رواية كريات الدم السوداء الفصل التاسع والعشرون بقلم زحل
_دوامي متعب ارجع
ميته جوع وانوب ابلش بواجبي بالبيت
ابوي وثابت عملهم كلش اطور وربي رزقهم عله كد تعبهم توني مكمله تنضيف
واريد ادخل غرفتي صاح عليه .
مولي: الله ينجحج ماتسويلنا جاي.
_تنطيني خمسه
مولي:الجاي مالج عيونه زرك
لو بي خدمه انترنيت لمدة شهر
ولج اطيب جاي بربع.
_هم صدك يله خوش الف
مولي:يعني من اطكج اصخونه
وتجين اضربج ابرة دفعين خمسه.
_ بسرعه تخيلت المشهد
مدري ليش خجلت .
هزيت ايدي ماعندك علاج غير
الابرة بس لا مفكر تضرب النسوان.
_لا حياء ف الطب مو هيج لوانه
فاهمها غلط. دروحي سوي الجاي
فتحتيلنا محاضرة
_ لحد ماكمل الجاي انه افكر
هذا بس لا يريد يضرب النسوان ابر خليت الاستكاين والقوري دخلت عليهم ابوي وثابت كاعدين يسولفون
وامي ضاربتلها صفنه مريم عينها للبلازمه .
ابواسعد:اي عشتي اجه بوقته .
مولي:ترى اخذت مني خمسه
يله سوت الجاي .
_رفعت راسي متفاجئه يااا شوكت.
ضحكو ابوي وثابت وانه احلف يجذب.
ثابت:مادام جذبت تنطيها الخمسه .
_كام مولي شال القوري .
مولي:اصلا خفيف راح اذبه
واسويلكم عشى
وكهوى وجاي وعصير .
_ابوي وامي بس يضحكون
صاح بي ثابت .
ثابت:اكوم اغسل راسك بي رجعه.
_نزل القوري وركض يم ابوي
يتوسل بثابت .
مولي:بداعت الحجي لخاطر هل شيبه
اطيح الفصل .
ثابت:حقير حته توب
بعد ماتتهم باطل .
_وهاي سوالف مولي الي مجمله بيتنا
اباوع لمريم ولا عبالك ويانه
شربو جايهم ومواضيعهم ماتخلص
فاجئهم مولي بسؤاله .
مولي:اكلكم صدك ابو رامي
عارض بيته للبيع.
ابواسعد: منين سمعت.
مولي:سيد صلاح كالي.
ابو اسعد:معقوله ليش .
_الفتت ابوي لثابت .
ابو اسعد:عندك علم .
ثابت:لا .
ابواسعد:شتكول لو .
_بسرعه ثابت هز راسه مأيد ابوي
بدون حته مايعرف شنو راد يكول.
ثابت:بس مااعتقد عدنا سيوله
تكفي .والله لو اياد يبيع بيته
وياخذه افضل مايجاورنا شخص
مانعرفه.
ابواسعد:توكل قبل لا يبيعونه
وبعدين نطرح عليه الفكرة .
وفيه:وشتسوي بي ترى بيتهم تعبان .
ابو اسعد:ينهد وينبني . ولو يعز عليه
ابو رامي يشيل لان خوش انسان هذا
عمر ماشفنا منه اذيه.
ثابت:مريم جيبي نقالي .
_كامت مريم بس ماعرف
ليش مزعوجه حته ماشاركتنا بحديث
اتصل ثابت بسيد صلاح اكد الخبر
بس نهى مكالمته ساله ابوي .
ابو اسعد:ها شيكول.
ثابت:ماعارضينه عند دلال بس حاجين بالمنطقه.
ابو اسعد:اعبر عليهم اتاكد .
ثابت:خاف فلوسنا ماتكفي
ونتفشل .
ابو اسعد:اخذ من محمد وشوف اسعد واياد بلكي جوى ايدهم مبلغ زين ولو اشك بااسعد عنده فلوس عله هاي
طربكته وسوالفه .
ثابت: عنده قبل كم يوم راد ياخذ سيارة.
ابو اسعد:تمام وانه احجي ويه اياد ولو زعلان عليه
وماردت اخابرة.
ثابت:ترى مشغول بدوامه هم عله كيفك ويا.
ابو اسعد: شريد منهم الله يوفقهم
بس اشتاقلهم .
وفيه:يمكن زوجته حامل امس خابرتها.
_حيل فرحنا هل خبر وبالاخص ابوي.
عفتهم مشغولين بموضوع البيت. وكمت ادرس
لليل واسمع هوسه وصوت الجرس
وكانو الشخص الي بالباب ماشال ايده من الجرس
طلعت تلاكه وياي ثابت طالع من غرفته متوجه للباب تبعته وابوي يصيح ورانا.
ابواسعد:شكو ياربي سترك .
_ضليت واكفه بالحديقه وثابت فتح الباب
مااشوف اله جبار وعلاء واسعد اخوي دخلو
ركضت للمطبخ لان بدون حجاب واستغربت
من دخلهم للصاله خرب شلون راح اعبر
ضليت محبوسه بالمطبخ .جريت الكرسي
قربته للهيتر وكعدت افكر شبيهم
نبهني صوت الجرس .بعد منو اجانه طلع مولي بدون ماينتبه عليه شويه ودخلت ام مريم تملخ بخدودها انخمش كلبي كمت اتلكيتها وعله صوتنا اجت امي .
وفيه:مانخلص من سوالفهم لحد مايقضون
علينا اسعد وعلاء .
_كعدن وحده تشكي للثانيه انتبهلي مولي .
مولي:وانتي شعدج هنا.
_اسكت تورطت طلعت ورا ثابت
وانحشرت هنا دروح سد باب الصاله
خلي اعبر .
مولي:سوي جاي .
_خرب هسه انه المن طلعت
خليت القوري .وهمه اصواتهم عاليه
وامي وام مريم ويه كل صيحه يلطمن عله
رجليهن بحركه .
وفيه:مافهمت بس التهديد
ام مريم:نايمن ودك تلفون جبار
كال هذا جواد شعده مخابر بس لاابوه مات
رد عليه ومااشوف اله جبار طفر بوجه لغرفة
علاء جرة من الفراش.
_ام مريم تسولف وامي كل شويه خازرتني
لان اباوعلهن حصرتني الضحكه. يعني كل عقلها
من ادور وجهي مااسمعهن .
ام مريم:فز علاء مخترع وابو شبعه كفخ
تالي كاله جواد يكول ناشرينك تصوير
عله الفيس .وبمكان موزين مدري شنو.
وفيه:صخام الصخمني .
ومنو ناشرة.
ام مريم:خابرو عله اجواد كالهم انحذف
مالحكت احفضه .
وفيه:اي خوش .
ام مريم:يا خوش .مودين رساله
لعلاء وهو مايدري يكول مامنتبه .
وفيه:لا مو مامنتبه بس كولي عنده الف نقال.
ام مريم:اي مدري شكد طالبين منه وكايليله
اذا ماتطينه ننشر التصوير مرة ثانيه.
_اجه مولي اخذ الجاي
سالته امي .
وفيه:هاا بشر شنو صار.
مولي:دزو عله عمي محمد .
_ضليت محتارة ابقه لو اروح انام لان وراي دوام
اجت مريم تفرك بعيونها . بس شفتها كمت
همزين اجيتي .دنكت بوست امها وردت عليه.
مريم:شكو
_خلي امي وامج يسولفن الج.
عفتهن ودخلت ادرس كملت
حضرت ملابسي وقتت النقال ونمت من التعب
ماحسيت عله المنبه كعدت عله صوت امي.
وفيه:ابنينه بعدج نايمه
السايق دك الباب كومي.
_فتحت عيني عبالي حلمانه
لحد ماصاحت بيه كمزت كبل جريت النقال
هاي ليش هيج .
وفيه:هو شنو اليش اكلها السايق بالباب.
_صفنت ثواني مالحك يمه قابل يبقه
مأخر الطلاب لحد ماابدل .فدوى اروحلج طلعي
كليله خل يروح .
وفيه:اكيد خلصتي ليلج بالنقال.
_هزيت راسي بعدم رضا امي حته اذا
نسيت الماطور مال الماي مشتغل تكول بسبب
النقال خو اذا قوري الجاي فار ونزل عله الطباخ
تألف فلم اول ماتبدي ياما ناس احتركت بسبب
النقال كمت وانه احجي غير بسبب هوستكم مانمت.
تلاكت وياي مريم عافسه وجها كوى صبحت
جريتها وانه متوجهه للمطبخ .
مريم:شبيج معوده .
_مادام فاتني الدوام عاد احجيلي خو
مو قهر وفضول هيج ضلم .
مريم:غير كون انه مفتهمه .
_معقوله ماعرفو الي دز الرساله
ونشر التصوير. زين شنو جان طلبه.
مريم:لحد ٣ بليل وهمه ماخلو واحد ماكلفو
تالي اياد كال حددنا موقع الرقم بس بعد
ماندزت الرساله نغلق النقال وهيج ماراح
نعرف وين.
_ليش الي اعرفه يكدرون يطلعون
صاحب الرقم من الشركه. بعدها ماراده عليه
ودخل علينا ثابت والضاهر سمع حديثنا .
ثابت:مو كل الارقام مسجله اكو ارقام بدون
اوراق يعني كلك .
_ضلينه وحده تباوع بوجه الثانيه
نقذني ابوي وهو يصبح. ردينا عليه.
ابواسعد:ها بنونه شو مارايحه.
_يابه كعدت متاخرة .
ابو اسعد:يله همزين عود انه ناوي اكلج
لاداومين اليوم .
_التفتت عليه بخوف .ساله ثابت.
ثابت ؛ليش يابه .ترى الرساله واضحه
خو مانغيبهالحد مايلزم صاحب الرقم .
ابو اسعد:للاحتياط،يعني الي يجازف ويسوي
هيج شي المفروض ينخاف منه .
ثابت:اصلا شغله زعاطيط ولا تخوف .
_باوع اله ابوي بشك .دنك ثابت متهرب من الاجابه.
للضهر اجه اياد بس العجيب مامهتم وخلصوها
مغامز هو وثابت كمنا نحضر بالغدى بعدنا ماصابين
واجه اسعد .استلمه ابوي من الباب.
ابو اسعد:لو انه لو سوالفك .
اسعد:ترى الرساله لعلاء يابه .
ابو اسعد:والي دزها لعلاء يجي يوم ويدزلك.
اسعد:كول ياالله حجي
و عملنا كلشي وارد بي.
ابو اسعد:مو كلت عينكم عله نفسكم
انتبهو لاتخسرون وضايفكم كافي طربكه.
_ضل ابوي يحجي عله اسعد وهو
يحاول يقنعه وتالي فجرها الوالد .
ابواسعد:اسمعوني زين .خاف عبالكم كبرتو
ومااكدر احكمكم . غلطانين .
اياد:كلمتك سيف عله ركابنا يابه.
ابو اسعد:خلص ترجعون تكعدون يمي.
_ضلو واحد يباوع بوجه الثاني.
اياد:اتمنى . بس البيت مايكفينا.
تعرف النساء ماتتراهم والغرفه بعد مو مكان
مثل قبل هسه بلازمه وثلاجه واستان اوتي
وحمام خاص .
ابو اسعد:وانه مو ضالم حته اكعدهن بغرف
واقيد حريتهن.راح اشتري بيت ابو رامي و ابني
الك انته واسعد وكل واحد بيته ونسيجهن
يصير الباب الرئيسي واحد شتكولون.
اسعد:افضل شي .
ابو اسعد:بس يمكن نحتاج مبلغ لان ثابت مسوك للمحلات وماجوى ايده سيوله.
اسعد:لا تفكر انه عندي.
اياد:وانه هم عندي كم فلس واكيد ينطينا فترة
لحد مانتكاتب بلكي بيتي ينباع.
_وبعد الغدى راحو الولد .وامي متعوده تنام.
بقيت اكف بالمطبخ طلعت مريم تعارك الهوى
هزيت راسي بمعنى شكو.
مريم:يعني الي يصير عنده فلوس يحاول
يطور نفسه يشتري بيت بمكان افضل
يسافر يتونس .
_اكيد بس وين الربط.
مريم:الربط ابوج راح يسوينا مثل بيت دواي
يسيج البيوت وتصير مثل الشقق .
_ليش هو بيت ابو رامي شويه
ترى مساحته كبيرة وبعدين وين الضرر
حلو نلتم كلنا وهيج مانحسس بالملل.
مريم:وين الحلو بالموضوع . فكري بغيرج
يعني ابقه طول عمري انه مالي خصوصيه.
_ مو طبعي ادخل بس كلامها يغث
رديت عليها. ترى ابوي مالازمكم
والفوك فارغ انتم نزلتو واذا تردين الحق
هو منو وياج شو بس انه ومولي حمامه بغرفته.
مريم:وهو مايقبل نصعد يكول
مابيه كل شويه نازل الدرج
ولايقبل يفارك ابوج ويطلع بيت وحدنا.
_معقوله لهاي الدرجه تغارين عليه
حته من ابوي .
مريم:لا اكيد بس شمعنى .ابوج مايجيب
اسعد لو اياد احسه عايفهم يتونسون همه ونسوانهم .
_التفتنا عله صوت امي واكيد سمعت نقاشنا.
وفيه:اول شي احنه مامانعين عزالكم
وثاني شي والاهم انو ثابت بالخطوبه اشترى بيت.
مريم:جا المن ضامه لاحفاده.
وفيه:لا جان ناوي بعد زواجكم بفترة تنتقلون
بس الي ماتعرفينه يامريم الرجال مايطلع من اهله
اله وهو عارف زوجته كد المسؤليه والثقه حته يأمن
سمعته وبيته بيدها .
______سلاسل _______
_ماصدكت طلع الباشا. بقيت اسولف
ويه سليمه
والهيها حته لاتحس بقدر.
سليمه:ولج ام اعطوب هذا صاحب الباشا
شلون صيده صدك لو كالو حاويهن كلهن.
_ دنكت الم بالصاله
وهيه مستمرة .
سليمه:دعوفين صيحي ام الشخاخ تلمهن.
_معوده شيرادلهن
اي ماعرفتي هذا شيشتغل.
سليمه:لا بس مبين طاك كلش.
بس ثكيل وراح يتعبني مايجي بسهوله.
_حجتها وكامت لغرفتها
شمرت الكلاصات بالسنك
وركضت لغرفتي افتر مثل البزون الي ماخذين
اطفالها فارغه الغرفه مكانها وحشه ابجي بعبرة
اريد اصرخ .كتمت صوتي بالمخده وين وصلتي
ياقدر بس كون خلصت من الشارع
واجاوب روحي. لو لازماتها النصافت جان جابنها
ولو رايحه لمديحه جا خابرتني
كل شويه اباوع للنقال احسب الوقت صارالها
ساعتين من طلعت ماكدرت اغمض
ولا استقريت لطمت عله وجهي شلون جازفت بيها
بس مابيدي غير حل لان خفت تنجن لو سليمه
تحرك كلبي عليها .
غمضت وانه اذكر قبلها بيوم دخلت لكيت المقص بايدها ولازه مقدمه شعرها همزين لحكتها اخذت وانه اباوع شلون كاصه كذلتها من الجذور متت قهر مسحت ادموعي وكمت لميت باقي الهوسه ودكيت الباب عله
سليمه صاحت بنزعاج .
سليمه:شكو .
_رديت
امثله الخوف والصدمه
لحكيني قدر ماكو وينج معوده
طلعت تفرك براسها
سليمه:شنو .
_جريتها وانه احجي بفزع
هسه كملت تنضيف الصاله ودخلت مالكيتها بفراشها
عبالي جوى الجربايه دنكت هم ماكو صفنت ثواني يله استوعبت دفعتني ودخلت للغرفه.
سليمه:شنو ماكو طارت لو حفرت الكاع.
_تحجي وادرو فكت الكنتور دنكت جوى الجربايه
صحت بيها شبيج كل عقلج يعني .التفت عليه جرتني من شعري دفعتها وخري هاي افلامج مو عليه
اكيد لهيتني من جان الباشا هنا وطلعتيها.
سليمه:انعل ابوج لابو الباشا .اليوم اخلي النصافات
يمثلن بيج. احجي وين وديتيها.
_دروبج مو عليه وين اوديها وانتي قافله الباب
ترى المفتاح عندج وانتي الي فتحتي من اجه الولد
ومن طلعو انتي الي قفلتي .
سليمه:ولججج صعدي للبيتونه
خاف بالسطح.
_عفتها وركضت وصلت نص الدرج
ونزلت اصيح ماكو ماكو باب البيتونه مقفول
كعدت عله القنفه وتباوعلي بشك دموعي
ضلت تنزل مثل المطر لكيتلي سبب ابجي بي.
سليمه:معقوله يعني حته لو طفرت من السياج
مستحيل تطلع الشارع . ومايشوفونها ولد الصعده
لو النصافات كووومي جيبي نقالي .
_شمرت عليها النقال خابرت لحربا .
سليمه:بت راضي ماهيه . لا النغله.
انبشو الصعده اكيد ماطلعت الشارع.
_سدته والتفتت عليه هزيت راسي ها.
سليمه:جيبي نقالج .
_اطيته الها ودخلت لبست صايتي وطلعت.
سليمه:وين موليه .
_خو ماابقه كاعده اكيد تخاف يعني
حته لو ضامه روحها بمكان بلكي من تشوفي تطلع.
سليمه:اذا ماطالعه الشارع هسه يلكونها
اريد اكسر رجليها ام الشخاخ .وانتي رجعي
ماعايزة مصايب .
_اطيني نقالي اخابر مديحه.
سليمه:سدييي حلكج لااكوم اشكه
بت التالف اذا طلعت النهار ومالكيتها
اسلمج لحربا .
_خايبه انتي تلعبين كل عقلج اسكت
اذا مارجعت اخلي الحكومه تحفرلكم كبور جماعيه.
سليمه:ندفنج بيها انتي وابوج .
_ضلينه للصبح هيه تحجي وانه ارد
انخبص الشارع . تالي خابرت محابس.
سليمه:من كتلكم ماريدهن بليتوني .
_ قبل مايجي كمت للغرفه .
شويه واسمع صوته يحجي ويها.
محابس:شلون طلعت وانتي قافله الباب.
سليمه:ماادري .
محابس:حزورة شنو . اكيد مرتبه للموضوع
خلص تولي عليمن مخبوصه .
سليمه:واذا داعوني بيها .
محابس:كليلهم شردت .
_احس نار وشتعلت بصدري وادري بي يتعمد
يستفزني لان ماطلعت . بس ماكدرت اسكت
فتحت الباب وانه احجي . خو تكلهم حركتها
مثلت بيها ردت ابيعها لفيلق . ولك شنو انتم
التفت عليه وهو يبتسم .
محابس:اي جا كلتي للباشا .
_مالحكت ارد عليه دك نقال سليمه ردت بقلق.
سليمه:ها بشري شنو .يله يله .
_سدته وهيه تجر محابس للدرج.
سليمه:اركض الباشا اجه .
_استغربت شعده جاي.
ركض محابس وقبل مايصعد التفت عليه وكال.
محابس:الضاهر مرتاح بزواجه منج بحيث
مايكدر يفاركج .
سليمه:دروح معود .
_باوعتله بقهر .هزيت راسي اي
ودموعي تصب.
محابس:كليله خل ياخذج منا
لان وجوده خطر بينا.
_حجاها وصعد يركض
درت وجهي لسليمه . شعده جاي .
سليمه:شمدرينييي . امشي غسلي وجهج
هسه يكول شبيكم . انه شاكه احد من الشارع
جاي يوصله اخبار لان هاي ثاني مرة يجي
ويه دخلت محابس علينا.
_توجهت لحمام غسلت وجهي
وهيه راحت للباب .ومدري ليش انعصر كلبي
من سمعت صوته .ونبرته مبينه مال واحد معصب.
الباشا:ام الحب لعبتي بعداد عمرج.
_دخل وسليمه ورا وجهه ينطي الوان
باوعلي بعدم اهتمام وكعد مخلي رجل عله رجل
حته ماسلم . من الخوف احس احتريت
وكل ضني عرف بمحابس جان هنا
رفع راسه باوعلي بلعت ريكي وحجيت بصوت
واهن شنو صاير صفن ثواني ورد بهدوء .
الباشا:دروب الداكوكات حافضهن بدون لف ودوران
الجن ساعه اريد النقال والشخص الي صور بي .
_احس كلبي يريد يطلع من صدري .
عرفت سواله عن النقال الي اخذته قدر
نبهني من صفنتي كلام سليمه .
سليمه:باشا يانقال ياشخص
ماجاي اعرف عن شنو تحجي فهمني.
_هز راسه بتمام وعدل كعدته منتجي
عله مسند القفنه خله نقاله بصفه وسحب جكارة
من باكيته شعلها ورجع الباكيت والجداحه يم النقال
حركاته مستفزة بحيث احس يلعب بأاعصابنا نفخ الدخان بتجاه سليمه ورد .
الباشا: راح اسوي نفسي مصدك
واحجيلكم . ولو مالي خلك.
_هزت راسها سليمه بأايجاب .
الباشا:ماعندي مجال اشرح لان اكيد انتن عدجن
علم بس نصيحه لوجه الله تسلمني الشخص والنقال
لان اذا شلت ايدي من الموضوع . علاء يحرك الصعده
عليكم ف اذا وحده منجن خلي تحجي وانه اسد السالفه .
_قلقي عله قدر مخليني اتلعثم ومااعرف ارد
ضليت ساكته .وسليمه نكرت الموضوع .
سليمه:صار شكد تعرفني باشا
شلون تتوقع اسوي هيج.
الباشا:ام الحب لحد الان جاي احجي
بطيب . شوفي انه مو غشيم . ليش ماتهمت محابس
لان الشغله مال واحد غبي ماعتقد واحد من شباب الصعده يسويها ويجازف . فالافضل تحجين الصدك.
_كمت وانه احجي و شنو الفايده
اذا صورنا يعني مافهمت الموضوع وبعدين انت
تعرف هاي الفترة علاء كعدته ويه بت نوشه .
الباشا:بدون لغوى وتحليل غبي
حددنا موقع الرقم الي اجت منه الرساله
وطلع براس الشارع قريب عله النجارين والوقت
الي وصلت بي الرساله يثبت واحد منكم لان
جان ليل .
_كمل كلامه ومد ايده اخذ نقاله
وجكايرة وكام طفرت سليمه لزمته .
سليمه:عله بختك .
شنو عداوتي ويا علاء بالعكس احنه مستفادين.
ومو من مصلحتي اسوي هيج بس اطيني مجال
لليل وانه اقررهن الك وروح امي اشلع منهن لحم
لحد ما يعترفن .
_ضحكت التفتو عليه
يعني كل عقلج هنه منو شو تحجين وكأنو
عدنا مجموعه بنات ترى الكاعد يم علاء انتي
وبت نوشه .
سليمه:بالنسبه الي صار سنين
يعرفني الباشا.
_وانه مالي مصلحه اسوي هيج.
هز ايده بأاستهزاء وطلع
قفلت الباب ورا ورجعت بوجها لغرفتها
شكد قلقه وخايفه عله قدر بس قهرتي
من تصرف الباشا اضعاف . اذن ماغلطت من
ضميت عنه وجود قدر وموضوع النقال
احسب الدقايق عيوني مابطلن مدري ابجي
عله روحي لو عليها ضليت حايرة معقوله لزموها
ولد الجده لو ضمنها النصافات كعدت اديه عله راسي
طلعت سليمه من غرفتها وبدون مقدمات هجمت عليه.
سليمه:وروح امي اعلكج باب البيت
واسويج عبرة لمن اعتبر وين النقال .
_تحجي وتعت بيه
رديت مغشمه نفسي . شبيج كل عقلج
ا شنو الغايه لو اريد جا صورت الباشا.
سليمه:ولج ياباشا.
نقالي الثاني بغرفتي.مالكيته.
_مادافعت عن روحي
ضلت تكفخ بيه تجيبني منا وتردني منا
لحد ماتعبت وعافتني ماتحركت من مكاني
كعدت كبالي والخوف واضح عله وجهها.
سليمه:شسوي ولج يهجم الصعده عله روسنا .
معقوله اختج النغله خذته.
_رفعت راسي اباوع عليها
يعني مافهمت هسه انتي ادورين
لو الباشا لو شنو . ليش ماتحجين الصدك .
سليمه:بت الكلب شحجي.
_انتي وبت نوشه لعبتنها
لان محد اله مصلحه يسوي هيج.
سليمه:شنو مصلحتي
اكيد هاي سوالفج وشردتي اختج لان
تعرفين راح تنكشفن.
_ ضلينه وحده ترد عله الثانيه
ردت اكوم واندك الباب . كمزت سليمه تتلفت.
_راحت هيه للباب وانه ركضت لغرفتي
وينج ياقدر . معقوله راحت لبيت فاروق
لا ماهون عليها تعوفني .ماهمني اصياح النصافات
بس خاف ادك عليه وتلفوني عد سليمه .
بقيت مثل الي تطلك وكل مااسمع صوت الباب
اكمز لليل وماكو خبر سيطر عليه الخوف
طلعت لكيتها بالصاله .باوعتلي بحيرة.
سليمه:راح اتخبل ولججج وين وديتيها
مو اذا لكفوها بالشارع تضيع.
_ضاعت وخلص الامر
وهذا كله بسببج ،
سليمه:مطلعتها انه بت التالف.
_لا بس جرمتي بيها
وادعي كون ماتروح تشتكي .
سليمه:هههههه خاف عبالج انه انضر
ترى ابوج الي اغتصب امها . فضل مني لفيتها.
_حيري بسالفتج شلون تخلصين
نفسج من علاء.
سليمه:ماعنده دليل ضدي .
_كامت لغرفتها
وانه ضليت كاعده بحيرة . بس لو اطمن عليها
حته لو خذلتني وراحت لبيت فاروق اهم شي
تكون بخير . ضاك صدري دنكت ودموعي تنزل بقهر
خلص اليل لا قدر ولا الباشا اتصل تعبت وغلبني النعاس تمددت بمكاني . بين الحلم والواقع اسمع صوت فكيت عيني سليمه واكفه عله راسي .
سليمه:ميته بت الجحش .
_كمت متوجهه بغرفتي
صاحت بيه .
سليمه:وين موليه مو احجي وياج.
_رديت بملل شتردين
سليمه:هاج نقالج الباشا كل ساع يخابر.
_كليله لا يخابر بعد
حجيتها ودخلت للغرفه قفلت الباب . ضلت تصيح مارديت عليها شمرت روحي عله الجربايه وبجيت بعبرة وين راح يصفى بيه الوكت ليش مالي حض
حته اختي هم خذتلني . تعده اليوم الثاني والثالث
وقدر مامنها خبر والباشا مل يخابر مارديت
لزمني صداع اريد افتح عيوني مااكدر
صاحت سليمه .
سليمه:ولج اطلعي خلينا نشوف
وين ولت اختج.
_طلعت اجر بروحي خليت القوري عله النار
متعاجزه اسويلي شي اكله .كعدت مسنده راسي
عله اديه وعقلي يجيب ويودي وهيه مستمرة تحجي
سليمه:شتكولين وين راحت.
_لو ادري جا لحكتها. بعدها ماراده عليه
اندك الباب كامت وهيه تحجي.
سليمه:بلكي لكوها .
_مالحكت اعبر للغرفه
لزمني مرجعني للصاله كعد وكعدني بصفه.
رغم كارهته بس شكله يجبر المقابل ينضرله
انتبهت هو دوم يلبس كاجول وحذاء رياضي
مرتب لدرجه تحير كل مرة يجي بساعه
شكل عطرة مميز . نبهني من شرودي سؤاله.
الباشا:تجاهلين اتصالي.
_رفعت راسي اباوع اله عكد حاجبه.
واردف بقلق .
الباشا:شبيج انتي مريضه.
_اي راسي حجيتها
وكمت متحججه بس خل اجيبلي
حبايه مال راس.
الباشا:خاف ماماكله هذا هبوط.
_دخلت للغرفه طبكت الباب
وجريت السركي.ضل يصيح .
الباشا:افتحي الباب لا افلش الغرفه
عله راسج.
_لو تبلط الصعده. تحلم اباوع بوجهك.
وياريت اطلكني .
الباشا:سهله ادللي . بعيني اعلمج.
_ههههه ترى خفت
كمت ارجف .
الباشا:بهاي حقج فعلا ماخوف لان ماحاسبتج
عله اغلاطج تمام . ابقي قافله الباب .
_ولا جني اسمعه
ضل هو سليمه يحجون ماركزت وياهم
حضرتلي صايه وبدلت ملابسي
كلت بس احصل فرصه اروح لمديحه.
صاح مسمعني .
الباشا:ام اعطوب بس خل افرغلج
هينه .
_دفر باب الغرفه وراح
شويه وسليمه صاحت عليه.
سليمه:طلعي سويلنا لكمه احس
ضغطي هبط.
_ماجادلتها سويت اكل لان انه هم جعت
طول مااحنه كاعدين هيه كل شويه تكرر نفس
السؤال.
سليمه:معقوله راحت لبيت فاروق.
_وين ماراحت الله وياها .
سليمه:مامقهورة عليها .
_انقهر عله روحي . محد يستاهل .
سليمه:ليش هيج سويتي ويه الباشا.
_بعدني ماسويت .رفعت راسها تباوعلي
نزلت كوب الجاي بالصينيه وانه احجي .
الي مابيه فايده الي المن ضاله ويا
الباشا تبرة مني بأول مشكله سلمني بيدج.
سليمه:ترى من اول يوم كتلج هذول حدهم
ويانا ساعات لا يووكفلج بمشكله ولا يعترف
بيج زوجه.
_هو مامعترف بزوجته الاصليه.
سليمه:عله كولتج هذا ماله عزيز
صاحب كيف ومزاج .
_حاولت اسايرها حته اكدر اطلع
بس ماقبلت . والعذر الباشا مايقبل .
_____قدر_______
_يمكن الخوف زيد الم حلكي
اريد ابلع ريكي مااكدر رفعت البوشيه
وانه اسحب النفس كوى . بسبب كلامه الي اكد
معرفته بوجودي شسوي. افتح الباب واشمر روحي حاولت ماانفتح كلت يجوز من يوكف ينفتح
ضليت حاصرة نفسي بضهر الكشن .وهو تلفونه ماسكت .
!!يابه واصلت شبيك مو خردلتني .
_مسافه مو قليله
وكفت السيارة مقابيل بيت
تهيئت لطفرة خليت ايدي عله الباب
حاولت افتحه ماانفتح رفعت راسي
بحذر اباوع شو مانزلو شويه وسمعته يحجي .
!!ها وينك انه بالباب اطلع اخذه .
_عرفت يحجي بالنقال
دنكت صار ضوى داخل السيارة
وشخص يسلم بطريقه ضحك.
!!حمد الله على السلامه.
!!دنزله معود .
!خرب ضميرك شنو شارب
حته هيج فاقد
دتعال انته شنو صار وياك .
_رد عليه بملل .
!ماكو شي يله من يصحى خابرني .
_غمضت عيوني بحيرة
ماكو غير حل بلكي نعبر عله سيطرة
احاول الفت انتباههم وينزلوني . انيت بالم بسبب الطسه اباوع ضلمه ولا طير بالشارع وين رايح هذا
دك كلبي بخوف معقوله يريد ياخذني مكان مكطوع
شو دخل بين البيوت وبسبب الطسات عرفت المنطقه
مامبلطه نزلت دموعي اللهي رحمتك جسمي يرجف
اطرافي ثلجت وكفت السيارة حسيت بي نزل
من طبكت الباب ادنيت اباوع ماهو معقوله الله عمى
عني بس شلون طابك السيارة هيج بحيث لازكها
باب بيت مدري شنو ماشوف بس الباب حديد
وكلش جبير خرب الحظ
اسأل واجاب روحي مخليه وجهي
بالجامه اباوع بتركيز
كمزت من انفتح الباب طلاقتين ضليت اتلفت
ردت اعبر للكشن الامامي والضاهر حس بيه
تقدم بسرعه فتح باب السيارة.وبصوت مرعب
كال .
!!انزلي .
لا اكدر اصرخ احس روحي انسحبت
اشر براسه انزلي لزمت العلاكه بقوى وهو مركز نضرة
عليه عدلت نفسي بنفس الايد الي بيها العلاكه لزمت
طرف صايتي وتقدمت عليه ابتعد مسويلي مجال
انزل طفرت عدلت روحي
وانه ناويه ادفعه واركض شلت راسي
واكف يقفل بالباب التف بحركه سريعه
تقدم لزمني من ردني شهكت .
!!!اشششش،بدون لغوى.
_ حاولت اتملص منه كفخته بالعلاكه لزم ايدي طبكها ويه الثانيه لولاههن ورة ضهري . وكفت وانه احاول اثبت رجيله بالكاع طاحت العلاكه ونيت اريد اصرخ بس الم لساني موتني جرني يسحل بيه مثل الطلي .
!!اردكي .لا تعبين روحج
المنطقه مابيها ناس.
_دفعني كدامه حاول يلزم اديه بأيد وحده
انوب البوشيه الي خنكتني
ونيت اريده بس ينتبهلي رفعت راسي
اباوع وين يريد يدخلني . طلع مفتاح من جيبه
وفتح باب خشب مبين مدخل البيت منه مااهتم
لحركتي العبثيه وانه اتملص منا ومنا جأجأ بملل .
!ج ججج
_دفعني بداخل صاله كلش واسعه .
اندار قفل الباب زحفت للحايط
سندت ضهري عليه .وكل ضني راح يحاول
يكومني لو يسالني استغربت تصرفه ماجنه يشوفني
دار منطيني ضهره تقدم فتح الاضويه وشمر المفاتيح عله ميز موجود بنهاية الصاله
مشطت المكان بنضرة سريعه درج ضخم
متوسط الصاله عله اليمين بابين مسدوادت
الجهه الثانيه مطبخ هذا موبيت
يمكن دائرة التفتت اباوعله دخل لوحده من الغرف شويه وطلع مخلي خاولي عله جتفه بلعت ريكي شيريد يسوي اكيد يعتدي عليه .لا ونوب راح يسبح . حجه بدون ماينضرلي .
!لا تحاولين لان البوب مقفله .
_تشخصت عيوني عليه
عافني بصدمتي وراح استغليت دخوله للحمام
بسرعه توجهت للميز .اريد اخذ المفاتيح اباوع بس
بصمه مال سيارة نقالات ثنين وجكاير وين خلاهن
انه شفته شمرهن هنا ركضت للباب اعت بي مقفول
حسيت بخطواته التفتت بخوف عجيب حته ماصاح بيه ولا جنه يشوفني. يتحرك بهدوء مستفز كعد عله الكرسي الي بضهر الميز ينشف بشعره وكل شويه يرفع راسه يباوعلي كام شر الخاولي عله محجر الدرج
تقدم ناحيتي شهكت بخوف التفتت يا باب اقرب
حته ادخل وقفله. ماكدامي بس المطبخ بابه مفتوح والغريب هو ضل يباوعلي وكانو يريد يعرف وين راح اتوجه ركضت بحيل مهدود دخلت ولزمت الباب طبكته
صاح مسمعني .
!!مابي قفل باب المطبخ.
حسيت بخطواته قريبه دفع الباب ودخل
ضليت واكفه بحركه سريعه جر البوشيه
كعدت ايدي عله راسي .وهو واكف بصمت طكت روحي لا هو سالني ولا عايفني باوعتله دار وجهه خافي ضحكته نزلت دموعي ادري يضحك لان مقدمة شعري مزينه كنبص كبالي وسالني .
_منو انتي .
رفعت اديه اغطي راسي اريد الكلمه تطلع ماكو الم الساني خوفي منه ونيت وعيوني جر ايدي حاولت افلتها منه قوى قبضته وركز نضرة عله اثر الوشم
غمضت بقهر احس الشهكه فتت روحي وكأنو نبهني . سحبت ايدي منه رد عاد سؤاله .
_منو انتي ؟
_ضغطت عله الالم ورديت بااحرف متقطعه
عله امل يفهم كلامي اااا نه . رجع سحب ايدي
_هذا اسمج .قدر
_هزيت راسي اي .
_رفع راسه ونفس الابتسامه مرسومه عله وجهه
رد بس ماعرف شنو الي كاله شعر لو اغنيه فصحه.
_أجميعُ من يولد في تلكَ الليلةِ جميلُ
آم انتِ الوحيدة التي ابدعَ الخالق بحسنِها.
_مد ايده للشال شمرة عليه
لفيت شعري كام وهو يحجي.
_كومي يابه غسلي ملابسج مطينه .
_باوعت اطراف صايني مطينه
بسبب كعدتي بصف السيارة من جانت بشارعنا
انيت منبهته اريد افهمه التفت عليه.
اشرتله اريد اطلع .
_عيني خير يابه يصير الصبح وانه اوصلج وين ماتردين كومي الكاع بارده وانتي مبلله .
_هزيت راسي لا .
_ترى ماخاطفج انتي اقتحمتي سيارتي
غير اعرف منو انتي منو دازج عليه .
_رفعت اصبعي ليفوك ااشر وجان قصدي احلف
وعجيب شلون فهم حركتي . رد بثكل.
_اها قصدج والله .
_هزيت راسي اي واشرت عله نفسي
نافيه معرفتي بي.
_وهاي لغه جديده لو انتي خرسه .
_صفنت وكأنو اجت الفكرة عدله اي ابقه ملتزمه الصمت حته يعوفني. يباوعلي
بمكر رجع بخطواته متوجه عليه .
_لا تعبين نفسج لان شكلج
مايوحي بأنج خرسه.
_بلعت ريكي وسحبت طرف شالي
خليته عله حلكي احاول اتحمل الالم
ثنه رجليه وكعد كبالي وترني قربه مايفصلنا
غير سنتيمات كتمت نفسي بسبب عطرة الي
ممزوج بريحة الجكاير . قرب وجه وعبالك يريد يفحص عيني
_درت وجهي بتوتر ودموعي نزلت بعبرة.
سحب وجهي انيت بألم ولزمت ايده ضل ضاغط فكي اشرتله عله حلكي وانه احاول ابعد ايده حس بيه متألمه ابتعد بسرعه فكيت حلكي وانه اعصر طرف الشال فز متقزز دنكت وادري بالحرك واصل مرحله بالاتهاب كام وهو يسال .
_هاي شبي حلكج .
_خليت ايدي بالكاع وكمت بتعب
طلعت للصاله وهو وراي يكرر السؤال.
_مو جاي احجي وياج شبي حلكج.
هذا حرك لو شنو .
_بدون ماالتفت هزيت راسي اي
تقدم بخطوات سريعه لزمني .
_بس لحظه فهميني منو سوى بيج هيج.
_اشرتله افتحلي الباب.تجاهل طلبي
وتقدم للميز سحب نقاله مااعرف بيمن يتصل
ضليت واكفه اريده يخلص مكالمته بس كلامه
خلاني اايس انو يعوفني .
_وين انته تمام تروح للصيدليه تجيبلي
مطهر حروق علاج علاج كامل مال حروق
مو تتأخر .
_مااعرف شنو رد عليه الشخص
وخلاه يبتسم . وقبل ماينهي مكالمته
صاح بي .
_دمشي لا تلح .
_شمر النقال والتفت عليه اشرتله
عله الباب . تقدم بثكل لزمني من ايدي توجه بيه
للتخم الموجود كعدني وكعد تاركه مسافه بينه .
_كعدي يابه واسمعيني
يجوز خايفه مني وحقج بس اطمني
عندي خوات واخاف الله بيهن
وثاني شي غيرتي ماتسمح اعوفج اطلعين
هيج وقت .
_رغم صوته الخشن بس
يحجي بهدوء .
_دخلتج لسيارتي بهل طريقه اعتبرها دخلتي بيتي اتحاميتي بيه صح المكان الي صعدتي منه معروف
بس مايمنع اسمعج يجوز مخطوفه لان كل شي بيج يثبت متعرضه للتعذيب وبطريقه بشعه .
_دنكت امسح بدموعي
وهو مستمر يحجي.
_ويجوز احد اعتده عليج و شمرج هناك او شارده من احد البيوت الي بالمنطقه فلا تستعجلين انداويج ونفهم منج شنو سالفتج والله وياج .
_قطع حديثه صوت النقال تفاجئت تجاهل الاتصال
وتوجه للباب فتحه وطلع شويه ورجع ويا ولد شاب
تفاجئ بوجودي ضل واكف ونضراته تتنقل بينا سلم بثكل .
!السلام عليكم.
_ ضليت مدنكه . رد عليه .
_وعليكم السلام ورحمة الله وبركاته
تعال يابه البنيه ماتحجي ويمكن بسبب
حرك بالسانها .
_نزل الجنطه الطبيه ورد عليه.
_سهله اكيد شاربه شي حار.
_ رفعت راسي
طلب افتح حلكي بس شافه نز
وبسبب تصرفه عرفت العلاج مو هين.
حس بيه خفت حاول يطمني
_سهله بس لازم انضفه لان ملتهب.
_اي يله بلش .
_شبلش غير تلزمها الي
مو يراد تنضيف عميق.
_لا بدون ماالزمها واذا تخليها هيه
تنضفه بس اشرحلها .
_بعد الولد وهو يشيل جنطته .
صاح بي .
_ها شو جنك ماراضي
اشتغل لاسحلك .
_الغالي.ماتعرفت عله حضرتك
_رد بثكل .ابو حيه .
_هذا اسم الدلع .
_خزرة ابو حيه تحمم ورد.
_اخوك المضمد مؤمل ويلقبوني مولي .
ابو حيه:حصل النه الرعب اخ مولي .
_عكدت حواجبي والولد ابتسم
ابو الحيه:فضها شلون تنضف السانها.
مولي:والله يا ابو حيه السان ماينضف اذا .
_تقدم عليه ابو حيه ابتعد مولي يضحك.
مولي:يابه شدعوى معصب خلي روحك رياضيه
حته المريض يسترخي . يله بسم الله اختي
تحملي هو صح راح ينعل اووو قصدي تحسين بالم
بس لازم انضفه وان شاء الله مابيج غير العافيه
تعال ابو حيه اشبكها .قصدي الزمها
_مالحكت اكوم لزمني ابو حيه قيد اديه بحذر
ومولي عصر فكي بقوى اضطريت امد الساني
احس روحي طلعت طعم المعقم خنكني
وهو مستمر عبالك يفرك جوته مو لسان دم ولحم
اخر شي اذكرة نضراته الي كلها اسف غمضت
مااعرف شكد مر وقت فزيت من الالم وبردانه
ارجف احس رجليه ثلج
بسرعه تلمست حلكي لعبت نفسي من كميته
المرهم الي بي ضلمه بس ضوى المطبخ مشتغل
ماكو احد اباوع بنفس مكاني عله القنفه ومغطايه بطانيه بس الصاله بارده كمت وانه ارجف وين راحو
معقوله عافوني توجهت للباب جربته مقفول .
رجعت اتلمس الحايط شغلت الضوى
وتقدمت للميز اخذت اكلنس مسحت حلكي
الم خاف وبسبب المرهم لساني صاير ترف يعني
اكدر احجي همزين التفت عله صوت خطواته .
ابو حيه:ها يابه حمد لله على السلامه.
_هزيت راسي . تمام . رفع حاجبه
معترض عله تصرفي .
ابو حيه:هاي شنو بعدج ماتكدرين تحجين.
_ههمت امممم . عافني وتوجه للمطبخ
شويه وطلع بيده عصير مخلي بي قصبه
قدمه الي .
ابو:حيه اشربي حته تاخذي علاج
ترى السانج ملتهب والمضمد راد ينطيج ابر
بس كتله بدلهن بكبسول افضل .
_اخذت منه العصير وكعدت
وهو كعد مسافه عني.
ابو حيه:شلون صرتي .
_هزيت راسي تمام.
_كام وهو يستغفر توجه للحمام
شويه وطلع يعدل بردان التراك
ضليت مركزه ويا معقوله توضه
نبهني صوت الاذان بنقاله تقدم
لغه الصوت ودخل للغرفه
نزلت دموعي صار شكد ماصليت
وفترة وجودي يم سونه ماسمعت اذان تحسرت
اكيد ضل بالها وقلقت عليه .لازم اطلع منا اذكرت العلاكه خرب طاحت مني بالحديقه مر فترة مو هواي وطلع ابو حيه سبحته بيده.
ابوحيه:محتاجه شي جوعانه .
_هزيت راسي لا وتوجهت للباب عكد حاجبه
اشرتله اريده يفهم .
ابو حيه:يابه مافهمت شنو تردين .
_تقدمت عليه تراجع بخطوات مبتعد عني
تعديته وعبرت للميز ادور قلم مالكتيت شلت النقال
اشرتله افتحه. اخذه مني فتحه ودخل عله الملاحضات وانطانيا .كتبتله علاكه طاحت برة من جريتني .
ابو حيه:وليش هل فرة خو كولي
غراضي طاحن بالكراج .
_فكيت عيني . اردف بملل .
ابو حيه:يابت الناس احجي خليني اساعدج
شوفي الوضع المريب الي حضرتج بي واثار التعذيب
تخليني اشك انج مسويه جريمه مااكدر افتحلج الباب
واكلج روحي لان اكيد الشارع الصعدتي منه بي كامرات.
_اشرتله لا مابي .تقدم عليه
و كل مايتقرب خطوى انه ارجع
لحد ماوصلت للميز كعدت عله الكرسي
وهو افتر كعد مقابيلي .سحب جكاره من باكيته.
ابو حيه:نشوف وين توصل وياج
ست خرسه..
_ينقر عله الميز بطرف اصبعه
والجكارة الي مرة يخليها ورا اذنه
ومرة يخليها بين شفايفه لاهو شاعلها
ولا هو ذابها تصرفاته توتر عيونه متشخصه
بوجهي ضليت امثل عدم القدرة عله الكلام .
ابو حيه:تمام يعني هسه انتي خرسه.
_هزيت راسي اي .
دفع الكرسي وكام متوجه ناحيتي
خليت اديه عله وجهي جرهن وتقرب عليه بحركه مستفزة وكانو يريد يبوسني دفعت و بجيت .
ابو حيه:عود كلت مادام خرسه
اسوي الي اريد لان ماتحجين .
_احجي .
ابو حيه:والضيف اله ٣ ايام .
_حجاها وطلع
رجع شمر عليه العلاكه .لزمتها وانه حايرة
شلون اطلع بدون مااحجي شي كون يعوفني .
نبهني صوته .
ابو حيه:المكان مابي غيرج الثلاجه بيها
اكل وكل شي تحتاجينه . وانه رايح ان شاء الله
اجيج باجر .
_كمت بخوف لا الله عليك خليني اطلع
ماقصرت وداويتني ربي يحفظك.
ابوحيه:ادعيلي الله يقدرني ياقدر واكدر اساعدج
يله رايح . لاتخافين محد يجي اخذي راحتج .
_مااطاني مجال احجي طلع وعافني
محتارة كمت للحمام نزعت صايتي غسلت اطرافها
اباوع بالمرايه منو هاي معقوله انه شصاير بيه
نزلت دموعي وينج يايمه تعاي شوفي حالي
المن التفت لسونه الي الله يعلم اشسوو بيها
خفت المكان بي كامرات خلصت النهار اصفن
لليل وهو مابين كلبي نار عله سونه
طفيت الاضويه وتفحصت السقف والحيطان
ماكو كامرة فتحت اول باب غرفه بيها كبت متروس فايلات وسجلات التفتت اباوع ميز زغير وعليه لافته
شركة ..... استيراد وتصدير
فتت الغرفه الثانيه جربايه ام النفر
وكنتور زغير وتعلاكه مال ملابس وميز مرايه
لفت انتباهي مصلايه مسفطه بترتيب وفوكها تربه وسبحه صفنت . ابو حيه شيصير من الباشا .لان ماكو ماكو مقارنه بينهم .
جريت المصلايه فرشتها وركضت
توضيت اصلي ودموعي تصب
احس بروحي ارتاحيت اللهي انت تعلم بحالي واكيد عاذرني .رجعت كلشي لمكانه سديت الباب وطلعت
الوقت مايمشي غفيت عله القنفه للصبح
كعدت الوب لازم اطلع مستحيل ابقه هسه
سونه ميته خوف . نبهني صوت الباب دخل
بكل رزانه عجيب شنو هل هدوء لبسه انيق كلامه
موزون كل تصرف منه يثبت انو شخص محترم
بس الي خلاني مااحجي وماطلبت منه يساعدني
معرفته بالباشا . سلم وهو ينزل علاكه اكل.
ابو حيه:السلام عليكم شلونج اليوم.
_الحمد الله حجيتها وكمت .
ابو حيه:استريحي يابه الله يرضى عليج.
_كعدت وانه احجي
الله يوفقك خليني اطلع .
ابو حيه:كتلج ٣ ايام ومن بعدها اسالج.
_صدكني ماعندي شي ولا راح اضرك.
مااكدر ابقه لازم اروح هيج انته تسببلي مشكله.
كام متجاهل كلامي ركضت ورا خزرني وطبك الباب
رجعت شلت الاكل خليته بالمطبخ وافكر بعذر سالفه
اقنعه بيها حته اطلع يربي شنو هل لزكه وبسبب الي شفته يم سليمه مالي ثقه برجال يله باجر ٣ يوم عله كولته تخلص ضيافتي ولحد ماطلع النهار انه كاعده
وبس اجه كمت بدون مارد السلام كتله مشكور عله حسن الضيافه ورحم الله والديك افتحلي الباب .
ابو حيه:يابت بنت الناس حاير
منطقج مايدل عله انتمائج لهذاك الشارع احجيلي .
_اخي ماله داعي لو محتاجه مساعده اكلك .
هز راسه وهو ينضرلي .
ابو حيه:تمام ارتاحي اليوم وان شاء الله باجر
اوصلج للمكان التردي .
_لا وين توصلني انه شارده من اهلي
واريد اروح لخالتي . رفع راسه باوعلي بعدم
تصديق واردف .
ابو حيه:اذن مااكدر اطلعج .
_ليش؟
ابو حيه:لازم اروح لاهلج بلكي اخذلهم سيد خير
نشوف رد فعلهم هل يتقبلونج خو مامفكرة الشغله هينه يجوز اخوانج يقتلونج.اي جا الي تشرد من اهلها وتنزل راسهم .
_هو يحجي وانه تذكرت كلام امي من كتلها نروح لاهلج يعني جان حجيها صدك نزلت دموعي بقهر
اووف لو يرجع الزمن .
ابو حيه:يكولن غلطت الشاطر بالف .
_بجيت وانه الطم عله وجهي
ماغلطت بس دفعت ثمن غلطة غيري
باليله ويوم انقلبت حياتي جحيم شلون وليش
هم مو ذبني ولا بسببي .
ابو حيه:وهيج انتي القيتي عليه الحجه
بعد مااكدر اعوفج اطلعين احجيلي يابه
خل اساعدج .
_احس خلصت طاقتي وفاض بيه
تهسترت افتر مثل الضايع ابجي بصوت
وهو ينضرلي بهدوء وكأنو يكلي ابجي طلعي شكو قهر وصرخات كتمتيها . التفتت عليه ماعدي شي اسولفه
لان انه نفسي مااعرف منو وشلون وين اروح وعند منو اشتكي ايي لا تباوعلي تخيل تكعد من نومك تلكه نفسك مو انته لا والمصيبه ابوك الي داريته بمرضه وحزنت لموته يطلع مو ابوك والاخ وابن العم
يطلع غريب هاي انه .
ابو حيه:شكد الله يحبج بحيث
خله هل محن كلها بحياتج المؤممن مبتلا.
_مو هيج لان لو فعلا شايفني مؤمننه
ماحرمني صلاتي .
ابو حيه:استغفر الله يابه لا تجزعين
وعسى أن تكرهوا شيئا وهو خير لكم.
ولا تعترضين ويضيع اجر صبرج.
_لو الصبر عله جوع عطش
الم عادي بس شيجازيني عله الشفته .
ابو حيه:خلاني بدربج .
_كتمت شهكتي بسبب صوت نقاله
رد وهو يكوم بأاستعجال .
ابو حيه:ها شوكت جاي جاي مسافة الطريق.
_نهى مكالمته والتفت عليه .كتله برجاء
اذا تريد تساعدني خليني اطلع .
ابوحيه:ان شاء الله بس ارجع اخذيها كلمه
اوصلج وين ماتردين بس كون اطمن
مايصيبج اذى .
_طلع مستعجل خجلت الح عليه
يله اتحمل لحد مايجي وهيج خلص النهار
وصار اليل الف فكرة اجت ابالي
وانه اباوع من الشباك الكراج الي مساحته
كلش جبيرة ماادري شلون اجت عله بالي وكفت امي
بيت فاروق اتخبلت لا مستحيل شنو يعني هم يصير
ابو حيه مؤمن ويدور اجر ويخليني عنده وابقه منبوذة
ركضت للعلاكه طلعت النقال ودورت شاحنه خليته
يشحن اباوع صار بي ٥ طلعت الرقم مالها
من الفلوس وضغطت عله الزر انفتح
انتضرته شويه والرسائل صارت مثل المطر
خرب انوب بي رمز لازم اخابر سونه
لازمه النقال بيدي وحايرة شلون افتحه
استغربت من كمية الرسائل كلت يجوز الشركه
حته نقالي قبل اذا اغلقه فترة هيج يستلموني
اسيا سيل لو خدمات لو عله الرصيد تاخر الوقت
وزعجتني المكالمات الي تجي عله الرقم خفت ارد
لان احنه اتفقنا انه اخابرها طفيته وتمددت بين الغافيه
والنايمه حسيت خطوات بالبيت عبالي ابو حيه مثلت النوم متهربه من اسألته غمضت عيوني حيل فزيت مرعوبه مالحكت اصرخ.
!!اشششش .
_جرني موكفني اريد استوعب
الي انه بي حلم لو حقيقه خرب الحظ نفسه الشخص الي جان يسهر يم سليمه . شهكت من قوت الضربه
احس طعم الدم بحلكي شكد جنت اكول محمود
عذبني وسليمه جرمت بيه بس مو هيج غلط ماسامعته حته بالصعده وطكات مال اجرام .
علاء:احجي شكد دفعلج الساقط ابو حيه
وصورتيني .
_اصرخ بكل قوتي .
علاء:اعله بعد اعله.
_اطيح ويرجع يجرني
لابس حذاء مثل البسطال فلش رجيله بي
اول مرة اشوف بشر بهاي القسوة يطك بااديه
ورجليه الدم حجب عن عيوني الرؤيا اخر دفر جانت القاضيه لزمت بطني احس تملخت دنكت جر مقدمة دشداشتي باوعتله بتعب سحبها بقوة قاصد يشكها
حسيت شي حار نزل بين رجليه عبالي ادررت
باوعلي وكام مبتعد وهو يعفس وجه .
علاء:وهاي خلصتج من النغل ليش
تحتارين بااسقاطه .
_درا وجه وطلع وهو يصيح بصوت عالي .
علاء:شسووووي بيك اليوم ابو حيه .
_ماتحركت من مكاني . اصوات عاليه
الصورة ماواضحه وكل ضني انه بالمستشفى
اريد اركز غمضت من عرفت بعدني بمكاني
دنك يباوعلي وعيونه مثل الشرار.
ابو حيه:ان كيدكن عظيم .
_هزيت راسي لا .ونزلت دموعي
حجيت بصوت واهن وضعيف،وروح امي لا.
ابو حيه:الله لا يوفقج.
_حجاها وكام درت وجهي اريد اصيح عليه
انتبهت اكو رجال واكف قريب عله باب
الغرفه طلع ابو حيه والرجال دنك بااسف
شويه ودخل بيده بطانيه شمرها عليه
وكنبص كبالي يحجي بعصبيه مغلفه بهدوء.
ابو حيه:منو دافعج .
_شردت من بيت ابوي الي جان يسهر بي
الباشا واهذا الي كتلني .
ابو حيه:خوش صدكت والنقال الي نشرتي
منه صور علاء وطلبتي مبلغ .
_ماخليته يكمل سولفتله مختصر وعلاء يتهدد
صاح بي ابو حيه .
ابو حيه:تسكت لو اكوم اسحلك .
علاء:فوك دكتك الناقصه تحجي .
_كام وهو يوجه كلامه لواحد بعمرة .
شكله موغريب عليه.
ابو حيه:جيبولي مرة ابوها واختها.
علاء:خابرو اسعد هو يجيبهن .
_مد ايده الرجال الجبير
سد الباب عليه اريد اتحرك مااكدر لو دايس
فوكي لوري ماصار بيه هيج بعد ششوف وين
تريد بيه الدنيا شكد اتحمل وشوكت ربي يخلصني
دموع ماكو حلكي نشف اكثر من ساعه وسمعت
اكثر صوت اكرهه.
سليمه:ها علاسه لو شنو .
_صرخت بقوى عرفت طكوها
اندفع الباب دخل الباشا ساحل سونه
الي شهكت من شافتني ماخلاها توصلني
استلمها دك ركض الرجال الجبير لزمه
فرغ نفسه منهم وسحب سلاحه .
الباشا:بس تلزموني ارميها.
ابو حيه:لا تتحيون اطلع خلينه نفتهم
يجوز البنات صادقات بكلامهن .
علاء:وليش ماتكول اتفاقك وياهن .
_التفتت ابو حيه صفك علاء عله وجهه
ضلو يدافعون والرجال الجبير بنصهم
الباشا استغل انشغالهم وركض قفل باب الغرفه
يابه لو كاتلين منهم عشيرة ماسوو بينا هيج.
الباشا:شكد حجيت وياج ولججج بقياس
حذائي تلعبيني . بس هو ساس وعرك نكس.
_صاحت بي رغم ايدك عليها بس ماسكتت.
سونه:كتلك طلكني .
الباشا:غبي عبالي صدك طالبه حمايتي.
سونه:وانته ماحميتني.
_ضليت اصرخ موتها .
وذولاك يفلشون بالباب ويصيحون وهو يشيلها ويطكها بالكاع زحفت وكل حركه روحي تشوغ لحد ماوصلت رجليه جلبت بيهن اريد اقيده نكت رجله مني
ودنك عليها جرها من شعرها وهيه ولا صرخت
لحد ماانكسر الباب ودخلو يتراكضون جرو منها .
ابو حيه:ماريد اشوف طول واحد منكم
يله اخذ هذا الزباله واطلعو
الباشا:ماتحرك اطينياها.
_دخل الرجال وكف كباله الباشا دنك
اشر اطلع .
الباشا:يابه اترجاك .
!لاتكول يابه متبري منك من هل
ساعه مااريد اشوفك.
_طلع الباشا وهو شايط
دخل ابو حيه والرجال وسدو الباب
كعدو كبالنه مدنكين زحفت لسونه الي
عيونها عليهم بتوعد تحمم االاب.
ابو اسعد:مااكول انتن صح ولا ابريهم
بس السويتو اكبر غلط .
ابو حيه:لحد هاي الحظه اكول احجو
خلونه نعرف منو الي ورا الموضوع.
_ردت سونه وهيه تلم شعرها.
سونه:فتحلونا الباب والشرطه هيه تعرف
منو الي سوا هيج ومنو صور.
_اشرتلها تسكت ودرت عليهم
هزيت راسي بمعنى اتقرب يمي كام الرجال
كعد قريب عليه.
ابو اسعد:احجي يابه .
_الموت واحد بعد شلون مات وين مات شتفيد
لو عدكم ذرة غيرة جان سألتونا قبل لا تسوون بينا هيج ومو لاجل ابرر نفسي بس حته يضل ضميركم
يأذيكم احنه مالنه ايد حجيتله السالفه كلها ضل صافن.
سونه: اطونه شي نستر بي نفسنا
صيحو مرة ابوي . خل اطلعنه .
_كام ابو اسعد وهو يأشر لابو حيه
طلعو ودخلت سليمه علينا شهكت .
سليمه:وروح امي اذا ماخيستهم بالسجن .
_ضلت تحجي وتصيح حاولت تكومني
صرخت بوجع نزعت صايتها وخلتها براسي
تلبسني بحذر جرت البطانيه ضلت تتلفت
من شافت الدم بسرعه طلعت عليهم تغلط وتصيح.
سليمه:بهاي حالتها اخذها للمركز
ابنكم معتدي عليها.
_دخلو يتراكضون غمضت عيوني
وهيه مستمرة تحجي.
ابو اسعد:لا يابه محد معتدي عليها بس
يمكن البنيه حامل وسقطت .
سليمه:حجي رجلها صار فترة مسجون .
_باوعت لسونه اريدها تفهم اشارتي
تقرب ابو حيه يسألني .
ابو حيه:جنتي حامل .
_مامتزوجه وخر من يمي
هز راسه وكام . بعد هوسه وصياح
سليمه:لخاطر هل شيبات راح اعديها
بس بشرط .
ابو اسعد:الي يرضيكم يابه وانه
اتكفل بعلاج البنات.
سليمه:حجي هاي ابنك عاقدها
وهاي زوجها سوى حادث وانسجن
الي اريده خلي ولدك يكفون منا
والباشا يطلك سونه.
ابو اسعد:صار .
_طلعتنا سليمه وحده ورا الثانيه
لحكنا ابو حيه .
ابوحيه:خل اوصلكم ترى الشارع بعيد
وضعهن يلفت النضر.
_كيفت سليمه قدم سيارته
ودنك عله سونه رغم رفضت يشيلها.
ابو حيه:لحد الان بعدج مرة اخوي.
_صعدها ودار عليه
صحت بي دير بالك تلزمني وخر يله وخر
تعاي سليمه ساعديني . دنكت شالتني كوى
رفعتني للسيارة. طول الطريق هو يحجي وياها
ويتعذر وصلنه للركن .نزلت سليمه .
سليمه:بس اشوف وحده من الجيران
تساعدني اوصل البنات للبيت .
ابو حيه:براحتج .
_شويه واجن النصافات
انه شالتني حربا واختها شالت سونه
اباوع وانه اوصف للمنطقه الشوارع ضيقة،
مجرد النظر إليها تحسب أن عدد سكانها لا يتجاوز أصابعك،
لكن ما إن تخطو خطوة داخل زواياها حتى يبتلعك عالم آخر، غارق في الغموض، مشبع برائحة الخوف. الأزقة ملتوية، متداخلة كأنها متاهة تريد أن تُضلّ من يسير فيها. البيوت متلاصقة، جدران متهالكة، تخفي خلفها أسرارًا لا تُحصى، قصصًا لا تُحكى إلا همسًا في الليالي المظلمة.
_دخلنه وهنه يرزلن بينا
ومنا قررنا مانبعد عن بعض اله واحنه متاكدين مالنه رجعه بهل مكان سليمه تركيبه عجيبه طول مااحنه
بالفراش هيه تطبخ وتخلي كدامنا ودز عله ربيع
يداوي جروحنا
سليمه:ام الشخاخ هل مرة سكتت لان الباشا
وعلاء ماقصرو بيجن الي تخطي خطوى ادفنها.
_خليني خدامه جوى رجليج
بس لاتتوقعين اطاوعج بشي
سليمه:ضلي مكفخه .
_يطلع طارق واعوضج .
اتفقت وياها بس ابلغ ال١٨ تاخذني اشتكي
عله حصتي بورث امي . اله سونه خلصتها صفنات
سونه:اله ابجي دم .
سليمه:يطلكج ومالج يمه شي
الف من يتمنى يسمع صوتج .
_اتفقنا نتحمل لحد مانبلغ السن القانوني
سونه تعافت قبلي وشرطت عله سليمه محابس
مايدخل علينا وبيوم جانت عدهن حفله و اجن متاخرات خليت الصينيه كدامهن وسونه تسولفلي
عن الحفله كمزنا عله صوت الطلق انخبص الشارع
سليمه:فلك فلكهم شكوو.
_كامت تشوف الشارع
رجعت وجهه مخطوف .
سليمه:محابس رامي عله سيارة الباشا.
سونه:والباشا شعنده بشارعنا.
_ومنا بده الباشا حربه عله سونه الي
رافضه حته تسمع صوته شرد محابس
بسبب الحكومه يوميه تغط الشارع.
سونه:اذا ماخليتك مثل اسويكه يل باشا.
سليمه:كفي الشر . هذا مو سويكه
سونه:نفس الشي لان سويكه ماطلع ليرة
من وكر الصعده ويصيح احبها
الباشا مخليني كبال محابس ويصيح اغار.
_ايام وليالي واحنه نعد الساعات لعمرنا
راضي يجي يوم ويختفي شهر.
سونه:اليوم سلوم معزومه يم ام طيبه.
_خوش يعني مانطبخ .
سونه:لا .
_نضفت الطارمه واخذني الفضول اباوع من الزرف الي بالباب التفتت عليها اكلج يمكن اكو عرس بالشارع
ردت وهيه تشمر المكناسه.
سونه:عرس ايش .
_والله هاي نساء جاي تدخل بهاذ البيت الي كبالكم
وحته جهال ومبدلات .اجت تهز بيدها دفعتني وفتحت الباب مدت راسها باوعت ورجعت سدته .
سونه:خميس اليوم .
_اي الاعراس الخميس.
سونه:خايبه يااعراس احنه باليوم الف عرس
نعرس . جلسه مال طقوس بيت فهده.
_ شنو جلسه ؟قصدج عزاء
بس شو هذولي لابسين الوان
وعبالك معزومين عله مناسبة فرح.
سونه:وهاي شلون اشرحه الج
امشي ترحين .
_يعني يقبلون؟
سونه :عادي الجوارين أكثرها
تروح يمهم .بس عندج استعداد تاخذيلج
كفخه كفختين من سليمه .
_كيفج بس ماندخل نباوع من الباب ونرجع.
سونه :أوكفي خل اشوف عدنا بيض .
التفتت عليها بقلة صبر
- جا هسه طلعتي جوعج خلي نرجع واكلي امشي
لا يخلصون وما نشوف شي .ردت وهيه تضحك .
سونه:اخ يمه بطني ههههههههه
ولج لازم ناخذ ويانه بيضتين .
_فتحت عيوني مستغربة
شنو يعني ياخذو بيض بدل الفلوس
سونه :هههههاي لا بس ميصير لان انتي اول مرة
ادخلين لازم تكسرين هل بيض بالباب .
-يمه الشغله تخوف ماروح يعني ليش هيج
شكو شراح تسوي البيضة .
سونه:دمشي امشي نلحك عل بدايه حتى
تعرفين كل شيء راح تتونسين صدكيني .
جرتني من ايدي و اني بداخلي فضول
طلعت و هي تسحل بيه و انه أتلفت
لحد ما وصلنه بقيت واكفه أباوع مستغربة
حتى ما ارمش اريد أباوع بكلشي
النسوان تدخل بدون ماتطرق الباب
البيت من كد ما قديم تحسه راح يوكع
خلت البيضات بيدي اشرت بمعنى كسريهن
عين على البيض و عين على النسوان الي تفوت
لفت انتباهي الوان دشاديشهن مجموعه لابسه
ازرك . وبعضهم ابيض .وعبالك زي موحد
عله شعرهن وصلة من نفس القماش . تركت البيض
و عيني على ألوان الدشاديش .كل لون يكول للثاني اني أقوى منك
و الأعداد الي تدخل للبيت تكثر ماتقل
فاتحة حلكي اباوعلهم جرت أيدي بقوة .
سونه هااااا هااااا فضينا من
يا دكمة تشتغلين؟
_ ماجاوبتها رجعت سحبت إيدي
طاحن البيضات بالكاع
حطيت إيدي على حلگي بـ فزة.
شكرا لزيارتكم عالم روايات سكيرهوم
