رواية كريات الدم السوداء الفصل الثلاثون بقلم زحل
_توني اتمدد وسمعت صوت ابوي يصيح
طلعت والكه اياد واكفه يحاول يهدئه.
اياد: مو هيج يابه بس ارتاح وانه احجيلك.
ابو اسعد:بعد ايش تحجيلي لو معتبريني
والي كلمه جان حجيتو من البدايه.
_دخل علينا ثابت يلبس بقميصه .
ثابت:يابه والله مااعرف شنو وشلون .
_كام ابوي سنده ثابت طلعو
صاحت وراهم امي ماردو عليها اشر اياد ادخلو.
وفيه:روحي كعديلي مولي.
_ركضت دكيت باب غرفته
ورجعت يم امي. الي ضلت تفتر بالصاله بقلق
مولي:ها يمه شنو صاير.
وفيه:علاء واسعد مادري شمسوين
اياد اجه عله ابوك وثابت اخذهم وراح.
_صفن مولي خطيه يمكن
بعده مامستوعب.
وفيه:مو وكت صفاتك
كوم شوفلي عمك محمد.
مولي:شبيج يمه كمزتيني
خو اكيد عمي محمد وياهم.
_ضلينا كل شويه نحلل السالفه شكل
وهمه لايردون عله نقالتهم ولا واحد منهم بين.
وشكد اتصل بيهم مايردون تعبنا من التفكير
طولو وامي تخربطت .
مولي:اضربج ابرة.
وفيه:راح اكوم اشمر الابر بالحاويه.
مولي:شنو هل قسوة ماعرفتج هيج .
_التفتت تريدلها شي اطكه شرد
كعدت مريم . ضحكت يعني هاي
معقوله ماتحس بالهوسه ولا تفتقد زوجها من يطلع .
مريم:شكو شصاير شبيكم.
مولي:اوفر اوفر انتي يعمي ليش هل تبذير
ترى كلهن نفس المعنى شصاير.
مريم:ديله بس كول شصاير.
مولي:للاسف ماندري لان محد جاوبنا.
_لحد مااندك الباب خلصت كلوبنا.
ركض مولي فتحه دخل ثابت مسند ابوي
تفاجئنا شبي تلكينا بقلق.
ابو اسعد:مابيه شي يابه لاتخافون
ثابت:ادخلك لغرفتك افضل.
ابو اسعد:لا خليني هنا
_الفضول يقرء الف وهمه مانطقو حرف
ايام وابوي ملتزم الصمت والعريب مرتين اجه جبار
وثابت ماطلع سلم عليه .
جبار:يعني اشم ايدي هو مايدري.
ابو اسعد:عوفنا من اتهامك بس دخلت علاء للشركه
وتجاوزه عله البنيه بهاي الطريقه غلط لو لا.
جبار:شتريده يحلفها اكيد يتعصب.
وبعدين شنو هل د......
ابو اسعد:معلينه شنو هنه الهن رب يحاسبهن
لو ميته بيده منو الي يبتلي غيرنا .
جبار:هسه الحمد الله ماماتت.
_واكفه يم الدرج واتسمع
ماحسيت اله ثابت خطف من يمي دخل عليهم
خرب انه شلون فشله. بس يمكن ماشافني .
ثابت:شباقي عن الموت مفلش البنيه.
جبار:طبهن مرض وشمعنى
ماكلتو اسعد هم كتلهن.
ثابت:مثل سكتنا عنه لو وكفنه نتفرج عليه.
جبار:خليهم وياهن موخوش ادميات.
ثابت:يطلبوهن داكت عليهم الباب غير همه كاعدين عدهن كعده ملن منهم يردن يخلصن ارواحهن .
جبار:وشنو رايحين يتونسون غير شغلهم
وجلال هو مكلفهم .
ثابت:عمي سحبهم وسلم الموضوع لاياد
وهنه تعاونن ويا والشغل ماشي تمام وكالهم انتم انسحبو همه مجلبين .
جبار:بعد صارت نضل نتكاون عليهن.
_ضلو يتصايحون طلع جبار
ايام وابوي رافض يحجي ويه اياد
اجه عمي محمد وشكد توسلو بي
ابو اسعد:حته لو عذرت اياد بس اسعد
مستحيل متبري منه ليوم الدين.
_ويوميه هوسه والمصيبه مانعرف
عليمن وشنو السالفه. ابوي حالته مااستقرت دوم ضغطه مرتفع حاولنه نبعده عن التعب صار اكثر وقته بغرفته احس البيت طافي مالي واهس
كاعدين انه ومولي وامي وثابت و دخل اياد
مدنك بس شافه ثابت كام متوجه لداخل البيت
ركض اياد لزمه .
اياد:بداعت الحجي بروح الاعزاز معود انه اريدك تبرد السالفه وتقنع ابوي حته اجيب اسعد يطيح عليه.
ثابت:حملتوني ذنب مع الاسف عليكم
ماتخافون الله زين غيرتكم وين .
اياد:يابه هم لاتلوم عليه الشغله مو هينه.
دشوفلي الوضع يم الحجي خاف ادخل ويطردني.
_جرة ثابت دفعو باب غرفت ابوي ودخلو.
التفتت كون مريم ماتلكفني اتسمع .سويت روحي
اريد اعبر لغرفتي وكفت اسمعهم .
اياد:يابه يضيع اذا ما تلمه
بحظنك اسعد تعبان كلش.
ابو اسعد:ماارضى عليه لحد
مايطلك البت ويترك هذاك المكان .
___________قدر____________
_ واكفه اباوع بقهر .مدت ايدها جرتني .
سونه:دمشي شبيج تصنمتي.
_مو خاف بعد ميقبلون ندخل
لان تكسر البيض. بعدها ماراده عليه اندفعت
همزين ماطحت عله وجهي .ضحكت سونه.
وهيه تلزمني من ايدي .
سونه:جا كسرنج ويا البيضات.
_شكد ماعدهن ذوق ليش هيج يدفعن.
سونه:مو حضرتج لازم الطرق يعن
ي منين يدخلن.
_خو يكللي من رخصتج
هزت ايدها والتفت عله مجموعه نساء
تقدمت تسلم عليهن
وانه عيني تتفحص المكان بفضول
جذب انتباهي رايات ثنين وحده بيضه مكتوب عليها الرفاعي والثانيه صفرة مالحكت اسأل جرتني سونه
لداخل البيت
سونه: شكد تصفنين.
_بنات وشباب يفترون مثل النحل
وكأنو يهيئون لفد شي مهم .شويه ودخلت بنيه بعمري وراها ولد شاب بشرتهم سمرة طوخ وانوب لابسين
ابيض زايد من حدة سمارهم صاح الولد بصوت عالي
!!اجه البابا.
_توجهت الانضار للباب دخل رجال جبير
ويا مرة بنفس عمرة الكل وكف نساء ورجال وبنات
اباوع عليهم سلمو عليهم كعدو متوسطين المكان
الفتت عله سونه هذا جدهم وبيبيتهم .
سونه:لا البابا والماما.
_مافهمت شنو .
سونه:بالبيت افهمج .
_زين ليش لابسين ابيض.
سونه:هو هيج لازم يلبسون.
_وهذول البنيه والولد هم بابا وماما.
ردت وهيه تخفي ضحكتها.
سونه:لا هذول كاوووش وكاووشه.
_شنو ؟
سونه:خرب ابوج اسكتي عود من نرجع افهمج.
راح تبدي الطقوس.
_دارت وجها متجنبه سؤالي
رغم الخوف . بس غرابه الحدث تشدك للبقاء
عيوني تتحرك ويه كل حركه وتصرف شيء مخيف بس ممتع عالم اخر اول مرة اسمع بي حركات غريبه اهازيج اغرب همه مشغولين بالي يسوو بس انه عبالي يباوعولي .
سونه:لا تتحركين من يمي .
_دخلو مجموعه شباب بيدهم الالات ودفوف
بدو يدكون بهدوء. تعبت من الوكفه دغيت سونه
انبها انو تشوفلنا مكان نكعد.
سونه:لا بس تقوة الجلسه نطلع .
_ليش؟
سونه؛مو بعدين تصير هوسه .
_قطع حديثنا دخول نساء
بيدهم منقله جبيرة مليانه فحم
خلنها بالنص وشمرن بيها بخور شهكت من كمية
الدخان الملت المكان. صارت الصاله تخنك
تعالت اصوات الموجوديت بكلمات غريبه مافهمت معناها شويه شويه يقوة دكهم بالدفوف.
كامو مجموعه نساء ورجال يتمايلون ويهزون خلفياتهم بطريقه عجيبه . وكل شويه يشمرون بخور بالجمر .اختنكت من الدخان الي يتصاعد ماحسيت اله ايد جرتني شهكت بخوف.
التفتت والكاها سليمه كفختني عله راسي. والتفتت ادور سونه اشرتلها تعاي وجرتني متوجه بيه للباب تمشي وادفع بالنساء الي واكفه وتسب بيهن.
سليمه:كون زار ازرك ويخنكم كلكم
عشيرة مال زيران وتهجم عليجن.
_لحد ماطلعنه للطارمه شبعتني دك
مااهتميت لكفخاتها بكد ماركزت بالكلام
دفعتني للباب والتفت عله سونه
رادت تلزمها شردت سونه وهيه تضحك.
سليمه:امشن اذا ماصلختج صلخ
انه صوجي ماقفلت الباب .
_وبس دخلنه البيت ركضنا للغرفه
وقفلنه الباب ضلت تصيح وتغلط.
سليمة؛وروح امي اليوم اكطع الشحاطه
عليج ياسونه ولججج ماخذتها لزيران .
_عفناها تصيح وكعدنا ميتين
ضحك . عدلت روحي والتفت عله سونه
هسه حظي جابها بهل وقت ماخلتنه نشوف الزيران
مايسوى الكفخات الي تحملتها .
سونه:هههههههه ولج شتشوفين .
_ جا المن رحنه كلشي مافهمت يعني بعد
هاي الهوسه والدك شيصير بعدين ؟ كمزت
من صاحت سليمه وهيه ماده راسها من الشباك.
سليمة:شتردين تشوفين
بت التالف .
_رديت بغباء . الزيران .
سليمه:كون واحد منهم ساحلج.
_فكيت حلكي بصدمه.
يمه يعني قصدج جن مو .
سليمه:جن ازرك نابلي ويخليج لازمه الركن
وتغنين ليل نهار اطلعي سويلي كهوى
لا احمسج حمس.
_كامت سونه وهيه لازمه صفحتها
من الضحك . طلعنه نمشي بحذر
وكل ماتتحرك سليمه نكمز عبالنه راح تكوم النا
اثرم بالزلاطه وسونه واكف تكلي دجاج
ادنيت يمها احجي بصوت ناصي اكلج يعني
لو باقين بالجلسه لحد الان شيصير.
سونه:يستنزلون زار .
_ولج غير افهم شنو الزار
يعني جن .
سونه:لا مو جن .
_هو مو صوجج انه غبيه خو اروح اسأل سلوم
شمرت السجينه وطلعت للصاله باوعتلي سليمه
ابتسمت وانه اتقرب منها اشرت شكو .حجيت
بخوف بروح امج فهميني. صاحت بصوت عالي .
سليمه:ولج هو انه مفتهمه حته افهمج.
_يعني انتي مو منهم وبيهم .
سليمه: ليش يعني شايفتني
أبلون ابوج بت الصخل .
_شدخل الون .
سليمه:الزيران تخص العبيد
السمران . انه مو عبدة ولا وصيفه.
_جا شنو ؟ انتي.
سليمه:كاوليه .
_ابتعدت عنها مسافه
وحجيت بتردد . شوفي الي اعرفه الشخص الموزين يكولون عنه كاولي مايستحي هيج جانت بيبي ام فاروق من تريد تغلط عله حجي احمد .
سليمه:انعل ابوج لابو بيبيتج
والكاولي اشرف منهم.
_اباوع عليها تحجي بعصبيه
ضليت حايرة شلون افهمها
انو مااعرف هل شي اذا كان صح
همزين نقذتني سونه . خلت الصينيه
كبال سليمه .وهيه تحجي.
سونه:الكاوليه الي همه الغجر.
_من البدايه وكولي غجر. اي سامعه بيهم
حته نسائهم تمتاز بشعر مجعد وحلوات
ويكولن يركصن بمهارة .
سليمة:اي هو احنه الي ركصتنا الدنيا
وركصت علينا . المهم الزيران موروث ثقافي
جلسات يحيونها اصحاب المكائد
بيها طقوس معينه مثل اهازيج وكلمات
بس همه يعرفوها .
_شنو الغايه منها.
سليمه:مو كلها سوى
اكو جلسات هيه علاجيه
شلون الناس الي يروح يتعالج عند شيخ روحاني .
ماسامعه الي يكول بيه جن والي يكول انضريت او هيج شي.
_اي اي فاطمه جانت دوم تروح لبيت الساده
تكول يقرون عليه ومرات ينطوها حرز مادري
حجاب المهم هيه جان عدها وهواس وتعتقد
اكو ناس تسويلها سحر.
سليمة:وهذول هم هيج حسب اعتقادهم
الي مايفيد بي علاج الاطباء يكون ممسوس
يسووله جلسه يستنزلون بيها الزار.
_اذا هيج ليش ماخليتينا
نشوف شلون يعالجون .
سليمه:جا لكيتج بوحده من الغرفه
مال شروان .
_ شيسون بيه؟
سليمه:يعالجونج كومي لااغط
راسج بازلاطه .
_حجتها والتفتت عله سونه كفحتها.
لابروح امج يعني شيسوون .
سليمه: يخلون ماده بالبخور
دوخ تخليج تفقدين ويلعبون بيج لعب .
يقشمرون النسوان عود يسوولها سحر
ويطلبون منها شغلات ثانيه .
_جنهم بالافلام المصريه
لو شلون ريه وسكينه.
سليمه:اي .
سونه:هههههههه انوب انه نسيت
قدر وياي والتهيت اباوع لطشه
الي كامت تروط شلون تجفيف الغساله
من تخلين بي ملابس وماتسدين بابه
عدل . يضل يهتز برعونيه.
سليمه: لو ماجايه انه
جا اليوم عزمو عليجن اقوام الزيران.
سونه:ههههه لوتدرين من شافت البابا والماما
دخلو تكلي هذول جدهم وبيبيتهم.
_همزين ذكرتيني
صدك شنو هذول .
سليمة:المسؤلين عن الكائد.
_ولو مافهمت .
زين كوشه وكوشش. شنو.
باوعتلي وهزت ايدها.
سليمه:كاووش وكاوشه
هذول خدام المكان يعني همه الي
يقومون بواجب المجلس .
_عالم غريب جنت اضحك عله فاطمه
من تخبط الخل وترشه بالبيت
لو ينطوها بخور وشغلات تسبح بيهن
بس هذول مااعرف شنو هل طقوس ..
سليمه:يعتقدون بوجود اقوام تسكن باطن الارض .
ويستعينون بهاي الكلمات مدري طلاسم
مدري تعويذات يندبون بيها الزار يحضرونه للجلسه .
_زين منو الي يحتاج هل جلسه.
سليمه:اكو ناس يصيبها هوس
تحس نفسها مسلوبه
يضل هايم يكولون عنه عاشك الزار مهبهب.
_ استمع الها بتركيز
وعجيب هل سليمه شلون حافظه هل معلومات
وتشرحهن بطريقه غريبه. هزت ايدها وكملت كلامها.
سليمة:يبقون يدكون بالدفوف
لحد مايفقد المريض ويطيح
يلتمون عليه يسالونه منو انته وشتريد
_وهو يرد عليهم .
سليمة:ولج شمدريني اصلا انه
ماامن بهيج شي . اسألي ام اعطوب.
_التفت عله سونه الي ميته ضحك.
سونه:ماحاضرة جلسه لطشه
جنت اروح ويه امي لبيت ابو حبيب
مايصير بجلساتهم هيج شي.
_جا منو الي يسوي.
سونه:جنت زغيرة وغافلت امي
وحضرت جلست طشه . لحد ما طاح المريض
سندو عله الحايط وضلت طشه تسال بي
منو انته من ياقوم عربي لو لا عاشق
لو معشوق . وهو يرطن ماينفهم منه شيكول.
_يعني يحجي.
سونه:هههههه اي يرطن
مرة يكول انه من افريكيا
جئت لاجل حبيبي ومرة يحجي هندي.
_طكتها سليمه وهيه ميته ضحك
صحت بيها دحجي مو فتيتي كلبي.
سونه:اجه كاووش بيده صينيه بيها ٦فناجين
كهوى وست فناجين دارسين خلاهن
كبال المريض شربهن .
_وشصار بعدين.
سليمه:ادكومين لو اخذج يمهم .
_طفرت للغرفه وسونه شالت الصينيه.
سليمه:ام اعطوب شنو قررتي .
_عرفت سؤالها عن الباشا.
طلعت يمهن .
سونه:قررت انام لان تعبانه
وباجر عدنا حفله.
سليمه:وين شوكت.
سونه:مزرعه . نروح العصر
اتفقت ويا مانتاخر .
سليمه:مااطلعين لحد ماتحلين سالفتج ويا الباشا.
مالي خلك المشاكل .الخال دز عليه وانتي
تدرين شنو الخال.
سونه:ماله شي يمنا كتله يريدني يحطلي
مكان ويطلعني منا . مايريد خل يطلكني.
سليمه:وهو لا بهاي قابل ولا بذيج.وانه خايفه من ولد الصعده لا يسوولهم بي سالفه وانتي شفتي
اهله معناها تصير مجزرة.
سونه:سمعي زين مال يرجع
يسهر يمنا وبحجة عاقد عليها.
هاي خل يشيلها من باله.
سليمه:خابري وكليله هل حجي.
_كامت سونه للغرفه .تبعتها عبالي راح تتصل بالباشا
شو هاي جرت فراشها وتمددت . باوعتلها بقهر.
دارت وجها للحايط . وقبل ماافتح حلكي صاحت.
سونه:طفي الضوى نعست .
اجلي اسألتج لباجر .
_مالحيت عليها
تمددت وانه افكر شنو هل طقوس
معقوله يعتقدون بيها ومصدكين غفيت والف سؤال يدور ابالي ، مااعرف وين راح يصفى بيه الزمن.
معقوله طارق .ماسال عني زين اذا طلع يجيني
تحسرت بقهر التفتت عليه سونه .
سونه:شبيج تتحسرين.
_خايفه .
سونه: هو الخوف للي مثلنه لازم نخاف .
_مو هيج . بس افكر بطارق يعني معقوله
يسامحني ويوكف وياي ضد اهله.
سونه:لا ماراح يوكف.
_عله اساس اتواسيني لو اطمنيني.
سونه:قصدج اعلكلج مغذي
انطيج جرعت امل كذابه اخدعج .
_نايمه عله ضهرها وعيونها للسكف
وتحجي بألم واضح .
سونه:تدرين انه كل ساعه تمر عليه
احس نفسي اكبر بيها سنه. ياقدر واقع حال لازم
نتقبل نفسنا ونعيش ونتعايش . واحنه من نسل اسود واب طبال وساكنين ويه سلوم الي تحيي سهرات
وليالي للرجال .
_شو كلامج تغير .
مو اتفقنا نتحمل هاي الفترة لحد مانكدر نطلع
منا واحنه ساندين نفسنا . ترى مابقه كم شهر
ويصير عمرنا ١٨ .
سونه:وصار ١٨ منو يكول اهل فاروق
ينطوج ورث واحتمال طارق يوكف ضدج.
_شنو هل احباط . اشتكي عليهم
وغصب عنهم اخذ حقي .تدرين شنو اتمنى.
سونه:يدلوج خوالج.
_اي لو بس اوصلهم .
سونه:ماتشوفين مامتأمله بيج خير
اكيد اذا تقبلوج راح تعوفيني.
_درت وجهي عليها
لا مستحيل .
سونه:ياريت لو تلكيهم ويتقبلونج
وامن انو مايصيبج شر .
_مادام انتي وياي مايصير شي.
سونه:ماتفرضيني عليهم يجوز يتقبلوج
لاجل امج بس انه مستحيل .
_سكتنا صوت سليمه .
سليمه:ام اعطوب طلعي الباشا
حرك نقالي .
_كامت سونه فتحت الباب
دخلت سليمه وهيه تسب بيها
جرت ايدها وخلت النقال بيها
وطلعت. ضلت سونه واكفه بحيرة
نززها صوت النقال باوعتله وزفرت نفس
اشرتلها ردي.فتحت خط وحجت بعصبيه.
سونه:نعم خير شرايد .
_حجتهن وتوجهت للجربايه كعدت
وخلت النقال بصفها رد الباشا ومبين من نبرته
صاك عله اسنانه .
الباشا:مااضن يجي من وراج خير
اطلعي انه براس الشارع.
سونه:بطلت اعتزلت تبت .
الباشا:خمس دقايق اذا مااجيتي .
سونه:مااجي وشتريد تسوي سوي .
_سدت الخط وكامت طلعت وراها
شمرت نقال بحظن سليمه.
سونه:لا تردين عليه بعد
احضري امسحي هو ورقمه.
_طفرت عليها سليمه جرتها
صرت بينهن مثل الطوبه .
سليمه:اشتغل عدج بت الصخل
مو انتي كتلتي روحج عليه.
سونه:عبالي بي خير.
_ثنينهن كمزن عله صوت الباب.
سليمه:اكيد هو . همزين اجه
خلي يكسر راسج .
_راحت هيه تفتح الباب
واحنه ركضنا للغرفه.
سونه:طكي السركي وطفي الضوى.
_التفتت عليها حته لايشوفج وانتي تباوعيله.من الشباك دارت وجها بزعل . مالحكت ترد عليه والباشا فلش الباب .
الباشا:طلعي احجي وياج .
_توجت للشباك فتحته وصاحت عليه.
سونه:اسمعك احجي .
الباشا:مادام بعدج عله ذمتي ماتخطين
الباب واذا لكفتج طالعه بحفله اصلخج طلقه
اكعدج بعربانه العمر كله.
سونه:كتلك حطلي خيمه بالصحراء
اكعد بيها . خليني بسرداب هم قابله.
مال تريدني ابقه هنا وانته تجيب ام طيبه
وتريد مني اغنيلكم .
الباشا:مو افضل من ما اطلعين بالمزارع
اليل كله تغنين.
سونه:مو اختيار مجبورة
فكيت عيني ابوي وعمامي يطبلون
وعماتي يركصن . قابل اهلي مثل اهلك وانحرفت.
الباشا:خلص لاطلعين وانه ادزلج مصرفج.
سونه:بدون ماتجي ولا اغنيلك.
الباشا:قبل لا اشوف اعطوبج انه اسهر يم سليمه.
يعني ماجاي عله مودج. وبعدين شنو الي زاعجج
من جيتي خو احسبيني زبون حالي حال الي تغنيلهم.
_غمضت عيونها وفتحتهن
حسيت بيها انقهرت حيل . هزت راسها تمام
وهيه تحجي بصوت مبحوح كابته عبرتها.
سونه:اذن خليك زبون
واطلعلك وين ماتريد .
الباشا:مو بيدج ساس نداس متكدرين
تعيشن بااحترام تحبين الذل والاهانه
خلص اطلكج وشوكت ماردتج تغنيلي اجيبج.
_دار وجه يريد يطلع صاحت عليه.
سونه:بس كون كد كلمتك .
_التفت عليها وعيونه تبث شرار
الباشا:اعتبري نفسج طالك
باجر يوصلح غايبج ورقة عقد الطلاك.
سونه:الغايب الك والحاضر اختي نسته
عدكم بيوم الي كتلتونه .
_فك عينه متفاجئ ماانطته مجال يرد
سدت الشباك وتمددت بفراشها . نمت بصفها
لو متفاهمه ويا تدرين احس كلامه صح يعني افضل ماطلعين ويه الفرقه.
سونه:بعد السوا بيه وبيج مستحيل اثق
بي وخل يكون بعلمج ترى هو بالحكومه
ويريدني عذر حته يكدر يوصل لمكان العصابات.
_معقوله يجوز علاء اي بس الباشا مااضن
صدك نسيت اكلج . تدرين بيوم الي كتلونه
قبل لا يجيبوج يمي لمحت واحد ويه ابو حيه
اعتقد شفته بالمركز . التفتت عليه.
سونه:يامركز شوكت .
_بيوم الي استنجدنا بالضابط
صفنت شويه وردت.
سونه:منو منهم .
_مو الي حقق ويانه لا الي اجه بعدين
وكلتي هو نفسه تتواصلين ويا بالتلفون.
سونه:اذن شكي بمحله وكلام محابس صح
هذول مستغلينه حته يوصلون لغازي وجماعته.
_وليش ضايجه خليهم يخلصونه منهم.
حسب مااعرف انتي اتفقتي وياهم وسلمتي
جماعه محابس،
سونه:اي لان عرفت غازي راح يصفي شباب
الصعده واكيد سلوم تصير بصفه
لهذا السبب خبرت عليهم حته نخلص من شرة.
بس يردوني اضل اعلس بيهم .
_اي خلي يولن .
سونه:وشنو الفايده مثل الضابط
يحميني .تدرين اذا حسو بيه ولد الصعده
شيسوون بيه اله يدفنوني بالخرابه .
_صح المفروض الضابط
من التجئنا اله يحمينا وترى يكدرون يوفرولنه
بيت نسكن بي ابسط الامور يكفلونه عند المأجر.
بس لو ماطالبه الطلاك.
سونه:قدر انتي ماتعرفين اهل الصعده
عدهم استعداد يخلوني طعم للباشا .وهو ماراح يسكت عن محابس وخاف عبالج حابني بس لان علاء انكشف.
بالي يم مديحه .
_ ابد ماحبيتها .
سونه:هههههه ترى حالها حالنه .
دنامي شكد تسالين .
_دارت وجها تمثل النوم وانه اسمعها اليل كله
تتحسر وتبجي بدون صوت . وهيج تمر ايامنا
وهيه رافضه الرد عله محابس والباشا .
سونه:قدر تعرفين تسوين كيك.
_ليش اليوم عيد ميلادج .
سونه:لا بس اريد اروح لمديحه يكولون
امها كلش مريضه . ترحين وياي .
_خاف سليمه ماتقبل.
سونه:انه اقنعها .
_سويت الكيكه وهيه قنعت سليمه .
سليمه: مو تتاخرن
وديري بالج لا يلكفج محابس.
_طلعنا نضحك واهل الصعده .
يباوعون عليه. وكأنو عيونهم تراقب كل غريبٍ يمر، تزن خطواته، تحدد إن كان ضيفًا عابرًا أم واحدًا من أولئك الذين لا يخرجون من هنا إلا بصفقة أوخطيئة. أكثرهم ذوو بشرة سمراء،
قسماتهم حادة، أجسادهم مرهقة، كأنهم وُلدوا في الشقاء بينهم آخرون ببشرة فاتحة، لم يشذوا عن المكان بقدر ما صاروا جزءًا منه، متأقلمين مع قوانينه التي لا تُكتب لكن الجميع يفهمها جيدًا. نبهني من شرودي
صوت محابس الي توجه علينا .
محابس:وين موليات.
سونه:شي ميخصك.
محابس:ما خايف عليج بس مالنه خلك المشاكل.
_باوعتله بنضرة ماعرفت افسرها
وردت بصوت تعبان .
سونه:قابل انه اشتغل وياكم حته اثير المشاكل
لو الحكومه مالاحكتني والعصابات تترصدلي
لازمه الركن اراقب ناصفتكم بشي وخر من دربي.
محابس:لا بس علستي ولد الصعده.
سونه:مثل جانو يصلون
ودخلت عليهم ارهابي فجرهم.
محابس:مثل جانو مانعين صلاتج وعلستيهم
شو كلنا بالهوى سوى يجوز همه افضل من ابوج
اقلها جازفو بنفسهم حته لايفتحون ابيتهم
للباشا وغيرة.
_التفت عليه خلت الكيكه باايدي
وكفت كباله .
سونه:قبل مايدخل الباشا
انته والنصافات ليش لازمين الركن
تحمون نوشه وسليمه من البزاين
لوجانن يبيعن روبه ولك مابقه نجار ولا حداد مادخل
للصعده واخيرهم فيلق شو تحجي وكأنو الصعده
سوك مخضر وانه دخلت الممنوع .
محابس:محد جبرج عله شغل انتي الي
شمرتي روحج بحضن الباشا.
سونه:مالكيت بيكم رجال واتحامه بي
وهو هم طلع مثلك .
_ حسيت بي يريد يستفزها
تقدمت جريتها . مشت وهيه تحاول تخفي
دموعها الي واكفت عله رمشها . وبدون ماادك الباب
دخلنه مديحه بالطارمه وامها بعربانتها .
مديحه:هلا بجميلات الصعده .
سونه:بشرفج .
مديحه:وروح .
_ماخلتها سونه تكمل.
سونه:مصدكتج لاتحلفين بالغالي .
_بوسنا امها وكعدنه هنه يسولفن وانه خذتلي صفنه
شنو هل ناس الي مثل الزرع مالهم ساس ولا معروف
ثمرهم عجيب الدنيا شكد بيها اسرار مخفيه نبهني
صوت مديحه.
مديحه:ها وين وصلتي بصفنتج.
_مااعرف بس اذا اسالج خو متزعلين.
مديحه:لا ماازعل هسه لو تفشخيني بهاي البلوكه
مااحجي جا غير مسويتلي كيكه.
_شعجب ماحاولوتي اطلعين منا
يعني انتي وامج تكدرون تسكنون
مديحه:الاجارات غاليه واحنه
لا راتب ولا شي.
_ليش ماطلعتو راتب تدرين فاروق الله يرحمه
جان مطلع راتب لابوي ايوب مال ذوي احتياجات .
مديحه:الغجر مالهم حقوق ورواتب
حته الي يموت بأنفجار ميحسبونه شهيد.
_ليش ؟ انتي لا تركصين ولا عايشه ويه الغجر.
مديحه؛حملونه ذنب
ابائنا لان جناسي اهلنه مكتوب بيها استثناء
وحته ماسمحولنه ندخل مدارس .
سونه:هو بس انتم خو شكريه مو رجلها مات باانفجار المطار وهل صارلها سنين تركض ماطلعولها راتب.
_هم غجريه .
سونه:لا عبده وزوجها سوداني.
_عكدت حواجبي شنو هل مصيبه
يعني عافت الدنيا اخذت سوداني اكيد
مايحسبو شهيد غير مو من البلد خو جان اجنس.
مديحه:لا السوداني ولا المصري
ولا اي واحد مو عراقي
انطو جنسيه .
_المفروض هيج ناس متخلف لان تعرف مصير
اولادها مجهول ليش يسوون جهال .
سونه:عايزة قهر وانتن كاعدات
تحركن بكلبي .
مديحه:شصفيتي .
سونه:حال السدانه بالماي .
_حجتها واشرتلي كومي.
طلعنا نتمشه بخطوات بطيئه
وكأنو نريد الطريق يطول دخلنه البيت واحنه
كل وحده صافنه بجهه خلص اليوم بين سوالف
سليمه وفصلات سونه .
سونه:اريد اروح للسوك.
سليمه:ماتخطين عتبه الباب.
_عفتهن يداهرن ودخلت للغرفه شويه
ودخلت وراي سونه . التفت عليها شبيج .
سونه:اجه صديق الباشا .
_علاء.
سونه:لا هذا الي اسمه ابو حيه.
_توجهت لشباك اباوع كاعد عله قنفه
وسليمه كباله . ليش اجه شيريد .
سونه:مااعرف.
_اشرتلها اسكتي خل اسمع شنو يحجون.
قربت اذني للشباك . _انعصر كلبي من كال .
ابو حيه:الباشا دز بيدي الغايب مال بنتكم .
_التفتت عله سونه هزت ايدها
وكأنو مامهتمه بس ،ماكدرت تخفي
المها تغير لون وجها وعيونها غرغرت
ماردت احرجها درت وجهي للشباك طلع الفلوس خلاهن كباله رادت تاخذهن سليمه مد ايده لزمهن تفاجئت بتصرفه .
ابوحيه:هاي امانه ولازم اسلمها لراعيها
بدون زحمه عليج صيحيلي البنيه .
سليمه:اي تدلل .
_وقبل ماادك الباب كامت سونه لبست صايتها
وشمرت شالها بأاهمال وطلعت . سلمت رد عليها وهو مدنك بدون مايباوع عليها شال الفلوس انطاهيا.
ابو حيه:هذا غايبج .
_هزت راسها بتمام .دارت وجها تريد تدخل
استوقفها. وهو يمد ايده لجيبه.طلع مبلغ ثاني.
ابو حيه:لحظه يابه . وهذا مبلغ مني الج
وحسبي حق تداوي وعلاج لان سببنالج الم
واتمنى تبرينا الذمه .
_باوعتله وهيه ترسم عله وجهه ابتسامه مكسورة
حسيت بيها راح تنهار . بس هو كلش نبهه قبل ماترد
كام وهو يتعذر .
ابوحيه:اعتذر اذا فهمتي تصرفي غلط
بس الله شاهد انه ردت اجي واخذكم للطبيب
ثقي ولو كايله اشتكي عليكم هم مااكول لا.
سونه:بالنسبه للغايب اخذته لان حقي
اما هذني فتعذرني مااخذهن لان ماابريكم
الذمه عله السويتو بينا .
_ضل مدنك . وهيه ماقصرت سولفتله
موضوع النقال . تخبلت سليمه .
سليمه:ايا بت الكلب . يا نوب تتبلين عليه.
لاتصدكها عيوني هاي جذابه والباشا يعرف دوالغها.
ابو حيه:وانه مو الباشا واعرف الصدك من الجذب
وبيومها مااطوني مجال افهم منهن ولو هيه غلطانه
لان المفروض تحجي للباشا بصفته زوجها . وان كان
زواجهم غير معلن او شكلي.
سونه:لان مااعتبرني زوجه وجان ضدي
وزواجي منه فعلي مو شكلي .
واساسا جان بينه اتفاق وخلص.
_رفع راسه يباوع ببعبث
وكل ضني يريد يبعد نضرة منهمن
لحد مااستقرت نضراته ع شباك وكال.
ابوحيه: المهم يابه اكو فلوس نستهن اختج
يمي بيوم المشكله ياريت تصيحيها حته انطيهيا.
_وقبل ماترد سونه طفرت سليمه.
سليمه:مو هنا راحت لبيت اهل زوجها
والفلوس انطيهن لسونه لان هن مهرها.
_التفت عليها مامصدك .
سليمه:اي وعيونك وديتها
كلت اخلص من مسؤليتها .
_هز راسه بتمام وانطه العلاكه لسونه
كام يريد يطلع ابتعدت سونه مسويتله مجال
وقبل مايعبر الشباك التفت بنضرة غريبه وشبه
ابتسامه عله وجهه طلع وسليمه تركض ورا دخلت
سونه شمرت الفلوس بالكنتور وتمددت بفراشها ماحجت وياها عفتها طلعت تاركت الها خصوصيه
حته تبجي براحتها .
سليمه:جا سونه وين .
_نامت .باعتلي بشك.
سليمه:نوميش خاف مقهورة عله الباشا.
_مااعتقد تنقهر عليه
من البدايه همه متفقين .فترة ويطلكون.
سليمه:احسن الها خلصت منه.
_وهيج مر عله طلاك سونه فترة
هيه ملتزمه الصمت. كاعده انضف وهيه تطبخ
اندك الباب طلعت عبالي سليمه واتفاجى بمحابس.
دخل بدون استاذان دخلت ورا .
محابس:سونه وين.
_صاحت مسمعته.
سونه:هاي انه ،خير منورنا اليوم.
محابس: اطلكتي .
_طلعت من المطبخ تمسح اديها
بصفاح دشداشتها.
سونه:ليش .
محابس:شنو ليش انه جاي اسالج.
سونه:وانه اكلك ليش تسأل شدخلك
شي خاص بيه انته ابن عمي ابن خالي .
حته جاي تسالني .
_ضل يباوعلها بتفاجئ .
وهيه واكفه كباله بتحدي.
راد يدارك الامر .
محابس:لا بس اكول يعني خلصنا المشاكل
والباشا وربعه يعني بعد مالهم دخله للشارع.
سونه:متاكد ؟
محابس:اي طبعا .
وترى هو بالحكومه وحته صاحبه.
سونه:اقصد متاكد
مايدخل الشارع بعد؟
محابس:اي اكيد. المهم شوكت
تخلص عدتج؟
سونه:اسمعني زين وحته مااضطر اعيدها
بغير طريقه . مال تخلص العده وكل ضنك
ارجع وياك لو تصيح مالتي ترى اسوي بيكم
دكه ما تنحجي اطلكت ومحد اله حكم عليه
اطلع اشتغل الطم اغني خوش.
محابس:مو كيفج .
مادام انتي بنصنه تمشين بقانون الصعده .
سونه:مامشغلني بمجموعتك حته امشي بقوانينك
محابس من الاخير مال تريدني اضل اميلتك وتعقد
عليه وتخليني هنا وضل طاب طالع عليه هاي شيلها
من بالك.
محابس:شتردين؟
سونه:نطلع من الصعده انه عندي
ناخذ بيت حواسم ونعيش بي حته لو نجدي
اهم شي نطلع منا انه واختي.
محابس:اجرلج مكان وبقه هنا
وكل يوم اجيج بس مااكدر ابقه يمج عله طول.
سونه:وانه مااجازف بااختي واعرف
يجي يوم تنلزم ويكرفونه وياك .
محابس:لبين ماارتب وضعي ونوب
اطلع منا ومااترك وراي اثر.
سونه:لحد ماترتب امورك يله تجيني
هسه تبقه بعيد عني .
_ماانطته مجال يرد دخلت للغرفه وقفلت الباب
وهو طلع . صحت عليها تعاي راح .اجت تمسح بدموعها . يعني اذا تحبينه .
سونه:حبيته يشبهني ضايع مثلي
عاش نفس العشته. ردت الم روحي بي
ولان ماعده اهل يحسب احسابهم
بنسبي الاسود مايستعر مني .
_جا ليش ماقبلتي يطلعنا منا.
سونه:النفس بالصعده ماينضم
واذا هسه حاميني من اطلع ويعرفون بي
وياي حته لو يجي بالشهر مرة راح يتخذوني نقطة
ضعف والحكومه ماترحم اذا الزم اكيد عبالهم بيتي مضمام واكيد ياخذوني عبالهم اندل شغله ويامن .
_تدرين حيرتيني
لان من طلكج الباشا وشفت نضراتج
كلت تحبه. هسه محابس ماجاي افهم.
الباشا:جنت ازغيرة واشوف مشاكل
امي وابوي لحد ما تزوج سليمه
وانه اتحلف ماازوج اله واحد يحبني وعنده فلوس هواي ويدللني ومن اجه الباشا تمنتيت يكون هذا الي
جنت احلم بي بس ثنينهم يردوني وكر .
_شراح نسوي.
سونه:مانسوي لحد مايطلع طارق
وابوي يسويلج جنسيه .
_وسلوم تسكت عنا كل هاي المده.
سونه:عدنا فلوس الباشا اطيها منهن
ايجار واكل . لحد ماتفرج.
_يعني بعد ماطلعين حفلات.
سونه:لا مااطلع .
_رغم تبين قويه
بس الحيرة واضحه بعيونها
هم يهد اجبال تعبنا واحنه نحاول نصد سليمه
وهجمات الباشا عله الشارع ويوميه هوسه
كاعدين بالصاله ودك نقال سلوم .
سليمه:منو هذا شو بس رقم.
سونه:وانتي منين خايفه ترى
مايكدر ايعضج من ورا الشاشه .
_شمرت عليها الكوشه مال التخم
وفتحت خط .
سليمه:عليكم السلام. اي نعم ليش شبي.
_ضلينه وحده تباوع بوجه الثانيه
لحد مانهت مكالمتها . سالناها شكو.
سليمه:ابوجن التالف لازمينه بالسيطرة.
_التفت عله سونه صفنت ثواني .
سونه:اكيد لاكين عنده شي.
سليمه:شمدريني . خل اشوف المحامي.
عود انه عايزة وجملني .
_واتصلت بالمحامي وبقت تتنصر منه خبر
ورا كم ساعه اتصل كالها لازمين عنده ممنوعات.
سونه:اذن حته هو يشتغل لاتكليلي
لكو عنده شي قليل هاي اخباريه مال واحد يبيع.
_ايام وليالي سليمه قلقه
التفت عله سونه معقوله تحبه.
سونه:اكيد لا بس تخاف يعترف عليهم.
_ويه كلمتها صاحت سليمه طلعنه نركض
هاا ها شكو .
سليمه:ابوجن الصخل معترف
عله ولد الصعده ومن ضمنهم محابس.
سونه:وحته لو غير ابوي ملزموم هم يعترف
جا شمتوقين الي ينكتل اكيد يحجي.
_ومنا بدت معانات ثانيه
وسليمه اطب وتطلع تدعي علينا.
سليمه:ساعة السوده الاخذته وشفتكم.
_يوميه هوسه رغم سونه تدفعلها اجار واكل
بس هيه ماقابله . وجانت تضعط عله
سونه حته تطلع حفلات.
سليمه:اول وتالي يخلصن افلوس الغايب.
سونه:لساعتها عود نفكر.
_نايمه واسمع صوت عركهن
طلعت شكووو .
سونه:تريد تجيب الباشا يسهر هنا.
سليمه:بيتي وبكيفي.
_جا انتي مو تكولين مانريده ومأذي ولد المنطقه.
سليمه:وماكدر امنعه هو طلب السهرة هنا.
سونه:تمام بكيفج واحنه ماراح نضايقج
ندخل لغرفتنا ماتسمعيلنا صوت .
_واجه الباشا وام طيبه ويا
وخلص اليل يضحك بصوت عالي وكل ضنه يستفز سونه الي ماجنها تسمع . بس الغريب ابو حيه
كل فترة يجي ينطي لسونه مصرف رغم ترفض
ابو حيه:تغجليني كدام مرة ابوج.
سونه:مشكور الله يرزقك اضعافهن.
_وهيج كل فترة يجي
والباشا ماجاب طاري الموضوع
ونفس كل سهرة صوت الديجي ماخلانه نغمض.
سونه:ترى يتعمد يعلي.
_مااعرف هل تصرف نابع من حب
لو مجرد حقارة.
سونه:اذا ماحجتله مكان بالخرابه
واخلي يجاور سويكه .
_جيات الباشا كثرت ورجع مثل قبل يخلص
اليل يمنا ويحاول يستفز سونه لحد ماطكت روحه
وبيوم جانت ام طيبه موجوده وهو صاح عله سونه.
الباشا:ام عطوب مشتاق لصوتج.
_درت وجه لسونه الي نصدمت من تصرفه
اشرتلي لا طلعين صوت غطينا حته روسنا وهو مستمر
الباشا:خوش ضلي لابده
لان مال اخليج تغنين لغيري تحلمين .
ام طيبه:وشعليك بيها عسى ما تسرح ويه الغنم.
الباشا:هاي السمرة مكانها عالي .
_كبت بينهم تالي طلعت ام طيبه
وهو بقى يدك باب الغرفه ملت منه سليمه.
سليمه:باشا مو هنا كتلك طلعت بحفله.
الباشا:غير اسحلج اذا صدك.
_لحد مااجه عليه ابو حيه
احس كلبي وكف من الخوف .
كمت اباوع عليهم
شلون يقنع بي وعبالك ابنه
ابو حيه:دكوم ياعيني مو ابوك ضال باله.
الباشا: لو يريح باله ويرحني اخخ .
_دنك ابو حيه يفرك جبينه بقهر
تالي جرة للحمام غسله وطلعه.
ابو حيه:وتالي نبقه هنا .
الباشا:لا ناخذها ويانه .
ابو حيه:دكوم وانه اجيبها باجر .
_شال راسه باوع لابو حيه
الي وجه انطعن ومبين انقهر على اخو .
ابوحيه:لخاطري كوم.
_كل هذا وسليمه صافنه باابو حيه ومركزه ويه كل تصرف منه عبالك اتابع فلم حته ماترمش .كام الباشا
وابو حيه استغربت هاي مو اول مرة من يوصل الشباك
ينضر بتركيز ابتعدت حته لا يشوفني بس ابتاسمته
الي خلتني اتلفت معقوله يشوفني وبس طلعو ركضت
عله سونه جريتها للشباك .
سونه:شبيج شكو ماريد اشوفه.
_اوكفي لاتتحركين قبل لا تدخل سلوم
طلعت اباوع للشباك من برا مايبين شي
صحت عليها سونه بعدج واكفه يم الشباك.
سونه:اي هسه غير افتهم شكو.
_جا هذا ليش محسسني انو
هو يشوفني .
سونه:هسه ارد عليج من الشباك
لو دخلين . ونسولف.
_دطلعي مو اختنكت.
سونه:اي بعد مو مال نوم طلعت الشمس.
_التفتت والكه سليمه صافنه عليه.
سليمه:ها رجعتي لسوادينج
تحجين ويا الحايط.
_طلعت سونه تضحك .
سونه:لا جانت تحجي وياي.
سليمه:يش انتي محجورة
وتحجي وياج من الشباك .
_غيرت الموصوع
تردن ريوك راح اسوي بيض.
سليمه:لا نعسانه عود كعدني الضهر
اروح اشوف ام طيبه لاتسويلها سالفه ..
_صارت حياتنا بالعكس اليل كاعدين وبالنهار انام
وغاب الباشا كم يوم سونه صحتها مو تمام وتشكي
من صفحتها .
سونه:احس سجين بخاصرتي.
سليمه:خابرت ربيع هسه يجي.
_اجه ربيع الي مستشفى متنقل
ربيع:يابه لازم اخصائي لان المسكن ينتهي
مفعوله ويرجع نفس الالم .
سليمه:اي باجر اخذها دنطيها ابرة .
_اجت مديحه ضربتها الابرة
مديحه:روحي سوي سونار خاف عندج رمل.
_وكل مرة تاجلها . وزاد المها بحيث اليل كله ماتنام
اضل تبجي من الالم. كوى قنعتها تروح .
سليمه:ام الشخاخ مو طفرين السياج
ترى يلكفونج ويودوج لفيلق.
_اطمني ماعندي احد اروحله
طلعن وقفلن الباب من برا حاولت اشغل نفسي نضفت وسويت عشى تاخر الوقت ضليت حايرة معقوله كل هذا يم الطبيب . ماعندي حل ثاني فتحت نقال سونه اتصلت بسليمه ماردت كررت الاتصال ماكو كلت اخابر مديحه ردت بملل.
مديحه:ماتخابرين اله وعندج سالفه.
_حاولت اغلس عله كلامها
كتلها انه قدر .
مديحه:يااا عبالي ام اعطوب.
_لو عندج مثل شعرها.
المهم راحن للدكتور ولحد الان ماكو .
مديحه:جا خابرتي سلوم.
_ماترد .
مديحه:جا وين ولن
بس يجوز ازدحام ترى تحليل وسونار
يتاخرن لاتخافين وهنه قافلات الباب عليج.
_اي مقفول .
مديحه:لا يضل بالج ثنيهن ماينخاف عليهن
بس ينخاف منهن .
_سديته وضليت افتر بالبيت
اباوع الساعه تسعه وليل شتا مامعقوله هيج يتاخرن سيطر عليه الخوف دخلت للغرفه وقفلت الباب عليه
كعدت ادعي ودموعي تصب سمعت طكطكه فركت وجهي استغفر يجوز يتراوالي . نوب مايمي شي ادافع بي عن نفسي بس حته لو حرامي اكيد مايكدر
يكسر الباب عليه. بين تفكيري
وصلتني ريحه عطر حركت خشمي اتاكد جريت مقدمت ملابسي اشم بيها لا مو عطري غمضت عيوني اريد اميز هل ريحه وين شامتها كمت للكنتور اتاكد
يجوز سونه جايبته نفشت الملابس ماكو صارت كبالي الجداحه اخذتها وعبالك اريد اي شي اشتت بي انتباهي
التفتت بخوف من سمعت خطوات قريبه عله الباب
كتمت انفاسي وعيوني تشخصت عله الباب ثواني
وسكنت الحركه مشيت عله اطراف اصابعي تقدمت للشباك ماكو شي بقيت بحاله ترقب عين للباب وعين
للشباك بس قوة العطر شككتني بوجود شخص بالبيت
معقوله الباشا لو محابس لان مستحيل يكون حرامي
ومخلي عطر حاولت اثير صوت فتحت الكنتور وسديته بقوة صار مثل الخيال عله شباك وكأنو احد يتسنط عليه طكت الجداحه بطكات متتاليه شهكت
من بين خيال واضح .اجاني صوته الخشن .
_اكو احد هنا ؟
_فكيت عيني عله وسعها هذا شلون دخل
رجع كرر سؤاله.
_سلاسل اذا تسمعيني .
_معقوله جاي عله سونه
كلت ماارد عليه اختفه صوته وخياله.طكيت الجداحه
رأسا ضهر يم الشباك مااعرف شلون باوعت.
للجداحه شنو هل صدفه ضليت اتفحص شكلها الغريب
راس حيه معدني والنار الي تطلع منها عله شكل السان
حته صوتها من تشتغل مثل الازيز ضغطت عليها.
بعناد اريد افهم شنو هل سر .ضحك .
ابو حيه:ههههههههههههه
قدر هاي جداحتي شجابها عندج ؟
______سلاسل______
_القهر يهيج الالم وانه هاي الفترة
عبالك الدنيا تريد تصحيني يوميه صافكتني مابينت
قهري كدام قدر اتصرف اعتيادي بس اخلص اليل ابجي
حاولت اطلع واطلع اختي من هل مستنقع ماكدرت
خسرت صحتي وكلبي ودموعي بسبب سهرات الباشا
الي يتعمد يبقى للصبح كليتي اذتني
حسيت بمعانات قدر من جانت تكول مااسيطر عله روحي عشت نفس الالم والزاد الطين بله سجنت ابوي الفلوس العندي بدت تقل لان سليمه زادت الاجار والمصرف ماردت احسس قدر لان ادري راح تحرم نفسها الاكل التفكير بمصيرنا دمرني خوفي من سليمه
خلاني مااطلع حفلات لان شكيت بيها تريد تسلم قدر لفيلق . ضغطت عله نفسي بس الابر كامت ماتسكني
وهيه لحت عله .
قدر:لخاطري كومي
فكري اذا صار بيج شي منو الي.
_الف وصيه وصيتها قبل مااطلع
قدر:شبيج هو هذا الباب شيفتحه لو دبابه .
_طلعت اجر بروحي جر تلكتنا صوله.
صوله:ها سلامات شبيج.
_مالي خلك احجي ردت عليها سليمه.
سليمه:صفحتها توجعها.
صوله:خاف حامل.
_اي يمكن من ذبان الباكله مالتج.
صوله:يابت الجلب .
_جرتني سليمه وهيه تضحك
وقبل مانوصل الركن اجت ام دعدوش
تهف بعبايتها ومخليه العلاكه فوك راسها.وكفت يمنا تباوعلي بحقد درت وجهي .
ام دعدوش:ها وين النيه .
سليمه:ماخذه سونه للطبيب.
ام دعدوش:اي جا شعبالج هاي حوبت دعدوش.
الكسرتي .كون مرض ماله علاج . اميلت محابس.
_التفتت عليها
تمشين لو اكنس بيج الشارع. ابنج جان واكف عله السياج ودفعته وتكسر. ابو المخدرات النذل بسببه اخوي انكتل وبس اسمع منج كلمه اروح لغازي اكله البضاعه جانت عدج عفت سليمه تحجي وياها
ومشيت تبعتني .
سليمه:بت الجحش . فوك ما علستي ابنها
_سونه:الج يوم واعلسج.
سليمه:جا فرخ البط عوام امج نجيه.
بت الجلب ،ونوب ماتنكسر عينج ماخذتج للطبيب.
سونه:دافعتلي من جيبج ترى ادري بالفلوس
الي اخذتيهن من ابو الباشا .لحد ماوصلنه العيادة
هيه تحجي سويت تحليل وسونار حولني الدكتور للمستشفى كال لازم تاخذين علاج مكثف .
سليمه:بس يخلص المغذي نطلع.
_حسيت الالم خف ونعست
بس ماكدرت اغمض بالي يم قدر
غمضت متهربه من سوالها .انتبهت عليه عبالها غفيت
ضلت كاعده وكل شويه تلفونها يدك .
سليمه؛شعدها ادك عليه الفكر.
_غلست جني مااسمعها
حسيت باب الغرفه انفتح . دك كلبي بخوف وقهر
ضليت مغمضه . عرفته من عطره حسيت انفاسه قريبه عله وجهي ، كتمت نفسي ابتعد يحجي وياها.
الباشا:شكال الدكتور ..
سليمه:التهاب حاد بالكله .
الباشا:شوكت يطلعكم .
سليمه:كال بس يخلص المغذي.
الباشا:تمام انه برا .
سليمه:لا تعب روحك احنه نروح .
الباشا:انتي ترجعين لبيتج وهيه تروح وياي.
سليمه:دخيلك باشا ماعولت
اسد حلك ام طيبه.
_عرفته طلع من طبكت الباب فتحت عيني
لكيتها تصفن . سندت روحي
كامت وهيه تحجي.
سليمه:ماضن جنتي نايمه وسمعتي
شوفيلج عذر لان ام طيبه تلعب بينا لعب.
_ماخايفه منها . بس مااروح ويا كومي خل نطلع.
سليمه:لو يسحلج لا ترحين ويا .
_صاحت الممرضه شالت المغذي
وطلعنا لكينا واكف اديه بجيوبه التفت يباوع علينا
ليش هيج متغير التعب مبين عله وجه
رغم ماصار كم يوم من شفته . تقدم يمشي بثكل.
الباشا:حمد الله على السلامة.
_هزيت راسي تمام.
الباشا:ترحين وياي ترتاحين كم يوم بالمزرعه
يحتاجلج علاج واكل ومدارت .
_لا اروح للبيت لان اختي وحدها.
الباشا:اجيبها يمج.
_رفعت راسي خزرته ضحك.
الباشا:قصدي تبقون هناك لوحدكم
صدكي بس اخلي الحراس يمكم .
سونه:مشكور ماارتاح اله بغرفتي .اشر لسليمه امشي كدامنا وهو صار بصفي. ضليت امدنكه احس نضراته
مسلطه عليه لحد ماوصلنه للسيارة مانطق حرف
ردت اصعد ورا جرني وفتح باب الصدر صعدت
وهو افتر افتر لجهة السايق . طول الطريق تلفون سليمه يدك وصلنه لراس الشارع ردت انزل لزم ايدي التفتت عليه .
الباشا:سمرة مشتاق لصوتج .
_بعدني ماراده عليه شهكت سليمه
التفتنا عليها مسلطه عيونها للشارع باوعت شكو
واشوف ام طيبه واكفه ايدها بخاصرتها .
الباشا:شبيج ام الحب
معقوله تخافين منها لهاي الدرجه.
_وبس نزلت توجهت عليه ام طيبه
التفتت للباشا .بسرعه نزل جرني ورا ضهرة
ام طيبه:لو تضمها بشيشه هم الوحها.
_التفتة سليمه للباشا غمزتله
يلزم ام طيبه وجرتني تركض بيه.
سليمه:لازم اتخلص منها هاي ماراح تكف من عدنا.
_التفتت عليها تولي شبيج
شايلتلها هم.
سليمه:عايزه ومحابس
لازملي الركن.
_ترى مللتيني
شنو انوب يتحكمون بيه بعدها ماراده
عليه وام طيبه صاحت عله سليمه التفتنا.
ام طيبه:سلوووم
عود رجعي الولد لاهله .
شكرا لزيارتكم عالم روايات سكيرهوم
