رواية كريات الدم السوداء الجزء الثاني الفصل الثلاثون بقلم زحل شريف
---سلاسل---
-گأنو داخله مكان بي خطر أتلفت بينهم رجليه تبنچت
وجود الشيخ المعمم وهذا عرفته سيد من الچفيه الخضرة الي مخليها على جتفه بس مااذكر وين شايفته عيوني تسلطت على اختي الي مدنكه وماعرف شنو هل الغطه،
مثل العلك الجبير أو يسمونه جفجاف مشمور عليها التفتو عليه اشرولي بمعنى لاطلعين صوت درت وجهي لخالة دنكت
مديحه واكفه بالباب أيدها على حلگها، وصدمتها مو اقل من صدمتي درت اباوع لقدر الي ونت بخوف وهمه مدري شيقرون عليها صحت شبيها،،، ويا ما سمعت صوتي شمرت الغطه و شالت راسها،، شهكت من شفتها اباوع مامصدكه صفحه من وجها زرگه شلون واحد طاكها بوكس ،، احس نار واشتعلت بيه معقولة ثابت مستحيل وليش شسوت حتى كاتلها هيج تقدمت عليها مد ايدة الشيخ مانعني،،باوعتله مستغربه وهيه بجت بصوت مبحوح .
قدر::اخذيني اخذيني .
-توجهت عليها متجاهلة وجود السيد والشيخ
ابتعدو من يمها دنكت عليها حظنتها اششش لاتبجين
هاي أنه يمج شبيج منو وياج .
قدر::اخذيني اخذيني .
-تحجي وتباوع للشيخ بخوف ادنت مديحه كعدت يمها لزمت أيدها ،، وهذول مدري شيقرون مدري يتمتمون بكلمات
مامسموعه ،،دخل الحجي وأخو محمد .
ابو اسعد::تعالن يأبه خلو السيد يعالجها .
-رفعت راسي اباوعله ، شبيها ويعالجها؟
ابو اسعد::انضرت يأبه تعالي برا افهمج.
-ام الباشا بس دموعها تصب باوعتلها متسأله شبيها اختي
خاله ليش هيج معقولة تكتلوها وهيه نفسه وعملية
وفيه::لا لا يا ماما الله يشهد محد ماد ايدة عليها
بس تدرين النفسه قبرها بين رجليها والبنيه نصدفت ومن خرعتها وخوفها مدري بيمن طك وجها وطاحت ولج والله من أمس احنى ممرودين عليها مرد واحتارينا شنسوي .
-مافهمت شي من حجيهم التفتت لمديحه الي تحاول
تهدء قدر الشيخ والسيد مدنكين لأن من ذبت الجفجاف
شعرها طلع لمته مديحه وغطتها ادنت خاله دور على شال
أنطته لمديحه لفته على رأسها ،،وكامت موجها كلامها للشيخ
مديحه::إذا ضر نفاس نعرفله عوفوها احنى نعالجها
-باوعولها مامصدگين مدري مستهزئين هزت راسها اي
الشيخ::بابا هو مو لعب هاي أمور يرادلها انسان يعرف
بالروحانيات .
مديحه::وأحنه نعرف بالزار
-حجتها بتحدي فك حلكه الشيخ والتفت يباوع للحجي
السيد ترخص وطلع وهمه ضلو يصفنون قدر ماعلى لسانها
غير كلمة اخذيني ،،احس روحي بدوامه كمت ماشوف
حيرة خوف وحده . مديحه واكفه كبال الحجي وأخو والشيخ وهمه مستنكرين كلامها ويستغفرون عقلي انشل
ماعرفت شسوي بقيت ساكته عيوني لقدر الي نضرات الخوف بعيونها هدت حيلي ماانتبهت لعدم وجود ثابت
لحد ما دخل علينا سلم ردو عليه باوعلنا حجاله الحجي
عن كلام مديحه هز رأسه ماراضي وتقرب يريد يحجي ويا
قدر، صرت بوجها باوعلي متفاجئ .
ثابت::شبيج يأبه ترى مو وقت سوالفج.
-بعدني ماسولفت طلعهم وخليني اشوف علت اختي
ونوب نحجي .
ثابت::لج فهمي جاي يكولون مضرورة خلي الشيخ
يرقيها يمعودة .
-انه اعرف اعالجها طلعهم ماتشوفها مرعوبه منهم.
حجيتها بصوت عالي الشيخ طلع تبعه الحجي ومحمد
بقت خاله واكفه بالباب و مديحه دارت لقدر شمرت الشال منها وكومتها من الكاع ونت تبجي التفتت باوعتلها تمنيت
لو عندي القدرة وأكدر اسحلهم سحل نزلت دموعي وهمه واكفين .
مديحه::بس طلعو كلكم خلوني اغير ملابسها
ثابت::وخري خل اشيلها للحمام .
-حجاها وادنه وكفت بوجه صاح.
ثابت::شبيج يمعودة شو وخري .
-اطلع اختي أنه اعرفلها.
وفيه::لج ماما صل على محمد واذكري الله خلي يشيلها
للحمام انتن ماتكدرن وترى عمليتها بعدها لانوب يصير بيها شي .
-ردت مديحه من وراي .
مديحه::خاله بس انطونه مجال ترى نعرف
- كلمه منا وكلمه مني على صوتنا دخل الحجي
صاحت مديحه
مديحه::يمعودين البت راح تروح من أيدنا .
ابو اسعد::اكيد من الخوف .
-تحجي وتضرب بوجه قدر تريد تصحيها طلعت خاله
تركض ورجعت بيدها ماي رشت بوجها شهكت بس فكت عينها بجت ضلت مديحه حاظنتها دفعني ثابت وتقدم شالها
ابوعلها ملابسها ناكعه دنكت امسح بدموعي
وفيه::لا تخافين مابيها شي.
-طلع وأحنى ورا دخلها للحمام دخلت وياها اشرتله اطلع وقفلت الباب حتى مديحه مالحكت تدخل وياي فتحت الماي وسبحتها عيوني تصب وهيه مثل الطفل بيدي بس تناشغ
عكدت حواجبي من شفت اثر على رگبتها مديت ايدي اتلمسه فزت بخوف سألتها شنو هذا منو خانكج دفعت
ايدي و تجاهلت وهيه تكلي .
قدر::اخذيني منا ؟
-حجيت بصوت ناصي اي اخذج بس كليلي شبيج
هذا ثابت هيج ماخلتني اكمل هزت راسها لا وبجت بصوت.
قدر::طلعيني منا .
-اي بس سكتي ،، حتى يخلونا نطلع هزت راسها اي وسكتت لحد ماكملتها فتحت الباب لكيت خاله محضره ملابسها اخذتهن احتاريت شلون ألبسها شو تنزف رديت فتحت الباب أشرت لخاله كلت الها .
وفيه::اي ماما طبيعي لان بعدها نفسه جا غير لحد ماتطلع الاربعين يله تنضف يله بنيتي أنه خليتلج احتياجاتها
-موقف ماتمنيته كوى كملتها وفتحت الباب اجه شالها
دخلها الغرفه لكيت مديحه ونغم مغيرات الفراش نومها
على الجربايه بقيت اباوع محتارة نغم وخاله طلعن وهو تبعهن وقبل مايطلع سد الباب علينا اسمعهم يحجون
أشرت لمديحه تعاي ادنت عليه حجيتلها على الأثر الي برگبت قدر .
مديحه::لا تحجين اسكتي بس خلينا نصحيها وبعدين
عود تصرفي ،،تلفونج ماسكت الباشا يدك عليج.
-هزيت راسي اي وعيني لقدر الي تبجي بونين يكسر الگلب
عقلي فصل مديحه تحجي مااسمع شتگول مديت ايدي للنقال دكيت عليه قبل مايحجي گتله وينك ؟
الباشا::بالطريق اقل الساعه اوصل سونه
لاتسوين شي لحد مااجي تسمعني
ـ هو يحجي وأنه العبرة خانكتني اريد ارد ماكدرت.
الباشا:: ابد لا تحجين وديري بالج تتجاوزين
على الحجي .
-سديته بدون مارد عليه كل همهم نفسهم حتى ماسألني على قدر بس لو اعرف شصاير ومنو وياها نبهني من زحمه تفكيري دخول خاله بيدها عصير.
وفيه::گومي شربيها من أمس ماماكله شي ،،يله عيوني ما بيها شي أن شاءالله ترى ثابت ماجان موجود ومن وصل وشافها تخبل ،، يا ماما لاتلومينه قابل هينه عليه .
-سكتت و مديحه كامت تشرب قدر ماقبلت ضلت تلج
قدر::اخذيني اخذيني منا عفيه اريد امي
ودوني الها .
-كامت خاله كعدت يمها لزمت أيدها وتحجي وياها
مديحه تقنع تريدها تشرب من العصير دخل ثابت
باوعتله بعتب دار وجها للباب وصاح .
ثابت::تعال يأبه .
-دخل مولي بيده علاكه سلم وأشر لامه تبعد عن قدر
باوعتلهم صحت شكو ؟
مولي::نشكللها مغذي خطيه مو ضغطها يهبط وتوكع
لان ماماگله .
-غمزتلي مديحه بمعنى اسكتي،، كوى اقتنعت قدر
شكللها مغذي وخلالها بي إبرة عرفته انطاها مهدء ماحجيت طلع مولي وثابت بقه واكف يمها دارت وجها منه كامت خاله
واشرتله طلعو ثنينهم شويه وبدت تغفي لحد ما غمضت عيونها كامت مديحه كعدت يمي .
مديحه::شوفي مال يخلونج اطلعينها مستحيل فكليلهم
يروحون وأحنه يمها
-وشلون اعالجها غير اعرف شبيها ؟
مديحه::هاي سهله ترى عادي تصير للنفسه هيج حالات
اي لا تباوعلي هيج .
-ترى مو وكت سوالفج ومانسيت جفصتج كدامهم
تكليلهم نعرف بالزار .
مديحه::بت الصخل بس افهمي ترى اعرف،، جنت اشوف
ابو .....تذكرين عليهم .
-هزيت راسي اي.
مديحه::دوم جانن يجنها نسوان هيج حالتهن لو نفسه
ومخترعه وقت المغرب لو دايسه لو بسبب مشكله
-يعني تتحسن تطيب لو لا بس فهميني
مديحه::اي شبيج ترى ما بيها شي بس خل اروح للسوك
اجيب شغلات من العطار ،، وأنه اعالجها
-كفختها تردين تجربين افكارج بيها بت التالف
شبيج انتي شبيج كله عندج ضحك
مديحه::ولج وروح امي مو ضحك اگلج أنه جنت
اكعد يم ام.... واعرف وبعدين كله بخور وسبح
لا تاكل منه ولا تشرب مو شفتي الشيخ الجايبينا أهل ثابت.
-نحجي بصوت ناصي جنا بايكين بوگه ،، اندفع الباب
طفرت مديحه كعدت على صفحة ،،دخلت نغم بيدها صينيه
نغم::اكللجن لگمه مادامها نامت هسه تكعد
ما بيها غير العافيه يله .
-مااشتهي العسل صدكيني ،،بس اريد اسألج هيه شبيها
ليش هيج قبل ماتجيكم جانت تحجي ويانه ما بيها شي
اذا هيه وثابت متعاركين عادي تصير بس .
نغم::لا لا وداعت ابوي اصلا ثابت ماجان هنا وهيه.
-سكتت ماكملت كلامها بدخلت خاله
وفيه::اكللجن شويه ماما .
مديحه::لو جوعانين مانستحي منج .
-وروح امي مااشتهي بس رقاوي وين ماشفتها
نغم::نامت خليتها بالغرفه الثانيه وبنين يمها لاتخافين عليها
دكلن شويه بداعتي عليجن إذا الي خاطر
-حرجتنا تحلف بينا ادنت مديحه شربت من البن وأنه
هم اكلت خاشوگه تمن وشربت لبن شالت الصينيه ورا شويه دخلت بنين جايبه جاي خلت الصينيه بالكاع ودنكت بوستنا
بنين::ماسلمت عليجن التهيتن بالهوسه.
-كعدت يمنا شويه وطلعت هيه وامها ،، بعدني اريد أحاجي مديحه ودخل الباشا بس شفته صبن دموعي باوعلي
الباشا::ها عليمن تبجين.
-گلهم خلي أخذ اختي يمي
الباشا::وهنا منو مضايقج قابل ماتعرفيهم شو ثابت صاحبج
-دخل ثابت وهو يحجي
ثابت::لا يأبه لا عدها صاحب ولا صديق .
-صاحبي الي اخابرة اساله عن اختي يگلي أنه ماموجود
ومرة يكول نسيت.
ثابت::ترى فعلا ماجنت موجود من اتصتلي گتلج بالطريق
واهلي ماكالولي خافو استعجل بسياقتي واسوي حادث.
-ومن وصلت وشفتها هيج ليش ماخابرني
ثابت::لأن اعرف راح تسوين هوسه وأنه
وماجانت متوقع تنتكس حالتها عبالي للصبح تصحى .
-سكتت وهو تقرب على قدر يباوعلها سد المغذي وكعد بطرف الجربايه شاله من أيدها ولف لاسق عليها .
ثابت::نأخذها للدكتور بس تكعد
-ردت مديحه
مديحه::مايحتاج دكتور ترى گتلكم اعرف علاجها
-باوعلها الباشا ردت مأكده كلامها
مديحه:: باشا أنته جنت تعرف الناس الي بالصعده
اكيد سامع بيت ابو ....
الباشا::اي اذكر هيج شي بس شبيهم؟
مديحه::أنه جنت اشوف هيج حالات تجيهم يعالجونها
-ضلت مديحه تحجيلهم ثابت مامقتنع بس الباشا كالها
الباشا:: اذا تعرفين توكلي على الله.
مديحه::بس احتاج شغلات من العطار.
الباشا::اي خلي امي تجيبهن الج .
مديحه::لازم أنه اروح خلي امك تروح وياي .
-كام ثابت وشرلها يله .
-هزت راسها اي خذت جنطتها وطلعت ورا بقى الباشا
كاعد مسافه عني باوعتله طلع جكارة شعلها سحب نفس ونفخ الدخان وهل حرگة اعرفها يعني عنده مشكله لو حاير بشي ويفكر حجه وعينه لقدر .
الباشا::ادري شايله بخاطرج مني وعبالج بعدت عنج
-ماابالي غير اختي أنته اول وتالي تبعد ،، التفتت باوعلي
الباشا::عندي ضرف وماردت أواجه بشر اختليت بنفسي
ضاگ صدري وطلعت للزيارة رحت دخلت عند أهل البيت
شگيت حالتي أو طلبت العفو من رب العالمين على عقوبته
الي نزلها بيه .
-باوعتله مافاهمه شي كام وهو يتحسر قبل مايطلع
گتله اريد اخذها لبيتي .
الباشا::خلي تصحى .
-حجاها وطلع عاف الباب مال الغرفه مفتوح سمعت صوت رقاوي تبجي كمت مديت راسي محد بالصاله طلعت اتبع الصوت لكيت بنين ونغم بالغرفه الثانيه وتينه بيد الباشا يبوس بيها وهيه تبجي انطاها الهن وطلع . دنكت اخذتها وأخذت مميتها بقن وحده تباوع الثانيه طلعت من ينهن صاحت نغم
نغم::لا دخليها يم قدر .
-التفتت عليها مستغربه ؟
نغم::قصدي لاتبجي وتكعد امها .
ـ هزيت راسي اي وكعدت بالصاله اجن يمي .
نغم::جا خلني اروح اردس بيتنا اشوف شصار هناك.
-باوعتلها دنكت تحجي بقهر
نغم::احنى عدنا ضرف بالبيت اسم عليج وكلش تعبانين
-خير خو ماكو شي
نغم::لابس اريج هم تعبانه وطفلها مريض وحالته مو تمام
مدري عاد امها بقت يمها لو اخذتها لأن عفتهن واجيت
-ان شا الله ما بيها غير العافيه
نغم::رحمه الله والديج
-لبست عبايتها وطلعت و بنين كامت تعزل بالبيت
أنه مخليه تينه بحظني شربت مميتها رفعتها على كتفي اطبطب على ضهرها بقيت عيني لغرفه قدر وأبوس بتينه صفنت بوجها اباوع ملامحها صدك بيها شبه مني بس عيونها لونهن يخبل دخلت مديحه دنكت باست تينه كعدت گبالي وبيدها علاكه .
مديحه::ها شنو كعدت بعدها ؟
-لا بعدها جا ثابت وخاله وين ؟ردت وهيه تفتح العلاكه
واطلع منها اكياس صغار بيهن اعشاب
مديحه::واحنى بالسوگ خابرو عليهم اگلج
يمكن عدهم طلابه .
-حجتها وهيه تتلفت خاف تسمعها بنين غمزتلها سكتي
اگلج شو ماخلتني نغم ادخل تينه لامها
مديحه:: همزين ذكرتيني كامت وهيه تحجي
مديحه::بنون وينج عفيه تعاي وياي
-مدت راسها بنين من المطبخ
بنين::تعاي هاي أنه
-كمت دخلت تينه الغرفه الثانيه عدلت كريكوتها وخليتها
بي ردت اطلع ماهان عليه اعوفها خطيه ضلت عيونها وراي دنكت شتلها وتوجهت للبنات لكيت مديحه تخبط وبنين تباوعلها بتركيز جدر على الطباخ بي ماي يفور مدري شنو حطت بي بس ريحه اعشاب ولون مثل عصير التمر الهندي
مديحه::بنون طليعيلي فحم اذا اكو
-وهاي بنين شلون المساعد جوى ايد دكتور
شتكلها تسوي وتتحركه بسرعه .
بنين::ترى عدنا منقله صغيرة
مديحه::جيبيها وخلي الفحم بيها ،، انتي على طهارة
-هزت راسها بنين بمعنى اي
مديحه::روحي جيبي قران وتعاي
-كامت بنين و مديحه ترست دولكه ،، اباوعلها جرت بطل ماي ورد فرغته بالدولكه، اجت بنين مخليه القران على كلبها اشرتلها مديحه تكعد
مديحه::خلي ايدج بهذا الماي واقري الآيات الاگلج عليهن
ومن تكملين انفخي بالدولكه .
-نفذت بنين كعدت تقرء و مديحه سوتلها جمريه عفتهن
اريد اودي تينه لفراشها گلت خل أمد راسي على قدر خاف
كعدت دفعت الباب ودخلت ويا دخلت التفتت اريد افتهم
مالحكت هيه شافتني وهيه صرخت .
قدر::لاااااا هديني لا
-طفرت من الجربايه تصرخ تريد تطلع وتباوعلي بخوف
اجن مديحه وبنين يركضن ماانتبهت لبنين شلون اخذت
تينه مني ركضت لقدر لزمتها وهيه ترفس بيدي
مديحه::لا تخافين بس انتبهي هاي أحنى يمج
-بعدنا نحاول نلزمها ،،دخلت خاله وثابت وراها
همزين لزموها وياي .
قدر::خنكتني خنكتني .
-جتفها ثابت وجرها للفراش .
ثابت::اسم الله اسم الله لاتخافين فكي عيونج يأبه
هذا أنه وذني خواتج شوفي
-تباوع بخوف التفتت على مديحه اشرتلي تبعتها
لاكتنا بنين .
بنين::ها سكتت؟
مديحه::اي بس تعاي وياي
-دخلنا للمطبخ شالت المنقله واشرت لبنين تبعيني
مديحه::جيبي القران اريدج تفتحينا بوجها ٣ مرات
ـضليت فاگه حلكي دخلن لغرفه قدر خلن المنقله بالكاع
و مديحه شمرت بنصها بخور احس اختنكت خرب ابوج طلعت من الغرفه أكح وهيه وبنين جنهن عجايز اصواتهن علت بالصلوات وخاله وياهن وثابت هم رجعت دخلت الدخان مضلم الغرفه كعدت بصف قدر فزت تصرخ .
قدر::لااااا يمممه الحكيني ثابتتتتت خاله
ودوني لاختييييي .
-حظنتها اريدها بس تهدء هاي أنه هنا لاتخافين
صحت خرب ابوج مديحه طلعي هاي المدخنه .
مديحه::تسدين حلكج لو ااطلعين لااحطج بنص الجمر
-اشرت لثابت الزمها ادنت بنين يمي بحركه سريعه
حطت القران بوجها ضليت فاگه حلكي و مديحه تصيح
مديحه::دير بالك لاتخليها تكوم الزموها حيل .
-أنه وبنين لزمنا رجليها وثابت مجتفها وهيه تصرخ .
قدر::خنكتني هيه خنكتني رادت تموتني ولجج يماااااا
ـضلت ترفس بينا طلعت مديحه وهيه تشيل المنقله .
مديحه::بنين فتحي الشباك وشغلي المروحه.
-كامت بنين جنها ألي نفذت الطلبته منها مديحه
قدر انشحطت من الصريخ والدخان ضليت امسح بوجها
وهيه مدري شتحجي ماخليت أبالي كلامها خف الدخان
دخلت مديحه بيدها بطل ماي تقربت علينا فزيت من رشته
يااا شبيج يمعودة
مديحه::وخري اذا ماتتحملين .
قدر::لا لا تعوفين سونه لاتعوفين اخذيني وياج
تخنكني تجي عليه تخنكني وتحط ابنها بوجهي
ـحجتها وصرخت
قدر::لاااااااا الحكوني
-تصرخ وتريد تفلت روحها من ثابت لزمت أيدها ماعوفج لاتخافين بس اوكفي شبيج يمعودة وين وين تريدين
قدر::طلعيني منا طلعينييييي
ـحظنتها و مديحه تصلي وتسمي بوجها اخر شي فقدت تخبلت كمت ادك على وجهي ولج شسويتي بيها ماتت .
مديحه::ما بيها شي بس سدي حلكج.
- مددها ثابت على فراشها و مديحه تخلي من البطل بيدها
وتمسح وجه قدر أشرت لبنين أنطتها ماي غسلت وجهها
نشغت قدر وهيه تناشغ .
وفيه::أن شاءالله من هل فقيرة ياربي تشافي قدر
على نيتها .
مديحه::أن شاءالله خاله ما بيها شي
بس هذا مو نفاس هاي خرعه .
ـردت خاله بتلگى.
وفيه::چا شنو يخاله كتلج هيه فزت أنه كتلها لاتجين
مايصير انتي نفسه وتنضرين وحتى ماردتها تدخل على اريج
بس الله يسلمها زعلت تالي سكتت وهل طاحت
-ثابت جنه مايسمعنا بس أنه متاگده باله يمنا سكتت اريد الزم راس خيط اعرف شصاير ومنو مسوي بيها هيج طلع ثابت وخاله ضلت تسولف علينا كامت بنين
بنين::رايحه للبيت نغم وحدها
وفيه::اي روحي.
- طلعت بنين وخاله بقت أنه بالي مو يمها بس مديحه اندمجت وياها،، اباوع لقدر تتفزز كمت وأنه احجي راح اجيب تينه فزت خاله معترضه.
وفيه::لا خاله لا دخليها يمها .
-التفتت عليها ليش ؟
وفيه::مو خاف قدر تفز وتصرخ والبنيه تخترع نوب
نعم عليها .
-مااقتنعت رديت لا خاله يجوز من تشوف بنتها ترتاح
كامت واعتراضها شككني أكثر
وفيه::لا يا ماما البنيه ماتحمل وقدر مو بوعيها
وخاف تأذي بنيتها نوب .
-شسالفه خاله تأذي بنتها شنو ترى ما بيها شي
حجيتها وطلعت لحكتني هيه و مديحه لكيت ثابت بالصاله وتينه بحظنه والحجي يمه باوعولي مستغربين لأن مبين عليه مزعوجه كام الحجي وهو يسأل
ابو اسعد::ها شلونها قيادة ؟
وفيه::نامت خطيه .
مااهتميت لكلامهم اقتربت من ثابت مديت ايدي قاصده ينطيني تينه خلاها بيدي وگال .
ثابت::لادخليها الغرفه .
-حظنتها ورديت ليش غير اعرف شنو الي مخوفكم
من قدر إذا خلينا بنتها يمها ؟ حجيت وأنه اباوعلهم
رد الحجي .
ابو اسعد::يأبه طفله نفاس وامها مريضه ميصير .
-وكل ام تتمرض يبعدون طفلها منها ؟
ثابت::هيه مصخنه مثلا لو يكلولج ضر .
-وانه ماشوفه ضر
ثابت::اي ان كان هو اسمه مرض وتشوفيها شلون تتفزز
واذا صرخت الطفله تنخرع .
-ناوشته تينه ودرت وجهي متوجه الغرفه واحجي
خوش خليني أخذ اختي يمي لحد ماتطيب وانتو ديرو بالكم
على الطفله صاح بانزعاج .
ثابت::وهنا ماتتعالج لو احد مضايقج تبقى بيتها وتتعالج
اصلا أنه ناوي اخذها للدكتور باجر
- وكفت باب الغرفه ورديت ،،لا مايحتاجلها دكتور هيه مصخنه مثلا ؟ باوعلي ماراضي عفتهم ودخلت لقدر لكيتها عافيه دخلو كلهم وراي .
ابو اسعد::يأبه ترى هنا افضل لأن كلنا يمها،، خاف تتخربط
وهل شفتي شلون ماسيطرتو عليها من تصرخ ليش تعاندين
قابل احنى نكرها لو مامهتمين لامرها بس شبيدنا.
-سكتت بس كلام ثابت غثني .
ثابت::ماتطلع من بيتها .
-باوعتله يعني شنو تمنعني لو ردت اخذها.
ثابت::زوجتي وام بنتي .
-قبل ماتصير زوجتك هيه اختي لو مالي حق
ثابت::هو ورث وتطالبين بي جاي نكلج مريضه،، مو مال
تاخذيها كافي عاد ترى مالنا خلك.
-واضن تسمعها تصيح اخذيني يجوز من اطلعها منا ترتاح
ثابت::وانتي تمشين بكلامها مريضه وتحجي بدون تركيز
-قصدك مجنونه ؟
ثابت::اوووو شتردين بالضبط كتلج ماتطلع منا عاجبج
تبقين حياج ماعاجبج مانجبرج خلصص .
ابو اسعد::صلو على محمد شبيكم يأبه تعال أطلع أنته
ثنينكم اعصابكم تعبانه لاتتناقشون خلونه بالبنية .
-التفتت على مديحه اشرتلها يله دنكت شلت جنطتي
ردت اطلع لزمتني خاله
وفيه::على بختج وأنه اكول سونه عاقله ومعدله
-مابيها عقل خاله اختي أحد كاتلها باوعتلي والتفتت عليهم
هز رأسه الحجي واشرلي تبعيني طلعت ورا
ابو اسعد::تعاي اكعدي احاجيج
-كعدت وأنه افور
ابو اسعد::تدرين بأريج ولدت
-هزيت راسي اي
ابو اسعد::ولا اعتراض على خلقه بس طفلها طلع مريض
مانعرف نقص أو تشوه ولادي فنصدمت خطيه والصدك
كلنا نصدمنا بس هيه ام فنهارت بحيث ماتقبلت الطفل
حاولنا وياها وزوجها ماقصر يأبه بس اطينا مجال نشوف حالته نحصل دكتور يشخص حالته رفضت تتقبله حتى مارضعته تكتمنا على الموضوع تجي الناس تبارك مانطلع الطفل الله شاهد ماردنا قدر تجي خفنا عليها بس .
-هو يحجي وأنه أتلفت بينهم ثابت كعد كبالنا ومديحه
وخاله واكفات اباب الغرفه ويبجن كمل الحجي كلامه
ابو اسعد::عاد قدر داخله عليها وذيج متخبله
أنه جنت اصلي المغرب وسمعت الهوسه مدري شلون
كملت صلاتي وكمت دخلت لكيت قدر تصرخ نريد نلزمها
وهيه اطفر منا ومنا ركضت وعثرت طاحت وهذا الي بوجها
من أثر الطيحه الله يشهد هذا الشفته
ـبس اثر بركبتها مال واحد خانكها اصابع مطبوعات
بركبتها عمو وقدر تصيح خنكتني ،، واكيد شفتو بس
ماتنطون باريج.
ابو اسعد::اي مانعرف هل متعاركات وهذيج خنكتها
ترى ماندري شنو الصار ذيج حالها اخس من حال اختج
هم نفسه نروح نكتلها وزوجها ماجان موجود .
وفيه::والله من خابرنا اسعد تخبل بس شيريد يسوي
نفسه هم يروح يبتلي بيها وهيه بدون كلشي متخبله
-سكتت محتارة وهمه ضلو يشكون حال اريج اجه الباشا
تلكو يسألون عن اريج .
ابو اسعد::ها شنو وضع زوجتك؟
الباشا::ضربوها مهدء وعمتي بقت يمها شلونها قدر
وفيه::يا يمه مالها لون .
-گتلهم ،،زين خلوني احط بنتها يمها بلكي من تشوفها ترتاح.
وفيه::بساعه الهوسه لزمنا قدر وغسلنالها وكعدناها
جبنا تينه لحظنها بس شافتها صرخت ماتريد تلزمها
يمكن يتراولها شي ومخترعه .
-غمزتلي مديحه كمت دخلت لغرفه قدر وهيه وراي .
مديحه::لهذا السبب يخافون يخلون بنتها يمها
-والحل شسوي گليلي .
مديحه::الناس مالهم ذنب هم خطيه ،، بس لاتخلين بنتها
بعيدة ترى تنساها والطفله على الريحه واحتمال تتعود على بنين مو بقصدهم بس .
-بس شنو؟
مديحه::من الشفته بالصعدة الطفل الي يردن يبيعونه
بس يبعد وهو بهيج عمر ينسى بالاخص إذا مميه
واذا تعودت على غير ريحة امها بعد ماتتقبلها.
- فزت قدر تصيح كمنا يمها.
قدر::لا وخري وخري مني لاااااااا
-حظنتها و مديحه ركضت جابت بطل الماي ترش بوجها
لحد ماهدءت وهمه واكفين يباوعون .
قدر::اخذيني اخذيني منا.
-باوعت لثابت بمعنى ها ، دار وجها وطلع الحجي بس يستغفر وخاله تقرأ وتسمي و مديحه طلعت ورجعت
بيدها الجدر الجان على الطباخ حطته بالكاع وكالتلها
مديحه::خلي رجليج بي يله قيادة خاب تخافين
واحنى نخوف الجن وأهله .
وفيه::بعد امج يامديحه المعدله .
-كوى اقتنعت قدر لحد ماكتلها اخذج وياي نزلت رجليها
بالماي و مديحه ضلت إتمتم عليها هدئت شويه ،،شالن الجدر ونشفت رجليها طلعت خاله شويه ورجعت بيدها عصير .
وفيه::يله اشربي شويه ماما نشف ريجج سودة عليه
عين الماصلت على النبي .
-كسرت خاطري تحجي وتمسح دموعها بطرف شالها
خذت منها العصير شربت قدر شويه
وفيه::ربي يجعل بي الشفى بحق الحسين عليه السلام
-خلص اليوم بين بخور مديحه وصلوات خاله وثابت يطب ويطلع علينا لليل أجت نغم جايبه اكل كوى اكلنا احس راسي يريد ينفجر سالتها جا الحجي وخاله وين
نغم::راحت لأن عدنا ناس ترى احنى هم مخبوصين مناك
بأريج وهم جابو السيد يقرأ عليها نوب تخبلت بالزايد
-ادنت مديحه تسألها بفضول
مديحه::هيه شبيها وابنها شبي ؟
-ردت نغم وهيه تستغفر .
نغم::اسم الله على السامعين الطفل مشوه بس تشوه
غريب خطيه متنا قهر عليه خو اسعد شصار بي .
مديحه::جا من خذت سونار ماشافته ؟
نغم:: حتى بالمستشفى سألونا شعجب ماعدكم علم عبالهم ماماخذين سونار بس من كنالهم تفاجئو نوب ضلو يلومون
بالدكتور كالو المفروض تبلغكم ،، بعد شنسوي المهم ماراوينا
لاريج كنالها بالخدج ،، لحد ما وصلنا البيت امها ضلت تلح
والطفل يبجي خلينا يمها هيه شافته وهيه تخبلت
مديحه::طبعا الله يساعدها بس عادي هسه
يخلون للفارة اذان .
-حجتها والتفتت عليه تسأل .
مديحه::اگلج جا هيه الفأرة ماعدها اذان ؟
-وانه شمدريني شو تسأليني هيه بت عمي مثلا؟
-غصت نغم تضحك.
مديحه::لا صدك يعني ليش يكولون هيج يعني الفأرة
ماعدها بس أنه شايفتها .
- رغم قهري وحالة قدر ضحكت
درت وجهي منها نوب هيه شلون الي فطنت على روحها.
مديحه::استغفر الله ربي لا تحسبه عليه شي .
-رفعت حاجبي مافهمت شيحسبه ؟دارت وجها لنغم
مديحه::كملي خطيه كملي .
نغم::اي عاد كالت ماريدة لاتقربونه يمي تخبلت تصيح طلعو
امها ضلت محتارة وخاله انخبصنا كلها تبجي.
مديحه::هو شنو جيس اندومي وماتريده غير ابنها.
-راح اكوم احمسج حمس سدي حلكج.
مديحه::خاب فلك وعلي ،، كملي خيه كملي .
-شتكمل ولج تكلج البت متخبله الله يعينها اكيد موهين عليها طبيعي انصدمت .
مديحه::أنه اريد اطيح على العله مال قدر .
نغم::اي افتهمج .
مديحه::شوف المعدله شلون فهمتني ،،ياأم اعطوب
انتي سكتي.
-سكتت ونغم كملت كلامها.
نغم::اي عاد اجت قدر سودة عليه شحلاتها ماتدري خطيه
الله شاهد خاله مارادتها تدخل عليها اريج نايمه أو تتهرب
من الناس المهم التهينا بتينه وجانن عدنا البنات كلهن ورا الغدة راحن للمغرب كمنا نصلي وبنين وقدر بقن بالمطبخ
سمعت الهوسه اول وحده دخلت عليهن بنين طلعت قدر مخترعه بنين تكول لكيتها خانكتها .
-نزلن دموعي بقهر سودة عليه اكيد خافت هيه اصلا خوافه.
نغم::ترى ثابت ماجان موجود ولا اسعد وعمو تخبل
بس شيسوون ذيج هم تعارضت وضلت تصرخ نوب
همزين مااذت وليدها وهسه امها مكابلتها وكاعده
مديحه::إذا تردون اعالجها.
-خرب ابوج اسكتي شتعالجين .
نغم::يا ليش ترى الها اجر مهما كان نفسه وخطيه
-شبيج خيه شنو معالج مديحه مو هاي قدر هل كدامج
شنو طابت مثلا شو بس ريحه الدخان خنكتنا .
مديحه::غير اليوم بدينا وهسه يله عرفنا العله .
-سكتت ونغم ترخصت وراحت ،، بقيت مكابله قدر وبالي بنتهاالي مايدخلونها يمها دخل ثابت باوعلها وطلع تعبت ومااكدر أغمضت خفت عليها تفز تمددت يمها فزت تباوعلي بخوف اسم الله هاي أنه حظنتها بجت بعبرة .
قدر::خنكتني رادت تموتني .
-تحجي وتناشغ ،، اشش لاتخافين هاي أنه يمج اسمعيني
لاتخليني محتارة اترجاج اصحي ولج لخاطري تعبت ياقدر
قدر::اخذيني اخذيني منا لاتعوفيني ترى هيه كالت اجيج
وين ماتضمين روحج .
-عدلت كعدتي وخليت راسها بحظني ايدي بشعرها
واحجي بصوت ناصي اريد افهم منها ،، دنكت شاورتها
شنو كالتلج .
قدر::خنكتني خنكتني رادت تموتني كالت لو اخر يوم هم
اكتلج . ابنها ابنها خلته بوجهي يخوف يخوف .
-وهيج خلصتها وياي تنام وتفز تصيح مخترعه
مديحه ما ملت تبخر وترش وألحجي وخاله ماعافونه
الباشا مااجه بعد وأنه ماسألت عنه مرن يومين هلكت
نوب هيه بدون كلشي شلونها ونوب حالتها زيدت النزف
كل شويه نغير الها .
وفيه::جبت حفاضات مال عمليات افضل من هذن.
-نسبح ونبخر ونقرأ ،، اباوع همه محتارين ضالين
يرحون لاريج ويجون يمنا ،، جابولي قران كالو اقري يمها
رغم البلازمه مشتغله وبصوت عالي بس أصروا أنه اقرأ
اخذتلي ساعه وهيه تستمع ودموعها تصب تدخلت عليه خاله
من تسمعني.
وفيه::عليج بالعافيه على هذا الصوت
-وهيج اليوم ثالث ،،تنام قدر اطلع اشوف تينه الي
بنين ومديحه سون عليها خفارة بالنهار بنين وبليل بين مديحه وثابت وهل شي طمني وقدر ماسألت عنها بس حسيت بيها احسن من اول يوم بس غفت كمت فتحت الباب وطلعت ،،لكيت مديحه متمددة على التخم وتينه بكركوتها ثابت ماكو كعدتها فزت تفرگ بعيونها .
مديحه::ها شبيج ؟
-مابيه كومي نامي جوى .
مديحه::لا خليني يم البنيه خاف تبجي خطيه ثابت
قبل شويه راح تعبت من الگعدة بيش الساعه هسه
- يمكن ب٦ وانه تعبت ولج احس اختنكت .
مديحه::جا شنسوي نتحمل .
-طارق ماله حس ؟
مديحه::خابرني وحجيتله مختصر كال ضلي .
-نعم الله عليه هسه كليلي شلون إقنعهم وأخذها لبيتي
مديحه::طبعا احسن الهم حتى يلتهون باأريج همه هسه
مبتلين بالصفحتين .
-اگلج مادام ماكو احد خلينا نجرب ندخل بنتها يمها؟
مديحه::يمعودة نوب خاف تخترع الطفله .
-لا إذا ماتقبلتها نطلعها دكومي بسرعه .
مديحه::دروحي بس خل اغسل وجهي حتى اصحصح.
-يله لا يگعد ثابت راح ادخل اكعد قدر .
مديحه::ترى معلية إذا صار شي .
-عفتها تحجي ودخلت لقدر كعدت يمها لزمت أيدها فزت
دنكت بوستها عدلت نفسها تباوعلي باستغراب ابتسمت
وأنه امسح على أيدها ها شلونج اليوم
قدر::زينه بس لاتعوفيني .
-لا ماعوفج حجيتها والتفتت للباب بس دخلت مديحه
شايله تينه شهكت قدر لزمتها شبيج هاي بنيتج
قدر::لا لا وخري عليج الله .
-اشرت لمديحه تجي تعمدت تراويها وجه بنتها
بجت بصوت عالي،،اجه ثابت يركض
ثابت::ليش دخلتنها عليها .
-ترى تريدها بس تخاف تلزمها مترددة
اخذتها من مديحه حطيتها بحظني واحجي وياها
شوفي جنها گمر ولج خطيه ادور عليج .
قدر::اي اي بس لاتودينها يم اريج
-لا يااريج هاي تينتنا،، دنك ثابت يريد ياخذها
وخرجت أيده وكمت طلعت للصاله تبعني يحجي بعصبيه
ثابت::ليش تسوين هيج شنو تتعمدين تأذيها
-نزلت تينه لكركوتها ورفعت راسي باوعتله عود صدك
تحجي ؟
ثابت::شتفسرين تصرفج
-ترى بنتها وشفت بعينك لا اذتها ولا سوت شي
بس ليش احس تريدها تنسها،، باوعلي متفاجئ هزيت راسي اي تصرفك هيج يبين شوف خل اگلك بنتها ماتأذيها لو شما تكون مرت بحالة اخترعت خافت نصدمت بس هسه الحمدالله ما بيها شي بس بقت خوفه وتروح
ثابت::أن شاءالله واحد ماتتشافى ماريدج تجازفين بالطفله
-الي يسمعك يقول اختي مسودنه تشكك بملابسها
لو طكت واحد منكم وهيج خايفين جا شتكولون عن اريج
الي رادت تموت اختي اذا هيج المفروض تخافون منها
ثابت::اوووو أنه مالي خلك غيرة النسوان
لاتخبطين .
-اغار كل عقلك ترى مابالي غير اختي
ثابت::خلص خليج يمها وإذا متضايقه من وجودي
أنه اطلع وحتى اهلي مايجون هم حقجن يجوز مديحه متقيدة حامل وتبهذلت .
-انته تغشم نفسك جاي اگلك هيه تكلي طلعيني منا .
ثابت::واحنى بكيفها
-ردة نرفزني صحت جا بگيفك مثل احنى هنا حتى
نعالجك ونرضيك ،، علت أصواتنا اجت مديحه شالت
تينه الي فزت قدر من مكانها تصيح
قدر::تعاي سونه تعاي يمي لاترحين لا تخليني
-عفته ومشت الها وأنه احجي مسمعته،،اله ميته يله اعوفج
اشش لاتخافين ماكو شي
قدر::ليش تعاركتي ويا عوفي .
-سكتتها بس أنه افور دخلت مديحه تعض بأيدها
درت وجهي منها
مديحه::يلام ذاك الرجال من يكول فلفل
-ولج شحجيت گتله خل اخذها يجوز تغير جو وتتحسن
مديحه::ترى يخاف عليها وعلى بنته
-وانه ماخاف مثلا ؟ سكتنا دخول الحجي صبح
ودخلت خاله ورا بيدها صينيه،، كامت مديحه تلكتها
مديحه::يا خاله عليمن متعبه نفسج احنى نسوي
وفيه::عمجن جاب كيمر وعزلت حصتكم شلونها قيادة اليوم
-زينه حتى دخلنا تينه يمها
وفيه::صلوات على محمد وال محمد ربي ماقصر
ينطيج العافيه يا مديحه ويرزقج بالمولد الي يگر عيونج
-دنكت مديحه بوستها وقدر بس تباوع بعيونها
مديحه::يا خاله حتى الجاي جايبته شسالفه
وفيه::دروحي حضريلج صينيه وصيحي لثابت يتريك
-بس طلعت مديحه التفتو عليه
ابو اسعد::بابا ترى احنى اعصابنا تعبانه لاتضغطين عليه
-عمو ماحجيت شي ردتها تغير مكانها هيه تصيح طلعيني
سكت الحجي دخل ثابت يحجي .
ثابت::اي أنه اخذها للزيارة تغير جو
-وهيه مال زيارة نفسه وحالتها هاي منو الها وبنتها
شلون ؟
ثابت::رقاوي تبقه عند ام اسعد .
-باوعتله وضحكت هز رأسه شكو ،، مو كتلك تريد تبعد بنتها عنها وكل عقلك اخليك.
ابو اسعد::شنو هل كلام بابا ترى بنته قابل يضرها
بس قصدة حتى مايحتار بالطفله وشكو بيها لو بقت يمنا
هيه بنيتنا واول وتالي تربى بحظنى الله وكيلج بس خلي تحط رجلها بالگاع هيه تجي .
أنه احجي وقدر تبجي وتتوسل
قدر::سونه لاتعوفيني .
-صحت من تگبر وامها تصحى بالعافيه عليكم بس هسه لا
ثابت::مافهمت شنو يعني تمنعيني لو شنو سلاسل انتبهي
لكلامج لحد الان عاذرج وحاسب حساب البينا ولخاطر قدر
-كمت وأنه احجي عوف الخاطر، وشتريد تحسبها احسبها
اختي مريضه مو بحاله تقرر شوكت ماصحت منك الها بس هسه بنتها بحظنها .
ثابت::بنتي بابا بنتي .
-هزيت راسي اي ضلو يباوعون مديحه بقت محتارة الصينيه بيدها واكفه باب الغرفه وقدر بس تبجي ادنيت عليها اسكتي
بس انطيني مجال خل البسج .
ثابت::ماتتحرك من مكانها كافي عاد انتبهي لنفسج
زودتيها .
-التفتت باوعتله وإذا اريد اخذها تمنعني هز رأسه اي
صاح بي الحجي
ابو اسعد::ثابت ماريد اسمع صوتك
-دنك وطلع مديحه ودت الصينيه واجت قدر خردلتني تبجي
ضليت أتلفت جرتني خاله
وفيه::شو اكعدي وانعلي الشيطان ياماما شبيج
-انطتني شربت اباوع لقدر فرفحت صحت بيها شبيج
هاي أنه گبالج اسكتي هزت راسها اي وسكتت بس دموعها تصب نوب انقهرت عليها كمت حظنتها وبجيت بعبرة
ابو اسعد::لاتبجين بابا الج التردي
-حجاها وطلع اسمع صوت ثابت رافض طلعتنا اباوع لمديحه وجها ضل ينطي الوان أشرتلها تعاي يم قدر وكمت
فتحت الباب كلهم ملتمين يحجون ويا وهو يصيح لا
صحت خوش خليها يمك وأنه اروح التفتو عليه
ثابت::براحتج خو مامسويه فضل ترى اختج
-ثق ياثابت إذا طلعت صاح مسكتني
ثابت::اياج تهددين تعرفيني ماخاف فلا تفشلين نفسج
-ضلو الحجي وخاله متفاجئين هزيت راسي تمام ودرت وجهي هينه نشوف منو بينا اليكدر لأن الضاهر بعدك ماتعرفني .
ثابت::اليجي بيدج سوي
-اذا اشتكيت شلون
ثابت::روحي وين ماتاخذج رجليج
-للصعده نرجع لاصلنه حتى نلبس وجه سلوم نواجهك بي
الباشا::سوننننه
-التفتت دخل يمشي بغضب متوجه عليه كام ابو صار
كدامه
ابو اسعد::لاتدخل هيه ونسبيها محترك كلبها على اختها
-خزرني باوعتله اشر دخلي الغرفه درت وجهي ودخلت بس احس العبرة كصت بلعومي لكيت قدر و مديحه يبجن
مديحه ::گتلج اسكتي عوفي مايخلنا نأخذها .
-اندفع الباب دخل الباشا كبل جرني طفرت مديحه اشرتلها
معليج قدر ضلت تبجي .
الباشا::شوكت تنسين المستنقع ذاك ولج واكفه تهديدين
ماخجلتي بنت الكلب شبيج انجلبتي مو قاعده هنا شعدج تردين اطلعين فهميني ؟
-دفعني باوعتله ونزلن دموعي فرك وجه بعصبيه
حجيت بصوت مبحوح ،، اختي تصيح طلعيني ماگتله شي
يريد يأخذها ويعوف بنتها يم امك
الباشا::بنته انتي احرص منه على بنته ؟
-لا بس احرص منه على اختي.
الباشا::وماعرفتي تتقندرين وتخابريني الف مرة وصيتج
لاتحجين لاتتجاوز ين .
-وهسه أنته دريت حلها
الباشا::شحل وانتي صخمتيها
-حجاها وطلع كعدت ابجي وهذن بس يناشغن
اسمع صوتهم يتصايحون دخلت نغم شايله تينه كمت خذتها منها وكعدت يم قدر الي مفرفحه حطيتها بحظنها وحجيت
لاتعوفين بتج للموت اخذيها وياج مو هيج جنت تعتبين على امج مو تكوولين ليش ماخذتني وياها .
قدر::ياريت اشوفها محتاجتها كلش
ـحظنت بنتها وبجت أنوب الطفله ضلت تصرخ دخلو كلهم
راد ياخذها منها ماقبلت
قدر::عوفها بنتي لاتمد ايدك وخر
-طلعه الحجي ودنك عليها باسها برأسها
ابو اسعد::اسكتي لخاطرها شوفي اخترعت خطيه
-سكتت جابو المميه وكوى الطفله سكتت
دخل الباشا اشرلي يله باوعتله صاح
الباشا::فضيها وراي دوام خل اوصلجن
-اخذ قدر وياي
ابو اسعد::اي يأبه اختج وياج وعينج عليها اي شي يصير
خابرينا ومانوصيج برقاوي
-كمت و مديحه وياي بسرعه شلت تينه صاحو عليه
وفيه::دخذيلها ملابس غراضها شبيج ماما ليشوفج ايكول
حابسينج .
-فشلت رجعت حطيت تينه بحظن قدر وطلعتلها صايه
راحت مديحه جابت سلة تينه لامه بيها اغراضها
وخذت دشاديش لقدر ضلن يجيبن ويحطن هيه وخاله
الحجي طلع من يمنا
وفيه::دشوفن بلكي جنطه زغيرة تلمن بيها جا تشيلنهن هيج
مديحه::راح اجيب علاكه جبيرة .
-وشلون ماكان لملمنا وطلعنه ثابت بالصاله كام
أخذ تينه بوسها وتقدم لقدر
ثابت::يومين واجيج هاي لخاطر الحجي والباشا عفتج
قدر::اي اي اجي
-بوست خاله وسلمت على الحجي وطلعنا صاح مسمعني
ثابت::منا وانتهت الصحبة
-ما التفتت رديت وأنه امشي هيج صحبة ماينبجي عليها
خزرني الباشا تونا صعدنا السيارة واجت ام اريج تهف بعبايتها وتصيح
ام اريج::عايف مرتك وضال تركض ورا العبدة
22
ـاشر ابو روح حرك السيارة وهو ينفخ بعصبيه
بس طلعنا شارعهم التفت عليه گمزت
الباشا::تخافين
-لا
الباشا::سهله اعلمج على كل هذا
-ليش أنه الخرعت مرتك لو باوعلي ورد
الباشا::متشمته بيها
-هزيت راسي لا أنه مو مثلها وروح امي لا وانقهرت
سكت بس أنه متت قهر وصلنا نزلت وهو نزل وبأنه فتح الباب نزلت قدر دخلنا وراح .
مديحه::رحت لبيت الله واجيت مثل بيتي مالگيت
استغفر الله هو مثل
-طاح حظج وحظ امثالج ددخلي الغراض
مديحه::خلي نكعد قدر وبنتها
- فتحت الاضويه وكعدت قدر الي دموعها مابطلت
بسرعه مديحه رتبتلها مكان بالغرفه وكومتها هيه وبنتها
بس دخلتها نامت خذنا تينه وطلعنا .
مديحه::ليش خايفه من بيتها تدرين شكيت مسويلها شي
-كلشي مامسويلها بس هيه تخاف ،، ماجانت هيج من اجتني
عقلها يوزن بلد وذكيه بس المر بيها والصار خلاها تخاف
مديحه::جا الصار وياها شويه لو وحدة غيرها تسودنت
-جيبي اليعذرها ويفهم حالتها
مديحه::ميخالف تصير المشاكل هاي أنه وطارق منو
كال نتصالح .
-مايهمني زعل اي بشر اختي اهم شي،،خلص ليلنا
ويا قدر بس حالتها احسن وبتها هادئه تبجي بس ننطيها الممه تسكت ،،ابو المميه ياهي تجي تصير أمه
مديحه::مستحيل الطفل على ريحت أمه يعرفها من يشمها
اذا من أول أيامه تعود على حظن اي بس من يتعد الأشهر
صعب يضل يبجي اسم الله اذا الام ماتت لو بعدو عنها
فترة يله يتعود كومي انام يمها
-نمنا واصبحنا على صوت تينه تتنعوص كعدت شلتها
دنكت على قدر بوستها فزت
قدر::ها شبيج منو اجه
-بتج كعدتنا تريد ريوك باوعتلها مدت يدها دنيتها الها
بوستها شكد فرحت
مديحه::يربي وين نايمه بس صوت المطگ على راسي
-عفتهن وطلعت وتينه بيدي شغلت البلازما وخليت قران
غسلتها ودخلت غيرتلها و مديحه بعدها على فراشها
صحت گومي
مديحه::وين أقرا على ابوج شعدج مغبشه
-كومن يمي
اضوج لوحدي
مديحه::ومن نروح لبيوتنا شلون بيج؟
-الي الله.
مديحه::اعتبرينا ماموجودين وروحي سوي ريوك
-طيتها تينه وكمت نوب ماعدنا صمون رايحه اشوف بلكي ابو الأسواق عنده كهربائي لبست صايتي وخذت نقالي وجزداني وطلعت بس عبرت الشارع دك نقالي باوعت رقمه
فتحت خط مامهتمه كمزت من صاح
الباشا::وين مولية .
-ضليت أتلفت شنو يعني شافني جا هو وين
الباشا::انخرستي
-وين أنته ؟
الباشا::بالدوام وشعدج طالعه ؟
-اجيب صمون
الباشا::رجعي هسه يجيج مولي
-حجاها وسدة باوعت الأسواق اگبالي عبرت بسرعه
جبتلي جيس كهربائي وكم علبة جبن وشغلات دك مولي
كتله لاتجي اتسوكت وراجعه
مولي::المن كعدتوني دروحي يله.
-رجعت سولفتلهن
مديحه::مراقبج شنو
-اندري ولج دخت محد بالشارع
قدر::لا اكيد أحد شافج ترى أكثر الي هنا قرايبهم وموصينهم
عليج من زمان ثابت گالي .
-حتى لو هم منو كاعد وشافني
مديحه::شوف ياهو طلع للدوام ولجحج وخابرة
-وشنو مخلي رقيب
مديحه::اقامه جبريه
-وهاي شنو ؟ردت وهيه تأخذ العلاكه وتتوجه للمطبخ.
مديحه::شغلات ماتعرفيها .
-سوت الجاي وجابت الصينيه تريكنا للضهر اجت خاله هيه وجدورتها تلكيناها .
وفيه::شلونجن ؟
-خاله عليج الله بعد لاتجيبين شي .
وفيه::وقابل طابخه بس الكم خير من الله
-ميخالف انتي تعبانه وهم الله يعينج عدكم مريضه
شلونها اريج ؟ردت وهيه تشيل تينه تبوس بيها.
وفيه::يخاله الليل كله تبجي وماتريد الطفل امها كافه عليه
مديحه::لو مسويلها من العلاج السويته ؟
باوعتلها خاله وكأنو تفكر
وفيه::الله وايدج بلكي تصير زينه الج اجر
-كامت مديحه لحكتها ولج فكينا من اريج وبعدين الغراض غير بقن بيت ثابت
مديحه::لا عيني جبتهن
-تحجي ونفش بالمجر مال الكاونتر طلعت وخبطت
رجعنا يم خاله اطتهن الها وتشرحلها الطريقه أخذتهن وهيه تدعي
وفيه؛:ربي يسعدج يامديحه يله أنه اروح هذا مولي يرمش
-راحت وهيج مرن يومين الباشا يخابر على كد السؤال
الباشا::شمحتاجه قدر شلونها
-قدر زينه ومامحتاجه شي
الباشا::مالي خلك تنعثلج
-محد جابرك تخابرني سديته دك بعد مارديت استلمني
رسائل تهديد غلست اجت خاله سألنها عن اريج
وفيه::شو مافادها العلاج وامها تعبت وأسعد يكسر الخاطر
نوب دوام وتعب حيل .
مديحه::خاف ماسويتي عدل
وفيه::والله مادري على كلامج اكلج ولو زحمه
تمشين وياي تسوينه؟
مديحه::اي خاله ادللي صدك جذب .
-كامت مديحه أنوب لا اكدر اكرصها ولا اغمز خاف المرة تشوفني خابرت مولي اجه عليهن راحن ضليت الوب
قدر::ماعليها شي ترى كلهم يمها
-كعدت تعاي انتي احجيلي الصار غمضت بقهر
قدر::ماانسى السوته بيه للموت ،، رحت لكيت بنات محمد
واخوات خاله تلكني فرحانات بيه اخذن تينه كل ماريد اروح لاريج يكلولي نايمه اسمع ابنها يبجي امها تدخل يمها للمغرب الكل راح كامو للصلاه بقيت يم بنين اطيتها بنتي وكمت
گلت لخاطر الباشا اسلم عليها حتى لو ماتريدني دفعت الباب ودخلت هيه واكفه و ضهرها عليه ركزت مدنكه على كاروك
ابنها دخلت وأنه احجي حمد الله على السلامه التفتت باوعتلي ادنيت عليها اريد أبوسها شو صرخت بوجهي
اريج::جايه تشمتين بيه ياساقطه
قدر::ضليت مصدومه اريد اطلع ماكدرت هزيت راسي لا
دنكت شالت الطفل من مكانه هو مغشه وجهه شو هاي حطي كبال وجهي وشيلي الغشاوه
-سكتت تمسح بعيونها هزيت راسي كملي .
قدر::شكله شكله مريب استغفر الله مو اعيب بس
مادري شنو بي دفعت واريد اطلع جرتني من خوفي ماصرخت مدري اصرخ ومحد يسمعني شمرت ابنها الي يبجي ولزمتني سفطتني على الحايط حطت أيدها بلعومي
مخنزرة عليه وتحجي مخربط.
اريج::عبالج اخليج تتهنين وتشمتين بيه اله اموتج بيدي
انتي وصخلتج مكيفه بتج اله اخنكها وياج .
قدر :: ضليت الهامش بديه بس هيه قويه احس الهوى انكطع ماكدرت اتنفس مدري شلون دفعتها ركضت اصرخ وهيه وراي وبعد مااذكر شي .
-تحجي وتبجي كمت حظنتها لاتخافين هاي أنه يمج شبيج
بس كليلي من اجه ثابت وعرف بالصور ليش ماخابرني
قدر::بعد مادريت أنه الي اذكرة بس من طلعت من يمها
وهيه تركض وراي خفت خفت تخنكني .
-يكولون متخبله مانعرف شتسوي لحد الان ماتريد طفلها
قدر::هو شكله غريب شوفي شلون اوصفه الج
-لا توصفين الحمد الله على كل حال همزين سلمتي من أيدها لو موتج جا شسوي أنه اموت روحي.
قدر::لا اسم الله عليج
-انتي شفتي وسمعتي الصار بيني وبين ثابت ياقدر
أنه ماكدر افرض عليه إذا قبل الي خاطر هسه خربنه
ياريت انتي تتفاهمين ويا .
قدر::هو لا اجه ولا سأل عني
-اي زعلان عليه مايدخل بيتي بس اكيد خاله توصله اخبارج
قدر::بس المفروض مايعوفني وانتي ماغلطتي
-هو زعل شسوي بعد أنه هم ماقصرت تجاوزت عليه
قدر::خلي بزعله أنه تعبانه وروح امي ترى لحد الان
جسمي يأذيني وعمليتي تبز بيه من رحت منج كوى اتحرك
بس ماشكيت حتى لاتنقهرين صح ماقصرو وياي بس هم اخجل من البنات ام جواد بقت يومين يمي وخاله تطبخ وتجيب ونغم وبنين ماعافني بس أنه اريد اكوم على حيلي حتى اكدر لبنتي ولبيتي.
-وانه هذا الإريدة وخلي ابالج ماترحين لبيت الحجي مثل قبل اله هو وياج لأن اريج ماراح تفك منج وهمه ماينطون بيها وبحجت مو بوعيها .
قدر::لا اصلا مااوصل شبيه غير تموت بنتي هيه كالت
-لا حجي لسان ماتسويها بس تغثج تسمعج حجي
انتي روحي خطار كون ماتختلي بيج ولا تعوفين بتج
بيتج محد يوصلج وهيه وياهم مايكدرون يمنعوها من الدخله عليهم جنتهم وباب واحد
قدر::اي اعرف .
ـخوش من يجي لو يدز عليج احجي ويا
قدر::ماارجع هسه .
-هاي ام المصايب اجت خل افتحلها الباب كمت ملكيتها
دخلت وجها مخطوف كعدت وصاحت
مديحه؛:ماي رحمه لامج.
-جيتلها ماي شربت ومسحت وجها تلهث شنو جايه مشي
مديحه::لا مولي وصلني
-اي شفت سيارته ،،بشري شسويتي طابت اريج
مديحه::هاي حتى طشه والهندي مايطيبونها
-باوعتلها تحجي من عقلها كعدت بقله صبر ،، احجي عاد
مديحه::نوب تريد تكتلني ولج وامها تصيح انتن سكيتن
بنتي وخليتن طفلها هيج يصير ،، كوى طلعت نوب همه
ضلو يتعذرون .
-غير مسويه روحج معالج حيل بيج،، باوعتلي مصغرة عيونها،،هزيت راسي شكو.
مديحه::شو جنج مامقتنعه بمرضها.
-اكلي تبن واحجي شصار ؟
مديحه::دخلت تلكني البنات هيه بالغرفه ماشفتها
سوينا الجمريه ومثل ماسويتي لقدر حضرنا كلشي گتلهن
يله نغم كالت خل أصيح امها نفهمها ،، راحت صاحتها شو هاي اجت وشافتني باوعت للجمريه وهيه شهرتنا تصيح
دخل الحجي وثابت ومولي يردون يسكتونها ماكو وعلى
حسها اجت اريج تسال امها حجتلها
ام اريج::ماكفها العبدة السوته أنوب تريد تكمل هنا
اريج::اطونيها خل احطها بالجمر مالها.
مديحه::اريد اندل الباب ماكو.
-هيه تحجي وأنه اتخيلت الموقف وضحت قدر
ماتت لازمه بطنها باوعتلنا بزعل
مديحه::اي اضحكن بدال ماتنقهرن عليه لو لازمتني
-تحطج بالجمريه تشويج وترش عليج بخور
قدر::ههههههههه وروح امي تسويها مسكوف
مديحه::خرب جا انسحلت أمام الملاء وأنه مئويه
روحي شخصيه واتأمر على نغم وبنين طيحت رجليهن
-شوكت تبطلين سوالفج مو راح تصيرين ام يله قوله
مديحه::احلفي ماطيبت اختج
-لا طيبتيها بس لان هيه تثق بيج وتحبج والعلاج جاب نتيجه انتي تحبيها سويتي بنيه صافيه
مديحه::حتى لا تكولن حارمتنا من علمها لو ماسوت
-دكومي لادفرج
مديحه::قاسيه انتي قاسيه
-بس مو بقساوة اريج
مديحه::يممه هاي شللو مو مريضه ويجوز حقها تسوي
هيج تريد تبرد گلبها أنه ماشفت ابنها بس البنات يكولن
خطيه محتارين بي اسمعه يلج
-اله الله خطيه
قدر::اي خطيه.
-وهيج خلص يومنا كل شويه نذكر سالفه مديحه ونضحك
كامت تخابر طارق وأنه عيني لنقالي وكأنو حس انتضرة
دك رديت بثگل فشلني
الباشا::يلوگ لام اعطوب تحجي بخشمها
-لزمت خشمي وأنوب انتبهت لروحي خرب شبيه
الباشا::شلون صارت قدر
-زينه
الباشا::خوش إذا زينه خلي تروح لبيتها رجلها خطيه
-مالازمتها عنه .
الباشا::خوش كليلها مولي راح يجيها
-هسه؟
الباشا::اي نايمه شنو؟
-لا بس خليها الصبح جا بهل ليل مطرودة شنو
الباشا::نصبر للصبح ونشوف عيارتج وين توصل
-انه عيارة ؟
الباشا::انجري لأن بالدوام مو مال نعوصج وتوازيني اجيج
-سده كمت بلغت قدر بكلامه
قدر::ماارجع هسه جا أنه شفهمتج
-انتي احجي وياهم ترى عبالهم أنه ماخليج
قدر::دكي وانطينيا
-دكيت مارد رجعت دكيت فصله ،،خذته مني كتبتله رساله
شويه ودك استلمته.
قدر::نوب اله اراسلك وحتى لو زعلان جان كلت خاف احتاجن شي ، ها نخابر الباشا يبلغك خوش جا خليني اخابرة
-سدته ودنكت دور رقم الباشا دكت ، عليه رد عفتها
وطلعت لمديحه لكيتها بالمطبخ ،، التفتت باوعتلي
مديحه::ها مغيمه شنو تسابيج للطنگورة
-جريت الكرسي وكعدت أديه على راسي محتارة كعدت كبالي .
مديحه::غردي
-حجيتلها صفنت ثواني
مديحه::شبي ثابت هيج متغير ليش انقلب أحسه
يريد يفرض عليها الي يريده .
-مايريد غير يبعدها عني لأن مخططين أشيل حتى لا اريج تعرف بزواجي من الباشا وهذا حقهم بس وين اروح اختي قريبه عليه وأنه تعودت على بيتي والمنطقه امان وبيني وبينج من الشفته بهذا البرنامج صرت اخاف
مديحه::اي والله ماكو امان جرائم تشيب الرأس
بس اكيد الباشا مايخليج تروح بمكان بعيد
-ماعم عليه غيرة تعبت وكرهت روحي لو ما قدر
اهج ومااخلي اثر يتبعني .
مديحه::دكومي خل نشوف البلكه شسوت
-كمت و مديحه جابت صينيه التفتت باوعتلها
مديحه::حليب مهيل دجيبي الصمون خل انغمس
-كعدنا يم قدر الي لازم طرف الچرچف مال المخده تهلس بي باوعتلها ها شنو صار
مديحه::بس قبل لاتحجين عوفي المخده خطيه
قدر::بلغت الباشا بالي اريده گال ما بيها شي حقج ترتاحي
مديحه::اي خوش جا شمالج هلستي المخده
قدر::غير خابرني ثابت يصيح ،ماراضي
مديحه::خرب راضي انجويت وهسه شنو
قدر::كال الصبح اجيج إذا ماترجعين وياي اطيني بنتي
- حاجتها وبجت التفتت على گتلها خابري طارق يروح للحجي حتى يرجعج .
مديحه::ثول أنه شعليه ؟
-اخذي الكلام
مديحه::نأخذه ليش لا
-للصبح أنه الوب ماحسستهن جسمي اشتعل نار نوب ماعندي علاج بس كشف الوكت دكيت عليه رد بصوت مال واحد نايم
الباشا::ها شبيج
-اريد علاج الحساسيه كامت عليه
الباشا:::اهون ولا غير شي
-سديته وكمت سبحت فزت قدر اجت لازمه بطنها
قدر::ها شبيج ليش كاعده بيش الساعه
-هسه عليمن اجاوبج
قدر::مانمتي ادري بيج بس لا هاجت الحساسيه
-هزيت راسي اي
قدر::الله ياخذني كله مني تجيج الطلايب خلص خل يجي ياخذني يكبرني هناك بلكي اموت ولج والله مابالي شي
بس رغم كلشي احس روحي غريبه بينهم بالاخص من يلتمون هاي ابوها وهاي امها لا عندي أحد يجيني بس يمج احس روحي الي أهل وناس ماتقيد وارتاح .
-ماترجعين لحد ماتتعافين يعتبرج عند امج
التجيب امها اداريها لحد ماتطلع الاربعين وانتي مريضه
قدر::خاف يعاركج لو الحجي يحجي عليج
-محد اله شي يمي كومي نامي
قدر::وانتي ؟
-منتضره مولي يجيبلي علاج ،، كمت وأنه عيني للكامرة
طلعت الموضفين اباوع هاي الناس مرتاحه وعايشه لو هم مثلنا بس وين اكو مثلنا تحسرت مر وقت اجه مولي كبل لا ينزل طلعتله ناوشني العلاكه
مولي:::محتاجه شي بعد
-هزيت راسي لا راح وأنه دخلت اخذت الحبايه شويه
وبدة جسمي يهدء من الحكه والحرارة كعدن البنات گتلهن راح انام ساعه لاتفتحن الباب اله تتاكدن من الكامرة
وعينجن على تينه مو تلتهن بالسوالف وتنسنها تبجي
مديحه::روحي ماعدنا شي من يكمل الغدة اكعدج
-خذت نقالي ودخلت الغرفه توني تمددت ودك رديت بتعب
الباشا::شلون صرتي
-احسن شويه
الباشا::شوفي اذا اجه ثابت لاتدخلين بينه وبين قدر
هيه مو طفله وتعرف تحجي
-بس اريد اسألك بناتكم مايجنكم إذا يتمرضن
الباشا::خواتي يبقن ١٠ ايام وامي تروحلهن وإذا يتمرضن
يجن ونوديهن طبيب حتى جهالهن بس ياسونه ثابت
مو قصده شي وأنه حاجيته قبل لاتصير هل هوسه
گال ردتها تتعود وتتعايش ويا أهلنه لأن حسيتها تخاف ومثل الي يحس بنقص يمكن حتى عدها رهاب من الناس ردت افرض وجودها حتى يتعودنها وحبوها وهيه اندمجت صح
اريج تغثها وعذرتها بسبب علاقتك بااختها
-هاي قبل لا تولد قدر وقبل لاتصير هاي السالفه
الباشا::اي صح
-وهسه ؟
الباشا::ماعرف بس اكيد يريدها يمه لاتلومينه وهم خطيه
بنيته يريدهن يسدن عليه الوحشه البيت فارغ ماينكعد بي
-باشا !
الباشا::ها زمو
-ثابت تغير هواي مو مثل اول وهل مرة اصرارة عناد بيه
الباشا::لا وحتى لو كلامج صح هم هو وزوجته لاتكرهين روحج المرة والرجال مايتعارك عليهم لأن يتصالحون وطلعين انتي بالوجه الاسود
-خير أن شاءالله
الباشا:'ها ام اعطوب شو مامرتاحلج
-ارتاح لأن راح انام
الباشا::خوش للعصر اذا شفتي روحج موزينه احجزلج يم الدكتور يله غمضي وجنج حاظنتني واغفي
-سديت النقال وشمرت ونمت فزيت على صوت حجي
كمت لبست شال ميزت الصوت هذا الحجي طلعت كاعد
بالصاله سلمت رد بثگل غسلت وجهي ورجعت يمهم بس كعدت وجه كلامه للبنات
الحجي::عوفونا لوحدنا
-كامن ثنينهن باوعتله ومتوقعه يحجي.
الحجي::شوفي يأبه رغم زواجج الي بدون علمي
سكتت لان مو حرام لكن الي ماتعرفينه الزواج مو ثنين عقدو احنى تحكمنا عادات وتقاليد وأنه رجال عندي أهل وعمام وعشيرة يعني اذا ردت أعلن ماراح يسكتون هذا نسب وانتي فاهمتني .
-قاطعته عمو النسب وهل نقطه نوكف يمها جينات
والدليل هاي بت قدر طلعت تشبهني وخل أكلك شي يمكن ماتعرفه شعرها على شعري الي أنه ورثته من بيبيتي ام جدي ها مو ام ابوي تعرف منطقتنا جانت يسموها منطقة السود والهنود وبيبيتي ماخذة هندي والجينات لاحتني
وأنه من احفاد احفادها القصد اتوقع بت بت قدر تطلع
تشبه ابوي ،، اما بالنسبه الي مامفكرة بالخلفه .
الحجي ::أنه مو معترض لا والله بس احنى مجتمع تحكمه هواي أمور غير الدين يعني خل نكون واقعين أنه وياج أن خلفتي هل طفل شكد يعاني بين عشيرة ما بيها من نفس
أصله ثقي ينبذ وان كبر راح يعاني أن كانت بنت فهي تنضلم وتنتضر الصدفه أو فرصه يجيها نصيب الناس يابنتي وانتي
اكيد سمعتي أو صادفتي حاله مماثله .
-هزيت راسي اي
ابو اسعد::فلا تعتقدين ناسنا تتقبلج وبالأخص زوجة اسعد هيه بنت اختي يعني حتى لو وكفت ويا ابني الناس راح تلومني وهيج تنخلق عدواة ومشاكل وهل شي يأثر على اختج النساء عنصريات واكيد يميلن لاريج
-هو يحجي وأنه استمع .
ابو اسعد::ولا تعتبرينه رفض لشخصج أنه اصلا وافق بزواج ثابت لأن كان صرف احتج حرج مالها أحد محد تقبلها لهسبب كال زواجي منها لله
-قصدك لعبها صح .
ابو اسعد::ماضن هو ناقصه شيء واحتج فرصه
-عمو من الاخير التريده مني شنو اامرني وأنه أنفذ
ابو اسعد::اشوف لو تحاولين تبعدين بغير مكان وهيج
هم انتي ترتاحين وهم زوجته ماتسمع.
-بعدت واصلا هل زواج ماردته وابنك ماعافني .
ابو اسعد:'بعد صار الصار .
-وانه مااكدر اعوف اختي بالاخص بهذا الوقت تشوف حالتها
تسمح ومنو يگول الباشا يقبل هو يكول هنا مأمن عليج لأن
تعرف لايكدر يبقى يوميه يمي هم دوام وهم زوجته
ابو اسعد::أنه احجي ويا يقبل معليج.
-اذا هيج ياريت تقنعه يطلگني ،، باوعلي متفاجئ
هزيت راسي اي ،، اما بالنسبه لقدر تبقى يمي لحد ماتتعافه
اعتبروها عند اهلها لو امها عايشه وهيه مارة بهل حاله جان
متعوفها واكيد انتو ماتعترضون.
ابو اسعد::وهيه هسه تعافت أن شاءالله وزوجها يريدها
بيته فارغ وهم مشتاق لبنيته
-هل شي اكيد وان مامعترضه ولا الي دخل ،،حجتها وكمت صحت قدر اجت گالها ترحين وياي
قدر::لا عمو أنه تعبانه أن شاءالله بس تتحسن صحتي ارجع
ابو اسعد::خير ان شاء الله
-طلع الحجي والبنات نصبنها مناحه هسه تنوحن شگو
وهيج مر اليوم والبعدة مديحه ماقبلت تعوفنا وطارق مااعترض قدر صحتها صارت بالنازل دزيت خبر خاله اجت
خذناها للدكتور نسبه دمها نازله استلمتها علاج
مديحه::الرمان هو يزيد الدم
-وتعصر مديحه رمان وتشربها من غير خلطاتها السحريه
لكيت الجدر على الطباخ صحت هذا شنو
مديحه::دوى
-منين جبتي
مديحه::وصيت خاله جابته هذا جفت للنفسه يخليها
تصير زلال ينضف ويطهر
-سكتت والباشا مكالماته مستمرة وبحجت تينه يجي ومايعتقني وين مايحصله فرصحه يسحلني وهمزين اشوفه
بالكامرة واركض أخذ حباية المانع قبل ماافتحله الباب
الباشا::مشتاقلك اسمر
-شكد تحبني
الباشا::الشيء الوحيد الي ماينقاس ولا اله وزن هو الحب
فلا تسألين ،، اقترب مني ترى الدنيا فرص
وانته مامضيع فرصه شأقترب
الباشا::لا تفكر حبنا غلطة ولا صح .
-وهيج مخلصها وياي يجي متلهف ويثبت حبه بطريقته ويروح ،، نايمه وكعدتني مديحه باوعتلها شكو
مديحه::ثابت هنا
-اي جاي على زوجته سكتت مديحه بقينا نتسمع على حديثهم قدر تعتب ومنفعله وهو يبرر
قدر::فد يوم بيداء عد بيت الحجي وهو لازم بتها يبوس
بيها كالتله بنين يأبه شتحب منها جنها محجارة رد
ابو اسعد::احبها لأن اسمها رقيه
قدر::منا خليت أبالي اسم بنتي ردت افرحه كتبت الاسم
وميزت الورقه الي تخصه وصيت نغم تبلغه بيوم ولادتي
ثابت::هذا غش
قدر::وصيت نغم اذا جبت بنيه تفتح العلبه وتعلمه بشكل وحجم الورقه البيها الاسم حتى يكون هو من يختار وميزت وصيتي للباشا عاملتكم أهل وحبيتهم على حبك الهم ومحبتهم الك بس ماحبيتو اختي ولا تقبلتوها لخاطري
ثابت::لا تخلطين وتعرفين معزتها عندي خلافي وياها
مايغير شي زعل بين اخوه ،، والباشا ماقصر حارب لأجلها
هذا مو موضوعنا أنه جايج حتى ترجعين لبيتج
قدر::لو عندي ام واب وهاي حالتي اكيد مايخلوني عندك
ياخذوني لحد مااتعافه وماتكدر تمنعهم
ثابت::وأنه مامنعتج والدليل انتي هسه يم اختج،، والحمد لله
تعافيتي بعد شكو
قدر::مريضه شوكت تحس أنه مريضه ولادتي كوم
والصار كوم ثاني،، لحد الان رجليه ترجف كوى اوكف عليهن
بسبب النزف تعبانه تعبانه
ثابت::اخذج للدكتور وهناك البنات مايقصرن .
قدر::ماريد بشر ولا ادخل بيت الحجي بعد .
ثابت::يعني شنو ؟
قدر::اليجيني خطار هله بي ماروح لذاك البيت لأن اريج بي .
ثابت::تمام امشي لبيتج
قدر::استعيد عافيتي وارجع لبيتي حتى اكدر اقوم بواجب نفسي وبنتي وبيك حاليا تعبانه .
ثابت::خلص ابقي وأنه أخذ بنتي شوكت ماتعافيتي خابريني
-كمت من سمعته كالها هيج طلعت سلمت وهيه متخبله
قدر::بنتي وياي ماتاخذها تريد تجي تشوفها شوكت مايعجبك تأخذها لأهلك يشوفوها هم عادي بس ترجعها.
ثابت::لا اخذها يمي.
ـ شال تينه وكام باوعتله متفاجئه ماتوقعت كل هذا منه
مشه منطينا ضهرة التفتت صرخت قدر الهزت البيت..
!!!بين العقل والجنون شعرة،
تتأرجح عليها الأرواح كما تتأرجح شموع العاصفة…
لحظة إدراكٍ حادة، أو غفلةٌ عابرة، كفيلةٌ بأن تزيح الإنسان عن ذاته.
وبين الإنسان والحياة مسافةٌ لا تُقاس بالزمن، بل تُقاسُ برحمةِ رب العالمين…
فما أبقانا قائمين وسط هذا التيه،
وما أنقذنا من جحيم أنفسنا،
إلا لطفٌ خفي، يمسك بنا حين نتهاوى، ويزرع في العتمة نورًا لا يُرى، لكنه يُنقذ.
