رواية ناديه الفصل التاسع والعشرون 29 بقلم انين الليل

___________

اتفاجات ابيبي جميله ونصره وشمس انا رحت حضنت بيبي جميله الي سالتني //منو مسوي بوجهي هيج 

انا جاوبتها ...عثرت من الدرج 

شمس وهي تحضني //ها والدرج عثرتي بي انتي چا حنين منو سووا بيها هيج هم متزورگه

...ها عمه حنين ماتدري وگعت فوگي 

شمس هزت ايدها //انتي عثرتي وهي وگعت گولي منو وياج 

...عمه محد 

جميله //هسه ما علينه خاله ام ياسر انا اريد اسالج ليش مگعده البنات بالمخزن يم البيتونه والبيت مليان غرف 

افراح //اي صحيح مكعدتهن وابن اختج يدري انا عدي ولد وهنه شابات وباچر اي شي يصير تحطونه بوجه 

ولدي وانا هم احطه بوجهن عاد هيج احسن وهاي هي اسالوها بيومها انطيتها قفل وگتلها اقفلن الباب عليچن النفس 

اماره بالسوء

نصره //ها ام كرم شگتلج افراح ما تكره بنات عباس بس تخاف عليهن 

شمس// عمه زهراء ما گالت شي گالت ردت اسالها وهي افراح بسرعه صارت عصبيه ليش شنواحنه قابل 

ما نعرف ام ياسر تخاف الله وتحب عباس مثل اخوها 

جميله // اي زهراء انقهرت من شافتهن بالمخزن وانتي ما فهمتيها 

شمس //وشنو بي المخزن بالعكس احسن الهن ولدراستهن بس كون بي كنتور وجربايه مو عمه 

نصره //اي صدك

اجه هادي وكرم وقيس اخو افراح سلمو وافراح راحت على قيس باسته واشوف الرجال يخزر بيها باوعلي وگال 

- - اشلونج عمو 

انا مدنگه ...الله يسلمك 

- - انتي ناديه ؟

هزيت راسي ...اي وهاي حنين (اشرت بايدي )

- - الله يخليچن بيا صف 

...انا بالثالث واختي بالثاني 

- - اي السنه بكلوريا افراح داريها

افراح //ليش انا شمسويتلها 

قيس//اقصد السنه بكلوريا لازم تشد حيلها 

افراح //الي يريد يدرس يدرس شنو اروح اقريها 

قيس//هم صحيح وانتي بابا شلونج بالشهريات 

...عمو كلش زينه درجاتي بالثمانيين والسبعيين

- - عفيه بس شدي حيلج وشنو تحتاجين اطلبي من عمتج افراح هي ما تقصر حاسبتچن مثل بناتها 

هادي// لا قيس ما اخليهن يداومن 

كرم //وليش باالله تبطلهن 

هادي // لا كرم بعد ما يداومن لان مو مؤدبات 

الكل اتفاجأ من كلام هادي كرم گله وهو واگف //اشلون هادي مو مؤدبات 

جميله // شنو جايتكم الناس تتشكى منهن لو بالمدرسه گايليين عليهن مو مؤدبات

هادي //لا بس يلاسنن بعمتهن واخاف هذا السانهن بالشارع واحنه ناس گوه عايشين بسمعتنا من وره مصيبة امهن

كرم //هو هذا شلون حچي هادي البنات مو غريبات علينه مؤدبات وخالتي الله يرحمها اتعبت هواي بتربيتهن 

هادي //لا ابو مرتضى هاي گدامهن طالعه عينهن وراسهن كبران 

جميله //اسمع خاله يجوز انا مخرفه وساعات اذب حچايتي شلون ما چان بس خلي اگلك شي امهن من سوت

العمله هنه چانن لحمه حمره وربتهن امك منيره مثل ما ربتك وربت عباس واخواتكم 

هذني البنيات ( وتاشر علينه )

الي تگول عليهن طالعه عينهن اذا مو بنات اخوك فهنا اخواتك لان منيره امهن

الكل بقى صافن على كلام جميله الي ردت وگالت //شوف ياهادي وهاي مرتك تسمع شوف يابني 

الزغير يكبر والدنيا ما تبقى الواحد وبيوم بسنه كلمن ياخذ حگه مثل ما امهن اخذت حگها من وره هاي

 (واشرت عليه )

هادي //شلون خاله شقصدج 

جميله //قصدي خاله لو ما هاي چا هسه مياده ماخذتهن وماخذه صاحبها الكتل اخووك وماخذه البيت والمحلات 

اثنينهن وراتب عباس وهسه انت كل شهرين تلاثه تودي على البنات وتشوفهن وتترس ايدهن بس هاي البنيه 

الگدامك هي واختها الهسه جاي يرجفن ويتباچن وانا احلف هنه ما طايحات من الدرج لا انت كاتلهن 

هاي البنيه لان من ظهر صالح ما سكتت على السوته امها 

وهي بيدها وصلتها الحبل المشنقه لو نسيت هسه جاي تگول ما متربايات چا شلون المتربيات 

 ولك الهسه يبجن على امك امك الربتك وسوتك رجال لابسات اسود عليها ويبجن وانت ياابنها ما ذكرتها بثواب 

بليلة جمعه وجاي تكول ما متربيات فهمني شلون المتربيات يصيرن

ما اتحملت وصرت اشهك بيبي جميله گالت //لا تبچيين يابعد اهلي (باوعت الهادي وگالت ) هادي خاله تره 

كل شي ولا دمعة اليتيم تصير نار تحركك وتاكل الاخضر واليابس 

هادي وهو يحرك ايده مستفسر //شنو خاله تدعيين عليه ؟

جميله //لا مو انا ادعي عليك بس ربك يباوع

كرم مسح دمعته واتقرب يمي وگال //اسكتي بابا ناديه لا تبچيين كافي (باوع الهادي ) شوف ابو ياسر 

انت عمهن اخو ابوهن وانا عمهن ابن عم ابوهن وابن خالته اذا تكول ما اكدر للبنات وتخاف منهن انا اخذهن 

عدي واخليهن بالمدرسه حالهن حال بناتي واصرف عليهن من جيبي

  هادي راد يحجي عمي قيس قاطعه // هادي مثل ما انت بالفاتحه گلت انا مسؤول عنهن وحالهن من حال بناتي 

هسه بناتك بالمدرسه وهنه هم يبقن (وخزر افراح ) مو صحيح فرحه 

افراح ظلت تعض بشفتها عضات متتابعه وگالت //اي خويه هادي بوكتها چان عصبي وعباله ملاسناتني وانا هم 

چنت مقهوره من زهراء وما فهمته 

شمس //هاي هي ابو ياسر البنات طلعن ما مسويات شي

افراح //اي هاي هي شنو نبطلهن لا عمي الله ما يرضى حالهن من حال البنات 

شمس //اي والله ام ياسر عاد باچر يحصلن شهاده يدعلج انتي وعمهن والناس تگول حصلنها بجال عمهن 

ومرت عمهن

كرم باوعلي // وانتي بابا ناديه تسمعين كلام عمتج هي مثل امج (سكت كرم ونفخ )هي تريد مصلحتج 

انا هزيت راسي واخذت حنين وصعدت شمس گالت // وين صاعده ابقي انتي وحنين 

جاوبتها وانا اشهك ......لا عمه ارووح احضر جدولنه وملابسنا للدوام 

جميله //ابقي شويه وتالي اصعدي تعاي يمي

قيس //شوف هادي اسمعني انت وافراح تره الدنيا فانيه وما تسوه شي والله سبحانه وتعالى گال (فاما اليتيم فلا تقهر )

اسمعيني افراح باجر يم رب العالمين لا انتي تفيدين هادي ولا هادي يفيدج كلمن وعمله 

واحنه كلنه عمامهن ومو غربه عليهن واليثگل عليكم يخف علينه

جميله // هاي گدام ام قيس خاف تكولون اتحاميلهن الله عليج نصره بالمگبره مو حتى التراب بچى عليهن مو 

متكترات او وحده كاظه ايد الثانيه وبس يبچن ويعاتبن ابوهن ( وبجت ) 

نصره //. اي والله خيه صدك

جميله باوعت الهادي // حتى ما راحن يم منير لمن ما كرم اجه ونزلهن من السياره گلهن جدچن يريد ايسلم عليچن 

كرم //. عمي ليش الچذب ناديه واختها مؤدبات ويستحن من خيالهن 

باوعلي قيس وگلي // روحي عمو اخذي اختج واصعدي

انا لزمت حنين وصعدنا وقيس يگله 

- - خطيه هادي ما تشوفها گوه تصعد الدرج من رجلها خطيه عاد تحصل شهاده منو الها

ورحت للغرفه قفلتها عليه وطلعت النقال شفت سراج مراسلني وهو يگلي 

::انكسرت ايده الهذا الكلب ما عليج تداومين غصبن ما عليهم واذا ما قبل اندمه والله 

كتبتله ...يمته تجي 

::ان شاء الله عن قريب

عرفت عمه زهراء گايلتله راسلتها وشكرتها گالت //باجر راح تدزلي كنتور وجربايه وگالت هنه 

بالاسم مني بس الصدك من سراج 

وكتبتلي //ناديه جاريها الهاي الحيه هي وبناتها انتي چبيره والي مريتي بي كبرج عشرين سنه 

صفنت وكتبت الها ...لا دگولي مية سنه

ثاني يوم الصبح گعدت گلت خلي اكسر عينها واسوي الريوك من وكت لكيتها هي وامها يسولفن بالمطبخ 

نصره //انتي ما عليج بيهن مو هليشتغلن 

افراح تحاول تنصي صوتها // يمه ما اريدهن اكرهن ولو ما هاي الچلبه زهراء گايله لشميسه ما چان 

رجعن للمدرسه واجاني قيس هاد عليه

نصره //اي لو تشوفين شمس شسوت من سمعت 

افراح //ادري شيشت عليه قيس ويتهدد ويگول اخذ ناديه الابني وارجعها للمدرسه وتاخذ حلالها 

وصار يهدد بيه واكسر راسج واطيح حظج واخذج اربطج ويه الهوش

صدك رغم قهري ضحكت 🤣🤣. وانا اتخايل افراح مربوطه ويه الهووش 

رجعت صعدت وبدلت انا وحنين وداومنا وانا ادري مستحييل افراح بيوم

 تحبنا لو يصفى گلبها علينه وما اعرف ليش

واجه الكنتور والچربايه فرحنا بي وكأن كل احلامنا اتحققت وكل مشاكلنه انحلت اجو عمال وشدو الكنتور

ورتبنا ملابسنا والفراشات 

شلتهن خليت نصهن فوك الكنتور والزوالي والكهربائيات بالبيتونه لكن افراح گالت

لا وين يخلون الچربايه ما قبلت ندخلها للمخزن بحجة زغير وگالت // كافي عليهن الكنتور هذا هو 

اخذت الچربايه وخلتها بالغرفه الچبيره المسدوده وبقينا على نفس الروتين نشتغل انا وحنيين الي ما تقبل تشد

 حيلها بالدراسه ومن اگلها يبطلج هادي ترد عليه // لا اذا انتي تنجحين وبته ترسب ما يبطلني

وصرت ادرس ما اضيع اي دقيقه بوكت فراغي وامتحنا نصف السنه وصارت العطله الي بيها راح تتزوج عمه

 زهراء وتبتعد عنه اجت وعزمت افراح هي وبناتها وجابت علاگتين وصاحتلي انا وحنين وگالت

ناديه //هاي فكت حزن الج والاختج كافي لابسه اسود 

انا جاوبتها ......لاعمه ما انزعه لو شيصير اذا حنين تريد تنزعه بكيفها بس انا لا 

زهراء مسحت دمعه من عينها وهي تگلي //يعني انتي ما تفرحيلي 

...لا عمه والله فرحانه الج بس ما اگدر خليني براحتي 

- - وانتي حنين ؟

حنين //انا احب البس هاي البدله (وتاشر بايدهه)

زهراء //دروحي گدريها حبيبتي (زهراء بابتسامه )مو ما تجون ام ياسر انتي والبنات احنه ما نسوي زفه بس 

انا راح اسوي حنه 

افراح //بيها الخير شلون ما نجي عاد انتي العزيزه الله يهنيج 

ونزلت حنين وهي فرحانه بالبدله الي چانت حلوه ومبينه غاليه زهراء گالت //الله طالعه مليكان شنو هالجمال 

(باوعتلي )- هاج ناديه هاي فكت حزنج يمته ما يعجبج البسيها وهم جبتلج لبسه سوده لان اعرف 

ما راح تذبي للاسود

وراحت زهراء وافراح لزمت بيها للعشا لكن هي كالت وراها مشاوير يادوب اتلحك تخلصهن وعرفت عمه زهراء 

صار كل همها نفسها وحياتها الجديده 

من طلعت زهراء افراح هي وبناتها گعدت تصنف وتگول

- - من كل عقلها هاي العانس تريد زفه الي بگدها بناتها بالكليه وهاي تدور زفه هههي ياالله 

هديل //لا وجايبه فكت حزن هههه صدك قديمه 

افراح باستهزاء //باالله راوينه شجايبتلج خلي نشوف

واخذت العلاگه بدون ما تسمع ردي وطلعت الملابس وهنه متعجبات لان بصراحه كلش فيكه وحلوات 

عمه زهراء جايبه بدله لونها عنابي وجايبتلي تنوره وقميص وشال اسود وحذاء بي شويه علو بس حلو كلش 

افراح گالت الهديل //خوش اجتج لبسه ما طول هاي (اتاشر عليه )ما تفك حزنها انتي البسيها وروحي للحنه ما بيه 

اطلع اشتريلج

واخذتهن هديل وراحت گدرتهن بالديوان الداخلي وطلعت راوت البدله 

بعدين لبست التنوره والقميص وسالت امها //ها ماما ياهو احلى 

افراح هنه اثنينهن حلوات عليج بس البدله انزك البسيها انتي والتنوره والقميص الناديه لان تدري بيها

ما تنزع الاسود 

اسيل // هديل چان گدرتي الحذاء فد نوب 

هديل باستهزاء//لا ما البسه مو هذاخاص

عرفت تقصد لان رجلي بيها قصر صعدت وانا خليت العلاگه بدون ما اخذها چنت كلش مقهوره اجت 

حنين وگالت //هاج هاي الحذاء والتنوره والقميص وافراح صارت تحچي وتكول هاي عود شبيها ضاگت عينها 

وهديل گالت //خبيثه 

افراح ردت // ما عليچ بيها البسي الفستان طالع عليچ يخبل 

هديل // بس مبين غالي كلش 

افراح // بخت هاي العانس اجتها هيچ قسمه

حنين تحچي بقهر وانا زاد حقدي على افراح وبناتها يوم بعد يووم وانا اتمنى انتقم منهم 

وبيوم حفلة زهراء لبست التنوره والقميص والحذاء اخذنه ياسر انا وحنين وره الغدا 

وافراح اتاخرت بعدين اجت هي وبناتها الظاهر ماخذتهن للصالون وشفت عمه زهراء جايه من الصالون 

من شافتني ابتسمت وصلت يمها

گتلها ...... مبرووك عمه 

زهراء بفرح//ولو زعلانه عليج ليش ما اجيتي من وكت لو من البارحه

انا سكتت وابتسمت ورحت باوست بيبي جميله وعمه شمس وعمه ام مرتضى وغفران وبقيت بالمطبخ اساعدهن 

العصر كلش اجت افراح هلهلت وباوست زهراء 

وهي تگلها // طالعه تخبلين عين البارده

بيني وبين نفسي گلت ... چا الاستهزاء طول اليوم انتي وبناتج وين صار

انا وغفران ورؤى بت عمه شمس نقدم عصير وماي اما هديل هي واسيل بس يرگصن وحتى حنين هم صارت 

ترگص رغم ما تعرف بس حنين تحب تعيش كل لحظه وتتعايش وياها انا وگفت على صفحه وهنه صارن

ياخذن صور بنقالاتهن وغفران اخذت نقال زهراء الي صارت تاشرلي انا وحنين نجي يمها 

اجيت يمها وغفران تريد تاخذ النه صور افراح گالت

- - شنو زهراء تاخذين ويه ناديه وهي لابسه اسود ما يصلح 

جميله گالت //لا ليش ما يصلح شنو ناديه تغار من زهراء بالمثل ما تگليلي شلج بهالحچي 

افراح وهي تصطنع ابتسامه //لا عمه مو هيج بس ابنيه وباچر تتزوج وناديه واگفه يمها وهي لابسه اسود وتاخذ صوره 

جميله باوعت الزهراء // ما بيها شي عود زهوره من يسالج رجلج گولي هذني بنات اخوي وهاي لابسه اسود لان 

يلوگ الها ويخبل عليها 

شمس // اي مو ابو المثل ايكول من لبس السوااد سبى العبااد

انقصفت افراح بالگصه واخذنا ويه عمه زهراء ويه بيبي جميله وعمه شمس وحتى ويه افراح وبناتها 

وانتهت الحفله وصديقات عمه وجوارينهم سلمو وراحو وبقت افراح هي وبناتها واختها ابتهاج وبقن يسولفن 

وانا وشمس وام مرتضى بالمطبخ نسوي عشا وصبينا ورحت افرش السفره وبنات هادي ويه بنات شمس وهنه 

يصورن بالموبايل ويسولفن ويضحكن وياهن بنات ابتهاج اثنينهن 

خلينه الصحون وبيبي جميله گالت

- - اتفضلن عيني البنيات وانتي افراح ما شبعتي سوالف انتي واختج ما تگللي اتبسبسن شعدچن 

افراح تضحك //يا عمه ما عدنا شي بس ابتهاج تگلي ليش زهراء ما تلبس بدله وتسوي زفه 

عاد انا گتلها تستحي هي صدك چبيره بس مو كلش

زهراء عكفت حواجبها وهي تگول //تحچين صدك افراح تره طلال گلي يسويلي زفه وحفله بالشيراتون وبعدين

نسافر بس انا ما قبلت گلت نسافر احسن شكو داعي للخساير 

ابتهاج //وين تسافرون 

زهراء//اول مره نروح للزياره ومن بغداد نطير المصر هو عنده هناك شقه وشاليه وگلي شهر الج وين يعجبج نسافر

 بكيفج عاد انا گتله خلي نوصل مصر واشوفها وبعدين نشوف وين نروح 

افراح اختفت الابتسامه لكن ابتهاج بينت هي فرحانه وگالت //تستاهلين كل خير احبيبه

بليلتها على اساس ابقى ابات لكن افراح ما قبلت گالت عمهن ما يقبل وعدها دراسه لكن بيبي جميله خابرته وهو قبل 

لان اعرف حسيت بيها شويه وتنفجر

بقيت طول الليل ويه عمه زهراء الي صارت توصيني وتعلمني شلون ادير بالي على نفسي وعلى اختي وما اثق باي احد 

وفهمتني انو انا كبرت والعين عليه انا واختي حنين الي تبين اكبر واجمل مني واكو هواي ناس تحب تصطاد بالمي العكر 

على بو امها مو زينه وكتلت ابوهن وادير بالي من بيت هادي وكل الي بي

نمت وانا بين القهر وبين الفرح العمه الي اشوفها فرحانه وبين القهر لان راح افارگها وما اعرف شنو يصير 

وثاني يوم العصر لبست كوستم ابيض وراحت عمه وهي تبوسني وتشمني وتوصيني وتبچي 

حتى مو مثل ما باست امها 

بعدين عرفت زهراء شگد چانت تحب ابوي وانو بيبي جميله برعانيتها كتلت هذا الحب

اتمنيتلها السعاده وبالليل رجعني عمي كرم ولگيت افراح تريد بس احد يطخها انا سلمت وصعدت بس الغيره مالتها 

دزت علينه اسييل ورحنا وگالت //ها شبعتي خواره انتي واختج 

- - راحت المسمومه 

  - - بخوت زهيره تسافر المصر 

باوعت النه وزمخت //شو واگفات ما تدخلن للمطبخ والبيت

رحنا للمطبخ وهي مخليه حتى مواعين الصبح صرنا نغسل ونشف ومسحنا الكاونترات والارضيه 

وثاني يوم كملنه باقي الشغل زهراء ما صارت تراسل هلگد وسراج يراسلني ويسألني عن احوالي وصرنا نروح 

كل اسبوعين تلاثه البيبي جميله ساعات نبات وساعات نرجع وره العشا وهاي اوامر افراح الي تعودنا عليها

وانطوني المعدل ناجحه يعني دخلت بكلوريا وانطونا العطله وانا اعرف افراح ما راح تخليني اقرا لذلك قررت 

استغل كل لحظة فراغ واتفقت انا وحنين الصبح اشتغل وانام وره الظهر والعصر عليها الشغل وانا اقرا ولان حنين

 مو هلگد بالدراسه وشغل العصر خفيف فچانت تروح للامتحان وترجع تنام شويه وتستلم شغل العصر الي هو 

بس العشا وغسل المواعين وتنظيف المطبخ

بيني ما بين نفسي قررت ما اگل الافراح تعتقني من الشغل لان برمجت نفسي انا الليل كله گاعده استغله بالقراءه 

والصبح انزل اسوي ريوگ وانظف الطارمه والحديقه وبعدين انظف البيت والمطبخ واغسل مواعين الغدا الي 

بالاساس ما ناكله وياهم

واروح انام حنين تحاول ما تگعدني وبدت الامتحانات وخلونه نمتحن بمدرسه بنفس المنطقه بس شويه ابعد من 

مدرستنا اول يووم الامتحان انا رايحه امشي ابحدي لان من چنت اداوم اروح انا واختي

 چنت امشي واراجع بالماده سمعت واحد يگلي

::ندووش بس كون دارسه زين 

جمدت وانا احس گلبي يرجف لان عرفت صوته باوعتله اريد احضنه لكن حسيت انا كبرت 

...عمو سراج 

هزلي راسه وكال ::اي لعد شعبالج اتركج اول يوم امتحانج 

::شلونك عمو 

...انتي شلونج هاا مستعده

  هزيت راسي ... اي عمو مستعده بس ليش ما تكتبلي شي يطمني 

::لان اريدج تعتمدين على نفسج 

...ليش من اخر مره كتبتلي حسيت بكلامك عبالك بعد ما اشوفك 

::لا ياعمري (اتقرب عليه ودك على گصتي دگات خفيفه )خلي ابالج ما راح اتركج لا انتي ولا حنين بس ابتعد 

بسبب شغلي وانتي هم لازم تعتمدين على نفسج

باوعتله بعتب ...تعبت عمو 

هز راسه ::ادري لكن لازم نصبر 

...الله كريم 

::عفيه بابنيتي الحلوه هاج (وطلع فلوس من جيبه )هاج هذا مصرف الج والحنين 

اخذتهن وگتله ...عمو ما تجي البيت هادي 

هز راسه وگال ::اي اجي بس تكملين امتحانج وهاي حنين خلي تشد حيلها لان اعرف بيها ضعيفه بالدروس

...عمو هي ما تحب المدرسه بس انا اجبرها 

::اي اجبريها وطيحي حظها اذا گالت ما اريد اداوم 

...اي عمو 

::ياالله روحي واريدج تجاوبين كل شي تعرفينه ولا تخبصيين نفسج كلنه نشوف الاسئله اول ما نقراها صعبه

 بس بعدين نشوف ما كو اسهل منها

...اي عمو 

::ياالله حبيبتي واي شي تحتاحي اكتبي اليه 

...هاا 

::اي اكتبي اليه وانا اعرف شلون اوصلهن الج 

...شكرا عمو 

::العفو تتدللين انا ارووح 

...الله وياك 

دار يريد يفتح السياره گلي ::ندووش گلي الحنين القاعده مالت الهرم ما راح تترككم لو باخر الدنيا راح تلزم بيكم

انا فتحت عيوني وبعدين تذكرت رسمت حنيين وابتسمت وصلت للمدرسه ودخلت للقاعه وبيومها جاوبت وصرت 

من ارجع اجيب الحنين جبس وحب اضمهن بدون محد يشوفني اقصد افراح وبناتها 

واستلمت حنين النتيجه راسبه وصارت تبچي وانا گتلها ...عادي تتقوين اهم شي لا تفكرين اتبطلين 

واجه عمي هادي بيومها رزلها وگلها ......بيش ملتهيه

وهي تبچي افراح تگله //مبين هادي ما تريد المدرسه خليها تبطل 

عمار //اي بابا بطلها خليها تساعد امي بالبيت 

ياسر شافني شگد مقهوره سأل هديل واسيل //وانتن وين النتيجه ما لتچن 

هنه ارتبكن ياسر گال //المدارس الاهليه تنطي قبل الحكوميه شنو ما رحتن اتجيبنها 

هادي سال گال //صدك وين النتيجه ؟

افراح //يا هادي تدري بيها بالانگليزي والرياضيات ضع..قاطعها

هادي //الزبده افراح 

هي تباوع النه ما تريد تحچي گدامنا ياسر گال //هديل بسرعه جيبي الكارت انتي واختج 

افراح //شبيك ياسر متحمل على اخواتك انت ما تحچي بوجود ابوهن 

ياسر //ماما ماسويت شي اريد اعرف هنه نجحن لو رسبن 

افراح بعصبيه وبسرعه// هديل بالانكليزي والرياضيات واسيل رسبت

هادي من سمع گال بعصبيه // ما شاء الله وهنه مدرسه اهليه والنهار كله كاعدات لا شغل ولا مشغله بيش ملتهيات 

انا جاوبت بخباثه ...عمو الظاهر على اسيل ما تحب المدرسه بطلها احسن خلي تساعد عمه 

وافراح صارت عباره عن عاصفه //شنو شنو يبطلها وانتي شعليج هادي المهندس يبطل بته ليش حبوبه 

...عمه لان مو شاطره مو انتي گتيله يبطل حنين لان رسبت

افراح //انچبي ولا تراددين ادب سزز وانتي بس ما تنجحين تبطلين 

باوعت الهادي الي ما فك حلگه ساكت وعمار صعد گال //ارووح ادرس

وهديل واسيل ضحكن وراحن ياسرهو بس الي اشوفه مقهور وضايج لكن احسه شخصيته مثل شخصية هادي 

ضعيفه گدام افراح 

وزاد حقدي وكرهي اضعاف على هادي وافراح الي تغلط وهادي ما يردها

اخذت حنين وصعدنا ودخلت للغرفه وگتلها 

- - اتولي افراح ما عليج بيها بس اسمعيني حنين لو ما اسيل راسبه چان افراح خلت هادي يبطلج وخلتج خدامه الها 

والبناتها لازم تشدين حيلج 

حنين //بس انا ما احب الدراسه 

جاوبتها ......ليش هو البشر يحصل على كل شي يحبه لا حبيبتي ساعات ينجبر على هواي اشياء وانتي لازم تبقيين 

بالمدرسه وتشدين حيلج افتهمي انتي كبرتي وما النه اي احد بالدنيا من نكبر بس شهادتنا 

حنين //لا عمو سراج يبقى ويانه وما يتركنا

ابتسمت وهزيت راسي .... حتى لو هو يريدنا نكمل دراستنا ما سمعتي من يكول اهم شي مدرستجن اخذن الشهاده 

وخلن اصبعجن بعين اكبر واحد

كملت الامتحان وانا متاكده راح انجح وفعلا نجحت بيومها بس ياسر شفته فرحان بنجاحي وبالليل سراج كتبلي وگلي 

::راح اتصل انتي لا تحچيين بس اسمعيني شنو اگول 

واتصل وانا احس الفرحه بنجاحي وهو يگلي 

::ندووش يا عمري ادري بيج راح تنجحين لان اعرفج انتي بطله شنو تردين اجيبلج هديه انتي اكتبي وانا اجيبلج 

وگلي الحنين زعلان عليها بس الخاطر فرحتج راح اسامحها وبعد اريدج تشدين حيلج

ثاني يوم اجت بيبي جميله وعمو كرم انطاني خمسه وعشرين وگلي ملابس الدوام عليه 

وبقيت منتظره عمو سراج لكن ما اجه قبل ما تنتهي العطله اجت زهراء وبيبي جميله وانا بس شفتها صرت احضن 

بيها وابچي جايبه هدايا صار من زواجها مره وحده شفتها وهسه اجت لان زوجها يشتغل بوزارة الخارجيه ودائم

 السفر حتى هي اخذت اجازه بدون راتب سنه وقررت اتجددها گعدت وسالتني

— ناديه وره الرابع شقررتي ادبي لو علمي 

... عمه علمي ان شاء الله 

زهراء//ان شاء الله 

جميله گالت //بيبي شفتو بستان عمج قيس واخوانه 

انا باستغراب ...يا بستان بيبي ؟

جميله //ليش مو اول البارحه ماخذتچن افراح البيت اهلها تتونسن بالبستان لان ضايجات 

افراح بقى وجهه فالت وانا اباوع ما اعرف شجاوب 

جميله باوعت الافراح وگالت //ليش هسه سراج صار كخه يجي يطلع اله عمار يگله اهلي راحو البيت خالي قيس 

بالبستان لان بنات عباس ضايجات وامي راحت تونسهن وبس انا بقيت وهسه اريد اطلع 

شنوسراج من جاي جوعان عطشان تره جاي يسأل على بنات عباس

افراح بتوتر //والله عمه اوامر ابن اختج يگول سراج لا اريده ولا اريد يسال على بنات عباس 

جميله //وليش باالله ؟

افراح //عمه انتي تدرين ليش 

جميله //اي ادري بس سراج لا باك ولا ساك هاي وصيه والوصيه تشكل الذمه 

افراح //بعد ما ادري من يجي ابن اختج اسالي

جميله //اي اساله چا اخاف منه شني هاي مو اول مره يجي وترجعونه من الباب مره نايمات ومره رايحات العرس

 ويه افراح ومره ومره تره سراج ما محتاج وعنده خيير من الله بس واجبه يسال ع اليتيمات 

اجانه صوت هادي //بصفته شنو 

جميله //ها انت اجيت 

زهراء وكفت //اشلونك ابو ياسر

هادي //هلا زهوره الحمد لله ع السلامه ما تگليلي شتاكلين بيج وما تحلوين 

زهراء //عيونك الحلوه 

جميله //اگعد لا تاخذنا بشراع وميداف 

هادي //خاله شاخذج سراج ما اريده يجي ولا يسال 

جميله //ليش خاله شبدر منه 

هادي ضرب على رجله //ما بدر منه شي عده امانه يرجعها وصلى الله وبارك 

جميله //انت گلتها امانه والامانه ما تنرد اله الاهلها

هادي اياشر على صدره //وانا اهلها 

جميله //لا مو انت مو بكيفك 

هادي //هو لعبها صح 

زهراء// شنو هاي ابو ياسر شنو لعبها شنو سراج محتاج 

هادي //اي محتاج وطامع بس انا اله وين يروح اخذه اخذه 

رادت بيبي جميله تحچي زهراء گالت الها //ياالله ماما لازم نروح 

جميله //اي ياالله

افراح //لا وين ابقو ع العشا 

جميله //انعم الله ما نجربكم 

هادي //خاله وين رايحه بعدنا ما شفناكم 

زهراء// هم ياالله اجيت اشوف بنات عباس واسلم عليكم هاج عمه ناديه هديتج مالت النجاح وهاي حبيبتي

ام ياسر شغلات الج 

افراح //ياا ليش زاحمتي نفسج 

جميله //اخذيهن عمه صوغة الحبايب

وراحت عمه زهراء وصارت ما تراسلني اله قليل اكيد التهت بحياتها وزوجها وداومت بالملابس الي جابتهن الي 

عمه صدك حلوات ومرتبات وسراج بس يدزلي رسايل شدي حيلج وادرسي وانجحي ويعبيلي رصيد

وافراح تزيد باذلالها النه انا وحنين بناتها يطلعن ويتونسن واحنا كل شهر نروح نشوف بيبي جميله ساعتين ونرجع

 نلگاها متنگه وعمار بدا يتمادى ويه حنين لكن انا ما منطيته مجال

ولان اعرف حنين بفتره مراهقه انا صرت اراقبها ونجحت بنص السنه الثالثه وحنين نجحت فرحنا رغم اكو بعد مرحله 

لكن الامل انو احنا ننجح 

بالعطله افراح وبناتها رادوا يسافرون ويرحون للزياره لكن كانت العقبه احنه وين نظل

  بعدين قررو يسافرون وخلونه عد بيبي جميله الي بنفس الوقت كان عمو كرم عنده ابنه مرتضى كمل معهد طبي 

واتخرج واتوظف 

وغفران بالسادس ونبأ بالرابع ومحمد بالثاني لكن ما همهم الي يهم افراح نبقى انا وحنين بعيدات عنها اذا اكو سفر او 

ونسه وبنفس الوقت تريدنا قريبات نخدمها هي وبناتها

ورجعو من الزياره والسفر واحنه رحنا واي شي ما جايبيلنه وياهم 

ثاني اسبوع اجه كرم وگال اريد البنات اخذهن للزياره ويه امي 

عمي هادي ما عقب وافراح گالت // اي اخذوهن ابو مرتضى اقلها يدارن بيبيتهن 

كرم باوع الافراح //. شنو ام ياسر شامين ايدنا عليهن قابل هنه خدامات امي بعدهي بحيلها مو بحاجة احد ايداريها 

واذا تحتاج شي فمرتي وبناتي موجودات اريد اخذهن يزورن ابوهن وبيبيتهن 

فلت وجهها ورحنه للزياره نجف وكربلا راح ويانه عمو كرم وبيبي وزوجته وغفران زرنا ورجعنا وقبل 

ما يبدي الدوام بيوم كرم خابر عمو هادي واجه هو وعمو سراج الي ما خلونه نشوفه ولا نسلم علي 

ما اعرف شنو الي صار لان حتى امتنعنا ما ننزل نبقى بغرفتنا 

ثاني يوم الصبح من رحنا نداوم شفنا عمو سراج اباب المدرسه سلمنا علي واشوفه ضايج لكن يصطنع الابتسامه گلي

::اشلونج ناديه وانتي حنين ما اشتاقيتيلي 

حنين عبالك زعطوطه حضنته وهي تگله //شلون ما اشتاقيت الك بس انت (واتحسرت ) 

هو باوعلي عرفت بي شي گلي ::ندووش انا جاي اسلم عليكم 

جاوبته ......الله يسلمك عمو بس ليش ضايج 

حنين// اكيد لان ما نزلنه البارحه لان الشريره حيزبونه ما قبلت ننزل

هو نفخ وباوعلي :: انا جاي اگلكم راح اسافر اجاني ايفاد سنه للخارج 

انا صار گلبي يرجف وانا اگله ......عمو س سنه ليش 

::بعد اوامر الحكومه الي اريده منج انتي وحنين تديرين بالج على نفسج وانا ...

قاطعته حنين وگالتله بخيبة امل //انت هم راح توگع من الهرم وتنسانه 

::لا بابا عمري ما انساكم هي سنه وارجع اريدچن مثل ما عرفتچن سباعيات وبطلات مو ندووش

صار خشمي احمر غمضت عيوني ...وعد سراج 

هو فتح عيونه ع الاخر يمكن استغرب لان سميته بااسمه رد :: وعد 

...يعني وره امتحانات نصف السنه راح تحي 

هو ابتسم وهز راسه وانا اتحسرت وگتله ... ننتظرك عمو 

::تديرين بالج على نفسج واختج 

...ان شاء الله

::وانتي حنين لاتوگعين القاعده لا ارجعي ابني الهرم كامل لان الاحباب حتى لو غابو مكانهم اهنا (اشر على گلبه ) 

ضحكت وگالت //اي بس ترجع مو 

::اي 

حنين //احلف

هو ضحك ومد ايده وانطاني فلوس يمكن ايكفني انا وحنين سنه اذا ما نبذرهن وحاچاني 

:: شوفي اي شي اي شي تحتاجينه انتي وحنين اتصلي بزهراء وهيه تعرف شلون تجيبه الجن

هزيت راسي وهو راح وانا بيني وبين نفسي خايفه

 ما اعرف ليش سافر سراج وره فتره عرفت انو قبل ما يجينه للمدرسه جاي ومسلم على عمي هادي وموصي علينه

ابداية سفره بقى يدزلي مسجات سلام ويسال عني وعن حنين وبعدين صار يدز كل فتره وانا نجحت للخامس ودخلت 

علمي اما افراح زادت بتنمرها علينه صارت تشغل بينه ليل ونهار تذلنه وتحرك گلبنه

وهادي فكانما اغراب ما يعرفنا مرتين جابلنه ملابس بعدها ما صار يجيب ولا ينطونه مصرف صارو يعاملونه

 كانما خدامات الافراح وبناتها وزهراء ما صارت تسال علينه مثل قبل ولان دائما مسافره ويه رجلها

احس الناس كلها مرتاحه اله انا وحنين الي اشوف عمار يحاول يتمادى لكن انا ما انطي مجال 

ودوم افهم حنين لازم اتدير بالها من بيت هادي كلهم وخصوصا من عمار الي نجح ودخل قانون

چنا گاعدين بالغرفه انا وحنين الي صارت بالثالث وچنت اساعدها بالدراسه وحل الواجبات

 واجت اسيل وگالت //رايديچن عيني شنو انا اشتغل عدچن ياموديني صيحيهن يامرجعيني 

جاوبتها ......اسيل كملنه شغلنه وصعدنا نقرا ليش شصاير 

اسيل بنتر //وانا شمدريني اتحققين وياي

نزلت بس انا لان اعرف بعماار ما موجود وحتى من نزلت گتلها اقفلي الباب عليج لگيت عمو كرم وزوجته 

ام مرتضى جايه 

انا سلمت وعمو سالني شلوني بالدراسه وام مرتضى گالت العلمي صعب لو داخله ادبي احسن 

كرم گله// هسه هادي تروح مو 

هادي //اي ارووح ليش لا يستاهل سراج الواحد يروحله

انا گلبي صار يدك يعني سراج جاي ويردون يرحوله زين ليش شبي شكو 

انا حچيت سالت افراح ...ها عمه دزيتي عليه 

افراح //اي حتى تسلمين على عمج ابومرتضى وعمتج سألت عليج 

سالت عمو كرم وانا الفضول يقرا مليون ......بيبي شلونها 

كرم //زعلانه لان ما تجنها اله انا اجي واخذجن هذا البيت مو بعيد خطوتين

...تعرف عمو دراسه وحنين ثالث 

هادي //هاي حنين هم تچيس السنه اعرفها غبيه ولا يم الدراسه والله كرم لو ما ام ياسر وتگلي خطيه خليها اتكمل بلكي 

اتحصل الها شهاده فلا خليتها بس مصاريف زايده 

ام مرتضى // الله يرضى عليج ام ياسر مداريه اليتيمات 

افراح // بعد شنسوي حالها من حال البنات

انا مو يم الحچي اريد اعرف شبي سراج وليش هادي الي دووم اسمعه يحچي علي والي ما يقبل يجي لهنا هادي 

يريد يروح اكيد سراج بي شي 

افراح //ناديه لميلج شكم قطعه الج والاختج واخذي كتبج حتى ترحن يم بيبي جميله على گولتج 

ام مرتضى بضحك //هاي اتعلمتيها من ناديه 

افراح //اي كله بيبي جميله وعمو كرم وعمه زهراء عبالك بغداديه

ام مرتضى //بس يلوگلها ام ياسر 

افراح //ايي لاتنسين هي الها اصل بغدادي (وضحكت )

ام مرتضى //لا مو هذا قصدي اقصد هي ترهيمتها وجمالها مال وحده هيج تحچي 

كرم //هسه نخلصها عمو وعمه (وضحك )روحي بابا جيبن ملابسچن وتعالن 

انا اتشجعت ...ليش عمو ؟

ضحك //هاي شنو ما تردين تشوفين بيبيتج 

...لا والله طاگ گلبي عليها بس شعجب چان خليتوها جمعه وسبت 

كرم //هاا مو نريد نروح وانتي وحنين تبقين يم بيبيتج جميله 

انا باستغراب //وين عمو ترحون ؟

كرم //نروح العرس سراج شنو ما تدرين 

انا اتلاشت الضحكه مني ما اعرف شنو صار وكرم باقي يگول 

عمج هادي يريد يروح هوو والبنات ويبقون بس الولد وانا اروح وغفران ومرتضى عاد انتي وحنين 

تبقين يم عمتج وبيبيتج 

ام مرتضى //نگل العمج اخذها هي وحنين يگول عدهن دراسه وامتحانات 

افراح //اي خيه هاي هي كل ما اگلها امشي اطلعي تگول عدي امتحان وجاي ادرس

كرم //ياالله عمو استعجلي 

انا صعدت للدرج واحس رجليه ما شايلاتني رحت حنين گالت شبيج ناديه جاوبتها 

...لمي جدولج مال تلث تيام وامشينا البيبي جميله 

ليش شعجب 

...امشي حنين مالي خلگج الرجال منتظر

حنين //اي غير افهم ليش هاي الاجازه الطويله شعجب عتقتنا افراح 

رديت عليها بعصبيه ... لان مسافرين 

حنين //ها وين مسافرين 

انا ودي اصرخ بس تمالكت نفسي ...البغداد وتدرين ليش لان سراج راح يتزوج

////////////////////