رواية ناديه الفصل الثلاثون 30 بقلم انين الليل

_____________

ناديه 

حنين فتحت عيونها وبعدين ابتسمت وسالتني 

صدك يعني عمو سراج راجع من السفر وراح يتزوج 

جريت نفس ... ايي 

حنين // ليش ما ياخذونه العرسه احنه وحد ياخذون بس بناتهم 

جاوبتها بنتر ......اسكتي حنين وياالله جمعي كتبج انا اخذتلج ملابس

حنين //لا شنو اسكت احنه شراح نكلفهم حالنه من حال بناتهم 

ظليت انفخ وگتلها ...شنو انتي ما تعرفين منو ما تقبل 

حنين بقهروتعض باصبعها //حيزبونه اكيد

 ......خلص حنين مو مال مشكله وهذا هادي يطلعها بينه امشي نروح يم بيبي 

حنين //اي اقلها نسبح بحمام ونحس بالنظافه

(على طاري السبح افراح محرمه علينه نسبح بالحمام لان حسب ماتگول الجوه بس الها والهادي 

 والثاني للضيوف والفوك حمام للبنات وحمام للشباب وما يصير تسبحن وتطلعن اخاف واحد من الولد يشوفجن 

والنفس اماره بالسوء لذلك نسبح بالبيتونه نحمي ماي بسطل وطشت ونسبح وحده تكعد اباب البيتونه الداخلي اخاف يجي 

احد ويفتحه والثانيه تسبح كل يوم وحده وبيوم الي تطلع افراح نروح نسبح بالحمام الخارجي لذلك مو يوميه نسبح

 لان نتعاجز من. نگل الماي )

رحنا ويه عمو كرم وانا ساكته ودخلت شفت بيبي جميله متمدده كبرت وما راح تروح العرس ابن اخوها انا بس 

شفتها حضنتها وما گدرت اصبر بچيت حييل وهي حضنتني وگالت عبالك تعرف ليش مقهوره 

— لا تبچيين يبيبي الله كريم

ثاني يوم سافرو رغم حنين گالت الكرم تريد تروح وياهم ومرتضى گله بابا خلي ناخذهن شكو بيها بس كرم گال 

خلوهن عدهن امتحانات 

ام مرتضى گالت //ياامتحانات كرم ليش بنات هادي ما عدهن امتحان 

جميله //هذا شغل افريحه الچلبه

كرم باوعلي // ياالله بابا ناديه انتي واختج بدلن وياالله خلي نروح شنو قابل شايلينچن على راسنا 

حنين رادت تگوم بس انا لزمت بيها وگتله ......لا عمو صدك عدنا امتحانات 

ادري بحنين تريد تروح لكن انا اتحججت لان اعرف افراح راح اتطلعها من عدنا وهم ما ردت اروح لان 

سراج ما كلف نفسه لو يدزلي مسج ويگلي بوكت رجوعه لو بخطوبته ولا زواجه حسبني غريبه

سافرو وانا داومت وابد مو يم الدوام اسال بنفسي ... ليش ضايجه شنو السبب 

واحچي ويه نفسي واگول ... اكيد حباها لا هي حبته هو عم اقطع كلمة (عمو) صرت اسمي سراج حاولت الهي نفسي

 مره بالدراسه ومره اشتغل ويه مرت عمي كرم ومره اكعد يم بيبي جميله وهي تسولف عليه لكن بيوم زواج سراج 

سمعته خابر بيبي وهي تهوسله وانا ما صبرت رحت للحمام ضميت روحي وانا ما اعرف شبيه رغم حچه ويه حنين 

ومن سال عليه گلوله بالحمام بقيت فاتحه الماي وابچي

... ... زين ليش ابچي شبيج ناديه سراج ما قصر من انتي طفله الهسه شنو شجرالج ليش ما تحچين ويا

بقيت جوه الدوش ومن يصب الماي دموعي تصب وياهن وصرت اشهك حييل ما اعرف تفسير الهذا الشي 

طلعت وره وكت وحنين شافت عيوني اجت يمي 

شبيج ناديه 

...ما بيه ليش 

عيونج مورمات 

......ها ايي تصدگين اختنگت من البخاار وصابون دخل لعيوني

جميله// سراج راد يحچي وياج 

ام مرتضى //عمه احنه ابختج عريس بحال ناديه هذا لان كرم كله امي تريد اتباركلك

بيبي جميله سكتت وبس تباوعلي وبوجهه كلام ما اعرف شلون خلص اليوم واجه الليل وحنين صعدت ويه نبأ بت 

عمو كرم هي بگدها وانا بقيت يم بيبي جميله 

وهي مره تنام ومره تگعد انا بالليل صرت اتساءل 

هسه سراج بحضن زوجته ويگلها احبج وهي هم تگله احبك

وگعت دموعي وصرت اشهك وانا دايره وجهي اتقربت عليه جميله وحضنتني وهي تگلي 

(كافي المقسوملك مضموملك )

عبالك تدري انا شنو بيه بس انا ليش هيج بليلتها ابد ما نمت حتى من صليت الفجر صليت وانا ابچي ما اعرف ليش 

وثاني يوم بقينا ابيت عمو كرم وانا بغير عالم مره التهي بالشغل مره اكعد افتح الكتاب وابد ما اقرا بس حتى ما يسالوني 

شبيج

يوم الاحد داومت وانا احس بروحي خاويه حتى المدرسات شافني ضايجه صارن يسالني مريضه انتي 

ردت بس الدوام يخلص بالليل اجه عمو كرم ومرتضى وغفران بوكتها چنت گاعده يم بيبي جميله الي دووم 

من اروح ابقى يمها عكس حنين تروح ويه نبأ وسلم عمو كرم على بيبي الي صارت تساله وهو يگلها

يمه الصباح رباح تعبان حييل 

راح كرم وبقت غفران گاعده ومن رادت تگوم سالتها بيبي جميله 

تونستو حبوبه 

غفران //اي بيبي اتونست رحنا للامام الكاظم( عليه السلام )ورحنا البيت جدو جميل الي يسلم عليج بگد الدنيا 

ورحنا للعرس چان ضخم وشگد ناس احت

جميله //الله يسلمج شلونه اجميل حتى ما يخابرني 

غفران //بيبي خطيه گوه يسمع 

جميله //مت عيني سوده عليه خويه جميل ما تسمع (بعدين عبالك اتذكرت شي ) اگلج اغفيره وهادي ومرته وبناته 

غفران //بيبي وين ولا شفناهم خلصوها كله طلعات حتى اجو البيت جدو جميل اسقاط واجب اقل الساعه وراحو

جميله //چا وين خلصوها

غفران //اكلج بس يتونسون حتى ما بقو بس ليله العرس بقو ابيت جدو منير وثاني يوم عمي هادي ذبح جوه رجل 

العروس خروف 

جميله عوجت حلگها وهزت ايدها //منين اجاله الكرم الحاتمي اول تالي هادي يجيبله خروف فلا اصدك هو لو 

يذبحله دجاجه للخطار يظل يرجف 

ما ادري بعد (واتثاوبت )ياالله اروح انام انا هم تعبانه

جميله //خايبه توگفي شويه 

غفران بتململ //ها بيبي 

جميله //او وجعاا اگلج والعراريس شلونهم 

غفران ابتسمت //يخبلون خو عمو سراج طلع يجنن 

جميله //والعروس حلوه لو ملبخه 

غفران //بيبي شحال لو ما بغداديه ما اعرف شلون تحچين

جميله //انچبي غفيره بغداديه بس بالاسم صار فوك الخمسين سنه اهنا 

غفران //بيبي عليمن تضحكين يا خمسين تكولي سبعين (ههههههه)عود تزغر بعمرها

جميله شالت الريمونت وغفران ركضت وهي تضحك وبقت جميله تسب وتغلط على غفران وانا بقيت ما احرك 

ساكن لمن ما اجت غفران وحظنت بيبي جميله وهي تگول 

- - مانگدر على زعلك ياحلو ياابيض ياابو عيون الشهل 

وباستها وجميله ضحكت وانا ساكته غفران گالت وطلعت تلفونها 

  - - هاج بيبي شوفي ابن اخوج شلون طالع

بيبي جميله باوعت وهي تكول// صلوات على محمد وآل محمد گمر سراج واسمه علي ومرته هم حلوه 

غفران //اي بيبي حلوه وفيكه شوفي هاي ثاني يووم من اجه من الفندق 

جميله //اي حلوه بس سراج احلى 

غفران //بيبي احلى وارجل لو تشوفيين مو عرس مظاهره 

جميله //اي هو معروف وابو وخواله معروفين 

غفران //بيبي چا اوولد جدو جميل ما شاء الله ذوله ابحدهم دوله وعلم 

جميله رفعت اديها بالدعاء //الله يوفقهم ويرزق سراج الولد الصالح

انا ضجت من سمعت دعاء بيبي اتقربت يمي غفران وگالت هاج شوفي ناديه صور عمو سراج فاتج ما رحتي ويانه 

باوعت للصور وانا اشوف شلون سراج هو وزوجته ومبين علي الفرح وصوره ثاني يوم من اجه من الفندق وشلون

يباوع الها وهي فرحانه 

ابتسمت وگلت //الله شگد حلوين

وراحت غفران وانا بقيت بحجة اقرا لكن بقيت افكر بسراج.ومرته وما اعرف ليش

وما ادري ليش انا هلگد ضايجه بوكتها گلت

......سراج بعد راح ينسانه ولا يعرفنه راح يلتهي ابيته وزوجته مثل ما التهت زهراء

ردت اروح الحنين واگلها القاعده مالت الهرم والي لازمتنا باديها راحت واحنا محد بقالنه 

ولازم احنا نبقى ايدنا بايد بعض يمكن تعتبرونها انانيه مني 

وهي بوكتها فعلا كانت انانيه مني لكن هذا الشي بيني وبين نفسي بليلتها گلت وانا ابچي

......ما طول كل واحد انتبه النفسه لازم انا هم انتبه على اختي وعلى نفسي واكيد راح انجح واتجاوز كل الحزن

 والالم لازم اصير قويه وافكر شلون احافظ على اختي وعلى نفسي

مسحت دموعي وبقيت افكر واخطط للمستقبل الي راح اعيشه ابحدي انا واختي بدون مساعدة سراج 

الي اعتبرته خلص انتهى من حياتنا 

الصبح گعدنا بدلنه ولگينه عمو كرم گاعد سلمنه علي وهو گال من تحلن تعالن لهنا وبالليل انا اوديچن 

البيت هادي لان يجوز همه اليوم او باچر يجون

وگعدنا نتريك وبيبي تساله العمو على بيت جدو جميل وهو يجاوبها بعدين باوعلي وگال 

- - - ناديه جدج منير زعل اهواي لان ما اجيتي انتي وحنين العرس سراج 

انا دنكت وبيبي گالت //لا ناديه زين سوت ما راحت 

كرم باوعلها// ليش يمه ؟

جميله //شني يمه هادي مو خابرك مو گلك البنات وين يبقن انوب تاخذهن للعرس حتى افريحه تجرم بيهن

كرم //يمه شنو هالحچي خابرني گال عدهن دراسه وانا بس ولدي باقيين بالبيت وحتى گلي اشتريت الهن ملابس 

جميله بونه //اه خلي نشوف وينهن الملابس هاي اللابستها حنين تذكر جدي 

حنين// اي بيبي مالت ناديه 

كرم //ياالله بابا اتاخرتن حتى اوصلچن بطريقي

ركبنا ويه عمو كرم وبالسياره كلي 

جدج منير وعمج سراج هواي يسلمون عليچن وصدك جدج ابو سراج عتب وكال 

شلون ناديه وحنين ما يجن العرس عمهن 

باوعت العمي كرم وكتله //. عمو لو صدك جدي منير يريدنه نجي جان هو طلب من هادي يجيبنه بس ... 

  

سكتت ما كملت كرم رد //. بهاي الج حق مثل ما عزم هادي وعايلته وعزمني المفروض يودي عليجن

ما عقبت وصلنه ورحنا للمدرسه كملنا الدوام ورجعنا البيت عمو كرم بدلنه واتغدينه وغسلت المواعين 

ورتبت البيت ويه عمه ام مرتضى والعصر جمعنه ملابسنا وكتبنا وره العشا گال عمو كرم //ياالله نروح 

بيبي //. شني اجه هادي 

مرم // اي يمه اجه وخابرني گلي جيب البنات 

جميله اتحسرت //. مت عيني خطيه كاتلاته البنات هاي افريحه ودت عليهن چا ياهو يسويلها زقنبوت 

معلمه على خدم بت نصره

ابتسم كرم رجعنا البيت هادي سلمنه وصعدنا انا واختي للغرفه ورجع كل شي نفس ما كان بوقتها نسيت التلفون ولا حتى

 حاولت افتحه واشوف سراج مراسلني او حتى زهراء صار كل همي ادرس واشتغل واتكفى شر افراح وبناتها

 واراقب عمار الي چنت اخاف من نظراته الحقيره اتجاه حنين

وبدت امتحانات نصف السنه وكل هم افراح ما انجح وانا عادي اشتغل وارتب حتى بايام الامتحانات لان اقرا بالليل 

وامتحنا وبالعطله رحنا البيت بيبي جميله اريد اطلب منها اروح ازور بيبي منيره وفعلا طلبت منها وهي گالت العمو 

كرم الي وافق ياخذنه هو وزوجته وبنته نبا حاول مرتضى الي چان يباوع الحنين بنظرات احسها اعجاب او حب 

حاول يروح ويانه لكن عمو كرم گله لا منو يبقى يم بيبي جميله وراح عمو كرم واستاذن هادي الي وافق وبيومها عمار 

گله انا هم اريد اروح ازور بيبيتي

ورحنا واحنا ساكتات وعمار الطريق كله وهو يسولف ويصنف ويضحك واحنه ولا يمه 

وصلنه زرنا ورحنا للمقبره وصلنه يم بيبي منيره وهناك انا بچيت بكل حرگه وقهر وعمار راح جاب 

ماي ورد ورش القبور وصرت اقرا قرآن وحنين هم لازمه كتاب ادعيه وتقرا 

بعدين رحت القبر ابوي وگفت قريت الفاتحه وگتله

... بابا مشتاقه الحضنك (وبچيت بعبره اول مره احس فعلا محتاجته )

عمو كرم من سمعني صار يبچي ويگله 

— عباس رحت مظلوم وبس الله يدري بحالك انت اب وهاي (ايإشر عليه )ما ضيعت دمك ادعيلها هي واختها 

الله يوفقهن ويستر عليهن

بوكتها چنت اتمنى ما ارفع راسي اله على صوت سراج من يگلي 

اشلونج ندووش لكن سراج نسانه والتهى بزوجته مثل ما نستنا زهراء وتركتنا بيبي منيره 

ويوم بعد يوم اكثر الناس راح تتخلى عنا ما اعرف ليش اتذكرت مياده من انا زغيره ورحتلها وهي تگلي

شوفي هذا الشايلچ ويگلچ عمو يجي اليوم الي يتخلى عنج

وفعلا سراج اتخلى وعافنا 

 وطلعنا من النجف ورحنا زرنا كربلا وهناك عمو كرم انطى الزوجته فلوس گلها اخذي البنات خلي يشترن شنو يردن 

اشوف الفرحه بعيون حنين وانا ما مهتمه الشي عمار گال اروح وياكم وراح ويانه وهو يحاول يتقرب الحنين

ويسالها اذا تريد شي 

انا اجاوب عنها اگله ... شكرا ما محتاجات اي شي

وكانه غريب عنه ورجعنا من الزياره ونفسيتنا مرتاحه ومن رجعنا بيومها افراح وبناتها سون مشكله بس حتى 

ينغصن علينه فرحتنا بالزياره وحنين تگلي //ناديه ليش ما نرد عليها شنو تخافين منها 

هزيت راسي ... اي اخاف بالوقت الحاضر اخاف وهذا عمج يريدله كلمه حتى يبطلنه من المدرسه فخلينه نسايسهم 

على ما يتغير وضعنا مو سرا(هزيت راسي )لازم نتحمل 

حنين //شبيج ناديه حتى اسم عمو سراج ما صرتي تگولينه ليش

اتنفست بحنق ... لان هو التهى عنه وما صار يسأل علينه فليش ادوخ نفسي باشياء تافهه 

حنين //هسه صارت سيرة عمو سراج اشياء تافهه 

...حنين كافي ما الي خلگج اهم شي ننتبه النفسنا ومثل ما نسونه ننساهم وانتي شويه انتبهي الدراستج وكافي ترسمين 

تره محد ايفيد بهالوكت

حنين من طبيعتها ما تحب تناقش وتحب الحلول السهله وداومنا وره نص السنه وبدوا ينطونه درجاتنا بالامتحان وانا

 الحمد لله درجاتي لا باس بيها ونجحت بنص السنه وهديل طلعت مكمله باثنين واسيل راسبه باربعه وحنين باثنيين 

الي صار بيومها انو ياسر غم هديل وگللها //بيش ملتهيه مدرسه اهليه وخابصه نفسج انتي واختج وتاليها واكعه 

باثنيين وهاي الثانيه راسبه

هديل // وانت شكو المدرسه بابا يدفع فلوسها ما جايبينها من كدك 

لزمها وضربها وصارت افراح تحچي وتدعي على ياسر وتگله //حقير شكو تمد ايدك على بتي ولو ما غراب البين 

الي خالات عيونهن ويتحسدن بالبنات ما رسبن

وهواي حچي وبيومها اخذت بناتها وراحت تتسوك الهن وما رجعن اله بالليل واحنه ما نزلنه لان محد بالبيت 

وبقينا نداوم وافراح تزيد بذلتها النا 

وره دوامنا بشهر او اقل چنا انا وحنين حالات من المدرسه وبطلعتنا شفنا واحد انا صار گلبي يدك. 

من اتقرب عليه وگال ::شلونج ندووش

چان سراج هو نفسه ما متغير بي شي انا باوعتله صرت صافنه علي واجت حنين تريد تحضنه من كثر فرحتها بشوفته

 لكن انا لزمتها من ايدها بعدها ركبنا بالسياره چان ساكت وانا مقهوره لمن ما وكفنا گدام اسواق وانطى الحنين فلوس 

گلها ::انزلي اشتري 

وهي مثل الطفل الجاهل اليفرح باي شي نزلت وانا بقيت سالني 

::شبيج ناديه 

...ما بيه شي عم 

::ها اشو قطعتيها هلگد انا مضايقج وما تردين تشوفيني 

اهنا انا انفجرت ما گدرت ابقى ساكته گتله بدون وعي ... انت ليش اتزوجت

من حچيت هذا الشي يمكن ارتاحييت وبنفس الوكت تندمت انا منو واگله هيج اصلا عيب لكن طلع الكلام دون قصد 

هو ما حچى وياي بگد ما چان متفاجئ واجت حنين وهي فرحانه ومشتريه شغلات هواي انطتني وگالت

- - ضميهن ندوش لا تشوفهن حيزبونه 

انا خزرتها وسراج ضحك وصلنه دگينه الباب وفتحته افراح وگالت 

- - ها جايات ويه سراج 

سراج ::اي ام ياسر مريت عليهن للمدرسه وجبتهن بطريقي 

افراح //هلا بيك اتفضل انت مو غريب

اتعجبت من كلام افراح وترحيبها بسراج هو گال ::اگعد بالديوانيه على ما يجي هادي 

- - براحتك البيت بيتك 

دخلت انا وحنين من المطبخ لان مرت سراج گاعده بالصاله الكبيره افراح گالت اصعدن بدلن بسرعه وانزلن ساعدني 

وبوكتها اجت هديل واسيل 

هديل //هلو ماما 

افراح //هلا هدوله انتي واختج روحن بدلن وانزلن سلمن على مرت سراج

هديل// يا سجى اجت اهنا عدنا 

- -اي دروحن بدلن

هنه زاحمنه ع الدرج حتى بدون ما يگولن شويه وانا وحنين غيرنه ملابسنا حنين لبست تراك وانا لبست دشداشه وخليت شال على راسي وحنين همه نزلنه وافراح گالت ياالله خلي انصب لان هادي يتاخر وصرنا نصب انا وافراح وحنين تخلي بالطرشي 

ورحنا نخلي الصحون ع الطاوله وافراح راحت يم سجى واسمعها تحاچيها بتملق 

- - ياالله سجاوي انتي مو غريبه (وباوعت الاسيل )روحي صيحي عمج سراج خلي يجي يتغدا

اجت سجى الي بس شفتها كرهتها ما اعرف ليش وهي تباوعلي بنص عين انا سلمت عليها 

......مساء الخير 

هي ردت وكانها تشاور نفسها 

واجه عمو سراج گال //ليش ما خليتينه ننتظر هادي 

يتاخر هو خابرني عنده اجتماع وانت راعي بيت ما سمعته شگلك

سجى متقربه على سراج الي من شافنا گال :: اگعدن اتغدن ويانه

خزرتني افراح وسجى صارت تسأل باافراح على انو احنا خدامات او عبالها خدامات 

 استهضمت حيل من كلامها او اوامرها وضحك افراح وبناتها لكن الي هضمني اكثر سكوت سراج الي

 بسرعه نهى اكله اصلا اي شي ما اكل سمعته گال وانا اصعد الدرج انا وحنين بعد اهانة سجى النه

:: لازم نروح

بيومها بچيت بحرگه وعرفت انو سراج خلص ما صار النه ولا يعرفنا

بعد ما طلع سراج هو ومرته دزت علينه افراح واشوف بوجهها الشر وهي تگلي 

- - - شنو خاتون استهضمتي شنو سبتج غلطت عليج 

جاوبتها باصرار ... اي عمه غلطت بحقي وانتي ما دافعتي عني عبالك عدواتج 

افراح //اكلي تبن وانجبي ياحقيره انتي يرادلج تربيه 

...مو انا الي يرادلها تربيه انا متربيه غصبن على الي يرضى و والي مايرضى الي يرادلها تربيه هي خطارتج 

الكلبه الي ما اعرف شنو تشاور بيج عليه وانتي تباعيلي وتضحكين وتستهزئين

افراح //وليش اتعب نفسي الج عم من عمه العماج يجي وتنجازين انتي ويا وياالله بلا لغوه فوتن اتزقنبن وغسلن

 المواعين اسمعي الاكل ينشال بالجدوره وانتي واختج خليت تمن وطاسة مرك اتزوهرنها ان شاالله سم 

اشوف حنين ميته من القهر گالت //زهر وزقنبوت بگلب اليكرهنه 

افراح بعصبيه. // بنات مياده يعني شتطلعن

لزمت حنين من ايدها ودخلنه للمطبخ شلنه المواعين رجعناهن اكيد افراح راح تاكل بي اسبوع هي وبناتها 

وصرنا ناكل انا وحنين الي گالت //مشتهيه دجاج 

گمت طلعت الها نص دجاجه وگتلها ...هاج حنونه اكليها

هي باوعت وگالت //لا مو حيزبونه ما تقبل

ابتسمت ... ولج اول وتالي راح هادي من يجي يجي يبسطنه عاد خلي يبسطنه على شي احنه مسوينه 

حنين غصت جبت الها ماي وگالت //يعني راح يضربنه 

......اكيد حنونه عاد اكلي واشبعي 

هي راحت للثلاجه وطلعت تفاحه وموزه گالت //تعاي اكلي وياي 

...اي اكل ليش لا

وتمينا ناكل لمن ما اجت افراح للمطبخ وشافتنا ناكل باوعت خزرتنا انا ولا چني اشوفها سمعتها 

......حنونه اجيبلج روبه

هي باوعت وتريد تنفجر علينه لكن انا ما اهتمييت لان اعرف بس يجي هادي راح تشيشه علينه وراح يبسطنه

 ويجوز يكفر بينه بعدها جمعنه الصحون وغسلناهن واجه عمار ورا اجه ياسر وصبت الهم غدا ورجعنه غسلنه

الصحون وياسر طلب چاي سويناله ومسحنه المطبخ وصعدنا وهي راحت الغرفتها گعدنا بالغرفه وانا گلت الحنين

......القاعده الي لازمه الهرم وكعيها 

هي باوعتلي وگالت //ناديه شبيج كل ساع وگتيلي 

هزيت راسي وعضيت شفتي ......اي لازم تفهمين احنا من اتوفت منيره بقينا ابحدنا وانكسرت جناحاتنا ولازم نسوي 

المستحيل حتى نرجع جناحاتنا

حنين //انتي اليوم ما اعرف شبيج 

...ها حنين ما تعرفين 

حنين //تولي غياره شافتج احلى منها وتخبلت

ابتسمت على كلام حنين الي اسمعه منها لاول مره گتلها ...اي بس انتي تشوفيني حلوه لان اختي وتحبيني 

حنين هزت راسها بالنفي //لا حبيبتي كل الناس يشوفوج حلوه وحلوه كلش 

......ااه ومنين عرفتني 

حنين //تتغيشمين ندوش ليش ما تشوفين الناس من نحل من المدرسه شلون تباوع النه لو ما تشوفين افراح وبناتها 

شگد يغارن من عدنا 

...هههههه يغارن

حنين //اي ناديه يغارن والدليل افراح ما تاخذنه الاي مناسبه تطلع بس بناتها 

هزيت ايدي //والله ضحكتيني نسيتي رجلي وشلون امشي

حنين //والله ولا مبينه بيها عرج ابد بس انتي مصدومه وكله من هاي اهديله ام عصاجيل من لمن زغيره وهي 

تصيح وتحچي ومحد يردها 

ضحكت اكثر وكتلها ......منين جايبه هذا الكلام 

من بيبي جميله

......والله بيبي ما منها اث...

والباب اندك حييل خليت الشال على راسي وراحت حنين فتحته دخل هادي و لزمنه من شعرنا وهو يسح بينه ع 

الدرج ويگول //اليوم اموتچن بنات السگط 

صرنا نصرخ انا وحنين وهو ولا كانه طلع ياسر من غرفته واجه يركض وهو يحاول يهد ادين ابو ويگله 

- - بابا شنو شمسويات 

افراح //ياسر انت معليك خلي يربيهن العايقات 

هادي //بنات النعال شنو انتن وهيج تتصرفن اله اربيچن من جد وجديد

وصار يرفس بينا ياسر صار گدامه وهو يگول 

بابا تره حرام الي جاي تسوي 

هادي //انچب وصير على صفحه تعلمني الحلال والحرام 

ياسر //بابا خلي نفهم شمسويات (ودار عليه )شمسويات گولن

احنه نبچي وحنين طك خشمها دم 

هادي //من وراهن سراج ومرته طلعو من غير غدا زعلانين 

ياسر //ليش هنه شعليهن ؟

هادي //مو هاي الك......(وياشر عليه ) ملاسنه المره وهذا سراج ضاج وزعل واخذ مرته

حنين وهي تمسح الدم من خشمها وهي تشاهك //يعني ترضاها تگول علينه خدامات ومرتك تضحك الها 

افراح //اي خدامات ونص واذا ما يعجبجن روحن ديحن بالشوارع 

ياسر ينكت بايده //يمه شنو هالحچي وهي منو جنابها حتى تكول على بنات عمي خدامات 

هادي //لك انت ما تعرف هاي بتمن منو عمها

ياسر //عسى ما يكون منو ما كان ما الها حق تتجاوز وهسه راح اخابر سراج واگله يضب مرته ويخليها تحچي عدل 

افراح //هي لو ما سامعته يگول عليهن خدامات ما حچت 

حنين// لا عمو سراج ما يگول هيج اصلا هو الي كلنه تعالن اتغدن بس هي هاي الحقيره مرته تتشاور وياچ وتاشر 

علينه وتضحكن

ياسر بتهديد // اله اخابر سراج واخلي يفهم مرته الي يجي للبيت يحترم الموجودين 

افراح عرفت نفسها راح تنكشف راسا گالت //ياسر انت ما عليك لا تخابر 

ياسر//لا اله اخابر اريد افهم منو گل الابوي واجه من بره متخبل على البنات اكيد سراج

هادي //كافي ياسر ولا تتدخل 

ياسر //لا بابا اتدخل شنو هنه مو خدامات وحالهن من حال اخواتي 

افراح بنتر //بسك شنو حالهن من حال اخواتك كافي ياالله وانتن روحن المهجومتجن اگعدن بيها هم نزل ويدبج

صعدنا واشوف حنين تمسح بخشمها من الدم وانا گوه امشي بس بيه صرخه لكن سكتت وانا اسمع هادي يگول 

- - الي يگلي بعد خليهن ايداومن انعل والدي ايگعدن اهنا وانشوف الهن كلب ابن كلب ياخذهن لا يجيبلي سوده 

مثل امهن

ياسر //بابا شنو هالحچي صدك چذب 

هادي //لا صدك عمي ذني ما منطيهن وجه وهيج يسوون من انطيهن وجه ياكلنه 

افراح //هادي على كيفك لا تقهر روحك

صعدنا انا وحنين ما اعرف ليش دموعي ما نزلن رغم نار بگلبي وانا اشوف وجه حنين مخرمش وخشمها ينزف دم 

رحت غسلت وجهي وگلت الحنين گومي غسلي 

هي راحت تغسل ورجعنا وانا ضامه كره الافراح وهادي وبناتهم بگد الدنيا وفكرت حتى سراج هم صرت اكرهه

 لكن صوت بداخلي يگلي لو تكرهينه ما تفكرين بي خصوصا وانا سمعته يرد على افراح لمن گالت سجى ما اكلت شي 

هو رد عليها گلها

اصلا اليوم سجى شبعت من دون الايام

انا اعرف سراج مستحيل يحچي علينه بس رغم هذا صرت اكرهه قفلت الباب وطلعت النقال وفتحته لان عرفت 

سراج راح يتصل او يدز مسج وفعلا بالليل اتصل اكثر من مره وانا ما ارد علي الى ان اجاني مسج منه يگلي 

ناديه انا آسف 

رديت علي //سراج انا اكرهك لان انت جبان

ما اعرف ليش هيج كتبت لكن حسيت بداخلي بركان ولازم ينفجر لذلك كتبت هاي الجمله بعدها غطيت راسي وصرت

 ابچي بسكته وثاني يوم ما داومت لان وجهي مورم وهم اخاف من هادي يشوفني ويتهدد عليه 

بقينا ما نزلنا اله وره ما طلع هادي وبناته نزلنه الصبح ما سلمنه على افراح الي من شافتنا غمتنا باثنيين اديها

وهي تگول //بنات ام الزلم الملگطات رافعات خشمهن حقهن متباهيات بسواية امهن

انا وحنين تريگنا خبز وجبن وچاي وادري بحنين ما تاكل الجبن لكن انا باوعت الها وگلت 

... حنونه اذا ما تحبين الجبن اكلي خبز وجاي 

هي هزت راسها وهي مبرطمه تريد تبچي 

بعدين گتلها اصعدي نامي لان خشمج مورم انا اشتغل بس اقفلي الباب عليج

هي صعدت شافتها افراح //ها وين رايحه المسعده 

انا گتلها ......اختي خشمها مكسور ما اعرف شبي وگتلها تصعد ترتاح وانا اكمل شغلها 

وصرت اشتغل وهي تخابر وتضحك وتسولف وتسمعني وتگلها

 — يوو سجى لو تشوفين شنو سووا بيهن سوواوجهن خريطه وهو يگللهن فشلتوني ويه خطاري

صاحتلي افراح وهي بيدها التلفون //تعاي اگلج 

اجيت وانا ساكته هي تسمع بسجى 

- - امسحي جوه رجليه لان اكو تراب (وضحكت )

ما رديت عليها رحت جبت خاولي مال مسح ومسحت جوه رجليها وهي تتعمد تحچي 

- - اممسحي عدل مو كفيان شر اگلج سجى شلونه سراج

صارت تسمع وهي تگول // ادري سجى ادري يموت عليج وانتي ما قاصره بالجمال والدلال بس ظل بالي 

لان طلعتو وانتي ما اكلتي شي 

وصارت تسمع وگالت // بالعافيه حبيبتي

ثاني يوم چان جمعه عمو كرم اجه البيت هادي وره الغدا سلم وشرب چاي وگال // صيحولي للبنات 

واجت اسيل وگالت // يردوچن 

نزلت انا وحنين واسمع اسيل تگول // تره مليت اصعدي صيحيهن انزلي خلو جرس ومن تردوهن دگو وهنه ينزلن 

افراح //صار تدللين

نزلنه سلمنه على عمو كرم بدون ما نسلم على هادي 

كرم گال //هلا عمو شنو نايمات

ما جاوبنا هو باوع الهادي وگله //البارحه غفران رادت ملابس من بيبيتها جميله هي گالت انا منيلي قابل ابوج منطيني 

شو هسه صاحت الغفران وگلتلي رووح جيب بنات عباس واخذهن هنه وغفران يشترن ملابس 

انا گتلها //يمه ما عدي بعدني ما قابض عاد خالتك ما قصرت بالحچي 

- - ابو فليس الما شايف الترجف ع الفلس ورزاله معدله بعدين گالتلي رووح جيب البنات اشوفهن وانوب اخذهن 

اشتريلهن اسمع هادي شتگول 

- - چا شني اطي لغفيره واعوف بنات عباس وهاي انا اجيت اخذ البنات حتى يرحن يشترن ملابس

هادي من عرف الشغله بيها مشتره وهو ما يخسر راسا ودانه وياه 

انا وحنين بسرعه لبسنا عبايه اسلاميه ورحنا ويه عمو كرم وصلنه وگال

— اهنا عمو اگعدن بالديوانيه خلي اصيح الغفران تره بس تكعد بيبيتجن ما نروح الباچر 

 دخلنه للديوان من الباب البراني لكن المفاجاه من شفت سراج 

انا بوقتها باوعت العمو كرم بعتب وسراج اعتذر لكن انا ما قبلت اعتذاره وحچيت كل شي بگلبي وبعدين طلعت

 انا وحنين رجعنا للبيت واحنا مكسورت خاطر ومن رجعنه سالتنه افراح 

هاا وين الملابس 

جاوبتها .... عمه بعدنا ما واصلين البيت عمي كرم عطلت السياره 

افراح باستهزاء //. تف تف غير عين

بعدها بيومين داومنا واي شي ما صار يهمني كل الي يهمني هو ان انجح.واروح للكليه واحصل شهاده وبعدها يصير خير 

كل همي حنين تنجح من الثالث وانا انجح واروح الصف السادس 

نسيت النقال واجت مرت عمي كرم جابت ملابس ولكل وحده حذاء وتراك راحت ام مرتضى للبيت لان افراح لزگت 

يمنا هي بس سالتنا //شلونكم بالمدرسه 

ردينه// الحمد لله

واستاذنت وراحت وافراح گالت الهديل اطلعي وره مرت عمج انا رجلي خدرانه 

وطلعت هديل ورجعت وافراح گالت جيبي العلاگه اوگفي لا تصعدينها فووك 

اخذتها وصارت تباوع انطتني الصدريه والحذاء وانطت حنين صدريه وجنطه واخذت الحذاء انطته الاسيل 

وجنطتي انطتها الهديل وهي تباوعلي وتگول

- - شنو بس الچن تشتري اجميله

باوعت الها وخليت عيني بعينها ...اذا تردين اخذي الصدريه ما اريدها عادي عدي صدرية البالات 

افراح //چان اخذتها بس تعرفين المدارس الاهليه زي خاص وبعدين لاتصير عينج ضيگه 

ما جاوبتها بيومها شفت حنين شلون مقهوره لان انطت الحذاء الاسيل 

اخذت الملابس وصعدنا وانا اعرف هنه مو من عمي كرم اعرف من سراج

تمينا انا وحنين بين البيت والمدرسه وبوكتها صار همي النجاح نسيت النقال وما صرت اروح البيبي جميله ولا حتى 

اسال على عمه زهراء وصارت امتحانات نهاية السنه وبوكتها چانت اسيل وحنين ثالث وانا خامس وهديل رابع 

انا صرت اراقب بحنين واشجعها ع الدراسه وچنت اساعدها واشرح الها

وامتحنت الخامس وباخر يوم امتحاني شفت 

المديره اجت للصف وصارت تفتر وتشوف الدفاتر واحنه نمتحن وشاورت المدرسه المراقبه وراحت وبعد ما سلمت الدفتر 

الامتحاني للمدرسه قرت اسمي بالدفتر واتقربت عليه وگلتلي 

ناديه روحي للاداره المديره طالبتج

///////////🌺🌷/////

شكرا لزيارتكم عالم روايات سكيرهوم