رواية اخذوني دفع للدار فصليه الفصل الثاني بقلم زينب الموسوي
نهر : رجعت من المدرسه وشفت بيتنه متروس ترس ناس كلبي ضل يوجعني كلش لدرجه دخت وعيوني غوشت وماكدر اوكف كوه وصلت لبيتنه
دخلت لكيت امي تبجي وتصرخ وتلطم
سميه: ولك يمه سوده عليا شسويت بروحك يبعد امك ولك يمه سامر شسويت بعمرك يمه
نهر : ابجي واكلها يمه شبيه سامر يمه احجي يمه احجي مترد عليا متهستره
اجتني عمتي ولج يمه نهر اخوج كتل واحد ونهزم ولج يمه الولد مات مالحكو عليه يمه سوده بوجهي سامر شسويت روحك ليش ماتبطل عصبيه يمه
نهر سمعت الحجي وحسيت نضربت على راسي ضليت ابجي بدون وعي شويهً ودخل ابويه
علي : بويه نهر روح لغرفتج وانتي سميه بسج يمره بسج تبجي موزين عليج ليصير بيج شي كومي رتاحي والصباح رباح
نهر : جنت كاعده وابوي بلغني ماداوم لمن تفض سالفه سامر اخوي جنت كاعده وسمعت صوت تكسير جام بيتنه من جوه وصوت رمي كلش قوي وصياح زلم هواي كلش نزلت اركض وابوي جان واكف واخواني ستتهم طلعوا ضليت ابجي واصرخ بويه لاتروح
علي : دخلي بويه نهر لاطلعين دخلي يحبيبه ابوج
طلعنه برا وشفتهم زلم هواي وملثمين وكالولي
ليث : حضر روحك للحك يومين وجايينكم وياريت تحضرون ابنكم لان ينكتل ينكتل هذا المات ابن شيوخ مو واحد عادي ويصير خير بينا الدم .
.........///
جنت نايم ودك التلفون ورفعته صحت الوو
كريم : وياك كريم شيخ صديق علوان شيخ الحك علينا علوان مات شيخ كتله المايخاف من الله
ليث : فزيت ع طولي وصرخت بويه علوانً
علوان : جنت طالع وي جماعتي رحنه سفره للسماوه نتونس طبعا بدون علم الشيخ
كريم : ولك علوان كلت للشيخ انه رايح سفره وي جماعتي خاف ناكل كم عكال منه ورزاله وشغل بالديوان
علوان : لا ماكتله بعدين هيه شغله ساعتين وراجعين وهاي هيه البصره
كريم : ولك يا هاي هيه صاًرلنه من سته الصبح طالعين وهسه ب12 الضهر شتحجي انته
علوان : ديلا خلينه نتونس لتصير نفسيه خايس
كريم : الله يستر منك بس
كملنه طريقنه وصلنه لبستان صاحبي بصف بستان واحد يكلوله ابو عبدالله وماشالله حيل بيه اشياء حلوه
علوان : اكلك فارس هذا بستان منو الي بصف بستانكم
فارس : هذا بستان ابو عبدالله وحيل مهتم اله ويحبه ومايخلي احد يدوس طرف من اطراف بستانه ومثل ماشوف كله مسيج
علوان : والله يافارس تدري بيه شكد احب هيج مواصفات وهيج ممنوعات واليوم الا ادخل للبستان اريد اشوف منو يحاجيني
فارس: ولك علوان اكعد لاسوي طركاعه
كريم : علوان كف الشر
علوان : ماسمعت كلامهم وطلعت عبرت السياج
وكلش عجبني المكان الي بيه همه اخذت وياي منهم تفاح وعنب من مزرعتهم جانت فارغه محد بيها اجيت اخذ بطه من البطوط ناكلها وماشوف الا واحد ضربني ع وجهي
سامر : لك كلب حرامي شتسوي هنا وفوك هذا كله بايك من حلالنه اليوم اطيح حظك ادبسز
علوان : لك هي احترم نفسك لاطيحً حضك الضاهر متعرف انه منو
ضلينه نتعارك ونتضارب وطلعت بجيبي سجين ردت اضربه تلاويت ويا وماشوف الا اخذ السجنيه من ايدي وضربني بطني ثلاث مرات طحت وماحسيت بشي بعد
كريم : سمعنه صوت عرك وصياح وعبرنه وشفت علوان طايح وغركان بدمه والولد واكف مصدوم خله وشرد واني ضليت اصيح واخذته ركض للمستشفى بس للاسف مالحكنه عليه وفقدت صاحبي واخوي ورفيق دربي من الصغر
خابرت الشيخ ليث واجانه للمستشفى بالسماوه
ليث : ولك احجي شصار كريم شسويتوا وشجابكم للسماوه
كريم : هذا اخوك شيخ الله يرحمه ماياخذ الحجي وسولفلي الي صار كله
ليث : صح اخوي غلطان بس مايروح دمه هدر والله اذا مابجيتهم دم ماطلع ليث الفارس اين شيخ فهد الفارس اذا ماطلعت حكك يخوي رحنه وصارت الفاتحه وامي حالها حاله ولا اكل ولاشرب وانه مسكور جان كلشي بالنسبه الي علوان مو اخوي علوان ابني الربيته خلصت الفاتحه وجمعت ولد عمامي ورحت عليهم وهددتهم والهم يومين يحضرون روحهم
........//
نهر : دخل ابوي وجهه اصفر وحالته حاله ومايعرف شيسوي ولا ندري سامر وين راح
سميه : ها ابو عبدالله شنو صار شنو كالو
علي : والله ياسميه شكلهم ماناوين نيه خير جايين وعيونهم شر
سميه : اخ يا سامر كتلك بطل هالعصبيه وين رحت يمه كلبي متكطع عليك يابعد امك
نهر : رحت يم امي وحضنتها وجانت اول مرا تبادلني وحضنتني وضلينه نبجي على اخوي الي مانعرف عنه شي مرن يومين وصارت الكعده
كعدت الصبح
نهر : صباح الخير يمه
سميه : صباح النور يمه يلا اكليلج لكمه وكومي حضري الديوان وعطريه مابقى شي لجيه الناس
نهر : حاضر يمه
اكلت وكمت. نضفت الديوان ورتبته وعطرته وغسلت الحوش (الطارمة) وحضرت الجاي والستكاين حسب كلام امي هواي راح يجون
علي : يلا بنتي وصلوا الجماعه حضري جايكم الزلم اجو
نهر : تامر يبا
حضرت الجاي وصبيتها واجه عبدالله اخذه هدوء شويه وسمعنه صوت صياح وصريخ وغلط
اخذو الناس وطلعوا والشيوخنه بقو يحجون وي ابوي واخواني ويهدون بيهم بس اسمع ابوي يحجي ويكول
علي : شيخ انت تقبلها انطي بنتي وحيدتي فصليه ولا يردون يجون ياخذونها باهانه لا ماقبلها وهيه بنت ابو عبدالله
الشيخ : يخوي حفاضا على بحور الدم الي تنفتح اقبل يا ابو عبدالله احسن حل
علي : فهمني شيخ شلون فهمني والله عقلي راح يوكف وابني مادري عنه اي شي ولا اندل وين الله حاطه
الشيخ : الله كريم يا ابو عبدالله يلا احنه نترخص وشوف وضعك وخابر علينا يلا بويه مشونه
نهر : طلعو الشيوخ وانه عايشه بحاله صدمه يعني انه اروح فصليه بس لحضه شنو فصليه
وشنو بذله .....
.......///
ليث :بعد مارحنالهم هادين عليهم ونطيناهم يومين يومين وانه افكر بشنو نساومهم شنو يبرد كلبي على اخوي دخل غضب عليا
غضب : ها خويه شنو قررت بشنو فكرت
ليث : مادري يخوي خلي تجي الكعده ويصير خير
غضب: انشالله يخوي
ليث خلصت اليومين ورحنه لبيت الناس احنه وشيوخنه ووجدي عكاب وابوي فهد واخوي ولد عمامي كلهم
دخلنه وكعدنه بعد السلام
شيخ عكاب : الله بالخير عليكم
الشيوخ : الله بالخير شيخ
علي : شيخ ماعرف شكول ولا شحجي بس ادري بابني غلطان وشتردون وشتامرونً انه حاضر بس لا طلبون دم ابني اتوسل بيكم
شيخ عكاب : شوف ابو عبدالله الصار كله بيه خطا من الطرفين واحنه مانريد دم
علي : الله ينطيك الصحه يا ابو فهد المبلغ الي تريده يجرالك
ليث : كاعد واسمع حجي جدي وعرفت الي براسه شنو وكلت اي هاي خوش فرصه اذلهم
حجيت وكلت
ليث : ومنو كلك احنه بعازه فلوسك مامحتاجينهن احنه نريد فصليه وبنتك هيه الفصليه حسب ماسمعت عندك وحده بنيه بس
علي : ضليت صافن رد عبدالله وايمن
عبدالله : عيب عليك شيخ شنو فصليه مايصير حرام عليكم ليش تعاقبون ذنب شخص غلط بشخص ماله ذنب
ايمن : ماتاخذون اختي على جثتي فهمتو
ليث : خلي ازيدكم من الشعر بيت يا ابو عبدالله موبس فصليه لا نجي وناخذها بعباتها وكبال الناس وبذله وهيج وماتبرد النار الي بكلبي
ابو عبدالله : اسفين شيخ ماعدنه فصليه والتردون سوو
ليث : عصبت وجدي نفض عباته وكام وكلهم
الشيخ عكاب : الكاله ابني ليث هوه الي يصير ومثل ماطلب والكم يومين تفكرون وراها نعرف نتصرف واعتبرو مو بس سامر ميت لا ثنين من اخوانه يلا امشونه
ليث : وكف جدي عصبي خفت عليه كلش وكفنه كلنه ورا وشلنه سلاحنه وطلعنه رجعنه للبيت ....
........./////
بيت ابو عبدالله
علي : هذا الصار يا سميه
سميه : ميخالف انطيها خلي تروح اهم شي ولدي يا ابو عبدالله تقبلها ينكتلون
نهر : امي تبجي وتحجي وانه صافنه عليها كلت معقوله هيج مضحيه بيه امي وماتريدني على مود ولدها
رد ابوي وكال
علي : شهالحجي يامرا بنتج يردون ياخذونها بذله وصيحه وكبال الناس ويكولون هاي فصليه ومانحترمها وتكولين نطيها
سميه : احسن من مايرحون ولدي من ايدي على الاقل ننطيها وندري بيها زينه وعايشه وشم الهوى
علي : بس يذلونها
عبدالله : لايمه لا لاتحجين هيج هاي اختنه وحيدتنه شلون ننطيها
ايمن :اي يمه شلون فهميني الله مايقبلها هيج
ساهر : صح اني صغير يمه بس مانضحيً باختنه على مود غلطه سامر الي مايفكر بشي بس بنفسه
احمد ومحمد : يمه هالحجي شيلي من بالج مايصير لو على كص ركبتنه
عمار : بسكم ترا امي كلامها صح تروح وعايشه ولا يموت احد من عدنه والفصل اله مده ويخلص وتجي النه مرا ثانيه
علي : انتم كاعدين تحجون ماتفكرون باختكم كاعده كبالكم
نهر : كاعده واسمع حجيهم وبطرف عيني دمعتي
باوعلي ابوي ضليت ابجي وصعدت شويه ودخلت امي عليه
سميه : كاعده يمه اريد احاجيج
نهر : اي يمه كاعده فوتي
دخلت امي وسدت الباب
سميه : يمه سوده عليه ادري بيج عبالج اكرهج وافرق بينكم انتي وخوانج بس لايمه انتي قطعه مني انتي روحي وكل حياتي يمه الله يخليج لاعبالج قابله بالحجي لا يزرف بكلبي زرف بس شسوي ولدي يرحون مني انتي فكري بيها تقبلين تخسرين اخوانج وهمه حالفين مايكتلون بس سامر لا يكتلون ثنين من اخوانج بعد ولج يمه فكري
نهر : امي تحجي وانه ابجي ساكته خلت و طلعت وضليت ابجي ولانمت الليل كله وانه افكر بخواني واخير شي قررت قريت من القران الكريم ايات ونمت كعدت الصبح ونزلت جوه كلهم كاعدين
نهر : صباح الخير
الكل : صباح نور
علي : هلا بويه صباح العافيه
نهر : صباح النور ياروح نهر
بابا اريد احجي وياكم شي وكلكم اريدكم تسمعوني وتقبلون
علي : اي بابا احجي كولي
نهر : بابا انه قررت .......
