رواية ناديه الفصل الثاني 2 بقلم انين الليل

ابراهيم تعجب من شافني داخله للغرفه سالني 

ها منيره وين خليل 

تقربت وخليت الباب مفتوح وكعدت ع الكرسي الي كباله وجانت

هاي اول مره ادخل الغرفته عكس جميله الي كانت دووم تتواجد

بغرفتي جاوبته وانا مدنكه 

==خليل هو الي جابني وهسه طلع هو وعمي راحو البيت نصره 

هو احس بي خف توتره //هاا زين 

سالته=ابراهيم ليش ما ترجع جميله 

هو باوعلي واتحسر

رجعت سالته ==ابراهيم خطيه جميله تبجي على جهالها رجعها هي

بعدهي زغيره ومتهوره ما تفتهم انت علمها 

جاوبني بنتر /شنو زغيره عدها اثنين جهال شكبرها تصير 

كتله بهدوء==مي خالف البشر مو كله سووا 

هز راسه واتحسر وجاوبني بحزن //لا ما ارجعها 

 دبلعت ريگي // واذا كتلك الخاطري

هو نفخ وعض على شفته وباوعلي وكلي //هو كل الي صار هذا كله الخاطرج 

انا جاوبته باستغراب =شنو ما فهمت شقصدك 

اتحسر وكال /اتزوجتها الخاطرج 

جاوبته بعصبيه وانا اهز بااصبعي // لا لا تدخل اختي بالوسطه اتزوجتها الخاطر اخوك وبالاساس انت چنت تحبها 

هو سالني /هي گلتلج مو ؟

جاوبته /لا انا عرفت من بحدي هسه هذا الكلام فات وكته انت هسه

بمثابة اخوي واريدك ترجع جميله

ابراهيم يهز راسه وهو ينفخ /ما اكدر معناتها تحكمين عليه بالموت لان 

انا مو بس اكرهها واحتقر نفسي على اللحظه الي اتزوجتها بيها 

جاوبته ==ابراهيم الي فات مات احنا اولاد اليوم البنيه تريد تموت على جهالها 

هو باستهزاء /قصدج براسها سم اذا ما تزوعه تموت لان اختج حيه 

جاوبته بعتب ==لا ليش تكول عليها هيج

باوعلي // لان هي السبب بكل الي حصل 

انا بضحكه باهته ==وهو شنو الي حصل 

ابراهيم وكف وكلي /الي حصل انو لمن قررت اخطبها كلت ما راح 

توافق حچيت وياها او هي چانت تسمعنا وره الطارمه وتدري بعلاقتنا انا ما چان گدامي اله اعترف الها 

انو انا اريدج من سمعتني كلتلي ما عليك انا احلها انت اتقدم اخطبني وانا ما راح اوافق عليك واكيد اهلي ماراح

 يوافقون على خليل انا اگل الامي ابراهيم يحب منيره بعدين شوفواالخليل ابنيه من يمكم وره سنه اكثر اتقدم الخطبة 

منيره هي راح توافق واهلي هم يوافقون واذا اهلك ما يوافقون اكيد خليل يقنعهم لان هو يريد يتزوج منيره مو لان 

 يحبها لان اهلك يردون يزوجو قنعتني وانا الغبي وديت امي وبنفس الوكت ابوي محاجي ابوج وهي اجت انطت 

موافقتها وموافقتج بحجة تستحين

جاوبته بذهول ==انت شتحجي مو انت چانت عندك علاقه وياها 

ابراهيم /شنو ما تعرفيني مو على ايدج طلعتي ودخلتي للبيت يمته سويت علاقه وياها هي كلتلج مو 

منيره هزت راسها =اي بالخطبه كلتلي هو يحبني ويكلي منيره تريدني وانا ما اشوفها اله مثل نصره اخت اليه 

ابراهيم /وانتي صدكتي ليش انا يمته چنت اشوفها ورغم هذا گلت هذا هو كلمن ياخذ نصيبه بعد ما افكر بيج اله 

اخت لكن هي ما راوتني يوم حلو حاولت وياها لكن بلا فائده لو احجي وياها نص كلمه تكلبها مناحه وانت تقارني

 بمنيره لان ما تگدر تنساها

انا برغم المفاجئه من تصرف اختي بس جاوبته 

= اي مي خالف ابراهيم هذا تفكيرها تولي المهم انت وجهالك وهذا بيتك بحاجة مره تدير بالها علي وانت انسان مثقف 

احتويها وربي جهالك 

جاوبني /تدرين منيره ليش عزلت بالبيت لان هددتني تفضح علاقتنا 

انا باستغراب ==انت شتحجي شنو هددتك وشلون تفضحها 

نفخ وگال // دفتر مذكراتج ودفتر مذكراتي انتي ملزكه صورتي وانا كاتبلج عليها بخط ايدي هنه موجودات عدها 

راوتني اياهن ودفتري كله اشعار بيهن اسمج وصورتج

انا رديت بذهول =تحجي صدك اوف وانا ما خليت مكان يعتب عليه وانا ادور عليهن وحتى من سالتها كالت

شوفي وين ضيعتي اتركي منو راح يشوفه 

ابراهيم /اي وهواي اشياء اختج تكدر تتجنى عليج وعليه وانا بعد ما اكدر اعيش وياها 

جاوبته ==مي خالف ابراهيم تحمل الخاطر شموسه وكرم 

هو بابتسامه باهته /تدرين بيها تهددني باسم شمس وتكلي اكللهم ليش ردت تسمي شمس وسامي

جريت حسره وكتله ==خويه ابو كرم انت انسان فاهم ودارك والعقل الله ما نطا بالتساوي الخاطر بيتك 

وجهالك رجعها وانا اكلك بعد ما تسمع منها اله كل خير

ورحت نزلت وانا الدمعه بطرف عيني وانا عرفت اختي بت امي وابوي شلون اخذت الانسان الي حبيته

 استغفر الله الي كنت احبه صرت اعاتبها بگلبي // ليش ياجميله ليش 

نزلت لگيت عمتي سالتني 

ها عمه بشري؟ 

= والله حچيت ويا ومتانيه خليل

واجه خليل وصار يحجي ويقنع بابراهيم يرجع جميله هو قنع ورحنا

بالليل البيت اهلي رجعناها لان اهلي يعرفون بيها هي الغلطانه

وردنا نرجع البيتنا ابراهيم لزم بينا وكال ابقوا باتو يمنا 

وبتنا الفجر عمي وخليل راحو للشغل وگالوا اليوم نرجع على وكت حتى نتغدا سووا

ابراهيم كعد هو وجميله الي كانت لابسه بدلة نوم ومبين عليها الفرح كعدنا نتريك واحنا ساكتين هي تسولف ويه 

عمتي وتضحك وانا جاي اوكل بشموسه وابراهيم احس بي صافن عليه راح الدوامه وانا كفيت البيت وكلت العمتي 

انا اطبخ 

عمتي كالت/: سوي برياني مشتهين من جوا اديج الحلوه 

= تدللين خاله

گعدت جميله وعمتي بالصاله چانت زغيره واسمع عمتي تنصح بجميله

يمه بيتج ورجلج وشوفي اختج شلون شايله رجلها بالصلوات 

جميله شافتني واكفه اباب المطبخ حچت تسمعني 

عمه انا احب ابراهيم اموت علي وهو يگلي ما اشوف مره غيرج بس ساعات ما ادري شلون يحچي 

عمتي //شلون يعني 

جميله //يگلي احملي وخلي البطنج ننطي البيت خليل يربو وانا ما عندي مانع ليش لا اشو منيره اختي وخليل 

اخو ابراهيم بس ما قبلت لان انتو من اجيتونه ذاك اليوم گلتو نصبر على اختج بس هالسنه اذا ما صار عدها طفل 

نزوج ابنه ليش بعد عمه ليش انطي الاختي وتربي وتتعب وانتو مبيتين النيه تزوجونه الابنكم واصلا انا اعرفها 

كلش زين للبنيه الي تردون تاخذوها الخليل حماتها النصره

عمتي گالتلها /اي نريد نشوف الابنه ضنى مو بالرايحه والراده يتحسر وبعدين نصي صوتج لا تسمع اختج 

جميله ضحكت باستهزاء /ياا تحجين صدك وراج اختي وجاي تسمع

باوعت عمتي عليه انا ما حجيت لبست عباتي وطلعت الظهر رحت للبيت وانا ابچي صليت ونمت بدون غدا 

بقيت متمدده بفراشي المغرب 

 خليل فتح الباب انا حسيت بي اجه هو ما حاچاني اخذ ملابس وطلع غسل واجه يمي گلي 

امي حچتلي كل شي ليش طلعتي من البيت 

بقيت ابچي ما جاوبته هو رد گال 

شوفي منيره لو ابقى طوول عمري بدون جهال ما ابدل اظفرج بالف مره 

انا احبج واموت عليج انتي حلمي اول يوم شفتج من نزلتو يمنا جنت

اتعارك ويه اي احد من تطلعين ويه امج يگلون طلعت بت البغدادي لو تعرفين شگد اتعاركت ويه شباب 

احسج انتي الي ومحد اله حق بيج بكدي وبعدين قبل ما اخطبج لمن اختج جميله گلتلي

هي تحبك وانت ولا مهتم بيها انا طرت من الفرح

فتحت عيوني متعجبه سالته وانا اشهك من البچي == جميله گلتلك ؟

خليل //اي ليش مستغربه 

جاوبته بارتباك =ها لا بس چنا نسولف وحچيت وياها ما عبالي تگلك 

خليل بابتسامه //لا گالتلي وبيومها الدنيا ما وسعتني من الفرح ياالله گومي اگعدي اكلي وسويلي چاي ما اريد شي 

يضوج حبيبة گلبي

رحت وانا مستغربه من تصرف اختي سلمت على عمتي وعمي ردو بثگل عليه جبت الچاي وگعدنا بالطارمه 

عمتي كلتلي /ولو انا زعلانه عليج هيج تطلعين الظهر ليش احنه شگلنه وانتي زعلتي 

ما جاوبت ابو خليل گال //عمي لا تزعلين علينه بس ابنه نريد نشوف بزره وانتي هاي اربع سنين حتى ما 

راجعتي طبيب عمن تدرين بروحج ما يصير عدج جهال ليش تحرمين ابنه تره حرام عليج 

خليل فز من مكانه وهو يكول // شنو هالحجي هذا شنو ما يصير عدها جهال 

عمي //هذا الي عرفنا وانت ضامه علينه احنا ما نريد نظلمك 

ولا نظلمها صحيح تحبها بس يرادلك بزر والبيت چبير والخير وايد

خليل كعد وجر نفس //يبه ما اخذ على منيره مرتي واحبها والي كالك ما يصير عدها جهال يجذب مو امي 

ذاك اليوم راحت وياها للطبيبه 

عمي بنتر //مو بكيفك اسمعني خليل هنه شهرين اذا مرتك ما حبلت تتزوج مو كافي متحملين اختها الخاطر البزر 

ويمكن هي لو صاير عدها جهال يمكن سوت بيك مثل الي تسوي جميله بابراهيم 

خليل //يبه شنو هالحچي هذا منيره مؤدبه ما عدها هيج سوالف 

عمي //مو انت اتطلع الواحد من طوره يبه البزر عزوه وانت مو زغير نريد ابنك يشب وياك

انا سمعت ما جاوبت ظليت ارجف دخلت للغرفه وبقيت ابچي اندك باب الحوش واسمع عمتي تگلها 

هلا خاله هلا نسيمه اشلونج وشلون عمتج 

نسيمه /:الحمد لله خاله امس طلعوها من المستشفى 

وهسه شلونها 

نسيمه /:الحمد لله زينه خاله ولو بيها زحمه اريد منيره تجي تغير الها الضماد وتضربها ابره 

عمتي جاوبت //والله ما ادري هي شويه تعبانه خلي اشوفها الج

دكت عمتي باب الغرفه طلعت باوست نسيمه جيرانه وصديقتي بيتهم بنفس منطقتنا بالشارع الثاني وعمتها ام 

رجلها كاعده عد ابنها الچبير بالناصريه واجت للبصره تسوي عمليه مراره والعمليات بذاك الوكت تاخذ فتره 

ياالله تطيب رحت وياها وانا ساكته هي بالطريق سالتني

منيره ليش باچيه 

جاوبتها =لا ما باچيه بس نظفت الطارمه وتراب طاح بعيني 

بسيمه /: شنو تضميين عليه

ما جاوبتها وصلنه وشفت عمتها وغيرت الضماد الها وضربتها ابره وثاني يوم رحت

الصبح ورجعت العصر وثالث يوم هم نفس الشي من كملت الابر شالت المره فلوس انا رديتهن كتلها 

==خاله عيب شنو انا ونسيمه مو بفلوس بعدين انتي مثل امي 

المره باوعتلي وجهه رحماني كلتلي// خاله الله يوفقج ويفرح كلبج ويخلي جهالج 

جاوبتها وانا ابتسم = ما عندي جهال 

يصيرون ان شاالله 

 رفعت ايدي = ان شاالله

شكد صار متزوجه 

=قبطت اربع سنين 

ورحتي للطبيب 

= اي لا انا ولا رجلي بينه شي 

نسيمه جاوبت بحركه -- كله من اختها هي چبستها 

المره باستغراب //شلون 

وسولفت نسيمه العمتها الي باوعتلي وگالت

-- خاله منيره عندي شي اخذي وسوي اذا ما ينفع ما يضر بس

ان شالله توكلي وصفي نيتج وهو ينفع بحيل الله

مدت ايدها يم چربايتها وطلعت جنطه ايد چبيره شويه فتحتها وطلعت 

منها قطعه خضره تقريبا متر او اكثر وگالت

--شوفي خاله يمكن انتي ما تعتقدين بهاي الامور بس جربي ما

تخسرين شي اخذي هاي الرايه من ابو الفضل العباس عليه السلام

 مزورتها بالضريح وادعي ربج بجاه كفيل زينب العباس يرزقج الضنى

الصالح ويفرح گلبج ومثل ما گتلج اذا ما تنفعج ما تضرج

انا اخذتها صحيح انا عيالي يرحون للزياره بس ولا مره رحت وياهم

وچنت اشوفهم ايام محرم شگد يحزنون ويلبسون اسود ويطبخون 

ويوزعون ثوابات انا ما اتدخل ولا اسال عكس جميله الي تطلع

تروح للقرايه وراحت للزياره شكم مره

جبت الرايه ودخلتها الغرفتي وانا عادي مو ابالي شي سويت العشا وگعدنا ناكل لميت المواعين ورحت جبت 

الچاي عمي باوع الخالتي وكانو يسمعني وگللها

-حاچيتي بتج 

-اي من ذاك اليوم 

-وشنو گالت 

-حماتها تگول اله تجي مرت خليل تخطبني ما اريد مشاكل 

-اي حگها منيره ما تگول شي مو صحيح بابا انتي هم ما تقبلين

ابنه يبقى بدون بزر 

خليل جاوب // يبه انا راضي بعيشتي وما اريد جهال 

جاوبه ابو بنتر /مو بكيفك

خليل وگف //لا بكيفي وحتى اريحكم انا ومنيره رحنا للطبيب وطلع مابيها شي 

وانا عندي ضعف وجاي اخذ علاج 

عمي باستغراب //هاا وليش هسه الحجي ياالله طلع تسدد الها مو 

خليل جاوب ابو وهو مدنك /لا يبه ما اسدد الها بس هاي الحقيقه 

عمي كام وكف وكال //شوف عندك ضعف ما عندك حدي بس

هالشهر وياك اذا ما حملت تاخذ حماة نصره ومنيره هي تروح تخطبها

واذا حماة نصره ما حبلت ازوجك ثالثه وغصبن ما عليك وهذا اخر كلام والما يعجبها تروح الاهلها وخط 

طلاگها يوصلها

خليل //يبه ما افكر اطلك منيره لو شنو يصير 

عمي //انا ما گلت طلگها گلت اذا ما ترضى تعرس ويصير عندك جهال 

عمتي كالت //على كيفك ابو خليل (دارت علينه )خليل ابنه ويسمع كلامك 

يخاف الله ما يكسرلك كلمه ومنيره تبقى هي ام البيت معززه مكرمه

تستمر القصة أدناه

انا سكتت رحت غسلت المواعين بالحوض ورجعت رحت الغرفتي وانا ميته من القهر وخليل طلع شويه بره 

يم صحبانه 

انا طلعت الرايه واخذت منها بكد الشريط وناجيت ربي

==يارب انت خالق الاكوان وخالق الملائكه والانبياء وانت مسبب 

الاسباب يارب بجاه العباس عندك يارب اريد طفل وتفك چبستي

تعبت ياالهي وادري بايدك كل شي وانا دعيتك بجاه العباس

اخذت القطعه ومسحت بيها جسمي او وجهي وشعري وخليتها جوه 

مخدتي والقطعه الجبيره ضميتها بالكنتور 

ثاني يوم سبحت واتحزمت بيها وصارت ما تفاركني ما اعرف احس

بنفسي عندي امل

مر اكثر من شهر وبالليل اشوف عمي وعمتي يتبسبسون بيناتهم ومن يشوفوني يسكتون حسيت بيهم خلص قرروا 

يخطبون الخليل نمت وانا مهمومه لكن سبحان الله گلبي بارد 

گعدت على دگة الباب وانا مفزوعه لگيت اخوي جميل جاي وهو يبجي ويكلي //منيره ابوي اتوفى 

ابوي كل شي مابي ولا يشكي من شي گاعد الصبح مصلي وراجع يريد

يبدل ملابسه يطلع للشغل راسا واكع اباب الغرفه

بچينا على ابوي الحنين ابو گلب الچبير وچنت اشوف عمي ابو خليل شلون يبچي على صديقه الي صار ما يفاركه 

من يوم الي اجينه بي من بغداد والصراحه الي گام بالفاتحه خليل وابراهيم واهل المنطقه واجه عمي من بغداد 

وعماتي واتعجبوا بالناس الي چانو النه اكثر من الاهل

انا بالفاتحه ماچنت اكل اكثر شي ابچي على ابوي ويوم السابع منير وخليل گالو راح يجيبون طباخ للذبيحه وانريد 

تسوون سبع اشكال من الطبخ وهاي متعارف عليها 

جابو سمج ودجاج وطلبوا مركة باميا ولفينه كبه وسوينه دولمه وكاستر وتمر بالدهن والجوز وخبزنا وجابو قاري 

وختمو السبعه وصبوا للرياجيل واحنا صبينا للنسوان من اجيت اجمع المواعين حسيت الكاع تفتر بيه او وكعت 

دزوا على خليل الي اجه يركض واخذني للمستشفى هو ونصره وهناك كالت نصره للطبيبه 

توه ابوها متوفي وما تقبل تاكل

علكولي مغذي وبعدين كالت سوولي تحليل واخذولي تحليل دم واجت يمي الطبيبه چان خليل واگف يم راسي ونصره 

كاعده على حافة الچربايه باوعت لي وگالت 

منيره لازم تاكلين مو زين ع الطفل شنو ذنبه 

من سمعت فزيت وكعدت وخليل گل للدكتوره برجفه

ياطفل دكتوره 

الدكتوره باوعت الخليل --انت شتعود الها 

زوجتي دكتوره 

ها تسوون نفسكم ما تدرون زوجتكً حامل

چانت مفاجاه بين الفرح والحزن ورجعنا خليل قرر يرجعني للبيت مو يم اهلي گال لان نسوان واخاف عليج 

من الفزه وراح جاب عمي وعمتي 

عمي دنك على راسي وباسه وگلي

انتي عزيزه وخليل عزيز لكن بزركم اعز 

عمتي كالت //والله لو ما ابوج توه ميت وتزعلين اله اهلهل

وثاني يوم اجه ابراهيم وجميله يباركون وابراهيم يگول/ اخيرا الكى واحد يصيحلي عمو 

اما جميله فكالت-- شنو ناوين تسمونه 

عمتي جاوبتها /بعد وكت يمه خلي يجي والله كريم 

جميله تباوع الابراهيم // انا اكول اذا ولد سموو سامي اكيد هذا الاسم يفرحج منيره مو 

ما جاوبتها ابراهيم خزرها وكال //خلي يجي والاسم سهل

بقيت بالبيت اي حركه عمتي تحسبها عليه وهي تكلي 

لا تشتغلين لا تغسلين ملابس لا تنظفين 

لكن انا ما اهتم اكوم واشتغل لان صار عندي اعتقاد بان الله سبحانه استجاب الدعائي

خليل چان صديق اخوي منير كلش الروح بالروح ومنير فتح محل مال مواد كهربائيه بسيطه بعد ان كمل السادس 

اعدادي وما قبل يكمل لان استهوا العمل الحر جان يطلع ويه ابوي وخليل واتعلم شغل النجاره بس ما حب شغل 

اللنجات اجه وره وفاة ابوي على خليل وبعدين اجاني للغرفه وگال

- - تدرين منيره امي وجميل يردون يرجعون البغداد 

انا استغربت وگتله ==يرجعون وين وليش وشعدهم اهناك 

هز راسه //ما اعرف منيره امي تكول تريد تعرض البيت للبيع وتشتري بمكانه بيت ابغداد 

= وانت منير شتكول 

 اتحسر // شگول منيره ما تعرفيهم خوالي شكد مبذرين لو عمي الي ما كلف نفسه يسال على اخو هاي اكثر 

من 15 سنه 

= وهسه شلون منير

- - امي تكول اتنازلو عن البيت وانا اشتري بيت واسجله باسمي واول وتالي هو الكم 

= اي منير هم كلامها صحيح 

- - منيره اعرف صحيح بس انا ما اريد اروح البغداد انا اهنا عشت وتربيت ويه هاي الناس الطيبه الي همه 

اكثر من اهلي من كل وعقلج انا اعوف المنطقه لو اعوف خليل ما اشوفه 

=. وشقررت منير 

 رفع اچتافه // ما ادري والله محتار

خليل جان ساكت بعدين كال //انا عندي الحل 

منير /:شنو خليل 

اشتري البيت اقصد حصة امك واخوك وتبقى حصتك وحصة جميله ومنيره وانت تبقى بالبيت وسددني براحتك 

انا جاوبته //لا خليل عمي ما يقبل 

ما عليج محد يعرف 

باوع المنير وكله وهو يبتسم /اختك علمتني ع التوفير

= بس اخاف الفلوس العندك ما يكفن لو عمي يسالك شتكله 

ماراح يسال الج الصافي 

وصار الاتفاق لكن جميله رادت حصتها ماقبلت تنتظر اضطريت ابيع

ذهبي وعندي شكم فلس واشترينه البيت وسجلنا باسم منير الي

كتب على نفسه سند امانه وشالت امي هي واخوي جميل راحت

البغداد وبيومها بچيت بقهر وحرگه لان اعرف امي راح تخلص

الفلوس وتكعد اجار هي وجميل

توسلت بمنير يروح وياهم ويشتريلهم بيت وفعلا راح واشترى بيت

100متر وسجلته امي باسم جميل بعد ان كتبت علي كمبياله دزتها

بيد منير ضماها عندي 

صار عليه سادس لمن اجت جميله البيتنا جابها ابراهيم وراح هو وخليل على معلم ويا كان بالمستشفى راحو

يتشافوله جميله من بقت يمنه انا وعمتي باوعتلي وكالت 

باركولي حامل

خالتي فرحت وكالت// صلوات على محمد وال بيت محمد يمه لاتكولين لاتنحسدن واخاف ع الولد 

جميله جاوبتها باستهزاء -- ليش خاله انحسد ما شاء الله عندي اثنين 

والثالث بالطريق وان شاء الله اسويهم سبعه 

عمتي //ان شاء الله خاله بس هذا ما يمنع ما تحجين 

جميله هزت ايدها --انا بالنسبه الي كل الي يسالني اجاوبه شنو معلك بخيط وخاف ينكطع

عمتي //انزين والله صار ما معلك بخيط اشو من تحملين الى ان تجيبين منيره تخدم بيج وتشيل شغلج وتجيب 

الاكل اللحد حجرتج هسه صار معلك بخيط 

انا جاوبتها ==خاله الرزاق رب العالمين بيده كل شي 

عمتي //الله يكملج بعقلح ويرزقج حتى يرضيج بجاه محمد وال محمد

شفت بعيون اختي حسد وخبث وراحت جميله هي ورجلها بالليل ثاني يوم اجه منير عليه الضحى واستاذن خالتي 

كلها// محتاجها بشغله اريدها تجي وياي 

انا عرفت هو مشتهي فد اكله ويستحي يكول وعيالي ابد ما يمانعون اروح اطبخله وانظف البيت واغسل ملابسه 

بالعكس خالتي كل ما نطبخ تشيله وساعات هي تودي اله للبيت چانو يحبونه ومنير بطبيعته محترم ورزن 

رحت ويا للبيت وانا اشوف منير ضايج من وصلنه سالته

= ها منير شبيك 

ما بيه منيره لكن ابراهيم مرني للمحل وكلي رايدك بشغله انت ومنيره 

انا استغربت ==وليش ما اجه وحجاها كدام خليل 

ما اعرف منيره مبين علي ضايج كلش

==ياستار اكيد متعارك هو وجميله 

منير /:يجي وافهم منه

اندك الباب وراح منير فتحه اجه ابراهيم الي سلم على منير وسلم عليه

انا رحت جبت ماي وسويت جاي جان مبين علي التعب منير ساله 

سلامات ابو كرم 

ابراهيم جر حسره وگال// منير انت اخوي وعزيز عليه لكن اريدك هالمره

تعذرني الحياة ويه اختك صارت مستحيله 

منير باوعله /:هاا ابو كرم على كيفك وفهمني 

ابراهيم بعصبيه //مابقى مجال افهمك كرهت نفسي والساعه الي 

صارت بيها جميله مرتي تره من اول يووم وانا متحمل كل شي وساكت

منير جاوبه //بهاي عندك حق اعرف بهذا الشي 

ابراهيم بعتب //اي منير تعرف وانت الي ما وكفت وياي 

انا من سمعت كتلهم ==فهموني شكو شنووالي صاير 

ابراهيم //احجي منير لان اذا ما تحجي يمكن افقد صبري واكت الاكو والماكو

منير كلي //ولو شي راح وانتهى اسمعي منيره من احنه زغار ابراهيم حچالي چان يريدج رغم انا جنت ازغر 

منه بس هو ما قبل يسوي شي من وراي ومن خطب جميله وخطبج خليل ابراهيم هم گلي ع السبب 

وانا سكتت لان اتفاجات بيج من عرفت موافقه على خليل لكن بعدين

ابراهيم فهمني شنو سووت ااختج الحيه والحمد لله ابو كرم ما

يشوفج اله اخت ومرت اخ وانتي ما تشوفينه اله اخ وزوج اخت

انا بخجل== اي والله انتم اثنين وابراهيم الثالث 

ابراهيم //وانا الخاطر العشره صبرت ودست على نفسي لكن بعد خلاص ماگدامي اله تلث خيارات

(وظل يحسب باصابعه)

لو اكتلها وادخل السجن واهدم بيتي وبيت اخوي وايتم جهالي 

لو اكتل نفسي واموت كافر 

لو اطلگها 

وانا اختاريت الخيار الثالث اختك مجرد ما تولد راح خط طلاگها يوصلها ومصرفها ومصرف جهالها كل 

راس شهر زايد مو ناقص الي اريده منك منير ما تزعل عليه لان اختك (جر حسره )استغفر الله اختك مو خوش ادميه

منير //ابراهيم اذا ما تريد اختي ما اجبرك عليها بس انت گلت موخوش ادميه اريد اعرف حتى اربيها 

ابراهيم //ماكو داعي هي مو غريبه عليك انت تعرفها 

منير /: بس انا مصر اعرف 

انا كتله ==وانا هم ابو كرم حتى ما يضل الها عذر او حجه لان انشوفك مقرر وخالص 

هو نفخ وگال //تدري منير وانتي خويه تعذريني للكلام الي راح اكوله

انا ما متقرب الاختكم من قبل وفاة ابوكم لكن قبل شهرين اعتذرت مني وكلت خلي نبدي صفحه جديده بلكي تتبدل 

وهي حملت وانا كلت الحمد لله لكن ما سامعين المثل الي يگول 

(طبع الي بالبدن ما يبدله بس الچفن )تدري اختك امس اجت شتگول

منير /:اي شتگول 

ابراهيم //افضل انت تسالها 

لا اريد اعرف منك 

ابراهيم //كلام ما ينكال بس جنزتها موتتها اله شويه 

منير //يعني ما تريد تكول 

كتلك كلام ما ينگال 

منير وكف على حيله //شوف ابراهيم انت جيتك لهنا حتى نعرف

شمصخمه فهمني شنو كالت وصدكني لا انا ولا منيره راح نتفاجأ من تصرفاتها حتى فلوس حصتها من البيت 

 صرفتهن ملابس ومكياج وسواللف تعبانه فما راح استغرب من كلامها لان نعرفها بس اريد اسمع منك

ابراهيم بقى ساكت 

انا جاوبته ==حجت عليه وعليك مو 

هو هز راسه وكال // واتهمتني هذا الي ابطنج مني وبس افك حلكي تفضح كل شي 

انا خليت ايدي على حلكي من المفاجاه

هو وگف وگال //منير انت اخوي ومنيره على راسي الله شاهد بيوم الي اخذت خليل هي مثل نصره لكن اختك 

بعد ما اريدها مره الي تبقى ابيتها معززه مكرمه وابد لا تضغطون عليه ارجعها

منير بخجل //لا هذا هو ابو كرم اختي هي الي جنت على نفسها

ابراهيم مد ايده على جيبه وطلع فلوس وكلي 

هاچ خويه هذا مصرف الها وللجهال ومريت على ابو البيت گتله كل راس شهر يوصلك الاجار هسه انا 

لازم اروح واريدك يامنير تعذرني 

منير بابتسامه باهته //وين رايح ابقى ويانه اتغدا 

مشكور ما اجربكم

منير كله //انا هسه اروح استفسر من جميله بس يا ابراهيم اذا طلعت انت الغلطان ازعل عليك 

ابراهيم //الك حق وتحقني بس افتهم منها لان ما تكدر تنكر

 (ابراهيم شاور منير )

راح ابراهيم وبقينا انا ومنير الي گلي/: امشي خلي انشوفها

رحنا انا ومنير اخذنا تكسي ونزلنه قريب بيت جميله ومن الدكان منير اخذ حلويات للجهال دكينا الباب فتحت النه

شمس لگينا الجهال مبين عليهم الخوف وما ماكلين منير شال شمس وانطاها نستله وسالها 

وين ماما 

نايمه بعرفتها (بغرفتها)

ليش بابا ضرب امج 

حالو تعالكو (خالو تعاركو )

باوعتله وكلت //شنو منير تستفسر من جاهله 

منير هز راسه //اي استفسر لان الي يسمعوا يحچوا لا يزيدون ولا

ينقصون اي حبيبتي وليش تعاركو 

حالو امي تتل الابوي الي ابطن حاله منيره ستله باسمت لان هو ابنت

ء(خالو امي تكل الابوي الي ابطن خاله منيره سجله باسمك لان هو ابنك )

انا سمعت الكلام ظليت ارجف منير كلها 

لا خالو ماما تتشاقى وحتى ابوج ما ضربها يتشاقى وياها مو تحجين هذا الكلام بره تره حرام الله يخلينه بالنار

عرفت ابراهيم من شاور منير على كلام جميله ومنير استفسر من شمس

هي هزت راسها خله الجهال بالمطبخ وگللهم //اگعدوا عقال لا تطلعون حتى انطيكم فلوس تشترون بيها من الدكان

وطلع للطارمه ما اعرف منين جاب بوري حديد تقريبا متر وصعد انا صعدت ورا هالمره ما ردت الزمه لا ردت 

اتشفى بيها لگاها نايمه هو خله البوري اباب الغرفه دخلت انا وبعدين هو 

ندهتها والظاهر هي ما نايمه هي گعدت شفناها مزوركه عينها او وجهها شافتنا رادت تحجي منيرگلها 

بلا لف ولا دوران جميله بسرعه اريد دفتر ابراهيم ومنيره

هي اتفاجات وتلعثمت //يادفتر 

دفتر المذكرات الي بكتي من اختج مثل ما بكتي الولد الي جان يريدها 

جميله بخوف ونتر //ما عندي اي دفتر ابراهيم يجذب 

منير لزمها من شعرها ::شوفي ولج هسه انا كوه ساكت وتعرفين خبالاتي اذا لزمتج بسرعه طلعي الدفاتر لا هسه 

ادفرج انتي والي ابطنج فد موته

هي خافت راحت للبوفيه وهناك اكو جنطه زغيره طلعت منها الدفترين انطاهن الي منير بعدين اتقرب 

منها وسالها ::شگايله لبراهيم 

هي ردت بخوف //هو هو چذاب ما گتله شي 

هاا ما گتيله هسه اعرف بطريقتي الخاصه

فتح باب الغرفه وجاب البوري وقفل الباب اول ضربه على ركبتها هي صاحت وصارت وراي

گلها ::وهسه شنو گايلتله 

هي تصرخ// چذاب يلفق 

انا رحت كعدت ع الجربايه ومنير ضربها على ركبتها الثانيه وهو يكول// ياحقيره ما كفاج الي سويتي جايه

 تتهمين اختج ياكلبه تردين تخربين بيتها وتجيبيلنه سمعه

صار يضرب بيها وهي تتوسلني 

صارت تحچي وتكله // شمعنى من هي راحت ورجعتني طلعت حامل 

هو بقى يضرب بيها لزمت منير وگتله 

==كافي لاتوصخ ايدك بهاي القذره لان عبالها احنا مثلها 

منير گلي //عوفيني خلي اموتها النذله عبالها من اسمع اسكت