رواية ناديه الفصل الثالث بقلم انين الليل
ناديه ......بيبي يعني بابا هو ولي العهد
اتحسرت وگالت
=هو اكو مثل ابوج ابوج دره مثل ابو خليل طيب اخذ سمار ابو وجمال وجهي فرحنا من صار ماتدرين
يمكن عيد صار عدنا واجت موضي اخت جارتنا حصه وجابتله اشكال من الكويت وهي تگلي
هذا انا حاجزته حگ بنتي الي ان شالله بتصير
بيبي ليش موضي هيچ تحچي
= لان ابوهم چان عايش بالكويت وموضي اتزوجت ابن عمتها بالكويت واخذت اطباعهم
صار عمر عباس خمس تشهر ونص وجميله صار عدها بنيه سمتها زهراء جانت حلوة
هزيت راسي ... اي بيبي عمه زهراء اكثر شي تشبهج
بيبي ابتسمت = خليل بيومها خابر ابراهيم بلغه انو جميله ولدت ابنيه وتريد تسميها زهراء
ابراهيم كله //بكيفها شنو ما تريد تسميها عادي خلي تسميها
اجه ابراهيم وره شهر من ولادة زهراء جاب ورقة طلاگ جميله وطلع جنسيه البته
جميله تخبلت من طلكها ابراهيم صارت تبجي وتغلط وتعيط لكن ابد
ما حجت لو هددت بالشي الي كان السبب بطلاكها واكثر شي خوفها من منير
هنا جميله يوميه صارت تجي وتطلب بيت يتسجل باسمها ومن سالتها عمتي على فلوس الورث كالت
دزيت نصه الاخوي جميل فتح محل واحتاج والباقي صرفته على نفسي وجهالي لان الي تودونه ما يكفي
عاد جدج هادي اشترى بيت وسكنها بي وراد يسجله باسم ابراهيم وهي جن جنونها وكالت
لا البيت يتسجل بااسمي اريده الجهالي وفعلا سجل عمي البيت باسمها
صار عمر عباس سنه حملت بعمج هادي وبعدين صارت عندي عمه نوال وموضي وسلوى
سالتها .........بيبي سميتي موضي على اسم صديقتج
هزت راسها =اي بيومها موضي جايه من الكويت وياها ابنها نواف عمره تلث سنين وصارت عمتج وانا سميتها
على اسمها وهي كالت حجزتها الابني وفعلا مجرد ما كبرت اخذتها
ابوج صار عمره خمس سنوات لمن ما اخوي منير قرر يتزوج بنيه حباها وهي هم حبته ابوها ضابط
...تقصدين بيبي امنه
هزت راسها = اي امنه اتزوجها منير رغم عدم اقتناع ابوها لان منير ما مكمل لكن صارت القسمه وهيه تحبه
واتمسكت بي
امنه انسانه مثقفه ومتدينه وتحب منير كلش وحملت من اول شهر زواج وصار عدها ولد سمو سراج ولد ثاني سمو موفق
سراج تعرفينه چان ولا زال يموت على ابوج يحب عباس الي يشوفهم يكول اخوان من فد ام واب كانوا ما يتفارگون
ولا كأنه عباس اكبر منه صرنا حتى نضربهم لان سراج چان يبچي يريد يبات عدنا هذا من عمره تلث سنوات
ومن يبچي عباس يستهضم على سراج يصير هو يبچي عبالك طفل جاهل وصار الاتفاق ليله يبات عباس ابيت منير
وليله سراج يبات ابيتنا
كانوا ما يتفارگون لكن ما يتلاگون بشي واحد
--شنو هو بيبي
ابوج ما يحب المدرسه وسراج روحه بالمدرسه
وعشنا واتوفى عمي ابو خليل وعرفنا انو مشتري بيت النصره وبيت لبراهيم وطلعت حصة جدج خليل بس
السياره رغم هو ابو الشغل واتذكر سأل امه على البستان گلتله ابوك باعه واخذ فلوسه ورا بسنتين
توفت ام خليل ونصره اخذت ذهب امها لكن جميله تعاركت وياها وگلتلها // ولدها هم الهم حصه لو ما كفاج الي خذيتو
نصره جاوبتها // شخذيت
جميله // ها هسه شخذيتي تعب خليل وفلوسه شنو عبالج ما ادري بس اختي فقيره وما تحچي
عاد نصره سكتت جميله وانطتها من ذهب عمتي وانا خليل ما قبل اطالب بشي لان يعرف نصره وطمعها
ابراهيم ما صرنا نشوفه صار عنده اثنين ولد من زوجته الثانيه وكان
ابد ولا يسال على جميله ولا على ابنه وبناته چان بس يدزلهم مصرف ورغم چانت الحياة بسيطه والمره بذاك
الوكت مدبره لكن جميله عشر تيام تكول خلص المصرف وخليل هو الي يسد كل احتياجاتهم
چان ابوج بصف الاول متوسط
ناديه ...بكدي يعني
= لا انتي اتاخرتي سنه بسبب الحادث
ناديه ...هم صحيح
= بيومها اجه خليل شفته مصخن چان عمر عمه سلوى سنتين ونص
اجيت يمه ==شبيك خليل
جاوبني //راسي يوجعني وبردان
=امشي نروح للمستشفى
لا يامستشفى هسه اصير زين
غطيته ورحت سويتله شوربه وكعدته شفت حرارته كلش ارتفعت اخذته للمستشفى انا وزوج بيبي نسيمه وضربو
ابر وكالو لازم يبقى بالمستشفى بقينا يمه انا وابوج الساعه سته الصبح اتوفى ما عرفنا
شبي جانت صدمه بالنسبه الي خليل الي الضحكه ما تفارك وجهه والي ما فد يوم سمعني كلمه تغثني الي دللني
هيج وبهالسرعه راح خليل الي حبيته والي نساني كل شي والي دللني وما خلاني
احتاج بس الله راح وما اعرف شنوالي مضموم الي
سوينه الفاتحه والناس كلها اتاسفت خليل لان چانت اخلاقه عاليه وطيب ويحب يساعد الناس
وره الفاتحه اجه الحجي الي يشتغل ويا خليل
سالتها ......صديق جدو هادي وحياوي
لا ابنه اجه وانطا الخالج منير مبلغ گله هاي يمشون حالهم بيها
الي صار انو خليل من شغله ما ترك النه بس البيت وعندي ذهب لان هو چان يشتريلي من يصير عنده فلوس
خليل كلي انو منطي فلوس الرجل عمتج نصره يشاركه ابستان نخل
لكن زوج نصره كال /:خسرنا والمرحوم عنده علم
ومن طالبته يبيع البستان كلي /:تبايعنه علي وانطيت الخليل حصته
عرفت انو هذا الرجال يجذب لان خليل ما يضم عليه بس هم ما عندي دليل
ضده كتله =هذا مال ايتام ما مبري الذمه اذا ماخذ فلس احمر
بيومها نصره زعلت وصارت تحجي عليه وتغلط
وره سنين دز عليه رجل نصره وانطاني الفلوس الي دفعهن خليل وگلي
خويه ام عباس هذني الفلوس الي نطاهن الي خليل الله يرحمه انا بوكتها كتلج متبايعين ع البستان وهو صحيح احنه
تبايعنه وانا ما نطيت الخليل حصته لان ما چان جوه ايدي وهسه هاي حصتكم
انا رفضتهن وگتله =لا مو هاي حصتنا نشوف الشرع شنو يگول صار سنين تجني خير من البستان وين حصتنا
لاتگلي هاي الافلاس الي ما يجيبلنه شي
هو ما قبل بكلامي ونصره ما قصرت بالحچي والسب وصارت تدعي عليه
صارت الحياة بيها وما تصعب اهنا قرر ابوج يبطل من المدرسه ويروح للتاجر لكن خاله منير ماقبل وكله
منير /:خالي عباس لاتروح ولا تتعب اصلا شغل اللنجات متوقف بسبب الحرب وبعدين المسافه بعيده عليك يوميه
تروح للفاو وترجع وبهاي الاحوال الحرب والقصف
عباس //خالي لازم اشتغل خو ما ابقى اتاني امي يمته تضربلها ابره الوحده مريضه البيت واخواتي يراد
الهم عيشه
وقرر منير يشغل عباس ويا بالمحل وكال// اجه الوقت الي ارد بي فضل خليل لمن ساعدني بمشتراة بيت اهلي
واشتغل ابوج ويه خالج منير وانا مقهوره ردته يكمل دراسه بس هو
مو يم المدرسه چان ما يحبها عكس سراج ابن منير وعكس عمج هادي
بيبي ......يعني عمو سراج ازغر من بابا وازغر من عمو هادي
=اي ازغر منهم بس عقله ما شاء الله
وبقى عباس يشتغل ويه خاله وانا هم اضرب ابر ومشت حياتنا هادي بالمدرسه وعمتج نوال جانت شاطره لكن
موضي مثل ابوج ما تحب الدراسه
بقى عباس ويه خاله اكثر من سنتين وهو يشتغل بالمواد الكهربائيه لمن ما قرر منير يبيع المحل ويصفي اموره
سالتها ......ليش بيبي
لان زوجته طلع الها ورث ابغداد من امها بيت ومحلات وشافو الافضل يستقرون ابغداد وباع خالج البيت والمحل
او وصى الرجال الي اشترا المحل ان ايبقي عباس عنده چانت لحظات صعبه علينه وانا اشوف اخوي وسندي الي
عشت ويا وما تركني من وعيت ع الدنيا عافني وسافر يعني ما بقالي احد اهنا بس جميله وعلاقتي وياها مو هلكد
واصعب لحظه عليه من شفت عباس ايودع سراج وشلون يبچون بوقتها الكل اتخلى عنا والتهى بنفسه اله سراج
هو الوحيد الي يجي ويسال رغم زغر سنه كان يبچي علينه وساعات يبقى ايام ما ياكل اله يجينا وبذاك الوكت امان
چان جدج منير ايامنه بالقطار ويه واحد جاي للبصره بحيث يوصل غبشه
ويبقى يومين وانا اروح اامنه ويه ناس يرحون البغداد واخابر منير ايلاگي بالمحطه
وهالتشوفينه الهسه ما تركنا
وبعد ما شال منير وعياله وبين ليله ويوم عباس صار صانع عد رجال غريب ابوج ما اهتم لان جان يحب يشتغل
بس انا مقهوره علي واليوميه چانت قليله ما تكفي وعشنا انا اضرب ابر وجنت اربي دجاج وبط وابيع وابوج
يشتغل ويجيب اليوميه يخليها بايدي وانا اجمع الفلس ع الفلس ما اصرف من يومية عباس اله شي بسيط
جنت اعرف بعباس يحب زهراء بت جميله وهي تبادله نفس الشعور وهو مثل خليل اذا حب اخلص وكبرو
جهالي وصار عباس كهربائي بحكم شغله وانا اضرب ابر
وموضي مو شاطره بالمدرسه صرت اوديها عد الجده مريم تتعلم منها وتساعدها بتوليد النساء
اما نوال وسلوى كلش شاطرات بالمدرسه خليتهن وهنه كل سنه ينجحن الاوائل
وانتهت الحرب وعباس يشتغل ومن يجي اي واحد يريد اياسس كهرباء يروح اياسسله وانا وسراج نشجعه
من عرفت بعباس يريد زهراء رغم الي شفته من اختي لكن سكتت لان اعرف ابني مثل ابو من يحب
مو من السهوله يتخلى عن الي يحبه
واتوفى ابراهيم سنة 92
اتوفى ابراهيم الي نسانه ونسى جميله واولاده اتوفى وزوجته خابرت
من بيت جوارينه كالت بكل برود
ابنكم اتوفى
ما رحنا لان كرم وعباس اصروا الفاتحه تصير بالبصره خصوصا وهي واهلها دافنينه وبعدين خابرت
سووله فاتحة ابراهيم ابيتنا وبمجرد ما خلصت السبعه سمعت انو جميله راحت وسوت معامله حتى تاخذ نص
راتب ابراهيم واصلا ما لبست اسود لان هو مطلگها
وصارت تسب بي من عرفو بس هيه وزهراء الها من الراتب لان طالبه
سراج چان دووم يجي يشوف عباس ويطمن علي وعباس هم دووم يسافر حتى يشوف سراج وخاله چانت
صداقتهم وخوتهم ماالها مثيل
من اجه سراج گال لازم عباس يفتح محل خاص اله الى متى يبقى يشتغل عد الناس انا ايدته لكن عباس گال
منين افتح المحل
انا طلعت الفلوس الي مجمعتهن من شغله وطلعت قسم من الذهب وانطيتهن العباس الي ما قبل وزعل عليه لان
عباله اصرف من شغله انا وسراج قنعنا وفتح محل يبيع مواد كهربائيه وصار الي يحصله ينطي الي انا قسم
اصرفه والقسم الثاني اضمه اله الزواجه
سالتها ......بيبي ليش بابا ما اتزوج زهراء بت اختج
=لان امها قشمرتها وقرت براسها حتى ما تاخذ ابوج
......شلون بيبي
= عباس مشت اموره بالمحل وصار معروف وشنو عنده فلوس يجيبهن عندي وهو ما فد يوم سالني وين
اودي الفلوس
وانا سنتين گاعده اجمع بمهرها وقررت اخطبها لان ادري بابني يحبها واشوفه الليل كله وهو يحجي وياها
بالتلفون لكن قبل ما اخطبها شفته شلون ضايج ويتصل يحجي شويه وبعدين يسد التلفون
وقررت اروح اخطب زهراء بدون ما اكله
ردت اعرف ابني شبي بذاك الوكت جان عمره 22 سنه
ورحت رغم كارهه هذا الشي لان اتذكر شنو سووت امها بيه وفاتحت جميله برغبة عباس الي جاوبتني
...والله منيره عباس ابن عمها وابن خالتها منج الها اذا وافقت انا ما عندي مانع بس اذا بتي ما تقبل انا ما اجبرها
شفتيني من شمس وافقت على ابن نصره محيي انا ماحچيت
وصاحت الزهراء الي بوقتها تداوم كليه تربيه حجيت وياها وگتلها =خاله جايه اخطبج العباس
جاوبتني وهي تباوع الامها وكانما متفقات /خاله عباس خوش ولد وكل وحده تتمنا لكن خاله اعذريني ما اكدر
=ليش خاله انتي تعرفينه وهو مو غريب ابن عمج وابن خالتج ليش ما توافقين
زهراء/خاله شلون اوافق على ابنج ابنج لا شهاده ولا وظيفه
==بس ابني عنده خير من الله عنده محل والحمد لله ما عايز
زهراء /ههههه خاله الله عليج اذا سالني صديقاتي اكول عنده محل
جاوبتها باستغراب =شبي العنده محل اهل الوظايف ميتين جوع
زهراء ابتسمت وهي تباوع الامها --ما بي شي ياخذله ابنيه خريجة سادس تقرا وتكتب لا يدور على وحده
خريجة كليه
اتقربت منها وانا مصدومه = خاله زهراء عباس رايدچ وانتي تعرفين هذا الشي وهم ادري هذا مو كلامج بس انتي يازهراء
خسرتي عباس وللابد وراح تتندميين
جميله // منيره تحچيين صدك تره الحياة قسمه ونصيب
باوعت الها = اي قسمه بس مرات النصيب احنه نختاره ناخذه او نضيعه مو هيچ ام كرم
ورجعت وانا ميته من القهر واتلكاني عباس فهمته على كلامها خابرها كدامي وكلها
:ليش زهراء من جنتي تكليلي احبك ما تعرفين ما عندي لا شهاده ولا وظيفه
وسدا وانا اشوف ابني شلون مخذول ومقهور خابرت سراج الي اجه وكله انت بس اشر على اي وحده
سراج بوكتها كان عمره 17سنه بس عقله جبيرعباس بقى بحزنه وبضوجته وانا ما اعرف شنو اسوي
وره شهرين اجه كرم هو وامه واجه عباس لكاهم سلم عليهم واهنا جميله كالت
- - خاله عباس احنا جايين لان اكو ناس اجونه على زهراء همه خوش ناس والولد مهندس اهله بالحله بس
چان يداوم بالكليه وشافها الزهوره وانعجب بيها وباجر يردون يجون يتممون الخطبه ولازم ولد عمها يكونون
حاضرين
ردت احجي لكن عباس راسا جاوبها //اي خاله بيها الخير ان شالله نجي انا وهادي
كرم كله //تسلم ابو فضل
جميله //وانتي ام عباس هم تعالي كدام الناس خالتها وجيبي وياج البنات
جاوبتها =اي ان شالله اجي تدللين
وثاني يوم رحنا حضرنا خطبة زهراء الي چانت هي وامها وشمس الي بوكتها متزوجه ابن عمتها نصره محيي
جانن ما واسعتهن الگاع من الفرحه من اكتملت الخطبه وراحو الناس جميله اصرت نبقى للعشا وراحن البنات
يحضرن بالعشا وجميله كعدت يم عباس وكلتله
خاله لاتزعل الدنيا قسمه ونصيب
لا خاله عليمن الزعل بيها الخير
خاله حقها ترفضك انت ما بيك شي لا سامح الله بس هي كالت لا شهاده ولا وظيفه
عباس باستهزاء //هههههه والله ضحكتيني اهل الشهايد يقبضون افلاس من وظايفهم ومن يردون گلوب ياخذونه مني بالدين
جميله //اي خاله بس ما يبقى الوضع على حاله تتبدل الدنيا وتصير الشهايد والوظايف الهن وزنهن
جاوبتها ==هذا هو ام كرم كلمن ياكل رزقه وعباس ما اله خبزه ويه زهراء وما يشوفها اله اخت ان شاء الله تتهنى ويه
الولد المهندس
جميله // يوم العباس والهادي والبنات
ورجعنا وانا اشوف عباس مقهور وضام بگلبه بقى شهر يروح ويرجع وهو ساكت
لمن ما اجه وگال /:انا اتطوعت بالشرطه
كلنه اتفاجانه وحاجيته ==ليش يمه شغلك ومحلك خير من الله شلك بيها انوب شرطه او واجبات
عباس وهو يعض بشفته /:اي يمه درتها براسي يجوز هسه ما تفيدني بس بالمستقبل استفاد غلطة عمري من
ما سمعت كلامج وكملت دراسه چان هسه انا غير شكل
جاوبته ==يمه حبيبي حتى لو مكمل دراسه هم الظروف ضدك وفاة ابووك وانت اتحملت المسؤوليه وهسه شنو
اهل الشهايد احسن منك
عباس بحسره //الحمد لله على كل حال
بعد خمس تشهر هواي صارت امور
زهراء تزوجت واجو بيت جميله يخطبون نوال الكرم هو معلم متوظف ونوال بالكليه
عباس گال الراي الاول والاخير الامي ونوال
نوال من سمعت اجت يم جميله وگالتلها: خاله ابنج تتمنا اي بنيه لكن اسفه خاله ما اگدر اوافق على ابنج لان
انا كلية تربيه باچرصديقاتي يگللي شنو يشتغل زوجج اگللهن معلم هم ايگللي شعجب شهادتج اعلى من شهادته
اسفه خاله ما اگدر اخذ ابنج شوفيله ابنيه خريجة سادس ثالث متوسط لان اكيد المعلمه ما توافق تريد مدرس
رجل اعمال ضابط وانا بعدني طالبه يعني بعدها قسمتي گدامي ومثل ما گلتي الزواج قسمه ونصيب
وراحت جميله وبنفس الشهر دزت موضي بت جيرانه الي تزوجت بالكويت على اختها حتى تخطب موضي بنتي
الابنها نواف
بوكتها العراق بحصار واي كويتي يتزوج عراقيه يسحبون منه الجنسيه
الولد من چانت زغيره شافها وبقت بذاكرته قرر يهاجر وياخذها ويا ومن خابرتنا من الاردن واتفقت ويانه
عباس گال
البنيه زغيره لكن هي وافقت
عباس فاجانه طلب مهر غالي والناس ما حجو شي وافقوا ودزو الفلوس احنه ما قابلين على طلب عباس وانا كتله
=شنو يمه اختك سلعه تبيع وتشتري بيها
هو ساكت ما جاوبني من وصلت الفلوس كانت الحواله باسمه راح
استلمها وبالليل گال //موضي حضري نفسج باجر تجين وياي للعقاري
سالته ==ليش يمه شكو
عباس //ما كو شي بس بمهرها اشتريت الها بيت طابو وراح اسجله
باسمها للزمن صحيح البيت زغير وتعبان لكن على شارع عام وخلي
للزمن وممنوع تبيعينه سمعتيني موضي
جاوبته //يمه لا تنسى بنيه وتريد تفرح وتحتاج او,,,,
ما خلاني اكمل كال // شنو تحتاج عليه لا تنسين رايحه الديره غريبه وبعيده والله العالم شنو الي راح يصادفها
=الله يطول عمرك ويرزقك
عباس بعتب //ولو زعلان عليج لان تعرفين اخلاقي بس هاي اختي ولازم اطلعها باحسن ما يكون
وكملنه الجوازات وسوت موضي حفلة حنه وچنه فرحانيين بيها واجتها الجده وكالتلها صيري شاطره وبيني شطارتج
وراح تكونين اشطر قابله
وسافرنا انا وهادي وموضي لان عباس ما قبل يسافر وبقينااسبوع بالاردن ورجعنا بعد ان شفنا موضي وهي
بقمة السعاده وعرفنا من الاردن راح يستقرون بمصر
... يعني زوج عمه موضي على مودها هاجر
هزت راسها = اي وهمه هناك فتحله مشروع والسفر عادي اهله يجوله بعدين استقرو ابريطانيا
يعني ما بقى بمصر
= بقى فتره وبعدين هاجر ابريطانيا
وبقى عباس يشتغل ويداوم بالشرطه وسراج ابد ما عافنه جان يجي دائما
اعرف بي شاطر بالمدرسه ومن يجي يخلصها ويه عباس طلعه او ونسه ودوم اسمعه يقنع بعباس يتزوج لكن
عباس رافض الفكره
بوكتهاا هادي اتخرج من المعهد الفني وقدم على وظيفه بوقت الناس
كانت تبطل من الوظايف لان الراتب قليل لكن عباسء شجع اخو
وگله// قدم اوراقك لو وين ما تطلع داوم بيها
وطلع تعيينه بالموارد المائيه قسم حفر الابار الارتوازيه وقررنا انزوج
هادي بعد ان مليت من عباس وخطبنا اله بت عمته نصره (افراح)
حسب طلبه لان كان يتردد عليهم وهي هم جانت تجي ويه امها النه
هي ما كملت حد الثالث متوسط وكعدت جانت بيضه ورشيقه وعيونها كبار وشعرها اسود يعني حلوة
وسويناله زفه وعرس والكل حضر حتى امي رغم صارت مره چبيره هم
اجت وحضرت عرس هادي وتكاليف العرس كلها من عباس
هادي يداوم ويحب شغله ودوم يسافر ايفاد للمحافظات لان بذيج السنين الدوله اهتمت بالزراعه والموارد المائيه
بسبب الحصار وباول سنه زواج صار عنده ولد سما ياسر
بوقتها انا عتبت گلت //ليش ما سميته خليل على اسم ابوك ركضت سميته ياسر بس كلتلك مرتك
عباس گلي =يمه خلي شيسمي يسمي المحبه مو بالاسم
=وانت الثاني شالع گلبي تره مو احسن منه
عباس //اهووو يمه راح نفتح القوانه
=خلف الله عليك كلامي صار قوانه
اتقرب عليه وباس راسي // لا يمه انتي كلامج دستور بس اتزوج اسمي خليل ولا يهمج شعندي غيرج
=انت بس اتزوج هو ابنك اسمه (فضل ) حسبي الله عليها كسرة كلبك
جاوبني /:الله كريم يمه الله كريم انتي بس لا تنقهرين
وبقى عباس يشتغل ويداوم اما هادي فكان يداوم ودائما يروح ايفااد للمحافظات خصوصا كربلا والنجف والانبار
بهاي الاثناء زهراء اتطلكت كنا نسمع بيها تجي زعلانه عد اهلها بحجة هو زين واهله مو زينين يغار عليها بخيل
وچانت كل شهرين تلاثه تزعل شهر اكثر وترجع وبعدها اجت الاهلها وبقت اكثر من سنه واتطلكت وما عرفنا
سبب طلاكها
نوال اتزوجت ولد مدرس وسراج ما تركنا ولا بلحظه ومن كمل اتطوع على جهاز الامن العام
فد يووم اجه هادي يمي وگلي
-يمه حچيتي ويه عباس
=اي وما قبل
-وليش شنو يكبر لو يزغر مو. تشوفين العمر يمشي
=شسوي ما قبل يگول ما افكر اتزوج بالوقت الحاضر
- وهذا برايج عذر
لا والله ياابني مو عذر بس گلي شسوي
-اي يمه غير تعرفين الى متى
=يمه انا عرفت ليش ما يقبل يتزوج ابتهاج بت عمتك
ليش اشو بت عمتنا واختها الافراح ومرتي حبابه مو صحيح
=والله صحيح بس ابتهاج مو حلوه انت ناسي زهراء شكد حلوه
-هم صحيح كلامج خوش يمه فاتحي اذا بعده يريد زهراءخلي نخطبها ويتزوجها مو اتطلكت
=انا ما احجي ويا هي الدگه الي سوتها بت اختي شويه
-خلص انا احچي
اجه عباس جايب چيس حليب وجبن من المحل وگلي
هاج يمه هذني جبتهن وحاسبت ابو المحل
= نعم الله عليك سلوى تعالي خليهن بالثلاجه
اجت سلوى وخلت الغراض ورجعت هادي فاتح عباس گله
ابو فضل شنو ما ناوي تتزوج تره ابدنا نشوف جهالك
عباس عكف حواجبه //تره ما يلوك لك دور الاب
=هاي شبيك عباس اخوك ما حچى شي
جاوبنه بصوت ناصي /:شنو مو گتلكم رايي بكل صراحه بزواجي من ابتهاج
:مو ابتهاج عباس زهراء بت خالتي مو اتطلگت وخلي نرجع نخطبها
عباس باستغراب باوعلي وسالني //وانتي يمه شتگولين
=انا الشي الي يريحك يريحني شريد غير بس سعادتك
خلص سدوا الموضوع
هادي /:لامانسده اذا مو الخاطر روحك الخاطر امي تريد اشوفلك جهال
جر نفس وگال /:صحيح بوكت حبيت زهراء وانقهرت لان رفضتني لكن مو عباس الي ياكل فضالة غيره والله
لو يصبون زهراء قالب ذهب ما اخذها
= عباس يمه تره الصوج من خالتك مو من زهراء
وهي مو زغيره هم الها راي (جر نفس ) غيرو الموضوع انا تعبان
ومن يومها تبدلت حتى اخلاق افراح ويانه لكن هادي ما كان ينطيها مجال
هادي صار دائما يروح ايفاد للنجف الكربلا وحتى للانبار يبقى اسبوع اكثر ويرجع جان
يروح يشرف على الابار الارتوازيه الي تنحفر بذاك الوكت
فد يووم اجه الظهر وگال
: راح اعزم صاحبي باجر ع العشا واحتمال يبات يمنه
=منو صاحبك
هادي / يمه صاحبي من اهل الكفل منذر لان عده ايفاد للبصره وانا من اروح هناك يعزمني
ابيتهم بعد لازم نرجعها
عباس كله /: اي اعزمه هلا بي
ثاني يوم عباس من راح للدوام ودا العربانه مليانه من كل شي وكعدت افراح وسلوى يشتغلن ويحضرن للعشا
واجه صديقه واتعشو وبقو هو وعباس وهادي يسولفون ويضحكون ثاني يوم الصبح اتريگو وراحو للدوام
وره شهر راح هادي ايفاد ومنذر عازمه وهيج توطدت العلاقه
چنا نهاية ال 96 لمن ما اجه هادي من السفر بالليل اجه كعد يمي بالحجره مالتي
احنه ما بنينا البيت بقى من لمن اشترا المرحوم غرف داير ما داير وحوش چبير وبره حديقه بيها نخلات تلاثه
وبيها طارمه نكعد بيها وساعات انام من تطفى الكهرباء
والسطح ينام بي هادي ومرته واولاده بالصيف هو صار عنده ولد ثاني سما عمار
اجه هادي وگلي
يمه
= ها يمه
- - يمه قبل يومين من سافرت عزمني منذر بالصدفه شفت اخت مرته يمه مو بشر استغفر الله تگولين ملاك
نازل من السما
=هاا هلگد حلوه
هز راسه //لا كلمة حلوه قليله بحقها
= وين شفتها
-جايه الببيت اختها بيتهم مو بعيد عن اهلها قريب وجايه هي وامها يساعدنها
=شعجب باقيه الهسه
- يمه زغيره توه عمرها 18سنه بس تخبل تمنيتها العباس مو تكولين يريدله حلوه
=هاا اشوفك كلش مهتم
يمه اتخبل لو تشوفينها تكولين ملاك
=هادي يمه لاتنسى ما اريد اخوك ينصدم نروح نتعنى وانوب تكول ما اقبل
هادي :لا انا هم فكرت گلت الروحه التجي اخذ عباس ونروح
بحجة نزور وهناك نمر ابيت منذر واخلي يشوفها وتشوفه واذا
تم الاتفاق نتوكل ونخطب
=شنو انت محاجي منذر
لا بس استفسرت اذا البنيه مخطوبه او لا
=وحتى من يصير اتفاق دير بالك تجيب طاري جان يريد زهراء بت عمك
اطمني انا شنو اريد غير اخوي يفرح ويرتاح
رفعت ايدها بالدعاء = الله لا يشن لبنكم والله ابدي جان ياخذ ابتهاج بس شسويله حتى اشوف صاير ابال افراح
هادي بعصبيه //ليش يمه شبيها افراح متجاوزه عليج والله ساعه ما اخليها
=لا يمه شبيك هادي لو انا من افراح حتى اعاتب واحجي بس انا الي مستحيه
هادي // عبالي مسمعتج حجايه كلت اطيح حظها.
= هادي على كيفك هم حقها اتضوج اختها
يوم الخميس اجاني هادي وكلي
يمه السبت عندي ايفاد وبلكي الله يهدي عباس ويروح وياي
=ها شعجب مو ذاك الاسبوع رجعت
اي اخذته من صاحبي بالاتفاق الايفاد الجاي هو ياخذه بس حتى نروح انشوف البنيه
=زين هسه يجي اخوك وكله بس خاف يتحجج ما عنده اجازه
يدبرها
اجه عباس وكله هادي //امشي وياي للنجف نزور ومناك نزور كبر ابوي
::ما عندي اجازه شنو بكيفي
خابر الظابط كله فاتحه عدنا موت عمك خالتك جميله
::ههههه لا هو الضابط خوش ولد ما يكول شي
زين باجر قدم الاجازه تلث تيام
::ان شاء الله بس ليش مصر اروح وياك
ونس بالطريق وهم من زمان ما زايرين
::خلي ناخذ امي ويانه
=لا عباس ما بيه حيل روح انت وهادي الروحه التجي اروح وياكم
ثاني يوم عباس قدم اجازه تلث تيام وهادي راح للسوك اشترى عطورات وبهارات وحنه لان البصره مشهوره
بالبهارات والحنه طبعا الفلوس مني وبالليل اشوف هادي يتصل بصاحبه والجمعه غبشو وره صلاة الفجر
تلث تيام انا حتى ما خابرتهم بس من وصلو اتصل عليه هادي
وثالث يوم بالليل رجعوا اتلكيتهم وهمه جايبين وياهم دهينه وكيك وسبحه وانا بوجهي الف سؤال
عباس كعد يمي شويه وراح الغرفته وبقى هادي
==ها يمه ابو ياسر بشر
::والله حجيه شافها وشافته هو من شافها الحد هسه ساكت بس انا بالطريق حاچيته وگتله شنو رايك نخطبلك اخت
مرت منذر
انا كتله ==ليش يمه كتله خاف البنيه ما موافقه
هادي //لا يمه اصلا هو منذر كلي ليش عباس الهسه ما متزوج كتله مالاكي بت الحلال
كلي شلقصه هاي البنات الله كثرهن
انا بينتله هو يريدها حلوه وزغيره
منذر رد عليه //عندي مياده اخت زوجتي
فهمته المنذر يجس نبض زوجته واختها ويرجعلي خبر
بقى عباس ساكت يعني ما جاب طاري خطبه او زواج وره عشر تيام من رجوعهم شفت هادي يخابر واجه كعد
يمي جان عباس توه جاي من المركز ومار بالمحل رن التلفون هادي كام يريد يرد راسا صاح اااخ ااخ رجلي التوت
التلفون بقى يرن گاله عباس جاوب
لان قبل محد يتجرا يرد اذا الزلم موجوده راح عباس وهو يگول /الو
اي عمو موجود ليش رايدته
ها اهلا شلونج شخبارج
دوووم خير
اي هسه اساله انتي ابقي يم التلفون
خله التلفون بايده وحچى ويه هادي //اگلك ابو ياسر منذر هم شايفه
هادي باوع بتعجب /؛ليش تسال ؟
مو خطيه ايكولون اله يومين من جاي للبصره وقلقين علي
هادي /:منو ع التلفون ؟
عباس جاوب بارتباك /:ا هاي اخت زوجة منذر تكول من اول امس وما مخابرهم
هادي /هاا زين گللهم امم گللهم
باوعت العباس = يمه عباس جيب التلفون الاخوك
عباس /:لا عليمن شگللهم هادي
گلهم بالباديه وما يتوفر اتصال من يجي للدائره اذا يتاخريخابرهم
ان شاء الله
لزم التلفون خلا يم اذنه واشوف شلون مرتبك // الوو انتي وياي
يكول هادي لا يقلقون بالباديه وما كو اتصال
عادي يمته ما يعجبج اتصلي
مع السلامه
عباس وره ما سده كانما يبرر /:خطيه قلقه على زوج اختها
جاوبتهم =جا شعجب اختها ما خابرت
هادي /اكيد متزاعله ويه رجلها وهالخلت اختها تخابر مو تعرف بي يجي يمنا من يجي ايفاد
صرت اشوف عباس وهو ينقل التلفون الغرفته ويكعد يخابر بالساعات وشفت فرحه ولمعه بعيونه وره اسبوعين
اجه وكلي //يمه قررت اتزوج
عرفت منو وفرحت واجه سراج وعباس وهادي سولفوله سراج گال ::بيها الخير بس لازم نسال عن البنيه وعن اهلها
هادي گله /:عليمن البنيه احنا شفناها مؤدبه وحلوه واهم شي عباس قابل بيها
ورحنا انا وعباس وهادي حتى انشوفها ابيت اختها من دخلت شفت ايه من الجمال عبالك حوريه وبنفس الوكت
شفت ابني عباس فرحان بيها ويتمنى ياخذها باسرع وكت فاتحت اختها وگتلها نريد الرد وبدت اختها تسال
شنووعنده وشنويملك وعباس يجاوبها وهو ما منزل عينه من البنيه
ورجعنا وره اسبوع انطو الموافقه ومناك خابرت على اخوتي يجونه ورحنا انا وافراح ونوال ونصره وزوجها وابن
عم خليل وكرم ابن ابراهيم وتمت الخطبه اهلها طلبوا مهر عالي وعباس وافق رغم اعتراضي لان اختها من خابرتها
وكتلها شكد تردون مهر كالت المتعارف علي لكن اتفاجئنا كان المهر هواي عباس ما قبل احجي وكلي هو متفق
ويه منذر وجايب الفلوس
انا سكتت رغم اتبدل الحچي وانا اشوف ابني فرحان واسبوعين وسوينه عرس العباس عرس چبير واجت هي وامها
واختها ومرت اخوها زفاهم سراج بسيارة ابوو والبوقي ملا المنطقه اما النساء فسوينه مولود
الكل انبهر بجمالها وبدلتها الغريبه الي كانت بدون ردن
مياده حلوه شعرها كستنائي وجهه ابيض مدور ما بي اي ندبه عبالك فضه مصبوبه عيونها لونهن اخضر حلگها
عريض وشفايف مليانات لونهن وردي طويله سيقان مليانات بتناسق كان الجمال رباني طبيعي الصوت موسيقى
كل الي شافها انبهر بجمالها
بالسبعه لبست سبع بدلات كانن مو بدلات مصيبه لان بذاك الوكت اللبس تقريبا محتشم بالحفلات مو مثل هسه
هي لبسها كان جرئ بحيث ظاهر كل جمالها وانا اشوف نظرات الحسد من افراح وجميله والقهر والندم بعيون زهراء
وحسيت عباس صار اسعد رجل بالعالم يوميه يطلعها وتجي محمله هدايا ومن اشوف ابني فرحان افرح ويا
هي اول شهر ما اشتغلت لان عروس ولان يوميه يطلعون يتونسون يرجعون بالليل هو ثاني يوم يروح للدوام وهي
تبقى نايمه على ما يجي وافراح بدت تتململ من الشغل رغم انا وسلوى ايدنا وياها لكن هاي حال الچناين
وره الشهر بدت تشتغل بالبيت وصار التنظيف عليها كانت تنظف الحوش والغرفه الي نكعد بيها وبس بعد اي شي
ما تنظفه الديوان وغرفتي والحديقه ما تمر بيهن
من تجي سلوى من الدوام تنظف الباقي وتغسل المواعين وتنظف المطبخ
لان مرت هادي كانت تعجن وتخبز وانا اطبخ شهرين وهي لا ابالي وعباس فرحان بيها لا شنو فرحان كولو طاير
لمن ما اجه وگلي يمه مياده حامل
/////////////
