رواية اوجاع يتيمة الفصل الثاني بقلم جمانه السعيدي
بقيت ابجي لا اني حضرت الفاتحه وبجيت ورتاحيت ولاشفت كبر امي ورتاح كلبي
ضلت حسره بكلبي بس ابجي وانوح
وما اكدر احسهم اهلي احسهم غربه
عليه صح عمي زين بس يطلع للشغل من الصبح ويرجع الضهر يتغدا وينام ويطلع وما يرجع اله لليل
تمرضت من كد البجي والخوف والقلق كمت ما اكدر اكوم وما اكدر احجي بلاعيمي مطبكات
نايمه ومتغطيه وصخونتي عاليه
الحد ما اجه حسام وشافني وتخبل ليش هيج عايفيها لزمني مصخنه وانتفظ
كال كومي اوديج للمستشفى
اني عدي جبه وشال اجيت بيهن لبستهن واني ما اكدر امشي
كلشي يوجعني
اجر تكسي ورحنا للمستشفى
فحصني الطبيب
جمانه السعيدي
..الدكتور .هاي بلاعيمها حيل ملتهبات والالتهاب نازل على مفاصلها
والصخونه صاعده بسبب الالتهاب
علكلي مغذي وخله بي ابره
حتى تفكني الصخونه
وسجلي ابر التهابات كرومايسين اضرب الصبح وحده وبليل وحده
وانطاني حب حساسيه كال بليل اخذي لان ينوم
راح حسام اشترالي العلاج اكو صيدليه قريبه على المستشفى
وضربتي الممرضه ابرتين
ورجعنا للبيت
...
عمي لكينا بلبيت
...ها بويه شبيها ايناس
...بويه التهاب قوي ونازل على مفاصلها
. عمي ابو حسام ..ام حسام سويلها شوربه علمود بلاعيمها
رجعت اتمددت وتغطيت
شويه وجابتلي عمتي الشوربه
...هاج خاتون مو كيفتي نايمه وحنا نخدمج
هاي عيارت المرض اعرفها كلش زين
شربت اشويه شوربه واني احسها سم ونزل ابطني
ثاني يوم شويه احسن
حسام ياخذني الصبح للمستشفى اضرب الابره والعصر يمهم ابنيه ممرضه اروحلها تضربني
اتلث ايام وصرت احسن كمت اكدر اكوم واكل
بس حسره بكلبي شكبرها على اهلي وبيتنا معقوله لحضه شيطانيه اضيع كل شي
لو ابويه شويه هادء
لو امي لازمه السانها
جان اني هسه ابيتنا وشحلاتني
بدت عمتي ام حسام تكرب عليه
ا
ام حسام كومي شكو ملابس بلحمام كلها تغسليها
نظفي الطرمه
نظفي المطبخ مايهون عليها اكعد ابد
اني اشبه امي اكثر اهل ابوي سمران وخشومهم كبار
اني على امي بيضه وخشنه
يعني اطي اكثر من عمري
ملامحي عاديات بس شفايفي عبالك نافختهن
وبدت المدرسه اني وبتهم ميثاق نفس الصف وبت عمي نجلا ويانه نفس المرحله
بدن يشترن ملابس مدرسه ويجهزن واني ساكته واباوع بعيوني ويحضرن واني اتحسر
جمانه السعيدي
واذكر امي شلون جانت تاخذني وتشتريلي ملابس واشرط عليها هذا اريده وهذا ما اريده
شلون جانت كلشي ماتخليني اشتغل
تشتغل هي وتكول ما اريدج اتعبين
ابجي بسكوت بس تشوفني عمتي ابجي تكول
هاااعليمن تبجين يلبومه
بليل اجا عمي والبنات سولفن كدامه على التقديم للمتوسطه
واني ساكته
ابو حسام وانتي بويه اشتريتي ملابس لو بعدج
جان تطفر عمتي
...شني هي اداوم
...ليش ما اداوم وحد هيه
...يا اريدها تساعدني بلبيت وحدي ما اكدر
...طول عمرج وحدج
هسه من اجت هاي المسكينه صرتي ما تكدرين
اداوم حالها حال بناتج
بويه حسام هاك هاي فلوس وباجر تاخذها تشتري بكيفها الي يعجبها
...صار بويه انشاء الله
...فوكاها انوب حسام يشتغل عدها ياخذها ويشتريلها
...اي هو مسول عليها هو مثل اخوها الجبير
...وفعلا ثاني يوم اخذني حسام اشتري ملابس
مايقبل اشتري شي ضيك اني صخمه ويبين جسمي اذا شي ضيك
اشترالي ملابس حلوات على ذوقه وجنطه وقرطاسيه
بعدين كال تعبنا تعاي ناكل موطه
وكعدنا بكافتريا واكلنا موطه
حسيت حالتي النفسيه اشويه اتحسنت وهم راح اداوم اطلع من البيت خنكت عمتي شويه
عمتي ام سمر اقصد عمتي اخت ابوي
هي هاي اخته الوحيده
خطيه دوم تجي تشوفني وحتى تنطيني فلوس لو اجيبلي ملابس
المصيبه الثانيه بحياتي عامر
دمرني سخيف يتحرش بيه
يتعمد يطخني
لو يلزمني واني اكرها اموت منه
حتى مرات يكرصني
المشكله جنه كلشي مامسوي
واني اجفل منه واحاول ابتعد
ما اكدر احجي اذا احجي تفضحني عمتي
واني ماليه سند يدافعلي
عمي وحسام بلشغل وهو اليل كله دايح وسكران وبلنهار نايم ومن يكعد ما اسلم منه ابد
للكن اني سندي رب العالمين دائما اكله
ياربي ماعدي غيرك سند احميني
جمانه السعيدي
بدت المدرسه وكمنا انروح سوا احنا التلاثه ومن نرجع نتغدا
تدخل تنام عمتي ام حسام هي وبانتها واني اتكلي نضفي المطبخ وانتضري حسام من يرجع من الكليه حضريله الغدا
واني كلش تعبانه اتحسر على نومة الضهر انضف المطبخ ومن يجي حسام احضرله الغدا
حسام جان الوحيد الي زين وياي بلبيت هو وعمي
من احضرله الاكل يكول شكرا تعبتج وياي
. حسام .ها نامن وعافنج تحضرين الغدا
روحي نامي واني اكمل ونضف ماعوني
اني ما اقبل مثل ماهو زين وياي لازم اكو زينه ويا
الشغل الوحيد بلبيت الي ما اتعب منه هو خدمة حسام
خلصت السنه باعجوبه وشلون نجحت ما ادري
لان عمتي ام حسام تتخبل تشوفني اكعد مرتاحه هي وبناتها براسي
اني مايضوجني الشغل اكثر شي يضوجني الكلام المر الي اسمعه منها
حجايه والثانيه وكيحه على امها
رغم اني ابد ما احجي ولا اناقش بكلشي
