رواية كريات الدم السوداء الفصل الواحد والثلاثون بقلم زحل شريف
______قدر_____
_مجرد ما تقدمت خطوات ..التفت
ضل مركز نضرة عله الشباك ،،عجيب شنو هل قوة بالتركيز بحيث ،،بس اتحرك يحس بيه ضليت واكفه وانضرله بقلق ..من كثر الهدوء احس صوت انفاسي تنسمع ،،كسر الصمت الي بينا رنة نقاله يمكن رفضه او كانت ترميشه ،،تقرب للشباك وحجه بصوت هادء .
ابو حيه:وهسه انتي لازمه طرف البرده محتميه بي
ترى مااكدر خطفج من الشباك .جيت احجي وياج
اذا محتاجه شي اكدر اساعدج بي . انه ماعرفت شنو موضوعج . وحسب كلام الباشا عله كولتكم
امج متوفيه وماتندلين خوالج . زين اهل زوجج
ليش طلعوج من بيتهم .
_رجع نقاله يدك وماعرف اذا رفضه
او كتم الصوت وحجه بقلة صبر.
ابوحيه:يابه ضيعتي الوقت والفرصه
عندج شخص اتواصل ويا؟
_بلعت ريكي ورديت بصوت واهن
اذا تريد تساعدني بلكي ادورلي
سونه اخذتها سليمه للدكتور ومارجعتها .
ابو حيه:اختج بالمستشفى
حالتها تعبانه ونيموها.
_شهكت يمه شبيها.
ابو حيه:مابيها غير العافيه
بس علمود العلاج وهسه عله جيه.
_زين انته شلون دخلت البيت والباب مقفول.
ابوحيه:هسه انتي بس هاي الي مدوختج
ماسألتي ليش اجيت .
_ماكو داعي ،اكيد وصلك خبر انه لوحدي
واجيت تستغل الفرصه .
ابو حيه:ماعندي مجال ابرر
اسمعيني يابه .
هذا المكان كلش خطر .
_اكيد خطر لان امثالك.
الي حته قفل الباب مايحمينا منهم .
ابو حيه:ياقفل ترى انه ماطافر السياج
وهذا المفتاح وصلني.
_شلون وصلك وهو بس عند سليمه.
ابو حيه:ماالومج اذا متثقين بيه
بعد الموقف الصار بس الغلط منج لو حاجيتلي الصدك من البدايه المهم ،هسه لازم اشوف اي شخص قريب عليجاتواصل ويا حته يطلعج منا ترى مرة ابوج مو امان ولا ينوثق بيها وحسب ماوصلني ناويه تبيعكم وبالاخص انتي، وحته ااكدلج صحة كلامي اكو
شخص اسمه فيلق متفق وياها .
_شهكت بخوف
و انخمش كلبي . حس بيه خفت .
ابو حيه:لا تخافين يابه
انه حجيتلج حته تصدكين بيه ،،لازم اطلعين منا باأقرب وقت اذا عندج رقم او عنوان لخوالج بلكي اكدر اتواصل وياهم اكيد ميهون عليهم وجودج هنا ويجوز ميدرون.
_ تقربت للشباك فتحته
وانه احجي وين اروح ماعندي احد.
وخوالي رفضو ياخذوني . رد وهو مدنك
ابو حيه:منو كال انتي واجهتيهم حجيتي وياهم
_لا لا بس محمود هو كال...
ابو حيه:محمود منو .
_وبدون تردد حجيتله كل شي
يخصني وجودي بيت فاروق
كل موقف اذكرة اشهك ودموعي تنزل بقهر، رفعت راسي اباوعله صافن ويستمعلي بتركيز وتعابير وجهه
تتغير حسب الموقف الي اذكرة ويمكن ماجنت حاسه بقساوة المريت بي ولا فقدان امي ولا عذاب محمود انتبهت لنفسي ابجي بصوت عالي ،سكتت خجلانه
هز راسه هزات متتتاليه بمعنى كملي
مسحت دموعي بطرف ردني ، ورديت
هذا كل شيء .
ابوحيه:زين هذا الي معتبرته ابن عمج
او خطيبج يعرف بيج هنا .
_كتلك مو خطيبي ولا زوجي .
وماادري اذا يعرف لان هو مسجون.
ابو حيه:مو شرط الخطوبه عقد
يعني حسب كلامج جان اكو مشروع زواج بينكم.
_كتلك السبب الي خلاه يقترح موضوع الزواج .
ابو حيه:بس هم حسب ماذكرتي هو يحبج
وابو وهمه انو انتي اخته لاجل يبعد عنج.
_رفعت راسي باوعتله ،ومااعرف ليش حرت بالاجابه
نبهني من حيرتي بسؤال ثاني .
ابو حيه:الوشم الي بيدج منو دكه الج
اقصد هنا سويتي . زين هم طلعتي ويه اختج بحفله .
_لا لا ابد ماطالعه اصلا سونه تخاف عليه
ومن جان الباشا يسهر هنا اقفل الباب .
ابو حيه:زين شنو الغايه من هل وشم.
_دنكت اتحسس مكان الوشم
نزلن دموعي . غصيت بعبرتي .وانه اذكر بيوم الي دكه الي طارق بوقتها اجه من الدوام لكاني بالحديقه
ومثل عادته شمر الكتب وتوجه عليه وقبل مايكعد طلع من جيبه ابرة وجيس بي حبر مدر صخام .
سالته شنو هذن .جر الكرسي كعد وهو شرحلي شلون يستخدموهن ومااعرف ليش طاوعته ،غمضت عيوني استجمع الموقف رغم حزني ابتسمت شكد جنا مقربين بحيث تحملت الالم مال وغز الابرة وكل مااكله ماريد واشرد يرجعني يتوسل ويكول .
طارق:لج جدر مو خاف بيوم تضيعين .
_شنو عميه لو خرسه يعني حته لوضعت
هم انطيهم اسمي واسم ابوي دوخر راح يخلص دمي وايدي تأذيني . ركض للحبل اذكر بوقتها جاب الشال
مال فاطمة وشكه لف ايدي بي وهو يحاول يقنعني ماابين المي.
طارق: حته لايكتشفون الموضوع .
_ولك ايدي توجعني . وبعده ماراد عليه دخل عمي فاروق وهو يصيح علينه تعالو شيلو المسواك ركض طارق قبلي اشرلي يله كمت وانه اضم ايدي ورا ضهري
انتبهلي وبدون مايسال جر ايدي يابه من شافها شسوى
شبع طارق كتل وانه هم اخذله مني كم راشدي
من غير الصياح امي وفاطمه تعاركن ومن يومها حرمو علينا نتفرد وبعدونا عن بعض . تمرضت
بس بسبب ورم ايدي ارتفعت حرارتي ورغم كلشي ماضجت منه .
ابو حيه:تحبي .
_رفعت راسي باوعتله .رغم نبرته الهادئه بس
تعابير وجه ادل عله انزعاج وعصبيه .
ابو حيه:مايحتاج تصفنين سؤالي واضح.
_رديت ودموعي تنزل بغزارة
احبه اخوي وابن عمي احبه لان ربينا سوى
من احنه زغار اكلنا ولعبنه ودراستنا .لان عمي جان مانع اختلاطنا بالناس ،لهذا السبب تعلقنا بعض وجان خايف عليه من جيتي هنا ورادني اوافق بالزواج حته يحميني
ابو حيه:هو محكوم ٣ سنوات حسب ماسمعت.
_اي بلكي يطلع ،لان هو الامل الوحيد الي باقيلي.
ابو حيه:،يعني تتزوجينه .
_اكيد افضل من بقائي هنا .
ابو حيه؛والله ياقدر مااريد
اكسر الامل بداخلج.
_باوعتله بعدم فهم
قطع حديثنا صوت نقاله..بس باوع للرقم
رفض المكالمه عدل وكفته باوعلي بحيرة ،
ابوحيه:اختج طلعت من المستشفى و راح توصل
انطيني رقمج حته اذا رحت لطارق ابلغج بجوابه.
_ماعندي نقال .رفع راسه باوعلي بعدم تصديق.
ابو حيه:ماشي اخذي رقمي ،واتصلي بيه من نقال اختج يله بسرعه قبل مايوصلون جيبي قلم .و ورقه سجلي .
_التفتت بحيرة وين الكه قلم
ترددت انطي نقال سونه . صاح بيه يستعجلني.
ابو حيه:يابه حته لو قلم كحله حمرة.
_درت وجهي عله . ورديت بفهاوه
ماخلي كحله .
ابو حيه:مايحتاج . تخلين .
_تجاهلت كلامه رجع نقاله دك
والضاهر وصله مسج قرء المضمون
حسيت بي قلق ، كتله يمكن اكو قلم بصف البلازمه.
بسرعه تقدم للميز جاب القلم ومد ايده لجيبه طلع فلوس سحب منهن ٢٥ خلاها عله الحايط سجل الرقم بيها وحسب مبلغ طبكه وياها قدمهن الي هزيت راسي برفض ماانطاني مجال احجي خلاهن عله القنفه.
ابو حيه:يله انه رايح لاتخافين اختج اجت
وانتضر منج اتصال .اطلعي اخذيهن
قبل ماتوصل مرة ابوج وتاخذهن
اي شي يصير خابريني . في امان الله .
_طلع مستعجل . ركضت فتحت باب الغرفه اخذت الفلوس رجعت للغرفه ضميتهن بكنتور سونه وبالي يم كلامه ،، تقريبا ربع ساعه واجن تلكيت سونه بخوف وعتب ليش هيج تاخرتي .
سونه:غير الدكتور حولني للمستشفى .
_قاطعنا سؤال سليمه .
سليمه:اكو احد داخل للبيت .
_بلعت ريكي بخوف ،
التفتت عليها سونه ،مستغربه سؤالها
سونه:شنو .
سليمه:اكو شخص داخل البيت ريحه عطر .
_حجتها وكامت تفتر بالبيت تشمم
ادور عله مصدر الريحه . وصلت المطبخ
ورجعت للحمام اخر شي دخلت غرفتنا وطلعت
بدون مقدمات جرتني وهيه تحجي بشك ،
سليمه:منو جان هنا؟
_كامت سونه دفعتها تحاول تخلصني من ايدها.
سونه:هذا فلم جديد ، منو يدخل
ومنين دخل والباب مقفول والمفتاح عندج.
_مااعرف شلون اجت الفكرة ابالي
دفعتها وانه احجي، حسيت
اكو حركه بالبيت بس عبالي اتخيل
لان افكر بالزيران .
سليمه:ولج يازيران عطر رجالي وراقي هم.
خوش نصدكج زين من سمعتي الطكطكه
ماكمتي باوعتي.
_من ايست من جيتجن
دخلت الغرفه وقفلت الباب . بس شفت خيال عبالي
محابس و كمت فتحته مالكيت شي من خوفي طفيت الاضويه وختلت بفراشي . انه احجي وسونه تتلفت
صاحت بيها بعصبيه .
سليمه:شبيج تتلفتين
مو قلتيني بت الكلب .
سونه:تكلج خيال بالشباك. وعطر رجالي
يعني مايرادلها تفكير .
سليمه:سدي حلكج لان
اذا كمت شرط انيمج بالمستشفى شهر.
وخلنينا بسالفتج الي راح تنهينا .
سونه:اووو يعني شسوي موديه عليه
لو اعرف باام طيبه لازمتلي الركن
شحال لو ما انتي وياي.وبعدين شكو خابرتي.
سليمه:ولج منو مخابر.اصلا اتفاجئت من اجه
بس اكيد اكو شخص جاي يوصله اخبارنا.
_هنه يحجن
وانه صافنه بكلام ابو حيه.
سونه:واكيد تعرفين ام دعدوش هيه الي بلغته
وبنفس الوقت اتصلت باام طيبه.
سليمه:غير من ورا مصايبج بت الكلب
علستي ابنها عبالج تسكت .
سونه:وسكتت ام دعدوش. بس انتي الى متى
تبقين خايفه من ام طيبه وشنو قصدت بكلامها .
_تجاهلت سؤال سونه وكامت لغرفتها
وقبل تدخل التفتت تباوعلي بشك. دنكت متهربه
من نضراتها خاف تكشف جذبتي كامت سونه
وهيه تجرني دخلنه لغرفتنا طبكت الباب.
سونه:زار جن ازرك .غردي بسرعة .
_ خل تنام سلوم ونسولف .
سونه:احجي لاتفتين كلبي.
_سولفت الها الصار ضلت فاكه حلكها
صفنت ثواني ،ونوب ردت.
سونه: اذن بايعتج لفيلق. بس منو الشخص
الي خلت عنده المفتاح وشلون وصل لابو حيه .
_يجوز ام دعدوش .
سونه:لا .
_وليش لا.
سونه: لان لو هيه جان ماضيعت فرصه تحرك كلبي بيها جا دخلت الشارع كله عليج . المهم احنه لازم نشوف النا محامي نخلي يطلعلج هويه بلكي نحصل احد يأجر النا اذا عدنا هويات .
_زين ليش مانكلف ابو حيه. يشوف النا بيت.
سونه:ماخرت اله مزروفه
واكيد ابو حيه مايضم عن الباشا، ويحطونه
بيت ويضلون داخلين طالعين علينا وهيج سهلنا
الهم الامر قدر اتمنى تاخذين من الصار وياي عبرة هاي الناس ماتقدم شي مجاني ولو المقابل فلوس اهون
تفهمين قصدي .
_جا شنسوي . تدرين من كالي بايعتج لفيلق
متت خوف يعني لو ما ابو حيه جان انتهت حياتي.
سونه:وهل مرة عدت سلامات
خاف بيوم محد يلحك عليج .
المهم انه دايخه بكلام ام طيبه
ولج سلوم ضل ينطي وجها الوان .
_مافهمتي شنو الموضوع
سونه: مافهمت شي لان بس حجتها
ركضت عليها سليمه وذيج شردت
_معقوله بايكه طفل من اهله وبايعته.
سونه :كلشي يصير. وعله موقفها وخوفها
اتاكدت عدها استعداد تبيعنا لابو العتيك
في سبيل تسكت ام طيبه.
_واحنه شنو نستفاد ان فضحتها.
سونه:خوفها اكدلي السر اذا انكشف
تنتهي سلوم واحتمال تنسجن واذا انسجنت
احنه ماعلينا خوف نبقه بيتنا محد يندك بينا نشتغل
وننطي النصافات حصتهن لحد ما يطلع طارق .
_واذا طلع وماوكفلي ويجوز يعاديني.
سونه:ماعليج لوم لو عتب ،تشتكين عليهم
وتاخذين حصة امج .بس الي اريده منج هاي الفترة
ديرين بالج خاف بيوم انه طالعه لا تخطين باب الغرفه.
_ عفتها تحجي وكمت جبت الفلوس
من الكنتور انطيتهيا .
سونه:ضميهن لاتشوفهن سليمه وخلي ابالج
راح تبقه تنبش لحد ماتعرف منو دخل للبيت
_وانه ابقه اكلها الزار .
سونه: خرب ابوج مالي خلك اضحك
بس خوش فكرة . وهاي فرصتنا .
_اشش لا تسمعنا .
سونه:من باجر اريدج مثل طشه
شفتيها بالمجلس .
_هههههه دروحي والله ولا اسويها.
سونه:ولج حته تكف منج
لحد مانشوف حل شخسرانه كل ماتشوفيها
اصرخي طكيها هههههه..اخ يمه صفحتي
كومي جيبيلي ماي خل اشرب علاجي
_عفتها تضحك وطلعت. سليمه مالها صوت
دخلت للمطبخ اخذت ماي ورجعت بعدني
ماعبرة الصاله وسمعت صوت نقالها وكفت
بفضول اريد اسمعها ويامن تحجي .
سلوم: وين جنت ماتكلي
عوف القنادر واسمعني خلصني من ام طيبه
وبدربك سوي لصوله جرت اذن كون شهر
ماتوكف عله رجليها ،
_فكيت حلكي مصدومه من كلامها
خفت تطلع وتشوفني ركضت لسونه كتلها.
سونه:اذن صوله الي تتواصل ويه ابو حيه.
روحي اسمعيها بلكي تعرفين ويامن تحجي.
_يجوز ويه محابس.
سونه:لا مو هو.واذا طلع شكي
بمحلة معناها كارثه.
_يعني شنو ؟
سونه:بعدين افهمج اركضي اسمعيها.
_طلعت امشي على اطراف اصابعي.
وكفت يم الباب . بعدها تسولف بالنقال.
سليمه:لا لا خليها الاسبوع الجاي
لحد مااخلص من ام طيبه. حاول تلهي محابس .
_ سوالفها خلتني اتلفت.
سليمه:لا مارهمت بس
شاكه اكو شخص داخل البيت.لازم اعرف منو.
اتاكدلي من بيت فاروق اذا ابنهم طلع لو واحد
منهم جاي . صدك نسيت اكلك اعتقد الجماعه
جاي يشتغلون من ورانا غط زاغور النصافات
شوف شجاي يصير . ههههه
_نهت مكالمتها بضحكه
ركضت لسونه حجيت الها السمعته.
ضلت تصفن ،معوده شبيج
انخطف لونج لاتخوفيني.
سونه:شلون ماكشفتها كل هاي الفترة
تدرين من انكتل جويسم ، الضابط شك بسليمه
تشتغل بالممنوع بس انه كتله لا ،اذن لحد مانطلع منا
اريد عقلج يطير فاهمتني .
_اي بس هيه مو غبيه لهذا الحد
اكيد راح تكشفني ،
سونه:بلكي قبل ماتكشفج احنه مدبرين امرنا
لو جايتها مصيبه ومخلصتنا منها .
_حاولي تقنعين الباشا يخليلنا مكان ،
سونه:قدر لا الباشا ولاغيرة
احنه نطلع ومانترك ورانا اثر. لايغرج كلام ابو حيه.
_نزلن دموعي عله وضعنا وقلة حيلتنا
مانكدر نثق بشخص ،من الخوف تمددت يمها
حته نومنا صار قلق ،صبحت سليمه تصيح .
سليمه:دكتورات بنات راضي
خاف تردني انه اسويلجن ريوك .
_ردت اكوم لزمتني سونه .
سونه:بيج زيران . واليل كله تعوين براسي.
_فكيت حلكي . تحجي بجديه
طلعت وخلتني اصفن ، استلمتها سلوم غلط.
سليمه:وجه الفكر عروس نايمه لهسه.
سونه:شوكت شفت النوم اليل كله قدر
تتكمز فوك راسي كتلني الخوف ساعه ترطن
مرة تغني اله صفناتها للشباك نشفت الدم بعروكي.
سليمه:عساها كون تلزم المكايد .
_ضلت تغلط وتصيح . كمت وانه احاول اتقن دور الجنون . طلعت للصاله التفتت عليه باوعتلي .وهزت ايدها كعدت كبالها ، لمت رجليها صعدتهن للقنفه
وهيه تحاول ماتبين خوفها ضليت مشخصه نضراتي
عليها شمرت الكوشه بوجهي وهيه تكوم.
سليمه: بت الصخل شبيج مخنزرة بوجهي
كومي انعل ابوج لابو رسج .
_دنكت ادور شي اطكني بي
اجت سونه جرتني من يمها .ضليت اصيح مسويه روحي فاقده العقل ،طلعوني منا ودوني للمجلس .
سليمه:اي روحي خل تلتم عليج العبيد .
سونه:معوده دعوفيها ماتشوفين وضعها.
_هجمت عله سونه تكفخ بيها
وردت عليه اخذت الها مني كم طكه عافتنا
ودخلت لغرفتها ،اندك الباب حيل طلعت سليمه تركض،شويه ودخلت هيه وطشه ضلينه انه وسونه وحده تباوع بوجه الثانيه احس بطني مغصتني وطشه تباوعلي بشك دفعتني سونه للغرفه وردت عليهن .
سونه:خير طشه منورتنا اليوم.
سليمه:انه خابرتها خلي تشوف ام الشخاخ
شنو فلمها .
سونه: بركاتج شيخه طشه بس
لو تعالجين روحج اول مرة .
_ركضت للباب قفلته
من الخوف مافكرت بسونه بقت يمهن
رفعت البرده اباوع عليها واكفه بنصهن وتصيح.
سونه:جري لا تخليني اضحك عليج
فروخ الصعده ،
سليمه:ولج خل تشوفها ترى ادوس عله راسج
مالي خلك سوالفجن البيه مكفيني .
طشه:اذا ماتلا حكناها تتازم حالتها وبعد ماتتعالج
وتوقعي يجي يوم تخنكج وانتي نايمه
اذا متلبس بيها زار ازرك عدها استعداد تكتل بشر.
سونه:اي بلكي تكتلج وتخلصنا من شرج.
_بسبب كلامهن شكيت بروحي ممسوسه
ضليت استغفر واقرء ايات بكلبي بقت سونه تحجي وهنه يردن .ماحسبنا حساب طشه العن من سليمه فاجئتنا وهيه توجها كلامها لسليمه.
طشه:اذن مابيها شي وهذا فلم .
مسوياته عليج.
_بحيث ضلت سونه تتلفت.هجمت عليها سليمه
شبعتها دك خفت اطلع ويكشفن امري بس ماكدرت
اعوفها بيد سليمه طلعت ركض اتفاجئن بتصرفي
هجمت عله طشه خنكتها ومدري منين الفت هل كلام الي مااعرف شنو معنا سوووز موووز موتتتت موت
ضليت اصيح كوى جرني منها .طلعت تركض
التفتت عله سليمه جريتها من شعرها.
سليمه:بت التالف ام الشخاخ
شو دتعاي خل اريد اطيبج عله عيب.
_صارت سونه بينا مثل الطوبه
كسرت خاطري لازمه صفحتها وتجرر بيه.
سونه:كافي كافي ولج راح اموت صفحتي.
_دخلتني للغرفه وسليمه كلبت الدنيا تصيح
كعدت مهدود حيلي ودموعي تصب.
سونه:شبيها الدنيا ويانه ليش معاديتنا .
_احس كل مانحاول نطلع تغركنا اكثر.
شنسوي . بهاي الورطه .
سونه؛نحاول نخليها تصدك
بعد لاتفكرين نطلع منا خل انفكر شلون
نتخلص منها .وين تلفوني
_المن تخابرين.
سونه:لمديحه .ولا تسالين .
_ شمرت النقال عليها وانه احجي
بعدج ماتبتي منها.
سونه:هيه الي راح تخلي سلوم تصدك
بيج زار.اش سكتي جاي يدك.
_ضليت ساكته وهيه تحجي ويه مديحه.
وتشرحلها حالتي سوتني اشكك بهدومي .
سونه:شوفيلي منو بالصعده عنده مجلس باجر.
ها خوش بس كون انتي وصوله تجن وياي
خاف تتخربط عاد تساعدني عليها تمام ..
_نهت مكالمتها وكامت تمددت بفراشها
ردت اسالها حجت بتعب.
سونه:خليني اغمض ساعه لان راسي موتني.
_خلص اليوم خوف تفكير قلق
ثاني يوم . كعدتني سونه .
سونه:كومي لبسي صايتج بسرعه .
_وين نروح.
سونه:بعدين افهمج تتصرفين حسب الموقف
وكلامي فاهمتني .
_هزيت راسي اي
لبسنا صاياتنا و طلعنا لكيناها كاعده
بالصاله باوعت علينا من فوك ليجوى.
سليمه:خير وين موليات.
سونه:مديحه خابرتني
تكول اليوم ينصبون طشه ماما للمكيد
بلكي يشوفون شنو علتها.
_هزت ايدها سليمه بااستهزاء
طلعنه والخوف واضح بوجهنا تمشينه لصوله
الي حاطه جدر الباكله وكل شويه فاتحه القبق
وخايطته سلمت عليها سونه وجرتني مكعدتني كبالها.
سونه:شو مبسطه شنو ما ترحين وياي.
_حطت الكمجه فوك الجدر
وهيه تباوعلي بشك.
درت وجهي متهربه من نضراتها
صوله:بعدهم مابدو .
دخل اصبلجن باكله عله ماتجي مديحه.
_التفتت لسونه الي ادنت لصوله
تحجي وياها بصوت ناصي.
سونه:عوفي الباكله للذبان وسمعيني زين
سلوم علستج ولا تفكين عيونج وتغشمين
روحج ترى مايخفه عليه شي ادري انتي الي
سلمتي المفتاح لابو حيه . ها هسه شتكولين.
_ضلت صوله تتلفت ،
وسونه ماانطتها مجال تحجي.
سونه:واعرف ماكاسرة خاطرج قدر
بس اكيد اكو شي منعج تنطين المفتاح لفيلق.
صوله:زين ماعرفتي ياهو الي دفعته عليه.
_هزت راسها سونه لا.
صوله:سهله اله اخلي النصافات
يدفننها بالخرابه.،ماتنضف اميلت ام طيبه انه الها.
سونه:هيه هاي الي اريد اعرفها
شنو الي لازمته ام طيبه عله سلوم . ليش ماتخلين ايدج بأيدي ونقضي عليها ونخلص.
صوله:كومي بت الكلب عود مسويه روحج
لوتيه روحي اسالي الباشا اكيد يعرف جا
ام طيبه ماتضم عن اميلها شي .
سونه:وهاي انتي كلتيها الباشا اميل
ام طيبه خو ماينطي بيها.
_قطع حديثهن صوت مديحه.
مديحه:ها نمشي لو بعد وكت.
_كامت سونه وصوله
شالت جدرها خلته بصف الحايطه
تقربت مديحه تباوسني وهيه تهز بحاوجبها
دفعتها استغربت تصرفي . التفتت عله سونه.
مديحه:عود صدك ؟
سونه:يعني هاي بيها شقه .
مديحه:لا بس عبالي فلم .
_جرتني سونه وهيه ترد عله مديحه بزعل
مشينا وصوله ورانا
سونه:وشنو فايده هيح فلم .
مديحه:اووو هسه شبيج زعلتي
دوكفي معوده اذا هيج المن ماخذتها لطشه.
سونه:غير عدها جلسه .
مديحه:شبيج جلسة ينصبونها ماما
ماراح نستفاد شي .
سونه:معوده بلكي البابا غيرة يشوفها.
_وصلنه لبيت طشه ونفس الوجوه الي شفتها بالطقوس السابقه بس الي لفت انتباهي السفرة الممدوده اباوع
مامخلين شي من اكل و الفواكه باانواعها المنضر جوعني ادنيت عله سونه كتلها همزين حته ناكل وفاجئني ردها.
سونه:مو النا محد ياكل منه .
انتجي عليه معوده لايحسون بينا.
_سندت راسي عله كتفها
احس عقلي وكف ،يعني من كل عقلهم مقتنعين
بلي يسوو ، اباوع للبابا والماما الي متوسطين المكان
دخلت طشه ملبسينها ابيض انوب صاير شلكها مرعب
كلمات مامفهومه والكل بحالة ترقب وانضارهم موجهه
بزاويه وعبالك ينضرون لشخص حاضر موجود
والمصيبه البابا الي يخاطبه وكأنو يرد عليه
البابا: هل انت قابل على ماقدمته لك طشه
هل يكفيك الموجود .
_ضليت فاكه حلكي ،لا لا مستحيل
لو اعرف انتحر ماابقه بهذا الشارع
نزلت دموعي بغزارة ،وبسبب الخوف والحيرة
والقلق الي بعيون سونه مااعرف شتصرف
تشتت تركيزي حاولت سونه تهدئني.
سونه:معوده بس خل نطلع شبيج .
_دفعتها وصرخت بهستيريا
ايييي اييي هو قابل احجي واشار عله المكان
الي همه مركزين بي ضلت سونه تتلفت
توجهت انضار الكل عليه،، كام البابا
وهو ينطق بكلمات تقشعر البدن صابتني
حالة رعب خوف رهبه هذا اخر شي اذكره
وفقدت ،شكد مر وقت ماادري فكيت عيني
اتفحص المكان عبالي بعدني بيت نوشه
ركزت احس كلبي انعصر وانه اشوف
سونه مخليه راسها بين رجليها وتناشغ
صحت عليها بصوت واهن فزت تباوعلي
بخوف وحذر ودموعها تصب اشرتها تعاي
سونه:كله مني كله مني.
_ خرب شنو هو الكله منج شبيج
فكت حلها بصدمه . التفتت للباب
ورجعت تباوعلي.
سونه:يعني شنو ولج بس طمنيني.
_مابيه شي لاتخافين.شبكتني تبوس بيه.
سونه:ليش سويتي هيج ولج ورطينا
وطلعتنا صارت صعبه ،تبقين مثل ماانتي
لحد ماشوفلي حل .
_الي فهمته من كلامها بسبب الصار
انو اصحاب هاي الطقوس اعتبروني
شي خاص بيهم ،احس نفسي بداومه
ومستحيل اطلع منها. ايام وليالي واحنه محتارين
تعبت وانه امثل الجنون الى متى ابقه هيج نضرات سليمه مشخصه عليه .وانه اكثر شخص يعرف هاي النضرة شجاي اتخطط شنو ابالها ضليت خازرتها
انتبهت عليه سونه كامت وهيه اجرني .دخلنا للغرفه.
سونه:معوده شبيج صافنه بوجها .
_جاي اتخطط لشيء .
سونه:هيه قربت النهايه لو كلنا للهاويه
لو نخلص من شرها ونعيش .
_معوده خلي اخابر ابو حيه بلكي يطلع شريف.
سونه:حته انه فكرت مثلج وطلبت من الباشا
بس فاجئني شلون منصاع لسليمه لو تطلب منه
يدوس عليه مايتردد بس شراح اسوي بي.
_وصارت حياتنا جحيم نخلص اليل
بجي لحد مانغفه. فزيت اتلفت معقوله
ايي هيه شفتها ليش ليش هيج بسرعه خلص الحلم
غمضت عيوني وانه اتوسل بربي ارجع لنفس الطيف
التفتت عله سونه الي تون عبالي كاعده لزمت ايدها فزت وحالها مو افضل من حالي تباوع وعبالك ادور شي. هزيتها شبيج معوده .
سونه:امي شفت امي بالحلم تدرين صار شكد
من ماتت ماحلمانه بيها.بس اليوم .
_صفنت شنو هل صدفه ولج حته انه هم
جنت احلم وهم شفت امي بس ماحاجتني،
عدلت كعدتها وباوعتلي بخوف .
سونه:معقوله شنو الي راح يصير ؟
_بلكي نموت بلكي اجن ياخذنا وياهن.
يجوز حسن بينا بخطر ويجوز رب العالمين
حاسبهن علينا لان ضلمنا عافنا لوحدنا
شبكتني سونه .
سونه:اششش لا تسمعنا نطلع منا نطلع.
_حسيت بيها متألمه كمت جبت علاجها
سونه:خرب البطل فارغ.
_طعلت اجيبلها ماي
وكف الدم بعروكي ، من سمعت صوت رجال.
بغرفه سليمه ضليت واكفه صوتهم واضح.
!!وشنو اليضمن ماتلعبين بذيلج.
سليمه:حته اثبتلك حسن نيتي
راح اخلي النصافات يفرغون المخزن
وحول بضاعتك بي.
!!بشرط التسليم يكون يمج
وهيج اضمن ماتعلسينا.
سليمه:تعجبني .
!!اعرف بس انه عاجبتني بت راضي .
سليمه:كتلك الك بس خلصني .
_رجعت بخطوات خذره سديت الباب عله كيف
حته مايحسون بينا كاعدين كل هذا وسونه
تباوعلي اشرتلها كومي وتوجهت للشباك.
سونه:شكو وين الماي.
_رفعت البرده وانه احاول ماثير صوت
ادنت تباوع وياي شويه وطلعت سليمه تتلفت
اشرتله طلع واحد ضخم ملثم مامبين منه شي
جرتني سونه بملل .
سونه:وكفتي كلبي عبالي مدري شكو ترى
عادي هيه يوميه ويا واحد.
_ولج ياواحد . دسمعي الحديث الدار بينهم.
سونه:شنو.
_انه احجي وهيه اتعصر بااديها
شويه ، ونسمع صوت محابس كمنا
نباوع هجم عله سليمه شبعها دك.
محابس: وين تردين تودينا سلوووم
شعدج ويا الموس .
_مجرد مانطق هل كلمه شهكت سونه
هزيت راسي شنو . اشرت اسكتي وادنت للشباك.
سليمه:ماعدي شي ويا بس مليت من ام طيبه وتهديدها كتله خلصني منها .
محابس:خو اخلصي من الباشا عوفنه جلبتن
بي انتي وسونه كلت الزلم .
_جرتني سونه .وهمه ضلو يتصايحون
تمددت وجرتي بصفها والخوف واضح بعيونها
دموعنا تنزل بدون صوت سحبت نقالها باوعت
لساعه سالتها ها بيش الساعه.
سونه:ب٥ . شتكولين كاعد لو نايم.
_منو هو .
سونه:الباشا .
_مافهمت .
سونه:ماعندي غير حل .
_حجتها وهيه ترسل مسج.
شويه واهتز نقالها فتحت خط تحجي بهمس.
سونه:بعدك مشتاق لصوتي .
_ومبين رده الها نهت مكالمتها وجرت الغطه لراسها
لحد ماطلعت الشمس وصارت حركه بالشارع يله
فتحنا باب الغرفه . لليل واجه الباشا الي يباوع
لسونه وهيه تركص عله جروحها وحزنها . ومااعرف شنو جان ابالها من خلته يجي يوميه لحد ما هدت علينا ام طيبه. ولعبت لعب بسليمه .
ام طيبه:اذا مابجيتج دم شلج بيه.
سليمه:قبل لا تفكرين حفريلج كبر
خاف تبقه جذتج تنهشها الجلاب.
_طلعت ام طيبه وهيه تهدد
ولو ندري السر الي لازمته هيج راح يطشرنا
جان احنه احتفظنا بي، بليله ويوم وكأنو النهايات مستعجله فزيت عله صوت سليمه تصيح.
سليمه:وينك موكتلك خلصني منها
سوتها ام طيبه ولك شوفلي حل
اذا اطلب الامر احرك الصعده.
_كامت سونه تفرك بعيونها فتحت الباب
لحكتها اريد اشوف شصاير وعبالك جانت
منتضرتنا مالحكنا نشرد جرت سونه واستلمتها
دك كوى دفعتها منها.
سليمه:ارتاحيتي بت نجيه .
سونه:شكو غير افتهم .
_بعدها سليمه ماراده والشارع انخبص
بصوت الرمي جرتني سونه للغرفه .
ولج خل نعرف شصاير
سونه:اكيد سلمت الصعده للموس
بس ليش شنو المقابل . اي ام طيبه
ماكو غيرها يمكن كشفت اوراق سليمه.
_عود هسه انتي فهمتيني
ولج ياموس وهاي فلشت البيت ماتسمعين
ركضنا للشباك انباوع الها تفتر مثل المجنونه
شيجي اكبالها ترفسه اخر شي ركضت عله
البلازمه شالتها وركعتها بالكاع .
سونه:نقالي ولج بس ناوشيني نقالي.
_ومن كثر ما متلوهين هو كبالنا ومانشوفه
لحد مالكيته روحي طلعت بسرعه خذته سونه
واتصلت بالباشا .
سونه:لا مو وكتك ليش ليش مغلق.
_عفتها تحاول وركضت للكنتور
طلعت الفلوس ادور الرقم مال ابو حيه
سحبت النقال منها وسجلت الرقم ومن اول
دكه جاوب.
ابو حيه:قدر.
_ تفاجئت شلون عرفني.ضليت ساكته.
ابوحيه:ها يابه اسمعيني.
_اي اي اسمعك الله يخليك تعال الحكنا
انه واختي لان سليمه راح تهجم البيت علينا.
ابو حيه:لا تخافين قريب عليكم
دقايق واوصل .
_هو يحجي وسليمه فلشت باب الغرفه
ادك بكل قوتها من خوفي شمرت النقال
وركضت شبكت سونه.
سونه:شكلج .
_راح يوصل بس شلون يطلعنا.
سونه:لو بس اعرف شصاير.
_خابري مديحه اكيد هيه تعرف.
عبالك نبهتها دفعتني وشالت النقال
وشكد دكت يله جاوبتها.
مديحه:ارتاحين هجمتن الشارع انتي وسلوم.
سونه:ولج شكو . فهميني .
مديحه:الموس والشرطه صارت مذابح.
_سدته وكعدت اديها عله راسها.
معوده بس فهميني الموس شنو.
سونه:انكس واخطر والعن شخص بالصعده
تاجر بكل ممنوع خطف قتل تجارة اعضاء
بس هم مو هذا الي مخلي سليمه متخبله.
_قطع حديثنا صوت باب البيت وكفت
بالشباك اباوع راحت سليمه تشوف منو
احس رد الدم بوجهي من سمعت صوته
وهو يوجه كلامه لسليمه بصيغت امر
ابو حيه:دزني عليكم الخال .
سليمه: بس خل افهمك.
_مانطاها مجال تحجي التفت لباب الصاله
استغربت من اشر ودخلو ثنين بعمرة
لابسين عسكري تقدمو عله سليمه لزموها.
سليمه:بس البس صايتي.
_هز راسه ابو حيه بتمام وتوجهه علينا.
ابو حيه:وينكم يابه افتحو الباب.
_كل هذا وانه وسونه مامفتهمين شي
بسرعه لبسنا صاياتنا وطلعنا اشرلهم
يطلعون سليمه جروها والتفت علينا.
ابو حيه:لا تخافون يابه .يله نتوكل.
سونه:وين ماخذينا .
ابو حيه:نوصل وتفتهمين كل شيء.
يله هذا الباب شلون تقفلونه .
سونه:بس اطبكه حيل .
_نمشي وعيون اهل الصعده علينا
صعدنا بالسيارة التفتت عله سونه
جا سليمه وين . جابوني بهدوء.
ابو حيه:راحت بسيارة الولد .
_حجها وحرك . اباوع للشوارع
بشرود سونه صافنه ادنيت عليها
ولج وين ماخذينا .
سونه:للمزرعه بس ليش ماادري .
_لحد ماوصلنه المزرعه الف فكرة
اجت ابالي .دك هورن فتحوله الباب
اباوع شنو هل مكان الفخم . بعدنا مانازلين
وطبكت سيارة بصفنا نزلت منها سليمه
وام طيبه. التفتت عله سونه لزمت ايدها بخوف
نزلنا وحده تحتمي بالثانيه . ماكدرت اسيطر عله شهكتي بجيت من شفتهم شلون جرو سليمه وام طيبه.
ابو حيه:تعالو يابه لاتخافون ترى الشغله مو يمكم
سونه:الباشا وين ليش جهازه مغلق.
ابو حيه:بالدوام لاتخافون اعتبروني
بدال الباشا يله دخلو.
_بساعتها تمنيت من رب العالمين
معجزة اشوف امي بيها واعاتبها عله كل الي جاي يصير. دخلنه قاعه جبيرة بيها اكثر من تخم هدوء مرعب بحيث ماينسمع بس صوت احذيتهم رفعت راسي للشخص الي نزل الدرج برزانه يطلع عمرة بكد فاروق او اكبر بس شخصيته تخوف رغم شكله الرجولي وهيبته كام ابو حيه حظنه تقدمن سليمه وام طيبه عليه وكفو الحرس مانعيهن كعد واشرلنا نكعد . كعدنا وحده بصف الثانيه سالت سونه بصوت ناصي منو هذا.
سونه:الخال .
_عينه لسونه يباوعلها بتركيز.
كمزت من حجه. موجهه كلامه لسليمه.
الخال:اول شي بس كليلي الي وصلني صدك.
_ضلت تتلفت . سبقتها ام طيبه بالرد
ام طيبه:اي صدك .
الخال:غردي اميلت سلوم بتفصيل
ماريد تضمين حرف .
_جنت اباوع للمسلسلات واكول
مستحيل اكو هيج بالواقع. بدت ام طيبه تسولف.
ام طيبه:من كلت لحراير نزلي الطفل
اجني هيه وسليمه اخذتهن للجده
واحنه ناوين تذبه.
الخال:وليش تراجعت.
ام طيبه: كالتلهن الجده اكو ناس يردولهم طفل
وكالو شكد ماطلبون ندفع ،ليش ماتخلينه ومن
اتجيبين بيعي الهم .
الخال:واكيد سلوم ماضيعت فرصه
وقنعت حراير.
ام طيبه:بوقتها حراير خافت يوصلك خبر
كالتلها سليمه معليج انه ارتبها وره اسبوع
زوجتها لحاتم الطبال .
الخال:وحاتم يعرف بيها حامل.
ام طيبه:اي اتفقن ويا ينطنه نص الفلوس
لحد ماجابت حراير استعزت بي وماقبلت تبيعه
ضل حاتم يضغط عليها شبعها كتل وهيه نفسه
تمرضت وماتت . وبعد فترة حاتم كال لسليمه
وينهم الناس الرادو خل انبيعه .
الخال:واكيد سلوم . رادت تنتقم من حاتم
ماباعته وضيعت الناس .
_احس عقلي شخط هذا شلون هيج يعرف بقيه الموضوع اريد بس يوصلون للزبده منو الطفل وينه
ادنيت لسونه الي دموعها تصب وهيه تستمعلهن بتركيز دغيتها بأايدي التفت عليه ونضرات القهر وحزن الدنيا بعيونها ماكدرت اسالها.دنكت بخوف وام طيبه مستمرة
ام طيبه:اي ضلت طلع اعذار
مرة تكله مسافرين اخر شي اتفقت ويا
يخلي عنده وتدفعله فلوس . تعرف عواطف
اخت حاتم تعلقت بطفل كبر سنه عله سنه
لحد ما صارت المشكله .
الخال:وسبب المشكله سلوم .
ام طيبه:مااعرف بس الي سمعته
من عواطف بيومها كالت
حاتم وصاحبه سهراني بيتهم.كايم صاحبه
بحجت الحمام .
_التفتت عله سونه بصدمه .
سونه:محابس .
_مااعرف من الصدمه خوفي
لو من صوت الخال الي هز المكان
ماحسيت من ادررت عله نفسي.
الخال:احجييييي كملي .
ام طيبه:هيه ومحابس نايمين بالغرفه
تكول ماحسيت اله واحد جفت علينا .
_سكتت
من كام الخال وهو يتلفت بحيرة وخوف .
الخال:كملي كملي . اعتده عليه.
ام طيبه:لا لا هو مجلب بعواطف
ضاله تصرخ فاز محابس محاول يخلصها من ايده
ماكادر اخر شي راكض مكعد حاتم ضال يدافع ويا
صاحبه هو من شايف حاتم ماكادر
راكض لساحة الحوش جايبله طابوكه
عواطف مالحكت تلزمه طك الرجال خله
دمه بطوله.
_همه يحجون وانه ابجي وكل ضنهم ابجي عله الموضوع كله ماهمني بس حايرة شلون اكوم
وملابسي ناكعه . وكل ماارفع راسي الكه ابو حيه
يباوعلي . حاولت انبهه سونه التفتت عليه حجيت بصوت ناصي ااانه غصيت بلكلمه .فهمت وضعي .
سونه:لا تهتمين اششش هسه انه اتصرف.
ضلت لازمه ايدي وام طيبه مستمرة تحجي.
_بس الضاهر ماهامه الطكه
بحيث بساعتها شايل الطابوكه وراكع حاتم بيها
عواطف تكول من طاح حاتم عرفت مات
راد صاحبه يشرد جلبت بي ومكاون مرة يطكها
ومرة اطكه لحد ما محابس مناوشها حديده
تكول هبدته بيها. وقبل مايطلع النهار مخابرة عله
سليمه مبلغتها عاد جابتهم للصعده.
_كام الخال متوجه لسليمه.
الخال:شنو من بشر انتي شنو هل اجرام البيج
ولج سنين وهو يركض من مكان لمكان والحكومه
تفتر عليه تشوفينه يتحسر عله نومت اليل
ماكسر خاطرج زين ليش ليش ماكتيلي .
_هجم عليها فلشها تفلش
ضلينه انه وسونه نتراجف،وهذا ابو حيه ولا حاول يلزمه عبالك يريده يفوخ كلبه بيهن عاف سليمه
ورد عله ام طيبه ضلت تزحف تريد بس شي تحتمي بي مو موقف ماانساه طول عمري. كام ابو حيه
جره كعد بتعب .
الخال:منو يعرف غيرج .
سليمه:محد محد .
ام طيبه:لا مديحه تعرف.
_الله يساعد كلبج سونه
ضلت تتلفت بحيرة . صاحت سليمه.
سليمه:لا وروح امي ماتدري .
ام طيبه:انه كتلها .
الخال:شوكت كتيلها.وهو وصله خبر لولا
ام طيبه:اليوم بس مااعرف اذا لحكت
تحجي لمحابس لو لا .لان كالت طلع من
الصعده وجهازة مغلق .
_تعب قهر خوف ضلم
كلهن بوقت واحد شنتحمل
وشراح نواجه بعد اباوع لموقفنا الي يبجي
غربه مالنا احد ضالين بيدهم مثل العبه
التفت الخال لسونه .
الخال:خابري .
_وتفاجئت من صاح ابو حيه معترض
ابو حيه:لا.
الخال:مو وكت سوالفكم . خابري بسرعه.
_حجها وتوجه عله سونه كالها يله
ضلت حايرة بس وكفته وهو ينضرلها برجاء
يمكن لو ما خجلان من وجودنا جان بجه
رغم شكله وهيبته بس حسيته ضعيف طلعت نقالها
واديها ترجف دكت اكثر من مرة يله جاوب .فتحت خط اشرلها الخال تفتح صوت خلت النقال بصفها وحجت بعبرة .
سونه:وين انته .
_رد بضحكه واخ يارده الي كسرني اكثر منها
محابس:ههههههههه جنت متوقع تخابرين
سونه:اسمعني .
محابس:انتي اسمعيني اذا ابالج اجي اركض
وفرحان لان طلعلي اب ف مسحي بوزج .
سونه:خابرتك لخاطر العشرة البينه
وابوك الي طلب مني .بس لاتضن متوقعه منك خير،
محابس:ولج ياعشرة ، وانتي بعتيني .
كولي انته خوش صيده وافلوس ابوك اكثر
من افلوس الباشا.
_رفعت راسها للخال كتم الصوت
وكالها .
الخال:سايسي بس خل اندله
حاولي طولين الحديث بلكي نحدد مكانه.
_هزت راسها اي وردت عليه.
سونه:اشتريتك وكل السويته عله مود احميك
بعدت عنك لان خفت سليمه تلزمني بيك ، جنت عاذرتك ،بس ماردت يلزموك بيه ،
_مدنكه تحجي وتمسح بدموعها .
محابس:اسمعيني
نصيحه ابقي عله الباشا افضلج لان حته لو اتقبلت ابوي وراي سجن اقل شي انحكم ٢٠ سنه مافيدج .
_حجها وسد الخط
ولان مركزين بكلامه ماحسينا بالباشا
شوكت اجه لحد مانبهنا صوته التفتنا عليه كاعد عله القنفه وعيونه لسونه الي نصدمت بوجوده وبدون مايعير اهتمام للموضوع ولا عبالك صاير شي مد ايده لنقاله اتصل وفتح صوت رد الطرف الثاني بادب
كام ابو حيه متوجه عليه راد يسحب منه النقال رفض
ابو حيه :ولك احنه طلبنا منها تحجي ويا
وهيه قبل ماتتصل بيه مخابرتك وجهازك مغلق.
_ماجنه يسمع
رد موجه كلامه للشخص الي عله الخط .
الباشا:شيخ تذكرني
الشيخ:اي نعم نعم اذكر جنابك.
الباشا:تمام شيخنا انه اكتشفت زوجتي تخوني
وسمعتها بأاذني تحجي ويه عشيقها .
الشيخ:لا اله الا الله .
الباشا:فأاريد اطلكها .
الشيخ:الله يعوضك بالزوجه الصالحه.
الباشا:بس عدنه مشكله زغيرة.
الشيخ:وهيه .
الباشا:ابوها مسجون وامها متوفيه
وهيه قاصر فبهاي الحاله شلون يتم الطلاق .
الشيخ:استغفر الله العظيم. يعني
اذا هيه بهل وضع ليش خانت .
الباشا:بعد مو بيدها تعرف الساس نداس
والطبع الي بالبدن مايغيرة بس الجفن.
_ضلت سونه مدنكه وهو يحجي احس
كوى مسيطرة عله اعصابه يمكن
بس واحد يحاجي ينفجر ابو حيه ضل محتار
اخر شي الشيخ كاله يصير اذا هيه.موجوده هسه اطلكم كامت سونه وكفت كباله وحجت مسمعه اليشخ.
سونه:نعم انه موجوده .
_اباوع الها كوه واكفه كمل
الشيخ اجراء الطلاق. توجهت للخال حجت
ويا بصوت ناصي عرفت كالتله عليه كام
وهو يحجي
الخال: ابو حيه اخذ البنات وصلهن
وانته جيب هذن الزبايل وراي.
وقبل مايتحركون صاحت سونه .
سونه:لهنا وخلصنا ياخال .
الخال:الج اليرضيج.
سونه:ماريد شي بس خل
ولدك يكفون من عدنا.
الخال:اليوصلج اعدمه روحي واذا
سليمه اذتج خابريني. سجللها رقمي ابو حيه
وانطيهن مصرف .
_دنك الباشا عله ام طيبه كومها
وسليمه كامت وراهم .
سونه:يله كومي .
_طلعنه ودموعنا تصب صعدت بسيارة
وانه فشلانه طول الطريق سونه تناشغ
وصلنه لراس الشارع كالتله نزلنا هنا.
ابو حيه:دزيتلج رقم الخال .
عله تلفونج ،وهذا مصرف وكل كم يوم يوصلكم
_ماخلته يكمل .
سونه:مانريد منكم شي بس كفونا شركم.
_نزلنا نجر بذيال الفشل نمشي ونتلفت بخوف
العجيب النصافات ماجنهن يشوفنا . لحد ماوصلنه للباب احس بروحي انتهيت .بعدنا بعتبت الباب وهدت علينا ام دعدوش.
سونه:مو وكتج ابد .
ام دعدوش:هجمتن الشارع المن جايات.
سونه:لنعل ابوج لابو الشارع بت الكلب انه شعليه
كايلتكم بيعو حشيش لو جبت الموس ودخلت بينكم.
_جرتها تسحل بيها وتصيح بعلو صوتها
التمو الجيران كوى خلصوها من ايدها.
سونه:من اليوم حاضركم يبلغ غايبكم
الي يندك بيه اكتل خلاص ،تبيعون تبوكون
تكتلون مالي شغل بيكم وانتم مالكم شغل بيه.
علاسكم سليمه وام دعدوش وصوله .
_عافتهم يتصايحون عافتهم
ودفعت الباب دخلنه بسرعه قفلته
وحته باب الصاله هم طكته سركي .والتفتت عليه.
سونه:يله سبحي حته اسبح وراج
_تصرف طبيعي وكأنو مامهمته
خلصنا يومنا صفنات ماضغطت عليها ولا حجيت
نومنا صار مثل نوم الذيب عين مغمضه وعين مفتحه
صبحنا عله صوت الباب .راحت سونه تفتحه
لحكتها ومااشوف اله مديحه دخلت .تجاهلت سلامها
مديحه:يلوك ام الشخاخ تزعل .
سونه:عيدها وشوفي شلون ادوس راسج
شكو جايه شعدج.
مديحه:تحجين صدك.
سونه:اي ليش شنو متوقعه ابوسج براسج
وانتي عندج علم بكلشي وخابرتج تكليلي هجمتن الصعده تدرين شكد جنت مغشوشه بيج .
مديحه:هو ماقبل اكلج .
سونه:انتي وهو ماحطكم برجلي
انكلعي منا وتنسين جان بينا زاد وملح.
_طلعت مديحه تتلفت
كم يوم.واجت سليمه والضاهر مكتوله كتله معدله
بس العجيب ماحاجتنا . ضل الوضع مثل ماهو لا محابس بين ولا الباشا اتصل ولا عرفنا شصار
وضع الشارع صار يخوف بدخول الموس عله كولتهم
وبين يوم ويوم الحكومه تدخل علينا نحسب الدقايق
لحته نوصل لعمرنا القانوني . تعبت سونه حيل والمرض
اخذ من حيلها الفلوس العدنه مابقه منها اله شي قليل
سونه:اطلع ويه الفرقه.
_هم رجعنا للفرقه.
سونه؛اامن من الشارع والجداوى شنسوي
ماعدنا غير حل نتحمل لحد ما تفرج .
_شتفرج واحنه ضايعين .
سونه:بعد شهرين وتقبطين ال١٨ بنفس اليوم اخذج نشتكي عله ابوي وبيت فاروق هذا املنا الوحيد.
بس لازم اشتريلج شريحه كومي نزلي النقال الفوك الكنتور شحني بين ماارجع .
_لحد مارجعت انه ادعي يارب محد يتعرضلها
ركبنا الشريحه وسجلنا ارقامنا لبعض
سونه:سكوت سلوم مخوفني.
_الله يحمينا ويكفينا شرها.
سونه:صدك اذكرت بله شوفي رقم الضابط
الجنت اتواصل ويا بلكي محفوظ بالنقال .
_رديت عليها وانه ابحث بالارقام
شلج بي . اي هذا .
سونه:خاف انه طالعه ويصير شي
خابري لان هو يوصلج قلبي .
_ليش تحجي وكأنو متاكد راح يصير شي.
سونه:لان اعرف سليمه .
_جا لاطلعين
سونه:لازم نبين الهم ماعدنا شي وياهم
بطلعتي اضرب الفرقه عصفورين بحجر
اول شي.اذا حاولت تأذينا راح يوكفون بوجها
وثانيه شي اريدها تأمن.
_وبدت سونه تطلع وسليمه رجعت لكعداتها
بس الغريب .تحجي بالنقال
متجاهله وجودي او تحاول تسمعني اجت سونه وسولفت الها .
سونه:متاكده .
_اي وروح امي حته اكدت عليه انو التسليم
بالتسعه يم الكراج .
سونه:شكي بمحله تريد تورطنا
تعرف عدي تواصل بالمركز .
_مافهمت.
سونه:كل تسليم ماكو . بس كولي اتفقت ويه ام دعدوش تصفينا . واكيد تريد تثبتلهم احنه نعلس بيهم.
_والحل .
سونه:ننطيها عله مايها وجنا مانعرف.
_شيخلص هل شهر . وهيج مر اسبوع
وبيوم سونه عدها حفله . جهزت نفسها وقبل ماتطلع
جريتها حظنتها وعبالك كلبي جان يعلم هاي اخر مرة اشوفها .
سونه:خلي نقال يم راسج خاف تغفين
وماتسمعينه ترى كل شويه اخابرج.
_ماانام لحد ماتجين.طلعت وهيه تضحك
مر اكثر من ساعه وصلني منها مسج
سونه:نامي لايضل بالج ترى اتاخر للفجر
_كتبتلها ليش .
سونه:لحد الان بعدها الحفله ماباديه.
_خوش. كتبتها وتمددت
بين الغافيه والصاحيه . حسيت عله حركه
بالبيت كلت يمكن سلوم طلعت للحمام . شويه
وهم سمعت صوت تبسبس كمت بحذر رفعت طرف البرده اباوع ولد ثنين بيدهم كواني مامبين شنو بيها
اشرتلهم سليمه دخلونهن بغرفتها . وراحو ضليت واكفه
فكيت حلكي من دخلن مديحه وام دعدوش وصوله
بيدهن صناديك يربي هذول شينكلون.
صوله:ها وين نحطهن .
_بسرعه كفختها سليمه منبهتها عله صوتها
وهيه تاشر لغرفتنا التفن يباوعن .
سليمه:دخلنهن جوه.
_حجتها وتوجهت للطارمه شالن الصناديك لغرفتها
انخمش كلبي من شفت الشخص الي يسومنه الموس
دخل نزلت البرده ومشيت عله اطراف اصابعي اخذت النقال وصرت بصف الكنتور دكيت عله سونه ماردت
كررت الاتصال ماكو باوعت للساعه ب٢ معقوله لحد الان ماخلصت الحفله ضليت حايرة ماكو غير حل
بحثت عله رقم الضابط وانطيته اتصال اول دكه رد
حجيت بصوت ناصي اانه انه اخت سونه.
الضابط:اي اي اعرفج هاخو ماكو شي.
_اكو ناس بيتنا يدخلون صناديك .وسونه طالعه
دكيت عليها ماردت وانه خايفه لان الموس هنا.
!اششش اخذي نفس لاتخافين
اسمعيني بسرعه سوي النقال صامت .
_سديته ودخلت عله اعدادات الصوت
انطيته صامت. بعدني ماداكه هو اتصل
فتحت خط .
الضابط:خو مادزيتي رساله لاختج .
_اي مو هيه راسلتني كالت نامي .
الضابط:اقصد هسه خو مادزيتي شي .
_لا بس ليش .
الضابط:انتبهي لايسمعوج راح اراسلج افضل.
_سده وبعد ثواني اشتعل ضوى النقال يعلن عن وصول رساله فتحتها .كاتبلي.
الضابط:لا تثيرين انتباهم ابقي هادئه
ولا تتصلين بااختج ولا دزين رساله
خاف نقالها بيد واحد من الفرقه وينكشف امرج .
_رديت عليه جا شسوي . هذا الموس هنا وهو قبل فترة اتفق ويه سليمه تطيني اله.
الضابط:لا تخافين بس اتاكدي منهم بعدهم لو طلعو
_ومن خوفي مدري غباء عبالك يشوفني
هزيت راسي اي وكمت اباوع محد بالصاله
رديت كتبتله ماكو احد بالصاله.
الضابط:تمام خليج بمكانج ابد لا تتحركين
لو يفلشون الباب عليج سوي روحج ميته
لحد مانوصلج .
_خوش خوش بس الله يخليك لا تتاخر.
قراها ومارد بعد ضليت حاشرة روحي بصف الكنتور
سمعت صوت سليمه تحجي عبالي هيه والموس كمت اباوع يا تحجي بالنقال.
سليمه:عيوني ونضرها . ههههههه
جنت متاكده تتصل .مو تدلل باجر الك احله سهرة
_ماعرف المتصل شنو راد منها كعدت
عل قنفه وردت بحيرة .
سليمه:لا لا بس عندي ضيوف ها تمام لعد
نص ساعه واكون يمك تمام .
_نهت مكالمتها ودخلت غرفتها ورا دقايق
طلعت كاشخه والعطر يفوح . ضليت واكفه
عين لنقال وعين للصاله وينج ياسونه
ليش ماردت عليه . فززني من شرودي اهتزاز نقالي
باوعت للرقم الضابط فتحت خط .
الضابط:وين انتي .
_بغرفتنا وسليمه طلعت .
الضابط:هسه اريدج ترحين لغرفتها تتاكدين اذا البضاعه
موجوده لو طلعتها.
_لا مااطلع من غرفتي اخاف يجوز الموس لابد .
الضابط:لج بابا ياموس شبيج يعني معقوله تخلي بالبيت وتطلع . لاضيعين الوقت استعجلي .
_لا لا مااكدر اخاف وبعدين
مو انته كلت راح اجي خو انته دور
الضابط:مو خاف كمين وهيج راح تكشفج.
_ضليت متردده .
الضابط:انه قريب عليكم بس
ماريد ادخل اذا مانتاكد .يله خلي الخط مفتوح.
_طلعت امشي واتلفت دفعت باب غرفتها
شغلت الضوى باوعت . ماكو شي دنكت جوى الجربايه
ولكاهن .
الضابط:ها بشري .
_هذن جوى الجربايه.
الضابط:بس اتاكدي شنو بداخل الصناديك.
_دنكت كوى حشرت روحي جريت الصندوك
طلعت مغلف بورق شكيت الغطه .
الضابط:ها شنو لكيتي .
_اكياس بيها ماده بيضه وشي
مثل التمر المعجون هيج لونه .
الضابط:عشتي عفيه بالبطله يله
جهزي نفسج جايج .
_ماانطاني مجال ارد سده ،شنو اجهز نفسي
كل عقله وين اروح . احس،مثانتي تريد تنفجر
استغليت الفرصه دخلت للحمام
وطلعت ركض للغرفه بعدني ماطابكه الباب
وسمعت طبه شلون واحد طفر التفت مالحكت
اقفل الباب جفتو ٣ ملثمين من خوفي وصدمتي
ضليت اصرخ ركض عليه واحد منهم حاول يسد حلكي
الضابط:اششش اشبيج يابه هاي انه لا تخافين.
_حجاها ورفع الثام عن وجهه .
اشر للويا عله غرفة سليمه والتفت عليه.
الضابط:بسرعه ماعدنا وقت لازم اطلعج قبل
ماترجع سليمه .
_بعدت من يمه،وانه احجي لا مااطلع لحد ماتجي
سونه هاي انتم اخذو الصناديك وسجنون سليمه.
الضابط:لج بابا لا تاخرينا افهمي شنو الفائده
من البضاعه احنه نريد نلزمهم متلبسين فوجودج
خطر احتمال يصير بينا اشتباكات امشي الله يرضى عليج عود من نلزمهم ارجعج .
_وسونه مو خاف تجي ويصير بيها شي.
الضابط:لا لا خليت ناس تنتضرها براس الشارع.
لا تخافين عليها ثقي بيه يله عفيه لاتخارينا.
_زين خليني براس الشارع انتضرها ها مو احسن.
الضابط:تمام تمام بس فضيها.
_يحجي ويتلفت دك نقاله رد بقلق.
الضابط:لا لا بس نطلع ارمشلك
حاول تاخرها ١٠ دقايق
_سده والتفت عليه جرني .
الضابط:بسرعه وين عباتج يله
راح توصل سليمه .
_خردلني اباوع للكنتور وابوعله
دفعني وتقدم جر صايه شمرها عليه
وضل ينفش يدور حجاب طاحت الجداحه كباله
دنك عليها شالها وهو يباعلها بأاستغراب
مديت ايدي خذتها منه واذكرت الفلوس خذتهن
طلعنا نتختل صعدني بالسيارة . وصعد.
عبرنا الركن التفتت عليه باوعلي وداس بكل بسرعه صرخت اوكف وين ماخذني مو كلت اخليج تنتضرين اختج .احس معدتي كلبت من كد سرعته ماجنه
يسمعني حاولت افتح الباب مقفلهن وعبالك يعرف بشنو افكر مد ايده سحب النقال طفاه لحد ماوصلنه اباوع وين جابني هذا المكان مال ابو حيه .نزل ودار فتحلي الباب بعدت مااريد انزل جرني يسحل بيه
الضابط:يابه وحق الحق اجيب اختج بس اطيني مجال
مو راح تخربين كلشي كتلج لاتخافين انه غايتي حمايتكم .
_ماريد شي بس وديني لاختي بداعت كل عزيز عندك بداعت امك وابوك .
الضابط:وداعت ابوي وعرضي اجيبها دخلي
محد هنا ولا تخافين المكان مامن بكامرات .
_قطع حديثه صوت النقال رد .
الضابط:تم هاي هيه بالشركه بس اختها لحد الان مابينت اوك اوك يله انه راح ارجع للصعده .
_عافني وطلع ضليت افتر مثل المجنونه كعدت بقله حيله مرة ابجي ونوبه ادعي اللهي خجلانه منك اعرف المفروض مااطلب منك تحميها وهيه عاصيتك بس
وعد وعد ياربي بس ترجع ماخليها تطلع بعد
احس كلبي ضل يوجعني تعبت عيني للساعه وكل دقيقه تمر تاخذ حيلي لحد ما غفيت وانه كاعده
فزيت عله صوت الباشا الي هز الصاله .
الباشا:كتلك لا تدخل لحد ماترجع سونه لو لا
ولك تتجاهل كلامي ليش ليش .
_اباوع وكل ضني حلم لحد ما استوعبت وتذكرت الصار كمت مفزوعه التفتو عليه. الف بحجابي واحجي
ها ها وينها وين اختيييي مو حلفت تجيبها .
الضابط:ما لها اثر مارجعت للصعده.
_تقدمت عليه باوعلي متفاجئ
صحت اطيني نقالييي اخابرها .
الضابط:مغلق دكيت عليها من الصبح لحد
الان كل شويه اتصل ماكو .
_التفتت عله باشا وانه اشهك ودموعي تنزل بحركه
دنكت عله ايده ابوسها ابتعد وابو حيه جرني
صحت اذا عدكم خوات لخاطر خواتكم رجعولي اختي
انه ماعندي احد وين اروح دوروها الي .
ابو حيه:نلكاها مادام مارجعت اذن وصلها خبر
ويجوز تخاف اكيد ضمت روحها بفد مكان .
_وين تضم روحها . ماعدها احد .انه صوجي
خبرتكم حذرتني منكم بس ماعبالي الضابط وياكم .
الباشا:زين ماتعرفين مديحه وين ممكن تكون .
شلت راسي باوعتله وتوني يله انتبهت ايده مجبسه
وجهه بي اثار ، هزيت راسي لا مديحه ماعدها احد بس احتمال تروح لاهل امها كالت بالغجر كاعدين .
ابو حيه :يابه انطونه مجال بس ينفتح نقالها
نحدد موقعه .
_قطع حديثهم صوت هورن طلع ابو حيه
والباشا والضابط يداهرون التفتت بصدمه وانه
اشوف محابس والخال دخلو . كام الضابط تلكاهم
بس الباشا ماجنه يشوفهم تجاهل حته سلامهم مارده.
الخال:ها بشرو مابينت.
ابو حيه: لا ماكو .
_تقدم محابس عليه وهو يحجي
محابس: ماكلتلج وين الحفله الطالعه بيها.
_وقبل مارد طفر الباشا جرة
الباشا:ترى بعدك محابس، فاهمني طبعا
_صاح الخال .
الخال:اسعدددد.
_الفتت عليه . ورد برود .
الباشا:حاليا انه الباشا خال .
_كام ابو حيه دفع محابس وجر الباشا كعده يم الضابط
ابو حيه:ترى عيب تصرفاتكم .
الخال:راح اعديها واعذرك لان اعرف الي تمر بي.
الباشا:مو انه الي الضرف يخلي يتغاضه او يسمح لشخص يقلل من اسمي او مكانتي خال فهم
ابنك حدوده . امر ميخصه لا يدخل بي.
محابس: ليش مصر تغشم نفسك
لو ماتريد تقتنع انو هيه ماتريدك.
الباشا:والدليل عافتك .
محابس:اواعدك اول شخص راح تلتجئ اله هو انه
لادورون ولا تعبون نفسكم لان ماراح تندلون طريقها
انه اعرف شوكت تضهر سونه لابده بس تتاكد انو الحكومه مااخذت اختها راح تضهر ودور عليها .
_الخال وابو حيه والضابط هزو اديهم
والباشا يفور وده يلزم محابس يعلسه علس
ضحك مستهزء .
الباشا:تمام هاي كدام الموجودين اذا اتصلت بيك
لو انته لكيتها شرط عليه اله ازفها الك بيدي.
شكرا لزيارتكم عالم روايات سكيرهوم
