رواية جذبني فمك البني الفصل الواحد والثلاثون 31 بقلم عبير إدريس

ادهم

اباوعلك غفل واندار من تندار خاطر ماتكول بدوني مايكدر ...

سيلين

تعالو فراكم بين علينه

_____

الحاضر

المكان بغداد ( شقة سيلين )

ضليت كاعده بمكاني راسي راد ينفجر من كثر ما سألت نفسي ليش هو بغداد وايفين نكرت وليش من خابروه كال اني بالجنوب مو بغداد ، وين جان صارله شهر مختفي .....

مديت ايدي على ركبتي فركتها ضليت احك بشعري اريد الخدر البراسي يروح ، من اخذ حبوب منوم ما استفاد منها بس ينمل راسي واطراف رجلي....

الم صغير بالقلب كفيل باصابتي بمرض مزمن يشبه ضيق التنفس كمريض الربو كنيه للتشبيه ، هذا المريض لا يحتاج الى دليل او جهاز اختبار بأن تنفسه بدأ يضيق لدرجه الاختناق لكن شعور داخلي يزاحم الرئتين يجعله يطلق الانفاس مسرعتآ وتنتهي بنوبه مصحوبه بدقات قلب متعبه اشبه بالساعه الرمليه .....

كمت على كيفي علكت الضوه جانت ساعه اربعه ونص الفجر ،، رحت للحمام توضيت ورجعت فرشت سجادتي صليت وكعدت ادعي ربي يحنن كلبه عليه ويسامحني...

ضليت كاعده على السجاده الى ان صارت الساعه بالسته كمت حضرت ملابسي بدلت وكفت كبال المرايا حتى البس الشال واتفاجئ جايبلي قلم حمره لونه بني وياه عطر ، العطر اللي يحبه ودائما جان يجيبلي منه عطر برائحة العود ...

فرحت حسيت هاي بذره صلح بيني وبينه كلبي كام يدك سريع وصارت رجفه بكل انحاء جسمي ..

لزمت قلم الروج با اصابع ترجف وخطيت ثغري لاول مره بعد مرور سنه ونص على الفراق اخلي من هذا اللون لان تركت كلشي يشبها وكلشي يذكرني بيه ردت انساها ونسيت نفسي وما نسيته...

ارسم واتذكر موقف موقف اثر بيه وكلمه كلمه جان يهمسلي بيها منها..

ادهم : عيون ناعسه وشفتان ممتلئة لونها بني بطعم الكاكو يا من اذابت فؤادي من اثر عضات اسنانك لها وانتي تقرأين وتداعبين خصلات شعرك المتدلي على كتفيك الجميلتين ..

ملهمتني وفاتنتي وجميلتي عروستي احب كل ما فييك حتى ذالك العيب الخلقي الجميل بخدك الايسر عندما تبتسمين ...

سيلين : ممممممم اليوم كله كالب على الفصحى.

جان واكف ورايه حضني وهمس.

ادهم : الحمد لله على النعم اولها انتي واوسطها انتي واخرها انتي ..

سيلين : ههههه

ادهم : ضحكي بعد احب ضحكتج..

سيلين : ليش ..

التفتت عليه حاوطني بأيده توزعت نضراته على وجهي مرورا بشفتي ابتسم وكال..

ادهم : من تضحكين احسها تطلع من كل كلبج مابيها كذب ولا تصنع.

سيلين: شلون عرفت.

ادهم : من الغمازه التحفر خدج ههههه..

سيلين : خوش تركز شديد الملاحظه دكتور ادهم.

ادهم : ههههه لا مو على كل شي انتبه.

سيلين : لعد ؟

ادهم : اباوع على اليعجبني بس ...

باوعت على المرايا نزلت دموعي هسه وكتج مسحت عيني واخذت جنطتي وطلعت لاكيت ابو عبد رحت يمه..

سيلين : ها عمو صباح الخير.

ابوعبد : هلو بنتي شلونج احسن ان شاءالله.

سيلين : ليش شبيه ؟؟

ابو عبد : ماعرف البارحه اجتي قريبتج كالت دير بالك عليها شويه مريضه ودكينه الباب مفتحت.

سيلين : شلون شكلها وشوكت اجتني مسمعت احد دك الباب؟؟

ابو عبد : مادري جنت بالمحل جوز فاتت وما انتبهت لان جانو يمي ناس والتهيت وشكلها ماركزت تدرين بيه ما باوع دنكت وحجيت وياها.

سيلين : اكو احد وياها لو وحدها.

ابو عبد : لا وحدها ..

سيلين : بعد شنو كالت ؟؟؟

ابو عبد : هذا هو بس كالت عينك عليها.

جريت نفس عميق حسيت كلبي راح يوكف منو هاي معقوله ايفين بس وين تندلني لو خاف ماما حيره يربي...

سيلين : هاهيه عاشت ايدك..

ابو عبد : بنتي بس فلوس المولد الايجار عوفيه شوكت مجان جيبيه جان دفعتلج بس والله ماعندي..

سيلين : عمو صار شهر وشويه مناطيني ولا فلس تدري باقي بس خمسين الف جوة ايدي بلكت ادبرلك هاي اليومين اذا مستلمت راتب.

ابو عبد : يلا انتضرج بلكت اليوم اذا كدرتي.

سيلين : اشوف واردلك خبر.

ابو عبد : الله يوفقج ويسهل امرج..

سيلين : شكرا عمو تسلم..

رحت لسيارتي والف حسبه وحسبه ابالي منين راح اجيب اضطريت اروح للبنك كلت اسحب اخر ٥٠٠ وبعد هذا هو ، وصلت صفيت السياره ونزلت ..

حجيت ويه الموظفه كالت انتظري ، راحت واجتي كالت..

_ الكي كارد ميشتغل..

سيلين : يعني شنو ؟

_ معطليه ماكو حساب بهذا الاسم.

سيلين : متأكده ؟

_ اي متأكده وهسه هم موظف حاول ماكو..

سيلين : ها شكرا .

_ عفوا اهلا وسهلا..

اخذت الكارت وطلعت يعني ادهم معطل الحساب يمكن عرف اني ساحبه زين معقوله هسه يلا عرف و ليش بهذا الوقت بالتحديد عجيب ..

رجعت للسياره ورحت للشركه دخلت للغرفه سلمت وكعدت اجتي رشا يمي..

رشا : البارحه هوواي تأخرتي هنا...

سيلين : شمدريج؟

رشا : سلام كال .

سيلين : اي هو هم جان عنده شغل ..

رشا : شعجب ضليتو هلكد عقوبه لو شنو؟

سيلين: ماعرف جنت بالكليه خابروني كالو رجعي للشركه وعندج شغل ومدري شنو ..

رشا : شمدريني حيره.

سيلين : مسمعتي شوكت الراتب يايوم .

رشا: ماعرف بس تره نطو لباقي الاقسام ضل بس قسمنه...

سيلين : ليش هيج اخروه يعني ميكولون

ناس عدها ايجار مولدات صخام بعينهم..

رشا : ميفكرون بحال الناس همه.

سيلين : انتظر لباجر اذا ماوزع اروحله .

رشا: نروح سوه.

سيلين : ان شاءالله .

كعدنه كل وحده بمكانها وبلشنه شغل خلصت صارت ساعه ١٢ اخذت جنطتي وطلعت توجهت للجامعه ...

وصلت تقريبا جانت ساعه وحده اله ربع يعني المحاظره الاولى جانت باديه صارلها ربع ساعه دكيت الباب اشرلي الاستاذ فوتي دخلت سلمت وكعدت حسيت نضرات الطلاب مو طبيعيه يمكن لان اكو تغيير بوجهي جانت بنيه كاعده بصفي همستلي.

_ سيلين شكد حلوة طالعه شنو انخطبتي ؟

سيلين : ليش التخلي مكياج وتهتم بنفسها يعني اله تنخطب ..

_ شمدريني بس التغيير خلاني هيج افكر.

سيلين : تره مكياج عادي يعني بس مجرد الحمره لونها طوخ..

_ بس تخبل عليج.

سيلين : ادري.

_ هههه مغروره

سيلين : لا مو مغروره بس هوواي كالولي حلوه عليه وتلوكلي..

_ فعلا حلوة عليج.

سيلين : شكرا.

بلش الاستاذ شرح واحنه سكتنه وصبينه كل انتباهنه وياه..

نعست كلش جنت كاعده ثالث سره خليت راسي على الجنطه وغمضت عيني لان دخت من الحاسبه بالدوام والبارحه منايمه بس ساعتين قفلت ...

غمضت عيني شبه غفيت بس اسمع الاصوات صوت الاستاذ وصوت الطلاب لهناك واسمع صوته..

كلبي فز ضليت نايمه بمكاني كلت ماريد اكعد خاف يروح صوته من بالي ضليت مغمضه بس حواسي وجوارحي كلها مشتغله وتستمع لهذا الصوت ،

لا صوته فعلا مو حلم ولا تخيل واللي اكدلي هو صحيح الطلاب لفضو اسمه ، كمت اني هم ادور عليه بعيوني ،

اي شفته هذا هو والله هو كامو الطلاب وراحو يمه سلمو عليه الولد صافحوه والبنات سلمو من بعيد..

الطلاب الويايه اغلبهم كبار لان مسائي...

قسم منهم يعرفوه جان ياخذهم بصف اول ورسبو واني جنت سابقتهم بس لان تركت لحكو ويايه.. ..

الكل كعد واني ماعرف شسوي اركض احضنه كدامهم لو شسوي .

بس هلكد تعبااااااان مو ذاك الادهم ماخذه منه الايام هوووواي ..

جوه عينه هالات سود وضعفان شويه بس شي على شي بترتيبه واناقته هيمن علينه بحضوره الراقي وشخصيته مثل كل مره.

جرتني صديقتي من قميصي كعدت وعيني عليه كلبي يدك سريع يمكن الكل سمعه ...

بلش المحاضره مالته جانت مثل كل مره توعويه لان بمرحلتنه ماعدنه درس بعلم النفس بس هو جان كل اسبوع ينطي محاضره لقسم معين اضافه للدروس العنده ...

يحجي وعينه تتوزع على كل الطلاب اله اني تجاهلني ابد مباوعلي..

بعدين كال ...

ادهم : اختم محاضرتي بعده نصائح او اعتبروها رساله الكم تفيدكم بالمستقبل سواء القريب او البعيد وبدايتآ ابلش بالخلاف الفكري اذا فكرك تضارب ويه فكر شخص ثاني انسحب من البدايه لان راح تصير نزاعات ومشكلات كبيره ما الها حل ،

عدم الاتفاق على نفس الرأي لا يعني الخلاف الانساني بل يعني انه اختلف وياك بالرأي لكن انسانيا انه وياك لهذا احذر الف مره من شخص يختلف وياك فكريا وتضل مستمر وياه بنفس العلاقه..

ابسط مثال من تجي تبني شخصيه ضعيفه انتبه ضعيفه جدآ وتبنيها بكل ماعندك من قوه وجهد نفسي وعقلي وخساره للوقت ...

وهاي الشخصيه اختلفت وياك بالفكر اجتي هدمتك ورجعتك للصفر وخسرتك كلشي ليش لان مجرد اختلفت وياها بالفكر ...

بغض النظر طبعا اذا جان بقصد او من غير قصد..

اكو مقوله شهيره لجبران خليل جبران يكول بيها ..

بين منطوق لم يقصد ومقصود لم ينطق تضيع الكثير من المحبه ...

يحجي بحركه كلب ورجفه بيده واني اباوعله ودموعي تنزل..

ادهم : هذه المقولة تصف حال الكثير من العلاقات سواء كانت اجتماعية او عاطفية بين الأشخاص الآن وغدا وبعد غد ، فهي تعبر عن حالة التردد فى البوح بكثير من الكلمات التى تحمل فى طياتها كم من المشاعر لو قيلت فى وقتها، لجنبتنا الكثير من المشكلات وانهت كثير من المواقف بكلمة.

كلمه منك ممكن تكسر بيها انسان كلمه ممكن تحطمك وتنهيك وكلمه تبنيك من جديد وتجعلك انسان ثاني مختلف تماما عن السابق.....

انه ك دكتور نفسي اعالج المرضى بالكلام لكن الدكتور اذا ...

سكت مكدر يكمل التفت على السبورة دنك راسه وخله ايده على عينه، صار هدوء بعدين التفت..

ادهم : اسف عن المقاطعه نرجع نكمل حديثنه ،،

مثل ما وضحت بكلامي فوك عن الفكر ،

ارجع واكول عدم الاتفاق هو اقصر مسافه بين فكرين كما قال جبران خليل اختصر المسافات وعاشر اليشبهك لتحاول تشبه شخص بيك و هو مختلف عنك مجرد انت تحبه ...

سألهم شنو رأييكم بهيج شخص كل واحد حجه شكل بس حجي كله مؤذي ويأثر بالنفسيه .. اخر شي باوعلي بنظره لو ميته ولا شايفتها...

التفت على السبوره كتب كلمات ورددهن بصوت عالي ومليان غضب...

ادهم : علمتهُ الرماية كل يوم فلما اشتد ساعده رماني

وكم علمته نظم القوافي فلما قال قافيته هجاني.

تعلم الأبجدية والأرقام مني فلما أصبح عالماً نفاني.

سعيت في الأرض من أجل راحته فلما أصبح عاقلاً عصاني.

كم رعيت العنز بعد شرائه فلما أعلن الشبع شراني.

شمر القلم على الميز وطلع كمت على السريع اريد اطلع وراه دخل استاذ ثاني ..

سيلين : عفيه استاذ ممكن ار

وح اغسل ..

احجب وارجف ودموعي تنزل ...

_ لا دخلي عندج محاضره.

سيلين : استاذ الله يخليك خليني اطلع ..

_ ابد رجعي لمكانج يلا طلعو اوراق واقلام امتحان ..

اريد اطلع واكف يم الباب ولازم اليده حتى حسيته متفق وياه ميخلي احد يطلع .

رجعت كعدت على الكرسي البنات ضلو يتهامسون بيناتهم مدرت بال لاي احد بالي كله يمه شفته من بعد فراق سنه ونص فرحت كلش يعني رجع ويانه للجامعه يدرس لو شنو حرت ...

كملت المحاضره طلعت بسرعه امشي مثل المخبله ادور عليه رحت لغرفته صعدت دكيت الباب فتحته بس الاساتذه موجودين هو ماكو سألتهم كالو مشفناه..

رجعت لقسمي سألت كالو قدم محاضره وطلع متت قهر رحت للنادي لنفس مكانه اللي جنه نكعد بيه ، ورجعت جالست الذكريات ورجعت بذاكرتي ويييييين ليا موقف ...

فلاش باك...ماضي

ادهم: كملي.

سيلين : كملت.

ادهم : هم ارجع واكلج صح.

سيلين : عمو بالك وين ؟

ادهم : مادري.

سيلين : هو شنو متدري ههههه.

ادهم : شنو رأيج اليوم نتغده بره .

سيلين : شنو المناسبه ؟

ادهم : عازمج.

سيلين : غير اعرف ليش ؟

ادهم : مزاجيتي حكمت بهيج..

سيلين : اني سألتك غير تجاوبني..

رفع حاجبه مبتسم..

ادهم : تره جاوبتج..

حجاها بطريقه بارده وهادئه كأنما سارح بالبعيد ( القريب البعيد ) على كولته.

جنت اسميه الغريب القريب هو يسميني القريب البعيد.

سيلين :اكلك معلومه المرأة ميعجبها اسألتك بكد الاجوبه..

كتف ايده وخلاها على الميز ورفع ايد خلاها جوه خده وكال ..

ادهم : واللي اعرفه المرأه متحب حديث الرجل بكد متحب استماعه الها مو صح..

سيلين : ههههههههه صح ..

ادهم : كملي اسمعج بكل ممنونيه.

سيلين : عمو اليوم بيك شي .

ادهم : شنو بيه

سيلين : اعرف بيك اذكى من اسألتي وكاعد تستغبيني ..

ادهم : لا بالله لتخليني احلف..

سيلين: لعد احجيلي شبيك اليوم.

ادهم : اتمنى احجي اتمنى اكدر.

سيلين : وليش متكدر مو تكلي انتي صديقتي.

ادهم : واقرب واحب صديقه على كلبي متشوفين تركت كل اصدقائي وضليت وياج حتى سرنه واحد ..

سيلين : لعد احجيلي شنو سبب التغيير المفاجئ تنام متأخر تكعد متأخر حتى على دوامك تسرح هواي تتجنبني من احاجيك واغلب الاحيان بالك مو ويايه من احجي وياك..

ادهم : انه بالي مو وياج.

سيلين : اي والدليل اليوم عدت السالفه مرتين وتكلي صح علمود اسكت لان ممركز ويايه.

ضحك وفرك وجهه ..

ادهم : شلون يكولون حدس المراة ميخطأ ابد واذا حس كلبها بشي متحتاج ادله ؟؟؟

سيلين : وياك كلشي ما احزر عباره عن كتله غموض ..

ادهم : المهم عزيمتي بعدها قائمه شتكولين تلبيها من باب الكرم لو نرجع للبيت وتسوين اكل وتتعبين.

سيلين : لا نرجع للبيت لان ايفين ومريم بلا غده خطيه هسه جاعو.

ادهم : نجيبلهم ويانه.

سيلين : لا نكمل محاضراتنه ونرجع للبيت.

ادهم : براحتج هسه وين راح تروحين.

سيلين : للقسم راح تبلش محاظره استاذ علي.

ادهم : يلا اوصلج وارجع .

كمنه وصلني وهو راح خلص الدوام ورجعنه للبيت مر كم يوم وكل تصرفاته طبيعيه ويانه ..

هسه تكولون تكذب ليش محست بيه ، محسيت لان هو بكل وكت مهتم بيه وبعلاجي ومنظم اكلي وحتى وكت نومتي يتدخل بيها لا اسهر ولا اتعب عيني بالتلفزيون وموبايل لحد الان ميقبل اشتري رغم صارت سالفه الخطف مالتي بس مقبل اشتري لهذا مستغربت شقاه ويايه ولا اعجابه بالتغيير الصارلي لان من اشتري شي اخذ رأييه يكلي حلو او مو حلو وايفين نفس التصرفات يتصرفها وياها.

لهذا ما جنت احس بحبه اتجاهي كحب عاطفي لان هو عباره عن كتله اهتمام سواء بيه او بأختي وبنته.

وبيوم جنه راجعين من الدوام وجنت بالمطبخ اسوي بالغده اجه وكف يمي وكال..

ادهم : سيلين اريد اعزم ضيغم و ملاك شتكولين..

التفتت عليه وكتله.

سيلين : يعني هنا بلبيت..

ادهم : انتي شتكولين بلبيت لو مطعم افضل.

سيلين : براحتك شنو يعجبك سوي..

ادهم : اريد رأييج..

سيلين : سألت اهلك شنو رأييهم ؟

ادهم : ماريد رأي احد اجيت اسألج الج نقرر ونشوف شنو نسوي..

سيلين : مو لان ما اعرف بهاي الامور لهذا كتلك اسألهم لان همه اكبر مني وخبره بهاي السوالف..

ادهم : اذا عزمتهم هنا انتي اللي راح تتعبين ونرمان لهذا اجيت وسألتج...

سيلين : عمو كيفك انت تريد هنا نتشارك ونسوي اني ونرمان وايفين واذا تريد بره هم براحتك.

ادهم : بره احسن وهم تغيير جو.

سيلين : بره بره هذا هو..

ادهم : يايوم تكملين امتحانات.

سيلين : يومين واخلص .

ادهم : ارتاحي ونحدد موعد.

سيلين : ماشي ..

ادهم : ايفين شلونها بالامتحانات...

سيلين : زينه..

ادهم: ان شاء الله خير.

سيلين : ان شاءالله بس يمكن هاي تعتبر مثل نص السنه مو صح.

ادهم : اي وبشهر السادس تمتحن اخر السنه.

سيلين : تريد تروح معهد معلمات..

ادهم : باللي يعجبها منجبرها.

سيلين : تكول اختصر الوقت لان كبرت .

ادهم : حجيت وياها حاولت اقنعها قافله..

سيلين : صح عاجبها كلش .

ادهم : الله كريم شنو مسويه غده.

سيلين : عمو حميت مال البارحه.

حجيتها وخلي

ت ايدي على حلكي.

ادهم : تحجين صدك سيلين.

سيلين : اي ..

ادهم : يعني البارحه متغديت واليوم هم ما اتغده.

سيلين : شبيها مركه الشجر تره طيبه

ادهم : لو بس اعرف منو وصه ايمن يجيبه جان ارتاحيت.

سيلين : اني ههههه.

ادهم : عود صدك تحجين

سيلين : اي هههههههع

ادهم : عقاب الج تسويلي غير شي.

سيلين : تدلل اسوي..

ادهم : لا انه اسوي اتشاقه وياج.

سيلين : ابد اني اسوي ما اخليك بس لان كلت هواي اكل حرامات يبقه.

ادهم : البارحه جاملتج وكتلج عاشت ايدج واكلت غصب وضليت جوعان اليوم ماكدر اجامل من الصبح لسه ما ماكل ضال على الريوك..

سيلين : حقك هسه اسوي على السريع.

ادهم : اساعدج.

حضرنه الغده ثنينه وصحت على البنات اجوي تغدو كملنه غده ورحت لغرفتنه طلعت الجدول مال مريم اريد اشوف شنو ناطيهم واجبات صارت صف اول اجتي شافتني فاتحه جنطتها جرت الدفتر حيل من ايدي واخذت الجنطه بعصبيه.

سيلين : ليش مريومه هيج تسوين..

مريم : معليج بيه ماريد اداوم كرهت المدرسه ماحبها ماحبها.

على عياطها اجه ابوها فات عاكد حاجبه كعد بمستواها مكنبص لزم ايدها وحاجها..

ادهم : ليش الحلوة معصبه منو وياها.

مريم : محد ويايه ماداوم ماداوم .

ادهم : غير افهم شنو السبب.

مريم : ما احب اقره وما احب الطلاب ولا المعلمه.

ادهم : ليش متحبيهم لازم اكو سبب ؟

مقبلت تحجي اخذ من ايدها الجنطه ذبها بالكاع وشالها وطلع طلعت وراهم دخلو للمكتب ودخلت اني هم كعد بصفها على القنفه.

ادهم : منو ضوجج؟

مريم : كلهم.

ادهم : منو كلهم ؟

مريم : الجهال

ادهم : ليش ؟

مريم : يكلولي انتي دبه حميسه تاكلين جهال اذا جعتي..

باوعت عليه ضاج بس اتصنع الهدوء علمود ليزيد ارتباكها وعصبيتها..

ادهم : انه اسف على الصار اليوم وياج ..

مريم : انت شعليك انت محجيت عليه همه حجو عليه..

حضنها وضلت تبجي بحضنه ويسمعلها الى ان هدأت اني دموعي تنزل وياهم كأنما كاعده اتابع مسلسل ..

وخرها من حضنه ومسح دموعها ولم شعرها بيده رجعه ليوره وهمس .

ادهم : الله سبحانه وتعالى خلقج بأحسن صوره مثل القمر من يكتمل ، بعيون بابا انتي اجمل بنت وارقى طفله كافي انتي بعيوني اجمل اميرات ديزني واضافه لهذا والاهم رب العالمين يحبج.

ضل يحجي هواي وياها الى ان ضحكت شالها وراحو للغرفه وكفت بالباب اباوع عليهم خلاها كبال المرايا و وكف وراها دنك لمستوها وحجه بهدوووء...

ادهم : باعي انتي شكد حلوة وجميله تشبهين ماما ياسة باعي زين...

وضل يفر بوجها بيده على كيف..

ادهم : كولي انه حلوووة ..

مريم : اني حلوة ههههه ، تضحك والدموع بعينها.

ادهم : انه حبابه

مريم : اني حبابه.

ادهم : انه قويه.

مريم : اني قويه

ادهم : انه ذكيه انه شاطره جميله محترمه انه ما اغلط انه انسانه بسيطه لا احسن من الناس ولا الناس احسن مني ...

يحجي وهيه تردد كلمه كلمه اخر شي كللها.

ادهم : مستعده تروحين للمدرسه باجر.

مريم : ايييي..

ادهم : ويكون يومج ايجابي وسعيد

مريم : ايييي

ادهم : ما نهتم للكلام السلبي .

هزت راسها ..

ادهم : جيد كولي انه انسانه عظيمه..

مريم : اني انسانه عظيمه

ادهم : شنو اسمج ؟

مريم : مريم ادهم يوسف

ادهم : اذا عثرنه بيوم من الايام و وكعنه على وجهنا شنو نسوي..

مريم : ننهض من جديد.

ادهم : شنو انه..

مريم : اني فخورة لان عندي بابا مثلك ..

ادهم : عفيه وهسه المن نشكر .

مريم : ربنا لان اعطاني نعمه العين اشوف بيها وخشمي اتنفس بيه وحلكي اكل منه وايدي ورجلي حتى تساعدني بالحركه ...

ادهم : عفيه هسه نروح نغسل ونام شويه ونكعد نشوف كارتون ويه بابا ونكعد ندرس اليوم انه ادرسج.

حضنته حيل وباسته من ركبته .

التفت عليه ابتسم واشر على عيونه يعني ليش تبجين ضحكت ومسحت دموعي..

ادهم : اسكت وحده تبجي الثانيه.

سيلين : منظركم يجنن هاي من شوكت هيج تعلمها.

ادهم : صار فتره تتعرض للتنمر متشوفين كمت العب رياضه وياها ونطلع نمشي مرات ،،،

ضل الاكل لازم اخليها تقلل بس كلبي ما ينطيني اخليها تكوم وهي جوعانه.

سيلين : ياعمري فدوه لكلبها حبيت ثقافه الاعتذار من اعتذرت منها رغم انت مغلطان بحقها..

ادهم : اعتذرت لان يضل الكلام بكلبها وتضل تحقد من اعتذر راح امتص غضبها بالتالي راح تحس بنفسها انسانه محبوبه ومهمه بالنسبه الي وتستحق الاعتذار..

سيلين : مادام صغيره تكدر تغيرها وتقوي شخصيتها..

ادهم : العمر معليه بكل الاعمار نكدر نغير سلوكياتهم ونسقل شخصيتهم بس لازم بخطوات صحيحه واحتواء تام ..

سيلين : بس اكيد يراد صبر و وكت هواي .

ادهم : يستاهلون اولادنه ننطيهم كل وقتنه ونعلمهم علمود نغيرهم ويعيشون حياة افضل.

سيلين : صح شلون غيرتنه اني وايفين خصوصا ايفين ابد مجنت اتوقع راح تتغير.

ادهم : بكل وقت الانسان يحتاج للأرشاد حتى وان كان بعمر السبعين سنه ..

سيلين : صح.

ادهم : راح انام ساعه واكعد.

سيلين : سويت جاي تشرب

ادهم : من اكعد راسي بده يدك.

سيلين : يلا نام لتروح تهيج الشقيقه عليك..

ادهم : ا

ي عفيه ..

سيلين : اروح اني اخذ راحتك.

ادهم : عينج عليها بلا زحمه.

سيلين : زحمه شنو تره ازعل.

ادهم : شكرا..

سيلين : عفوا..

اول مره يكلي شكرا هههه ..

رجعت للغرفه كعدت اقريها صار العصر كالت ..

مريم : نروح نشتري.

سيلين : منو يروح.

مريم : اني وياج وايمن.

سيلين : يلا روحي كليله بين ما ابدل..

مريم : اييي هههه.

راحت واني لبست عبايه اسلاميه وشال انتضرتها بالهول اجتي كالت ....

مريم : عمو يكول انتضروني شويه واجي..

سيلين : تعاي نطلع بالطرمه بين مينزل..

طلعنه والكه فهد واكف سلمت عليه حك وجها بطرف اصبعه وكال ..

فهد : شغلتكم مطوله ؟

سيلين : شلون يعني مفهمت.

فهد : شنو الما فهمتيه ادهم حول البيت اللي بالشمال بأسمه لان صعبه ياخذكم ومعامله طويله كلف محامي وكت فلوس يلا تحول البيت بأسمه باعه وفتح الكم حساب بالبنك بأسمج واسم اختج ومن سألته شنو راح تسوي بالفلوس كال اشتريلهم بيت قريب ...

سيلين : اي كلي ...

كذبت لان ما ادري ومحجالي اي شي بس مردت ابين نفسي كلشي مادري.

فهد : طلبي يستعجل ويشتريلكم بيت تكعدون بيه..

سيلين : وانت شنو الضارك من كعدتنه هنا اريد افتهم..

فهد : الضارني انتي واختج غريبات والناس اكلت وجهنا...

سيلين : الناس ان حجت وان سكتت ميهموني وانت من ضمن هاي الناس.

فهد : صدك والله.

سيلين : براحتك لتصدك..

فهد : سمعي الكل ضايج من كعدتكم هنا عدا عمج الواكف بضهركم لتخليني اسوي شغلات تجبركم تطلعون منا.

سيلين : هههه بس فهمني شحارك حمامك انت؟؟؟

فهد : مو اخويه استغفر الله ماريد احجي ..

سيلين : لا احجي ليش سكتت.

فهد : احجي اليعجبني باعي الج شهر تقنعين عموووو يشتريلكم بيت وتستقرون بيه وتنسد هاي اللغوه كلها..

سيلين : واذا مسويت ومقنعته ولا حجيت وياه شنو تسوي.

حجيتها وكتفت ايدي باوع على شفتي وكال.

فهد : بوكتها اكلج شنو اسوي لان هلمره حجيت مره ثانيه يكون بفعل..

سيلين : سوي اللي يعجبك متخوفني.

من حجيت هيج رفع عينه وخلاها بعيني.

فهد : نشوف ست .

سمعت صوت ايمن صاح مريم التفتت جان دينزل من الدرج شافني ابتسم رديتله الابتسامه.

ايمن : تأخرت عليج جنت اسبح.

سيلين : لا متأخرت عادي.

ايمن : يلا نروح ماعندج شي

سيلين : لا ماعندي.

طلعنه تمشينه للسوبرماركت اليمنه واني افكر بكلامه وروحي طفرت،، اشترينه ورجعنه دخلنه للهول واسمع فهد وادهم يحجون بصوت عالي من غرفه النوم.

ادهم : فهد ذني ترفات مو حمل سوالفك شيلهن من بالك احسلك.

فهد : هاي شبيك شنو ماشايف نسوان لو مو على ايدك ساحلات روحهن وما منطي مجال..

ادهم : اي اكتفي بمحيطك وبالساحلات روحهن عليك ذني عوفهن...

فهد : اريد سيلين شنو اليمنع.

ادهم : ما ازوجهم لتلح.

فهد : ابوهم انت شعليك.

ادهم : اي حالهن حال مريم.

فهد : شنو تحنطهن هنا يمك طول العمر وتضل تتفرج على طولهن..

ادهم : مادام مرتاحات وعايشات حياة مريحه يمي شنو اليمنع يضلن هنا.

فهد : اي نكعد بالمشتل وتضل يمك وقريبه عليك وكبال عينك وجوه حمايتي.

ادهم : لو تضل اخر رجال بالدنيا ما زوجك وحده منهن.

فهد : حتى اذا هيه رادت.

ادهم : اي..

فهد : زين لعد.

طلع وسد الباب لكاني بوجها ابتسم وكال.

فهد : سمعتي لعمج سألي نفسج ليش ميقبل ينطيج وفهمج كفايه..

شكرا لزيارتكم عالم روايات سكيرهوم