رواية ناديه الفصل الواحد والثلاثون 31 بقلم انين الليل

ناديه 

من اخذت المدرسه دفتر الامتحان وگلتلي روحي المديره طالبتج 

بساعتها خفت وانا امشي بالممر واگول ...ياساتر شتريد مني ليش انا شمسويه

وصلت يم الاداره وگفت دگيت الباب شفت المديره الي اومآت براسها وگالت //تعالي ماما ناديه ادخلي 

انا دخلت وگتلها ......نعم ست 

باوعتلي وابتسمت وگالت //شلونج اليوم بالامتحان 

بلعت ريگي ...الحمد لله ست كلش زينه 

المديره //اي عفيه ادري بيج شاطره وسبعه هاي ست خوله تريد تحچي وياج

باوعت ع الجانب لان ما منتبهه من ارتباكي شفت مره يجي عمرها بالاربعين او اكثر گاعده باوعت الها وانا 

ساكته هي اتكلمت //انتي ماما ناديه ان شاء الله تردين تكملين سادس 

انا هزيت راسي ...نعم ست 

ست خوله //عفيه شوفي ماما احنه نسوي دورات تقويه للصف السادس بيها مدرسين اكفاء 

قاطعتها...... ست بس انا ما اگدر ادخل دورات

هي هزت راسها وگالت //اي اعرف خليني اكمل اسمعي احنه كل سنه ناخذ طالبه من كل مدرسه تدخل مجانا 

ومن اجيت المدرستكم ست عفراء حمدت بيج وبشطارتج واخلاقج يعني انتي راح تدخلين دورات ابلاش

انا ما صدگت بين الفرحه والمفاجأه دمعت عيوني ست عفراء گامت من وره الميز وانطتني كلنس وگالت 

- - لا تبچيين ماما انتي من احسن الطالبات اخلاق وجمال وشطاره وست خوله كل سنه تاخذ طالبه والسنه 

اختيارنه انتي لان تستاهلين 

انا ما حچيت شي بس گتلها ......شكرا ست

ست خوله گالت //ناديه الدوره بعد اسبوع وحتى الملازم تاخذيهن من عدنا تمام 

هزيت راسي ست عفراء باوعتلي // اهم شي ترفعين راسنه وتنجحين ياالله ماما روحي البيتكم وگليلهم 

......ان شالله ست شكرا 

اريد اطلع ست خوله گالت //من الفرحه حتى نست تسالني وين وبيا مدرسه

انا وگفت وهي گالت بمدرسة ال ...الاهليه يوميه الدوره الساعه بثمانيه ونص اعتبارا من السبت القادم 

ست عفراء //اكو خط لان شويه بعيده 

ست خوله //اي اكو خط وانطيت اسمها للسايق وراح يمر عليها اسبوع القادم وهم ابلاش 

ست عفراء ابتسمت // ياالله شدي حيلج اريد اسمع عنج كل الاخبار الطيبه 

انا اتقربت على ست عفراء وحظنتها لا اراديا هي مسحت على ظهري وگالت //ياالله حبيبتي روحي وارتاحي 

واتحضري وشدي حيلج تره السادس مصير مو لعبه

ورحت للبيت وانا فرحانه لان متاكده من نجاحي من الخامس ولان سجلت دورات للسادس سبحان الله البارحه 

 چنت محتاره شلون ومنين ادخل دورات هسه الله سهلها باوعت للسما ......الحمد لله ياربي 

دخلت للبيت من باب المطبخ ودگيت الباب وفتحته اليه اسيل دخلت بدون ما اسلم وصعدت فوك لگيت حنين تقرا

 وقافله عليها الباب دكيته فتحت لي شافتني مبتسمه هي ابتسمت وسالتني گتلها زينه بالامتحان صرت احچي ويه نفسي

... حنين بعد اسبوع امتحانها يعني بداية الدوره شلون 

  ... اي وشنو يعني من اجي اكمل الشغل وبعدين اقرا

  ... المهم هسه خلي اسكت العصر او بالليل افتح موضوع ويه هادي بس شلون بحيزبون والشريره وهديل 

  هزيت راسي. ... اي خلي احچي من اشوف ياسر يمهم لان هو الولد حباب عبالك مو ابن افراح وهادي 

  ... قصدج يريد خاطرج ناديه 

...... اوو انا وين احچي شعليه الي امه افراح الله يبعده عن طريقي ويكافيني شره

نزلت العصر بعد ان قفلت الغرفه على حنين چانت افراح بعدهي بغرفتها انا بقيت ارتب بالمطبخ ولو هو ما بي 

شي طلعت قبل المغرب شافتني دخلت للمطبخ وطلعت عدس بطاسه زغيره وفتحت المجمده وطلعت كبه 

 وكالت //هاج سوي شوربه الهادي وكلي هذن الكبايات الي والعمار وسوي بيض وبتيته الهديل وياسر واسيل 

هي حتى ما تگول شنو ناكل يعني بين قوسين (الي يبقى ناكله )سواء نريد او لا

انا سلكت العدسات وقطعت البتيته وصعدت اتوضيت وصليت ونزلت اكمل بالعشا اجو وانا اصب الشوربه العمي

 وخليت ماعونيين كبه وصحنيين بتيته فوگاها بيضتين وقوري الچاي همه صارو ياكلون وانا واكفه اغسل الصحون 

الي استخدمتهن بالطبخ شفت ياسر اجه گعد وهمه صارو ياكلون انا اتقربت وگلت

......عمو 

هو باوعلي وعاكف وجهه انا اتشجعت گتله ...عمو اليوم المديره دزت عليه 

افراح //خيير شرايده لو انتي شمسويه 

...لا ما مسويه شي بس......قاطعتني افراح بنتر 

- - مو تكولين دزت عليه المديره وهسه تگولين ما مسويه شي 

هديل //يجوز لزمتها تغش

ياسر //شنو هاي انطو البنيه فرصه خلي نسمع (دار وجهه )احچي ناديه 

...رحت للاداره وشفت يم المديره وحده گاعده 

هديل //لا تگولين جايه تخطبج هههههههه

الكل ضحك حتى عمي اتبسم افراح هزت ايدها باستهزاء بس ياسر نفخ وبهاي اللحظه كرهتهم اكثر گلت 

...المره چانت مديرة ثانويه ال ......الاهليه وجايه الست عفراء رادت ابنيه شاطره حتى تدخلها دورات صف 

السادس ابلاش 

ياسر //اي زين انتي اول وتالي لازم تدخلين دورات السادس مو لعبه 

افراح// وعليمن تدخل تدرس بالبيت وهذا هو شنو قابل تصير دكتوره (حچتها باستهزاء )

ياسر //شنو نسيتي ماما انا دخلت دورات ودرسين خصوصي وهذا الگاعد يمج دخل خصوصي بالدروس كلها 

افراح //اگلك ياسر انت شبيك ها ما تگلي ...اهنا عمي هادي گال 

افراح ما طول ابلاش خليها تدخل شكو بيها 

ياسر //همه لو ما شايفينها شاطره ومؤدبه ما دخلوها دورات ابلاش 

هادي //هذا هو روحي للدورات

افراح //اي هي دورات وذيج متعلگه فووك بكلوريا وانا خدامه اهنا 

...لا عمه انا اكمل الشغل بالليل 

افراح //واحنا شمدرينه هذا كلامج صحيح 

هديل //اي شمدرينا 

...عمه شلون يعني 

افراح وهي تباوعلي بنص عين وتلملم بشفتها وتگول //منو يگول كلامج صحيح

...عمه هي ست خوله انطتني تلفون المدرسه وگالت اي احد يجي يستفسر او يخابرني هسه انزله 

هادي //هي الدوره يمته 

عمو بعد ست تيام 

رفع راسه // خلص بابا ياسر اخذها انت واستفسر من المديره 

...اي عمو وحتى گالت سجلت اسمج بالخط وبلاش 

هادي //هذا هو ما طوول ابلاش

افراح //بس الشغل نفس ما هو مو يوميه عذر 

...اي عمه 

افراح //ياالله اخذيلج طاسة شوربه وهذني الكبايتين وخبزه واصعدي اتعشي وبعدين انزلي اغسلي المواعين 

...اي ان شالله

صبيت الماعون والكل سكت وانا احس بنفسي كانما سائل واگف بالباب من درت اصعد وبيدي الصينيه كالتلي 

اتعشي بساع وانزلي مو تنامين 

ياسر گال //شنو ماما شدعوه ليش هيج تتصرفين ويه ناديه وحنين

افراح //چا شتريدني اسجد الهن 

ياسر //ماما تره ما يصير ه ...

قاطعته افراح //والله يصير ما يصير هذا العندي ماكو ودوهن العماتهن الخوالهن انا ما فاتحه البيت تكيه 

وانت ياسر اشو بس تدافع الهن شكو شجوه راسك 

ياسر //كلنه انشوف وساكتين وباچر نتحاسب وانا ما احب الظلم

افراح //يعني انا ظالمه زين ماكو دورات واذا بقيت تحچي ابطلها من المدرسه 

هادي //خليها تروح للدورات واذا ما نجحت تبطل وهاي هيه

انا صعدت والدمعه بعيني وانا اسمع افراح شلون تحچي وتغلط وتسب وصلت فتحت الغرفه لگيت حنين نايمه گعدتها 

وانا اگلها ...لا نجحنا اشو نايمه 

حنين تتثارب //تعبت ناديه وجعت عاد اتمددت وغفيت 

......دا اكعدي واتعشي 

وصرنا ناكل وسولفت الحنين الي گالت// اتحمليني بس هالاسبوعين بعدها ما اخليج تشيلين عود شخاط

...شلون يعني 

:يعني بس اكمل امتحانات راح الزم الشغل كله وانتي ادرسي 

...لا حنونه اتعبين 

:عادي اتعب وارسب وانتي تنجحين وبعدين انا اشد حيلي وانتي تلزمين الشغل 

...والله حليتيها حنون

جاوبتني وهيه تضحك // اي چا شعبالج ندوش 

...بس حنين اريدج تديرين بالج من عمار 

:اي اعرف ندوش هذا اكبر حقير 

انا خفت سالتها ...شسوى حنين 

:يباوع ومن امر يتحسر وهسه قبل شويه من نزلتي حاول يفتح الباب وبعدين راح

انا جريت نفس وگتلها ...اكبر حقيير ونذل 

حنين //ليش هلگد تخافين منه 

...وج ما اخاف منه اخاف عليج حنين انتي مو زغيره حتى من يسوي شي مو زين افراح وهادي يذبونه براسج 

هزت راسها //اي لان بت مياده 

...اي حنين ليش احنه هسه الي يصير بينه كله منين

حنين دنگت وبچت وانا حضنتها وگتلها ...كل الي صار خلي وراج المهم تنجحين حتى نعرف نغير حياتنا 

حنين وهي تمسح بدموعها //شتتصورين ورا افراح وبناتها وابنها اكو تغيير 

هزيت راسي ......اي اكو انتي بس شدي حيلج وديري بالج 

ابتسمت وگتلها ......ياالله راح انزل اجيبلج چاي عفيه حنونه ادرسي 

حنين //انا انزل اجيبلي كوب چاي مو زين على رجلج صعده ونزله انزلي كملي الشغل وانا شويه واجي اصبلي 

كوب چاي

نزلت دخلت للمطبخ وغسلت المواعين ومسحت الكاونترات وغسلت المطبخ ورجعت مسحته

بالباب الخارجي مال المطبخ الي ايطل ع الگراج جاي اخلي الماسحه بالمنور اللوره واسمع ياسر يحچي ويه

عمار يگله //عود ليش من گتلك ملازمك انطيهن تستفاد منهن ناديه بالبدايه گتلي اي وتالي شفت امي خزرتك 

گتلي ضامهن الهديل شدعوه عليك 

عمار //انطيها سم الهلنذله

ياسر //شگد طايح حظك وسوقي عود راح تصير محامي بس مبين انت من هسه حرامي 

عمار //اي شتگول گول بس افهم انا اكرهها الهاي لو بيدي اموتها 

ياسر// وليش شمسويتلك 

عمار حمحم //هي ما مسويتلي بس الحب والكره من الله 

ياسر //لا الحب والكره من الناس الناس هي الي تزرع المحبه وتزرع الحقد والكره

عمار //ايباااخ ولا عرفتك حبيبي هاي العواطف نسولفهن على بنات الكليه على شكم وحده حلوه تروحلها (وغمز )

ياسر //صدك ما تستحي ولك مو عندك اخوات واعتبر ناديه واختها هم اخواتك لا تنسى ذني بنات عمنا يعني عرضنا 

عمار //لا ياسر افهم ذني بنات مياده تعرف منو مياده وحده ساقطه ماشيه على حل شعرها وربك فضحها وطلعت 

حامل بنغل وجابته واخذو اهل ابو لو نسيت 

ياسر //اي اعرف كل شي بس البنات شعليهن

عمار //البنات مثل امهن يعني شيطلعن فانا بصراحه ما اشوفهن لا عرضي ولا بنات عمي واتمنى استفرد بيهن

خصوصا حنين شايف انوثتها تطيح اكبر واحد 

ياسر //صدك انت واحد سگط وما عدك اخلاق 

عمار //لا متوهم ياسر انا جدا خلوق بس ويه بنات الناس المعروف اصلهن وفصلهن لكن ويه ذني انا اكبر ساقط 

بس وين تروح اول وتالي احصل على حنين وناديه لابد فد يوم تغفل عنها

ياسر //ولك انت ما تخاف من الله 

عمار //ههههه والله تضحك ياسر بابا ذني مو بناتنا وامهن وحده عايقه شتريد نتزوجهن مثلا 

ياسر //لا بس كافيهن شرك وابعد عن طريقهن 

عمار //ههههه ظل بمثالياتك شيخ ياسر

وضحك عمار وطلع وياسر ركب سيارته وهم طلع وهو يهز براسه اسف وانا من سمعت الكلام الي دار بين ياسر 

وعمار ما اتفاجئت من كلام عمار بقدر ما خفت منه وصار لازم ابلغ حنين بي واخوفها منه وابقى اراقبهم 

البيت هادي خصوصا هذا النذل عمار رجعت للغرفه وما حچيت الحنين الي بس شافتني گالت

ندووش شبيج لونج مخطوف 

......لا ما بيه شي بس تعبت 

الله يساعدج جاي تشتغلين عني وعنج 

...ولا يهمج اهم شي تنجحين وما تخلين حيزبونه وبناتها يتشمتن بينه 

حنين //وداعتج ندووش ولا احب ادرس بس حتى ما تتشمت بينه لازم ادرس

......مو بس هيج حنين والخاطر بيبي منيره وبابا 

حنين اتقربت مني //اي وهم الخاطر عمو سراج

انا ما عقبت بقيت الليل كله وانا افكر شلون ابرمج نفسي بحيث ما انطي العمار الكلب فرصه يستفرد باختي 

گعدت مفزوعه على عيطة افراح نزلت انا عبالي بيها شي اسمع ياسر يگلها

يمه البنيه تعبت واكيد اخذتها نومه 

افراح //كون تاخذها نومه ابديه الكلبه شلون ترحون بدون ريوك 

ياسر //شلقصه يمه ما صار شي 

افراح //ولك انت لا تدافع تره اعرفك ودارستك (باوعتلي )وانتي ست الحسن صح النوم شنو جنابج الهسه 

...عمه غفيت هسه بسرعه اسويلهم ريوك

افراح تحجي وانا خليت ماي بالغلايه وشغلتها وطلعت صمونتين من المجمده وحميتهن بالاوفن ورحت گليت 

بيض خليته بصحن وطلعت جبن وصبيت الچاي الياسر وعمار وطلعت الصمون 

باوعلي عمار وغمز الامه وگال //اي والله خوش سيلانيه عاشت ايدج فرحه

افراح ضحكت وانا اتفاجات من كلامه وياسر گاله بنتر //صدك ما تفتهم اوزن كلامك گبل لا تحچي 

عمار//ليش انا شگايل هاي سجى مرت سراج تگول ناديه تشبه جينا الخدامه العد اهلي مو يمه 

ياسر باستغراب //هي گالت هيج 

عمار //اي گالت وبحضور سراج 

ياسر //يعني سراج سمعها 

عمار //اي وبقى ساكت وما سوو شي ولا عقب

ياسر بعصبيه //زين انا اخابر سراج واعرف شغلي ويا 

افراح// اااه تخابره وشتگله 

ياسر بنتر //مااله لاهو ولامرته اي حق تحچي وهو ساكت الها جايين خطار حدهم لگمتهم ويرحون باي حق 

زوجته تتجاوز على بنات عمنا وهو ساكت 

افراح //ياسر شنو هالكلام كافي 

ياسر //لا مو كافي اذا هو ما يگدر يخلي المرته حد احنه نگدر وعلى فرض ناديه سيلانيه ما الها حق تحچي عليها

عمار باستهزاء//اگله غسلت مجاديفها ووگرايب ابوك ساكت 

ياسر//زين هسه اتصل واشوف 

افراح// دا كافي كافي سالفه صار الها شگد اليوم متفطن حضرة الاستاذ ياسر يعتب على سراج ههههي 

صدك ما عدك سالفه شنو من حجت سجى طاحن دلاليعها الست الحسن بسك بسك وياالله روح على شغلك 

وانت روح لامتحانك

ياسر //شوفي اذا ما اخابره هسه اركب السياره وگبل البغداد واعرف شغلي ويا او ويه مرته 

افراح رادت تحچي انا گلت الياسر //لا ياسر لاتخابر ولا تروح على گولة عمه سالفه من زمان عوفها 

(انا ما ردت انطي الافراح مجال وتسوي مشكله تتاثر حنين وانا يجوز تبطلني من الدورات انا اعرف افراح تخاف 

من قيس رجل شمس هلمبقيتنا بالمدرسه ) اتقربت من عمار وگتله 

  ...... والله عمار لو كل سيلانيه مثلي ومثل شكلي انا واختي چان الناس كلها خلت مو ابن عمي

هوما عقب ياسر گال // يمته ما اشوف سراج احچي ويا واگله الي يجي للبيت يحترم كل البي

طلعو وبقيت اشتغل بالبيت الحد الظهر وصار هذا روتيني وبدت امتحانات حنين وبنفس الوقت الدوره مال التقويه 

هم بدت انا فهمت حنين شلون تحل ولا تخبص نفسها بيوم دوامي بالتقويه الصبح كملت الريوك واجه ياسر گلي

ياالله امشي خلي اوصلج 

افراح //وليش عود توصلها مو عدها خط 

هادي //لا خلي يوصلها ياسر ويتاكد من كلامها

افراح //اي هم صدك

وركبت بالسياره ويه ياسر الي فتحلي باب الصدر يمكن ثاني مره اركب ويا مره اجينه من بيت جميله بوكتها چانت 

ويانه اسيل ركبت يمه وانا وحنين وره وهاي ثاني مره واتذكر شلون لمن امتحنت الثالث لاگاني سراج 

وهو يشجعني ويوصيني بدراستي ما اعرف ليش وگعت دمعه من عيني وصلنه وقبل ما ننزل ياسر طلع خمسه وعشرين 

وانطاني باوعتله وانا اردهن ...لا شكرا ما محتاجه

ياسر //اخذيهن مصرف الج واي شي تحتاجينه گليلي 

...شكرا بس ان... 

ياسر قاطعني // بس شنو شرايده تگولين 

...ياسر الله يخليك محتاجه رزه مال باب هي وقفلها 

اتفاجأ من طلبي وگلي// شلج بيها 

...اريدها عفيه الله يخليك واذا ما تگدر ما لازم

ياسر //تدللين صار 

...بس ( وصرت اعض بشفاي ) 

ياسر //بس شنو ناديه 

...الله يخليك مو تگول العمه افر

ماخلاني اكمل وگال //مفهوم راح اجيبهن اخليهن الج اباب الغرفه

يعني حتى ياسر يعرف بحقارة امه ودخل الست خوله وافتهم منها وحتى وصاها عليه اتذكر گلتله 

- - احنه من اخذناها لان عرفنه بيها يتيمه لكن اتفاجات انت ابن عمها وحسب كلامك مهندس

ورجع ياسر وانا دخلت للصف وانطونه ملازم 

وصاحتلي ست خوله انطتني كتب وسجلات گالت ذني تستفادين منهن واي شي تحتاجينه تعالي اطلبي مني 

والظهر رجعت بعد ان وصونه الاساتذه انو التحضير يوم بيومه وابد ما نخلي شي ما نقرا

رجعت بالخط وياي هواي بنات نص اعرفهن يداومن بنفس المدرسه والباقيات بغير مدارس 

ومثل كل مره رجعت ومن شافت افراح الكتب والملازم والسجلات عبالك نايمه وگعدت صارت 

تتعمد تطلع لي شغل من جوه الگاع وآوامر الها اول ما الها تالي وانا انفذ وانا ساكته لان اعتمادي على الليل 

وطبيعي البدايه مالت الدوره سهله لذلك صرت انفذ اوامر افراح على امل تخلص حنين امتحاناتها وتلزم عني 

الشغل وجابلي ياسر السركي والقفل وحتى جاكووج ومسامير وخلاهن الي ع الدرج الي يصعد الغرفتي

والظهر من صعدت الغدا دكيت السركي داخل الغرفه لان خفت من كلام عمار وفكرت يجوز ما خذ نسخه من المفاتيح 

عاد هاي اقفله من داخل بقفل ثاني 

بعد عشرين يوم كملت حنين واسيل الامتحان نسيت اگلكم هديل نجحت من الرابع للخامس نجاح شلالي يعني شلون 

ماكان وافراح ما تنوصف فرحتها چنت اغسل بالگراج ودخلت وعيني بعين افراح وياسر يگول

- - هاي انتي بالرابع ودرجاتج هالشكل بالسادس ناويه شكم سنه وشكم دور وشگد راح تطلعين 

افراح تباوعلي وكانما تتحداني //بالسادس اخليلها مدرسين خصوصي بكل المواد وبيش ماكان وراح تنجح من 

اول دوور وغصبن على الي ما يعجبه 

ياسر //عليمن هالغصبن خو لو بيها خير تدرس وتنجح

واستلمت حنين الشغل عني ولو انا هم اساعدها ودووم افراح ترزل بيها واشوف الدمعه بعيون حنين الي ما تشكي 

وبنفس الوقت ما متعوده على شغل وتعب لكن هي من تشوفني تضحك وتتشاقى 

فد يووم الظهر كمللت حنين كل شي وهي جابت الغدا حتى ماتنزل اله العصر خلت الصينيه وما قفلته الباب تونه 

جاي ناكل والدفره مالت الباب باوعنه شفنه افراح وبيدها قطعة قماش وراسا لزمت حنين من شعرها وهي تكلها

- - بت الكلب بت الزفره اليوم مثل ما حرگتي قميص ياسر احرك ايدج 

ياسر وراها يحاول يفك حنين منها ويگلها// يمه يولي القميص ما صار شي 

افراح بصياح //اسكت انت لا تدافع اريد اعلمها شلون هيج تسوي اليوم بالاوتي الي حرگت بي القميص

اله احرك ايدها حتى تبطل بعد تحرك الهدووم

انا اتذكرت شلون حرگت ايدي مياده ظليت ارجف وانا احاول اوخر ايدها من شعر حنين الي صارت تصرخ 

وهي تگول //عمه گتلج ما اعرف اكوي 

افراح //انچبي بت النعال 

ياسر //يمه يعني گلتلج ما تعرف تكوي ليش تخلينها تكوي الملابس وتحرگهن 

افراح //لا مو ما تعرف بس هذا شغل مياده ام النغوله لا تعلمني 

ياسر //يمه عيب هذا الحچي كافي الخاطر ربج

افراح //انت لا تدافع اريد اربيهن بنات الزنى 

ياسر هد حنين وخلاها ورا وگلها //البنيه ما غلطت گلتلج ما تعرف تكوي بعدين خلي بناتج شويه يحركن 

ايدهن تره حنين واختها مو خدامات

افراح //لا خدامات ونص خاف عبالك مصدك هنه بنات عمك تره كلها الناس تدري هنه بنات مياده بس 

موبنات عباس

انا بالاول سكتت لان ادري بيها متحمله عليه وما تريدني اداوم لكن من سمعت كلامها ما صبرت رديت عليها 

......عمه اذا احنه بنات مياده ودونه الخوالنه بس اثبتو احنه مو بنات عباس خلص ما تردينه اتصلي بخوالي 

وخلي يجون ياخذونه 

ياسر //اسكتي ناديه شنو هالحچي 

افراح //لا خليها تحچي بت مياده طلعولها خوال انا الج

ونزلت افراح وهي تسب وتدعي علينه وبيومها بقينه بدون غدا لان افراح بدت الصينيه من خمشت حنين 

العصر اندك الجرس مال الغرفه الي خلو النه بناءا على طلب اسيل لان كل ساع تصعد تصيحنه وافراح ما تقبل 

نبقى جوه نزلت حنين ورجعت صعدت گالت وهي خايفه

ناديه عمي هادي يريدج والشرار طالع من عيونه 

باوعتلها وانا الم شفايفي ...شبيج حنين خايفه ما سامعه كتله تفوت ولا حد يموت (وضحكت )

هي ابتسمت وگالت //اكيد حيزبونه قرت براسه 

هزيت راسي وگلت ......اي اكيد مليون بالميه

ونزلت ونزلت وراي حنين هو واگف ومنتجي على المحجر مال الدرج وافراح وبناتها گاعدات وصلت يمه 

...ها عمو رايدني 

لزمني من اذاني لوواها وهو يگول// تگولين عمو لو عمج صدك ما چان هسه طلعولج خوال

باوعتله وهو كمشني من ثوبي قريب صدري وحصرني ع الحايط وصار يخنك بيه وگلي 

تخزريني ياساقطه صلفه ما مكسوره عينج

انا احس الهوى انگطع عني بذيج الساعه تراوالي شلون سلدار يخنك بابوي وهو يفرفح بين ادي 

ظليت اهز براسي وانا احاول اوخر ادي عني حنين بحرگه 

عمي هدها هي مرتك سبت ابوي وتگول انتن مو بنات عباس وروحن الخوالچن بنات مياده

هو من سمع حنين رخى ايده وباوعلها گالت //اي عمو حرگت قميص ياسر وانا اگلها ما اعرف اكوي ورادت 

تچويني بالاوتي ومن ياسر كلها هنه مو خدامات گالت لا خدامات ونص گدام الناس هنه بنات عباس بس هنه

خدامات الي ولبناتي 

باوع الافراح الي گالت //شوف الساقطه الثانيه اتالف عليه كلام 

خزر حنين هي راسا گلتله// اسأل ياسر

هادي صاح //ياسر ياسر 

وكمش حنين وگلها //اذا يطلع الكلام چذب اله بايدي احرگج بكل جسمج بالاوتي 

نزل ياسر وهو يشوفه شلون كامش حنين اتقرب منه وهد ايده وهو يگول 

 - - ما صار قميص هم لو ذهب ما سويتو علي هيج هسه البنيه گالت ما اعرف اكوي ليش امي تجبرها مو ذني

 بناتك النهار كله گاعدات ع التلفزيون والموبايل اشو محد يآمرهن ليش بس ذني 

جاوبته وانا اشهك...... لان خدامات لان احنه مو بنات عباس بس گدام الناس

هادي//ياسر امك هيج گالت جاوب 

ياسر يباوعلي هز راسه //بابا امي بوكتها چانت عصبيه وهيج حچت وياهن 

هادي //يعني گايله مو 

سكت ياسر واتقرب هادي من افراح وگلها //اليمته تبقيين زعطوطه وماتفتهمين مو كافي شتردين من عدهن 

افراح بنتر //ها صرت اتحن الهن شنو لو اكو شي استجد

وصل يمها وكمشها من شعرها وگلها //ولج تبقيين فگر بت فگر وتبقيين ما تستحيين 

اجه ياسر خلاها ورا وگله// كافي بابا عيب اصواتكم فوك من الناس 

هادي //هذا ياعيب ليش المثلها تعرف العيب 

افراح //مخليه العيب الك والمرت اخوك الي انعدمت بعد ما شبعو بيها تتذكرها وهسه جايبلي نغلات تريدني

اخدمهن مو كافي يتسممن وينامن شنو شيردن بعد 

هادي //هنه الي يردن لو انتي مشغلتهن خدامات

هي اتقربت وگالت بتحدي ورافعه اصبعها //هادي هذني خدامات ويبقن خدامات الي والبناتي والي ما عاجبه 

هو يخدم نفسه (ودارت علينه )

- — اسمعي ولج انتي وهي مو عبالچن انساها الچن لا والله اطلعها وتشوفن 

اسمعيني انتي واختج گدام هذا (وتاشر باصبعها )الي يگول عمچن يعجبچن تبقن اهنا تحترمن نفسچن وتشتغلن 

ما يعچبچن روحن الخوالچن معروفين بس تسالون عليهم وين الناس الي بتهم كتلت رجلها وانعدمت لو ليش روحن 

الاهل سلدار صاحب امچن اهناك اخوچن واگعدن وياه

اتقرب هادي عليها هي جاوبته //لا ترفع ايدك هادي كل الي گلته صدك وانت تدري بي وانا هذا العدي

ودخلت الغرفتها وسدت الباب وهادي صار يخزر بيه ياسر ظل ينفخ اما هديل اتقربت وگالت بتهديد 

- - كل واحد بهذا البيت يعرف حده مفهوم 

وصعدت هي واسيل وهادي راح الغرفته وره افراح بقى ياسر الي يباوع وهو مقهور انا وحنين صعدنا 

وبكل خطوه يزيد كرهي ورغبتي بالانتقام گعدنا انا وحنيين واحنه مدنگات ما حچينا بس دموعنا هي الي 

حچت مقدار القهر والضيم حنين گالتلي وهي متمدده على فراشها

- - ليش ما طلعتي الصوره وتفلتي عليها طلعيها خلي اتفل وياج على الحقيره 

انا جريت نفس وگلت ...... هي اخذت جزائها وماتت لكن بعد جزاء الباقيين 

حنين دارت وجهه وگالت //شقصدج ناديه

ما جاوبتها طلعت كتابي وصرت اقرا بالليل اندك الباب فتحته انا شفت ياسر وبيده علاگه انطاها الي وگلي 

- - هاج اتعشي انتي وحنين

ردت ارجعها بس اعرف حنيين ما تتحمل الجوع اخذتهن وانا دموع بعيني گوه حبستهن وانا اشوف ياسر شلون

 يباوعلي وهاي النظره بعيونه من چنه ازغار ما اعرف شنو اوصفها بذاك الوكت لان انا اعرف نفسي 

انسانه مختلفه عن كل البنات الي بعمري اي اختلف عنهن انا الطفله الي وصلت امها الى حبل المشنقه