رواية أعظم خيانة الفصل الواحد والثلاثون بقلم الزهيريه
قمة الصبر ان تسكت
وفي قلبك جرح يتكلم
ريماس/ شعور تأنيب الضمير صعب خصوصاً من شوف نتيجة غدرك وخيانتك گدام عينك وشعور تأنيب الضمير موتني من شفت زوجة مهند وأطفاله حتى احس مهند صار گدامي ومن گمنه للمطبخ اجتي ورايه زوجة مهند اني بالبدايه ما انتبهت عليها بس من گرصتني من زندي قوي شوطت روحي للخالق انتبهت عليها وچان تگلي
سهاد/ عبالچ ما عرفتچ ولچ انتي شگد بربوگ شنو ماخذه العائله گباله بعد ما چنتي بحضن مهند الله يرحمه من مات رجعتي نصبتي شبكتچ على بيان واخذتي من لميس مثل ما اخذتي مهند مني
ريماس/ واني افرك بمكان الگرصه جاوبتها / انتي شسولفين يا مهند الي سولفين عليه
سهاد / مهند الي چنتي نايمه بحضنه ويصرف عليچ لانه وحده ساقطه ياخذ منچ لطعه وباقي چان وياچ حافظتچ عن ظهر قلب حتى اسمچ چان كاتب على رقمچ لينا الحب
ريماس/ بس اني اسمي ريماس مو لينا
وبعدها تريد تحچي دخل بيان نقذ الموقف من گال
بيان / انتي متوهمه ريماس اني مزوجها صار سنتين من چانت عند عمها وعمي مهند چان عايش ويعرف بزواجي من ريماس هسه عرفتي ليش چنت رافض الزواج من لميس
ريماس/ وظلت سهاد متفاجئه وتعتذر مني لكون شكت بيه وكل شويه تبوسني وتعتذر من بيان بس هو جاوبها انه ما صار شي تعجبت شلون گلب السالفه على سهاد وبعد العشه وتعليله راحوا واني چنت بالمطبخ من دى اغسل المواعين اجى بيان يمي راح واجى اكثر من مره عبالك عنده شي يريد يگوله بعدها الله وفقه ونطق
بيان / كملي بسرعه وتعالي ورايه للغرفه اريدچ
ريماس/ تريد اسويلك شي او اجيبلك شي
بيان / لا ما اريد شي بس كملي بسرعه وتعالي
ريماس/ وعافني وراح اني هم كملت بسرعه وصعدت دكيت الباب صاح دخلي
اني هم دخلت وظليت واگفه وگتله / تريد شي
بيان / اي تعالي يمي شبيچ
ريماس/ هو چان گاعد على السرير وموبايله بيده والله من صاحني عبالي يريد يشوفني شي بالموبايل اتقربت صرت قرّبيه عليه بس واگفه هو گام وگف وحتى الموبايل تركه على السرير سحبني عليه وظل يبوس بيه تفاجأت بي حاولت اكثر من مره ادفعه بس هو حضني قوي بحيث شل حركتي بس كلامه منتهي چان يعني يريد فراش شگد قاومته بس بقى إلا آخذ رغبته يله تركني
گتله / اگلك أحنه زواجنه فتره وينتهي ماكو داعي تجي يمي
بيان / اي لما ينتهي الله كريم الف عمامه تميل وتعدل
ريماس / بكل الاحوال راح ينتهي وهذا الصار هسه بعد لا تعيده
بيان / اگلچ تضاريس جسمچ تموت واني بشر وزوجچ يعني انتي حلالي شوكت ما اريد فراش تجين بفراشي
ريماس/ اگلك انت تحچي صدگ يا زواج لا مقدم ولا مؤخر ولا ذهب ولا غرفه بعد يا زواج الي تحچي بي انت
بيان / هاااا انتي متعوده لازم يندفعلچ فلوس يله عادي ادفع وانطيهن الچ على القندره في سبيل أونس نفسي
ريماس/ جاوبني على سؤالي انت بعد ما نخلص من المشكله نبقى مستمرين بزواجنه لو كل واحد يروح لحاله
بيان / قبل ما اجاوب على سؤالچ انت تريدين تكملين زواجچ ويايه
ريماس/ اي أريد اكمل وياك وابقى وياك
بيان / وشنو السبب بس تحچين الصدگ
ريماس/ والله وربي يشهد على كل كلمه اگولها أحبك واموت عليك ومن اجيت هنا حبيت الحجيه والدك
بيان / اني لا ما اكمل وياچ بس تخلص المشكله اطلگچ وما اريد اگول السبب حتى لا اجرح مشاعرچ بس كرغبه جنسيه بصراحه اريدچ وجسمچ يثيرني وشگد حاولت امنع نفسي بس ما گدرت
ريماس/ قهرني بكلامه انسحبت من يمه بدون ما أنطق بكلمه وعبر يومين صار يوميه بالليل ياخذني لغرفته وياخذ الي يريده وبيوم اجتي سياره وگفت وفوگاها تابوت وصح رب العالمين بجلالة قدره يگول ما تدري نفس بأي ارض تموت ودخلوا التابوت بيان وعمو سامي وعمو وسام وابو حارث ومن فتحوا التابوت چانت رحاب الي هي أغاريد والحجيه تخبلت نامت عليها وظلت تبوس بيها وتگول ربي ما صار كم شهر من دفنت مهند ارجع ادفن أغاريد
اتقربت على التابوت وبستها من بين عيونها إذا أريد اوصف شعوري ما ينوصف احس والله نار بگلبي والحجيه تخربطت وبوقتها أخذناها اني وابو حارث للمستشفى وطلع ضغطها صاعد وصاير عدها ذبحه صدريه وخلولها علاج بالمغذي ونامت بقيت گاعده يمها والدكتور ما قبل نطلعها گال / تبقى تحت المراقبه اليوم وباچر يشوف حالتها ظليت افكر برحاب حمدلله رب العالمين حقق أمنيتها واهلها دفنوها وتقريباً ساعه 1 بالليل اجى بيان ورسميه والي فهمته انه هاي جيتهم من الدفنه
وبيان باس گصت الحجيه وهي فتحت عيونها وتسال دفنوا أغاريد وهو جاوبها بالموافقه وظلت تبچي وهو يبوس بيدها ويصبر بيها واقتربت عليه
رسميه / حبيبه ولو تدخل من عندي ومو من حقي احچي بس اني البيه ما يخليني انتي حماتچ متوفيه وانتي لابسه ثوب سمائي لخاطر زوجچ البسي اسود
ريماس/ والله خاله ما عندي ملابس سود والحجيه تخربطت لهذا اضطريت البس هذا الفستان العندي واجيت وياها والا همه يعتبرون اهلي حزنهم حزني
رسميه/ ياااا خاله تدللين هسه اني اگصلچ ثوب اسود من عيني واخيطه بيدي
ريماس/ وبقينه للفجر واجى الدكتور فحص الحجيه وگال صارت شويه احسن وهذا علاج مؤقت وراجعوا بيها دكتور اخصائي وحدود الساعه 6 الصبح طلعنه الحجيه ويانه رسميه وصلنه للبيت وعساني لا وصلت اگو چادر منصوب مسافه أشويه على البيت جدور كبار ودى يطبخون وهواي ناس بالچادر دخلنه للبيت بعد انعل يروش نسوان وجهال ومن دخلنه لصاله بده العياط من شافوا الحجيه ومن وره النسوان اجيت اوگع عليهن لانه روجه طگ روجه وگوه سون مكان للحجيه وگعدت
هسه بعد شدة اني شلون راح اطلع من الصاله كلهن گعدات وحده لاطشه بالثانيه أخيرها رسميه گوه طلعتني وتگلي صعدي فوگ خلي اجيبلچ ثوب من عندي مؤقت لما اگصلچ ثوب ترى بده تلمز عليچ
صعدت ركض فوگ بس تفاجات الغرفه الي انام بيها وغرفة بيان هم مقفوله هسه شلون نزلت للمطبخ وشفت زوجة مهند الله يرحمه وام حارث والصدمه شفت لميس وامها وأخواتها بس سويت روحي ما مهتمه الهن وحچيت ويه ام حارث وسألتها على مفتاح غرفتي
ام حارث / والله يا خاله ما ادري بس اكيد المفتاح يم بيان وهو بره هسه يجي
ريماس/ وبعدني دى احچي ويه ام حارث دخلت رسميه جايبتلي دشداشه وشال من عدها اخذتهن ودخلت للحمام سبحت ومشطت ولبست الدشداشه انوب رسميه سمينه واني ضعيفه الدشداشه تسحل عليه والدلعه مال الصدر حتى الستيان نصه طالع خليت الشال على راسي وطلعت ظليت واگفه وياهن ومخلين صينيه بيها هواي استكاين واني اخلي شكر وعمه سهاد تصب چاي وسبحان الله احنه اثنينه كل وحده عدوتها گبال عينها عمه سهاد لقاء گبالها واني لميس گبالي وظلن شگد يبسمرن بينه بس احنه نسولف بينه وما نهتم
اخيرها وگف بيان يم باب المطبخ وسمعته گال / تعالي ريماس ورايه فوگ وراح
اني رفعت راسي وچان لميس تغمني واني هم طلعت لساني الها ورحت وره بيان وصعدت لگيته بالغرفه ومن شافني
بيان / شنو انتي تستعدين للقفزه
ريماس/ ما فهمت يعني شنو
بيان / ما اعرف احنه بكليه الشرطه اخير سنه قبل ما نتخرج نسوي قفزه نقفز من فوگ الجسر للمي بس ما نخلي برشوت هسه انتي لابسه دشداشه عبالك برشوت فگتلچ عندچ قفزه
ريماس/ ما عندي ملابس سود شلبس يعني والناس كلها موجوده جوه مو لائقه البس الوان انطتني دشداشه رسميه من عدها
وهو سحب محفظته وطلع اثنين من ابو الخمسه وعشرين وانطاهن الي وگال
بيان / انطيهن لرسميه خلي اجيب الچ ملابس سود وعلى قياسچ
ريماس/ اني أحوص عندي موضوع أريد افتحه ويا بس ما اعرف شلون افتحه ظليت واگفه گدامه
بيان / ترى اني صحتلچ اريد الدشداشه السوده مو حتى توگفين مثل صنم ابو الهول
ريماس/ رحت افتح كنتور وأسد كنتور وبطلعان الروح يله لگيت الدشداشه أخيرها بعد ما تحملت گتله / تدري لميس موجوده
بيان / اي شسوي لقنادر أذا موجوده
ريماس/ يعني تدري
بيان / يا رب انطيني الصبر بابا فاتحه والناس كلها موجوده القريب والغريب شتريدين اسويلها يعني
ريماس/ لبس دشداشته وراح ما اعرف منين طلع يشماغ اسود خلا على راسه وهو يگلي / قفلي الباب وخلي المفتاح عندچ
واني هم نزلت ورا وطبعاً بعد غده ودي وجيب واغسل مواعين والجاي كل ساعه متنه لساعه 4 العصر يله تغدينه اني وسهاد والحچي والتبسمر على راسنه اني وعمه سهاد من لميس وامها وأخواتها وبدوا يسوون عشه وهم نفس الغده لساعه 12 بالليل يله شويه هدئنه وبيان دخل يمنه للمطبخ اخذ گلاص چاي والمفتاح مال الغرفه وصعد واني دى اغسل ويه عمه سهاد ورسميه وام حارث المواعين شفت لميس صعدت فوگ بصراحه ما اعرف شنو من شعور اجاني عفتهن يغسلن بالمواعين وصعدت هروله فوگ ركض رحت على الغرفه الي انام بيها يوميه طلعت بيها لميس من شافتني گالت /
لميس / خير يا وجهه الططوه شكو جايه بغرفتي شنو حاگرچ وتنامين هنا
ريماس/ احس نار بگلبي جاوبتها / ليش اني لميس الي تركض ورا وهو ما معبرها ليش انام بغرفتچ حبيبتي اني انام بحضن زوجي ما يگدر بدوني
وهي تخبلت ظلت تغلط بس بصوت خافت ما تريد احد يسمعها وتغم بيه ضحكت وطلعت لساني الها وعفتها ورحت دخلت غرفة بيان وهو چان گاعد على السرير ويگلب بالموبايل ويشرب بالچاي من دخلت وسديت الباب ظل يباوع عليه نزعت الشال وفتحت شعري ورجعت رحت لغرفة لميس سحبت ملابس الي وعطر وهي تغلط وتفشر عليه بس ما اهتميت الها ورجعت للغرفه يم بيان وهو يباوع عليه
نزعت الدشداشه السوده گدامه ولبست دشداشه الوان وخليت عطر واجيت نمت بصفه
بيان / شبيچ بابا شنو ساطرچ العباس شسوين نايمه يمي اطمئني اليوم ما اسوي ثواب على روح عمي تعبان وأريد انام الفاتحه هلكتني روحي نامي بغرفتچ
ريماس/ لميس هناك تريدها تضحك عليه وتگول زوجها شامرها خارج غرفته
بيان / حمدالله على نعمة العقل هسه تنامين يمي بالغرفه فهمنه بس مو يمي على السرير روحي نامي بالگاع
ريماس/ اني قبل ليله ما نايمه لانه چنت ويه الحجيه بالمستشفى والنهار كله گظيته شغل وتعب حتى ما جاوبته على كلامه جريت الغطى ولفيت راسي ونمت
بيان / چان في بالي يجي يوم من الايام واشوف أغاريد بس ابد ما اجى في بالي انه الگاها جثه هامده وبعد الفاتحه الي چنت ماخذ بيها اجازه رجعت لدوامي بس نفسيتي مكسوره ومر على وفاة أغاريد اسبوع من اتصل بيه
فرقد وگال / أبشرك وگع ابو شوارب بيدنه
بيان / صدگ سيدي والله
فرقد/ اي لزمنا وربك الشباب وگعوله دگ تكفخ وچلاليق تعال ومن تجي نسولف
بيان / وچانت الساعه حدود 1 الظهر من فرحتي ما
انتظرت لما يخلص الدوام گبل رحت على فرقد وبقيت انتظر لانه جايه لجنه على فرقد من شؤون الداخليه لما طلعت اللجنه اني طالعه روحي لساعه 3 ونص يله طلعوا من دخلت يم فرقد لمكتبه
فرقد / اول ما نلزم اجتي لجنه من الشؤون عليه بالبدايه افتروا بالسجون وطابقوا الاسماء ويه السجناء وبعدها اجوي يدققون بقضايا الي احقق بيها عبالهم اني غشيم حمدلله اني شغلي كله بالسليم واطبق مثل الي يگول حرامي لا تصير من السلطان لا تخاف
بيان / يعني شنو قصدك
فرقد / ابو شوارب اليوم نلزم في بستان بأطراف بغداد ويا 9 اطفال اربع ولد و5 بنات ومن حس انه الشرطه اجتي عليه راد ينهزم بس لگى الشرطه والجيش مطوقين المكان واشتبك ويه الشرطه والجيش هو يرمي عليهم وهمه يرمون عليه بعدها گدرت القوات تلزمه وسلموا الي الساعه 8 ونص الصبح اليوم بعدني ما محقق ويا اجوي لجنه من شؤون الداخليه عليه وربك هسه يله طلعوا ليش اجوي بهذا الوقت بالتحديد بعدين نعرف ذوله جيتهم مو منا والدرب اريد أتغدى ميت جوع انت متغدي
بيان / لا والله سيدي من ساعه 1 الظهر اني انتظرك
فرقد/ هسه اطلب غده الي والك اني اليوم خفاره راح اگظي خفارتي على ابو شوارب وابشرك شواربه حالقها ولو هي الشوارب مو مقياس الرجوله لانه حمدلله حتى الفقمه عدها شوارب
بيان / وفرقد جاب غده وتغدينه وبعدها جابوا ابو شوارب واني گاعد اي شي يسأله عليه فرقد ينكر وحتى الادله الي واجه بي فرقد والأطفال الي چانوا يمه بس بقى مصر وينكر ويريد محامي اله
فرقد/ بعيني غير اليوم اجيبلك 10 محامين
بيان / وصاح على الشرطي فرقد وطلب منه يسلمون ابو شوارب للشباب وكلمة شباب يعني تعذيب لهذا استاذنت منه وطلعت
ومن وصلت للبيت رجع اتصل بيه فرقد وطلب تجي ريماس حتى اشوف ذوله الاطفال الي چانوا ويه ابو شوارب اكو من ضمنهم اخوانها او أخواتها وعدته ثاني يوم اجيب ريماس ويايه
دخلت للبيت لگيت ريماس بالمطبخ وياها بيبي وبس سلمت عليهن وگلت السلام عليكم گالت بيبي / روح للمستشفى لميس دى تولد
اخذت عنوان المستشفى ورحت لگيت مدخليها صالة العمليات وموجوده عمه لقاء وعمه سهاد وابويه وعمي وسام والجو چان مشحون تحس على غفله تگلب بين عمي وسام وعمه لقاء وما طولنه هواي حتى طلعت الممرضه جابت طفلتين وانطتهن النه وبعدها طلعوا لميس من صالة العمليات تحمدت الها بسلامه وسميتهن أغاريد وتبارك وعسى أغاريد بنتي يكون حظها احسن من أغاريد اختي الله يرحمها وبقيت تقريباً ساعه واني چنت تعبان لهذا رجعت للبيت دخلت للحمام اسبح وبعدها صحت على ريماس جيبلي ملابس
سبحت وكملت أصيح عليها ما جاوبتني ابد لفيت المنشفه على خصري وصعدت فوگ لگيتها بالغرفه گتلها / معقوله ما سمعين من اصيح عليچ على ملابس
ريماس/ سمعت شنو طرشه اني وما اسمع
بيان / بصراحه انتي عذرچ اقبح من فعلچ إذا سمعين ليش ما تردين
ريماس/ واني شعليه بيك اني مره خطار عدكم كلها فتره واطلع منا ليش أخدمك تجي ام أطفالك تخدمك اني معليه بيك
بيان / شبيچ بابا أنتي شاخطه عقلچ بي شي وشعليه بلميس اني المره مسويه عمليه قيصريه وبالمستشفى شجاب هاي السالفه براسچ
ريماس/ خطيه صرت ادافع لمرتك ام اطفالك اعتيادي اليوم فرحان راح يطير من الفرحه
بيان / اعتيادي افرح اليوم الله انطاني هديه وأحلى هديه شلون ما تردين افرح
شو هاي گامت تبچي من سألتها ليش تبچين اتقربت عليه وخلت ايدها على صدري وتگلي
ريماس/ احبك بيان اموت عليك ما اتحمل اليوم انت فرحان بلميس لكون جابت إلك اطفال
بيان / واني احبچ واموت بيچ والله بس احنه ما راح نكمل سوه لزموا ابو شوارب يعني القضيه انتهت كلها يومين ونطلگ
شكرا لزيارتكم عالم روايات سكيرهوم
