رواية أعظم خيانة الفصل الثاني والثلاثون بقلم الزهيريه
اغلب الندم ليس لأنك
فعلت أشياء خطأ
لأنك فعلت أشياء صح
للشخص الخطأ
ريماس/ مرات يجيك شخص الصح بالوقت الغلط وهذا چان حالي ويه بيان اني اعتبر بيان اجاني بالوقت الضايع بس ما باليد حيله المهم استمرت الفاتحه3 ايام وصحيح الي يگول كلمن عدوه گبال عينه واني وعمه سهاد كل وحده عدوتها گبال عينها اني لميس وهي لقاء واليوم الاخير صارت الختمه المغرب بره جابوا سيد ختى واحنه النسوان ختمت ملايه بعد العشا الناس كلها راحت بقينه احنه اهل البيت
وبالمطبخ چان الشغل هواي ولقاء وبناتها گاعدات بوقتها صاح عمو وسام على عمه سهاد حتى جبيب چاي اجتي لقاء هي حمت الچاي وراحت انطته اله ما اعرف بوقتها شنو الي صار لانه گبل عمو وسام گام يغلط على لقاء رحت لصاله الفضول عندي فول
وسمعت عمو وسام يگول لقاء / انتي احد مصخم وجهچ صحت على سهاد انتي سهاد وبعدين انتي مره مطلگه شكو جايه هنا لا تعزينه ولا نريد نشوف خلقتچ يله ولي بعد شكو ماتت الحماره وخلصت الزياره
ريماس/ بس لقاء ما سكتت ظلت تغلط وتفشر وانه راح تشتكي على وسام بوقتها جاوبها
بيان / احنه بيا حال وانتي بيا حال بس گليلي بيا لغه نحچي وياچ وتفهمين انتي مطلگه وهو زوج روحي شوفي حياتچ التهي بنفسچ كل شويه وناطه النه هنا وشنو هاي القباحه مشتكيه عليه انتي وبنتچ وجايات هنا مگابلتني وگاعدات وبعدين اخوچ الگواد المگرن مديح اخته حتى تلم اله فلوس من اهل طليقها صار 3 هنا ما گال تعالي لو اخوچ مگرن اصلي يله ولي طلعي منا وهاااا اخذي بنتچ بيدچ مو تعوفيها هنا
ريماس/ شنو نوع الفشار الي عمري ما سامعه مثله ابد سمعته من لقاء هنا بيان بعد ما أتحملها وگعلها تكفخ وهو يگللها انصحچ روحي اشتكي مره ثانيه
ومن دى تطلع ما قبلت تاخذ لميس وياها وتگول / شنو اخذ لميس وهي على وجهه ولاده اخويه يتحملني اني ولميس وتريد ذب خلفتك عليه هم
بيان / لا گولي سيبچن هنا تلمن مصرف بطل العرگ مالته شلون عادي عنده يگود عليچن في سبيل تجيبن اله بطل العرگ
ريماس/ طلعت لقاء وبقت لميس يمنه وانتبهت من بيان وعمو وسام موجودين كلمه ما ينطقن يخلن بس امهن سربت حچي المهم خلصنه الشغل كله هلكت اخذت ملابس سبحت وصعدت فوگ وبعد ما شفت لميس باقيه دخلت اخذت غراضي وملابسي من يمها وهي تگلي
لميس / عبالچ اعوفچ تتهنين لو تموتين باقيه على گلبچ شوفي إذا ما هججتچ مثل ما هججت ميقات هسه شوفين
ريماس/ ما اهتميت لكلامها ومن رجعت لغرفة بيان لگيته هو صاعد وموجود بالغرفه ومن شاف ملابسي والغراض بيدي
بيان / خير يا طير شو راح تستحلين الغرفه
ريماس / والله ضرتي رجعت لغرفتها واني وين اروح
بيان / ترى اكو بعد غرف هواي غير هنا
ريماس/ اي روح جهزلي غرفه وأني اروح بيها حتى ما أزعجك انت وميقات
بيان / وانتي منين تعرفين ميقات
ريماس/ بالبدايه توضحلي ميقات منو
بيان / اولاً اني ما مضطر اوضحلچ لانه وجودچ هنا مؤقت وثانياً ميقات زوجتي
ريماس/ شنو ليش انت كم وحده مزوج
بيان / حبيبتي انتي الثالثه
ريماس/ عزززه بعينك انت ما تشبع
اجى عليه خله أيده وسحبني عليه ويگلي
بيان / مو كل وحده ينشبع منها هسه عندي انتي بصراحه ما اشبع منچ حاير بشغله وحده بعد ما تروحين منا شلون منو يسد مكانچ
ريماس/ لا تخاف لميس موجوده تسد مكاني
بيان / هاي بالتحديد لو تموت ما تاخذ من مكانچ شعره بابا هي مكان ميقات ما اخذت منه شعره انوب مكانچ
ريماس/ بالبدايه ظل يلعب بشعري بعدها باصبعه يمرره على شفايفي گتله / احبك
بيان / واني امووووت عليچ
ريماس/ كل مره يتقربلي قصده يشبع رغبته هاي المره لا چان كل شي يسوي بمشاعره وهاي اول مره بعد ما يتقربلي الليل كله منيمني بحضنه وبعدها مرت الايام مرار ويه لميس بس چنت اجاهلها إلى ما بيوم چنت بالمطبخ دى اسوي چاي لعمي سامي اجتي لميس حچت غلطت ما رديت عليها بس للامانه چنت اطلع الها لساني اغيضها اجتي جرت شعري وضربتني هنا بعد ما تحملتها اني همين دفعتها قوي وگعتلها دگ حتى شعرها صار بيدي وهي تعيط
اجى عمو سامي گام يصيح عليه وجرني منها وگوم لميس وهي تبچي وتگله والله عمو اجيت اشرب مي ولا يمها ولا حواليها وضربتني وتگلي إلا اموت الي بطنچ
جاوبته / والله عمو چذابه اني دى اسويلك الچاي وهي ظلت تغلط عليه من شافتني ما ارد عليها ضربتني واني رجعت ضربتها
سامي / والله عمو عدچن رجال يجي هو يحير بيچن وبطلايبچن اني ما بيه حيل عندي ذبحه صدريه طفي لچاي ما اريد
ريماس/ وعمو سامي راح اني هم خليت وصعدت فوگ وبعد ما نزلت چنت مشغله التلفزيون ونايمه ما حسيت غير بيان يگعدني
بيان / شو اليوم نايمه لو لكون وراچ طلابه
ريماس/ لازم بلغتك خطيه هاي سريعة التوصيل الحراري والكهربائي
بيان / عيني نيوتن شبيچ ويه لميس
ريماس/ گمت وصلت يمه وخليت ايدي على حلگه واگله / لا تگول اسمها على لسانك گدامي گول حرباء گول حيه گول عگربه
وهو ضحك وذب ملابسه واجى حضني ويبوس برگبتي ويگلي
بيان / ولچ شلون بيچ وبالسانچ الي يرادله گص لسانچ ينگط
ريماس/ ما خليته يكمل كلامه خليت شفايفي على شفايفه وبسته بقوه وبعدها گتله / شبي لساني
بيان / تعالي ويايه للفراش واگلچ لسانچ شبي
ريماس/ إذا اگول اموت بيان قليله بحقه كل لحظه ويه بيان تسعدني وبعدها دخل سبح ونزل يريد غده اني هم نزلت ورا حميت الغده وگعدت اكل ويا وطلع علينه زقنبوت لانه اجتي البومه لقاء وبدون لا سلام وكلام حچت ويايه
لقاء / انتي شلون تضربين لميس وهي حامل والله لو موجوده اني چان كسرتها لايدچ
بيان / انتي بنت ابوچ أضربي ريماس وشوفي إذا ما كسرت ايدچ وخليتها ..... وانتي شكو عايفه بنتچ هنا بابا إنتن الكرامه ممسوحه عدچن بابا بنتچ منا لبعد 100 سنه راح تبقى ذيچ الرخيصه بنظري الي چانت تبوس قنادر في سبيل اقبل بيها بس انتن بلا احساس صفر
لقاء / يعني هي الي تحافظ على بيتها صير رخيصه
بيان / بابا يا بيت الي چانت تجي هنا وغايتها تهجج ميقات وسبحان الله شوفي الله شلون علعلچن انتي مطلگه وبنتچ حمدلله لاهي مزوجه ولاهي مطلگه عدها عقل خلي تطلگ وتروح شوف حياتها واكيد راح تلگى الاحسن مني موقفي من ناحيتها ما يتغير
ريماس/ وكالعاده من جيات لقاء يمنه تنتهي بعركه وعلى ثاني يوم بيان بالدوام ولميس صار عدها وجع في بطنها تعيط وتستريح اخذها عمو سامي للمستشفى وبعد تقريباً ساعتين أجى الخبر للحجيه انه لميس ولدت تؤام بنات اني متت قهر واجى بيان طالع من الدوام ورايح للمستشفى وهو شافني گالبه خلقتي ومن عرف السبب گال لزمنه ابو شوارب وكلها ايام ونطلگ صدگ تخبلت گتله / ما اگدر اعيش بدونك بيان احبك والله
بيان / صدگيني بس اول فتره راح تتعذبين لكن مع مرور الوقت راح تتعلمين على عدم وجودي وتتأقلمين
ريماس/ وانت هم راح تتأقلم على عدم وجودي
بيان / نفس الوضع الزمن كفيل أنه ينسني صح بالبدايه صعبه بس تهون ويه الوقت
ريماس/ وليش هذا العذاب بيان خلينه نكمل حياتنه سوه
بيان / بصراحه راح اگلچ شي ماكو احد يعرفه وهو اني من النوع الشكاك لو چنت ما اعرف ماضيچ چان هانت السالفه عندي بس ماضيچ اعرفه لهذا ما من الممكن اخليچ يمي انتي هنا بالمزرعه كحمايه حابسچ هنا بس مستحيل اخليچ محبوسه لازم تردين تروحين وتجين وتاخذين راحتچ مو مقيده يمي وانتي بعدچ صغيره اليوم تحبيني وتتحملين بس بمرور الوقت صدگيني راح تنفرين لانه راح تكبرين وعقلچ ينضج راح ترفضين هذا السجن راح اكلچ شغله تذكرين بيوم جبنه تابوت أغاريد للبيت وبيبي تخربطت ومن ماكو احد يروح وياها ورحتي انتي تدرين طول الطريق بالي يمچ ساعه اگول هسه شافت احد او ضحكت ويا او شاقت لهذا شوفيني ساعه 1 بالليل من الدفنه عليكم اجيت للمستشفى وبقيت وياج لما طلعنه الصبح فهمتي عليه لهذا اسلم حل كل واحد يروح بطريقه
ريماس/ قصدك لكون تعرف الماضي الي چنت مجبره عليه تعوفني
بيان / اني دى اعوفچ حتى ارحمچ من الجحيم الي ينتظرچ إذا بقيتي يمي باچر اخذچ ويايه تشوفين مجموعه مال اطفال تشوفيهم اكو بيهم من اخوانچ واخواتچ واحسبي حسابچ الليله آخر ليله الچ بيها انتي يمي
ريماس/ خلاص الي ما يريدني ربح خساره وما اريده بس عندي طلب يمك إذا نفذته اكون ممنونه منك
بيان / رغم قساوة قرارتنه بس راحتنه بقرار يكون بي راحة البال افضل من راحة القلب اني حبي لريماس ما انكره بس ما اغلط روحي البنيه اني اعرف شنو چانت وهذا ماضيها راح يبقى حاجز بينه طول العمر لهذا من حچيت وياها هي چان عدها طلب واني ثاني يوم من طلعت الصبح اخذتها ويايه حتى شوف الاطفال رحنه على فرقد للمركز وانطانه ورقة سماح نروح نشوف بيها الاطفال وچانوا خاليهم بالأحداث
وصلنه وشوفناهم الورقه الي ويانه ودخلنه يم موظفه وچانت باحثه اجتماعيه وجابوا 9 اطفال 5 بنات 4 ولد اول ما دخلن البنات ريماس گامت تركض وحضنت اثنين منهن وگالت / ذني اخواتي
بس الولد ما تعرفت عليهم لهذا الباحثه گالت / نلجىء للتحليل إذا تطابقت ويه ريماس معناها أخواتها وبوقتها سحبوا دم من ريماس ومن ردنه نطلع ونأخذ البنات ويانه ما قبلوا لانه ريماس ما بالغه سن القانوني لازم وصي عليهن من الدرجه الاولى
لهذا اتصلت بعمها احمد وبلغته بالموضوع كله وهو رجال ما قصر بقينه ننتظره تقريباً ساعتين يله اجى وقع على استلام البنات وطلعنه ومن طلعنه خارج الاحداث
گتله لعمها / الله بالخير عليك اني وفيت بكل كلمه گلتها إلك وانتهت القضيه هاي بنت اخوك يمك سالمه ورجعت أخواتها الها زواجنه بعد ما اله لزمه لهذا راح اطلگها
انتبهت على ريماس گامت تبچي وشگد انقهرت عليها بس ما بيدي حل
ريماس/ بس اني گتلك عندي طلب يمك
بيان / آمري
ريماس/ اني من زمان اريد اطلع خارج العراق ولكوني قاصر ما اگدر اطلع واخواتي ما بالغات سن القانوني أنت كضابط تگدر تطلعني بكوني زوجتك
بيان / انتي زوجتي بعقد سيد مو بعقد محكمه لهذا مستحيل اگدر اطلعچ اعذريني
ريماس/ خلاص براحتك
بيان / ورحنه على اقرب مكتب زواج وطلاگ ودخلنه للمكتب بس شنو احس روحي راح تطلع وبده سيد بأجرأت الطلاگ ومن طلب مني اذب اليمين الطلاگ عليها ذبيته بطلاق واحد وطلعنه بس هي شنو منتهيه گد ما بچت راحت صعدت بسيارة عمها احمد يم أخواتها وسلمت على عمها وظليت أتعذر منه واني عيني على ريماس بس هي ابد ما صدت عليه
وراح عمها ركب بالسياره وحرك السياره وبقيت واگف اباوع على السياره إلى ما اختفت عن نظري صعدت سيارتي اريد أتنفس شغلت تبريد السياره احس الهوى يدخل لرئتي يحرگها حرگه بگلبي شلون راح اتحمل هي ماكو ما اعرف شلون سقت السياره وصلت للبيت
لگيت مطلعين لميس من المستشفى وجايبيها للبيت وابويه سالني على ريماس گتله / يم بيت عمها
وصعدت للغرفه ما اعرف ليش احس دموعي راح تنزل گبل نزعت ملابسي ودخلت جوه الدوش حتى من تنزل دموعي تنخبط ويه المي وأقنع نفسي انه دموعي ما نزلت على مود ريماس
مر على طلاگنه اسبوع ونفس وضعي لا عقل راضي ينساها ولا گلب ما يشتاقلها وبهذا الاسبوع اتصل بيه
فرقد گال / رضيعتك الله يرحمها بأسم أغاريد ما عليها قيد جنائي صح
بيان / اي ما عليها اي قيد جنائي لانه دگيتها حاسبه
فرقد / الله ينور عليك بأسمها المستعار دگيته حاسبه وشفت عليها قيد جنائي
بيان / والله سيدي ما اعرف اسمها المستعار الي چانت تستخدمه
فرقد / عيني زوجتك الي چانت وياها اكيد تعرف اسالها وردلي جواب اريد ادگه حاسبه
بيان / تمام سيدي
يعني هنا لازم اسال ريماس لهذا ثاني يوم بعد دوامي الظهر رحت على بيتها دگيت الباب سمعت صوت اعشقه صاح منو
بيان / اني بيان
انفتحت الباب وصارت گدامي ريماس وجهه شاحب سلمت عليها
وگتلها/ ولو اسوي زحمه عليچ اغاريد الله يرحمها شنو چان اسمها المستعار الي چانت تستخدمه
ريماس/ وانت جاي حتى تعرف هذا الشي رجاءً بعد إذا تريد شي اتصل بعمي احمد وهو يتصل بيه واني اجاوبك عن طريق عمي احمد لا تجي هنا واني راح اخلي عمي احمد يدزلك الرقم برساله مع السلامه
بيان / بعدني اريد احچي وياها چان سد الباب بوجهي
سلمت امري لله ورجعت لبيتنه اتصل بيه عمها وگال
احمد / اخويه اني ما اريد أحرجك بالكلام بس انت اليوم رايح لبيت اخويه سلام الله يرحمه وهنه بنات وحدهن ما يصير انت زلمه تروح عليهن للبيت الناس من شوفك شتگول ريماس ما تقبل وهسه راح ادزلك الاسم الي انت تريده واي شي تريده اتصل بيه لا تروح عليهن
بيان / تآمر ست ريماس بعد ما اوصل ولا اريد منها شي وغلقت الخط ويا ودزلي اسم أغاريد المستعار الي هو رحاب والاسم الثلاثي
واني بدوري رسلته لفرقد وبعدها اتصلت بفرقد وسالته على ابو شوارب شنو نتيجة التحقيق ويا
فرقد / والله اول تعذيب اله حچى اشياء مو منطقيه بس صار اسبوع هواي شخصيات ادخلت حتى يطلعوا والمحامي مالته رايح مشتكي عليه بشوؤن انه اني أعذب المساجين وانتزع منهم اعترافات عاريه عن الصحه وحتى بمجلس القضاء الأعلى هم مشتكي
بيان / سيدي مو الموضوع دى يكبر اكثر من توقعاتنه
فرقد/ اكيد كبر لانه الشخصيات الي ادخلت على موده معروفين بالبلد وطنيين وليل ونهار ماكلين مخ راسنه بخوفهم على البلد وهمه بايعين البلد تفصيخ هسه الضغط عليه يريدون ما احقق ويا وحادثة لزمنا متلبس بتجارة الأطفال ما اذكرها بالتحقيق يعني اگول مشتبه به حتى گبل يجيبون كفيل ويطلعوا وثاني يوم تلگى بأربيل ويضيع موضوعه وبعد فتره يرجعون يصدروا النه في بغداد بس بأسم ثاني فهمت
بيان / اكيد سيدي هذا زلمتهم ويعرفهم ويخافون لا يجيب اسمائهم
فرقد/ اكيد لعد مستقتلين عليه عبالك محبه لا هذا چان اله تماس مباشر وياهم يعني يعرفهم معرفه دقيقه هسه اخذت الاسم منك وحولته على ابو الحاسبه حتى يدگ الاسم ونشوف واردلك خبر
بيان / وانتهى الاتصال بينه وما يقارب ساعه 2 بالليل اتصل عليه
فرقد وگال / مثل ما توقعت اسم رحاب عليها تهمة غسيل اموال ونحكمت سنه مع إيقاف التنفيذ وممنوعه من السفر
شكرا لزيارتكم عالم روايات سكيرهوم
