رواية ناديه الفصل الثاني والثلاثون 32 بقلم انين الليل

ناديه

واستمر هذا حالي وكملت الدورات وسط ثناء المدرسين وتشجيعهم الي وكل مدرس گالي 

- - اي شي ما تفهمينه تجيين لهنا واحنا نفهمج ايا حتى لو الماده باكملها نعيدها هم صار وتدللين

انا احيانا افكر معقوله المدرسين وست خوله تحن عليه لان شاطره ويتيمه مع العلم دووم اشوفها تدز

 على طالبات الي ما دافعات فلوس الدورات او باقي عليهن قسم لكن انا يعاملوني باهتمام حتى ساعات اضحك 

بيني وبين نفسي واگول

......يجوز عبالهم ابوي فد انسان مهم لان ست خوله شافت ياسر وگلها مهندس 

بعدين اگول...... شنو المهم بالموضوع اشو من بداية الدوره وانا البس نفس العبايه الاسلاميه الي جابتها اليه مرت

 عمي كرم

وبدا الدوام وبوكتها هادي انطى فلوس الافراح وهاي اول مره يسويها گلها 

- - - اشتري الناديه وحنين ملابس للدوام 

هي اخذتهن وهزت راسها وهو گال //اخذيهن وياج خلي يختارن صداريهن بنفسهن 

وطلع عمي هادي بعد ان گالت افراح //باچر الصبح اخذهن يشترن

ثاني يوم گعدنا واحنا نمني نفسنا لان اول مره من اكثر من تلث سنوات راح نطلع ونشتري ملابس على ذوقنا 

صحيح عمه زهراء الله يذكرها بالخير چانت تجيب النه ملابس يمكن اغلى وانزك شي بالسوك لكن هي راحت 

ونستنا مثل ما اهواي نسونه

تريگنا انا وحنين الي غسلت الطارمه بعد ان طلع عمي هادي هو وياسر للشغل والباقيين نايمين لمن ما گعدت افراح

باوعتلي بنص عين وهي تگول //ها نازله بيها خواره 

سكتت ما جاوبتها راحت صبتلها كوب حليب وگالت

- - اسمعي انتي وحنين انا راح اروح واشتريلچن ملابس ما متوازيه اطلع وياچن ويلاگني صاحباتي 

گرايبي ويسالني // ام ياسر مني ذن وابدي اشرح الهن بنات حماي 

ها الي عندج هاي الي امهن كتلت ابو..

حنين بدون وعي صاحت //كافي عمه ما نرووح كافي الخاطر الله اي امنا الي كتلت ابونا واحنا عشنا ابيت عمنا

 خدامات الج والبناتج ولولدج

افراح وهي متفاجئه //انچبي يا ادب سزز بس انتي منين تطلبينها (خلت اصبعها على حلگها ) انچبي وكلمه وحده 

ما اسمع اسمعي انتي وياها راح اجيب هدوم وقنادر تاخذنهن وانتن ساكتات مو عوزي تتمشن والناس تصنف انوب 

هاي العرجه گوه تمشي (وتأشر عليه )

حنين رادت تحچي لزمت ايدها وعصرتها يعني اسكتي وصعدنا هي گالت 

وين وين صاعدات 

درنا عليها گالت //شنو اليوم ما عدچن شغل 

حنين //من البارحه كملنه كل شي عبالنه نروح نشتري ملابس 

افراح //اي ومن يسالجن هادي انتي ناديه گليله عندي دراسه وحنين گليله ما رحت لان اختي ماراحت

جاوبتها ......صار عمه بس مو تنسين تشتريلي ترانشوز حتى ما اعذبج واطلع وياج ابدله 

افراح //لا ما انسى ادري بيج ما تكدرين تلبسين عالي لان تطيحين

صعدنا حنين چانت كلش عصبيه بينما انا چنت هادئه لكن بداخلي بركان مال انتقام من افراح الحقيره

حنين //اله من يجي عمي اگله اريد اعرف شنو احنه بهالبيت خدامات لو شنو 

جاوبتها ...لا احنا بهالبيت بنات مياده 

حنين //مياده ماتت وشبعت مووت واحنا بقينا للتعب والعار 

لزمتها من چتفها وحچيت ...... ما تبقى هالشكل حنين لازم تتغير بس يراد نتحمل 

حنين //قصدج يراد الها صبر مثل ما گالنه عمو سراج

سكتت ما عقبت واجت افراح هي وهديل وجابت صداري وقمصان وترانشوزات الي واحد والحنين واحد اخذناهن 

وگدرناهن ثاني يوم لبسناهن وطلعنا للدوام شافنه ياسر وهادي لان احنه نطلع من باب المطبخ اسمع ياسر يگول الامه 

حجيه شنو هذن الي لابساتهن البنات 

افراح بنتر //شنو صداري 

ياسر //الله عليج يمه هذني صداري والي لابساتهن بناتج صداري 

افراح خلت رجل على رجل //بناتي ينطوهن المدرسه لان اهليه وهذني على گد فلوس ابوك شنو تريدني 

اصرف من عندي منين اجيب

طلعنا واحنا نسمع كلامها وابتدت السنه حنين الي مخليه ابالها ما تنجح لان كل الشغل راح يصير عليها وانا الي مخليه 

ابالي لازم انجح وبمعدل عالي وما يهمني اي شي ثاني

وصرنا انا ادرس وحنين تشتغل لان ست افراح يوميه شغله جديده الي عجبني بحنين صارت تتصرف مثلي 

واي شي تگوله افراح تگللها صار وتدللين انا بقيت اراقب بعمار الي اخاف من نظراته على اختي 

اتذكر بيوم افراح گالت الحنين //طلعي الزوالي مال الديوان البراني وغسليهن 

حنين جاوبتها // عمه الدنيا بارده شيغسلهن وشينشفهن وثگال منو يشيلهن وياي 

افراح ردت بنتر //اختج تشيلهن وياج لو على رجليها نقش الحنه

حنين // عمه انا اشتغل شغل اختي وشغلي واختي ما تسيطر تشيلهن بسبب رجلها 

افراح //مو مشكلتي دبري حالج انا رايحه انا والبنات اشوف امي اجي العصر الگاهن مغسولات ومشرورات 

وانتن سولجن اي شي گلن طماطه وخبز لان الولد يتغدون بره

راحت افراح واخذت بناتها وياها وصعدت حنين يمي وهي مقهوره سولفتلي انا گتلها 

......هسه انزل اساعدج 

حنين //شتساعديني اربع زوالي كبار تعرفين شنو اربعه كبار وانتي ما تكدرين من رجلج 

...مي خالف طلعيهن الي وانا اجلفهن 

حنين باوعتلي گالت //ندووش انتي واثقه بيه 

عكفت حواجبي //شقصدج حنين ؟

حنين //قصدي مثل ما افراح حياله وكل ما تجي وحده من جاراتها تعوج حلكها وتكلهن ربيتهن ال الله شريد

منهن حالهن من حال بناتي خلي شويه نعيش بالحيله 

جاوبتها باستغراب ......شلون يعني 

حنين //يعني هسه ادك الباب على اعمير المكروه واسلهمله عيوني ومو بس يغسل زوالي الديوان لا وحتى 

زوالي الصاله يغسلهن وهو الممنون 

انا اتذكرت كلامه ويه ياسر گتلها ...لا حنين هذا ابن امه افراح الشريره

حنين //وانا بت مياده ودووم فروحه تگول العرق دساس 

...تدرين من تسوين هيج تعمين حتى عليه وانا اريد انجح 

حنين تبتسم //وج شبيج لا تخافين وانتي ناديه ما قاصره بس هدفج بعيد وهذا الصح انا هدفي يغسل الزوالي 

واذا ما قبل وگال الامه 

اگلها اي عمه طلبت منه يشيلهن وياي لان ندووش التوت رجلها من شالتهن

ما خلتني ارد عليها نزلت وانا نزلت وگفت ع الدرج وانا اباوع الها وخايفه عليها دكت الباب 

اسمعها تحچي بهمس //انا عمار افتح 

هو طلع لابس تراك برموده ويباعلها متفاجأوهي تلم بشفايفها وتگله 

- - اسفه عمار گعدتك بس محتاجه مساعده منك 

هو بنظراته الخبيثه //ادخلي حنين شرايده

حنين عكفت حواجبها وعوجت حلگها //لا شنو ادخل تريد امك تجنزني محتاجه مساعده تگدر لو لا 

عمار //اي حنونه شتردين 

حنين باستعطاف //ساعدني تعال انزل جوه وياي شيل الزوالي مالت الديوان لان امك تريدني اغسلهن بهالبرد 

شسوي بعد هاي امك تحير شتطلعلي من شغل ما اعرف ليش ولا واحد بهذا البيت يحبني

عماار //شنو ولا واحد وانا وين رحت 

حنين بدلاعه //ما مبين عليك ياسر بس يدافع النه وانت دلوع الماما 

عمار بنتر //ولج شنو هالحچي 

هي صارت ترمش وگالت //ها عمار ناسي خلي اذكرك 

عمار //لا حنين بس انا من ادافع تنوخذ بغير شي 

حنين //هسه عوفنا بيك تنزل لو اروح اشوف مصيري ابحدي

عمار //عمي انا خادم وجسر للطيبين اشيلهن واغسلهن واشرهن 

حنين بفرح //اي هذا ابن عمي البطل وحزام الظهر

بصراحه ما قبلت على حنين خصوصا وانا اتذكر كلام عمار ونظراته الها وره فتره اجت حنين وگالت 

غسلهن ولفاهن وبس يتواشلن يشرهن 

......حنين هذا السويتي اكبر غلط 

باوعتلي وهي تهز بايدها //اكبر غلط الي سويته بس الي تسوي افراح هي وبناتها هو الصح انتظري العصر من 

تجي وتدخل وحده من جاراتها شتگول

حنين عوجت حلكها وتجر كلمتها مثل افراح //يا خيه تعرفيني نظيفه ولا چني شكبرني اغسل الزوالي ما اتحمل 

اشوف لثكه بالفراش 

جريت نفس ......مي خالف حنين ما نصير مثلها نسيتي بيبي منيره شوصتنا 

حنين //لا ما نسيت بس هم ما نسيت شسوى عمج بينا ومرته وهذا ابنهم السگط

اضطريت احچي ......ديري بالج حنين تره سمعته باذني وهو يگول الياسر هذني بنات مياده مو بنات عباس 

وعادي شنسوي بيهن نسوي لان هنه مثل امهن

حنين صكت اسنونها //الحقير انا اله 

......لا حنين حتى لو ابالج تسويين شي مو هسه خلي نحصل الشهاده ياالله 

حنين هزت ايدها //والله ثبرتينا انتي وسراج الي صار سنه ما سائل عنه شهاده وشهاده شتسويلنه الشهاده مثلا 

ترجع طفولتنه الي كلها حرمان لو مراهقتنه الي ما حسينه بيها انا اگلج شهاده بدون حيله وبدون ذكاء صدگي 

كل شي ما تفيد

هزيت راسي ......لا حنونه غلطانه 

حنين //خليج انتي بمثالياتج وانا نازله يم النذل ابن الحقيره اشوفه كملهن لو لا

اول مره اخاف على حنين من نفسها اكثر مما اخاف من عمار وره تقريبا ساعه حسيت بعمار صعد فتحت الباب 

واسمع حنين وهي تگله //شكرا عموري تعبتك وياي صدك اذا گالوا ابن العم سند وحزام ظهر 

عمار //تدللين شعندي غير حنين 

حنين //شكرا ابن عمي ياالله انت غير ملابسك لان مبللات قبل لا تجي (حيز )اقصد عمه افراح وتشوفك 

وتظل تلطم وتسويلي سالفه

عمار //هههههه لا مو الهلدرجه 

حنين بدلع //واكثر عموري ياالله اروح اگلي طماطه لان گالت انتوهم تطلعون تتغدون بره 

عمار //لا شنو تگلين طماطه انا اروح اجيب غدا شتردين 

حنين //مو خاف امك ما تقبل 

عمار //لا شنو امي ما تقبل گليلي شتردين

حنين عضت شفتها الجوه وسلهمت عيونها وحچت //. امم اذا مصر جيب دجاجه شوي وجيب وياك كباب 

عمار //تدلل حنين بس نريدج ترضيين 

حنين بدلع // عمار يجوز ارضى ويجوز لا على حسب

انا سمعتها وانا ظل گلبي يدك الف بالثانيه هي صعدت لگتني واگفه اباب الغرفه لزمتها من ايدها وحاچيتها بنتر 

...وج حنين منين جبتي هاي الجساره 

حنين تحاول تهد ايدي //شبيج ناديه تره ما احتليت فلسطين كل ما بالامر جاي احچي انا وابن عمي 

(وصارت ترمش بعيونها سريع )

...انچبي وبعد ما اريدج تشتغلين بالبيت انا غصبن ما عليه (اهنا ما اتحملت صرت ابچي )غصبن ما عليه اكمل شغل 

وادرس وحتى لو ما انجح طبني الف طووب 

حنين //شبيج ندوش والله ما سويت شي 

......ولج عمار تعرفين منو عمار ابن افراح وج باذني سمعته يگول الياسر احنه نغلات وبدل ما تلعب عليهن الزلم

 احنه اولى

حنين بتحدي //ولان هذا كلامه انا اعلمه اله اخلي يحفى وراي لا تخافين عليه صحيح احنه بنات مياده بس 

الفرق احنه ما اتدللنه ولا فرحنه ولا لبسنه مثلها وهي خانت لكن صدگي ياناديه اغفر للناس كلها بس الهذا ابن 

الكلب ما اغفر

انا باستغراب ......انتي شتحچيين

حنين هزت راسها // اي انا هم سمعت الي حچا ويه ياسر سمعته ناديه مثل ما انتي سمعتي نزلت اصب كوب چاي 

وسمعتهم يحچون هو وياسر وما دام شايفني مو بت عمه فالنغله كل شي تسوي مو ؟

انا بيأس ......شتسويين واحنه لا حول ولا قوه 

حنين هزت راسها // لا وداعتج انا اجبن مني ماكو بس هيج اريد ابرد گلبي 

......وج هذا حقير مثل امه 

حنين // والله اعرف واكثر من امه انتي لا تخافيين عليه

سمعنا صوت رجلين قريبه من الغرفه اندك الباب خلينه شالات على شعرنا سالت ... منو 

  كان صوت عمار // ياالله عيني خلي نتغدا 

فتحت الباب جاوبته ...ياسر وين ؟

عمار //معزوم ويه اصدقائه على سمج مشوي بالبر 

حنين تلم بشفايفها //اسفه عمار تعبتك وما طلعت ويه اصحابك 

عمار //تعبج راحه انا اطلع ويه اصحابي على گولتج بالليل (وابتسم بخبث )

ونزلنه ولگينا مخلي الاكل ع الطاوله وهو صار يخلي گدامنا واكلنه وعمار يسولف ويضحك بعدين خدرت 

حنين چاي وگالت //اصعدي اقري 

......لا شويه اگعد ضجت بس اقرا 

وشفت عمار يتمنى اصعد لكن انا غلست وصبت حنين العمار كوب والي وهي هم گعدت وهي تباوع العمار وتگول

- - حلو الواحد يحس عده بيت وعزوه وناس تحبه 

عمار //اي حلو 

حنين //صدك احچي ليش تستهزأ 

عمار //لا والله ما استهزأ 

جرت نفس قوي //يعني الواحد اذا مو وهو شاب يتونس ويرتاح يمته بعد يرتاح 

جاوبتها ......الله كريم حنونه اهم شي تدرسين وتنجحين

حنين باستهزاء //السنه اغسلي ايدج 

...وليش باالله 

:لان ما تشوفين كل الشغل عليه لان انتي سادس 

...اذا تگولين ارسب انا اصير اشتغل وبعدين ادرس

حنين //لا ندوش انتي ادرسي وانا اكو الي يساعدني (وابتسمت العمار وهو هم يباعلها ويبتسم )

عمار //حنين شنو تردين گليلي اسوي 

حنين //تره اتشاقى انا اعرف انت ابدك تساعدني وادري من تشوفني اشتغل تنقهر عليه بس هم اعرف 

امك شگد قاسيه ويانه وشنو راح تسوي من تسمع بيك تساعدني 

عمار //انتي ما عليج شنو تردين گليلي

جمعت بقايا الاكل بعلاگه وخلتهن بالسله وغسلت المواعين وبعدين صعدت وانا هم صعدت وياها گتلها 

......حنين لا تلعبين بالنار 

حنين باستهزاء//يانار هاي بس اليوم هسه تشوفين شراح يصير انا حبييت اسوي شي نغير بي نفسيتنا 

......ولج حنين خليني اعرف اقرا مو مال هبطات

حنين بضحك //وروح منيره ما تنهبطيين بالعشا انزلي عليج الله سوي روحج تساليني على قلم على مساحه انا 

راح ادك الجرس مرتين اول مره لا تنزلين يعني حيزبونه وبناتها اجن بس ثاني جرس انزلي

وره المغرب نزلت لان حنين دگت الجرس من اجت افراح وتقريبا وره ساعه ونص هم دكت الجرس نزلت 

شفتهم كلهم متجمعين بالمطبخ وحنين تخلي گدامهم العشا نزلت گلت ......السلام عليكم 

ياسر وعمار ردو عليه وهادي دمدم حنين گلتلي //ها ندووش شرايده 

...... اريد قل ...قاطعتني هديل //شرايده اكيد عشا 

حنين //لا اصلا هسه ما نشتهي شرايده ندووش 

......رايده قلمي وين مخليته

حنيين باستهزاء //اكيد مو بالمكتبه تلگينه بالميز الزغير الي انظم بي الكتب 

......دورته بس ما لگيته 

حنين //اخذي قلمي بس عفيه رجعي ما عندي اشتري

درت اريد اروح حنين //ندووش من تجوعين گليلي لا تستخطيني ولو ادري بيج شبعانه من غدا اليوم 

افراح عكفت حاجبها //ليش شتغديتن 

حنين //عمه دجاج وكباب شوي ويا مقبلات وتمن 

افراح رفعت حاجبها //شنو منيلچن ومنو جابلچن

حنين //عمه عموري الله يخلي طلع وياي الزوالي لان شافني ظهري مكسور وغسلهن وياي وهو 

شرهن وبعدين گلي روحي اصعدي يم اختج لا تبقيين ابحدج وانا من اجيب الغدا اصيحكم 

حتى انا گتله شراح تجيب گلي دجاج گتله جيبلي كباب وياك من زمان ما ضايگته من اخر روحه النه 

 البيت عمي كرم

افراح وبناتها ودهن يگومن يموتن حنين وگفت افراح وگالت //زين روحي اصعدي ما طوول شبعانات من غدا اليوم 

حنين //يعني عمه ما انزل اغسل المواعين 

افراح //لا شنو ما تنزلين اصعدي يم اختج وشويه ونزلي 

انا درت وجهي وحنين همه تباوع العمار وترمش سريع صعدت حنين تركض ظلت تطب برجليها ع الدرج بصوت 

مسموع بعدين رجعت نزلت بدون صوت وگفت اباب المطبخ انا نزلت وراها واسمع افراح تحچي وترزل بعمار

  - - - ولك طايح الحظ تجيب دجاج وكباب البنات مياده 

هديل //لا وبعد يغسل الفراشات چان غسلت الملابس وياك 

افراح //حتى اعوقه واحسب الله ما انطا اشو ساكت ما تحچي 

ياسر //يمه شصار تره ما كفر هو مشتهي وجاب غدا وكلن ويا 

افراح //ومن يمته تاكلون ويه بنات مياده لو عدكم وياهن شي بس صحيح منو يلزمكم بنات وشابات 

او وكيحات وشوف شيسون ليش ما تشتغلولهن تصيرون خدم الهن

ياسر// يمه استغفري ربج شنو هالكلام 

افراح بنتر //هو هذا الصدك وگدام ابووك ترا ذني بنات مياده تعرفون منو مياده اسالو عليها ابوك  

اهنا حنين دخلت وره ما كحت وباوعت العمار بنظرة احتقار وهي تگلي 

ندووش ماكو الكتاب اهنا انتي متاكده نزلتي وياج

جاوبتها ...اي

حنين //لا يجوز متوهمه لان ماكو بالمطبخ 

وصعدنا انا وحنين الي گالت //خلي بعد يتجرأ اله اغسل مجاديفه الجبان 

...اكلج حنيين صدك جبان عوزه يضم روحه بالجدر من افراح وهديل 

حنين // منين يطلبها وارث الجبن من هادي

ثاني يوم چان سبت وهديل واسيل يداومن لان مدرسه اهليه گعدت من الصبح خدرت چاي وسلكت بيض باوعت 

من شباك المطبخ شفت الزوالي طايحات بالحديقه الي كلها طين لان مفتوح البوري وصايرات الزوالي كلهن طين

 عرفت هاي سوالف افراح وبناتها لان شفت اثار بيهن طين دگيت الجرس على حنين الي نزلت وشافت المنظر 

گعدت تتريك وهي مقهوره نزلن البنات وگعدت امهن وحنين راحت صعدت ونزلت بسرعه

وافراح تباوع هي وبناتها بنظره كلها شماته اجه عمار وگال //صباح الخير 

افراح //صباح النور شعجب گاعد اليوم عدك سفره شنو 

عمار //لا مو ان...قاطعته حنين 

حنين //عمه انا صحتله اريد اگله الزوالي الي غسلتهن وتعبت بيهن وشريتهن ما ادري منو مطيحهن بالحديقه 

ومليانات طين 

افراح بنتر //شقصدج ولج ياهو مطيحهن

حنين //عمه على كيفج گومي شوفي منو الي مطيحهن يجوز حراميه ما تشوفين اثار الرجلين 

 افراح //اكيد الحرامي انا ما مواعدته يعرف المن يجي وكافي تسربتين بسرعه اطلعي اغسليهن 

حنين باستغراب //عمه شلون اسحهن 

افراح //مشكلتج اتسحيهن وتغسليهن انا ما اعرف اريدهن مغسولات يبرگن

حنين رادت تحچي انا لزمت ايدها يعني اسكتي واشرت الها تروح للحديقه ورحت صعدت فوك 

دگيت الباب على ياسر هو فتح الباب اتفاجأ بيه گلي 

- - ناديه خيير 

ابتسمت بوجهه وكتله //صباح الخير ياسر ما اعرف منو مطيح الزوالي بالحديقه ومليانات ماي وطين وعمه 

تگلنه طلعنهن واغسلنهن وحنين ما تگدر ابحدها وانا تعرف (جريت حسره ) رجل......

هو قاطعني بايده //ياالله نازل انتي روحي انزلي قبلي وانا جاي وراج 

گتله ...بس عفيه ياسر الله يخليك مو تگول انا صحتلك (وخنگتني العبره )

جر نفس وهز راسه // لا ناديه اطمني ما اگول بس لا تبچيين روحي انزلي واطلعي للحديقه

نزلت وانا دموعي جرن على خدي عبالك حنفيه وصلت يم الحديقه واشوف حنين بالطين داخل الحديقه وهي 

تحاول تلف الزوليه لكن ثگيله چنا بالصيف يوميه نغسل وحده انا وياها وننخليها تنشف ونشرها لكن بهذا الصيف 

انشغلت بالدورات فما غسلتهن

اسمع افراح تگول //هاي شنو اليوم كلكم كاعدين من وكت خيير ان شالله 

ياسر //البارحه نمت من وكت وهسه گعدت 

افراح //عبالي عدك دوام 

عمار //شلقصه يمه صار يومين من اجيت نسيتي دوامي اسبوعين صباحي واسبوع ابقى بالشركه واسبوع عطله 

افراح //نسيت تعال اتريك

ياسر //اي بس خلي اشوف السياره 

طلع ياسر وشافني گال //هاي شكو حنين ليش بالطيانه بهالبرد 

افراح //الزوالي طايحات بالطين وراحت تطلعهن 

ياسر //تحچين صدك الزوالي امس غاسلتهن وثگال منو طيحهن وفاتح الماي ومغرك الحديقه 

افراح //وانا شمدريني وما صار شي هسه يطلعنهن ويغسلنهن

ياسر //ياهنه ناديه وحنين !

افراح //اي شنو قابل مكسرات 

ياسر //يمه شنو تره هنه بگد بناتج شنو هالحچي گوم عمار وياي (طلع وگال الحنين )

اطلعي من الحديقه (رجع على عمار ) شبيك ما تگوم لو عاجبتك البنيه راح تتجمد بالبرد 

عمار گله //ما اگدر اصلا انا من امس ظهري من شلت الزوالي

اتقرب ياسر على امه وگال //عمار شكبره وشگده وظهره وجعه من الزوالي وتردين ذني البنات يشيلنهن 

ما خلاها تحچي راح ياسر دك الباب على هادي الي فتح الباب وگله //ها بابا ياسر خيير 

ياسر //كل الخيير حجي بس تعال وياي رايدك 

هادي //وين غير تگلي شصاير 

ياسر //ما صاير شي اريدك 

اجه هادي للمطبخ وياسر ورا وهادي يگول //صباح الخير 

الكل رد

ياسر //بابا تعال وياي شيل الزوالي مال الديوان 

هادي باستغراب //يازوالي ؟

 - - الي البارحه عمار غسلهن ويه حنين ما اعرف منو ذابهن بالحديقه وهنه مبللات وفاتح البوري وهسه مليانات 

طين وماي وامي تگول ناديه وحنين يطلعنهن ويغسلنهن 

هادي //منو الي ذابهن 

ياسر //ما ادري منو ذابهن حتى ماكو هوا عالي وعمار يگول ظهري يوجعني لان البارحه شارهن

هادي //هاا ظهرك يوجعك چا شنو حنين واختها يگدرن يشيلن زوالي مليانات طين وماي هاي وين لا گينها

افراح //شنو يعني يبقن زوالي الديوانيه كلهن طيانه وماي 

هادي //لا هسه انا وياسر نطلعهن

ياسر //اي يابه خلي نطلعهن وبعد شويه اجيب واحد يشيلهن وياخذهن للغسل

افراح //ياغسل هذا 

ياسر //غسل الزوالي كراج يغسلون بي زوالي وينشفوهن 

افراح //ها وبيش ذني يغسلوهن 

ياسر //يمه الج الصافي 

افراح //لا شنو الي الصافي حنين واختها يغسلنهن مو كل سنه يغسلن الزوالي 

ياسر //هذا هو هنه اربعه كل وحده تغسل زوليه ويبقن اثنيين

افراح // ومنو يغسلهن 

ياسر //وحده هديل او وحده اسيل 

هديل //ياا شنو وين بيه 

ياسر //طبعا ما بيج حييل من كثر الگعده والنوم 

افراح //اگلك انت شو متحمل علينه دا كافي كافي

راح ياسر وهادي وطلعت حنين ورجليها كلهن طين غسلتهن بالحنفيه وهي ترجف وتباوعلي وانا گوه لازمه نفسي

 ما ابچي لكن چان ابدي احرك افراح وبناتها وانا اشوف رجفة اختي بقى ياسر وهادي گالو يجون العمال يشيلوهن

ويودوهن للغسل اجيت انا وحنين للمطبخ 

هديل واسيل اجه عليهن الخط بعدهن دخل هادي ورا ياسر وهمه غسلو رجليهم وحتى تراكاتهم انتلفت طين 

گال ياسر //حييل شگد ثگيلات 

هادي جاوبه //لاتنسى ماي وطين وهنه بالاساس ثگال

ياسر //بعد شويه راح ادز عمال وسياره يشيلوهن 

حنين گالت //حرامات عاد شلون غسله غسلهن عمار الله لا ينطي الشمرهن بالطين وضيع تعبه خطيه

افراح // ولج على منو تدعيين 

حنين //عمه على الي شمر الزوالي يجوز بزون چلب

باوعت النه وگالت //اشو واگفات گبالي شمعة فگر شنو ياالله كلمن على شغلها 

حنين وجهت الكلام الي // اصعدي ناديه باچر عندج امتحان فدوه ياسر مو تنسى العمال حتى الحك اغسل 

الطارمات من الطين 

انا باوعت الحنين گتلها //راح انظف الطابق الثاني وبعدين اكمل دراسه

بيومها كملنه شغل وصعدت حنين الغدا ومن نزلت المواعين صار عينها بعين عمار الي گلها 

شنو معناتها الصبح ندهتيني وگتيلي انزل امك تريدك 

باوعتله حنين باستزغار وگالت //ردت اشوف ابن عمي وسندي كلامه صحيح من يگول انا وانا بس مع الاسف 

عمار //شقصدج ولج 

حنين //قصدي على كلامك طلع فاشوش

عمار //انچبي لا تطولين السانج 

حنيين اتقربت منه //وانت اششش (خلت اصبعهاعلى حلگها ) ولا كلمه ودير بالك تره انا بت مياده 

عمار //اي اعرفج ساقطه مثلها 

حنين //بالضبط بس بنفس الوكت مياده خلت صاحبها يكتل بدم بارد واعترفت وما اهتمت يعني اگدر كل شي اسوي

اكتل بايدي ودفاع عن النفس افتهمت ياابن عم العفويا دلوعة الماما

عمار بتوعد //انا الج 

حنين دارت علي وهيه تباوعله بنص عين // يعني شتسوي رووح بابا رووح صيح على ماما اتغطيك زين 

وخليها تگطع المصروف عنا 

وراحت حنين وهي تهز بايدها وتگول //هههههي گوه مسوين روحهم رامبو وهمه هههههه ما نگدر نگول

انا من سمعت رغم فرحت بتصرف اختي لكن خفت عليها وگلت هذا عمار حاقد مثل امه رجعت حنين يمي وگتلها 

......حنونه ليش هيچي حچيتي ويا 

حنين //احسن حتى اذا يريد يسوي شي يفكر الف مره گبل لا يعلگ وياي وهم على مودج 

......شنو على مودي 

حنين //اي حتى يتبدد خوفج وما تفكرين ممكن انجرف ويه هذا الساقط

رحت يمها وحضنتها اقلها كشفت عمار على حقيقته بس هذا ما اتصور يعبرها الها 

ومشت حياتنا حنين تشتغل وانا اقرا ومن يصير عندي فرصه اساعدها وامتحنت نصف السنه وما طلعت الاي 

مكان بس رحت شفت بيبي جميله الي لگيتها زعلانه عليه لان ما ازورها وهناك شفت مرتضى شلون مهتم الحنين

 وهي تبادله نفس النظرات لكن ياترى امه وابو معقوله يغفرون المياده الي سوته بعباس وياخذون حنين المرتضى 

اتمنى هذا الشي

انا من دخلت للسادس نسيت او اتناسيت كل شي لان چان امامي هدف لازم احققه 

بعدها بدت المدارس وبيومها انطوني الدرجات ومحد سالني كانت درجاتي كلها ثمانينات وتسعينات 

وقررت اشد حيلي اكثر وفهمت حنين الي گلتلي //اي ندووش ادرسي اكثر ما عليج اكيد من اصير بالسادس 

هم تشيليني

وصار كلمن ملتهي بحياته وبدت هديل تعتني بنفسها وتخلي مكياج وتحف واسيل همه لكن هديل اكثر وصارت

 بالبيت تلبس موديلات وشعرها دووم مسشور ونقالها بايدها بعد الدوام بشهر اجت عمتي زهراء البيت هادي 

وجابت بتها الي سمتها اسفار

چان عمرها تلث تشهر وفرحانه بيها ودزت عليه ونزلت ومن شفتها حضنتها وهي هم وبعدين شلت اسفار 

افراح تگللها //شنو ماكو غير هذا الاسم 

زهراء //شسوي اذا يوميه بدوله 

هديل //يعني خاله صدك تسافرين ويه رجلج 

زهراء//اي ليش لا تعاي شوفي الصور

وشافتهن هديل وافراح الي بين الحقد والغيره من عيونها گالت //زهوره ردنالج ولد يفيدج بكبرتج تعبتي ياالله 

حصلتي على هاي البنيه 

زهراء //ام ياسر رزق ربج وانتي تعرفين انا هواي تقدمولي بس رفضت

افراح رادت تحچي بس زهراء ما خلتها باوعتلي //ها ندووش ليش ما تمرين على بيبي جميله 

...عمه ما اگدر تعرفين سادس وكل دقيقه محسوبه عليه 

زهراء //اي هم صدك لازم تشدين حيلج 

افراح //ياا زهراء هاي التشوفينها كاتله روحها لا شغل ولا عمل ومن نحاچيها تكول ادرس ما ادري شتريد 

تصير طبيبه وزيره

زهراء //اي ليش لا اليدرس يصير مو هذا هادي درس وما جاب معدل دخل معهد وبعدين كمل وصار مهندس 

وهسه رئيس مهندسين 

افراح بونه //اييي نشوف 

زهراء//ان شالله تنجح وتجيب معدل وترفع راسنا وتفرح بيبيتها وابوها

وراحت عمه زهراء بعد ما وصتني ادير بالي وادرس وخلت بايدي فلوس لكن الي شفته تعاملها وياي ابرود وحتى 

ما سولفت على بيت جدي منير ولا على سراج هذا الشي خلاني افهم انو انا ماالي بس الله واختي وشهادتي

وبقيت ادرس وامتحنت حنين وادري بيها السنه ترسب لان ما جاي تلحك على اوامر افراح ومحد يحفزها ع الدراسه 

حتى ياسر لان يعرف اذا يفتح موضوع راح ياثر عليه وبدت امتحاناتي وصرت امتحن وانا اتذكر وصايا سراج 

من رحت لامتحان الثالث واخذت بيهن وابد ما خبصت نفسي واي شي اعرفه اكتبه

وانتهت الامتحانات وانطوا نتيجة حنين الي طلعت راسبه

 اما هديل فطلعت مكمله واسيل نجحت واجه اليوم الي تطلع بي النتائج محد مهتم بس ياسر الي گال مجرد ما يعلنوهن

 راح يجي ويگلي وانا مرتبكه رحت للغرفه وطلعت التلفون الي صارلي سنه ولا يوم استعملته بس اشحنه وافتحه 

لان اخاف يوقفون الشريحه وبكل شهر اشوف سراج محوللي رصيد ويكتبلي مسجات وساعات يدزلي رقم البطاقه 

ويدزلي مسج عبيها

بيومها شغلت الجهاز وراسا اجتني رسايل من الشركه ومن سراج 

:: ندووش ليش غالقه الجهاز هلگد كرهتيني 

ورساله :: ندووش مو انا عمو سراج القاعده الي لازمه الهرم 

ردت اغلقه اجتني رساله منه تگلي 

 :: لا تغلقينه شويه وابشرج بنجاحج

ظليت مرتبكه وانا قافله الباب عليه هالمره ما اهتمييت الدردمت افراح ع الشغل هالمره منتظره الفصل بين حياتي

 السابقه ومستقبلي القادم اجتني حنين وجابت الغدا ما اشتهييت اكل لان خايفه وانا اسمع عن الغبن الي يرافق بعض 

الطلاب بالتصحيح

نزلت حنين وانا قفلت الباب وراها وبقيت كل شويه اباوع لمن ما اتصل عليه سراج خفت وانا ما اريد اسمع صوته 

بس اكيد اكيد خابرني حتى يبشرني انا فتحت الخط لكن ما حچيت هو گلي 

::ليش ندووش حرامات التعب ليش ولج ليش

بقيت بس اتنفس ما اگدر احچي وگلبي يدك ردت ابچي سراج گلي 

 :: ام ادميعه جبتي بس اربعه وتسعين وج ندووش انتي نجحتي وجبتي معدل ما ضاع التعب بيج 

انا شمرت التلفون ما اعرف شسوي فرح حزن خوف سمعت سراج يگلي 

::وينج انتي وياي عمو ندوشتي ابنيتي انتي وياي

انا گعدت وانا ما اعرف ودي انزل واگول نجحت وبمعدل اربعه وتسعين 

بچيت اول مره ابچي فرح واتمنييت بيبي منيره موجوده وعمه زهراء وتمنييت يمي ......

لكن لا (هزيت راسي وجريت نفس وحچييت ) ... خليني اواجه مستقبلي ابحدي 

وصلتني رساله منه تگلي 

:: هاي اول خطوه بمستقبلج وتغيير حياتج شدي حيلج اميد القادم افضل

//////////////////////////////