رواية أعظم خيانة الفصل الثالث والثلاثون 33 بقلم الزهيريه

ريماس/ الحياة صعبه ومواجهة الصعوبه يحتاجلها شخص قوي والقوه نستمدها من الشخص الي نحبه واني حمد لله صعوبة الحياة واجهتها وحدي والانسان الي حبيته تنازل عني لهذا بقت مرارة الحياة الها طابع بحياتي وبيوم الي طلگني بيان متت احس روحي في بحر والروج ياخذني ويرجعني بقوه والتنفس يضيق عندي وعمي اقترح عليه أني واخواتي انه نسكن ويا مؤقتاً 

بس اني رفضت وطلبت منه يرجعني لبيتي وبالفعل رجعني والبيت بعده مقفول لهذا دگيت الباب على ام زهراء حتى تنطيني المفتاح وهي من شافتني ظلت تبوس بيه ودخلت جابت المفتاح واجتي ويايه وبوست اخواتي وعمي عافنه وراح واني فتحت الباب ودخلنه للبيت الي ما صار اسبوعين من فارگته بس شنو منتهيه اريد بس انفرد بنفسي حتى ابچي وبقن اخواتي يفترن بالبيت واني نزلت دموعي 

ام زهراء/ شبيچ خاله گولي يا الله 

ريماس/ وحچيت لام زهراء كل شي وأخيرها گتلها خاله احس نار بصدري هاي اول ساعه هيچ الأيام الي بعدها شلون 

ام زهراء/اني مو گتلچ ترى ماكو واحد يقبل يزوج بنيه عدها هيچ ماضي حتى لو چانت مجبره بنتي الرجال يحير شيسوي بحياته بس من يزوج لازم البنيه تكون مستوره شوفي الرجال حتى البنيه من ترخص نفسها اله بحجة الحب ينفر منها يريد البنيه الي حتى رغبته بالفراش يريدها صعبه ويا شوفي بنت عمه شگد رخصت نفسها بس بقت ذيچ البنيه الرخيصه بنظره وما راح يبدل نظرته وأحسن شي گلچ وما ضم عليچ السالفه 

ريماس/ راح اظل طول عمري ملوثه وراح ابقى بعين الناس إلي يعرفوني أني ملوثه لهذا اني بعد ما عندي مكان هنا بالعراق اعيش بي اخذ اخواتي واهج خارج العراق أفضل خاله عفيه الجنطه الي بيها الموبايل اريدها 

وراحت ام زهراء جابت الجنطه طلعت الموبايل الي بيها وخليت السيم كارت والموبايل مخلص شحن خليته على الشحن وام زهراء گاعده يمي ظلينه نسولف لما شويه شحن واتصلت على راكان وهو كل ما اتصل بي يگلي 

راكان / انت وين يروح نفسي اعرف يصير انه أطلعك وانت ماكو ما يتصل 

ريماس/ اعذرني راكان والله ظروف چانت عندي 

راكان / انتظر هاي الفتره مني خبر بس الطلعه يكلفك هواي لانه انت طالع تهريب 

ريماس/ شگد يعني من گلي الرقم هواي چان المبلغ عليه وعلى اخواتي بس إذا وحدي المبلغ اقل بس اني ما قبلت وگتله إلا اخواتي ويايه ذني وين يروحن 

راكان / اكو طريق ثاني اني يزوجك عن طريق محكمه وأطلعك لتركيا أصولي وهناك يطلگك وانت قدم على منظمة اليو ان بس بشرط 

ريماس/ شنو شرطك 

راكان / اني يكتب الك مؤخر عالي من اطلگ وارجع لدهوك احولك الفلوس وانت يستلم الفلوس وانطيك حساب ثاني تحولهن على حساب منطي الك اني وننطيك جزء بسيط منه المبلغ 

ريماس/ بعد احسن اني موافقه 

راكان/ اني اشتغل على الخطه الثانيه ما بي خطر عليك ولا على أخواتك لان الطلعه تهريب ما تعرف انت بيد منو توگع 

ريماس/ اتفقنه اني وراكان وانطيته رقم عمي احمد حتى يتواصل ويا وگتله اريد فلوس لانه ما عندي جوه أيدي اصرف وللعصر دزيت ام زهراء على مكتب تحويل وحولي مبلغ وجابته ام زهراء وانطته الي 

ام زهراء/ تدرين ريماس آني متعجبه على شغله يعني بيان طلگچ وعمچ اجى ذبچ هنا وراح ادري انت تدري البيت فارغ زين ما تگول بنات اخويه شلون ياكلن شلون ينامن وهن فراش ما عدهن ومن البنيه تطلع من الطريق الناس بكل قباحه تلومها أما ظروفها ماكو واحد يسأل عليها الناس الها الظاهر والباقي عميان من يمه 

ريماس/ عفيه همزين انتبهتي على هاي الفقره هاي الظروف الي خلتني وجبرتني عليها صفيه هسه الناس ما تلوم صفيه الملامه كلها على ريماس وبيان نفسه هم اخذني بذنب غيري وحملني شي ما چان بأختياري انتي تدرين عمي احمد من طلگني وجابنه اني واخواتي گال تعالن يمي بس خابر على زوجته وگاللها اليوم ريماس وأخواتها ضيوف عدنه تدرين والله صوتها لمي لانه اني گاعده يمه ليگدام سمعت زوجته تگله / إذا جيبهن اعوف البيت واطلع وهو غلق الخط وياها وچان يگول العائله كلها طالعه منا لبعد اسبوع يله يرجعون لهذا اصريت اجي هنا لو اگعد على الكاشي هم ما اروح يمه خاله احنه بزمن كلمن يگول يا روحي لا بقى اخ ولا عم ولا اب ولا خال 

ام زهراء/ اي والله صحيح صرنه عبالك غابه واحد ياكل الثاني 

ريماس/ اني هم قررت اشمر كل شي وره ظهري وأدور مصلحتي ومصلحة اخواتي 

وبقيت متواصله ويه راكان واتصل بعمي وبلغه اني يريد يخطبني واجى عمي بلغني 

احمد / اني ما عندي مانع إذا انتي موافقه عليه بس انتي ما صار كم يوم من طلگتي واذا زوجچ داخل بيچ شرعاً ما يصير تزوجين إلا بعد 3 شهور و10 ايام عده واذا حامل ما يصير تزوجين إلا بعد ما تولدين بس يصير خطوبه فقط 

ريماس/ هنا عمي فر راسي اني هذا الشي ما چنت اعرفه واني ما أريد يفوتني فرصة السفر مال راكان لهذا ما عرفت شنو اجاوبه بس نقلت كلام عمي احمد 

لام زهراء وهي گالت/ صحيح كلام عمچ احمد انتي بيان دخل بيچ 

ريماس/ اي دخل بس گال ما انزل شهوتي بيچ لانه ما اريد اخلف من وحده مثلچ والله 

ام زهراء/ هااا إذا ما چان ينزل شهوته ما يصير حمل وتگدرين تزوجين وانتي زواجچ چان مال سيد يعني ما مصدق بالمحكمه لهذا ما عليچ مسأله قانونيه 

ريماس/ ترى زواجي من راكان بس مجرد يطلعني من العراق وبس نوصل لتركيا نطلگ 

ام زهراء/ لعد اسكتي وگولي لعمچ ما دخل بيه وأنتهت السالفه وروحي فوتي بفالچ 

ريماس/ هذا احسن حل

وبالفعل اتصلت بعمو احمد انه بيان ما دخل بيه وانه اني موافقه على راكان 

وبعدها اتصل بيه راكان انه متفق ويه عمي احمد يرفع قضيه بالمحكمه مال وصايه عليه وعلى اخواتي وبنفس الوقت نسوي جوازات النه اني واخواتي حتى من يجي يخطبني بنفس الوقت نسوي معاملة العقد حتى بعدها نحجز على تركيا ونطلع وهذا چان حلم حياتي 

وبالفعل مرت ايام بس إذا اگول نسيت بيان أكذب على روحي بيان ساكن روحي وعقلي وگلبي بيوم اجى سأل على اسم أغاريد المستعار شگد ذيچ ألأيام چنت اخلي گلبي يملّا الحقد على بيان بمجرد شفته گدامي نهاريت يحچي ويايه بس شنو ارجف بحيث نهيت الحديث ودخلت ركض ودموعي تنزل وآني ادعي رب العالمين يهون عليه بعد بيان 

وبعدها بأيام اجى عمي احمد واخذنه للمحكمه وسوه وصايا علينه أني واخواتي وبعدها بدينه بمعاملة الجوازات والفلوس كلها على راكان ومعاملة الجوازات كلها عمي ويانه بكونه الوصي علينه 

وتحدد اليوم الي يجي بي راكان يخطبني بس اني نبهته انه ما يحچي شي گدام عمي لأنه الاتفاق الي بينه ماكو احد يدري بي لهذا يجيب اهله طبيعي ويا من يخطب بس هو چان منتظر الجوزات تكمل ومعاملة الجوازات صارت طويله لانه عمي وصي علينه وجيب كتاب من القاصرين ودي كتاب من القاصرين وجيب كتاب من المحكمه ودي كتاب من المحكمه وگضيناها كله كتابنا وكتابكم وبعدها گالوا راجعونه بعد شهر حتى يوصلنه كتاب القاصرين والمحكمه بالبريد 

وبخلال هذا الوقت احس صحتي بالنازل وبيوم رجعنه من الجوازات بس دخلت للبيت صرّت أتقيأ وراسي يوجعني وللمغرب صخنت 

بيان / مرات نغالط ارواحنه حتى نكمل حياتنه ونريد نتناسى أوجاعنه بس لشوكت واني بعد ما طلگت ريماس احس روحي تنازع عليها كل شي بيها احسه عايش بروحي كلامها غزلها تلاميحها دقيقه ما تفارگ بالي ابد بس أغالط روحي حتى اكمل حياتي من فرقد عرف اسم اغاريد المستعار ظل يبحوش وره الاسم وعرف انه عليها حتى منع سفر بسبب تهمة غسيل الأموال هنا رجعت بذاكرتي من ريماس گالت رحاب هم انهزمت منهم ورجعوها واخذوا كليتها بوقتها ما فكرت بس هسه صارت تبين الحقيقه اكثر من نهزمت ما گدرت تنهزم خارج العراق لكون عليها منع سفر لانه هي بالغه تگدر سافر مو مثل ريماس ما بالغه السن القانوني لهذا بداخل العراق يكدرون يرجعوهن بس خارج العراق ما يگدرون ومن سكتت گال 

فرقد/ هااا بشنو تفكر خلي اشوف تفكيرك مثل تفكيري 

بيان / والله سيدي چنت افكر واگول هسه عرفت اغاريد ليش ما طلعت خارج العراق لكون عليها منع سفر 

فرقد/ اني عكسك چنت أفكر انه طالما چانت عليها تهمة غسيل أموال نروح ندگ اسمها بالبنوگ اكيد عدها حساب مصرفي ومن خلالها راح نعرف منو چان يحول الهافلوس وهي المن چانت تحول فلوس فهمت يعني التحقيق ويه ابو شوارب ما يهمني وراح ارجع افتح قضية التهمه لرحاب الي على ضوءها نمنعت من السفر وراح تطلع الاسماء واحد وره الثاني 

بيان / كلامك مضبوط ومنطقي لهذا من نسجنت ام رحاب رغم همه يعرفون اغاريد مريضه اخذوها وياهم حتى لا تحچي شي 

فرقد / عندك شهادة الوفاة مالتها اريدك ادگ اسمها بالمصارف الحكوميه بكونك انت وأبوك ورثتها فهمت وانتظر منك جواب 

بيان / تمام سيدي وبعدها انتهى الاتصال بيني وبين فرقد وعلى ثاني يوم راجعت اول مصرف وطلع صح عدها حساب مصرفي مثل ما گال فرقد الفلوس الي عدها الرقم جان خيالي لهذا بالمصرف گالوا هي متوفيه ولازم قضيه بالمحكمه قسام شرعي بالورثه مالتها اضافةً هي كاتبه وصيه لازم هاي الوصيه تنفتح تحت رقابة قانونيه 

هنا رجعت خبر لفرقد بكل المعلومات الي عرفتها وهو قدم شكوى على اسم رحاب بتهمة غسيل الأموال وانه يريد موافقة القاضي حتى ياخذ من المصرف اسماء الي چانت تحول الهم فلوس والي يحولون الها فلوس 

وبقينه ننتظر امر القاضي بالموافقه لفرقد على كشف الحساب والأسماء والمشكله مو هنا مشكلتنه صارت أنه القاضي ما ينطي موافقته لهذا اشتكى فرقد بمجلس القضاء الأعلى وبعد شكوته بيومين چنت بالدوام بمكتبي دخل 

شرطي يمي وگال / سيدي دريت 

بيان / شنو بس لا راح تطلع علينه لجنة من الشوؤن ما بيه حيل ابقى مشتول للعصر من وراهم 

الشرطي / لا سيدي ماكو لجنه بس قبل شويه اجى نداء بالاسلكي انه اكو ضباط اثنين مجموعه مسلحين مغتاليهم 

بيان / وين ذوله ليش

بس ثولني من گال اسم المركز الي بي فرقد لهذا اتصلت على ولد ضابط اعرفه بالمركز وسألته على الحادثه گال 

الضابط / اي خطيه مقدم فرقد ونقيب عمار جماعه على درجات ناريه هموا طلعوا وهمه الرمي صار عليهم من كل ناحيه يگولون عمار حالته افضل من حالة فرقد الظاهر اجى امر بتصفيتهم الله اليعلم بمنو ندگوا وعمار مو هلگد الظاهر التصفيه جايه على فرقد لأنه هذا ضابط تحقيقات 

بيان / نسطر راسي انطاني عنوان المستشفى الي تم نقلهم الها لهذا رحت مباشرتناً ومن وصلت المستشفى مگلوبه گلب على الضابط الي مصوبين وعرفت انه فرقد بعده بالعمليات لهذا سلمت على اخو وطلعت ومن رجعت للبيت لگيت مصيبة حياتي لقاء موجوده بحجة ساعد بنتها واني ردت اصعد فوگ بس هي كالعاده ما تسكت 

لقاء / ادري لسانك بي عظم السلام لله ما تعرف سلم 

بيان / الله مطولچ يا روح بابا ترى سهاد ازوجت وسام بيان ما ازوج وسام يوميه جايه معرسه علينه شكو تردين رجل روحي شوفي واحد وزوجي لا ظلين يوميه جايه عليه والسلام لناس الي احبهم الي اكرهم ما اسلم عليهم 

لقاء / ترى سألتك ليش ما سلم عليه هاي مرتك جابت الك اثنين طيور ذهب غيرك واحد هسه يبوس رجلها مو حتى ما تحچي وياها وحتى الحليب جف بصدرها من وره معاملتك الها 

بيان / بس اريد افهم انتن الله ليش خالقچن وتعبان عليچن بطين بابا بنتچ لو جيب 10 اطفال مني موقفي ما راح يتغير منها 

وبوقتها صحت على لميس نزلت چانت فوگ وگدامها گلت / شوفي هاي بنتچ لميس تحرم عليه حرمة أمي واختي منا ليوم القيامه تريد تذب البنات عليه وتروح تريد تبقى تربي بناتها براحتها هاي اختصرت عليچن الدرب ويا ريت سويها لله خلقتچ بعد ما آريد أشوفها 

وعفتهن وصعدت فوگ بس شنو اغلي ما اعرف شنو اسوي احس نفسي مخنوگ ويه نفسي اگول اكيد راح يصفوني ويه فرقد 

وبعدني دى ابدل ندگ الباب وعرفتها لميس گتلها ادخل وهي دخلت ودموعها صب گالت 

لميس/ بس گلي ليش هيچ سوي بيه اني ادعي ليل ونهار حتى طلگ ريماس وتبقى الي وحدي انوب تحرمني عليك ليش الله يرضاها اني ام بناتك 

بيان / الله واكبر على راسچ چنتي دعين على ميقات حتى تطلگ ودعين على ريماس حتى تطلگ بس گليلي انتي شنو الله گاعد على حلگچ لو خطيه ايمانچ قوي يوميه صلين الف ركعه بابا انتي دعين على الناس بطلاگ والملائكة تگلچ ولكي مثل ذلك لانه ثلثين الدعوه على الداعي تبنين سعادتچ على سعادة غيرچ وتردين الله يوفقچ شنو هاي القباحه وصلافة العين ليش الله بيان الي لعبتي عليه وخليتي فياكرا اله بالعصير حتى يدخل بيچ هذا الله تعرفين شنو الله لو متعرفين 

لميس / اني سويت كل هذا لكون احبك 

بيان / والله ما تحبيني انتي مثل امچ انتي نسخه ثانيه منها طماعه والفلوس همچ وما لگيتي واحد عنده فلوس يگلبچ لهذا بيان عنده فلوس ونعرفه وخوش اشتغلتن على ميقات هذا كل الوضع لا أكثر وهسه تردين اصدگ انتي تحبيني روحي بابا تعبان 

وراحت لميس وبقيت بغرفتي حتى ما اشتهيت اكل وبقيت لليل بغرفتي ابد ما نزلت وذاك الليل چان ليل اگشر على كثر الكوابيس الي شفتها ولما طلع الفجر اني الف كابوس شفت وبدلت الفجر من وكت وطلعت حتى امر للمستشفى على فرقد قبل ما اروح لدوام ومن وصلت للمستشفى موجود اخو سالته عليه گال / طلع من العمليات وحولوا على العنايه المركزه شوكت يصحى الله اليعلم 

طلعت من المستشفى ورحت لدوامي وبعدها ما صايره الساعه 10 الصبح اجى الشرطي گال المدير يريدك بمكتبه 

گمت عدلت نفسي ورحت لمكتب المدير دگيت الباب ومن گال / ادخل 

دخلت دگيت تحيه للمدير 

گال المدير / ضابط بيان هنا الجماعه جايين عليك شوفهم شنو طلبهم ولا طلعهم منا زعلانين 

بيان / اني تعجبت يعني ذوله شنو رتبتهم بحيث المدير يريد ما أزعلهم وشنو يريدون 

انتبهت عليهم همه لابسين مدني وهمه أربعه ثلاثه چانوا عاديين بس الرابع ضخم كلش شلون عبالك ملاكم گعدت مقابيلهم واحد منهم گال / احنه ما نريد نگلك الجهة الي تابعين الها بس نحب نحذرك انت عندك اخت اجاك خوش ورث منها اخذ ورثك واسكت اما هذا منين وتبحوش تريد تعرف مصدر الورث صدگني ساعتها ما تلوم إلا نفسك 

الفصل الرابع والثلاثون من هنا 

شكرا لزيارتكم عالم روايات سكيرهوم