رواية كريات الدم السوداء الجزء الثاني الفصل الثانى والثلاثون بقلم زحل شريف
-اباوعلها تحجي بتحدي بلعت ريگي ورديت وأنه امثل عدم الخوف ،، اي وشنو يبول ويزحلكني ولج تدرين منو واكفلي برا لو لا .
سليمه::لا بس ممكن يزحلگ الواگفلج يعني طلقه طايشه .
من مستطرق. سيارة مسرعه ويدعم عادي .
-اله أهل يداعون بي واكيد محابس ماينفذ منها.
سليمه::اي بس اذا عرفوا وجودج يعرض ابنهم للخطر
راح يحطون بيج طابع ابو الالف ويزحلكونج،، وبالأخص
اذا درو الحادث مدبر ومنو الورا.
ـ فكيت حلگي بصدمه ::هزت راسها اي مأكدة كلامها
رجعت كعدت واشرتللها تكعد نضرتلي وهيه تبتسم
وأنه أكثر بشر يعرف هل نضرة كتمت حسرتي وتقربت عليها
سلوم تعرفين معنى التحجينه شنو ولچ يعدمونج بحبل مال اهدوم ولچ عبالج لعب .
سليمه::ولهذا السبب اگلج اطفري النهر مادامه ظيگ
ولا تكليلي مستقرة وحتى مديحه هم ،، لو شما حاول طارق
تبقى بصمه عار بالنسبه لأهله كيف اذا صارت مشكله وعمامه
سمعو شيكول عاركت لأن مرتي ملاحقه من جماعه
-عبالج الدنيا سايبه ،، ههه ترى ينبشون أهله الي يندك بيهم
سليمه::اذا طاحو بي والدليل سالفه الباشا تقيدت حادث
-ولج منو گال الباشا علاسكم ولا مديحه ومو خوف منج
بس وروح امي مالي ايد ولا اعرف.
سليمه::ام الشخاخ العلستنا ،، خاف عبالج عبرت على الموس وربعه هاي الدگه لا بس سكتو لحد مابردت السالفه .
-باوعتلها متفاجئه ،، هزيت راسي لا
سليمه::الموس وغازي صار سنين يشتغلون محد لزمهم
بس من صار الشغل يمي انعلسو .
-اي خو يتهمونچ احنى شكو
سليمه::يدرون ماسويها ويعرفوني زين ،، ولچ عبالج الصار هين حطيتن روحجن بدربهم سونه هاي حيتان وراهم ضهر
وناس مستفادة من الشارع ،، وروح امي بعد الف سنه هم يلكفونجن ،، والسوو بالباشا رسالة لكل شخص يريد يدخل للمكان ويترقى بروسهم بعد الصار محد يجازف بروحه
الضابط اليجي يغمض لو كل فترة يلمله گم واحد من الركن
بس مايدنه لزاغور الكبار .
-من الاخير التريدنه شنو وخاف عبالچ خفت من تهديدج
خلي ابالج محابس كارت محروگ مايخدم بعد وبالنسبة الي
ما يهمني بس اريد اعرف شنو الي تستفادينه من تخربيه حياتي وترجعيني لمحابس .
سليمه::لو ادري بحياتچ مستقرة والباشا راح يبقى وياج دوم
جان فرحتلج بس اعرف لو شما طولتي اول وتالي يشمرج
-وانتي خايفه عليه؟
سليمه::لا بس حتى اضمن من اطلع الي مكان الفي بي
لان اذا خلصت ال١٥ راح اطلع منا امشي صفح خو ماروح
لدار المسنين.
-ومتوقعه من النذل يلم گبرتج ولج هو ترباتج
وعرج الكاولية ،،انصحج لله فرصه السجن تكفرين عن ذنوبج
وأنه بحماية الله واهل الباشا الي يوصلني مايرجع سالم
وگولي للنذل يبعد من دربي لأن مااسكت اذا حاول يلعب بذيله وخاف مستغل الوضع وعلى ابو هو ابن الخال ماراح
يسووله شي لا غلطانه .
سليمه::اسمعي مني وافلتي بريشج احسنلج .
-باوعتلها كلت احجي وياها بلين ،، ابتسمت
تدرين مديحه بيها بنيه ،، هزت أيدها مستهزئه وطلعتلها جكاره شلعتها ورجعت الباكيت لصدرها نفخت الدخان بنفس طريقتها المعتادة وردت برود
سليمه::هاي احسابها مضاعف ومستحيل يخلونها
لان اكثر وحده من بنات الصعدة تعرف زوايا الشغل ،، وشاهده على مصايب محد سامع بيها حتى إذا الموس وربعه عافوها النصافات وطشه مايعتقنها .
-اهل الباشا معتبرينها بتهم .
سليمه::خل يحمون ابنهم يله يحمونها .
-الحكومه حاميته .
-سكتت ،، شمرت الجكارة بالكاع وداستها برجلها وردت
سليمه::الصعدة رجعت مثل قبل ،، والسوو بالباشا
انذار خاف واحد يريد يبرم عضلاته .
ـهزيت راسي اي
سليمه::والباشا اذا سلم منها
المرة الفاتت ورهمتله عملية هل مرة يطيرون رجليه
-كمت وأنه احاول مابين خوفي ولو اعرف مايخفى عليها
جرتني لحظنها باوستني .
سليمه::بت الصخل احبج ،، وأشوف روحي بيج
ديري بالج على نفسچ ،، وبعدي عنه احسلج .
-ليش احسج غيرانه ،، ضحكت بصوت
سليمه::بعده حلو ؟
-امممم وبعده نفس طبعه
سليمه::ويبقى هو الباشا وانتي بت بشار .
اباوعلها نفس الاستايل والكشخه الشعر مصبوغ
وبدون مااسأل جاوبتني وكأنو تعرف الي يدور أبالي عدلت دلعة الكلبيه الي لابستها وهذا الي دوخني هل خياط جان بس بالصعدة ضحكت
سليمه::كلشي اكو هنا
-يعني بس ردت اعرف منو يجيبلج ملابس
سليمه::اكو خياطات وشريد يفصللي
وهنه منين يجيبن قماش وهاي السوالف
سليمه::اهلهن واكو يوصن الحانوت واكو السجانات من ينزلن لاهلن يجيبن النريدة ولج عالم ثاني سوك مكياج وصالون
وكلشي حتى التريد تعرس هم يجيبولها رجل حسب دفعج
-مديت ايدي لجنطتي توني اريد انطيها مصرف اندفع
الباب ودخل الشرطي وهو يحجي.
الشرطي::ممنوع تنطيها
-التفتت عليها هزت راسها اي رجعت الفلوس وهو طلع
سألتها ليش ماقبل؟
سليمه::مايقبلون تسلمونا بيدنا
-جا شلون إذا تردون شي ؟
سليمه::اكو مكان اسمه أمانات الأهل يخلون بي الفلوس والسجين يسحب على كد حاجته
-وليش هل شي
سليمه::عود يحافظون على الوضع حتى لا نشتري مخدرات
من داخل السجن
-فكيت حلكي يعني شنو مافهمت جا هنا يبيعون شلون لا مستحيل
سليمه::كلشي اكو .
-زين يمنعون المشتري لو الي يدخلها
سليمه:'خرب ابوج. بنت الصخل بعدج على نفس الطبع
شكد تسألين
-مو ماجاي تدخل عقلي بس اريد افهم يعني شلون يدخلونها ومنو يدخل هيج أمور لا ونوب ساجنين اليشربون
سليمه::حاميها حراميها همه يدخلونه ويبيعونه جوى العبايه
-ولج ياعبايه كارثه هاي يعني محرمين الأهل ينطون
فلوس بيد المسجون حتى لايشتري خو الزمو الي يدخلها
سليمه:'هاي لعبه حتى يعرفون كل شخص شكد عنده
هذا مواجهته قويه يبيعوله .
-مثلا الي يتأكد من جيب الزبون
سليمه::اي هيج شي
-جا عليمن ساجنين الناس بعد خو خلوهم يبيعون
سليمه::جا همه ماخلينا بس اختج ام الشخاخ العبت بينا
-ماردت اجادلها لأن هيه متأكد،، تمام جا اخليلج مصرف
بالامانات وإذا ربج كتبلنا نتشاوف رجعت حظنتني
سليمه::ام اعطوب محلوة وكبرانه وصايرة نسخه مني
ديري بالج من محابس لأن مايعوفچ وبعدي عن الباشا
ـ طلعت من يمها وأنه أتلفت يتراولي أحد تابعني سألت عن الامانات عفتها مصرف ومشيت وصلت الباب الخروج وكفت خايفه اعبر باوعت لسيارة ثابت طابگه بالسايد الثاني مامنتبهلي أنوب المنطقه إلبيها هل سجن مقطوعه وسيارات تجي طايرة كأنو شارع خارجي لا جايبه نقالي واخابر بقيت أتلفت صاح عليه الحرس اللباب
الشرطي::شكو واگفه ؟
-باوعتلي هز رأسه وتقدم عليه سويت روحي دايخه
لزمت راسي
الشرطي ::شعدج واكفه ماتمشين؟
-رديت بتمسكن ماكدر اعبر الشارع الكاع تفتر بيه
الشرطي::اوكفلج سيارة ؟
-لا عمي هذاك اخوي ،، اشرتله على سيارة ثابت
حصرتني الضحكه من صوفر يريد ينبه ثابت اشر بيدة
التفت ثابت باوع بتجاهنا نزل متوجه عليه عبر الشارع
وصل يمي سلم على الشرطي ودنك عليه
ثابت::ها سلامات شبيج
-كمت والعبرة خانكتني ،،لزمني من ايدي يريد يعبرني الشارع وكفت خايفه التفت عليه
ثابت::شبيج يأبه شنو دايخه اكيد ماتريكتي
-هزيت راسي اي انتضر السيارات تخف عبرنا
ماصدكت وصلنه السيارة صعدت بسرعه صعد وهو يباوعلي مستغرب عيني للشارع اباوع بخوف وكل شويه التفت خاف سيارة تابعتنا حتى ماانتبهت شيحجي وياي لحد ماوكفت السيارة باوعتله
ثابت::بيج شي شكو تتلفتتين ؟
-ها لا ماكو شي بس اباوع للمكان اكول ليش هيج بعيد
ومكطوع
ثابت::اي هذا بنو جديد،، هسه صارت يمه بيوت جانت هيمه
هو حتى شبكه مايمه .
-التفت باوعتله هز رأسه شكو ،، شلون مايمه شبگه
يعني قصدي السجناء منين يخابرون
ثابت::دخل السجن اكو بس حدها للإدارة
-بس سليمه كالت ينطوهم
اتصال كل اسبوع .
ثابت::اي اتصال محدد بس يحجون ويا اهلهم دقائق
وبوجود الحرس ،، بس هم اكو من جوى العبايه دوم يگتشفون نقالات عند النزلاء .
-منو يدخلهن إذا ممنوع شو همه يفتشون الشخص
قبل لايدخل ينكتونه نكت .
ثابت::يدخل بفلوس مدام الرشوة موجودة ماكو ممنوع
-دگ نقاله باوعله وضحك
ثابت::هذا الباشا
-حجاها وفتح خط
ثابت::لا خليتها يم سلوم ترد عليها الوحشه ،، بالطريق
شويه ونوصل الله وياك
-سده والتفتلي
ثابت::اي شارادت منج سليمه ؟
-واحتاربت شجاوب لأن الباشا كال لا تحجين البدور بينج وبين سليمه ،، بلعت ريگي ورديت بعدم اهتمام ،تلعب هاي
ثابت::مافهمت يعني هيه دزت عليج شتريد منج
-تريد تتأكد مني وين وتريد تثبت لمحابس هيه تگدر ترجعني اله .
ثابت::هل ولد عجيب غيرة يتمنى يحظى بأب
مثل جلال المفروض يبدي حياة جديدة يحاول يحسن من نفسه ويعيش بكرامه.
-سكتت وهو هم ماحجة بعد لحد ماوصلنا لبيتي لكينا الباشا طابك سيارته بالباب نزلني ثابت وراح فتحت الباب ودخلت وهو وراي شمرت الشال ورحت غسلت وجهي واديه رجعت للصاله لكيته كاعد فتحلي اديه .
الباشا::تعاي .
-كعدت مسندة راسي على صدرة محتارة احجيله لو لا اتحسرت دنك باسني
الباشا::غردي ؟
-حجيتله كلشي لحد ما وصلت لكلامها عن الحادث
تفاجئت من ضحك بصوت عالي،،شو تضحگ يعني تعرف
بيهم همه السوو هيج .
الباشا::شكد شالعه سلوم خرب عقلج.
-لزمت ايدة ودموعي تنزل ،، بس خل افهمك سلوم مالها ايد
بس اكيد الموس وفيلق وغازي .بس ماعرف إذا محابس يدري لو اله ايد ؟
الباشا::لج غبيه انتي شبيج مو همه .
-مافهمت جا منو ؟ عدل كعدته وأنه انضرله بااهمتام
الباشا::جماعه .
-يعني تعرفهم لزمتوهم ؟
الباشا::لا مالزمناهم شلون افهمج يأبه كمثال الي يريد
يشتري بيت غير يشوفه يتفحص بنائه يشوف إذا يخر
صالح للسكن لو يحتاج تعمير.
-اي بس هم مافهمت؟
الباشا::الجماعه الي التزموا الشارع من جديد اكيد عدهم
معلومات عن الصار ،، فرادو يدزون رساله تحذير لاي شخص
او ضابط يحاول يتقرب للمكان يكلوله مانعوفك ولو بعد حين وهيج يأمنون محد يداهمهم مثل ماسويت أنه .
-فهمت يعني اكيد الضابط الي يحاول يدخل للصعده
يحسب ماراح يسلم منهم جا طبعا ايخاف
الباشا::اي اكو ناس يكلك عليمن اخاطر بنفسي
ويجوز انقتل او يعوقوني وأكثر هو الشارع هذا وغيرة هواي اماكن ماكدرنا نسيطر عليهم حتى لو لزمنا مجموعه تلزمه مجموعات ثانيه .
-زين همه شلون عرفو أنته ألي نفذت العمليه
الباشا::اول شي مو بس أنه هواي ابطال جانو وياي
أما شلون عرفو ياسونه بكل مكان اكو من يسرب معلومات
اكيد مثل مااكو ناس بالصعده تشتغل لصالح المركز اكو
ناس من المركز تسرب معلومات لسلوم وغيرها
ولا تنسين هاي العملية جانت اكبر عملية مداهمه
ونشرتها هواي قنوات ومن غير الناس الي بالمنطقه
تناقلتها وترفيع بعض الأفراد مثلي وغير اكيد هل شي
وصل للعصابات خوش مو اغبياء همه
-بس ترى إذا واحد من الي نلزمو طلع ماراح يعوفك صدگني لو بعد الف سنه يضلون وراك .
الباشا::هينه نشوف منو الي يمد رأسه منهم
-عوفهم يولون
الباشا::اكلي تبن اعوفهم شنو ولج أخليهم يجرمون بالناس
هل المخدرات والسموم هجت بيوت وشتت عوائل وبسببها
ياماصارت مصايب من غير تجارتهم لأمور أخرى .
-مايسكتون عنگ .
الباشا::دخل واحد بيهم يواجهني جبانيه شحال لو ماتعرفين
هل نماذج بطولاتهم بس بالصعدة بس لا خفتي من كلامها
-اخاف لأن اعرف الي يسوونه حقك ماتدري شنو الي
يصير والصار هناك .
الباشا::خلص انسي الصار كله وعيشي مأمنه
ترى سلوم رادت تخوفج اصلا مايفكرون بيجن
وحتى لو هم محد يكدر يوصلج هنا منطقتنا أكثرها ناسنا
بالنسبه للجيران صار سنين واحد يعرف الثاني والكل يعرف انتي زوجتي .
-يعني اهلك عرفو
الباشا::اهلي منو شبيج هو ابوي واكيد عمي والولد يعرفون
-اقصد امك يعني ماضن تعرف لأن مابين عليها
الباشا::يعني شلون يبين مثل ، شوفي سونه شكد ماتتصورين امي انسانه مسالمه مايوم إذت بشر من كنى صغار هذا طبعها لاتحب تستغيب ولا تحجي على شخص
تكول ليش احمل نفسي ذنب ،، يعني حتى لو ابوي حاجيلها
لاتتوقعين تعاتبج لو تعاركج
-بس ماراح تتقبلني ؟
الباشا::شنو القبول بنضرج سونه اهلي يفكرون من زاويه
اخرى يعني يعرفون لو انتشر خبر زواجي بيج راح تصير مشاكل بيني وبين اريج ولهذا السبب ماراح يكدرون يتعاملون وياج مثل معاملتهم لقدر فهمتي وهو اول وتالي
الأمر ينكشف والكل يعرف لوقتها ربج يحلها
-سكتت وهو هم غير الموضوع دك جهازه ومن رده عرفت الخال بقيت بحظنه حتى اسمع
الباشا::دومك مقتحم جوي
الخال::شلون جو طاح صبخك
الباشا؛:ههههههههه
الخال::ها بشر شنو الاخبار
الباشا::نفس ماتوقعنا بس ياخال محبس يرادله جرة إذن
الخال::انجرها وننعل أصله بس خليني ارتبها
الباشا::تمام .
-بقينا نسولف تمددت على القنفه وراسي بحضنه ماعرف شلون غفيت ،، فزيت لكيته كاعد يباوعلي .
الباشا::شبيج كأنو مانايمه صار شهر
-عدلت كعدتي وكل ضني صاير ليل ،بيش الساعه .
الباشا::ب٣ ضهر
-شعجب ماكعدتني.
الباشا::شفتج تعبانه كلت خليها ترتاح يله أنه اروح وإذا كدرت بالليل اجيج .
-راح وهو يوصيني اقفل الباب ،، بس طلع ركضت لنقالي
اووو مديحه شكد متصله بس دكيت ردت
مديحه::خرب ابوج بت الصخل عود هسه كلت لطارق اخذني الها ولج متت من القلق شبيج ماتكليلي مو وصيتج تخابريني
-هيه تحجي وأنه ابوحش بالثلاجة اريد شي اكله
صاحت
مديحه::ماتحجين شنو عگدت لسانج سلوم
-اوكفي خل اغسل الخيارة واطلعلي خبزة
مديحه::يربي لا تعاقبني على مسبة راضي الصخل
-سويتلي لفه اشكد احب الفه مال خيار وخبز
مديحه::اي حتى أنه نعلعله اعطوبج شهيتيني اوكفي خل انزل اسويلي لفه
-هسه تلكفج فطوم وتكلج لاتحطين سحر بالثلاجة
مديحه::لا هل ايام تكلي اكلي حتى البنيه تطلع صحتها زينه
-هم رحمه .
مديحه:::غردي ؟
-حجيتلها كلشي ،، سكتت صحت بيها ها شو خنستي.
مديحه::شحجي ؟بعد سلوم الشلو بس كون رب العالمين
يبليها بمرض وتموت ونخلص منها .
- شنو تعرفينه عليهم وههيج خايفين منج.
مديحه::ماعرف شي وسدي الموضوع
وديري بالج دوم خل بابج مقفول ترى محابس نذل
-مديحه شتعرفين وضامته ؟
مديحه::سمعي مني هل كلام ياسونه هنه نحكمن وموت يحمار لحد مايطلعن بالنسبه الموس وربعه ماراح يدورون علينا بس كولي سلوم وام دعدوش وام طيبه اي لو بعد الف سنه هنه ماراح ينسن الصار
-بس انتي مالج ايد بعلاستهم
مديحه::بس شهدت عليهن
-تدرين لو ما محابس ابن الخال جان محد عرف بينا وين
بس الحظ المزفت خلاه لازك بينا
مديحه::خاب دخلي تولي شمالج مهتمه وروح امي
اذا طلعن هنه بعد كارت محروك مالهن قيمه ومالهن كلمه مثل قبل ترى الصعده انباعت ولزموها غير جماعه وهذن من يطلعن راح يحرحمون بحالهن يخلونهن كل وحده تحطلها جدر بأچله. شلون صوله قبل يستفادون منهم يسجلن كل حركه تصير .
-امممم يعني كدر صوله جان مو لأجل تبيع.
مديحه::شتبيع ذبان ولج هو منو المشتري منها انتي ثوله
-لا مو ثوله بس النصافات كافيات يعني صوله ماجان الها
فائده
مديحه::النصافات جانن للشارع ويلمن الوارد
بس صوله جانت تسجل كل شاردة وارده من داخل الشارع
مثلا طلعت ام اعطوب بهيج ساعه دخلت على مديحه بقت
هلكد وقت رجعت ولاكاها فلان وكفت يمه 5خمس دقائق
بت نوشه عبرت لام علوش الكراج انفتح بابه مرتين
-فهمت لهيج محد جان يلعب بذيله وماشين مستقيم
مديحه::والدليل من انكبست الصعده صولة
مانلزمت وياهم وكدرت تفلت ،، لأن اول ما دخلت السيارة
الي طلعو قدر بيها صوله جانت موجوده وعرفت راح تصير
كبسه وهيه الي انطت خبر لأم طيبه ولو ماانتي جان مانلزمن .
-بس شلون عرفت راح ينكبسون لأن دخلت الزلم للصعده
عاديه يوميه الف شخص يفوت
مديحه::جا هيه خبرة عبالج مثلج يعرفن اليدخل من مشيته
هذا جاي يشتري يبيع يسهر.
-نوب هيج خوفتيني على قدر لأن صوله شافتها من طلعوها
مديحه::لا تخافين صوله صارت كارت محروك بعد لايشغلونها وياهم ولا يورجونها على شي اصلا لو مابيتها
ملكها جان مايخلونها ترجع تكعد بي
-يجوز بس ام دعدوش ولدها
مديحه::ولج كتلج اليدخل للسجن يصير عليه مؤشر
مايشغلونه ويتهم لأن أكثرهم يطلعون يصيرون علاسين للحكومه ،، وهيه قدر نهار كله تفتر بالشوارع لو احنى
شو كاعدين والحمد الله عود إذا طلعو الله لايكولها
نلبس بوشيات .
-دسدي هاي قدر ادك خل اطمنها ،عود بليل اخابرج
نهيت مكالمتي وياها وفتحت خط على قدر الي تحجي بصيغه طفل عود تينه تحجي
قدر::ها خالتي شلونج مشتاقتلج
3
-دفتحي كامرة
قدر::ها شوفي سويتلها كرون
-ولج ليش هيج ضابه شعرها خطيه
قدر::مو يصير على عيونها وثابت ماقبل أكص گذلتها
المهم شنو اخبارج .
-ماردت اخوفها غيرت السالفه وبقيت أحاجي تينه
ولك تين ياحلو ،، يفدوى تقرب وجها للكامرة
قدر::شوفي راح اصفكلها شلون راح تركص
-متت ضحك هاي على حس الطبل
قدر::اي ولج خاف وراثه نوب تطلع على راضي
-طاح حظج شبيج انتي شبيج
قدر::شمدريني ولج تفتح عينها من النوم هيه تهز
اگلج هنه عماتنا من هنه صغار يركصن
-لا اكيد بس أنه اذكر يعني هنه بعمرنا هذا من جانن يطلعن
قدر::بس عجيب معقوله كل هاي السنين ماسألن على اهلهن
ولا اجن ولا حاولن يتواصلن
-بعد زواجهن بفترة طويلة گامن يتواصلن بعمي طالب
ويدزن فلوس بس هو ماينطينا منهن عاد بيوم مخابراتها
وطالبات يحجن ويا ابوي وامي وتدرين بي يموت على الفلس معاتبهن ليش مايدزله من عرفن تعاركن ويا عمي
طالب بيومها جنت حاضرة السالفه واسمع عمتي سلطانه
رزلت عمي طالب كالتله،،ماتنضفون ولا تصيرلكم جارة
ليش مخلي اخوك بعده يطبل وتأخذ الفلوس كلها
قدر::اي خوش جا مادزن لابوج وخلنه يبطل
-اي هو هيج جانن مفكرات كالن لابوي أنوب أندز
كل واحد حصته ودزن فترة بس ابوي من توصله الحواله
يلعب لعب ملت منه امي وتعاركت ويا يارجال حرام عليك
هاي الفلوس نعيش بيها تروح تتمسكر ونسوان ليش
قدر::سافل نذل لاتزعلين مني
-عاد امي ماقصرت من خابرت عمتي سلطانه
كالتلها وهنا سلطانه كالت بعد مادز وانسو عدكم خوات
ومن يومها انتهى التواصل بينا وغيرت حتى رقمها
قدر::زين ليش ماحاولتي تتواصلين ويا خوالج
يعني امج علاقتها بااهلها مو مثل امي
-من ردت ازوج فيصل ثابت راحلهم ،، كايليله اختنا ماتت
وبعد مالنا صله بهاي العائله وعمامي حتى اسمائهم مبدلينها
قدر::الله لايفقهم يله يولون
-وهيج تمر الايام اخلص نهاري مكابله الكاميرات
والصالون ماقبل الباشا افتحه وأنه هم خافت من محابس
ودخلت مديحه بشهرها اجتني صبغت شعرها وتنضيفات
لحد يوم ولادتها اتصل بيه طارق
طارق::سلاسل احنى متوجهين للمستشفى
-لا عفيه تعال عليه
طارق::يله جهزي نفسج لأن خبصتنا تصرخ
-كمت بسرعه لبست صايتي وخابرت الباشا
الباشا::شكو رايحه عود من تولد
-تحجي صدك شبيك يعني اعوفها لا والله اروح وبلكي يقبل طارق من تولد اجيبها يمي يله باي وصلو ،، طلعت اركض
صعدت يمها فاطمه بالصدر ،، صوتها وهيه تصرخ خردلنا
مديحه::يماااا راح اموت ولج سونه لحكيني
فاطمه::دكولي ياعلي ولاتصرخين فضحتينا عيب السيارات تباوع علينا
-عدلت روحها مديحه واشرتلي ادنيت عليها
مديحه::ولچ ماتجرينها الي خل اعضها من بلعومها
عفيه قشمريها كليلها اطيني ايدج بس خل تمد أيدها لهنا
-اختنكت نوب فشلت من طارق وأمه اريد اسكت ماكدرت
مديحه::بت الصخل تضحكين عليه
-حجتها وبجت لحد ماوصلنا المستشفى هيه طلعت روحها
نوب أنه من يمي بطني گامت توجعني دخلناها جيكتها الدكتورة وكالت عدها ولادة اخذناها للصاله مال الولادة
كوى دخلوني وياها يمه البنات كلها تصارخ وهاي التمشيط
وذيج اتمشع شعرها اله مديحه يحطونها على السديه
وتنزل ولج بس خل المغذي يخلص هذا حتى تسهل ولادتج
مديحه:::ولج كليللللهم يشكون بطني ويطلعونها راح اموت
-ضليت محتارة والممرضات يحجن عليها وهيه تصرخ
وحده منهن كالتلها وكرص شنو هل صوت،، يبوووي
شسوت مديحه
مديحه::الگرصج ياشلوو ولج سونه لزميها الي خل اعضها
-خاب اسكتي انجلبتي ياهو تلزمينه تردين تعضينه
لحد ما صارت عدها ولادة اخذنها يولدنها بقيت بالممر
اسمع الصريخ يمه شموزيهن المن يحبلن أنه ماشفت قدر
يمكن لأن عمليه ،، شويه وطلعت الممرضه صاحت منو ويا
مديحه ركضت
الممرضه:'وين ملابس الطفل
-بقيت أتلفت ها ماجايبه
الممرضه:'شنو ماجايبه يمعودة شنو جايات تتسوكن
غير تحضرن ملابس
-اوكفي بس اطلع لعمتها يمكن عدها ركضت طلعت لفاطمه
خاله يردون ملابس الطفله
فاطمه::يا نسيت الحنطه بالسيارة شوف شلون هيه المكروصه اطتنا مجال دخل اطلع لطارق
-عفتها تحجي وطلعت لطارق خطيه فز من شافني
طارق::ها بشري
-عفيه الحنطه مال الملابس بسيارتك
طارق::اي اي رايح اجيبها
-ركض جابها اخذتها ودخلت حتى ما انتبهت لفاطمه
اطيتهن الممرضه الي شكد حجت علينا شويه وطلعو البنيه
خلوها بيدي بجيت بقهر ضليت حاضنه الطفله ،، اكو مرة
جبيرة لازمه بنتها مدري بنتها تمشي بيها باوعتلي وضحكت
اجت بوست الطفله
-صلوات حمد الله على سلامتها اخيتج
-اي بس شو ماطلوعوها
-هسه يطلعنها بس انتن لوحدجن ليش ماواجن أحد
-ماعدنا أحد امنا ميته حجيتها ونزلن دموعي
-ياعيني الله يرحمها ،لاتبجين موزين على الطفله هسه يطلعونها اخيتج
-ويا كلمتها طلعو مديحه مخليها بعربانه تقربت عليها
بجت بصوت دفعتها الممرضه لوحده من الغرفه نزلتها السرير
واكو حاضنه مال طفل كالت خلي البنيه بيها خليتها وطلعت
لفاطمه كتلها دخلت وياي دنكت تباوع للطفله شالتها بوستها
كعدت وخليتها بحظنها بس حتى ماالتفتت لمديحه
فاطمه::طلعي بشري طارق
-باوعتلها تحجي بصيغة أمر درت وجهي لمديحه
لميت شعرها شويه ودخلت ممرضه جيكتها وخلت علاج على
الطبله الموجودة وطلعت ،، سألتها ها بعدج تتوجعين
مديحه::لا الحمد الله بس غطيني بردت
-جريت البطانيه غطيتها وفاطمه حاطه الطفله بحضنها
ماجنها تشوفنا حيل انقهرت طلعت نقالي الي ماسكت
فتحت خط
قدر::ها بشري ولج راح اموت من القلق
-طمنتها وسديته وفاطمه تلح عليه اطلع لطارق،خاله راح اتصل بي عليمن طالعه هو مايخلونه يفوت لأن نساء هنا
فاطمه::لا يدخلو لأن غرفتها خاصه
-اتصلت بي بلغته وگتله جيب وياك ماي،، شويه واجه
جايب ماي وعصائر وكلنكس ،، دنك لميدحه بوسها
طارق::سلاسل بدون زحمه عليج بس روحي للممرضه خل تجي تعلكلها هذا المغدي وتضربها الإبرة .
- اجت الممرضه وماقصرت بس ماقبلو يطلعونها
ضليت حايرة الباشا يدك طلعت احجي ويا بالممر
الباشا::ها شلونها مديحه
-الحمد الله بس ماقبلو يطلعوها لازم تبقى لباجر
الباشا::اي اجراء طبيعي بس غير ام طارق تبقى يمها
-اي و أنه هم ماعوفها خطيه
الباشا::خوش ديري بالج على نفسج
-دخلت لكيت الطفله تبچي اشرتلي مديحه اناوشهيا
بس فاطمه كالت
فاطمه::هذا وين صار مو كتله جيب مميه وحليب
خابري سونه
مديحه::لا يجيب اطينياها ارضعها
فاطمة::لا خليها على الممه افضل
-بقيت واگف بينهن محتارة مديحه سندت نفسها
وكعدت اشرتلي جبيبي الطفله وفاطمه ماتقبل
مديحه::خاله بنتي ماريدها على حليب اطينياها
فاطمه؛:وعليمن مخليتها تمص بگلبج ترى الرضاعه تعب
مديحه:: شعليج حليبج لو حليبي .
فاطمه::وشلون راح تبقى يمي غير من تبجي انطيها ممه
مديحه::وانتي بغير مكان مثلا شو نفس البيت
وأنه راح انزل جوى شوكت ماجاعت ارضعها خو ماعوفها
-ضليت مثل محتارة وهنه گبن نزلت مديحه من الجربايه
كوى تتحرك لزمتها انتي ليش هيج شبيهن رجليج
مديحه::غير خياطات داخليه ولج ٥ خياطات
شكني بالنص يله طلعنها وفطوم تريد تأخذها على الحاضر
-دنكت اخذت بنتها من فاطمه الي طلعت من الغرفه مزعوجه ساعدت مديحه رجعت للسرير وحطت بنتها بحظنها ترضعها اباوعلها تغمض من الالم كملت رضاعه
مدت أيدها لخشم الطفله تجر بي صحت بيها ولج شبيج
وياها خطيه
مديحه::حته خشمها يصير حلو
-مشتغله جدة قبل
مديحه::بعت فرارت بخبز يابس ماخليت دحيسه
مامديت راسي بيها جانت طشه اذا وحده من البنات العدها
تجيب تضل تجر بخشمها وترفع بخدودها وحتى من تگمطها
ترفع خلفيتها تكول يصير جسمها حلو
-حتى من تكبر تشغلها ونوب يخلفن وهنه ماعرفن منو الاب
مديحه::تذكرين الجگمه بت أم دعدوش ؟
-اي وبعدين اختفت گالو ابوها اخذها
مديحه::هيه منيلها ابو اصلا اخذتها من بيت نوشه
-باوعتلها متفاجئه هزت راسها اي،، جا وين راحت
مديحه::باعنها لواحد جبير يتزوجها وبعد مارجعها
-شكد مثل الجگمه بنات
مديحه::اووو بكد الزلم الدخلت للصعده ومنهن الماتت
ومنهن لعبرت لغير بلد ولغير محافظه ومنهن انسجنت
والي انقتلت وينولد غيرهن،، ادعي من رب العالمين كون
من اموت يموت بنتي وياي
-اسم الله شبيج قابل بنتج ماعدها ابو طارق خوش ولد
مديحه::بس أمه مو خوش مرة
-اخذت الطفله منها خليتها بمكانها شويه ودخلت فاطمه
مزعوجه اجت شالت الطفله خلتها بحظنها وكعدت وهيج
لحد ما صار الصبح كملو إجراءات الخروج وسمو البنيه
عسل قبل مانطلع سألتها غير ترحين وياي،، ردت فاطمه
فاطمه::لا شكو رايحه وياج بتنا ماتروح لمكان غير بيتنا
-التفتت لمديحه اشرتلي بمعنى اطيني نقال اطيتهيا
دكت على طارق كالتله تعال
مديحه::يله ينتضرنا برى
-فاطمه شالت عسل وأنه اخذت الجنطه ولزمت مديحه
الي كوى تتحرك الممرضه صاحت خل تكعد بالعربانه
الممرضه::خياطاتها بعدها ميصير تمشي
-همزين وصلتنا للباب تلكانه طارق ،، وفاطمه مشت قبلنا
متوجها للسيارة ،، كوى صعدنا مديحه قبل مايحرك كالتله
مديحه::اروح ويا سونه
فاطمه::روحي بس بتنا ماتروح
انتفضت مديحه
مديحه::شنو خاله بنتي وياي شنو متروح منو يرضعها
فاطمه::اخليها على ممه
مديحه::شو ساكت استاذ طارق
-ردت اهدء الوضع گتلها خاله هيه ماتكدر تتحرك
عدها خياطات وانتي وين بيج حيل خل اخذها لحد ماتفتح
الخيوط على الأقل
فاطمه::اي اخذها عادي
مديحه::وبنتي وياي
فاطمه::لا
-ضل طارق يتلفت بينهن
طارق::أنه احلها تروح سلاسل ويانه
-باوعتله متفاجئه هز رأسه اي وسحب نقالة عرفت راح يتصل بالباشا وفعلا اتصل بي
طارق::طالبك لاتردني لأن امي و مديحه كابات وأنه باب المستشفى امروتك
-حجاله عن عركتهن سده وهو يتشكر منه
طارق::هاي هيه انحلت
-بس حرك طارق علن تلفون عن وصول رساله بدون ماتعب
نفسي باكتشاف المرسل دريت هو فتحتها.
الباشا::بت الكلب تحرجيني سهله اعلمج
باجر ترجعين مادري شلون اطلعيلج عذر
-رجعت نقالي للجنطه وصلنه لبيت طارق الي تفاچىت بي
صلوات شنو هل بناء والتصاميم الحديقه جبيرة امشي
وتلفت مديحه بصفي حجيت مسمعتها ولج لاتخلينه يبيعه
مديحه::لا يغرج شكله مابي راحه
-فاطمه دخلت كدامنه وطارق وراها دخلنا من باب المطبخ
كانو صاله شكبرة والأثاث شنو عبرنا گلدور بين الغرف
ودرج التفتت على صوت الباب الي نطبك ثأري فاطمه سدت باب غرفتها باوعت لمديحه الي عينها لطارق تجاهل نضراتها ورد
طارق::حيا الله سلاسل تعالن يأبه
-حجاها وهو يفتح غرفه مقابل غرفة أمه دخلت مديحه
وأنه وراها اباوع جربابه ام النفر وكنتور صغير ومرايه
بالحائط وميز على جانب عليه غراض كأنو كلبي علمني هل غرفه لقدر كعدت مديحه على الجربايه وهو يحجي وياها
طارق::لاتزعلين منها فرحانه بالطفله اول وتالي تشمرها عليج لأن ماتتحمل طفل يبجي يله ارتاحوا راح اصعد اغير ملابسي وانزل اجيب اكل
-طلع يضحك تمددت مديحه وهيه ادردم
مديحه::غير الخياطات لازماتني جا سحلتها، وانتي شبيج
صافنه ذبي صايتچ وروحي غسلي تلكين حمام جوى الدرج
-هاي غرفة قدر
مديحه::اي طارق مامخلي أمه تغيرها والبصفها مال
وداد وعمه هسه يطلع اصعدي جيبيلج ملابس مني وسبحي
ونوب اراويج البيت
-شويه وطلع طارق وصته على التحتاجه،، صعدت جبتلي ملابس وحته الها خذتلي نضرة سريعه بالقاط الفوگ
نزلت وفاطمه مامدت راسها علينا سبحت وطلعت
سمعت الطفله تبجي شويه واجت فاطمه
فاطمه::تعاي رضعيها من گلتلج خليها على ممه
صاحت مديحه متجاهله وجود فاطمه
مديحه::گومي سونه جيبي بنتي خل ارضعها
فاطمه::لا انتي تعاي هنا رضيعها ورجعي
مديحه::راح اكون اخذها واصعد اشمرها من القاط الفوك
واسويها ذرگ واخلصها منج
فاطمه::اي تسوينها جا انتي مجرمه هيه التعيش بالصعده شيطلع منها بس أنه الج شوفي لو ما توبتج هسه راح اخليها
ممه .
-طلعت فاطمه و مديحه شمرت الغطى وكامت طفرت أزمتها شبيج يمعودة خياطاتج لاتنفتح صدك جذب
مديحه::وخري خل اجرم بيها حتى اخلص من شرها ام الخل
-ولچ بس سكتي شبيج قابل ماتعرفينها
مديحه::مالي خلك سوالفها تعبانه ولج الالم موتني
-كعدتها على أمل يجي طارق ويحل السالفة نسمع الطفله
تبجي ولج كومي خطيه بنتج جوعانه
مديحه::لا اريد اتوبها اذا رحت هسه بعد تمشيها عليه
-ضحكت من اجت فاطمه شايله الطفله
فاطمه::رضيعها ياكلبة شوفي ليش ماثق بيج
لان ماعندج حنيه تسمعيها تبجي وماجيني رضعتيها
مديحه::تولي أنه اريد يصير بيها شي حتى اكول للشرطه
السبب من فطوم
-خرب ابوج ولج سدي حلكج اخذت الطفله من فاطمه
الي بقت كاعده لحد ما خلصت رضاعه اخذتها ،، صفنت الله يساعدج يامديحه ،، اجه طارق مامخلي شي ماجايبه
كمت سويتلهم صينيه راح يصيح لامه رجع بيدة ماعون
طارق::سلاسل بدون زحمه عليج بس خلي لامي هنا
-كمت جبت صينيه صغيرة ورتبتها اخذها وهو يتشكر مني
وهيج اليوم ثالث حرب بين فاطمه و مديحه والباشا شبعني مسبه
الباشا::ولج شكو باقيه بعد
-حجيتله عن وضعهن.
الباشا::ديري بالج منها هاي المرة مريضه نفسيا
-اقتنع ابقى قدر كل شويه تتصل بينا
قدر::ماخلاني اجي يكول موزين على تينه
-عود من تجي يمي تعاي شوفيها،،وهيج خلصتها
على اعصابي مديحه شاطرة وصت طارق على اعشاب
مديحه::بس فوريهن الي وخليهن بالطشت حتى اكعد بي
-غير نسبح البنيه اليوم
مديحه::خل أسبح بلكي اكدر اتحرك
-جهزتلها الحمام دخلت وأنه نضفت الغرفه الي من اباوعلها
ينمرد گلبي خذني الفضول اباوع لصاله بابها على الگلدور
دخلت لفت نظري صورة جبيرة معلگه بالحائط تقربت
اباوعلها حسب الوصف هذا فاروق بس والله شخصيه
كمزت ايدي على گلبي
فاطمه::شعدج هنا وليش تباوعيله
-بلعت ريگي وماعرف شحجي ضليت اجفص ها خاله الله يرحمه بعده شباب وحلو
فاطمه::أي راح بسبب وداد الساقطه احتركت روحها
-نقذتني مديحه صاحت عليه ركضت بخوف
مديحه::شبيج مخطوف لونچ
-حجيتلها الصار ضحكت ،، بس تدرين يشبه طارق كلش
مديحه::اي دتعاي حضريلي ماي دافي وخاولي وغراض
عسوله بين ماجيبها
-حجتها وطلعت حضرت الغراض واسمع هوستها هيه وفاطمه اجت شايله بنتها وذيج ادردم وراها
فاطمه:'لا تموتين الطفله عوفيها اختي راح تجي تسبحها
مديحه::مشكورة ماريد. احد يشوف بنتي بلا ملابس
-ملت فاطمه و مديحه نزعت الطفله جنها زرزور
ولج لاتزلك من ايدچ
مديحه::صبي ماي مالج شغل صار اشهر مكابله اليوت يوب واتعلم يله ولج لاتستبرد
-فاطمه تحجي وهاي حاطه الطفله وتفرك بشعرها
وأنه ميته من الخوف اصب الماي ويتراولي راح تختنك
لعبنا بالطفله لعب كوى خلصتها
مديحه::اي هسه ريحتج حلوة عفيه بنيتي صيري نضيفه
-خرب ابوج اسكتي وكف گلبي ،،لبستها وفاطمه
كاعدة تريدها تكمل حتى تأخذها كسرت خاطري مديحه
ماتقبل تنطيها
مديحه::تنام يمي
فاطمه::لا بفرشها تنام أنه أكرهه هاي الغرفه
-خذتها وطلعت كمت فتحت الكنتور الموجود اباوع ملابس
معلكه وميبنه من مدة قديمه كتب ودفاتر وقرطاسيه
دنكت البوم صغير شلته اباوع صور قديمه جامعه قدر وامها
وطارق وفاروق وكم صورة لايوب وقدر رجعته لمكانه
مديحه::كل ماادخل انضفها اشبع بچي يتراولي قدر
شلون جانت هنا وتدرس وامها وياها .
-اسبوع طلعت روحي من فاطمه وتصرفاتها اخذنا طارق
للدكتورة شالت خياطات مديحه ورجعنا گلتلها اروح أنه
بعد انتي صرتي زينه
مديحه::ماقصرتي
-انجبي شنو غير اختي انتي ترى قدر ميته تجيج بس تدرين
مديحه::معذورة عود من اجيج نتشاوف
-بعدنه نسولف ودكت قدر
قدر::ها شلونجن شنو شوكت تجن
-انه هسه طارق راح يجيبني لبيتي بس مديحه
ماتكدر تدرين بفطوم وهم لازم تطلع الاربعين
قدر::يا وأنه محضرة نفسي جا فتحي كامرة اشوف عسوله
-هيه يمنا حتى تشوفيها ولج يم فاطمه
قدر::اي ميخالف دروحي يمها
-فتحت الكامرة اريد اكوم وسمعت شهكتها باوعت الها
شبيج يمعودة حطت أيدها على حلكها ودموعها نزلت
قدر:'غرفتي هاي هنا جنت ادرس امي رتبتها الي
بس مانام بيها دوم أخذ مخدتي وروح يم امي هنا جانت
تجي تصيحني حتى اكل تكعد يمي تحجي على فاروق وأنه
اجاگرها وأكلها تغارين
-تحجي وتبجي بصوت
قدر::يايماااا وين عفتيني ليششش
-سديته منها وطلعت لأن طارق اجه ودعت مديحه وصيتها على نفسها وبنتها وصلني وهو يتشكر دخلت لبيتي احس جنت مسافرة ورجعت بوجهي للحمام طلعت بس احس الم
بطني مو موعدها ليش هيج خابرني الباشا كوى حجيت ويا
فهم مرضي كم يوم وماكطعت استغربت ليش هيج وحتى هو هم تالي حجزلي يم دكتورة وصلني وكال من تكملين
خابريني دخلت وتفاجئت من كالت
الدكتورة::تأخذين مانع
-اي
الدكتورة::وكطعتي
-لا بس جنت طالعه يم اختي وماخذته اسبوع
الدكتورة ::ميصير ماما لازم يوميه ومن تردين تكطعي
بعد الشهريه لاتشربين
-كتبتلي علاج طلعت الصيدليه قبل ماخابرة كلت فرصه
اشتري حتى لايشوفه حددتلي العلاج وطلعت اتصلت بي اجاني
الباشا::ها شكالت
-خربطه عاديه وكتبتلي علاج
الباشا؛:تمام
-وصلني وراح كم يوم تحسنت ورجعت أخذ المانع
مرات اذكرها بليل مرات الصبح مرات لحد مايجي اركض قبل لاافتح الباب اشربها ،، الايام تركض قدر وضعها مستقر
مديحه طلعت الاربعين اجت وقدر هم فرحت بين
قدر::ولج بنتج تشبه فاطمه.
مديحه::لا بروح امج اخنكها غير .
-هنه يحجن وأنه ملتهيه بتينه الي سوالفها تخبل وقدر لاعبه بيها لعب تحتار شتلبيها وشكالات شحلاتهن ولج تعبت اديه
يوجعني كافي رگص
قدر::شغليلها النقال وعوفيها تولي
-طلعت لطميه وخليت النقال كبالها شو هاي تهز متت ضحك
قدر::كله من الباشا هو سوفلها وثابت متخبل
-شنو أوضاع اريج وابنها
قدر::ماشايفتها البنات هنه يجني وحتى خوات ثابت
الحجي يوميه يأخذ تينه لليل يرجعها والولد نفس الشي
مديحه::احسن المن رايحه
قدر::بس ثابت يلح امشي امشي كتله خل يعالجون ابن الباشا بلكي اريج تخف خباثتها
-تعدت فترة وابن الباشا هم سووله عمليه حسب ماتنقلي
قدر مديحه هيه وفاطمه حرب مستمرة مكاماتنا بقت يوميه
وكل خميس يجني قدر رجعت علاقتها بيت الحجي تروحلهم
قدر::بس ماطول ساعه وارجع ومرات من تروح اريج لأهلها
-ميخالف تجنبيها
قدر::اگلج هذا الخميس مااجي لأن عدهم ثواب
-خوش بلغي مديحه حتى تجن سوى ،،اكتم غصتي
ومابين كدامهن تعامل بيت الحجي الي بقو مستبعديني
لاشركوني بمناسبة وحتى الثواب الي يسووو كامو مايدزولي مثل قبل حيل حز بداخلي هل موضوع تاكدت لا يمكن بيوم
يعتبروني جنتهم حالي حال قدر سكتت رغم انقهر وهو مامقصر وياي ويجي يوميه فوك المسواك ينطيني مصرف
الباشا::خاف تحتاجين شي هذا مصرفچ
-حتى لو ردت شي هو أنته تخليني اروح للسوك
الباشا::اخاف عليك اسمر اغار من الناس تباوعلك
-وهيج مخلصها وياي همزين مديحه تجيبلي الإريدة
لان هيه طارق يأخذها للسوك ومرات قدر من تروح ويا نغم
خابرتني قدر فرحانه
قدر::راح نروح للزيارة كم يوم
-بالعافيه ادعيلنا وياج ،،فرحتلها من رجعت علاقتها بثابت
مثل الأول توني طالعه من الحمام دخلت لغرفتي انشف بشعري واسمع الجرس والباب ثنينهن يندگن ركضت للكامرة
اباوع نسوان بس مبوشايات مامبين منهن شي ضليت مركزة
اريد اعرف منو هذن معقوله على الصالون بعدني احجي وياروحي وهنه هجمن على الباب يدگن بثنين اديهن استغربت وخفت شكو رجعت الغرفه اريد اشوف نقالي كلت اخابرة واسمع الصياح انصدمت من كلامهن
ام الزلم خطافه الزلم بت الطبال بت بشار الگ ..
-ضليت فاكه حلكي نوب اتخردلت اباوع فشلانه اكيد الجيران سمعت تقربت للكامرة البيت المقابيلي فتحو بابهم
دكيت على الباشا بس فتح خط. صحت الحكني
الباشا::شكو شكو ولج احجي
-احجيله وعيني للكامرة وهنه خبصن الشارع بصياحهن
الباشا::لاتفتحين الباب بين مااوصلچ
-سده وأنه ضليت الوب اطلع أمد راسي من باب الصاله
وارجع للكاميرات وهنه يغلطن ويفشرن خذلهن بنص ساعه
ونوب وحده حجت ويا الثانيه ومشن ماكو دقايق وطبكت سيارة الحجي نزل ومولي ويا مدري شحجو ركضت فتحتلهم الباب بعدني ماحاجيه استلمني
ابو اسعد::من گتلج يأبه شيلي منا يأبه الناس هنا تعرفنا
يله هسه شكبرها علينا كدام الجيران .
-شنو حجي أنه شعليه قابل طالعه ماعركه الناس
ابو اسعد::جا هذن شنو الهدن عليج هيج بدون سبب
-ترى ماعرفهن ولا اعرف احد هنا اصلا أنه متفاجئه
هنه منو وليش هدن عليه بس السمعته يكولن خطافه الزلم
باوعلي وهز ايدة ماراضي،، متت قهر مولي ضل ساكت
ابو اسعد::عمي كفي الشر وابتعدي لمكان محد يعرفج بي
-وهنا منو يعرفني عمو وليش ماتكول هاي اريج وامها
ابو اسعد::خافي ربچ اريج بالبيت وحتى وإن هم مستحيل
تسوي هيج بناتنا مايطلعن هيج طلعات يستحن ويخافن
-ماهدت عليه ام اريج قبل ؟
ابو اسعد::اجتچ بأدب لا صيحت بالشارع ولا احد سمع ثوتها
-وانه اگلك هاي لعبه منهن
ابو اسعد::لج بابا اگلج اريج وامها بالبيت عدنا البنيه ملتهيه
بأابنها اصلا ماطالعه .
-بعدنا نحجي والباشا اجه كام مولي فتحله الباب دخل يباوعلي سلم على ابو وكعد. سألني حجيتله الگالنه النسوان.
الباشا::كوم مولي رجع الكاميرات منو هذن
ابو اسعد::تگلك مبوشات مامبين منهن شي
الباشا::بلكي المح شي انشوف كاميرات الشارع
منين اجن وشلون راحن .
-رجع الكامرت يباوع بتركيز مامبين منهن شي طلع يمكن راح للجيران الي بالركن شويه ورجع .
ابو اسعد::ها شنو لگيت
الباشا::ماكو شي بس الكاهن اول وتالي
-كام ابو مزعوج طلع وصاح لمولي تبعه
الباشا::المن خابرتيهم
-مو أنه همه اجو ،، اكيد واحد من الجيران خابرهم
سكت وبقى كل شويه يعيد الكاميرات ويسألني شحجن
واعيدله الگالنه بقى كاعد يباوعلي هزيت راسي شكو
الباشا::منو هذن
-شو تسألني أنه شمدريني شكيت بأريج وامها لأن يصيحن خطافه الزلم كلت محد غيرهن بس ابوك كال لا
الباشا::ماتسويها اريج مستحيل تخاف وحتى عمتي
وحتى لو شكيت بس هنه ثنينهن بيت اهلي
-نوب الفشله من الجيران هسه شيكولن عليه
الباشا::سهله لابد ماالزملهن خيط يله أنه اروح
لان دوام كوى بگت نفسي ديري بالج على نفسج وشيصير خابريني .
-مر على هل سالفه ايام ماكلت لقدر ماردت اضوجها
خطيه متونسه بسفرتها بس حجيت لمديحه
مديحه::شغله تحير منو غير اريج قابل انتي ماخذة
زلمه من مرته غير الباشا
-ماقهرني اله كلام الحجي
مديحه::خاب خلي يحجي يمعودة هو احنى مانخلص
بس نتحمل شنسوي
-مامجبورة اذا هيج خل يحجي ويا ابنه يعوفني
واشيل منا ابعد كلش .
مديحه::خاب لاتلعبين يعني وين ترحين لو طلگج
والنذل يفتر عليچ ،، ولجچ اوكفي يجوز محابس اي تطلع منه هيج دگه ناقصه لأن هو ناقص اي وروح امي
-صفنت لا شبيج يمعودة منين جاب النسوان لو سلوم
طالعه ام دعدوش اگلج اي
مديحة::شوف بنت الصخل ولج يعني صعبه يجيبله
ثنين من الشارع يطيهن جم فلس غير يكيفن
-ومنو تجازف شبيج وين يدرون محد يمي لا
مديحه::لا يجازفن وياما سونها سلوم وصوله
وحتى يدزونهن. على نسوان يكتلنهن بالشارع ويخلنهن
فرجه للناس تدرين جانن نسوان تجي تدفع يطلعن وياهن
لو وحده رجلها مزوج وحده بالسر لو مصاحبها لو وحده تطلب وحده فلوس اوووو مصايب ..
-من اگلج شتعرفين عنهن تكولين ماعرف
مديحه::خاب هسه دحتاري بسالفتج.
-شسوي مثل گليلي
مديحه::لاتسوين هو يسوي مشكلته هو يحميج
-ضل الأمر شاغل بالي وكل مااسأل الباشا يغير الموضوع
جاي اغسل بالبيت وهو اجه دخل وهو يحجي
الباشا::بشرفچ شكو مفيضه البيت ،، وين اكعد هسه
-ادخل الغرفه هسه اكمل مابقى شي ،، راح يمشي بحذر
صاح عليه رديت هسه اجي كملت سكت كفيت البيت بسرعه
ودخلت اخذتلي ملابس سبحت وطلعت هو متمدد على الحربايه ويگلب بنقاله انشف بشعري واحجي ويا ،، جوعان
الباشا::لا ماشتهي .
-كملت وصعدت يمه بين حظن وسالفه تذكرت الحبايه
تحججت بالصوى فلتت روحي من يمه احتاريت شلون اخذها طلعت جبت ماي وهو يباوعلي حاولت اششت انتباها
ضليت افتح الكنتور واسدة ركضت للمجر سحبت عطر رشيت وهو نضرة عليه كعد ومد أيده جوى المخدة وطلع الشريط انصدمت
الباشا::ادورين على هذا
-بقيت أتلفت صاح
الباشا::احجييي ليش هيج تسوين بشنو قصرت لو انتي
ماتردين تعيشين مثل النسوان وتكونين عائله تردين تبقين
للونسه شوكت تنعدلين فهميني،،بس مو صوجج أنه مو رجال
وانطيتچ اكبر من حجمچ
-ياحجم حالي حال ام طيبه اهلك نابذيني اتريدني اخاف
وابني ينضلم مثلي ياحجم تحجي عنه وابوك كل يوم يكلي شيلي .
الباشا::اششش صوتچ ماسمعه مضلومه ضالمج
ولچ مو هاي مديحه وهاي اختج بس كولي أنه ماريد استقر
-هجم عليه شبعني كفخ لازمني ويعت بيه وصوته يلعلع
الباشا::احجي وين ضامه حبوب بعد احجييي
-هنه بالمجر بس وخر عني ،، دفعني وفتح المجر طلع باكيت الحبوب أخذه وطلع خلص يومي بجي مارديت على مديحه
لثاني يوم تمرضت كلش بقيت بفراشي اسمع الباب ماكمت
لليل جسمي بدة يطكك وجهي صار يخوف دكيت على مديحه ردت وهيه تعتب
مديحه::من القهر والخوف حتى بنتي تمرضت لأن ارضعها
وأنه شايطه ليش هيج ؟
-بلكي تجيبلي إبرة راح ادزلج الوصفه .
مديحه::ددزيها هسه اجيبها واجيج .
-ورا ساعات اجت مديحه بنتها وياها .
مديحه::شو تعاي هنا على البرودة .
-روحي ماعليه شي هسه اصير زينه مادام ضربت الإبرة
مديحه::درتاحي خل اسويلج اكل
-بقت يمي للصبح اجه عليها طارق راحت باوعت للنقال
رفضته دز رساله
الباشا::ترى مايلزمني الباب اكسرة واكول ضاع المفتاح
-كمت فتحتله ودرت وجهي دخل وراي
الباشا::نوب ماراضيه على صخام وجهج
-شوكت مااهلك عاملوني مثل اريج عود احجي
الباشا::يتيم ماعندي أهل اعتبريني حالي حالج
يعني شسوي ماتقبلوج اجبرهممممم
-لا تجبرهم بس لاتطلبني جهال
الباشا::وأنه مو كيفچ
-وصار يأخذ حاجته غصب وكل مرة يجي نتعارك
وشكد حاول حتى ارجع ويا مثل قبل يمل وهو يحاول يخليني اتفاعل ويا كرهت نفسي ،، ماحجيت لقدر لاتنقهر وهم تبقى تلوم بيه مديحه مرة تلومني ومرة تخلصها دعاوي على اهلنا .
مديحه::تعبت من فاطمه ولچ مليت حاسبتني مربيه
للبت كون ارضع وسبح وأكمل احتياجاتها واطلع من الغرفه
-طارق شيكول ؟
مديحه::لو شما يگول ماينطي بأمه مخلصها عليه
ميخالف وتحبها وخليها وبعد احسن حتى نرتاح من بجيها
نزلنا يمها طردتنا وضاله محتارة شسوي كليلي
-احجي وياها وكمزت على صوت الباب وانصدم
نفس النساء مديحه كالت خابري للباشا خابرته وهم قبل لايوصل راحن نوب هذا قلق جديد تعبت كلش
الباشا::لازم ااجلرلج بيت بعيد منا فترة حتى نطيح على السالفه اذا احد من عدنا راح ينكشف لان ماراح نحجي بنقلتج بلكي نكشف الموضوع
-خلص ليله يمي ثاني يوم راح الضهر وخابرتني قدر
تبجي ها يمعودة
قدر::ولج رحت لان ام جواد هناك وخابرتني بعدني بالكراج
واسمع الهوسه دخلت والكاهم كابين اريج والحجي بعدني
مافهمه الموضوع شو هاي التفتت وشافتني وهجمت عليه
همزين نغم صارت كبالي كوى جرروها وأنه خذوني لغرفه
بنين بس اسمعها تغلط عليه ماخلت گلمه ماحجتها
-اي عليمن غير نعرف ؟
قدر::بعد ما اجه ثابت والولد سمعت على أساس هيه
داخله وسامعه الحجي يحجي ويا الباشا بموضوعج
انتي ليش ماكلتيلي على النسوان الهادات عليج؟
-مثلا انتي شبيدج وماردت اقلقج المهم شصار بعدين؟
قدر::شنو غير انكلبت الدنيا واخر شي سمعتها كالتلهم
خل يطلكني بعد أنه ثابت رجعني للبيت وراحلهم
-يعني عرفت بي متزوجني ؟
قدر::اي سامعه الحجي يحجي ويا
-دروحي خل اخابرة ،، يدينه منها وكعدت اصفن اي اجه
وقت الخيار شراح تسوي ياباشا ،، بيومها مااجه وقدر
بعد ما اتصلت ترددت اخابرها مديحه ضلت محتارة
مديحه::خليني أنه اخابر قدر وشوف
-بقيت انتضر شويه وردت مديحه هااا بشري ؟
مديحه::تگول مااعرف شصار من امس محد اجه
وثابت رجع لف رأسه ونام وطلع من الصبح
-يعني اكيد متعارك وياها والى ليش ماخبرتني بعد
مديحه::وهيه شكو ويعاركها خب اسكتي
-شكد صعب الانه بي عيني بالكاميرات وبالي للنقال
دكت قدر بس ماحجت شي لليل. اجه هو بس وجه
مايبشر سالتها
الباشا::طفي الضوى تعبان اريد انام
-باوعتله متفاجئه درت وجهي وطلعت من الغرفه
كل شويه أمد راسي عليه نايم للصبح كعد سبح سويتله
ريوگ وقبل مايطلع سألته
الباشا::ماكو شي أمر مو يمچ
-سكتت واستمر على هل حال ايام قدر ماتحجي بس حسيت علاقتها بثابت مو تمام حتى الخميس مااجت
مديحه::لا تكليلها تعاي
-لا يمعودة هم يكولون هيه تحرض اختها،، اسبوع
واجت قدر حالها ماعاجبني بس ماحجت
مديحه::ادري مااكلج ثابت شصار يعني اريج
سكتت ؟
قدر::مايحجي ومن اسأله يكلي رجال ومرته همه يحلون مشاكلهم لاتدخلين .
-تعدت فترة والوضع سكته هو يجي ويروح تعبت
منه لحد ما كمت ماقاومه ولا اعترض ،، بس احسب للشهريه يوم يوم لحد ماتجي يله ارتاح هاي أيامها مرن يومين بده
القلق وياي كل شويه اعيد الحساب وتعده اسبوع وصارن عشر ايام وعبرن تخبلت ضليت محتارة مالي غير مديحه خابرتها اگلج من تجين جيبيلي هاي مال الحمل.
مديحه::لا بروح امچ
-شاكه ترى ماكو شي بس اريد اتاكد
مديحه::جا شيصبرني لحد مااجي
-وشبيج فرحانه ترى مستحيل اخلي .
مديحه::شوفي عندي طريقه نعرف لحد مااجي
جا شلون نعرف شنو نشعل بخور دمشي مالي خلكچ
مديحه::لا وروح امي هل طريقه مضمونه جانن بالصعده
يسونها شوفي الصبح من تكعدين لاتشخين اول نامي على
ضهرچ كون بدون مخده ولا فراش
-خوش بالكاع وبعدين
مديحه::تتلمسين بطنچ اذا بمنطقه فوگ الحالب شفتيها
عاليه لو حسيتي صلبه هيج شلون الطوبه يعني حامل
-ادعبلي والصبح نجرب طريقتج،، سدته وهيه تضحك
ماعولت يصير الصبح سويت مثل ماكالت مااقتنعت
دكيت عليها خاب طريقتچ فاشله عود من تجين حاولي دبرين عذر ونزلي للصيدليه .
مديحه::خوش ولو متأكد حامل
-خابرت قدر سالتها شنو الاخبار
قدر::امس نغم اجتني تشوف تينه وتفاجئت من كالت
اريج عند اهلها من يوم الهوسه
-اكيد شرطت ماترجع اله يطلگني؟
قدر::تعرفين طبع نغم ماتحجي بس حسيت هيج شي
وهو اكيد اريج راح تطلب هيج طلب
-وخو مايطلكها ويضحي بيته وجهاله بس اكيد يضحي بيه
قدر::حتى إذا سواها صدك هل مرة ماابقى عدهم
-اوووووانتي شكووو؟
قدر::وروح امي اله اندمهم كون يسويها ،، هو أنه اريدلي
حجة على ثابت الي شايل خشمه عبالك أنه العقدتلج على الباشا مو هو القنعج .
-وهذا الجنت خايفه منه قدر شلون راح تقنع،، وصارت سولتي ابحث عن اي طريقه اكتشف بيها نفسي اذا حامل
لحد ما جتني مديحه جايبه الاختبار اخذت مترددة وخايفه
من النتيجه
مديحه::دروحي سوي شمتانيه
-دخلت للحمام وگلبي يدك بخوف ادعي كون لا بس
عضيت ايدي بقهر وأنه اباوع للاختبار غميت گصتي
لا لا ابد مو وقتها صاحت عليه مديحه غسلت وجهي وطلعت
مديحه::ها بشري ؟
-ماكو شي ،، باوعتلي مامقتنعه خلت بنتها بالكاع وتقربت عليه مدت أيدها
مديحه::وين الاختبار
-گتلچ ماكو شي
مديحه::اطينيا اشوفه
-هاي شبيج اگلج ماكو بعد عليمن تشوفين وذبيته بالغربي
مديحه::تعاي نمطلي خل اشوف
-صحت بعصبيه شبيج يمعودة شنو تفحصيني
گتلج ماكو لا تلحين درات وجها بزعل شالت بنتها
طلعت نقالها من الجنطه خابرت طارق كالتله تعال عليه
كمت اريد الزمها دفعتني
مديحه::خلي ابالج إذا تنزلينه تخسرين
-هو أنه شربحت حتى اخسر جبت عمري خسارة
طفل لناس ماتريدني ولچ فكري لو الباشا مات ابني يبقى
منبوذ وأنه احتار مايموت بس اذا اريج أصرت على الطلاگ
مديحه::خلي يطلگج هم تحطين طفلج وتكعدين
-وليشششش اتحطم واحطمه
مديحه::قسمتج هيج
-لا مو قسمه اختيار عقلي براسي المفروض افكر
مديحه::خوش فكري يله اجه طارق أنه اروح
-تزعلين مني مع الاسف
مديحه؛:مازعلانه أنه اصلا جيت ومامقررة ابات فطوم
شرطت علينا قبل لانطلع
-هزيت راسي تمام راحت ،، بقيت انه اصفن شسوي
وين اودي لا مستحيل واذا طلع عبد اي حتى نوب تكمل عليه وهيج للصبح ماغمضت تعبت من التفكير والبجي
دكيت على مديحه حلفتها ماتحجي حتى لقدر
مديحه:'لا مااحجي
-رديت اتصلت بقدر ردت كوى تحجي ،، ها شبيج
قدر::ولج اريج دازة الجهال اثنينهم لبيت الحجي كايلتلهم
يطلكني وجهاله اله يمه متت قهر على هل طفل المريض شلون انطاها گلبها
-منو گالج رحتيلهم
قدر::لا خابرت بنين واسمع صوت الطفل يبجي
سالتها شبي عبالي موجوع گالتلي السالفه
-والباشا والحجي شكالو
قدر::مادري ماشايفتهم
-ماسألتي ثابت ؟
قدر::مااحجي ويا.
-بلعت حسرتي نهيت مكالمتي وياها يومين مابين الباشا
تعبت منا مديحه الي تلوم وتحلف بيه ومنا التفكير هلكت
بس اخر مكالمه من قدر جانت نقطة نهاية
قدر::گلت مادام هيه عند اهلها رحت لان بنين ونغم
من يخابرني كلش تعبانات بسبب الجهال
-اي زين سويتي
قدر::لا والله الناس مو مال زين
-ليش شصار ؟
قدر::الحجي يحجي وياي من ورا خشمه وتالي تعمد
يسمعني عود يحجي ويا خاله يگلها غصبن عنه ينفذ طلبها
-اكيد هيج يگول قدر خليج مكانها منو تقبل زوجها يتزوج عليها ولج هو ابوي الجنه بصمه مال سايبه مايبين وجه من كفا وامي عافتنا لأن تزوج عليها .
قدر::خرب يومج ضحكتيني وأنه مالي خلك
-اضحكي لاتهتمين
قدر::لا والله صدگي ياسونه اذا الباشا طلكچ ماابقى عد ثابت لأن همه مالزمو ابنهم شكد ردتي تبعدين
-لا تدخلين وياريت يطلگني،، روحي يله خل اكوم اسويلي اكل
قدر::الخميس اجيچ باي
-عصرت روحي بكلامها بس ماكو حل ثاني إذا بقيت
وطلكني راح اعم على قدر ،، عزمت امري يومين اخطط
لميت ملابسي والفلوس الباقيه من قدر وذهبي وكم فلس
ملاتي صفنت شلون أفلت قبل مايوصله خبر اكيد اذا احد شافني من الجيران راح يتصل بي اي ماكو غيرها انتصرت
توقيت الكهرباء من تطفى لحد مايحول السحب أنه واصله
الشارع احس عيوني كامن ينسدن من وحدهن ليلتين أنه
اناطر شوكت تطفى مابينت للبنات وهو هم رغم يتصل ويبقى ساعات يسولف وياي ،، كمت فتحت الباب مديت راسي باوعت الشارع فارغ حتى ماقفلت الباب بس طبكت
وطلعت امشي واتلفت دموعي تحجي الرؤيا عني وصلت الشارع أول سيارة صارت كدامي صعدت وبس وصلت الگراج طلعت نقالي كتبت رساله لقدر ولمديحه واعرف هيج وقت نايمات دزيتهن وأغلقت نقالي ومنا انتهت تواصلي بالكل .
شلونكم حبايب قلبي شخباركم
