رواية ناديه الفصل الثالث والثلاثون 33 بقلم انين الليل

ناديه

بقيت بالغرفه لان ما اعرف شنو اوصف حالي وما اگدر اگللهم انا ناجحه هم راح يسالوني منين عرفتي 

حنين صعدت وگالت وهم هي مرتبكه //ناديه ياسر رايدج 

اشوف الخوف والترقب بعيون حنين ما گدرت اگللها نزلت وانا گوه ضامه فرحتي شفتهم كاعدين والكل مترقب حاجيته 

......ها ياسر بشر 

باوعلي وگلي //حرامات ...... 

افراح ما خلته يكمل كلامه غمتني باثنين اديها

- - امدااج نمونه ما نجحتي مايسوه النهار كله عينج بالكتاب لا شغل ولا عمل بيش ملت......

ياسر قاطعها // يمه انطينه مجال (باوعلي )عفيه نداوي عفيه رفعتي راسنا نجحتي ومعدلج اربعه وتسعين

حنين صارت تهلهل وحضنتني وانا گوه لزمت نفسي ما شهگت بالبچي رغم دموعي نزلن هادي گال 

 - - ما شاء الله

افراح وبناتها انذهلن وسكتن اما ياسر فادري بي فرحان اندك الباب راحت اسيل وما نحس اله كرم وزوجته وبيبي 

جميله الي جايبه (الواهليه ) نذر الچكليت وشمرته على راسي وهي تهلهل وام مرتضى هم وياها وغفران ونبأ 

واجه مرتضى اما احمد وابراهيم ذوله طالعين للفريق عمي كرم اتقرب مني وباس راسي وهو يگول

- - عفيه عليج يا بطله رفعتي راسنا 

مرتضى //سباعيه وجبتي هيج معدل رغم صعوبة الاسئله 

جميله صارت تهوس //يالطارش كللهم نجحت (بعدين صارت تبچي وتگول )عمت عيني عليج منيره 

تعاي شوفي تعبج ورباج ما راح بلاش ( باوعتلي وگالت )هسه عباس فرح بگبره 

اتقربت عليها غفران وگالتلها //ليش هيج جميله اشو ما فرحتيلي مثل ما فرحتي الندوش

جميله وهي رافعه العكازه // خايبه انچبي ام حلك افرحلج هاي رفعت راسنا انتي ما دري شكثر جبتي 

والنهار كله كرم يعلف بيج ويودي ويجيب 

افراح //چا عمه ناديه هم دخلت دورات ونجحت 

جميله لمت حلگها //وانتي شحارك كلبج دخل بته دورات بفلوس وانتي بناتج مدارسهن بفلوس عاد ناديه الناس 

حنت عليها ودخلتها 

كرم // اليوم العشا على حسابي مرتضى رووح جيب عشا وببسي وحلويات وفواكه كله على شرف ناديه 

انا مدنگه وراح مرتضى عمو كرم گال 

- - ناديه بعدلج يمي طلبين لان العشا طلب والج بعد اثنين 

ياسر گله //شنو مارد المصباح (وضحك )

كرم //لا بس انا گلت من تنجح ناديه الها تلث اشياء هسه العشا من ضمنهن بعد اثنيين 

جميله //هسه بعد وكت الهدايا خلونه گاعدين 

نبأ //صدك بيبي شتنطين الناديه هديه 

جميله وهيه تلملم بحلكها // شيب ابوج انچبي مالج غرض

ضحكنا على حچي بيبي جميله لكن اشوف الصدمه بوجه افراح وهادي وهديل الي بقو ساكتين 

رن تلفون هادي رد 

- - الو هلا سراج 

- - الحمد لله اي هاي يمي الله يبارك بيك اي كلنه موجودين كرم وجميله وكلنه 

- اي هاي هي يمي 

باوعلي هادي وگلي// تعاي سراج يريد يباركبج

اخذت التلفون ورديت 

...الو 

::هم زين سمعت صوتج اشلونج ندووش گولي الحمد لله 

......الحمد لله 

::الف مبروك يا بطله تستاهلين ردت شويه فد درجتين ع المعدل چان رحتي صيدله 

......اي هم صحيح 

::بس صدك ليش ما تحچين وياي شنو اجيبلج هديه لا تكولين ما اريد گولي شكرا

......شكرا بس ما اريد شي 

::اي مو بكيفج اجيبلج وغصبن ما عليج 

اجه كرم وگال// شنو الي ما تردينه 

انا گتله...... هذا عمو كرم وياك 

كرم اخذ النقال //الو سراج وينك ليش ما اجيت 

- - ان شالله هلا بيك اليوم فرحتنه شكبرها 

- - اي كلنه موجودين تريد جميله تسمعلك منها شكم رزاله معدله 

- - ههههه بكيفك هله بيك لا تبطي

وسد التلفون وهو يگول // يمه سراج يگول اجي وترزلني وجها لوجه (باوعلي كرم )

وانتي ليش اكليله ما اريد هديه 

انا سكتت جميله ردت //چا شبي اسريج انغسل حظه ما سلم عليه 

كرم //لا يمه ما اقبل تگولين على سراج مغسول حظه هو اكو مثله 

جميله //لا والله بس اگول خاف ينغسل حظه حاله حال اهويدي الما يگول اروح اشوف خالتي انشد عليها

كرم وهو يضحك ويغمز الهادي //شبيك هادي ما تجي تسأل على خالتك 

جميله //شني تگله شمالك چا هو من زمان مغسل ومچفن 

كرم راد يلطف الجو گال // شنو وين صار العشا اتاخر مرتضى (باوعلي وضحك )ندووش عمو 

سوي البيبي حليب 

......صار تدلل جميله

سويت الحليب البيبي جميله وصمونه واكلت وهي تباوعلي وتهزلي راسها حسيت بيها فرحانه اليه وعيونها 

توعدني بشي رن تلفون افراح ردت //هلا ام احمد شلونج هله بيج اشلون الجهال عاش من سمع صوتج 

اي هاي يمي (افراح انطتني التلفون وگالت )سلوى 

...... الو 

هلا ناديه حبيبتي مبروك 

... ... شكرا عمه الله يبارك بيج 

عفيه عليج شاطره انطيني ام ياسر

عماتي سلوى ونوال مو هلگد يسالن ولا يجن البيت هادي وموضي كل شگد تخابر وما تجي 

افراح ما طولت وياها جميله گالت 

 - - امداها سلوى حتى ما تسال ولا تسلم خو نوال عبالك ماخذه وزير 

افراح //چا وموضي ولا كانه عدها اخو وتسال علي

واجه مرتضى جاب العشا وانا وحنين حضرنا واحنا فرحانات يمكن اول مره الفرح زارنا 

من قبل وفاة بيبي منيره وگعدنا كلنه اكلنه سووا اول مره نگعد سووا ابيت هادي وناكل وياهم 

وانا اشوف اشلون افراح تريد تنفجر لكن گوه لازمه نفسها 

كملنه شلنه المواعين وجبنا الچاي وصبينا عمو كرم گال

ياالله عيني ياحلوه شنو تردين بعد گليلي 

انا ابتسمت ... ... عمو تسلم كافي فرحتك 

جميله //خايبه اطلبي منه بس على كيفج وياا تره ما عده مو مثل هادي ضامهن على گلبه حتى ما بي يتنفس

افراح //ياا هادي خالتك تحسبلك شكد عدك وهي رجليها والگبر

جميله شالت العكازه مالتها //گبر يگبرج الله ياخذ اليكرهني وانتي شلج غرض ابن اختي احچي اسبه اغلط علي

انتي شعليج نابزه بالوسطه 

افراح مصفطه اديها //ياا شنو شعليه هذا هادي ابو ياسر رجلي انا وبس وانا الالي غرض 

جميله هزت ايدها //ههههههه بالعافيه عليج وياهو مشاركج بي عاد انتي تجيرين البيضه 

الكل ضحك هديل //بيبي يعني شنو تجير البيضه

جميله //انشدي حبوبتج نصره يعني هيچ گايله (وضمت كف ايدها ) بخيله وما تند النديده ومو عبالج ابوج كريم

تره يباوع للتفله عباله درهم 

الكل ضحك بس افراح تهز بايدها 

كرم //هسه ما گلتي شتردين 

جاوبته وانا مدنگه //عمو اريد اروح ازور بيبي وبابا وكافي 

كرم //بس هاي تدللين اسبوع الجاي انتي وحنين تتدللين وهاج (طلع فلوس وگلي ) هاج بابا ذني الج

......لا عمو كافي 

كرم //بابا اخذيهن 

جميله //لاتردين ايد عمج اخذيهن حبوبه ضميهن ايفيدنج 

......شكرا عمو ربي يخليك

وراحو بيت عمي كرم وانا وحنين فرحتنا ما تنوصف حسيت روحي مميزه صعدت فوك وما حاولت افتح النقال ما 

اعرف ليش ثاني يووم گعدت الصبح وسويت الريوگ وگعدت افراح وهادي وهديل وهي تگل الهادي 

  - - شوف بتك شتحتاج دروس واتفق ويه المدرسين 

ياسر دخل وگال //على شنو المدرسين مو مسجله دورات وتحضير يوم بيومه وهي تنجح 

افراح بنتر //اكلك ياسر المدرسين فلوسهم مو من جيبك عود من تكد علينه ذاك الوكت احچي 

ياسر //يمه هديل مو شاطره يعني خساره ابلاش

هادي// بابا ياسر انت ما عليك انت اتخرجت واخوك خليته بدورات ومدرسين واختك هم حالها من حالكم 

حنين باوعتلي وشاورتني // هادي يستحرم لازم الكل متساويين 

ضحكت على كلامها باوعلي ياسر //شنو شراح تقدمين 

......افكر اقدم معهد طبي واطلع من الاوائل وبعدين اروح كليه احسن 

ياسر //اي احسن من تطلعين من الاوائل راسا تعيين مركزي وحتى من تداومين راتبج جاري

......اي ان شالله 

افراح //شنو تعوفين الكليه وتدخلين معهد وانوب تكملين شني تخلصين عمرج اتدرسين 

ياسر //يمه بكيفها (باوعلي ) انا امليلج الانسيابيه 

هزيت راسي وجاوبته وانا ابتسم ... شكرا

وطلعو ياسر وهادي وهديل اجه عليها الخط وانا وحنين بلشنه بالشغل واسيل نايمه وكملنه شغلنه وصعدنا للغرفه 

والعصر نفس الشي كملنه وصعدنا ثاني يوم بالليل سلگنه لوبيا وگلينه بتيته وطماطه واخذنا ماعونه وصعدنا 

كملنه عشا وبقينا نسولف انا وحنيين الي تگلي // هيج تتخرجين ويصير عندج راتب وتشتريلي كل شي اريده 

انا سالتها...حنونه شنو الي تردينه هسه اشتري الج

حنين باستغراب //منيلج فلوس ؟

...الفلوس الي انطاهن عمي كرم 

حنين //خليهن الج اشتري بيهن ملابس شعبالج حيزبونه تخلي يشتريلج ملابس لازم تداومين بشي جديد ومرتب

عمري ما فكرت لو سالت نفسي ليش هادي ما ينطيني من فلوس المحل لو راتب ابوي لان ما عندي الجرأه احچي 

وبصراحه اگول اكيد هو ضامهن او راح ينطيهن وبصراحه اكثر اخاف منه يصير عصبي ويضربنا او يتصرف 

ويانه تصرف مو زين 

ثاني يوم بالليل چنا انا وحنين انظف بالمطبخ لمن ما اجه هادي وگال

- - افراح كرم جاينه هو وخالتي ومرته 

افراح //شنو اشو اخذت رجلهم علينه شنو يوميه جايين 

هادي //الرجال خابرني شگله 

افراح //اووو. هادي گله طالع وام ياسر اخذت البنات وراحت الاهلها 

هادي //هم باچر يجون 

افراح //ما تدري بيها هاي خالتك المخرفه تحچي حچايه بالبصره والثانيه بكركوك

هادي //ادري بيها بس شنو اطردهم 

افراح //والله انا اطردهم بس تحچي (اتخوصرت )وهمه شعدهم يارايحين ياجايين شنو خاف طلعت الاولى 

وجابت السياره بس انا اگلك هذا كرم انطاها چم فلس واتعجب ولازم يطلعهن چايات واكل

اندك الباب وراح هادي فتحه افراح گالت //تف لا هله ولا مرحبا ( اجت يمنه للمطبخ وگالت ) سوون چاي 

وطلعت ونسمعها تگول //هلا ومية هلا بيك ابو مرتضى اشلونج عمه وباستها 

جميله// طاب لونج 

افراح. //هلا بيج ام مرتضى وين غفوره ونبوءه 

ام مرتضى //بقن يم اخوانهن

كرم //چا وين البنات 

جميله باستهزاء // يلكدن چا وين خاف بالمتنزه 

رادت افراح تحچي اندك الباب وراح هادي وهو يگله //هلا يابه فووت اهنا عمتك ادخل يمعود خلي ترزلك 

بلكت تفك مني 

سمعت كرم يگول //هلاااا شعجب جاي 

::ما تجي انت لو خاف تغرك السفن 

كرم //السفن مو اليه الهادي انا رجال فقير

افراح //هلا بيك شلونك سراج الحمد لله ع السلامه 

:؛الله يسلمج ام ياسر وينها بنتنا الشطوره 

سمعت صوته وصار گلبي يدك ورجفت ماردت اشوفه خفت ما اعرف ليش وانا اتذكر لمن سجى تسميني خدامه

وهو ساكت هسه شيسوي جاي 

جميله گالت //افريحه ما تصيحين للبنات خلي انشوفهن وانت سريج شدعواك لا تنشد ولا تگول امدااك اگول 

انغسل حظك محد يصدگني

دخلت افراح وگالت //ما تجن شنو يرادلچن عزيمه 

حنين طلعت وسلمت على سراج وبعدين سلمت على بيبي جميله وعمو كرم وام مرتضى انا طلعت صارت عيني 

بعينه ردت اطرده واگله المن جاي بس ما گدرت رحت سلمت على بيبي جميله وعمو كرم وباوعتله كتله اشلونك ع م و 

هو باوعلي وگلي //هلا بيج الف مبروك عفيه صدك رفعتي راسنا 

...شكرا 

افراح //اتفضل سراج شنو واگف وانتن جيبن چاي

راحت حنين وانا لزمت ايدي جميله حنين جابت الچاي جميله گالت //ابنيه وناجحه عاد ياهادي شربتات ما يخسرن 

سراج ضحك وگلها ::لا الچاي احسن 

جميله //اگعدن يابيبي خلي انشوفچن 

كرم //يمه مو اول امس يمهن 

جميله //ولا مره اجيت ولگيتهن گاعدات مثل البنيات (وتاشر على هديل )كله بالمطبخ

الكل سكت كرم راد يغير الموضوع گال // ناديه يوم الخميس اخذج انتي وحنين وامي 

سراج ::وين ؟

كرم //للنجف ناديه تريد تروح تزور بيبيتها وابوها 

جميله //اي حگها

سراج باوع المرتضى الي صافن على حنين وگله ::رضاوي هاك عمو اكو غراض بالجنطه نزلهن 

باوعلي وانطاني العلاگه البيده ::هاج عمو ندووش هاي هديتج 

انا بقيت متردده جميله گالت //شو فاهيه ما تاخذينها من عمج

وگفت وصلت يمه وانا اباوعله اخذت العلاگه وشفته صافن عليه اجت عيني بعينه وگتله بعد ان دنگت ... شكرا 

جميله //شمالج تشاورين بروحج شو فكيها خلي اشوف شجايبلج 

الكل عيونهم على العلاگه بالرغم من انها زغيره فتحتها شفت بيها موبايل سراج گال 

:: راح تدخلين كليه وتحتاجينه وخليت بي شريحه وانتي سيفي باقي الارقام

جميله هزت ايدها وگالت //هههي هي لدالي جايبلها گلاده سوار نقال نمونه شني 

كرم يبتسم //يمه حاجته بهالوكت اهم من الذهب 

جميله // هاا احسن من الذهب وين صايره 

كرم //اي حجيه وداعتج 

جميله وهي تهز بايدها //خايب عليمن تضحك كل ما اجي صار عشر سنين اكثر اشوف هديله كاظته وتلعب  

مره زغير مره احمر مره هذا البي باب وانوب اشوف بتهم الثانيه هم بيدها واحد چا اذا احسن من الذهب ما 

يضمنه شو كاضاته ويلعبن لا بشغل لا بعمل

هديل باوعت سراج گلها وهو يبتسم ::هدوله عمو شدي حيلج حتى يجيج نقال هديه مني 

هديل //شكرا عمو 

جميله تحچي ويه افراح //اكلج ما تگومين تغسليلج تفاحات خوخات من الجابهن سراج گاعدين چنه مطرودين 

افراح رادت تحچي حنين گالت //تتدللين بيبي هسه 

جميله //يابعد بيبي مو اليه بس الولد گاعدين لا كيكه لا جكليته طرك استكان الچاي 

هادي //خاله شتردين بالخدمه

جميله خلت ايدها على حواجبها عود تباوع //ياهو هذا خاب عبالي نايم شمالك حتى حسك ما يطلع 

هادي // خاله غير اسمعج 

جميله // شني ام كلثوم وتسمعني بس انت هيچ گايل خاف تحچي خاف تخسر

وراحت حنين جابت صحون بيها فواكه وقدمتهن وصلت يم سراج گلها ::شكرا ولو زعلان عليج 

هادي باوع //ليش سراج 

::لان رسبت ضيعت سنه من عمرها حرامات

حنين سكتت ما جاوبت وبقو يسولفون ويضحكون بعدين صار لازم يرحون هادي گال السراج 

ابقى بات يمنا 

سراج ::غير مره ابو ياسر اروح انام بحضن جميله مشتاق الها 

افراح //ابقى سراج وحتى عمتي همه

جميله //لا حبوبه دايم البيت واهله شمالني متوازيه 

افراح //وليش عمه شبينا 

جميله //ما بيكم شي بس هاي شكثر ولا يوم ابن اختي اجاني وگالي تعاي خاله باتي عدنا ابقيلج يومين تلاثه 

هادي //خاله البيت بيتج 

جميله //الله يديم البيت واهله ويديمك خيمه 

سراج ::صدك ابو ياسر اي شي تحتاجه رنه بسيطه وانا بالخدمه

هادي //ما تقصر 

سراج // لا والله صدك ابو ياسر 

هادي // كفو منك بس ولو روحت عليه ادارة مكتب گرايب مرتك 

سراج //لا مو انا الروحتها (ويباوع الافراح ) 

هادي //لو ما طلگت مرتك وتعاركت چان انا وين هسه 

سراج // صدگني ابو ياسر مو انا الي روحتها بوكتها ناس حاقدين روحوها

هادي //وطلاك مرتك ؟

سراج // وحتى الطلاگ صار (سكت وهو يباوعلي ) ياالله احسن بدل ما اتورط اكثر اختياري چان خاطئ من البدايه 

بعدين شنو يابه انت هسه بموقع احسن واثگل وخلي اگلك للعلم عمها طلعت علي ملفات سوده متوازي چان 

رحت بالرجلين وهسه المكان الي انت بي احسن وارقى مو خو ما قصرت وياك ابن عمتي

هادي //اي والله ما قصرت سراج نجازيك بالافراح 

::ياالله فيمان الله تصبحون على خير 

كرم //ياالله يمه 

جميله //چا شني هادي يريد يبطل من شغله ويشتغل ويه سراج 

الكل ضحك كرم گلها //لا يمه هادي يريد شغله من سراج

جميله باوعت الهادي //خاب شمالك ما تشبع بس تلهط النهار كله ارتاح خاله شويه الدنيا ما يتلاحك عليها 

هادي //خاله غير اريد اسوي مستقبل الاولادي 

جميله //اليسمعه هادي ماخذله اربع نسوان وعده عشرين فرخ خاب تنجب انت بطرك فريحه ولاعبه بيك طنب

افراح بضحك //يايايا خاله شبيج وياي 

جميله //ما بيه شي بس شويه نفهي عن الولد خلي يشوف دربه 

مرتضى// ياالله بيبي خلي نمشي 

جميله //اي جايه تعاي ناديه 

...ها بيبي 

مدت ايدها بجيبها وطلعت الجزدان وخلت بايدي فلوس وهي تگلي //هاج حبوبه ذني الج 

هزيت راسي ......لا بيبي عمو كرم اهواي انطاني

جميله //ولج اخذيهن اشتري بيهن ريحه وزواگه مثل البنيات چا انتي وحد ما تباوعين البنات عمچ چنهن عرايس 

الكل فلت وجهه عمار بضحك // ناديه اخذيهن واذا ما ترديهن انطيهن الي 

جميله //امدااك اعمير عليمن تطلع مثل ابوك وافريحه تموت ع الفلس 

سراج // ياالله جميله ما تردين تنوميني بحظنج تعبان 

عوجت حلگها // انهجم بيتك لو عدك مره ما اعترفت بيه ياالله امشي

الكل ضحك وسلمو علينه وطلعو سراج بس كال فيمان الله حتى ما باوعلي 

ومن طلعو افراح گالت الهادي //هاي شبيها خالتك من عرفتها حاطه دوبها من دوبي 

هادي //شبيها افراح مره چبيره 

افراح //تگول مخرفه (باوعت النه )شوگاعدات شيلن الصينيه وتعالن وراي

شالت حنين الصينيه ودخلنه للمطبخ شفت صندوك تفاح وصندوك خوخ وعنب وعصير وحلويات 

حنين گلتلي اصعدي فوك انا ارتب الغراض واصعد رحت للغرفه وفتحت النقال شفت رساله من سراج 

لان اعرف رقمه كاتبلي 

::جبتلج هذا النقال لان بعد ما تغلقينه وتردين عليه وذاك هم احتفظي بي 

من شافني قريتها گال //وتالي ما ناويه تردين عليه انتي بعدج تكرهيني

فعلا ما رديت ولا كتبت اي شي لكن انا متعجبه وبنفس الوكت احس بفرح يعني سراج طلك مرته ومن يمته وليش 

ما اعرف اسئل منو 

وره اربع تيام رحنا للنجف انا وحنين وبيبي جميله وراحت ويانه اسيل اخذنا عمي كرم ومرتضى بسيارتهم 

وصلنه للنجف وزرنا بيبي منيره وانا اخذت وياي شهادتي وگتلها //بيبي هاي انا اخذت وصيتج ونجحت وان شالله

ما اقصر من اختي 

بيبي جميله گعدت يم الگبر وهي تگلها //ودي يامنيره اشيل بنات عباس بعيوني بس مو بيدي

بعدها رحت القبر ابوي وبسته شفت قبره متهدم شويه من الجانب انقهرت ليش محد يبني لكن ضميت قهرتي ما بينتها 

زرنا النجف ورحنا الكربلا بتنا وثاني يووم رجعنا وصلنه عمو كرم للبيت وهو هم راح البيتهم 

وره رجعتنا من الزياره باسبوع اجتنا عمه زهراء وصلها مرتضى الي دخل وراها جنطه مالت سفر 

وگلتله ساعه وارجع عليه شفتها وبوستها وهي حضنتني وباركتلي النجاح واجت حنين هي گلتلي

- - عفيه بابنيتي والله فرحت الج ولو من البدايه مخليلج درس درسين يمكن جبتي الطبيه 

انا سكتت وبس ابتسمت هي گلتلي //هاج حبيبتي هاي هديتج جبتلج ملابس للكليه وللبيت وشغلات تحتاجيهن

......شكرا عمه بس هذني اهواي 

زهراء//لا حبيبتي مو هواي جهزتج للكليه صيفي وشتوي لازم من تداومين تكونيين بمظهر حلو 

......شكرا عمه

حنين //حييل كل هذا الناديه وانا محد اتذكرني 

زهراء بعتب //لا متذكرتج تعالي يمي 

اتقربت حنين زهراء لزمت اذانها ولوتها //ليش رسبتي يعني ما كملتي فرحتنا 

......عمه اتركيها اوعدج تنجح 

زهراء //جيبيلي جهازج خلي اسييف رقمي

......ان شالله 

زهراء//بعد ما اوصيج شدي حيلج اي شي يطلعلج نعمه اهم شي تشدين حيلج بلكي تطلعين من الاوائل 

وتصيرين معيده 

......ان شالله 

زهراء//ياالله حبيبتي بعد رقمي يمج شنو تردين بس رمشي 

...اي عمه 

زهراء// انا استاذن

افراح //بعد وكت زهوره ابقي ع العشا 

زهراء //لا ما اگدر لان ابو اسفار عازمني 

افراح //هاا وين عازمج 

زهراء // بمطعم هسه فاتحينه جديد بس شنو فخم فخم تحتارين بي الله يخلي الطلال يوميه يطلعلي مناسبه 

مره اول لقاء ومره تلبيس الخواتم ومره الحنه ومره اول حمل 

يريد بس يطلعني ويونسني ياالله حبيبتي من رخصتج وسلمينه

افراح //الله وياج عيني يوصل 

زهراء باستني وشاورتني //ديري بالج ولو انتي كبرتي ما يحتاج اوصيج 

باوعت الافراح //ام ياسر سلميلي على هادي ابدي اشوفه واگعد واسولف شگد مشتاقتله واكيد هو هم مشتاقلي

بس شسوي مضطره اروح ان شاء الله اجي واشوفه 

افراح //الله يسلمج دادا هلا بيج

انا بس راحت عمه زهراء صعدت ملابسي للغرفه وفتحتهن شفتها جايبه شغلات حلوات كلش وغاليات ما ناسيه 

شي حتى الكماشه والشالات والملابس الداخليه والعطورات 

كتبت الها ......شكرا عمه لو باقيه شويه ما شبععت منج 

زهراء //العفو وداعتج انا هسه كاعده يم جميله بس حبيت اقهر افراح شويه

......عمه قهرتيها هواي لو بيدها چان كلتج بسنونها 

زهراء//اعرفها حقيره المهم انتي ديري بالج على نفسج 

......ان شالله عمه 

حبيبتي 

...اگلج عمه 

هاا 

...حابه اسألج 

اي ندووش اسالي

......هو سراج اقصد عمو سراج طلك مرته 

  زهراء تضحك // هههههههه صدك ما تدرين 

...لا والله قبل عشر تيام دريت سمعت عمي هادي 

- - ولج طلگها وره زواجه بتلث تشهر 

......هااا

  - - هاي شبيج ناديه 

......عمه ما ادري اتفاجأت بعدين هو ما يجي

زهراء//شيسوي يجي اذا ما يشوفج ويشوف حنين 

هااا اي هم صحيح بعدين گتلها (عمه زهراء ) 

زهراء//گليلي شرايده بدون تردد 

......عمه ممكن انتي اتقدميلي الانسيابيه اقصد تمليها 

زهراء//ها وليش 

......عمه اذا ملاها ياسر لو هادي افراح تتشرط عليهم يجوز يگلولي مليناها وهمه ما مالينها

زهراء//ولا يهمج انتي بس حضريلي رقمج الامتحاني وجنسيتج 

......گولي والله 

زهراء//والله بس فهميني انتي شرايده تدخلين 

......عمه انا حسب معدلي ولو اريد معهد طبي بس افراح ما تقبل 

زهراء//شلون عرفتيها 

......عمه عايشتها واعرفها من عيونها قبل لاتحچي

زهراء//هذا هو باچر اجي وانطيني رقمج الامتحاني 

......صار عمه وبعد عندي طلب يمج لان استحي اطلبه 

زهراء//اسمعج ناديه شرايده 

......عمه احنه كبرنا وسبحنا بالبيتونه بطشت ونحمي ماي هاي واگفه تصدكين حنين بالصيف 

كل يومين تسبح والشتا ساعات كل اسبوع

زهراء//اي ناديه شتردين 

...عمه حاچي عمي هادي بينج وبينه بلكي يبنيلنه حمام لو يخلينه نسبح ويه البنات 

زهراء//والله صحيح ما طلبتي غير حقج 

......فدوه عمه ومو تگليلهم انا گتلج الله يخليلج ابو اسفار واسفار وشكرا ع الملابس 

زهراء //العفو ياروحي

ثاني يوم اجونه بيت عمي كرم وياهم زهراءوبيبي جميله افراح من شافت زهراء شلون تسلم على هادي 

گعدت يمه وهو بقى ساكت جميله گالت //اشلونك خاله شو ما الك خلك 

هادي //اي والله تعبان 

جميله //الله يساعدك خاله بالنهار شغل وبالليل افريحه خانگتك

افراح //خاله ليش ترحين وتردين عليه 

جميله //شنو انا مچذبه گاعده بحضنه خاف ايتنفس شنو متعجبه ما شايفه بس انتي ما خذتلج رجل

افراح لمت كف ايدها وتضرب بالكف الثاني //هذا هو رجلي وبكيفي وين ما اكعد احد مشاركني بي 

جميله //هو الي يشاركج شيلكه حتى اعضامه امصمصتهن 

جبت چاي وقدمت الهم جميله //شنو افراح ما عدكم بس ماي وچاي شلقصه (باوعت المرتضى )هاك مريضو

مرتضى بضحك //ها بيبي 

جميله //يابعد البيبي رووح جيبلكم ببسي وكرزات افراح ميبستها من اگول اتجير البيضه تزعل

الكل ضحك ومرتضى راح جاب وانا متعجبه عمي هادي حتى ما گللها خلي افلوسج هسه اودي واحد من الولد

مع العلم العصائر والحلويات الي جابهن سراج ما طلعت منهن 

من اجه مرتضى حنين جابت كلاصات وصحون وخلو الكرزات وصرنا نشرب ببسي جميله گالت

ها الهدوم الجابتهن عمتج حلوات 

... اي بيبي كلش حلوات وذووق 

بعد زهوره هي ام الذوق 

... اي والله كلش حلوات 

هسه عمج كرم انطاج مصرف واخذج للزياره

حنين// بيبي لا تنسيين العشا 

والعشا وعمج سراج جاب هذا التخابرون بي 

غفران// بيبي الموبايل 

جميله //خايبه اعرفه 

غفران// بيبي گولي 

جميله //امداج غفيره عود تقلدين اسمه مبايل نمونه ههههي هي ما علينه (وباوعتلي ) وعمتج زهوره 

جابتلج ملابس وعمج هادي وعمتج فرحه شجابتلج ؟

انا سكتت وهادي ما جاوب افراح //بعدنا خاله خلي يطلع قبولها والله كريم 

جميله //والنعم بالله بس اگول هي هم مثل بتج فرحوها الله يفرحكم 

الكل سكت زهراء انطتني اسفار وگالت //ابو ياسر رايدتك بشغله 

هادي //اي تفضلي 

زهراء //شغله خاصه (وباوعتلنه )من رخصتكم

دخلو الغرفة الضيوف وزهراء خلت الباب مردود تقريبا ربع ساعه طلعت زهراء وانا اشوف افراح عباره 

عن بركان بس احد يتقرب منها تنفجر بوجهه زهراء طلعت تضحك وعمي هادي يبتسم 

وبعدين راحوا وسلمت على زهراء وانطيتها الرقم السري حتى تقدملي الانسيابيه 

من طلعو انا وحنين جمعنا الصحون واسمع افراح اتگل الهادي //شرادت منك زهراء 

هادي //لا لا ما رادت شي انا تعبان اروح انام

صعدنا انا وحنين للغرفه وثاني يوم گعدنا الصبح سويت ريوك وگعد هادي وياسر وافراح وهديل انا صبيتلهم الريوك 

هادي گل الياسر //اگلك ياسر اذا اريد اسوي حمام فوك السطح شگد يكلف 

ياسر //بابا حمام وفوك السطح ليش والمن 

افراح //شلك بي 

هادي //هسه غير تجاوبني

ياسر //يابه على حسب شگد طوله وشگد عرضه وارضيته شنو وسگفه والبواري وتاسيس الماي والكهرباء 

اريده مربع مترين بمترين فوك والسگف عادي حتى لو چينكو 

ياسر //ما يكلف اهواي بابا 

هادي //زين احسبه وگلي 

ياسر //صار 

افراح //غير اعرف المن تريده

هادي //افراح اريده الناديه واختها البنات كبرن او واگفه يسبحن بالبيتونه 

انا بدون وعي //اي عمو الله يخليك 

افراح وگفت وگالت بعصبيه //شنو هادي تريد تخرب السطح الحضرت جناب ناديه واختها انت شتحچي 

هادي //البنات كبرن يراد الهن حمام 

ياسر// اي يمه صحيح

افراح //(باوعت الياسر ) انت ما عليك شوف هادي هي كلمه حمام ما تسوي البنات مياده مو كافي حاملتهن ذاك 

يوم وهذا يووم 

لو هاي العانس المامصدگه اخذتلها رجل لو خالتك المخرفه گالتلك 

ياسر //شنو هالحجي

افراح بنتر //هذا هو الحچي بنات مياده حاملتهن على اعصابي انوب حمام وفوك السطح تعرف شيصير انا اگلك

كل الناس تصير مطيرچيه 

انا ما هانت عليه نفسي گتلها //عمه ليش هيج تحچين حرام عليج اذا ما يبنيلنه حمام خلي نسبح ويه بناتج لو 

بره بالحمام البراني 

افراح //شنو شنو خاف تتشاقين شوفي ولج خاف فرحانه كرم جابلج لكمه وانطاج فلسين لو هاي ازهيره المتشمخره 

وما مصدگه اخذتلها رجل جابتلج تواميل لو سراج جاب نقال اسمعيني لا يكبر راسج تره من باجر ابطلج واخليج 

الهوى حسره عليج تشمينه

ياسر //يمه كافي 

افراح بعصبيه //لا مو كافي مو كافي هذا العدي العاجبها تگعد اهلا وسهلا ما عاجبها تگول اكو هواي دروب

 خاف عبالها اخذت الشهاده وراح تدخل كليه وعبالها احد يگلبها لا متوهمه وكلكم متوهمين

انا من سمعت خليت وطلعت وانا ابچي ياسر يگول //شنو معناتها هاي تره حرام 

افراح //لا مو حرام يمته تفتهم هاي مو بت عمك وانطيك دليل ابوك ما اهتز له جفن من احچي افهمو

 هذني مو بنات عباس ذني بنات مياده وبس

////////////////////////////////////

الفصل الرابع والثلاثون من هنا