رواية أعظم خيانة الفصل الرابع والثلاثون 34 بقلم الزهيريه

ريماس/ اكو أمور تكون ما حاسب حساب الها بحيث من صير وياكم تخربط أمورك كلها طبعاً اي مخطط الي ويه راكان ماكو احد يعرف بي غير ام زهراء حتى عمي ما بلغته لانه عمي بالنسبه الي بس واجهه گدام الناس فقط لاهو يهمه أمرنه أني واخواتي ولا اني هو يهمني بعد طلاگي من بيان 

بقينه شهرين بين مراجعات على وصيات عمي احمد علينه وبين معاملة الجوزات 

اخيرها الجوزات ختمتها النه بعد شهر يله يوصل قرار المحكمه والقاصرين وبالبريد يعني انتظر بعد شهر المهم من گالوا النه هيچ اني قبلها بفتره احس عندي نحول وشهيتي للأكل قليله لهذا بيوم رجعت من الجوازات صرت بس اتقيأ واختي راحت صاحت لام زهراء وهي خطيه ما قصرت اجتي تركض من شافتني وگتلها الاعراض 

ام زهراء/ والله يا خاله هاي أعراض حمل 

ريماس/ أنوب شلون واحد ونضرب على راسه جاوبتها/ يا حمل خاله گولي يا الله بيش مفاوله عليه ومنين أحبل 

ام زهراء/ يااااا شبيچ بنتي شنو منين تحبلين غير چنتي مزوجه ويمچ رجال لعد هي الي يمها رجال شعدها غير الحمل والولاده 

ريماس/ خاله ترى ما چان ينزل شهوته هو ذكر هذا الشي والله قابل اكذب عليچ 

ام زهراء/ ولچ بنيتي مو انتي چذبين عليه هو چذب عليچ هو ماكو مره يمه يفرغ رغبته بيها لهذا من دخل بيچ صار يفرغ رغبته بيچ بس حتى لا يگول اني ضعفت گدامچ لانه يحسها زحمه عليه يگلچ اني ما أنزل رغبتي بيچ على اساس اني ما محتاجچ فهمتي صدگيني هذا حمل اخذي الحچي من خالتچ 

ريماس/ تخبلت هسه اني بيا حال اني كل همي اطلع خارج العراق جاوبتها / لا حاله انتي غلطانه يمكن هذا الجبن الي تريگت منه ما موالم معدتي لا اكثر ولا اقل 

ام زهراء/ هسه احنه ليش مدوخين نفسنه العصر نروح للمختبر ونحلل حمل وكان الله يحب المحسنين 

ريماس/ اني عقلي رافض الفكره گتلها / لا خاله لا اروح ولا ارجع هسه راح انام والعصر اگعد وان شاء الله ما بيه شي عفيه لا تهبطيني اني املي بالله چبير اطلع خارج العراق 

وراحت ام زهراء تسوي غده ويه اخواتي واني نمت وقبل ما انام وصيتهم ما يگعدوني وبقيت نايمه وما حسيت اله المغرب 

وام زهراء تگلي / ولچ گومي صايره نار من الصخونه امشي اخذچ للمختبر ولچ والله حامل 

ريماس/ اگوم اسبح حتى الصخونه تروح وما أروح للمختبر ابد اني كل حمل ما عندي 

ام زهراء/ ولچ لا سبحين مو زين عليچ غسلي وجهچ وايدچ وراح اروح وهسه ارجع 

ريماس/ راحت ام زهراء ورحت للمغسله بس شنو راسي يفتر اجيت اوگع لما اخواتي لزمني واخذني للمغسلة يغسلن بوجهي ورجعن رجعني للفراش احس رجلي ما اسيطر عليهن اجتي ام زهراء جايبه مثل الشريط وتگلي / اگلچ ريماس اريد إدرار من عندچ 

واني ما بيه حيل گوه احچي / ليش خاله 

ام زهراء/ اني اريد احللچ عن طريق الإدرار حتى اشوف آنتي حامل لو لا هذا تحليل منزلي 

ريماس / گمت گوه على نفسي ودخلت للحمام وانطيتها إدرار مثل ما گالت وخلته بهذا الشريط وشويه وگالت 

ام زهراء/ والله أني المفروض اصير دكتوره مثل ما گتلچ شوفي خطين آنتي حامل 

ريماس/ تخبلت وما صدگت ام زهراء وهي جبرتني ابدل اروح وياها رحنه على مجمع طبي قريب علينه ودخلنه على دكتوره نسائيه وبعد انتظار ما دام هواي دخلنه وام زهراء شرحت الموضوع مال التحليل المنزلي والدكتوره آخذت سونار گالت صحيح حامل عليچ 6 اسابيع وكتبت علاجات وطلعنه اخذنه العلاج ورجعنه للبيت بس شنو أني منتهيه من البچي 

ام زهراء/ راح تگولين لطليقچ على حملچ 

ريماس/ لا خاله اني طلعت بيان من كل حساباتي إذا گتله على الحمل اكيد يگلي نزلي واذا ما گال نزلي بس راح يسجل الاطفال بسمه واني اجتني خوش فرصه اطلع بيها خارج العراق لهذا ما احچي ابد اريد أطلع اخواتي بره ذني امر من حالي نظلمن 

ام زهراء/ والله احسن حل واني اشجعچ عليه اكيد بيان ما يرجعچ على ذمته 

ريماس/ وحتى إذا رجعني على ذمته شنو قابل راح يصرف على اخواتي هاي بعيده اليوم كلمن يگول يا روحي هو عمي بالچذب يجي هنا يشوف البيت فارغ ما بي غراض ما گال شياكلن شنو يشربن حتى 5 الالاف من جيبه ما طلع فرصة خروجي من العراق ما أبدلها بالدنيا كلها 

وصرت اشرب العلاج والصرف كله من راكان لانه ما عندي واتفقت ويه ام زهراء أنه يتاجر البيت من أسافر واني أتواصل وياها في سبيل يحولون الفلوس لتركيا 

ومره چنت دى احچي ويه راكان وگال / شوفي ريماس انتي من تطلعين لتركيا قدمي لجوء لمنظمة اليو أن بس لازم تنطين أسباب عن طلبچ اللجوء لازم اكو سبب قوي حتى يقبلون اللجوء وانتي تگدرين تاخذين نسخه من قضية اختطاف اخواتچ واخوانچ ولكون اخوانچ ما رجعوا يعني حياتكم في خطر لهذا يقبلون اللجوء 

ريماس/ اگلك راكان منين اخذ نسخه من القضيه يعني وين اروح 

راكان / تروحين لنفس المركز الي چانت بي القضيه حتى موافقة طلب اللجوء ما يتأخر عليچ ومن يوافقون على اللجوء ترتاحين لانه حصتچ مال النفط بالعراق ينطوها الچ راتب فهمتي 

ريماس/ تمام الله يوفقك راكان دليتني على الطريق اني ما اعرف 

وبعد انتهاء اتصالي ويه راكان اتصلت بعمي احمد وسألته على اسم المركز الي چانت بي قضية اختطاف اخواتي من سألني ليش گتله/ كل شي يصير اخلي عندي نسخه احسن 

وهو انطاني اسم المركز وثاني يوم ساعه 8 ونص طلعت رحت للمركز وسالت واحد شرطي انه شلون اطلع نسخه من قضيه 

گال الشرطي / من الأرشيف طلعيها والأرشيف يم آبو الحاسبه 

ريماس/ رحت وين ما كال الشرطي وحچيت ويه أبو الحاسبه گال اي عادي بس قدمي طلب يم المدير حتى طلبچ يحال إلى المحكمه وهي توافق عليه يله ننطيچ نسخه 

والطلب طلع اسوي بره يم العرضحلچي سويته ورجعت وگالوا بعد المدير يختمه حتى يروح الطلب مالتچ للمحكمه ويم غرفة المدير دخل شرطي دى يختمها وطلع واحد ضابط وبيده الفايل مال الطلب مالتي وهو نفسه الي حقق ويايه من چنت بالمستشفى گال 

فرقد / انتي قاصر لازم عمچ يستلم النسخه مو انتي فهمتي هسه الطلب راح يروح للمحكمه والقاضي يوقع عليه بس الاستلام لازم يكون بيد الوصي عليچ بعد اسبوع فهمتي 

ريماس/ نعم سيدي شكراً 

وعفته وطلعت اركض لانه شكله يخوف ورجعت للبيت واتصلت بعمي احمد وبلغته بكل شي وانه بعد اسبوع يستلم نسخة القضية ومر الاسبوع عادي 

وبعدها اجى عمي عليه ورحنه للمركز دى ناخذ نسخة القضيه ومن دخلنه يم الضابط تفاجأت بوجود بيان يمه 

گمت أرجف احس گلبي گام يرجف والضابط گال تفضلوا هسه ابو الأرشيف يكمل النسخه ويجيبها وصاح على الشرطي الي واگف بالباب واني موافقة طلب القاضي حتى يوديها لابو الأرشيف ويكمل النسخه وبقيت گاعده بصف عمي احمد وگبالي بيان وچانت السوالف عاديه إلى ما 

سأل بيان / صدگ نسيت اسال شسوون بنسخة القضيه 

احمد / والله ريماس تريدها تگول كل شي يصير نخليها عدنه يعني ما عدنه شي محدد وخصوصاً البنات راح يروحن يسكنن بدهوك 

بيان / شنو يسكنن بدهوك ويامن يعيشن هناك 

احمد / شنو ويامن ريماس راح تعيش ويه زوجها وهي ما تقبل تعوف اخواتها وهو وافق اخواتها يسكنن وياها 

بيان / مرات ينضغط عليك ضغط مو طبيعي بحيث يكون الاستسلام افضل الطرق وبيوم الي اجوي عليه جماعه چانوا گاعدين يم المدير لهذا رحت والتهديد صار عيني عينيك يعني تهديد بمركز شرطه ولضابط وگدام المدير يعني واحد وين يروح بلد ما بي قانون زين إذا اني ضابط وامثل القانون اتهدد علني الله يساعد الفقير هذا مو بس ينداس عليه هذا يموت على ايد عصابات منفلته وماكو احد بحاله لهذا جاوبته / بس اختي چانت تشتغل ويه ناس قتلوا عمي 

المجهول / عمك مات بعد ما تبرع بأعضائه وأختك ماتت بالسرطان اما ويه منو چانوا يشتغلون هذا مو اختصاصك اخذ الفلوس واسكت احنه نطينه تنبيه والا نگدر نخرسك بطريقتنه وانت بعد حر واحنه هم احرار وأعذر من أنذر 

بيان / وخلوا وطلعوا بس شنو اني اغلي احس الدم وصل لراسي 

المدير / بيان انسحب لو مصيرك مثل مصير فرقد كفيلك الله ما تكلفهم شي ترى اني وانت ندري الداخليه ما تحمينه البلد تايه 

بيان / تركت المدير ورجعت لمكتبي واني قررت انسحب اما الفلوس هي مو الي وحدي ويايه أبويه وتقريباً اسبوع يله صحى فرقد من الغيبوبه ومن رحتله چانت الناس يمه هوايه بحيث كلمه ما اگدر احچي ويا لهذا بس تحمدت ألّه بالسلآمه 

بعدها طولت سالفة القسام الشرعي بسبب ازدواجيت شخصية رحاب وأغاريد ولازم نطابق بصمات أغاريد مال النفوس ويه الطب العدلي من توفت ويه المصرف معامله شطولها وشعرضها 

وبوقتها فرقد طلع لبيته من المستشفى لهذا رحنه اني والمدير عليه للبيت وهنا گدرت احچي ويا بالموضوع مال التهديد الي اجاني 

فرقد / افضل أنه انسحبت وأني كذلك ابو شوارب اثناء تواجدي بالمستشفى مطلعي لعدم كفاية الادله والمصرف نقض قرار القاضي انه ما ينطي اسرار عملائه ورجع القاضي ألغى القرار الي انطى ونغلقت القضيه وكلمن گعد بمكانه مو گتلك هاي عصابات الحكومه تديرهم 

بيان / يعني سيدي انت تصور موضوع اغتيالك صار على إيدهم 

فرقد / والله بيان ما اعرف لانه اني احقق بهواي قضايا فما اعرف منو چان يريد يصفيني بس المقصود اني لانه ويايه نقيب عمار حالته چانت افضل من حالتي يعني چانوا متقصديني همه غيرهم الله اعلم 

بيان / حمد لله على سلامتك سيدي 

وبعدها استأذنه من عنده وطلعنه وبعدها مرت الايام عادي بس روحي تلوب على ريماس يعني ميقات چانت عندي علاقة حب وياها من افترقنه صح ما انكر انقهرت وتأثرت بس مو مثل ريماس في حين ريماس ما بقت يمي هواي وحياتي صارت بين البيت وبين الدوام وبيوم اني بالدوام اتصل عليه 

فرقد / اگلك بيان تذكر البنيه الي زوجتها لكون چان عدهم فيديو عليك 

بيان / اي سيدي اذكرها ما صار هواي من طلگتها بس ليش تسأل 

فرقد/ اليوم أجتي البنيه نفسها وتطلب نسخه من القضيه مال اختطاف اخوانها وأخواتها 

بيان / ليش شسوي بيها 

فرقد/ هاي تريد تمشي بشغله وتريد نسخه وهسه تگول فرقد گال 

بيان / يا شغله ما اصور هي ما عدها شي 

فرقد/ ادري ماخذه نسخه من القضيه تخليها بجام خانه وتتفرج عليها اكيد عدها معامله بيها والا نسخة القضيه ما تفيدها بشي 

بيان / طلعت نسخة القضيه لو لا 

فرقد/ لا بعد نقدم طلبها للقاضي وعمها بعد اسبوع يجي يستلمها 

بيان / بعد اسبوع اني يمك واريد من يجون انطيني خبر حتى اجي 

وانتهى اتصالي ويه فرقد بس ما اعرف ليش هيچ الوب أريد اشوفها خلت شوفتها حسره عليه وبعد اسبوع گد ما روحي تلوب عليها بذاك اليوم اتصلت بمديري واخذت منه اجازه اليوم ورحت على فرقد حتى من شافني تعجب وگال 

فرقد / شنو بالخير راح داوم ويايه 

بيان / لا سيدي بس گلت انتظر يمك خاف يجون ويرحون وما أشوفهم 

فرقد/ آني لهسه ما فهمت انت ليش تريد شوفها اني اعرف بس اريد اشوف انت راح تگول لو لا 

بيان / والله سيدي ما اعرف شلون أفسر شعوري بس اگلك روحي تلوب على شوفتها 

فرقد/ مرات الگلب يدگ لشخص الغلط شگد تحاول تقنعه انه هذا غلط ما يقنع والمشكله انه الي تحبها انت تموت بيها بس هي ما تفهم عليك لانه فارق العمر كارثه كل واحد يكون من جيل وكل واحد يكون اله تفكيره بس الگلب دگ الها 

بيان / والله وصفت شعوري بالضبط شنو سيدي لازم انت مثلي 

فرقد/ مثلك مثل غيرك المهم انه الگلب دگ 

بيان / وبقيت انتظر إلى ما دخل الشرطي وگال اجوي لانه فرقد چان موصي يبلغه إذا اجوي ودخلت ريماس وعمها بس شنو متغيره ضعفانه هواي والوجه اصفر احسها مريضه 

وشگد ظليت ادقق بملامحها بس هي ابد ما باوعت عليه ومدنگه راسها وتباوع على أيدها الي چانت مخليتها بحضنها حتى احسها ترجف بس احس السما انطبقت على راسي من گال عمها / ريماس راح تزوج بدهوك احس روحي گاعد على نار وفرقد كانه قرأ افكاري سبقني وگال 

فرقد / منين الولد لازم تتأكد منه تعرف هاي دنيا وخطيه هنه ما الهن غير الله وانت 

احمد / الولد مبين حباب والبنيه شنو گعدتها وهنه وحدهن يحتاجن رجال يستندن عليه 

بيان / فرقد كأنه چان يعرف اريد احچي وياها گال 

فرقد / بيان اخذ البنيه وهذا الفايل يم أبو الحاسبه الأرشيف خلي ينطيكم نسخه من القضيه 

بيان / وگام عمها احمد حتى هو يروح وياها بس فرقد سد عليه الطريق من گال 

فرقد / هي لازم بيد الشرطي الي بالباب بس الولد دزيته يجيب مي اخذها انت بيان ولو اسوي زحمه عليك 

بيان / اني هم گمت دگيت تحيه لفرقد واخذت الفايل وريماس اجتي ويايه وبس طلعنه ومشيت مسافه عن مكتب فرقد گبل لازمتها من ايدها وگتله / ترى ما صار هواي من طلگنه شبيچ لهاي الدرجه تردين رجال بعد ما تتحملين 

وهي نترت ايدها من ايدي بقوه وگالت 

ريماس/ وانت شعليك هاي حياتي واني حره بيها اجيت اني حاسبتك على شي شعليه بيك كل واحد بينه راح وشاف حياته 

بيان / هاااا حياته حلو عيني يا ام الحياة انتي بعدچ ما عابره العده شلون تزوجين افترضي حامل مني هذا يصير خلط أنساب واگدر اشتكي عليچ تدرين لو لا وأثبت الي بطنچ ابني 

ريماس/ حيلك حيلك حيلك يا حمل يا ابنك أصلاً مو حامل ونزلت عليه الدوره صار مرتين وبعدين شلون احبل وانت گلت ما انزل شهوتي بيچ حتى اخلف من وحده مثلچ وبعدين زواجي بعد شهرين يعني العده عابرتها شنو قابل الحكومه تمنع النسوان الي يزوجن وره العده 

بيان / احس گلبي احترگ گتلها/ بسرعه نسيتي بيان اني اريد ترجعيلي 

ريماس/ بيان هو ما رادني مو آني ماردته  

بيان / زين لا تزوجين هسه انطي فتره لنفسچ وشوفي عسى تقتنعين وترجعين الي 

ريماس/ لا اعذرني الي يبيع مره يبيع الف مره ما اقتنع كل واحد يروح لحاله افضل والله يسعدك بحياتك 

بيان / اخذتها لابو الحاسبه كملت الها نسخة القضيه واخذتها ورجعت يم عمها وهو سلم علينه واخذ ريماس وراح 

فرقد / طبعاً هذا وجهي من وجهك إذا ما تطلع ماخذين نسخه من القضيه حتى يقدموها بمنظمه وشنو هاي المنظمه الله اليعلم ساعتها گول فرقد گال 

يتبع/ 

ملاحظه/ نزلت من وكت حتى أروح انام لانه البارحه چانت عدنه سهره على طبخ ابو عبد الله عليه السلام ونعسانه والله گوه كتبت لانه ما احب اخلف بمواعيدي وياكم لهذا خاف تلگون سحگ غلسوا 

تحية لكم من القلب إلى القلب 

دمتم في امان الله وحفظه 

شكرا لزيارتكم عالم روايات سكيرهوم