رواية ناديه الفصل الرابع والثلاثون 34 بقلم انين الليل

ناديه

من سمعت كلام افراح صعدت وانا مكسور خاطري وبنفس الوقت كرهي زاد اضعاف مضاعفه الافراح والهادي 

خصوصا وهي دووم تردد جملتها. العتيقه بنات مياده لگيت حنين بعدهي نايمه ما ردتها تشوف قهرتي 

صعدت فوك السطح وگعدت وانا اناشغ وبچيت حييل وانا اگول

......ياربي ما عشنا ويه مياده ولا ربتنا لكن عارها بقى ملازمنا الى متى ياالله بعد ما عندي طاقه ساعدني يارب 

حسيت بواحد اجه گعد يمي وانتچى على الحايط وهو يگلي 

- - تخلص ناديه صدگيني يراد الها صبر 

كان صوت ياسر الي باوعلي وهو يگول //ناديه لا تيئسين انا وياج 

باوعتله واشهك من البچي ... شنو صفتك انت وياي

هو باوعلي باستغراب هزيتله راسي مستفهمه وسالته ......شنو صفتك ؟

ياسر جر نفس عميق // ناديه انتي بت عم...قاطعته بايدي وگتله بعصبيه 

......لا لا غلطان ياسر انا بت مياده بت مياده وبس والهسه متعجبه ومالاگيه جواب السؤالي 

اذا انا وحنين بنات مياده امك وابوك ليش مخلينه يمهم 

ياسر //كافي ناديه اسكتي 

مسحت دمعتي بايدي ......ليش اسكت لا تگلي اتاثرت

جر نفس واتقرب مني وهو يگلي //ناديه انتي بت عمي غصبن على الي يرضى والي ما يرضى 

انا باستهزاء...... اششش يامعود لا تسمع امك وتگطع عنك المصرف 

هو اتقرب اكثر بحيث نفسه صار بوجهي وگال //ناديه كافي حقج انتي مقهوره بس والله الوضع ما يبقى هيج 

بس اصبري 

دمعت عيوني وگتله ......ليش انا واختي شنملك غير الصبر

ياسر //تدرين ناديه من تبچيين تزيدين جمال ومن تضحكين بعد يزيد جمالج اكثر 

باوعتله وبگلبي اگول ......هذا شگد بطران 

وگفت وردت انزل هو لزم ايدي انا تعجبت وباوعتله وره ما عتييتها منه 

ياسر //ناديه اتمنى تحسين بيه 

عكفت حواجبي ......نعم ؟

ياسر //انتي تعرفين 

...شعرف ياسر 

هو جر نفس وگال //احيانا البشر يعرف الي يريد يگوله المقابيل لكن يستغبى وانتي من هذوله البشر الي يستغبون

هو نزل وانا بقيت اهز بايدي ما اتفاجات من كلام ياسر لان اعرف بي من احنه زغار هو يحبني لكن ياسر مو جسر 

ولا عنده الشجاعه الي يواجه بيها امه 

نزلت ولگيت حنين گاعده گالت //ها ندووش ليش عفتيني نايمه 

......بعد ما بادي وكت الكراب ياالله خلي ننزل نتريك 

ونزلنه ولگيت افراح راجعه الغرفتها لان هي بس يروح رجلها وبتها ترجع تنام طلعت تلث بيضات حنين 

تباوعلي تگلي //شتسوين 

......اششش ما عليج حابه اترزل بس بالاول خلي ناكل ونترس بطنه

گليت البيض وطلعت جبن وخبز وصبيت چاي وطلعنا نتريك بالمنور وحنين تاكل وبعيونها تساؤل دخلنه للمطبخ 

غسلت الصحون ومسحت الكاونترات وحنين راحت تغسل الطارمه وانا بقيت ارتب بالبيت ورحت خليت ملابسها 

هي ورجلها بالغساله وانا اتسائل اگول ......ليش اذا ما تريدنا وكلمتها هي الماشيه ليش خلتنه عدها

بعد عشر تيام واحنا نفس الروتين وتاكدت ما راح يتغير شي لكن اهم شي عندي احصل الشهاده وادير بالي 

على حنين الي لازم تدرس اكثر وتشد حيلها بالليل نزل ياسر وگال

- - ناديه وين رقمج الامتحاني لان فتحوا التقديم ولازم نملي استماره 

......صدك ياسر 

هز راسه // اي صدك انفتح التقديم 

ابتسمت. ... خووش عمه زهراء من اجت اخذت الرقم الامتحاني ملتلي الاستماره وهيه تقدملي 

افراح //هاا وليش هي تقدملج 

......عادي گالت انطيني رقمج وانا اقدملج الانسيابيه وانا انطيتها وحتى گالت عمج ابو ياسر يعرف 

(طبعا اهنا ردت احرك فلم )

افراح //واحنا شنو يابه وانتي تتصرفين بكيفج 

سكتت ما جاوبتها وهي بقت تدردم //هاي ما صدكت لگتلها رجل وصارت تتعيقل وتتدخل فد نمونه هي لو ما آمنه 

ام سراج چان تحلم حلم يجيها واحد وهو الاجاها شنو شايب يگوم ويطيح هسه يطك ويموت وهاي الشمخره كلها 

تروح منها

محد رد عليها وبقيت منتظره القبولات وانا حتى ما سالت عمه زهراء شقدمتيلي 

داومت حنين ومحد اشترالها ملابس داومت بملابسي مالات العام بينما هادي دفع فلوس واقصاط المدارس بناته

وصار كل همي حنين تدرس وتعوض السنه الي رسبتها على مودي صرت اشتغل بالبيت وادرسها

اجه ياسر وهو يگول // باچر تطلع القبولات 

بصراحه محد بين اهتمامه بقيت الليل كله ما نايمه عبالك باجر النتائج مو القبولات وثاني يوم جاي انظف بالصاله 

وبيدي النقال لمن ما اتصلت عمه زهراء بنفس الوقت اتصل سراج بهادي

زهراء //الف الف مبروك حضرة المهندسه 

......عمه الله عليج شنو قبولي 

زهراء //حبيبتي كلية الهندسه جامعة البصره

انا وحنين صرخنا من الفرحه افراح گالت// وسم وگرص شبيچن 

حنين //عمه ندووش طلع قبولها كلية الهندسه جامعه البصره 

افراح //اي وشنو هيج تصيحن وانت هادي ياهو هذا الي تگله الله يبارك بيك 

هادي //هذا سراج خابرني وباركلي 

افراح //عليمن (وهزت ايدها )

بنفس الوكت اجه ياسر وهو يگول //مبروك عيني حضرة المهندسه الف مبروك 

حنيين // گللللووووش

افراح //عليمن طرتو وما حطيتو من قلة المهندسين على ما تتخرج يمكن يصيرون يدفعون عرباين

انا سكتت ورحت انا وحنين طلعنا بره للحديقه لان احس اختنگت من هاي الانسانه الي تمشي وتذب سمها عليه

انا واختي 

ياسر //يمه شلقصه ما يصير هيج 

افراح بعدم مبالاة //شبيك ياسر شصاير 

ياسر //يعني لو هديل ناجحه وجايبه معدل وداخله كليه شسويتي 

افراح //طبعا افرح لان بتي 

ياسر //بس هسه الناس التجي تگول الزود الج لان هنه موجودات ابيتج

ا. ردت بعصبيه // وهسه شتريد 

ياسر //ما اريد شي يمه ما اريد شي 

صار المغرب ورحنا صلينه ونزلنه نسوي عشا وبالليل اجه كرم هو وبيبي جميله الي جابت جكليت وگالت 

- - هاج بيبي هاي الج انتي واخيتج 

عمار //چا واحنه 

جميله //انت جبت هندسه كلك واحد عفطي بالكوه والدفعات حصلت محامي

هادي وهو يضحك // ومسائي خاله 

جميله غمت عمار // امدااك مسائي همه اهل الصباحي محصلين شغل ياالله ادور مسائي 

عمار گعد يمها //اكلج جملو انتي تعرفين شنو مسائي 

جميله لمت حلگها //لا امك اتعلمني مسائي يعني ليلي يا فهيم بس انت عليمن تطلع

افراح //ها خاله شبيهم ولدي يطلعون على ابوهم وخالهم 

جميله //اي ياسر على ابو وعمه بس هذا اعمير ما ادري شو قيس ورده مالت الله ومحيي سبع ونچر هذا طالع 

على امج 

افراح //ياا خاله شبيها امي 

جميله //ما بيها شي ما لگيت احد اشبه اعمير بي گلت طالع على حبوبته نصره 

والكل ضحك جميله //بيبي ناديه تعاي اگعدي يمي عبالي تصيرين طبيبه وتداويني 

......بعد بيبي كل شي بقسمة الله

جميله //احنينه گومي سوي العمج چاي لو تبقى على افراح تكومنا حتى ما تطينه ماي 

افراح //ياعمه انا هيج 

جميله //اي حبوبه بالچذب ما جبتيلنه گلاص شربت خو بتج ما تحرك روحها 

كرم باوعلي //شقررتي تدخلين 

جاوبته بثقه ......ان شاء الله معماري 

مرتضى//تخصص راقي و حلو 

ياسر //ارقى تخصص بس صعب

جميله //اسكتو انتم بيبي عود شتسويين 

انا بابتسامه ......بيبي اسوي عمارات وبيوت ومشاريع واهندس شوارع وجسور 

جميله //عفيه عليج كرم يمه اشتريلك قطعه خلي بت اخوك تسويلك الخريطه 

كرم يضحك //ان شالله يمه 

افراح //شنو عمه بعد خمس سنين اكثر عود تتخرج

جميله تهز راسها // وداعتج يخلصن ويصيرن سوالف غمض فتح صايره مهندسه البارحه ناديه صارت 

هادي //اي والله كله من عمرنا 

افراح //اي والله صدك عبالك امس من مياده كتلت عباس هي وصاحبها ونديوه وگفت بالمحكمه وهي تكول 

هيج خنگه وتاشر بايديها والناس كلها بچت عليها وهي تسال القاضي الشرطي راح يذبح اختي

الكل سكت وانا دنگت وگلبي صار يدك وحنين بقت بالمطبخ كسرت السكوت هديل 

- - - يعني ماما ناديه هي وصلت امها الحبل المشنقه وعدموها

اسيل // الله عليچ ماما وگفت واشرت عليها 

افراح //ايي انتن ما تتذكرن چنتن زغار اوووف هسه شذكرنا هادي اختنك من القهر الله لا يوفقج يا مياده

انا صعدت من الفشله او القهر دمعتي بعيني ما حچيت وحنين بس خلت الچاي صعدت وراي وبيبي جميله گالت 

گوم يمه كرم امشينه مستكثره افريحه على اليتايم فرحتهن

محد عقب كرم بدون ما يجاوب طلع وانا وحنين وصلنه للقبو مالنه وانا ابدي امووت افراح الي حقدت عليها بكد الدنيا 

وحنين تباوعلي ودموعها تنزل //الحقيره تمثل مقهوره علينه وهي اتذكر الناس بالي سوته مياده 

......كافي حنين لا تبچيين الله كريم 

حنين //اليمته ناديه مو يوميه نموت الف موته

جريت نفس وگتلها ...اي بس هاي اول خطوه بسلم نجاحنا وبعد ورانا اهواي بس اصبري 

حنين //ان شالله (واتقربت يمي وهي تعدل بشعري ) لاتضوجين ندوش هاي الي تسوي افراح تريد تجزعنا

على مود تكول علينا احنا مثل مياده 

انا بيني ما بين نفسي //ما تدري الحقيره شلت حقارتها وظلمها وحقارة مياده كله صار عندي جبل من الكره 

والحقد انا الج افراح

بصراحه ما اعرف ليش هيج حچيت وره يومين اجه قيس وشمس وياهم كرم واجت عمه سلوى الي بس گلتلي 

مبروك بدون ما تباوسني اما نوال فابدا ماكلفت نفسها حتى تتصل 

عمه شمس جايبتلي هديه وهي تگلي 

- - تستاهلين كل الخير انتي خوش بنيه 

سلوى طلعت ساعه وگالت //هاي هديتج

شفت بعين شمس الاستزغار الهدية سلوى لان كلش رخيصه 

وقيس گال// عفيه بنيتي عمج كرم گال تردين معماري وهذا الشي حلو بي مجالات هواي 

شمس //اقلها نحتاجج بهواي امور 

وطلع قيس فلوس وانطاني وگلي //اشتري بيهن شي على ذوقج

اخذتهن واتشكرته كرم گلي //يمته تسجلين 

...ما اعرف عمو 

زين انا اسالج وارجعلج خبر 

...اي والله ياريت 

كرم // مو تدللين شكم ناديه عدنا

وراحو وره يومين اجانه كرم وگال گدام افراح وهادي //بابا ناديه التسجيل يفتحونه بعد يومين لازم تحضرين 

اقل شي ثمن صور حديثات وثيقتج وجنسيتج وشهادة الجنسيه وكفيل لازم موظف شتگول هادي 

هادي //هاا ابو مرتضى تعرف عندي شغل 

كرم //هذا هو انا اخذج عمو ولا يهمج (باوع الهادي وگله )ماردت اتخطاك ابو ياسر تره هي مثل بتي وانا وانت 

ماكو فرق

هادي بقى ساكت كرم گلي //عمو باچر ان شالله العصر امرلج واخذج اصورلج واستنسخ الاوراق اتحضري 

هزيت راسي وگتله ...الصبح لازم اروح للمدرسه اجيب وثيقتي 

ثاني يوم الصبح گعدت من غبشه نظفت البيت وسويت الريوك واتريگت ورحت للمدرسه اجيب الوثيقه 

 ولبست العبايه الاسلاميه الي صار الها سنتين من اشترتها الي عمه زهراء رحت امشي وبگلبي 

تمني اشوف سراج وهو منتظرني لكن عذا چان تمني وصلت للمدرسه وبسرعه ورجعت

العصر مر عليه عمو كرم ورحت ويا واخذت صور وبعدين استنسخنا الهويات وگلي باچر الساعه ثمانيه الصبح 

امرلج ونروح للكليه

الصبح بدلت لبست تنوره وقميص وترانشوز بعد ان خليت جوه رجلي قطعة الكارتون الي ما تفارگني ابد ونزلت 

شافتني افراح وگالت

شنو هذا الي لابسته 

...ليش عمه شبي ؟

مابي شي بس لو لابسه عبايه اسلاميه احسن 

جاوبتها ...چنت اتمنى عمه بس ماعندي الملابس الي جابتهن الي عمه زهراءما بيهن عبايه اسلاميه والي البسها 

صارت قديمه حتى كشف لونها 

هي ما ردت كرم گلي // نمشي ؟

...اي عمو 

اخذتي كل المستمسكات 

...عمو من امس عندك 

اي والله نسيت فيمان الله

وطلعنا رحنا للكليه الجامعة الگرمه اول مره اشوفها جامعه كبيره جدا وراقيه وبيها كثير اقسام دخلت ويه عمو 

كرم 

وصلنه وانا مبهوره بالي اشوفه البنات والشباب واللبس والمكياج قدمت اوراقي وعمو كملي الكفاله وبعدين 

مليت استماره ثانيه اختيار الاقسام انا اختاريت المعماري اول واحد وبعدين الاقسام الاخرى من كملت 

وعمو كرم گال// لازم تشوفين خط

وهنا شفت مجموعة طالبات وعرفت هنه من نفس المنطقه وابعد شويه واتفقنا بعد ان اخذنا رقم البنيه الي عن 

طريقها راح اناجر الخط ورجعنا وانا مزيج من فرح وتمنيات عمو كرم گال 

- - وين يعجب المهندسه تتغدا 

......لا عمو نرجع 

كرم //وين نرجع لازم نتغدا بمطعم على شرف بت اخوي المهندسه 

......شكرا عمو والله تعبتك وياي 

لا بابا تعبج راحه

ودخلنه المطعم صراحه فخم كلش واول مره اشوف هيج مطعم بهالفخامه هاي وعمو گلي //شيعجبج اطلبي 

انا ما طلبت بس عمو كرم طلب غدا مطبك (زبيدي ) وهاي الاكله مشهورين بيها اهل البصره خصوصا السمك 

الزبيدي شي ما يخطر على البال 

اتغدينا انا ويا اكلت رغم خجلانه لان ابحدنا بس هو ما شاء الله ولا يمي رن تلفونه رد علي

الو 

هلا وينك فاتك شلون غدا مطبك زبيدي 

الله يعافيك بس مو اهنا المفاجأه 

گاعد ويه حوريه تخبل والناس تباوعلي ومتحسدتني 

اي والله وداعتك 

گاعد ويه حضرة المهندسه ناديه 

اي يمي هاي 

عمو كرم باوعلي وانطاني التلفون وگلي //سراج وياج

انا اخذت التلفون وانا متفاجئه لان شگد صار ما حچيت ويا وهو حتى ما اتصل انا گلت 

...الو 

::شلونج ندووش ليش ما تردين 

...هلا 

::بس هلا بعدج زعلانه وتكرهيني 

...اي 

::ليش 

...انت تعرف 

::انا اعرف شي واحد انو هسه انا اسعد انسان بالدنيا 

...ليش 

::لان انتي دخلتي كليه وهاي بحد ذاتها انتصار الج 

...شكرا 

::بس هاي 

...اي 

::زين ليش ما تردين على اتصالاتي ورسائلي عاد ردي السلام 

...هاك هذا عمو كرم وياك مع السلامه

وبقى عمو كرم وسراج يحچون وانا بغير عالم ما اعرف ليش هيج اتصرف ويه سراج 

رجعنا للبيت واتشكرت من عمو كرم ياسر فتح النه الباب سلمت وعمو كرم راح البيتهم دخلت ولگيت البيت هدوء

ياسر سالني //كملتي التقديم 

هزيت راسي ...اي 

ياسر //ومليتي استماره 

...اي مليت 

ياسر //بس ناديه المعماري صعب 

...اعرف هذا الشي لكن مصره 

ياسر //تحبينه الهذا التخصص

...لا ياسر ليش الچذب انا كنت اتمنى ادخل معهد طبي قسم صيدله لكن امك عرضت ما قبلت لذلك خليت عمه 

زهراء تمليلي حسب المعدل 

ياسر اتفاجأ وگال //من هيج ما قبلتي املي الانسيابيه وانطيتيها الزهراء 

...اي ياسر 

:وليش 

...بكل بساطه لان اعرف امك ما تقبل ولا ابدها تطلعلي كليه زينه 

هو سكت وانا گتله ... من رخصتك تعبانه اريد ارتاح

وطلع قبولي هندسه معماري ورحت اسجل واخذ المواد بيومها ياسر گال //انا اوصلج 

افراح //ان شالله نبقى ياماخذينها ياراديها لان باچر تكد على راسنا 

باوعتلها وگلت ...لا عمه ااجر خط 

هي هزت ايدها باستهزاء وركبت ويه ياسر الطريق كله ساكتين وياسر بس يدخن

من وصلنه گلي //ارجع عليج 

فهمته انو لازم ارجع ويه الخط حتى يندل بيتنا هو انطاني خمسه وعشرين گلي //خليها بجنطتج 

انا رديت ايده لكن هو فتح الجنطه وخلاها ونزلت وانا احس انو انولدت من جديد 

اخذت المواد وما اخفيكم كانت العيون متفتحه عليه لكن انا كنت خايفه لان شي جديد وناس مختلفه عن الي اعرفهم 

ومجتمع واسع اخذت على نفسي شي انو ما اختلط باي احد بس حد الزماله

اجن بنات اثنيين وسالني شنو المواد الي اخذتهن واتعرفت بيهن وحده فاطمه والثانيه لمى 

فاطمه ابوها ضابط چبير ولمى ابوها تاجر ومن سالوني جاوبتهن ابوي متوفي من عمري اربع سنين 

فاطمه //ياالله ناديه هاي حال الدنيا البركه بامج 

اهنا انا ارتبكت وجريت نفس وصرت حتى ارجف جاوبتهن 

...... امي هم متوفيه وانا عشت ويه بيبي بعدين ابيت عمي

لمى //احنا اسفات لان ذكرناج 

بلعت ريگي ......لا عادي 

فاطمه //شگد عمرج من اتوفت امج 

انا بدون اهميه ......خمس سنوات 

لمى //عفيه عليج وهيج شديتي حيلج وطلعتي هذا المعدل الحلو رغم ماكو اب يدير باله عليج وام كل شويه تجي 

تسالج عن احتياجاتج 

فاطمه// تدرين ناديه انا عدت سنتين ودورات ودروس ياالله گدرت احصل على هذا المعدل 

لمى //حتى انا عدت سنتين وحصلت على هذا المعدل وانتي ما شالله عليج 

انا شويه هدأت وگلت ......الحمد لله

وعزمني ع الكافتريا لكن انا ما قبلت اله كل وحده تدفع الشي الي تطلبه ودخلت للكافتريا وانا عندي فلوس 

الي نطاهن ياسر وقسم من مصرف عمي كرم ما طلبت بس عصير ونستله وشفت شگد طالبات وطلاب واكيد 

من غير مراحل 

وشفت بنات يصورن بالنقال وبنات يسولفن ويضحكن وبنات يتشاقن ويه الولد

واحنه گاعدات اجت بنيه سلمت على فاطمه وباوستها وعرفتنا عليها فاطمه اسمها سها وتصير جيران فاطمه البنيه

مرحله ثالثه بعدها اجت وحده اشوفها تسولف ويه الولد وتتشاقى لبسها ضيك وحجابها اسقاط واجب مكياجها صارخ 

مرت وسلمت على سهى الي سالتها

- - ها نسرين بشري 

- - شتتصورين ما انجح (وطگتها ضحكه ) وگالت //عيني سوسو ما تعرفينه 

سهى گالت الها //نسرين هاي بت جيرانه فاطمه انقبلت السنه وذني صديقاتها 

نسرين //هلا بيكم انتي فاطمه وانتي 

لمى 

واشرت عليه ...ناديه 

ردت وهي رافعه حاجبها // اها اشم قديم مثل اسمي بس ما شاء الله خوش دوره كلهن حلوات بدون 

لبخ خو انتي (واشرت عليه ) انتي جمالج فد شي هاي وانتي لا خافه لا متمكيجه وهيج چا من تحفين وتخلين 

مكياج شتصيرين 

انا ماعقبت اجه ولد وگلها //نسرين انتي وين 

هي باوعتله وگالت //هاي انا 

وگفت وگالت //من رخصتكم

وراحت وسط ذهولنااحنا التلاثه فاطمه سالت سهى //اگلج شنو هاي 

سهى //هاي نسرين والكتاب مبين من عنوانه 

فاطمه //شعجب تعرفين هيج نماذج 

سهى //لا ما اعرف بس لان وياي بنفس المرحله وساعات تفيد بس انتن ديرن بالچن من امثالها

وصارن يجن طالبات ويسلمن ويتعرفن وحتى طلاب بعدها شفت البنيه الي تشوفلنه الخط وگالت هسه يجي 

السايق ويعرف بيوتنا ورجعنا وصار الاتفاق انو ندفع كل شهر اربعين الف 

وصلت للبيت ولگيت حنين بالمطبخ تقريبا وصلت الساعه بالثنتين ونص وشافتني وانا فرحانه وهي تگلي 

 —— راح اصعدلج الغدا على مود تسولفيلي

صعدت واجت وراي حنين وسولفت الها كل شي عن الكليه وشلون حتى نسيت عيشتي اهنا وهذا الشي 

بس حتى احفزها على الدراسه 

 وره الغدا گتلها خلي انام حتى العصر نگعد نكمل الشغل انتي تدرسين وانا هم وفعلا نمت بحيث ما گعدت اله 

من اجتني حنين وهي تگلي // اگعدي ندووش صلي

اتعجبت هلگد نمت وعرفت لان طلعت من الصبح ورجعت بالخط والفره نزلت سلمت وافراح تباوعلي وگالت 

هاي اول يووم خلصتيها نووم 

......اي عمه فره وتعب 

ياسر //اشلوونها الكليه 

......حلوه بس اكيد دراستها صعبه

اي شدي حيلج (باوعلي وسالني )شفتي خط 

هزيت راسي ...... اي شفت هو وصلني 

افراح //وهذا شگد ياخذ كل شهر 

......عمه اربعين 

افراح گامت من مكانها وگالت بنتر //شنو شدعوه 

ياسر //لا يمه زين نسيتي من چنت اداوم التكسي ياخذ ثمانين

افراح // بس هواي 

ياسر // لا مو هواي همه هاي اسعارهم

كملنه شغل وصعدنا الصبح گعدت من وكت لان ما اعرف السايق بيش يجي الساعه سويت ريوك واتريگت 

وصعدت بدلت واتفقت ويه اماني ان ترمشلي حتى اطلع نزلت لكيتهم گاعدين گلت صباح الخير 

عمي رد يشاور نفسه وافراح ما ردت ياسر ابتسم وگال //صباح النور راح يمرون عليج 

هزيت راسي ...اي

افراح وگفت وانطتني فلوس وگالت// هاج هذني ستين اربعين كروة السياره وعشرين مصرف الج 

ورجعت گعدت باوعت الها وگلت ...شكرا عمه ما تقصرين 

هي باستهزاء //عاد وره هالمخاسير كون نجاح وظيفه 

......الله كريم

واجاني الخط وطلعت وبس گعدت انطيت الاجره وقررت بعد ما اگعد بالكفتيريا واكتفي اشتري باكيت عصير وكيكه

واذا اريد ماي لازم ما اخذ عصير 

بقيت افكر واگول افراح حاسبتلي كل يوم الف يعني اذا احتاجيت ملزمه اشتهيت فد شي منين اجيب 

همزين ضميت فلوس عمو كرم وقيس زوج عمه شمس

وبدينا ناخذ محاضرات وانا اكثر وقتي كنت اكعد بالحديقه وانا اراجع الي ناخذه 

تعرفت على كثير زميلات لكن لمى كانت صديقتي المقربه وهي دائما تگعد وياي اما فاطمه فكانت تسلم وتتشاقى 

وبعدين تروح ويه باقي الزملاء وحتى لمى لكن هي تحب تبقى وياي انا بطبيعتي مو انطوائيه لكن احس الكل يعرف 

بقضية مياده لذلك حاولت ابعد قدر المستطاع وكان كلامي وياهم يقتصر على السلام وبس

بيوم كانت ويانه المرحله الثانيه الي ياخذون نفس مادتنا فكان الدكتور يشرح بالانگليزي وسأل احد الطلاب جاوب 

وهو داير وجهه گله بنتر اگعد انا راسا جاوبت هو باوع گال // منو جاوب 

انا وگفت گتله بخووف

......العفو استاذ انا ما كان قصدي اجاوب بدون استئذان اجه الجواب بصوره عفويه اسفه

صارت القاعه هدوء خصوصا وهذا الدكتور المعروف عنه ما يقبل احد يجاوب بدون ان يسمحله هو باوعلي 

وانا گلبي صار يدك گلي وهو اياشر بايده يعني اوگفي

اسمج وعيدي الجواب 

جاوبته وانا مدنگه //اسمي ناديه استاذ

وصرت اجاوبه هو گلي //رغم انتي خطأتي مرتين الاولى من جاوبتي بدون ان اسمح لج 

والثانيه من تسميني استاذ وانا ماخذ الدكتورا اذن لازم تسميني دكتور لكن جوابج ونقاشج راح اطلق عليج لقب 

استاذه وبجداره لان هذا جوابج مو اي احد يعرف يجاوبه احييج اتفضلي بابا

انا بين الخوف والفرح حسيت بنفسي انو انا مو اقل من اي بنيه موجوده بالكليه اذا مو احسن 

وبيومها رجعت الحنين وانا فرحانه واسولف الها وهي مثل الطفل صار عدها حافز تقرا وتنجح وحتى انا صار 

اهم شي انجح وبتفوق ومو مهم يوميتي الف او ربع المهم بالموضوع اني اغير نظرة الناس الي من خلال دراستي 

ونجاحي ونجاح اختي

ومشت حياتنا ابيت هادي وطلبات واوامر افراح الي ما تخلص وانا انفذ بس حتى ما تسويلها

مشكله تاخذ من وقتي او وقت دراستي وانا اشوف نظرات الاعجاب من اكثر من طالب وبغير مرحله وحتى بغير كليه

 لكن انا اعرف حدودي وراسمه هدفي

ابتعدت عن الكل ما صرت حتى ارد على سلام سراج الي احسه ابتعد وهذا سؤاله صار مجرد اسقاط واجب 

وحتى عمه زهراء الي استقرت ابغداد وكانت دائمة السفر ويه زوجها والتهت عنه ابيتها وبنتها والتزاماتها. 

صحيح يمكن كل شهر اروح اشوف بيبي جميله وعمو كرم ينطيني مصرف الي والحنين هو صحيح ما يكفي لكن 

ناخذه

اما هادي فوجودنا وعدمه ما يهمه اساسا ما فد يوم سالنه او رد علينه السلام يعني شايفنا مثل ما افراح وبناتها شايفاتنا 

مجرد خدامتين ابلاش وانا يوميه اوصي حنين تدير بالها من عمار وما تنطي مجال

ياسر على طول اشوف بعيونه نظرات وكلام يريد يگوله لكن يخاف من امه الي ما تبطل تبقى تدور مشاكل ويانه 

امتحنه نصف السنه وهالمره حنين نجحت واسيل هم اما انا فنجحت الاولى لكن ما حچيت لان اعرف افراح راح 

تحاول بشتى الوسائل ان تعطلني او حتى تخلي هادي ايبطلني

واجت هديل وهي واگعه بدرسين وياسر صار يحچي عليها وحتى عمو هادي 

وافراح تگلها //شبيج ما تشوفين بنات الشوارع يطلعن معدلات شعوزج انتي 

انا گتلها ...هديل عيني انتي وگعتي بدرسين مو مشكله معناتها هذني تنجحين بيهن ودرجاتج الي جبتيهن ستين معناتها 

راح تحصلين على السبعين والسبعين راح تجيبيهن بالثمانيين واكثر

ياسر گلي //شلون باالله منين بنيتي هذا الاختراع العظيم تمشين وتنطيين درجات 

حسيت بكلامه استهزاء جاوبته //لان الفصل الاول اخذو بي تلث ارباع الماده وهي البنيه ما مقصره بذلت جهدها باقي

 ربع الماده تشد حيلها والمدرسين يشوفون وين نقاط الضعف ويحاولون يفهموها

ياسر //هاي غبيه ما تنجح 

......لا ياسر متاكده تنجح ولان هي ما درست حييل وهذا ذكاء منها خلت تعبها ودراستها للاخير 

هديل //اي صحيح مثل ما تگولين

ياسر سكت رغم اشوفه ما اقتنع بكلامي انا حچيت هالشكل بس حتى اتكفى غضب افراح عليه وعلى حنين ومشت 

ايامنا مثل ما هي الشي الجديد اكثر من طالب حاول يتقرب بكلمه او نظره لكن انا ما كنت انطي مجال ولان عمري 

ما نسيت انا بت منو

بالشهر الرابع چنت انا ولمى گاعده على مصطبه وانا بيدي باكيت حليب ابو الربع وكيكه لمن ما اتقرب من عدنا ولد شاب 

مبين بگد ياسر بقى واگف لمى باوعتله وندستني انا هم باوعتله هو گال 

صباح الخير 

ردينا //صباح النور 

باوعلي وگال //انسه ناديه ممكن كلمه 

انا صار گلبي يدك ما عرفت شجاوبه هو باوعلي وهز راسه انا گتله ...اتفضل

گال //على انفراد اذا تسمحين 

بهاي الاثناء اجه ولد وگال //السلام عليكم اشلونك ميثاق 

ميثاق //عليكم السلام هلا رحمن 

رحمن //ميثاق وين الملزمه الي وصيتك اتجيبها 

ميثاق. //العفو نسيت باچر يمك 

تمام فيمان الله

انا صافنه وهو رجع وگال //انسه ناديه رايدج بكلمه على انفراد 

لمى جاوبت //طيب ناديه انا اهنا شويه وارجع 

لزمتها حيل يعني لا تعوفيني هو گال //انسه تره ما آكل بشر عندي كلمه حابب احچيها وياج

لمى راحت وگالت ما اتاخر هو بقى واگف وانا گاعده بيدي الكتب بقيت مدنگه گلي 

- - اشلونج 

باوعتله باستغراب ... اهلا حضرتك تعرفني 

هز راسه // اكيد والا ما اجيت متعني عليج 

عرفت انو هو اكيد لو اقارب امي لو من منطقتهم جاوبته .... اتفضل شرايد 

- - اريد اتكلم وياج 

.... واني اسمعك بس ياريت تختصر 

—- — انسه ناديه انا اسمي ميثاق طالب دراسات جاي احضر ماجستير ومتاگد انجح الاول وانا متعين اهنا بالكليه شفتج 

مره لان مريت على ابن خالتي سجاد وشفتج وسالت عنج وهو سولفلي انو انتي اشطر واعقل ابنيه بالمرحله اذا مو 

بالكليه جذبتي انتباهي بعد الي سمعته عنج وصرت اراقبج رغم انتي ما منتبهه عليه واجه الوقت الي بعد ما اگدر 

اكبت الشي الي بداخلي 

من الاخير ناديه انا معجب بيج واملي اتبادليني نفس الاحساس

ظليت صافنه وارمش ما مستوعبه الي اسمعه من هذا الشخص الي وهو واگف كل شويه يجي واحد ويگله 

اشلونك استاذ 

مرحبا استاذ

لو الطالبات الي يباعن وبعضهن يباعن بحسد كل هذا شفته وانا اسمع كلامه الي اول مره اسمعه من شخص ما اكذب 

كنت اتمنى اسمعه بداية مراهقتي لكن جوابي النفسي منو يقبل بيه جاوبته 

استاذ انت كل شي ما تعرف عني لا...

ميثاق قاطعني //ما محتاج اعرف اي شي ناديه تصدگين اذا اگلج ما انام اله اتخيلج يمي ما اكل اله اشوفج انتي 

كاعده وياي وتاكلين 

 - - صدگيني انا كافي عليه اسمع صوتج واعرف من ارتبط بيج الكل راح يحسدني اخذت انقى واجمل واشرف ابنيه 

بالكليه وهذا الشي يزيدني فخر

بلعت ريگي ......استاذ انا ما افكر ارتبط 

ميثاق ابتسم //وانا ما اريد اسمع جوابج هسه اخذي وقتج بالتفكير بس لازم تعرفين انا احبج ولو منو ما تكونين احبج 

وابقى طوول عمري احبج

راح وانا اشوف انسان رزن وثگيل اجتني لمى وهي تگلي 

هي هاي الدقايق شگد صار 

انا بقيت صافنه ويه نفسي لمى گلتلي //شراد منج 

باوعتلهاورفعت اكتافي يعني ما ادري 

لمى رفعت حواجبها //يعني تردين تفهميني هو ما طلب منج علاقه

انا باوعت الها مستفهمه لمى گالت //ناديه تره عادي اي ولد يطلب من ابنيه يتكلم وياها على انفراد شيئين لا 

ثالث لهما اول شي علاقه وثاني شي يريد يسالها على صديقتها الي وياها اختاري الاول لو الثاني 

ابتسمت لمى گالت //هاا ناديه يعني طلب منج علاقه 

......لا شنووهالكلام هذا لمى انا مو مال علاقه وسوالف تافهه 

لمى //تره عادي حبيبتي يعني شنو الحب علاقه الزواج علاقه اي شي بالاول يبدي بعلاقه

رديت ......لا الزواج ارتباط مقدس 

لمى //ناديه تره استاذ ميثاق خوش انسان

ما جاوبتها بقيت بس افكر ورجعت للبيت وانا صورة ميثاق وكلامه ما يرحون عن بالي ردت احچي الحنين 

لكن خفت عليها لذلك سكتت اتمنيت عمه زهراء موجوده يمي حتى اتكلم وياها لكن انا ما عندي احد وبيومها 

انا ابد ابد ما نمت واول مره ما استوعب الماده الي اقراها صرت افكر بكلام ميثاق 

- - يعني انا فعلا جميله زين هو ما انتبه للعرج الي برجلي ومنو يگول من يجي يتقدم افراح رااح توافق

ثاني يووم داومت وبيومها ما شفت ميثاق ولا حتى اليوم الي بعده ما اكذب عليكم صرت مهتمه اشوفه واتمنى

 يصادفني وصرت من اگعد ع المصطبه واراقب بالطلاب ولمى سالتني 

اشو ميثاق ماكو 

جاوبتها ... ما اعرف 

بقينا گاعدين وانا جاي اقرا لكن بيني وبين نفسي اگول 

 ... ... وين ميثاق وليش ما اجه يجوز حچى واتندم لان عرف بيه عرجه ياالله هسه انا قابل منين حصلت ياالله افكر 

احصل من ميثاق

جريت تفس واشوف خيال واكف رفعت راسي شفته ميثاق مبتسم وكلي 

اشلونج ناديه 

لمى رادت تروح انا لزمت ايدها وگلت...... اهلا استاذ 

ميثاق //اهلا بيج 

باوع ال لمى وگللها //مرحبا 

لمى //اهلا استاذ اسمحولي 

انا لازمه بايدها گتلها... لا لمى وين رايحه 

لمى //احسن حتى تاخذون راحتكم

... لمى انتي صديقتي وانا ما عندي شي اضمه عنج (باوعت الميثاق )اتفضل استاذ اسمعك 

هو اتفاجأ من طريقة كلامي //تسمعيني 

......اي اسمعك اريد اعرف شنو رايد مني 

باوع ال لمى انا گتله... استاذ ميثاق صدگني انا لا مال علاقه ولا شي 

ميثاق //اعرف ولان انتي مومال علاقه ولا شي انا مصر عليج 

باوعتله باستغراب ...يعني شنو

ميثاق جر نفس وگال //ناديه انا گدام صديقتج انا احبج واريدج 

جاوبته وانا عبالك چنت اركض مسافه طويله ... استاذ لازم تفهم شي انا احب الرجال الي يجيني من الباب يعني 

مو تمضية وقت وعلاقه ولي نطلع ونتفاهم لان يجوز اكو بنات

 يقبلن على نفسهن هذا الشي لكن انا لا ومال كل شويه وجاي والطلاب يباعون ويحچون هم ما اقبل 

ميثاق بابتسامه // وبعد 

......بس بس هذا الشي

ميثاق //زين سجلي رقمي 

بلعت ريگي ...لا شنو رقمك باالله شافو بالبيت 

لمى //سجلي باي اسم ابنيه شبيج كيميا 

ميثاق وهو يبتسم //لا هي شاطره بالكيميا والرياضيات 

لمى //سجلي باسم امممم بدور ما ويانه بمرحلتنا بدور

واخذت رقمه بعد ان حرجني ولمى ايدت كلامه وبيومها ما عندي رمز الشبكه ولا حتى واتساب صار 

يخابرني ع الشريحه وانا ما اجاوبه 

بعدين كلي //شوفي اتصل واحچي وياي على اني صديقتج واذا صادف احد من اهلج گليلي لا بدور 

ما اگدر وهايراح تكون كلمة السر حتى انهي المكالمه

صرت مرات اجاوبه ومرات اكتب مسجات لان ما عندي الجرأه اطلب رمز الشبكه وبقينا هيج

وامتحنت وحنين امتحنت ونجحنا انا رحت مرحله ثانيه وحنين خامس واسيل نجحت للسادس 

بقت هديل تمتحن والكل اعصابه مشدوده وانا بالرغم من اني نجحت الاولى على المرحله لكن ما گلت حتى 

ناجحه لان اعرف افراح اذا ما نجحت هديل واگول راح اسبب مشكله النفسي

وطلعت نتائج السادس وهديل وگعت بدرسين وبذاك اليوم اتازمت الاحوال اكثر من اللازم وانا اسمع هادي يگللها 

 - - - حقيره بيش ملتهيه ما شفتيهن ناديه واختها اثنينهن نجحن وهنه ملابسهن اجداوه وانتي كل شهرانطيج فلوس 

تشترين سيت جديد من المدرسه 

افراح //هادي مو وكت الحچي خل نشوف شلون تنجح 

هديل //بابا رجعلي المدرسين خلي ياخذوني خصوصي 

افراح //اي هادي خليلها مدرسين 

هادي //ليش انا مو مخلي مدرسين 

افراح //وارجع خليلها شنو عجبه 

هادي //لا مو عجبه چا الوياها تكرب مثل الحيوان والدوره ابلاش ولو ما الشغل والعيطه چان جابت الطب 

افراح //دا كافي هادي تقارن بتي بذني ما سامع بخت الگ...

هو سكت ما جاوب وثاني يوم صارو المدرسين يجوون وينطوها دروس وهي مره تقرا مره تلزم النقال وامتحنت هديل 

والكل مترقب عبالك هي كل سنه تطلع الاولى 

انا وميثاق بقينا نحچي بالتلفون كان كلامنا يقتصر على السلام والسؤال عن الاحوال اكثر من مره گتله 

......لازم تعرف عني كل شي 

چان جوابه //ما يهمني انا قررت وانتهى الموضوع

ونجح بامتياز وعرفت منه انو اهله بالاحزاب لكن الشهاده ال الله هو مجتهد وحصل على شهادته

بجداره وگلي انو بشهر 122 يجون اهله يخطبون وبالعطله نتزوج رغم معارضتي الخاطر حنين 

وهو اصر وگلي ما اگدر اصبر

ومن سولفتله على حنين گلي //اختج الها مطلق الحريه تعيش وياج او تبقى ابيت عمها 

حسيت لاول مره الدنيا ابتسمت الي وجود ميثاق بحياتي حفزني ونجحت هديل جابت معدل 68دور الثاني 

وملت استمارة التقديم بدون ما اعرف شنو كتبت وانا داومت مرحله ثانيه

شكرا لزيارتكم عالم روايات سكيرهوم