رواية جذبني فمك البني الفصل الرابع والثلاثون 34 بقلم عبير إدريس

اعدك سأكون امرأة كاملة بنقصي

وناقصة بك

اذوب من فرط حبك

وابحث عن ضجيج صوتك في اقصى مراحل ايامي الهادئة...

روحي صاخبه بك رغم سكوني ..

اعرفك بنفسي الجديده..

انا امرأة الاحزان والخيبات المتكررة ...

انا القريبه البعيده...

انا الضاحكه الحزينه...

انا الجارحه المجروحه..

انا الغادره المغدورة

انا القاتله المقتولة

انا صاحبة العمر الفاني وحياتي على المحك..

ثق ان لم تجمعنا الطرقات والايام الغابرة

حتمآ ستجمعنا الاحلام حينها سلنتقي بين احضان الحياة لنصحى ونحضن ذاك الفراغ ......

بقلمي عبير ادريس..

____

تك تك تك تك تك ، الازعاج الصباحي صوت الساعه الجديده كل متصير ساعه تدك ردت اكوم اكسرها كعدت من النوم باوعت ساعه اربعه جبت الكرسي وصعدت شلت الباتري منها ونزلت لبست حجابي وطلعت من الغرفه رحت توضيت ورجعت اصلي ....

عندي دفتر صغير كاتبه بيه كل دعاء وكل تسبيح ينطي اليه عمو من ضمنهن دعاء للتوفيق وللرزق والعافيه شكد شفت عليه فرق بحيث صرت مدمنه عليه ماكدر اتركه لان غير حالي من حال الى حال ....

هذا وقته بعد صلاه الصبح ميصير بوقت ثاني هيج كلي عمو..

( بسم الله الرحمن الرحيم وصل الله على محمد واله الطاهرين اللهم اني ادعوك بأسمائك الحسنى ) مره واحده اكولها

بعدها اكول

١٠٦ مرات ( ياجواد يالطيف ياباسط يامغني يا لااله الاهو )

وبعدها مره وحده واحده ( اسألك ان تصلي على محمد وال محمد وان تعطيني من خزائن جودك ما تغنيني عن غيرك وان تعينني على طاعتك واداء حقك اليك )

كملت وقريت سوره من القران الكريم وكمت لميت سجادتي..

ورحت للمطبخ سويت ريوك صارت سته ونص رحت كعدتهم مريم كوه كعدت نعسانه وبارده الدنيا شلتها ورحت للحمام غسلت وجها صحصحت ..

سيلين : اليوم كسوله ليش ؟

مريم : بارده

سيلين : ياعيوني هسه اعلك الصوبه وتدفين واسويلج حليب حار..

ادهم : صباح الخير ..

جنت مدنكه واحجي ويه مريم رفعت نفسي وابتسمتله ردلي الابتسامه ...

سيلين : صباح النور دكيت الباب مجاوبتني..

ادهم : جنت كاعد بس ضليت متمدد بالفراش بارده..

سيلين : اي بارده اليوم الاب وبنته متفقين على نفس الكلمه هههههه..

ادهم : قصدج نفس الاحاسيس..

سيلين : اي بهاي ما اكدر اتدخل هههه يلا تتريك ...

ادهم : لا بالدوام فد مره راح اسبح بين متكملين ..

سيلين : لعد اتريك وياك.

ابتسم وفات للحمام رحت للمطبخ لكيت مرايم خاله ايدها على الميز ونايمه بوستها بخدها بوسات ترفه كعدت ضحكتلي ..

مريم : حلمت بماما تبوسني وانتي بستيني عبالي هيه ...

ضليت صافنه عليها نزلت دموعي من وحدهن كامت من مكانها وحضنت رجلي وبجت.

دنكت كعدت بمستواها حضنتها بجت..

سيلين : ليش حبيبتي تبجين ماما موجوده ويانه وتشوفنه وبابا عندج واني وايفين وعمو ايمن وبيبي وجدو وكلنه نحبج ...

مريم : البارحه بابا شوفني صورتها اني ما اتذكرها هوايه ..

سيلين : ياعمري سوده عليه..

مريم : صديقتي كاعده يمي بالرحله امها تجي وياها للمدرسه وتكعد يمها مرات بالصف لان تبجي ..

سيلين : اي شفتي لان تبجي امها تجي وياها انتي سباعيه وحبابه متخافين وبعدين بابا كم مره اجاج للمدرسه ...

مريم : بس ميوديني كل يوميه ..

سيلين : غير عنده دوام وانتي عندج خط مال مدرسه وياج هواي طلاب ..

ضليت احجي وياها وهيه تناقشني مكدرت اقشمرها لان ذكيه كلش ونبهة اخر شي هزت راسها ب اي بعد ماعرف كدرت اقنعها لو لا..

سيلين : تعاي اغسلج وجهج ..

رفعت راسي لكيت عمو واكف يباوع علينه وعيونه مدمعه اشرتله بيدي يروح لان اعرف هسه البجي مالتهم ياخذ الدنيا ...

راح للغرفه واني غسلت وجها وريكتها ، كملت رحت بدلت الها ومشطت شعرها واني هم بدلت طلعنه بالهول انتضرنه عمو يكمل ، اندك الجرس صاح من غرفته..

ادهم : لحد يطلع جيت .

طلع يلبس بالرباط راح ورجع..

سيلين : هذا خط مريم

ادهم : اي

سيلين: اطلعها.

ادهم : لا انه اوصلها اليوم

سيلين : براحتك..

دخل للمكتب اخذ جنطته وطلعنه وصلناها للمدرسه ونزلنه دخلها للصف وطلب من المعلمه يكعد وياها بنفس رحلتها ، سمحتله ورحبت بيه خصوصا من عرفت بيه دكتور بعدين المدير هم اجه وصارت نقاشات بينهم حول تربيه ونشأة الطفل ونفسيته بالمدرسه وشلون يكدرون يقومون سلوكهم ويغيروه اذا جانو جايين من بيئه تربيتهم غلط..

المدير كال..

_ دكتور شتحجي هو الدرس اقل نص ساعه ننطيهم درس لو نقوم سلوكهم غير الاهل هاي مسؤوليتهم.

جاوبه عمو بكل هدوء وجواب متمكن..

ادهم : استاذي العزيز انت المربي الاول مربي الاجيال ، كاد المعلم ان يكون رسولا ، انت شغلتك هنا تقوم سلوك الطالب لان نفسيآ يتقبل وياخذ المعلومه منك اكثر من اهله ، لان انت المؤثر الاول بحياته.

_ شلون يعني من اي ناحيه قصدك.

ادهم : ابسط مثال اذا معلمه بنتي تحبها وتشجعها راح تحب الدرس وتقراه بكل ممنونيه حتى وان كان عشر ورقات بينما اذا تصيح عليها وتنطيها ورقه وحده راح تقراها بخوف وقلق واصلا متقراها

وتكره الدوام،،، التربيه وتقويم السلوك نفس الشي..

المدير عجبته السالفه راح كعد كباله بالرحله المقابيله..

_ زين استاذ احنه عدنه هواي مواد مهمه قابل الغي وحده منهن شلون يصير.

ادهم : لعد التربيه المن خلت المرشد التربوي غير يسمع للطالب يحسن من نفسيته ، عندك درس الفنيه والرياضه بدال ما يوميه اخليها بين يوم ويوم ، اليوم رياضه تنشط الجسم ثاني يوم ارشاد نفسي وتربوي تنشيط وتهذيب للنفس والعقل ثالث يوم الفنيه تنميه للمواهب وتقنيه للروح وغذاء للعقل لان الرسم يسحب شكو طاقه سلبيه من الجسم يشتت الانتباه ويخلصنه من التوتر ومن القلق راح تذب كل هموهك بهاي اللوحه لهذا الفنان المبدع من يرسم يوصل احساسه للمتلقي مرات نشوف لوحه كئيبه منكدر نباوع عليها مو عاد نشتريها ومرات نشوف لوحه يعجبنه كل شويه نجي نباوع عليها وترتاح نفسيتنه..

_ الصراحه قنعتني يادكتور وهذا النظام وعد مني راح اطبقه بمدرستي و امشي عليه

ادهم : احنه منكم نتعلم استاذي العزيز بس اعتبرها هاي ملاحظه من ابنك .

_ الله يحفظك دكتور افتخر عندي هيج ولد الله يحفظك لشبابك..

ادهم : ممنون ...

باس مريم وطلعنه وصلنه المدير للباب وكف عمو وحجه وياه...

ادهم : هاي مرايم بنتي امانه يمكم شويه نفسيتها تعبانه هالايام..

_ بعيونه نخليها دكتورنه العزيز.

ادهم : تسلم اجي بيوم انطي محاضره للطلاب ياريت تكون بالساحه علمود اكدر افيد اكبر عدد ممكن واذا شفت استجابه من الاطفال وتقبل للموضوع اكرر الموضوع وياهم.

_ المدرسه مدرستك باليعجبك ..

ادهم : ممنون انه اترخص..

_ الله وياك

طلعنه صعدنه بالسياره وانطلقنه متجهين للجامعه ، محجيت اي شي لان واضح متأثر بالموقف مال الصبح..

مشى اليوم عادي وطبيعي وروتين مابيه شي ثاني يوم هم نفس الشي ، الفرق كمت اقره هواي بعلم النفس وصار عندي شغف اعرف هذا العالم شنو بيه وعجبني اغوص بيه وفعلا غصت صار عندي ادمان اكمل كتاب واحن لهذا العلم العظيم وارجع اسحب كتاب ثاني لمده اسبوعين متواصله اني عايفه دراستي واقره ، طبعا بعد ما اخذت الاذن من عمو يلا سمحت لنفسي ادخل المكتب واقره كل يوم ساعتين واطلع اكمل شغل البيت وباقي السوالف التخص الروتين اليومي.

وبيوم جنت اقره فات للمكتب شافني ضحك.

ادهم : شلون اخذتي مكاني ..

سيلين : العفو عمو تعال .

طلع ايده من جيب تراكسوده واشرلي..

ادهم : لا لا اخذي راحتج ، بس شنو دتقرين..

سيلين : كتاب لمايكل دايك مترجم..

ادهم : مممم جيد بس اقري كتب ابراهيم الفقي اسهل واقرب للقلب.

سيلين : ها انت هيج تكول..

ادهم : اي اقري كتب تنميه مو بس علم نفس لان التنميه مثل الغذاء الروحي تبني العقل والجسد.

سيلين : اي كتاب تنصحني بيه.

تقرب يم المكتبه ضل يكلب بيهن طلع كتاب وخلاه على الميز وضرب عليه بصبعه بنقرات خفيفه..

ادهم : ابدي بهذا..

باوعت وقريت الاسم بصوت مسموع.

سيلين : قوه التفكير واثاره على حياتك ممم حلو ؟

ادهم : مو بس حلو وانما روعه..

سيلين : نبذه عنه علمود انشد واقراه ..

ادهم : كل شي يحدث أولا في التفكير ...وقوة التفكير الها تأثير على أحاسيسنه و سلوكنه و نتائجنه و بالتالي الها تأثير على واقع حياتنه . و بهذا الكتاب تتعلمين شلون تتحكمين بقوة التفكير وشلون تحولين الأفكار السلبية إلى إيجابية وشلون توصلين الى السلام الداخلي و الهدوء النفسي .

سيلين : حلوو راح ابلش بيه عبالي اخلص لغه الجسد بس صار عندي اشباع..

ادهم : اذا تردين تتعمقين بلغه الجسد اقري اطروحتي مال ماجستير مترجمها للعربي راح تفهميها اكثر وبس اترجم اطروحه الدكتوراه اخليج تقريها ..

سيلين : ان شاءالله عمو الغالي ..

باوعلي وجر نفس قوي دنك راسه راد يطلع صحته..

سيلين : عمو..

التفت نص التفاته وكال .

ادهم : نعم.

سيلين : شكرا ..

ادهم : شسويت ؟

سيلين: بنيتني ..

حجيتها وبجيت..

تقرب مني باوعلي بنضرات قلقه وهمس.

ادهم : ليش ليش البجي مو ازعل عليج.

سيلين : عمو انت بنيت انسان من حطام تعرف شنو يعني اني عمري كله اخاف من خيالي وبعمري ما اعرف احجي كلمتين ويه اقرب الناس وجنت اخاف وارجف وهسه كمت انطي محاضرات وياك عمو انت السويته ويايه لو اسولفه لاي واحد ميصدكني..

ادهم : كم مره كتلج لو مريم واكعه بنفس مشكلتج راح اساعدها وابنيها من جديد وشفتي بعينج كم مره تعرضت لتنمر وكدرت ارجع ثقتها بنفسها لهذا ماكو داعي للشكر هذا شغلي ويه كل الناس حالج حال طلابي شكد اتعب وياهم ما انتظر منهم شكر هذا واجبي.

سيلين : رغم هذا شكرا

ادهم : عفوا بس اذا متصير زحمه عليج اريد لفه صغيره وجاي وياها لان راسي بلش يدك..

سيلين : اسويلك اكل شنو لفه.

ادهم: سيلين كلت لفه اي شي جبن شي خفيف ماريد تكلاه.

سيلين : ماشي..

ذبيت الكتاب من ايدي ورحت للمطبخ سويتله لفه وجاي وديته اله جان كاعد بالهول ويشرب جكاره خليتها كباله وكعدت..

طفه الجكاره واكل اللفه شرب الجاي وكام ..

ادهم : راح انام اذا ضليت اكثر راسي يدمرني مادام بعدها بدايتها بلكت تن

ساني وتروح.

سيلين : بلكت الله يعينك شيصير بيك من تلزمك.

ادهم : دمار لا يضاهيه دمار الف الحمد لله.

سيلين : تصبح على خير.

ادهم : وانتي من اهله.

راح نام واني كملت كم شغله ونمت ثاني يوم جنت بالمطبخ اجتي ايفين وكفت يمي نشتغل ونسولف.

ايفين : سيلين بنيه بالمعهد انطتني روايه تجنن بس بيها حزن شويه..

سيلين : احجيلي عنها.

ايفين : لا انتي اقريها تحترك عليج الاحداث حرامات.

سيلين : لعد خليها اقراها..

ايفين : لج تخبل تخبل تخبل تسوه الكتب الكاعد تقريهن ..

سيلين : لا حبيبتي هذا علم وحد والروايه للتسليه متضيفلي شي عمو يكول تضيعه للوقت مره شفت مكتبه يم الدوام تبيع كتب ومن ضمنها روايات ردت اشتري ومقبل..

ايفين : عمج على كلشي ميقبل المهم اقريها وراح تدمنين.

سيلين : بله اريد اشوفها شلونها خبلتيني صارلج يومين تحجين بيها.

ايفين : اقريها وراح تبوسيني عليها..

سيلين : هههههه خوش..

كملنه شغل والعصر اخذت الروايه منها وكعدت بالهول اقره بيها مريم صاحتني رادت اسبحهة سديت الكتاب وخليته على القنفه ورحت للحمام سبحتها ورجعت للهول باوعت الروايه ماكو رحت لايفين جانت متمدده..

سيلين : وين الروايه شبسرعه اخذتيها بعدني مقاريه ورقتين منها..

ايفين : اصلا مطلعت من الغرفه..

سيلين: لعد وينها ...

ايفين : يبووو بس لا عمو اخذها والله اموتج ..

سيلين : هسه اسأله عليها باجر اكيد عنده ههههه.

ايفين : معليه اليوم باجر اهم شي ترجعيها اليه.

سيلين : اي اي اي لتثبريني هههه..

ثاني يوم رحنه للدوام كملت محاضراتي وصعدت جانت الساعه عشره ونص وصلت للغرفه سمعت صوت استاذ يحجي ويه عمو وكفت باوعت عمو مدنك راسه وخاله بين ايده والاستاذ كاعد كباله وكفت اسمع ..

سامر ؛ هااا نكدر نكول دك الكلب للمره الثانيه ؟

ادهم : لا بعدني مالاكيها

ضحك الاستاذ وكال

سامر : شوكت تلكاها

ادهم : من الكاها راح اصير مثل المجنون وبوقتها راح تعرف اني حبيت لان تصرفاتي تدل على هذا الشي .

سامر : لكيتها تره بس انت كاعد تكابر .

رفع راسه عكد حاجبه مستنكر

ادهم : ماكو هيج شي ....

سامر : والله يادكتور مبين عليك صارلك ايام مو على بعضك واليوم تأكدلي هالشي.

ضيق عينه وكاله..

ادهم : شلون عرفت بله ..

سامر : شوف نفسك لبسك مو متناسق لحيتك ما محددها ، شغلك متراجع اغلاط بيه كومه واني اصحح وراك هاي كلها مؤشرات تدل على عقلك مو يمك سرقوه المايخافون الله ..

ادهم : لا بس تعبان ومالي خلك..

سامر : لتنسه انت كاعد كدام دكتور بعلم النفس يعني اعرفك اعرفك لو تطير هههههه.

سكت مجاوبه دكيت الباب رفع راسه باوعلي واشرلي تعاي دخلت سلمت ردولي السلام..

سيلين : اذا عدكم موضوع مهم اروح وارجع بعدين.

سامر : لا ماعدنه شي دردشه عاديه تعاي..

كعدت وعمو سألني..

ادهم : تريكتي ؟

سيلين : لا

ادهم : وانه هم بعدني دكتور تتريك ويانه.

سامر : لا متريك وعندي محاضره راح تبدي اخذو راحتكم وبالعافيه..

ادهم : الله يعافيك..

طلع واحنه تريكنه بعدين سألته.

سيلين : عمو

ادهم : همممم.

سيلين : ليش متصارحها ؟

ادهم : هي منو ؟

سيلين : اللي شاغله بالك

ادهم : كتلج السبب قبل..

سيلين : جرب مره ثانيه.

ادهم : صعب

سيلين: حاول جرب وياها.

ادهم : كتلج تعوفني..

سيلين : زين شلون عرفت تعوفك ؟

ادهم : لتنسين انه دكتور نفسي يعني قريتها وعرفت جوابها ليش افشل نفسي..

سيلين : يعني شنو تركتها ؟

ادهم : لا ما تركتها بس اجلت الموضوع ..

سيلين : قصدك عفته للزمن.

ادهم : بالضبط عفته للزمن ..

سيلين : تدري البارحه شنو قريت وتذكرتك ..

ادهم : شنو قريتي؟

سيلين : قريت شلون تبين للمقابل انت تحبه سواء بنضرات او عن طريق بدء محادثه وياه احجيلك شتكول..

رجع بالكرسي ليوره ارتاج وخله ايده على حنكه وكتف ايده الثانيه ضيق عينه وكال.

ادهم : يلا نتعلم شورانه .

سيلين : باوع اهم شي اهم شي من تريد تحجي وياها بلش بمحادثه بسيطه ..

ادهم : ممممم وبعد

سيلين : وبعدين تعمق بالمحادثه شارك وياها رأييك واسألها عن رأيها مثلا بملابسك او بفكره معينه اذا ما وافقتك الرأي جاوبها بأسلوب بسيط ولائق بأنك تخالفها بالرأي وفهمها وجهة نظرك..

ادهم : مممم وبعد

سيلين : لا تخاف تفتح اي موضوع يعجبك وياها خوف من الخلاف بالرأي واذا شفتها صدتك اكلب الموضوع لموضع ثاني واذا كان ساخر بيه ضحك يكون افضل.

ادهم : جيد وبعد.

سيلين : تابع الكلام بأهتمام وحاول تبين انت مهتم بحديثها..

ادهم : زين

سيلين : حاول تطرح اسئله عليها بس كون هاي الاسئله حواريه مو جوابها ب اي او لا لان هذا الشي راح يخفف التوتر بينكم وحاول الحديث ياخذ عده اتجاهات مو اتجاه واحد لان راح يكون كأنما استجواب الها واكثر الناس تتوتر من هذا النوع من الحديث وممكن جدا راح يصيبها اشمئزاز من الكلام وتريد بس تنهي المحادثه وياك..

ادهم : واذا كتلج كل هذا سويته وماحست.

سيلين: زين لعد حاول تحجي وياها بلغه العيون..

تقرب على الميز خله عكوس ايد

ه وشبك اصابع كفوفه وخلاها جوه حنكه يعني كعده مال واحد مهتم بالحديث اللي راح يستمع اله..

ادهم : يلا نشوف شلون علميني ست.

سيلين : راح اكلك وانت طبق اللي اكوله.

ادهم : بكل ممنونيه...

سيلين : يلا لعد اول شي تسويه تركز بوجها..

ادهم : ركزت وبعد...

سيلين : ثبت نضرتك عليها وباوعلها بنضرات حالمه يعني تخليها تحس انت كاعد تنقل الها رساله وترجم افكارك من خلال هاي النضره بس كون مو جريئه وتحرجها تخليها تدنك مثلا او تباوع بغير اتجاه لان راح تفقد التواصل البصري بينكم وهيج راح ينقطع التواصل النظري الفكري..

ادهم : حلووو حبيت وبعد..

سيلين : حاول تتجنب النضر بعيون واسعه يعني لتوسع عينك خصوصا البؤبؤ....

ادهم : هيج مثلا..

باوعلي بهاي النضره اللي كتله عليها..

سيلين : اي اتجنب وياها هاي النضرات..

همس بصوت ذايب..

ادهم : ليش ؟

سيلين : تعرف ليش

ادهم : انتي بلشتي شرح كملي..

سيلين : يعني النضره هاي تدل مرات على الدهشه و الحماس و..

سكتت

ادهم : وشنو ؟

سيلين : انت تعرف..

ادهم : احجيها هذا علم مابيه شي احنه درسناه ودرسناه لطلابنه..

سيلين : يعني ممكن المتلقي يفهمها نضره اثاره او شهوه..

دنكت راسي و هو ضحك سكتنه وره شويه كال..

ادهم : صرت اهابج ..

رفعت راسي ضيقت عيني وكتله..

سيلين : ليش ؟؟؟

ادهم : اخاف من المرأة المثقفه وبنفس الوقت احب عقلها.

سكتت مجاوبت هو استرسل بالكلام..

ادهم : اكثر مرأة خطره ومخيفه بالنسبه للرجل هيه المرأة المثقفه فكريآ ..

سيلين : ليش ؟

ادهم : لان من تحجين وياها تحسيها عاصرت اجيال ومرت على كل الحضارات وبهيج راح تتحدى كل رجل كال المرأة بنصف عقل والمرأة ما تقرأ ملتهية بس بالقيل والقال والغيبه وماركات الملابس ونوع الروج والعطور..

راح يعرف هاي الاشياء مو اساسيه وانما مكمله لاناقتها لكن الاهم فكرها المظهر تكميلي للشخصيه ...

سيلين : صححححح

ادهم : اعجبج...

سيلين : زين البارحه ليش اخذت الروايه الجنت اقراها تدري هاي مال ايفين اكلت راسي عليها كتلها عمو اخذها...

ادهم : ما اريدكم تقرون روايات...

سيلين : زين ليش ؟

ادهم : راح تكرهون حياتك العايشيها..

سيلين : ليش بالعكس اصلا تغيير جو.

ادهم : لا مو تغيير جو تأثر بحياتكم خصوصا انتو البنات تقروها بكل مشاعركم وتعيشون كل سطر من الروايه.

سيلين : لا اني اقره عادي ما اتأثر..

ادهم : مو بيدج غصب عنج تتأثرين تبجين وتضوجين وتضحكين وتتعذبين وياهم على شنو تعبين نفسيتج ونرجع للصفر وانه كوه كومتج..

سيلين : ههههه عمو شكد تضخم الامور..

ادهم : ما اضخم الامور وانما هاي حقيقه علميه البنيه من تقره قصه تصير بطله هاي القصه وبكل قصه تصير بطله وتحب البطل راح تتعدد ادوارها وتكون عاشرت كل ابطال القصص بعقلها خانت هذا وصانت هذا تعرضت لخيانه او تحرش لهذا تشوفين اغلب الامهات تمنع بناتهم بسن المراهقه يتابعن هيج قصص..

سيلين : هههههه يعني مو امي همزين.

ادهم : امج عاصرت ابطال حقيقين متحتاج تعاشر ابطال الروايات..

سيلين : تدري صحيح بس قهرتني.

ادهم : لا ما قهرتج اريد اصحيج حتى خاف بيوم من الايام تريد تجيج وتكلج انتي بنتي وانه احبج وتعالو نرجع نعيش سوه نهائيا متسمحين الها بالتواصل حتى بالتليفون..

سيلين : صح هو احنه شنو شفنه منها دمرتنه والله..

ادهم : وهذا اللي اريد اوصله الج...

سيلين : غير الموضوع نرجع لموضوعنه هسه يعني احنه نتأثر بشي سلبي بس لو اكو ايجابيات من قرائتنه لهاي القصص.

ادهم : الاهم هيه تدمر النفسيه لان راح تتعلقين بهذا الخيال و اي شخص يتقدملج ميعجبج لان رسمتي بطلج بمخيله غير حقيقيه بطل احلام وبس واذا ارتبطتي بشخص راح تعانين هواي وياه لان شنو راح يقدملج يكون مو بعينج لان تردين ذاك البطل التعلقتي بيه بالروايه وهم اكدر اكلج اكو ايجابيات..

سيلين : شنو الايجابيات .

ادهم : راح تزداد خبرتج بالحياه خصوصا بالتعامل ويه الجنس الاخر يعني تقوه شخصيتج بس كون تصيرين ذكيه وتاخذين فقط المفيد من الروايه ومتتأثرين بشي سلبي.

سيلين : حديثي وياك ممتع دكوري الغالي اروح اكمل محاضراتي لان راح تبلش بعد عشر دقايق.

ادهم : امشي اوصلج.

سيلين : ليش تنزل وانت ماعندك محاضره اني اروح..

ادهم : كرهت الكعده كافي صار هواي كاعد.

سيلين : يلا براحتك لعد.

نزلنه وصلني وراح توني افوت للقسم وكفني ولد ويانه بالقسم بس غير شعبه..

_ ممكن احجي وياج.

سيلين : عندي محاضره ميخالف بعدين.

_ يعني شوكت ؟

سيلين: بس تخلص

_ ماشي انتظر.

سيلين : زين ممكن اعرف السبب شنو تريد..

_ مو مال وكفه نكعد بمكان ونحجي براحتنه.

سيلين : ماعرف اشوف اذا كدرت اكلك بس الاكثر ما اكدر.

_ ليش غير افهم

سيلين : ما متعوده اكعد ويه اي شخص بأي مكان.

_ اعتبريها زماله مابيها شي.

سيلين : ماكدر واذا عندي وكت عود نحجي.

_ براحتج انتظر..

توني اريد ادخل دك موبايلي باوعت عمو جاوبته.

سيلين : ها عمو؟

ادهم : انتي وين ؟

سيلين : بالقسم وين يعني.

ادهم

: دخلتي محاضره.

سيلين : بعدني

ادهم : ليش ؟

سيلين : هيج ماكو شي هسه ردت ادخل وانت اتصلت ..

ادهم : ليش تكذبين.

سيلين : شكو غير افهم ليس عصبي.

ادهم : منو جان واكف يحجي وياج وعايفه درسج ..

سيلين : ها هيج واحد.

ادهم : وشيريد

سيلين : يريد يحجي ويايه.

ادهم : بشنو؟

سيلين : ماعرف مقبل يكولي ..

ادهم : ليش .

سيلين : يكول هوسه هنا نكعد براحتنه ونحجي..

ادهم : سيلين ممنوع تحجين وياه واذا عرفت ازعل.

سيلين : عمو اعرف واساسا كتله اني.

ادهم : يلا ادخلي محاضرتج وركزي بشي واحد انتي جايه هنا تدرسين وبس.

سيلين : اي طبعا..

ادهم : يلا روحي.

سيلين : باي.

ادهم : باي.

سديته ودخلت للقاعه انتظرنه جيه الاستاذ طارت نص المحاضره يلا اجه خلصت المحاضرات واتصلت على عمو

سيلين : الو كملت اني.

ادهم : انه هم

سيلين : اصعد لو تنزل.

ادهم : ضلي بمكانج نازل انتي وين.

سيلين : يم الدرج واكفه

ادهم : جيت.

سديته ونزل ابتسمت عاقج وجها مبادلني الابتسامه وصل يمي وكال يلا وكفت اندار عليه.

ادهم : يلا شبيج.

سيلين : ليش ضجت.

ادهم : مضايج .

سيلين : لا ضايج شوف وجهك شصاير بيه..

ادهم : هاي شلون سالفه امشي يابه .

سيلين : ما اتحرك اله تكلي ليش ضجت.

لزم ربطه العنق مالته وثبتها عيوني نزلت عليها ورجعت باوعتله ..

سيلين : شوف شوف التوتر وتغيير بالافكار.

ضيق عينه وباوعلي.

ادهم : انه

سيلين : اي تريد تغير تفكيرك وتجاوبني بشي يغالط اللي تفكر بيه..

ابتسم نص ابتسامه وكال.

ادهم : شلون عرفتي.

سيلين: بعلم النفس يكولون اذا شفت شخص يلزم ربطه العنق اللي هية الرباط بين السبابه والابهام هذا يدل على تغيير معسكر افكاره ، واذا جان يحرص على تثبيتها بمكانها فهذا يدل على شي واحد وهو ظروف حياته الحاليه كاعد تأثر سلبآ على ثقته بنفسه واذا رخه الربطه اثناء الاجتماعات المهمه معناها راح يفقد موقعه او سلطته وقدرته على التحكم بمجريات الامور.

ضحك ورجع غضب ملامحه.

ادهم : ماكو هيج شي حركه صارت لا اراديه.

سيلين : ولان لا اراديه يعني تدل على عقلك يفكر بشي مو منطقي لهذا كاعد اترجم تفكيرك بتصرفاتك.

ادهم : تدرين بكد ما فرحان بتغييرج وقوه ملاحظتج وقرائتج المستمره بكد ما ضايج .

سيلين : اي لان بلشت اقراك واسيطر على افعالي حتى متكشفني بسهوله.

ادهم : بهاي المناسبه راح اخذج لمكان كلش حلو نتغده وبعدها نروح نشتري ملابس اليه والج شتكولين..

سيلين : مممم يلا نروح ..

طلعنه من الجامعه صعدنه السياره وكل شويه تجيه الضحكه ويضحك واني التفت عليه واكله ضحكه خير ان شاءالله يسكت ميجاوبني بس يهز راسه..

وصلنه للمكان نزلنه تغدينه شويه غيرت جو بعدين رحنه اشترينه ملابس اني بالبدايه اشتريت وسألته على اللون مال جاكيت..

سيلين : شتكول اسود بني لو نيلي.

ادهم : بني بني بدون تفكير.

سيلين : ههه اني هم عجبني.

ادهم : يلا اخذيه بالعافيه.

اشتريته وطلعنه افترينه اشتره هو هم قمصله لونها بني.

سيلين : جان كلت تقلدني بس انت تحب هذا اللون.

ادهم : اي عفيه لهذا ما الج حق تحجين.

سيلين : باجر نلبسهن سوه .

ادهم : وندخل نحاضر وهيج راح تطلع علينه حجايه احنه كابلز.

سيلين : ميهمني كلام الناس مادام احنه بداخل نفسنه ممسوين شي غلط.

ضحك من كلبه بحيث حتى الولد اللي يبيع كام يضحك اشتره الملابس وطلعنه بالطريق سألته ....

سيلين : عود ليش ضحكت حسستني حاجيه نكته.

ادهم : لا مو نكته.

حجاها ودار الستيرن باوع بالمرايات ولاف ...

سيلين : لعد شنو

ادهم : لان كلامي كله كاعد تحجيه وعدا المصطلحات المسروقه.

سيلين : سرقه فكريه مابيها شي.

ادهم : هههههههه براحتج يابه..

ضلينه نسولف ورجعنه للبيت..

مر اسبوع وحياتنه مابيها اي حدث روتين عادي وبيوم اجتني ايفين جانو طالعين ويه عمو واني ضليت بلبيت عندي امتحان..

ايفين : سيلين باعي شنو اشتريت ...

سيلين : شنو ؟

ايفين : جبت دشاديش الي والج ولمرايم.

سيلين: ولج ذني شنو مال راقصات وين تلبس هاي.

ايفين : هيه اصلا مال رقص تتذكرين اغنيه ناسي عجرم مال اه ونص..

سيلين : اي شبيها.

ايفين : هيه نفسها .

اخذتها منها باوعت جاكات بيها منا ومنا وليرات لونهن اصفر.

سيلين : وهاي وين تلبسيها عيني.

ايفين : نلبسها من عمو يطلع ونكعد نركص والله ضايجه.

سيلين: اخذيها وخري من وجهي.

ايفين : هاي شبيج لخاطري حبابه.

سيلين : ايفين وخري عني تره مالي خلكج...

ثاني يوم العصر وره ما عمو طلع اجتني هم تتوسل..

سيلين : كتلج لتلحين مالي خلك..

ايفين : ما ما اليوم ماعوفج اله تلبسيها ويانه واخليلج مكياج.

سيلين : انت شبيج كل عقلج.

ايفين : لا نص عقلي ..

ضلت تتوسل ومريم وياها اخر شي قنعوني كمت لبستها صدك تجنن بس مينطلع بيها بره الغرفه ..

سيلين : اذا لبسناها متطلعون منا

ايفين : باعي عمو مو بلبيت وبس احنه ونضل هنا ميخالف بس نصور فديو.

سيلين : خوش والله...

ايفين : شبيج بموبايلي حبابه.

سيلين : شلون قهر ايفين راح تودينه

بهبيه بسوالفج هاي.

ايفين : اهووو باعي الخوات شيسوون هاي بس حضي عندي اخت بكلشي متقبل.

سيلين : مو سوالف عوج ..

ايفين : ديلا شو غمضي خلي اكمل..

خلتلي مكياج وهيه هم طلعت تخبل بعد احله مني ومرايم هم سوينه شعرها وطلعت حلوه شغلت ايفين الشعاره اغاني وكامن يركصن واني كاعده اباوع عليهن.

سيلين : هاي شوكت تعلمتن هاي الحركات.

ايفين: كل يوم نركص وانتي بالدوام

سيلين : اي خوش هههههه

ايفين : كومي ويانه حبابه.

جرتني من ايدي واني معترضه ماريد اكوم...

سيلين : ولج ماعرف.

ايفين : انتي هزي مثلي وتتعلمين.

كامت تهز واني اسوي مثلها ماعرف شكد مر وقت يمكن اكثر من نص ساعه و هاي صفنت تباوع ورايه.

سيلين : شكو شبيج

من اندار الكه فهد واكف منتجي على اطار الباب وضحكه خبيثه مرسومه على وجها لهناك واجه عمو ادهم وكف يباوع على فهد ويرجع يباوعلنه احنه مصدومين وعمو مصدوم بينه مدري بفهد ...

ادهم : شعندك هنا واكف وانه ما كلت ممنوع تفوت هنا..

ضحك فهد والتفت على عمو و كال.

فهد : عمو بنات تماره راح يطلعنك من دينك الاسلامي وكول ما كال فهد.

نتر بيه..

ادهم : فهددددد احترم نفسك.

فهد : والهي محترم نفسي ومتونس زين سؤال ليش متتنغص لاخوانك مثل هيج سهرات تعرف بيه مودي يعجبه هيج ويخرب عليه.

لزم الباب عمو وسدها بس قبلها خزرنه خزره ..

همه من جانو يحجون احنه لبسنه عبي اسلاميه وشالاتنه وهمه على مجادله وحده وبنفس المكان ...

سيلين : هذا شلون فات مو باب الهول مسدود لو عايفته مفتوح.

ايفين : لا والنبي سديته بيدي قبل لا اجي لهنا.

سيلين : لعد شلون فات شكد نذل.

ايفين : ماعرف شلون فات شفتيه شلون يباوع

سيلين : حقير لو خواته هم هيج يسوي يعني بغرفتنه كاعدين حتى مو بالهول ونكون احنه الغلط من عدنه وكعدنه نركص وهمه فاتو زين الباب مو جان مسدود مال غرفته واحنه نعرف عمو اذا راد يفوت يدك الباب هذا فتحهة وجفت

ايفين : صوت الاغاني عالي وماسمعنه من انفتحت الباب ..

سيلين : كتلج نصيه هذا على صوت الاغاني اجه جوز عنده مفتاح..

ايفين : اكيد لعد شلون فات..

سيلين : تلكيه ماخذ نسخه ايمن لو نرمان مال مفاتيح

ايفين : اله هيج.

بيومها كلش ضجنه حتى بره مطلعنه فشله من عمو اله فهد مو بحاله احنه وبليل عمو غير الكيلون مال الباب ونطانه نسخه جديده...

ثاني يوم جان دوام ، بدلت وكملت انتضرت عمو تأخر ، عفت باب غرفتنه مفتوح ايفين متغطايه واني وكفت اعدل مكياجي جنت اعدل بالحمره بأصابعي سمعته كال.

ادهم : خلصتي.

باوعتله واكف وخال ايده بجيوب بنطرونه.

سيلين : كملت نروح.

همس

ادهم : يلا استعجلي تأخرنه...

الفصل الخامس والثلاثون من هنا 

شكرا لزيارتكم عالم روايات سكيرهوم