رواية جذبني فمك البني الفصل الخامس والثلاثون 35 بقلم عبير إدريس

تحاكوا بديار الغرب

ولم يسمح الزمان لهم بدخول الحب ...

نوافذ محطمه

وستائر مبعثرة

وقناديل محترقه

وما ان خرجت هي من البوابه

لفحتني تلك الاعاصير وكأنها تزيح

شعور الراحه عني والى الأبد..

اين ذاك الهواء العليل بحضرتها فأنني اختنق يا الله...

و شاء القدر وفرغت الديار من احبابها

و اخذتكِ الايام مني

ولذتي هاربه

تاركه تراحيب الاسترخاء التام على اراضي قلبي المتعب..

وحده _ سفر ومن ثم رجوع و موت ___ وماذا المنتظر

اني تعبت فأنا من البشر

اين الملتجئ واين المفر

الى رب رحيم اعلم بقلوب البشر

فيارب ارحم قلبي وهون ضعفي واشدد ازري..

ياترى هل الزمان قادر على ان يرأف بقلبي المتعب ...

مشاعري مكتومه بين طيات افكاري ومسرح حياتي ليتردد سؤالي ..

الم تستشعري بوجودي بحبي بحناني بدفئي وترافه يدي

ام كانت تلك قساوة متعمده لكسر المشاعر...

ادهم

خاطره بقلمي عبير ادريس....

____

ادهم : خلصتي.

باوعتله واكف وخال ايده بجيوب بنطرونه.

سيلين : اي كملت نروح.

همس

ادهم : يلا

مشيت ضل واكف بالباب بحيث صرت كلش قريبه منه التفتت عليه لكيته مغمض ورافع راسه ليفوك عديته ومشيت وصلت للهول التفتت نفس وكفته صحته..

سيلين : عمو بيك شي ؟

ضل ساكت ونفس وضعيته ثواني جر نفس واجه مشه وطلع كدامي بدون ميحجي طلعنه وصعدنه بالسياره ...

بالطريق احس اكو توتر بينه يعني مو مثل كل يوم مرتاح ماعرف اني هيج حسيت بوقتها..

سيلين: عمو اني اعتذر عن موقف البارحه تره مو مثل مافهمت.

دار وجها عليه بحركه سريعه ورجع باوع ليكدام.

ادهم : انه مو صغير علمود افهم غلط اعرف الموقف شنو وشلون صار ماكو داعي تبررين .

سيلين: كلت خاف تاخذ موقف من عدنه واحنه ما قاصدين.

ادهم : وانه الف مره كايل لتبررين مادامج صح .

سيلين: شكرا لثقتك.

ادهم : عفوا

سكتنه بعدين وكفنه بأزدحام اجتي بنيه صغيره تبيع ورد دكت الجامه التفت عليها شافهة نزل الجامه ضحكتله وكالت.

_ عمو يارب تصيرلك هاي الحلوه ويصير عدك توأم بس اشتري هاي الورده للورده الوياك..

باوعلي مبتسم فتح باب السياره ونزل وكف يمها ..

ادهم : بيش هذا الورد .

_ الوحده ب الفين.

ادهم : مممم زين اذا اخذتهن كلهن منج وين ترحين.

_ اروح للبيت وانام..

ادهم : زين عندج مدرسه.

_ لا ماعندي بابا شهيد وكاعدين ايجار واني واخويه نبيع هو كلينس واني ورد عفيه عمو اخذ وحده..

ادهم : واذا اخذتهن كلهن شنو رأيج ..

ابتسملها وكرص خدها هيه كامت تكمز رادت تبوس ايده مقبل جرها ودنك كنبص صار بمستواها ماعرف شنو حجه وياها شاورها وهيه ضلت تضحك ، طلع فلوس من جيبه فتحت عينها كلها وصاحت..

_ حيل عمو ذني هوواي.

ادهم : كليلها لماما ذني عمو دزهن علمود يخلص هذا الشهر وما اطلع بالبرد ومن تطلعين مره ثانيه لبسي قمصله.

_ اي عمو البس شكرا هسه تاخذه للورد.

ادهم : اي اخذه شكرا

_ عفوا عمو ..

اخذه منها وراح تمشي وتتلفت على عمو..صاح بصوت عالي حتى تسمعه...

ادهم : للبيت كبل وديري بالج من تعبرين ..

صعد وخله الورد بحضني وكال..

ادهم : شلون قهر شنو ذنب هاي الاطفال مصيرها التشرد ليش هيج يا الله.

سيلين : قهرتني كلش..

ادهم : مردت كلبي مرد المشكله يا طفله اشوفها تذكرني بمريم شكد اخاف عليها من هاي الدنيا اذا صار بيه شي .

سيلين : اسم الله عليك عمو عمرك طويل لتكول هيج.

ادهم : اعمار بيد الله مامعروف شنو ضامتلنه الدنيا..

سيلين : ان شاءالله كل خير.

ادهم : يارب.

انفتح السير ومشت السياره لهناك ضحك .

سيلين : ها شكو ههههه.

ادهم : اجه موقف ابالي ضحكني.

سيلين : شنو؟

ادهم : هاي مريم شلون تركص منين تعلمت.

حجاها والتفت عليه جان يسوق بتك ايد وايده الثانيه مرتاج بيها على الفاصل البيني وبينه..

سيلين: من ايفين ..

ادهم : خبلتني شلون تتمايل ..

سيلين : اي ههههه

ادهم : خرب بعرضها شكد حلوووووه

سيلين : فعلا تجنن صايره.

ادهم : خو هاي الدشداشه فد شي يجنن صفنتني..

سيلين : اي صحيح كلش حلوه.

ضحك ماعرف بوقتها ليش محسيت جان قاصدني بهذا كلامه اله بعدين من قوت علاقتنه يلا اعترفلي جان يقصدني بهذا الكلام ويكول بيومها منمت للصبح خبلتيني رغم ما ركزت وجيت اخر شي بس طبعت ابالي اخر حركتين تمايلتي بيها...

وصلنه للكليه وكلمن راح لقسمه كملت اول محاضرتين وصعدت فوك يمه وره ما تريكنه كال..

ادهم : نكمل موضوعنه .

سيلين : ياموضوع.

ادهم : لغه العيون حبيته حيل واستفاديت.

سيلين : هههههه لو ما هاي دراستك وحافظها..

ادهم : المهم كملي شنو قريتي بعد..

ضلينه نسولف بهذا الموضوع اني وياه ونحجي بلغه العيون ...

اجتي بنيه دكت الباب وكالت

_استاذ اريد اسألك ع الماده لو مشغول

ادهم : اي مشغول كلش تعااي بعدين

_يعني استاذ شكد واجي

ادهم : ماعرف حسب عندي الموضوع مهم..

جان عاقد حاحبه ويحجي بجديه..

_ ها شكرا

ادهم :اهلا

طلعت واني ضحكت هو ابتسم وفتح البطل مال مي شر

ب وكال..

ادهم : اله ارسبها .

سيلين : ياا ليش.

ادهم : قطعت التواصل النظري الفكري بينه واحنه تونه اندمجنه بالموضوع.

سيلين : همزين قطعته عندي محاضره وانت اليوم ناوي تختم علم النفس براسي.

طلعت وصلت للباب سمعته يهمس..

ادهم : جعلني كتاب ..

حجاها وضحك.. التفتت عليه وكتله

سيلين : شنو ؟

ادهم : لا على ايفين من تكول جعلني ميلي هيج اجتي ابالي وضحكت عليها

سيلين : هاا ميلي يلا راح اروح باي ..

رفع ايده وسوالي حركه بصابعه الاربعه باي.

ومثل كل يوم خلص اليوم عادي ورجعنه بالطريق ساكتين وفجأة كال.

ادهم : سيلينه .

حجاها والتفت عليه ضحكت..

سيلين : شو سيلينه هههههه تدري اول مره اعرف دلع لاسمي ...

ادهم : مثل مرايم الكل يصيح الها مريومه اله انه لقبتها بمرايم ياسه الله يرحمها جانت تكلي منين جبته متكلي ، المهم مو هذا موضوعه.

سيلين : لعد؟

ادهم : قررت قرار ومامنه رجعه ..

سيلين : بخصوص ؟

جنت منداره عليه وهو يحجي ويلتفت شويه ويرجع يركز على الطريق..

ادهم : راح اجازف .

سيلين : بشنو غير افهم.

ادهم : راح احجي وياها

سيلين : ويامن؟

ادهم : البنيه الكتلج عليها.

سيلين: واخيرا قنعت.

ادهم : اي اليوم فكرت هووواي حتى محاضرات ما دخلت دكتور سامر ورطته بدالي.

سيلين : ههههه لازم كتله راح تعترف بحبك وتحمس اله هو يتعاجز.

ادهم : ههههه على كولته يكول اذا انت يمي كلمتين على بعض معرفت ترتبهن وتسويهن جمله شلون راح تلقي المحاظره ..

سيلين : والله ياعمو وتالي وكعت ههههه.

ادهم : ادعيلي الله يهديها عليه ..

سيلين : انطيني تسبيحه من تسبيحاتك المبهره واني ادعيلك.

ادهم : انتي ادعيلي وبس هسه ماكو ابالي اي شي ..

سيلين : ماشي اذا الك ما ادعي المن لعد بس اول مره اشوفك هيج فرحان عدا اول يوم رجعت من السفر وشفت مريم اول مره بالحقيقه ذيج فرحتك ما انساها ابد...

جر حسره وكال..

ادهم : احس الروح انبثت بداخلي من جديد بعد ما جنت عايش بتصحر سواء من ناحيه المشاعر الماتت ويه ياسه او عذاب الضمير اللي جان ملازمني انام واكعد الوم بنفسي شلون عفتها عروس ورحت ليش ماعشت وياها ليش ماعوضتها ..

سيلين : قابل انت جنت تدري هيج راح يصير غير عندك دراسه.

ادهم : واليوم فكرت من خسرت ياسه تدمرت ست اشهر انه ما ادري بالدنيا شبيها مابيها لهذا ما مستعد نفسيآ اخسر اي شي غالي عليه من جديد.

سيلين : ان شاءالله متخسر.

ادهم : هاي الايام تبين والله كريم.

سيلين : الله كريم..

رجعنه للبيت اول مافتت بدلت ورحت للحمام غسلت وكبل للمطبخ سويت الغده بعدين رحت صليت رجعت للمطبخ لكيت عمو يسوي بالزلاطه.

سيلين : ها عمو جيت اني.

التفت عليه وكال.

ادهم : عادي اساعدج انتي هم تعبانه...

سيلين : اليوم نعسانه راح انام يمكن للمغرب ما اكعد.

ادهم : نامي ارتاحي ماعدنه شي..

كعدت على الكرسي يصير بدون تجوه وعالي يسموه ستول خاص بالبار مال مطبخ كعدت عليه صرت عاليه اعله من الدجه ( الفاصل بين المطبخ الحراري والبارد) هو جان يثرم عليها اخذت خياره منه اكلتها رفع عينه باوعلي وهمس.

ادهم : عوافي

سيلين : الله يعافيك عمو تعرف شنو اتمنى.

ادهم : شنو؟

سيلين : اضل عايشه هاي الحياه طول العمر.

ادهم : شلون يعني مافهمت.

سيلين : يعني اضل هنا يمك لا اتزوج ولا اخالط ناس ولا اتعرف على اي شخص غيركم انت وايفين ومريم.

ادهم : رجعنه للأنطوائيه.

سيلين : لالا مو قصه انطوائيه بس من عاشرتك وشاركتك بتفكريك وحواراتك مايعجبني اي شخص صرت اي واحد يحجي ويايه اريد بس ينهي الحوار خصوصا اذا جان متملق وبس يضحك ويزعطط بروحه.

ادهم : يعني احنه فعلا معقدين.

سيلين : منو ؟

ادهم : الاطباء النفسسين..

سيلين : ههههه ليش لا حشاك

ادهم : مو انه اكول الناس تكول.

سيلين : هيج يكولون لان ممعاشريكم ومستوى عقولكم مايتناسب ويه عقولهم لهذا ميكدرون يتآلفون وياكم.

ادهم : يكولون علينه هلكد ما معقدين حتى شركاء حياتنه نعقدهم ويانه.

سيلين : بالعكس يا عديم الذوق الهيج يكول ويفكر مثل هيج تفكير.

كعد نص كعده على الستول الثاني ضحك وكال..

ادهم : اهم شي عاجبيج شعلينه بعديمين الذوق.

سيلين : بس جديات عمو ماريد اتزوج ابد ولا اريد اي تغيير بحياتي ..

تقصدت هيج حجيت خاف اباله يريد يفاتحني بموضوع او شي لان بلشت افهم تلميحاته بس ممتأكده كلت انتظر لحد ما هو يحجي ماريد اظلمه واحكم من هسه..

صفن بوجهي حسيته حاير ذب السجين من ايده وفرك عينه بصابع ايده بعدين لزم لحيته ضل يمسد عليها صعود ونزول...

سيلين : كلت شي غلط ..

ادهم : لا بس تعجبت.

سيلين : لتتعجب اني احس نفسي ما اكدر اتوالم ويه اي بشر..

ادهم : حتى انه ..

سيلين : هههه كتلك انت ومريم وايفين ماريد شخص جديد يدخل حياتي اكتفيت بيكم ..

ادهم : هاهيه ...

سيلين : راح اصب غده.

مجاوبني صبيت ورحت صحت البنات كعدنه نتغده وعمو بس يصفن..

سيلين : عمو اكل.

ادهم : مامشتهي اكلو انتو بالعافيه.

كام وراح للغرفه .

ايفين : شبيه شو ما

اكل ..

سيلين : ماعرف ذيج الساعه جنه نضحك ونسولف شو فجأة ضاج..

ايفين : علم نفس بعد ..

سيلين : يسوون راسج ياتافهة اذا سمعتج تحجين هيج على عمو وتضحكين اله اطيح حضج مو سمعتيها من هذا التافه وجلبتي بيها.

ايفين : منو فهد هههه

سيلين : اي خ******

ايفين : ههههههههه اخ يابه لو يسمعج لج اني كلت عليه مجرم شرشحني اذا يسمعج هيج تكولين يمكن يعلكج بالتيل ..

سيلين : يا فدوة خوفتيني دكلي اكلي ...

ضلت تضحك كمت رحت لغرفتنه وصلت يم غرفته بابه مسدود ، هنا بلشت احس وافهم اكثر انو عمو عنده مشاعر اليه بس عقلي يرفض هذا الشي وميريد يصدك مكاعد يتقبل هذا الشي ابد لهذا بسرعه اوخر الافكار من بالي واتحاشها رحت نمت من بعد ما وصيت ايفين تنظف المطبخ..

كعدت على صوت الموبايل باوعت عمو جاوبته ...

سيلين : الو

ادهم : كعدتج مو

سيلين : لا هم يله صارلي هواي نايمه.

حجيتها وتثاوبت كال.

ادهم : صحه

سيلين : شكرا.

ادهم : انه طالع كتبيلي شنو اجيب وياي ..

سيلين : ماشي هسه اروح اشوف النواقص وادزلك..

ادهم : استعجلي

سيلين : ماشي هاي كمت.

اخذت الموبايل ورحت للمطبخ فتحت الثلاجه اباوع واكتب.

سيلين : خيار طماطه برتقال _ وكتبت بقيه الاشياء.

ضحكت على المحادثه كلها عمو جيب فلان شي وفلان شي ..

وهو خطيه بس يجاوب بكلمه وبعد

اكتبله هاهيه ، اكثر واحد اراسله هو لان احتياجات البيت كلها اني قايمه بيها ومعتمد عليه بالدرجه الاولى ، مرات اريد ادز شي لصديقتي على فد موضوع وانسى وادزله اله وبليل هم تكررت بعد ما اجه وجاب المسواك وصفيته بليل عود دزيت لسرى رساله دزيتها اله...

سيلين : اكلج اني قريت لحد صفحه ٣٠ هاهيه لو بعد اكو ماده .

دزلي .

ادهم : لا هاهيه نامي و ارتاحي..

سيلين : ههههههه هم دزيتها الك شنو هاي ..

ادهم : مو انه مبرمج فكرج لهذا تدزين الي اول..

سيلين : لان اكثر واحد اراسلك وخاله رقمك ليفوك لهذا تشوفني اغلط دائما.

ادهم : يلا نامي ساعه ١١ كتبي من التعرفيه افضل ما تتعبين ويروح عليج الاول والتالي..

سيلين : هو هم هيج نعست كلش تصبح على خير.

دزلي سمايل مبتسم ...

اني هم دزيتله ونمت ثاني يوم رحت للدوام ورجعت نفس الروتين نمت و كعدت العصر سمعت صوت اهل عمو بلبيت جايين باوعت ايفين فاتحه الباب شويه و واكفه تتسنط..

سيلين : لازم موضوع دسم الي لازكه بالباب.

ايفين : لج تعاي فهيدان لعب لعب

وخرت الغطا وكمت وكفت يمها..

سيلين : شبيه هذا الخبل شيوجعه.

ايفين : بعدين اسولفلج خلي نسمع.

وكفنه نسمع..

يوسف : كلام اخوك صحيح ومنطقي ليش كاعد ترفض اذا متزوجهن نكعد كلنا بيت واحد.

ادهم : البنات مرتاحات هنا وانت عندك ولد ثنين وين اكعدهن وياكم حجي شبيك اول تالي فهد يمشيك...

يوسف : لا مو يمشيني بس حجايته صحيحه على الاقل خواتك وامك موجودات وياهم شنو عايشات بيت رجال عزابي لو عمتهن عايشه فلا احجي مو جانن عايشات و وياهن ايمن كم مره اجيتهم وجنت فرحان بيهن لان احب مرتك الله يرحمها بس هسه اختلف الوضع.

ادهم : ما ابيع البيت مرتاح بيه.

فهد : لعد رجعهن لامهن..

نتر بيه عمو.

ادهم : سد حلكك انت لتدخل.

فهد : حجي عوفه يريد ياخذ راحته .

ادهم : لتخليني اكوملك..

فهد : اعصابك عمو ريلاكس ..

يوسف : كافي مو وكت هذا الحجي عندك خيارين لو تزوج البنات لو تبيع البيت ونعيش كلنه سوه.

ادهم : واذا رفضت هاي الخيارات شنو يصير.

يوسف : انطيهن لامهن كافي الناس اكلت وجهنا.

ادهم : ما انطيهن لامهن ولا ابيع البيت ولا ازوجهن وبكيفي ومحد يكدر يجبرني على شي.

يوسف : يابه بيع البيت وفلوسي على فلوسك ونشتري بيت واحد وجبير وباب وحده هاي كدام الناس بس داخل البيت يعزلن البنات حتى لو فوك وانت وياهن اخذو الطابق الفوك كله واحنه الارضي بس اهم شي نسد حلوك العالم مو يا ابني البنات راح تنكطع قسمتهن ياهو يجي يخطب يسألنه منين ما منين ومن يعرفون ماعدهن اهل ديزيد الحجي وانت دكتور والك سمعتك وطالع طاب ويه سيلين وين صايره هاي ...

ادهم : هسه مشكلتك ابيع البيت ونكعد سوه هذا هو بعدها تفكون ياخه مني ومن البنات.

يوسف : اي هذا هو

ادهم : ماشي باجر عارض البيت للبيع وانت اطلع دور بيت وانت تحير بالمعاملات انه تعبان ومالي خلك.

وفعلا انعرض البيت للبيع خلال اسبوع انباع بس حسيت عمو معصور عصر لان راح يترك غرفه عمه وذكرياتها بحيث اول مره بعد وفاه عمه ينام بيها ويطلع عيونه حمر مبين باجي هوواي ومتأذي حتى من الدوام اخذ اجازه اسبوعين واني اروح وارجع ويه ايمن اللي بلش يعلمني سياقه من سمع اريد ادخل دوره كال عليمن اني اعلمج وجنه نطلع مرات عصريه مرات بليل وهسه بالدوام هم كام يعلمني ..

بيوم اتفقو القسم نروح سفره ماعرف ليش عجبني اروح وياهم اتصلت على عمو جان بلبيت..

سيلين : صباح العافيه

ادهم : اي فعلا محتاجها.

سيلين : سلامتك

ادهم : الله يسلمج شنو ماعندج محاضره اليوم

سيلين : اسكت عمو كاعد اضوج واختنك من انت ماكو يعني فعلا كارهة الدوام ش

وكت ترجع تداوم مو مليت.

ادهم : بس اكمل شغله البيت ارجع..

سيلين : ماشي بس اريد اكلك شغله عنونيه هههههه حباب لتفشلني .

ادهم : اعرف اول ..

سيلين : عمو راح اروح سفره ويه القسم.

ادهم : لا

سيلين : ليش

ادهم : شعندج

سيلين: ضايجة

ادهم : لا نروح كلنا سوه

سيلين : لا اريد وياهم

سكت وبعدين كال..

ادهم : من يمته وجاي تحبين الاختلاط انتي

سيلين : ليش مو انت تكلي اختلطي..

ادهم : هاي قبل من جنتي مريضه وهسه تحسنتي.

سيلين : هسه شنو اروح لو لا

ادهم : لا من انه افرغ اخذكم..

سيلين : ماشي..

ادهم : شوكت يجيج ايمن.

سيلين : نفس كل يوم.

ادهم : اي زين يلا ديري بالج.

سيلين : راح اضل وحدي وين اروح لو انت موجود جان صعدت يمك و اطبق كم شغله قريتها براسك وهم اضيع وكت .

ادهم : لو تدرين شنو بيدي جان محجيتي هيج.

سيلين : شنو

ادهم : تحفيات مال اشيلها واحطهن براسج.

سيلين : ههههههه شدعوه عمو صاير قاسي.

ادهم : مو انتي يوميه متعلمتلي شي جديد وتريد تطبق وانتي كلشي متفتهمين ..

سيلين : هاي اني.

ادهم : اي انتي مكيفه اسبوعين تقره بلغه العيون وتصفن بوجهي مثل *** ال لتخليني اكمل.

سيلين : كول ثوله

ادهم : انه ماكلت انتي كلتي.

سيلين : بس انت لمحت.

ادهم : سيلين روحي عاد عندي شغل من يمته وجاي تلحين هلكد.

سيلين : ممممم لا اروح سفره ولا اطبق عليك ولا عندي محاضرات لعد اروح اكل شتكول.

ادهم : اي خوش فكره يلا تدعبلي

سيلين : ههههه ويكولون الدكتور ميستخدم هيج مصطلحات..

ادهم : ليش مو بشر.

سيلين : هههههه يلا باي لان اذا ضليت شويه تطلعلي من التليفون.

ادهم :اي فعلا يلا الله وياج..

مدري شلون خلص اليوم صار شطوله اجه ايمن و رجعنه اول مادخلت للبيت على ايدي اليمين غرفه المكتب مال عمو دخلت لكيته شايل الكتب مالته وخالهن بكارتونات كبار وفاتح القاصه يطلع منها غراض ويغلفهن بالجرايد ويخليهن بالكارتونه جان مندمج سلمت عليه التفتلي وردلي السلام...

سيلين : لازم لكيتو بيت وراح نشيل

ادهم : اي اليوم الحجي تكاتب

سيلين : عمو بس انت ممجبور تخسر راحتك علمودنه ليش هيج ضحيت بالبيت وضحيت بذكرياتك ويه عمه..

ادهم : والله وانه ما احب احلف ؟ ما يهلني انطيكم لاي واحد لا كرايب لان اعرفهم شنو وراح تتأذون متأكد ولا غريب لان ما اعرف الناس شنو ما شنو.

سيلين : لعد والحل تضل هيج يوميه مشكله ويوميه تسمع حجي

ادهم : ما دام ما شاكيلج لتاخذين على نفسج معليج انه اتصرف.

سيلين : بس اني هم ما اقبل تخسر اكثر من هيج.

ادهم : يعني شنو تردين تسوين مابيدج شي وبعدين راح نشيل بيت اكبر واوسع هذا من تقسم اختنك لتضوجين عادي يعني.

سيلين : ماعرف شكلك، زين هاي شنو ...

ادهم : شنو

سيلين : ذني الغراض اللي كاعد تغلفهن اول مره اشوفهن..

باوع على الغراض ورجع باوعلي

ادهم : ذني غراضي كلش عزيزات عليه واخاف لا وحده منهن تنكسر اغلبها دروع و وسوم تكريم ومن هاي السوالف يعني ..

سيلين : حقك تخاف عليهن اذا هيج..

باوعلي وطولت نضرته وكال..

ادهم : يصير اضمج ويه اغراضي اللي احبها...

نصدمت بكلامه بعدني ممجاوبته سمعت صوت صفكه ورايه التفتت لكيته فهد واكف يضحك وصوفر بحلكه عاط بيه عمو .

ادهم : وسم شبيك ...

فهد : ههههههه العب دكتور صارت اغراض خاصه وكذا شو حتى بغزلك مثقف لعد شبيك ويايه.

ادهم : لتلوص واطلع بره.

فهد : هو احنه كلنا طالعين بره لان نعتبر ظيوف بيت العالم..

عمو صار عصبي شال تحفيه وشمرها عليه هو رجع ليوره غمزله وراح.

نسيت الجمله اللي كالهة عمو وحرت بالموقف الصار يعني من الخوف رجف كلبي حسيت راح يتعاركون اله شويه ..

سيلين : عمو هذا شبيه وياك...

ادهم : معليج بيه ابتعدو عنه وبس.

سيلين : زين هو ليش باقي هنا ليش ميرجع لبيتهم..

ادهم : يابيت باعوه واستقرو هنا ماكدر اطرده بس افتح حلكي ابويه يطلع وياه وتلحكه امي وتعال شيخلصك يا ادهم على طردت اهلك من وره البنات .

سيلين : عمو كل يوم حياتنه كاعد تتعقد ازيد من قبلها الله عليك وافق بأي واحد يجي اني قابله .

ادهم : سيلين اسكتي لخاطر محمد وروحي سوي غده ميت جوع لحد الان ما متريك شربت بس جاي.

سيلين : ماشي راح اروح..

رحت سويت غده والف حسبه وحسبه ابالي دخت حيل..

مرت الايام وكملنه حزم الاغراض وشلنه للبيت الجديد وفعلا بيت واسع وحلو مرتب ومبين مريح بس مجنت ادري الراحه راحت من طلعنه من ذاك البيت وهنا بلشت اللعبه....

اخذنه الطابق الفوك كامل بيه ٤ غرف وحده لعمو تطل على الحديقه والثانيه صارت مكتب والثالثه النه والرابعه الجبيره سويناها استقبال كلش حلوه وبيها بالكون على الحديقه من رتبناها صارت تجنن واكو مطبخ وحمام وملحقاته..

ايفين

استقرينه بلبيت ومرتاحين الحمد لله بس عمو شويه جان ضايج..

بيوم جنت كاعد بالحديقه بحجابي الكامل حتى البس عبايه اسلاميه من انزل كلش التزمت وشعرايه مني متطلع انفتح باب الشارع فات فهد جانت الساعه تقريبا ب ١١ الكل نايم واني مجاني نوم لهذا نزلت من

شفته دخل بالسياره كمت وكفت حتى افوت بس هو مثل المخبل فات سريع كلت راح يفوت بنص الهول لهذا انشدهت وضليت واكفه بمكاني هو طفه السياره ونزل وصل يمي وكال.

فهد : هااا فيفو ..

ايفين : فيفو شنو اسمي ايفين لو متعرف تلفظه.

فهد : لا اعرف بس هذا اسمج الحركي.

ايفين : شنو تقصد.

طك اصبع وهزلي جتف عرفته يقصد من شافني اركص.

ايفين : هسه شتريد

فهد : سمعت والعياذ بالله من الفتن ونقل الكلام والغيبه انو فيفو جانت تبوك سابقآ.

انصدمت ضليت اباوع بعيونه وجسمي يرجف تمتمت بكلام متقطع.

ايفين : ماكو هيج شي.

فهد : يعني تنكرين بايكه عمو لو تنكرين بايكه ايمن .

يحجيها ويهز براسه مستهزء بيه.

ايفين : انت شتريد وين تريد توصل.

فهد : شنو اريد صعب افهمج بس وين اريد اوصل .. وسكت

بس عيونه تتوزع على ملامح وجهي نزولا لجسمي.

ايفين : وخر من وجهي خلي افوت

فهد : فوتي يابه فوووتي ...

وخر واني مشيت ودموعي نزلت من وحدها تلاكيت ويه عمو جان واكف باب المطبخ باوعتله ولا اراديآ خزرته وكفني وكال.

ادهم : شبيج ؟

ايفين : يعني اني جنت صغيره وغلطت هيج ترحون تفضحوني والف مره اعتذرت منك ليش هيج سويت بيه.

عكد حاجبه وكال.

ادهم : اوكفي منو فضحج وشنو الصار.

ايفين : الصار اخوك يعيرني بالبوكه القديمه وانت كتلي محد يدري بس اني وحتى سيلين اكدتلي ايمن ميدري فشلون عرف فهد اذا انت محاجي لاهلك..

مجاوبني عافني وراح لفهد جان واكف يدخن اول ما وصل عمو يمه نفخ الدخان بوجها ..

واحد واكف كبال الثاني بوقتها شبهتهم بالذيابه

ذيب ابيض عمو ادهم وذيب اسود ماكر هو فهد..

عمو حجه من بين اسنانه بعصبيه بس حجه بصوت ناصي لان دنيا ليل والناس نايمه..

ادهم : ايا ارعن فوكاها سكران ..

فهد : لا هذا مو سكر هذا اسمه مشروب روحاني والعياذ بالله ..

ادهم : امشي اغسل وصحصح ولتضل تجفص ومتعرف شنو تحجي.

فهد : اكله مو سكران يكلي سكران بابه اكو فرق بين العرك والبيره وانه شارب بيره مو عرق اشرب عرق هههههههه تتذكر هاي المسرحيه والله حلوه انصحك تشوفها.

ادهم : شوف اي خلاف شخصي بينه نحله سوه

لتحاول تلوي ايدي بالبنات لان بوكتها ادمرك..

فهد: دكتور شنو نسيت انه ماعندي شي اخسره

ادهم : احترم نفسك وفوت اسبح ونام وجفيني شرك

فهد : خايف

ادهم : استغفر الله.

فهد : لا لا صدك ادهومي خايف مني ؟

ضل عمو صافن عليه مجاوبه ..

فهد : ها دكتور دخت مو ماعدت تقراني مثل قبل ولا تعرف بشنو افكر وشنو اكدر اسوي ، فهدك تغيرررر هووواي ...

ويجرها للحجايه..

ادهم : امشي نام ولتضل تلغي لغوه زايده.

فهد : تعرف شنو راح اسوي راح امشيك حسب مزاجي وانه راح ارسم حياتك واخليك تسوي اللي اريده بدون تعب وجهد مني شنو بالي يكلي امشيك عليه راح انومك مغناطيسيآ....

ويأشر بيده ....

الفصل السادس والثلاثون من هنا 

شكرا لزيارتكم عالم روايات سكيرهوم