رواية ناديه الفصل الخامس والثلاثون بقلم انين الليل
نجحت هديل وانا داومت مرحله ثانيه بالكليه وحنين صارت بالخامس واسيل بالسادس واهنا راح
يصير الشغل والكراب على اختي يعني هم تعيد سنه ليش شنو ذنبها وقررت هالمره احچي وگدام هادي
والي يصير يصير
ونفس ما انا ما اتغير شي داومت بملابسي مالت العام الي اشترتهن الي عمه زهراء لان محد كلف نفسه يگول
خلي نشتريلها لو بس تنوره وقميص وحتى قبل لا يبدي الدوام ما رحنا البيت عمي كرم لان اعرف راح ينطينا
فلوس واعرف هو عنده التزام بعائلته اضافه الى بيبي جميله وعلاجها
بصراحه شفتها واگفه اخذ من كرم مصروف وانا عايشه ابيت عمي انا واختي نخدم بس بلگمتنا ولا فد يوم عمي
فرحنا بمصرف لو بملابس ولا حتى بعيد
ما اضم عليكم اكو اشياء كل ابنيه تحتاجهن كل شهر والشهاده ال الله كانت عمه ام مرتضى تشتريهن وتجيبهن النه
انا وحنين ومرات تجيب مال شهرين او اكثر ولا مره افراح انتبهت النه انا واختي كل همها بناتها وبيتها
وهمها الثاني شلون اتذلنه بالاوامر الي ما تنتهي والشغل الي تطلعه من جوه الگاع وتحاول تسوي مشاكل ويانه
عمي هادي چان ما يحچي ويانه ولا فد يووم سالنه عن احتياجاتنا ويه عائلته چان يتصرف وياهم بهدوء
مو ذاك هادي الي من چان يجي يم بيبيتي بس يصيح ويغلط لا ابيته چان انسان ثاني حتى مرات ما نحس بوجوده
لكن انشوف بعيونه كره وحقد علينه انا واختي ما كان حتى يباوع النه واذا صادفنا فيصير يخنزر علينه وكانما
يريد فرصه يتخلص من عدنا لذلك چنت اتحاشا وابد ولا فد يوم لو كلف حاله يسالنه عن احوالنه لو احتياجاتنا
ولا اتذكر گال //عمو اشلونج لا الي ولا الحنين حتى من يريد من عدنا شي چان يوصله عن طريق افراح
لو وحده من بناته
اسيل من اول اسبوع سجلوها دورات وافراح گالت بالدوام تخلي مدرسين رغم معارضة ياسر وهو ايگلها
يمه شدعوه شراح تطلع
افراح //ما عليك عود من ناخذ من راتبك احچي
عمار بضحك //ليش انتي شمخليه براتبه اول باول عدج
افراح //اي مو اودي الابوي الكم اجمعه تستفادون منه
اشوف افراح تطلع هي وهديل وتجيب وياها ملابس وجنط واحذيه والاسيل همه اما انا وحنين فاي شي ما جابت
النه ولا كانه نداوم اشوف حنين ضايجه لان العام داومت بملابسي گعدت يمها وهي مغطيه راسها وگتلها
...حنونه شبيج مغطيه راسج
حنين //. راسي يوجعني
...لاتضوجين انا اشتريلج صدريه وقميص
هي شالت الغطا وگالت باستغراب //تشتريلي منيلج ؟
...ها يعني مو راسج يوجعج لان محد جابلج
ضربت على رجليها //اي ناديه شنو احنه وحد ليش محد يجيبلنه شي جديد
ابتسمت بوجهها ...ما عليج وهسه تشوفين تعالي وياي
حنين //وين وين نازله
...امشي وانتي ساكته
چانو يتغدون واحنا لازم ما ناكل وياهم من يكملون نصب النه ماعون تمن وطاسة مرك نزلنه انا سلمت وافراح
باوعت وعكفت حواجبها وگالت
- - ها خير اشو نازلات
جاوبتها ...ماكو شي عمه بس اريد استاذن عمي (هو رفع راسه بدون ما يحچي انا استردفت )عمو اريد اروح
اشتري الحنين صدريه وقميص
افراح ما خلته يحچي گالت //اگلج شنو صار بعينج الملابس الي جبتهن البتي شگد خبيثه وعينج فارغه
جاوبتها ...عمه ليش الغلط حنين العام داومت بصدريتي بس السنه مو مال تداوم بيها بعدين لا انتي ولا بتج
راويتنه الملابس حتى عيني تفرغ
افراح //وليش ما تداوم بصدريتج شنو ما تنعرف
حنين //عمه عتگت
افراح //لا مو لان عتگت لان شفتني جبت البتي ملابس وبعدين (باوعتلي ) انتي ولج منيلج فلوس
تشترين الاختج
...عمه من رحنا بالعطله عمي كرم انطانه الكل وحده خمسه وعشرين وضميناهن
افراح //اي اصعدي جيبيهن والعصر انا اشتريلها
...لاعمه خليها هي تروح تختار الشي الي تريده
هادي گال //اصعدي نزلي الفلوس وام ياسر تروح تشتري الحنين
باوعت واشوف هديل واسيل يباوعلنه بشماته صعدنا وانا حاقده على الكل واكثر شي على سراج الي گلي راح
يتغير كل شي بس اصبري وهاي سنه وهو حتى ما اتصل لكن قررت ما اسكت والي يصير يصير
نزلت انا وحنين وصبينه غدا وگعدنا ناكل بالمطبخ وانطيتها الفلوس الافراح والعصرراحت تجيب ملابس
الحنين الي اشوف بعيونها ترقب وهذا الشي سببه الحرمان
واجت افراح وره المغرب وهي تگول وشمرت علاگه //تعبت ياالله لگيت هذني وطلعتهن چانت صدريه وقميص
لكن من التعبانات كلش يمكن افراح متوسله بابو المحل حتى ينطيهن الها ابلاش من شفتهن گتلها
...عمه شنو ذني
افراح //شنو ما تشوفين هدووم الاختج
......بس عمه ذني تعبانات وما يلبسن لو جايبه من البالات احسن
افراح وگفت واتقربت يمي //انتي هييي شايفتني النهار كله بالسوك ادور بالبالات هذا الموجود وعلى كد فلوسجن
......لا عمه تره ذني ما يلبسن وما اقبل حنين تلبسهن
الكل باوعلي وهي گالت // وانتي منو حتى تقبلين او ما تقبلين
...عمه ما يلبسن حنين ما تلبسهن
بوكتها اجه ياسر وافراح گالت //ليش شناويه تلبسيها الست حنين
......عمه هاي الصدريه مال ابنيه بالابتدائيه شوفيها حتى اقماشها گالب
افراح //قصدج قديمه
...لا عمه مو هذا قصدي بس اكو احسن منها
افراح باستهزاء //لا باالله صايره تعرفين بالموديلات
......عمه ليش هالاستهزاء تره انا بالكليه وقبلها چنت بالمدرسه واشوف البنات شنو يلبسن
الصدريه هاي ما تلبسها حنين چان جبتيلها قميص مثل الي جبتي الاسيل وصدريه زينه
افراح وگفت ولزمتني من صدر الثوب //وتصيحين بعد واگفه وتصيحين سهله انا الج هسه اخليها تلبس ع الموديل
ولزمت الصدريه والقميص وشگتهن وشمرتهن عليه ابوجهي وگالت
هاج خيطيهن ولبسيها الاختج
لزمت ايد حنين الي صارت تبچي وگتلها //لا عمه ذبيهن بالزباله بس مثل ما اشتريتي البناتج چان اشتريتي
للخدامات الي بالبيت
افراح //شوف اللسان شطوله امشي ولج من گدامي لا اطيح حظج وما طول هيج ماكو ملابس وحنين اذا ما
يعجبها تبطل اصلا اسوله السنه سادس ويراد احد يخدمها (وصارن يضحكن هي وبناتها ياسر گال )
كافي شنو هالحچي
طلعنه من المطبخ واحنا مقهورات وهي تحچي وتگول //بت الساقطه تتشرط
صعدنا بقينا بدون عشا حنين تبچي وانا مقهوره واغلط على افراح وعلى هادي واغمض عيوني اشوف سراج
يبتسم لكن هالمره غلطت علي وصرت اسب بمياده رجعت الحنين وگتلها
حنونه انا اشتريلج هالشهر صدريه وشهر الورا اشتريلج قميص انتي داومي بصدريتج القديمه
باوعتلي وگالت //مو الفلوس العندج خلصن منين تشترين
...حنونه من ينطوني كروة السياره ومصرفي من المصرف اشتريلج صدريه
حنين هزت راسها //لا شنو ترحين للكليه تموتين من الجوع والله ولا تفكرين
باوعت وگلت ......تدرين يمكن ابيع النقال الي جابه الي سراج
حنين //لا يمعوده ولا تفكرين باالله احد شافنه وشمدرينه شگد سعره
......اي وما اعرف بيش وشلون بس ما تبقيين بدون ملابس جديده
هي مسحت دموعها //الله كريم ندووش لا تشغلين بالج
ثاني يوم الصبح گعدت سويت ريوك ورحت انظف الحمامات البره شفت ياسر صعد سيارته بعدين نزل اجه وگف
يمي چنت اجلف بالمغسله گلي وهو يباوعلي
صباح الخير
رديت بدون ما اباوعله ... صباح النور
ياسر //ناديه لاتزعلين من امي بس انتي طخيتي وياها
ما جاوبته رحت شغلت الصونده وصرت ارش بالاشجار وانا حانقه على الدنيا كلها كملنا شغل وهمه اجو ع الغدا
واتغدو وكل واحد راح الغرفته ونزلت ويه حنين نتغدا شفت ياسر نزل كملنه غدانا وغسلنه المواعين ورحنا الغرفتنا
بالباب شفت علاگتين كبار مركونات على صفحه
گعدت فتحتهن شفتهن صداري اثنين وقميصين وحذاء وترانشوز حلو كلش
حنين بفرح //ندووش لا تگولين افراح صحى ضميرها وجابتلنه الملابس لو عمج الجلف
......والله ما ادري
حنين //يعني الامير بدل ما يدور على صاحبة الحذاء اجه وجابلي ملابس
ضحكت على كلامها ......هههههههه ولج ما تكبرين
اجتني رساله من ياسر //ها بت عمي الملابس گدن على حنين والترانشوز الج
انا باوعت الحنين گتلها ......الملابس من ياسر
حنين گالت //اي شفته من نزل وبعدين صعد
ا......خلاهم يدخلون الغرفهم وراح جابهن
حنين //اگلج ندووش تتصورين اهله يدرون
......يعني من كل وعقلج افراح تدري بي هيج مشتري ملابس وتقبل انتي شبيج
حنين //چا من تشوفني لابستهن شتگول
...وج راح انگللها بس مو هسه
حنين //ومن تشوفني لابستهن وتسالني
...لا تگولين اي شي خليني انا احچي
حنين //زين
ابداية الاسبوع بدت المدارس وگعدنا من الصبح سويت ريوك وصعدت الحنين وگتلها اتريكي وبدلي وانا هم بدلت
ونزلت قبل حنين وگتلها بس ادك الجرس انزلي همه من گعدو شافوني بالمطبخ وانا محضره الريوك ومبدله لان
منتظره الخط
دكيت الجرس ونزلت حنين والكل اتفاجأ بلبسها افراح خزرتها وگالت
- - شوف هادي شوف بتك اخوك ما ادري منين جايبه هاي الملابس
جاوبتها ......شنو عمه قابل بگناها اصلا الملابس اجنه واحنه گاعدات
افراح //ها وانتن گاعدات
......اي عمه ليش يسوري ما گلج ما هان علي يشوف حنين تبچي وانتي شگيتي صدريتها وقميصها راح جاب
قميصين وصدريتين وحذاء وجنطه وحتى انا جابلي ترانشوز يمكن لو عنده هم جابلي ملابس للكليه
حنين اتقربت وگالت //شكرا ياسر صدك ذووق ويخبلن
الكل سكت انا جاوبت ......عمه اعرف انتي الي گلتي الياسر يجيب الحنين صدريه وقميص لان ما يهون عليح
تشوفيها تبچي وانتي من شگيتي صدريتها اعرف چنتي عصبيه بس انا اعرف بيج شگد گلبج طيب
ورمشت عليه اماني وطلعت وحنين هم طلعت راحت للدوام
وصلت للكليه وانا لابسه نفس ملابسي الي اشترتهن اليه عمه زهراء الي صار اكثر من تلث تشهر وهي ابد ما
مخابرتني انا حچيت وياها يمكن مره وحده لكن شفتها تريد تنهي الاتصال فانا بعد ما حچيت وياها
لازم تعرفون انو عمو سراج يحولي رصيد ابو العشره كل شهر لكن ولا يوم اتصل بيه هاي تقريباسنه
بالكليه اتلاگيت ويه زميلاتي بنفس القسم وبيومها ما شفت ميثاق لان رحنا نسجل على المواد الي لازم نختارهن
شفت لمى وفاطمه ورحنا للكافتريا رغم عدم موافقتي لكن فاطمه اصرت عليه وطلبت گهوه وصرنا نسولف عن
العطله وهنه يعتبن عليه لان ما اتواصل وياهن رغم انا خابرت لمى مرتين وفاطمه مره قبل لا تسافر ويه اهلها التركيا
من طلعنا من الكافتريا صارت عيني بعين ميثاق الي مبين علي چان يدور عليه من شافني وگف وسلم لمى ردت وفاطمه
هم سال لمى
- - اشلونج لمى
- - اهلا استاذ ميثاق اعرفك صديقتنا فاطمه
- - تشرفنا ياانسه
- - فاطمه اهلا
باوعلي وگال //رحت سالت عنج لان جايبلج المقرر الي طلبتي مني
انا بارتباك ......ها ايي
لمى گالت //من رخصتكم ياالله فاطمه
فاطمه بابتسامه //ايي ياالله
ميثاق جر نفس وگلي //وين شگد صار ادور
جاوبته ......مو بين ما اخذت المواد وسجلت
هم صحيح بس ما شفتي شگد متصل
......لا ولا انتبهت اسفه
ما صار شي خلي نگعد
ورحنا گعدنا ع المصطبه ميثاق يباوعلي ويگلي //ناديه مشتاقلج
......اح احم
ميثاق // شبيج ناديه شنو بعدج تخجلين مني تردين هسه اوگف واروح يم ذيج الشجره واصعد والناس عبالهم اتخبلت
واصيح بعلو صوتي ياناس ياعالم احبها الهاي البنيه الي اسمها ناديه احبها واريد اتزوجها لان راح اصير
مجنون بحبها
بقيت مدنگه ما اخفيكم فرحانه ما اعرف لان ميثاق حسسني انو انا بنيه واكو واحد يريد يرتبط بيه
جاوبته وانا گلبي يدك ......الهلدرجه
ميثاق //واكثر احبج بكل لحظه بحياتي انتي حلمي الي ان شالله يتحقق
...بس انت ما تعرف عني شي
ميثاق //وما اريد اعرف لو شنو ما كان انا حبيتج وخلص
...لكن اكو اشياء بحياة الانسان لازم ما يضمها
ميثاق باوعلي وگلي //ناديه انتي مرتبطه
عكفت حواجبي ...شنو قصدك
قصدي انتي هسه بالوقت الحاضر مرتبطه باحد تحبين احد ؟
...شنو هالحچي هذا
ميثاق //ليش زعلتي
...طبعا ازعل شنو مرتبطه او احب بعدين ماكو انسانه شريفه ترتبط بانسان وتحاچي واحد ثاني
ميثاق //خلص ياعمري انتي ما مرتبطه ولا تحبين احد اكيد بس انا بعد شنو ترديني اعرفه عنج
...بس اكو اشياء ضروري تفهمها
هز راسه // لا مو ضروري لان الانسان ما ينعرف من خلال ابو او اخو او حتى عشيرته هاي شكليات الانسان النفسه
هو يبدي وهو يبني مستقبله
......لا شلون يصير
يصير لان هي دورة حياة بعدين شنو يابه نخلصها الانسان والحياة وننسى نفسنا
ابتسمت وهو گال //صدقه مو ابتسامه فعلا بيها كل معاني الحب (باوعلي )اگلج ناديه انا بعد ما اتحمل
لازم اجي اخطبج
انا دنگت وهو گال //السكوت علامة الرضى موافقه انتي بس گولي يمته
...بعد وكت خلي......
قاطعني //شنو بعد وكت ما اگدر اتحمل افتهمتي يوميه احلم بيج خبلتيني بت الاوادم
دنكت ما جاوبته گلي //خلص اتوقعي باي يوم اجي انا واهلي
......لا عفيه خلي هالشهرين اقلها اعرف الماده لاتنسى اريد انجح الاولى
صار وتتدللين بس افهمي انا احبج
ما جاوبته بس ابتسمت
رجعت وره الدوام لگيت حنين جايه قبلي وانا اتعمدت اصعد على كييف لگيتها بالغرفه وقافله الباب عليها دخلت وسلمت
عليها وهي تگلي //خلي انزل اصبلج غدا
...وانتي اتغديتي
لا منتظرتج
...زين انا اغسل واغسل ملابسي وانزل اتغدا
حنين //لا ندووش انا اصعدلج الغدا انتي تعبانه
رحت غسلت رجليه واديه بالسطح وغسلت ملابسي هم بالسطح وشريتهن ونزلت لگيت حنين جايبه النه غدا رغم
قليل بس ما طوول حنين تاكل انا اشبع من يمي من كملنه حنين نزلت وگالت انتي نامي وانا بس اشطف المواعين
اصعد انام شويه
وفعلا بس خليت راسي نمت وگعدت المغرب اتوضيت وصليت ونزلت سلمت على افراح وهديل وسالتها عمه شسوي
عشا هي گالت سوي شوربه العمج وخدري جاي وسوي زلاطه خيار وطماطه لان الشباب يردون اجبان
انا هم سويت العشا وكملته من ردت اصعد افراح گالت طلعيلج جبن واخذيلج كوبين جاي وصمونات واتعشي
انتي واختج
اخذت عشانه وصعدت وگعدنا اتعشينا وانا نزلت المواعين اغسلهن وگلت الحنين انتي نزلي ملابسي
من الحبل وحضري دروسج وانا ارتب المطبخ
ونزلت شطفت المواعين ورتبت البيت واجيت انظف البيت افراح گالت // لا نظفي قبل لا ترحين للكليه حتى يبقى نظيف
بالليل بس سوي العشا وغسلي المواعين وغسلي الگراج بهاي الاوامر الجديده لازم ما انام وره الفجر
وصار هذا روتيني الصبح اگعد انظف واسوي ريوك واروح للدوام وبالليل اسوي العشا واغسل المواعين والطارمه
حنين عليها مواعين الغدا وترتيب المطبخ وغسل الملابس وانا من اجي من الكليه اصعد فوك اشطف ملابسي الي چنت
لابستهن وثاني يوم البس الثانيات الي جابتهن زهراء والي اغسلهن انزلهن من الحبل بالليل
ومشت حياتنا وميثاق يوم عن يوم يسمعني كلام عن الحب ويتمنى نتزوج ونكون اسره
بصراحه هو ولا يوم حاول يتمادى وياي بس من يشوفني گاعده ويه لمى او فاطمه يجي وهنه ينسحبن اما اذا كنا
مجموعه فيوگف على صفحه ودائما كنا نتخابر بالليل وكلامه الي كله حب وهيام وشنو راح يسويلي وشلون راح يعيشني
وطلعت القبولات وبيومها الكل مترقب وانقبلت هديل تربيه وهذا الشي زعل ياسر وهادي الي سمعته يگللها
- - لو ذاب فلوس المدرسين على ناديه چان جابتلي الطبيه بامتياز وانتي خابصه نفسج ادرس وادرس وتالي بالشافعات
هديل //بابا ميه بالميه هاي مو درجاتي
ياسر //اي هاي اعذار الكسالى يعني شمعنى غلطو بدرجاتج
افراح //كافي هذا هو المهم كليه وبعدين لا تقارنون بتي باي وحده
هديل //بابا سجلوني كليه اهليه بيها هواي مجالات
ياسر //وليش بس دفع فلوس ع الفاضي
هادي //هذا هو داومي وشدي حيلج حتى بس تتخرجين تتوظفين
ياسر //بابا شتحچي هي وينها الوظايف
هادي //انا اوظفها بس خلي تشد حيلها
وقدمت تربيه كيميا رغم ياسر گلها ما تنقبلين لكن انقبلت بعدين عرفت انو اولاد جدو جميل متوسطيلها
بطلب من هادي وراحت هديل اتسجل واله ياسر ياخذها انا رحت ويه الخط
وبيومها ما طلعت من القاعه گلت يجوز يجي ميثاق ويحچي وياي ويشوفه ياسر او هديل ولان هديل گالت
الياسرارجع وياك
خابرني ميثاق منتظرني بمكانه المعتاد لكن انا گتله ...ما اگدر لان ابن عمي هو.واخته جايين للكليه
ميثاق //وشنو واذا شافني زميلتي ومعجب بيها واريد ارتبط انا وياها
انا حچيت وگتله ...مي خالف ما اريد احد من اهلي ياخذ خبر بالوقت الحاضر
ميثاق //ناديه ليش
...والله الصراحه يعرفوني جايه ادرس مو
ميثاق //مو شنو ناديه احنا مو زغار ونلعب ونگضي وكت انا رايدج بالحلال
......ان شالله هانت كلها شهر شهرين او
ميثاق //كملي او شنو
ما حچيت هو سالني //ابن عمج شنو يشتغل واخته وين تداوم وشكد جابت معدل وين انقبلت
وانا جاوبته وبيومها كل شويه ودزالي مسج او خابر ومن طلعت من الكليه شفته واگف وهو
يبتسم لي وصادف بطلعتي شفت ياسر وهديل رحت اركب بالخط لكن ياسر گلي
شنو هاي ناديه تعالي اركبي ويانه لاترحين بالخط
......شكرا ياسر ماكو فرق كلها سيارات
صحيح بس ما يصير بنفس البيت وحده تجي وياي والثانيه بالخط ياالله تعالي
راح يمشي ركبت وانا اشوف ميثاق شلون يباوعلي والعصبيه مبينه على وجهه الطريق كله وياسر يسالني
على الاساتذه ومنو بقى ومنو انتقل واشوف هديل تريد تنفجر من القهر وبس رجعت ميثاق خبصني اتصالات
ومسجات وليش ركبتي وياهم
وشنو مو مأجره وانا اغار
نزلت واتلگتنا افراح الي صار وجهه بوجهي واتبدلت ابتسامتها الى تجهم ومن دخلنه سلمنه لان هادي موجود وهو
يگول الهديل // هلا بحضرة مهندسة الكيميا وان شالله معيده
هي راحت وباسته واتگله //ان شالله بابا
ياسر گال //ياهيه المعيده هديل (وياشر عليها ويضحك ). سويتوها مهندسه منين كلها مدرسه وخلف الله على يوسف
ابن خالك دخلها هيج قسم وتگولون معيده هههههه والله ضحكت
هادي //ليش تضحك لان گلت معيده
ياسر //بابا الي تستحق لقب معيده وراح تصير ان شالله هي ناديه الي نجحت الاولى على قسمها بدون منافس
باوعتله ...لا ياسر مو الهلدرجه
ياسر //واكثر ما شاء الله بس سالت عنج بالكليه الاساتذه والدكاتره كلهم اشادو بيج وبتفوقج والاستاذات گالن ماشاء
الله ادب وجمال واناقه بعدين تعاي اكلج (واشرلي بايده )انتي ليش ناجحه الاولى على القسم مالتج وما گلتي
جاوبته ...لان محد سالني وانتو هم چنتو ملتهيين بهدوله
ياسر سأل هادي //ها بابا منو تستحق لقب معيده واستاذه
افراح بنتر//دي كافي تره انخبصنا روح غير ملابسك وانزل اتغدا
وصعد ياسر وهو يبتسم وانا همه صعدت ورا بشويه لگيت حنين متمدده من شافتني اجيت گعدت
وهي تگلي //هلو ندووش
جاوبتها وانا اتثاوب ...... هلا حنونه
تعبانه
......اي والله كلش
بس اشوف بعيونج فرح
......هسه ما بيه اسولف لان تدرين ما نايمه
الله يساعدج زين انا نازله اجيب النه غدا بين ما تغيرين ملابسج
......اي انا بسرعه راح ابدل واشطف هدومي واجي اكل حتى انام
نزعت ملابسي ولبست دشداشه وبجامه واخذت تنورتي وقميصي والشال رحت شطفتهن وشريتهن ونزلت لكيت
حنين جايبه الغدا وگعدنا نتغدا وحنين تسالني
شفتي هديل بالكليه
......لا لان اليوم عدنا لوود بالمحاضرات بس اجيت وياهم
حنين //اي شفتها تتغدا هي وياسر بس اويلي افراح گاعده وبيدها رشاشه تريد تكتل كل واحد گدامها ما اعرف شبيها
ضحكت وگتلها ......انا الاعرف شبيها
حنين باوعتلي وگالت //تعرفين وساكته الله عليج گليلي
انا خليت الخاشوگه بالصينيه وگتلها ......حنونه بعدين ما بيه افك عيوني
ونمت ما حسيت اله على حنين تندهني //اگعدي ندووش صار دنيا ليل وانتي عبالك ميته
فتحت عيوني واتمغطت باوعت الساعة النقال ......حييل هلگد نمت
:اي وافراح تگلي روحي گعدي المسعده خلي تسوي عشا
......اي هم صحيح هسه اتوضا واصلي
ونزلت للمغسله اتوضيت وصليت بسرعه گلت الحنين
......راح انزل اسوي عشا وانتي اصعدي جيبي ملابسي من فوك
ونزلت لگيت افراح گاعده بالصاله وبيدها الريمونت باوعتلي وگالت
شنو عيني هلگد تنامين ما تگولين وراي شغل عمل
......عمه تعبانه محاضرات وطريق واگعد من نص الليل
افراح //دي كافي كافي ياالله سوي شوربه الهادي وگلي باذنجان وبتيته وطماطه
...صاررعمه
افراح //بسرعه اتحركي جيبيلي ماي حار وخلي بي ملح وجيبي الانجانه رجليه توجعني
باوعت الها وگلت ......تتدللين عمه
ورحت خليت ماي من الكيزر وخليت فوكه ملح وجبته خليته يمها مدت رجليها ورحت للمطبخ وصرت احضر
بالعشا وكملت وردت اصعد هي گالت
— فوريلي حليب واخذيلج عشا انتي واختج ومن تكملين انزلي للبيت
فورت حليب وخدرت جاي واخذتلي عشا انا وحنين طبعا من نخلي الاكل دائما افراح تراقبنا تشوفنا خاف نخلي
زايد حتى تفشلنه سوتها شكم مره ويه حنيين المهم صعدت ودخلت شفت حنين گاعده صافنه بالغرفه وملابسي
بايدها سالتها ... شبيج حنين
هي بنتر وترجف // هاج شوفي ملابسج شوفي شنو بيهن
باوعت للملابس لكيت مصبوب عليهن كلورالتنوره والقميص والشال
حنين گالت// شوفيهن ناديه الكلور ما مخلوط بماي لا مصبوب عليهن وهنه مشرورات ع الحبل
اخذتهن وشميتهن لگيت بيهن ريحة الكلور حتى بعدهن مبللات بي انقهرت لان ما عندي بعد بس تنوره وقميص
ضليت صافنه واتنفس حييل واحس تطلع من عيوني نار وانا محتاره شنو اسوي معقوله السنه كلها اخلصها
بتنوره وحده وقميص ما حسيت اله اخذتهن ونزلت وانا الدمعه بعيني لگيت افراح گاعده هي
وهديل وهادي بالصالصاله يسولفون گتلها بحرگه
......عمه شوفي شنو صاير بملابسي
هي باوعت بلا مبالاة وهزت راسها //ايي شصاير
......عمه ما اعرف منو جايب كلور وشامره على ملابسي مال الكليه
افراح //|ههههههههه خاف انا لو هديل لان ميتات على تواميل زهراء مال العام شوفي انتي ثوله وغسلتيهن بكلور
جاوبتها بعبره ......لا عمه الكلور مشمور فوگهن حتى بعده ما ناشف هاج شميهن
افراح بنتر //وشسويلج اروح ادكن البيبان منو ذاب كلور على هدومج
......لا عمه هنه فوك السطح منو ذب عليهن الكلور
هي وگفت وراحت للمطبخ وگالت //تعاي جيبيهن يفيدن للمسح
دخلت وراها للمطبخ وانا مقهوره ما احس اله لزمتني من ايدي وهي تگلي //شنو نازله حاميه عبالج هادي ايشكيج اذا تردين
تعرفين من ذب الكلور على ملابسج خلي اگلج (انا ) /ودكت على صدرها /حتى بعد ما تخلين راسج براسي
حاولت احرر ايدي گتلها ......ليش عمه مو حرام عليج
خلت اصبعها على حلگها //انچبي حقيره تعرفين الحرام ملتهيات انتي واختج اتضحكن على ابني ويشتري صداري
وقمصان افوتها الج بت الگ...
......عمه ياسر اشتراهن الحنين من شافج شگكتي ملابسها احنا ما گلناله
افراح //واذا ما تمشين عدل ابطلج وابطل اختج تره مخليتج حتى الناس من تحچي يكولون عفيه بافراح بت اصول
او وصلت البنات ما ميته عليچن وهاي جرت اذن الج (ولوت اذني حييل )والاختج حتى شنو اجيب الچن تلبسن
وما تعيبن مو عبالج دخلتي هندسه تخلين راسج براسي وراس بناتي لا هاي بعيده عنج
وياالله اطلعي تره ما الي خلك
درت وجهي اريد اطلع من المطبخ واسمعها تحچي وتگول
—- جايتني بت مياده الشريفه تعلمني الحلال من الحرام
صعدت وانا ابدي احرك البيت واحرك افراح وهادي بوكتها ما عرفت شنو اسوي بوكتها صرت ابچي بصوت
لزمت التلفون وخابرت زهراء هي گالت //الو ندووش هل... قاطعتها وانا انهديت بيها وگتلها
......انتي وين ليش ما تسالين علينه مو انتي وعدتي بيبي منيره تديرين بالج علينه وين كلامج صار شگد ما سائله
زهراء //حبيبتي ناديه ليش تبچيين شكو
......ابچي تساليني ليش ابجي خلي اگلج ابجي من ظلم البشر ابچي من الضيم والفقر والقهر
هي حاولت تمتص غضبي //. على كيفج ياروحي اخذي نفس شهيق وزفير وكل شي راح ينحل
.... كافي مليت من احچي وترديني اصبري كل شي راح يتغير بس يراد صبر عمه زهراء حتى الصبر مل من عدنا
— ناديه انتي مو خابرتيني اكيد صايره وياچ مشكله سولفيلي واكيد نلگالها حل سولفيلي عمه حبيبتي شصاير
وسولفت الها كل شي سوته افراح بعدين گتلها
......خلص راح اكتل روحي وقبلها اكتل اختي ونرتاح لان بعد ملينه كافي بعد ما نكدر نتحمل وهم خلي اكلج
محد يثنيني عن قراري لا كلامج ولا وعود سراج
زهراء باستعطاف وخوف // لا حبيبتي ابد ابد لا تتهورين انا اوعدج خلال شهر راح كل شي يتغير وراح تشوفين
بنيتي ياروحي شهر واحد شهر بس وداعة بنتي وروح عباس ومنيره ( حسيتها حجت بعبره )
......عمه زهراء والله تعبنا كافي بعد ما بقت عندي طاقه
زهراء //ندووش انتي اتحملي ولا تخافين وج انتي السباعيه تخوفج وحده مثل افريحه
بقيت اشهك وابچي وزهراء گالت //ياالله ندووش كافي واتعشي لا تهتمين باجر البسي واطلعي روحي الكليتج
وكل شي راح يتغير
...والله ثبرتيني بس احچي لو اشكي اصبري وراح كل شي يتغير زين خلي نشوف انتي حلفتي ابتج وبروح ابوي وبيبي
وانا اگلج وروحهم اذا خلال هالشهر ما تسوولي چاره انا واختي راح اكتل نفسي واكتل اختي وخطيتنا برگبتج انتي وذاك
الي ما اعرف وينه
سديته واباوع الحنين الي تبچي وتمسح دموعها باديها عبالك طفله جاهله لزمتها وگلت
......لا تبچيين حنونه وتعالي نتعشى
ندووش البسي قميصي الجابه ياسر
هزيت راسي ...اي هو راح البسه من احتاج اغير وكافي تعالي نتعشى على عناد حيزبونه
وتعشينه انا وحنيين وخليتها تقرا ونزلت غسلت المواعين ورتبت المطبخ ورحت للصاله نظفتها وصعدت وانا
اشوف افراح شلون تباوعلي بتشفي
ثاني يوم داومت ووصرت من ارجع اغسل ملابسي وابقى انكت بيهن واجيبهن اشرهن بالغرفه على مسمار دكيته
وحنين تغسل ملابسها بالليل وتلبسهن حتى بدون كوي
ميثاق دائما اشوفه ويخابرني وگلي اتحضري بعطلة نص السنه اخطبج ونعقد حتى بعد ما تگليلي ما اطلع واخاف احد
يشوفني وللعلم تقريبا الكليه كلها تعرف انا اريدج واريد اتقدم اخطبج وبعد لازم تمشين وياي عادي
جاوبته ...لا شنو امشي وياك لا لا يمكن
هو صار يضحك //زين ومن ننخطب
......لا بذيج الساعه امشي وما يهمني
- - هذا هو باسرع وكت راح ننخطب
صرنا نمشي انا ولمى ومرات تجي فاطمه ويجي ميثاق ويانه ونگعد بالكافتريا هو يعزمنا ونصير اربعتنا نتناقش
بامور عامه لكن هو يبدي يتكلم عني وعن حبه الي گدام صديقاتي الي يتسحبن ومره دخلنه للكافتريا انا ولمى
وفاطمه وشفنا مجموعه من الطلاب والطالبات واگفات وسوالف وضحك وهنا شفت هديل صارت عيني
بعينها اتقربت وابتسمت وسلمت ......هلو هدوله
جاوبتني بتكبر وهيه رافعه حواجبها // هلاوو ناديه اشو اهنا...
عرفت الوين تريد توصل جاوبتها ......اجيت ويه صديقاتي بس انتي شعجب عايفه الكافتريا مالتكم وجايه لهنا
لمى //ما عرفتينا ناديه
ابتسمت //هديل بت عمي
لمى //اهلا تشرفنا
هديل //هلاو حبيبتي
فاطمه // ناديه يعني هي بغير قسم
انا جاوبتها ...لا هي بكليه تربيه
لمى //وجايه للهندسه اكيد حتى تشوفج
هديل بدلال //لا جايه على مود صديقاتي
فاطمه //ياالله خلي ناخذ العصير ونروح لا ننطرد خارج القاعه
وطلعنا انا وفاطمه ولمى گالت ما الي خلك ادخل للمحاضره جوعانه وتعبانه
ورحنا انا وفاطمه للمحاضره وبيومها رجعت للبيت وميثاق راسلني واتصل بيه بالليل هو يحچي ويسولف عن
حياتنا وبيتنا وگلي //بمعلومج اسبوع الجاي حضري نفسج ننزل نختار الحلقات
......يا حلقات شنو من يمته صرت خطيبتك
ميثاق // انتي خطيبتي وحبيبتي وزوجتي هانت كلها شهر واجيج على حصان ابيض واخذج
انا بابتسامه ... ... تحچي صدك ؟
هو جر نفس //. اي ياروحي ليش عندج شك بكلامي
... ... اكيد لا
ميثاق // ناديه اتحبيني
... ... ياالله ميثاق عندي دراسه
ميثاق // اموت على الي يخجل هانت كلها اسبوع عود واشردي من اسالج
بقيت احلم وثاني يوم داومت لكن ما شفت ميثاق بالليل خابرته اول اتصالين
ما رد ثالث اتصال رد عليه وگلي //بعدين انا اتصل بيج مشغول
بقيت منتظره لكن هو ما اتصل الصبح داومت ما شفته رحت سالت عنه گلولي مجاز دزيتله رساله ما جاوبني عليها
ثاني يوم الصبح كتبلي
گلي //تعبان ومن اصير زين اتواصل وياج لا يظل بالج ما اگدر ارد عليچ
صرت من امشي بالكليه الطلاب يباعولي وحتى البنات يباعلي والشي الي لفت انتباهي لمى صديقتي من اطلع ما تجي
وياي ولا تگعد يمي ما اعرف شبيها وحتى من احچي وياها تجاوبني على گد السؤال طلعنا من المحاضره ولمى بقت
گتلها ...شنو اليوم ما تطلعين
هي ما جاوبتني راحت بدون ما تحچي وياي اجيت يم فاطمه سالتها
...فاطمه شبيها لمى
باوعتلي وگالت //ناديه انتي صحيح امج قاتله ابوج وانحكمت بالاعدام وعدموها وره ما جابت ولد من صديقها
بقيت صافنه هي گالت //تره الكليه كلها عرفت بالموضوع والكل متفاجئ
انا ما جاوبتها هي طلعت وانا بقيت بالقاعه لمن ما اتقرب مني ممثل المرحله وگلي
- - ناديه رايدينج بالعماده
عرفت استدعاىي بي نهاية وجودي بالكليه ومن وصلت الشي الي شفته وسمعته سووا مني ناديه ثانيه
///////////////////////////////////////////////يتبع
شنو رايكم بالبارت وشنو توقعاتكم ؟!
💖حابه اقرا ارؤوكم
احبكم
////|||||||///////||
ناديه
من اجه ممثل المرحله واتقرب مني وانا چنت صافنه بكلام فاطمه گلي
- - ناديه طالبينج بالعماده
عرفت بوقتها انو اكيد قررو فصلي
حسيت الدنيا صارت سوده وزغيرره كلللش
اتنفست وحچييت ويه نفسي ... هذا هو الي يصير خلي يصير
اخذت جنطتي والملازم وصرت امشي باتجاه العماده المسافه شويه بعيده صرت افكر
... ... يعني شنو هذوله الطلاب والطالبات جاي يباعولي لان امي مو زينه
... ... وهذني الطالبات يباوعلي ويضحكن لان عبالهن انا بت ناس وبعدين عرفن باامي كاتله ابوي ومعدومه
... ... وهذوله الشباب جاي يصنفون اكيد عليه اي اكيد
... ... زين ياربي وين ميثاق وين ليش ما يرد عليه يجوز سمع حاله من حال السمعواي اكيد عرف
شنو يعني انا شكم مره گتله ما افيدك ظروفي تعبانه انت ما سائل عني وهو يگلي
ما يهمني انا حبيتج الج وبس
... ... صحيح كل واحد من حقه يزعل عليه بس اذا كانو سائليني وانا مچذبه انا اصلا محد سالني لان الكل يعرف
بيه يتيمه وگاعده ابيت عمي
... ... وهسه دزو عليه بالعماده شنو يردون ينطوني قرار فصلي لان امي معدومه وابوي مقتول
هزيت راسي لا اراديا ... .... لا ما اتصور شنو ماكو بالكليه وحده او واحد ابو اخو مسجون
... ... لا ناديه اكو بس مو امها قاتله ابوها هي وصديقها
صارن دموعي يجرن لا اراديا ... ... زين شنو اگللهم اذا سالوني انكر
... ... اي انكر اگللهم انا فتحت عيني على بيبي ما اتذكر شنو صار
... ... اي لازم احاول ابقى بالكليه لازم احصل على شهاده وما ابقى الافراح وبناتها خدامه انا واختي
وصلت وصرت اقرا آيات قرانيه لان انا ابد ولا يوم واصله للعماده دخلت سالني موظف گاعد وره ميز
- - اتفضلي شتردين
حاولت اجر نفس وما ابين خوفي وارتباكي گتله ......دازين عليه ممثل المرحله خبرني
شنو اسمج
انطيته اسمي وراح شويه باوعلي گلي// اتفضلي
اشر على غرفه مكتوب عليها معاون العميد دگيت الباب ودخلت وانا ادعي واستغيث شفت غرفه واسعه بيها مكتب
ورجال گاعد وره المكتب وعلى القنفه الي على يمينه گاعد رجال ثاني لابس قاط وگدامه جنطه اتقدمت خطوتين گلت
......السلام عليكم
همه ردو //عليكم السلام
معاون العميد گلي //انتي ناديه عباس خليل
هزيت راسي وگلبي يدك الف بالثانيه ......نعم دكتور
هو باوع للرجال وگلي //تعالي بابا اگعدي شبيج خايفه
اتشجعت وگتله ...لا دكتور بس اتفاجات بطلبكم
هو گلي //الاستاذ اهنا ( اشر على الگاعد ع القنفه ) حاب يتكلم وياج واحنه عدنا خلفيه عن الموضوع
وگف وگله //راح اتركم استاذ
الرجال رد // شكرا جزيلا ممنون منكم
وطلع خله الباب مردود الرجال باوعلي وانا هم شفته يجي عمره تقريبا بنهاية الاربعينات باوعلي وگلي
— استريحي ست ناديه
كانت نبرته هادئه جدا حسستني بالاطمئنان بلعت ريگي وگعدت مقابيله وهو گلي
— اسف اجيت لهنا وسببت الج ازعاج
بقيت ساكته وافرك باديناتي ما اعرف شرد علي لان بالاساس انا ما اعرفه وكانه قرا افكاري گلي
— اسف مره ثانيه المفروض اقدملج نفسي انا الاستاذ علي عبد الصمد المحامي
من سمعت محامي ما اعرف اشو خفت او گلبي رجف هو گلي //ست ناديه انا جاي ...
قاطعته ......استاذ والله احنه كل شي ما مسويات وين تريد تاخذنه
هو باوعلي باستغراب وگلي //ارجوج تهدأين وتسمعيني شنو اخذكم والوين انا ما فاهم اي شي
من الحضرتج تگولينه
من سمعت استغرابه سكتت ما جاوبت هو گلي
— ست ناديه انا المحامي الي خلتني المرحومه منيره حتى من تكبرن اسلمكم انتي واختج حلالكم
انا بلعت ريگي وگلبي هالمره راد يطلع من صدري ما گدرت احچي هو فتح بطل الماي وقدمه الي وگلي
—. هاچ بنتي اشربي ماي واهدي وارجو منج ان تسمعيني وتفهمين انا لويش جاي
انا اخذت البطل وشربت ماي يمكن نص البطل لان احس مو بس ريگي يبس حتى گلبي هو كمل كلامه
— ست ناديه انتي الج او بالاحرى انتي واختج الكم اموال واملاك لازم اسلمهن الج انتي وحنين وبما انه انتي بلغتي
السن القانونيه وحنين همه اهنا اجه دوري لازم اسلمج كل شي
— بالحقيقه انسه ناديه انا وقفت راتبج التقاعدي انتي واختج اعتبارا من هالشهر لان مثل ما تعرفين
عمج كان يقبضه وهم وقفت الاجار مال البيوت بقى بس المحل هذا انتي الي توقفينه
انا ما ادري شنو صار بيه لان بصراحه متفاجئه من الي سمعته باوعت وحاولت اهدا وسالته
... .... استاذ ممكن اتفهمني عن شنو تحچي ياراتب ويا محل يمكن تكون غلطان
هو ابتسم وجر نفس //ست ناديه انا من خلتني المرحومه محامي خلتني بس حتى اسوي الشغلات القانونيه لكن
بالحقيقه كل شي بيد الوكيل
... ... استاذ يمكن غلطان لان اذا على السن القانوني فانا قبل سنتين او اقل بلغت السن القانوني ليش هسه
جاي وبهذا الوقت
المحامي // بصراحه الوكيل الي خلته المرحومه منيره هو الي ما قبل ابلش بشغلي قبل سنتين او اقل شويه
... اي وكيل واي املاك وليش هسه جاي ؟
هو حمحم //افضل تسالينه
...اسال منو استاذ ؟
المحامي //الوكيل على املاكج انتي واختج
...ومنو هو
المحامي //بصراحه هو ما قبل اگول على اسمه وگلي لا تستعجل راح يعرفوني
...وهسه استاذ
المحامي //هسه يابنتي لازم تجيين وياي للمحكمه تستلمين املاكج مني
صار گلبي يدك اكثر ...زين استاذ ممكن سؤال
المحامي //اي اتفضلي
...انت تگول بيبي الله يرحمها خلتك محامي
المحامي //اي نعم وهذا التوكيل
...زين طيلة هاي السنين وانت لازم تاخذ راتب مو صحيح منو چان يدفعلك الراتب
المحامي //كل راس شهر استلم اتعابي من الوكيل زايد مو ناقص ا
...زين استاذ عمو هادي الي عايشه ابيته يعرفك
المحامي //وليش ما گلتي هو الوكيل
......مستحيل چان گتلي او هو بلغني
المحامي //صحيح كلامج وعمج ما يعرفني ولا ملتقي بيه اصلا ما يعرفني ولان بيبيتج سوت بيع وشرا
جاوبته باستغراب ...بيع وشرا شنو استاذ ؟
المحامي //ها بابا المرحومه منيره باعتج بيتها الي چنتي انتي واختج گاعدات بي الج انتي بس
سالته ...البيت ؟
هز راسه // اي بيت منيره
......اليه انا (ااشر على نفسي )
نعم الج ليش مستغربه ؟!
سالته بدون ما ارد على سؤاله //وبعد شنو گلت اقصد عن باقي الورث
المحامي //بعد راتب ابوج التقاعدي واجار بيت ابوج والمحل
......ذني كلهن النه انا واختي
المحامي //اي نعم ما عدا بيت منيره الج ابحدج
دنگت لان انا ما مستوعبه الي سمعته الرجال گلي //هسه انتي بايدج ترحين وياي وتستلمين املاكج انتي واختج
باوعتله وهزيت راسي وگتله //عمو انطيني مهله افكر
ابتسم // تمام اتفضلي هاي بطاقتي بيها رقمي وانا حاضر الاي سؤال او مشوره
......شكرا الك
المحامي وگف واخذ جنطته وكانما اتذكر شي //بس ملاحظه اذا تسمحيين (ما خلاني ارد )
- - انتي ياست ناديه انتي واختج مو فقيرات حتى الناس تعطف عليچن هذا الي انتن عايشات بي
طوول السنين من لمن اتوفه ابوج وبعده بيبيتج كله من ورث ابوچن
يعني محد صاحب فضل عليچن بس الرجل الي وكلته المرحومه هو الي ما يقبل اطالب هادي بفلس
وبنفس الوقت هو الي يدفعلي راتبي
... استاذ ليش تخليني محتاره فهمني منو هو
- - اكيد هو راح يجي ويعرفج عن نفسه هسه اهم شي عندي لازم اسلمج املاكج
هزيت راسي گتله ......شگد يسوى بيت بيبي
المحامي //قصدج بيتج اسال وارجع الج خبر بس عندي طلب زغير يمج
اتمنى بابا ما تگولين على زيارتي الى ان تستلمين كافة حقج وبشكل قانوني وانا حاضر الكل شي رقمي يمج
اي استفسار اي مشكله تواجهج حتى لو زغيره لا تعتبريني المحامي مالتكم لا اعتبريني مثل ابوج
لان انا على معرفه بكل تفاصيل حياتج من وانتي زغيره
اتشكرته وحبيت منه كلمة مثل ابوج الي عمري ما سمعتها من عمي اخو ابوي
كان المحامي انسان غايه بالثقافه والرزانه واتفقنا اخابره حتى اشوف شنو راح اسوي بعد ان عرض عليه
يوصلني لكن انا ما وافقت الرجال راح وانا هم طلعت وبوكتها صرت بغير عالم بعدني اي شي ما مستوعبته
رحت امشي وكانما انا منومه مغناطيس امشي وانا بعيده عن كل شي عن الجامعه والطلبه بوكتها منتهي الدوام
رحت اتمشى صوب الخط ركبت وانا مو ويه البنات الي يسولفن والي يضحكن والي يتشاقن
چنت مذهوله بكل معنى الكلمه كعدت بالسياره صافنه بدون تفكير اسمع البنات وهنه يتشاقن واشوف الناس
الي جاي تمشي بالشارع وانا كانما من غير كوكب
وصلت للبيت دخلت وره هديل مباشرة هالمره بدون ما اسلم وما اهتميت
منو موجود او منو گاعد وصلت اتلگتني حنين
وهي تگلي //هلو ندووش جوعانه بين ما تبدلين وتشطفين ملابسج اصعدلج اكل
انا ما جاوبتها صعدت للغرفه اتمددت بملابسي اجت حنين واتقربت مني وهي تگلي
ندووش شبيج حبيبتي صاير وياج شي ،
انتبهت الها وانا اشوف الخوف بعيونها جاوبتها وانا متمدده ... ... لا تخافين حنونه ما بيه شي اريد انام
- - اتغدي ونامي
......لا اليوم ما بيه افتح عيوني روحي انتي اتغدي وخليني انام
راحت طلعت ملابس وگالت //زين هاج حبيبتي هاي الدشداشه وانطيني ملابسج اشطفهن
كعدت غيرت ملابسي الي خذتهن حنين وراحت وانا بقيت افكر واحچي ويه نفسي
...يعني معقوله انا راح يصير عندي فلوس وليش هسه بهالوكت وين چان المحامي اجه بهذا الوكت والتوقيت
...يمكن الله سبحانه وتعالى ودا بهالوكت بس حتى التهي من الي صار بالكليه
...شنو تلتهين ناديه
...اي اقصد الي سمعته من فاطمه والي كان طلقه اجتني تايهه وبوسط گلبي
اتحسرت ونمت گعدت على حركة ايد حنين وهي تنده بيه //ياالله ندووش اگعدي صلي
اتثاوبت وهزيت راسي رحت اتوضيت وصليت ونزلت شفت افراح وبناتها گاعدات مبدلات انا بدون ما اسلم سالتها
...شنو اسوي عشا
هي باوعتلي وگالت// سويلج انتي واختج راح نطلع نتعشى بره
...براحتج عمه
افراح گاعده ع القنفه وهي تهز برجلها //طلعي طماطه وگلي
...اي انشالله
خليت القوري على النار وخدرت الچاي ما طلعت طماطه لان ما بيه اسوي اي شي او مالي خلك
صبيت كوبين حليب وچاي واخذت صمونتين وصعدت
حنين شافتني بسرعه صعدت سالتني //شعجب اليوم عشا افراح خفيف !!
......لا هاي بس الي والج لان افراح وعصابتها راح يتعشون بره
حنين //راح يطلعون
...اي
حنين تتحسر //زين ليش ولا مره اخذونه وياهم ليش احنه وحد شراح نخسرهم
باوعتلها وحچيت ......نخسرهم هوااي هوااي حنين
شفتها انقهرت وهي تاكل بالصمونه وتشرب الحليب اتقربت يمها وحاچيتها وانا اضحك
...تخسى افراح وبناتها ورجلها احسن مطعم ترحيله
حنين بحسره //اي اعرف بالاحلام لمن يلگاني الامير لو يجي صديق ابوي الهندي وينطينه من منجم الذهب مالته
ابتسمت. ... ... لا حنونه لا هاي ولا هاي بس اصبري
حنين //اكيد يعني اصبر اصلا انا وياج عايشات وعدنا اخت ثالثه عايشه ويانه اسمها اصبري
ضحكت على حنين الي اشوفها مهضومه واخذت الصحون ونزلت شطفتهن ورجعت صعدت گالت //رايحين
حاچيت حنين ......حنونه ما طول ما بقى احد جوه انزلي باعي ع التلفزيون
حنين //مو خاف تجي افراح تساله منو فتحك
انا بضحك ...دا انزلي حبيبتي ولا تضوجين طز بكل شي
وانتي
...لا عندي دراسه وانتي شويه وصعدي لا تجي افراح وتسويلها مقاله
حنين //ندووش شبيج
...ما بيه تعبانه وباچر عندي امتحان
حنين //زين اقري وانا نازله
طلعت حنين نزلت وانا قفلت الباب واتصلت بالمحامي
الو
...مرحبا استاذ انا ناديه
اهلا وسهلا
...استاذ يمته تحب نروح للمحكمه
يمته ما تردين لكن اهم شي تكون حنين وياج والمستمسكات الاصليه وياج
...ان شالله باچر فاضي
المحامي //اكيد ست ناديه وين تحبين نلتقي
...استاذ انت تندل بيتنا اقصد بيت عمي
- - اي اندله اكيد
...زين لا
المحامي //خير بابا ليش خايفه
...انت گلت لازم حنين تكون ويانه
- - طبعا لازم تكون موجوده
...خلص انا الصبح ارووح اطلب اجازه الحنين بس قبلها اريد اشوفك عندي اشياء حابه استفسر بيها
المحامي // مثل ما تحبين صدك ست ناديه عرفت بيت بيبيتج اقصد بيتج شگد يسوى
تستمر القصة أدناه
...شگد استاذ
تقريبا 600 /650 اذا مو اكثر
سالته ......استاذ 650 شنو
المحامي // 650 مليون
شهگت ......مليون
المحامي //اي نعم واذا يبقى هيج والسوك يزحف علي يوصل حتى مليار ها وحتى بيت ابوج هم يسوى لكن مو مثل بيتج
......زين استاذ الي اريده منك هذا الشي ما يطلع بيناتنا احنا الاثنيين
- - اكيد طبعا بدون ما توصيين
...تسلم شكرا جزيلا باچر ان شاالله من اطلع نلتقي يم حسينية ال ...الساعه بثمانيه اله ربع
المحامي // ليش من وكت
... ... استاذ مو اتفقنا نكمل الاجراءات بدون محد يكون عنده علم
المحامي //. اي صحيح
... ... اذن استاذ لازم من وكت نتلاگى
المحامي // تمام مع السلامه
جريت نفس وانا الم بحلگي واعض عضات متقاربه على شفتي الجوه وانا افكر
... ... معقوله راح الزم فلوس بايدي فلوس مو عطيه اباوع الايدهم يمته ينطوني
نفخت واتذكرت كلام فاطمه اتصلت بيها
بالبدايه ما ردت لكن بعدين جاوبتني
الو
...الو فاطمه سامحيني اتصلت بهالوكت
ردت بثگل //لا عادي اتفضلي
......فاطمه اريد اسالج
العفو ناديه بس انا مشغوله هسه
......بس دقيقتين ما اخذ اكثر
فاطمه //اي اسمعج
......منين عرفتوا قصة امي
فاطمه ردت سؤالي بسؤال //ناديه هي صدك لو فبركه ؟
......جاوبيني وانا اجاوبج
فاطمه //لمن چنا نمشي وانتي شفتي بت عمج وسلمتي عليها ولمى بوكتها گالت راسي يوجعني وبقت
......اي فاطمه
فاطمه //الي صار چان ولد اسمه غياث گلها صدك هاي البنيه بت عمج هي گالت اي وياريتها ما كانت
غياث بتعجب //ليش خوش ابنيه الكليه تحلف بشرفها وحتى استاذ ميثاق يريد يتقدم الخطبتها وهواي ناس اتمنوها
هديل //ياا ما نعرف بهذا الشي لان مستحييل يصير
غياث //وليش ما يصير اكو مانع
ابنيه اسمها حوراء گالت //مبين هواي تكرهيها البت عمج
هديل //. اي مو بس انا اكرهها كلنه بالبيت نكرهها وما نطيقها
لمى //تكرهونها ليش ناديه تنكره بالعكس خوش بنيه حبابه
هديل //اي يتهيأ الكم بس الحقيقه مره
غياث باستهزاء //. الحقيقه شنو فلم هندي
واهنا اتجمعواكثر الطلاب اتحسرت هديل وگالت // واكثر گول فلم رعب هاي الي شفتوها والي تگولون
عليها مؤدبه امها صادقت واحد وهي وصديقها كتلوالعمي وهو بعز شبابه وامي وابوي ما قبلو يتركوهن
جابوهن عدنا وربوهن رغم مشكوك بنسبها
حوراء گالت //استغفري ربج شهالكلام
هديل //استغفر الله ما مچذبه اتصورو هي امها من لزموها چانت حامل واعترفت بلسانها انو الي شايلته ابطنها
مو ابن عمي من صديقها وبمجرد ما جابته اخذو اهل صديقها وهي عدموها
حوراء //بس اكيد ابوج اخذ البنات لان يعرف هنه بنات اخو
هديل //لا مو صحيح بس لان مسجلات باسم عمي اتصورو ابد ولا بيوم سمعت ابوي يگول الوحده من عدهن
عمو لو بابا عايشات ويانه على اعصابه بس لان يخاف من الله وشوف شلون وصلهن
وامي ابد ما تفرق بيناتنا تگول خطيه ال الله
من سمعت كلام فاطمه انذهلت يعني هديل سودت صفحتي بالكليه فاطمه حاچتني گالت
—— ها ناديه بعد عندج شي
جريت نفس وگتلها ......لا ما عندي شي فاطمه شغله وحده هديل نست تگولها واريدج تعرفيها
فاطمه //شنو هي
