رواية القلب وما يريد ( أرض الانتقام ) الفصل الخامس والثلاثون
بروج : بتقول مين اللي عمل حادثه
الغفير : منا قولتلك يا ست الكل جسور بيه
بروج بخوف : جراله حاجه
الغفير : والله معرفش.. بس الدنيا مقلوبه بره
بروج دخلت القصر جري : يا اسلاااااااااااااام
راحت بروج بيت ولاد فارس هي واسلام
اول ما دخلت البيت لاقت حسناء بتعيط
بروج : ماله جراله حاجه ؟!
حسناء عيطت وسكتت
بروج بعصبيه : ااااانطقي
شاورت علي مدخل البيت : هو جوا في اوضته
بروج دخلت بسرعه لاقت امه قاعده وبتعيط وصباح قاعده تواسيها... بروج حست بدوخه بس اتماسكت وطلعت عند اوضته لاقت عاصي واقف بره الاوضه...
بروج بقلق : هو كويس صح!!
عاصي فرك جبينه وسكت...... اعصابها مقدرتش تستحمل تكتر من كده .... فتحت الباب ودخلت.
. اسلام جه يدخل فقام عاصي قافل الباب
اسلام : هدخل
عاصي : مينفعش... احنا عايزين نصالحهم
اسلام : تقصد ان دي لعبه
عاصي : تعالي اشرب معايا شاي واسكت
بروج دخل لاقت جسور راقد وتغطي حتي وشه
بروج انهارت : لأ لأ مش معقول تسيبني وتروح... طب بنتك
راحت وقعدت جنبه وقررت انها تشيل الغطا من علي وشه ....بروج قربت ايديها وهي بترتعش... كذا مره تقرب ايديها وتبعدها ..... لغايه ما شالت الغطا
صرخت بخنقه وهي شايفه وشه مليان دم... كانت حاسه انها هتموت من وجع قلبها في اللحظه دي
بروج :لأ لأ..... اكيد انا بحلم... لا ده مش حلم ده كابوس كاااابوس
اترمت علي صدره وفضلت تعيط... جسور فتح عنيه وبص عليها وضحك.... بعد فتره طويله من العياط قامت لاقت جسور مفتح عنيه وبيحول
بروج بصوت مخنوق : ايه ده ؟!
جسور ضحك فضلت فتره مش مستوعبه بس لما استوعبت نزلت عليه ضرب وصرخت بحسره : شاااايف ان دي حاجه تضحك ها... حرام عليكي قلبي كان هيقف ليه كدا
جسور مسك ايديها وحاول يحضنها ويخليها تهدي
جسور : اهدي اهدي
بروج : انا بكرهاااااك
جسور بهزار : لا والله اومال العياط اللي عيطيه ده ايه.
بروج نزلت فيه ضرب تاني : خليني احطك في نفس الموقف وشوف هتتعصب ولا مش هتتعصب
جسور باس رأسها : طب اهدي يا ستي حقك عليا
بروج زقته : ابعد عني بقي علشان انا مش طيقاك
ومسكت بطنها وصرخت
جسور بخوف : مالك ؟!
بروج : مش عارفه
جسور : يعني ايه مش عارفه
بروج صوتت : بطني بتتقطع ... الحقني... خايفه علي بنتي وديني للدكتور
جسور بقي يلف في الاوضه زي المجنون يدور علي المفاتيح بتاعت العربيه
لحد ما لاقاها
جسور سندها : تعالي يا حبيبتي انا اسف
بروج : بنتي يا جسور بنتي لو جرالها حاجه مش هسامحك
جسور بقلق : لا باذن الله مش هيجرالها ولا هيجرالك حاجه
بروج نزلت وهو مسندها وهي عماله تصوت الكل اتجمعوا وبدأوا يسألوا في ايه
جسور : مش عارف فجأه لاقتها بتقولي بطني بتتقطع ومش قادره تقف علي رجليها... انا انا هوديها المستشفى
عزه : يا ساتر يا رب... واد يا عاصي روح مع اخوك متخلهوش يسوق في حالته دي واحنا هنلحقكم بالعربيات
عاصي : حاضر حاضر
عاصي ركب العربيه وساق وجسور قعد مع بروج في الكرسي اللي ورا
جسور : استحملي يا حبيبتي استحملي
بروج بألم : مش قادره هموت
جسور : بعد الشر عليكي والله انا من غيرك ولا اسوي .... عاصي زيد السرعه خلينا نوصل للمستشفي
عاصي : حاضر حاضر
جسور أخدها في حضنه : هنوصل يا حبيبتي وهتبقوا بخير
بروج بتعب : بنتي يا جسور بنتي
جسور : هتبقي كويسه متقلقيش
وصلوا المستشفي
شهاب قابلهم بالصدفه
شهاب : في ايه يا عاصي
عاصي : مرات اخويا حامل وتعبانه اوي
بروج ماسكه ايد جسور وعماله تصوت
شهاب : طب هي مش قادره تمشي.
جسور وطي علشان يشيلها
شهاب : لا اهدي الاحسن ان نجبلها كرسي متحرك.... لانها هتطلع الدور الرابع
عاصي : مش مهم بس انجز
شهاب : حاضر حاضر... اسامه هاتلي كرسي هنا.
الكرسي جه وبروج قعدت وطلعوا في الاسانسير.... جه الكل بعدهم
شهاب : خير يا انسه حسناء ؟!
حسناء،: مرات اخويا جات هنا... عايزين نطمن عليها
شهاب : اه لسه طالعه فوق الدور الرابع
حسناء بزهق : ومدام انت عارف احنا جايين ليه بتسأل ليه من الأول... رخامه وخلاص
صباح : يلا يا حسناء مش وقت خناق دلوقتي. الراجل مغلطش معانا في حاجه ... يلاااا
*****************************************
دخل جسور مع بروج للدكتوره
الدكتوره : مفيش حاجه خالص ووضع الجنين كويس جدا
جسور : ازاي دي تعبانه اوي دي كانت بتصرخ
الدكتوره : لا ده دلع بقي
جسور بص لبروج :لا وانتي الصادقه دي بتردلي اللي عملته
بروج ضحكت
خرجوا بره فالكل لفوا حواليهم
عزه : مالها يابني حصلها ايه ؟!
جسور : قوليلهم انتي
بروج : مش كلكوا اتجمعتوا وعملتوا عليا لعبه.. انا لوحدي بقى لعبت عليكوا علشان تدوقوا اللي انا دوقتوا
حسناء: والله يا بروج احنا كان غرضنا خير ان احنا نرجعكوا لبعض
جسور : هترجعي معايا صح قولي اه بقي
بروج : لا يا حبيبي انت تيجي تأخدني من بيتي ها .. زي ما طردتني من بيتك.... اقل حاجه تعملهالي انك تيجي تأخدني من بيت جدي
جسور : حلو انا هجيلك النهارده ... دلوقتي لو ينفع
بروج ببرود : لا تعالي بعد يومين . علي الاقل اكون ريحت اعصابي وساعتها اكرر اروح معاك ولا لأ... يلا يا اسلام علشان نروح ... عن اذنكوا
وسابتهم ومشبت مع إسلام
جسور حضن عاصي
عاصي : انت فرحان علي ايه ده بتقولك ليه هتفكر ان كانت هترجع ولا لأ
جسور : لا ما هي كده سامحتني
********************************************
في العربيه
اسلام : ده انتي مش سهله خالص.. انا ذات نفسي صدقت ان انتي جرالك حاجه
بروج :،بصراحه انا كان هيجرالي حاجه فعلا لما شوفته كده ولما عرفت انها لعبه اتجننت وكان كل همي ان يدوق لو جزء من اللي انا دوقته
اسلام :بتعجبني اوي دماغك. فكريلي بقي في حل في اختك اللي عاصيه عليا دي
بروج : في مثل بيقولك يا اسلام يا اخويا ابعد حبه تزيد محبه
اسلام : قصدك ايه ؟!
بروج : قصدي انك ليل مع نهار بتكلمها في الموضوع مش مديها حتي فرصه تفكر .... حاول كده تبعد... تقلل حتي الاهتمام وشوف هي هتعمل ايه
اسلام : اما نشوف
اسلام وبروج رجعوا البيت
رقيه : كنتوا فين قلقتونا عليكوا
بروج : في مشوار كده
رقيه: طب ادخلي شوفي اختك اللي هتجنني دي
بروج : انهي فيهم
رقيه : هو فيه غيرها واجع قلبي بوسي
بروج : مالها طيب
رقيه : قلبالي الدنيا ومتعكننه علشان في واحده صاحبه تلا جاتلها وهي مبتحبهاش
بروج : هي مين دي ؟!
رقيه : واحده اسمها سهام
بروج : ييييييه هو احنا مش كنا خلصنا من البت دي
رقيه: بتقول كانت مسافره
بروج : بصراحه يا ماما عندها حق
راحت بروج لعند بوسي.
بروج : مالك يا ست بوسي
بوسي : البت اللي فوق دي انا مبطقهاش
بروج : متخليكي في نفسك وركزي في امتحاناتك احسن
بوسي : انا مبحبش حد يدخل بيتي وانا مبطقهوش يا بروج ... ده انا محطتش حاجه في بوقي من الصبح بسبب انها عكننت عليا وراحه جايه تسأل علي اسلام
بروج بخبث : قولي كده بقي
بوسي : اقول ايه يأختي
بروج : ولا حاجه.
بروج لاحظت ان فجر رايح جاي يبص علي بوسي بغيظ
بروج : تعالي
فجر راحلها.
بروج : مالك في ايه بقي
فجر : بوسي خلصت الأكل كله... حتي كمان أكلت اكلي المفوجوعه
بروج : عيب لما تقول كده..
وبصت لبوسي : ده اللي محطتيش حاجه في بوقك من الصبح
بوسي : الواد ده كداب
فجر : انتي اللي كدابه.. انتي اكلتي كل اللي في طبقي كان ناقص تأكلي الطبق بالمره
بوسي : والله اجيبك من شعرك
بروج سمعت صوت سهام فخرجت جري لاقاتها راحه تسلم علي اسلام فعدت من ما بينهم ومخلتهمش يسلموا علي بعض : تقريباً في حد ينادي عليا
رجعت سهام ومدت ايديها علشان تسلم علي اسلام فبوسي مشيت ما بينهم برضه : حد بينده عليا تاني
اسلام ضحك بس قرر انه يسمع بنصيحه بروج ويتجاهلها
اسلام : سهام عايزين نبقي نشوفك.
سهام : هاجي علي طول ان شاء الله.
ومشيت
بوسي قلدت اسلام : عايزين نبقي نشوفك
سكتت وبعد شويه : اسلام عيزالك تسمعلي حاجه
اسلام سابها ومشي وهو بيقول : مش فاضي
بوسي ضربت الارض برجليها: بس فاضي للست سهام... طييييب
******************************************
تاني يوم الصبح جات سهام واتكلمت مع اسلام وبوسي هتولع حتي مسألهاش عملت ايه في امتحان النهارده زي كل مره
واقفه عماله تبص عليهم وهما واقفين يتكلموا مع بعض وفجر معدي من قدامها ماسك كيس شيبسي اخدته منه وكلت منه وهي عماله تراقبهم فجر ضربها في رجلها : يا بوسي يا مفجوعه يا مسعوره يا مخلصه اكل الغلابه حرام عليكي
وفي المكتب
بروج : نعم يا جدي طلبتني
فوزي : اقعدي عايزك في موضوع مهم
بروج قعدت
فوزي : ابوكي جاله شلل نصفي من زعله علي مراته وهو مرمي في مستشفي دلوقتي
مبنش علي بروج اي زعل : والمطلوب مني
فوزي : المستشفي طالبه فلوس لان ممعهوش يدفع
بروج ببساطه : ادفعله
فوزي: لو قولتي لأ مش هدفعله ولا مليم
بروج الدموع اتملت في عنيها : لأ ادفعله مهو لو كان حيوان كنت هتعالجه فما بالك بابنك... ادفعله بس متفكرش تجيبه هنا لحظه لان وقت ما هيدخل هنا هيتحرم عليا دخول البيت ده طول عمري
جدها قام وطبطب عليها : طيب اهدي
بروج عيطت بحرقه : تعرف ايه اللي قاهرني انه متهزلوش شعره لما عمل فيا كده بس جراله اللي جراله لما مراته ماتت
فوزي : ربنا يسامحه علي اللي عمله... احنا هنعمل اللي علينا وندفعله الفلوس بس انا مبنساش وعمره ما هيخطي عتبه القصر ده ولا هيرجع واحد مننا تاني
****************************************
اتصل بيها
بلال : دلوقتي انا حفظت اللي عليا
منه : تمام
بلال :،عايزك ترشحيلي كتاب ديني اقرأه
منه : اقرأ السيره النبويه. .. اظن مفيش اجمل من كده
بلال : تمام هقرأه ان شاء الله المهم انتي اخبارك ايه في المذاكره
منه : الحمد لله
بلال : ربنا يوفقك يارب
منه : يارب
*****************************************
قاعده هتموت من الرعب ومتوتره جدا قربت تدخل الامتحان والماده دي صعبه موت
جه قعد جنبها ومد ايده بعلبه عصير
عاصي : اشربي وروقي دمك
تلا :مش عايزه حاجه
عاصي: اهدي بس علشان بتوترك ده مش هتعرفي تحلي.
تلا :خااايفه
عاصي :انا متأكد انك ذاكرتي فاهدي علشان مضيعيش تعبك
تلا : مش قادره اهدي... حاسه ان ضغطي علي
عاصي : بصيلي
تلا بصتله
عاصي : انا سامحتك
تلا فضلت ساكته شويه تستوعب اللي قاله : بجد
عاصي : بجد
تلا : ولا بتقولي كدا علشان تهديني
عاصي : لا بجد سامحتك... وعايزك تدخلي تحلي في الامتحان كويس ..... وافتكري اني بحبك وهبقي معاكي دايما
تلا : بس مش هتبقي معايا في الامتحان
عاصي : قومي امشي يا تلا بدل ما ازهق عليكي
تلا : خلاص خلاص بهزر معاك
عاصي : طب يلا قومي علشان الامتحان هيبدأ بعد خمس دقايق
تلا : ماشي ادعيلي
عاصي : هو انا بدعي لغيرك اصلا
خرجت تلا من الامتحان لاقت عاصي واقف وقلقان
عاصي : ها عملتي ايه
تلا :،الحمد لله حليت كويس
عاصي : لأ ده انتي كدا ليكي فسحه بقي
********************************************
خرجت داليدا من الامتحان لاقت عدي واقف بره الجامعة
فصاحبتها اتكلمت
رانيا : الله الواد الحليوه واقف مستنيكي يا داليدا اهو
داليدا : ما تلمي نفسك يا بت انتي
رانيا : لأ لأ في تغيرات حصلت.... المره اللي فاتت عكسناه ومفتحتيش بوقك... المرادي بقينا نغير اهو
داليدا : ملكيش دعوه
وراحت لعدي
عدي : خلصت شغل بدري قولت اجي اعدي عليكي نروح مع بعض.. ها عملتي ايه
داليدا : الحمد لله... بس مالك متشيك كده ليه
عدي : متشيكش يعني
داليدا : اه متتشيكش لان صاحبتي عاكستك
عدي بهزار : فين دي
داليدا ضربته في دراعه بغيظ : لم نفسك
عدي : يسلملي الغيران يا ناس والله ما بحب غيرك انتي
*******************************************
تاني يوم جه جسور علشان يأخد بروج
فوزي : ايه رأيك يا بنتي تروحي ولا لأ انا مش هغصب عليكي في حاجه
بروج بصت لجسور وقالت :
