رواية ناديه الفصل السادس والثلاثون بقلم انين الليل
جاوبتها //انو الي كشف الجريمه مالت قتل عم هديل الي هو ابوي وخلا مرت عم هديل توصل للمشنقه الي هي امي
الي كشف الجريمه وما اهتمت الشي بذاك الوكت هي انا
فاطمه بذهول //شنو
اتحسرت ...... اي فطوم مثل ما اگلج انا الي كشفت الجريمه والي دليت على المجرمه والي وگفت بالمحكمه
او وصلت امي الحبل المشنقه رغم ماكان اي دليل عليها وكان ممكن تحزن وبس تخلص العده تتزوج عشيقها
لكن انا حچيت ودليت على القاتل وبسبب كلامي عدموها الامي الي تستاهل الاعدام الف مره
وعشنا انا واختي طول عمرنامنبوذات ابيت. عمهن وحسابهن احساب اي خدامه عايشه بلگمتها الي
عباره عن فضالة مرت عمهن وبناتها وهدومهن من البالات
فاطمه //ناديه ما اعرف شگلج
......لا تگليلي شي اسالي اهلج اكيد سمعو بالبنيه الزغيره الي عمرها اربع سنوات وهي شهدت على امها بالمحكمه
انا ما عندي شي ولا اريد ابرر شي لكن اريد اوصلج شي نست بت عمي تگوله ياالله مع السلامه
فاطمه //مع السلامه
سديت النقال وانا افكاري متشتته بقيت اخذ شهيق وزفير وكأن الهوى انقطع عني يمكن وضحت الصوره گدامي
وعرفت الي صار بس انا شنو ذنبي ليش اتعاقب بشي ما الي يد بي ليش الكل صار يباوعلي وكاني
شي معدي ما يتقربون مني
نزلت وصرت اغسل بالارضيه مال المطبخ وطلعت اغسل بالطارمات چانت الدنيا بارده لكن النار الي مشتعله
بداخلي اتذوب اكبر جبل جليدي وصلو بيت هادي وياهم عمار وافراح وهي وبناتها وهادي دخلو وهمه
يسولفون وهي من شافتني صارت تباوع الهديل وتضحك انا بقيت انظف بالحمامات وهي گالت الحنين
- - سوي چاي
كملت واجيت دخلت من باب المطبخ اريد اصعد فووك افراح تباوعلي //اوگفي
بعدين باوعت الهادي //اگلك هادي هاي الناس شبيها
هادي //ليش شكو
افراح //تدري هاي وحده ويه هديل ابوها مسجون وجاي طالب وياها يريد يخطبها وبعدين من داري لو تشوف
شسوالها من فضيحه
هادي //ليش الفضيحه شنو هواي ناس تنسجن
افراح // اي صحيح هادي بس هاي البنيه ابوها مسجون بقضية شرف
هادي //الله يكافينا الشر
افراح //بس انا گلت الهديل //هاي الوياج غلطانه چان لازم تعرف حدها ومستواها
عرفت الكلام موجه الي وعرفت هديل خربت علاقتي ويه ميثاق اتقربت منها
......ها عمه ردتيني
افراح عكفت حواجبها //انا
......اي عمه هسه من اجيت اصعد گلتيلي اوگفي
افراح //اوووه والله نسيت روحي عود من اتذكر اصيحج
صعدت للغرفه وانا لاول مره بحياتي ما افكر احس بروحي فارغه رغم كل المفاجآت الي مريت بيها
لگيت حنين نايمه وانا طلعت التلفون واتصلت بميثاق اول مره وثاني مره ما رد ثالث مره رد
:الو
...اشلونك ميثاق ليش ما ترد عليه
:اهلا ناديه الحقيقه مشغول
...اليوم ما شفتك ولا امس خيير بعدك تعبان
ميثاق جاوبني بحسره ) تعبان كلش
...رحت للطبيب شنو گلك
:هاا اي گلي تعب وارهاق ولازم ارتاح
...زين ارتاح واخذ علاجك وحتى اخذ اجازه
:هو هذا الي راح اسوي
...طيب ميثاق تصبح على خير
:وانتي من اهله
من نهيت المكالمه من ميثاق عرفت هو مو ذاك ميثاق الي عرفته والي اذا خابرني يگلي انا احچي وانتي بس
سمعيني نفسج واذا نهيت ويا المكالمه يزعل واذا اگله خلي نكتب مسجات يبقى للصبح يكتب
صرت احچي ويه نفسي
...ليش شبيك
...شنو اشبي اكيد عرف الحقيقه
...واذا عرف اكثر من مية مره گتله لازم تعرف عني كل شي هو گلي قابل بيچ لو شنو ما تكونيين يعني
مجرد ما سمع دار وجهه وغير نظرته الي (عضيت شفتي وهزيت راسي ) ايي غير نظرته لان امي معدومه
هزيت راسي وجريت نفس وگلت ... ... مي خالف هسه انا لازم افكر بعقلي واهم شي مصلحتي
انا واختي لازم اشوف المحامي واتفاهم ويا
خابرت بنيه وياي بالخط وگتلها باچر ما اداوم لا تمرين عليه تعبانه بقيت الليل كله ما نمته انا صحيح ما انام
بس دائما وره الصلاة لو انام ساعه اكسر نعوستي لكن اليوم نهائيا ما نمت وره ما صليت نزلت رتبت الصاله
وسويت ريوك شربت چاي واكلت شويه صمونه لان ما اشتهي وصعدت ندهت حنين هي باوعتلي وكالت وهي تتثاوب
بيش الساعه مو بعد وكت
هزيت راسي ...اي بسرعه غسلي وجهج وصحصحي اريد احچي وياج
خير //خيير ناديه خوفتيني
ابتسمت ...لا تخافين حبيبتي بس شغله ضروريه ياالله بسرعه اكعدي
راحت حنين غسلت وجهه واجت وهي ترجف من البرد
ها ندووش خير
...كل الخير اريد منج تسمعيني والي اگوله الج تنفذينه بالحرف الواحد
حنين //اي شكو فهميني
...اسمعيني تنزلين تتريگين وبعدين تصعدين تبدلين حاولي تتاخرين ومن تطلع هديل الكليتها وهادي واسيل
تطلعين وترجعين تجين بسرعه وتگولين
يا نسيت المديره طلبت جناسينا ما اعرف شتريد بيهن
حنين //ليش ناديه تردينا نشرد
......هههههه وين نشرد لا حبيبتي شغله مهمه وان شالله بيها خير النه
حنين //اي غير تفهميني
...ما اگدر هسه اجيج للمدرسه وافهمج
حنين فتحت عيونها //تحچين صدك يعني ما تداوميين
......اليوم لا انتي سوي الي اگلج علي وخلي الباقي عليه مو انا اختج الچبيره
هزت راسها // ايي صار
حضنتها ......حبيبتي ياروحي
وحاولت حنين تتاخر وانا نزلت راح هادي وطلع ياسر وعمار راح وانا بقيت على اساس منتظره الخط نزلت
حنين گالت // صباح الخير شنو ناديه بعدج ما رايحه
...اي اشو اتاخرو ما اعرف ليش
- - اتصلي شوفيهم
...لا ليش اتصل لو ما يجي السايق چان اماني اتصلت بيه
- - هاا زين ياالله انا رايحه
...الله وياج
راحت حنيين وصلت للباب ورجعت بسرعه وهي تگول// شوف شلون نسوه
انا عكفت حواجبي ......شكو حنين خيير
باوعت الافراح //عمه المديره رايده جنسيتي والشهاده
افراح باوعت بغضب الحنين //شنو
حنين //اي عمه المديره تريد جناسي الصف تگول تريد رقم الهويه وانا نسيت همزين اتذكرت
انا جاوبتها ......ياثوله هيج تنسين تعرفين لو ما تاخذين الجنسيه شتسوي بيج
حنين دنگت //بعد ندووش نسيتها
گامت افراح وطلعت الجنسيه والشهاده واخذتها حنين وانا اگلها ......ديري بالج مو تضيعيها
انا صرت احجي واسمع بافراح ...شنو الخط اليوم اتاخر عندي امتحان خلي اخابر
واتصلت باستاذ علي گتله
......هلا اماني شنو ما تجون اتاخرتو وعندي امتحان
......ها انتم بشارعنا زين انا طالعه
هو گال /انا بانتظارج
طلعت اركض خاف افراح توگفني وصرت امشي بدون ماا التفت وصلت راس الشارع شفت استاذ علي واگف
صعدت بالسياره وانا فحطانه گتله ......صباح الخير
ابتسم ورد // صباح النور
......استاذ اسفه لان خابرتك باسم اماني
:لا عادي ما صار شي هسه انروح الحنين
......لا استاذ بالبدايه عندي شكم سؤال اريدله جواب
:وانا حاضر
...تماام
المحامي //ست ناديه اعرف مكان يقدم گهوه تريح الاعصاب انا بصراحه دائما اخذها منهم خلي نروح نگعد
والج مطلق الحريه شنو تردين تسالين او تستفسرين انا حاضر بس بالاول نشرب الگهوه
......شكرا استاذ ما تقصر
وصلنه للكوفي ونزلنا بعد ان طلب مني استاذ علي اخلي كتبي وملازمي بالسياره
نزلت واجه النادل هو گلي خلي اجيبلج ريوك لكن انا ما قبلت طلبلي گهوه جابوها هو صار يشرب وانا هم شربت
شويه الصراحه چانت كلش طيبه استاذ علي دخن جگاره وگلي //اتفضلي اسمعج
...استاذ ردت افهم ليش ما اجيت قبل سنه سنتين
استذ علي //الحقيقه الوكيل ما قبل
...وليش ؟
:ست ما مخول بالاجابه
...منو هو
:راح تعرفينه عن قريب
...لا اعرفه هسه وانا اعرفه سراج مو ؟
هز راسه // اي هوه استاذ سراج
...زين ليش سووا كل هذا الشي
:ست ناديه انا رجل قانون بيبيتج الله يرحمها سجلت البيت باسمج بيع شرا وخلت راتب ابوج وبيته ومحله عندي
من تبلغين انتي واختج اسلمكم الورث وخلت الوصايه بيد سراج
هزيت راسي ......... مفهوم استاذ لكن انا ما عرفت عندي املاك. الي ولاختي اله منك والي اعرفه راتبي انا
وحنين ميتين او اقل لان كل شهر يگول عمي هادي قطعوا الرواتب واحنا ما نعرف اي شي
:لا ست ناديه بالنسبه التقاعد المرحوم والدج 600 الف مناصفه الج والاختج
...بالشهر
هو ابتسم وهز راسه //اي بالشهر واجار بيت والدج بالشهر 350
وبيت بيبيتج الي هو بيتج بالشهر 800 لان ملحق بي محل
اما المحل الي تركه ابوج فهذا شغال يعني كل المحصول الج والاختج
يعني صافي الراتب والاجار يجيج كل شهر انتي واختج حوالي اكثر من مليونين اله ربع من غير محصول المحل
صفنت من سمعت هلگد النه فلوس كل شهر لان اتذكر مره بيبي جميله اجت وسالت افراح
جميله // ليش ما تشترين للبنات محبس تراچي من راتب ابوهن
جاوبتها افراح وهي تهز بايدها //منين عمه كل التقاعد ميتين دينار شنو ميه والف
المحامي //هاا ست ناديه اشو صفنتي رايده شي تگولينه الي
...لا استاذ كل شي صار مفهوم او واضح
:تماام هسه نروح ناخذ حنين وهناك نسوي الاجراءات
...مثل ما تشوف
:طبعا انا بالخدمه يمتى ما ترديني لان انا هم محامي استاذ سراج
شكرا (قاطعتني رنة التلفون )
:الو اهلا استاذ
:اي هاي يمي
:نعم واتفقنا على كل شي وراح نروح للمحكمه
:اي هاي هي وياك
انطاني المحامي التلفون وهو يگلي سراج انا اخذته وگلت
...الو
::هم تدرين شگد صار ما سامع صوتج
انا سكتت ما جاوبت
::بعدج زعلانه
...اي بس ضيف وياها محبطه
::ليش
...لان چنت تعرف شگد مرينا بمآسي وانت ظال تتفرج ياترى ليش
::راح تعرفين بالوقت المناسب
...ومو اله اعرف ما يهمني
جاوبني ابرود ::ناديه اتصرفي عدل بفلوسج وديري بالج من العگارب الي يمج
......مو اگلك ماكو قاعده تصير فوك لان انت واحد من ذوله الي تگلي ديري بالج منهم
::يعني تشوفيني عگرب لعد اسمعيني انا باقي لان انا القاعده وراح ابقى لازم بيكم طوول العمر مع السلامه
رجفت من سمعت كلامه ...مع السلامه
استاذ علي گلي //هم ياالله نروح الحنين وناخذها للمحكمه
هزيت راسي وركبت بالسياره وصلت انا ويا للمدرسه وانا ابد باي شي ما افكر وبنفس الوقت ما ادري احس بفرح
