رواية ناديه الفصل السابع والثلاثون بقلم انين الليل
////////////////////
ناديه
بعد ان اخذت الفلوس من ثامر واعتذرت من استاذ علي ع الغدا نزلت بالسوك الي يمكن من قبل ما تتوفى
بيبي منيره انا رايحه ويه عمه زهراء الفلوس الي اخذتهن من ثامر خليتهن بالجنطه وكل شويه اتحسسهن
خفت يضيعن او يمكن لان ما شايله مبلغ بهاي الضخامه من قبل
صرت امشي واباوع وصلت يم محل ايبيع ملابس ورغم كانت
الدنيا ظهر لكن الناس باقيه تبيع باوعت للمحل شفت معروضه تنوره لونها رصاصي وبصفها قميص ابيض بوكتها
عجبني ولان اشوفهن احلى شي موجود وهذا لان انا ما طالعه ولا مشتريه شي واتذكرت شلون من افراح شمرت الكلور
على الملابس الي جابتهن زهراء ومن حچيت عمي ما رد ولا گال انا اشتريلج
حتى ما سال بشنو راح اداوم
اتقربت وگلت للبايع اينزلهن شفتهن على گدي واشتريتهن بدون ما افاصل بالسعر
واخذت شال وحذاء رياضي نفس اللون وصرت امشي وگفت يم مطعم وصيته على ربع كباب ونص دجاجه
وقوطيتين ببسي
بعدين رحت يم بياع الحلويات واشتريت ورجعت وصلت للبيت دكيت الباب حنين فتحتلي وانا اشوف الخوف
بوجهها دخلت وهي تگلي اتاخرتي انا ابتسمت وما جاوبتها
حنين شافت العلاليك اخذتهن مني وهي فرحانه انا سالتها بعيوني هي ردت //الكل نام وانا بقيت منتظرتج
صعدت بسرعه وانا رحت وراها دخلت للغرفه گالت //اجيب الغدا
هزيت. رااسي وگتلها ...لا جبتلج كباب او دجاج
اشوف حنين من الفرح دمعت وهي تگلي //يعني صدك راح يصير عدنا مصرف
لزمتها وحضنتها ......اي واشتريلج كل شي يخطر ابالج بس انتي تسمعين كلامي
هي ردت //ندووش انا ما عليه بشي اريد البس وآكل
......وتنجحيين حنين اهم شي تنجحيين
هزت راسها طلعنا الاكل وصرنا ناكل رغم حنين تحب التمن بالغدا لكن ريحة الكباب والدجاج نستها لان من زمان
ما ماكلات بعدها جمعت البقايا ونزلت گالت //اروح اجيب جاي
ابتسمت ... اي بس اخفي الجريمه
هزت راسها // اي اكيد اخليهن بعلاگتهن وبعدين بعلاكه سوده واخليهن بالسله
... عفيه عليج
ونزلت حنين وانا رحت غسلت ورجعت اتصلت بزهراء هي جاوبتني
الو هلو ناديه
......هلا عمه اشلونج
انا زينه بس انتي لا تتصلين ولا تگولين عندي عمه وبت عمه خلي اطمن عليهن
......والله عمه ما فارغه بعد انتي تعرفين
اي صحيح شخبارج ويه الدراسه
......تمام الحمد لله
عفيه عليح صدك بت ابوج
......عمه زهراء
ها حبيبتي
...اليوم چنت انا وحنين بالمحكمه والمحامي رجعلي كل شي
ردت // اي اعرف
......عمه ليش ما سويتو هذا الشي قبل سنتين ليش سراج كان كل همه ايعذبني ويجوعني
زهراء ردت بسرعه //لا لا ناديه سراج سووا هذا الشي المصلحتج
.........شلون يعني سووا كل هذا الشي المصلحتي
زهراء//يعني لو من چنتي بالسادس وخلا المحامي يرجع الاملاك بذاك الوكت يجي هادي ويضحك عليج
بكلمتين لو يخليلج درس خصوصي لو يشتريلج كم هدمه انتي وحنين وما عنده مانع يوقعج على كل شي
او حتى ...ستتر
...... شنو عمه ليش سكتي
تستمر القصة أدناه
زهراء//يعني ياعمه انتي بالسادس كان كل همج تنجحين وكل دقيقه محسوبه عليج راح يجي ويكلج انا خايف
عليكم ويجيبلج ورقه تنازل توقعيها وانتي اساسا ما تعرفين شنو بيها سراج رادج اتعانين وتشوفين ظلم البشر
وتشوفين شلون البشر ممكن يسوي كل شي على مود الفلوس
رادج تعرفين انو ضمانتج الشهاده وبيت ابوج وبيت بيبيتج الي كتبته باسمج والي لحد هسه هادي ساكت
ما مسوي وياج زوبعه
والعلمج خلي اگلج تره هادي اتحرك لكن من شاف ماكو فايده سكت بعد ان قنعه سراج وهسه هو ومرته
الله العليم شنو ايخططون
...ليش شيردون
زهراء//يردون البيت
...بيت بيبي
زهراء//اي بيت خالتي
...وهو يسوى اكثر من 650 ويمكن يزيد
:بالضبط
...زين ليش ما فهمتوني
:لان اكيد ما راح اتسكتين وراح تصير مشاكل ويجوز يعقدلج على واحد من ولده يعني هم كل شي ما تحصلين
يعني سراج رادج تستلمين حقج وانتي خايفه وتفكرين الف مره لا كولي مليون مره شلون تحافظين على حقوقج
مو رادج تستلمين الورث وانتي فرحانه وتخافين من هادي وافراح ونوال وممكن ياذوج ويخلوج تتنازلين
رادج تستلمين حقج وانتي قويه وتتذكرين كل شي مر بيج حتى تعرفين شلون تصرفيهن وشلون تحافظين عليهن
جاوبتها وانا العبره خانگتني ...بس انا واختي اتعذبنا هواي
زهراء//صحيح ولو بذاك الوكت مستلمه حقوقج راح تتعذبين اكثر
.. .... اكثر من هذا العذاب معقوله ؟
زهراء//. ايي معقوله ذاك اليوم لمن خابرتيني لمن افراح موگعه الكلور على ملابسج شنو صار عمج راح جابلج تنوره ؟
لو هاي صار شهر يوميه بنفس التنوره وتلبسين قميص حنين لو من ياخذون بناتهم ويطلعون لو الي سوته
بيج وباختج والضرب والعار والاهانه سراج سوى هيج حتى ما بيوم تنسين الي سووا بيج هادي ومرته
وتعرفين شلون تحافظين على حقج
عرفتي شنو لو ماخذه البيت بذاك الوكت افراح تعرف شلون تاخذه منج تدرين لو مستلمه حقوقج چان انتي هسه
عيشتج اتعس وسراج راح يتاذى
......لا عمه سراج لويش يتاذى شنو عبالج مهتم النه
زهراء//انا اعرف انتي الهسه ماخذه على خاطرج من الي سوته سجى لكن هو ما اتحمل اهانتها الج وطلگها
وهذا الي تگولين ما مهتم يمصلح الهادي ويدفع فلوس المحامي من جيبه
......بس هو جرحني وخله افراح وبناتها يضحكن عليه
زهراء//ندووش تره سراج ما اله يديه على افراح وبناتها اقلها سراج ترك مرته وطلگها يمكن مو على مودج بس
انتي احد الاسباب لكن الدور والباقي على عمج الي بيومها شبعج كتل انتي وحنين لو نسيتي
روحي ارتاحي عمه ورجعي شريط حياتج وعلى اساسه اتصرفي تره هادي اذا ساكت جوا بركان بس ينضغط
يتفجر ولازم هذا البركان يواجه بركان اكبر واقوى افتهمي
وسدته عمه حتى بدون ما تسمع ردي باوعت شفت حنين واگفه سالتني
ناديه ممكن اتفهميني
...شفهمج حنين
حنين //كل شي
هزيت راسي وابتسمت اطمنها واخذت كوب الچاي وشربته ونمت شويه
لان كلام زهراء خلاني افكر شلون لازم اتصرف چان يوم ثلاثاء نزلت سويت ريوك اكلت شويه جبنه وصمونه
وشربت چاي وحنين نزلت اتريگت انا ع السريع شطفت الكوبين ورحت انا وحنين الي بدلت وشلت الها مصرف
هي باوعت وگالت
تستمر القصة أدناه
ندووش لا تگولين ذني مصرف الي
هزيت راسي ......اي هذني الج بس اليوم من باجر مصرفج يصير بس الف
حنين //الله عليج لو تتشاقين
...شنو قليل الالف
حنين //لا والله بس ما مصدكه يعني اشتري لفه وعصير
1
ولبست ملابسي الجديدات ونزلت چانت افراح گاعده تصب چاي الهادي وطلعت هديل وشافتني راحت يم افراح
واشرت الها افراح باوعتلي وهي تگول //هادي هادي شوف ناديه شلابسه
باوع هي استردفت //اسالها منيلها فلوس ولابسه هاي الملابس الجديدات
رادت حنين تحچي بس انا خزرتها
هادي باوعلي انا گتلها //عمه وصيت ابنيه صديقتي واشترتهن يم بيتهم محل
1
افراح اتخوصرت //اي ومنيلج افلوس
......عمه البقى من مصرفي وذاك اليوم ياسر انطاني خمسه وعشرين جمعتهن وانطيتهن للبنيه اشترتلي
افراح اتغير وجهه //ها ياسر انطاج
......اي عمه اسالي
افراح //لا ليش اساله ادري بي مگير وتضحك علي النسوان
ياسر // يمه شنو هالحچي شنو تض......
قاطعته افراح وهي تگول وتاشر باصبعها على حلگها //اسسس ولا كلمه وانتي (باوعتلي ) انتي ترحين
تنزعينهن وتجيبنهن الي لا صدگي باجر تگعدين ما تلگين شي ترحين بي
......عمه ملابسي ما كاويتهن وهسه تجي السياره
افراح //ما ادري هسه تصعدين تنزلينهن
باوعت الهادي الي ولا كانه يسمع الكلام وياسر يباوع بقهر صعدت وياسر ايگل الامه
- - ليش هيج تسوين شنو مو حرام
افراح بنتر //لا مو حرام اريد اعلمك واعلمها شلون تطيها فلوس وانا ما ادري وهي شلون توصي بدون ما تگلي
ياسر //تره حرام خطيه هم ابنيه وتريد تلبس شي جديد مو هذني بناتج
افراح //انت گلتها ياسر بناتي مو بنات مياده
ياسر //يمه شنو مياده ومنو يذكرها انتي وابوي ربيتيهن وقبلها ربتهن بيبي
افراح //كافي كافي عمت عيني ما تشوف بينت تربيتنا اسمعني ذني ابوك جابهن امر واقع بس عمرهن ما يصيرن
مثل بناتي وانت اذا ردت تتكيرم لاتتكيرم الذني افتهمت
ياسر//يمه مو هيج هذا مو حچي
افراح //هو هذا الحچي ادري بيك گلبك ارهيف بس ما ادري بيك فاسد
نزلت وهاي الجمله الاخيره ما سمعتها لكن حنين كالتها الي
ياسر //شنو فاسد عيب هذا الكلام
افراح //لا مو عيب شنو ما ادري بيك شلون تباوع الناديه هذني البنات ما طول عدنا انت تلزم حدك
عود من (باوعت الهادي )
انا دخلت وانطيتها التنوره والقميص هي گلتلي //الحذاء والشال
هزيت راسي .......... لا عمه ذني من مصرفي ما انطيهن
1
وطلعت وانا اسمعها شلون تضحك هي وهديل الي تگلها
:ماما شلج بيهن تره انا ما البس ملابس ملبوسات
افراح بتشفي //شوفي هدوله اسويهن وصل امسح بيهن الطباخ ولا وحده تسوي شي من وراي وتخلي راسها براسي
حنين يمي وهي تريد تبچي انا ضحكت بوجهها وهزيت راسي واجه عليه الخط وصلت للكليه بيومها ما شفت لمى
الي احاول اشرح الها لكن هي حتى ما قبلت تسمعني
سالت فاطمه گالت خابرتها وتگلي تعبانه اتصلت بيها اكثر من مره رفضت المكالمه بعدها صرت اتصل بميثاق
وهو ما يرد واتصلت مره واثنين ورحت اتمشى يم الغرفه مالت الاساتذه الي بقسمه بس حتى اشوفه وطلع
هو ويا استاذ باوعلي استاذن منهم ورجع للمكتب وانا بقيت واگفه وره ربع ساعه طلع اجيت يمه
تستمر القصة أدناه
هو مدنك سلم عليه
صباح الخير
صباح النور هاي وي......
قاطعني وهو يباوع الساعته وگلي //اعذريني عندي محاضره ولازم اروح بعدين نتخابر
مشى عني ميثاق ورجعت للقاعه وانا احس بخيبة امل واسأل نفسي
... ... شنو الي صار وليش هيچي يحچي وياي مو قبل يومين چان يتغزل بيه ويگلي انتي راح تصيرين اميرتي
واخذج لو اكبر واحد يوگف بوجهي
... .... يجوز بي شي عنده ظرف مي خالف اسمعه وانطي العذر
... .... لكن هو ما مبين علي بي شي مو من طلع يسولف ويضحك وبس شافني رجع للمكتب معناتها بي شي
او انو ما يريد يشوفني هذا هو ناديه افتهمي ميثاق عرف تاريخ مياده المشرف وبدل
... ... يعني شنو ؟
... ... يعني انسي كل كلام الحب والغزل الي سمعتي من عنده
... ... شنو ناديه انتي تحبينه الميثاق لو شنو
اهنا انا ما جاوبت بس اعرف انو كلامه وتمسكه بيه قبل اثر بتفكيري
دخلت وگعدت وانا بغير عالم حتى ما انتبهت للاستاذ شنو يحچي كملت المحاضرات وطلعت ردت اشوفه لكن
هووما موجود اتصلت شغله كتبت اله رساله
...ليش ما ترد عليه شصاير اكو شي
هو ما جاوبني
رجعت للبيت وعلى نفس الروتين الاربعاء داومت واتصلت على ميثاق هو جاوبني
:اعذريني بعدين انا اتصل بيج عندي شغل جدا مهم
ونفس الشي اگعد ابحدي لان انا بالاساس عندي بس لمى وفاطمه لمى الي شگد اتصلت عليها وهي
ولا ترد عليه ولا تجاوبني وفاطمه ويه شلتها بيناتنا بس سلام
الخميس ميثاق اساسا ما عنده محاضرات يجي بس حتى يشوفني چنت امني نفسي بان اشوفه لكن هو ما موجود
كتبت اله ......ميثاق ليش تتهرب مني وليش ما ترد عليه انا مسويه شي
لكن هو ما يرد ورجعت وبيومها بقيت افكر معقوله انا ضايجه لان احب ميثاق لو لان هو مهتم بيه وهسه ما
اعرف شنو الي صار الجمعه طلبت من عدنا افراح نسوي عمل شعبي على البيت وعلى المطبخ وفعلا انا وحنين
اشتغلنه لمن ما انكسر ظهرنا وهي تباوع النه وتگول
- - - اي اشتغلن حتى الياخذونچن ما يگولون ما يعرفن شي عاد تكسرن عينهم بسواية امچن
اتقربت عليها وگلت
......عمه نكسر عينهم بيج لان ربينه عندج وعد بيبيتي مو عدها اصلا ما نتذكرها
افراح بنتر //اي بس حبوبه كلمن وساسه انا حيا الله مرت عمچن مو امچن
هزيت راسي ......هم صدك عمه ما طوول هيج ما نتزوج نبقى اهنا على گولتج ساس انوب نكتل الناخذه بسچين
حنين بضحك // انا بساطور بس ايفك حلگه
ضحكت وگلت ......انا اسويله سحر والصمه خير شر ليش اكتله
افراح بنفس نبرتها //انچبن ولا تمسلتن وكملن الشغل (تعيب على كلامي ) تشويله شحر انتي منو يگلبج
وميت عليج صدگ الجمل لو شايف حدبته يمكن گص رگبته
استهضمت من كلامها لكن ما رديت عليها كملنه وصعدنه رحت اصلي ودك الجرس نزلت حنين واجت جايبه صحن
بي يمكن ربع سمچه وخبزتين وطماطيه وشويه بصل
باوعت گتلها ......حنين انتي اكلي
حنين هزت راسها بالنفي //لا ناديه انتي اكلي
ابتسمت وحاچيتها ......حبيبتي انا احب السمج وهاي ما تكفيني لگمه اذا مو سمچه كامله ومشويه شنو بس اتزفر
تستمر القصة أدناه
حنين //اي والله صدك
......ولا يهمج تشوفين بس اصطبري
حنين //بس مو اربع سنين
...لا شدعوه سنتين
حنين غصت //شنو ما راح اكل
اتقربت منها وحضنتها ......لا ياگلبي بس هالشكم يووم
ان شالله بس لو اعرف ليش ساكته وما تحچيين
ابتسمت .......... خلي استو المفاجأه على نار هادئه
ونمت وثاني يوم قريت وانا كل شويه اباوع للتلفون لكن بدون فائده صرت احچي ويه نفسي
...شبي ميثاق شكو ما يرد على مكالماتي
...اي هسه غير ايفهمني شصاير ويا
...يجوز مشغوول اي ايجوز
داومت الاحد ورحت للقاعه وهناك شفت الكل متجمع يم لمى لان مداومه والكل فرحان وهي بيدها علبه مالت
چكليت وتوزع
والياخذ يگلها شكرا اتقربت يمي وشفت نظرتها الي باستحقار انا اخذت گتلها ......شكرا بس شنو المناسبه
اروى گالت //باركيلها لمى انخطبت
انا ابتسمت وگتلها ...تستاهلين ياعمري الف مبروك
1
طالب وياننه گال //شنو تضحكون علينه جايبه بس چكليت احنه ما نقبل اذا مو عزيمه
اجت نسرين وهي تضحك بصوت عالي واخذت من الجكليت وهيه تكلها //. ليش ما عزمتينه
لمى // مو صارت بسرعه
نسرين // ها بسرعه لو تخافيين من الحسد صدك المن انخطبتي
لمى جاوبتها // مالت اخاف اخاف لذلك سويناها مفاجأه
نسرين مدت ايدها واخذت جكلييت //. ومنو سعيد الحظ
شفت لمى اتصلت وقطعته وهيه تبتسم وكالت // هسه اعرفكم علي
دخل ميثاق للقاعه لابس قاط نيلي وقميص ابيض لمى اتقربت منه تريد تنطي
چكليت وانا لا اراديا رحت صوبه لكن اليصار انو لمى لزمت ايده وگالت وهي تضحك
:نسرين عيني هذا سعيد الحظ وانا سعيدة الحظ هذا خطيبي وحبيبي الاستاذ ميثاق
الكل اتقرب منهم وهمه يباركون وانا بقيت ساكته لا كولو جمدت من المفاجأه احس اختنگت وعيوني غورگن بالدموع
احچي ويه نفسي ...يعني لمى انخطبت الميثاق يمته وليش
...مو هي صديقتي الي تعرف بميثاق ايحبني مو گدامها صارحني
بدون انتباه طلعت من القاعه كلها وصرت امشي ابتعدت مسافه وگفت وانا الهث عبالك عندي سباق وانتظرت ميثاق
بنفس المكان الي نتقابل بي وانا ارجف
طلع واجه صوبي كأنما متعمد باوعتله وانا ما مسيطره على دموعي راسا گتله ......ليش ميثاق ليش
جاوبني وهو مدنك ومخلي ايده بجيبه //ناديه احنا وصلنه الطريق مسدود
...ليش احنا يمته مشينا بالطريق يمته سمعت ردي او موافقتي انا الي دائما اصدك وانت الي وين ما اروح وراي
جر نفس وگلي //اي لان چنت مغفل وما اعرف
جاوبته باستغراب ...شتعرف ؟
اتقرب اكثر وگال //ما چنت اعرف امج معدومه لان خاينه زوجها واشتركت هي وعشيقها وقتلو ابوج
باوعلي واتحسر // ناديه انا رجال الي سمعتي واسمي باچر اتزوجج من يسالوني ابوها منو شنو راح
يكون ردي
- - ابوها خطيه مقتول
ومنو قتله ؟شجاوبهم امها قتلته لان عاشگه واحد براسه وانعدمت افهميني ناديه
الحب شي والارتباط شي ثاني
تستمر القصة أدناه
رديت ......بس انت ما سالتني ولا خليتني احچي شكم مره ردت افهمك وانت تگلي مو مهم لو شنو ما يكون يكفي
انا احبج ومقتنع بيج
ميثاق // بوكتها چنت احبج ومبهور بجمالج
...الله عليك وما لگيت اله لمى تخطبها
اجاني صوت من وراي //وشبيها لمى اقلها ابوها رجال معروف وامها خوش انسانه بس انتي مثل ما گالت
بت عمج انتي مثل امج تمثلين النقاء والمثاليه وانتي ماضيج اسود بلون الفحم باالله ما استحيتي جاي تحومين
على خطيب زميلتج
باوعت الها وبيني وبين نفسي عباره عن بركان لكن حاولت ابين عدم اهتمامي جريت نفس وسيطرت على نفسي
وگلت باستهزاء بعد ان اتقربت منها واحچي وااشر بايدي
......تؤ مو انا الي اخذ الفضايل انتي الي چنتي خالته ابالج هو الي رادني وحفى وراي واسالي الهذا
(واشرت على ميثاق )ولا يوم گتله احبك اخذي بالعافيه لان انتم نسخه مطابقه
لمى ضحكت واتقربت مني وگالت //لمن وحده مثلج تدعي الشرف والمثاليه لاتحچي بشي اكبر من راسها
رديت عليها وانا ارجف ...ولمن ما وحده صدك شريفه ومثاليه وبت ناس مثل حضرتج ومن جوه ليجوه تلدغ
وتضم راسها هاي هي الخاينه وهي صاحبة الالف وجه
لمى بنتر //فوتي حقيره روحي شوفي امج الساقطه منين جايبتج بعدين احچي
ردت ارد عليها لكن لزمت نفسي وعضيت شفتي باوعت الميثاق وگتله وانا ابتسم برجفه
...... لايگين على بعض واكيد يرادلك وحده مثل لمى شريفه وبت ناس
لمى جاوبتني //غصبن عليج شريفه واذا شفتج واگفه بهذا المكان صدگي افضحج وانتي ما شاء الله ما عايزه
اسمج اشهر من نار على علم
هي باوعتلي بتحدي ولزمت ايدد ميثاق وراحت وهي تضحك
بقيت صافنه وانا ارمش گوه لازمه نفسي ابدي اصرخ اشكك ملابسي اكتل نفسي معقوله هذا الي يصير وياي
شنو ذنبي اجت فاطمه وگالت
: ناديه السبب بهذا كله بت عمج هي الي صارت تحچي عنج وعن امج
هزيت راسي وابتسمت ابتسامه مره بمذاق ايامي وجاوبتها
... تدرين فاطمه شگد اكرهها البت عمي بس اليوم لازم اشكرها لان عرفتني اخلاق الناس
رحت وانا ارجف عيوني بيها دموع لكن انا حابستهن گعدت على مصطبه بعيده وظليت صافنه وغمضت عيوني
ولاول مره من اغمض عيوني ما اشوف سراج وهو يبتسم لا شفت عباس ابوي وهو يرجف ومياده وهي گاعده
وسردار وهو يخنك بي
ومياده وهي حالقين شعرها شفت افراح وهي تضربني وهادي وهو يسحني وهديل وهي تقلد عليه
وگفت ورحت للقاعه وانا اتذكر كلمة حنين من حچت
- - احنا بنات مياده الساقطه وكل شي يطلع من عدنا
بهاي اللحظه صرت فعلا ناديه بت مياده مو لان ميثاق تركني
ولا لان لمى خانتني لا لان انا اتعاقبت بجرم امي مع العلم الناس تخون وتسوي فضائع لكن يلگون
عذر النفسهم اله انا
عرفت ميثاق ولمى ما يقلون اجرام عن اجرام مياده مع العلم انا ما كنت احس باي عاطفه اتجاهه لكن ميثاق بوكتها
حسسني باني انسانه مرغوب بيها وهذا الاحساس كل ابنيه ترغب ان تعيشه
لكن خيانة لمى اكبر واكثر معقوله من لمن حاچاني وطلب مني الارتباط هي خاله عينها منه وباول فرصه لدغتني
وسابت عليه معقوله اكو هيج ناس صدگوني چنت اشوف الناس نوعين نوع مجرم وحاقد
وهاي مياده وافراح وبناتها
تستمر القصة أدناه
ونوع طيب ويساعد الناس وذوله هواي بيبي وبابا وكرم وزهراء وسراج وحتى لمى وميثاق
لكن الي شفته والي سمعته غير نظرتي للامور مليون درجه بيومها قررت اعيش على انو انا ناديه بت مياده
وقررت اخلي النقاط ع الحروف طلعت من القسم وانا احس بنفسي مهدوده امشي ما شايفه الي گدامي وانا اشوف
شبح مياده يمشي وياي مياده الحقيره الرخيصه القاتله
مياده الي حملت حرام والي حلقو شعرها والي عدموها والي انا واختي شلنه اثمها من قبل اكثر
من 16 سنه
صرت امشي وانا ما مسيطره على نفسي كنت عباره عن مجموعة اشياء محطمه
قهر
ضيم
جوع
حقد
وكره
مشيت وصلت للكليه الي بيها هديل دخلت للقاعه ما شفتها سالت عنها بنيه گالت اكيد بالكافتريا رحت للكافتريا
مالت قسمها باوعت ما شفتها گعدت وطلبت عصيربرتقال
شفتها جايه هي وياها مجموعه من الطلاب والطالبات هي ما انتبهت لي لان چانت تسولف وتضحك انا رحت
امشي صوبها وصلت يمها ابدي الزمها واگطعها مو لان ضيعت ميثاق لا لان فضحت قصتي هي شافتني استغربت
وضاعت ضحكتها ابتسمت وگتلها
...هلو هدوله
هي بعدم مبالاة //هلاو اشو اهنا
...اي جيت اشوفج عجبني ازور كليتج
طالبه وياها //هديل عرفينه
انا سبقتها وگلت ...ناديه اسمي ناديه بت عم هديل واذا تردين تعرفين القصه اساليها هي تكملج
هديل وگفت وسالتني بتحدي // ناديه خير شكو جايه
...لا هچي رايدتج بكلمه
هديل // خير شكو
ابتسمت ... اذا ممكن على انفراد طبعا من رخصت الشباب
اجت يمي وهي متفاجأه طلعنا من الكافتريا وگلتلي //اگلج مو تشوفين نفسج فايته زايد
اتحسرت ...اي والله صدك انا وين انتي وين
هديل //انچبي وگليلي شرايده
باوعتلها ......هو سؤال راح ايموتني بس اعرف جوابه (اتقربت منها ) من حچيتي عليه وعلى تاريخ امي
المشرف شنو حصلتي
باوعتلي بنص عين وهي تعوج بحلگها //ليش انا مچذبه
...لا بس انتي فضحتيني
هديل //فضحتج لو حبيب الگلب الي طايحه ويا علاقه وحب والله اعلم شمصخمه ويا طار منج
......لو مثل ما تگولين حب والله اعلم ما چان طار بس ليش خليتي الكليه كلها تعرف
هي ابتسمت بوقاحه وگالت //هيج ولان اكرهج ولان شايفه نفسج وانتي خلك خدامه الي والامي واختي
هزيت راسي ...لا مو لان تكرهيني لا لان انتي (اشرت باصبعي ) انتي تغارين مني ولان انا احسن منج
هديل اتخصرت بايد وحده وتهز الثانيه // هههههه بشنو احسن مني بتاريخ امج اليبهر لو باخوج الي ما تعرفين
وين هو وعد منو عايش لان ابن حرام
هزيت راسي. ... ... صحيح ابن حرام وصحيح امي تاريخها اسود بس لا انا ولا اختي ولا اخوي ابن الحرام
النه يد بهذا الشي بس اتذكري انتي الي بديتي ياهديل مو انا
هديل رفعت حاجبها //مو چنج اتهددين زين انا الج واعلمج
رديت عليها بنتر ...لا ما اهدد صدگي بس الي سويتي مو بس شوهتي بي سمعتي وحتى سمعتج
ضحكت وردت //ههههه وليش سمعتي خاف مصدگه روحج انتي وحنين بنات عباس لا حبيبتي الناس كلها تدري
شنو انتن ومنو امچن ومنين جابتجن حابه اذكرج ( اتقربت عليه ) انتي واختج مثل ما تكول امي كل اظفر من شارب
هزيت راسي وابتسم بمراره ... ... هم صحيح كلامج كله صحيح
هديل اتقربت مني //بعدين حبيبتي بدل ما نافخه ريشج وعلى اساس انتي فد شي مهم روحي ياالله روحي
استسبعي على صديقتج الي فضحتج واخذت صديقج العفو حبيبج او خطيبج ههههههههه صدك ناس
ما تعرف حجمها
(راحت تمشي وتحچي)
مصدگه نفسها تگول بت عمي ما شايفه روحها العرجه
رحت من يمها وانا اسمعها شلون تصنف وتضحك رحت امشي وانا مليانه قهر وكره وحقد حتى على نفسي
گعدت على مصطبه منتظره الخط وانا احس كل الطلاب والطالبات يباعولي بنظرة حقيره واحچي ويه نفسي
... ... يعني كل الي صارلي والي راح يصير كله من جوه راسج ياهديل
نبهني صوت هورن سياره شفت اكثر الطلبه جاي يطلعون من الكليه رحت امشي للخط وانا فكري مشتت طخت
بيه نسرين وهيه تبتسم كل مره ابتعد عنها واشمئز منها لكن
هالمره باوعتللها وابتسمت
وگتلها ...... العفو ما شفتج
نسرين بابتسامه // لا حبيببتي ولا يهمج
ضحكت بوجهها وهي سوتلي حركة سللام بايدها ورحت ركبت بالخط وانا احاول الملم خيبة املي اتقربت ع الجامه
وصرت اباوع للناس الي تمشي بالشارع والي راكبين بالسيارات وافكر بالي صار بيه واسئل نفسي
...كل هاي الناس عايشه وتريد تعيش حتى تحقق هدف بحياتها اما انا وحنين فما اعرف المن عيشتنا عايشات
حتى الناستنكل بينه وتعير وهذا كله من وره مياده
...ناديه من وره مياده لو كله منج انتي لو ساكته چان هسه عايشه انتي واختج ومياده
...اي عايشه ويه سلدار الي كتل ابوي وانا اشوفه يتنعم بخيره
ابتسمت باستهزاء وانا اعض اصبعي الوسط ... ومنو الي اتنعم بخير ابوج افراح هي وبناتها
هزيت راسي ......... هذا هو كل شي لازم يرجع المكانه وكل واحد لازم ياخذ جزائه والي عاقبوني بشي
انا ما مسويته لازم يتعاقبون بالشي الي همه سوو.يتعاقبون حلال حرام لازم يتعاقبون
وصلت للبيت ولاگتني حنين وهو وجهه مخطوف وگالت //انتي شمسويه
باوعتلها بتساؤل ...شمسويه
حنين //ما سمعتي هديل اشلون اجت وصارت تحچي
انا بدون اهتمام ...عادي حنونه ولا يهمج اتعودنا انتي لا تخافيين
//////////////////////////////
ناديه
حاولت امتص خوف حنين الي شفتها ترجف ومتوتره انا الي سويته ابتسمت بوجهه ونزعت الدنبوس
من شالي لان اعرف افراح راح تلزم شعري وهادي يخنگني وسط ذهول حنين واستغرابها ابرودة اعصابي
تگدرون اتگولون انا اعرف شنو راح يصير بيه لكن هالمره ما اهتميت دخلت للمطبخ ما لگيت احد وصلت
للصاله الداخليه شفت افراح يمها هديل وياسر وعمار واسيل گاعدين عبالك محكمه وهادي گاعد على كرسي
وهو يحرك رجلينه اووجهه مليان شر
من شافني وگف وافراح مثل ما گتلكم لزمتني من شعري قبله وهي تگلي
هلا بيج وبعارج يا گح......ياام الزلم واعدتي يجيج للبيت مال الدعاره بس مو العتب عليج العتب على الجانيج
ما يذبحج متاني على ما تحبلين مثل امج
باوعت الها وما جاوبت اتقرب يمي هادي الي مثل كل مره لزمني وبدا يخنك بيه وانا ما حاولت ادافع عن نفسي
ولا واحد من ولده حامالي بالعكس چانو ايباعوله وافراح تگله //اكتلها وطم عارها لاتالي وكت تجيب المكسوره
حنين گالت الها //عمه خافي ربح شنو العار وشنو هالكلام
هادي لزمني وصار يضرب بوكسات بوجهي ويگلي //اسمعي ولج هسه تگليلي هذا الي بالكليه منو وليش هيج
حاچيه ويه هديل
بقيت ساكته وافراح تگله //هادي شوفها شلون عين صلفه نسخه طبق الاصل من امها اذبحهاا لا تسويلك فضيحه
حنين صارت تبچي //عمه شتردين من عدنا حرام عليج
هي لزمت حنين وملشت شعرها وهي تگلها// انتي هم جاي دورج هادي بلانه بگ...
انا اتملصت من هادي لان هو انتبه الحنين ورحت صوب اختي عتيت ايد افراح وصعدنا فووك
وهي تگلي //العرجه انا الج وين ترحين شنو عبالج افوتها الج رايحه البتي ومفشلتها انا الج
هادي گلي// اوگفي واسمعيني شوفي من اليوم بعد ماكو كليه تحلمين اخليج تعتبين باب الحوش
ما رديت عليهم خليتهم ايصيحون وانا وحنين الي صارت تشهك من البچي وهي تگلي
- - - كله منج ليش ما دافعتي عن نفسج هديل تحچي اشكال عليج وتگول فشلتني بالكليه وهي مصادقه واحد يضحك
عليها يمشي ويحچي هاي من كل وعقلها اتزوجها انا اتزوج وحده امها كاتله ابوها ومسجونه وصارو الطلاب
يقارنون بيني وبينها
وصلت للغرفه لزمت حنين وحضنتها وانا امسح على ظهرها ولاول مره ما ابچي خليتها تهدا شويه واتمددنا
انا وياها وهي تباوع العيني الي زورگها هادي
واشوف القهر بوجهها انا هزيت الها راسي يعني عادي مو مشكله اتعودت چنت اريد بس اطمنها انو انا زينه
وما بيه شي
واكيد بقينا بلا غدا وحنين مو مثل قبل تبچي اذا ما تاكل العصر اتصلت بعمي كرم
