رواية ناديه الفصل التاسع والثلاثون 39 بقلم انين الليل

//////////////////////. 

ناديه 

بتنا يم بيبي جميله وتقريبا نفس ما انا ما انام بالليل عمه شمس باتت يمنا وبقينا نسولف وهي تگلي 

ديري بالج من افراح وبناتها لان هسه راح يشنن حرب عليج وياهن هادي ونصره 

سالتها //عمه شتگولين هادي راح يسكت 

شمس //اسمعي ناديه حتى لو هادي سكت افراح ما راح تسكت لازم تكونين حذره وتتصرفين بذكاء 

...اعرف عمه وانا متاكده ما راح تسكت

شمس //الصدك انتي سباعيه واتصرفتي زين بس گليلي صدك انتي ساحبه الوصايا من سراج من قبل سنتين 

ضحكت ......هههههههه لا عمه اصلا كل شي صار قبل تلث تيام بس انا فكرت اسوي هيج حتى اجنب نفسي المشاكل 

شمس //ما طول سراج وراج لا تخافين

هزيت راسي بالنفي ...لا عمه سراج ما شفته من اكثر من سنه بعد شنو هو وراي 

شمس //هسه مثل ما گتلج ديري بالج من افراح تره راح تشن حرب عالميه 

...وانا هم احاربها خو ما اسكت كافي شبعت ضيم وقهر ومذله انا واختي 

شمس//نامي مو وراج دواام 

...لا ما اداوم اريد اشتري ملابس وحتى شويه وجهي يطيب

شمس //انكسرت ايدهم مي خالف بشويه مكياج يصفى وجهج

...لاعمه انا اصلا ما اخلي مكياج بعدين منيلي 

شمس ابتسمت وگالت //انتي حلوه بدون مكياج بس يراد تعتنيين بنفسج ولازم تفكرين شلون تحافظين 

على حلالج وحلال اختج وتديرين بالج من هاي الحيه افراح 

...... ان شالله عمه

جميله عبالنه نايمه گالت //اي اسمعي كلام عمتج وديري بالج من افراح ونصره 

شمس گعدت على حيلها وگالت //هسه يمه لو زهراء قابله بهادي ما چان كل هذا صار وهسه هنه عايشات 

ابيت ابوهن معززات مكرمات 

جميله وهي خاله ايدها على عيونها //تدرين بيه حلفت ما اجبر زهراء من لمن اتطلگت وعلى كيفج شمس لو ماخذه 

هادي چان هسه يباوع الها مثل ما يباوع للبنات انتي من كل وعقلج بت نصره تخلي يشوف دربه

صفنت ويه نفسي وكلت يعني هادي خطب زهراء بعدين اتذكرت لمن زهراء اتعاركت ويه افراح على مودنا 

وگالت الها صوجي ما قبلت بهادي 

يعني عمي هادي خاطب زهراء وانا اشوفه من تجي شلون يبقى صافن عليها ومن تحچي يسمع الها يعني

 عمي هادي خطب زهراء وطلب منها تبقى ويه بيبي او ويانه يعني عمي هادي يدري بينا احنا بنات اخو 

لا ويجوز طلب من زهراء الزواج لان يدري بيها تحبنا ونحبها ويجوز چان يريدها اتاثر علينه حتى نتنازل الها 

على ورث ابونه ويجوز ويجوز اوووه هسه زهراء اتزوجت وهادي يشوف العمى وما يشوفنا

بقيت افكر وانا استذكر كل المآسي الي مريت بيها 

اذن الفجر وگعدت بيبي وعمه للصلاة وانا صليت ورجعت نمت ما حسيت اله على حنين وهي تگلي 

اگعدي سويت الريوك 

گعدت وشفت عمه شمس نايمه وبيبي جميله ضحكت بوجهي گتلها وانا اتمغط ومبتسمه ...صباح الحير 

جميله// هلا بهالصباح صباحج نور 

...بيبي شنو اسويلج ريوك 

جميله // چا مو حنينه گالت سوت

......ما عليج بحنين هاي تخدر چاي وتطلع جبن وتگول ريوك 

جميله // نعمه وخير اسلگيلي بيضه 

.........مو يدلل الحلو الابيض الي يخبل عبالي يريد گيمر چان ما قبلت 

جميله //. عود ليش 

......شنو بيبي شايفه گيمر ياكل گيمر

وضحكت رحت للمطبخ شفت حنين تتريك وهي تگول //شنو ما ترحين 

......لا اليوم ما اروح ذكرتيني خلي اخابر اماني 

واتصلت باماني وگتلها لاتمرون بيه تعبانه ما اداوم 

حنين اتقربت عليه وشاورتني //ندووش تتصورين افراح وهادي يسكتون 

باوعت الها وابتسمت ......شبيج حنونه ما مسىوين شي غلط لا تخافيين ما يسويلنه شي

گعد ياسر انا ما سلمت علي اخذت ريوك بيبي ورحت اتريك وياها لان عمه شمس بقت نايمه اتريكت انا وبيبي

 واجت حنين الي كالت هي راح تروح للمدرسه وراها بيبي جميله كملت ريوك وگلتلي //جيبيلي استكان چاي

 اخذت الصينيه وعيني بعين ياسر الي باوعلي وگال //شنو اليوم ما تداومين 

هزيت راسي ......لا ما اداوم 

ياسر //وليش يابه 

انا باستهزاء ......اول شي باوع الوجهي والفضل الابوك وامك وانت هم ما قصرت

ياسر رد بسرعه // انا انا ما ضربتج 

...والشي الثاني لازم انت ومرتضى ترحون تسألون ايجوز انا مفبركه القصه 

ياسر //كافي ناديه احنه عرفنا صاير سوء فهم

ابتسمت باستهزاء /الله عليك سوء فهم يعني انا شفت اختك گاعده بين تلث شباب ممكن اجي واتقول عليها 

وانت وابوك اتضربوها وبعدين اجي اعتذر واكللكم اعذروني سوء فهم اكيد راح تعذروني مو 

ياسر //ناديه الي صار كان بالنسبه الي مف......

قاطعته //شوف ياسر الي صار امس فتح عيوني على هواي اشياء اولهم انو بهاي الدنيا محد ايفيدك بس نفسك

لذلك انا ما صار اي شي يهمني لان خاب ظني بهواي ناس واولهم انت 

ياسر //اي واحد بمكاني من يسمع الي صار يگوم ايموتج 

  باوعتله بتحدي واشرت براسي ... ... رووح موت اختك الي ذبت عليه كلام ما صاير 

هو. جر نفس وگال //راح اجيبلج ملابس جدد بدل الي اخذتهن امي 

 رديت باستهزاء ......لا ياسر شكرا صار عندي فلوس وانا اشتري بس ياريت تروح تتاكد انت ومرتضى

درت صبيت استكان چاي البيبي جميله ورجعت للديوان وانا اشوف افراح گعدت وهي تريد تنفجر عليه وراها 

بشويه گعدت شمس وراحت اتغسل ورحت سويت الها ريوك هي گالت // اجي اتريك بالمطبخ

صعدت فووك اباوع للغرفه الي لمت كل احزانه وقهرنا صعدت ردت الم ملابسنا لكن ما گدرت لان من اجمعهن 

لازم اجمع الحزن والضيم والجوع والخوف لازم اجمع البرد بالشتا بدون صوبه لان تدخن وتعمينه وبالاساس نحمي 

عليها ماي لو بالحر لمن بقينا شهر بدون لامروحه ولا سبلت لمن ما اجت زهراء وجابت سبلت وعمال وركبو

النه بيومها عبالك صار عدنا عيد

نزلت جوه وانا اتمنى اطلع من كل بيت هادي لكن وين اروح وخصوصا وانا ما اعرف شي اما الكلام الي حچيته 

فلان شفت وسمعت من المحامي ومن عمه زهراء انطاني شويه قوه وصرت استرجع الاحداث ومقدار الضرب والاهانه 

هي الي خلتني قويه واوگف بوجه هادي ومرته

نزلت جوه وانا اسمع شمس تگل الافراح //ام ياسر تره ما صايره ابنيه بالكليه والثانيه بالاعداديه وهنه يسبحن بالبيتونه

وانتم ست حمامات ابيتكم 

افراح تحچي بعصبيه //اي هذا الموجود انتم فرضتوهن عليه وانا گوه متحمله 

دخلت وگفت اباب المطبخ واتخصرت وگلت ......لا مو گوه متحمله انتي اتحملتي الخاطر فلوسنا لولو نتحاسب 

اطلع هواي اطلبكم 

صارت اتاشر عليه وتگول //هاج اتفضلي سمعتي باذنج سمعتن شلون ترادد ومحد بعينها

شمس //لا ما ترادد جاوبت على كلامج 

افراح //اي خو انتي وياها لان تكرهيني على كره امي 

شمس // انا لا اكرهج ولا اكره امج انا اگول الدنيا دواره وبنادم على كيفه 

افراح // وانا ما سويت شي عدي ولد وهنه مراهقات واخاف تدرين بعد كلمن وساسه 

جاوبتها ......صحيح عمه وما دام هيج انا فكرت اخذ الديوانيه البره هي ومطبخها والحمام وانتم الي يجيكم دخلو

 للديوان الداخلي

افراح // هاا خاف تتشاقين شوفي ولج امشي عدل لا والله اسويلج مصيبه ما تطلعين منها 

اتقربت وگلت ...شتسوين مثلا انتي وبتج وحتى رجلج انكشفتو

اجت بيبي جميله // ناديه بيبي اسكتي وانتي ام ياسر عيب هذا الكلام شنو تسويلها مصيبه تره من يدري كرم

وقيس ما يرضون على كلامج 

 افراح //زين عمه ما طول هيج فهميها البت ابن اختج تگعد هي واختها باحترامها تاخذ الغرفه الفوك وتدير بالها 

مو تذبلها داهيه على واحد من ولدي

شمس // شبيج افراح شنو هالكلام 

افراح //لا ما بيه شي وكلكم تعرفون مني هي وامهن ياهي مو جايات تطلعن نفسجن بس انتن وبس خاله ام كرم 

هاي امهن مياده الكتلت ابن اختج هي وصاحبها الي چانت تصعده فوك ينام وياها وهاي (اتاشر عليه ) وهاي تباوع 

بعيونها تره من شهدت على امها ما تدري امها راح تنعدم لا حچت شي شافته مو محبة بعباس فمو بعيده هي او 

اختها تذب سالفه على واحد من ولدي

جميله // چا ما طوول هيجي انتي تخافيين انطوها الديوان احسن 

شمس //اي وتبني سياج وتطلع باب عليكم 

افراح // ياا اخرب بيتي على مود بنات مياده هذا هو ايگعدن بالغرفه الفوك انا گلت الهادي وقنعته 

جميله باستهزاء //نعم الله عليج ما طوول قنعتي 

شمس // هذا هو ام ياسر والشغل يتقسم عليهن

افراح باستغراب //شنو ؟!

جاوبتها ابرود ... اي عمه يتقسم لا تنسين راح ادفع اجار 

افراح بنتر // انچبي محتاجين الاجارج 

ابتسمت بخبث وگعدت على الكرسي الي چان ممنوع نگعد علي ...... عمه صار اكثر من اربع سنين تاخذون 

بالراتب والاجارات يعني من ادفع اجار الگعدتنا وياكم انا واختي احسن 

جميله // كافي بيبي الشغل يتقسم

......زين انا واختي علينه العشا وغسل مواعينه وتنظيف الطارمات

افراح //شنو وباقي الشغل ؟

......عمه مثل ما چنتي قبل اول ما اجينه لگينه البيت نظيف ويخبل وانتي عندج بنتين واحنه اثنين قسمي عليهن الشغل 

حالهن من حالنه 

افراح باستهزاء //اي چا ليش اسيل السنه سادس وهديل عدها كليه 

رديت عليها ...+بعد عمه مشكلتج وحنين عدها دراسه وانا دراستي صعبه لا تنسين هندسه

(باوعت الشمس )عمه يمته يجي عليج عمي قيس 

شمس //اليوم العصر ليش ؟

... ايي مو ردت اروح وياكم اشتري ملابس وجربايه الي والحنين 

شمس //اي تدللين وصار 

راحت افراح ورجعت جايبه التنوره والقميص وهي تگول //هاج هذني ملابسج اخذيهن 

باوعتلها بنص عين ورديتهن بايدي ......لا عمه مني الج اقصد الهديل 

افراح بتكبر // هديل ما تلبس ملابس غيرها عدها كومه

جميله // ليش هسه صارت ما تلبس مو دووم كل ما تجيب الهن زهراء گبل لا يگدرنه انتي تاخذينهن وتگلين 

البناتج گدرنهن واليعجبج تاخذينه البناتج 

افراح // اي بس هذني ما اريدهن 

جاوبتها ...سويهن وصلة مسح للطباخ

افراح // والله خوش الظاهرضامتهن الي 

ماجاوبتها صعدت واسمعها تحچي وتگل الشمس // كله منج انتي ورجلج وكرم كبرتو راسها

نزلت على كيف لان اريد بس اسمع ما اريد اشترك بالكلام 

شمس //عيب هذا الكلام شنو كبرنه راسها 

افراح //اي ما تشوفينها شلون ترادد عبالك هي ام الراهي 

جميله// البنيه ما راددت 

افراح // ها انتي دومج تكرهيني لان تكرهين امي 

جميله // اي ليش الچذب اكره امج بس مالت الله احب قيس ومحيي

افراح //. تحبيين قيس لان ماخذ بتج ومحيي لان مرته ما تريد اني 

   جميله ضربت الكاع بعكازتها // ولج دا بسج شايله البنات وراگعتهن بالگاع 

كافي تره ندري بيج لا تحبينهن ولا تشوفينهن ع الصراط المستقيم بس انتي مستفاده منهن 

افراح بعصبيه // هاا شمستفاده فوگها فوگ ما مخليتهن ابيتي 

جميله //تكافي ابيتي ام بيت تره كلنه ندري كل شهر تقبضون تلث ملايين ما ادري اكثر وهنه خدامات بلگمتهن 

وياريت لگمه افضالتج وافضالت بناتج

افراح بنتر // ويطبهن طووب گايله الامهن .........وتعوفهن 

جميله // اي بهاي ما چذبتي امهن نذله وخلتهن بيدج 

شمس // يمه هسه هذا الحچي ما منه فايده وانتي ام ياسر تره ناديه وحنين حبابات وهواي اتعذبن ديري بالج عليهن 

على ما يجي نصيبهن 

افراح //عليمن تضحكين ام احمد هو ياهو ايگلبهن نسيتي عملة امهن

جميله بعصبيه // افراح لا تطغيين 

افراح // خاله شنو اطغى 

جميله // اي كلامج طغى من تگولين ياهو ايگلبهن تره الدنيا دواره وانتي عدج بنات 

افراح // خاله ما گايله غير الصدك ياهو ايگلب بنات امهن كاتله ابوهن هي وصاحبها وطلعت حامل من عده بولد 

جميله // ليش خو ولد عمهن ياخذوهن 

افراح نشغت // انتي خاله شتحچين من كل وعقلج 

جميله // ها ولج شنو من كل وعقلي مسودنه يمج

شمس // يمه كافي خليهن يحصللهن شهاده والله كريم 

افراح // بعد خاله ليش تصيحين هاي بتج ما كالت اخذ وحده منهن الولدي مو هالسكتت لا تعرفينها وتحرفينها

جميله // انا احرفها 

افراح // اي تحرفينها بربج هاي بتج وكرم ابنج منو يقبل ياخذ وحده من بنات مياده 

جميله وهي تحرك بايدها //بسج بسج الهن الله لحد يتمگطع بيهن وتعاي اكلج اجم وحده بوحده بوحده عد امها وابوها 

واخوان وبيت وصيت وهي تلعب ع الحبلين تره ربج الستار واله لو بايد ابنادم ما ظل احد مستور واحد يفضح بالثاني

من سمعت صعدت للمخزن وهناك طلعت صورة مياده باوعت الها وحاچيت الصوره 

 ... شنو حصلتي ادري بيج انتي ما مرتاحه ومتعذبه بس احنه انا واختي شنو ذنبنا نتعذب بجرمج 

ما اتمالكت نفسي بچيت شمس دخلت بقت واگفه گالت //سمعتي مو 

هزيت راسي يعني (اي )شمس //لا تهتمين افراح من يومها وهي حقوده انتي ما شفتي شنو سوت بيه قبل لا تتزوج 

وما شفتي شلون هي وامها جرن هادي خليها تولي ولا تهتمين

باوعت واتحسرت ...عمه شلون ما اهتم اذا وجهي بوجهها ومن گعدنا عدهم على نفس الوتيره بنات مياده وبنات مياده 

شمس //اي وراح تزيد بس انتي كوني حذره منها لان افراح ما تخاف من الله والما يخاف من الله كل شي يسوي 

اتحسرت وجاوبت ......الله كريم عمه 

شمس // ظميها الصوره زين وديري بالج من افراح وبناتها وحتى هادي 

......... ادري عمه وحتى عمار وياسر وكل بيت هادي

نزلت ويه عمه شمس وغسلت المواعين وافراح لكيتها مطلعه دجاج وسالگه لحم انا نگعت التمن ورحت لميت 

الفراشات الظهر اجت حنين اللي اشوف بعيونها فرحه وترقب وخوف وبعدها اجت اسيل انوب عمار الي صار 

يتشاقى ويه بيبي جميله لكن عينه ماتخلوومن الخباثه ورا اجت هديل وهادي وكعدنا نتغدا وانا اشوف بعيون هديل 

واسيل اشمئزاز واحتقار لان كعدناوياهم ع السفره

وقررت بعد اكلي انا واختي بالغرفه ما ننزل وياهم وهذا الشي ايدتني بي عمه شمس من طلعنا للسوك 

وره ما شربنا چاي هادي استاذن بيبي جميله گلها يروح يرتاح وافراح راحت ويا اهنا شمس گالت 

ابو ياسر العصر ناخذ البنات حتى يتسوگن 

هو بدون ما يدور وجهه //اي ام احمد روحوا خابرني قيس

واشرت الحنين تصعد وما تغسل المواعين حنين باوعتلي وصعدت وانا وراها گالت 

حنين //ندووش لو مخليتني غاسله المواعين 

......لا حنين ديري بالج قسمنا الشغل وما علينه بيهم واذا يردون انطي بس اجار الغرفه وناكل ابحدنا 

حنين //ياريت علوا 

......حنونه ترحين ويانه للسوك

:لا ندووش باچر امتحان 

......زين تنزلين يم بيبي جميله ولا تفكين حلگج وياهن باي شي يحچنا 

حنين //اي مثل ما تردين 

اجتني رساله من سراج :: صيري قويه ابد لا تضعفين انا وراج

ما رديت علي لكن من اقرا رسايله ما اعرف ليش اطمن ولبست عباتي الاسلاميه وشالي وخليت حنين تنزل گدامي 

يم بيبي جميله وبس نزلنا اجه عمي كرم وقيس وطلعنا 

رحنا ابسيارة عمو كرم الي گال //شنو تردين تشترين 

جاوبته ......عمو اول مره خلي نروح المحل بابا

همه ما عقبو مشينا شويه بالسياره وصلنه شافني ثامر الي اجه واتسالم ويه كرم وقيس وسلم عليه رديت السلام وگتله 

...... شوف ثامر هاي گدام عمامي وعمتي بعد ايراد المحل يمي واريد اعتبارا من اليوم اي شي ينباع يتسجل بالسجل 

مال البيع 

وسجل المشتريات اريده ابحده 

ثامر // والله كل شي مسجل 

...... اعرف واعتبارا من اليوم گدام عمامي الحساب يمي

ثامر // صار بس اذا اجه ابو ياسر تعرفون هو المحل هذا ( واشر على محل بصفه) محله ودووم يمر 

بي من يسالني شجاوبه 

  رديت ...... گله بت اخوك تگول ايراد المحل كل شهر يتسلم الها 

كرم //عمي ثامر ندري بيك من سنين امين وگد الامانه 

ثامر // الله شاهد ابو مرتضى غير راتبي فلس زايد ما اخذ لان هاي ذمه اتحاسب عليها گدام رب العالمين 

قيس // الله يوفقك رجال وصنت الامانه

درت وجهي صوب المحل الثاني وگتلهم ...... هذا المحل محل ابوي وفتحه بفلوس الفصل مالته والله يدري وانتو 

تدرون هادي بعد لا يداعيني بالبيت مال بيبي لان كلكم اوگفكم بالمحكمه اتقسمون يمين 

كرم // كلنه نعرف بس هو اخذه خاوه وبوكتها سراج گال اسكتو

انا بنتر ......اي اسكتو كل الي مرينه بي انا واختي ويگللكم اسكتو

باوعت الثامر وگتله ......بلا زحمه انطيني خمسميه محتاجتهن 

ثامر //تدللين حقج

انطاني ورحت ويه عمو كرم واشتريت جرابي اثنين وكنتور تلث ابواب ميز امرايه زغير قيس گلي 

ليش ما اخذتي غرفه 

......لا عمو بالوقت الحاضر كافي عليه انا واختي لان اساسا ما شايفينها للغرفه بعدنا 

قيس باستغزاب //يعني ما داخلتلها 

  هزيت راسي ... .... ابد عمو ولا شايفتها

طلبت من عمي قيس اروح انا وعمه شمس اشتري ملابس همه بقو ينتظرونه واحنه رحنا عمه شمس اخذتني المحل

 انا انبهرت ولا مره واصلتله رغم هو مو بعيد وهي اخذتلي تنوره وبدي وقميص وجنطه واخذتلي مكياج انا 

ما وافقت بس هيه كالت // اخذيهن تحتاجيهن سفره حفله الصديقه 

واشتريت الي والحنين تراكات واخذت الحنين فستان ورجعنا بسرعه 

لان عمه شمس گالت // اجيت وياج هالمره بس حبيت ادليج بالمحل حتى تجين مره ثانيه تشترين من عنده

ما اوصف شعوري وانا ادفع او واثقه من نفسي عندي فلوس ومو بحاجة احد ولا منتظره احد ينطيني او يتصدق عليه

رفعت راسي للسما ودعيت الابوي ... الله يرحمك بابا ما خليتنه محتاجات احد لكن طمع افراح وهادي خلونه 

مثل المجاديه كلشي حسرو علينه

رجعت وياي عمه شمس ولكينه عمي قيس هو وكرم جايين وشايلين الاثاث الي اشتريته ومصعدينه فووك 

وياهم مرتضى

 صعدنا لگيت حنين منظفه الغرفه الي چانت سادتها طول الاربع سنين ما اتذكر اجوهم خطار

 ونامو بيها بس حقارتها الافراح خلتنه ذليلات بالمخزن

بيبي جميله گالت // ياالله يمه كرم خلي نروح 

كرم //حجيه نتعشى ونروح هسه وكت عشا صدك هادي وين 

افراح // توه اجه تعبان وفات يرتاح 

قيس خزرها يعني اندهي 

جميله باوعتلي وگالت // تعاي گليلي جبتيلج ملابس الج والاختج

انا هزيت راسي وابتسمت 

جميله ترفع ايدها بالدعاء // تلبسينهن بالفرح والستر 

اتقربت عليها وحضنتها وشميتها من صدرها واتذكرت بيبي منيره وحضنها الدافي بچييت بصوت جميله

اتمسد على ظهري وهي تگول //كافي لا تبچيين ما بيه حييل وعيوني عمن 

مرتضى بضحك // كافي ناديه لاتعمين عيون جملو وانوب محد ياخذها 

هي وخرتني وگالت المرتضى // شيب ابوك انا الهسه حلوه خو مو مثل شميسه وافريحه وامك چنهن حصن

شمس // ياا يمه گدام قيس هسه يطگني بمره 

جميله // شحده فنه 

افراح // لازم خرزتج قويه خاله 

جميله //اي خرزتي قويه بس مو بقوة خرزتج 

كرم راد يسكت الفريقين //مرتضى رووح جيب كباب ومعلاك وصمون وببسي 

افراح // يا ابو مرتضى شلقصه عدنا خير من الله

كرم //الله يزيده بس انا حبيت نلتم ونتعشى 

افراح. // هلا بيكم 

كرم // بابا مو تنسى الفواكه 

راح مرتضى وانا صعدت فووك للغرفه لگيت حنين فارشه الجرابي ومنزله ملابسنا وهي تگول 

اخيرا صاررعدنا غرفه لا وبيها حمام 

......اي حبيبتي وبعد كل شي تردينه اشتري

حنين // تلفزيون 

هزيت راسي وابتسمت ......اي وغساله 

   حنين // صدك ؟! 

...والله باقي اسبوع ع الراتب ولازم نعرف شلون نحافظ على فلوسنا مو نطيرهن 

حنين //شلون يعني ؟

......يعني بس هالشهر راح ناخذ رالراتب واجار البيت بس شهر الثاني بس الراتب نصرف منه 

والاجارات وحساب المحل انضمهن

حنين //بكيفج ندووش انا اهم شي صار عدي جربايه وراح يصير تلفزيون وغساله 

......اي حبيبتي وحتى ثلاجه احنه مو فقره بابا خلانه ثروه بس 

حنين // ادري خيزبونه وشرشبيل اخذوهن 

...اي مثل ما تگولين لازم ندير بالنه كلش زين وبعد ما اوصيج ديري بالج من عمار

اندك الباب وراحت حنين فتحته شفنه هديل واسيل واگفات باوعت الهن وگلت ......اتفضلن عيني ليش واگفات 

اسيل بنتر // من نريد نتفضل محد يمنعنا هذا بيتنا 

باوعت الها وگلت ...اي اكيد بيتكم واحنه ماجرات هاي الغرفه من اهلج 

هديل // شنو انتي ماجره الغرفه من اهلي

هزيت راسي ... ... اي والله وكل هاي السنين احنه كاعدات بالاجار اصلا اهلج قابضيين من عدنا 

اجار خمسين سنه ليگدام 

اتقربت اسيل وگالت //شوفي مو عبالج صار عندج راتب واتعجبتي تره راتبج ما يجيبلي انا وهديل احذيه 

انا ابرود // ادري بس احنه ما شايفات وتونه لزمنه فلوس فلازم نتعجب 

اسيل // اي مو انتي فگر 

حنين //وهسه شرايدات

هديل // شوفي منو تحچي وتگلنه شرايدات 

حنين //ليش عيني شبيه خاف مو حلوه وتارسه وجهي مكياج حتى الناس تباوعلي 

اسيل //امشي هدوله من هذني البيئه 

اتقربت مني هديل وهي تحچي وياي بشماته //شوفي ولچ انتي واختچ لو مو تصير عندج فلوس تبقى امچ مياده 

ام الزلم مياده الي انعدمت لان كتلت ابوج على مود صاحبها ومو عبالج اسكتلج لان شيشتي ياسر عليه راح تشوفين 

شسوي 

وطلعن واسيل تحچي //مصدگات نفسهن بنات مياده عبالهن ينظفن

عرفت انو هذني البنات لا يمكن بيوم من الايام يعتبرنه اقاربهن لذلك لازم انا واختي ما نعتبرهن بنات عمنا 

ولازم نكون اكثر حذر من قبل

صليت ونزلنه انا وحنين واشوف الكل گاعد افراح وبناتها وبيبي جميله بعدهي اتصلي واكيد عمي كرم وقيس يصلون

اجه مرتضى وجاب العشا وانا رحت للمطبخ سويت البيبي حليب صبيت الها بالكوب وصمونه واجه ياسر اخذ السفره 

فرشها بالصاله وكلي // حضري بس مواعين وجيبيهن وراي 

وصار . ياسر هو الي يخلي بالمواعين الكباب والتكه والمعلاك والمقبلات 

ومرتضى جايب الصمون والببسي والفواكه انا خدرت الچاي واجيت گعدت انا وحنين ما انتظرت احد يگلي تعالي

وصرنا ناكل وانا اشوف افراح وبناتها شلون مقهورات عكس ياسر وحتى عمار چانو حابيين هاي اللمه 

بعدها شلنا المواعين ورحنا انا وحنيين للمطبخ حنين صبت الچاي وانا بلشت اغسل المواعين من كملت صاح عليه 

عمو كرم // ناديه بابا اذا كملتي شغل تعالي رايدج 

انا صبيتلي كوب چاي واجيت ... ... ها عمو 

اهنا عمي كرم باوع الهادي وگله //ابو ياسر اليوم رحنا انا وابو احمد ويانه شمس وناديه ومرينه مناك على ثامر 

لان ناديه اخذت فلوس من عنده واشترت اغراض 

هادي باوعلي ولم حلگه وهز راسه وگال // بيها الخير

قيس // ابو ياسر الحقيقه عدنا كلام وياك ابيناتنا ويانه ناديه 

هادي بعصبيه //لا ليش ابيناتنا ماكو احد غريب احچي اهنا 

قيس // بخصوص بيت المرحومه امك 

هادي جاوب بعصبيه // بيت امي الي انا واخواتي وهاي (اشر عليه ) ما الها بالبيت لا هي ولا اختها 

كرم //بس البيت باسمها 

هادي //تتنازل عنه وهذا هو

كرم /// ابو ياسر ناديه تگول تتنازل عن بيت حبوبتها الي هو بيتها وبااسمها مقابل المحل 

هادي باستغراب // يامحل

ردت احچي كرم سبقني // المحل الچبير ابضاعته تتنازل عنه وهي تتنازل عن البيت الك والاخواتك 

هادي هو وافراح وگفو هادي گال// شنو شنو ما سمعت تريد المحل جناب ناديه 

افراح //صلوات قرة عينك هادي بت مياده خوش شامه ايدها على حلالنه

قيس // افراح اسكتي 

افراح بعصبيه // لا ما اسكت شني حبوبه يامحل هذا

راد كرم يحچي وگفت وگلت ......محل ابوي محل عباس الي اشترا وعمي اخذه وبفلوس الفصل خله بي سلعه 

هادي // انچبي ولج كافي لا اكسر اسنونج 

كرم //شنو هالحچي هذا هادي 

هادي //هذا الحچي وما عندي غيره 

جاوبته ......هذا هو عمي انا وحنين راح نروح البيت ابو مرتضى لو البيت ابو احمد وانت عمي اشتكي علينه 

واذا عندك مستند شي يثبت انو احنه مو بنات عباس طلعه للمحكمه حتى تحردنا من كل ورث ابونه

هادي // انچبي لا اگوم اكسر راسج وانعل والديج شني اشتكي تتنازلين وهسه وغصبن ما عليج 

جاوبته ابرود رغم خايفه ...... زين عمي انا راح اطلع انا واختي انت تشتكي وانا اوگف (وصرت ااشر باصبعي )

اوگف كرم وقيس گدام القاضي وياهم ثامر وحتى سراج ويحلفون المحل المن وشلون انت اخذته 

هادي يباوع الكرم // شنو هاي تحچي صدك ؟

كرم // والله اسمعني هادي اذا يطلبنا القاضي للشهاده نشهد بالحق 

هادي // ها هيج صار الحچي 

كرم // اي هيج بعد هاي الحقيقه وانا بوكتها شفت بعيني وسمعت باذني 

افراح // والله خوش بت مياده صارت تتشرط يمكن ماليه ايدها بالمحامي 

...اي مثل ما تگولين وهذا ابنج محامي واسالي

اندك الباب وراح عمار گال // عمه نوال هي وسلوى اجو 

اجن وسلمن ونوال گالت // خيير اشو مجتمعين 

قيس // لا والله من زمان ما شايفين هادي وسيرنه عليهم 

نوال // همزين لكيناكم حتى نعرف شنو الي صاير 

شمس //خير شصاير ؟

سمعنا هاي (واشرت عليه ) جاي تطالب بحلال اخوي 

شمس //شنو تطالب نوال ناديه بلغت وصار الحلال من حقها 

نوال بنتر // ياحق هذا ما الهن كل حق اشو اول مره امي كسرت ظهرها عليهن وانوب هادي 

جميله //ليش خاله هادي رباهن وصرف عليهن مو من جيبه من راتب ابوهن والمحل واجار البيت من يكون 

يصرفن باديهن ورجليهن ما يخلص حلالهن 

نوال // وبيت امي

كرم // البيت باسمها والمحامي راوانه العقود 

نوال // اطعن بي وكلكم تشهدون امي من سجلت البيت چانت مريضه 

جميله // وانتي وين ما گعدتي وداريتيها وما خليتيها اتسجل البيت باسم ناديه 

نوال // والله اشتكي وكلكم اطلبكم للشهاده

جميله // وانا اول وحده اشهد اگول اختي كتبت البيت وهي كل شي ما بيها واكول ناديه واختها الهن الراتب 

والمحل والبيت الحق حق وحتى احلف على محل هادي وعود اشتكو عليه گولو مخرفه اله كلكم اسجنكم 

نوال // ما طول هيج خاله وتخافين من الله چا ما تطالبين بحق البستان الي اخذه ابو قيس من ابوي  

لو لا هذا حلال لان قيس ماخذ بتج

جميله //لا خاله مو انا الي اقبل بالباطل صحيح السان واكره ابراهيم الله يرحمه بس لا خليها 

ابالج لو هذا ابني

 (وتاشر على كرم) ياكل فلس حرام ما اقبل واذا على بستان ابوج اسالي عنه اخوج هادي ومرته 

تره قيس رجعه من اكثر من خمس سنين

//////////////////////////////

جميله //لا خاله البستان رجعه قيس من اكثر من خمس سنوات واسألي هادي وافراح 

كانت مفاجئه والكل بقى صافن سلوى گالت //هادي كلام خالتي صحيح قيس مرجع البستان 

جميله // اي رجعه شنو تره بعدني ما مخرفه 

شمس //قيس واخو رجعو البستان كله لان حسبو الارباح الي اخذ وهن من چان ابوهم عايش 

وما رادوشي يبقى بذمة ابوهم

نوال اتقربت من هادي //هادي شو ما ندري محد گلنه 

هادي وگف // البستان موجود وانا گلت بس استلم بيت امي اقسمه بالتساوي 

نوال باستهزاء// يابيت هذا الي اخذته ناديه والله خوش حلال ابوي وتعبه صار بخت ناديه وهادي واحنه 

طلعنا كل شي ماكو 

قيس // لا خويه مو صحيح البستان اخذه اخوكم ولحد هسه ما اتنازلنه عنه لان الشغله بيها حلال وحرام 

فهادي گال انا اراضي اخواتي ويبقى الي

سلوى // والله لو ما خالتي جميله حاچيه چان ما ندري رجعتولنه بستان ابوي

نوال باوعت الافراح وگالت // افراح ما دام صار خمس سنين ضامه علينه رجعة البستان شكو خابرتيني وتعاي 

وشوفي حلال ابوج امج كاتبته باسم ناديه 

افراح بارتباك //اي انا ما مچذبه اساليهم البارحه اجه المحامي لهنا وهو يگول بيت امج صفه الناديه بيع وشرا

نوال باستهزاء//شنو شنو بيت امي تاخذه هاي (وتاشر عليه )

كرم //اي البيت خالتي الله يرحمها بايعته عليها والكل يعرف بهذا الشي 

نوال //لا ما نعرف لان هادي گال حليت الموضوع تالي يطلع البيت بعده باسم نديوه 

سلوى // شنو هادي گايلج حال موضوع البيت شلون حله 

  نوال // اي حله صفه البيت الناديه والبستان عد هادي واحنه ياغافلين الكم الله

هادي بعصبيه //بس كافي شنو ولج هالحچي اذا ع البستان فالبستان ما اتصرفت بي ردت كل شي يتوزع 

حسب الاصول 

نوال اتقربت مني وكالت //يااصول هايه هادي صار خمس سنين والبستان تاكل بي ابحدك وانوبه كملتوها 

 ابت الساقطه تاخذ بيت امي والله اموتها وما تاخذه 

بوكتها اتذكرت شلون لمن ضربتني راشدي من شهدت على مياده لو لمن طالبت بالذهب من اتوفت بيبي 

لو نظراتها الكلها كره 

باوعت الها بتحدي وگلت ......البيت بيتي والي عنده شي ذيج محكمه ويروح يشتكي 

نوال //والله زين جاي اتهددنا بت مياده 

افراح //اي متعلمه على المحاكم من هلگدها وامها بعد الها تاريخ 

نوال // بعد لاعتب هاي النغله شيطلع منها

لزمت ايد حنين ودرت اريد اروح للغرفه باوعت وگلت 

......البيت انا اشتريته من اخوجن بفلوس محل ابوي والفصل مالته تتذكرون لو لا وما طول هيج صار الحچي 

انا مستعده اوگف بالمحكمه واخذ حقي والي يريد يطعن بنسبنا ذيج المحاكم وخلي يطعن

(اتقربت اكثر من نوال )اما انتي ياست نوال الي تطالبين بورث امج تتذكرين لمن اگلج ساعديني بس اوصلها 

للحمام بيومها درتي وجهج ورحتي واكثر من مره وانا اشوفج وانتي اتفتشين بغراضها لومن لگيتج تخنگين بيها 

وتگليلها وين ذهبج وين فلوسج وسكتت وما حچيت هسه جايين تطعنون بيه وبنسبي اي انا امي مياده الي كتلت 

رجلها هي وصاحبها بس ما عفت بيبيتي ام ابوي داريتها وحافظت على كرامتها

... ... وانتم اولاد خليل ما يهمكم اي شي بگد ما تهمكم الفلوس ماشي انا حاضره محكمه شرع حاضره 

بس كل واحد يحچي العده ومو عبالكم بعدني ناديه الطفله الفقيره لا هسه انا ناديه السباعيه المهندسه الي اعرف 

شلون احافظ على نفسي وعلى اختي وشلون احافظ على حقنا

(جريت نفس وباوعت الهادي )ابو ياسر انا فهمت عمي كرم وعمي قيس 

وانت بكيفك تريد تطعن بنسبي اطعن انا اطلب من المحكمه اثبات نسب وما اخليهم اينبشون جثة ابوي لا اخليهم 

ياخذون العينه منك انت ومن نوال ومن سلوى واذا طلعت مطابقه اكعد وياكم واخذ كل حق عباس وما اتنازل 

عن فلس احمر واي واحد طعن بنسبي راح اقاضي بالقانون وحتى بالعرف

نوال //اي الساقطه ما تخلف اله ساقطه ودايحه مثلها 

باوعت للكل محد حچى وبيبي جميله گالت الها //انچبي كافي شويه استحي 

رجعت عليها وگلت ...الساقطه الي تحچين عنها طلعت حك ابوها الي اخذه اخوج ودارت بيبيتها الي ما 

عرفتيها بس من ماتت واجيتي تطالبين بفلوسها انتي بت معروفه امج منو وابوج منو وعفتي امج 

وانا بت ساقطه وعلى گولة افراح الها تاريخ بالسجون وحافظت على كرامة امج وما ضيعت دم ابوي 

صعدت للغرفه انا وحنين وانا ارجف ابدي هادي يطردنا من البيت لكن اعرف بي ما يسويها يجوز بسبب الاعراف 

والتقاليد او عنده فد مشروع براسه 

دخلنه للغرفه واتمددنا وحنين تگلي //خايفه ندوش هذوله ما يعوفونه بحالنه 

......ادري بس لا تهتمين ولا تضعفين 

:خايفه ندووش خايفه هواي

......وانا هم واترقب كل شي ممكن تسوي افراح وياها نوال وهادي لكن حنين انتبهي ديري بالج تضعفين لو احد 

يقشمرج وتتنازلين عن فلس احمر الاي احد 

حنين //ياا شمالني صحيح افراح عيشتنا بضيم بس بنفس الوكت فهمتنه شلون نحافظ على فلوسنا (ابتسمت حنين )

والله وناسه يعني اروح واقبض راتبي 

......ايي 

حنين //انطي الج وانتي تشتريلي اي شي يعجبني مو 

......ايي 

:وتنطيني يوميه الف مصرفي للمدرسه 

......صار