رواية ناديه الفصل الأربعون بقلم انين الليل
ثاني يوم نزلت الصبح وره ما صليت خدرت چاي وطلعت جبن وگليت بيضتين وصعدتهن اتعمدت نتريك من الصبح
حتى ما اشوف افراح گعدت حنين الي تگلي //خليني ندووش نايمه على الچربايه الي بقيت احلم بيها
......اگعدي تريگي وبدلي حتى نداوم
حنين گعدت وسالتني //منو گاعد
......محد والظاهر بيبي جميله وشمس كلهم رايحين
اتريگت حنين ونزلت الصينيه وبعدها بدلنه وبقينا بالغرفه الى ان صار وقت جية الخط نزلت انا وياها فهمتها
...حنين سلمي واطلعي
شفت افراح گاعده وهديل ماكو يمكن رايحه واسيل منتظره يمر عليها الخط عمار وياسر كاعدين يتريگون نزلنه
صباح الخير
ياسر وعمار رد وافراح واسيل ما ردن گلت الحنين ......ياالله حنون روحي وديري بالج وانتبهي زين لدراستج
:صار تامرين امر
باوعتلي افراح //شنو ست الحسن اشو گاعده ما نظفتي الطارمه
جاوبتها ......عمه من ارجع انظفها او انظفها بالليل
افراح //ها والصبح من يطلعون بسياراتهم
......عمه گلتيها سياراتهم يعني سيارة رجلج او ولدج الصبح انتي او بناتج نظفيها
افراح //لا باالله
......اي والله عمه مثل ما گتلج انا واختي علينه نسوي العشا ونغسل المواعين
افراح //هاا بس هذا
جاوبتها ابرود ...... يادووب نلحك
رمشت عليه اماني وطلعت رحت ويه الخط وانا متجنبه الكل وصلت للكليه اشوف بنات يباعلي وحتى الشباب
وشفت لمى وياها ميثاق يتمشون ومن شافتني صارت بصفه كلش وصارت تباوعلي وتضحك وهي تتعمد تسمعني
ميثاق الله عليك صدك لو تتشاقى
هو ساكت ما جاوبها او يمكن همس باذنها ما اهتميت او بينت عدم اهتمامي وصلت للقاعه لگيت بيها طلاب
وطالبات گلت
......صباح الخير
اغلبهم رد ورحت گعدت على الاستيج واغلبهم يباوعلي اجت فاطمه وكالت //صباح الخير
انا رديت ......صباح النور
سكتت اجت لمى وبس شافتني وكانما انا الي اخذت حبيبها او خطيبها باوعتلي باستزغار انا ما اهتميت
هي گعدت بغير مكان بعد ان طلبت من احد الطلبه ان تگعد بمكانه اقصد يتبادلون ومن سالها ليش گالت
لان خطيبي وصاني ابدل مكاني
اجه صلاح وگعد بعد ان استاذن انا ما جاوبت كملنه اول محاضره والثانيه واشوف بالاستراحه بين
المحاضرتين لمى تسولف وتضحك واعرف هي تسولف عليه لكن انا ما اهتمييت بعد المحاضره الثانيه
طلعت وهالمره رحت للكافتريا گعدت طلبت گهوه وصرت اشرب وانا احس كل الي بالكافتريا يباعولي
همه لان يعرفون بقصة امي
گعدو طلاب باتجاهي وصارو يسولفون ويتشاقون واحد بيهم يسولف ويباوعلي شفت من نظراته نظرات حقاره
كان خفيف رغم هوه حلو واشوف شلون يتشاقى ويه البنات اجت فاطمه وگعدت يمي على الطاوله سالتها
......شعجب گعدتي ما تخافين اقتلج مثل ما امي قتلت ابوي
هي جرت حسره وگالت //يعني صدك ناديه
......اي والله ليش اچذب صدك امي صادقت واحد ومن كشفهم ابوي قتلو
فاطمه //وانتي الي كشفتي الجريمه
اتنفست قوي ......اي انا الي كشفت الجريمه والي طلعت دم ابوي او وصلت امي الحبل المشنقه
فاطمه //بس ليش ضميتي علينه
......لان مو فد شي اتباهى بي وبعدين هذا شي ايخصني
فاطمه //بس هذا الشي اذاج
... وبنفس الوكت فادني
فاطمه باستغراب //شلون ؟
...كل شي بوكته
اجت نسرين وصارت تتشاقى ويه الطلاب وانا اباوع الها هي شافتني وسلمت عليه بايدها وانا رديت السلام
بحركه براسي وفاطمه راحت ويه صديقاتها صرت يوميه اداوم والبس شي جديد واگعد بالكافتريا لكن متجنبه
الطلاب والطالبات ورحنا انا وحنين وقبضنا راتبنا
حنين ما تنوصف فرحتها وبعدين خابرت المحامي يجيبلي اجار البيتين ومريت على ثامر اخذت الوارد مال الشهر
انطيت الافراح 150 الف وگتلها اجره الغرفه اتصورو اخذتهن وگالت بكل وقاحه // ليش والاكل
جاوبتها ... ... اذا تردين انطيج فلوس الاكل بس شرط كل شي ما نسوي يعني ما نشتغل اي شي بالبيت
هي سكتت ما جاوبت هالشهر اشتريت ثلاجه وغساله اتوماتيك وطلبت من ياسر يجيب واحد يشدها وانا بيوم الي
اشتريت الكنتور والچرابي غيرت قفل الغرفه والي بقى من الفلوس ضميتهن عد ام مرتضى
وهي المره عدها دفتر زغير كتبت بي گدام كرم وغفران ومرتضى المبلغ والتاريخ وگتلها عمه من احتاج
اجي اخذ منهن
وعشنا بغرفتنا مرتاحات ما ننزل اله وكت العشا نسوي ونغسل
المواعين ونصعد واحنه تقريبا ما ننزل ولا نشاركهم بكلام او نگعد وياهم
عمه زهراء تخابرني وتسالني عن احوالي وتنصحني اما سراج فما صار حتى يدزلي صباحيات لان ما چنت
ارد علي
اشتريت مداليه زغيره االحنين الي كان كل همها تبقى متمدده وتاكل جبس وتشرب عصير
و اتجنبت افراح وبناتها قدر المستطاع
ومن اروح للكافتريا نفسه الولد اشوفه يبلوعلي وصوته دائما عالي عرفت اسمه رافد ودائما يحچي ويتشاقى بصوت مسموع
وهو يباوعلي الى ان فد يوم اجت عليه نسرين سلمت وگعدت يمي وكالت
:ناديه جايه الج بشغله
ابتسمت بوجهها ......اي اتفضلي
نسرين //دازيني عليج ناس
...بخصوص شنو ؟
نسرين غمزة بعينها //واحد معجب ويريد يتعرف عليج
......هههههههه ومنوو هذا
:رافد
سالتها وكأني اعرف بالموضوع ......هوو دزج عليه
:اي والله ايگلي معجب بيها
باوعتله شفته يراقب بنسرين سالتها وانا ابتسم ...+وشنو نوع الاعجاب
نسرين بضحكه //يعني شنو يريد يسوي وياج علاقه
......اي بس ليش دزج افهم الي معجب ببنيه هو يجي يصارحها
:اكيد يستحي
......ههههههه هذا بنظرح يستحي
نسرين //هسه شنو اگله
......انا مو مال علاقات اسفه
نسرين //او كي انا بس حبيت اكون طرف بسعادة ناس احبهم واحترمهم
......اعرف شكرا
هي راحت وانا وگفت طلعت من الكافتريا وصرت امشي احس واحد وراي ما التفتت هو تقريبا صار بصفي وگلي
:انسه ناديه ممكن لحظه
باوعتله شفته رافد وگفت وما حچيت هو گال
:انا وصلني ردج من نسرين اگدر اعرف ليش رفضتي
باوعتله مستفسره ......شنو رفضت استاذ ؟!
رافد //العرض
اتفاجئت اكثر من كلامه ......عفوا اي عرض
رافد //انسه ناديه ممكن نگعد بمكان هادي ونتكلم
......اسفه عندي محاضرات
:طيب خلي نگعد اهنا
كانت مصطبه انا گعدت گتله //اتفضل اسمعك
:انا معجب بيج وحاب اتقرب اكثر واعرفج
......انت معجب بيه وتريد تعرفني
رافد //اي
......وانا يا استاذ او زميل رافد اشكرك لان معجب بيه بس الي معجب بوحده اكيد يعرفها
رافد //اي طبعا اعرفج ب......
قاطعته ......رافد انت شتريد بالضبط
:اريدج
باوعتله بنص عين ......هاا تريدني شلون يعني ؟
رافد //يعني احنا شباب واحد يعجب بوحده او بنيه تنعجب بزميل الها ما بيها شي يتعارفون واحد يسولف
للثاني همومه يطلعون يتونسون
......تحت اي مسمى
رافد بابتسامه ما تخلو من الخبث // الي يعجبج حب علاقه صداقه
......ما تشوف نفسك جرئ اكثر من اللازم
رافد //وصريح
......تماام وانا راح اكون صريحه وياك انا ما احب اسوي علاقه ويه كائنا من يكون الي معجب بيه ممكن
يسالني شكم سؤال او يسأل عني بالكليه بالمنطقه واذا يقتنع ويحب يتقدملي غير هذا الشي انا ما اوافق
هو اتقرب اكثر وگلي //ناديه فعلا انا معجب بيج ومشتهيج من زمان
كلامه خلاني ارجف واخاف باوعتله وانا امثل عدم الا مبالاة ......الظاهر انت ما سمعت كلامي اسفه طلبك مرفوض
هو دنك عليه ولزم ايدي انا عتيتها وگتله ......انت شجاي تسوي
هو باوعلي بنظرة خباثه //ما اسوي شي هذا الي اريد اسوي شي طبيعي ومو جديد عليج
انا صرت ارجف ولو بيدي چنت ضربته گتله ......ولك شقصدك احترم نفسك لا ...
قاطعني ويضحك باستهزاء //لا شنو مثلا تعزميني ابيتكم مثل ما امج چانت تسوي ويه صاحبها لو تخلينه نسوي
علاقه مثل ما چنتي انتي ويه ميثاق الي شبع منج واخذ صديقتج تره انا اعجبج شنووتردين حاضر (وغمزلي بعينه )
بلحظه صارت الدنيا سوده لكن لزمت نفسي اتنفست وغمضت عيوني لحظه وانااشوف سراج يبتسملي
اتقربت منه وجريت نفس قوي وابتسمت وگتله
......ما طوول تعرف حقيقة امي فامي ياحباب كتلت ابوي بدم بارد وما اهتمت لذلك دير بالك مني وافهم شغله
وحده الي يدوسلي على طرف انهي من الوجود امشي منا لا صدگني هسه صرخه وحده واشك قميصي واگول اعتدى
عليه وشوف شنو يصير بيك تعرف لو خلي اگلك
تنفصل وغصبن ما عليك تتزوجني مو بارادتك خصوصا وانت لحگتني وعدي عمام ما يسووني بت المعدومه لا
وربك يهدون عليك ويوذرونك اذا ما تتزوجني ويكتبون عليك مؤخر خمسين مليون بس تفكر اتاذيني او اتطلگني
اسمع ولك منا ودور وجهك اذا انت عندك سياره وشكم فلس هاي الگدامك تطيرك بساعه وتشتريك وتشتري ابوك
وعشر سيارات مثل ازبالتك الي وصلك امي قاتله وانعدمت ما وصلك تجارتهم منين وشنو انا املك وبفلوسي
ياشاطر اوديك وره القمر
صرت امشي اريد ابتعد عنه وهو بعده متفاجئ من كلامي وعرفت انو كل الي بالكليه يعرف حقيقة مياده
وكله بفضل هديل الي شوهت سمعتي
وهم عرفت انو لمى وميثاق خانوني وحجو كلام عليه ما صاير بس حتى يبررون خيانتهم
واكيد كل خاين ينطي النفسه الف عذر وعذر بس حتى يبين للناس ليش
هو هيج اتصرف واكيد خلو مياده عذر الخيانتهم صار لازم اعاقب وانتقم من كل واحد اذاني والي شوه
سمعتي وانا كل شي ما مسويه لازم اشوه سمعته وهو فعلا يستاهل العقاب واهنا ما دخلت للمحاضره
بقيت گاعده ع المصطبه وقررت بدون تفكير لازم انتقم من كل الي اذوني وانتقم انتقام شديد
اتمنيت ابچي لكن الدموع صارن اقوى مني وما نزلن جريت نفس قوي وطلعت التلفون وكتبت الميثاق
وانا ارجف
......اعرف انت تحبني واعرف بيك مجبور تتركني لكن انا ابقى احبك الاخر نفس بعمري
......ما ملزم بالرد عليه بس حبيت اگلك انت مو بس حبيبي لا انت النفس الي اتنفسه
......تتذكر من چنت تگلي احبج بكل الصحيح البيج وبكل اخطائج انت علمتني احبك بكل اخطاءك
......حبيت اگلك اتمنالك السعاده والتوفيق انت تستاهل كل خير ولمى خوش ابنيه مؤدبه وبت ناس يارب
السعاده الدائمه وصدگني انا ما زعلانه عليك لكن مقهوره على نفسي لان ضاع اجمل حلم بحياتي الي
هوانت
ورسلتها اله اهنا اعرف هو ما راح يراويها الها لان كتبت كلامه الي چان يسمعني ايا
بقيت منتظره الخط وانا مزيج من احباط وخذلان رجعت للبيت دخلت وشفت افراح بالمطبخ وراي اجت هديل
ومن شفتها وصارت عيني بعينها اتذكرت كلام رافد ونظرته اليه على اني انسانه متاحه للكل
صعدت بدون ما اسلم شفت حنين بالغرفه من شافتني ابتسمت وهي تگلي //انطونه اوراق الكيميا ناجحه
ابتسمت الها ......عفيه بيج شدي حيلج حتى لو تردين مدرسين اجيبهم الج المهم تنجحين
:ان شالله ندووش راح اصب غدا وانتي بدلي حتى ترتاحين
هزيت راسي وانا احچي ويه نفسي ......اي راحه تجي من وره هديل وامها
نزلت حنين وانا فتحت الموبايل شفت ميثاق قاري الرساله وما رد عليها ابتسمت وگلت
هذا هو تدلل البادي اظلم
جابتلي حنين الغدا ما اشتهيت اكل بس جاملتها لان اعرف اذا ما اكل هي هم تبقى بدون غدا وحنين من النوع
الي ما تتحمل الجوع
شافتني ما اكلت بس شويه سالتني // ليش ما اتغديتي
ابتسمت بوجهها وگلت ......حبيبتي ماكله بالكليه شبعانه
شالت الصينيه وهي تگلي //زين نامي وارتاحي
نزلت حنين وانا ما گدرت اسيطر الى دموعي بچيت على حنين الي شگد ما كبرت تبقى طفله هاي مو مال
واحد يكسر گلبها غطيت وجهي ومن التعب نمت گعدت العصر غسلت وجهي وگعدت ع الچربايه حنين بس
شافتني گالت //راح انزل اجيبلج چاي
ما جاوبتها هي نزلت وانا صرت اتصفح بالملزمه جابتلي چاي وگالت //ندووش يراد النه غلايه مو احسن بدل
يا صاعدين يا نازلين
......صحيح والله تدللين
:ندووش ما راح تگليلي شبيج
ابتسمت بوجهها وگلت ...كل شي ما بيه تعبانه تدرين سهر وانوب طريق ودوام اتعب
:لا تنزلين انا اسوي العشا
......لا حبيبتي انا انزل واسوي ماعندي شي
نزلت بدون ما اسلم ولا اسال فتحت الثلاجه طلعت باذنجان وطماطه ومن شافتني افراح اتصلت عرفت متقصده
الو هلا بهوجه
الله يسلمج انتي شلونج
الحمد لله زينين مشتاقين ليش ما تجين انشوفج
هلا بيج ياا على خطوبة هديل لا هسه تعاي
هو الولد خوش ولد ما شاء الله بس بعد لازم نسال جاي على صيت ابوها وخوالها ويگول ما الگى مثلها
عاد كون هي تقبل
عرفت من الجمله الاخيره افراح اتچذب تريد اتسمعني بقت تحچي
اي حبوبه بعد انتي تعرفيين بخت الل ما نريد نحچي راتب واجارات وصار عدهن السانات بس لو يموتن يبقن هذنيج
هنه شنو صفحتهن تنغسل ويطيح اللثك منهن لا لو يوصلن للقمر
تولي شمس ام السحوره
لا شعليه اگلج بهجه مو تبطين من زمان عنج
هلا بيج اتشرفينه
هي باوعتلي بنص عين وعوجت حلگها وگالت
شنو عيني اشو امس بتيته وطماطه وهسه باذنجان وطماطه
باوعتلها وگلت ......ليش مشتهيه شي اسوي الج
افراح //اي لفي كبه وسوي كباب
مسحت ايدي بالخاولي ... والله عمه عندي دراسه علوا انتي تلفين الكبه وتعجنينه كباب من زمان ما ماكلين
افراح // هاا واحنه نظل على عندج دراسه انتي واختج
اتقربت منها وگلت الها وانا اعوج بحلگي ......اي عندي دراسه انا واختي مثل ما عد بناتج
افراح // والله خوش صار عدج السان وتحچين
جاوبتها ......اي ليش لا عندي السان والسان طويل لاتنسين بنات مياده الگ...يعني شتترجين
نطلع علاوي مثلا يتصلى على ذيالنه
خليت الباذنجان على السيبايه وگليت الطماطه وخدرت چاي واخذت كوبين صبيت بيهن حليب وچاي وصعدت وانا ادندن
اتعشينا ونزلت انا وحنين رحنا للمطبخ بسرعه غسلنه الصحون ومسحنا الطباخ والكاونترات حنين مسحت المطبخ
وانا طلعت للطارمه وصرت اغسل بيها وبعدين رحت للحمام الخارجي نظفته من طلعت صار وجهي بوجه ياسر
الي گلي //اريد الصونده
انطيتها اله هو اخذها وطلع بره وبعدين رجعها وگال
غسلت التايرات حتى ما يتلفن الطارمه
ما جاوبته لان صار ما تهمني اي نظره اتقربت منه وحاچيته وكاني اتذكرت شي
...ياسر اريد تجيبلي غلايه
هو گلي مستفهم //غلاية ماي ؟
...اي ياسر محتاجتها ساعات بالليل احتاج اشرب گهوه چاي واتعب من الصعده والنزله
:صار باچر يمج
......وبيش ما تصير فلوسها جاهزات
:ما بيناتنا بت عمي
ما اعرف ليش ارتاح الكلمة ياسر من يگلي بت عمي
... شكرا ما تقصر
ثاني يوم رحت للكليه صرت اخلي مكياج خفيف لان بصراحه وبدون مجامله وجهي ما يحتاج اخليله مكياج
رحت وانا ابالي شي ولازم اسوي وره المحاضره طلعت ورحت يم القاعه الي بيها نسرين شفتها تسولف وتضحك
نسرين اختصاصها شباب واذا وگفت ويه البنات معناتها عدها شي وياها هي شافتني وانا اشرت الها واجت
هلو ناديه
...هلو نسرين تعالي عازمتج ع فنجان گهوه
نسرين //هلا هلا شنو هالكرم الحاتمي
باوعت الها وگلت ......بعدج ما شفتي شي
وصلنه للكافتريا وهي كل شويه مسلمه على هذا وعلى ذاك گعدنا ابتسمت بوجهها گتلها ...شتحبين تاخذين
هي رفعت حواجبها //ها يعني مو بس گهوه
...لا وداعتج بوفيه مفتوح
نسرين //ياالله خلي نروح يم حمودي ىناخذ
(حمودي الولد الي بالكافتريتا يشتغل )رحنا هي اخذت عصير ولفه وحب وانا اخذت گهوه ورجعنه گعدنا گتلها
...تدرين ما عندي رقمج
:حتى انا
...عبالي ما تردين تنطي اليه هل ما طلبته
نسرين // وليش عيني
...ليش لا تگليلي ما تعرفين بقصة امي
نسرين تهز بايدها //شنو يعني تكتليني لا حبيبتي امج وحده حبت واحد وابوج شافها راد يكتلها حتى يدافع
عن شرفه ورجولته وهي بالمقابل دافعت عن نفسها وكتلته شنو انتي شعليج
......هههههه اول وحده تنصفيني بس تدرين ليش
ليش ؟
...وما تزعلين
نسرين //لا ما ازعل ؟
...+ولا تعيطين عليه وتغلطين
نسرين //شلعتي گلبي شتردين تگولين
......لان انتي مثلي هم الكل يباوعلج على انه انتي وحده
فتحت عيونها
هزيت راسي وابتسمت ......شنو نسرين مو كلنه بلا زعل عوفينا من هذا الكلام الفاضي ما علينه انا حبيتج
واكيد راح احتاجج وحاجتي ومساعدتج الي مو ابلاش (وسويت باصابعي حركة الفلوس )
نسرين بضحك //ما طول الشغله بيها فلوس حاضره بلي تطلبينه
رفعت اصبعي واتقربت يمها ......اهم شي الثقه ولا وحده تحفر ع الثانيه
:تدللين بس امنيلج لا تگليلي صادقتي واحد مليان
ابتسمت وانا اهز راسي بالنفي ... .... انا مو مال صداقه (اشرت على نفسي ) هاي الگدامج عدها املاك وخيير
لكن ابوها الذيچ الي فضحتني هو چان مكوش على كل شي
نسرين //تقصدين بت عمج
هزيت راسي ......اي اتصوري چان ياكل باملاكنا انا واختي ومرته مخليتنا مثل الخدامات
نسرين //ايا بت الكلب (مو عليج على اهديله الساقطه تگول مربينهن ال الله ) من هذا امس رافد يگلي انت گايلتله
تشترينه هو وعشر سيارات مثل سيارته
هزيت راسي ... ...اي صحيح واكثر مما تتصورين وعندي ظهر وظهر قوي بس انا خالته على صفحه
( اتذكرت سراج وجريت نفس )
هسه ما علينه هسه انطيني رقمج وهذا الكلام يبقى سر ما يطلع وراح ادللج بگد ما تخدميني
نسرين // صدك چذب سجلي يمج
سجلته وگمت عنها گتلها ...بالليل اسولف وياج
ورحت حضرت المحاضرات وكنت منتبهه للاستاذ وهو يشرح لكن ما اخفيكم گلبي نار ومقهوره وكل ما اشوف
لمى ودي الزمها واهينها واضربها لان خانتني بدون خجل وما حاولت لو تتاسف او تبرر ومن خلال كلامها عرفت
انو ميثاق ما گايللها اني راسلته
من طلع الاستاذ كان عدنا مختبرات اكيد تسالون شلون معماري وناخذ مختبرات
باختصاصنا ناخذ محاضرات على قدرة الجسور على مقاومة الثقل واستيعابها وارتفاع الابنيه والكميه الي لازم
تنوجد بمقادير دقيقه رحنا للمختبر وصار الدكتور يشرح النه
كنت اشوف لمى تباوعلي بحقد مره واستهزاء مره ثانيه فصار الدكتور يسال وكنا نتسابق للاجابه
لمن ما سأل وهي جاوبت بعدين بدلت جوابها وقبل ان تكمله جاوبت اجابه ثالثه الدكتور گلها
لازم تتاكدين من الاجابه
رجع سال نفس السؤال انا جاوبته مباشرة هو هز راسه بالايجاب وگلي // عفيه هايه هي الاجابه الصحيحه
كملنه ونريد نطلع بعد ان وجهنه للدكتور اكثر من سؤال وانا اشوف لمى شلون تباوعلي بحقد ،
من طلع الدكتور واحنه هم ردت اطلع من الباب هي حاولت تحصرني انا باوعت الها ما حچيت
لمى بحقد ردت گالت
عمه ما تشوفين
مارديت عليها فاطمه اتقربت منها وگالت الها //عيب الي تسوينه لمى
لمى باستهزاء وبصوت عالي بحيث الكل سمعها // عيب شنو العيب
فاطمه //انتي حصرتيها بالباب وبعدين غلطتي عليها
لمى //هههههه ليش ما ردت عليه الغلطه لو هي گدها بس تعرف ما اخلي عليها ثوب لابسته
فاطمه //لمى ليش هيج تتصرفين تره اهنا كلنه صديقات
لمى //فاطمه حبيبتي كلمن وقدره وهاي مرض معدي لازم ما نتقرب منه ياصديقات هاي
فاطمه //جاي اتعجبيني لمى
لمى //لا تتعجبين فاطمه والدليل لان تعرف حجمها ما ردت
فاطمه //ممكن تنصين صوتج
لمى //هههه على شنو انصي صوتي لاتغرج الفقاريه وداعتج هاي من ايد الايد واسالي رافد عليها
فاطمه //لمى انا ما عليه كل ما بالامر جاي اگلج عيب تصرفج هذا
لمى //وداعتج لا عيب ولا ابدا تعرفين ليش لان هي ما تعرف العيب والدليل سكوتها لو بيها خير ترد عليه
رحت امشي وانا بيه صرخه تهز الدنيا ما احس اله ودموعي نزلن مو على شي بس على نفسي وليش ما رديت عليها
ودافعت عن حالي گعدت على مصطبه وانا احاول اجر نفس اجت فاطمه وياها مينا وعابد وگلتلي فاطمه
ناديه لا تضوجين من تصرف لمى
عابد //ناديه زين سويتي ما رديتي عليها
مينا //هي شبيها لمى من انخطبت اتخبلت عبالك محد مخطوبه غيرها
فاطمه //امشي ناديه ويانه
جاوبتها وانا ابتسم //لا شكرا حابه ابقى ابحدي
اشر عابد وراحوا عني وانا بقيت گاعده امثل البرود لكن بالحقيقه انا نار اكل كل الي گدامي نويت على شي ما
اتخلى عنه لو اموت نويت انتقم من كل الي اذوني واولهم ميثاق ولمى
رجعت للبيت قبل ما افتح الباب شفت ياسر وكانه منتظرني نزل من السياره سلم عليه وگلي
اشلونج ناديه
...اهلا ياسر
:ناديه حاب احچي وياج بموضوع مهم
...اي اسمعك
:لا ناديه مو اهنا اقصد نگعد بمكان هادي
باوعتله وانا عاكفه حواجبي ......ياسر شنو الموضوع
اتقرب مني ياسر وگلي //باچر الصبح لا ترحين ويه الخط انا اوصلج للكليه
باوعتله هو رد //ارجوج ناديه محتاج اگعد وياج
...زين ياسر باچر ما اروح ويه الخط هسه ممكن تخليني افوت للبيت
ياسر //باچر اوگف براس الفرع يم الصيدليه حاولي تتاخرين
هزيت راسي ودخلنه للبيت انا دخلت قبله نزعت حذائي خليته بايدي وصعدت لگيت حنين متمدده من شافتني گعدت
وگالت
:هلو ندووش
...هلو حنونه اشلونج
:زينه الحمد لله اجيبلج غدا
...ليش وانتي
:ما اشتهي
...شعجب
:ها لان اكلت لفه بالمدرسه
...زين حتى انا ما اشتهي اريد انام تعبانه
اشوف بوجه حنين كلام العصر گعدت وصرت اقرا وحنين هم تقرا وره المغرب نزلت اسوي عشا سالت
افراح الي گالت سوي حميسة لحم وطماطه سويت واخذت عشاي انا واختي وصعدت فوك اتعشينا ونزلنه نظفنا
المطبخ والطارمات وما شفت لا ياسر ولا سيارته من كملنه صعدنا سالت حنين
...خيير حنونه شبيج من العصر اليجاي شصاير
:ما صاير شي
...ها تضمين عليه
:ندووش من اجيت من المدرسه وانا اسمع افراح تگل الياسر لو تموت ما اخطبلك هاي العرجه بت مياده
وهو يگلها //يمه بت عمي ومربيها على ايدي احبها
افراح تگله //بيوم التاخذها خلي ابالك لو اكتلك لو اكتلها
هزيت راسي وعرفت ياسر شنو يريد مني لكن خفت من كلام افراح خفت هواي وصار لازم احتاط اكثر
//////////////////////////////////. /////////////////
