رواية إبن دار الايتام الفصل الثالث بقلم جمانه السعيدي
كمت اشتغل خير من الله الحمد لله
الله رزقني من أوسع ابوابه
بقيت اشتغل بعرابنة الاكل لمدت سنه كامله وعندي زباين تجيني خصوصي
الكل يكول طبخك كلش طيب
طبعا صدك الطبخ نفس اني اسوي بيضه الكل يكول شكد طيبه
بهاي الفتره اكو محل قريب علينا فرغ من الإيجار
قررت ااجره
واشتغل بي
تعرفون كعدت الشارع مو تمام مرات مطر
مرات الجو تراب
وهم الزبون يوكف بلشارع وياكل
صحيح المكان موحيل جبير
بس زين يمشي اموري
اشتريت كراسي وسويت موديل الطبله الطويله على الحايط والكراسي ادور على الطبله
اني اكثر زبايني العمال والكسبه لان اكل طيب ورخيص
الحمد لله اشتغل خير من الله
صحيح قبل محمد كلش قريب عليه بس هسه هم قر يب
ويجي ياكل يمي
بديت ازود انواع المرك والتمن اسوي كم لون واسوي برياني
والعصر اكلب على المقليات
كبر مشروعي وبعد عمل اتلث سنوات كدرت اتحول المكان افضل ومطعم اكبر
وجبت وياي عمال يساعدوني
وجبت محمد يشتغل وياي يلزم الحسابات
ارحمله من كعدت الشارع
الله فتح أبواب الرزق علينا واكرمنا اخر كرم
بعد سبع سنوات من طلعتي من دار الايتام
صار عندي مطعم راقي ملكي
وعندي سياره واشتريت شقه كنت احمد رب العالمين الصبح وليل
لو ما لطف رب العالمين بيه جان ضعت
صحيح اني انسان طموح واشتغل ليل نهار بهمه وعزيمه
ومحافظ على فلوسي
بس رب العالمين كان يراعيني بعملي وواكف بصفي
بعدعشر سنوات من بداية عملي صارت اموري احسن مايكون
بوقته بديت افكر ارتبط واعيش حياتي
اريد ازوج ويصير عندي هواي اطفال
اريد عائله واهل
اني عشت طول عمري محروم من العائله اريد ادور بت الحلال الي نكون اني وياها اسره ونعيش سوا
اربد يصير عندي اطفال حتى يكبرون ويساعدني بلمطعم
طبعا اني كمت ما اطبخ بس اجهز شغلات الطبخ
واجيب المسواك الي نحتاجه بلمطعم
شغلت ثنيين طباخبن بلمطعم
بيوم كاعد اتصل على طلبيه شغلات ضروريه للمطعم
وسمعت عياط وصوت عالي مثل صوت عركه بلمحل
اني مكتبي فوك بلطابق الثاني نزلت
جان اشوف عائله رجال وزوجته وياهم بنيه تخبل
البنيه تصيح على العامل
قصي السلام عليكم خير شصاير
ردت عليه البنيه بعصبيه ماتشوف هذا العامل الاثول اني طلبت شي وجايب شي ثاني
التفتت عليه عيوني اجن بعيونه تيهت الكلام كله
وهي مستمره تحجي بعصبيه وابوها يهديه
وامها كاعده وما عاجبه الوضع
جمانه السعيدي
قصي حقج عليه هسه تنزل طلببتج ومثل ما انتي تردين
وكله على حسابي
اني قصي صاحب المطعم تشرفت بيكم
البنيه سكتت وباوعت عليه وردت اهلا وسهلا
اني لمى النا الشرف استاذ قصي
ابو لمى شكرا الذوقك وتفهمك للموضوع
ام لمى ماحجت اي شي بس جانت مبينه ماعاجبه الوضع ابد
صحت على العمال شالو الاكل الي كدامهم ونزللولهم اكل ثاني وبيه توصيه ووصيتهم ما ياخذون منهم الحساب ابد
عفتهم ورجعت الغرفتي لمن اتاكدت الاكل وصلهم مثل ماكانو يردون واحسن
ثاني يوم اتفاجئت واحد من العمال صعد
...استاذ قصي هاي البنيه مال امس اجت وتريد تحجي وياك
قصي يااا بنيه
...البنيه الي تعاركت ويانه علمود طلبيه غلط
...هاااا شتريد
...تريد تحجي وياك
...زبن تمام خلي تصعد للمكتب
...بس حبيت اكلك شي استاذ قصي انت تعاملنا كلنا مثل اخوتك وتحترمنا
...اي
...ولله البارحه ماكانت الطلبيه غلط اني سجلته بدفتر
الطلبيه حسب ما اختارت هي واهله
بس هي سوت هاي الحركه علمود ياكلون بلاش
قصي ابتسمت انت ماشفتهم شكد راقين ومبينيين عائله مثقفه
...ولو اكو ناس تلمع من برا بس بداخلهم الله يستر
قصي شكرا على حرصك على المطعم
خليه تصعد خل اشوف شتريد
...صار استاذ دقيقه
شويه وصعدت لابسه بنطرون وبدي بخبلن عليه
وخاله مكياج بطريقه هادئه وتخبل
والشعر لونه عجيب غربب
كلشي بيه حلوووو اطلالته تخبل
لازمه جنطه زغيره بايده
حلوووه تشبه المبيعات بلتلفزيون شكله حلو وممييز
لمى دخلت للمكتب صباح الخير
قصي وكفت اهلا وسهلا صباح النور تفضلي
كعدت وخلت رجل على رجل والابتسامه ماليه وجه
اني رفعت التليفون وطلبت عصير
قصي اهلا وسهلا زارتنا البركه
...اهلا بيك اكيد انت مستغرب من جيتي للمطعم
قصي بلعكس هذا مطعمكم وتشرفين باي وقت تردي
لمى اني جايه اعتذر عن الموقف الي صار البارحه
اني بلحضه فقدت اعصابي
قصي لا مصار اي شي احنا شعارنا الزبون دائما على حق
اتمنى ما نكون قصرنا وياكم
لمى لا حشاكم من التقصير بس اني البارحه كنت حاسه بتأنيب الضمير
قصي ارجوج لاتعتذرين الي صار من حقج تعترضين اذا الطلبيه ما اجت مثل ما انتي تردين
لمى كلك ذوق انت انسان محترم فرصه سعيده
قصي اني الاسعد
لمى ممكن نكون زباين دائمين للمطعم
قصي اكيد المكان مكانكم وتدللون اليوم غداكم على حسابي
انزلي جوا واي شي تطلبي على حسابي
اذا حابه تاكلين او تاخذي سفري
لمى شكرا الكرمك انت انسان مهذب انت جنتل مان
رفعت التليفون وكلتهم اي شي تطلبه الانسه على حساب المحل
اتشكرت مني ونزلت
بعد يومين من هذا الموقف
طلعت اكو طلبيه موصي عليه للمطعم
جايه بس ناقصه
واريد اروح اتاكد منه
بس حركت سيارتي اريد اطلع من المطعم جان تصير لمى كدام السياره
اني حسيته مصادفه عجيبه
نزلت وسلمت عليه
جمانه السعيدي
لمى اهلا اهلا وسهلا استاذ قصي
قصي اهلا وسهلا صدفه سعيده
لمى اني الاسعد
قصي اذا رايحه المكان ممكن اوصلج بطريقي
لمى هااا اي ولله انت وين رايح
قصي اني رايح على الاعضميه
لمى اي نفس طريقي اخذني وياك
قصي يله تفضلي اهلا وسهلا
صعدت بلسياره وكعدت يمي
لمى ممكن اطلب منك طلب
قصي تدللين
لمى ممكن نكون اني وياك اصدقاء احسك انسان مريح
واني ما عندي صديقات ولا اصدقاء
احس الناس ماله أمان واخاف من الصداقات حيل
قصي اكيد
لمى زين اريد رقم تليفونك وصفحتك على الانستا او الفيس
قصي الصراحه اني ماعندي بس واتساب
لان ماعندي مجال ابد
واكو صفحة المطعم على الفيس
لمى لا ما اريد صفحة المطعم شسوي ببه
قصي جيبي تليفونج اسجلج رقمي وانطيني رنه حتى اسجل رقمج يمي
راسا طلعت تليفونه وانطتنيا
سجلت رقمي يمه ورنت على تليفوني
اني بداخلي كنت حيل فرحان بوجودها
جنت حاسه جاي تتقررب مني
طبعا اني ما أحلم بوحده مثله ابد موصلة ثقه بنفسي
بس اعرف حجمي زين وما احب اكون بمكان اكبر مني
يمكن هاي قناعه
او رضا بلواقع
امبينه من عائله مثقفه ومخلصه دراسه
اكيد تريد واحد واصل مثله
قررت استمر وياها واشوف شنو نهاية هذا التعارف
احنا نعزل المطعم الساعه ١٢ بليل والصبح نفتح الساعة
تسعه الصبح
اني ومحمد عايشين بشقه مالتي
اني صممت يجي يعيش وياي حتى يونسني
واني اعتبر محمد اكثر من صديق
محمد اخوي الي ما جابته امي ابد ما اكدر انسى معروفه ووكفته وياي
