رواية هشاشة قلب الفصل الثالث 3 بقلم العباديه

‏شـفـاهٌ أُجـمِـعـت لتَـضُـمَّ نهـرًا

كـدجـلـة بـالعـراقِ مع الـفراتِ

أنـا كـلُّ الــعـراقِ ومـن عليـهـا 

ووحدي الشاربونَ من السُـقاة 

~~~~~~~~~~~~~~~~~~~~~~~~~~

نهى

إرتجفت وسرت رعشه بأنحاء جسمي واني اشوفه واگف ونظراته تتجول بكل جرأه على انحاء جسمي ركضت بسرعه على السرير اريد اسحب الچرچف بس چان اسرع مني وركض عليه قيد إيديه وهمس

- شوكت نتزوج؟؟

دفعته حيل وعطت

- من تختفي هالنظره المقززه من عينك

- آه لج طالعه تخبلين مداسيطر

رجع عليه لزمني من زندي ويتقرب من إذني يهمس بيهه 

- وخرر عني وليد اليوم نظراتك مُقززه معقوله هذا انتَ

- هذا الجمال كله وتريديني ابقى صامد

- وخرر

- بس خل اتذوق 

دفعته حيل ماكدرت لزمني بكل قوته .. نزل على رقبتي ويبوس بشراهه عبالك ماشايف .. جوعان وحطوا مقابيله طبق بيه جميع انواع الاكل الشهي.

دموعي ظلت تصب وايديه تدفع بيه 

وليد.. اخ ربي جمال جمال شهالبياض خرب يومج ماتوقعت لهالدرجه مااسيطر على نفسي مقابيلج

سحبته من شعره حيل ونبتت اظافيري بعلباته عاط بصوت عالي

- خرمشتيني شبيج متوحشه

ركضت ع الباب ورجع سحبني ومچلب بإيدي بإثنين إيديه. گعدت بالگاع ومشبثه برجليه واسحب بإيدي.

عطت بعلو صوتي وظليت اعيط واعيط 

- عووففنيي حقير لو بيك ذرة غيره متسوي هيج 

ظليت اشهك وابجي ركض عليه سد حلگي بإيده وعصر وجهي حيل.

عضيت ايده بكل قوتي .. عاط وضربني راشدي بكل قوتع وگعت بالگاع واشهگ. 

- صوتج مااسمعه والله افضحج بس تحجين

لحظات وانفتح الباب بقوه وشفت ولد يطلع عمره بنهاية العشرين او بداية التلاثين واگف بالباب اول ماشاف منظري دار وجهه وگال بصدمه 

- تسترري خويه 

ركضت ع الچرچف سحبته واشهگ وجسمي يرجف وحالي حال.

دخل للغرفه رفع وليد من ياخته وضربه راشديين سطره سطر. حتى اني خفت وخدي وجعني عبالك اجه بيه الراشدي.

انعزلت بالزاويه وابجي بقوه وهوَ يحاسب بيه. 

- ماعندك عرضضض قليل الاددددب 

دخلت موج بإيدهه كاميرا وتضحك كالت

- خايبه مالكيت الموبايل جبت الكاميرا من الـ..

خفتت وانهبطت من شافت منظر وليد واني ابجي وحاطه الچرچف على راسي ونازل على بقية جسمي.

شهگت وحطت إيدهه على حلكهه كالت برهبه وخوف

- شكو شصاير؟؟؟؟؟؟

محد حچه بس هذا الشخص نفسيته شحط وليد من ياخته وطلعه من الغرفه من وصل للباب كال لموج(شويه وخري) 

هيَ بجت بقوه وظلت تناشغ كالتله

- عمو شسوه هذا الحقير بس لا الببالي ؟؟

هز راسه الهه وكالهه

- اي عمو تفشلتي مقابيل صديقتج بسبب هالعاررر وراح اخذه حسابه يمي

لطمت على خدهه وركضتلي.. اني وخرت عنهه ودموعي تصب 

موج.. نهى يعمري شبيج فدوه حاچيني والله العظيم ماإلي ذنب والنبي وداعت بابا ماادري بوليد هنا ولاادري أعمامي عدنه تفاجئت لكيتهم يم ماما.. بالطابق الثاني مضيفتهم علمود مرت عمي رايده تشوف الطابق الثاني وصاعدين نهههههى احججييي 

كمت اخذت ملابسي ودخلت وره البرده بدلت وذبيت الفستان بالگاع ودست عليه وبدلت ع السريع.. 

مسحت وجهي بكلنس مرطب ع الميز مالتهه وطلعت مهروله .

موج.. نهههههى اوكفي خل عمو يوصلج اووكفي

راحت بسرعه صاحت عمهه واني طلعت بالشارع ابجي. وصلت لراس الشارع ووكفت يمي سياره ونفس الشخص كال :-

- اصعدي يابه لايتعرضلج احد بهالظهريه

صعدت بهدوء وبس ابجي.. وتلگيتوني انتم

وهذا الصار وياي..

ثريا.. اخخ مو نهيتج ماتروحين لبيتهه

نهى.. لان ماعدهم احد وامي سامحتلي وتدري بيهه وتثق بيهم وبيناتنه عشره وزاد وملح

- اكلج خاف هيَ متفقه وياه؟؟

- ماتحلف بداعة ابوهه جذب بس الي شككني ليش طلعت 

- يمكن صدك راحت تجيب الموبايل ومو تكولين اجت تضحك ؟؟

- اي/ ماادري ماادري عقلي واكف اريد انام فدوه ثريا غطيني يمكن صخنت

- خل احطلج مُرهم لرقبتج شتكولين اذا تلبسين شال هم يگلولج الولد اول تالي تلبس شال من اخوتهه

شهكت بالبجي

- الله لاينطيه ان شاء الله گلبي معصور عصر والمشكله حبيته يربي آآآه شورطني بالحب شجابني ويني وين الحب مو رفضت بقوه بالبدايه شوگعني ؟؟!

- اشش حبيبتي نامي خيولي ربج انطانه نعمه اسمهه النسيان

- شينسيني شينسيني اوف

نامت واني گاعده يم راسهه واتحسر وبگلبي عبره نايمه على صدري نيوم.

دخلت وياهه بالفراش وحضنتهه لان بس ترجف وتهلوس وهيَ نايمه كلساع تفز وتعيط بإسمه تگول (وليد لتتقربلي) اخخ شورطج يبنت امي.

للعصر واندگ باب الغرفه فتحته لگيته إسماعيل گال

- ثريا وين نهى؟؟

خفت وارتبكت جاوبته بلهجه متوتره

- أأءء .. نايمه

- شلون تروح لبيت صديقتهه بدون متاخذ موافقتي؟؟

- دازتلك رساله صديقتهه لان ماجاوبت عليهن

- اي لكيت مكالمات بس موبايلي جان صامت وواصلتني رساله يعني بس انطتني علم مااخذت رأيي ليششش؟؟ منو مسؤل عنكم هنا؟؟ فزاع خضره گدامكم جاوبييييننيييي

- ماادري 

- آني هسه رايح لاأمي وإذا ماطلعت تدري بيهه وحق الله اگلب الدنيا على راسهه

سكتت وخايفه لان كلش عصبي وكلنه مانتقربله من يعصب ينگلب وحش رغم

هوَ هادئ ويتفاهم سمعت صوت نهى كعدت فازه وترجف ظلت تبجي وتناشغ 

- اذا يدري بالصار بيه يشنقني والله

- لا اسم الله وين يدري

ظلت تشهگ وتبچي خايفه حيل وإيديهه ترتجف من الرهبه وهيَ نفسيتهه تعبانه ماصارلهه مده من طلعت من محاولة إعتداء وهالشي يكفي يخلي الانسان يصرف مية بطل دم.

- نهى نهى شبيج لتسوين هيج بهاي تصرفاتج راح تفضحين نفسج وتخلين نفسج بمصيبه الهه اول ماإلهه تالي

- خايفه ثريا خايفه

حضنتني حيل حسيتهه تريد تدخل بداخلي وتلتجأ لأأمان يحسسهه بالاطمئنان

رجعتهه لفراشهه وكمت اريد اشوف شصار.

دخلت للمطبخ لكيت اسماعيل يعيط وگالب الامه گلاب أُمي تهدأ بيه وهوَ ينشال وينرگع

إسماعيل.. گلولي شلون ثقت وتدخل ببيتها شلووون؟؟؟؟ اني شمحذرهن من الصديقات؟؟ ماكو ثقه لهالوقت مااكووووو

امي كالتله

- ولك شبيك هاي صديقتهه من الاعدادي ومحد عدهم اخوانهه عازلين وهيَ البنيه تستنسخ الهه حتى توفر مصاريف الملازم وكالتلي قبل لاتروح ودوم تروحلهه هم

- انعل ابو الاستنساخ يابو حتى الفلوس الي هيج تسوي بالانسان تذله ذل .. منا وهيج اني استنسخ الهه عسى ما اجدي وماتروح لبيت صديقتهه عرفت شعدهم ماعدهم عرفت ماعدهه اقارب اخوان؟؟ هيج هسه هيَ أمنت وراحت بدون متاخذ إذن مني؟؟

- يمه كالتلي 

- واني شنو هنا فهموني شنوووو؟؟؟؟

- هاي هيَ أخير مره بعد ماتروح لأي وحده 

اخخ بعديش بعديش اخر مره !! 

(حاچيتهه بداخلي)

لما صارت هالسالفه بنهى وتعقدت نفسياً والخوف ياكل ويشرب وياهه؟؟

سكت إسماعيل بعد محاولة إقناع طويله عريضه وخله شروط علينه كلنه ماكو طلعه لأي مكان من الكليه للبيت ومن البيت للكليه .

~~

داومت ثاني يوم بدون واهس والقلق على نهى ياكل بيه خطيه اليوم ماداومت ولگيناهه مصخنه خليت أمي تسويلهه كمادات وتشرب بيهه اعشاب والبارحه الليل كله مانمت واحس راسي مصدع واقل حركه اتخربط وريوك ممتريگه ..

دخلت للمحاضره مال أستاذ أحمد وظل يفشل بيه كلساع وگايل

- ثريا عيني الصفنه مو إلچ

ردت أگوم الزگه بچلاق اوصله يم البانزين خانه 

سكتت واني أَزأر عليه من العصبيه واتمنى هسه يمي چاكوچ إله ادگ إذاناته

خلصت محاضرته بألف ياعلي وإجه دور القاسي اوف يربي اليوم ماإلي خلگ والنوب يجي عليه هذا يفخفخ .

دخل والعطر ملئ المكان عبالك مفرغ الشيشه على راسه ادري ماشامين عطر هاي شبيهم الزلم عود يسوولنه اغراء بالعطر لو شنو؟؟ بس نحنُ لانُهزم ميغرنا عطر .

النوب عطره قوي حيل .. خفه ويهك اني دقيقتين ويطير في الهواء الطلق ..

ظل يشرح واني حاطه إيدي على خدي وصافنه على السبوره بس بالي مسافر يم نهى ويم وليد ووياهم موج جاي افكر معقوله موج إلهه إيد بالصار لو لا ؟؟

حسيت القاعه هدوءء وصوت الشرح ماكو واسمع آهات ضحك الطلاب الخفيف !

شكو شصاير ليش هيج .. كلهه تباوع عليه وتضحك !

رفعت راسي واشوف القاسي مكتف وواگف يم الستيج مالتي وعاگد حاجبه ومخنزر عليه !

عززا شصار بيه ظليت ارجف من نظراته

أشر بإيده بحركات متتاليه وكال:-

- كملي كملي 

جاوبت بنبرة براءه ومقوسه حواجبي

- شأكمل؟؟؟

- أه ؟ يابه كملي صفنتج ليش وگفتي؟ اوووو.. أثاري إحنه قطعناهه عليج . بس يلا تكدرين تكملين وگوليلنه وين وصلتي؟؟؟؟

- ااءء .. إستاذ ماجنت صافنه

- لا لا.. چنتي تتمشين بكورنيش المنصور

يحچي بحده ومعصب .. دنگت واحس خدودي يريدن ينفجرن من الحراره وإذاني دخنن. خو الطلاب كلهه تضحك !

ضرب بكل قوته على الستيج مالتي وعاط وهوَ صوته صلب كلش وقوووي نزيت ورجعت لوره وحسيت گلبي طفر من ضرب الستيج غير حالي المخربط من السهر واني مامتعوده !

- اني مو گلت من اشرح الكل ينتبه؟؟؟؟؟ شكلت انيييييي؟؟؟؟؟؟؟

كلهه خنست وأي صوت ماكو بالقاعه . اني إنتهيت حسيت ضغطي علگ ورجليه ترجف 

باوع بيه ورفع إيده السبابه يهدد

- اخر مره طالب يصفن بمحاضراتي. اخلص من التأخير تطلعلي صفنات النوب

تنفسي سرع وراسي صدع من صوته فوگ ماهوَ مفجور من السهر .. احس طبلة إذني انفجرت هسه شدعواك شسويت اني رحمه لله ؟؟

تمشه عن كرسيي وكال :-

- بعد تعاملي كله بالدرجات اضافه للرزايل عود اكول كبار عيب ارزلهم بس الظاهر سوالف الاعدادي بعدهه منسوخه وراسخه ببالكم ف اني اطلعهن منه واعلمكم الكليه شلون تصير.

لا والله شخليت للرزايل حتى ماترزل؟؟

راح للسبوره وظل يكمل شرح اني اباوع وادنگ والطلاب كلهه كلساع واحد يلتفتلي اشوفهم بطرف عيني تمنيت اختفي .

مرت خمس دقايق حسيت نفسي مااكدر ابقى اختنگت وإعتصرت حيل رفعت ايدي وكتله بصوت خافت

- إستاذ اگدر اطلع

باوعلي بعدم رضا ونتر :- لا متطلعين 

ظليت اهز برجلي وأعصر بإيدي وامدهه جوه شالي اعصر براسي أذاني حيل واحسه يريد ينفجر ..

ظل يشرح وعينه عليه والحواجب معگوده..

أشر عليه ومد القلم كال بنتر :-

- كومي إشرحي الشرحته كله

اشرت على نفسي بغباء

- آني؟؟؟

- إي إنتِ أشرت على غيرج آني؟

همست :- لا

- تعالي إشرحي إذن

وگفت واني اطگطگ وحايره شأشرح واني نص المحاضره چنت صافنه !

مشيت بخطوات بطيئه حيل ومدنگه بالگاع حسيت رگبتي إنكسرت من گد ما مدنگه.

وصلت يمه وانطاني القلم اخذته بحذر خاف اتلامس بايده ودرت وجهي ع السبوره شفته شكاتب ووين واصل.

راح گعد بكرسيي وكال

- اي ثُرىٰ اشرحي 

باوعت وركزت وعصرت مخي وقريت آيات واردد (يامُذكر الخير وفاعلهُ ذكرني مانسانياهُ الشيطان) .. يلا مخي فدوه تذكر لاتفشلني عليك الله.

حسيت گرگشه بين شفتي وخشمي مثل الشي الينزل منه !

مااهتميت وظليت اتذكر 

ظليت خمس دقايق لما أيست من ذاكرتي ودرت وجهي عليه اريد اگله مااعرف 

صاحت نرجس :-

- دكتور خشمهه ينزف دم !

باوعلي بإستغراب ووكف تقدم تجاهي يحاول يبين الهدوء على هيأته بس يمشي ع السريع باوع بوجهي مخنزر وعيونه نظرات قلق

- شبيج؟؟؟

مديت إيدي لخشمي اريد اتلمسه كال

- لا لا لا .. هاج يابه 

انطاني خاولي مدري منديل مشجر بورود صغيره وناعمه باللون القرمزي ..حطيته على خشمي وكله ريحة عطر خرب شكد طيب عطره تخلخل بأنفاسي فهمنه معطر بس مو لهالدرجه ابنل ابنل ..

وجّه كلامه لنرجس وگاللهه

- نرجس تعالي إخذيها للحمامات 

غريب هالرجال بسرعه خفظ اسماءنه كلنه !

اجت نرجس عليه وهوَ يباوع عليه ويباوع ع الطلاب يحاول يبين الموقف طبيعي

اخذتني من إيدي واني نسيت انطيه خاوليه مديت ايدي عليه وانطيته اله

- إستاذ خاوليك 

- خلي على خشمج دينزف 

- لا هسه اصير زينه

- اخذيه وروحوا ونزلي راسج خل ينزل الدم لترفعيه ابد

- نعم استاذ

طلعنا وايدي على خشمي

نرجس.. شبيج ولج

- من الرعب صار بيه هيج وهاي اول مره

- بتل بتل شايفتلج شبح

- شفتيه شسوه بيه والله حاصرتني البچيه لحد هسه شهالقساوه هاي؟؟ الحقير ابو خاولي

- ههههه والله من كتيله ع الخاولي احتاريت مدري اضحك مدري ابچي

- ابچي على حالي خيه .. 

بس كال نزلي راسج واني شايفتهم الينزفون يرفعون راسهم

- نزليه هوَ أفهم يمكن دارسهه شدراني اني

نزلت راسي وتوقف النزيف واستغليناهه فرصه شردنا من المحاضره .. رحنا للكافتيريا اكلنه لفات وبقينه كاعدين نسولف

.إجتنه بنيه توجهت للطاوله و كالتلي

- انتِ ثُرىٰ؟؟؟

- اي اني ليش؟

- إستاذ ماهر طالبج بمكتبه

وكفت وحطيت ايدي على صدري

- عزززاااا شيريد؟؟

البنيه إستغربت وضحكت 

- هههه شبيج ؟

- ولج هذا جني هسه يخلسني مااريد مااروح

- هههه يا والله ورده استاذ ماهر 

- وياج ورده بس وياي قرده

- هههه هسه تجين ويايه ادليج على مكتبه لو لا؟؟

- لا مااجي

- اوكي

راحت واني كعدت ونرجس تكرص بيه وتأشرلي

- ولج روحي يريدج ولجج ثريا كومي

سويت ملامحي مال بكاء وعبالك ابجي بس دموع ماكو

- ما.. ما مااريد 

تضغط على اسنانهه حيل وتخزرني

- ولج ثريا رووحي

اني ارفعلهه حواجبي واحجي بهمس لان بالكافتيريا اكو طلاب چان أدبتهه 

- مااروح ماااا

اني واكفه وهيَ ماتخليني اكعد ع الكرسي وكلما اريد اكعد تسحبه تريد تفشلني ونحچي بملامح وجوهنه. كتلهه

- رايحه اجيب كرسي وكرسييج خليه يفيدج

تقدمت خطوتين وشفت استاذ ماهر واگف مقابيل الكافتيريا ويباوعلنه لان الواجهيه جام

يبوو على حظج ثريا يبووو

رجليه ثگلن وظليت بمكاني .. دخل وتقدم عليه عاكد حاجبه وخازرني كال بنتر

- ليش ماتجين من ادز عليج؟؟؟

توترت وظليت اعتعت إحتاريت شأگول؟ قابله اگله اخاف منك حتى يسمطني راشدي طياري ثلاثي الابعاد

- إستاذ هوَ شسمه شسمه

نتر وصوته شويه صار عالي

- فضييهههاا شسمه؟؟؟؟؟

اجتني كلمات على بالي لبگتهن بسرعه وتنفست بأريحيه

- جوعانه واجينا ناكل وماصارت فرصه اجي لمكتب حضرتك

- مبين عليكم الجوع وانتم صار ساعه تتعاركون عبالك اطفال !!

ييييياافشششلللتتتي طلع شايفنه اني ونرجس من نتعارك بهمس وبالحركات مال الحواجب والوجه

دنگت واني ميته من الفشله 

مشه وكال بصيغة أمر :- تعالي وراي

مشيت وراه وهوَ مشيته بفخر وهيبه ولبس النظارات واخذني لمكتبه ..

دخلت لمكتبه صغير ومرتب ميز صغير وخلفه كرسي دوار ومقابيل الميز مجموعه من الاوراق ويمهن صورته يم مكان بإيطاليا اعتقد .. وحاط ساعته يمهن الظاهر مزعوج منهه ونازعهه ، على الجهه اليمنى خشبه ومخطوط عليهه إسمه الكامل وعشيرته بس كأنما كاتبهه خطاط ، كوب قهوه صغير فارغ بس آثاره باقيه بداخله. وع الجدار لوحه زيتيه لمنظر غروب الشمس 

احب اركز بتفاصيله وادور على ابسط شي 

راح كعد ع الكرسي وكال تفضلي كعدت ع القنفه وهوَ صفن بيه شويه ونزع النظاره 

- شلونج؟؟

- الحمد لله صرت احسن

- ليش خشمج نزف؟؟

- ءء مااعرف

- عندج ضغط او مرض مُزمن؟؟

- لا لا هاي اول مره هيج يصير ويايه

سحب نفس وكال

- زين ليش هيج صار وياج؟؟

رفعت نظري عليه اجت عيني بعينه لااول مره كل مره اتلاشى هالشي ومااخليه يصير هوَ او غيره او اي شخص مااباوع بعينه لان يكولون اكو تواصل بالعيون ف مقابيل اي رجل ماارفع راسي.. 

ارتبكت بالزايد من اجت عيني بعينه وبسرعه دنگت 

وجاوبته بتلعثم :- مااعرف ليش !

فرك وجهه بإيده وتنهد

- معقوله لان رزلتج؟؟؟

طفرت عبالك ذب عليه تيزاب

- لا لا ابدد 

صفن بيه وتناول قلم بإيده وظل يضرب ع الميز بهداوه شلون طگة ميل الساعه

- بس مداصدگ 

- لا أستاذ صدگني مو لان رزلتني يمكن لان تأخرت بالسهر

- السهر مايسوي هيج يس يخلي الجسم كسلان ونحلان .

- مااعرف بعد

- تمام لعد .. 

مشكوره اخذت من وقتج 

اني ظليت مصفصفه كتله بس :- العفو

دنگ ع الاوراق وظل يكتب .. رفع راسه وظل يباوع عليه اشر ع الباب وكال

- تفضلي !

فهيت وبعدين ركزت هاي طرده بنزاكه .. ايا حقير مو صوجك صوجي اني اجيت طلعت اركض واغلي وادردم عليه ويه نفسي..

يعني حتى ماطلبهه مني بإحترام لو كاللي اخذي راحتج .. لا گبل تفضلي الحقير ابو خاولي صدك خاوليه وين راح مدري وين خليته خل ارجع اشوف الجنطه بلكت بيهه.

رحت لكيت نرجس تحوم قريب ع المكتب اول ماشافتني ركضتلي

- ها شصار

- عوفي الصار وكليلي الخاولي وين وديته؟؟

- بالدفتر خليتيه

- اي عفيه رحم الله والديج منتبهه لتصرفاتي اكثر مني عفاريم

- دحجي هسه شصار عوفي الخاولي

- شصار يعني طردني النذل

- شنو ليش طردج؟

- يكلي تفضلي ويأشر ع الباب .. بالجذب ماكال تفضلي ست ثُرىٰ او كال براحتج ست ثُرىٰ 

- لا بله خاف ماتقبلين

فتحت إيديهه وظلت تسوي حركات تعالي وترفع راسهه بشموخ 

- خايبه شو طيري تردين ألاوستاذ ماهر المُعظم يجي ويكلج تفضلي ست ثُرىٰ؟؟

عدلت وكفتي ووكفت اتظاهر الهيبه وعبالك واگفه مثل الملكات رفعت راسي وبشموخ كلتلهه

- نعم نعم حضرة الخادمه دُره !

اعوج بحلگي واتظاهر بالتفاخر .. حسيت بضربتهه على متني

- دُره براسج هذا المصكلك شو امشي لاهسه اسويج قطعتين .. دُره هيَ ام الگلك دُره سوتني خدامه خفه ويهج

الفصل الرابع من هنا