رواية ناديه الفصل الرابع 4 بقلم انين الليل

منيره 

جان اسعد خبر بحياتي من گلي عباس مياده حامل جان فرحان عبالك مالك الدنيا وبنفس الوكت گال 

الطبيبه گالت تنام على ظهرها هاي الشهرين

عندي اي شي يگوله عادي المهم الله سبحانه فرحه وراح يصير عنده ضنى انا بوكتها وصيته 

=يمه عباس الزم ايدك وراك مصاريف هواي 

-شسوي مو شوفة عينج البيت شكد يحتاج مصرف 

=لا ابد هو نفس المصرف الي تنطي ويه الفلوس الي احصلهن من ضرب الابر 

-مو انتي تكولين الزم ايدك

=اقصد مصاريفك انت ومرتك هواي جاي تصرفون طلعات وهدايا وتشتريلها ذهب 

-لا تنسين يمه مياده زغيره وتحتاج هواي شغلات وهم تدلل عليه 

=مي خالف بس انتو راح يصير عدكم جهال يعني هم لازم تلزم ايدك

هو ما جاوبني اكتفى باسني براسي وطلع 

وبقينا انا وسلوى نشتغل ومياده نايمه بغرفتها ماتطلع بس 

للحمام تسبح وتبدل كانت ما تكعد ويانه ولا تسولف النهار كله 

لازمه التلفون وتخابر باخواتها او كاعده ع التلفزيون

اما افراح فصارت تخبث ازيد من قبل وهم يوم معدتي ويوم راسي ويوم تعبانه ويوم رايحه الاهلي 

وصار اكثر شغل البيت عليه انا وسلوى الي چانت مرحله اخيره بمعهد المعلمات 

بالليل اجت مياده وجابت التلفون وكالت 

-خاله واحد رايدج 

اخذت منها التلفون ورديت

=الو 

::الو شلونج عمه 

=هلا هلا يمه سراج اشلونك شدعوه محد يسمع صوتك 

::مبين زعلان الحلو عليه والله عمه صار تلث تيام اخابر وكله

تلفونكم مشغوول ما تگليلي بداله خو مو بداله 

=هاا عمه لا بس 

::بس شنو الله يخليج جاي اكلج حتى اليوم كل ساعه اخابر الكا مشغول منو هلكد يخابر

باوعت المياده =. هاا اي مو مرت عباس تحجي ويه اخواتها تعرف بعيده وتحتاج تسولف تفضفض 

سراج جاوبني ::هم صحيح زين هي تسولف وتخابر عباس شبي هاي اسبوعين حتى ما اتصل شنو الزواج نسا سراج 

=سراج لا تاخذ غيبة عباس كل شي ينسى بس ما ينساك بشرني انت شلونك 

::انا زين عمه منير يكول خلي تجي يريد يشوفج

ابتسمت = ولك شو تسمي منير ازغر جهالك وبعدين كلي شبي ابوك

يحجي وياي ويضحك ::والله ما بي شي يكول من زمان منيره ما جايه خلي تجي شكم يوم اشوفها وهم تغير جو 

وهم يريد يشوفلج رجل يكول ما عدنا نسوان يبقن 

=. ولك سراج 

 :: ههههه. وصاني وكلي خلي عباس يجيبج

=صار بس انت تدري بعباس دوام والمحل وخطيه مرته حامل وتعبانه والطبيبه موصيتها ما تتحرك 

سراج ::ولاتنسين المره الي بدلته وخلته ما يسال عن اخو وتوام روحه

=لا يمه سراج بس المسؤوليه كبرت علي هم الله يساعده 

رد بعتب ::ما گلنه شي انتي كليله وانا باقي مرابط يم التلفون من يجي خلي يخابرني

وسدا سراج واجه عباس مبين علي التعب سبح وسلوى خلتله

عشا وكتله على سراج خابره ومن سدا كتله 

=ينطوك اجازه نروح نشوف خالك

كال/: اي عادي بس ما اكدر اروح

=وليش ما تروح 

::يمه ناسيه مياده نايمه على ظهرها 

=شنو عباس رايحين شهرين هنه تلث تيام نروح نشوف منيرونمر على جميل ونرجع 

وبعدين شعليها هي نايمه وافراح وسلوى يشتغلن 

باوعلي وكال /: ها يمه مو چنج تلمحين الشي

=ما المح انت كلت ما اروح لان مرتي حامل وانا كتلك ما عليها 

شي اختك ومرت اخوك واخوك يمها وهنه كلهن تلث تيام هاي 

لو كل اليتزوجون يبطلون لا يسالون على خال على عم الناس تبطل

ما تزوج اولادها

جر حسره ما جاوبني وراح الغرفته سلوى كلتلي 

-ماما مو چنج زعلتي عباس 

انا بنتر =ها حتى انتي شگلت انا كتله امشي وياي نشوف خالك 

هو اتحجج بمرته لان نايمه على ظهرها گتله انتي وافراح وهادي 

يمها بعد شنو 

سلوى -// اول مره اشوفج تصيرين عصبيه على عباس

افراح من سمعتي احچي بنتر اجت /:لا سلوى عمتي مو عصبيه بس هو عباس الله يسلمه

عبالك بس مرته حامل وهاي انا جبتهم اثنين حتى ما دريت بيهم 

سلوى --افراح لاتنسين الحمل مو سووا وهم الجو والعمر 

افراح بنتر /:شتقصدين سلوى انا عجوز 

سلوى بخجل -لا والله مو هذا قصدي

افراح وكفت وتحجي بعصبيه /:بسج بسج انتن من دخلت هاي للبيت(واتاشر على غرفة عباس )

وانتن بس تفرقن متعجبات ماكو حلوة بس هي هاي لو انا نايمه على ظهري جان فضحتني وخليتن هادي لو يطلگني 

لو ياخذ عليه مره

وراحت افراح انا هزيت راسي باسف وكتلها السلوى 

=اتفضلي استلمي تراضين من وتزعلين من

ثاني يوم الصبح اكعد الفجر اصلي واقرا قران واسوي ريوك العباس وهادي وبعدين سلوى تكعد تروح للمعهد 

افراح جانت تكعد من الصبح من شافت مياده تبقى للظهر هي هم 

صارت تتاخر بالكعده انا حتى جهال هادي اريكهم بيومها كعد عباس

ويا مياده اول مره من اتزوجو تكعد ويه عباس للريوك سلموعليه وعباس اتقرب وباس راسي 

وكعدو تريكو من راد يطلع كلي 

يمه حضري نفسج بلكي اليوم احصلي اجازه وره الظهر انسافر نروح البيت خالي

انا ما رديت علي هو كمل كلامه باوع المرته 

- - وانتي هم مياده مو اجي والكاج ما متحضره اخابركم يعني اجيب التكسي وياي للبيت وبس البس ملابسي 

سالته باستغراب. =. ليش مياده تروح ويانه؟ 

عباس جاوبتي وهو يمشي /:اي خليها تروح تتونس ملت من النوم على ظهرها وهم من نرجع نمر اتشوف اهلها 

=لا عباس خاف مو زين عليها 

عباس /:عود تاخذ علاجها وياها

=بكيفك يمه الي تشوفه (بيني وبين نفسي )هسه عرفت سر كعدتها من الصبح

بمجرد ما طلع عباس راحت الغرفتها وسدت الباب انا طبخت وكملت وصليت الظهر وهو اجه كال 

ياالله بين ما ابدل كون حاضرات 

وطلعنا انا ويا ومياده وهي لابسه تنوره وقميص باوعت الها وكلت 

=شنو عمه هو هذا لبس انتي مو حامل التنوره ضيكه ع الطفل والطريق بعيد 

جاوبتني بدلاعه /:لا عمه شنو ضيكه هو بعده ما اتصور يعني ما علي شي

اتعجبت من ردها واتعجبت اكثر من سكوت ابني عليها ورحنا البيت اخوي وهناك تلكونه وفرحو بينا وعزمونه بيت 

اخوي جميل همه قله يلتقون لكن سراج چان دائما يسال عنهم ويروح يشوف احوالهم لان جميل حالته الماديه تعبانه

وسراج چان يضغط على ابو حتى يساعده

مياده ما گعدت هي وعباس خلصوا اليومين كله فره بسيارة سراج ومن يجون محملين علاليك 

ثالث يوم رجعنا ومناك مرينه على اهلها الي بس وصلنه طلعت 

عباية الراس ولبستها وهناك بتنا وتقريبا بهاي الليله بقيت ابحدي

لان امها واختها الازغر منها واختها مرت منذر ومرت اخوها كله وياها بالغرفه وانا كاعده بالصاله حتى العشا جابو 

من المطعم شفتها نزلت العلاليك الي جابتهن من بغداد عرفت هنه هدايا الااهلها

بتنا والضحى سلمنه عليهم ورجعنا للبصره واشوف مياده ضايجه وطول الطريق ساكتين وحتى من نزلنه بالمطعم 

ما قبلت تنزل عرفت هي رايده تبقى عد اهلها لكن عباس ما موافق انا كتلها 

=عمه شبيج تدرين بعباس ما يكدر يفاركج ان شالله يحصل اجازه ثانيه ويجيبج الاهلج

هي ما جاوبت ومن وصلت راسا راحت الغرفتها انا حجيت على عباس = ليش ما خليتها عد اهلهة 

هو ضحك وكلي // يمه مو اگلج مياده زعطوطه مو عبالج زعلانه لان ما بقت عد اهلها

سالته = شبيها شنو تريد 

اتصوري تكلي خليني ابغداد عد بيت خالك ومن تحصل اجازه تعال اخذني اصلا هي ما قبلت

 تبات عد اهلها اتفقت وياي اهنا قبل لانروح كالت نمر بيهم ساعتين ونرجع 

جاوبته =لا يمه شلون تبقى ابحدها ابغداد لاتنسى مرت خالك دووم اخوانها واخواتها يجنها وعيب نخلي مياده 

عدهم ابحدها 

عباس /:اعرف انا ما قبلت

افراح گالبه خلقتها وحتى سلامها بارد ثاني يوم الصبح كعدت صليت وسويت الريوك واجه هادي باسني براسي وكلي 

اشلون خوالي واولادهم 

انا جاوبته =كلهم زينيين ويسلمون عليك 

هادي باوعلي وابتسامه بعتب //چا يمه چان اخذتي وياج افراح مثل ما اخذتي مرت عباس 

عرفت هذا اول خيط للتفريق بين الاخوه كتله 

= مو انا الي اخذت مياده عباس اخذها حتى بالرجعه تمر على اهلها وبعدين اخذ اجازه وروح انت ومرتك الخوالك 

منو لازمك اخذها واخذ جهالك وروحو زورو واتونسو

هو سكت وراح على دوامه وانا هم رحت كعدت سلوى حتى تروح للدوام سالتها من اجت تتريك 

= شبيها افراح 

ماما من رحتو وهي كالبه خلقتها وتشتغل وتدردم 

= ليش انتي ما تشتغلين 

والله انظف البيت بالليل ومن اجي اغسل المواعين وانظف المطبخ وبالليل هم اغسل المواعين هي بس تطبخ وتعجن وتخبز 

= اتريكي سلوى وروحي على دوامج

وكعدت افراح سلمت واتريكت وريكت جهالها اما مياده فما شفتها انا طبخت الغدا وغسلت مواعين الريوك وافراح 

تباوع وتهز بايدها اجو ع الغدا والتمينا ومياده ماكو گلت السلوى 

= روحي صيحي مرت اخوج 

افراح كالت //خليها خاله نايمه تعبانه خطيه من السفر 

هادي/: يعني من اجت الهسه ما كعدت 

افراح //اصلا ما شفناها خير شر

عباس من سمع ما كمل اكله وگام دخل للغرفه وسلوى لمت المواعين وراحت تغسلهن بعدها طلع عباس عرفت 

رايح للمحل بالليل كمت سويت العشا شوربه وشويت باذنجان وسلوى سوت زلاطه اجه عباس سلم ودخل للغرفه 

بعدين طلع لابس دشداشته وكعد يمي بالطارمه وسلوى وافراح جابن العشا التمينا باوعت السلوى كتلها

=روحي صيحي المياده 

عباس ما رد سلوى راحت واجت وراها مياده گتلها 

=اتعشي عمه انتي اليوم ما اتغديتي ولا اتريگتي ومو زين عليج 

جاوبتني //عمه ما اشتهي 

 = مو زين عليج انتي حامل ما يصير تبقين بدون اكل

ردت عليه وكانها تتحدى افراح /لا عمه مو عباس جابلي ويا كباب وحلويات وكرزات يعرف ما اشتهي اكلكم 

ودارت تريد ترجع كتلها بلهجة الامر =روحي جيبي قوري الچاي واكعدي صبي 

هي باوعت العباس الي ما عقب على كلامي وجابت القوري وگعدت وبدت تصب الچاي انا حچيت 

= ما طول مياده صارت زينه راح اقسم الشغل بيناتچن 

افراح/ اي والله عمه تعرفين جهال ورجال ما الحك 

جاوبتها ==اي انا الاعرف انتي ام ياسر عليج العجن وانتي مياده تاخذين تنظيف البيت والطارمه 

مياده / لا انا ما اكدر ادنك اتعب نسيتي انا حامل 

رديت عليها =زين المواعين توكفين ع السنك 

جاوبتني /لا عمه كل شي ولا المواعين اديه تمشك واظافري يوكعن 

انا باوعت العباس الي يباوع المياده وهادي الي يبتسم باستهزاء 

= يعني لا تنظيف ولا مواعين زين خلي الطبخ عليج الغدا والعشا 

افراح /والمواعين والتنظيف 

 = سلوى تنظف وتغسل مواعين الغدا وانتي ام ياسر مواعين العشا

وگمت ما خليت احد يحجي ونمنا بالليل طفت الكهرباء وما چان اكو مولد من تطفى اطلع اطفي الثلاجه والمجمده لان 

خاف تجي قويه ويحتركن رحت طفيتهن وكعدت ع القنفه الي بالطارمه المفتوحه وانتچيت شباك غرفه عباس 

يطل عليها سمعت تگله 

؛عباس حبيبي مو انت تحبني خلي نطلع منا والله دا احس مختنگه ما اعرف شنو بيه 

عباس/وين نروح مياده 

؛ما نبقى بالبصره نروح البغداد ما شفتها شكد حلوه 

؛انت شتحجين بغداد 

اي بغداد ما شفت بيت خالك شلون عايشين شنووقابل انت اقل منهم 

؛اي اقل بغداد يرادله فلوس 

وانت عندك المحل تبيعه وهناك تشتري محل تدري من نروح البغداد نتغير جهالك يطلعون غير شكل ناس مثقفه

عباس جاوبها //تره وهنا البصره هم ما قاصرين لا تشوفيني انا ماكملت اخواتي واخوي 

هي بدلاعه /اعرف حبيبي بس اقصد ناسهم واحد ما يتدخل بالثاني مو مثل اهنا يعدون عليه اللكمه 

عباس رد عليها //اي بس انتي هم مقصره مكضيتها نوم 

عبوسي حبيبي اني ما اعرف اشتغل الله عليك لو چنت اشتغل عد اهلي شفتني محافظه على جمالي 

سألها //ليش ابيتكم منوالي يشتغل

امي عبوسي ومرت اخوي بس الزوجها وجهالها حبيبي گلي اي خلي نشيل البغداد عفيه مو انا ملكتك 

جاوبها //اووف منج صار اشيل بس مو هسه 

هي بدلاعه /لعد يمته 

انطيني مجال واصبري

الي سمعته دوخني لكن سكتت واتذكرت هاي الشغله مو جديده ليش نسيت اختي شنو سووت هاي انا ما عندي حظ 

ويه الناس ثاني يوم كعدت مياده الساعه عشره اجت يمي 

صباح الخير 

= صباح النور 

عمه شطبخ 

 = مركة بتيته وتمن

وراحت للمطبخ من اجو الولد الساعه ثنتين صبت الغدا هي وسلوى وافراح تباوع 

جابوا الغدا بدينا ناكل المرك مالح والتمن اي نكهه ما بي 

باوعت الها وكلت= مياده يمه ليش هلكد تخلين ملح 

خاله مو طبيعتي اضوك الاكل شمدريني خليت بايدي 

=قللي الملح مره ثانيه 

افراح باستهزاء//خاله ينوكل اذا نكاسره ع التمن

= كاسري واكلي وانتي مياده ما بيها شي اذا تضوكينه للاكل 

اخذت خبزه وخضره وصبيت كلاص لبن وصرت اكل 

افراح كالت الجهالها // كومو يمه اسويلكم جاي وحليب 

هادي وعباس ساكتين ومياده ما اتغدت وانا رحت للغرفه اجت سلوى كالت 

ماما لو تشوفين شكد طابخه تمن تتعجبين تكولين عدنا عشرين نفر خطار وشفتي طابخته بس بماي !

جاوبتها بحرگه =اي شفته لاتذبينه نعمه الله ضمي باجر نخلي علي زيت وبصل ونهدره 

اي ضميته بس والله لو تشوفين المطبخ يشيل وما يشيل من المواعين عبالك عدنا عزيمه 

=مي خالف اغسليهن وانتي ساكته

عباس راح للمحل وهادي دخل للغرفه وهي ابد ما طلعت صار الغروب واريد اصلي اجت سلوى وكالت 

شنو ماما اروح اصيح المياده تسوي عشا 

= لا خليها 

والعشا 

 = شنو تهمين بس ابطنج اذا كلش كلش نطك بيضات شلقصه

سكتت سلوى وصليت واجو يمي الجهال ع التلفزيون وبعدين اجت افراح وسلوى بالغرفه الثانيه تقرا وافراح كل 

شويه وسالت // شنو عمه اليوم ماكو عشا هسه مو كافي ما اتغدينا 

انا ما جاوبتها طلعت نساتل للزغار 

افراح //جا عمه انطيني وياج انا وحد 

= لا مو وحد انتي البديه هاج 

مشكوره هي هم حظوظ العلاليك تتسفر كله كباب ومعلاك

= افراح حبيبتي اللوين تردين توصلين تره نفس علاليك عباس هادي يجيبهن ولاتكولين اراقب بس جاي اشوف 

وهاي سوالف نسوان الحمى لا تسوينها 

افراح/ اشو عمه بس انا اذا فكيت حلكي تلديني وما تخليني احجي شو غيري كل مصيبه ولا الثانيه 

جاوبتها =غيرج ما تحجي ومن تحجي هم الدها على حلكها 

افراح راحت الغرفتها وهي تسمع //اروح الغرفتي ابركلي بعد هواي ع السحور بعدنا تونه اتفطرنا

راحت واجه عباس هو وهادي وجايب ويا عشا كباب ودجاج شوي سلم وهادي گال 

عباس جاب العشا يگول لان ما اتغدينا 

افراح طلعت وكالت// ها لازم عباس كايل المياده لان ابد ولا طلعت ولا كالت شسوي عشا 

انا ما جاوبت كلت الافراح= دكومي اخذي العلاليك وصبي وصيحي جهالج

وصبت العشا ما وديت على مياده عباس راح للغرفه بحجة يبدل واجه هو وياها هي كعدت يمه وصرنا ناكل 

واحنا ساكتين لمن ما هادي كال 

باركولي الوزاره وافقت تنطيني اجازه دراسيه

عباس كله// شنو اجازه دراسيه 

اي مو طلعت من الاوائل وقدمت اكمل كليه 

افراح //يا هادي وراتبك خاف يكطعونه 

لا ما يكطعونه مو اكلج اجازه دراسيه يعني اداوم كليه وراتبي ماشي 

= تستاهل يمه 

افراح// احم احم يعني انا راح اصير حرم الباش مهندس

ثاني يوم طبخت الغدا هالمره ماصخ ذرة ملح ماكو والتمن خاله علي بطل زيت وبقت يوم اللحم محترك ويوم 

الدجاج ما مستوي والمركه ماي والمركه ثخينه بس معجون چانت تستفزني لكن انا ما انطيها مجال العشا 

لو انا لو سلوى نسوي 

الى ان وره اسبوعين چان الغدا سمج وبيومها هادي كال الافراح انتي اطبخي وفعلا افراح طبخت واتغدينا بعدها كتلها

= گومي مياده سوي چاي وجيبي اهنا 

راحت غابت ورجعت جابت الچاي چان محترك واسود وبارد ثلج يعني لو نخلي على كل استكان بكده شكر ما ينبلع 

اهنا انا صرت عصبيه وكتلها 

=شنو هذا 

چاي غير 

حچيت بنتر =هاا چاي اتحملنه الطبخ مره مالح مره ماصخ مره المركه ماي مره چنها طين اللحم محترك هسه 

حتى چاي ما تعرفين تخدرين

جاوبتني وهيه تعلج // خاله اني كول شي ما اعرف 

=لا حبيبتي من خطبناج اهلج گالو كل شي تعرف شنو قشمرو علينه مثلا 

راد عباس يحجي اشرت وكلت 

=الطبخ عليه والعجن والخبز على افراح والتنظيف على سلوى وانتي عليج المواعين حجايه ما اسمع مو الي 

يحصلونه الولد نخلصه عشيات من المطاعم

باوعت السلوى وكلت 

گومي سوي غير هذا الزفت

الكل سكت وهي راحت متنرفزه الغرفتها ومشا هذا البرنامج وصارت المواعين عليها والغسل يلعب النفس لكن سكتت 

ما ردت انطيها مجال صار عليها رابع واجت تتريك وياسر ابن هادي يتريك رحت للمطبخ واجت جايبه كوبها

باوعت الها وكلت ليش والصينيه 

والله خاله مواعين الريوك كل واحد يخسل كوبه مو هاي انتي تغسلين كوبج وكوب بتج الي ياكل بي ياسر امه تخسله 

سمعت افراح اجت هاده //اگلج انتي مو المواعين عليج بعد شنو اغسل ماعون الياكل بي ابني

  هزت راسها // اي واذا مو هاي خالتي تخسل مواعين الريوك 

  افراح // تره خالتي هيه تغسلهن لان جنابج تكعدين الظهر وخالتي تستحي اخااف مره تجي وتشوف الوصاخه ولعبان النفس

اتاشر على نفسها // واني ما اغسل ماعون ابنج اصلا تلعب نفسي منه 

  افراح // ولج اشبي ابني يسواج ويسوه طوايفج 

 باوعت الها باستهزاء // شنو شنو هههه يسواني ليش حبيبتي انتي مباوعتله زين چنه وجه عگروگه 

- انجبي واحترمي نفسج ياما متربايه صدك انطوج خبز ما انطوج تربيه 

- لا تغلطين ادب سزز انتي من اول ما شفتيني وانتي الغيره كاتلتج لان عباس ما اخذ اختج الي چنها قرقوز 

- - ايا طايحة الحظ انا اختي چنها قرقوز انا الج

واجت تكمشها وانا لزمت افراح وكلت المياده= عيب عليج شنو هالكلام انتي ما تستحين 

هي اتخوصرت /شنو سبيت العنب ما گلت اله الصدك. افراح تكرهني لان عباس ما اخذ اختها يگول تلعب نفسي منها 

جاوبتها =صدك ما تفتهمين تره الملافظ سعد روحي الغرفتج وكافيني الشر

بيومها عباس ما اجه من الدوام ورايح للمحل چان مشتري بضاعه جايته من بغداد عن طريق اخوي منير من صبينا 

الغدا افراح ما كعدت ع السفره وما خلت جهالها يجون ومياده بكل عين صلفه اتغدت وشالت المواعين وراحت تغسلهن 

وهي تغني 

دخل هادي للغرفه وطلع لگاني بوجهه شفت الغضب بعيونه وگال 

- - وين مياده وين الي تلعب نفسها من جهالي وتعير بمرتي على اختها منو گللها عباس مو زين هسه راح اروح 

واعرف شغلي ويا شنو بيش مان علينه 

انا كتله =يمه هادي استهدى بالرحمن عيب فوك من الناس صوتكم يطلع 

 هز راسه // لا يمه هاي طالت وشمخت ولازم افهمها حدها صلفه والسان وما تستحي ولا تخيل

بوكتها خفت لا يتعاركون كتله =هادي تره مو عباس الي كايل المياده على مهجه 

- - منو يمه اكيد مو انتي 

 = لا هاي المكموعه سليوى هي الي حجت وكالتلها

هذا ما خلاني اكمل كلامي وكانما مصبر فات على سلوى هي متمدده بالغرفه فات عليها ودفرها بظهرها 

سلوى نشغت وبعدين لزمها كفر بيها وهو يكلها 

حقيره تحجين على بت عمتج للغريبه شوفي شلون ما ضمت السر طايحة الحظ

اول مره هادي يضرب سلوى بيومها عرفت انو اولادي تفرقو والسبب مو بس مياده لا افراح همه 

صارت سلوى تبجي وهي تكلي// ليش يمه ليش هيج تكولين 

جاوبتها والدمعه بعيني =ما ردت اخوانج يتعاركون كدام الناس 

سلوى بعصبيه //كله من هاي الحقيره كله منها 

- اعرف يمه بس شسوي مضطره اسكت 

سلوى //والله ولا اسكت بس يجي عباس اله اكله عليها يوكفها عد حدها

بالليل رجع عباس شاف الوجوه مكلبه افراح صبت الها والرجلها وجهالها وراحت اخذت الصينيه الغرفتها ومياده

 بقت بغرفتها ما طلعت سلوى جابت العشا الغرفتي وكعدنا انا ما كتلها صيحي المياده اتعمدت شاف وجه سلوى 

سالها// شبيج سلوى منو وياج 

جاوبته // عثرت وطحت من الدرج 

- - ها وتعورتي كومي البسي خلي اوديج للطبيب 

هزت راسها // لا ما يحتاج امي ضربتني ابره مسكن 

 عباس // لا يختي امي شنو قابل دكتوره ياالله البسي وخلي اوديج

جاوبته=اتعشى وبعدين اخذها 

  - الحمد لله شبعت ياالله امشي

لبست العبايه الاسلاميه ولفت الشال وراحت ويا ربع ساعه ورجعوا هي دخلت وعباس راح للغرفه ونسمع بس الصريخ 

والعياط وهو يضرب بيها ويگلها// حقيره شلون تحجين هذا الكلام 

ونسمعه يضربها ويغلط عليها كلها //شنو. ولچ مانه عليه بهذا الي ابطنج اله اوكعه واطلكج بت النعال شايفه روحج علينه

عبالج ما كاشف حقارتج بس انا صوجي المفروض من مريت بيج باهلج اخليج عدهم لمن ردتي تبقين ابغداد

هو يضرب بيها وهي تصرخ اهنا تدخلت وطلعته اخذته للديوانيه وهو يلهث ويرجف جبتله ماي وغسلت وجهه وانا اكله 

=سمي بالرحمن يمه 

عباس بعصبيه//الله يخليج يمه كله منج اكلكم سلوى شبيها تكليلي طايحه من الدرج وانتي خاله الصوج بيها 

=اي ما ردتكم تتحاجون كدام الناس عباس يمه انا طلعت بيكم من الدنيا ما اريدكم تتفرقون 

جاوبني وهو يضرب چف ايده بالثانيه //والله چنا من وره هالبت الكلب هاي راح نتفرق 

=سمي بالرحمن وروح الغرفتك 

  هز راسه // لا يمه ما اروح تولي چزت نفسي منها باجر اوديها الاهلها واخلي ابوها يربيها

انسند ع القنفه ما حاجيته رحت سويتله جاي وجبته اله لكيته متمدد ع القنفه وخال ايده على اعيونه ادري بي يحبها 

وادري بيها جاي تستغل حبه شكد حقدت عليها بذيج الليله بقيت يمه غطيته وخليت مخده جوه راسه وانا فرشت يمه 

جوه بالكاع تقزيبا الساعه بالثنتيين حسيت بخيال اجه يمي عرفتها هي بيدها لايت واتقربت يمه وهي تكله

- - حبيبي ما جايني نووم لان مو بحظنك اذا ما تجي للغرفه ابقى گاعده اهنا يمك 

هو ما جاوبها 

- - عبوسي حياتي انا اسفه انا غلطانه بعد ما اسويها بس تعال انت ما اشتاقيتلي 

هو جاوبها //اطلعي مياده كافي منا امي 

- - ما اطلع ابقى ااهنا 

- - ما اريدج باجر من الصبح لمي ملابسج واوديج الاهلج 

- - لو تموتني ما اروح ما اكدر افاركك وهسه راح اطلع ابقى بالحوش ما اخش للغرفه 

— ما علي بيج وين ما ترحين روحي باجر اوديج الاهلج 

صارت تبجي من صدك //عباس اكتل نفسي وما اروح اني غلطت وگتلك التوبه

وصارت تشهك انا كعدت كتله =عباس روح الغرفتك كوم يمه البنيه تكلك غلطت وبعد ما تعيدها 

جاوبني // لا يمه ما اريدها اوديها الاهلها ما تبقى اهنا 

=لا والله انت الي تطلع مياده تبقى هذا بيتها مثل ما هو بيتك وياالله بلا كلام زايد ياالله روح الغرفتك ياالله حبيبي

ومن يومها صارت حرب بارده بين افراح ومياده ونظرات حقد على سلوى من مياده 

كانت حامل بنص الخامس لمن خابر منذر وبلغنا ابو مياده اتوفى

بيومها اخذناها ورحنا انا وعباس وهادي وافراح ونصره ورجل نصره الحجي ومناك اجه منير وسراج بقينا تلث تيام 

وعباس اتكفل بالفاتحه وانا اشوف مياده مو عبالك ابوها الي اتوفى عبالك شخص غريب اي حزن ما بين عليها 

عكس امها واخواتها 

گاعده وتسولف وكل شويه تبدل من كملنه الثالثه رجعنا وهي بقت كالت // ابقى للاربعين ما اكدر اروح وارجع 

عباس ما قبل بس انا كتله = مي خالف يمه تبقى يم امها واخواتها

رجعنا واشوف عباس مو مثل قبل يكعد ويسولف ويه هادي ولا حتى هادي يتشاقى ويه عباس ابتعدوا واحد عن الثاني 

هذا ذاب روحه بالشغل والوظيفه 

وهادي حجته الدراسه 

اشوف عباس يخابرها ويسال على حملها وبعدين يدخل التلفون الغرفته ويبقى يسولف وياها من صار الاربعين 

مال ابوها هو اخذ اجازه وكال اروح وياهم واجيبها واجي وراح وره يومين اجه عباس ابحده تلكيته سلمت علي سالته 

= وين مرتك 

جاوبني /