رواية ناديه الفصل الواحد والأربعون بقلم انين الليل
مرحبا
الكل يسأل وين سراج وليش ما اله ظهور بهاي الفتره
الجواب
اول شي تسلسل القصه واحداثها تحتم عليه ابقى بمنحى واحد بالوقت الحاضر يعني هاي الفتره اتكلم بيها
عن ناديه ومعاناتها
ثاني شي سراج موجود واكيد على تواصل ويه كرم وزهراء واكيد اكو شي خلا يبتعد لكن اكيد واكيد
بالاحداث القادمه راح يظهر
القصه على لسان صاحبتها انا فقط ارتب الاحداث واكتب بعض الاضافات حتى من تقرؤها وكانما تعيشون
احداثها مع الابطال
اتمنى منكم التصويت لان بنظري هي قصه ليست ككل القصص
قراءه ممتعه
💕احبكم كومايات 💕😘😘😘
🌷آنيين 🌷
/////////////////////🌹❤️🌹///////////////////////
ناديه
يمكن حبي للانتقام او لان فضول حبيت اعرف شيريد مني ياسر ولو انا اعرف لكن اريد اسمع منه
انا اعرف ياسر يحبني ومن زمان واشوفه شلون دائما يدافع عني وحتى من چنا زغار وهديل وعمار يضربوني
چان ايدافعلي واكثر من مره اشوف هادي شلون يضربه ويعنفه
ثاني يووم الصبح گعدت فتحت الباب ونزلت للمطبخ هو نزل وگلي
انتظرج براس الفرع
اي بس رمش عليه وانا اطلع
ورجع صعد انا سويت ريوك واتريكت وصعدت خابرت اماني گتلها لاتمرون عليه ورحت ندهت حنين وگعدتها
تتريك لان صعدتلها ريوك بعدها غسلت وفرشت اسناني وبدلت وحنين نزلت الصينيه وشطفت المواعين ورجعت
صعدت هم بدلت
حنين گالت //ندووش كلهم متجمعين وافراح تريد تنفجر
انا رفعت اديه وگلت ......عساها بالانفجار وما يبقى منها شي
حنيين // آميين
ضحكنا وره ربع ساعه نزلت وما شفت بس افراح گلت ......صباح الخير
هي ردت تشاور نفسها// هلا
شويه ورمش عليه ياسر طلعت وبقيت امشي الى ان وصلت الراس الفرع ركبت بالسياره وتمينا ساكتين فتره
بعدين گلي //ناديه اضربي الدوام وخلينه نروح المكان هادي نگعد بي
ضحكت على جملة مكان هادي باوعتله وگلت ......ياسر انت گلت انت توصلني للكليه لان عندك كلام تريد
تحچي وياي
ياسر وهو يباوع ع الشارع //اي صحيح
......وانا اسمعك وياريت تستعجل لان عندي محاضره مهمه
هو وگف السياره على صفحه وبقى يباوعلي ويتنفس قوي انا مدنگه ااباوع للجنطه هو گلي
ناديه احبج واحبج من زمان
باوعتله ولان چنت اعرف شنو يريد يحچي سكتت ما جاوبت
هو رد //ناديه سمعتيني ليش ما تحچين
باوعتله وگلت بدون اهتمام ......ياسر وصلني للكليه
حاچاني بنتر //ناديه ليش ما تجاوبيني انتي سمعتيني
رديت بهدوء......اي سمعتك وادري وحاسه بيك لكن
:لكن شنو ناديه
...واهلك ياسر ؟
ياسررعكف حواجبه //اهلي شبيهم
تفخت وگتله ......اقصد امك ابوك يقبلون تتزوجني لو تريدني علاقه شكم يووم وبعدين بيباي
هو فتح عيونه وگلي بزمخه //ولچ شنو هالكلام
هزيت راسي ......اي هذا هو الكلام امك من سابع المستحيلات توافق ناسي انا بت منو خلي اذكرك انا بت ميا......
هو رفع ايده //كافي لا تكملين
وساق السياره وهو ساكت وصلني للكليه ومن ردت انزل گلي
ناديه لازم تعرفين انتي اليه ومستحييل تصيرين الغيري
الحقيقه ما اهتميت الكلامه لان اعرف امه مستحيل توافق لو انطيها كل ثروتي وادري بياسر شخصيته ضعيفه گدام
اهله والشي الثاني انا ما عندي اي احساس اتجاه ياسر غير هو ابن عمي الحباب الي يدافع عني وعن اختي
لكن بنفس الوقت هو شخصيته ضعيفه خصوصا گدام امه
وصلت وبوجهي للقاعه ودخلت وراي اجه الاستاذ وانطانه محاضره بعده الاستاذ الثاني اعتذر لان تعبان طلعت
اتمشى بالحديقه وگعدت على مصطبه واتصلت بنسرين هي ردت عليه وگالت
يابذات مو گلتي احاچيج بالليل وينج
......صار عندي شغل ونسيت
نسرين //ها هو اكو واحد ينسى يخابر نسرين
رديت عليها بعدم اهتمام ......اي انا اگلج اريد اشوف رافد
:ها عيني وين تردين اتشوفينه
......وين يعني اهنا بالكافتريا وهسه
نسرين //عبالي بغير مكان گلت اخدمج
......تسلمين ياالله خلي اشوفه باسرع وقت
نسرين //شتنطيني
......انتي شتردين
:الصراحه تلفوني حتى ترميشه مابي
انا باستهزاء ......بس عبالي تردين اوصيلج على صينية مشاوي
نسرين //هلو يابه الدولار صاعد اليوم
......وكل يوم وشگد ما تردين بسمو ابلاش يعتمد على خدماتج الي تقدمينها اليه
نسرين //اوگفي اوگفي شنو خدماتي
ما جاوبتها على سؤالها بس كلمتها بلهچة الامر ......نسرين دزيلي رافد وياريت هسه انا بالكافتريا
وراح اعبيلج رصيد
انا نفسي اتعجبت من طريقة كلامي بس عرفت الكلام احيانا يجي كرد فعل من تصرفات بعض الناس رحت
للكافتريا وگعدت وقبلها رحت اخذت گهوه وطلبت من ابو الكافتريا رصيد ابو العشره وگتله حوله النسرين
لان الف بالميه يعرف رقمها انتظرت شويه واجه رافد وهو مبتسم عباله گدر ان يوگعني او خوفني بكلامه
ابتسمت بكل ثقه واشرتله يگعد
هو گعد وگلي // صباح الجمال والسعاده حبيبتي
ظليت اباوعله بنظرة استهزاء وانا خاله ايدي على الكرسي ومسترخيه بگعدتي بدون ما ارد ولا كلمه هو گال
- - اتصدگين ناديه من گلتلي نسرين انتي رايدتني ولو انا چنت واثق من هذا الشي لكن اغالط نفسي
جاوبته ابرود ......واثق واثق بشنو ؟!
رافد // انو انتي حبيتيني وارتاحيتي الي
باوعتله وانا اسوي بحلگي حركات استهزاء وگتله ......روح جيبلي نسكافيه
هو راح بعد ان ضحك وگلي //يدلل الحلو
اشمأزيت من تصرفاته لكن اريد اعرف شي منه ولازم اعرفه جابلي النسكافيه وهو هم جابله واجه گعد وما مبطل
سوالف وتحشيش ويه اصدقائه الي يمرون من يم الطاوله وكأنما ايگللهم گدرت اجيبها للطريق گدرت اوگعها
شربت الفنجان وهو يباوعلي ويگول //ناديه عيوني الچ شنو تردين مني حاضر وانا اسف على الكلام الي بدر مني
ابتسمت بوجهه ورديت ......بس الكلام الي سمعتني ايا كله صحيح
هو بضحك ما يخلو من الارتباك جاوبني //اي صحيح بس ما شاء الله انتي غسلتي مجاديفي
تستمر القصة أدناه
خليت اديه على الطاوله وقربت وجهي وگتله ......رافد انت عرفت بس الجزء الي سمعو الك يعني الي
رادو يوصلونه ويشوهون صورتي وحتى انت تسوي علاقه وياي
هو راد يحچي بس انا اشرتله يعني خلي اكمل حاچيته بهدوء
......صحيح امي قتلت ابوي بمساعدة عشيقها وهي من كثر ما تحب عشيقها ضحت بنفسها واكثر من مره گالت
بالمحكمه انا الي قتلته بس حتى تنقذ حبيبها لكن الشي الي ما تعرفه هو منو الي كشف الحقيقه وخلاها تنعدم
رافد باهتمام //منو
ابتسمت ورديت ابرود وانا ااشر على نفسي ... ... انا رافد بكل بساطه شفت امي اكثر من مره ويه عشيقها بيومها
چنت ما مكمله اربع سنين وشفتها شلون هي وحبيبها قتلوا ابوي ومن اجه المحقق انا شهدت على امي
رافد بتعجب //معقوله !!
هزيت راسي وگتله ......اي معقوله ليش متعجب وانا الي وصلت امي الحبل المشنقه لكن (وجريت نفس قوي )
رافد //لكن شنو ناديه
اتقربت منه وگتله بصوت ناصي بعد ان اشرتله يتقرب ...... انا من حچيت چنت بوكتها عقل طفله اصلا عبالي
ابوي مو ميت لكن الي جبرني احچي والي ركض وراح ودور على الادله وقدمها واستعجل بحكم الاعدام
ها وسوالي انا واختي تحليل نسب هو عمو
رافد //قصدج عمج ابو هديل
انا باستهزاء... ... ها تعرف بت عمي هديل
رافد //اي اعرفها قصدج عمج هو ابوها الي كشف امج
انا بنفس نبرة الاستهزاء... ... لا ياعمو ابو هديل اممم ابو هديل هذا عباره عن جريدي بس بوخه هذاك عمو يصير
ابن خال ابوي بوكتها كان ضابط بال...وباقل من يومين قنعني اشهد ضد امي وقدم ادله للمحكمه خلاهم يحكموها
اعدام واستعجل حتى ينفذون بيها الحكم
وهسه هو ما شاء الله صار بمنصب كبير بالدوله ناهيك عن ولد عمه لعد منين ابوها الهديل بت عمي
منيله وصل الهاي الدرجه بالدائره
رافد باستفهام //ما فهمت ناديه شنو قصدج؟
نفخت حيل وگتله ......قصدي الي طلع دم ابن عمته بيومين (وحركت اصابعي )وبوكت چانت الدوله متخبطه وتريد
اترضي الناس مره تكتل وتعدم ومره تنطي عفو شامل لكن هو ما انتظر خلاهم يصادقون على حكم الاعدام
وهسه هو واولاد عمه الي طاگين بالحكومه يگدر بلحظه يجيبك ويحاسبك على كل كلمه گلتها بحقي
هو وگف وگال //انتي تهدديني
انا نترت علي ... ... اگعد لاتعلي صوتك مو بصالحك صير ذكي لان بعدني ما مكمله كلامي
رافد بعصبيه // وانا ما اريد اسمع
جاوبته بابتسامه...... مو توني اگول عليك ذكي اگعد وخليني اكمل كلامي ولا تزعلني منك
هو گعد وراد يحچي انا رفعت اصبعي على حلگي ...... شوف رافد انت ولد وشاب وحلو وما شاء الله عندك سياره
واهلك عدهم خير من الله بس بتصورك بعد عمر طويل شگد راح تورث من ابوك نگول مية مليون ميتين
شوف واسمع وتگدر تسال هاي الگاعده گبالك( واشرت على نفسي ) تملك ما يقارب المليار ونص
فتح عيونه هزيت راسي وابتسم ...... ايي مثل ما تسمع واذا تحب تتاكد ما عندي مانع انا ثروة ابوي چانت عد عمي
وعرفت استرجعها على كل مو هذا موضوعنا انت غلطت بحقي ولازم تعتذر
رافد //ناديه انا ما اشوف نفسي غلطت بحقج واذا غلطت فاانا اسف
......تؤ ما اقبل اسفك اله تجاوبني على شكم سؤال والا ثق باالله هسه اخابر عمي وهو يجي يگوم بالواجب وخلي
الي دزوك عليه يشفعولك
رافد //رجعنا للتهديد
هزيت راسي وابتسمت ......لا تعتبره تهديد بقدر ما اريدك تعتبره تعريف عن نفسي انت حقك ما چنت تعرفني اله
معرفه سطحيه وسمعت عني هواي كلام فما الومك
رافد حمحم واتكلم بهدوء // شنو تردين تسألين
......رافد انت ما تعرفني لذلك مهم جدا اعرف منو دزك عليه وثق هذا الكلام راح يبقى بيناتنا
رافد //اذا يبقى بيناتنا ليش تسالين ؟
......حتى اعرف هاي منو الي هلگد تكرهني واخذ حذري منها
رافد //يعني ما راح اتاذينها
باوعتله وگتله بعتب ......هاي شنو شايفني رئيسة عصابه (باوعتله )گلي رافد منو
رافد //ناديه انا دووم اسوي علاقات
......اعرف لا تسولفلي بطولاتك گلي منو
رافد //لمى ناديه لمى الي گلتلي
انا استغربت ......لمى ومنين تعرفك ؟
رافد //تعرفني بيناتنا سلام وكلام
......وليش ما تگول بيناتكم علاقه
رافد هز راسه بالنفي //الصراحه انا ولمى ما بيناتنا شي بس هي طلبت مني اصادقج
...تصادقني ؟
رافد //اي والله ليش الچذب ومن سالتها ليش هي گالت عليج لان انتي تمثلين الشرف والبراءه وظلت
تحچي على امچ وعلى علاقتچ بميثاق وشلون ......
حكيت حنچي ...ليش سكتت
رافد //هسه انتي مو عرفتي منو هذا هو
ابتسمت ......مي خالف حب استطلاع
رافد //ناديه لمى گلتلي انو استاذ ميثاق انتي ويا علاقه وهو گللها بان هو تركج لان انتي ......
ابتسمت وسالته ......وانت رافد بدون مجامله شنو تشوفني
رافد //لا والله ما كو مثلج بدون مبالغه وانا اسف ناديه تعرفين احنه شباب اووو
......مفهوم اكيد شكرا الك بس اذا سالتك گللها الصدك يعني انا رفضت اسوي وياك علاقه لان انا مو
رخيصه ها ويجوز احتاجك تردلي الخدمه من رخصتك
طلعت من الكافتريا وبقيت امشي اتصلت بنسرين گتلها ...رايدتج
نسرين كتبتلي //عندي محاضره
كتبت الها ...ما اعرف اطلعي يم مختبر العلوم
وره ربع ساعه اجتني نسرين وهي تگلي //شتسوين جايه لهنا
......ما اعرف بقيت امشي باوعت نفسي اهنا وانتي شلون طلعتي
سويت نفسي دايخه وطلعت
رحنا الكافترية العلوم وگعدنا اهناك وانا ما اعرف احد بس نسرين تعرف اهواي جماعه گعدنا وراحت جابت عصير
نسرين // ها ناديه خير شنووردتي مني
عضيت على شفتي وحچيت ......نسرين خلي نحچي بصراحه بدون رتوش
:وانا اسمعج بالبدايه شكرا ع الرصيد
...... تدللين (جريت نفس ) اريد اوگع واحد واصوره واوگع صاحبته وهم اصورها
نسرين بتعجب // ايا بت الاوادم
......شگد تاخذين وانتبهي هاي مو بس هي الخدمه الي اطلبها يعني بين قوسين تبادل منفعه
نسرين هزت راسها //لا ما اصدك انتي ناديه
...لا ليش ما تصدگين مثل ما انتي نسرين انا ناديه الشي الي اريده منج هو مكان وتصوير مخل
:المن للولد ؟
هزيت راسي وابتسمت ...اي واحد للولد والثاني للبنيه انا اگدر اجيب غيرج وناس ما يعرفوهم بس حبيت
افيدج واستفيد
نسرين گالت //ناديه بديت اخاف منج
هزيت راسي ... .... معقوله نسرين اتخافيين مني هو منو اليكدرلح
نسرين ترفع حاجبها //. ولو انتي صايره تخوفيين
... ... لا شبيج اگدر اخابر عمو او ليش ادخل عمو بايراد ومصرف اجيبلي جماعه واخلي ميثاق يضيع او ع الاقل
شهر ياكل بسط غسل ولبس لكن ما يشفى غليلي (باوعت النسرين وحچيت )
......وهسه تگدرين ترحين وتگليله لكن انتي ذكيه شوفي شگد تردين وگليلي
نسرين باستغراب // قصدج استاذ ميثاق ولمى
هزيت راسي .... ايي همه
نسرين بعصبيه //. ولج انتي لوين تردين توصليين يعني كلام لمى صحيح هولعب عليج وعافج
عضييت شفتي من القهر وجاوبتها ...تتصورين انا اسوي هالشكل
نسرين //. وانا شمدريني
اتنفست ... نسرين بس انا اريدج اتساعديني
نسرين //. شوفي ناديه انتي بعدج خامه ما تعرفين شي الكليهعباره عن (حكت ذقنها ) عباره عن منطقه لامه الزين والشين
.......... ها يعني اذا انا خامه معناتها ميثاق ولمى يچذبون ولفقو عليهكلام ما صاير
نسرين //. حتى لو انسي لاتفكرين بالانتقام بعدين تعاي اكلج منو گلج انا اكدر اخدمج شنو اشايفتني اذا ما تجوزين
اروح الميثاق واسولفل...
قاطعتها ... مليون كافي
باوعتلي بذهول انا ابتسمت ... .... حبيبتي نسرين اكون غبيه اذا ما اعرفج انتي تكدرين كل شي تسوين ما احيتج
منا والدرب لا حبي انتي نسرين اشهر من نار على علم نسرين الي مصادقه اغلب اساتذة الكليه ناهيج عن الطلعات
والونسه وسوالف ا...
ردت بعصبيه //. ولج الزمي حدودج
ابتسمت وحچييت //. لا ازعل منج اعرفج ذكيه وما تضيعيين فرصه رزق وجايلج وبس تصوير اله
نسرين // ولج ناديه انتي تلعبين بالنار
... ... تؤ لا تخافيين انا اعرف شنو اسوي وهسه شگلتي
نسرين // بس هذا يكلف
.... لا تدورين طمع وياي لان اذا سويتيلي هذا الشي راح يصير هوااي شغل ابيناتنا وقبلها اسمعيني
انا احميج من اي شي وراح ادلعج بالفلوس وتكدرين تتاكدين من المحامي الخاص مالتي شكد انا املك
ومو بس هيج عندي ناس واصلين ورافد اكيد راح يسولفلج عليهم يعني انتي بالسليم فكري ورجعيلي خبر
اذا ما تكدرين راح تبقيين صديقتي الي احتاجج تسويلي شغل والي لازم ما تطلعين سري لان بذاك الوقت
راح ازعل منج هوااي فكري ورجعيلي الخبر
... ... تمام محتاجه شي لا تترددين اتطلبين مني وانا بالخدمه
عفت بذهولها ورحت امشي بكل ثقه ورحت كعدت على مصطبه بالحديقه شفت نسرين اجت وراي
وگالت //ميثاق مگدور علي بس لمى
جاوبتها ......لمى هي الي لازم تتعاقب لان خانتني اخذت الشخص الي يحبني وبعدين شوهت سمعتي
نسرين //زين خليني ادورها براسي ويصير خير
......بكيفج نسرين بس صدگيني اذا تحاولين تحچين الميثاق ما راح يصدگج وتخسرين هواي
نسرين //شوف هاي شنو شحصل من ميثاق مثلاهاي شبيج حبيبتي ناديه انا وره اليدفع اكثر
......تمام وشي ثاني نلتقي اهنا او بره بكيفج اريد ابتعد عنهم ما اريد ايشوفوني وياج
:هذا هو مثل ما تردين بس بالاول لازم افكر شلون اوگع لمى
جاوبتها بعدم اهتمام ......توگع رخيصه صدگيني توگع واسمعيني نسرين تگدرين تحچيلهم ويجوز ميثاق ينطيج
شكم فلس ويخلي الاساتذه ايساعدوج بس مو بگد الي راح تحصلينه مني
جاوبتني // ولچ ناديه طلعتي داهيه ولا مبين عليج
....... ههههه البادي اظلم وهمه بدو
ابتسمت وگالت //هذا هو اطمني بس خلي افرها براسي واشوف شسويله
... ... ما ينخاف عليج كل شي تگدرين تسوين
ردت بكلمه بعدين عرفت شنو معناها //. بس كله بالسليم
...هاج طلعت خمسين الف وانطيتها
نسرين عكفت حواجبها //شنو هذني لا تگليلي اتعابج
......ههههه لا عيني هذني الج هيج محبه وحتى تفكرين الف مره قبل لاتحاولين تخونيني
نسرين //هاي شنو منج تره ازعل
اتحسرت ......لا تزعلين واعذريني لان اهواي اتاذيت وهواي خانوني
:اعرف الله يساعدج
...هسه اريد منج شي ثاني
:شنو ناديه
...تراقبيلي هديل وتشوفيلي كل تحركاتها
:صدك ناديه
......اي صدك ما احب اظلم احد اله اتاكد ميه بالميه
وگفت وگتلها ...نسرين من تقررين تساعديني راح يكون النه كلام ثاني فكري واحسبيها وشوفي شگد
تردين وحاچيني انتظرج تردين عليه
هي ابتسمت وگالت //هذا هو اعتمدي
طلعت ابحدي امشي ورحت للقاعه وحضرت المحاضره وطلعت رجعت للبيت وانا اتذكر هديل والي
سوته بيه
قررت ما اسامحها ولازم تشرب من نفس كاس الذل الي شربتني منه بس الفرق بسيط انا بت مياده
القاتله الفاجره وهي بت افراح الحقوده
دخلت للبيت وصارت عيني بعين ياسر سلمت ......مساء الخير
ياسر رد والباقي ساكتين صعدت وشفت حنين گاعده تباوع ع التلفزيون وتكرز حب انا اجيت يمها وحضنتها
وهي ابتسمت وگالت //غسلي وانا انزل اجيب الغدا
......لا حنونه انا راح انزل اجيب الغدا
:مو انتي تعبانه
جاوبتها بضحكه ...بس هيج احب اغيض افراح
حنين //لا ندووش هاي ما تستحي لا تتجاسر عليج وانا والله بعد فلا اسكت الها
هي نزلت وانا غسلت ولبست تراك ماروني اجت حنين وهي جايبه ماعون تمن وطاسة مرگ بس عادي متعودين
على كرم افراح نزلت هي گالت وين اشرت الها تعاي وراي
وصلنه للمطبخ شفتهم يتغدون وگفت اباب المطبخ واشوف ياسر شلون يباوعلي انا گلت
......عمو من رخصتك اريد العصر اروح اشوف بيبي جميله من زمان ما شايفتها
ما جاوب افراح گالت //ليش شعجب كل مره تتحججين بالدراسه
......بس هي عنت عليه واريد اروح اشوفها
افراح //ها والعشا منو يسوي
......عمه انتي لو هديل انا راح اتعشى اهناك
حنين گالت //روحي انتي ندووش وانا اسوي العشا
......وليش ما ترحين وياي ؟
حنين //لان عندي امتحان ابقى اقرا وانتي روحي
افراح //لاانتي ولا هي ماكو روحه
باوعت الها وگلت ......ليش عمه
افراح //بنات كبرتن شكو النهار كله اتخورن
اتقربت منها وگلت ......كلمةاتخورن ما تنگال الي والاختي لان احنه ما نطلع من البيت اله البيت بيبي
افراح بنتر //ها ولج تعاي طگيني
انا ابرود ......لا عليمن بس مره ثانيه عمه عيب لاتحچين هيچ ويانه لان احنه كبرنا
هي گامت وگفت واتدنت يمي //اسمعي ولج خاف عبالج صار عدج راتب واجار وصرتي تتشمخرين
عليه احترمي نفسج لاانعل ابوج لا ابو راتبج
هادي گال بزمخه //افراح
افراح ردت بصوت عالي // عليمن صرت عصبي (وباوعت الياسر ) وانت فزيت من مكانك تره
عادي نعلت ابوها خاف مصدگين هي بت عباس تره كلنه نعرف اذا مو بت سلدار شوف منين جابتها
صرت ارجف وانا اشوف الكل سكت وهديل واسيل يضحكن رديت عليها
......والله لو چنت بت سلدار ما چان وصلته الحبل المشنقه چان حنيت علي بس انا بت عباس وحتى
عمي هذا الساكت ( وآشر باصبعي ) متاكد انا بت عباس وانطيج دليل
هديل باستهزاء //ياا صارت تحچي بالادله
اسيل //يجوز داخله قانون موو هندسه
رديت وانا اهز راسي واخزر بياسر ......لا اخوج بالقانون وانا هندسه دليلي هذا عمي خطب زهراء اكثر من مره
بس حتى تبقى اتدارينا ومو بس هيج لان يحبنا ويحبها ويدري بيج انتي ما بيوم راح تحبينا ولا تحنيين علينه
درت وجهي واشرت الحنين وصعدنا
افراح صارت تعيط وتگول
: الساقطه العرجه هسه تجيبلنه كسرة وجه قرة عينك هادي بنات ام الزلم يعيرن بيه يگولن چنت تريد زهراء
بالعافيه وبعد شضامه طلعي لا تسكتين
انا صعدت ويه حنين الي گالت // ندووش ليش هيج سويتي چان خليتيها تحچي وما راددتيها
......المهم خليتها ما تتزقنب
دخلنه للغرفه وصرنا ناكل وطلعت فواكه من الثلاجه لان من اجي ويه الخط اكو بسطه قريبه من البيت
انزل اشتري منها نمت وگعدت قريب المغرب وشفت ياسر كاتبلي
:الخميس بالليل انا اوديج البيت بيبي انتي وحنين وباتي هناك
قريت ما جاوبته بقيت بالغرفه احاول اقرا ولوانا كل دراستي تبدي بالليل وتنتهي الفجر بس اتصفح عفت المحاضره
ورجعت ع الموبايل شفت ميثاق متصل كتبت اله
... ... لازلت اقول اني احلم بكابوس لايريد ان يفارق عقلي
...كيف للصاحب ان يخون وللحبيب ان ينسى
... ... صدقني لا ابكي الا اني اتمنى ان تعاد لحظه واحده من تلك الايام حتى اقول لك
... ... اني احبك هذه الكلمه التي كنت تتمنى ان تسمعها مني ولو للحظه
شفته قراها وبدا يكتب وانا گلبي يدك بالثانيه الف اجتني منه رساله كاتبلي
فعلا كنت اتمنى اسمعها ولكن الان انا اسمعها من حبيبتي في كل لحظه ومتى ما شئت
رديت ......ايها الكاذب اي حبيبه هذه التي تقول عنها
تلك انسانه رخيصه ورخيصه جدا
ميثاق //الا تخافي ان اخبرها
......اخبرها سوف اقف واقول انا احق بك من تلك اللئيمه الخائنه
بقى ساكت وبعدين كتب // ناديه اتصور احنه انتهينا
جاوبته ......العفو مجرد خاطره وردت اتشاركني بيها اسفه بعد ما اكتب
ميثاق //ناديه ممكن سؤال
...اي اتفضل
:انتي تقصدين الكلام الي كتبتي
...گتلك مجرد خاطره وعفيه لا تحچي ال لمى
:تخافين منها
......اكيد طبعا الي سرقت حبيب صديقتها واصطادته بماي عكر وعكر جدا هاي كل شي ممكن تسوي
:لاتنسين هي خطيبتي
......تتهنا بيها بس الي اعرفه انت ما تحبها
ميثاق //هاا متاكده من كلامج
......اي مليون بالميه
:اذا مثل ماتگولين ما احبها زين احب منو
ما جاوبته بقيت متصله وصار يگلي //ليش ساكته جاوبي
اخذت سكرين وحفظتها واتصلت بنسرين ردت عليه //. هلو ناديه
هلا بيج ها موافقه
نسرين // اي موافقه
... .... شوفي شغلج ويه ميثاق
صليت وكملت ونزلت من شافتني افراح حاچتني من وره خشمها گالت
: سوي شوربه ومن تكملين سوي بيض وطماطه كملت الشوربه وگليت طماطه اجه عمار جايب ويا اكباد دجاج گال
:مشتهي سووهن الي
انا اخذتهن وغسلتهن وبعدين حمستهن وصعدت بديت احضر ملابسي الي حلبسهن بالدوام وحنين تقرا بعدين نزلت
اجيب عشا شفتهم كلهم موجودين انا رحت اريد اصب اكباد ما لگيت مع العلم انا سويت حافظتين يعني هواي
اخذت طماطه وطلعت خبز ياسر شافني وگف جاب ماعونه وگال
:هاج ناديه هذا الج انتي وحنين
ابتسمت ......لا شكرا مو اله عادي نحب الطماطه
ياسر //مي خالف اخذي
حبيت اغيض افراح ......تسلملي ابن عمي بس والله ما اشتهي
:لا مي خالف
اخذت الصحن ......الخاطرك راح اخذه شكرا
صعدت واتعشينا ومن كملنه نزلنه انا وحنين دخلنه للمطبخ وصرنا نغسل بالمواعين وافراح گالت
- - حنين صبي چاي
- - صار عمه
صبت چاي ومن رادت تقدمه انا اخذت الصينيه قدمت الهادي وافراح وبعدين خليت الباقي على الطاوله يعني
الي يريد ياخذ ورحنا انا وحنين نغسل بالمواعين افراح حچت بصوت عالي
— - 0 هادي اليوم حاچيت ابتهاج على مود براء
هادي //خير ياستار شبيها براء
افراح //كل خير اليوم حچيت ويه ابتهاج حتى نروح نخطب براء الياسر
هادي //وشگالت
افراح //تدري ما عدهم مانع
عمار //يعني ياسر راح يتزوج گللوووش
ياسر گال // هوب هوب منو هذا الي راح يتزوج
افراح //انت غير
ياسر //لا حجيه ما افكر بالوقت الحاضر
افراح بنتر //شنو ما تفكر ياسر حاچيت خالتك وانتهى الموضوع
ياسر صار يحچي بعصبيه //شنو زعطوط انا وانتم تتصرفون بدون ما ترجعولي انا ما اتزوج براء
افراح باستهزاء //يااا خاف تتشاقى شنو ما تتزوج براء بكيفك اسمعني ياسر فاتحت اختي بالموضوع
وهمه موافقين واسبوع الجاي نروح ونخطبها
انا طلعت للطارمه وحنين صعدت فووك وصرت اسمع افراح تگله
- - - بكيفي مو بكيفك وغصبن ما عليك تتزوج براء لو ماكو صدگني ما تعرف الي راح يصير
ما سمعت شنو رد عليها لان رحت انظف الحمامات وكملت غسل الطارمه شفت ياسر طلع وهو ما منتبه
للي گدامه ورجعت وهادي ايگللها
- - افراح شكم مره ياسر گلج ما اريد براء شنو انجبره
افراح بنتر //اي انجبره چا اتاني ياخذمن
:الولد گلج ما افكر ومو زغير وتگليله غصبن عليك
:اي غصبن علي وعلى خشمه ياخذ بت اختي اقلها اعرف اصلها وفصلها هادي خلي نلحك نزوج الولد لا بنات ابليس
يلتفن وياخذنهم
عرفت هي تقصدنا بكلامها ثاني يوم داومت وحاولت ما اطلع للكفتريا بقيت بغرفة الطالبات وصرت اكتب الميثاق
......اتمنى اشوفك ارجوك ميثاق انا ابقى احبك حتى لو انت اختاريت لمى ولو اعرف كلش زين هي الي اختارتك
ميثاق ما صار يرد عليه عرفت من نسرين انو بالوقت الي انا اراسل بميثاق هي بدت تتواصل ويا
حتى ما يشك باي شي
كتبت اله
......اعرف انا نزلت نفسي اكثر من اللازم لكن لاتنسى انا ما سمعت كلام الحب والغرام اله منك
كتبلي // يعني ناديه انتي ما تكرهيني
...لا ميثاق ما اكرهك انا انطيك العذر بس مو بيدي ما اگدر انساك
هو بوقتها لان متواصله ويا نسرين يتاخر بالرد عليه جاوبني بعد فتره //انتي وين
......بالقاعه ليش
:حتى انا بغرفة المدرسين
...خطيبتك يمك
:لا بس زملائي
...طيب ميثاق بعدين نتواصل
:ماشي
...ميثاق
:هاا ناديه
...انا احبك
صدگوني من اكتب هالشكل وخصوصا كلمة احبك چنت اتفل عليها واغمها الهاي الكلمه
چان ابالي شي وردت اسوي بقيت اتواصل ويه ميثاق واخابر نسرين الي گلتلي جاي استوه على نار هادئه وسالتها
على لمى وگالت تعرف واحد چان صديقها حلو ومرتب تقصد من ناحية الملابس ويحب ايصادق وهي راوته لمى
وگلتله هاي تحب الحلوين بس يراد الها صبر وحبكت ويا قصه انا راح اصير طرف بيها
اما هديل فالي عرفته عنها هواي عدها علاقات ويه طلاب وگدرت احصل شكم صوره واهنا فهمت نسرين انو لازم
رافد يتعرف على هديل ويسوي وياها علاقه وهيج راح يكون كل حقي وصلني
نسرين طلبت تلث ملايين وانا گتلها مليونين هذا الشهر انطيج مليون ومن تكمل الشغل انطيج المليون الثاني
وفهمتها اكو ناس بوكتنا هذا يكتل بشر بورقتين
بالبدايه ما وافقت لكن فهمتها انو شكد ما تخدمني ما راح انساها واح اداريها بعدين گتلها
.... تردين تلاثه يوصلنج بس على حسب التصوير الي تجيبينه اذا يسوى تلث ملايين انطيهن وانا الممنونه
هي وافقت وفهمتها تبقى بالسيناريو مال الغزل والحب ويه ميثاق الى ان اگللها على يوم التنفيذ
چان يوم خميس ورجعت من الكليه اتغدينا ونمت ونزلت العصر بعد ان اجتني حنين گعدتني وگالت
: ياالله مو على اساس نروح البيبي جميله
انا اتمغطت ......اي ياالله
حنين //ندووش بس غسلي وجهج والبسي عباتج الاسلاميه انا اخذت الج ملابس لان انبات
گمت غسلت وجهي ولبست عباتي الاسلاميه وخليت بالجنطه النقال وخليت فلوس ونزلت لان اعرف ياسر
راح ايوصلنه
شفت هديل واسيل مبدلات عبالي يرحن ويانه من شافتنه افراح گالت
عمار روح وصلهن وارجع
عمار يتافف //وين ارجع اهنا
افراح //لا تعال النه للحديقه ناسي اليوم عازمين بيت خالتك ابتهاج
هديل // وبابا منو يبقى يمه
افراح //ابوج يلحگنا اهناك ياالله ياسر گوم وصلنه
انا گتلها
......عمه خلي عمار يروح وياكم احنه نروح انا واختي مشي هذا بيت عمي كرم مو بعيد
افراح بعدم اهتمام //خوش ما طول هيج روحن شمتانيات
باوعت الياسر ورديت ......لا عمه ما متانيات شي عود سلمينه على عمه ابتهاح وبراء ياالله حنونه مشينه
عمار //اوگفي انا اوصلچن
......لا هذا البيت مو بعيد
افراح //خليهن هنه دووم يرحن مشي شعليهن
هديل باستهزاء //مو صار عدهن راتب خاف ينباگن ههههههههه
اسيل //لا وشوفيهن كل وحده جنطه ما مصدگات
ياسر// انچبي واحترمي نفسج يا طايحة الحظ
اسيل // ليش تغلط انا شحچيت
افراح بهمس // مو سبيتي العنب
طلعت وانا مستهضمه بالطريق دخلنه المحل واخذت منه كيلوين حلقوم وگلت الحنين تشتري كرزات وعصير وتحاسب
ابو المحل وصرت على صفحه خابرت نسرين گتلها //اتفاهمي ويه رافد
نسرين //. اكلج تره رافد اكيد يريد فلوس
... .... لا نسرين ما يريد بط مي خالف اذا يريد فلوس هديه طلعه انا حاضره
وصلنه البيت بيبي جميله شفتها بالصاله بس شافتني گالت
... ... بعد ما اريدچن ليش ما تسالن عليه
رحت حضنتها وگتلها ......بيبي والله دوام
جميله //شني دوام
......اي والله بيبي ما تشوفين نبأ
جميله //هم صدك وشعجب افريحه خلتچن تجن ؟
...لا بيبي قدمنا عريضه على گولتج
حنين //بيبي خلتنه نجي مو محبه بينا لان هي وبناتها او ولدها طالعين يتونسون بالحديقه
جميله هزت ايدها //اي ياحبوبه يلوگ لابو حلوگ الچلبه ما اخذتچن وياها ما ادري شتاخذن منها
(باوعت المرتضى الي واگف يباوع الحنين )
اگلگم بس افريحه هي وبناتها تطلع چا احنه وحد ما تخلونه نطلع ونتونس
مرتضى //صار جميله
جميله //ياالله هاك مريضو ( ومدت ايدها على جيبها وطلعت فلوس )هاك جيب سمج وباچر نطلع للبر
مرتضى //صار جملو باچر من الصبح اروح اجيب السمج واهنا نغسله ويحضرنه البنات
ونروح نشوي ع الحطب
غفران //هييييي ياريت من زمان حنونه ضايجه
جميله //ايخسا الي يضوج حنان
مرتضى يباوع ويبتسم وهو يحچي بصوت ناصي // اي والله يخسا
اتاكدت مرتضى يحب حنين وحسيت الكل ابيت عمي كرم يعرف جميله گالت
- - - مو تحچون وافريحه تجيب دبشها وتلز ويانه
ضحكت على كلام بيبي ومرتضى سالها //بيبي شنو دبشها
جميله // الدبش يعني الحيوان افتهمت
صرنا نضحك وغفران صاحتلي بغرفتها وهي تگلي
- - - عود ليش ما تحفين وجهج وتعتنيين بنفسج گبل انگول ما عندج فلوس هسه ليش
...لان ما اعرف
غفران باستغراب //تحچين صدك
...اي ليش متفاجئه
:يعني ما بيها شي اقصد كل بنيه تعرف
... اله اناوحنين لان ما كان عدنا مجال نحك راسنا
اتحسرت غفران وگالت //اي والله صدك تعاي هسه احفلج واعلمج هواي شغلات
... لا وجهي ما يحتاج
: حتى لو لازم تحفين حتى تبينيين انتي معتنيه بنفسج
وصدك غفران حفت وجهي الي اول مره تخلي علي الخيط وشلون صرت اتوجع وعمه ام مرتضى تگول
: والله لواسولف محد يصدك ليش اكو هالوكت بنيه ما تعرف تحف وجهها
غفران //اي ماما ناديه وحنين لان ملتهيات بخدمة افراح وبناتها
ام مرتضى //الله لا ينطيهن (باوعت النه وكالت )
- - - اسمعي عمه ناديه كل شهر او كل عشرين يووم روحي الام صالون وحفي وجهج وخليها تسويلج عنايه بالبشره
انتي وحنين لازم تعتنن بنفسچن ولو انتن ما عايزات بس بعد هاي اشياء ضروريه
من كملت غفران نزلت رحت يم بيبي جميله ونبأ وحنين حضرن غراض السفره بقيت انا وبيبي جميله وعمه ام
مرتضى واجه عمو كرم وهم گعد يمنا نامت بيبي وهمه استاذنو راحو الغرفهم وبقيت اراسل بميثاق بعد ان نسرين دزتلي
مسج هي متصله ويا
ميثاق بوكتها مره يرد عليه ومره يرد عليها لكن عرفت منه انو يريد يعيد العلاقه وياي
عرفت يريد علاقه مو انا ناديه البنيه المؤدبه والي كان يتمنى يرتبط بيه لا يريد علاقه وياي على اساس انا ناديه
بت مياده
الصبح گعدت الساعه ثمانيه ولگيت الكل جاهز وحنين صبتلي كوب چاي وخلتلي جبنه بنص صمونه ورحت غسلت
وبدلت واندك الباب وراح مرتضى فتحه لگينا ياسر وهو جاي وجايب ويا فواكه وسيت ببسي وماي
رحنا ركبنا ويه ياسر انا وبيبي جميله وحنين وعلي ابن عمي كرم
وبسيارة مرتضى عمو كرم وام مرتضى وغفران ونبا وابراهيم
شفت ياسر وهو يباوعلي من الجامه وبيبي سالته// شعجب اجيت ؟
هو جاوب //مرتضى خابرني
نزلنا للبر وفرشنا وانا خليت البيبي دوشك ومخده وخليت يمها ماي وراح ياسر ومرتضى يدورون حطب
لان البر بي هواي حطب واشجار يابسه ونبا وحنين وعلاوي وابراهيم يلعبون طوبه
عمي كرم هو وزوجته راحو يتمشون
اجه ياسر گعد يم بيبي جميله ومرتضى صاح على غفران وحنين يجن يحضرن السمج انا خاله حب بصحن اتقرب
ياسر واخذ حب بايده بيبي جميله گالت //شعجب امك هي واخواتك ما لزت
انا جاوبتها ... ... اكيد ما تدري
ياسر وهو يباوعلي //اي بيبي ما تدري لان مرتضى خابرني الصبح گال جيب خبز حار وببسي وتعال
جميله //اي مو اگول امك ما تفوتها فايته ولا اكله بايته وانتم امس وين رحتو
ياسر // بيبي امي وخالتي وبناتهم راحو للحديقه
جميله //وانت
ياسر //انا بس وصلتهم ورحت للكوفي ادخن نارگيله
اجت حنين هي وغفران وهي تگول //بيبي باركي الياسر
جميله //شني عرس وانا ما ادري
حنين //اي راح يعرس عن قريب خطبوله
جميله //صدك ايويسر تخطب وما تگلي
حنين //اي بيبي عمه افراح خطبتله بت اختها ابتهاج اسمها براء
بيبي لزمت العصا مالتها وشالتها تريد تضربه هو گالها //بيبي صدك چذب هاي شبيج
جميله //سرسري دوني تخطب وما تگلي
ياسر //لا بيبي شنو اخطب
جميله //ها چا حنين جابتها من جيبها
ياسر //بيبي امي ابحدها تريدلي بت خالتي وانا لو شيصير ما اخذها
جميله //وليش ما تاخذها اذا خوش ابنيه بس المصيبه خاف تشبه ابتهاج سوده مصخمه
ياسر وهو يباوعلي ويجر نفس //لا جميله انا ابالي وحده وداعتج ولو هي لو ابقى طوول عمري ما اتزوج
///////////////////////////////////
