رواية ناديه الفصل الثاني والأربعون 42 بقلم انين الليل

____________

ياسر //لا جميله انا ابالي وحده وداعتج ولو هي لو ما اتزوج 

جميله //شني هاي نازله بزنبيل 

ياسر يباوع ويتحسر //اي بيبي 

جميله //وياهي هاي ؟

ياسر يبتسم //وحده خوش ابنيه ما اشوف بالدنيا بس هي 

جميله //خايب بيبي كون هاي التريدها كون السان ما اريدها فاهيه 

مرتضى //ليش باالله جملو 

جميله //غير حتى تگدر لفريحه الآفه وبناتها اذا فقيره يشردنها بيومها

الكل ضحك بس انا ما شاركتهم لان بگلبي حرگه وقهر مرتضى گله 

:ما تگوم ياسر خلي نشوي السمج شنو جايين اهنا نسمع قصة حبك وزواجك

احس بمرتضى يعرف شي همه راحو ييشوون وحنين صارت تحضر بالزلاطه وبيبي جميله گالت 

   - - - ياسر خوش ياسر بس لو ما امه افريحه الچلبه 

سكتت ما جاوبتها ورحت اتمشى اجت غفران وياي وصرنا نتمشى غفران گلتلي 

عرفتي ياسر شنو قصده

باوعت الها هي ابتسمت //تره ياسر عيونه فاضحاته 

هزيت راسي وجاوبتها ... ...لمن ما تنصدمين بانسان چنتي تشوفينه ممكن يكون سند الج بوقت من الاوقات 

وفجأه ينزع قناعه الخافي بي وجهه الثاني وتشوفينه اضعف ما يكون بهلحظه راح اتفقدين ثقتج بكل الناس 

غفران // ناديه ياسر يحبج 

... ... بس شخصيته ضعيفه 

:انطي فرصه

ردت اغير الموضوع سالتها ... ...غفران وانتي 

هي احمر لون خدودها //انا انا شنو 

... ... يعني ما معقوله بنيه حلوه ومتخرجه ماكو احد ابالها 

: هي ابتسمت // ان شالله عن قريب 

... ... هاا يعني اكو 

: هو زميلي وياي بس چان عنده ظروف هسه الحمد لله راح يجي اسبوع الجاي ويتقدملي 

ضحكت ... ... الف مبروك تستاهلين كل خيير

: وانتي هم ناديه 

اتحسرت وگلت ... ... لا انا بت مياده محد يقبل بيه 

غفران // لا تگولين هيج انتي بت عباس والي ربتچ بيبي منيره 

اجو مرتضى وياسر مرتضى گال //عيني خواتين حضرنا الغدا اتفضلن

احنا ابتسمنا واشوف غفران ومرتضى ابتعدو عنه ياسر بقى يمي گال 

اريد اشوفج واحچي وياچ 

... ... اي اسمعك 

ياسر // مو اهنا اجيج للكليه

ما جاوبته لان ما الي خلك اناقشه 

لگيت عمه ام مرتضى وحنين ونبأ خالات السفره والمواعين وانا اخذت القوري وخليته ع الجمر واگول ويه روحي 

 ...... النار الي بگلبي احر منك ياجمر

رحنا واتغدينا گعدت يم بيبي جميله وياسر گابلني ومرتضى گابل حنين احس بيهم واحد يحب الثاني وصرنا ناكل 

وانا افلس واخلي گدام بيبي جميله وهي تگلهم //شوفو ناديه مو مثلكم كلمن يگول ياروحي 

ام مرتضى //عمه شبساع بعتيني كل مره ياهو يفلسلج السمج 

جميله // والله انتي ام مرتضى ماكو مثلج تذكريني بمرت اخوي ام سراج الله يذكرها بالخير 

ام مرتضى //وانتي اطيب گلب واحن عمه 

جميله //تعلمت الطيبه والمحنه من منيره وعباس الله يرحمهم

الكل گال الله يرحمهم وعمي كرم گال اقروا الفاتحه الروحهم 

كملنه ولمينه السفره وغسلنه وجبت القوري وصبينه چاي والبنات والولد صارو يلعبون بالطوبه وانوبه لعبو

شد الحبل انا بقيت يم بيبي لان اخاف من هاي اللعبه على رجلي والعصر رجعنا وكل شويه وگالت بيبي 

  - - - على عناد الراحت للحديقه احنه رحنا للبر 

حنين // بيبي من نجي مره ثانيه ودونه المدينة الالعاب 

جميله // اي على مود تلتهون تركبون بالسيارات المتداعمه وتعوفني 

جاوبتها ... ... لا بيبي انا ابقى يمج 

جميله // ادري بيج يابعد البيبي

وصلنه وراح ياسر البيتهم واحنه بقينه لان عمو كرم گال ابقن باتن يمنا وباچر انا اوديچن 

وبقينا واحنا فرحانات بالليل گاعدين واتصل عمو كرم بسراج وفتح الحاكيه

:الو هلا سراج 

من سمعت باسم سراج كهرباء مشت بجسمي سمعته يحچي بس مبين علي التعب :: هلا بيك كرم اشلونكم 

كرم //احنه زينيين واليوم اخذنا جميله برحله سياحيه 

:: ههه لا باالله بيها حييل 

: اي مو اجتها حبيبة گلبها ناديه (حنين باوعت الكرم )ها بس هي حبيبة گلبها وانا 

كرم وخر التلفون وجاوبها // انتي حبيبتنا كلنه 

كرم // ها سراج اشلونكم

:: الحمد لله بس (وجر حسره ) 

كرم عكف حواجبه // خير سراج شكو ( سد الحاكيه وخلى النقال على اذنه )

: وهسه شلونه 

: من يمته 

: ليش ما گتلي 

: وشنو گالو الاطباء 

: انت وين

:راح اجي 

:لا شنو ماكو داعي لازم اجي

مرتضى سال ابو //بابا شكو 

كرم // لا ماكو شي 

اتقربت علي وسألته ... ... عمو شصاير حتى وجهك اتبدل 

كرم // لا بابا بس ( نصى صوته )جدو منير تعبان 

جميله //اكريم شكو تداسر شگالك سراج 

: لا يمه ماكو شي عده شغل وگال ربع ساعه ويتصل 

جميله // ها ما طول هيج زين

ربع ساعه او اكثر اتصل سراج وهالمره كامرا اجه كرم گللها //هاج يمه ابن اخوج يريد يشوفج 

جميله //الو هلا ياعمه هلا بيك خاب ليش لا تنشد لا تگول اشوف عمتي 

:: حجيه مشغول الراسي 

جميله //الله يساعدك اشلونك انت ومنير 

::عمه ابوي تعبان وما قبل يبقى بالمستشفى 

جميله فزت من مكانها //شني ابوك مريض وضام عليه يمته

:: عمه على كيفج اول البارحه ارتفع السكر ودخلنا مستشفى وما قبل يبقى 

جميله // وهسه اشلونه 

:: هذا هو 

شفنه جدو منير ع الجربايه مالته وسراج گله //بابا عمتي جميله وياك 

هي صارت تبچي وتگله // منير خويه كون يومي گبل يومك اسم الله عليك 

هو گلها بصوت تعبان كلش //جميله لا تدعين على روحج 

هي بقت تنعى وتبچي واخذ التلفون كرم وگله راح يجي وهي گالت // اروح اشوف اخوي 

كرم //يمه ما تتحملين السفر 

: اتحمل ما عليك اذا ما تاخذني اروح ابحدي

وثاني يوم راحت بيبي جميله وعمو كرم وانا بست بيبي جميله وگتلها هاي البوسه الجدو منير 

ورجعنا انا وحنين رجعنا مرتضى ويا نبأ وثاني يوم داومت حتى ما الي خلك لا اشوف نسرين ولا احچي 

ويه ميثاق الي اشوفه يحاول يراويني نفسه 

يوم الاثنين الصبح كرم خابر هادي وگله جدو منير اتوفه وهنا انا من سمعت صرخت لان چنت احبه واتذكر شگد 

هو يحبني

وقرر هادي وافراح يرحون وانا طلبت اروح وياهم لكن افراح گالت لا بس انا وهادي وعمار نروح 

انتن شكو رايحات صعدت للغرفه وانا ابچي واهنا خابرت سراج هو رد بتعب 

:: الو 

انا اشهگ ... ... اشلونك عمو 

:: هلا ناديه 

البقيه بحيا......صرت ابچي بصوت عالي 

هو احس بي خانگته العبره جاوبني :: كافي ندووش كافي حبيبتي لا تبچيين

... ... عمو چنت اتمنى اشوفه واحضنه بس 

: : مي خالف هو هم چان يريد يشوفج 

بقيت ابچي وهو يگلي :: كافي ناديه اطلبيله الرحمه وانتبهي النفسج 

... ... عمو وين دفنته 

:: بعدني ما دافنه بس راح ادفنه بصف اخته وبصف ابوج 

وانا ابچي ... ... عمو بوسه الي وسلملي على بيبي 

هو بعبره :: اي بابا وكافي وانتبهي على نفسج 

... ... الله وياك 

اتحسر وگال ::مع السلامه

وراحو افراح وهادي وعمار واجت ابتهاج وبراء بقن ويه هديل واسيل واحنه كانما غربه بيومها انا لبست عبايه 

اسلاميه وداومت وحتى حنين هم لبست اسود هديل ما داومت بقت يم براء هي واسيل انا وصلت للكليه 

واجت فاطمه سالتني وعزتني وبعض الطلاب سالوني منو اتوفه گلت جدي 

لمى ضحكت باستهزاء واتقصدت اتسمعني ضحكتها راحت يمها فاطمه وگالت

:عيب لمى شنو تتشمتيين 

لمى // لا بس تگول جدي الي اعرفه ابو ابوها متوفي بس يمكن هذا ابو امها 

انا ما جاوبتها ميثاق راسلني كتبلي// البقيه بحياتج (اكيد عرف من لمى )

رديت علي ... ... بحياتك الباقيه شكرا 

گتبلي //ناديه تدرين بيه محتاجج 

... ... بشنو ميثاق مو عندك خطيبتك 

:انتي تعرفين انا ليش خطبتها

... ... اي اعرف وانا متقبله منك هذا الشي 

: يمته اشوفج 

... ... هسه اذا تريد بالكافتريا 

: لا ناديه اريد اشوفج بمكان خاص بس انا وانتي 

... ... خاص ميثاق ؟!

ميثاق //اي ناديه مكان واحد يشكي همومه للثاني واحد يرتاح ويه الثاني

ما جاوبته سديت الواتساب وعرفت بان ميثاق مو مثل ما اتصورلي وخابرت نسرين الي گالت 

: بديت ويا الشغل على الاخر وهو هم بالبدايه كان حذر لكن بعدين عرفت شلون اجيبه للطريق 

قبل ما ينتهي الدوام اجتني رساله من ياسر ايگلي //واگف اباب الكليه وياريت تطلعين هسه

بيومها انا طلعت ما حضرت المحاضره الاخيره بس حتى اعرف هو شيريد مني ركبت گدام وياسر يسوق 

واحنا ساكتين نزلنه يم مطعم انا ما قبلت گال // اريد احچي وياج 

نزلنه وگعدت وهو راد يطلب غدا انا ما قبلت گتله 

... ... ياسر انا اتغدا ويه حنين 

: نتغدا سووا واوصيلها اخذيلها سفري

هزيت راسي ... ... تمام وانا اسمعك 

ياسر // خلي نتغدا بالاول

وطلب غدا وانا ما اشتهيت اكل اكلت شويه وهو ياكل ويباوعلي بعدها طلب چاي شربنا ويباوع عليه 

گلي //ناديه من الاخير وبدون مقدمات انا احبج من چنا زغار مو اليوم وكل ما تكبرين گدامي يزيد حبي الج 

هو باوعلي وهزلي راسه راد يسمع ردي جاوبته بدون اهتمام 

... وبعد 

ياسر //ناديه شنو بعد

... ... اقصد وره الحب شنو 

:الناس ليش تحب حتى تتزوج 

اتقربت من الطاوله ... ... انت گلتها تتزوج ياسر امك ليش بهذا الوقت بالذات خطبت بت خالتك 

: شنو قصدج 

... ... اقصد ليش مو قبل سنه مثلا ليش هسه اصرت على براء 

:امي من زمان تلح عليه وتريد تفرح بيه

ابتسمت ... ... لا ياسر متوهم مو صحيح 

:شبيج ناديه ؟

... ... ياسر امك اصرت على براء لان انت گلت الها اريد بت عمي اريد ناديه وامك ما قبلت شنو ما قبلت 

گول اتخبلت 

ياسر رد // ما يهمني امي انتي كل اهتماماتي

حچيت وانا اجر بالكلام ... ... من هاي لمن لزمني ابوك وامك وصارو يضربوني من اختك ذبت عليه التهمه انت 

دافعت عني وحاميتلي 

ياسر بارتباك // ناديه بذاك اليوم بس الله يعلم شنو صاير بيه بعدين هاي مو موضوعنا انا احبج واريد اتزوجج 

جاوبته باستهزاء // ابوك مگدور علي بس امك 

ياسر //مو چنج تستهزأين 

ابتسمت ... ... لا لا شنو استهزأ احچي الصدك (باوعتله ) شلون نتزوج اذا اهلك رافضيين ؟

ياسر //انتي ما عليج بس وافقي والج الصافي 

... ... شلون فهمني 

ياسر // ناديه انا ابن عمج اليوم نروح انا وياج اعقد عليج واخليهم امام الامر الواقع 

فكيت عيوني ع الاخر ... ... يعني نتزوج بدون علمهم 

ياسر //اي شيردون يسوون ايقاطعونه خليهم وشگد يقاطعون ست تشهر سنه عادي

... ... واكيد بهاي السنه او الست تشهر نگعد ابيتي مو 

ياسر // اي وانا ادفعلج اجاره خاف عبالج انا طمعان بي 

... ... لا لا والله مو هذا قصدي 

ياسر // شنو قصدج 

جريت نفس ... ... قصدي ما موافقه 

ياسر // ما موافقه ليش انا احبچ 

... ... اسمعني ياسر من نتزوج بهيج شكل راح اكون انا فعلا بت مياده

ياسر بنتر // انتي شبيج شنو بت مياده 

... .... ليش نسيت عار امك 

ياسر // عوفي كل شي انا احبج واريدج ام بيتي وام جهالي خلينه نتزوج ونعيش حياتنا 

جريت حسره ... ... لا ياسر انا اسفه 

ياسر باستغراب // شنو اسفه ؟!

... ... اسفه ما موافقه اتزوج بالبوگه وليش شناقصني 

ياسر //ما ناقصج شي انتي ست البنات

اتقربت اكثر ع الطاوله وهو هم سالته ... ... انت تريدني مو ؟

ياسر هز راسه جاوبته ... ... خلص حارب الدنيا على مودي لان انت ما مسوي شي غلط انت شاب وموظف 

وتحب بت عمك وتريد تتزرجها على سنة الله ورسوله بعد ليش نعقد براني بدون محد يعرف 

ياسر //انا گتلج فتره 

هزيت راسي بالنفي ... ... لا مستحييل اسوي هالشكل 

ياسر //ليش ناديه

... ... لان بكل بساطه انا مكسورة جناح لا اب لا اخ وانت ابن عمي يعني المفروض سندي ومن تريد تاخذني

 المفروض اكبر واحد ما يوگف بوجهك وما تخاف من ياهو الچان هذا مصير مو لعبه وانت ما شاء الله

مفكر ومقرر تاخذني بالبوگه يعني بين قوسين (تنهبني )

ولان ابن عمي راح الناس تغض البصر لكن انت ما فكرت بيه 

ياسر // ناديه صدگي اعيشج ملكه

... ... مو هذا قصدي قصدي ما فكرت شنو راح تكون نظرتي النفسي انا يا استاذ من اوافق اخذك بطريقتك افقد

 احترامي النفسي الي بس هو باقيلي وانا ما متوازيه اخذ واحد بالاساس اهله رافضيني وبالاساس هو ما يگدر 

يواجههم شنو من كل وعقلك انا اوافق عليك والله بايدي اكتل نفسي ولا اقبل اخذك 

ياسر //گتلج فتره وقت وكل شي يرجع المكانه 

عضيت على شفتي وهزيت راسي اسف ... ... يا ابن عمي ما اتصور يرجع كل شي المكانه اي نعم تعقد 

عليه ونتزوج لكن ثق هنه شهرين اذا مو اقل وترجع الحضن امك وتطلگني هاا حتى لو چنت تحبني تدري ليش

ياسر // ليش باالله 

... ... لان بكل بساطه انت انسان ضعيف شخصيتك ضعيفه خصوصا گدام امك ما تكدر توكف بوجهها وتواجهها 

ياسر خزرني وگلي // شنو هو الي يحترم امه تكون شخصيته ضعيفه 

... ... لا الاحترام شي والخوف شي ثاني 

ياسر // هسه انا جبان بنظرج 

... ... اگول وما تزعل 

: يعني انا جبان

... ... لا انت خوش انسان وحباب بس امك مسيطره عليك مثل ما مسيطره على ابوك شكم مره تسمعها تغلط عليه 

وتضربني وانت ما تدافعلي شكم سنه انا واختي نسبح بطشت وبالبيتونه وانت ما تحچي شفت بعينك مقدار الاهانه

 والعذاب لكن بقيت ساكت وللعلم يا ياسر اگدر اخذك واوافق واگدر اوگف بوجه امك لكن لا (هزيت راسي ) 

عمري ما راح انسى ضعف شخصيتك لو من اجت هديل وحچت عليه وامك وابوك يضربون بيه وانت گاعد تتفرج 

مو لان چنت مقهور من الي سمعته من هديل وعبالك صدك لا لان حتى انت عاملتني بذاك الوكت على اني انا بت 

مياده الخاينه ام الزلم على گولة امك واذا اقبل اخذك مثل ما انت تريد راح اصير فعلا بتها 

وگفت وگتله ... ... اسفه ابن عمي عرضك مرفوض

هو بقى يباوعلي واعرف بي انقهر من كلامي لكن انا واجهته بالحقيقه وحتى ما يبقى عنده امل اني اوافق 

على عرضه بادرت بالكلام ... ... صار لازم نمشي 

وطلعنه واحنه ساكتين ركبت بالسياره وانا خاله وجهي ع الجامه بحجة اباوع واعرف بياسر ضايج من كلامي لكن

 انا خليت النقاط ع الحروف بدون مماطله وصلنه الراس الشارع گتله ... ... نزلني اهنا 

هو ما سمعني بقى يسوق وصلنه قريب للبيت نزلنا وهو فتح الباب نزعت حذائي بالباب ودخلت لگيت ابتهاج بالمطبخ

 انا سلمت ... ... السلام عليكم

ابتهاج باوعتلي وگالت //شنو جايين سووا 

قبل لا يجاوب ياسر گتلها ... ... لا هسه اتلاگينه بالباب شنو جايين سووا 

ياسر // شلونج خاله 

:هلا حبيبي 

اجت براء وهي مبدله ومتمكيجه واتقربت من ياسر وهي تباوعلي وكانما تگلي هذا ملكي شكو واگفه يمه

براء //الله يساعدك ياسر اصبلك غدا 

هو بدون ما يباوع الها // لا ما اشتهي شبعان 

صعد ياسر الغرفته ونزلت حنين الي مبين عليها چانت تبچي على جدو منير باوعتلي گالت 

ها ندووش اجيتي 

... ... اي حبيبتي 

اخذت ملازمي وجنطتي وانا رجعت ع الحذاء وصعدته هو والعلاگه بالغرفه گتلها 

... ... هاج حنونه هذا الج 

هي فتحت العلاگه وسالتني //وانتي 

... اتغديت

انا غسلت واتمددت وحنين بقت تاكل ومن كملت هم غسلت واتمددت بقيت دايره وجهي واحچي ويه نفسي 

... ... يعني ميثاق يريد علاقه طايح حظها وياسر يريد نعقد ونتزوج بدون ما اهله يعرفون وبعد ياترى

 شضاملي زماني 😭😭

نمت وگعدت المغرب اتوضيت وصليت ونزلت اسوي عشا شفتهم كلهم گاعدين رحت اريد افتح الثلاجه ابتهاج گالت 

:احنه ياسر راح ايجيبلنه عشا انتي واختج شوفي شنو تسويلج عشا 

سبحان الله نفس حقارة اختها جاوبتها وانا اباوع الياسر

... ... خاله العفو اقصد عمه انا انزل اسوي عشا مو الي ولا الاختي لا للي بالبيت لان هذا شغل مقسمينه علينه 

وهم زين ياسر راح يجيب الكم عشا حتى ما ادوخ شسوي 

اريد اصعد ياسر گال // ناديه انزلي انتي وحنين اتعشو ويانه 

اتقربت منه وفتحت الثلاجه طلعت باكيت جبن گتله 

... ... لا بالعافيه انا واختي هسه ناكل اي شي

ياسر // لا ليش انا راح اجيب عشا وانتي وحنين اتعشن ويانه 

... ... شكرا ياسر ممنونه منك ابن عمي بس راح ناكل جبن وصمون اخف 

اخذت جبن بماعون ويا طماطيتين وصمونات اثنين واسمع ياسر يگول 

: شنو خاله ليش هيج حچيتي انا اريد اجيب عشا للكل 

ابتهاج // ياا يسوري وانا شگلت عبالي اكلهن ابحدهن من صار عدهن راتب لان ما شاء الله صايرات احوال 

هديل // اي خاله اشايفه وشايفه

صعدت وخليت الجبن والصمون گبال حنين هي گالت ما تشتهي وانا رديت عليها ... ... حتى انا بس جبته اخلي اهنا 

هي ما عقبت اشوف حنين هواي تصفن وكانما تتذكر كلام ومرات تبتسم وهي صافنه عرفت اكو شي 

اتاكدت من قفل الغرفه واجيت گعدت يمها وگتلها 

... ... حنونه شبيچ 

هي كانما فزت // ها ندووش شبيه ما بيه شي 

......تضمين عليه مثلا گليلي 

: ندووش ماكو شي ليش شكو ؟

... ... انا الي اسال

:ما بيه شي 

جاوبتها بزمخه ... ... لا بيچ وانتي جاي تضميين عليه شنو ما اشوفج لو ما اعرفج 

: ضايجه ومقهوره على جدو منير الله يرحمه 

... ... الله يرحمه بس مو هذا السبب 

: ناديه ماكو شي 

... ... ما طوول ناديه يعني اكو شي شنو ما اشوف صفناتج وساعات تبتسمين وانتي صافنه شكو 

حنين لاتنسين انا اختج الچبيره ولازم اعرف كل شي

هي دنگت وگالت// ناديه هو مرتضى صارحني 

... ... صارحج ؟

حنين مدنگه //اي گلي بس تنجحين من السادس اخطبج 

... ... وين گالج ويمته 

:من رحنه سفره 

... ... وانتي شنو رديتي علي

: بالبدايه گتله انا مو مال هيج حچي بس هو طمني وگلي انا احبج حب طاهر وحتى اهلي يدرون 

... ... هاا يعني هو گايل العمو كرم وامه 

:اي ندووش وهمه موافقين 

... وانتي 

: انا انا شنو 

... ... انتي حنونه شنو احساسج

: ما اعرف هو مرتضى خوش ولد وانا ما اعرف ليش من اشوفه افرح 

... ... هاا وكل هذا الشي وانتي ضامه عليه 

: لا ندووش لا تزعلين بس لان ما اعرف شعور بين الفرح والخوف 

... ... وانتي شرديتي علي 

حنين //گتله بكيف اختي

... ... شوفي ولو زعلت عليج لان المفروض اي شي تجيين وتگليلي بس مي خالف هالمره سماح 

بس ياويلج اذا ضميتي عليه 

... ... اسمعيني حنين انا وياج ما النه اله بعض واي شي يصير لازم راسا اتگليلي نسيتي كلام 

عمو سراج من گلج شنو يصير وياج بلغي اختج لان هي الوحيده الي تخاف على مصلحتج 

وانا اگلج انتي انتبهي الدراستج سواء چنتي موافقه على كلام مرتضى او لا

حنين حضنتني //ندووش لا تزعلين عليه بداعة بيبي 

... ... لا زعلانه وزعلانه 

: فدوه ناديه حلفتج بروح بيبي 

... ... الخاطر بيبي راح اسامحج انتبهي حنين جاي تشوفين الدنيا كلها ضدنا 

حنين باوعتلي //بس مرتضى گايل الاهله

... ... مي خالف وهم ما تعرفين شنو راح يصير والايام شضامتلنه

اندك الباب رحت فتحته شفته ياسر گلي// انزلي انتي وحنين جبت عشا 

جاوبته //لا شكرا اصلا ما نشتهي 

ياسر مبين علي مقهور //حتى لو ياالله انزلي 

... ... لا ياسر شكرا

هو دار وجهه ونزل وانا سديت الباب وحنين گالت // ليش ما قبلتي ننزل 

... ... اگعدي حنين وين ننزل ويه ابتهاج وبراء 

: اي هم صدك چنا بافراح وبناتها هسه صرنا بابتهاج وبتها وبنات اختها 

... ... ههههههه دياالله خلي ناكل ورانه دراسه 

اندگ الباب راحت حنين شافت ياسر //ها ياسر خير 

ياسر انطاها صينيه //حنين هذا عشاكم

:بس احنا راح نتعشى 

ياسر رد // حنين عبالي بس ناديه عنوديه طلعتي انتي هم 

انا وصلت للباب ... ... ياسر مو گتلك ما نريد 

جاوبني // ناديه هذا العشا مني ومحد اله شغل اخذي تاكلنه اتعوفنه المهم تاخذينه 

ابتسمت بوجهه ... ... زين الخاطرك راح ناخذه ونتعشى 

حنين گالتله // تعال اتعشى ويانه

انا خزرت حنين قبل لا يجاوب ياسر اجت ابتهاج //هاا خاله يسوري منتظريك ع العشا 

هو باوع الها // اي خاله هسه 

انا ردت اخبث ... ... اتفضلي خاله اتعشي ويانه انتي وياسر خطيه اصر اله ننزل ناكل ومن ما قبلنه صعدالنه

العشا بنفسه ياالله اتفضلي وانت يسوري هم اتعشى ويانه 

ابتهاج //لا عيني انزل اتعشى ويه البنات ياالله ياسر براء ما قبلت تاكل اله انت تنزل

رديت وانا اعض شفتي الجىوه وابتسم ... ... روح ياسر زحمه من براء 

دارت تريد تنزل رجعت عليه وهي تگلي وتسمع بياسر //حبيبتي ناديه انا بت عمة ابوج لذلك سميني عمه 

عرفت قصدها رديت عليها ... ... العفو سميتج خاله لان انتي خالته الياسر ابن عمي اسفه بعد ما اعيدها 

وهم لا تنسيبن انا ما عندي خاله فااتمنى احچي هاي الكلمه

نزلت وهي تهز بايدها اتعشينا ومن كملنه نزلت انا وحنين حتى نغسل المواعين وانظف الطارمات صرنا نغسل 

بالمواعين واحنه نشوفهن شلون يتشاورن ويضحكن لكن احنه ابد ما مهتمات كملنه وجاي نصعد ياسر گال 

:ناديه انتي وحنين ابقن ويه البنات 

هنه تنرفزن وضاجن انا ضحكت وجاوبته ... ... ياريت ابن عمي بس انت تدري دراسة الهندسه شگد صعبه 

 خصوصا وانا اريد اطلع الاولى وحنين هماتين عدها دراسه

من سمعن كلامي ضحكن ياسر گال // ليش الضحك عيني ست اسيل انتي مو سادس وانتي جناب هديل 

ما تگومن تقرن 

هديل جاوبت //ياسر ما عدنا محاضرات 

ياسر //ها يعني باچر ما تداومين 

هديل //لا لا شنو ما اداوم بس ما عدنا دراسه هو الاستاذ يجي وينطي المحاضره ويدير وجهه ويروح 

انا جاوبت ...... ياالله حنونه خلي نصعد

ورحنا للغرفه وصرت اراجع ومرات اكتب ويه نسرين تنطيني اخر اخبار ميثاق ولمى 

استنكرت نفسي معقوله هاي انا ناديه الي اليوم اتوفى جدها منير الي يحبها صارت ما مهتمه اله 

وبس تفكر شلون تنتقم 

هزيت راسي وكلت ... .... اي الله يرحمه الجدو منير بس انا لازم اخذ حقي من كل الناس الي ظلموني

الي عرفته انو لمى واگعه بسامر الي بداية تعارفه سائلها عليه وانو يريد يخطبني لان انا حلوه وهي 

ما مقصره ما باقي شي ما حاچيته عليه بعدين هو على اساس ضايج وماخذ رقمها بعدين صاير يتواصل وياها 

ومفهمها انو هو ابن تاجر وابو كلش يحبه ومستعد اينفذ اي شي يطلبه منه 

وشويه شويه راح يسوي علاقه وياها

ونسرين بتواصل قذر ويه ميثاق 

ميثاق الي مجرد ما يخلص تواصله ويه نسرين يبدي يتواصل وياي ونفس طلبه اريد اشوفج ابحدنا لان 

محتاجج واحبج 

ولان تعبان اريد ارتاح وكل هذا الشي يزيدني كره وحقد الميثاق واللمى

اما رافد فسوى علاقه ويه هديل بناءا على طلبي لكن فهمته اذا ما تقبل وترفض تتركها لكن الظاهر 

هديل ماشيه ويا بالعلاقه وهاي سبب فزتها من گال الها ياسر باچر ما تداومين

ثاني يوم داومت ورحت للمكتبه اخذت شريحه باسمي واشتريت نقال جديد لان چنت محتاجه جهاز ثاني

  ومن رجعت للبيت اجاني تصوير من نسرين (الهديل ورافد )بس شنو تصوير غايه بالوقاحه واصلا 

هي ما مداومه 

ورايحه ويا المكان يمكن بيت او شقه انا احتفظت بي بنقالي ونقلته للجهاز الثاني

بالليل انا باقيه گاعده كالعاده سمعت حركه او دگه خفيفه على باب فتحت باب الغرفه شفت براء وهي واگفه وتدگ 

دگات خفيفه على باب غرفة ياسر هو فتح الباب چان لابس برموده وفانيله واشوفه استغرب وهو

 يشوف براء الي اجت واتصور تريد تدخل للغرفه لكن انا طلعت وكحيت هو شافني وصارت عينه بعيني وبراء 

باوعتلي وخزرتني انا نزلت رحت للمطبخ بحجة اشرب ماي ورجعت بسرعه 

لان خفت ياسر يلحگني وابتهاج اتسويلي مصيبه

رجعت قفلت الباب وبقيت گاعده اقرا الصبح اتريگت انا وحنين ورحت للدوام ومن رجعت العصر 

اجت افراح وهادي ندهتني حنين وغسلت وجهي ونزلت سلمت شفت هادي يسولف ويضحك ويه ابتهاج وافراح

وصلت يمهم گلت ... ... السلام عليكم 

ما انتظرت يردون السلام راسا گلت ... ... اشلونك عمو البقيه بحياتك 

ودرت وجهي صعدت

رجعت الغرفتي وع الدرج اتلاگيت ويه براء الي تتصرف وكانها هي فعلا خطيبة ياسر وره المغرب نزلت اشوف

شيردون عشا افراح گالت بامر //سوي حميسة لحم وشوربه 

ابتهاج گالت //شنو افراح مبين ما ماكله لحم بالفاتحه 

افراح //اسكتي ابتهاج هي فاتحه لو مهرجان الدنيا انگلبت وسراج كله يذبح مفطح وشنو من خير ينگل لو الناس 

الاجت شنو كلها وينه او وينه

هادي //لا والنوب ما ياخذ واجب 

ابتهاج //سراج من يومه كريم وما تهمه الفلوس 

بقيت اسوي بالعشا وحنين نزلت تساعدني همه اتجمعو بالمطبخ فاافراح اتعمدت اتسمعني بعد ان شافتني 

اريد اصب لي عشا انا وحنين

: گومي خاله براء صبي العشا شنو انتي غريبه باچر اتصيرين ام البيت 

ابتهاج //لا والله مو غريبه بس هي تستحي 

افراح // منين اشو هادي مثل ابوها وعمار اخوها وياسر خطيبها غير لو ما فاتحة منير وعيب من هادي 

وكرم چان العقد خليته اسبوع الجاي 

هادي // مي خالف افراح وره اربعين خالي تعرفين عيب من سراج

افراح // ياا هادي وسراج شمدري شنو رجال الله يرحمه خاش بالعمرين شنو سراج واذا زعل يگطع الهوى 

هادي // افراح شبيج جاي اگلج عيب من سراج 

افراح // بكيفك عيني عود گلنه نريد نفرح 

هادي // ان شالله قابل طايرين 

براء باعتلي واجت صوبي وحچت// عيني اذا سمعتي الموجز ياريت تاخذين عشاج وتصعدين

الكل اتفاجأ من كلامها انا خجلت لكن رديت عليها ... ... تره الموجز ما يخصني وما بي شي مهم 

واذا ع العشا مو اله اخذ ناكل اي شي انا واختي

حنين صبت صحن حميسه وصحن شوربه وطلعت صمون وصعدت انا وياها وانا اغلي من القهر گلت الحنين 

... ... بس اليوم ناكل من اكلهم الحقراء انوبه براء اجت وياهن 

بعدين گتلها ... ... حنين اليوم نسكت ونتصرف عادي وبعدين نحچي ويه افراح 

حنين //اگلج ندووش مو لازم نروح البيبي جميله 

هزيت راسي ... ... اي بعدهي ما جايه انا سمعت افراح اتگل الابتهاج من تجي نروح الها (باوعت الحنين )

... ... زين حنونه انتبهي لدراستج ومن تجي بيبي نروح الها 

حنين //لا والله ناديه مو قصدي شي بس انتي تعرفين بيبي جميله تعتب على كل شي وانا گلت اذكرج 

... ... اي اعرف بس تجي نروح 

نزلنه وصبت حنين الچاي وافراح گالت الياسر // روح وصل خالتك البيتهم 

وراح ياسر وتاخر بعدين رجع 

ثاني يوم رجعت من الكليه ونمت وگعدت العصر لان حنين اجتني وتگلي 

انزلي ناديه اسمعي افراح

باوعت الها ... ... شكو حنين 

:انزلي بسرعه وانتي تعرفين 

نزلت على كييف وهي تگله //اسمع ياسر غصبن عليك تاخذ براء 

ياسر //گتلج ما اخذها الهاي الادب سزز واكبر واحد ما يجبرني 

افراح //انا اجبرك ولا تغلط افتهمت 

ياسر //يمه انا مو زغير ما اريدها البراء افتهميني 

افراح // تريدمن بت مياده نديوه العرجه

ياسر // اي عرجه عوره اريدها 

افراح //والله بعد السما عن الكاع تاخذها وانا عدله يجوز اذا جوه التراب يجوز تاخذها 

ياسر //زين ما اخذها بس هم ما اخذ بت اختج 

افراح بنتر //مو بكيفك 

:لا بكيفي وبكيفي تردين تزوجين بت اختج زوجيها العمار بس انا لا ما اخذها

افراح // اي لان بت مياده فاره راسك شنو عبالك ما ادري تروح الهن للغرفه 

ياسر //ها گالتلج ابتهاج تردن تذبن داهيه على البنيه 

افراح // اي گالتلي داخل للغرفه شتسوي 

ياسر //لا ما دخلت للغرفه وحتى لو دخلت عادي بنات عمي ومتربيات وياي 

افراح //لا هاي مال متربيات وياك عوفها على صفحه

ياسر //زين افضحيها وگولي يروح الهن للغرفه وانا ما راح انكر علوا اگول احبها واتزوجها 

افراح // شحدك تسويها اسمعني هي كلمه ما اثنيها تاخذ بت اختي وغصبن ما عليك 

:ما اخذها لو شيصير 

افراح //هاا مغسول دماغك من بت ابليس انوب صار عدها فلوس لبس ومكياج بعد وين تعرف بت خالتك

هاي عابرتلها مثل امها امها وخالاتها الي ضحكن على ابوك 

ياسر //انوب ضحكن على ابوي

افراح //اي بيومها يريد يروح يخطب ابتهاج العباس ما ادري شلون افتر راسه وعاف البصره كلها وعبر 

خمس محافظات بس حتى يجيبون مياده وشنو تاليها انكتل عباس وهي انعدمت وهسه انت تريد تاخذ بت مياده 

وعبالك اوافق 

ياسر // اي يمه اريدها ناديه اريدها وما اخذ غيرها انتي ليش ما تقبلين لان امهن انعدمت ليش هنه ياخذن ذنب 

ما مسوياته 

افراح // انچب ياسر اسمعني ما اريد ناديه باچر تطلع على امها

ياسر //يمه ناديه اشرف من الشرف احنا شباب ونعرف 

افراح //لا ما تعرف 

ياسر// يمه اذا نرجع للصدك ناديه اشرف من بت اختج الي البارحه اجت عرضت نفسها عليه 

افراح بعدم مبالاة // شكو بيها تحبك وتدري بيك خطبتها ورادت تگعد وياك 

ياسر //افهميني يمه غير ناديه ما اتزوج 

:شنو تتحداني

ياسر //مو قصة اتحداج بس اسمعيني ما اخذ غير ناديه لو ادري اخطفها 

افراح //وانت اسمعني ناديه احرگها وما تاخذها 

ياسر //وليش الخاطر الله انسي مياده 

افراح // ولك شنسى ابن الكلب افهم هذني نغلات تعرف شنو نغلات 

ياسر //هاا وما طوول نغلات ليش بقيتوهن  

افراح //اي بقيناهن گدام عيونه ولك حلال عدهن بالمليارات وباچر عگبه يجي ابن كلب ويتزوجهن 

ياسر //هاا يعني ما ترديهن يتزوجن

افراح // حتى لو يتزوجن الياخذهن بطرك الثوب العليهن قبل لا يتزوجن يسوون تنازل عن كل الحلال لو ماكو يبقن 

ياسر // وليش خو اخذها والحلال راح يصير اليه 

افراح // انچب ادري بيك ما طمعان بيها وادري بيك تحبها بس لا تفكر تاخذها گتلك احرگها اشوه وجهها وما تاخذها

من سمعت كلام ياسر هو وامه حسيت بخوف من كلام افراح وعرفت هاي المره كل شي ممكن تسوي صعدت 

فووك واتمددت ع الچربايه وحنين تركتني لان شافتني مقهوره اجاني اتصال من ميثاق ما رديت علي لكن 

شفت الواتساب دازلي رسايل عشق وغرام وعرفت هو شايفني رخيصه مثل ما افراح تشوفني بت حرام 

اذن انا لازم اتوخى الحذر ومن الكل يعني افراح وهادي مستعدين يقتلوني انا واختي حتى ياخذون حلالنه

///////////////////////////////////////

الفصل الثالث والأربعون من هنا