رواية بنت الكهوجي الفصل الرابع والأربعون بقلم احمد
ياقوت : من طلع هو توجهت للحمام وقبل ما اوصل الحمام مسكني من زندي واني نشف الدم بعروگي من الخوف وگال ليش متوترة
بقيت ساكتة وگال لا تخافين اني من اليوم زوجج لا تخافين مني من اليوم اني مسؤول عنج واريدج تحسين بالامان يمي مو الخوف
هزيتلو راسي بس علمود يعوفني ومن عاف ايدي رحت للحمام والتيلفون وياي اول ما دخلت قفلت الباب علمود ما يگدر يدخل علي
تميم : مرت الايام وبلشت امتحانات ياقوت بس المشكلة كلام عماد مدا يروح من بالي ودائما اتذكرو وهو ينصحني كأنو متأكد قراري غلط
بالاخير قررت اتجاهل كلامو وما اخلي الشيطان يلعب براسي وممكن يكون فصخ الخطوبة غلط فخلي تتزوج الولد وهاي هي
رغم اعرف ياقوت ما تعترض على قراراتنا بس ممكن فصخ الخطوبة يضوجها بمعنى انو ما الي حق افصخ الخطوبة من يمي
وممكن تكون معتبرتني اني واخواني مثل اخوانها وهالشي راح يكون مشكلة جبيرة بعد فصخ الخطوبة فما حبيت اوگع بهالموقف
وباليوم الي حجيت وياها بموضوع فلوس الفصل شاورني زيد وگال اغبى قرار قررتو موافقتك على زواج ياقوت من الولد
فوگ كلام عماد اجى زيد دمرني بكلامو خلاني ماعرف يميني من يساري فمن طلع لحگتو گلتلو شنو قصدك من هالكلام
زيد : قرارك غبي
- شسوي لعد تريد افصخ الخطوبة هسا
- موافقتك من البداية غلط
- زيد الموضوع مو بايدي
- لا بايدك ياقوت المفروض ما تطلع من بيتك او باسوء الاحوال ما تطلع من بيتنا علمود تبقى قريبة عليك وتگدر تطمن عليها يوميا
- وهسا اگدر اتطمن عليها يوميا شنو الفرق
- الفرق يا تميم انو ممكن تزعل او تضوج وما تحجيلك علمود لا تسببلك مشاكل
- زيد باليرحم والديك لا تزودها علي من دون كلشي كلام عماد مخبلني
- شنو گال عماد
- حجيتلو كلامو
- ياخي ياريت سامع كلامو من البداية وفاصخ الخطوبة
- سكتت ماعرف شجاوبو
- تتذكر من سألنا عالولد
- اي
- ترا من وقتها اني اعرف قرارك غلط بس ما حبيت اتدخل علمود لا تگولون حاط عينك عليها لو فد شي
- ليش ما حجيتلي بيني وبينك ومفهمني
- هاي هي راحت بعد ادعي تتوفق وتنسعد بحياتها علمود لا ضميرك يدمرك
عافني وراح للبيت وحرگني حرگ بكلامو من صدگ بوقتها تخبلت عقل ما بقى براسي لدرجة طلعت تيلفوني واتصلت على خطيبها
من جاوب تراجعت گلتلو توهمت صاحبي مثل اسمك واتصلت عليك بدالو وترخصت منو وسكرت الاتصال منو
حاولت قدر الامكان ما التقي بيها واگضي وقتي لو بالمضيف لو بالجامعة وطلبت اجازة لاية يوم الاحد علمود تبقى يم ياقوت لان جان عندها امتحان
يوم الاحد بعد المغرب جنت گاعد بالمضيف وگاعدين اخواني وابوي وجدي واني معزول بصفحة واگلب بتيلفوني بس عقلي مو وياي
جان زيد گاعد يمي لان يعرف بشنو دا افكر ومن اشتغلت الاغاني گلتلو روح عليهم خلي يطفونهن مو وقت هوستهم
گال عوفهن لا تخرب الحفلة عليهن وبقيت ساكت الى ان اجو اهل العريس بس بوقتها ما اجو زلم هواي بس الي يسوقون السيارات
دخلو يمنا بالمضيف واستقبلناهم وبدون وعي مني گلت للگهوجي گهوتك جاهزة لو بعد ابو باسم واهلي كلهم انتبهو علي والگهوجي صفن ما يعرف منو ابو باسم
سكتت وابوي تدارك الموقف ووصى الگهوجي عالگهوة والحمدلله اهل العريس ما دققو هواي وجانت المشكلة ماگدر اطلع من المضيف
جانت امنيتي اطلع لاي مكان بس المهم ابتعد عن البيت بلكي يرتاح عقلي بلكي يرتاح گلبي بلكي اي شي بي يرتاح ما ابقى اتعذب
هسا اني ما احبها ليش گلبي دا يوجعني اخير شي اجى الولد سلم علينا واحد واحد وباركنالو وگعد ويانا شوية بعدها راحو
واني قبل ما احد يذكرني بموضوع ابو باسم ركبت سيارتي وطلعت بدون وجهة محددة بس افتر بالشوارع اخير شي وگفتني سيطرة
شافوني افتر هواي وبسبب الوضع الامني وگفوني انطيتهم هويتي وتأكدو انو ماعندي شي وعافوني وباوعت للساعة جانت 1 بالليل
رجعت للبيت وگفت السيارة گدام المضيف ودخلت للمضيف تمددت بيه وتفكيري مدا يرتاح واجى زيد يمي لان جان ينتظرني ارجع
بقى ساكت الى ان اخذتني الغفوة وحسيت احد غطاني بس النوم كابس على عيوني وكملت نومتي وگعدت الساعة 9 الصبح
حتى وقت الدوام طافني خابرت عالعمادة مالت الكلية وطلبت اجازة بحجة مريض وبقيت گاعد بالمضيف الى ان اجت الزفة
زيد : يلا گوم
- وين اگوم
- ودع ياقوت ووصي زوجها عليها
- ما يحتاج
- يا ما يحتاج شنو قابل هي ما الها احد ترا بهذا تصرفك تصغرها گدام زوجها يلا گوم ودعها وخلي تفتخر بيكم گدام اهل زوجها
- هوووووووف تمام
طلعت من المضيف الدنيا مخبوصة خبص ولان اكو نسوان هواي وگفت بطارمة بيت ابوي وبعد ما ودعتها رجعت للبيت وفوگ فراگها فراگ امي وياها
بيومها ما صارت الدنيا ليل الا اني متخبل زيد واية گاعدين بالصالة واني متخبل مگضيها روحة ورجعة واية ما تعرف شنو الموضوع
صارت الساعة 10 واني دا امشي بالصالة ودگ تيلفوني وانصدمت من شفت رقم الولد دا يتصل جاوبت عالسريع واجاني صوتها المرعوب
ياقوت : بخوف وبجي .. فدوة تميم الله يخليك فدوة فدوة
تميم : لحظة لحظة يا بوية بس فهميني شكو
- فدوة الحگلي والله ما الي غيرك
- لج بوية والله اجيج هسا بس گليلي شكو
- والله والله اذا ما اجيت هسا الا انتحر
- جايج يا بوية والله جايج ثواني واني يمج
زيد : شكو
- شعرفني تعال وياي بسرعععععععة
طلعت من البيت اركض مثل المجنون واول ما شغلت السيارة كبست البانزين كل قوتي وجنت اسوق بسىرعة جنونية لحد ما وصلت بيتهم
من وصلت بيتهم جانو جماعة الولد وگرايبو خارج دا يحتفلون واستغربو من شخطة السيارة وزاد استغرابهم من شافوني اني وزيد واجى ابو الولد
- هلا شيخ تميم تفضل
- زاد فضلك اخذلنا طريق بلا زحمة
- باستغراب .. شنو الموضوع شيخ تميم
- حالي حالك كل الي اعرفو ان بنيتنا اتصلت واكو شي صاير فاخذلنا طريق خلي نعرف شكو
استغرب هواي بس بطبيعة الحال لازم ياخذلنا طريق ورحنا وياه للغرفة دگ الباب وفتح ابنو وانصدم بوجودنا اني وزيد
تميم : وين ياقوت
الولد : شكو شيخ تميم
- جاوب عالسؤال
- بالحمام بس لحظة خلي انطيها خبر
- خليك بمكانك .. زيد سكر الباب
شيخ تميم فهمني شكو
- ياقوت تسمعيني
- اي
- اطلعي بوية فهميني شصاير وياج
فتحت الباب بخوف وكأنها دا تتأكد اني موجود لو لا وجانت لابسة عبايتها وخمارها بس رافعة الخمار عن وجهها واول ما شافتني ختلت وراي
- انداريت ومسكتها من وجهها .. شكو بوية فهميني ليش خايفة وشنو يبجيج
- شوف منو اتصل قبلك
- جانت ماسكة التيلفون وايدها ترجف بقوة اخذت التيلفون ما جان بيه رمز ودخلت للاسماء جان اخر اتصال قبلي باسم معتصم فاضل ( ابن الشيخ الي اشتغل يمو ابوها )
- باوعت لزوجها .. منين تعرف معتصم فاضل
- صار وجهو اصفر .. هذا صاحبي ليش شبيه
- باوعت لياقوت .. سمعتي شي
- هزتلي راسها ودموعها يجرن مثل الشلال
- هاك اتصل عليه وافتح الصوت وان حسستو بوجودنا اهجم بيتك
- شبيك شيخ تميم ترا هو مجرد صاحب
- بصوت عالي .. اتصصصصصصل
اتصل عليه وفتح الصوت بس وجهو صار كأنو ليمونة من الخوف جاوب معتصم بسرعة گالو ها وين صرت مو دا اتصل عليك
الولد : ما جنت اسمعك من الهوسة اليمي
معتصم : شصار وياك
- بعد ما صار شي
- مثل ما وصيتك لا تخلي اي دليل يبين شرفها واليوم ترجعها للگواو.د الي جانت يمهم وتگوللهم مو شريفة وتنطيني خبر
تميم : اذا اگول كلمة تخبلت ما توصف 1% من شعوري زيد جان اقرب عالولد مني ضربو بوكس كل قوتو وگعو فوگ السرير
گعد فوگ گلبو وصار يضرب بيه بوحشية وابو الولد يحاول يسحب زيد والنسوان جانن يم باب الغرفة من صارت هوسة فتحت الباب امو وصارت تصرخ من شافت زيد يضربو
وعلى صوت صريخ النسوان اجو ولد عمو سحبت زيد منو بعد ما زورگ وجهو وسحبت ياقوت اريد اخذها ودفعني واحد من ولد عمامو وبنفس اللحظة ضربو زيد بوكس
عفت ايد ياقوت الي متخبلة من الخوف وضربت ابن عمو الثاني قبل ما يضرب زيد وتخيلو انتو الموقف الي صرنا بيه
المشكلة احنا ثنين وهم مجموعة كلش جبيرة وجنت خايف على زيد لان جرحو يعتبر بعدو مو متشافي 100%
بعدنا واگفين وشد انتباهي صرخة ياقوت باوعت وراي شفت زوجها مسكها من شعرها سحبها داخل الغرفة ودفع الباب علمود يسكرو
قبل ما يسكرو دفرتو كل قوتي ومن قوة الدفرة وگعو هو وياقوت ورجعنا عليه اني وزيد وهالمرة زيد قفل الباب مو بس طبگو
اجيت مسكتو من رگبتو لحد ما صار وجهو ازرگ ورفعتو بكل ثگلو وطبگتو بالمراية فلشتها بيه ووگع بالگاع وهو فاقد الوعي
انداريت على ياقوت جانت واگعة بصفحة وفاقدة الوعي رفعت راسها بحظني وگلت لزيد جيب ماي بسرعة وجابلي ماي من الحمام
مسحت وجهها ومثل الفزت فزة بسيطة بس بقت نايمة وشلتها وقبل ما اطلع اسمع صارت هوسة خارج فتح الباب زيد لگيت اخواني وابوي بوجهي
زيد اتصل عليهم وطلعت من بينهم وهي بحضني گلتلهم جيبو امي ولحگوني وحطيتها بسيارتي واجو وياي امي وزيد وطلعت من يمهم
تخيلو انتو موقفي بذيج اللحظة واني ينعاد گدامي كلام زيد وعماد من گالولي افصخ الخطوبة واني بقيت مطنش لحد ما صارت هالمصيبة
امي ما جانت فاهمة شي ومن سألت گاللها زيد بالبيت نحجيلج وطلعنا فورا للبيت وشلتها لغرفتها واية جان وجهها اصفر من خوفها عليها
حطيتها بفراشها ونزلت على ركبي گدام سريرها وامسح على وجهها وانتظرها تگعد علمود اطمنها انو رجعتها لبيتي وخلصتها منهم
زيد جان بالطابق الي تحت دا يشرح لاهلي الي صار جنت اعصر ايدي بكل قوتي واني افكر شلون انتقم من هالنغولة وابرد گلبي
حتى لو اگطعهم واذبهم للجلاب ما يبرد گلبي بيهم بس المهم هسا تگعد ياقوت اهم شي ما تأثر عليها هالخوفة الي عاشتها
بقيت گاعد يمها وانتظر وبلشت تتحرك على كيفها اول ما نطقت اسمها فتحت عيونها على وسعهن وصرخت صرخة بحياتي مو سامع مثلها
جانت تصرخ بهستيرية ومغطية وجهها وصوتها جان صوت وحدة مرعوبة رعب مو طبيعي صرت اتوسل بيها علمود تسكت بس بدون فايدة
اخير شي ما تحملت وسحبتها لحضني وجانت تصرخ وتحاول تدفعني وعلى صوتها اجت امي وبقت تصرخ لحد ما فقدت الوعي
جن جنوني بذيج اللحظة وماعرف شلون اجى ببالي الدكتورة النفسية الي عالجتها طلعت تيلفوني وجان موجود عندي رقمها واتصلت عليها
جانت الساعة 12 بالليل ومن جاوبت مبين من صوتها انها جانت نايمة وگعدت على صوت التيلفون
الدكتورة : الو منو وياي
تميم : دكتورة اني تميم جنتي تعالجين ياقوت ببيتي
: هلا تميم خير إن شاء الله اكو شي
- دكتورة باليرحم والديج تلحگين ياقوت راح تروح من بين ايديني وماعرف شسوي
- ياربي سترك شصاير
- تعالي هنا واني افهمج
- تگدر تجيني لان ماعندي سيارة هسا
- تمام هسا جايج
- تمام
طلعت ركض وسألني ابوي گلتلو اجيبلها دكتورة واجي رحت عالعنوان الي اخذتو منها ومن وصلت خابرتها گلتلها اني گدام البيت
اجت هي وواحد من اخوانها عمرو 15سنة اول ما صعدت انطلقت مثل الصاروخ گالت شبيها وحجيتلها الموضوع باختصار
- وهسا شبيها
- گعدت وبقت تصرخ لحد ما فقدت الوعي
- تمام إن شاء الله مابيها شي
- إن شاء الله
من وصلنا نزلنا ركض وصعدنا على غرفة ياقوت والولد بقى يم اخواني دخلنا لغرفة ياقوت جانت بعدها فاقدة الوعي وامي واية وزوجة ابوي يمها
طلعت خارج الغرفة ومتخبل فد مرة بقيت رايح جاي يم الغرفة لحد ما سمعت صرختها وعرفتها گعدت وقبل ما ادخل راح صوتها
سمعت امي تهدي بيها وصوت صرخاتها مكتوم وتراجعت گلت هن نسوان ويا بعض واكيد يگدرن يهدنها احسن مني
نزلت تحت گلت لزيد عود رجع الدكتورة واخوها وطلعت خارج ولحگني زيد گال وين رايح تميم
تميم : لجهنم
- شبيك تميم وين رايح بهالوقت هذا
- عوفني زيد باليرحم والديك ترا مالي خلگك
- تميم تشوف الدنيا نص ليل والدنيا مخبوصة ما نريد نكون بياقوت ونصير بيكم ثنينكم
تجاهلتو وركبت سيارتي وطلعت من البيت ماعرف وين اروح اخير شي ما حسيت على نفسي الا اني متصل على عماد وجاوبني وهو گوة يحجي من النوم
سكتت ماعرف شحجي وماعرف ليش اتصلت عليه گلتلو اعذرني ماكو شي وسكرت منو ورجع هو خابرني لان حس ان اكو شي
تميم : هلا عماد
- شبيك تميم وشعجب گاعد لحد الان
- ماكو شي
- احجي يخوي اذا اكو شي
- تستقبلني اذا اجيك
- دنجب وتعال هذا هم سؤال
- تمام جايك
رحت عليه طلعلي بملابس النوم دخلت للاستقبال وهو راح جاب ماي واجى گعد يمي گال احجيلي شبيك تميم وضعك قلقني
تميم : شلون عرفت
- عرفت شنو
- ان زواج ياقوت غلط
- احجي شصاير وياها لان الي اعرفو اليوم عرسها
- ذبيتها بنص النار بايديني ذني ورطتها بنفسي بسبب عنادي وغبائي
- بقلق احجي ترا خبلتني
- العرس كلو على بعضو اتفاقية بين زوجها وابن الشيخ الي جان ابوها يشتغل يمو
- بصدمة .. اتفاقية بينهم
- اي اتفاقية بينهم
- بحذر .. شنو سوو بيها
- ما سوو شي لحگتها باخر لحظة جانو يريدون يتهموها بشرفها معتصم ابن ال..ة يريد ينتقم من ابوها بيها
- هسا احجيلي بالتفصيل شصار
- حجيتلو من البداية للنهاية
- الحمدلله انو لحگتها حتى لو خايفة او صاير عدها انهيار عصبي هذا كلو تتعالج منو بس قبل كلشي اشتكي عليهم ثنينهم
- لا اريد اخذ حقي بنفسي
- لا هيج غلط
- الدولة ما بيها قانون يبرد گلبي
- تميم هسا عوف العصبية والانتقام على صفحة وركز وياي بعقلك فقط وافهم كلامي
- احجي
- هسا الناس راح تبدي تلفق عليها كلام وماراح يگولون لحگو عليها راح يگولون طلعت مو شريفة واجو اتهمو الولد بالموضوع
فاشتكي عليهم واخذ حقها گدام خلق الله كلهم وخلي كل الناس تعرف انها اشرف منهم ثنينهم وخليهم عبرة لباقي الناس
- يعني انت هيج رايك
- اي هيج رايي
- بس شلون ابرد گلبي
- من يبلعون كم سنة بالسجن راح يبرد گلبك وفوگها من يطلعون يبقون عارات بعيون الناس
- تمام بس ادعي ما اتخبل واروح اكمل على هالنغل
تميم : بقى يحجي وياي علمود اهدئ بالاخير گالي يلا انگلع لبيتك وطمني عليها اول ما توصل گلتلو تمام وطلعت منو توجهت للبيت
شكرا لزيارتكم عالم روايات سكيرهوم
