رواية جذبني فمك البني الفصل الثالث والأربعون 43 بقلم عبير إدريس

الادهم

مرات تحصـل بالصدف نَظـرات بيني وبينـه

وأصفن وأحير وأرتبك يا لون هـذا بعينـه ..

____

(مشهد من الحاضر )

اصوات متكرره يصحبها صخب موسيقي

ما نعرفهُ يختلف عن ما لا نعرفه

وما نحسه يختلف عن ما لا نحسه .

وبين معرفه واخرى هناك خفايا ومخابئ ولكل شيء جميل وجه اخر قبيح....

كالموسيقى مثلا عند سماعها نشعر براحه في بعض الاحيان وربما تغييير للمزاج ، وكبار المطربين لا يكتمل ابداعهم الطربي ان لم تكن هنالك موسيقى طربيه تطرب المسامع والنفوس.....

بينما لها وجه اخر قبيح وربما مميت او شيء يؤدي الى الجنون الحتمي او الهلاك لو استخدمناها بطريقه للتعذيب مثلا...

اختيار قطعه موسيقيه صاخبه مع كلمات بذيئه تهين معتقد الانسان وتنتهك ثقافته تكون ذات محتوى جنسي كنوع من الاذلال....

هذه المقطوعه الموسيقية او الكلمات تدق بالرأس كقساوة دق المسمار بالحائط تخلق هذه الموسيقى ترددات داخل العظام والنفس البشريه تسافر بعمق مصطحب اهتزازآ ينتهك رفاهيه النفس البشريه بمعنى التعذيب الصوتي ...

من كل مكان اسمع هذا الصوت يضرب براسي اريد انام ما اكدر اعصابي بدت ترجف حفظت المقطوعه وحفظت كلماتها كمت اصرخ بعلو صوتي ...

كااااااااااااافيييييي كااااافيييي

الى ان افقد الوعي واكعد الكه نفسي بالغرفه البيضاء .....

_________

سيلين: متحجون شبيكم خرسان توكم تسولفون وشحلاتكم واسرار بينكم ومبين متفقين على شي قوي احجولي احسن ما اصرخ والم البيت عليكم ..

فهد باوعلي ابتسم وكعد على ميز التواليت نص كعده ، يباوع لايفين مستهزء ويرجع يباوعلي كأنما يتفرج على مسرحيه ومستمتع ..

سيلين : متحجيييين لسانج بيه عظم ليش ساكته شنو الشي الخايفه منه اوبالاصح خايفه نكرهج بسببه ويامن غلطانه سولفي ..

فهد : يهووو ويامن غلطانه شنو اكلها مرتي هسه ليش تضوجيني وتدوسين على كبريائي..

التفتت عليه خزرته وهو يضحك مجنون رسمي..

سيلين : انت اسكت ميخصك..

فهد : غير ادافع على مرتي.

سيلين : اسكتتتتتتتت ناقصني مجانين اني اسكت اسكت ..

فهد : افيدج شبيج..

سيلين : لا اله الا الله امشي اطلع برررره.

فهد : لو تصيرين على كلبي تستفادين شبيج مجلبه بعمج

سيلين : اذا تأذه عمو منك لو من اختي ادمركم ..

فهد : لعد ليش اذيتيه..

سيلين : بسببك انت حيوان لعبت بعقلي كتلي اذا قبلتي بسامر اخلي ايمن يعقد على ايفين ويستقرون وابعد عن ادهم كتلي انتي اللي راح تدمريه وانتي اللي بسببج راح اخسره كلشي لهذا تركته تركت الايد اللي انمدتلي تركت حنانه الابوي خليته يعاني بسببك وبسببها بس طلعت مكار وكل همك اذيه اخوانك لو ادري بيك انت هيج لو بس حاجيلي ادهم والله فلا احقق مبتغاك لان اني مجان ابالي لا زواج ولا جان عاجبني بس خوش ضغطتو عليه انت من جهة وامك من جهة وحتى ابوك واختي كلكم ساهمتو بتفريقنه...

فهد : هسه شنو الفرق هذا دكتور وذاك دكتور نفس المحتوى المعقد قابل عفتي دكتور وتزوجتي مجرم مثل اختج عافت مدرس واخذت مختل ...

سيلين : يعني تعترف انت مختل.

فهد : طبعا اعترف هاي شهاده اطباء مثل عمج تصدكين جنت زين همه خبلوني اسوء مرحله عشتها بحياتي هيه الفتره اللي بالمصح شايفه اذا نمتي هواي شلون يكعدوج بالابرر لو مي بارد يجبون على وجهج وجنت اكله ليوسف طلعني يكلي لا بابا تتعالج الى ان وهمتهم انه متعالج ومن غبائهم طلعوني تصرفت عادي وطبيعي وبعدين طلعت عقدي بزوجتي بس لو تجين انه مو مذنب..

سيلين : كل الحجيته وكل العشته ميهمني ومستحيل اتعاطف وياك لان لو فعلا مريض ومامأذي احد اعذرك بس انت كاعد تأذي كل الحواليك ومكاعد تحس بنفسك..

فهد : همه بلشو ويايه ابني ابني تعرفين شنو يعني تخيلي صار عمره تقريبا ٧ سنوات ماعرف ازيد وانه ماشايفه محد يقبل احجي وياه يكلوله ابوك مات وابني يصيح لرجال غريب بابا..

سيلين : معليه بيك ولا بالماضي مالتك اللي عليه اذيتني واذيت اختي والله اعلم شنو ضاملنه بعد.

فهد : ما مأذيها هياتها سأليها.

سيلين : شنو ممأذيها والحجي اللي حجته اليه.

فهد : شفتي بعينج اثر بجسمها تصوير هيه متأذيه..

سيلين : يعني شنو هذا الاسبوع اللي راح واحنه ما نايمين ولا ضايكين طعم الراحه طلع جذب..

سوه حركه بحركه ورفع كتفه يعني ما ادري واشر بيده عليها وكال..

فهد: هيه تسولفلج بالمناسبه هيه زوجتي شرعآ وقانونآ هاج هذا نسخه من عقد المحكمه واقري بعينج..

اخذته منه بيد ترجف باوعت التاريخ قبل ٣ اسابيع يعني الاسبوع الاول اللي زعلان ايمن وياها والاسبوع الثاني اللي على اساس عاشت بيه الست ايام والسبع ليالي وهذا الاسبوع اللي عشناه بالضيم والقهر اقره وارجف واريد املخها باوعتلها خزرتها دنكت راسها لزمتها من شعرها وكمت اعت بيه وبيدي الثانيه الورقه خليتها بوجها.

سيلين : رايحه بأرادتج وعاقده وتكولين جبرني لج انتي شنووووووو من بشرررر انتي شنو هسه ثبتيلي انت بنت تماره النذله

فهد : اي لعد شعبالج العرك دساس..

التفتت عليه عطت بيه

سيلين : انت اسكتتتتتتتتتت ..

فهد : شلون طلابه هاي يابه عرسان صدك تحجون واحد يضربني والثانيه تتعارك ويه مرتي تره ماصايره.

رحت عليه ضربته بجتفه بمكان الجرح ..

سيلين : انت اسكت سد حلكك الله ليوفقك..

احجي وارجف كلبي كام يدك سريع ردت اوكع من طولي اجتي تريد تسندني دفعتها حيل وكعت بالكاع..

باوع على ايفين وكللها..

فهد : يلا تكبرين وتنسين اختج الجبيره تمون عليج..

سيلين : اطللللللع بره اطللللللع ماريد اسمع صوتك كافي اسكت اسكت كرهتك.

فهد : لا فدوه حبيني الله يخليج.

كمت اركض عليه وادفع بيه حتى يطلع.

سيلين : اي دكافي كافي عاد مو ملييييييت مليييت منكم تعبتوني حرام عليكم لعبتو بيه وبحياتي الله ليوفقكم..

طلع يضحك ولا عبالك هلكد انضرب والمصيبه ميتأثر ابد ولا عبالك يضربون بيه حتى مرفع ايده ودافع عن نفسه مستسلم ، رجعت التفتت عليها.

سيلين : بسببج عاديت سامر وبسبب غبائي خربت حياتي وللمره الالف اضحي بحياتي على حساب سعادتج وانتي شنو قدمتيلي شنو غير الخذلان والظلم شنو من اخت انتي اريد افهم شاربه سم تماره كله دمج ما ماخذ من وضاح ولا شويه عوفج من الدم من عشتي ويايه و ويه عمه ياسه ماتعلمتي من عدنه الحنيه لو الطيب لو الادب معقوله هذا كل تمثيل ..

ايفين : انتي كلشي متدرين لهذا اسكتي..

سيلين : اسكتتتتت هاا اسكت وهسه شنو اكول لعمج ولايمن اذا اجوي اكلهم صارلكم اسبوع معطلين اشغالكم ودواماتكم واني عايفه بيتي ورجلي ودوامي وطلعت بمشكله جبيره وتهددت اتطلك لان افونه لعبت علينه ماكو اغتصاب ولا غصب راحت بأرادتها لج انت فد وحده نذله وحقيره لو اشرب من دمج كلبي ميبردد ....

احجي وارجف مكدرت اوكف الى ان انفتح الباب دخل عمو عينه براسه من الاعصاب شافني ارجف واريد اوكع واختي ياجبل ميهزك ريح ثابته كأنما اني التعرضت للمواقف اللي حجتها لان خلتني اعيشها بفكري انام واكعد افكر بيها يا انام اصلا دقيقه عيوني مغمضت واذا غمضت احلم بكابوس وافز اجه عمو يمي باوعلي بقلق وجها تعبان واصفر ...

ادهم : شبيج ليش صوتج واصل ليجوه شنو الصار.

سيلين : عمو خجلانه منك والله وين اودي وجهي فهمني شسوي هسه اني .

ضيق عينه وهمس بصوت متشحرج.

ادهم : ليش شنو الصار شبيج .

سيلين : تصدك انضحك علينه وانت الدكتور فاتتك لعبتهم.

عقج ملامح وجها وحلكه رجف بغضب وكال..

ادهم : شنو قصدج ما فهمت

رفعت العقد بيدي وخليته كبال وجهة اخذه مني وقراه باوع لايفين ورجع باوعلي..

ادهم : هاي عود صدك.

دنكت راسي مكدرت احجي مد ايده رفع حنكي وكال ..

ادهم : لتنزلين راسج الف مره كايلج لتشاركين بذنب غيرج كلمن يتحمل خطأه...

اخذ الورقه وكام وكف يم ايفين خزرها واشرلها تكعد جر الكرسي وكعد كبالها صفك ايد بأيد وكللها.

ادهم : يلا سولفي كاعدلج، من هذا ما قبلتي تحجين كدامي وفضلتي تحجين لسيلين علمود لا اكشفج ولو حتى لو ردت اكشفج ما اتصور تطلع منج لان اعرفج انتي شنو بحكم عشتي ويايه كذا سنه واعرف اخويه شنو لهذا رجحت انتي صح واخويه غلطان ، يلا مو مشكله نبلش من جديد احجيلي ادق التفاصيل..

سكتت مجاوبته ..

ادهم : مو وياج ليكون خايفه ؟؟؟

متحجي ساكته فتح الباب ايمن وفات كوه يمشي وتعبان بشكل التفت عليه ادهم.

ادهم : شصعدك انت مو مريض شكو جيت.

ايمن : جيت اشوفها خاف اذاها الكلب.

عمو ضرب على رجله حيل وفرك وجها عاط بصوت اول مره هيج يفقد شكد ضاج من فهد بس مو مثل هسه.

ادهم : لج شلووووووووون نطاج كلبج تأذيه وتلعبين بيه وبمشاعره لج هذا ايمنننننننن تعرفين شنو ايمن بالنسبه الي هذا روحي هذا ابني انتي شسويتيله ذبحتيه تعرفين شنو ذبحتيه..

ايمن عقج حاجبه ومشى بتعب وصل يمي وكف وحجه بصوت ضعيف و يرجف..

ايمن : ليش شسوت شبيك تصيح عليها هاي فوك اذيتها تجي انت تأذيها..

عمو غطه وجها بيده ودنك راسه وهمس بصوت مسموع.

ادهم : اخ ياكلبك بيدمن وكع اخ يا ضميرهم الميت اخ اخ ..

ايمن : غير تحجي شنو الصاير اريد افهم شنو هالالغاز هاي..

شال عمو الورقه وخلاها بيده بدون ميرفع راسه حسيته ما اله عين يباوع بعيون ايمن.

ايمن باوع وعكد حاجبه ، حجه والورقه ترجف بيده سريع..

ايمن : يعني تاريخ العقد قبل لا نزعل بيومين يعني من طلعتي ويايه حتى نشتري غرف جنتي مرته جنتي على ذمه اخويه زين ليش شسويتلج انه بشنو اذيتج بشنو قهرتج بشنو زعلتج وهيج تسوين بيه...

هو يفرفح وهيه مدنكه راسها وتبجي بدون صوت ..

سيلين : ليش ساكته وتخلينه نعاديج ونكرهج احجي كلنا وياج اني وعمو وايمن كولي شنو لازم عليج وهيج خايفه حتى لو فاضحتني كدامه هم قابله بس خلينه نساعدج احجي كلشي...

ادهم : زين هذا الصار كله لعبه اجي وياج بس شلون كدرتي توهمينه بمرضج يعني شلون ضغطج صفر هيج..

شالت كبسول من جوه مخدتها وخلته بيده باوع عليه ورجع باوعلها مصدوم..

ادهم : يعني حتى هاااااي محسبلها لكم انتو شنو ، وانتي شلوووووون تطاوعيه شلووووون اريد افهم اليوم ماعوفج اذا متحجين

ايفين : لو تموتوني ما احجي.

ايمن : مو بكيفج متحجين موووووو بكيفج لعبتي عليه واعوفج ادفنج هنا وعلي الكرار..

ايفين : اي ادفني علواه اخلص عوفني شلزكت الف مره كتلك انت صديق ما أملتك بشي اني..

ايمن : يعني تحبين فهد مو ؟؟؟؟ ومن شوكت ..

ايفين : اي احبه شتريد هسه.

سيلين : لعد شلون كتيلي من ايمن كاعد يم راسي واسمعه يبجي جنت اتكطع واكول لو تدري بشنو انضربت وبشنو عانيت جان شكال كلبك يعني حتى هاي جذب.

ايفين : اي حتى هاي جذب.

سيلين :يابه الحكني عقلي راح يوكف مكاعد استوعب ولا اصدك ابد .....

حجيتها وارجف وعمو حار بيني وبين ايمن اخر شي صعدت نرمان على صوت الهوسه ، هيه من النوع ابد متدخل لو البيت يحترك بس اجتي لان انهارو اخوتها واني اتخزيت هم بيت غربه وهم اختي خلت راسي بالوحل كومني عمو اخذني للحمام هو يرجف واني ارجف شنو من موقف صعب عشناه..

فتحلي البوري ومد ايدي جواه.

ادهم : غسلي وجهج راح تموتين.

رفعت وجهي باوعتله وعيونه غركانه بدمع وندم وخوف وقهر وقلق كلها قريته بعيونه.

سيلين : عمو اخت هاي اخت يعني اني ربيتها واني تحملت برد وحر وجوع علمودها هاي ايدي شوفها..

رفعتها وتقطر مي وهو عينه على ايدي الترجف وساعه على وجهي حسيته يريد يحضني بس ميكدر..

سيلين : بهاي ايدي غسلت الها وسبحتها ونظفتها والله جنت اوكلها ، اني ضحيت بيك وعفت حياتي هنا وعيشتك بقهر لان فهد ساومني اقبل بسامر لو يأذيها ويأذيك ضحيت بحياتي للمره المليون علمودها عدا شلت تهم يابو تهم عنها وتالي هاي جزاتي تلعب عليه عيشتني اسبوع دمرت اعصابي بيها..

عقج حاجبه وكال..

ادهم : اوكفي اوكفي شنو كلتي منو هددج وعفتيني.

سيلين : فهد هددني بيكم ، سلب راحتي في سبيل ترتاحون اثاري راد يبعدني عن البيت علمود يضربكم ب ايفين ، عقلي مجاي يستوعب اجرامه وخباثته..

ضل يباوع على وجهي وبؤبؤ عينه يتوزع بقلق على ملامح وجهي يريد يتطمن عليه ويهديني بنضرته لان لا كلام ولا مواساة يكدر يهديني بيها...

همس.

ادهم : مدي ايدج توضي ..

سيلين : ماكدر والله ماكدر.

ادهم : توضي كتلج

حجاها بحزم..

مديت ايدي وهو طلع توضيت سديت البوري وطلعت جان واكف باب الحمام شافني اجه يمي.

ادهم : تعاي وياي..

مشى ومشيت وراه وكل شويه يلتفت يباوعلي ويرجع يمشي دخلنه لغرفه المكتب فرش السجاده مالته وكعدني عليها كعد بصفي بس اني سابقته بشبر رفع ايدي خلاها على صدري. وكال..

ادهم : اخذي نفس..

اخذت

ادهم : اقوه اي اقوه بعد...

كمت اجر النفس واحس صدري يوجعني..

سيلين : عمو صدري يوجعني عليه جبال من الهم ...

ثبت ايدي على صدري وبعدين وخر ايده وكام يردد بأذني وطلب مني اردد وراه ردتت بصوت يرجف...

( بسم الله الرحمن الرحيم ولا حول ولا قوه الا بالله العلي العظيم يا لطيف ادركني بلطفك الخفي )

رددها ١٢٩ مره واني اردد وراه حسيت ارتاحيت بعدين وره فتره من سألته هاي لشنو ( كال الخلاص من الشدائد وذهاب الهم والغم ) وضفتها لدفتري الذهبي.....

كام جاب مخده خلاها بالكاع وطلب مني امدد..

تمدتت واحس الدنيا نامت على صدري كمت كعدت وضليت ابجي واردد ( يالطيف ادركني بلطفك الخفي ) واكررها عمو مكنبص كبالي وعيونه دم ميعرف شنو يسوي اجتي نرمان تركض دخلت للمكتب التفت عليها ادهم صاح..

ادهم : شكو شبيج..

نرمان:الحك ايمن وفهد تعاركو...

لزم راسه عصره حيل وصاح ...

ادهم : ياربيييييييي دخيلك....

كام وطلب من نرمان تبقه يمي وهو راح نزل ، عفت نرمان وكمت نزلت وراه ولكيت ايمن يضرب بيه وفهد يستفزه بالكلام ويضحك بس حرك دمي من يكله..

فهد : ولك خلصتك منها والله ما تسوه تخسر اخوك علمودها.

ايمن: حتى لو متستاهل بس من تدري بيه احبها جان اجيت حذرتني ولا تخليني وتخلي نفسك بهيج موقف ليش هيج سووويت ليش ..

يصيح ويضرب على صدره..

فهد : وداعتك متسوه يجي يوم وتشكرني خلصتك منها ولك متسووووه..

ايمن : كلببب نذل ياعار انت عار الاخوان.

فهد : زين معلينه بهذا الحجي كله مو عبالكم انه غاصبها طلع تسجيلات الكامره وشوفها اجتي ويايه برضاتها لو مغصوبه بيوم العقد مال محكمه..

سيلين: انت شكاعد تحجي شكاعد تخربط لك انت شنو شيطان مو بشر.

احجي واتقدم عليه عمو صار بيناتنه..

ادهم : عوفيه معليج منه لو تضلين ساكته لو تصعدين فوك..

سيلين : عمو كاعد تسمعه شيخربط..

ادهم : اي اسمعه انتي سكتي...

خزرني والتفت على ايمن..

ادهم : طلع التسجيل خلي نشوفه..

راح ايمن بس يرجف من الاعصاب طلع التسجيل بأيد ترجف ورجع بالتاريخ ليوم العقد ، وكفنه كلنا نتفرج اني وعمو وايمن وامهم وابوهم ، وفعلا اختي مبدله وتضحك وياه طلع السياره وهيه واكفه على صفحه وطلعت هيه هم وسدت الباب يعني ثنينهم جانو منسجمين و يضحكون زين وينهم اكيد ايمن جان بالدوام والبنات هم وعمو وامهم ساعه

تسعه يلا تكعد تتأخر بالنوم...

صدمه ياربي صدمه كلنا بهتنه ومن ضمنهم امهم اللي وكعت من طولها وركضو عليها ولدها واني ضليت بصفنتي على التسجيل،، وايمن كل شويه يعيد بيه يريد يطلع ثغره يكذب عيونه الشافتها التفت عليه وكال..

ايمن : دتشوفين سيلي تشوفين الجاي اشوفه هاي اختج هاي ايفين التعبت عليها....

سيلين : شفت شفت ...

اجه عمو وكف يمنه انداريت باوعت امهم منيميها على القنفه ويمها نرمان وزمن غسلو وجها التفت ادهم على فهد وكله .....

ادهم : طلكها واطلع من البيت.

ضحك مستهزء....

فهد : اعتبره امر لو طلب....

ادهم : باللي يعجبك..

فهد : عوفنه والتهي بحب حياتك الضاع معليك مني.

ادهم : فهددددددد

فهد : نعم يا حبيبي عيون فهد ...

ادهم : سد حلكك وطلك ايفين ....

فهد : ما طلكت شتسوي هم تشهد ضدي وتفرقني عنها هلمره محسب حسابي زين لو اموتها متحجي ....

ادهم : تعرف كلش زين انه ما الي دخل انت اللي اذيتها ودمرتها وانه جنت مسافر بوقتها رجعت لكيت الدنيا كايمه عليش ذاب بلاك عليه..

فهد : يعني تنكر شهدت بالمحكمه ضد اخوك بحكمك دارس علم النفس جنت بعدك ماصاير دكتور ...

ادهم : شهدت على الشفته بعيوني اجيت لكيتها تتوسل وتبوس برجل ابوك حتى يخلصها منك لك انت حتى باللحضات الحميميه جنت تعنفها عاد من يصير خلاف شتسوي بيها.

فهد : جانت تحبني وهيه قانعه وقابله بعيشتي لو ما انت واخوك تدخلون بيناتنه.

ادهم : تخاف منك..

فهد : مامجبوره تخاف قابل شكتلك مني فهمني شمدريك انت جنت عايش وياي وما ادري..

ادهم : مو ضروري تشكي انعزالها عن البيت كافي لك فهد انه لو ما سوايتك وياها قبل لو تشوف نجوم الظهر ما ازوجها الك بس عرفت شلون تلوي ايدي ولخاطر عمي قبلت بزواجك..

فهد : هيه رادتني واستقتلت وهيه برجلها اجتني ماجبرتها وانه جنت رايدها انتو الجنتو معارضين.

ادهم : جانت تدرس وهم تحبك يا حيوان ....

فهد : دام تحبني تتحمل خبالي انه ماجبرتها واعرف بيها تحب هيج سوالف وما شكت بيوم مني..

ادهم : لك تمرضت ورادت تتخبل من وراك وتخاف منك لهذا جانت تسكت..

فهد : اجتي شكت مني لو بس بيك لغوه..

ادهم : ايمن يكذب وهيه تكذب مو نامت مستشفى ٣ اسابيع من وراك بطر حتى ايدها كسرتها بعد شتسوي انت من تتخبل متحس بنفسك..

فهد : لعبتوها صح كتولي روح تعالج وتعال تلكاهم موجودين بعدين من اطلع الكه اتفاق بينكم متفقين عليه اروح اتعالج منا وتسووون تفريق منا لو احركم كدامي هم كلبي ميبرد اخذتو مني علاوي وروايتي اخذها غريب ...

ادهم : جان حافظت عليهة وكل مره تعيد السالفه واكلك انه ما تدخلت طلبو شهاده اهلك ومحد قبل يروح يشهد وياها الكل ضم راسه وانه رحت ما غلطان ولا متندم لان خلصتها منك ولو يرجع بيه الوكت هم اعيدها...

مجرد القاضي حكملها بالتفريق اجتي باست ايدي لعد شكد مأذيها جنت ياظالم وعمك هو قفل عليك كال لو تصبوه ذهب ما ارجعها اله وحتى تعاده ويه ابوك وبيت جدك كلهم حقدو على امك وشفت بعينك بعرس ضيغم محد اجه منهم يعني ميريدون لا يشوفوك ولا يحتكون بيك..

فهد : وارجع واكول انت وايمن السبب لو ناطيني فرصه اتعالج واطلع وارجعهم جان ما احترك كلبي هيج..

ايمن : انت نذل وتستاهل ومو خوش ادمي والصارلك كله من ايدك مريض وكاعد تبجي علمود تستعطف عواطفنه بمشاعرك المزيفه ..

كام يصفك ...

فهد : الله الله يا استاذ التاريخ مزيفه عجبتني ..

ادهم : لتضل تلغي طلك ايفين وخلصني..

فهد : يابه تحبني انت شجلبت روح اسألها ...

ايمن : مو موزينه واتندم اذا اخذتها ليش مجلب بيها طلكها وهم انه اخلص وهم انت...

فهد : الخبيثون للخبيثات اطلع منها احنه نتوالم ...

ادهم : تطلكها وتنجب وتولي منا وجهك ما اريد اشوفه..

فهد : دكتورنا الراقي الهادئ موزين عليك تصيح هسه تنجلط جيبوله عصير ليمون بالنعناع سامع بيه مريح للشد العصبي..

ادهم : لتخليني انهيك ولك كوه لازم نفسي ماريد اضربك ما اريد أاذيك.

فهد : عليمن حارك دمك على بنات تماره هنه انكس منها هاي عافتك وذيج عافت اخوك ....

عمو متحمل ضربه وذاك يستفزه ويزيد بالحجي ويرجع عمو يضربه...

فهد :يمعود ازيد هاي شنو ضرباتك زلاطه بالنسبه للتدريب النتدربه يعني البوكس مالتك كأنما بايسني ههههههه.

ادهم : سا****** كو*********** ،*******

بلش يقسم عمو فشار اول مره اسمعه...

فهد : لتعب نفسك وتضرب انسان ميت انه علمودك صحتك موزين عليك لو تضل تضرب بيه لباجر ما اتأثر...

حجاها وكام يبجي وعمو ادهم كعد بالكاع من التعب ارتاج على الحايط وخله ايده على راسه من شاف فهد يبجي كام حضنه هو يبجي وعمو يبجي ....

فهد : داموت كل يوم داموت بعد ما اتحمل صار كم سنه ماشايفهم مانام بليل مانام ....

ادهم : ارجعلك ابنك واخليك تشوفه و تتقسم الايام بينك وبين امه بس بشرط توعدني تتعالج وتصير زين ...

فهد : وروايتي شلون..

ادهم: انساها روايه انساها وابدي حياتك من جديد وعوف ايفين علاقتك بيها غلط لتخسر اخوك حبيبي انت اعرف تصرفت بدافع الحقد واندفعت بس احنه اخوتك وذخرك ليوم توكع بيه..

فهد : وكعت وكعت ومحد بيكم نهضني بالعكس دستو عليه واخذتو عزازي مني..

عمو لزم وجه فهد وثبته بيده وضل يحجي وياه..

ادهم : زين انت اسبوع كامل تأذي بيها انواع العذاب شافته وياك نفس الاشياء الكاذبه الحجتها ايفين انت جنت مسويها ويه زوجتك وبوقتها حفرت ارقامك وحرفك على صدرها شكد تألمت وتأذت نفسيتها وشكد ما انت عزيز عليه واحبك بس روايه فقيره وماتستاهل لهذا وكفت وياها المفروض تشكرني بعدتهم عنك خليهم يعيشون سعيدين ولا تموت واحد بيهم وتضل تعض اصابعك ندم خاف هسه متنام ليلك اذا صار بيهم شي تبجي دم عليهم..

فهد : يعني اكدر اتعالج..

ادهم : كاعد ابحث واريد اوصل لحالتك وطرحت الموضوع على دكاتره اكو خالفوني بالرأي وكالو انه غلطان بتشخيص حالتك واكو ايدوني وراح ابحث بعد اكثر وعلاجك على ايدي بس انت كون تصير صادق ويايه لتكذب وتتحايل راح امشي وياك بكلب صافي وضمير حي انت لتقابلني بغدر واذيه وكلشي فات انساه من هاي اللحظه ماشي...

فهد : هاهيه متفقين.

ادهم : طلك ايفين ..

فهد : ماكدر.

ادهم : ليش ؟

فهد : جوز حامل شلون اتركها.. ..

صفن عمو بوجها واني كمت اضرب على وجهي وعلى صدري واعيط واصيح تخبلت لزموني البنات ايمن هج من البيت طلع والام تلطم والاب يغلط وانثبر البيت ثبر بعدين وره ما هدأت وره ماعرف شكد البنات غسلو وجهي وكعدوني سمعت عمو يسأله..

ادهم : شوكت عاقد شيخ وشوكت صارت بينكم علاقه.

فهد : ماصار شهر مو كتلك.

عفتهم وصعدت عليها ..

سيلين : لج نذله شلوووووون تكولين ماصار اسبوع من عقدت وشلوون تجذبين عليه ولج ليش شسويتلج حتى تخلين راسي بالطين شسويت من الله لا ينطيج ولا يوفقج كون..

كمت اضرب بيها واملخ بشعرها ابد مقاومتني بس تبجي...

سيلين : يعني تحبيه فهميني صدك تحبيه لو هذا هم اتفاق مو كمت ما اصدك بيج ما اصدك ولا أأمن احجي احجي لتسكتين..

احجي واضرب بيها اخر شي طلعت من الغرفه مكدرت ابقه وياها كرهتها ..

رحت للمطبخ كعدت بالكاع ابجي ولهناك واشوف مريم خاتله جوه ميز الطعام مسحت دموعي وكمت جريتها على كيفي جانت خايفه وترجف..

سيلين : حبيبتي شبيج ليش هنا كاعده...

متحجي ترجف وصاكه على اسنانها عفتها وكمت صحت على عمو من الدرج ادري تأذه وميتحمل بعد بس هاي بنته اهم من الكل ..

سيلين : عموووو تعااااال فوك..

كوه حجيتها بصوت يرجف ..

صعد يترنح ولازم راسه عيونه دم باوعلي عاكد حاجبه..

ادهم : شنو ؟

سيلين : مريم

ادهم : شبيهاااااا

سيلين : على كيفك بس جانت تبجي

ادهم : وينها ؟؟؟؟

سيلين : بالمطبخ..

عافني وركضلها كعد بمستواها و حضنها وهيه تعلكت بركبته رغم الصار بيه ورغم الاذيه اللي تأذاها كدر يحتوي بنته وفصل بين مشاكله وبين معاملته لبنته شكد طول خلك وياها عبالك بنيه جبيره ويحاجيها..

ادهم: هسه تمام مابينه شي ..

هزت راسها ب اي.

ادهم : عفيه عليج هسه طلعي واجباتج ونزلي اقري ويه عمه نرمان.

مريم : اريدك انت تقريني.

ادهم : بابا راسي يموتني تقبلين ابوج يموت ما اكدر..

سيلين : اسم الله عليك الله ليكولها ..

رفع عينه باوعلي وسولفلي حاله بعيونه حسيته يريد يرجع يشكيلي مثل قبل ونكعد نحط المرهم على جروحنه ونطيبها ...

جر نفس قوي وكال ...

ادهم : شوكت ترجعين لبيتج..

سيلين : ماعرف لا اريد ارجع ولا اريد ابقة وحايره..

ادهم : ما مرتاحه مو ؟؟

سكتت ودنكت راسي..

ادهم : ليش ما كتيلي فهد مهددج بينه جان تصرفت ليش حركتي نفسج وحركتيني وياج.

سيلين : عمو اول وتالي اني رأيي بيك نفسه ميتغير..

ادهم : اعرف بس على الاقل تختارين الشخص الصح.

سيلين : وسامر مابيه شي..

باوعلي ودنك على بنته عدل شعرها وهمس من بين شفايفه.

ادهم : الله يسعدج انه شريد قابل...

دنك على مريم شالها وطلع من المطبخ ماعرف شنو من شعور تولد عندي تمنيت اني مريم وهيج يشيلني واحضنه بس ماعرف شعوري بوقتها جان حب عشق مدفون لو حب ابوي واريد حنانه مثل مريم..

نفضت الافكار من راسي ورجعت لغرفتنه القديمه علمود اخذ ملابسي واخابر سامر حتى ارجع دخلت لكيتها كاعد تبجي بعدها ، مدرت الها بال لميت ملابسي وخليتهن بالجنطه وبدلت اجتي وكفت يمي تبجي وتتوسل ..

ايفين : عليج الله سامحيني والله متدرين شنو الصار.

سيلين : اذا متردين تخسريني احجي متحجين انسيني وبعمرج متلكيني بعد..

ايفين : عليج الله لتقسين عليه والله اني مو بهذا السوء الوصفه فهد الكم والله انجبرت ..

سيلين : لو خال سجينه على ركبتج وذابحج ولا تدعين ادعاء كاذب وتمثلين كدام زلم ثنين معتدي عليج وفوك هذا دخلتينه مراكز ولج عذرج اقبح من ذنبج لو مهما يكون سرج جبير وخطر ما انطيج الحق هيج تتصرفين نزلتي من عيني ومن عين الكل وخسرتي ايمن الذهب الصافي جان هسه عيشج احسن عيشه ودللج بس انتي مو وجه خير..

ايفين : انتي مو عفتي عمو لان كلبج ما راده..

سيلين : وشكد فرق بين الثرى والثريا شجاب لجاب ههههه فهد تقارنيه بعمو تره جريمه ورغم هذا اني تنازلت عن حياتي هنا بسببج ومن وراج قبلت..

ايفين : واني الف مره كتلج كافي تضحين علمودي انتي عاجبج تعيشين الالم اني شكو..

سيلين : والله صح اني غبيه بس شيفيد الحجي بعد

ايفين : لتعوفيني وحدي الله يخليج

سيلين : وخري من وجهي واليوم اخر يوم تشوفيني بيه.

ايفين : صدك تحجين ...

ضلت تجر بيدي نترتها منها وطلعت لكيت عمو واكف منتضرني..

ادهم : اوصلج..

سيلين : لا هسه اخابر سامر..

ادهم : ماشي ....

عافني ونزل طعلت موبايلي واتصلت بيه فوك الخمس مرات يلا جاوب ومبين ضايج..

سيلين : هلو شلونك.

سامر : همزين يابه تذكرتي عندج رجال وتسألين عنه..

سيلين : كتلك اسبوع تطيب اختي وارجع..

سامر : المهم شرايده هسه ..

سيلين : تعال اخذني.

سامر : ساعه واجي هسه نايم..

سيلين : تعال اخذني وبعدين نام ..

سامر : من اكعد باي.

سيلين: الله وياك ..

سديته ونزلت جوة طلعت كعدت بره بالطرمه خليت راسي بين ايدي واهز برجلي انتبهت واحد كعد رفعت راسي عمو..

كعدت عدل باوعتله وهمست...

سيلين : ايمن وين؟

ادهم : ما ادري..

سيلين : شلون راح تعيشون هنا سوه.

ادهم : باجر ادور بيت ونطلع انه وايمن.

سيلين : ومريم شلون..

ادهم : شي مؤقت على ما ارتب اموري واسافر استقر كم شهر واسحب ايمن ...

من كال هيج اختنكت الدنيا صغرت بعيني اريد اتنفس ما اكدر..

سيلين : تعوفنه يعني ..

رفع راسه باوعلي ورجع دنك.

تنهد وكال.

ادهم : اريد امشي وره مصلحتي كافي تعبت.

سيلين : مو كلت اعالج فهد

ادهم : اكو دكاتره هواي بس احدد شخصيته بالمضبوط ادزه لدكتور صديقي يعالجه لان يحتاج علاج عقاقير مو بس كلام ...

سيلين : وشكد تضل بره...

ادهم : ما ارجع بعد بس ارتب وضع و وظيفتي اروح...

غصيت بريكي من بلعته كمت اكح همس..

ادهم : اسم الله اجيبلج مي..

سيلين : لا ماريد شكر..

ادهم : عفوا..

ضلينه كاعدين وصافنين كل واحد بدنيا اتصل سامر..

سيلين : هذا سامر اجه

ادهم : ها يعني تروحين..

سيلين: اي اروح هم يلا صارلي اسبوع ..

ادهم : حقج بيتج اهم وياريت هديتيه على شي يسوه.

سيلين : اعتذر نيابه عني و عنها اذيناك هوواي..

ادهم : اذيتج ما مقصوده مسامحج عليها..

ابتسمت وطلعت لكيت سامر بالباب سلمت وصعدت اول ما شافني كال.

سامر : لازم كشفتي ملاعيب اختج..

شهكت ودرت وجهي عليه

سيلين : شنو شلون عرفت وشمدرك.

سامر : مبين من وجهك راح تموتين .

سيلين : يعني انت تعرف ايفين .

قاطعني..

سامر : متزوجه فهد..

الفصل الرابع والأربعون من هنا