رواية اغفري لي الفصل الرابع والأربعون بقلم أوتار حزينة
ارشد
شفت الكلام اشتد وصارت هوسه حجيت
واني مصمم على كل جلمه اكولها
«،، يابه يمه من الاخير اني رايد هالبنيه واي
واحد يرشها بمي ارشه بدم
حتى لو جانو اهلها
امي صاحت بيه
««،واني اكلك اتبره منك اذا اخذت هاي
المطلگه
«،،، مو اني مصخم يمه وعندي جهال ااثنين
نسيتي هالشي لو ناسيه اني شنوو
صحت بغضب ابويه رد بعصبيه
«،،،اي صيح انت وامك وشيلو الاحترام فد
مره
سكتت انهد من غضبي امي رادت تحجي
صاح بيها
«،،،انتي اااش ولا كلمه ،،،،شورج
مااريده ولا اريدج تخلين روحج
بهل السالفه
««،ها هيج الحجي ابو ارشد
«««اي وكومي منا وخليني وحدي وي
ابني
«،،مالي لزوم اني بهل البيت
«،،لا مالج لزوم اذا ظليتي بهل العقل والتفكير
نتر بيها كامت من يمنا صايره فد مره وطلعت
ابويه كعد وكال
«،«اكعد وفهمني سالفتك وي هالبنيه
كعدت وحجيت اله قصتها،،،،وشسويت
الها من رجعت بيتها سمع كل الكلام
رد
«،،انت غلطت من ضميت عليه هالسوالف
«،،اعرف يابه بس
اشر بايده سكتت كمل
«،،ابني اني ماعندي اعتراض على زواجك منها
ولا اريد ادخل باختيارك لشريكه
حياتك اذا عرفت هي
خوش بنيه وبنت
خوش ناس
بس
كال هالكلام وكمل
«،،بس ياابني اهلها مدري شلونهم يعني ابوها
اجه هو واخوها يحجون بالفلوس
ويريدون يفصلونا احجي
ويا مايعرف يحجي
لا هو ولا ابنه
واحد يرفع واللخ يكبس لا احترموني
ولا احترمو الجليسه الكاعدين
«،،يابه اني راح اخذها الها مو اهلها
««،،،اعرف بس ذلو راح يصيرون نسايب النا
واذا الله رزقك منها ضنه اخوها راح
يصير خالهم،،، وانت عاد
عاقل وتعرف هيج
ناس ماينرفع
بيهم الراس
«،،اعرفهم كلش زين هم شنو وهي من زمان گاطعه
صلتها بيهم وماتروح الهم،،،، ولا هم يجوها
بس من تطلگت كامو يجوها مو حب بيها
لا طمع بالعدها
سكتت وكملت
«،،،يابه جنات تختلف عنهم كلش هي مو مثل طبعهم ولا مثل اخلاقهم
«،،هسه فرضا اذا كلت اي ووافقت منين نروح نخطبها من اهلها ذوله الي اجوي يهددون
ويريدون يفصلونا
«««لا يابه مو من عدهم اخطبها
«،،عجل منين نخطبها
«،،من رجل اختها هو من تطلكت تكفل بيها وصار
الها اهل وسند
«،،ابني شلون يصير نروح نخطبها من عنده هسه
لو يتيمه انكول اي بس هي عدها اهل
واذا سوينا هيج راح يحگونا جدام الناس
وتصير سالفه مو حلوه بحگنا على
فاتونا واحنا اهلها وراحو
خطبوها من النسيب
ولا هو راح يخلص ولا احنا واني
مو خايف من الحجي بس هاي الاصول
يابني
سكت وكمل
«،،وانت ماقصرت وياهم ياابني تريد بنتهم وضارب
اخوها ومشبعه بوكسات واذا رضت
هي مدري هم شلون راح
يرضون
«،،غصب ماعليهم يرضون
جاوبت بغضب رد بهدؤ
«،،مو هيج الحجي ابني شنو غصب عصابه احنا
نهدد بالعالم حتى ناخذ بناتهم
مارديت كمل مركز بعيونه عليه
«،،اعرفك يول هاويها من زمان وتريدها
بس حكم عقلك ابني انت شيخ ولازم تخلي
عقلك الي يمشيك مو گلبك
ذبيت حسره وجاوبته
«،،تعبان يابه واشوف راحتي يمها
رد بقهر
،،حكك ابني الصار بيك مو شويه بس ارجع اكلك
عوفني اني اتصرف وياهم
«،،تمام شيخ
،،،اركد ابني وهي اذا الك ماتصير لغيرك
واسال الله يجعلها من نصيبك
حتى تعوضك عن الصار
بيك
غاده
العصر سويت جاي وحضرت العصريه
رانيه طبت شايله سله كليجه
كالت
«،،هلو حب
«،،هلو بطه
«،،هههه والله صدك صرت بطه واني توني
طبيت بالخامس
«،،ههه من تصيرين بالتاسع راح تصيرين
فقمه
«،،ههه شفتج هيج صرتي بعلوش
««،اكلج خلي نبطل تنمر لان الحال من بعضه
جاوبتها اضحك وكملت
«،،هاي من خاله نعمه موو
«،،اي سوتلي هي والبنات ودزتلج حصتج
«،،عاشو والله عاشو وين ام اللقم لكيتها
يمه فدوه شلون تخبل
«،،هاي شغل اميره
«،،تخبل مثلها
«،،، ولج تموت على شغل الكليجه لو يوميا
تسوي ماتضوج ولا دكول لا
«،،معدله اموره
«،اي بس كل حلو بي لوله
جاوبتني بحسره كلت
«،،امر ربج رانيه
«،،اعرف ومو معترضه بس والله تقهرني
ياغاده يعني من تحجي وادكول
انه هم راح اصير عروسه
حالي من حالج وحال
رغد اكوم ابجي
عيوني غوركت كملت
««ومن صرت حامل ورغد هم كالت من ازوج
هم راح اصير ام
دمعتي نزلت هي كامت تبجي عليها تردد
«،،والله من تحجي هيج تحرگ افادي
انه وامي
«««اسكتي رانيه مو زين عليج القهر
بيبي طبت شافتها تبجي سالت
«،،هاي شبيج يمه تبجين
«،،تبجي على اميره
جاوبت كعدت يمها وكالت
««اسم الله وشبيها اميره حتى تبجي
عليها
«««يعني من وره وضعها تبجي عليها
بيبي ذبت حسره وكالت
«،لاتبجين يمه هاي من اهل الله وعدها
بخت يمه
«،اعرف بس تقهرني من اسمعنها تريد
تزوج ويصير عدها جهال حالها
من حالنا انه ورغد
«،،من بعد عمر طويل ربج راح يعوضها
عن ابتلائه ويسويلها
الي بنفسها والله يجعلها
شفيعه الكم والنا
«،امين حبوبه
جاوبتها بخنگه رحت جبتلها مي وانطيتها
كلت
«،،هاج اشربي وكومي غسلي وجهج واستري
علينا مو زين عليج
القهر
هزت راسها شربت مي وكامت من يمنا
راحت للحمام بيبي كالت
بقهر
«،،،شنسوي امر ربج علينا ومانكدر نعترض
علي نكول الف الحمد لله والشكر
شايله روحها وتفتهم من
واحد يعلمها
سكتت وكملت
«،،العمر جاي يمشي بسرعه واعرف ابني
شايل همها وتعبان من وراها
رانيه رجعت كلت
«،،تعالي اكعدي خلي نصب جاي
ونتعصر وناكل كليجه من ايده امورتي
الحلوه
كعدت وكالت من صبيت الجاي
«،،حبوبه امي راح تجي عليج بليل
تريد تشورج بزواج موسى
«««هلا بيها كالت اليه هيج سالفه من زمان
«،،المن تريد تاخذله
«،،بنت خالتي امنه
«،،ها شايفتها موو
«،«اي ولج سجى الجبيره
«،،يا والله حلوه وتخبل
«،،اي هو رايدها وميت عليها
«،،،بنات امنه خوش بنات ومتربايات خوش
تربيه
بيبي حجت وكملت
«،،يربح الي ياخذ منهن
«،،اي والله حبوبه ابويه هم كال هالكلام
ردت وكملت
«،،وكال بس يگبر علي شويه اخذله
ساره
«،،العب راح يركص علوش من فرحته
«،،ههه اي ولج بس سمع كام يبتسم وي
روحه ويصفن
«،شكو بيها يمه الزواج ستر للزلمه والحرمه
حمزه طب سلم وكعد يمها
سالت
«،،ها اشوفك رجعت من وكت
«،،تعبت ورجعت
فزيت ورحت علي اردد
«،«يمه اسم الله شبيك راسك يوجعك
مصخن
لزمت كصته ابتسم ورد
«،،بويه تعب مو فلاونزه
جريته من جتفه وكلت
«،،كوم ارتاح
«،،لا صبيلي جاي
«،،مو تعبان كوم تمدد وارتاح
««ولج صبيلي جاي كتلج تعب ماگلت
راح اموت
«،،سمعتي بيبي شحجه
«،،اسم الله عليك يمه ليش هالحجي
«،«ماايكدر الا يقهرني
حجيت هيج وكعدت زعلانه منه
«،،وجان تغندب عليه
رانيه ردت بضحك
«««علت عليها يبن العم
««،وجان اللخ تطبك وياها
ههه
خربت ضحك ابتسمت الوجه يضحك ويباوع
عليه كلت
«،،تره انقهر من تحجي هيج
«،،بعد مايحجي ولا يقهرج
بيبي جاوبت مبتسمه هو كال
««،،جايج بويه تره خلصت ماعون الكليجه
«،،الف عافيه اكو بعد
رانيه جاوبته كمت صبيتله جاي
سال
«،علوش وين
«،نايم
«،،جدي كاعد بالمجلس
««اي
كام وكال
«،،جيبي صينيه اروحن يمه هو شرب
جاي
«،،اي يمه سوتله غاده وودته اله
اخذ الجاي مالته وراح يمه بيبي حجت
«،،روحه معلگه بي
«،،چا شلون حبوبه مو هو الي رباه
وسوه زلمه
رانيه ردت كلت
«،،هو يحبه كلش
،،اي يمه وهم جدج يحبه ويشوف ابوه
بي
كالت هالكلام بقهر وكملت
«،،الله يرحمهم برحمته الواسعه ويجمعني
وياهم بجنات الخلد
«،،هاي شبيكم اليوم حمزه يحجي
بالموت وانتي هم صرتي ويا
حجيت بضوجه وعيوني غورگت ابتسمت
وردت
«،،ها اشوفن انه هم قهرتج
«،بيبي رحمه لاهلج لاتحجين هيج
تره والله اني اختنك من
تحجون بهل
السيره
«،،اسم الله عليج يمه وبعد مااحجي مادام
تضوجين من هالسالفه
«،اي خلينا نحجي بعرس موسى
ونشوف شنسوي اله
«««والله امي كالت كله راح اخلي بايدج
انتي لان عجبها عرس رغد
وعرس عمه رقيه
«،صدك رانيه بيبي شوكت نعزمها هي
وعمو زاهد
«،هالخميس جدج كال اعزموها هي
ويا
««،خوش بس يعني خما يعزم العگارب
بيبي ردت
«،،لا يمه كتله بس ولدي يجون مااريدن
ذيجن الي ماوكفن الها ولا
اجني باركن وكال
لااريدهن ولا
اريد بزرهن الي ما من وراه
غير بس المغثه
والطلايب
ابتسمت رانيه كالت
«،،خفه وراحه النا
«««اي والله
رديت فرحانه بليل كعدت اني وحمزه
بغرفتنا علوش بحظني يرضع اريد احجي
بسالفه زهره بس ترددت خايفه
من رده فعله
بس معاذ لح عليه واتصل اكثر من مره
وكلي احجي ويا لان زهره وضعها
مو تمام وبس تبجي
كلت
«،،حمزه اريد احجي وياك بموضوع
«،،اي احجي اسمعج
«،،بس بداعه علوش مااريدك تضوج
ولا تصير عصبي
صفن عليه وسال
«،،خير غاده شنهي هالموضوع الي
راح اصيرن عصبي من وراه
«،،هو يعني يخص زهره
بس سمع اسمها دار وجهه مني وكال
«،،اسمها لاتجيبي بهل البيت هي ماتت
من سوت السوته
«،،حمزه هي تعرف شسوت وندمت والله
وتريد بس تسامحها
وتسمع صوتك
«««الما اسامح ولج هاي الي شردت ونزلت
راسنا بالطين هاي الي ربيتها وتحزمت الها ووكفت بوجه الكل من وراها حتى تكمل دراسه
وتالي سوت السوته وخلتني
بصخام الوجه جدام الكل
جاوبني باعصاب وكمل
««،،انتي ماسألتي روحج ليش ولد عمي
تفرعنوا عليه وكامو يخلون راسهم براسي
ويوكفون بعيوني
سكت ووجهه صار دم كال
«،،من وراها لهاي الساقطه هم انگلبو عليه
وصاروا جلاب لان شافو جلمتي
مامشت عليها وهي
حرمه وانه
الربيتها
«،،هي تندمت وبس تبجي عليك
«««لو بجت دم لو ماتت جدام عيوني ماراح
اسامحها طول عمري ولا راح
ابريها ذمتي
««حمزه لاتصير قاسي تره هاي بنت عمك
ويتيمه
««ولج غااده لادافعين عليها تره هااي ظلمتج
وظلمتني وياج نسيتي ولج
شسويت بيج من وراها
اذيتج ولج اغتصبتج لوو ميته
جووه اايدي ااانه شرااح
ااكولن لله وو
سكت وصاح بصوت مكتوم
«،،اااخ يابويه
نفض دشداشته وكام من يمي
يروح ويجي بالغرفه كمل
بوجه مطعون
وبصوت
مخنوك
«،عدالج نسيت السويته بيج لا والله
وروح ابويه مانسيت لحد هسه اذكر شسويت
بيج وشلون خليتج تموتين جوه
ايدي
«،،اني نسيت كلشي من حبيتك
«،،وااانه مو ناسي
نتر بغضب وكمل
«،،مو ناسي ولج لان انه الي ظلمت ومن وراها
ظلمتج هي الي خلتني اتخبل
واسوي ااسويته ولا
انه اخافن ربي
وعمري ماجنت اتصور اسوي
السويته
خفت علي كلش لان شفته صار فد مره
خليت علوش على الجربايه ورحت علي لزمته
من ايده وكلت
«،،بس اهدأ ولا تصير عصبي
«،،غاده لاتجبين سيرتها بهل البيت ولا
جدامي هاي ماتت بالنسبه اليه لا اريدن
اشوفها ولا اريدن اسمع اي
شي عنها
«،،هاهيه حمزه بعد مااحجي ولا
اجيب سيرتها بس امشي
اكعد
سحب روحه مني وراح كعد صفنت علي بعدين
رحت كعدت يمه تسمعه يذب حسره
وحده وره اللخ
كال
«،،انه ولج انه ابو جمره انكسر ومن وره
منو من وراج انتي يلي وكفت
بوجه الكل من وراج
سكت وكمل بخنكه من باوع عليه
««انه غاده الي جانت جلمتي دستور عند ولد
عمي وعمامي نفسهم تروح من
وره حرمه
انقهرت علي كلش وتمنيت ماحجيت
ولا جبت سيرتها كدامه
كمل
«،،لو ميته وي اهلي واهلها ولا العار
الجابته النا
جان كلامه يوجع بس صح لان الي تنهزم
من اهلها عمرها ماراح تعيش مرتاحه وي الي اخذته وفضلته على اهلها شنو
ذنب ابوها وامها بعد التربيه
والتعب ترده الهم
بفضيحه جبيره
تكسر الظهر
اي وحده مثل قصه زهره لازم تخلي الله
بعيونها وتخاف على اهلها قبل
لاتخاف على روحها
لان سمعتها من
سمعتهم
زين اخويه طلع خوش واحد منو يكول
غيره مايطلع جلب ويكوم يتاجر
بيها وبشرفها
ويا ما سمعن هيج سوالف صارت بنات
انضحك عليهن باسم الحب وانهزمن
وضاعن بهل الدنيا واليدضيعهن هن نفسهن
من باعن اهلهن وركضن وره الحب
وسوالفه
يمامه
لا نمت ولا غفت عيوني لان شفته
شصار بي من ورايه وسمعته شحجه واكفه
اسوي ريوك واحجي وي
روحي بقهر
عفت بنات العالم كلها وحبيتني اليه
اني الي مااعرف احب ولا احس
عندي گلب
عيوني غوركت وكملت
ليش اني مو عندك بنت عم تخبل من حلاتها
ومبين هي تحبك وتموت عليك
روح اخذها الها شسوي
بيه وانت تعرف
بيه ارمله
وعندي بنيه وفوكاها خدامه
اشتغل عدكم
«،،،ريوكج بنتي حتى اروح اجيبلكم
اللحم والسمج
سمعت صوت عمو كلت
«،،،اي عمو حضرت كلشي بس
اطك البيض
«،،،تمام
كعد الحجيه اجت وكالت
«،«يمه هم سوي ريوك لمهيب كعد قبل شويه
عمو كام وكال
«،،اروح اشوفه شلونه اليوم
«،،كال زين
جاوبته بتعب مشى من يمنا وراح علي
حجت
«،،هالولد راح يموتني انت ماتكدر ليش طلعت
وي الولد واجيتنا متخربط
مارديت خليت ماعون البيض كبالها
وسويت اللخ للحجي سالت
«،،ام ياسين يم ابنها
«،،اي كاعد تبدل اله وتريكه
هزت راسها عمو رجع خليت الماعون
كدامه كال
«،،سووله لكمه خلي ياكل هذا كام يدوخ
من وره قله الاكل لان شفته صارله جم يوم
اكله مو شي
«،،راح نشويله لحم من اجيبه من الگصاب
«،اي سوو
جهزت اله صينيه شلتها ومشيت بتردد اله جان
الباب مفتوح هو متمدد ومغمض
عيونه طبيت وكلت
«،،،،الريوك
فتح وباوع عليه جان مبين علي تعبان
وماله خلك سحب روحه لفوك وكعد
كال
«،،رجعي مالي نفس اكل شي
ترددت بعدين كلت
«،،انت ليش هيج كاعد تسوي بروحك
صفن عليه ورد بخنكه
«،وتساليني ولج ليش هيج
كاعد اسوي بروحي
رديت بتوسل
«،،انت مو كلت انسي السمعتي مني اني
نسيت انت ليش ماجاي
تنسى
«،،،لان اغبر وطايح حظ واموت بشلعان الگلب
جاوبني بنتره وكمل
«،،،،شجابج عليه اجيتي حتى تعذبيني
وتشلعين گلبي
«،،،،والله اروح منا وبعد مااشوفك
وجهي
خليت الصينيه على الطبله وانداريت
كال
«،،لو بسابع ارض تروحين اجيبج ولج
باوعت اله كام،،،، يرجف من
غضبه والوجه صار دم
هدد
«،،حنين ديربالج تروحين منا اياج تختفين من
جدام عيوني والله اذبحج
اموتج اذا سويتها
«،،انت شبيك لخاطر الله تره الف وحده
تتمناك مو كلت اشمر قندرتي
توكع على الف
بنيه
«،،واني مااريد الف اريدج انتي وبس
عيوني غوركت وجاوبته
«،،ليش هالعذاب ليش جاي تعذب روحك
بحب وحده ماراح تكدر تحبك
وجهه انطعن كملت
««ارحم روحك وارحمني وخليني اعيش
واعيش بنتي وروح اخذ بنت
عمك تره تحبك وميته
عليك
رد جاز على سنونه
«،،ولج اانتي شنو ثلج ماعندج احساس
«،اي اني ماعندي احساس ولا عندي گلب
عرفت هسه اني شنو فالله
يخليك جوز مني وشوف
روحك وي
غيري
فزيت من ضرب الطبله بالعگاز
ووكع الصينيه،،،،حجه بصوت مكتوم
«،،خررب بيج وخرب بگلبي الي حبج
دموعي نزلت عمو طب سال
«،،هاي شكو شصاير
طلعت من يمهم ابجي امه اجت تسال
«،،شصاير يمه
ماجاوبت ،،،،، رحت لغرفتي
كعدت اشهك بالبجي خايفه لا يحجي بس
ابوه اجه وره
مشوار وكال
«،،احسبيها عليه بنتي ولاتزعلين منه
هذا اعصابه تعبانه
من الي بي
جاوبته بصعوبه
«،،مو زعلانه عمو
ذب حسره وكمل
«،،كومي يابه غسلي وجهج وتريكي ولاتظلين
تبجين
مسحت دموعي امه اجت مقهوره
وكالت
،،هالولد راح يموتني مااعرف شوكت يبطل
هالعصبيه وهالخبال
،،عوفي حجيه تره ابنج مو متعلم يكعد
جثير بالبيت وجاي يشوفها
صعبه علي الكعده
«،،اي اعرف تعلمني بي
جاوبته وكملت
«،،اعذرينا يمه هذا طلع حركه گلبه بيج
من الصبح وانتي لا ذنب
ولا صوج
«««ماصار شي خاله
جاوبت عمو كال
«،،اروح اجيب اللحم والسمج
«،،روح الله وياك
طلع كالت
«،،امشي تريكي مادام بنتج نايمه
«،اي هسه
خاله طبت كالت الها
«،،ام ياسين روحي نظفي السواه هالمخبل
صفنت عليها وسالت
«،خير حجيه شسوه مهيب
«،ماتعرفي وتعرفين سوالفه طگت عنده وطلع
قهره بهل البنيه المسكينه
باوعت عليه ماحجت شي هزت
راسها وراحت لغرفته
تريكت بدون نفس والبيت جاان نظيف بس
مسحته ومسحت الاخشاب بعدين
وكفت اسوي دولمه وي
خاله
يمامه بحظن الحجيه تحجي وياها وتغنيلها
سوينا جدر للغده وضمينا
اثنين على جيه ولدها
بنتها المفروض باجر تجي الصبح والولد
عگبه خاله سالت
«،،حجيه كلهم راح يجون
«،،اي منير ومرته وبناته وولده ومفيد
هم راح تجي مرته وابنه وبنته
«،،خوش لمه راح تصير
«،،،اسكتي ام ياسين فرحانه كلش بجيتهم
صارلي اربع سنين مو شايفتهم وگلبي
صاير نار عليهم
«،،الله يساعدج والله فراك الولد صعب وهم
بعيدين كلش عليكم لا بيهم
يجون كل شهر ولا
يكدرون من وره
المسافه
«،،اي هنا هنا امريكا يعبرون محيط يله يجونا
«،،الله يحفظهم ويجونا بالسلامه
««،امين يارب
هسه ولدهم كبرو هم وبناتهم
«،،اي صلاوات ولد منير باسل وآسر صارو شباب
وبنته ماريا هم كبرت وصارت مره وهم
مفيد ابنه رواد كبر هو وبنته ياره
عفتهن يحجن وطلعت اغسل بالكراج كملته فتحت
الباب انظف البره حارث طلع سلم
رديت السلام سال
«،،،شلون مهيب اليوم
«،،الحمد لله احسن
ردت اطب كال
«،،عبالي اجي اشوفه
«،،اي هسه انطي خبر لخاله
طبيت سديت المي ورحت للمطبخ كلت
«،«خاله حارث بره ويريد يشوف مهيب
«««اي هلا بي ام ياسين اطلعي علي
«««اي حجيه
خاله طلعت علي طب وياها من باب الاستقبال
وراح لغرفته طلعت اكمل البره. شلت الوصخ ذبيته
بالحاويه وغسلت الرصيف وسگيت
السنادين سياره
عمو اجت وصل نزل
وكال مبتسم
«،،عاشت ايدج مطلعه باب الحوش
ورد
«،،وايدك عمو
«،،تعالي خلي نزل اللحم جبت معلاك اشوو منه
لمهيب هسه وبالعشه وضمي الباقي للولد ومنى
من يجون لان جبت اربعه
«،،اي عمو
رجعت سديت المي وساعدته بالمسواك
الحجيه جانت ماكو بالمطبخ سمعتها تحجي
وي حارث بغرفه ابنها سال
«،،منو يمنا
«،«حارث اجه يشوف مهيب
خاله جاوبته كال
«««هلا بي اروح اغسل واكعد يمه
حجه هيج ومشى من يمنا كالت
«،«يمه حنين هاي المجمده بعد ماتگفي انترست
غراض خلي نخلي المسواك
الي جابه الحجي
بالمجمده الي جوه
الدرج
«،،اي خاله
شلنا المسواك اني وياها رحنا ليم الدرج اتجنب
اباوع لغرفته خلينا بالمجمده
كلت
«،«خاله عمو كال اشوو معلاك بالعشه
«،،اي هم گلي بس خلي اسوي لمهيب هسه
لان كال اشوو اله بالغده
«،،تمام
رجعنا للمطبخ الولد طلع من يمنا من اذن عمو
جلب بي على الغده ماقبل
هي شوت معلاك بره بالمنقله واني سويت
زلاطه كملت كلشي عمو طب
كال
«،«هاي يابه جهز الغده
«««اي بس اگلب الدولمه بالصينيه
«،،لا جيبي اني اگلبها مثل الشيف بوراك
حجها بضحك انطيته الصينيه شال
الجدر وگال
«،،يالله يكون ماافشل جدامج ام يمامه
گلبها وكال من شاف الضلوع والباگله
««عاشت ايدج انتي وام ياسين المنظر
يكول هالدولمه طعمها راح يطلع
فد شي
خاله طبت شايله المعلاك كال
«،،سوه اله صينيه وخلي ياكل لا هم يگع
علينا
«،،اي هسه حجي حنين تسويله
الحجيه اجت وكالت
«،يمه اجت الوطني روحي غطي بنتج خطيه
خاف تستبرد
««اي خاله
مشيت وطلعت من يمهم غطيت يمامه
ورجعت للمطبخ خاله محضره
صينته واخذتها اله
«،،اكعدي بنتي وتغدي
عمو حجه كعدت شال لحمه خلاها كدامي
وكال
««اكلي هاي شرح ومابيها شحم
«،تسلم عمو
««يعرفج ماتحبين الشحم
الحجيه حجت مبتسمه كلت
«««اي مااحبه
خاله رجعت كعدت يمي اكل بدون واهس
لان بالي جان مشغول بي ومااعرف
اذا ظل هيج يلح
شلون راح اتصرف ويا
اعرفه اعصاب ومخبل وخفت لا فد يوم
يسوي شي او يحجي كلام
يخليني اخسر
اهله
جنات
عرفت من اختي ابويه ومهند رايحين لبيت
استاذ ارشد ومشتكين علي يم ابوه
والسالفه كبرت وصارت
بيها كعده شيوخ
عزلت روحي بغرفتي دمعتي بعيوني ومااريد
اشوف اي احد خجلانه من الصار
كدامه هو وابراهيم
عرفت ماراح اخلص من لسانهم من وره
السواه باخويه العار وصار من
اجت امي تعلل
بالصوت
«،،،هاا ولج طلعتي،،،،ضامه واحد جوه
ايدج وماتحجين ومنو طلع
ذاك الشيخ الي رادج
من زمان
مارديت رانيه انهدت بيها
«،،يمه عيب عليج هالحجي هاي بنتج الي
يمسها تره هم يمسج الج هم والرجال كلتي
رادها من زمان ومن عرف بيها
تطلكت رجع يريدها بس
هي مو قابله بي
«،،عليه هالسوالف ولج لو رافضته جان ماطب
عليها وكتل اخوجن من وراها
اختي ردت بعصبيه
«،،ااابنج يستاهل الي صار بي وحيل بي وابو زايد
واجعله بالكسر الي مايكوم
منه
«،،،اانجبي سااقطه دايحه تدعين على
اخوج كدامي
،،يممممه
عطت وكمت لحيلي كملت باعصاب
«،انتي شتريدين وليش جايه عليه
«،،تصيحين عليه ولج
«،،شتررريدي كولي احجي
عطت بيها بهستريا اختي اجت لزمتني
وخرت منها وتقدمت عليها
كملت
«،،،انتي شنو ماعندج مخافه الله بينا
بطنج هاااي
اشرت لبطنها وكملت
«،،جابت بس مهند واحنا نغوله جبيتنا من الملجأ
«،،انجبي ولك
«««لااااتغلطين واحترامي روحج
صحت بخبال وكملت
«،،اطلعي وروحي لابنج الغالي وبعد لاتجين
لا انتي ولا ابويه ولا اي احد
منكم اريده يطب بيتي
اااني متبريه منكم الى
يوم الدين لا انتو
اهلي ولا اريد
اعرفكم ولو اموت ماااريدكم
تجون بجنازتي ولا تمشون بيها
«،،وااني هم وياج
رانيه حجت هي صاحت
«««والله بس اطلع منا الا اخلي ابوجن يجي
ويكسر راسج انتي وياها
رديت
««روووحي كولي اله جنات ادكول اذا سوه الي براسه وفصل استاذ ارشد اني هم راح
اسوي شي يكسر ظهرج
انتي ويا بابنكم المدلل
«،،شتريدين تسوين ولج
«««هسه فورا اروح اشتكي علي وهااي اثاره
بعدها بوجهي وجسمي وعندي
شهود علي ويشهدون
اليه
تخبلت وكامت تصيح
«،«ولج تريدين تخلين اخوج بالسجن
«««اااي واليوم راح اشتكي والله اذا سويتو الي
براسكم الا اسويها واااني جنااات
اخذ حقي منه ااخذه
جرت عبايتها وطلعت تغلط عليه وتدعي
كعدت ارجف من اعصابي بجيت
بشهكه وادعي على روحي
بالموت لان تعبت
من الجاي
يصير بيه
ابراهيم عرف بالصار واجه بليل عليه وراد
يشوفني جنت خجلانه منه من
وره الصار ورحت اله
منزله راسي
سلمت كعدت اگباله اختي يمي سمعته ذب
حسره وكال
«،،،اني الي اريده منج ماتقهرين روحج من ورة بشر مايسوه لان انتي تعرفين اخلاق اخوج
وهالشي متوقعه منه من زمان
لان ابوج وامج بظهره
ومنطي عين وحجم
اكبر من حجمه
«،،اي والله هم الي خلوه يصير هيج
اختي ردت هو كمل
«،،، سمعت انتي شحجيتي وي امج
واكلج اني وياج بهل الشي لان اعرفهم ماراح يعوفون سالفه فصل شيخ
ارشد الا بهل الطريقه
رانيه ردت
«،،هي سوت زين من هددت امي بمهند
لان اعرفهم هسه جرو بوشهم
وخافو علي للافندي لاتروح
تشتكي علي وتذبه بالسجن
سكت وكال وره لحظه
«،،جنات انتي تعرفين اني شكد اعزج وحاسبج
اختي وحالج من حال خواتي
ومعزتج من معزتهن
عيوني غوركت نزلت دمعتي كمل
«««واكول امون عليج لان انتي هم حاسبتني اخوج وحزام ظهر الج
«،،والله انت هيج
جاوبته بدموع وكملت
«،اني ماانسى وكفاتك وياي ولا شلون لميتني
بيتك
«،،هذا الحجي مااريد اسمعه انتي مو غريبه
انتي اخت الغاليه ام يوسف
وخاله ولدي وكتلج
انتي بحسبه
خواتي وامون عليج واحجي وياج
كلام اتمنى تفكرين بي بعقلج مو بگلبج
سكت وكمل
«،،جنات الدنيا ماتوكف على احد ولا راح توكف
ولا انتي اول وحده عاشت تجربه زواج فاشله
ولا اخر وحده راح تمر بهل الشي
والحياه لازم تستمر
ولازم تشوفين حياتج
وي انسان شاريج
وبالغالي
«،اني
قاطعني وكال
«،اعرف الي بيج بس اسالج سؤال هو يستاهل
الكاعد تسوي بروحج
«،،لااا والله مايستاهل شوفه عايش حياته
واجه ولد ويجوز بعد فتره هم يجي اللخ
وهي شوفها دفنت روحها بالقهر من
وراه
سكت وطول بعدين رد
«،اي هو عايش حياته وراح يجي اللخ
«،شنووو
اختي صاحت
لميت قبضه ايدي بقوه وصفنت علي بجمود
جاوب
«،،شفته هو وياها وجان مبين عليها حامل
رانيه صاحت بيه
««،سمعتي ولج شفتي مرته حاامل وين لعد
الحجي والكلام مااريدها ومالي نفس بيها وانتي
بس بگلبي
سكتت وكملت بغضب
«،،طلع كله جذب بجذب واهلج العارات اكيد
يعرفون بهل الشي وساكتين حتى
يقبضون منه كم فلس
وطز بيج
ابراهيم حجه
«،،،جنات اني كتلج هالكلام حتى اشوفج هو
عايش حياته وصارت عنده عائله
واريدج انتي هم تفكرين
تسوين عائله حالج
من حاله وشيخ ارشد رغم معرفتي بي
من فتره قليله بس الي شفته
منه والي سمعته عليه
خلاني اتاكد هو راح يخاف الله بيج
ويصيرلج سند من
بعد الله
السمعته منه ذبحني وخلاني اكوم من يمهم
دموعي تنزل ماامسحها طلعت
سمعته كال
«،،عوفيها وحدها
طبيت غرفتي سديت الباب وهناك انهاريت
بالبجي اذكر كلامه وياي والوعود
الي طلعت كلها جذب
جان عايش حياته بالطول والعرض وراح
يصير عنده جاهل اللخ واني
بعدني ابجي علي
وعلى السواه
بيه
لطمت على وجهي وصحت
«،،حسبي الله عليك يكون حرگه گلبي
هاي تندار بگلبك وتضوك لوعه السويته بيه
بنفس الليله تخربطت وضغطي صعد
كلش وهو واختي اخذوني
للمستشفى ضربوني
ابرتين وخلو
مغذي
لا كدرت ادوام ولا كدرت اتحرك فصلت
عن الدنيا وغفيت مثل الميته
ارشد
مااتصلت بعد على جنات ولا حاولت اراسل
كلت خليها براحتها ترتاح من الصار
وبعدين احجي وياها من
ادوام
ثاني يوم تفاجأت من سمعت من ابويه اهلها
ماراح يكعدون ويفصلونا كلت
اكيد صاير شي
اتصلت عليها ماترد اخر شي جهازها انغلق
خابرت ست اسماء كالت اتصل
عليها هم مغلق وخابرت،،،،اختها كايله الها
المشاكل علگت فوك راسنا من وره
السويته
ثالث يوم انتظرتها تجي بس مااجت ولا دوامت
دزيت على ست اسماء
اريد افتهم
الصاير
اجت كلت
«،،تفضلي اكعدي
كعدت وعرفت منها هي مهددتهم
اذا سوه هيج تروح تشتكي على
اخوها كلت
«««لييش هيج سوت اني اريد اكعدهم
حتى اخذلها حگها منه لهذا
العار اخوها
«««لا استاذ خلي السالفه تبرد وتروح لان
وضعها مو تمام
فزيت من مچاني وكلت
«،شبيها ضغطها صعد
«،،اي وتخربطت واختها ورجلها اخذوها للمستشفى
سالت
،،،وهسه هي شلونها
««الحمد لله احسن وضغطها نزل
كعدت مخنوك وضايج كملت
«««اهلها قهروها كلش وهاي مو جديده عليها
وهم سمعت من ابو يوسف كلام قهرها
كلش
عكدت حواجبي سالت
«««شنو هالكلام الي كاله وقهرها
««حجه وياها على وضعها وكال الها انتي
جاي تخسرين عمرج من ورة واحد
مايستاهل لان شفته وي
مرته وراح يصير
عدهم طفل
ثاني
كلت بحسره
«««ياريت عاد تفهم هالشي وتقبل بيه
««والله لا اني مقصره ولا اختها ولا رجلها
كلنا كاعدين نحجي وياها ونقنع
بيها وندعي اليوم قبل
باجر تقبل بيك
الباب اندك كلت
«««تفضل
هي كامت ترخصت وطلعت كملت دوام هي
بالي ولا راحت منه ولو لحظه وصلت
بيتنا طبيت من المطبخ امي
كاعده يمها سلمت
ماردت السلام
مشيت كالت بغضب
«،ارشد اذا سويت الي براسك واخذت
هاي المطلكه اتبرى منك
«،،تبري يمه اني غيرها ماراح اخذ غيرها
جاوبت بروده وكملت مشي لحكتني تحجي
«،،ولك انت شنو ماعندك احساس ماتحس
مو رفضتك بدل المره مرتين شلون
ترجع الها
صعدت الدرج اسمعها تحجي ومادرت بال
طبيت غرفتي اخوتي الصغار
اجوي ورايه ساجد كال
«،،ماراح تفض وي امي
«،،شتريد تسوي خلي تسوي اصلا اني بطلت
اسمع كلامها من زمان
جاوبته باوع لماجد الي رد
«،«المفروض بعد الصار ماتحجي ولا تدخل
بزواج اي واحد من عدنا
شفت ساجد خزره ذبيت حسره وكعدت
اجه كعد يمي وكال
«««لاضوج ارشد هو مو قصده يذكرك
قاطعته
«،،جاي ترحون لمعهد التقويه
سكت بعدين رد
«««اي يوميا اني ويا نروح
«،«لاتضيعون وكت مابقى شي وتبدي السنه
وانت
اشرت لماجد وكملت
«،،شد حيلك هالسنه وطلع معدل لان فاتتك
سنه من وره التسخت مالتك وربعك
كلهم راحو كليات
««،لا اني مصمم اطلع طب بأذن الله هالسنه
«،«يالله وانت ولك هم بعدك تريد هندسه
««،اي عجل شلون ولا معماري اصير
مثل زها حديد
«،،والله عاد انت كدها لان شاطر مو مثل هذا
الثور اخوك
«،،هههه اني ثور ابو ادريس
ابتسمت وجاوبته
«،،لا حشه الثور زمال
اثنينهم خربو ضحك كلت
««خلي اكوم اسبح واشوف ولدي
«،،،نايمين بغرفه ريهام العصر شوفهم
هزيت راسي طلعو من يمي وسدو الباب
سبحت وكعدت جهازي بأيدي
كلت خلي اتصل
عليها
اتصلت جهازها مغلق ضجت كلش وشمرته
من ايدي لا بيه اروح اشوفها ولا بيه
اخابر ست اسماء لان خجلت الح عليها
بهل الشي
ذبيت حسره رجعت اخذته رجعت اتصلت
هم مغلق تمددت وخليته يمي
غمضت هي بين عيوني
اشوفها بذاك اليوم من اول مره شافتها عيوني
تضحك والخلقه تخبل اسرت
كلشي بيه وصرت
اسيرها
ورجعت اسير الها من القدر جابها ليمي
وخلاها جدام عيوني وكلت لو هل المره
مستحيل اتخلى عنج لو وكفت الدنيا
بوجهي مو بس امي
واهلج
غفيت كعدت العصر على صوت ابني ادريسيكعد
بيه تماره طبت تصيح
«،،بابا اده
«،،،هلا يبعد ابوج
كمت شلت ادريس ورحت شلتها بستهم
اثنيهم اختي طبت سالت
«،،ماتريد غده
«،،مااشتهي
«،،زين عصريه جاي كليجه موالح
«،«اي سوي وجيبي لذوله العصابه عصير
ونساتل
«««واني وياهم موو
سالت تضحك
ابتسمت وجاوبت
«««اي وانتي هم
«،اخذ تماره
«،،،لا خليها بحظني
اختي طلعت من يمي ادريس يحجي وياي
وبنتي ادير وجهي عليها هم تحجي
اثنينهم يريدوني بس
الهم
شغلت الهم البلازما وخليته على فلم كارتون
يحبو مال ريو ،،،،كعدو يتفرجون
علي واني صافن ومقهور
عليهم وعلى روحي
لان تعبت امثل القوه وادعي اني مابيه شي
وحياتي استمرت رغم الصار بيه
واني بداخلي نار لحد
هسه ماطفت
ورغم الصار بيه امي ماجازت مني بعدها
تريد تفرض رأيها عليه وتريد تمشي
كلامها عليه
اذكر من ردت جنات اول مره هم هيج شدت
وياي وكرهتني بالدنيا ورغم رفضها
مشيت عليها مرتين بس
اخ هي خذلتني وراحت
اخذت واحد كسر
ظهرها مثل مااني رحت هم وسمعت كلام
امي واخذت الي كسرت
ظهري
ذبيت حسره اريد ادخن بس ولدي يمي
ومااكدر احرك ناري بهل
الجگاره
اختي طبت شايله صينيه خلتها يمي
وكالت مبتسمه
«،،وهاي خوش عصريه لخوش اخ
«،،تسلمين ريهام
انطت لولدي العصير النستله
كعدت يمي ادحك للكارتون حجت
بضحك
«،،ولا يملون منه لريو
«،،اي يحبو
صفنت عليه سالت
«،بيك شي
«،،لا مااجت سلوى
لا كالت للجمعه يله تجي
«،«طولت هالمره
«،،اي ملتهيه بتحضيرات زواج معين هالشهر
راح ياخذ وتعرف هي الجنه الوحيده
لبيت عمو وماعدهم اخت توكف اله
ولا خاله تكدر تروح
وتجي
«،الله يساعدها ويفض زواجه على خير
«،،امين
كامت وكالت
««،،راح انزل لجوه اذا ضوجوك خابرني
هزيت راسي باي مشت تماره كامت واجت
عليها سالت
«««ها تروحين وياي
««،اي
ادريس هم كام وراد يروح وياها كالت
«،،راح اخذه وياي
تمام
اخذتهم وطلعوا من يمي الليل اجه وطلعت
كعدت وحدي بكافي اريد ابتعد
عن بيت اهلي وملحه
امي
رجعت متاخر الكل نايم كعدت بغرفتي
ادحك لاسمها بجهازي اتصلت
دك عدها فصل رجعت اتصلت الخط الخط انفتح
وحجت بصوت تعبان ومتغيرو
برسميه
«،«اهلا استاذ
«،هلا جنات
سكتت بعدين كالت
«،اني جاوبتك حتى اشكرك على السويته
اليه لان اسماء كالت اليه انت
رجعت البيت اليه وهم
اكلك سالفه الفصل فضيتها
وي اهلي وماراح
يكعدون وياكم
ولا يريدون منكم شي
«،ليش سويتي هيج يولي جان خليتنا نكعد
وياهم حتى اخذلج حگج
منهم
ماردت وطولت بعدين كالت
بخنكه
«««انت شفت اهلي مو شفتهم هم شنو
من بشر وعرفت اخلاقهم كلش زين
اختنگت وكملت
«،«هم السبب القوي الي يخليني من بعد الصار
بيه مااقبل بيك
«،،واني شعليه باهلج اني ماخذج الج
قاطعتني
««،ااسمعني الله يخليك وافهم اني اخجل منهم
وهم يخجلون اكبر راس مو عاد انتو
الشيوخ الي گل الدنيا
تعرفكم وتحلف
براسكم
«««جنات ارجع اكلج اني ماخذج الج مو الهم
ومايهمني انتي بنت منو او اهلج
منو الي يهمني بس
انتي
««بس اني يهمني لان اعرفهم ماراح يعوفني
بحالي
كامت تبجي وحرگتني حرگ جاوبت
«««ولج لاتبجين وتحرگين دمي والله لو مو اهلج
لو اكبر راس يندك بيج الا اخلي
طلقه براسه واسكنه
الگبور
««شفت هو هذا الخايفه منه
ردت وشهكت كملت بصعوبه
««،اعرف راح اجيبلك المشاكل بس اقبل بيك
اعرف راح ينزلون راسي يمك ويم اهلك من
وره سوالفهم ومشاكلهم
«،،انتي ماتعرفيني زين
جاوبت وكملت
«،يولي اني شيخ ارشد بجلمه وحده اوكفهم
عند حدهم واخليهم يفكرون الف
مره يله يغثوج بجلمه
او فعل
سكتت كملت
«««جنات اني مااحتاج ارفع سلاحي بوجه اهلج
او اي احد ثانيه يگرب الج وشفتي
انتي هالشي رجعت بيتج الج
ولا سمعتي اليه
حس ولا صوت ولا اصلا عرفتي
اني هو الي رجع الج بيتج
الا من اسماء
ماردت كلت
«،،يبنت الناس اقبلي بيه والله مايهمني اي
احد بس انتي انتي وبس الي
يهمني امرها
«،،صعبه
«،،ليش يايابه صعبه ليش،،،بس فهميني
انطيني سبب لرفضج غير وضعج واهلج
«،،خايفه لا هم انت تقهرني
«،،ولج المن اقهر اكو واحد يقهر روحه
جنات فتحي عيونج اني ردتج قبله وذبحت
روحي عليج بس ااانتي واااخ منج
رفضتني واخذتي اله وحركتي
گلبي
رديت وذبيت حسره كملت
«،،لو غيري والله مايرجع عليج ويسوي السواه
بس ااخ من گلبي بعده يحبج ويريدج
بعدني يولي اموت بيج واريدج
اليه اريد اصبح
بوجهج وامسي
علي
ماردت بس اسمعها تبجي كلت
«،،ولج كولي اي والله ماراح اخليج تندمين
وغلاتج بگلبي ماراح يضيمج ضيم
وخشمي يشتم الهوه
«،،اريد اكول اي بس ماااكدر
كملت بشهكه
«««ااسفه واتمنى تلكي الي تحبك من گل كلبها
ردت احجي سدت الخط صحت بصوت
مكتوم اهز بجهازي بغضب
«،،راااح توازيني على خطفج ولج
توازيني اخذج بالغصب
وراح اااسويها
والله
شكرا لزيارتكم عالم روايات سكيرهوم
