رواية ناديه الفصل الخامس والأربعون بقلم انين الليل
ناديه
تره انا مو شريره لكن الناس گوه تقسي گلبي حتى من صورت لمى وميثاق چان ابدي اسمع منهم او
اشوف تصرف يدل على الندم والاعتراف بان همه غلطو بحقي او راح ايتركوني بحالي حتى
ممكن اراجع نفسي واحاسبها قبل ان اتصرف بحقهم لكن همه اتمادو حالهم حال افراح وهديل
وقبلهم مياده الي هسه جاي ندفع انا واختي ثمن اخطاءها
لمى لمن اخذت ميثاق بمجرد ما عرفت من هديل قصة مياده يعني چانت تمشي وياي وتسالني عنه
وتمثل عليه الصداقه لكن چانت تحفر جواي حتى تاخذه مني بسبب الغيره
اي لمى تغار مني لان ميثاق اختار وحده فقيره مثلي وتركها هيه صدكوني ما چنت اعرف بيها تغار چنت اشوفها
صديقه مقربه وهيه بوقتها ما ناقصها شي جمال وشياكه وجنت من اشوف ميثاق هيه وياي وبمجرد ما سمعت من
هديل راسا رمت شياكها على ميثاق وعافني وراح الها وهو فرحان بحسبها ونسبها واخلاق اهلها
لكن بمجرد ما شافت واحد احلى واغنى منه ارتمت باحضانه وهيه مخطوبه يعني تلعب ع الحبلين
اما ميثاق فما يقل حقاره من لمى لان هو عمره ما كان رجل ميثاق چان مجرد ذكر لا اكثر
وهديل كل الي انا بي والي حصل الي بالكليه ونظرات الاحتقار من بعض الطلاب والطالبات كله من جوه
راسها لذلك قررت اتصرف وياهم بقانونهم الي فرضو عليه وهو قانون انو انا مو ناديه لا انا بت مياده
من سمعت من فاطمه الكلام الي حاچيته عليه وگدام الطلاب قررت مو بس انتقم منها لا لو بيدي چان كتلتها
خلاص وانت يا ميثاق لان انا طلعت شريفه ومو مثل ما انت متصور شوهت صورتي اذن انا راح اطبق المقوله
الي تگول -— البادي اظلم —
ولازم انتهي من هذوله الزباله قبل ان تبدي الامتحانات النهائيه وحتى انتبه الدراستي الي هملتها
على ناس ما تسوه
چانت الساعه بتلاثه بعد نص الليل لمن ما رسلت مقطع لمى الميثاق وكتبت
... ... شوف واتونس بت الحسب والنسب وتاج راسي هاي هي الي تفيدك وملبوسك استاذ
ومقطع ميثاق دزيته اللمى وكتبت الها ... ... لان احبج ردت اراويج قذارته
وغلقت الجهاز وبقيت گاعده وافكر وره ساعه فتحت الجهاز شفت بعدهم ما شايفينه گلت اكيد نايميين بعد
ان كل واحد منهم چذب ع الثاني باسم الحب والوفاء ورجعت غلقته مره ثانيه صليت وكملت وحاولت انام
غفيت يمكن ساعه گعدت فتحت الجهاز شفت لمى
شايفه المقطع وراده عليه
- - - ياكلبه ياحقيره ياساقطه هاي انتي الي وياا موو
- - - زين انا الچ اله اگول صورتي حتى تبتزينه
- - - شنو عبالج من اشوف هذا المقطع اعوفه الچ
- - اتحضري اليوم انا الچ تتدللين
... .... اتخسين اكون ويه هيج زباله نعال ما اخلي برجلي ولا تردين قبل ما تشوفين المقطع الثاني
رسلت الها المقطع مالتها وگتلها ... ... ولا تنسين من تجيين تردين تفضحيني اقصد تفضحيين خطيبج
بطريقج تراوين هذا وياج
تستمر القصة أدناه
رحت على واتساب ميثاق وشفته متصل يعني اكيد اكيد شاف المقطع جريت نفس قوي وانتظرت خمس دقايق
وبعدها دزيتله مقطع ثاني مو نفس التصوير الي دزيته اللمى وكتبت اله
... ... استاذ ردت اعرفكم واحد للثاني بس حتى تعرف نفسك شنو انت
هو رد عليه // ولج ما تدرين اطيرج بلحظه
جاوبته بصراحه چنت ارجف ... ... ادري وخاله بنظر الاعتبار لكن من ينتشر المقطع ويشوفون
قذارتك ذاك الوكت طيرني
رد عليه //مو مشكله اگول سويتيلي كمين او ليش تحت التهديد
... ... هههههه بس ما مبين تحت التهديد اصلا مبين مرتاح وسكران وانت تدعي الايمان ومحابسك عقيق
ميثاق // اكلي تبن گح...
جاوبته ... ... شوف اشلون انت گرن خفت على نفسك ونسيت مقطع خطيبتك
ودزيتله مقطع الجامعه وگتله ... ... هسه اهنا گول كمين يابطل شوفه بس قبله باوع للمقطع السابق لان كلش حلو
نقلت المقطع للجهاز الثاني وفكرت لازم اخذه وياي لكن مو للكليه لان كل شي يصير غلقته وخليته بجنطه
وغلقت الجهاز مالتي خفت ميثاق يتصل ونزلت اتريگت وبعدها صعدت بدلت وحنين گعدت اتريگت وبدلت
خابرت اماني گتلها ... ... لا تمرون عليه توني گعدت اخذتني النوومه انا اجي
ونزلنه سلمنه شفت عمار وافراح واسيل همه ردو اتقربت من افراح وگتلها
... ... عمه اليوم راح انزل يم بيت عمي كرم اتغدا عدهم وانتي حنين هم من المدرسه وتعالي لهناك
افراح //زين روحي الله وياج
شفت علامات التعجب على وجه حنين وعمار واسيل مو من شي بس رد افراح عليه ولان همه ما
اتعودو يسمعون من افراح ترد عليه بهدوء همه اتعودو يسمعون بس العياط والمسبه والعار
انتظرت عمار يطلع وبعده بشويه طلعت واجرت تكسي للكليه لكن قبلها طلبت من السايق ان يوصلني
للمحل نزلت وشفت ثامر گاعد يبيع على واحد هو باوعلي وانا ابتسمت حاسب الرجال ومن طلع گتله
... .... صباح الخير
ثامر // صباح النور اهلا ناديه
ابتسمت وگتله ... ... عمو ابو احمد هاك هاي الجنطه تخليها يمك امانه البعد الظهر اجي واخذها
ثامر // ليش شصاير
... ... عمو ما صاير شي بيها اشياء مهمه طالبها المحامي
هو گلي // تدللين بالحفظ والصون
ضماها بالقاصه وانطاني المفاتيح بعد ان طلع سجلات اثنين وگلي
: هاچ بابا خلي المفاتيح يمج ومن تجين رجعيهن الي
... ... لا ابو احمد شنو هالحچي الرجال الي لزم حلالنه من هو زغير الهسه وما دنت نفسه على فلس حرام
مستحيل يخون الامانه
هز راسه //رحمه الله روح ابوج بس مي خالف اخذيهن
... ... بكيفك عمو بس راح تزعلني منك
ابتسم وگلي //ازعلي قبول
انا هم ابتسمت واخذت المفاتيح الي بالحقيقه فرحت من انطاهن الي ورحت ركبت بالتكسي وصلت للكليه
وما اكذب عليكم گلبي عبالك مكينه صار يدك بالثانيه مليون وريگي يابس چنت خايفه من ردة فعل ميثاق
دخلت وانا احچي ويه نفسي ... ... ناديه لا تضعفيين الكره بملعبح
... ... انتي انظلمتي هواي واي احد ما وگف وياچ
... ... لا ليش الچذب سراج لا لا ياسراج هو وينه
... ... صدگ ناديه ليش تغالطين نفسج مو گلتي اذا ميثاق اتصرف وياج واعتدى عليج راح تتصلين بسراج
... ... اي اتصل بي لان اعرف هو عنده منصب بس مو اتصل بي على انو انا ناديه بت عباس
الي دووم يگول انا القاعده مال الهرم (وبگلبي حچيتها وانا اعيب )وهاي اكثر من سنتين حتى ما سأل
تستمر القصة أدناه
... ... ليش تچذبين مو من اجه المحامي خابرج مو دائما يدز سلام بس انتي ما تجاوبينه هو مل منج ودار وجهه
... ... هسه انا وين سراج وين خلي اشوف حضره ميثاق شيسوي
... .... يعني شيسوي مثلا ما معقوله يفضح نفسه
صرت امشي وانا يتهيأ الي واحد وراي راح يضربني او واحد راح يخلي ايده ويسحبني صرت امشي ابين الطلاب
لمن ما وصلت للقاعه وشفت الطلاب قسم واگفيين ويسولفون وبنات وياهم وقسم گاعدين ابغير اماكنهم وهذا حال
الطلاب دخلت وسلمت وعيني راحت على مكان لمى الي ما شفتها اجت فاطمه وگالت
:هلو ناديه
جريت نفس من ما شفتها رديت ... ... هلو فاطمه
:صاحبتج ماكو
... .... شعجب (اتعمدت اعلي صوتي ) مو على اساس تجي تفضحني
الكل باوعلي وفاطمه گالت باستغراب // شنو انتي ما تعرفيها
... .... لا اعرفها بس هم اعرف نفسي واعرفكم
رحت كعدت بمكاني وانا اسمع لغط من بعض الطلبه ودخل الدكتور انطى المحاضره وبعده اجت الاستاذه
هم انطتنه محاضره
وتقريبا احنه بنهاية العام فاكثر الاساتذه مكملين الماده
طلعنه بالاستراحه ورحنا للكافتريا وهناك خابرت مرت عمي كرم
... ... الو صباح الخير عمه
:هلا عمه ناديه اشلونج وشلون حنين
... ... تماام اگلج عمه اليوم اتغدا يمكم
: هاا شعجب خير ان شالله
... ... شنو ما ترديني اجي
: لا والله الف هلا بيج بس شعجب
... .... اشتاقيت البيبي جميله
:هله بيج شتشتهين اطبخ لج
... ... كل شي من ايدج طيب
اجاني اشعار عرفتها لو من ميثاق او من لمى جاوبت مرت عمي
... ... ياالله عمه عندي محاضره مع السلامه
مع السلامه الله وياج
شفت الرساله من ميثاق يگلي // اريد اشوفج
جاوبته ... .... ايي يمته
: هسه تعالي الغرفتي
رديت علي ... .... ما تشوف نفسك جاي تتامر انا بالكفتريا واذا تريد تعال هناك
: شنو نسيتي نفسج
... ... شنو نسيت نفسي اتصور انت الي تريد تشوفني وانت الي لا تنسى نفسك
طلعت من الواتساب وحتى النت غلقته المحاضره الثالثه بدت ورحت اتمشى وصار ميثاق وجهه بوجهي
وهو يگول// تسمحيلي بكلمه
انا وگفت گتله ... اتفضل
:اهنا
... .... اي استاذ اهنا اسمعك
: خلي نتمشى
ما انطاني مجال ارد مشى قبلي ابتعدنا شويه عن القاعه وكف وگلي // ليش سويتي كل هذا
ما جاوبته هو سالني// ليش تردين تحطميني ؟
رديت وانا ااشر باصبعي ... .... هذا جوابه يمك
ميثاق // يمي انا شنو سويتلج ردت اخطبچ وما صارت القسمه وخطبت غيرج تصير يوميه وبالالاف
شفته شلون خايف جاوبته ... ... اي صحيح تصير وانا ما زعلت لان ما خطبتني زعلت من خيانة صديقتي
او الي چنت اعتبرها صديقتي ومنك لان زيدت وقللت بالكلام عني
ميثاق // ناديه انا اسف ارجوج قدري موقفي
... .... وانا ما اريد منك شي حقي وصلني بس بقالي يمك مليونين
هو اتفاجأ // مليونين ماليش
تستمر القصة أدناه
ابتسمت وجاوبته ابرود ... ... ثمن المقاطع ليش هو الي صورهن ابلااش
: تبتزيني ناديه
رديت بتهكم ... ...ابتزك ليش انت شتملك وانا ابتزك
جر نفس // تدللين بس رجاءا احذفيهن انا ما يهمني بمقطع لمى لان قررت انهي كل شي وعرفتها على حقيقتها
المهم عندي اسمي ومركزي
... ... هههههه ما عرفتك جبان الهلدرجه انت حتى مو رجال وعندك غيره على خطيبتك
هو گلي // لا انا رجال واعجبج اصلا خطوبتي الها مخليها فتره يعني بوجود المقطع او عدمه انا افصخها
... ... هههههه من يمتى مو هاي تاج راسي بت الحسب والنسب
ميثاق //اي گلت هيج چنت مقهور منج والا انا اتزوج وحده مثل لمى بمجرد ما عرفت حقيقة صديقتها اجت
عرضت نفسها على خطيبها بربچ باچر من اتزوجها شلون أأمن بيتي واسمي يمها
1
ما اعرف شنو احساسي وانا اشوف هذا الانسان المتقلب جاوبته ... ... على كل ما يهمني بس شي واحد اگوله وما
اعيده انت تفصخ الخطوبه وبدون ما تحچي عن السبب
هو باستغراب // لاتگولين تحبينها وحنيتي عليها
ابتسمت باستهزاء ... ... لا بس انا لازم اتشكرها
: هاا ووليش باالله
... ... لان عرفتني معدنك وشگد انت انسان وضيع
ميثاق باستعطاف // هم مقبوله منج وهم ما راح احچي عن سبب فصخ الخطبه بس المقاطع
باوعتله باشمئزاز ... ... شوف يابطل بالنسبه للمقاطع هنه ما يهمني باي حال من الاحوال ردت اعرف شي
واوضح اشياء وضحلي وعرفتهن لذلك خلص هنه ما يهمني
: هاا يعني حذفتيهن
رفعت حواجبي ... ... حذفتهن شگد تضحك اچذب عليك اذا اگلك حذفتهن بس هاا هنه موجودات عد شخص انا
عزيزه عده واثق بي وهويحبني ويكرهك يموت منك لدرجه انو يتمنى يشوفك مهزوم ولازم تفهم بأي لحظه
اتعرض بيها للاذى من قبلك راح بنفس اللحظه ينشرهن بس وين على مواقع التواصل الاجتماعي
يعني فضيحه معتبره
لملم حلكه : اتهدديني ناديه
هزيت راسي وبنفس برودي وابتسامتي ... ... لا بس الحذر واجب
ميثاق // الشخص هذا الي عده المقاطع نسرين
انا ابتسمت ... ... واخيرا عرفت البنيه الوياك حتى اعرف اتصرف وياها يعني نسرين چانت وياك موو
: لا لا شنو نسرين
... ... انت گلتها بلسانك
: لاتلعبين بالنار ناديه
... ... شوف ما اريد اطولها انت باچر تجيبلي مليونين وما يهمني شلون تتصرف ويه لمى بس دير بالك انت
اوهي تتعرضولي لو بحرف صدك انشر المقطع وهسه عرفت اسم البنيه چانت وياك وهاي وحده وضيعه او وصخه
بكل معنى الكلمه حتى اوصخ منك ومن يوصل الكلام الاهلها راح تنجبر تداري الفضيحه وتتزوجها
هههههههه. جاي اشوف وجهك شلون وانت لازم ايدها ومتزوجها وكل اصدقائك يباعولك سدك موقف يبچي
: ناديه لا تفوتين زايد تدرين كل شي اگدر اسوي
... .... مو جنك اتهدد لعد اسمعني ميثاق انا بعد عندي دواهي صوت وصوره ويجوز الي صور المقاطع
وخافي وجه البنيه يجوز عنده وجهها ظاهر فدير بالك يعني لاتجني على نفسك ويصير موت وخراب بيوت
على گولة المصري
: واذا جبتلج الفلوس ما تبتزيني
تستمر القصة أدناه
... ... ابتزك هههههه ليش انت شعندك وابتزك اخاف عبالك ابشهادتك لو وجود اخوك ما اعرف ابن عمك
بالاحزاب تهمني وتخليني ابتزك
... .... ... لك بابا انا هاي الگدامك عندي فلوس تشتريك وتشتري عشيرتك ليش لمى ما فهمتك شنو طلع
عندي من ورث ها وقبل ما انسى تره مو انا الي اعرض نفسي للاساتذه حتى انجح الاولى مثل
ما حضرتك مفهم خطيبتك
ميثاق باستغراب /./ : انتي شتگولين انا ما گايل عليج هالشكل
... ... هذا مو كلامي كلام لمى على السانك وانا اعرف بيك كلش زين تگول
هز راسه // : لا لا ناديه انتي ظلمتيني
... ... ولمن طلبت اتشوفني ومن حاولت تعتدي عليه وانا منعتك شنو گتلي تتذكر لو نسيت الظاهر نسيت
خلي اذكرك گتلي انتي مجرد سلعه رخيصه لا تنسيين نفسج انتي بت مياده تتذكر مو وهواي كلام
ما اريد احچي ولان انا بت مياده فانت دير بالك مني
اتقربت منه وخليت عيني بعينه وحاچيته بتهديد ... ... اسمعني ولك انت او لمى ما تجيبون اسمي لو بالحلم تره
اعرف شلون ارد عليك الصاع الف وباچر الصبح المليونين عدي ومو عبالك هذا ابتزاز لا هذني رد اعتبار
اليه عن الكلام الي توجه الي منك ومن خطيبتك المصون
وما احب اشتري قذارتك بفلوس ابوي هاا ونصيحه لا تحاول تلعب وياي اي لعبه رخيصه تره صدك راح تخسر
كل شي فكر زين واذا تريد استشار واسأل واحد اكبر منك ( رفعت حواجبي ) ياالله من رخصتك
1
خليته واگف وانا رحت گعدت باستراحة الطلاب لان اكيد الاستاذ ما راح يدخلني للمحاضره لان هواي وكت اتاخرت
رجعت بالخط ونزلت يم المحل ورحت الثامر الي انطيته المفاتيح وانطاني العلاگه واتشكرت منه
وبوجهي رحت البيت عمي كرم لگيت حنين سابقتني لهناك سلمت عليهم والكل رحب بيه ورحت يم بيبي جميله
وباوستها وانا مشتريه حلويات من الكليه وكلنه اتجمعنا بغرفتها واتغدينا بعدها حنين جمعت المواعين
وراحت تغسلهن هي ونبأ ومرت عمي كرم جابت الچاي وكرم گال ابقن لليل وانا اوصلچن واذا تباتن عادي
جاوبته
... ... تسلم عمو ورانا دوام وتحضير
: هذا هو اتعشن وانا اوصلچن
الكل راح وانا بقيت يم بيبي جميله الي گلتلي //بيبي نامي وارتاحي ادري بيج بالليل ما تنامين
... ... اي بيبي بس قبلها رايدتج بشغله
جميله //شنو بيبي گليلي
... ... بيبي هاي الجنطه تبقى عندج امانه ما تنطينها الاي واحد بس الي والعمه زهراء
جميله باستغراب // شبيها الجنطه مو تضمين فلوسج عد ام مرتضى
... ... اي بيبي هاي الجنطه بيها شي اهم من الفلوس اي احد يجي يگلج اريدها ما تنطيها بس الي
يحلفح بروح منيره وعباس
جميله // وياهو الي يحلفني بروح منيره هو بس انتي
... ... ياالله بيبي دليني وين تضمينها
جميله // شوفي ندوه انا طبعي الح هواي بس هالمره ما اگلج شبيها الجنطه وراح ادليچ مكانها وادلي زهراء
حضنتها ... .... حبيبتي
چان بغرفتها كنتور ابو البابين اشرتلي على باب فتحته وشفت بداخله مثل الميز زغير بي سويج بيبي انطتني المفتاح
وفتحته لگيت صندوك زغير وشفت جنطه هي گلتلي راح اخلي امانتج بالجنطه واخابر زهراء واامنها لان هيه هم عدها
نسخه من المفاتيح
تستمر القصة أدناه
قفلت الميز والكنتور ورجعت المفتاح البيبي ونمت والعصر كلش گالت
اگعدي ناديه راح اياذن المغرب مو زين نوم العصر
گعدت واجت نبأ وحنين جايبه كيكه وچاي وگعدنا ناكل وصلينه كعدنا نسولف لمن ما عمو كرم جاب عشا من المطعم
واكلنه ويه سوالف وقفشات بيبي جميله وهالمره عمي كرم رجعنا هو ومرتضى
ثاني يوم شفت ميثاق الي طلب مني ينطيني الفلوس بمكتبه لكن انا گتله بنفس المكان الي امس حچينه بي
واجه وجابلي الفلوس وانا اخذتهن واعتبرتهن فعلا رد اعتبار
بعدها شفت لمى وهي نازعه الحلقه واجيت يمها وسط ذهول كل الي موجود بالقاعه چان مبين عليها
الحزن والقهر حاجيتها ابرود وانا اطبطب على جتفها ... ... لاتزعلين لمى يولي ما يستاهلج لو نگول انتي ما تستاهلينه
هي سكتت وفاطمه گالت // ناديه شنو صاير
جاوبتها ... ... لا ما صاير شي بس مع الاسف لمى واستاذ ميثاق فصخو الخطوبه
الكل اتفاجأ انا هزيت راسي ... ... لا تضوجين حبيبتي الدنيا قسمه ونصيب
اجانه الدكتور وانطانه محاضره ومن كملنه طلعنه لان الدكتور الثاني ما جاي
طلعت وصلت للكفتريا اجت يمي لمى وهي تگول// ليش هيج سويتي
هزيت راسي ... ... لا مو انا الي سويت خلي انگول جشعج هسه ميثاق يجوز عجبج او انتي حبيتي
او چنتي اتغارين مني واخذتي ويه اول فرصه سنحت الج
... ... لكن الي عجبني اكثر سامر الي اجه وسالج عني ليش اخذتي وانتي مخطوبه يعني الي تطلع على
امها حچايه لازم تعيش ذليله مكروهه عبالك بيها طاعون والساقطه الي تاخذ اي واحد يتقدم الصديقتها
تبقى بقناع الشرف عاد انا قررت ازيل هذا القناع وافضحج
لمى والدمعه بعينها // بس انتي دمرتيني
هزيت راسي ... ... لا لمى بالعكس شنو عبالج من تاخذين ميثاق راح ترتاحين صدگيني يوم يومين ويصير
يعيرج ويشك بيج لان انتي رخصتي نفسج واخذتي من حبيبته الي هي اعز صديقاتج نسيتي كل شي
واصطدتي بماي عكر وعكر كلش
جريت نفس ...... ... خلي انصحج ديري بالج منه تره حقير ونفسه دنيه الى ابعد الحدود انا ليش وديتلج المقطع
حتى خاف بيوم ايساومج عاد انتي اتهددينه وتگليله افضحك يعني واحد لازم ع الثاني لزمه
لمى گالت // ناديه انا ......
قاطعتها وانا أأشر بايدي ... ... اشششش انتي انسانه سافله ورخيصه للغايه وبنفس الوكت وضيعه وراح اعيدها
عليج ولو ما تتحملين صفعتين بوكت واحد لان الحمد لله شفت قذارتج ونذالتج كان المفروض اخذ منج مليون
بس شوفتج ذليله كدامي تسوى فلوس الدنيا هاا وديري بالج تلعبين بذيلج
تره اول الي يفضحونج ميثاق والمقطع صحيح انا حذفته لكن خليته عد ناس ثقه بيوم الي تحاولين اتمسيني
لو بنسمة هوى گبل الاهلج وعمامج والكليه الي انتي بيها عاد صيري حبابه وامشي عدل ومو كل لحم ينوكل
گمت عنها وانا اباوع الها باشمئزاز ومن يومها سديت صفحة لمى وميثاق او بالاحرى همه حلو عني وما صرت
اسمع من لمى اي شي ولا صار ميثاق يحاول وياي باي تصرف
تقريبا هدئت حياتي وصرت اقرا وحنين تمتحن وبمجرد ما كملت امتحانات افراح گالت نروح للزياره قبل
لا اسيل تمتحن بكلوريا وناديه وحنين يرحن ويانه
تستمر القصة أدناه
الكل اتقاجأ هادي واسيل وعمار وياسر ما عدا هديل هذا الشي خلاني ما اطمن لذلك خابرت عمي كرم وفهمته
يخابر هادي ويگله اجر سياره ويريد ياخذنه وهادي اكيد راح يگله همه هم يردون ياخذونه وهنا راح نتجمع كلنه
بالسياره الي اياجرها كرم ونروح هو وافق لان انا گتله ما اگدر ارفض وهم خايفه وهنا عمي كرم خابر بعد ان
انطيته كروة السياره هو ما وافق لكن انا گتله هاي الزياره بثواب ابوي وبيبي
وخابر كرم هادي واتفقنا كلنه نروح نزور وحتى عمه شمس وبيبي نصره ورحنا بالبدايه زرنا النجف
وبعدها رحنا للمقبره وهناك لگيت الاحبه بابا وبيبي وجدو منير الي گعدت ابچي يم قبره واقرا قرآن
وشعلت بخور وشموع وغسلت قبورهم بماي ورد وانا احس بيهم يباعولي ويسمعوني
بعدها ودعناهم وزرنا كربلاء والكوفه
كان اتفاقنا نزور النجف وكربلا لكن حنين طلبت نروح نزور الامام الكاظم عليه السلام ورحنا بعد ان انطيت العمي
كرم باقي الاجره وگتله فد نوب نزور سامره هو الرجال ما قبل ياخذها لكن انا گتله
... ... عمو هاي الزياره بثواب ابوي وبيبي منيره
ورحنا البغداد وزرنا الامام وگعدنا بالصحن وهناك اجانه سراج لان عمي كرم
خابره اجه سراج الي صار سنتين ما شايفته اجه وسلم علينه وگعد وهو يسالني عن دراستي
وانا اجاوبه وانا مدنگه ما اعرف ليش ما اباوع بوجهه
بيومها عزمنا ابيتهم ورحنا كلنه وشفت بيبي امنه چان مبين عليها الكبر والحزن على فراق جدو منير
ومن سمعت بينه چنا بالنجف صارت تبچي وتگل البيبي جميله سلمتيلي علي
انا حاولت اتجنب سراج الي اكتفى من رحنا البيتهم اكتفى بالسلام علينه وبقى بس يتشاقى ويه بيبي جميله
الي راد منها تبقى يم امه وهو يرجعها بس بيبي كالت //لا اجيكم غير مره
بعدها اخذها البيت جدو جميل وراح وياها كرم وهادي واجت زهراء بقت يمنا وهي فرحانه ابتها
وفرحانه بينا لان اخذنا حقنا وانا صورت وياها او ويه بتها الي صايره تخبل
ثاني يوم الفجر ركبنا بالسياره واتوكلنه السامره وسلم علينه سراج ومن طلعت امشي انا وعمه زهراء
الي باتت يمنا شفته چان وجهه متعب لكن نفس ما هو باوعلي وانا گتله
مع السلامه
ما انتظرت اسمع رده لكن هوجاوبني :: ندووش نامي بالسياره ادري بيح بالليل ما تنامين
صعدت بالسياره بدون ما اجاوبه وانا اباوعله بالجامه وهو يسلم علينه بايده بذيج اللحظه اتمنيت شي
ما راح اگوله هسه اكتفيت حركت ايدي رديت السلام
زرنا سامره ورجعنا بنفس اليوم الكربلا وبتنا والصبح طلعنا رجعنا للبصره بالطريق قبل ما نوصل عمو كرم گال
:ياجماعه صلوا على محمد وآل محمد
الكل صلى
هو گال //تره هاي السفره مو مني لا هاي هديه من ناديه وحنين بثواب بيبيتهن وابوهن
بيبي جميله هي وعمه شمس وام مرتضى بچن وگالت جميله
:عفيه بيج ما ضاع ربى منيره عفيه
حنين گالت // بيبي السنه التجي قررنا ندز البيبي وبابا حجه نيابه
تستمر القصة أدناه
: الله يخليچن ويبارك بيچن
نصره گالت // من تعبهم حجتهم
جميله // اي خيه ام قيس شكم واحد اكل ورث ابو وامه ما يتذكرهم بتمره ثواب
ام مرتضى // صدگي عمه الي يسوون هالشكل راح يلگونها باولادهم
وصلنه وصعدنا فووك لان تعبنا من السفر والي ما متعودين علي ومشت حياتنا ونجحت الاولى
ع القسم وحنين
نجحت راحت للسادس واسيل صارت تمتحن بكلوريا
انا سجلت حنين دورات لان اعرف باختي ضعيفه فهمتها اخذي دورات وبالدوام اخليلج مدرسين لكن هي
رفضت وگالت
- - - لا ناديه دورات كافيه لان انا قررت ادخل اكاديمية فنون جميله واختص زسم حتى انمي موهبتي
انا بالبدايه ما وافقت وگتلها اريدها تصير صيدلانيه او مهندسه لكن هي گلتلي انو هاي قدرتها ومجال الرسم تحبه
انا ما حبيت اضغط عليها وفعلاحنين عدها موهبة رسم
اترقبنا نتائج البكلوريا ورسبت اسيل بالدروس كلها والكل سكت ما حاجاها بس ياسر گلها
——-ليش حرامات سنه راحت منج
كان ردها /. / الاسئله صعبه
بالعطله ما صار عندي تواصل ويه البنات الي بمرحلتي بس ويه فاطمه الي دائما تسالني عن صحتي
رحت تلث مرات شفت بيبي جميله ثالث مره اجت عمه زهراءوبقت اسبوع وانا وحنين بقينا يومين
وبيبي جميله راوتها وين مخليه الامانه مالتي
وحتى عمه زهراء ما سالتني شنوهيه الامانه اما بيت عمي هادي عزمو زهراء على عشا وبيومها
اجت وياها بيبي جميله والكل مستغرب من تصرف افراح ويانه الي بيبي كالت
لان تخاف من قيس
عمه زهراء هزت راسها وگالتلي // ورغم هذا االهدوء الي شفته من افراح بس انتي اخذي حذرچ
وبعدها سافرت عمه زهراء وبقينا انا وحنين بالغرفه والمحامي فهمني انا استلم اجاربيت بيبي وبيت ابوي
وايراد المحل وصرت استلمهن واضمهن عد عمه ام مرتضى واكتفي
انا واختي بالراتب التقاعدي مال ابوي
ومن اقتربت العطله على نهايتها صار لازم اشتري الحنين ملابس جديده واحذيه وجنط للمدرسه واشتريتلي
انا ملابس للدوام وطلعت حتى اشتري وبصراحه تعبت من الفره
چنت امشي بالسوگ وچان كلش ازدحام وگفت يم محل ايبيع عصير باوعت شفت نفسي قريبه من شقة نسرين
اتصلت بيها وگتلها ... ... انا قريبه يم الشقه مالتج
هي ردت // اذا عندج المفتاح روحي ارتاحي محد بيها لا تنسين عطله وانا اليوم بالبيت
1
فكرت اروح واترددت بعدين گلت
... ... خلي اروح هم اشوفها واسال على اسعارهن حتى اخذلي وحده اسويها مكتب الي بعد التخرج
يمكن مو هذا السبب واكيد حب الاستطلاع والفضول ان اشوف شقة وحده مثل نسرين وصلت واول مره اشوفها
چانت بمنطقه راقيه يمها سوبر ماركت ويمه بوتيك ملابس وفوك مكاتب محامين
وعقارات ويمكن طبيب او اثنيين وحتى صيدليه فتحت الباب و دخلت بقيت اباوع الها واتفحصها
اثاثها راقي ونظيفه ومرتبه شفت المطبخ مو كلش كبير ومفتوح وبي ميز طعام وكراسي تلاثه
وكاونترات كلش حلوات وثلاجه رجعت للصاله وخليت العلاليك ع القنفه وانا اسال وفسي
الشقه كلش حلوه ومرتبه ومكانها راقي يراد اشوف اسعارهن
رن موبايلي شفتها نسرين جاوبتها
تستمر القصة أدناه
... الو
هلو حبي وصلتي
... ... اي هس توني وصلت ليش
بس حبيت اطمن اندليتيها
... ... اي بس شويه ارتاح واروح
لا حبيبتي اعتبريها شقتج اخذي راحتج
... ... تسلمين
سديته من عدها نزعت خذائي واتمددت ع القنفه الثانيه گعدت شويه جريت نفس وقررت اسال على سعرها
اذا مناسبه اخذها واسويها مكتب ويجوز حتى اسكن بيها بعد ان الله يوفق حنين وتتزوج مرتضى
شلت العلاليك حتى اطلع خفت احد يجي وفتحت الباب وانا صارت عيني بعين رجال جاي يريد يفتح الباب
بحيث من فتحته هو كانما عثر باوعتله وانا مرتبكه وهو نفس الشي واثنينه گلنه بنفس الوقت العفو
كان شاب لابس عسكري وشايل رتبه كان مرتب وحلو هو اتفاجأ من شافني وانا هم راسا گتله بارتباك
... ... ... ال عفو انا مو هي نسرين اجيت لا ن تعبت
هو ابتسم وگلي //انسه اهدي اهدي ما صار شي واذا متضايقه رجاءا ارجعي ارتاحي ولا كانج شفتيني
سمعت صوته كان منتهى الرجوله والرزانه انا راسا طلعت امشي بسرعه حتى بدون ما التفت وراي
اخذت تكسي للبيت وصلت ورحت اتمددت ع الچربايه وصورة الرجال ما تروح من بالي لو صوته الي
كله رجوله
اتصلت عليه نسرين وقطعته عرفت ما عدها رصيد خابرتها
... ... الو ها نسرين
:ها عيني شنو شبيج
... ... شبيه نسرين
:فيصل يگول بس شفتي انهزمتي وهويكرر اسفه
اسمه فيصل بلعت ريگي ... ... لا عليمن يكرر اسفه بس هو منو
: صاحب الشقه
... صدك
2
:اي شنو نسيتي مو گتلج هاي الشقه مالت انسان عزيز عليه وهو خلاها تحت امري
... ... يعني هذا الي شفته هو صديقج
: ناديه لا يروح بالج لبعيد فيصل صديق قديم وانسان جدا رزن ومحترم
... ... بس هسه شياخذ عليه من نظره
: لا عيني كل شي ما ياخذ لان عرفج انسانه مؤدبه وانا عرفته عنج كل شي اگلج ناديه ما تجيين باچر
... وين اجي
: للكليه نتشاوف
... لا شيجيبني بعدين كلها عشر تيام ونداوم
: لا حبي اسبوع ناسيه تسجيل المواد
... اي اقصد اسبوع
:هذا هو نتشاوف خابريني بيوم التجيين
... تمام
(ملاحظه )
#انا ما حبيت اذكر شخصية فيصل بالقصه لكن ناديه اصرت عليه ونزولا الرغبتها ذكرت شخصية فيصل #
آنيين الليل ❣️❣️
فيصل ثلاثيني او يمكن اربعيني وطويل اسمر وعيونه كبار الي شدني بي صوته ما اعرف ليش
طبعا هاي العطله كانت اهدا عطله بالنسبه الي لان افراح چانت ساكته وما تحچي مثل قبل ولا تعيط وتقريبا لا
هي ولا بناتها يتواصلن ويانه لا سلام ولا كلام وانا وحنين متجنبيهم خصوصا وحنين عدها دورات لذلك هي تلتهي
تقرا وانا حدي العشا والمواعين والطارمه والمطبخ
وره اسبوع رحنا سجلنه ع المواد الي لازم ندرسهن وشفت اكثر البنات وسلمت عليهن وانا واكفه اجت نسرين
وهي تگلي :هلا بالگاطعه
باوعت النسرين ابتسمت بوجهها وگالت
: شنو بالعطله عندج سبات
... ... اي شسوي مو حنين سادس وسجلتها دورات ولازم اراقب دراستها
: اكيد تطلع شاطره على اختها
هزيت راسي ... ... لا والله حنين ما تحب الدراسه لذلك هي تروح اكاديمية فنون
: يعني شنو غناء لو مسرح
... لا هاي ولا هاي رسم
ابتسمت نسرين ورحنا للكافتريا وطلبنا عصير وصرنا نشرب سمعت صوت وراي گال
: ممكن اشاركم
باوعت شفته فيصل وباوعت النسرين الي گالت
: فيصل يوميه يسالني عنج وطلب رقمج لكن انا اعرف انتي ما تقبلين انطي
فيصل گال // انسه ناديه احب اعتذر
جاوبته بتساؤل وبارتباك ... ... تعتذر عن شنو ؟
: الي صار اسف سببت الج ازعاج
... ... لا بالعكس انا الي اسفه كل ظني الشقه محد يجي بيها هيج افتهمت من نسرين وكنت تعبانه وحبيت ارتاح
: وهي فعلا محد يجي بيها وانا كنت ضيف لكن ضيف ثقيل
... ... لا استاذ ابدا
: ممكن بدون استاذ
ابتسمت بخجل وبعدها استاذنت حتى اكمل المقررات واصر فيصل ايوصلنه رغم اعتذرت لكن هوه اصر عليه
خصوصا وانو نسرين مجر د ما سمعت قبلت وركبت بالصدر وانا ركبت بعدها ساق السياره واحنه ساكتين
لكن ما يمنع ان استرق النظر بين فتره واخرى وبنفس الوقت اشوفه يباوعلي ونسرين مستمره بالكلام
والشقى هو جان يدخن ويبتسم بهدوء على كلام نسرين لمن ما دارت وسالتني
: اجرتي خط
هزيت راسي .... هو خط العام ويه اماني ليش
: مو گلت اناجر تكسي انا وياج
... ... لا ما اگدر بعد انا ويه البنات واساسا انتي مو على طريقي
فيصل گال وره ما تحمحم // هسه وكت غدا شنو رايكم نروح نتغدا ابفد مطعم
نسرين // اكيد موافقه وناديه هم
جاوبته ... ... لا لا شكرا لازم ارجع
نسرين // شلقصه ناديه طوول عمرج سادتها
فيصل // ما نتاخر
... ... شكرا غير مره
مشى شويه بالسياره گتله ... ... نزلني اهنا
فيصل// ليش وين بيتكم ؟
... ... قريب يكفي هم يادوب توصل نسرين
فيصل سالني //: بيتكم وين ؟
... ... بالفرع الثاني اهنا انزل
هو ما سمعني دخل للفرع واضطريت انزل يم البيت بعد ان گتلهم... شكرا
نزلت ودخلت للبيت غيرت ملابسي ونزلت اخذت غدا ورجعت صعدت وبعدها اتمددت لان اريد
انام اجتني رساله من نسرين // شلون فاتج احلى غدا مرتب
... ... بالعافيه
:شبيج ناديه ليش ما قبلتي دعوته بالمطعم
... ... اسفه نسرين ما اقبل وبصفة شنو اقبل
:صديق صديقتج هههههه بس هو خوش انسان
... ... نسرين اسألج وتجاوبيني بصراحه
:اي اتفضلي
... ... انتي گلتيله انا اليوم مداومه
: اي ليش الچذب وبعد هم اگلج الصبح هو وصلني ومن شافج ما قاوم
... ... اووو انتي دائما تجسمين الامور
: شنو اجسم الامور الغدا كله وهو يسالني عنج
... ... شنو ليش يسالج عني وعن شنو يسأل
نسرين // شبيچ ناديه اسئله عاديه ومن عرف انتي ناجحه بامتياز زاد اعجابه بيچ
... ... ياالله خلي اتغدا وانام
اكلت وانا افكر بكلام نسرين وحجيت ويه نفسي
... .... لازم ما اثق بيها واكيد فيصل عنده علاقه وياها ويجوز يشوفني مثلها انا لازم اكون حذره
نمت وگعدت على ترميشه شفت رقم متصل بيه ورحت ع الواتساب شفت نفس الرقم وهو كاتبلي
اعذري تطفلي لكن انا جبرت نسرين ان تنطيني رقمج وانا مستعد اتحمل الرزاله بدلا عنها
//////////////////////////////////////////////////////////
