رواية ناديه الفصل السادس والأربعون بقلم انين الليل
ناديه
عرفته فيصل ما رديت على رسالته وهو ما حاول يراسلني رغم انا كل شويه اروح اشوف الواتساب
گعدت على حركة حنين الي شفتها مبدله هي ابتسمت وگالت / / اليوم اخر يوم بدورة السادس
باوعت الها وانا اتمغط ... ... اي مو منا وهيج المدارس
حنين اتقربت //صباح الخير ندووش حبيبتي چايج بالغلايه والجبن بالثلاجه والصمونات فوكها
(تقصد فوك الثلاجه ) وانا رايحه
ابتسمت وگتلها... ... الله وياج
ردت عليه // فدوه ندووش قبل لا يبدي الدوام نروح نشوف بيبي جميله
خزرتها وما جاوبت وهي باوعتلي دنگت وراحت انا بقيت بفراشي وانا استذكر العطله الي مرت چانت بالنسبه النا
انا وحنين اهدأ عطله افراح تاركتنا وما تسمعنا حچي وهديل ساكته وبهاي العطله ماكو غسل زوالي مال الشتا
ولا اكو غسل بطانيات
چنا انا وحنين يوميه ننزل نغسل المواعين والمطبخ ونفوت ع الطارمات
وقبل اسبوعين ياسر سافر ايفاد للخارج يبقى تلث تشهراو اكثر ودووم چان يخابر اهله ويخابرني من
خطي وانا احاول بس اسلم علي واتمنااله الرجوع بالسلامه ودوم اسمع افراح تحچي
- - - راح نخطب الياسر براء
وهالمره گالت الامها وعمه شمس بس يرجع من الخارج نخطبله ونعقدالهم فد نوب
قبل السفر من تحجي افراح بموضوع الخطبه والعقد ياسر ساكت مو مثل كل مره يحجي وما يقبل
وهذا الشي فرحني گلت الحمد لله ياسر اخيرا فهمني وفهم كلامي وراح يتزوج بت خالته الي اشوفها حلوه
ومناسبه اله (چذب هي تشبه امها وخالتها من ناحية الجمال والخباثه )
لكن كل هذا الشي والهدوء والتغيير انا بقيت ما مرتاحه. ومترقبه ما معقوله افراح ساكته هي وهديل
اعرف جاي يدبرن شي
داومت بالكليه واهنا قررت اشمر كل شي وراي تعب السنين واليتم وضيم افراح وطمع هادي
وقهر ميثاق وخيانة لمى
اله جريمة مياده ماگدرت اتركها لان اكيد هي ما راح تتركني راح تبقى لازگه بيه انا حاولت اتناساها
قررت اكون انا وبس انا ناديه الي لازم ادرس واكافح واطلع الاولى على القسم حتى يكونلي نصيب واتعين
داومت بتفاؤل وهمه بديت من اول يوم دراسه حاولت اتجنب الكل فقط السلام وياهم
واي شي ثاني ابتعد عنه
صار فيصل يوميه يدز صباحيات وسلام وبالليل يدز جملة مساء الخير وتصبحون على خير
بالحقيقه اشوفهن لكن ما ارد عليهن وباول اسبوع دوام شفت لمى وسلمت عليها وهي ردت السلام وهيه
تبتسم وكأن اي شي ما صاير دفعني الى ان اباوع الاصابيعها كلت ويه نفسي
... ... يجوز انخطبت او اتزوجت او حتى رجعت الميثاق
الي عرفته من فاطمه لمى كايلتلها من سائلتها ليش فصختي انتي وميثاق
مجاوبتها انو هيه ويا ما اتوافقو تفكيرهم يختلف وعرفت بان ابو الميثاق قبل اكثر من شهر اتوفه
انا ما فكرت اروح اعزي مجرد من سمعت گلت الله يرحمه لكن غيرت رايي خفت يظن مچيئي اله غير شي
چنت امشي طالعه من المحاضره لمن ما شفت ميثاق
بوجهي چان ضعفان شويه ومبين علي التعب هو سلم عليه
: اشلونج ناديه
باوعتله ... ... اهلا استاذ البقيه بحياتك
:بحياتج الباقيه ناديه ممكن نحچي شويه
... ... اي استاذ اتفضل
ميثاق يلتفت //اهنا ؟!
هزيت راسي وابتسمت // اي استاذ اهنا افضل
: نتمشى ممكن
هزيت راسي صرنا نمشي على كييف ابين الطلاب ميثاق گلي
:ناديه انا اسف عن كل شي صار يمكن بسبب لمى او الي سمعته او بسبب رعونيتي ضيعتج
جاوبته وانا احاول اتحاشى اباوع بوجهه ... .... استاذ ما كو داعي الهذا الكلام شي صار وانتهى
هو رد // بالنسبه الچ لكن بالنسبه الي لا ناديه انا ...جر حسره وسكت
... ... انت شنو استاذ
ميثاق نفخ //انا متندم وعرفت غلطي
وگفت وباوعتله وابتسمت // وانا نسيت كل شي واتصور احنه متعادلين
:متعادلين شلون ؟
... ... انت غلطت بحقي وانا عرفتك خطأك وانتهى ليش تريد تعيش بالماضي
هو دنك // لان ما اگدر انسا
... ... وشنو المطلوب
: ناديه انا عرفت بنفسي انا احبج والي صار اقصد خطوبتي ال لمى كان رد فعل للي سمعته لكن صدگي
ما كو يوم نسيتج
ابتسمت ... ... وهسه
ميثاق //هسه انا مستعد اليوم ادز اهلي حتى قبل اربعينية الوالد ادزهم يخطبوج
بنفس ابتسامتي رديت ... ... اتصور احنا وصلنه المفترق طرق ما اريد لا اعاتبك ولا تعاتبني لكن اسفه
طلبك مرفوض
ميثاق باستغراب // ليش ناديه ؟
سلهمت عيوني وفتحتهن ... ... ابساطه لان الثقه الي ابيناتنا انعدمت وثاني شي انا ما احبك (باوعتله )
ميثاق اطمن الي صار ما يطلع لاي كان
ميثاق //. ناديه انطيني فرصه جاي اكلج انا غلطت وجل من لا يخطئ
اتنفست بعمق ... ... ... احنه بالاخير بشر نخطأ ونتحاسب ونندم وننسى انت خطات بحقي من شفت جريمة
امي بعيون الناس ونسيت شنو انا وشنو ممكن اكون او اصير وهم نسيت انك بيوم من الايام اختاريتني الاخلاقي
انا ما الومك لان المجتمع هيج يباوعلي امي قاتله وقاتله منو زوجها الي هو ابوي
اكيد انا راح اكون مثلها لان انا بتها المجتمع اتناسى التربيه والدين اتناسى انو ممكن وحده مو زينه تخلف انسان
طيب خيير محترم لكن بعد هذا مجتمعنا وهاي تقاليدنه ما نگدر انغيرها بين يوم وليله
... ... ويجوز لو اخوي (واتحسرت ) اقصد لو عندي اخ وراد يخطب وحده امها مثل امي يجوز ما اقبل
... ... اطمن استاذ انا بعمري ما افضح احد حتى الناس ال فضحتني واذتني انسى الي صار وانا الي سويته بس
حبيت ابين الك انو الخيانه مو جينات وراثيه لا الخيانه غريزه بالبشر تجي من كره من غيره من حب تملك
ميثاق //تدرين ناديه راح اعاقب نفسي طوول عمري لان ما ارتبطت بانسانه مثلج
ابتسمت وهزيت راسي ... ... هاي شهاده اعتز بيها وانا اتمنالك التوفيق وتلاگي الانسانه الي صدك تحبها
وتحترمها
ميثاق // سؤال اخير اذا ممكن
هزيت راسي هو كال //. نسرين عدها التصوير اقصد هيه الي صورتنا يعني انتي تعرفيها يجوز تبتزني
... ... .... لا اطمن نسرين ما تعرف باي شي اطمن ميثاق كتلك الي صار سويته لان انت جرحتني ولمى كالت عن
لسانك كلام بحقي جرحني جرح عميق الي مثل نسرين ما يهمها شي ولا تفكر اله بونستها الماديه فقط وهسه اسمحلي استاذ
اتحسر // اتفضلي واريد منج تسامحيني
جاوبته بعدم اهتمام ... ... ما بيناتنا شي
ورحت للقاعه اول مره احس بالانصاف مجرد ما انسان يخطأ بحقج ويطلب منج السماح هذا انتصار بحد ذاته
بعدها حاولت اتجنب ميثاق وما اشوفه وحتى ما اسمع اخباره ومشت حياتنه على نفس الوتيره مبتعده عن افراح
وبناتها وكانما احنه ماجرات غرفه عدهم
حتى اكلنه اكثر الاحيان اجيبه من بره چنت گاعده بالكافتريا ومندمجه اقرا بالملزمه واشرب عصير سمعت
صوت يحچي وياي هذا الصوت الي من اسمعه يصعقني //صباح الخير
عرفته فيصل رفعت عيني وشفته ما انتظر اگله اتفضل هووگعد باوعتله بتساؤل هو رد
: اعذريني بس كان لازم اطمن عليج
انا بتساؤل ... ... تطمن عليه
فيصل //اي
... ... ليش منو گلك انا بيه شي
:انتي
... ... ممكن اتفهمني ؟
فيصل // صار اكثر من شهر لا دگولي شهر ونص ليش ما تردين عليه
عكفت حواجبي ... ... عفوا ؟
هو كلمني بنتر //تسووين روحج ما تعرفين شي الگدامج شنو بنظرج
باوعتله وما جاوبته اخذت ملازمي وجنطتي وگفت طلعت من الكافتريا وسط ذهوله وانا احچي ويه نفسي
... ... شنو هو وهيج يحچي وياي وشيريد مني انوبه يطلعلي مثل ميثاق احبج وبعدين من يعرف بمياده ينهي
كل شي لو مثل ياسر الي يخاف من امه لا ناديه كافي لازم تفهميين انو انتي ناديه الطفله الي ظلمتها امها
والشابه الي الناس ظلموها بجريرة امها
... ... بس انا ليش من اسمع صوته ارجف
... ... عادي ناديه ...فيصل رجال وشخصيته قويه ورتبه اكيد الكل ينعجب بي لكن انسي ناديه انتي بعمرج
ما يتقبلج المجتمع
... ... ليش مو هاي حنين ؟
... ... حنين لان مرتضى يعرفها وابو وامه يحبونها على حب بيبي جميله كافي لا تقارنين نفسج بحنين
هاي المسكينه ما تعرفين القدر شنو ضام الها
... ... كافي ناديه وهذا فيصل ابد لا تنطي مجال
دخلت للقاعه وانا بغير عالم گعدت وخليت الجنطه والملازم گدامي
اجتني فاطمه// ناديه ناديه شبيچ
جريت شهيق وزفير ورديت ... ... لا بس شويه تعبانه
فاطمه // ليش دخلتي كان بقيتي بره ترتاحين بغرفة الطالبات
باوعت الها وانا ابتسم ... ... لا فطوم انا زينه شكرا الج
حضرت المحاضره وبعدها محاضره ثانيه وطلعنا ركبت بالخط وانا اشوف فيصل وراي بالسياره
ما عرته انتباه وصلت للبيت لگيته واگف بالفرع نزلت بدون ما التفت ودخلت للبيت لگيت حنين جايه سلمت
هي گالت
:شنو اليوم ما جايبه غدا
... ... لا والله حنونه نسيت هسه اخابر ثامر يجيب النه تدللين
:لا ندووش ما اشتهي ماكله بالمدرسه
انا گتلها ... ... حنين مو تاكلين لفات فلافل دائما تره مو زين وهم يگلوهن بزيت ما يبدلونه
:ادري ندووش اليوم صديقتنا بالصف جابت دولمه واكلت وياها
... ... زين بالعافيه بالليل ادزلج على كباب وهسه خليني انام لان تعبانه
حنين //زين ندووش نامي وانا راح اطفي الضوه وانزل بالحديقه اقرا
......شعجب
:باچر عدنا امتحان صعب كلش
... ... زين بس ديري بالج خلي شالج على راسج
: اي ان شالله لا توصيين حريص
لزمت النقال وكتبت الفيصل ... ... اتصور هاي التصرفات عيب تصدر من شخص مثلك شنو لاحگني من الكليه
ومن وصلت للبيت انت براس الفرع
من شفت الرساله وصلت راسا انطيته حضر ونمت وانا استهزأ بنفسي
... ... هذا بعده ما يعرف انا بت منو واذا چان يعرف فغايته يقضي وكت ويلعب
گعدت العصر قبل المغرب بشويه غسلت وجهي ونزلت لگيت حنين گاعده بالمطبخ واساسا ماكو احد گتلها
... ... ياالله حبيبتي اصعدي انا گعدت
اشوف بوجه حنين اصرار ع النجاح عرفت هذا الشي حتى تنخطب المرتضى وتطوي صفحة التعب الي مرت بي
سويت العشا وصعدت خابرت ثامر يجيب ربع كباب وصمون وببسي وهو الرجال بسرعه وداهن بايد الولد الي
يشتغل ويا بالمحل وهذا يشتغل بيوميته لان ثامر باخر شهر گلي
:عمو ناديه (هو مره يسميني ست مره عمو يمكن لان فارق العمر بيناتنا بس 12سنه )
:عمو ناديه ما شاء الله وجهج حلو المحل ما صرنا نلحك على البيع والشرا لذلك انا بحاجة عامل يساعدني
وانا گتله ... ... سوي الي تشوفه مناسب بس اهم شي يكون امين وتعرفه
وهو جاب ولد يعرفه جابه واتفق ويا باليوميه وصار يحسبله يوميه عشره
ثاني يوم داومت وتقريبا انتهت المحاضره الاولى وفتحت النقال شفت مكالمه لم يرد عليها من رقم غريب بعدها
رساله اقصد مسج (اسمعي الساعه 122تطلعين الباب الكليه لا والسماج ناديه ادخل اجرج من ايدج واطلعج گدام
الكليه كلها تره بعدج ما تعرفين اخبالاتي )
ما عرفت منو وبنفس الوكت خفت گلت يجوز لمى مسويتلي ملعوب او ميثاق او حتى ياسر كتبت
... ... العفو منو
راسا رد //انا الي حضرتي ست ناديه
عرفته هذا فيصل وحسيت بي شگد عصبي من كتابته اتصلت بنسرين گتلها // تعالي منتظرتج يم القاعه
اجتني سالتها وگلت الها على كلام فيصل وشلون كتبلي هي اتغير لونها وگالت
: ناديه روحي شوفي
ااستغربت من ردها جاوبتها ... ... شنو نسرين مو چنچ خفتي
هزت راسها // : لا بس هذا بسرعه ايعصب
... ... والله على نفسه بعدين هو شنو شيريد مني
نسرين جاوبتني // ناديه تره فيصل خوش انسان صدگيني واكيد من لحگج بالسياره او من كتبلج اكيد يريد منج
شي او يريد ايوصلج شي انتي ما خسرانه شوفي شيريد
... ... بس كلامه بي نبرة تهديد
: مي خالف شوفي شيريد لو انتي خايفه منه
هزيت راسي ... ... لا ما اتصور عنده شي مو زين نسرين اطلعي وياي خلي اشوفه شيريد
نسرين //قصدج اروح وياج لا يمعوده فكينه تره للعلم هو كل شي يعرف عنج
فتحت عيوني هي هزت راسها وگالت //هو سالني عنج وانا جاوبته
... ... اي يعني شگلتيله
گتله //هي يتيمه وعايشه ابيت عمها وگتله هي دائما تنجح الاولى ع المرحله
... ... وبعد
وگتله //كل الطلاب معجبين بيها بس هي ما تقلد الاحد
... ... هاا
نسرين //اي وسالني ليش اجيتي للشقه
انا جاوبته // لان هي تفكر تگعد هي وبيبيتها واختها بشقه فانا انطيتها المفتاح وگتلها روحي شوفيها اذا
تعجبج اكو وحده بنفس العماره اجريها
... ... وهو اقتنع بكلامج
نسرين //ما اعرف
... ... هسه ما ترحين وياي نشوفه شيريد
: لا وداعتج لو تنطيني مليون
لغيت المحاضره الاخيره لان بصراحه خفت من فيصل ينفذ تهديده ولان شفت رد فعل نسرين وهم كلامها خلاني
يصير عندي فضول اعرف شيريد مني وليش هو هلگد سائل نسرين عليه
بيني وبين نفسي حچييت وانا الملم بحلكي ... ... ... اي اروح اشوفه شيريد وابد ما انطي مجال
طلعت بره الكليه وكتبت الاماني انا رحت لان صار عندي شغل وصلت يم الگراج شفته واگف لابس رتبته
ونظاره واگف منتظرني انا راسا ركبت لان خفت احد يشوفني هو هم ركب وسلم انا رديت باهلا
هو ساق طريق الكليه بعيد شويه مشى مسافه واحنا ساكتين بعدين بادر بالكلام وگال
: وين تحبين نروح
باوعتله بخزره وگلت ... ... ياريت يااستاذ تگلي شنو رايد حتى انزل واروح للبيت
جاوبني ابرود // طيب يا انسه اعرف مطعم خوش يسوي اكل نتغدا ونحچي
... ... شكرا ما اشتهي
رد عليه //لازم مسدوده نفسج
ما جاوبته هو بقى ساكت ومشغل اغنيه للقيصر دار عليه وگلي //احبه بجنون
ما جاوبته
وصلنه يم مطعم فتح الباب وگلي// اتفضلي
نزلت وگتله ... ... استاذ ياريت ما نتاخر
هو ما جاوبني مشى قبلي ودخل والظاهر يعرفونه واهلا بالاستاذ واتفضل واحسن طاوله
فعلا المطعم كان فخم جدا يعني من هاي المطاعم الي انشوفهن بالافلام رحنا الطاوله بعيده شويه وگعدنا
وهو گال // شتطلبين
باوعتله وگتله ... ... استاذ اتصور سمعتني ما اشتهي
اشر بايده واجه النادل وما سمعت شنو شاوره بعدها اجوا اثنين وخلو على الطاوله دجاج ولحم ومقبلات وعصائر
كان الاكل ايشهي هو گلي //ارجو ان تسامحيني وارجو منج ان تاكلين حتى يصير ابيناتنا خبز وملح
بعدين گلي //ياالله سمي بسم الله الرحمن الرحيم
استحييت من كلامه بديت اكل مقبلات وهو صار ياكل تمن ويه لحم وهو يگلي اكلي ناديه مو بس مقبلات
انا اكلت شويه تمن ولحم لان شهاني وهو ياكل وشربت عصير برتقال بعدها هو گلي //ليش ما تاكلين
... ... الحمد لله شبعت
فيصل //شنو شبعتي انت تنقنقيين
ما جاوبته هو گام وگلي ذاك حمام النساء بي مغاسل هزيت راسي وگتله ... ... ماكو داعي هاي مناديل مبلله
مسحت بيها ايدي هو راح غسل ورجع گعد بعد ان شالو الاكل طلب چاي وباوعلي انا اشرتله جابو كوبين چاي
صار يشرب باوعتله وگلت
... ... استاذ اتصور لمن كتبت لي اطلع من الكليه مو حتى اتغديني واشرب چاي واذا كان بس هذا الي تريده
فياريت تسمحلي اغادر وشكرا على هاي الغدوه
هو طلع جكاره ودخن ونفخ الدخان بجهته // انا كنت عصبي بوقتها واكرر اعتذاري
... ... ما صار شي هسه اسمحلي
:رجاءا اگعدي واسمعيني
اتنفست ... ... اتفضل
: ناديه انا اول ما شفتج ما اعرف شنو صار بيه ما اكذب عليج انفاجات بيج بالشقه او......... لكن بعدين
عرفت عنج كل شي
سألته ... ... من گلت اتفاجات بيج بالشقه حضرتك قطعت كلامك
سحب نفس من الجگاره وگلي //يعني بدون زعل
هزيتله راسي هو جاوب // ابنيه وبشقه ابحدها شتسوي ؟
... ... ليش نسرين ما گلتلك ؟!
: گلتلي انو تردين تشوفين الشقه حتى تاجرين وحده وتكعدين بيها انتي ويه بيبيتج
... ... اي صحيح
: بس من اسمع كلام من نسرين مو اله يكون صدك
... .... وليش ؟
رد عليه بسؤال // انتي من يمته تعرفيها النسرين ؟
... ... من اول ما دخلت للكليه
:شتعرفين عنها
لملمت حلكي وعيني بعينه ... ... جاي اتحقق وياي
هو رد // لا بس ناديه نسرين انسانه ......
قاطعته بايدي ... ... اوگف استاذ اوگف مو من حقك تتكلم على انسانه مهما كانت وياريت تدخل بالموضوع
الي طلعتني على موده من الكليه بدون نسرين والي اعرفه عنها
فيصل بكل برود وهو يبتسم // انا احبج
انا فتحت عيوني وارتبكت وحتى رجف گلبي لكن حاولت اتماسك وما ابين مقدار المفاجأه هو سالني
:ناديه سمعتي ؟
بقيت ساكته
:ليش ما تردين ؟
جريت نفس وجاوبته ... ... لان منتظره تنهي عروضك
باوعلي وهو عاكف حواجبه // عروضي اي عروض
هزيت راسي ... ... لازالت مستمره بديناها بفنجان گهوه وبعدها صباح الخير ومساء النور وانوب تهديد ولازم
اطلع من الكليه والا
وبعدها بغدوه باجواء جدا جميله ثم اتكلمت على زميله الي كلام غير لائق وبعدين انا احبج وبعد استاذ جاي اسمع
خزرني //مو چنچ تستهزأين ؟
جاوبته وانا اهز راسي ... ... لا ابدا اريد اسمع
فيصل // شتسمعين جاي اگلج انا احبج وخلص
استجمعت قواي وگتله ... ... ليش خلص العرض مو المفروض اكو بعد كلام مثلا انسه ناديه انا احبج ومستعد
اسوي اي شي تردينه انتي بس اطلبي
... ... لان انا ما اشوف بالدنيا غيرج ومهما تكونين ومنو ما تكونين حتى لو بت ......
سكتت ما گدرت ارد هو گلي
:كملي ليش سكتي ؟
جريت نفس ونفخت هو گلي // انا قابل بيج حتى لو امج كاتله ابوج ومعدومه
هلمره فعلا اتفاجآت من كلامه يعني هو يعرف عني كل شي ما رديت بقيت اتنفس قوي ياترى شيريد مني هو
اتقرب من الطاوله وكانما يشاورني //ناديه انا كل ذني الي گلتيهن بس شي واحد نسيتي اتگولينه
انا احبج واحبج من كل وگلبي وحبچ مله عليه جوارحي خلاني اعيش ليل ونهار ويه اسمج وصورتج ما تفارگني
يابت الناس بس شفتج اخذتي عقلي حاولت انسى ما گدرت سالت عنج وعرفت كل شي ويوميه حبج يزيد بگلبي
ما رديت علي اخذت جنطتي وملازمي او وگفت هو اخذ السويج انا گتله
... ... حابه ابقى ابحدي
فيصل //شلون يصير لازم اوصلج
... .... لا رجاءا خليني براحتي
هز راسه طلعت من المطعم واجرت سياره وركبت بيها وانا خاله راسي ع الجامه وافكر اگول
... ... معقوله الدنيا ضحكتلي اخيرا وفيصل حبني وراح يتزوجني فيصل الهيبه والرتبه معقوله يقبل ياخذ بت مياده
... ... لا ناديه لاتفرحين يجوز يطلع مثل ميثاق اول مره احبج لو منو ما تكونين وبعدين كلي لا تتشيرفين براسي
... ... لازم اكون حذره لازم ما اخلي عواطفي هي الي تحكمني وهذا فيصل ينخاف من عنده
... ... خلي اشوف شنو يريد وافهمه انا لا مال تسليه ولا تمضية وقت الي يريدني يجي يخطبني
نزلت قريب الاسواق واخذت نستله وكاكاو وفواكه وعصير ويمه محل يبيع همبركر اخذت لفتين ورجعت مشي للبيت
وصلت لگيت الكل متجمعين گلت السلام عليكم وصعدت لگيت حنين نايمه بس حست بيه من دخلت سلمت عليها
وانطيتها الاكل شفتها متذمره سالتها
... ... خير حنونه
:تعبانه من كثر الدراسه شنو هاي
... ... لفات گلت يجوز ما يعجبج تتغدين من طبخ افراح
: هو ما يعجبني ما يعجبني بس شنسوي واقع حال
... ... هسه انزل اصبلج لو تاكلين اللفات
:وانتي
... ماكله بالكليه
:لا هذا هو اكل اللفات واشرب العصير
راسي بيومها دايخ نمت وانا افكر بفيصل وكلامه ونظرته الي كل ما اتذكرها اصير ارجف گعدت العصر لزمت
الموبايل وكتبت النسرين عتب ليش مسولفه على قضية مياده الفيصل
وهي بقت تقسم مو هي الي گايلتله اصلا ولا مره سالها عن اهلي
اتعجبت يعني هلگد مهتم بيه دزالي رساله //تره انا اغار منو جاي تراسلين
ما جاوبته كتبلي // وهم اضوج اذا ما تجاوبيني
بعدها كتبلي //احبچ باچر اشوفچ بالكليه مو
رديت ... ... ما اعرف
: لا تعرفين
بقيت افكر ليش هلگد مهتمه الفيصل وچان ردي
انا حالي حال اي بنيه تفرح من احد يهتم بيها وهم تتمنى يصير عدها رجال يحبها ويخاف عليها وتبني ويا اسره وبيت
حاولت الهي نفسي بالشغل وبعدها درست وصليت واخذت حمام وبدلت ورحت ويه الخط چنت اريد اشوف فيصل
حتى اعرف منه اشياء لازم اعرفها
دخلت المحاضره الاولى والثانيه وبعدها طلعنا انا حاولت اتاخر شفته كاتبلي منتظرج يم الكفتريا
رحت ما شفته دخلت للكافتريا اباوع نسرين رفعتلي ايدها واجيت سلمت وگعدت نسرين بادرت وهي تضحك
: عيني ندووش فيصل طول ما هو گاعد وياي ما بطلت عينه تدور عليج
انا ابتسمت هي رادت تگوم انا گتلها
... ... وين رايحه منا الطلاب هسه شيگولون بس تگومين انا هم اروح
شفت فيصل ضاج وانا اباوعله بتحدي هو ما حچى وياي بقى يسولف ويه نسرين انا وگفت وگتلهم
... ... اخذوا راحتكم لان وراي محاضره
رحت امشي بدون ما التفت وحتى نقالي غلقته دخلت للقاعه وما طلعت اله نهايةالدوام ومن وصلت سلمت وگبل
بدلت ونمت وگعدت المغرب صليت وسويت عشا ونظفت الطارمات وصعدت لگيت حنين تغسل بالملابس انا
حچيت عليها گالت اغير الروتين ابتسمت وبقيت الليل كله گاعده وانا العن اللحظه الي ابوي اتزوج بيها مياده كان
هسه حالي انا واختي غير شكل حاولت اقرا وبعدها صليت ونمت وثاني يوم الصبح هم ما فتحت الموبايل واجاني
الخط لان وگفت انتظره بالباب والشي الثاني كان بتوقعي اشوف فيصل لكن ما شفته وهم داومت ورحت للكفتريا
وهم ما شفته ولا شفت نسرين يعني ما مداومه من خلص الدوام رجعت للبيت اتغديت وبعدها فتحت موبايلي وانا
متوقعه الگى كومة رسايل لكن ما لگيت
وتميت الاسبوع كله ما شفت فيصل ونسرين شفتها مرتين او تلاثه وما صار بيناتنا حديث مجرد سلام
الجمعه العصر وصل ياسر انا وحنين نزلنه وسلمنه علي وراسا صعدنا
بالليل مانزلت اسوي عشا لان اعرف بافراح اتأولها لكن اتفاجأت بهديل تدك الباب وهي تگول
ماما اتگول اتفضلن اتعشن
انا جاوبتها ... ... ... لابالعافيه اخذوا راحتكم
حتى حنين ما حاولت تعرف ليش اناهيج سويت والحقيقه صحيح افراح وهديل وحتى اسيل اتبدلت معاملتهن
لكن انا اعرفهن اتبدلن بس حتى ايسكتني لان خايفات لذلك حاولت اخليهن دووم ايخافن ويتجنبن سكوتي
الي صار حتى ياسر ما دزالنه عشا وفعلا هذا الشي خلاني ما اصدك معقوله يجيب عشا وما يدز النه
ما اهتميت وره اكثر من ساعه نزلت ونظفت المطبخ وغسلت الطارمه وبعدها طلعت طماطه وصمون وجبن
وصعدت اكل انا وحنين هو لاگاني ع الدرج لكن ما بين انو مهتم الوجودي
وهذا الشي رغم فاجأني لكن ريحني لان عرفت انو ياسر شي من اثنيين يااما قنع ياخذ براء او انو شاف بنيه
وانعجب بيها
يوم الاحد داومت وما اخفيكم انا كل شويه اشوف موبايلي
من كملت اول محاضرتين فتحت الموبايل وشفت فيصل دازلي //منتظرج بره ياريت تطلعين
بصراحه ما اترددت اطلع واشوفه الهذا المتعجرف والي عباله كل البنات لقمه سائغه
طلعت وشفته لابس قمصله سوده وخال ادي بجيوب البنطلون وصلت بدون ما اسلم گتله ... ... نعم
گلي // اصعدي
حطيت عيني بعينه ... ... مو چنك تتامر عليه
جاوبني بعصبيه : گلت اصعدي بالسياره لا اكسر راسج
باوعتله وخزرته جريت نفس وصعدت وره هو مشى مسافه گلي //اسف
ما جاوبته رد عليه //ناديه گتلج اسف
هم بقيت ساكته هو اتكلم بعصبيه وهو يضرب على الاستيرن بعد ان وگف السياره
: ليش ساكته ليش ما تجاوبين ما اتصور صرتي خرسه
... ... لا منتظره اتكسر راسي
: اسف مو بقصدي
جاوبته بنفس عصبيته ... ... وانا ما اقبل اسفك
اتنفس بعمق // : ناديه ليش تحاولين تعذبيني تعرفين بيه احبج
... ... فيصل ارجوك خليني اروح للبيت
: تدرين هاي اول مره تنطقين بيها اسمي
... ... اذا ممكن وصلني للبيت او خليني انزل اخذ تكسي
: صار بس مو قبل ما اعرف انتي ليش هيج تتصرفين
هزيت راسي ... ... ماكو شي
: لا اكو
... ... طيب يا استاذ ذاك اليوم لمن گتلي اشوفج يم الكفتريا وين شفتك
هو باستغراب // يمها ليش ؟
هزيت راسي ... ... لا متوهم شفتك داخل الكفتريا ويامن ؟
هو ضحك //هاا ما اتصور تغارين من نسرين
رفعتله حاجب وحچيت بتهكم ... ... ليش انت شايفني مثلها ؟
هز راسه //لا ناديه هي اجت شافتني واجت عرفت انا منتظرج اجت وكعدت
... ... شوف فيصل من الاخير انت شتريد
: ما اريد شي
جاوبته بنتر ... ... تمام هذا هو وهسه ياريت توصلني
هو گلي بدون ما يباوعلي //انزلي
انا استغربت من ردة فعله بس ما بينت هذا الشي نزلت بكل برود وبدون ان احچي كلمه نزلت وسديت باب
السياره بهدوء هو شخط السياره ولازالت منطقتنه بعيده وگفت اشرت التكسي وركبت اريد ارجع للبيت
مشت السياره للبيت شويه وگف السايق چنت ما منتبهه سمعت صوت ايگله
: ابو الشباب الي بالسياره زوجتي وانا اتاخرت عليها قبل ما اوصل شفتها صعدت وياك اسفين عذبناك ويانه
السايق باوعلي يستفسر عرفت اذا ما انزل ممكن اتسبب بمشكله للسايق فيصل طلع الكروه بعد ان سالني بيش
اجرته انا ما جاوبته الرجال گال //عمي ما صار شي ما مشينه اهواي روحوا الله وياكم
لكن فيصل ما قبل طلع عشر تالاف وگله // حجي انت على باب الله واعذرنا رحمه الاهلك
رجعت صعدت ويا ركبت بالصدر بدون ما اتكلم وهو بس يدخن وصلنه النفس المطعم ورحنا على نفس
الطاوله گعدنا وهو طلب گهوه جاب النادل الگهوه وياها ماي هو فتح البطل وشرب الماي وبعدين لزم الكوب
اخذ رشفه وگلي // : انا اسف ولا تسكتين تره تقتليني بسكوتج
بقيت ساكته واخزره هو رد //كتلج اسف ومستعد الكل شي
... ... ليش تسوي كل هذا
: لان احبج افتهمي احبج
... ... وبعدين
: شنو بعدين
... ... شنو نهاية الحب انتبه انا لامثل نسرين ولا مثل مياده
هز راسه //اعرف
... ... اي جاوبني
: اريد اتزوجج
فتحت عيوني ع الاخر هو هزلي راسه وگال
: مثل ما سمعتي اريد اتزوجج على سنة الله ورسوله هسه لا تجاوبين اي شي اسبوعين او اكثر عندي دوام
اخذي وقتج فكري الف مره ومن ارجع اريد اسمع ردج اذا موافقه راسا اجي واخطبج وما عندي شي يمنع زواجي
بقيت ساكته وهو صار يدخن وبدا يحچيلي عن حياته واعجابه بيه رجعت بعد ان طلبت منه ان يوصلني للبيت
وهو گلي راح يبقى على تواصل وياي من ردت انزل گلي
: ناديه ياريت تحاولين تخففين علاقتج ويه نسرين
ما جاوبته لكن بيني وبين نفسي شفت طلبه معقول سواء وافقت بالارتباط بي او لا
رجعت للبيت وانا احاول اتحاشى الكل لان الي يهمني هالفتره هو دراسة حنين ما حبيت اصطدم بافراح وهديل
بقيت اداوم وفعلا صرت اتحاشى اشوف نسرين كنت من الاگيها حد السلام واطلع اي حجه حتى ما ابقى واگفه
وياها ودائما اتواصل ويه فيصل شفته مناسب الي ان ارتبط واوافق علي لان حسيت بي هو يحبني
وشخصيته قويه اضافه الى وظيفته وهو يعرف كل شي عني اقصد جريمة مياده فاكيد راح يساعدني وما يخلي
هادي وافراح يوگفون بطريقي وطريق اختي بالعكس اكيد راح يحميني
صرت يوميه اسهر وانا اقرا شنو يكتبلي فيصل واشوفه ملتزم بكتاباته ودووم يگلي الرجل هو العرين الي ترتاح
وتامن بي المرأه وانا عرينج ما اخليج تحتاجين شي حتى املاكج تخليهن يم المحامي وانتي الوحيده الي تتصرفين
بيهن
كلامه چان يطمني لكن ما اچذب عليكم اكو خوف بداخلي خصوصا وانا اشوف نظرات ياسر الي چان يخفيها
عن الكل بس عني لا انا اعرفها وفاهمتها
فيصل يوميه لازم انطي تقرير مفصل وين رحت وشنو درست وشلون جاوبت ويامن گعدت وشنو اكلت ومنو
ضايقج وچان كله ايسميني حبيبتي وبنيتي وكلمة ابنيتي كلش اتاذيني لان اتذكر سراج من ايگولها الي والي تركها
للكلمه ونساها من لمن اتزوج سجى واكتفى بكلمة اسف وكأنما يدفعني ثمن طلاگ سجى من عنده سراج الي شفت
مقدار ضعفه وهو ما گدر ايرد عليها
صرت اسال بتفسي ... ... زين من ننخطب انا وفيصل هم لازم سراج يحضر يكون الجواب
... ... اي اكيد يحضر حتى لو انتي ما بلغتي اكيد كرم ايبلغه
جريت نفس وانا اسال نفسي ... ... لا ما اخلي عمي كرم ايبلغه اصلا انا وحنين مو اباله
دووم فيصل يبقى وياي الى ان اطلب منه انام لان تعبت ودووم يطلب مني ان اگله حبيبي لكن انا ما اگدر الفظها
وهذا الشي كان ايضوجه وفعلا انا ما اگدر الفظها ولا حتى اكتبها اله
كنت بالمحاضره ومن طلع الدكتور شفت نقالي وقريت المسج وهو يگلي
- - - اذا انا ما موجود ما احب تلبسين اللون الزهري اله الي
كنت بيومها لابسه شال وجنطه وحذاء لون زهري عرفت فيصل بالكليه طلعت ورحت للكافتريا شفته گاعد هو
ويا طالب من شافني الولد وگف وراح وصلت يمه ابتسمت وگتله ... ... الحمد لله ع السلامه
هو رد عليه وگال //كمليها بكلمة حبيبي
انا ضحكت رد عليه //اشتاقيت الهاي الابتسامه
... ... اشلونك
: هسه فوك الريح تدرين ليش
... ... امممم ليش
: لان اجمل وحده گاعده وياي
صفن وجر نفس وگلي //احبج واموت عليج
... ... شكرا
رد وهو عاكف حواجبه // : شكرا ياالله عفوا اسمعيني بعد ما اتحمل گليلي يمته اجي اخطب
انا فتحت عيوني هو هز راسه //اي يمته
... ها يعني شنو
: يعني يايوم ادز اهلي ويخطبونج اليه انا حاضر ما عندي شي من ننخطب اسبوع ونتزوج
انا بتردد ... مو حنين
: شبيها
... ... سادس ما اريد شي اياخرها
فيصل ابتسم //هاي شنو قابل عدنا حرب هي خطبه تجي نسوان وتفاتح اهلج وبعدها تجي الزلم والبسج الحلقه واعقد
واسبوع وانتي مليكتي بعد حنين شعدها ما عليج اجيبها تعيش وياج
... ... هههههه تحچي صدك كل شي محضر
: اي شعندي تدرين حبيبتي ما اعرف شنو صار بيه ما صرت اگدر اعيش بدونج
... شكرا
: الله عليج ! هو وگف وگلي //ياالله
...وين
: اضربي المحاضره وخلي نطلع
... بس
: بس شنو ناديه انا خطيبج وبعد ايام تصيرين زوجتي يالله ياعمري
هو طلع وانا شويه بقيت وطلعت وانا افكاري متشتته بعدين گلت
... اي انا اوافق على فيصل اقلها رجال واعتمد علي
طلعت وانا شفته واگف منتچي على سياره جديده لونها رصاصي تلمع ورقمها جدا مميز فتحلي الباب وهو يگلي
: اول شخص راح يباركها ويگعد بيها انتي
اباوع الها ... ... مبروك حلوه تخبل
:هاي الج اكيد
هزيت راسي ... لا انا ما اعرف اسوق
باوعلي باستغراب //ومنو يخليج اتسوقين هاي الج من تصيرين زوجتي
غمضت عيوني وانا اريد احلم بان اگعد بالسياره وانا لابسه البدله البيضه لكن شفت سراج بابتسامته المعهوده رغم
حزنه باخر مره شفته ما انتبهت اله على ايد فيصل امتدت الايدي انا فزيت ورجعت ايدي وهو يگلي
: اسم الله شبيج
باوعتله وما جاوبته هو رد عليه// ناديه ليش هيچي انا ما سويت شي غلط
... ... لا فيصل ما يصير
رد عليه // : بس انا حبيبج وانتي راح تكونين زوجتي
... ......اي من اكون لكن هسه مستحييل
: بس انا يابنت الناس ما غلطت
... وانا هم ما غلطت
كان كلامي ويا جاف هو سكت وانا هم ما حچيت اي شي نزلنه بنفس المطعم وطلب غدا اكلت وهو وصى على
سفري گلي اخذي الحنين ورجعنه واثنينه ساكتين من ردت انزل گلي
: اعملي حسابج الجمعه اهلي يمكم
ابتسمت ونزلت ثاني يوم رحت للكليه وهناك شفت نسرين هي سلمت عليه وانا رديت السلام وحاولت اتحاشاها
سالتني گالت //خير فاطمه تگول امس حضرتي بس اول محاضرتين
جاوبتها بدون اهتمام ... ... اي فجأه تعبت وطلعت
نسرين //سلامات وهسه اشلونج
... ... الحمد لله احسن
طلعت بالاستراحه ورحت للكافتريا وشفت فيصل جاي اتقربت يمه وانا ابتسم سالته ... ... شلون يخلوك تدخل
ضحك وگال //معارفي هواي بس خلي اطمنج دكتور كاظم صديقي
... ... بصراحه ما اعرفه منو هذا
: يداوم بقسم علوم البحار
... هاا
هز راسه //اي انتي بعلوم البحار تعرفين احد
رفعت اكتافي ... لا منين اعرف
باوعلي وگلي// ادري بيج هاا حبيبتي هسه على اتفاقنا الجمعه مو
اجه صوت نسرين // سمعت الجمعه خيير شعدكم الجمعه اخذوني وياكم السلام عليكم
انا باوعت الها وابتسمت وفيصل رد //عليكم السلام
انا هم رديت ... ... عليكم السلام
نسرين باوعتلي وابتسمت وردت باوعت على فيصل // الحمد على سلامتك ابو اصيل
شفت فيصل اتبدل وجهه وهي استردفت //شلونه اصيل (وباوعتلي )الله عليج ناديه اكو واحد هالوكت يسمي
ابنه اصيل
هي ضحكت وگالت // ما گلتولي شكو الجمعه
باوعت الفيصل وانا متفاجئه وشفته شلون ضايج رديت عليها ... ... لا ماكو شي بس فيصل ايگلي يوم الجمعه يريد
ايسافر هو وعائلته البغداد من رخصتكم انا عندي محاضره لازم اروح
رحت امشي وحتى ما سمعت شنو نسرين گالت احس نار تطلع من خشمي واذاناتي وگلبي يدك وصلت للقاعه
وحضرت المحاضره ورجعت للبيت حتى من گعدت بالسياره ماگعدت يم الجامه وانا غالقه النقال نزلت للبيت
وصعدت فوك للغرفه وصلت سلمت على حنين وگتلها
... ... انزلي صبي غدا لان كلش تعبانه
نزلت حنين وانا قفلت الباب وفتحت النقال لگيته ما كاتب شي كتبت اله
... ... فيصل اعتبر كل شي انتهى ابيناتنا ما اريد لا اسمع مبررات ولا اقبل اي اعتذار
رسلتها اله شفتها وصلت وقراها انا انطيته حظر وحتى رقمه هم حذفته جريت نفس وصرت احچي ويه نفسي بعصبيه
... ... انتي غبيه نسيتي انتي بت منو واذا مهندسه تردين واحد بي خير يجي عليج ما يجي البي خير ما يجي الج
لان انتي بت مياده والناس تخاف ما ترتبط بوحده مثلج اصحي ناديه لا تحلمين اصحي واتذكري انتي بت مياده
شوف هذا شنو راد منج ومن شافج انتي صعبه اجاج عن طريق الخطبه والزواج وهو بالاساس متزوج
اصحي ناديه وانتبهي النفسج
هزيت راسي ... ... افراح گالتها كلمه لو شنو تصيرين هم تبقيين انتي انتي ناديه بت مياده مستحيل المجتمع
ينسى او يغفر الشي الي سوته امج
بقيت ثاني يوم ما داومت بحجة تعبانه الاربعاء داومت وانا ناديه نفس ما انا گلبي چان ينزف لكن الي ايشوفني
ما مبين عليه اي شي بوكتها ما شفت فيصل ولا هو دزلي اي شي لا اعتذار ولا اسف
وشفت نسرين الي قررت فعلا اقطع علاقتي بيها رغم ادري هي تداوم اخر مرحله يعني وين بعد اشوفها
بقيت اداوم وما شفت فيصل الي اول ايام صرت اسبه والعن كل لحظه عرفتني بي لكن بعدين ما صرت افكر بي
وامتحنت نصف السنه وصارت العطله رحت البيت عمي كرم وبتنا انا وحنين ليلتين ورجعنا وصارت حنين
تراجع وما تضيع دقيقه خطيه حتى التلفزيون لغته وبدا الدوام وباول يوم صادفت فيصل موجود بالكليه وطلب
مني ان نحچي وصلت المصطبه وگتله ... ... اي استاذ اسمعك
جر نفس وگلي //انا جاي اگلج انو انا ما ضميت عليج امر زواجي لان ردت اقضي وكت او العب حالي حال
الشباب لا انا ضميت عليج ما ردت اخسرج
باوعتله بعدم تصديق //اي لاتباعيلي اعرف ما راح توافقين بس انا حبيتج الج صحيح متزوج لكن زوجتي
ما منتبهه الي بقدر ما منتبهه النفسها لذلك انا ادور على راحتي بره وبشتى الوسائل ومن شفتج حسيت انو انتي
الي راح تعوضيني عن كل شي ردتج الي زوجه وحبيبه وبنيه سالت عنج وعرفت كل شي والي عرفته ما غير
نظرتي الج ولا نقص من معزتج بالعكس زاد حبي وهيامي
ردت احچي هو رفع ايده يعني اسكتي // عبالج اريد اقضي وياج وقت او اضحك عليج تره من
كعدنا قررنا الجمعه اجي واخطبج وانا مسولف الاهلي واخوتي وحتى الزوجتي ومو اول واحد يتزوج ثانيهخ
لا مسوي عيب ولا حرام
اتنفس وكلي //اخذي وكتج وفكري ومن توافقين انا برسم الخدمه واي ضمان انا اوافق علي بس شغله وحده
ما راح اوافق عليها وهيه تكليلي اطلك زوجتي لان بكل بساطه عندي ولد منها ما اريده بيوم يتربى وهو يكرهني
ناديه انا احبج واحبج واحبج واموت عليج
جاوبته ... ... بس انا يا استاذ ما اقبل ارتبط بشخص متزوج وعنده ولد ليش اخرب عائله بايدي مستحييل
هو رد // لا تگولين مستحييل الي راح نسوي لا عيب ولا حرام انتي راح تصيرين زوجتي وهي زوجتي لكن
انتي الي احبج والي اريد الگى راحتي يمج
... ... اسفه ما اگدر ما احب الظلم ومن نتزوج لو انا لو هي لو حتى ابنك راح ينظلم اسفه
: براحتج بس هذا ما يمنع ان اتفكرين انا لا اول ولا اخر واحد يتزوج على زوجته وصدكيني كلام رجال لا انتي
ولا هي راح اخليكم تحسون انو اكو ضره بيناتكم
وگفت ... ... اتمنالك الخير والسعاده والاستقرار ويه زوجتك وابنك
باوعلي //وانتي حبيبتي واكيد راح تكونين زوجتي
ابتسمت وهزيت راسي ... ... لا ما اتصور انا مستحيل اقبل انا ما موافقه
جر نفس قوي //زين ناديه انا الي اتمنالج السعاده بس يمته ما تحتاجيني راح تلگيني موجود ومنتظرج
وصدگيني الاخر لحظه اتمنى ارتبط بيج لان حبيتج مثل ما انتي كنتي تتمنين الانسان الي يكون الج سند
واستقرار انا چنت اشوفج انتي راحتي واستقراري وهم ما يمنع ان اتفكرين
هو راح بدون ما يباوعلي وانا بقيت افكر واسال نفسي ... ... معقوله هلگد يحبني
... .... بس انا مستحييل احطم عائله مستحييل
وبيومها اخذت نتيجتي ناجحه بامتياز على المرحله واهنا الاساتذه گلولي انو اشد حيلي
بالمرحله الرابعه لان مكاني وياهم بالكليه اتصدگون اذا اگلكم ما فرحت لان كلام فيصل ونظرته الي خلني بحيره
وانا استرجع كلامه الي ما يقبل يروح من ذهني فرحانه
واستمريت بدوامي عادي چنت اداوم وما صرت التقي بنسرين وتقريبا متحاشيه الكل فد يوم الصبح
اجه عليه الخط چنت دايخه وتلعب نفسي يمكن مستبرده بنص
الطريق قررت انزل لان اكثر من مره اتقيأت السايق گلي بس اوصلهم ارجعج لكن انا گتله انزل
اخذ تكسي وفعلا اخذت تكسي ورحت للمستشفى انطاني الدكتور ابره وحبوب وگلي انتي مستبرده
ورجعت للبيت كانت الساعه بالتسعه ونص او اكثر شفت سيارة ياسر بالباب والباب مردود دخلت وصلت
الباب المطبخ سمعت افراح تگله
: لا تقنعني ما اقبل
: يمه احبها ما اگدر اعيش بدونها واخذها لو ادري اموت
افراح //لا انت ما تموت هي اموتها
ياسر بترجي //ليش يمه مو انا ابنج الجبير ليش تكسرين گلبي
افراح بكل برود //اكسر گلبك ولا تاخذها
ياسر // انتي مو تردين فلوسها اخذها واخليها تتنازل الج عن كل شي
افراح // ما عليك انا اخليهن يتنازلن وهنه الممنونات انت اسمع كلامي وخلي اجيبلك براء ولك تدري بيها
تحب التراب الي انت تمشي علي
ياسر //لا يمه لو الف مثل براء ما تترس عيني انا اريد ناديه
افراح وگفت وگالت //شوف ياسر ما طول هيج صدگني احرگها وما توگف الها لا على جثه ولا تعرف الها طريق
ولك انا اخذ بت مياده لو تموت هي كلمه تاخذ براء وغصبن عليك
ياسر رد على امه بتحدي //وانا راح اگلج غير بت مياده لا تفكرين اخذ ابقى كل عمري ما اتزوج وما اخذ غيرها
افراح // خوش ياسر انا انا وهيه هيه سهله
/
