رواية اغفري لي الفصل الثامن والأربعون بقلم أوتار حزينة
كيف لي ان اكون كما تريد
وانا ارى نفسي غريبه عني
ارى ندوب روحي،،، بينما انت لا ترى سوى ابتسامتي
احاول ان اتشكل على مقاس امنياتك
لكنني اذوب في الداخل بصمت
واحمل في صدري صرخة لا تسمعها
اريد ان اخبرك من انا حقا
ولكني لا استطيع لانك ترى امراة
وانا ارى طفلة مشوهة الملامح
لم تعد تعرف طريق الفرح
ونسيت كيف يكون شكل
الضوء
يمامه
حجه هيج وسد الخط بذيج الساعه بجيت
الما عمت عيوني خاله طبت عليه شافتني
بهل الحاله سدت الباب واجت عليه
بسرعه سالت بخوف
«،،هاي شبيج يمه ليش تبجين
«،،خاله بعد مااريد اظل هنا
«،،ليش حنين شصاير
«،،تعبت واريد ارجع بيتج حتى ارتاح
كعدت يمي وردت
«،،،الي بيج مو تعب قهر يمه لان
انقهرتي من وره حجي ام جمال
مارديت شهكت بخنگه كالت
«،حقج يمه بس الحجيه كالت اليه هي مارضت
الها وانتي سمعتيها ردتها خوش رد
«،،خاله الله يخليج خلي نرجع هي بعد ماتحتاجنا
لا هي ولا اابنهاا
«،،منو كلج هي ماتحتاجنا بعد
«،مو اجوي ولدها ونسوانهم وبناتهم هم يشيلون البيت احنا شكو ظالين هنا
صفنت عليه تفرست بملامحي سألت
«،،احد وياج سامعه كلمه من احد
ردت احجي واطلع الي بگلبي بس ماكدرت
لان اعرف ماراح تكدر تسويلي شي وهم خفت
لاتروح تحجي الها السمعته مني لان اعرفها
ماتضم سالفه على الحجيه
كلت
«،،لااا محد وياي بس حجي عمتهم قهرني
واحنا هم طولنا هنا واشوف مالها داعي كعدتنا
يمهم وولدها ونسوانهم يمها
«،،والله يايمه اني قبل كم ايام كلت الها مادام
الولد يمج هم والبنات راح نرجع اني
وحنين لبيتنا وماقبلت كالت
اني متعلمه عليج انتي
وياها ومااكدر اعتمد او اطلب شي
من البنات
ذبيت حسره قهر كملت
«،،وهي يايمه زينة ويانا وشفتي شسوت الج
واليه يعني عيب منها ومن الحجي
وولدها نعوفهم ونمشي
«،،يعني بس اريد افتهم احنا شوكت راح نرجع
لبيتنا
سالت بضوجه وقهر كامت وردت
«،،،من يرحون ولدها ومهيب يطيب نرجع
ولا ديرين بال لكلام الي يجون لان انتي شفتي الحجيه من سمعت شلون جفصت
بطن حماتها
مارديت كالت
«،،،جيبي يمامه سوده عليه انتي تبجين وهي
صافنه عليج
اخدتها مني حجت
«،،اني طالعه وانتي كومي غسلي وجهج
واطلعي ورايه
طلعت من يمي صفنت على
الباب من سدته مااعرف شلون راح اكدر اظل هنا
وهو،،،الى متى راح يظل ساكت وضام
هالحب بگلبه
كلت اجاهله ومااروح علي ولا اسويله شي
حتى مايحجي شي ولا اسمع نفس الكلام
بس كلت لاا راح يتخبل
عليه وخاف يتعارك
وياي ويطلع
صوته
وانفضح
كلت احاول بالهداوه احجي ويا وبالعقل
اظل ارفضه واعيد نفس الكلام
واشوفه الفرق بينا وهو
بلكي يحس ويفتح
عيونه ويشوف هو منو وابن منو
ويعوفني لان اعرفه مغرور وشايف روحه وعنده
عزه نفس جبيره واكيد اذا ظليت
على نفس الرأي راح يحس
كرامته انجرحت واجز
روحه مني
كمت ادعي من الله يحس على روحه
ويعرف هو منو وابن منو
ويشيلني من راسه
وره مشوار طلعت من غرفتي غسلت
ورحت للمطبخ جانت خاله ارؤى بي هي
وخاله اعتماد من شافن وجهي طيبن خاطري
وماقبلن لحجي عمه الولد ثاني يوم راحو للدكتور ومناك رجعو لبعقوبه وره يومين
اختهم ورجلها رجعو لتركيا
لان خلصت اجازته
غاده
الافلاوانزة طولت عندي يله راحت والحمد لله صرت زينة بهل الاسبوع جان عيد ميلاد حمزه وصيت جعفر يجيب اله سبحه كهرمان اصليه وجابها وكتله يحفظ السر
وهم طلبت اله سيت زي عربي دشادشه سوده بيها خطوط رفيعه وشحاطه وعكال ويشماغ
ضميت الهديه كلت اسويله مفاجأه
واحتفل اني ويا بليل
بيوم عيد ميلاده عزلت غرفتي ،،بدلت الفرشه والبردات خليت اثخن لان اجه البرد وراها عزلت الكنتور ورتبت هدومه اصفط واشم بيهن
مبتسمه وميته على
ريحته
كملت كلشي وعلوش نايم ورايح بسابع
نومه طلعت ورحت للمطبخ بيبي
كاعده رانيه تثرم
زلاطه سالت
«،،،ها كملتي تعزيله غرفتج
«،،،،اي
«،،،،جان عفتيها يايمه الما اصيرن زينه وتگوين
بعد اكثر
«،،،مابيه شي بيبي حصان ااني
«،،ههه قصدج فرس
««،ههه هو ده ياختي
جاوبت رانيه ضحكت هي وبيبي كلت
«،،عندج شي اسوي
«،،لا ماعدنا شي
«،«لعد اروح اغسل
«،،روحي
رانيه جاوبتني رجعت لغرفتي اخذت هدوم
وطبيت غسلت طلعت اخذت
جهازي اشوفه
وينه
خابرته رد
«،،هلا بالحلوه الي نهبت گلبي
«،،هههه هلا بااجمل واحد سكن گلبي
«،،،الله شوف الغزل الحلو
«،،،،ويلوك بس الك يبعد ناسي وهلي
سكت وجاوب وره لحظه
«،،،هم انلام لان احبج هوايه
«،،ههه حبني اني استاهل انحب
«،،اوف ولج دخت وسگرت بليا كاس
«««ههه ماعرفتك سيد لو يسمعك جدو الا
يكول رجعي ابني اليه انتي
بدلتي بغير واحد
«،،،،انه بس يمج اصيرن غير واحد
««واموت علي لهل الواحد يمه فديته وفديت
سوالفه الحلوه مح مح
كمت ابوس بي ضحك وكال
«،،،ولج جااي اسوق هسه اروح رون سايد
««لاا خليك صاحي اسكر بليل
««هههه
ضحك بصوت عالي وكال
«««ولج انتي شنو والله خبلتيني وخليتني
اضحك وي روحي مثل المخبل
ابتسمت كلت
«،،،احلى مخبل والله
سكت كملت
«،«اكلك
«،،كولي ياجمره گلبي
«،،العصر اريد اطلع
«،،ادللي من عيني بس وين تريدين تروحين
«،صالون يعني احف وهيج شغلات
«،،اوديج وتامرين امر
«،،خوش نتغده وارتاح ساعه ونطلع
«،،تمام انه وصلت حضري هدومي اسبح
واتغده اتمدد ساعه وراها انه
بامرج
«،،،يسلمو يبعد عيوني ورمشي
««،انتي بالغرفه
«،،ههه اي
«،،جايج لاتطلعين
حجه هيج وسد الخط وخرت الخاولي
ورحت للميز رشيت عطري وفليت شعري
كمت امشط بي
مبتسمه
هو طب الضحكه بوجهه سد الباب
واجه ليمي جرني علي
وسال
«،،،،غاسله
«،،اي اليوم سويت حمله على الغرفه گلبتها
گلب
فر راسه عليها ورد
««،عاشت ايدج مسويه الجو رومنسي
حجه هيج ودنك باسني من رگبتي
شمني بنفس طويل وحجه
بهمس
«،،عطرج يموت
ظل يبوس بيه الما وصل لشفتي
باسني ولمني لحظنه بقوه
دخت وحظنته
من رگبته
شالني لصدره وحسيته فقد وخرت
وكلت
««حمزه مو هسه
تنهد وكال
«،،والله انتي شايله خطيتي
«،،ههه اني
«،،اي تتحارشين بيه ومن اگضج
ادكومين اجرين بظهرج
«،«راح ابطل اتحارش بيك
جاوبته ومشيت من يمه جرني على
صدره كزكز
«،،شحدج ولج والله اذبحج
«،،ههه ماافتهمت شتريد
««اريدج تظلين هيج مسودنه ومسودتني وياج
دارني علي العيون ذبلانه وصاير دم كمل
من لزم خدي
«،،،ياجمرة گلبي والله ماتعرفين شكثر
افرح من اشوفج هيج تحبيني
ابتسمت وجاوبته
«،،ظل فرحان لان اني راح اظل احبك
واحبك واحبك طول العمر
الوجه ضحك وكال
«،،،ليش احس اليوم انتي بيج شي
«««مابيه شي بس افرح من اشوفك ترجع للبيت
وامشي يله اسبح وتعال حتى نتغده
تغدينا ونام ساعه رضعت علي نام وطلعنا اني
ويا رحت للصالون حفيت وسويت
تنظيف بشره وسرحت شعري
اجاني وره ماكملت من
صعدت كتله
««،خلي نروح للخاصكي مشتهيه حلويات
«،،تمام بس انه ماشايف حلو ياكل حلو
ابتسمت وجاوبته
««تره راح اصير مغروره من ورة حبك ودلالك
«««ههه صيري بويه يلوك الج
حرك ورحنا للخاصگي جنت اريد اكتب على
الكيكه عيد ميلاد سعيد حمزه
وهو يمي شفته راح يباوع
للحلويات وطلب كم
نوع حجيت
بسرعه وي الولد افتهم وكتب اني عيني
علي ملتهي غلف الكيكه وهو ماشافها م
رجعنا للبيت ضميتها بثلاجتي
تعشينا خفيف وانطيت حصه
جدو وبيي ورانيه من الحلويات هو
كال
«،،،اروح اتعلل يم جدي
«،،براحتك
جنت اريد ارتب الغرفه واسويله جو رضعت
علوش ونظفته غفى وعاف الجو
لامه قفلت الباب
خليت طبله جبيره بالنص ورتبت الحلويات
والكيكه بالنص كعدت نفخت كم
نفاخه حمره وشمرتهن
بالگاع
بقى بس ابدل رحت للكنتور اختاريت فستان
كلوش قصير مفتوح من الجتف
لونه احمر فاتح لبسته وخليت مكياج وطوخت طلعت حذاء كعب باوعت لروحي
بالمرايه طالعه حلوه
انتظرته يجي تاخر اخذت جهازي
راسلته
«،،،حب ماتجي
قراها جاوب
«،،بعد شويه
«،،يعني شكد
«،نص ساعه
حجيت وي روحي
««يبو واني انتظر نص ساعه
كتبت
«،،هوايه
«،،خير احس وراج شي
طگيت صوره من رگبتي ليم الحذاء ودزيتها
اله شافها دز سمايل فاك عيونه
خربت ضحك كتب
«،،،جااايج بويه
بسرعه طفيت الضوه وعلكت الاحمر
صرت وره الباب طب وكف
وصفن على الطبله
ضحكت
اندار شافني ابتسم وسد الباب
رحت حظنته وبسته من خده وكلت
«««مبروك عيد ميلادك يااغلى من الروح
««،ولج هاي شمسويه
«،،احتفل بيك وبعيد ميلادك
اخذته من ايده ليم الطبله علگت شمعه
وكتله
««،اطلب امنيه وطفي الشمعه
صفن عليه باعجاب وكال
««،شاتمنى وانتي عندي
««،ههه يعني ماعندك بعد امنيه منا منا
«،،عندي
«،،لعد يله كولها بگلبك وطفي الشمعه
سوه مثل ماكتله سالته
««،شنو تمنيت
رد
«««تمنيت من الله اظل اشوفج هيج
دوم تضحكين والفرحه بعيونج
جاوبته مبتسمه
«،،انت بس ظل يمي واني اظل فرحانه على
طول وها شوف شجبتلك
هديه
وخرت منه جبت هديته انطيتها اله فتحها
كال
«،،هاي شنو سبحه كهرب
«««اي واصليه
فرگها بايده شمها ورد
«،،اي والله اصليه بس تره هاي غاليه
«،،ههه الغالي للغالي يرخص مو انت هيج
تحجي
ابتسم ورد
«،«هالايام جاي ادلليني هوايه
«،«وبعد شوف السيت العربي
فتح العلبه سالت
«،،حلوه الدشادشه وكشخه
طلعها ورد
«،،والله توب ومال شيوخ
«،،انت شيخ گلبي وشيخ الكل
رديت علي ضحك وكال
«،،وجت وجت
«،«ههه لا بعد هسه اعلگها الك
رحت علكت اغنيه ساريه بس اسمع مني
شديت الشال وكمت ارگص اله
كعد صافن عليه والعيون
تضحك
قربت منه اهز واردد
«،،،،طرف الهباري اسمر ياسابي العين
حبوك اجباري القلب قبل العين
ضحك وكال
«،،،اي خبليني بعد انه عايز خبال
حجه هيج وكام لحيله ظليت اتمايل يمه
مد ايده ولزم خصري جابني
علي وحجه بصوت
متغير وعيون
وكحه
«،،،فلك طرج مو حرمه غضب انتي
«،،،،ههه
خربت ضحك شالني لصدره وكام يبوس بيه بجنون
والجنون شفته منه من تخبل عليه
وعشنا احلى ليله
جنات
وره عقدي بكم يوم دانيه اجت العصر مااعرف
شبيها سالت
«،،هاي شبيج اشوفج مو على بعضج
حجت بعصبيه
«،،،كريم رايح لاهلي هداد ومتعارك وياهم
وابويه طارده من البيت
گلبي هبط وكلت
«،،اي
«،،،شنو اي كتلج متعارك وياهم وابويه طرده
«،،،هذا ماراح يجوز مني
حجيت بقهر ردت
««،لا راح يجوز لان حجيت لابراهيم شسوه
بذاك اليوم وشلون راد ياخذج
بالغصب وكال اخابر
ابو ادريس وخلي
هو يصرف ويا
«،،ااي وكلتي ارشد خطفني موو
صحت من قهري ردت
«،،لا ماكتله هيج
«،،لعد شحجيتي اله
«،،،كتله هو فگها منه وجابها لهنا
سال ليش محد گلي لا انتو ولا هو كتله هو
ماقبل وكال اني اتصرف
«،،،،،شوكت خابرتي
«،،قبل لا اجي عليج بشويه
فزيت وكمت كلت
«،،،وين جهازي
شفته على الكاونتر اخذته وخابرت ارشد
جاوب
«،،هلا جنات
«،،،ابراهيم خابرك
«،،لااا خير شصاير
«،،اذا ابراهيم خابرك وسال على الصار بذاك
اليوم لا دكله انت اخذتني للبستان
مالتكم
«،،،زين شصاير حتى هو يخابرني ويسال
سكتت وخفت اگله كريم اجه وتعارك وي اهلي
كال
«،،،،يولي مو جاي اسال ماجاوبين
«،،ها ماكو شي هو عرف انت تعاركت وي ذاك
وكلنا اله انت جبتني للبيت
«،،،زين ليش هسه حجيتو اله الصار
هم سكتت نتر بغضب
«،،،هذا هم اندك بيج مره ثانيه
«،،،لاااا
«،،روحي هو جاي يدك عليه
سد الخط ومتت رعب كلت
«،،ولج راح يگله وتصير مشكله
سمعنا جرس الباب اندك دانيه طلعت رجعت
وكالت بخوف
«،،ولج هذا ابراهيم اجه
حسيت بوجع بمعدتي وخفت لايعرف بالي
ضامي اني واختي ويزعل علينا
من صدك مشينا للباب
سمعته كال
«،،،ابو ادريس هذا الصاير البارحه بليل
اني كتلك حتى انت تصرف ويا
سكت بعدين كال
«،،تمام هلا بيك اني بيت جنات
سد الخط اختي طبت واني وراها سالت
«،،راح يجي ابو ادريس
««،اي
جاوب بضوجه وكمل
«،،بله هيج سالفه تنضم وماتنحجي
يعني لا انتن كلتن ولا هو
«،،ابراهيم هو كال لاتحجن شي اني اصرف
ويا
«««غلط دانيه جان لازم اعرف لان هي،من مسؤوليتي لو صاير عليها شي ماراح اخلص
من لسان اهلج وجان
صارت عزيزه
عدهم
سكتنا لان كلامه صح كمل
«،،،تايهه هي حتى ذاك يجي ويريد ينهبها اذا القانون ماسواله شي اكو عشيره تكسر ظهره من وره هالسالفه
«،،وهم تصير مشاكل واني اظل بالحلوك
جاوبته بقهر رد
«،،،جنات الصار بيج جبير يعني اني اعرف
ابو ادريس غلط من ماحجه اليه
الصاير بس اكول خلفه
علي من وكف بوجهه
وجابج لبيتج
دانيه باوعت عليه كلت ماعرف ولا ارشد
حجه شي ماجاوبته لان شفته صاير
فد مره ظل يلوم بيه اني
واختي ويحجي
على كريم
وره مشوار دك الجرس هو طلع رجع
وكال
«،،،،تفضل ابو ادريس
طب عاكد حواجبه سلم وكعد سال
«،،،،خير ابو يوسف شصاير واني
ماادري بي
«،،كول شنو الصاير وانت ماحجيته اليه
«««حگك عليه واعتذر منك من ماحجيت الك
الصار بذاك اليوم لان اني اتصرفت
ويا وانطيته حگه
«،،ابو ادريس السويته ماجاب نتيجه ويا
لان اجه هداد على بيت عمي
وهددهم وهددك
الخلقه انگلبت وحجه باعصاب
«««هينه اعلمه شلون يندك بيهم
««،شتريد تسوي سوي لان كريم سواها بدون
ملح
انسحبت وطلعت من يمهم اختي لحكتني
تلطم على خدها كالت
«،،راح يعلكها على راسه للمشعول الصفحه
«،،ابراهيم ليش حجه ليش گله
حجيت ودموعي نزلت رددت
««يعني شلون ياربي ماراح اخلص منه ومن
مشاكله شيريد مني بس فهميني
مو راح ازوج مو صار عنده
اطفال حلال علي
وحرام عليه
ابراهيم اجه اختي سالت
«،،شنو راح ابو ادريس
«،،اي
«،،،ليش كتله ابو يوسف راح تصير مشكله
جبيره واني والله تعبت من المشاكل
«،،لازم يعرف حتى يخلي حد اله
نتر بغضب وكمل
«،،،حتى يجوز منج ويعرف انتي صار وراج
رجال ويكدر يوكفه عند حده
«،،انت احجي ويا وگله خلي يجوز مني
«،،جنات انتي غشيمه مو تعرفين علاقتي
بكريم انقطعت وكرهني لان وكفت وياج من
ردتي الطلاك
سكت وكمل
واني والله بعد مااكدر افوت ابو ادريس
لان الرجال صار رجلج وانتي مسؤوله منه
واعرفه بس هو وابوه يكدرون اله
ويكدرون يوكفو عند حده
«،،،،اي جنات خلي هو يصرف ويا تره صارت
ماصخه ويوميا جاي ومسويلج فضيحه
اختي حجت
كمت ابجي ورحت كعدت ردد
«،،،لا حول ولا قوه الا بالله ولج يابه ليش
هالبجي هسه اختج لو عال
عليها واحد منو يوكف
الها غير اني
««،اي صح
جاوبته واجت كعدت يمي كلت
««خايفه منه لايسوي شي مو زين
انت مو شفته شلون تغيرت خلقته وصار
عصبي
«،شتريدين جنات اضم علي هالشي
زين اذا ماحجيت اهلج راح يسكتون مايحجون
الصار اله
سكتت كمل
««هذا الشي ماينضم ولا الصاير بيج بذاك
اليوم هم ينضم وجان المفروض تحجي
انتي واختج بس مااعرف
ليش ضميتو عليه
ماعندي كلام لا اني ولا هي هو مشى
من يمنا ضايج كلش دانيه
كالت
«،،زعل علينا
سالت بخوف
«،،،شراح يصير ياربي
«،،مااعرف والله اليستر من ابو ادريس
ارشد
سمعت شحجه ابو ابراهيم وطك شي
بالراس طلعت من يمهم
صاير نار اردد
«،،،بعدك كواد تحجي بيها وانت عرفت اني
عقدت عليها وصارت مرتي بس
هينه اعلمك يول وشوف
شراح اسوي بيك
صعدت سيارتي ابويه اتصل كال
««،انت وين
«،،رايح بشغله
«،،،ارجع ولاتسوي شي وخليني اني اتصرف
عرف بالصار كلت باعصاب
««،ياابه هذا لازم اوكفه عنده حده
«،،،،اي بس بالعقل مو بالاعصاب واني
اعرفك بس راح تگضبه ماراح ترحمه ويجوز
ترفع سلاح وتگتله
سكتت كمل
«،،،تعال للبيت وخليني اني اتصرف
«،،تمام
وصلت قريب المغرب نزلت ورحت للمجلس
ماكو بي بس الكهوجي تمشيت
للبيت طبيت من الاستقبال
اجه متوضي يمسح
بايده سلمت
«،،الگوه يابه
«««هلا ارشد
كال
«،،سد الباب تعال اكعد
رحت سديته اجيت كعدت يمه حجه
«،،،عمك خابرني وحجالي الصاير وشمسوي
هذا بيهم وعرفته من
يا عشيره وطلع شيخ نواف شيخهم من ارجع
من الصلاه اخابره
«««يابه خلي يجوز منها تره والله گوه گاضب
روحي منه
«،اهدأ وخليني اني اصرف
الاذان انرفع كام وكال
««،روح توضه وتعال نصلي بالجامع
«««اي يابه
صلينا ورجعنا ابويه خابر شيخ نواف وحجه
ويا على السواه جهازي دك جانت جنات وهاي اول مره تتصل عليه عرفت من ورة خوفها
اتصلت انطيتها رفض وكتبت
««،كاعد وي ابويه بعدين اتصل عليج
قرتها كتبت
«،،تمام
بليل كعدت بغرفتي غادي نار اريد اگوم
اعدمه العافيه بس مااكدر لان
راح يجيب اسم جنات
على لسانه واعرف
بروحي بس
راح اسمعه بحلكه اخلي طلقه بگلبه
واكتله
جهازي دك جانت هي فتحت
الخط كلت
«،، هلا جنات
««،هلا ارشد
سكتت بعدين كالت
««اني يعني خابرت حتى اكلك عوف
كريم وو
قاطعتها بغضب
«،،هذااا اسمه مااريده اسمعه بحلكج مرة ثانيه
ومااعليج بالي اااريد اسوي
سكتت كملت باعصاب
«،،،،كواد ااني حتى اعوفه جنات وهو يوميا
جاي هدااد عليكم وجايب اسمج
على لسانه
«،،،لا مو هيج بس اني مااريد تصير مشاكل
«،،،،واني جايب المشاكل الج ااني لو هو
«،،،،هسه انت ليش صاير عصبي اني حجيت
هيج لان مااريد اهلك يكولون عليه
جابتله المشاكل وهم
توهم عاقدين
«،،،محد يكدر يجيب طاريج بجلمه والمشاكل
مو انتي الي جبتيها هو الگواد
جاي يندك بيه جثير واجه
وكته اوكفه عند حده
«،،،ارشد عوفه
«،،لييش جناات خايفه على منو عليه لو علي
نترت بيه بغضب
«،،،،لااا مو خايفه علي لان
هو بالنسبه اليه انتهى من زمان من اول
ماشافته عيوني طلع من بيت
الي اخذها عليه وبعدين انت شلون تسال هالسؤال شعبالك اني بعدني احبه وخايفه
علي
جاوبتني بغضب وكملت
«،،اذا تحس هيج ليش ااجيت وردتني
ليش ذبحت روحك حتى اقبل
بيك
«،،ااني مااحس هيج
«««لعد ليش سالت هالسؤال
«««لان لحيتي عوفه وعوفه واني والله
گوه كاضب روحي منه خايف
لا اروحه علي ويكول
اسمج وذيج
اذبحه واسكنه الگبور
«،،، شفت ليش اكلك عوفه خايفه منك
اعرفك هيج راح تصرف شفتك
شلون تخبلت علي
وكتلته
كامت تبجي وتردد
«،،،اني مااريد المشاكل تعبت والله
وبعد مابيه حيل الها
«،،يولي كافي بجي والله ذبحتني بهل العوي
من شافتج عيوني وانتي بس
تعوين وتنوحين شوكت
تضحكين بوجهي
مدري
««راح اروح حتى ماتسمع صوت العوي
««ووين رايحه ابقي ولج افهمي اني مااريدج
تبجين من وره بشر مايسوه
«،،،يعني انت ماتسوه
سالتني وخلتني صافن كملت
«««اني مااريدك تتاذه
جن كضبت گلبي بايدها سالت
««،خايفه عليه جنات
ردت بتردد
««انت صرت زوجي ولازم اخاف عليك
ابتسمت وگلبي برد كلت وي روحي
راح يجي الحب بعد هالخوف كلت
«،،،لاتخافين عليه رجلج سبع وماينخاف علي
سكتت كملت
«،،يولي انتي غاليه عليه وافديج بروحي
لو طخ الهوه خدج وهذا لازم
اخلي اله حد حتى بعد
مايندك بيج ولا
يجيب طاري اسمج
على لسانه
«،،،تره ماراح انام من خوفي من الي راح يصير
«،،،،لاتخافين ونامي رغد لان الي راح يصير
هو كعده بين ابويه وشيخهم بحضوره
وحضور اهله وهم راح
يجرون اذنه جدامهم
ويخلوه يعرف
حدوده
«،،،وانت وياهم
«،،لاااا لان لو اشوفه ماراح ارحمه
«،،،،شلون بلوه ياربي
«،«اني بلوه
«،،،انت غضب مو بلوه
جاوبت بعصبيه وزعل كلت مبتسم
«،،جاي تذميني جثير هالايام
ماكو رد كملت
«،،اي اني غضب وبلوه ونار وشرار وبارود
واصير بركان لو شفت احد تعرض
الج او بجى هاي عيونج
الحلوه
حجيت هيج وكملت
«،،كلشي ولا انتي انگلب واحد ثاني اني نفسي
مااعرفه
«،«اني عبالك الله بلاني بواحد مم
قاطعتها
«،،كمليها مخبل كلت جاي تذميني جثير
هل الايام
«،تره ردت اكول متسرع
«««اي صدگت
ادريس طب واجه كعد بصفي تماره
وراه من اجت للجربايه سحبتها وخليتها
بحظني كلت
«،،ولدي اجوي
««،اترخص
«،«لا ظلي شوفيهم
فتحت كام هي ترددت بعدين فتحت
شفتها مفرعه والشعر نازل
على الوجه وخرته
بخجل كلت
«،،بعده اسود
«،،شنو
«،،،شعرج
««ها اي مااحب اصبغه
««لاتصبغي ابدا مايلوك الج غير هاللون
««بابا اشوف
ادريس حجه وياي خليت الكامراه علي
«،شوفي
شوفها سياره صغيره بايده كالت
«««الله هاي شكد حلوه
بنتي خلت وجهها بالكامره حجت
«،،هلو تماره
باستها تاشر بايدها
««اوي فدوه شلون بنوته تخبل
«««ولدي احتلوج
حجيت مبتسم ودحكت الها ردت
«««ولدك حلوين ودمهم ينحب
«««طالعين لابوهم
رفعت حواجبها وهالحركه خلتني اضحك
بصوت ابتسمت ودارت
وجهها كلت
«،،عبالك مو مقتنعه
دحكت عليه ساكته والنظرات لعبت بحالي
لعب كلت
«،،،،انتي اول حب اليه واول عشك
انتي الشوگ الي انتظره من سنين
يجيني بلهفه
الخجل بين بملامحها كملت
«،،والله ماجان حب الي حسيت بي
من شافتج عيوني اول مره لا احتلال
جنات بس غريمي مو عدو
لا حبيب
رفعت راسها والعيون التقت كلت
هايم بيها
«،،بس والله احلى احتلال واحلى حبيب
ولدي كاموا يكمزون يمي ابتسمت وكلت
«««راح يتعبوج ذوله القروده
شوفتها شكاعد يسوون بعدين درت
الكامره عليه كالت
«««الله يخليهم الك
«««الله يخليهم النا لان انتي راح تصيرين امهم
حسيت بيها تاثرت كلت
«««جنات مااريدج تنقهرين وخلي ايمانج
بالله جبير واني والله ماراح اقصر
وياج بشي اوديج لاحسن
بلد حتى يصير عندج
وتفرحين بطفل
«،اني اروح
عرفتها اختنگت لان صوتها تغير كلت
«،،،تمام
«،،،تصبح على خير
«،،وانتي من اهله
مهيب
العصر كعدت وي امي بالصاله
ادحك ليمامه بحظنها والف حسره بگلبي
جنت احس بيها عبالك بنتي وحنين مرتي وهاي عائلتي حجت
«««شوفها يمه شلون تباوع عليك وتضحك
والله تعرف الحنين والي يحبها
«،،اي تعرف بس امها شوكت تعرف
مدري
حجيت وي روحي وذبيت حسره هي اجت شايله صينيه الجاي خلتها كدامنا وسالت
«،،اخذ يمامه
«،،،،لا يمه خليها بحظني من فدوه للخلقه
شلون تضحك لمهيب
باستها وكملت
«،،شوفيها ولا وخرت عيونها منه
ابويه طب هو واخوتي كعدو رادو مي
راحت جابت الهم وانطتهم
سالت
«،،اجيبلكم جاي
«««اي والله
راحت من يمنا ارؤى اجت مبتسمه هي
واعتماد كعدن يمهم حسيت اكو
شي
هي رجعت شايله العصريه خلت يم
ابويه وراحت منير حجه
مبتسم
««،يول ماتريد هديه على سلامتك
«««لا اريدك سالم ابو باسل جيتك كافيه
انت والاهل
اجت خلت صينيه جدامه هو ومفيد
الي حجه
«««والله تفوتك الهديه الي نريد نجيبها
الك
«««اي والله مهيب تفوتك لان توب كلش
ارؤى حجت تضحك اعتماد كملت
«««كول اي اريد
ابتسمت وجاوبت
««مااريد اي شي منهم كعدتهم هاي بنصنا
كافيه عليه
«،«يعني شنو يابه نرجعها للهديه
منير حجه يضحك دحكت لابويه يبتسم رد
«««والله مامدري خلي يشوفها بلگي تعجبه
«««كووم خلي نشوفك شجبنا الك اني ومفيد
منير حجه وكام كمت ويا والاهل ويانا
طلعنا لبره مفيد فتح الباب
وكال
«،،،تعال شوف شجبنا الك
طلعت وتفاجأت من شفت جگساره
احدث موديل واكفه وره سيارتي صفنت عليها
وبعدين على اخوتي كلت
«،،،هااي شجابين
«،،جكساره اخر موديل
«، ليش هيج والله مااريد منكم اي شي
««،اسكت بابا وامشي شوفها جبنها سوده
لان اعرفك تحب هذا اللون
«««فدوه لگلبكم يمه والله يخليكم واحد
للخ ويرزقكم من عالي سما
امي حجت وكامت تبجي ابويه رد
«،،،امين يارب
حظنت منير وبسته هو ومفيد كلت
«««تسلمون على هاي الهديه بس والله ماردت
منكم شي
«««بس احنا ردنا نهديك شي غالي واعرفك
تحب هيج موديل وكلت لمفيد
واخذنها الك
«،،تستاهل مهيب وقليل بحقك
ارؤى حجت شكرتها باسل كال
«،«عمو راح يطگوك ليز حار بس يشوفك
صاعد بيها
«««ههه عود بيبي اطكك اله رمله
يارة حجت بضحك باسل غمها بگصتها
ورد
«،،امداج حرمل ياثوله
««،ههه هو هذا
شفت السياره وكعدت بيها وفرحت بيها
كلش شكرت اخوتي مره ثانيه
طبينا لجوه تعشينا هي ماكو
ابويه سال عليها خاله
ام ياسين كالت
«،،ماتشتهي
شفت امي دحكت لابويه عكد حواجبه وعرفت
من ملامحه هو عرف بحجي عمتي بس
ماحجه شي
كمت غسلت وطلعت كعدت بسيارتي
الجديده فتحت جهازي رحت للواتس
كتبت
«،،،ليش مااجيتي تعشيتي
ماشافتها اتصلت انطتني رفض
كتبت
«،،يولي جاوبي ولا تعلين گلبي
كتبت
«،،مااشتهي
««،بعدج مقهوره من ورة كلام عمتي
«،،لاا
«،،جذاابه
ماكتبت شي كملت
««،تره اعرفج بعدج متاثره بكلامها
«،،اريد انيم يمامه
«،،لاطلعين حجه بيها حتى ماتحجين وياي
ماردت رجعت كتبت
««صعبه عليج تحجين وياي شويه واطلعين
الي بگلبج
عبالي راح تسكت او تجامل وادكول
لا مو صعبه بس هي كتبت
«،،،اي صعبه
«،،،،ليش يولي قابل اني غريب
ماكتبت شي وراحت اتصلت فتحت
خط حجيت باعصاب
«،،،،ولج حتى مجاامله ماتكدرين اجامليني
وادكولين لاا انت مو غريب
««،اجذب عليك يعني
ردت بروده واني صاير نار كلت
«««ااي جذبي جاامليني كولي لااا حتى
مااتخبل
««واني مااكدر اجذب بهل الشي لان اعرف
بروحي اني هيج احس
«««يعني اني هسه غريب بالنسبه الج
سكتت من عدت الكلام
وخلتني اموت من قهري رددت
«،،،ليش حنين والله اني مااشوفج غريبه
قبل كم ساعه جنت ادحك لبنتج واشوفها بنتي
وانتي مرتي
«،،اني مااريد اقهرك والله مااريد اذيك
بس هو هذا احساسي يعني شاسوي احبك
غصب لو جبر انت ماشفت روحك
ماكدرت تكمل وي الي خطبتهن
وفصخت لان ماشفت
روحك حبيت اي
وحده منهن
«««اااي وحظي الطايح حظه حبج الج
رديت باعصاب وكملت
««بس الصوج مو منج مني ااني الي حبيت
وذليت روحي لوحده مثلج
««شفت بديت تعير
«،،مااجااي اعيرج
صحت بصوت عالي وكملت صاير
نار
«،«قصدي حبيت وحده ثلج بارده عديمه
المشاعر ماعدها گلب
ماردت انهديت بغضب
«،،خرب بيج خرب بكلبي الي حبج وخرب
بيه من ذليت روحي الج ولج
يكون توكعين بأيد
واحد مو حنين
حتى تعرفين انتي شضيعتي
من ايدج
سديت الخط وضربت جهازي بالگشن ظليت
كاعده هناك مقهور وصاير نار كرهت روحي
لان ذليتها الها جثير وهي نفس
رأيها ونفس الكلام
الجارح والي
يقهر
من وراها حتى البيت كرهته لان شفتها مااهتمت
بالسوته بيه تفوت من يمي تجنب النظر اليه وحتى
كامت ماتجيب الشي اليه
رفضت امدد اجازتي لان ماردت
اظل بالبيت واحرگ بدمي
الصبح بدلت وطلعت اسند على عوجيه
رجلي طابت بس بعدني مااكدر اذب
كل ثكلي عليها طبيت للمطبخ
هي واكفه تسوي
ريوك امي يمها
شافتني
كالت
«،،،هاي وين رايح يمه
«،«للدوام
«««يادوام وانت جرحك بعده اخضر
«،،،لا اخضر ولا اصفر حجيه وخليني اروح
بلا عرضه
رديت بضوجه لان شفتها مالتفت ولا
دحكت عليه
«،،ولك شنو اخليك تروح وانت كوه واكف
وسانده روحك على هاي العوجيه
مادرت بال مشيت للباب طلعت صاير
نار امي اجت ورايه وصاحت
«،،ولك يمه ارجع انت ماتكدر تسوق
مادرت بال فتحت الباب ورحت لسيارتي
صعدت شغلت وطلعت من يم
بيت اهلي
طول الطريق مخنوك وافكر بيها احجي
وي روحي بقهر
«««ليش انتي من دون البنات حبيتج مو بحياتي
جثيرات ليش ولا وحده دگ الها
گلبي هالدگه
وهاي بنت عمي حلوه وتريدني وميته عليه
وهي اعترفت اليه بحبها وذابه روحها
عليه ليش ماجاي احس بشي
تجاهها مااعرف
وليش بردت من كل النسوان الا من يمج
اصير نار لا جاي اطفى ولا جاي
اكدر اشيلج من راسي
ورثت جگاره اخذت نفس طويل وذبيته
بحسره رددت بقهر
«،«ولك طفيها للنار وانساها وكافي تذل روحك
الها انت ماجاي تشوفها شلون
بارده من يمك وتحجي
كلام يقهر وانت عزيز
نفس وعندك كرامه
وهي ماقصرت سحلتك وسحلت كلشي
بيك لا خلت كرامه ولا خلت
عزه نفس داست
عليك جثير وانت جنت ادوس
ماتنداس
حسيت عيوني صارن جمر واختنگت وكفت
على صفحه فتحت الشباج اخذ
نفس واذبه صفنت على
نفسي،،، بالمرايه
الجانبيه شفت شكلي مو اني ضعفان
والعيون منكره ومبين عليه التعب والسهر واحد
ثاني جنت الصار بيه مااذاني بكثر
ماهيه اذتني لان
وجع گلبي وروحي جان اقوه من جروح جسمي
درت وجهي مااريد اشوف خلقتي شفتها الها بين عيوني شلون تحجي وياي بروده واني اتوسل بيها تحبني وهي ترفض حتى ماجاملتني ماكذبت وكالت لا تقهرني لو صار بيك شي
ماكالت انت مو غريب
وفرحتني حتى
لو جذب
هالشي مرد گلبي وحرگني
وخلاني احجي بأعصاب
«،،ولج والله راح البسج لبس القندره واخليج تندمين وتعضين اصابعج ندم لان رفضتيني
اني مو مهيب ابن حجي محمود
اذا ماخليتج تتحسرين العمر
كله لان ماقبلتي بي
والا اذلج مثل ماذليتني
جهازي دك جان ابويه مافتحت الخط حرگت
مشيت مسافه هو ظل يتصل اخر
شي جاوبت
يمامه
طلع من يمنا امه طلعت وراه تصيح مادار
بال الها سمعت الباب انسد بقوه وصوت سيارته اشتغلت رجعت تحجي
بقهر
«،،شفتي يمه شلون راح للدوام
وهو بعده مايكدر
«،،هاي شبيج صايره عصبيه من الصبح
وتصيحين
عمو طب يسأل جاوبته
«،،اصيح من وره
اابنك الي راح يموتني ناقصه عمر
««منو مهيب
«،،،ليش اكو غير شالع گلبي شوفه
طلع وراح للدوام
«،،شنو وشلون راح وهو جرحه بعده ماطاب
«،،حجيت ومافاد ويا انت روح خابره خلي
يرجع
«،،هذا گوه يريد يجيب الاذيه اله
حجه هيج طلع جهازه من جيبه وخابره
كال
«،،مايرد
«،ارجع اتصل بي
جاوبته ظل يتصل وره دقائق جاوبه
فتح السماعه حجه بضوجه
«،،ها حجي
،،،انت شبيك ماتعرف وضعك شتريد يابه
توكع ويفين حظك بالدوام
««،مابيه شي ولا يظل بالك
«««ابني ارجع انت جرحك مو هين وخايفه
عليك لا تتخربط
الحجيه حجت رد بعصبيه
«،«يمه رحمه لاهلج عوفيني اروح تره طگت
روحي من كعده البيت واختنگت
«««ولك يمه خايفين عليك
«،،لاااتخافين وعووفني اااولي للدوام
قاطعها بصياح ابوه نتر بي
«،،شكوو تصيح ولك وعلى شنو هالاعصاب
تريد ادوام روح دوام الصوج مو منك من عدنا
احنا الي خايفين عليك
«،،لاتخافون اذا اريد اموت خلي اموت طبني
الف طوب
رد علي وكمل
«،،رايح وصلت المركز
ابوه سد الخط وحجه بعصبيه
«،،ابنج مايفيد بي الحجي عناد وراسه راس
مطي
««،،شلون ويا خاف يتخربط
الحجيه حجت بخوف رد
«،،استغفر الله ياربي شاسوليه كولي اروح اگضبه
من ايده واجيبه من المركز مثل الجهال
عمو منير طب هو واخوه سال
«،،خير يابه اشوفك صاير عصبي
الحجيه ردت
«،،اخوكم راح يموتنا من وره عناده وراسه
اليابس
جنت ملتهيه بالريوك ومااكدر اعوفه لان كلها
التمت تريد تتريك خاله ارؤى
كالت بعد ماسمعت
الحجي
«،،كولو ياالله وان شاء الله مايصير بي شي
«،،ولج يمه جرحه قوي وخايفه علي لايتعب ويتخربط
«،،،ماعلي شي لان جرحه طاب ولم
عمو مفيد حجه وكمل
«،،هو لو ما يعرف نفسه صار زين مايطلع
ولا يروح للدوام
««اي من العوجيه الي طلع يسند عليها
امه ردت بقهر وكملت وياي
«««مو شفتي يمه مو طلع كدامج ساند
روحه بيها
««اي
جاوبت بخنكه ورحت للطباخ اطك بعد
بيض
اشتغل واسمعهم يحجون بي عرفت هو هج
من البيت من ورايه كملت كلشي
ورحت لغرفتي طبيت
يمامه كاعده بس
ساكته
بدلت الها بالي مشغول بي وصوته باذني
شلون يحجي بعصبيه وضايج وكلت
يجي يوم ويطك بوجهي والكل
يعرف هو يحبني
ورايدني
لا كدرت اتريك ولا اكل لكمه وجنت متوقعه
من راح للدوام يخابر وهم اسمع
منه نفس الكلام
سويت جهازي صامت وعفته بالغرفه التهيت
بالشغل الحجيه كالت عزلي غرفته مادام راح
للدوام
بديت بالفوك ماريا اجت سالت بخوف
«،،حنين عمه ميسون راح تجي اليوم
حجت هيج وكملت
«،،راح ادكولين الها مو
من اجت ام احمد اخر مره ويا وبعد ماشفناها
لان من راحت عمها تمرض وصار فد مره والتهت بي كلت
«،«اي لازم تعرف
«،«شلون خاف ماتصدگ هو هيج سوه
«،،،لا راح تصدگ
كامت تفتر يمي متوتره وخايفه كالت
«««اني اكول لو مانحجي احسن
««بكيفج
جنت دايخه بمهيب الي تصرفاته زادت مانقصت
كالت
«««لا لازم نحجي اي خاف بعدين تطلع السالفه
وتنذب براسي
«««بكيفج
«،،حنين شبيج اليوم احجي وياج كله ادكولين
بكيفج
ذبيت حسره وجاوبت
«،،انتي شتريدين
كعدت تبجي ردت
«،«مااعرف وخايفه منه كلش ومو مرتاحه
لان احس بروحي سويت شي غلط
«،،،انتي غلطج الوحيد هو الثقه الزايده
الي انطيتها اله
«««والله ماعبالي هيج
كعدت يمها كملت
«،،، لازم احجي لازم ابرء روحي لان انتي
شفتي كال انتي اجيتي عليه
«،،اي لازم تحجين كلشي لعمتج
«،،وانتي وياي عفيه لان انتي شفتي شسوه
وشحجه
«،،اني وياج
صفنت عليه بعيون تبجي وكالت
«،،مااعرف ليش من شفتج حسيتج طيبه
كلش وحبابه وصدك طلعتي هيج
ولو عندي اخت جانت
تمنيتها انتي
عيوني غوركت وحنين صارت بين عيوني
جاوبت
«،،،،اعتبريني اختج
حظنتي تبجي بشهكه دموعي نزلت وهاجت
كل المواجع سحبت روحها مني
وسالت
«،،زين اني ابجي من وره الصار بيه
انتي ليش تبجين
مسحت دموعي كملت
«،،اذكرتي رجلج
هزيت راسي باي وكمت كلت
«،،من تجي ام احمد نحجي وياها
«،تمام
ذبيت روحي على الشغل ماريد افكر بي
بس هو ظل شاغل بالي ولا
راح من عنده ولا لحظه
كملت الفوك ونزلت لجوه نظفته ورحت لغرفته
طبيت جان گالبها گلب فاتح
الكنتور وناثر هدومه
ناس بالگاع وناس على الجربايه فتحت الشباج
حتى تتهوى الغرفه لان ريحه الجگاير
جانت تارستها،،،والكطوف قسم
بالنفاضه وقسم واكعات
بالگاع
شلت الهدوم وبديت اعلك بيهن كملتهن
وبدلت الفرشه بعد مانفضت
الدوشك كنستها ومسحت
الاثاث
طلعت ورحت للحمام خليت هدومه الوصخه
بالغساله ورجعت للمطبخ طبيت
يمامه بحظن الحجيه
وخاله ارؤى كاعد
يمها حجت
«،،مايجاوب ويقره الرساله وهم مايرد
««عمه عوفي هذا تعب من الكعده بالبيت
وراد يطلع ويغير جوه
خاله ارؤى ردت الحجيه كالت
«««اي هو وين معلم يكعد بالبيت طير وطاير
بالسما
«،،ههه تعلمينا بي مهيب محد يلزمه
«««اوف لو بس يسمع كلامي ويزوج جان استقر
وماظل هيج حاله
ردت اطلع حجت
«،،حنين يمه سويلنا حلاوه نشا مثل
ذيج المره طلعت تخبل وعبالك علوجه
وخلي بيها جوز
«،،اي
وكفت اسويها خاله سالت
«،،عمه شنو سبب رفضه لنبأ وانتي
هم كلتي ماتريدها اله
«،ماتفيده يمه هاي مدلله وتتنعوص هوايه
وهو شلون يتخبل من هيج وحده
«،،ها اي والله اعرفه مايحب هيج وحده
لان كلتي فصخ مرتين من ورة
هالشي
««اي واني هم مااريدها من وره هالشي
وهم اشوفها مو مال بيت
ومسؤوليه
سكتت وكملت
«««اني اريدله وحده عاقله ومعدله تعرف
شلون سايسه لان انتي تعرفي وتعرفين شلون
طبعه صعب
«،،اي والله هو يختلف عن منير ومفيد
كلش ولا عبالك اخوهم
«««لا شيجيبهم عليه فرق من السما للارض بينه
وبينهم ومن هم صغار ماشلعوا گلبي
بس هو اوف لعب بحالي
لعب اني وابوه وعشنا
بالهبطات من وراه
«،،ههه من الدلال عمه
«،،والله يايمه كلهم دللتهم مافرقت بينهم
«،،،ههه لا هو اله حبه زياده
«،،اي بزر الگعده عاد لازم شويه ندلله
خاله ارؤى ضحكت وكالت
«،،،،هو اخر العنقود يصير سگر معگود
«،،سگر من مزاجه حلو بس من ينطبگن عنده
لا يمه يصير علگم ويصعد الحموضه
للفاد
«««ههه اليوم گصينا لمهيب
صبينا الغده وهو ماكو كملنا وخاله اعتماد
وكفت تجلف وماقبلت اساعدها
بنتها وياها
رحت لغرفتي اخذت هدوم سبحت ورجعت
الها عيوني راحت لجهازي اخذته وفتحته
شفت ماكو اي اتصال منه ولا رساله
اجه اخر كلام براسي وكلت
بلكي جزت نفسه مني لان رفضته هوايه وسحب روحه مني دعيت ربي يطلع هالشي
صدك حتى اخلص منه
ومااظل عايشه
بهل الخوف
هالشي شفته وتأكدت من اذن العصر
بدلت ليمامه وخليت الها شريط
وردي بلون فستانها طلعت
شايلتها
وكفت من شفت جاي لغرفته لا رفع
راسه ولا باوع عليه بس
جان عاكد حواجبه
وبين علي ضايج
طب غرفته وسد الباب مشيت بيها
ياره اجت وكالت تضحك
«،،بابا يريد حمامه
انطيتها الها ورحت للمطبخ سلمت على
ام احمد من شفتها جايه
خاله ام ياسين مسوي العصريه وصبت
الجاي امها سالت
«،،شلون اخويه اليوم
«،،الحمد لله احسن
««،خطيه والله بعده صغير على الزهايمر
خاله ارؤى حجت هي ردت
««امر الله بعد
«،،اي الله ومانكدر نعترض علي
جاوبتها الحجيه سالت
«««يمه ارؤى ماكو علاج بامريكا لمثل حالته
«،،لا عمه هذا المرض ماله علاج وهناك شكثر
ناس مثل عمو والله بعدهم صغار
ويصير بيهم هالشي
ردت عليها خاله اعتماد كملت
«،،،هاي خطيه ام صديقتي الامريكيه هم
صار بيها وخلوها بدار رعايه
«،،يا ذبت امها بالعجزه
الحجيه حجتها بقهر ردت
«،،عمه هناك مو مثل هنا يعني اكثريتهم
ماعدهم مجال حتى يدارون اهلهم
وهيج حالات لازم الها رعايه
خاصه وعنايه طبيه
خاله ام ياسين ذبت حسره وكالت
«،،ام منير هو هسه الصاحي كامو يذبو
بدار العجزه مو عاد المريض
«،،،،اي والله صدك كمنا نشوف كم واحد
يذبون ابوهم وامهم بهل الدار
ولا عبالك ربوا ولا تعبوا
ولا انكسر ظهرهم
عليهم
ردت عليها وكملت
«،،سلف ودين الي يذب امه وابوه بالعجزة
يجي يوم وولده هم يذبوه بيها
«،،اي والله
ردن عليها عمو اجه من بره سال
«،،مهيب اجه
«،،اي
«،،،شلون وضعه
«««زين لا يظل بالك
الحجيه ردت علي راح لجوه
كمت وكلت
«،،خاله اروح انزل الهدوم من فوك
««،اي يمه روحي
مشيت من يمهم رحت للدرج عيوني على غرفته
اشتميت ريحه الجگاير صعدت ام احمد
صارت بصفي وكالت
«،،اريد احجي وياج بموضوع
عبالي ماريا حجت الها صعدنا لفوك وطلعنا
لسطح كالت
«،،حنين شبيج وي هاشم وليش متعاركه ويا
وطاردته من بيتنا
شكرا لزيارتكم عالم روايات سكيرهوم
