رواية جذبني فمك البني الفصل الثامن والأربعون بقلم عبير إدريس
مابين حلمج وحلمي
ضاعت سنين عمري
الادهم
________
وره ما قره الرساله شمرها بالكاع تقرب من سيلين باوع لأديها وركبتها واصابع رجلها ،،،
بهت وتغير لون وجها باوعلنه مصدوم ...
وضرب على رجله رجع باوعلها حاير متحمل بعد ،،،
ثنى ركباته وكعد قريب راسها كام يختض جسمه ويبجي ، متحملت لا منظر اخويه ولا منظر سيلين اختنكت ودموعي نزلت ايمن متحمل عافنه وطلع بره ...
ادهم يشهك ويبجي عبالك طفل تخبلت عليه رحت يمه لزمت كتفه وربتت بيدي عليه همست بصوت ناصي..
نرمان : حبيبي الله يساعدك ويقوي كلبك بس على كيفك فدوه لتأذي نفسك عيوني انت.
بدون ميرفع راسه جاوبني وصوته مخنوك خبلني كلت كلبه راح يوكف هذا هو يحجي كلمه ويسكت ..
ادهم : لج نرمان ماتت سيلين متفيد بعد متفيد هاهيه انتهت..
حجاها وضرب ايد بأيد حيل ...حركه تدل على خسارته الكبيره...
رحتله حضنته واختلطت دموعنه وشهكاتنه تطلع سوه كمت اتوسله خايفه...
نرمان : عليك الله على كيفك اسم الله عليها مابيها شي مابيها وهسه تشوف...
وخر مني وجر ايد سيلين كف ردنها بحركه عصبيه وطلع ايديها عاط.. ...
ادهم : لج شوفي شصاير بيها كاعد تتخيلين شنو مسببلها من اضرار جسديه واكيد منتهيه نفسيآ.
باوعت لو تخبلت مكان الاورده مالتها واضحه بيها علامات التعاطي ومبين بشكل مستمر بحيث ظاهره علامات المسار على جلدها اللي هيه عباره عن خطوط صغيره داكنه اي الثقوب الناجمه عن الابر وتحيط بيها منطقه من الجلد لونها داكن وعدها اماكن بيدها عباره عن ندبات دائريه ومتقرحه اختنكت مجرد شفتها..
مسح دموعه وطلب مني اشوف باقي الاماكن بجسمها..
ادهم : شوفي منطقه الفخذ والابط وبلغيني منتظرج بره..
نرمان : ماشي..
طلع رفعت ملابسها ماكو اي اثار للأبر غطيتها وطلعت صحته اجه وكف خصر ايده يباوعلها حاير وكل شويه يمسح وجهه مرتبك ايده ترجف ملامحه تتحرك بغضب..
نرمان : ماكو اي اثر للأبر بس بيدها.
ادهم : شلون فهميني شسوي منين ابدي شنو اعالج منها شسوي نرمان شسوي شسوي..
ضل يكرر بالكلام بشكل هستيري..
نرمان : حبيبي ناخذها مستشفى ونشوف بلكت يطلع توقعك غلط مو ادمان بلكت مهدئات ها شتكول....
ادهم : لا لا مو توقع متأكد شوفي الاورده مالتها مزرفها الكلب ناطياها بالوريد كتلج السالفه بيها ادمان بيها مخدرات بيها بلاوووووووي والله عرفت اخ مني اخ شلون عفتها شلوووووووووووون شلون تساهلت وتركتها انه كتلتها بيدي انه موتتها..
نرمان : شبيدك عليها قابل تدري هيج راح يصير.
ادهم : المفروض ما اقبل ازوجها واعاند حتى لو تكرهني انه الغلط مني انه.
نرمان: عليك الله لتقهر روحك كوم ناخذها لاقرب دكتور ..
كام يضرب على رجله فقد فرك وجها بيد ترجف وكال.
ادهم : حسبي الله ونعم الوكيل والله اله اموته بيدي والله والله وين يروح مني الجبان ناقص عديم الغيره..
مسح عيونه بعصبيه ورجع كعد يم راسها باسها بكصتها تنهد وحجه بحركه كلب...
ادهم : اوووووف لو تعرفين شكد احبج جان متخليتي عني وتركتيني اعاني ياعشقي يامالتي ياملكتي يا حبيبتي ياغاليتي ...
حسيته تعب رحت يمه كومته منها...
نرمان : كوم ادهم غسل وجهك وخلينه نفكر بعقل شنو نسوي....
رفع كتفه دلاله على قله حيلته.....
ادهم : شسوي ماعرف انتي كليلي شنو اسوي ؟؟؟
حجاها والدموع تناثرت على وجها ولحيته...
تقربت منه لزمت وجها وبلشت احجي وياه واحاول اهدئه.
نرمان : باوع اول شي لازم تركز ويايه وتعوف العواطف على صفحه تره الشغله خطره ومخيفه اذا فعلا طلعت السالفه بيها مخدرات..
ادهم : هممممم.
مدنك راسه يستمع ..
نرمان : نروح لاقرب مستشفى نعرض حالتهة ونشوف سبب الاغماء شنو ويشخصوها وتبلش كورسات علاج..
ادهم : ما سلمها بيدهم كل عقلج.
نرمان : لعد شلون تتعالج قابل انت تعرف..
ادهم : اكيد لا بس اجيب فريق طبي يعالجها بلبيت لو اعرف اصرف العندي والماعندي..
نرمان : يعني اكو هيج شي.
ادهم : كلشي بالفلوس يصير..
نرمان : هم صح زين هسه شنو راح نسوي.
ادهم : ننتظرها تكعد اكيد ناطيها جرعه وهيج خدرانه.
نرمان : ننتظر بس كون تكعد وترتاح..
ادهم : الراحه راحت من زمان اخوج فقدها ..
نرمان : اني وياك لتشيل هم خطوه بخطوه نعالجها.
ادهم : راح اتخبل ليش هيج سوه بيها ...
رحت جبت كرسي وخليته يمه كعد واني كعدت كباله.
نرمان : معقوله جان مريض وانت معرفته..
ادهم : لا والله كلشي مابيه ومثقف وعنده مبادئ يعني تعجبت من تصرفاته ..
نرمان : ماعرف هيج الانسان غفله يتغير ويبيع مبادئه.
ادهم : لا الشغله اكبر من التغيير اكو شي جبير خلاهم يعادوني اولا وينتقم مني بسيلين لان يعرف كلش زين هيه نقطه ضعفي وممكن تهدمني..
نرمان : يعني قصدك يحاربك بمجالك المهني..
ادهم : ماكو غيرها يعني ماكو هيج انسان يكشر عن انيابه خلال مده قليله وبدون سبب اكيد عنده دوافع خفيه وراح اعرفها ..
نرمان: لو بس اعرف انت ليش الدنيا كاعد تمشي عكس وياك جان ارتاحيت...
ادهم : ماعرف انه هم ماعرف..
جر حسره و سكت واني هم سكتت ضلينه كاعدين مكابلين سيلين شوكت تكعد ..
ادهم : فدوة مي حلكي نشف..
نرمان : تدلل..
رحت جبتله مي شرب بطل كامل وراد بعد رجعت جبتله هم شربه.
نرمان : هيج عطشان؟
ادهم : كلبي محروك بنار مجاي تطفى وحلكي كاعد ييبس..
نرمان : خاف انهبطت.
ادهم : مادري..
ضلينه نراقب وضعها الى ان بدت تتحرك ، اول شي سوته مدت ايدها على ركبتها فركتها من الجهة اليمين بعدين تنهدت وهمست بصوت تعبان ...
سيلين : اه ه ه
تقرب ادهم منها وضل يراقب حركاتها شويه شويه فتحت عينها وهنا المصيبه متعرفنه تباوع علينه عبالك ماكو بشر كبالها ادهم تنهد وهمسلها..
ادهم : حمدلله على سلامتج سيلينتي ، سيلي عرفتيني انه منو انه ادهمج ؟؟؟؟
تباوع عليه وترجع تباوع للسكف التفت عليه عاكد حاجبه متسائل بنضراته يعني شنو شبيها كاعد تشوفين كمت رحت يمهم وكفت همست بصوت ناصي..
نرمان : معقوله متعرضه للتعنيف..
ادهم : او تعذيب.
نرمان : معقوله .
ادهم : شوفي حالها هاي صاحيه برأيج.
نرمان : خاف بعدها عقلها مغيب بسبب المخدرات..
ادهم : لالا جان تعرفت علينه اول ماصحت..
قاطعتنه حركاتها الهستيريه ساعه تضحك وساعه تعصب بدون سبب ، ادهم كعد كبالها وميعرف شنو يسوي متشتت وخايف اكثر منها...
نرمان : هاي ليش هيج عيونها؟؟
ادهم : شبيها....
نرمان : انتبه لحدقه العين شلون تتسع وترجع تضيق..
ادهم : هاي احدى علامات الادمان يانرمان..
عيونها حمر ومن نحجي وياها متركز ويانه عدها صعوبه بالتركيز ..
بعدين كامت تهذي بشغلات مصايره وقديمه تفاجئنه من تكله لادهم بابا...
هو باوعلي وباوعلها غرغرت عيونه..
ادهم : ميخالف انه ابوج بس اتذكريني..
همست بتعب...
سيلين: بابا وضاح...
هنا ادهم انهار عافنه و طلع بره ضل يضرب بالباب الخارجي مال استقبال لحد ما ايده تدمت ركضت بره على ايمن لكيته بالشارع يدخن..
نرمان : وينك انتتتتت يمعود الحك الادهم ضاع ...
شمر جكارته وفات يركض للبيت وصاح.
ايمن : شبيه ولج شبيه..
نرمان : مادري مادري.....
دخلنه للبيت لكيناه كاعد بالكاع وايده تقطر دم ..
نرمان : يااا هاي مكسر الجام مال الباب..
ايمن كنبص يمه وعاط بيه ..
ايمن : شبيج صافنه متشوفين ايده يحتاجلها تضميد عليش ضافنه.
ركضت للمطبخ بدون ما احجي رحت جبت العده مال تضميد وخليتها يمه طلع كطن وتعقيم رشه على ايد ادهم ، وادهم سحب ايده من ايد ايمن ، ايمن نتر بيه ورجع سحب ايده..
ايمن: دجيبها تخبلت انت هاي بدال متفكر بحل تكعد تكسر..
همس ادهم ودموعه نزلت.
ادهم : لك تخبلت عقلها راح شوفها .
ايمن حاول يتصنع القوه بس هو اضعف من عدنه اعرفه كلش متأثر بس راد يسيطر على الوضع ويحد من انهيار اخوه ويسانده.
ربت على كتف ادهم بيده وكال.
ايمن: دكتور انت كدها وراح ترجعلها عافيتها احسن من قبل وكول كال ايمن..
ادهم : ما اعتقد حتى وان تعالجت راح تتضرر صحيا او عقليا مستحيل ترجعلي مثل قبل..
ايمن : ترجع ترجع كول يا الله.
حجه بصوت تعبان ونفس محروووك...
ادهم : يا الله ياالله يارحمن رحمتك ارحمني وارحمها ...
نرمان : دخيلك الهي ربي..
انتبهنه عليها كامت تحك بجسمها وايدها بشكل فضيع بحيث طلع دم من ايدها ركضت عليها لزمت ايدها كامت تصيح تهسترت ضليت احجي وياها واهدأ بيها بس متسمعني التفتت على ادهم لكيته كاعد يباوعلها مأيس مرجي راسه على الحايط وكاسر ركبته عينه عليها ودموعه تنزل برهاوه...
حسيت مي صار جوه رجليه من اباوع متت قهر تدررت على نفسها ، ادهم من شافها هيج كام يضرب براسه بالحايط وايمن لزمه وضل يهدأ بيه ..
لزمتها اريد اكومها تنتر ايدها مني وتصيح، دك موبايلي جنت خاله النغمه اغنيه اجنبيه سمعتها وكامت تعيط سدت اذنها وصرخت لااااااااا لااااااااا كااافي كااافي...
ادهم : هاااااك استلم هاااااك وتكلولي اصبر ولكم شصبر ..
عاط بيه.
ادهم : طفيييي موبايلج طفيييييي تخاف من الاصوات تخاااف...
من خوفي غلقت الموبايل بيد ترجف وكع مني البطاريه صارت وحد والموبايل وحد شلته وشمرته على الطبله..
ادهم : اخذيها بغرفه مريم خليها تنام وتعاي نظفي المكان..
حجاها وكام راح للحمام واني لزمتها اريد تكوم تعاندني متقبل تجر ايدها مني رجعت حاولت وياها شرمخت ايدي بأضافرها..
نرمان : ليش حبيبتي ليش..
اجه ادهم وكف يمي ويتنفس سريع..
ادهم : عوفيها انه احير بيها ..
نرمان : شلون تلزمها وانت محرم عليها ادهم...
ادهم : دكتور وبالطب ماكو حرام وخري..
وخرت شالها وضلت تضرب بأدهم شرمخته من ركبته وعضته من زنده ..
يعني فعلا مخبلها ، اخذها للحمام واني رحت وراهم ...
ادهم : الزمها الج وانتي غسليلها وراح اغمض عيني.
نرمان : ماشي..
لزمها ثبتها واني رحت جبتلها ملابس مني ، ورجعت للحمام ،
ادهم غمض عينه ودار وجها نزعتها وسبحها على السريع تتحرك وتتمرد علينه بس مثبتها ادهم بقوه وكل شويه يستغفر بنفاذ صبر احس روحه راح تطلع من كد الألم اللي عاشه وعاصره بهاي الحادثه ، ترجمتها شعوريآ حسيتها اصعب من وفاه ياسه واقسى ...
كملتلها نشفتها ولبستها ملابسها همست..
نرمان : كملت افتح عينك..
فتح عينه باوعلها بحنيه باسها من راسها وشالها جلبت بركبته وضمت راسها بصدره همست .
سيلين : بابا..
حضنها قوي وهمس بصوت مسموع.
ادهم : راحلج فدوه ابوج بس رجعيلي..
وداها للغرفه اول ماعلكنه الضوه خلت ايدها على عيونهة التفت عليه جان بعده شايلها ..
ادهم : طفي الضوه وعلكي ضوه الممر الشمسي وعوفي الباب شويه مفتوح..
طفيت الضوه وطلعت علكت الضوه الشمسي ورجعت يمهم..
نيمها على الجربايه جر كرسي وكعد يمها ، مجرد خلت راسها على المخده نامت..
نرمان : ليش هيج سدت عينها من الضوه ؟
جان مركز عينه عليها بدون ميباوعلي كال..
ادهم : اكو شكوك ابالي وكاعد اجمع لقطات من تصرفاتها وشويه شويه تتوضح عندي الصوره..
نرمان : يعني شكد تحتاج وتعرف حالتها النفسيه ؟؟
ادهم : مو اكثر من ٤٨ ساعه..
نرمان : زين ليش سدت عينها هنا وبالاستقبال اكو ضوه بس ما سوت هيج..
ادهم : ضوه الاستقبال شمسي هادئ وضوه الحمام كذلك بس ضوه هاي الغرفه ابيض ومادام ضاجت منه يعني كاعد تعاني من شغله نفسيه بسبب هذا اللون وباجر اسويلها اختبار صغير واتأكد اذا حالتها مثل توقعاتي او لا.
نرمان : الله يعين كلبك ..
حجه بتعب..
ادهم : مريم وين ؟؟
نرمان : اجه فهد اخذها قبل لا تجي سيلين.
ادهم : ليش خليتيها تروح انه مو مانعها تبات هناك.
نرمان : امي دزته عليها بابا راح لل______ يكمل شغله وتضوج وحدها..
ادهم : هممم ..
الليل كله ضلت سيلين نايمه مكعدت واني اروح انام وارجع يمهم الكه ادهم كاعد على كرسي والكرسي الثاني مدد رجله عليه مكتف ايده ومرجع راسه ليوره مغمض..
همست بصوت ناصي..
نرمان : ادهم ادهم ..
ادهم : كاعد احجي.
نرمان : كوم مدد ضهرك شويه ونام فد ساعه.
ادهم : روحي نامي انتي.
نرمان : نمت ياعيني كوم انت..
ادهم : كتلج مانعسان.
نرمان :ممممم زين ادهم سؤال نسيت اسألك.
ادهم : كولي .
نرمان : قبل شهر من رحت لبيت سامر وتراقب علمود يطلع واحنه نروح نشوف سيلين تتذكر.
ادهم : اتذكر شلون انسى..
نرمان : زين احنه مو عطله شنو يكول ايمن سامر يروح للدوام ويتأخر على المحاضرات ادهم يكول بوكتها راح من بالي اسألك وهسه من شفت سيلين تذكرت...
ادهم : اي عنده محاضرات بس مو بالجامعه..
نرمان : لعد وين ؟
ادهم : مركز .
نرمان : مال علاج نفسي.
ادهم : مممم
نرمان : وهاي اي واحد يكدر يدرس هناك.
ادهم : مو تدريس دائم لا محاضرات بفلوس ..
نرمان : هاا فهمت ...
جر نفس ورجع غمض عينه...
الصبح كعدت سيلين ونفس الحال كوه تفتح بعينها..
ضلت تفتح وتغمض بجفنها ، اني ضليت يمها وادهم طلع راح للمستشفى بدون اكل ومنا هو منايم...
اريد اتقرب منها اخاف ، شافت الحايط بصفها لونه ابيض مصبوغ لو تخبلت كامت تضرب على الحايط وتهلوس بكلام ما مفهوم حتى خفت ركضت صحت ايمن اجه لزم ايدها وثبتها ...
ايمن : هاي شلون بله تره موخوش مبقيها هنا غير ياخذها مستشفى.
نرمان : هو راح يسأل واكيد يعرف شلون يتصرف احنه العلينه نساعده وبس.
ايمن : الله يسهلها
نرمان : يارب.
ايمن: زين شبيها ليش ترجف ومغمضه.
نرمان : ماعرف اول ماكعدت شافت الحايط لونه ابيض كامت تضرب بيدها عليه وتعيط.
ايمن : الله ليوفقه بجاه النبي شمسوي بيها..
حجاها بحركه كلب.
نرمان : من حلكك لباب السما ...
رجعت سيلين مددت بس الجسم يرتعش ، وتجيها نوبات هلع وغفل تصير عصبيه علينه وتريد تضرب ايمن وهو لازم اديها مكتفها.
ايمن: هاي ليش هيج شبيها.
نرمان : هاي عدها اضطراب قلق بسبب الادمان اعتقد تحتاج جرعه لهذا هيج مكاعد تتحمل.
ايمن : يعني بشنو تحس.
نرمان : حسب ما اعرفه وسامعه ألم قوي يجتاح كل جسمها وحتى عقلها ..
ايمن: يعني شلون وهذا بيه اضرار.
نرمان : للأسف اي اضرار جسديه ونفسيه والله يستر.
ايمن : خطيه متستاهل والله ميت قهر عليها.
نرمان : اني هم..
مرت ساعه واجه ادهم رحت لبست ملابسي ودخلت يمهم ..
جايب فريق طبي متكامل متكون من طبيب وممرضات ٢ و واحد متخصص بسالفه الادمان اول شي شخصوا الحاله من خلال الفحص حسب شغلهم وجان شرح مطول ...
بعدين اخذو منها دم لغرض التحليل علمود يعرفون نوعيه الماده المحقونه بجسمها يعني نوع الادمان شنو علمود يحددون العلاج والفتره العلاجيه..
حجه الدكتور موجه كلامه لادهم.
_ دكتور ادهم المريضه حسب شرحك الوافي لحالتها وبعد معاينتي الها تحتاج علاج جسدي نفسي يعني بنفس الوقت،،،
احنه مثل هيج حالات نخصص دكتور نفسي يتعامل ويه المريض على مدار اربعه وعشرين ساعه مثل الطبيب اللي يعالجها من الادمان يعني ثنينكم لازم تتواجدون يمها ..
ادهم : اكيد انه ما اتركها شوكت نبلش بأول خطوه علاجيه وشنو راح تكون؟؟
_ اليوم فحصناها وتقريبا شخصت حالتها يبقه التقييم الشامل يرصد بيه الاعراض الانسحابيه للمخدر ومن ثم تشخيص الحاله الجسديه والعقليه لكن تبقى الحاله النفسيه تعتمد عليك انت تكتشف نوع الاصابه مالتها شنو ومن شنو تعاني.
ادهم : تمام يعني هاي تعتبر اول خطوه البعدها شنو؟
_ البعدها ننطيها علاجات حسب نوع المخدر ونشوف كميه التعاطي علمود احدد برنامج علاجي الها ...
ادهم : يعني الطبيب المعالج راح يعمل جدول محدد للزيارات والمتابعه الدوريه لو شلون يكون ؟
_ اكيد متابعه دوريه على مدار الساعه علمود نشوف مدى تطور المريض واستجابته للعلاج وتماثله للتعافي.
ادهم : بعدها نبلش العلاج النفسي صح.
_ صح انت تنظم الها برنامج علاجي نفسي سلوكي مع برنامج علاج الادمان ويارب تتشافى بأسرع وقت.
ادهم : دكتور سؤال اخير.
_ تفضل
ادهم : اكيد بعد تركها للتعاطي راح تظهر عليها الاعراض الانسحابيه اللي تنتج عن اقلاعها للمخدر هاي شكد تاخذ فتره تقريبا..
_ كتلك حسب نوع الماده اللي تعاطتها وحسب المده يعني شكد شهر ست اشهر سنه حسب المده احدد بس بشكل عام ممكن تستمر هاي الاعراض لمده متقل عن ٧ الى ١٠ ايام متواصله لكن ممكن تزيد بأختلاف نوع المخدر ومده التعاطي مثل ماذكرت والحاله الصحيه والنفسيه والعقليه لمريض الادمان ...
ادهم : شنو الاعراض اللي تظهر عليها عدا الرعشه بالاطراف والرغبه الشديده بالتعاطي للمخدر.
_ اضطرابات بالنوم مثل الارق او العكس تكون عدها رغبه شديده بالنوم ، قلق ارتباك ، صعوبه شديده بالتركيز ، هلوسه بصريه وسمعيه ، ميل الى العنف ، فرط بالتعرق ، الآم شديده بالجسد ، سيلان الانف وفقدان الشهيه والوزن.
ادهم : اغلبهن عدها يعني نقصان الوزن ، عنيفه هلوست البارحه هوواي ، تعرقت بليل والعفو منك دكتور تدررت..
_ عادي تصير لان تفقد السيطره على نفسها بسبب المخدر وهاي مو كل متعاطي هيج يصير وياه لا اله اذا جان متعرض لتعنيف مصحوب بالخوف .
ادهم :صحيح
نرمان : دكتور يعني الاعراض الانسحابيه لانواع المخدر ممكن نعالج المريضه بدون الحاجه للطبيب المختص ..
_ لا طبعا ، لان اخطر فتره على المريض تمر عليه بعد الادمان هيه الحاله الانسحابيه اذا أخطأتو بالتعامل مع المريضه ممكن تؤدي الى الوفاه او ممكن فقدان عقل المريضه و مضاعفات صحيه خطيره لهذا التعامل مع الاعراض الانسحابيه لا يعرفها سوى الاطباء والمراكز والمستشفيات المختصه بهذا المجال..
نرمان : شكرا دكتور على التوضيح.
هز راسه مبتسم ..
ادهم : شكد تستمر فتره علاجها من الادمان عدا الحاله النفسيه لان اعرف مطوله.
_ يعني من ٣ _ ٦ اشهر واحتمال سنه حسب مده التعاطي ..
ادهم : ان شاءالله خير..
يحجي ويه ادهم ويرجع يباوعلي ضجت تندمت سألته عفتهم وطلعت رحت للمطبخ سويت جاي وطلعت جبن وسويت مخلمه على السريع كلت بلكت ادهم الله يهديه وياكل..
طلع الفريق الطبي واني رجعت للغرفه..
نرمان : ها بشر..
ادهم : نطوها نوع من المهدأ وراحوا
نرمان : ليش؟
ادهم : لان تأذي نفسها وممكن تنتحر وتسوي مصايب..
حجاها وجر نفس قوي خله ايده بجيوبه وتقرب منها وكف فوك راسها صافن عليها ..
نرمان : ادهم.
ادهم : ها
نرمان : عندي خاطر يمك.
ادهم : كولي نرمان مالي خلك.
نرمان : جوعانه واريدك تاكل ويايه عفيه.
ادهم : الله يخليج لتلحين بس اريد جاي.
نرمان : زين لفه اكلها على السريع.
مجاوبني رحت للمطبخ سويتله لفه وصبيت جاي واخذته اله خليته كدامه على الطبله وسحبت ايده خليت بيها اللفه.
باوعلي حزينه ملامحه متلبسه بالضيق المصحوب بالتوتر جر نفس وكال..
ادهم : روحي اكلي وعاشت ايدج.
نرمان : وايدك.
رجعت للمطبخ لكيت ايمن كاعد يتريك.
رغم الألم البيه على سيلين بس من شفته ضحكت باوعلي ورجع ياكل .
ايمن : خير شفتي شي اخوج حصل بوسه حضنه.
نرمان : بيا حال هو متسكت انت الثاني.
ايمن : دسكتي شبع حضن اخوج بحجه دكتور ومريضته وعلى اساس مو حرام.
نرمان : دعوفه خليه يبرد كلبه.
ايمن: ههههه الله يبرد كلبه لعد ليش ضحكتي.
سحبت كرسي وكعدت.
نرمان : شلت هم شلون اقنعك انت الثاني تاكل شو بس وديت لفه لادهم بعدني مصايحتك لكيتك كاعد تاكل.
ايمن : شسوي جعت وانتي تدرين بيه من اجوع ابويه ماعرفه.
نرمان : فدوة رحت لكلبك اكل الف عافيه ..
ابتسم وكمل اكل..
كملنه كمت غسلت المواعين ورحت يم ادهم شافني وكال.
ادهم : بروح اهلج اريد براسيتول تلاحكيني..
رحت جبلته خليته بيده وفتحلته بطل المي.
شرب ثنين طبك راد ياخذ الثالثه سحبت الشريط من ايده.
نرمان : شبيك تريد تنتحر.
ادهم : راااااسي راح يطك..
نرمان : لان منايم كوم نام واني اكعد يمها.
باوعلي ميت نعس رحت جبتله فراش وفرشته على صفحه بالغرفه ، كام من مكانه شاله وراح فرشه بصف جربايه سيلين وتمدد ، عفتهم وطلعت كملت شغلي على السريع اذن الظهر صليت ورحت سويت غده ، حرت شنو اسوي لسيلين تاكل من اكلنه مدري لازم اكل خاص شلون نسيت اسأل ادهم ...
سويت تمن ومركه ورحت لغرفه سيلين فتحت الباب على كيفي لكيته مصعد ايده لازم جف ايدها ونايم ، رحت جبت موبايلي وطكيت الهم صوره ، علمود اشوفها لسيلين من تصحى واكللها اخويه شكد يحبج لتخسريه بعد لان متلكين واحد مثله يحبج ويرجف خوف عليج...
اخذتلهم اكثر من صوره ورحت للهول مددت ...
صارت ساعه ٣ كعد ادهم من النوم واجه للهول كوه يفتح عينه.
نرمان : راسك مو؟
هز راسه ب اي.
ادهم : شنو سويتي غده سيلين كعدت اريد اغديها.
نرمان : تمن ومركه.
ادهم : صبي بس باعي اريد تمن ابيص ولبن لتجيبين شي ثاني
نرمان : ليش المركه موزينه عليها.
ادهم : لا بس عندي شك من شغله واريد اتأكد منها.
نرمان : ماشي.
كمت وادردم ويه روحي شو اني ماعرف هيج معلومات اضل اصفن من يحجي معقوله جنت اقره بس علمود انجح والله فشله كلشي يسويه اسأله عليه مرات احس بنضراته يسب بيها اللي نطاني شهاده الدكتوراه لان فعلا فرق شاسع بيني وبينه واعترف...
توني فتحت الجدر اصب اجه وكف ورايه.
ادهم : صبي بصحون لونهن ابيض ولتخلين لون ثاني.
هزيت راسي وسويت اللي طلبه مني ، اخذ الصينيه وراح ، اني هم رحت وراه الفضول كتلني اريد اعرف شنو نوع هذا الاختبار..
خله الاكل على الطبله وكعدها خله مخاديد وراها وقرب الاكل منها تقصد خلاها تركز على نوعيه الاكل ، اول ماشافت التمن مدت ايدها وضربت الماعون تطشر بالكاع، ادهم رجفت عضلات وجها وضيق عينه مركز على حالتها وكأنما دخل بوسطها وجاب عالمها وفرزن نوعيه مرضها النفسي وبلش بالتشخيص الصحيح..
اخذ علبه اللبن وخلاها كبالها هم شمرتها وكامت تتقيء تخبل ..
ادهم : جيبي خاولي بسرعه.
رحت جبته وخليته بيده اخذه مني ومسح وجها راد يكومها مقبلت شالها ، ابتسمت كيفلها الادهم صار عادي عنده خلاها على جربايه مريم جانت كبيره يعني مو مال اطفال ، رحت نظفت المكان واحس ظهري وكف يعني بعدنه ثاني يوم وهلكنه و اليوم بعده مخلصان وهيج..
صاحني بصوت عالي علمود اسمعه رحت للغرفه بعدني مواصله سمعته يصيح ..
ادهم : الله الله اسم الله شبيج يمعوده لتخبليني.
دخلت للغرفه لكيته كاعد وراها حاضنها علمود يثبتها لان مشرمخه وجها وطالع دم ..
بهتت من شفتها .
نرمان : هاي ليش شبيها ؟؟
جر نفس وكال
ادهم : خافت من الصوت وهذا دليل ثاني يأكد شكوكي بس منتظر تتعالج من الادمان يلا ابلش بالتجارب وبعدها العلاج وانتظر النتائج..
يحجي ومجتفها وهيه بس تصيح حتى عض عضته تشوغ روحه يغمض بس ميمنعها..
نرمان : ليش تخليها تعضك وخر ايدك مو طلع دم.
همس ..
ادهم : اششش عوفيها.
نرمان : براحتك ، زين اصبلها اكل لو شنو تضل هيج.
ادهم : ماعرف مامار بهيج تجربه قبل ولا اعرف شلون اتعامل وياها بس الفريق الطبي ساعه اربعه يجون وهمه يتكفلون بكلشي يخصها ننتظر ونشوف.
نرمان : الله كريم ياربي خير.
وصارت بالاربعه واجه الفريق الطبي وبلش علاج سيلين المتعب مع تعالي الاصوات والاضطرابات النفسيه مصحوبه بالبكاء الشديد من شده الألم ، ادهم يا ادهم انتهى عليها يطب يمها يطلع عيونه مغرغره دموع ، تعب كلش وانهارت اعصابه وصلت بيه مرحله ينام هو وكاعد من التعب والارهاق...
خلص برنامج الانسحابي اللي حددها الطبيب المختص وهيه عشره ايام تخلصت سيلين من سموم الادمان وعرفنه المده اللي تعاطت بيها المخدر هيه ٣ اشهر بس وجانت جرعات خفيفه يعني مو ادمان قوي بس اخر اسبوعين جان مأذيها بالجرعات ، الفريق كمل مهمته وراحو بس تضل مستمره على العلاج ومراجعه الطبيب الى ان تشفى تمامآ لان السالفه تعتمد على قدرتها الجسديه والنفسيه بالتحمل وتجاوز الازمه...
، اما العلاج النفسي ادهم وياها وياها كدر يحدد من شنو عانت وعرف نوع العذاب المرت بيه من بعد ما نامت سيلين اجه ادهم اجتمع بينه اني وايمن.
ادهم : بهاي الفتره هواي اجتي ايفين ورادت تشوف اختها وانه منعتها لعده اسباب اول شي ما اريد اشتت انتباه سيلين وتتعدد الوجوه عليها لان عقلها يكوم ميجمع ويحفظ الصور هسه ركزت علينه احنه الثلاثه وخصوصا انه ونرمان لهذا بلشت تأمن النه وتتقبلنه نوعا ما ...
اذا اجتي ايفين مستحيل تدخل اله انه اسمح الها ماشي..
هزينه راسنه موافقين...
ادهم : ايمن تفرغ غرفتك وتصبغها لون بني فاتح وتغير الاناره مالتها خلي شمسيه فقط شلون ماسويت غرفه مريم وتشيل التلفزيون منها وتروح تشتري جراجف لونهن سمائي..
ايمن : زين ليش اله غرفتي خو غرفه مريم غرفه نرمان.
ادهم : انت غرفتك بعيده عن الحمام وعن المطبخ لهذا اخاريتها.
ايمن: وهاي شعليها.
ادهم : شوف سيلين متعرضه لتعذيب وبعده اشكال كدرت اتعرف على ٣ نوعيات والباقي منتضرها هيه تحجيلي.
ايمن : شنو السالفه هلمره تعذيب.
ادهم : اي
ايمن : شلون عرفت
ادهم : اول شي شبه فاقده الذكره وتكره اللون الابيض بكل اشكاله وعدها رده فعل قويه اتجاه هذا اللون.
ايمن: بمعنى ؟
ادهم : بمعنى متعرضه لنوع تعذيب اسمه التعذيب باللون الابيض او الغرفه البيضاء هذا النوع يستعملوه بالسجون علمود يحققون ويه المتهم خصوصا السجناء السياسين
نرمان : اويلي لهذا يطلعون عقلهم بيه شي يعني مو طبيعين يرجعون لاهلهم بنص عقل مثل ما نكول.
ادهم : صح
نرمان : يعني سيلين مابيها امل يرجع عقلها ابد..
ادهم : لا سيلين تعرضت لهذا النوع فتره شهر واحتمال اقل يعني الضرر مو قوي ان شاءالله وبالعلاج النفسي نكدر نتلافه المشكله ونتعداها.
نرمان : الحمدلله لان اني قاريه على هذا النوع من التعذيب مستحيل الانسان يصحى منه ويرجع عقله طبيعي...
ادهم : صح اذا مده طويله ..
نرمان: زين ليش متعرفنه اذا ترجع..
ادهم : صاير عدها فقدان ذاكره وقتيه.
ايمن: والنوع الثاني شنو شخصته.
ادهم : التعذيب بالاصوات.
ايمن : شلون يعني.
ادهم : شلون ماعرف لازم هيه تحجيلي بس لاحضتها تخاف من الصوت حتى اذا حجيت بصوت ناصي تفز وتخاف بسرعه تدخل لحضني.
ايمن : هيه هاي احله شي صارلك بهاي السالفه..
ادهم : اسكت احسلك تره كلش متأذي عليها..
ايمن : الله يعينك والله بس حبيت الطف الجو وازيل التوتر.
ادهم : متقصر..
ايمن: زين ليش ردتها بعيده عن الحمام والمطبخ.
ادهم: لان تسد اذنها من تسمع صوت الدوش من تفتحوه او من نرمان تشتغل بالمي تنام وتسد اذنها حيل.
ايمن : وهذا سامر النذل شنو راح تسويله معقوله فلت منها.
ادهم : مو كدامك قدمت شكوه وطلع مسافر .
ايمن : عرف راح تلتهي بسيلين وحسب حسابه وره يومين يطير ..
ادهم : اي فعلا الجبان ..
ايمن : خلي يولي ..
ادهم : بس وين يطير وهو روحه بالجامعه قابل راح يتركها ..
ايمن : هم صح جوز عباله فتره شهر وتأيس منه ويرج ...
ادهم : الله كريم هسه خلي اعالج سلين اهم عندي وبعدين اتفرغله انت سوي الطلبته منك لتنسى ..
ايمن: لا باجر اسوي اللي كلت عليه بالحرف.
ادهم : عاشت ايدك وانتي نرمان نزلي للسوك وجيبي بيجايم لسيلين مريحه واختاريها قطنيه واهم شي يدخل اللون الازرك بيها او سمائي
نرمان : شمعنى ازرك.
ادهم : بيه راحه نفسيه علمود تحس بسلام نفسي واي قطعه يدخل بيها اللون الابيض ابتعدي عنها.
نرمان : صار
ادهم : وكفتكم ما انسها باجر ورانه علاج طويل ويرادلنه صبر وقوه تحمل
ايمن: عدينه الاصعب وان شاءالله هاي هم نعديها.
ادهم : بوجودكم نعديها وبصبرنه وايمانه برب العالمين.
ايمن : ونعم بالله
نرمان : ونعم بالله..
شكرا لزيارتكم عالم روايات سكيرهوم
