رواية ناديه الفصل التاسع والأربعون 49 بقلم انين الليل

سراج 

رجعت انا ورضا او بالاحرى رحت حتى اشوف شنو ممكن اسوي نمت بالسياره وفزيت وانا اشوف ناديه الطفله

 الي حاضنتني وهي خايفه لو هي مصخنه وصلت البغداد ورحت على ولد عمي جميل الي عدهم علم بالي صار

 لكن همه بطبيعة الحال ما يهتمون الهيج امر رغم يحبون عمتي منيره لكن ما يهتمون بسبب انو ناديه تكون اقاربهم

 من بعيد وثاني شي يخافون على مناصبهم خصوصا وكل واحد صار بمنصب اكبر من الثاني وكل واحد اتزوج 

اثنين وفلوس وسفر

لكن هذا ما منعني اطلب منهم المساعده محمود ابن عمي گال انطيت الاسم على كل المخافر الحدوديه وحتى 

المطارات لكن ماكواي شي اتشكرته وطلعت وبعدها. رحت الدائرتي الي بدو البحث من يومين گعدت وره المكتب

ورضا وياي 

وانا خليت راسي على الكرسي وصرت احچي بصوت عالي

::ناديه يومين ماكو انتي وين معقوله صدك مثل ما گالو انهزمتي بس لا لايمكن تفكرين بنفسج لايمكن تعوفين

حنين وترحين انتي مو انانيه مستحييل 

ضربت ايدي ع المكتب وانا اكول بصوت عالي ::لاناديه ما تسويها 

اتقرب يمي رضا وگلي //سمي برحمانك وگول ياالله

انتبهت النفسي انا بالمكتب وگفت وگتله ::لازم ارجع للبصره بس بالاول عدي شغله لازم اخلصها وبعدهااقدم اجازه 

رحت الرئيسي بالدائره الي فهمته انو عندي حاله استثنائيه تستوجب حضوري وما تقبل التاخيروبعدها اتصلت 

وگالو نص ساعه والكتاب يكون عندي

ورجعت لگيت رضا غافي خطيه صار يومين وياي وما گعد وصلت يمه وندهته 

::رضا اگعد روح للبيت ارتاح 

هو باوعلي وگال بنعاس //انت شتحچي وين اروح اعوفك 

::اي انت ما قصرت بس مثل ما گتلك روح ارتاح 

اتثاوب وگلي //ما اخليك منا الهنا اله رجلي على رجلك وانا ما مكلفك شي كاعد بالفندق

ابتسمت من كلامه وجاوبته ::رضا انا ما رايح للبصره بالبدايه عندي شغل 

  - - - وانا وياك سراج هسه انت شايلني على راسك 

::مو تتعب 

لا وداعتك ما اتعب منو گلك انا شايب بس اطلبلي چاي وانطيني براسيتوله راسي يوجعني 

دگيت جرس اجاني ولد گتله :: جيب چايات 

رضا گله // ثگيل كون يعدل روسنا

انا اتحسرت ونفخت هو اتقرب يمي وگلي //سراج الخوه مو بس دم الخوه سالفه وضحكه وگفة وكلمه طيبه 

وخبز وملح لا ياخوي ما اعوفك اله تنگطع هاي (واشر على رگبته )

غورگت عيوني ودنگت هو شافني وگال //افه انا خوج ياعليه شوف هاي (ودگ على رگبته ) هاي جدامك وابني 

او ويلاد اخوتي الك افداهم افه والله سراج الزلمه الحوك يبچي 

هو سكت رد گال// بس ساعات البچي يراد چا هو گلب مو صخر

حسيت بي خانگته العبره اجه الولد جابلنه چاي صرت ادخن واشرب هو گلي 

  - - - سراج على كيفك ويه روحك تر جاي تحرك بروحك مو بالجكاير 

ما جاوبته اجاني ولد وجابلي كتاب باوعت الرضا وگتله ::ياالله خلي نتوكل 

وطلعنه وصرت اسوق باوعت الرضا وگتله ::تدري وين رايحين 

رضا بلا اهتمام // وين ما تروح انا وياك 

  جاوبته بهدوء :: افتش السجون

هو باوعلي باستغراب //شني ؟

رديت باستهزاء :: ايي رضا ليش مستغرب تربات ايدي تاليتها افتش عليها بالسجون وبيوت الدعاره 

رضا حرك راسه وهو يگلي //لا سراج انت گلتها تربات ايدك لا تحچي هالشكل وانت متاكد ما راح تلگاها بهيج مكان

ما جاوبته ضربت على الاستيرن هو رد عليه وگال //الله يساعد گلبك 

خابرت زهراء جاوبت 

الو ها سراج بشر 

:: كل شي ماكو اگلج زهراء دزيلي صوره ال ( واتحسرت )

زهراء// قصدك الناديه 

:: اي كون صوره حديثه 

زهراء// عندي وحده هي وسفر لمن اجو للزياره ابيتكم 

:: اي دزيها بس ابحدها 

ودزت الصوره بعد ان قصتها چانت مبتسمه وثانيه وهيه تباوع ما اعرف المن باوعت الها شفتها 

ذيج ناديه ابنيتي الحلوه البريئه صرت اباوع للصوره واعاتب بيها

::وينج وين رحتي 

::خلصت كل عمري وانا اراقب بيج معقوله بلحظه ضعتي معقوله كل الي چنت اشوفه واسمعه چان تمثيل 

::ناديه بايدي اموتج اذا الگاج باحد هاي الاماكن صدگي اموتج وما يرفلي جفن 

::ناديه لا تخيبين ظني بيج 

رضا يسمع //. ما تخيب ظنك بس الصار وياها غصب عنها 

 تحسرت :: ياريت رضا ياريت

رحت بالبدايه على جماعه وراويتهم الصوره نقلتها الهم وانطيتهم الاسم بالكامل وصرنا نتنقل نفتش بالسجون 

وبكل محافظه نمر بيها لازم افتش السجون اما بيوت الدعاره فچان لازم اخذ وياي افراد من الشرطه

فتشت انا ورضا واي شي ما لگيت ما اوصف الكم حالي وانا افتش بالسجون وشلون گلبي چان يدك من الخوف 

وانا افتش ببيوت الدعاره وبهاي طلعاتي شفت هواي قصص او وگفت على بنات متقشمرات من ناس ذئاب باعو

 بيهن واشترو وعلى نساء مجرمات بحق نفسهن وبحق المجتمع

بقيت اسبوع ما خليت سجن او بيت مشبوه بكل محافظه اله دورته وحتى دزيت جماعه للشمال وماكو اي نتيجه 

وحتى بالليل اروح للملاهي اشوف الراقصات واي شي ما حصلت 

صار عندي يقين انو ناديه يااما منهزمه ويه واحد او مخطوفه حتى يساومون عليها او كاتليها ودافنيها

رجعت للبصره انا ورضا رضا الي ما قبل حتى يمر ابيته ويجيبله ملابس رغم وجودنا ابغداد بقى وياي ما فارگني 

من اجينه للبصره شفته تعبان گتله ارتاح وانا اسوق هو گعد يمي وانا سقت واشوفه نام يمكن ساعتين گعد وگلي 

:انزل انا اسوق وانت ارتاح شويه 

باوعتله واگله ::وين الراحه رضا راح اتخبل 

رضا // داانزل ياخوي انا اسوق

ونزلت وصار رضا يسوق واسمعه يدندن بابوذيات حزينه وهو خانگته العبره ويمكن بچى اتحيرت بهذا الرجال 

وبعشگه معقوله هيج اكو واحد يحب نسى ابنه وطلك مرته بس على مود اليحبها وهو ما طايل لا سما ولا گاع 

نزلنه مطعم بالطريق طلبنه اكل لكن منو يشتهي يمكن كل واحد اكل لگمتين وشربنا چاي

حياتي بهذا الوقت عباره عن تفكير وجكاير وچاي 

وصلنه للبصره ونزل رضا بالفندق لان ما قبل يروح وياي رحت على بيت كرم الي شفت الحزن والكسره

 على وجهه دخلت للديوانيه وانا بعيوني تساؤل وكرم نفس الشي اجت يمنا زهراء ومرتضى وسالوني وجاوبتهم 

 :: ما لگيت شي وحتى دخلت الاماكن من الصعوبه اي احد يدخلها ودزيت جماعه للشمال ونفس الشي 

مرتضى //وبالحدود ؟

اشوف كرم خزره انا گلت ::حتى بالحدود وبالسفارات ماكو وحده دخلت بهالاسم

كرم بعصبيه // يعني شنو 

مرتضى // يجوز طلعت تهريب 

كرم // لا ليش يجوز اكيد 

   ما عقبت. :: من رخصتكم اروح اشوف عمتي

تحنحنت وگلت :: ياالله  

حتى يسوولي طريق دخلت يم عمتي جميله الي لگيتها گاعده وبس تنعى وتبچي لكن بصوت ما مسموع 

وشفتها شلون متغيره 

اتقربت يمها وبست راسها وهي بس شافتني گالت //. بشر عمه ان شالله ما لگيتها 

چانت زهراء واگفه استغربت من كلامها هزيت راسي الزهراء يعني شنو قصدها ما جاوبتني

بقيت كاعد وحاولت اخابر الجماعه الي دزيتهم كرم طلع ومن نهيت مكالمتي زهراء كالت

- - - بيوم الي خابرتني ع الصوره وكرم عرف منك راح تدور بالسجون وب ......اجه يم امي وگلها 

قرت عينج ابت ابن اختج بت عباس لا مو بت عباس بت مياده الزلم اتدور عليها بالسجون 

وببيوت الدعاره بس ليش نتعجب هي امها شنو 

هي ردت علي //انچب ناديه اشرف وحده 

كرم گللها // اي مبين وين هسه هي بس اسمعيني وين ما الگاها اكتلها واغسل عارها

سالتها :: كرم ليش هالشكل يحچي واحنه ما ندري هيه وين 

عمتي ردت بقهر // والله ياعمه احلف دونها شريفه بس شوف شني من مصيبه صارت الها 

كرم اجه ورانا وگال //هم بعدج تدافعين 

جميله //اي واليوم وباچر وعگبه ناديه شريفه ما طلعت عليها حچايه 

كرم باستهزاء //ومياده هم شريفه 

جميله // جزاتها ناديه بعرس غفران المحبس ذهب هديتها بايدها وشاشه بحجرتها

كرم اتقرب على عمتي وگلها //بس تثبت عليها صدگي حتى المكان الگاعده بي والمخده النامت عليها ابيتي احرگها 

عمتي سكتت وكرم طلع بالصاله زهراء گالت //شبي كرم متخبل 

جميله //حگه يمه لاتلومونه الرجال عرض والمره شرف 

زهراء //بس يمه ناديه ما تسويها 

جميله //ادري ما تسويها (باوعتلي )مو عمه 

هزيت راسي وگتلها ::الله كريم عمه 

باوعتلي وگالت //اي عمه الله كريم الله يبرد گلبك ويبرد گلوبنا

طلعت انا وكرم وزهراء ويانه ام مرتضى رحنا البيت هادي دخلنه للديوان البراني وراحت زهراء وام مرتضى 

بعدها اجه عمار گال // شنو عمي انتو غربه وگاعدين اهنا فوتو داخل البيت بيتكم 

رحنا ودخلنه بالديوان الداخلي واجه هادي وياسر اشوف هادي چان عادي وكأنما يتمنى تكون ميته او ان يلگاها

 وتنكتل بحجة غسل العار لكن ياسر هو الي مبين علي الحزن والتعب والقهر الي يشوفه يگول عمره خمسين سنه

هادي باوعلي وكأنما يحچي بشماته // ها سراج خو ناديه ما قصرت وياك خلتك تدخل بيوت دعاره

وسجون 

جريت نفس وحچيت :: مي خالف اهم شي ما لگيناها 

عمار// عود صدك تحچون شنو عبالكم هي شارده وباقيه اهنا هسه لو باربيل لو بتركيا لو بايران 

ام مرتضى // استغفر ربك خاله شنو هالحچي 

عمار // هو هذا الحچي وين يعني تكون راحت فص ملح وذاب

اجت افراح سلمت علينه هي من شافتنا گالت //هم زين اجيتو حتى لو ام مرتضى لو زهراء تروح وياي ما 

اروح ابحدي 

زهراء// وين ام ياسر 

افراح وهي تتحسر // وين للضيم نروح على مره كشافه يگولون تنطي بالمكان 

كرم // اي روحن وياها 

زهراء //شنو انوب ع الكشافات والياخذن خيره 

افراح گعدت وتهز براسها // چا شنسوي زهوره مو هالخلت سراج من سجن السجن لبيوت دعاره وابو مرتضى 

ما خله لا مستشفى لا طب عدلي 

زهراء //انا ما اروح روحي انتي ام مرتضى 

 افراح // ياالله خلي نروح

افراح هي وام مرتضى طلعن واحنا بقينا نترقب جيتهن عبالك من يجن يجيبنها وياهن 

ومن وصلن سلمن وهنه مقهورات هادي وجه كلامه الافراح //ها شگالت 

افراح تهز بايدها // لا هادي انا ما احچي انوب مثل لمن ابتهاج اجت وگالت وصرت تصيح عليه 

هادي // هسه عوفينه شگالت المره 

گالت //هاي راكبه بسياره ويه واحد وهسه گاعده ابيت بس هي خايفه وهاي فيحاء (تاشر على ام مرتضى ) واسالوها

كرم // هاي هي تبينت رايحه ويه واحد 

فيحاء // ايي والمره اشرت صوب الشمال 

كلنه صفنا وبهاي الاثناء اتصلوعليه جاوبتهم :: هسه جايين بقوها بمكانها 

باوعولي والكل سال // شكو 

وگفت :: لاگين ابنيه بمواصفات ناديه غرگانه ياالله امشو خلي نروح

الكل گام بس ياسر بقى زهراء گالت // اوگفو خلي ام ياسر وام مرتضى يرحن وياكم 

جاوبتها // اي وروحو اسالولي حنين شنو چانت لابسه 

ياسر // چانت لابسه تنوره رصاصي وقميص ابيض جوا بدي ابيض وشال اسود وترانشوز اسود 

باوعتله ورفعت حاجبي :: هاا زين حافظ لبسها

افراح // هي هذا لبسها ما تلبس جبه ولا عبايه اسلاميه بس اذا راحن البيت كرم وبيومها كلنه 

شفناها هيچ لابسه 

   :: زين ياالله خلي نروح وجيبو وياكم جرجف 

راحت افراح وجابت جرجف ورحنا انا وكرم وام ومرتضى بسياره وافراح وعمار وزهراء بسياره لان 

هادي ما قبل يروح 

وصلت وگلبي يدك وانا اگول :: لا ناديه لا 

وصلت يم الجثه وانا گلبي يباوع گبل عيوني موجودين هواي ناس بدون تفكير كشفت وجهها شفتها 

افراح گالت //اي هي هي هاي 

لكن انا هزيت راسي وعطت :: لا لا مو هي ام ياسر 

افراح باوعتلي // منين تعرفها ومبين غركانه صار اكثر من تلث تياام ما مبين شي من ملامح وجهها

گتلها :: لا ام ياسر مو هي 

زهراء // افراح هاي لابسه عبايه اسلاميه وانا من ردت اسأل حنين انتي وياسر گلتو 

لابسه تنوره وقميص 

افراح // شمدريني شگد صار الها من راحت يعني تبقى بالتنوره والقميص ههههي والله تحچون (وهزت ايدها )

جاوبتها ::اي بس مو هي 

افراح //وانت منين تعرف مو هي هاي 

رديت :: اعرفها باوعو الهاي شوفوها لابسه ترچيه طويله وناديه لابسه التراچي الزغار الي جبتهن الها اول 

ما صارت 

زهراء // اي صحيح شفتهن باذاناتها من اجيتو للزياره

وبهاي اللحظه اجو ناس ونسوان وهنه يتصارخن والرجال گال هاي بنتي قبل تلث تيام رحنا للساحل سفره وهي 

غركت 

افراح //منين تعرفونها ما مبين منها شي 

المره// بتي هاي اعرفها من المحبس الي لابسته

رجعنا وانا اشوف افراح خاب املها لان ما طلعت ناديه ولان حسيت ابدها تكون الجثه جثة ناديه من وصلنه 

هادي گال // ها ما طلعت هي 

كرم بعصبيه // ياريت طالعه وفاكتنا اقلها نگول غرگانه 

هادي // اي والله ياريت 

زهراء //شني هالحچي هذا شندري بيها شنو صاير وياها 

كرم //شتدرين بيها انفضحنا وخلص. من رحنا ما شفتي الرجال السلم عليه هذا يعرفني وسالني 

خير ابو مرتضى شو اهنا عاد انا گتله جاي ويه الجماعه خطيه بتهم غرگانه

تستمر القصة أدناه

افراح // لو ما طالعين الهاي الميته اهل چان گلنه هاي هي ودفناها وسوينالها فاتحه ولا هالفضيحه 

زهراء // استغفري ربج ما نعرف شنو الظروف 

هادي // ياظروف هاي 

زهراء// الله اعلم شنو بيها يجو...

كرم قاطعها // كافي زهراء بس خلي الزمها اله اگطعها وادفن كل وصله ابحد

بصراحه اتعجبت من ردة فعل كرم ليش هيج يحچي شنوو السبب ما لگيت جواب السؤالي وهواي امور 

مثلا هادي الي ما كلف نفسه يدور وبس افراح الي تحچي 

لو ياسر الي عايش بعالم اخر ولا كانه بت عمه ما موجوده

لكن الصدمه الحقيقيه من رجعت للفندق وقررت اروح انا ورضا ندور عليها بالصحراء بحكم انو البصره 

قريبه على الكويت وهو طريق صحراوي وطريق الناصريه والسماوه دائما يتواجدون بيهن البدو صرنا نروح 

ونضيفهم ونسالهم بلكي شايفيلهم جثة ابنيه ودافنيها للثواب لكن همه كانو يقسمون انهم ما صادفو هيج 

شي حتى رحنا بمحاذاة طريق سكة القطار گلنه يجوز صاعده بقطار وشامريها من الشباك

اتوصلنه انا ورضا الى قناعه انها فعلا مهزومه ويه واحد اجت ابالي حچايه // رضا بعد عدنا بس بيت خوالها 

رضا هز راسه // ايي واهل سلدار لا ننساهم 

وقررت اروح اسال عليها هناك وانا اتهيأ لي اشوف مقدار الشماته بعيونهم بيومها

چنا راجعين من احد مناطق البدو وعلى اساس الصبح نروح الخوالها ندور لمن ما زهراء اتصلت وبلغتني انو 

عمتي جميله تعبانه وطالبتني 

گتلها :: شكو زهراء شبيها عمتي 

زهراء // سراج تعال ولا تخابر كرم وانت تعرف 

اتخوفت من كلام زهراء خصوصا وانا شفت التغيير من ناحية كرم وشلون هو صاير ما يتحمل حتى يسمع باسم ناديه 

وصلت ورضا للفندق ورحت على بيت كرم واتصلت على زهراء فتحت الباب سلمت عليها گتلها  

وبعيوني تساؤل ::خيير شبيها عمتي 

زهراء // اتفضل الغرفتها هي متانيتك

وصلت شفت جميله ساكته وهي كاعده على جربايتها ومدنگه جريت نفس وابتسمت بوجهها هي باوعتلي وگالت 

: ها ما كو خبر من البنيه راحت فص ملح وذاب (وتضرب ايد بالثانيه )

زهراء //يمه لا تقهرين نفسج 

جميله بانكسار وگالت //خليني اولي علوا اموت ولا ناديه ما ترجع 

اتقربت منها وباوعت الزهراء سالتها :: ليش گلتيلي لا تخابر كرم ؟

جميله بقهر //سولفيله لان بعد ما عدي قابليه

زهراء جرت نفس وگالت// لان امي زعلانه على كرم وهاي صار يومين حتى الماي اشتري الها من المحل 

:: ها وليش كل هذا شصاير 

زهراء مدنگه // لان مرتضى ......

عكفت حواجبي :: مرتضى شبي ياستار

زهراء // مرتضى عقد على هديل بت هادي 

فعلا صدمه رفعت حواجبي وفتحت عيوني ع الاخر :: انتي شتحچين همه بيا حال 

زهراء // اي مثل ما سمعت هو وابو وهادي وافراح ما نعرف يمته طبخوها للسالفه

رديت ::زهراء بهذا الوضع مرتضى خطب 

زهراء // لا سراج مرتضى مو خطب مرتضى عقد على هديل وباچر يتزوجون 

  لملمت حلكي وسالتها باستهزاء:: تحچيين صدك ؟ 

هزت راسها // اي والله 

جريت نفس ::بس لا الوقت ولا الظرف مناسب شنو السبب شصار وهمه بياحال حتى المخابيل ما يسووها

زهراء بالگوه لازمه نفسها ما تبچي وگالت

: بيوم الي رحنا نشوف هاي الي لگوها غرگانه وطلعت مو هي انت من رحت وانا صعدت اشوف حنين

صعدتلها للغرفه ولگيت حال الضيم حالها املخه نفسها عبالها الجثه الناديه والظاهر هواي متشفيين بيها من 

غير ضرب هادي وافراح رحت يمها وحضنتها وفهمتها انو الجثه مو الناديه وان شاءالله نلگاها 

هي باوعتلي وگالت //عمه انتي تعتقدين ناديه تسوي شي مو زين

هزيت راسي وگلت //لا ابد ناديه بايام المراهقه وكل الضيم الي شافته ما فكرت تنهزم لو تسوي شي مو زين 

حنين // عمه زهراء يعني انتي متاگده ندووش يجوز مخطوفه او صاير وياها حادث وانا اگلج ناديه ميه بالميه 

مخطوفه لان لو صاير حادث وياها چان عمو سراج عرف 

هزيت راسي // اي صحيح 

حنين بصوت مبحوح //عمه الله يخليج خلي عمي كرم وبيبي جميله ايگولون العمي هادي اروح اهناك اگعد يم 

بيبي جميله على ما يلگون اختي هيه اكيد راح ترجع

سالتها //ليش حنين شصاير ؟

صارت تشهك من البچي //عمه مليت من ضرب هادي وعار افراح واستهزاء هديل واسيل او ......

:شنو بعد حنين 

حنين // عمه عمار يباوعلي بنظرات تخوف وانا بالليل صرت اخاف انام ابحدي ابقى الليل كله گاعده وهاي 

افراح خلت الشغل كله عليه وتگلي بعد ما كو دوام لاتفكرين ترجعين للمدرسه 

جاوبتها //شنو بكيف افراح غصبن عليها تمتحنين وتنجحيين

حنين وهي تبچي وتتوسلني // اي عمه الله يخليج خلي عمو كرم وبيبي يگلون الهادي والله بعد ما اتحمل 

رديت عليها //هذا هو الي راح يصير اصلا كرم وامي يتمنون تجيين تعيشين هناك يمهم وبس نلگى ناديه راح 

تعقدون انتي ومرتضى 

حنين هزت راسها بالنفي //لا والله عمه مو على مود هيج بس والله مليت وهذا عمي هادي يباوعلي بنظرات عبالك 

يريد يكتلني

گلتلها //اسمعي حنونه انتي كوني حذره من كل شي ولا تتقربين للطباخ وحاولي تتجنبيين افراح حتى لو غلطت عليج

وعلى ناديه لا تراددينها اسكتي واتحملي 

حنين // اي عمه بس فدوه مو تنسيين 

 حاولت اطمنها // لا ما انسى حبيبتي اسمعي الكلام وديري بالج وانا اروح اجيب امي وكرم يحچون ويه هادي 

ومن نزلت وصيت هادي على حنين وگتله //حتى لو ناديه غلطت حنين ما الها ذنب

هو رد عليه وگلي گدام كرم // لا تخافين عليها زهراء هاي تطلع ابلى 

افراح // اي الامها مياده واختها ناديه وخالتها رغد ورانيا شتطلع مثلا 

جاوبتها // استغفري ربج ام ياسر

افراح // ما گايله شي چذب حتى النبي صلى الله عليه واله وسلم گال انتقولانسابكم 

وگال اياكم وخضراء الدمن 

يعني لازم تنتقون مو مهم الجمال المهم هي بت منو ابوها منو وامها منو وخالتها منو لان العرك دساس 

وهاي گدامكم تگل للبنات رايحه ويه ابن عمي وهي بس الله يدري ويامن رايحه 

هنه مسجلات بنات عباس بس معقوله اخذ وحده منهن الاولادي صحيح هنه گدام الناس 

بنات عمهم لكن من يتزوجن ويصير عدهن جهال ما راح يسالون على جدهم وينه وبيببيتهم وخالهم منو 

لاتعرفونها وتحرفونها البنات چان لازم يتودن الدار الايتام بس عمتي الله يرحمها تصيح من ريحة عباس 

وبنات عباس وهسه خوش سوت بينه بت عباس خلت راسنا بالوحل

سكتت ما جاوبتها ورجعنا للبيت وهناك فتحت موضوع حنين گدام كرم ومرتضى وامي وفيحاء لكن الي صار 

والي ما لاگيتله تفسير 

كرم ومرتضى اتخبلو والي سمعته منهم عجبني اكثر 

انا باهتمام :: شنووالي سمعتي زهراء 

زهراء من سمع كرم گلي // انتي من كل وعقلج اخذ بت مياده الابني شنو شگول للناس اخذتمن الابني

امها منو اختها وين ويامن ؟

زهراء //بس مرتضى رايد البنيه

اشو مرتضى راسا گلي // لا عمه سدي الموضوع ما اخذ حنين يصير عندي طفل ويسالونه بيبيتك 

خالتك خالك منو ابد عمه ابد لا تفكرين 

فيحاء ام مرتضى //حنين خوش بنيه وناديه صاير وياها شي وانا احلف هنه خوش بنات

كرم //فيحاء اذا تردين اخذي حنين الابن اختج الابن اخوج ابني ما ياخذها 

فيحاء // نسيت كرم من فاتحتوني بالموضوع على حنين انا شنو گلت مو گلت البنيه خوش بنيه بس امها

وبوكتها انت شنو گتلي كرم اذكرك كتلي استغفري ربج كل لشه تتعلك من ذراعها وصدك كلامك وشفت حنين 

انسب وحده الابني

مرتضى // ماما انا قررت وخلص اخذ اي وحده بس حنين مستحيل 

كرم // ليش انت شبيك وتاخذ اي وحده اروح اخطبلك هديل بت عمك هادي اقلها اعرفها واعرف اخلاقها اعرف 

خالها خالتها اخوها 

مرتضى هز راسه 

جاوبتهم بذهول // انتو شتحچون هديل منو الي تخطبونها 

كرم //اي ردتله بت شمس بس اختج ما قبلت

جاوبته //على كيفك خويه وانت عمه مرتضى فكر هسه مو وكتها ما ندري بناديه شصاير وياها 

مرتضى //لا عمه هو هذا الوكت المناسب حتى بعد حنين تفقد الامل من عدي 

زهرا//بس عمه انت جاي تعاقب حنين بجريمة اختها وحنين ما الها ذنب 

كرم //وطبها مرض انا متاكد هي تدري وين اختها ومتراهمه وياها الله العليم شچانن يسون من يجنا مشي لو من 

يرحن يقبضن رواتبهن مو حتى الاكل ثامر لو العامل الجديد ايجيبه الهن

جاوبته //بس هذا ما يمنع تنتظرون شويه عاد خلي نعرف مصير ناديه شنو 

كرم //مصيرها انا اگلج لو بملهى ترگص لو ابيت استغفر الله ......

امي گالتله //خاف ربك شدعواك تره الله الفضح مياده يگدر يفضحكم 

    كرم. //. ما مسويين شي مياده الله فضحها چلبه واحنا كلنه ندري بيها وما شاء الله بتها استلمت الرايه عنها 

فيحاء //. استغفر ربك كرم كلنه عدنا بنات

هو ما رد و بنفس اليوم راحو البيت هادي طلبو هديل وهادي ما گال مو وكته بالعكس ثاني يوم سوو 

خطوبه وعقد وقررو يتزوجون بدون لازفه ولا اي شي واجه كرم يتشفى بامي ويسمعها 

رضاوي لا تضوج اسويلك احلى عرس واحلى زفه بس نلگى العايقه نذبحها ونغسل عارها ويصير الفرح فرحين

احس اختنگت گتلها :: زهراء انتي شتگولين 

هزت راسها / ومو بس هيج لا امي ولا فيحاء ولا شمس راحو للخطبه بس غفران وزوجها وقيس 

ابتسمت ::لا زهراء انتي تتشاقيين 

زهراء بعبره //سراج ويني وين الشقه اصلا قررت باچر الصبح اسافر واخذ امي وياي 

باوعت الها وگلت :: جمعي غراض عمتي وفد ساعه نسافر كلنه سووا 

زهراء // عود انا گلت بالطياره

:: بكيفج بس انا بعد ساعه راح اسافر 

زهراء //سراج ونترك حنين 

  :: بالاول خلي الگى ناديه ويصير خير 

زهراء //چنك شاك بشي 

  اتحسرت :: هسه كل شي ضبابي زهراء

  طلعت شافني كرم ابتسم // هاا سراج من يمتى اهنا 

  جاوبته بدون نفس :: صار ربع ساعه اجيت اشوف عمتي واسلم عليها لان راجع البغداد 

   كرم // اي ارجع بعد شكو باقي اي شي ما لگينه شوف هاي يجوز اتهربت خارج العراق وهسه 

شوف بيا ملهى مع الاسف انضحك علينه قشمرتنه بت مياده

شگد چنت احب كرم واحترمه لكن من سمعته هيج يحجي احتقرته جاوبته 

    :: ابو مرتضى ولو اشك ناديه ما تسوي هيج بس كل شي وارد انا دزيت جماعه وانطيتهم الصوره هاا 

ودفعت ملايين من جيبي ولحد الان ماكو شي 

كرم //ادري بيك سراج ما قصرت بس هاي بت الك... وطت روسنا وانت الهسه تگول اشك ما تسوي هيج 

شي لا خويه تسوي وتسوي الي امها جابت رجال وبفراش زوجها وانوب كتلته كل شي اسوي

  زهراء //سراج سوي جهدك الگى ناديه وطلع الحقيقه مثل ما لگيت الي كتل عباس 

   باوعت الكرم بحزم // زهراء مو انا الي لگيته ناديه هي الي دلت علي 

  جميله حچت من غرفتها //لا والله يمه انت انت الي دورت ورحت وركضت والزلم بس يدگولك تلفونات 

وهسه همه وداعتك هاي التشوفهم بس بوخه نذبح ونصلخ وهمه گاعدين وبس انت تدور لا والناس استعرست

  سويت نفسي ما ادري ::يصير خير اگلك ابو مرتضى اشو جميله تگلي اخذني وياك اريد اروح اشوف اخوي 

  اتحسر كرم وگال // امي زعلانه عليه 

  :: ها وليش 

  كرم //معقوله ما حچلك 

    :: شحچلي كرم هسه توني اجيت وبس شافتني گالت الزهراء لمي هدومي شصاير كرم ؟

   كرم //امي زعلانه لان مرتضى خطب بت هادي 

       درت عليها :: اي بيها الخير ليش زعلانه ؟

        كرم //تگول احنا بيا حال وانت تريد اتزوج ابنك 

      :: هم صحيح كلامها 

     زهراء //شنو كرم تضم على سراج لا خويه كرم باچر يعرس الابنه

    كرم خزر زهراء وگلي // سراج هو احنه ما راح نسوي عرس لان تعرف العرس الي سوته بت مياده 

كافي علينه بس ياخي شسوي الولد رايد البنيه وهادي قرر يشيل من البيت يكول انفضحت وكل شي يصير 

يجوز انا هو لو واحد من ولده من نلگى ناديه نكتلها عاد خلي مرتضى يتزوج وبعدين من نلگى هالعايقه نتصرف

  جاوبته // كرم ولو مو من حقي اتدخل انت تريد اتزوج ابنك مو على مود هادي ولا لان مرتضى يحبها الهديل

لا انت تريد تكسر گلب بت عباس 

كرم فتح عيونه وهو مستغرب من كلامي رد بنتر وعصبيه 

 // فكنا سراج الله يخليك يابت عباس موتونه وانتم تگولون بنات عباس وهذا الجنينا من وره بنات عباس وحده 

ما ندري هسه بيامكان ترگص و...والثانيه الله اليعلم شناويه تسوي وكله من جوه راسك 

رفعت حواجبي ::ها شلون باالله ؟

  كرم ايأشر عليه //ايي انت لان خليت الورث يرجع الهن لو ما انت مرجع الورث چان الهسه هنه مكسورات 

جناح وما تشمخرن وطلعن من الطريق عاد گبل چانت تشوفهن افراح تگل الهادي يكتلهن ايطيح حظهن بس 

من صارت عدهن فلوس طارن وما حطن مثل طيرة امهن 

  جاوبته وانا ابدي ارمي طلقه // بس انت گلتها ورث يعني حق شرعي ما منطي من جيبي ولا ماخذه من هادي

تستمر القصة أدناه

   كرم هز ايده // اي مو لمن ما يكونن بنات شرعيات 

      :: افهم من هذا الشي انت اتشكك بصحة نسبهن 

  كرم //مو بعيد عمت...

   قاطعته :: شوف كرم بس الگى ناديه او الگى اي شي منها راح اعيد صحة النسب وهالمره اسوي تحليل نسب 

من هادي عمهن ومن جميله واطلع جثة منيره وعباس (باوعتله وگلت بحقد )خاف ربك كرم شنو هالحچي 

فيحاء /. اي هادي وافراح غسلوا دماغه 

كرم صاح على مرته // انچبي واسكتي لا اطيح حظج 

فيحاء // هاي الگادر بيها بس عليه بس اسمعني كرم گدام امك واختك وابن خالك انا ما راضيه على هديل 

تكون زوجه الابني 

كرم قاطعها // اي تردين بت الگ...على مود باچر الناس تعير ابنج 

فيحاء // لا مو اله ناخذله حنين بس هم ما اريد بت هادي

كرم //كافي انتي ما عليج الولد رايدها وهذا هو صارت واقع حاال 

جميله وهي تضرب العكازه بالارض // زهراء لميتي هدومي خلي اروح ويه سراج 

زهراء // اي حتى انا يمه هم اروح مناك رجلي ابحده

واخذت عمتي وزهراء مرينا على رضا وطلعنه البغداد وانا اشوف عمتي جميله الي چانت دائما تصنف 

وتضحك اشوفها شلون حزينه وساكته وتعبانه الكل مقهور وضايج وصلنه تقريبا الساعه عشره بالليل 

وزهراء وعمتي قبل ما ينزلن وصيتهن لا يجيبن اي سيره باختفاء ناديه

  وصلتهم للبيت وطلع زوجها الي چان كلش مشتاق البنته انا سلمت وگتله

:: عمتي تبقى يومين واجي اخذها

  هو ما قبل وگال //لا تبقى يم زهوره وسفر 

  نزل رضا وانا رحت البيتي الي صار فتره ما شايفه دخلت وكاني غريب بي اخذت حمام وبدلت حاولت انام ما گدرت 

صرت اسال واگلها ::ناديه انتي وين ؟ 

مانمت اله وجه الصبح گعدت وسويت اتصالاتي وهي فص ملح وذاب بدلت وخابرت رضا گتله ::تمشي وياي

رضا //لابس دشداشتي ومتانيك 

ابتسمت على كلامه 

رحت على بيت اهلي شفت امي الي حضنتها وهي تشمني وتحاچيني بعتب // انت وين 

انا جاوبتها ::يمه شغل مو تدرين 

سوتلي ريوك وگالت // اگعد اتريك واجوي اولاد موفق وموفق وزوجته وسلمو عليه انا سالته

::شلونه الشغل 

جاوبني // زين بعد انت تدري شغلنه ع الدولار

    هزيت راسي :: اي اعرف الله يرزقك بس هم دير بالك 

امي گالت // شنو سراج ما ناوي تتزوج لو ناذر اله اموت 

::لا ماما شنو هالحچي عمرج طويل 

امي // دياالله شد حيلك 

:: ان شاء الله 

موفق طلع يريد يروح المكتب الصيرفه مالته وصاح عليه // تعال سراج رايدك

رحت ويا للطارمه سالني //شنو هذا الخبر صحيح 

::ياخبر موفق ؟

هو جاوبني // محمود ابن عمي گلي وانا ما حبيت احچي الامي 

هزيت راسي ::زين تسوي 

:وهسه ما لگيتوها 

:: لا والله

موفق // يعني معقوله انهزمت ويه واحد 

:: انت شتگول موفق شنو ما تعرفها الناديه 

موفق //سراج لا تغالط نفسك ما جاي تشوف الدواهي بعيونك ما تسمع الي دا يصير بس الله يستر

:: بس مو ناديه 

موفق // وليش هي وحد ناسي منو امها 

خزرته وگلت بنتر :: لا ما ناسي وانت هم لاتنسى منو ابوها ومنو بيبيتها

موفق // انا على مودك سراج ما اريدك تتورط وانت اسم ومركز اريد تنتبه النفسك

::ليش انا شبيه 

موفق //لا ما بيك شي انا رايح بس اتمنى تفكر العمر يمشي فيمان الله 

::الله وياك ومثل ما وصيتك لا تحچي الامي او زوجتك 

موفق //لا توصي حريص 

رجعت للصاله امي گلتلي // اليوم ابقى هنا اتغدى مبين عليك التعب

:: لا ماما غير وكت عدي شغل مهم 

  امي تهز بايدها //. هو انت من يمته فارغ ما عندك شغل 

اتقربت وحضنتها واتحسرت :: مي خالف اتحمليني 

طلعت ورجعت عليها حضنتها وبست ايدها وگتلها :: ادعيلي ماما كلش تعبان 

امي باوعتلي وگالت// الله ينور طريقك ويرضى عليك

طلعت ومريت على رضا الي ركب وياي بدون ما يسالني وين رايحين بقيت اسوق وادخن ورضا مره يدخن ومره

يسولف عليه وانا بغير عالم من شاف الطريق گلي 

:اي زين تسوي خلينه نروح ونفك شوگنا يم ابو الحسن 

وصلنه للنجف ورحنا نمشي وانا اباوع للمناره وروحي يمها اريد اوصل للضريح دخلت وانا شاخصه عيني على الشباك 

بقيت واگف اقرا بكتيب بي الزياره ومن كملت اتقربت ع الضريح وصلت للشباك رغم ازدحام وصرت احچي بحرگه وقهر

:: ابو حسين اريد ناديه منك اريدك تعثرني بيها تره بس الله يعلم بحالي محتاج وگفتك ياعلي لاتقصر وياي بداعة الزهره 

بقيت لازم الشباك وانا عندي طلب واحد هو الگى ناديه صرت احچي واگول 

::يارب بجاه امير المؤمنين يارب استر على ناديه هي واختها مسكينات ياربي لا تشمت بيهن الي ما يخاف منك 

ياربي بجاه علي دليني طريق ناديه ياربي بجاه علي دليني طريق ناديه (بچيت بحرگه ) ابو الحسن لاتتخلى عن ناديه

صليت ركعتين الزياره وبعدها انتظرنا الصلاة واذن الظهر وصلينه انا ورضا واتوجهنا للمقبره رحت الابوي وعمتي

 وعباس گعدت يمهم وحچيت عبالك همه گاعدين يمي اسولف عليهم 

:: ناديه ضاعت وانا انشل حالي وانا ادور عليها عمه تره انا گد الامانه لكن ناديه كبرت وسلمتها حقوقها وهسه ضاعت 

ما اعرف بارادتها غصبن عنها ما ادري

ورحت يم عباس وگتله ::عباس انت رحت مظلوم وبتك ماكو انت ابوها ادعيلها ربك اينجيها

گعدت يم ابوي اهنا ما لزمت نفسي بچيت وگتله 

::بابا محتاجك منير ناديه راحت وما لا گيها سراج تعبان منير سراج ابنك تعبان ويكابر ما يبين تعبه ابدي هسه 

تحضني مثل گبل وتگلي كل شي ينحل ما طول انت سالم 

::مو هذا كلامك لان بس انت تدري بيه يابه تعبان ادعيلي تره انت حبيبي وعمري ما ضميت عليك شي ولا زعلتلك

صرت ابچي بصوت اجه يمي رضا وگلي //يالله سراج خلينه نمشي ياالله ورانه هواي شغل 

طلعنه وانا محمل بالحزن رضا صار هو يسوق ويجر ابوذيات 

يامگبره بهيده اعزاز عدنا وعلي يامكبره بهيده 

نامو بيج نومه وما ظنهم ايعودون 

يامگبره شكم واحد بواحد 

فارك حبيب الگلب وتاه وابد مارجع متاني حبيب الگلب بلكت اله يعودون 

متاني حبيب الكلب بلكت اله رده 

ايس ايس ايس من اهل النجف ما ظن اله رده 

والي اتداين گلب بالله عليك رده 

فوك الگلب والحيل ماظل عگل بالراس

باوعتله شفته يمسح بدموعه حاچيته. :: كافي رضا 

هو ما سكت //هم تدري ياصاحبي افراگ المحب بلوه 

وهم تدري ياصاحبي الميت سنه وينسي 

لكن ياصاحبي فراك العدل بلوه

صرت اتنفس قوي ورضا سكت وانا اشوفه شلون دموعه ينزلن وگفنه يم مطعم ورغم ما نشتهي لكن اكلنه 

وبعدها طلعنه الكربلاء وزرنا ورحنا على احدى الدوائر سالنه حتى على الناس الي تتسول اذا كان اكو احد غريب

 جاي لكن ما حصلت شي

ورجعت وانا مهموم ما اخفيكم بديت افقد الامل بان الگاها رجعت للبيت تقريبا الساعه قريب الوحده بعد نص الليل 

اجتني رساله انا بين النايم والصاحي ومتحضر الكل اتصال او رساله شفتها صار گلبي يدك شفته رقم  

قريت الرساله

عمو سراج الحگلي انا محتاجتك تعالي وهذا رقم الخطفني لا تتصل يكتلوني

انا ما ادري وين بس معمل طابوك بي كلمة (الله ) بلون اصفر

///////////////////////////////////////يتبع

ياريت تصوتون بعدها الاحداث باولها

#ناديه

#بارت٥٠

#انيين_الليل

____________

مرحبا 

تقريبا كل الي قروا البارت السابق وحتى الي ما صوتلي نفس الجمله 

الموبايل الي عد جميله

حتى انا سالت ناديه هي جاوبت 

الله يبعد عنكم الخطف احنه بمجتمعاتنا الشرقيه عموما والعراقيه خصوصا لمن ما بنت تنخطف او تنهزم 

او ما يلگونها الكل ينسى كل شي المهم عدهم يلگوها ويحاسبوها ويقتلوها

اما الامانه فناديه خالته عد جميله بجنطه زغيره وجميله ما تعرف اكو موبايل بالجنطه وهي امنتها وگلتلها اله يحلفوج 

بروح منيره وعباس ياالله تطلعين الامانه

جميله يمكن ظنها انو الي بالجنطه فلوس او ذهب واكيد ناديه ضامته بالجنطه بحيث ما ينعرف على انو نقال 

اكيد هواي تساؤلات وهواي اجابات لكن كل الي يصير راح اذكره الكم واكيد 

//////////////. ...////////////.....//////////////

ناديه 

بين النايمه والگاعده افتح عيوني وارجع اغمضهن عيوني ثگلانات وعبالك شايله فوك متوني موراس عبالك شي 

بگد الثلاجه جسمي خدران وما اگدر احچي فتحت عيوني گوه لگيت روحي مربطه ونايمه على حصير رجعت 

غمضت عيوني وانا احچي ويه نفسي واكول 

 ... ... ... اي انا مخطوفه وبعدني عدله بس ليش ما افتح عيوني

يمكن رجعت نمت فزيت على واحد يرش ماي خفيف على وجهي فتحت عيوني شفته نفسه هو الي خطفني 

باوعلي وگلي // اگعدي كافي نوم 

ما حاچيته لان ما الي قابليه احچي شبي راسي ماذيني وحتى يحكني اتقرب الخاطف مني وحل الحبل وگلي

   - - - گومي غسلي بالمغسله

خليت اديه بالگاع بس ما گدرت اوگف مو بسبب النعاس لا ما جاي احس برجليه حاولت احرك اديه وانسندت 

ع القنفه وانا احرك باديه بعدها صرت اضغط باديه على رجليه واحرك باصابعي صدگوني اذا گلت الكم اول

 مره عبالي انشليت وبعد ما اگدر امشي حاولت اوگف وگعدت ع القنفه وانا النعاس مسيطر عليه واتثاوب 

وعيوني تدمع اريد بس انام

هو يباوعلي وراح الوحده من الغرف غاب ورجع گلي 

   - - - گومي غسلي وجهج وصحصحي

وگفت وانا دايخه صرت اغمض عيوني حييل وافتحهن حركت رجليه استقريت وصلت للمغسله وغسلت وجهي 

اكثر من مره رجعت وانا ساكته

هو راح ورجع بايده صينيه زغيره بيها كوب چاي ولفه اخذته منه وصرت اشرب بالكوب وراسي يفتر حاولت 

اسيطر على نفسي ما گدرت هو گلي 

  - - - اكلي اللفه وحاولي تگعدين 

سالته بتعب ... ... انا ليش دايخه وشگد نمت 

جاوبني // هسه اكلي وشربي الچاي وبعدين نحچي

  حسيت بي هادئ ما اعرف مجرد احساس وعرفت يمكن خلالي شي بالماي اخر مره حتى انام وافتهمت 

من خلال تصرفه هو عنده كلام يريد يحچي وياي 

بقيت اكل بهدوء وبعدني اتثاوب وبالگوه الوج بيها طلع بره صرت افكر واحاچي بروحي

................ اهدي ناديه لاتضيعين اي فرصه اي خيط النجاتج لاتضيعينه هوه مبين عده حچي وياج 

 هزيت راسي ......... يعني يجوز راح وسأل وعرف انا عندي املاك واگدر اشتري نفسي ،

  ...... ... اويمكن گدرت اقنعه ياخذ فلوس مقابل يرجعني

... ... واذا ما اقتنع شلون لازم اقنعه هاي اخر ورقه عندي بس انا شنو چنت نايمه وشگد نمت وليش راسي 

هلگد يوجعني

باوعت للمكان گلت يجوز اخذني الغير بيت ظليت ادير بعيوني اتفحص المكان 

    .......... لا هو نفسه هذا المكان بس ليش هالشكل عيوني ثگيلات كل الي اتذكره هو انطاني ماي طلعلي 

من الثلاجه ماي وشربته بعد ما حسيت على نفسي

صرت ابچي وانا تذكر حنين وهسه شنو حالها عليه وهم ادري ابيبي جميله وعمي كرم وزهراء من تسمع بس سراج 

معقوله ما سمع وما جاي ايدور لا ما معقوله اكيد هو ايدور عليه

ماخذت الصينيه ورحت للغرفه الي جابلي منها شفته 

مطبخ زغير بي كاونتر سنك وطباخ وبي شباك باوعت للشباك شفته يطل على ترك باوعت اي شي ما شفت 

ولا سمعت رجعت صار وجهي بوجهه گعد ع القنفه وانا بقيت واگفه هو بادر بالكلام

: اذا قبلت بالعرض مالتج منو يگول ما راح تخبرين عليه وحتى لو اكتلج او جماعتي يكتلونج انا بالاخير ما احصل شي 

حاولت ابين نفسي مسيطره جاوبته ... ... ومنو يگول اذا انا انطيتك كل شي وعدتك بي ما راح تكتلني 

هو اتقرب يمي // زين لعد ماكو بينه اتفاق 

هزيت راسي ... ... بكيفك بس لو تسمعني للاخير وبعدين تقرر 

   اتنفس بعمق // اي احچي

... ... شوف عمو (هو ابتسم من كلمة عمو ) انت رووح واسأل بهاي المنطقه الي دليتك عليها شگد البيت يسوى 

انا عندي بيت بيها ونص بيت ثاني ونص محل المحامي قدر ثروتي بمليار ونص اذا مو مليارين الي دزوك عليه 

شگد راح ينطوك حتى تتخلص مني عشر ملايين انا انطيك بگدهن خمسين مره 

 ......... احسبها بعقلك انت ذكي يجوز ظروفك جبرتك هيج تسوي تخطف وتقتل واكيد تسوي هالشي الخاطر الفلوس 

لكن الفرصه تجي مره وحده للبشر وانت بكيفك يعني المفروض تسوي شغل لليدفع اكثر

هو حك لحيته وگلي //شلون اضمن حقي 

باوعتله وگلت ... ... لا لازم نفكر شلون نضمن حقنا احنا الاثنين وخصوصا انا بس الي اگدر انطيك الفلوس 

رفع حواجبه //شلون يعني ؟

... ... يعني هسه انت اذا طلبت فديه مثلا خمسين مليون محد راح ينطيك ولا فلس 

هو باستهزاء //ليش مو على اساس انتي تاجره وعندج املاك

  هزيت راسي ... ... صحيح بس انا الوحيده الي اگدر اتنازلك عن املاكي انا الي عندي املاك ينباعن بلمح البصر 

واي احد ما يتجرا يبيعهن او يتصرف بيهن وليش اچذب عليك سيوله ما عندي اله شكم الف 

هو طلع جكاره ودخن // املاك يعني اروح ابيعهن مو تشوفين انتي جاي تضحكين عليه 

  جاوبته بسرعه ... ... لا لا شنواصحك عليك ليش شنو گتلك

هز ايده //تگليلي املاك ومحد يتصرف بيهن بس انتي وقبلها تگليلي انطيك نص ثروتي شلون اروح ابسط باملاكج 

واكول يابه اريد ابيع املاك البنيه الي خطفتها منو يشتري انتي جاي تضيعين وكت وانا رجال هاي شغلتي اخطف 

وبعدين يدفعولي يااما اكتل الضحيه يااما اسلمها الهم 

هو اتقرب مني وصار يربط بيه حييل وگلي //نصيحه لا تتذاكين عليه 

 بلعت ريگي بخوف من كلامه صار يربط وكانما ينتقم مني حيل انا باوعتله وگتله 

... ... لازم تفكر بشي يرضينا احنه الاثنين 

هو خزرني ورخى ايده / شنو شگلتي 

... ... احنه ما بيناتنا ثقه انت تخاف مني عبالك اچذب عليك وانت متاكد انا ما اچذب لان اكيد رايح وسائل او داز 

ناس وانا ما عندي ثقه بيك لان خاف تاخذ كل شي وتقتلني لان تخاف من الي دزوك عليه لكن لمن ما تشوف 

طريقه او حل يضمن حقنا احنه الاثنيين ذاك الوكت نحچي انت فك...

اتصل رقم هو سووالي باصبعه اسكتي ابتعد شويه جاوب //الو 

اي منتظر وهاي صار شكم يووم ما حچيتو وياي حتى عبالي تچذبون عليه 

اتفاقنا چان خمس ملايين بس اكو ناس دفعولي عشره حتى بس اسلمها 

انا عرفت طريقهم شنو تردوني اخطف واخلص بدون ما اامن نفسي

- - اي ذولاك الصكاكه وانا شغلي يختلف المهم احنا ما راح نختلف هنه عشرين مليون والا اكتلها 

— - - اي ليش ما جبتو واحد يخلص بمليون اكيد ما تردون تنفضحون لو وراها شي تردون تستفادون منه 

  رفع حواجبه // هاا ثار ؟

  - - - زين ما طول ثار هنه خمسه وعشرين يجني والكم تلث تيام ما كو لو اساوم اهلها يدفعون لو اكتلها ومحد 

يعرف طريقها 

  - - - هاا هالشكل تمام بس مو عبالكم اكتلها وتفضون مني لا راح اخذ مضاعف مو انا الي ينضحك عليه

هو باوعلي واشوف الغضب بعيونه وگلي //الظاهر انتي ما تسووين عدهم شي وفعلا يردون بس يتخلصون منج 

باوعتله هو طلع بره رحت يم الباب لان ما سمعته شغل سيارته اسمع كلام يگله عرفت اتصل بواحد 

شووف ولك فهمهم مو انا الي ينضحك عليه راح اكتلها وادفنها وبعدين اعرف شلون ابتزهم ودير بالك تسوي 

الناقصه وياي تره تعرفني شنو ممكن اسوي والمكان تذا لو تموتون ما تندلونه 

  - - - مثل ما انت عرفتهم عليه غصبن ما عليك يجني 25 مليون 

  - - - اله اكص السانك على استهزائك زين راح اكتلها واعلمك واعلمهم

من سمعت كلامه عرفت اكو شي او اختلاف من جانبه من جانبهم ما اعرف لكن شفته اقتنع بكلامي وطلب مبلغ ثاني 

وهذا دليل انو تقريبا مصدكني 

رجعت المكاني وانا اترقب اشوف الموت قريب مني فتح الباب واجه يمشي وهو 

يگول بتشفي // الكل اتخلى عنج وهسه انتي صرتي ميت وبايد مغسل 

باوعتله وانا ارجف والخوف سيطر عليه هو كلي //شوفي راح اجيبلج ورقه تتنازلين بيها عن كل املاكج مقابل حياتج

عرفت هذا بمجرد ما اتنازل راح يكتلني هزيت راسي وانا مدنگه وگتله