رواية ناديه الفصل الخمسون بقلم انين الليل
... ... تتصور اذا تنازلت وانا ماموجوده او مختفيه شلون تحصل عليهن راح يتهمونك واكيد هسه المحامي منطي علم
لكل الدوائر باختفائي
هو گلي // هاا زين ما بقى اله اكتلج واخذ الخمس ملايين
ابتسمت ... ... وتتصور راح ينطوهن الك بعد ما حسو بيك عرفت الحقيقه فكر زين انت بايدك فرصه ذهبيه بس
لازم تلگى حل شلون تحصل على املاكي بدون محد ايشك بيك وبدون ما انا اتاذى
هو غاب تقريبا نص ساعه وانا بكل لحظه يتقرب مني الموت اكثر فتح اللباب وانا اتشاهد من الخوف واباوع الايده
واگول هسه يخنگني واشوف بجيب دشداشته مسدس مبين اگول هسه يكتلني هو گعد وگلي
:انا فكرت وشفت كلامج صحيح انا اخطف واكتل على مود الفلوس لذلك لو اكتلج واخذ الي اتفقت بي وياهم لو اوافق
على كلامج وبالتالي انتي ترجعين وانا اخذ نص املاكج
انا جريت نفس وشويه خف توتري گتله ... ... هي فرصه واغتنمها
باوعلي //اي بس لا تنسين احنه ما بيناتنا ثقه انتي ما عندج فلوس بس املاك
... ... اي صحيح وانا مستعده اخذك واتنازلك يم المحامي
هو ضحك //ههههههه لا ذكيه قصدج تسلميني للشرطه موو
هزيت راسي ... ... لا والله بس انت شوف شنو يرضييك انا اسوي
من شفته يباوعلي انا شويه هدئت اقصد الخوف الي بداخلي شويه راح حچيت
... ... انت فكر جايتك 500 او 6000 مليون لو تكتل نص العراقيين ما تحصلهن فكر زين الفرصه الي تجيك اليوم
اذا ما تستغلها باجر تتندم عليها
هو باوعلي وصار يربط الحبل گتله //لا تربطني مو تگول هيمه وبس الچلاب شتتصور بيه اركض
هو ربطني وخله القماش على حلگي وطلع سمعت باب السياره انفتح وبعدين انسد وشغل السياره بقيت افكر واگول
... ... هذا متاسف على الخمس ملايين يجوز هسه باي لحظه يجي ويموتني وانا عرفته عندي املاك
اي بس هو مو بذاك الغباء اكيد يفكر ويرجع
بقيت منتظره سمعت سياره اتقربت وانفتح الباب هو اجه وجابلي علاكه خلاها يمي وفتح ايدي وخر القطعه وگلي
اكلي
انا لزمت العلاگه وطلعت صمونه بيها بتيته تكلاه وطماطه صرت اكلها واباوع اله وهو چان يباوعلي
كملت انطاني ماي وشربت دنگت هو گلي //انا فكرت بالي گلتي وشفت على كلامج لازم اغتنم الفرصه
صار گلبي يدك جاوبته ... ... وانا اسمعك
باوعلي نظره ما اعرف شنو افسرها // نتزوج
باوعتله باستغراب وفتحت عيوني هالمره خوف من صدك هو هز راسه وگال
:احنه ما بيناتنا ثقه انتي ما تثقين بيه وانا ما اثق بيج وانا مطلوب مني اقتلج مقابل خمس ملايين دينار وانتي عرضتي
عليه تردين تشترين نفسج مقابل 500مليون فاكون غبي اذا صدگتج واكون اكبر غبي اذا ضيعتهن لذلك انا رحت
وسالت وعرفت كل شي واكيد من اجيب الورقه مالت التنازل واكتلج بس اوصل راح يلقون القبض عليه لكن من
نتزوج يصير التنازل سهل وبعدها انا اقبض وانتي تشترين حياتج
جاوبته ... ... يعني قصدك زواج صوري
هو لملم شفايفه وشعل جگاره وگلي // بكيفج المهم اضمن نفسي انتي فكري بس لا تطولين لان انا اعتبر نفسي
خاسر بهاي العمليه الا اذا انتي وافقتي
طلع وهالمره انا الي لازم اقرر يااما اشتري حياتي او انكتل وبكلا الحالتين انا خسرانه بس خساره عن خساره تفرق
اذا وافقت واتزوجته اقلها بعدين اگدر اعرف منه منو الي دزا حتى يخطفني ويكتلني
واذا ما وافقت فهذا يكتلني ويدفني وما يرفله جفن صرت احچي ويه نفسي
... ... هاي هي لازم اوافق
... ... توافقين ناديه توافقين تاخذين قاتل ماجور
هزيت راسي ... ... اي اخذه الخاطر اختي الي الله اعلم شلون حالها عبالها ميته او مهزومه
... ... بس شلون تقبلين بهذا ؟
... ... اي شسوي مو حتى انقذ نفسي لان الظاهر محد دور عليه
... ... لا ما معقول اكيد يدورون بس وين يلگوني
... ... يعني ناديه تتزوجينه ؟
... ... اي اتزوجه شسوي ولا انكتل لو يذبحني ويدفني ومحد يعرفلي طريق
... ... بس خاف هذا ياخذ كل شي وما تحصلين بس الندم وترجعين العار افراح
... ... لا ناديه اكيد همه الي دزو يخطفج ما وافقو ينطونه اكثر لان ما يعرفون العندج اكيد خوالج منين يدرون
بيبي مسجلتلي البيت لذلك اغتنمي الفرصه واضربي ع الوتر الحساس بالنسبه اله والكل الناس الي هو الفلوس
... نسيتي بيبي جميله من تگلج ضمي فلوسج ولا تبذرينهن لان هنه الي يسوون قيمه للبشر بهالوكت
...هسه فلوسج هنه الي سوولج قيمه حتى يم هذا المجرم وما خلنه يكتلج
اتذكرت بيبي جميله وسوالفها وابتسمت رغم التعب والجوع والخوف حسيت بسياره تتقرب من الباب وبعدين بابها
انسد وانفتح الباب وشفته هو نفسه اجه يمي واتقرب فك اديه ورجليه وخر القماش من حلگي باوعلي وفتح باب الثلاجه
وجابلي ماي انااخذته منه وشربت شويه هو باوعلي وسالني // شنو قصتج ؟
فتحت عيوني متفاجئه رجع سالني // ليش يردون يقتلوج ؟
جاوبته ... ... حتى انا ما اعرف بس لو تگلي منو همه ذاك الوكت اگلك ليش يردون يقتلوني
هو بنتر // سالتج شنو قصتج لا تجاوبين سؤال بسؤال ؟
انا نزيت من صوته صرت اسولف اله عن حياتي وشلون اعترفت على امي او وصلتها الحبل المشنقه وشلون
عشت وداريت بيبي الي كتبتلي البيت يعني سولفتله كل قصتي هو يسمع مره يعكف حواجبه ومره يبين
علي عدم الاهتمام
من كملت كلامي سالني //يعني صدك انتي عندج املاك
هزيت راسي ... ... اي عمو صدك وتگدر تتاكد او انت يجوز متاكد انا ما اچذب عليك
هو ظل يحرك باصابعه ع القنفه ومرات يباوع للسگف انا سالته ... ... انت شنو اسمك ؟
هو استغرب انا هزيت راسي ... ... ما معقوله ابقى اصيحك انت او عمو او عفيه
هو ابتسم وهز ايده وطلع من راد يفتح الباب گتله... ... اشو طلعت شنو ما راح تربطني
هز راسه وگلي //لا ما اربطج انتي بصحراء وبس الچلاب اهنا موجوده وبعدين انتي ذكيه تعرفين اذا شردتي
ما تحصلين شي والگاج واضوج واسوي شي مو زين
هو سد الباب انا جريت نفس قوي انتظرت الى ان عرفت هو ابتعد بالسياره اول شي سويته رحت يم الباب شفته
مقفول بعدها راسا صعدت على الدرج للسطح لكن اتفاجأت بان باب البيتونه مقفول همه
بقيت اتفحص.البيتونه شفت شباك رحت حتى اشوف شنو ورا ما شفت اي شي بس دخان ما اعرف غيم رجعت
حاولت ويه الباب شفت بي زرفين زغار حاولت اشوف شنو وراهن اطلت النظر اريد اشوف فد شي اي
شي باوعت حيييل شفت مثل البرج عالي وجاي يطلع منه دخان بقيت اباوع حييل واتذكر شنو هذا
بعدين عرفت هذا معمل مال طابوك بس بعيد انا مره من سافرت سالت بيبي گالت هذا معمل مال طابوك
واتذكر بقت تحچي هي وسراج شلون الناس تگدر تعيش بهيج منطقه
حاولت اركز من الزرف شفت مكتوب ليفوك كلمة ياالله بلون اصفر باوعت بعد شفت معمل ثاني بس بعيد عنه
نزلت وصرت على يقين بان انا بمنطقه تكاد تكون معزوله جريت نفس نزلت اريد افتح باب الغرفه لكن لگيتها
مقفوله رجعت گعدت ع القنفه وانا اسولف ويه نفسي
... ... خلي اوافق ع الزواج منه لا يكتلني ويجوز يشمرني بالفرن مال المعمل ومحد يعرفلي طريق ايي اوافق
وبعدين انطي فلوسه واگله يطلگني بس لمن ما اعرف منو الي ودا يخطفني
... ...وچ انتي غبيه اكيد ما راح ايگلج منو الي ودا لكن انتي اهم شي سايري وبعدين من اتكتبيله الاملاك
گليله ايطلگج اي لازم هيج تتفاهمين ويا
بقيت گاعده ما اعرف شسوي بين الخايفه وبين امني نفسي بانه ممكن ارجع واشوف اختي
غاب ساعه ورجع عليه گلي //هاا شگلتي
جاوبته راسا ... ... موافقه
رد //زين اسمعيني انا باچر اجيب الشيخ ويا شهود يعقد النه وبعدها تسويلي ورقة تنازل بنص املاكج تمام
هاا وديري بالج تلعبين بذيلج تره بلحظه انهيج صار معلوم
هزيت راسي بخوف هو گال
:ومن نروح ويسالونج اهلج گولي انا احبه واعرف بيكم ما تقبلون علي لذلك انا اتزوجته وخليتكم امام الامر الواقع
باوعتله وگلت ... ... بس هيج اهلي يكتلوني
: لا ما يكتلوج انتي بالغه واتزوجتي بارادتج اكثر شي يسوونه افصلهم خمس ملايين ويگلولي بعد ما انريد انشوفها
جاوبته ... ... واختي شلون
:اختج شبيها راتب وحلال عود جيبيها تعيش وياج (باوعلي وگلي ) هي صفقه انتي تريدين تعيشين وانا اريد اربح
انتي ذكيه وتفكرين ولو وحده غيرج چان ميته وشابعه مووت (وگف ) زين انا اروح وانتي اتحضري
من طلع چانت دنيا غروب وانا ما اعرف شگد صارلي اهنا بقيت خاله ايدي على راسي والوم بنفسي
... ... ليش ناديه اتسرعتي وگتيله على املاكج ليش ما گتيله يخابر هادي كرم ويطلب منهم فديه
... ... شمدريني عبالي افراح وبناتها لو ياسر بس الظاهر اخوان مياده همه الي دزو وهمه ما يعرفون شعدنا
من املاك ياالله اهم شي اطلع منا وبعدين ما اسكت اسولف للمحامي وهو يتصرف
صار الليل وانا باقيه گاعده صافنه على روحي مره اتمدد ع القنفه ومره ع الحصير افتح الثلاجه بس بطلين ماي
واي شي ما بيها اتمدد وانا مثل يوميه يتهيأ لي الموت لكن اليوم انا ما مربطه وهم اعرف انو انا بموافقتي ع الزواج
من هذا معناتها حكمت على نفسي بالموت
ما اعرف بيش الساعه انفتح الباب وشفته جاي بيده علاكه چبيره فتحها
وطلعلي منها علاكه زغيره وگلي اتعشي وهاي اول مره يسويها من يوم الي خطفني اقصد ينطيني وجبتين باليوم كله
ينطيني لفه وحده اخذت من عنده العلاگه هو باوعلي وراح للغرفه انا اكلت چانت لفه كباب وشربت ماي ورحت
غسلت هو من الغرفه صاحني //ناديه تعاي
اول مره اسمعه يصيحني باسمي ما اعرف رجفت انا رحت دخلت للغرفه اول مره اشوفها باوعت الها شفت
بيها چربايه وكنتور وتلفزيون وشفته هو گاعد بالگاع وگباله بطل
وگلاص وجگاير شفته يشرب انا خفت هو وگف اتقرب مني وگلي وهو عيونه حمر يخوفن
:تعالي ناديه ليش خايفه
بقيت واگفه هو گلي //هاي شبيج مو باچر راح تصيرين مرتي
انا صرت ارجف هوواتقرب ولزم چتفي وگلي //هاي شبيج حبيبتي
انا جاوبته بخوف ... ... اريداطلع عفيه ... ... هدني الله يخليك
هو ضحك وگال // انتي مو تردين تعرفين اسمي اثير انا اسمي اثير شبيج حبيبتي تعالي اگعدي وياي
جاوبته بخوف ... ... لا انا اروح
هو حاوطني //وين وين ترحين اگعدي اهنا اريد اسولف عليج
لزمني من ايدي وگعدني وهو صار يشرب وانا صارت روحي تلووب خفت منه هو مد ايده على شالي رفعه
انا وخرت ايده هو لزم ايدي حييل وخزرني //من اسوي شي لا تعانديني
وخر الشال وصار يباوعلي ومسد على شعري وهو يگلي //هذا شعرج ابحده يدوخ ويسكر
ما جاوبته هو رد اكيد //الي يردوني اكتلج يغارون منج جمال وفلوس وشباب (وصار يكهكه)
بس ما يدرون ضحكنا عليهم وانتي طلعتي اتشبهيني بالشطاره
انا باوعتله باستغراب هو شرب وگلي وهو يهز راسه //ايي ليش مستغربه انا شاطر بالخطف بالقتل وانتي ذكيه
عرفتي شلون تلاعبيني مو تلعبين عليه لا انا محد يگدرلي وعندي كل شي اسوي وما يهمني
ابتسم // ادرين انا صرت اخاف منج
شفته طلع حبوب من جيبه وخله بالكلاص وشربه هو باوعلي وصار يضحك
: لازم اخذج قبل ما اتزوجج حتى ما تحاولين من يجي الشيخ ترفضيين
انا من سمعت الكلام خفت گتله ... ... لا لا مستحييل انا اغدرك انا اريد اطلع منا
هز راسه //اي حبيبتي تطلعين وانتي زوجتي ماكو فرق اليوم من باجر
خفت منه حاچيته بترجي ... ... لا عفيه الله يخليك اصلا انا من شفتك حبيتك واذا ما انت طالب تتزوجني انا راح
اطلب منك اتزوجك
ردلي باستهزاء //ههههه حبيتيني ليش حبيتيني لان اخطف واكتل
جاوبته بخوف ... ... اي لان شجاع وعندك عضلات وانت راح تفيدني اقلها تحميني
گلي وياشر على صدره //هو انا راح احميج بس اول مره احمي روحي منچ شنو يعني من اتزوجج ما راح تغدريني
بس من اكسرج اليوم حتى من اخذ العقد واروح الاهلج واگللهم انا عقدت عليها لان سترتها ويشوفون تاريخ العقد
بعد ما يصدكوج يعني حتى من اتكليلهم خطفني محد ايصدكج
خله حبايه وصب من البطل وشرب ولزمني من ايدي حيل صرت اتوسله ء......... عفيه عمو حرام هالشكل اسويلي.
وابچي واصرخ وهو ولا يمي دفعني ع الچربايه وصار يشم برگبتي ويبوس بيه اتقرب مني وضغط عليه بكل جسمه
ما گدرت اتحرك راحت كل توسلاتي صرت اصرخ بس محد يسمعني قاومت لكن بدون فائده
راح حيلي بين جثالة جسمه والخوف والجوع الي مريت بي اتمكن مني واغتصبني اغتصبني بكل وحشيه بلحظه
اختنكت حتى العبره ما طلعتها ودمعتي شاهت وانا اشوف حياتي شلون اتدمرت الالم بكل جسمي لكن الم روحي
اقوى انغمى عليه ما اعرف شگد گعدت باوعت شفت نفسي وانا منتهيه او حياتي انتهت يم هذا الوحش النايم
يمي ردت اگوم باوعت النفسي واتذكرت الي صار والي سووا بيه هذا المجرم
باوعت الدنيا ظلمه وانا ع الچربايه وهو نايم ويشخر شفت ضوه يلمض شفته نقاله على الميز بلحظه مديت ايدي
واخذته سويته صامت وصرت اتذكر اي رقم متذكرته اي رقم ناديه اتذكري صار گدامي رقم سراج
لزمت النقال وصارن دموعي هنه الي يكتبله دزيتها وچانت اطول لحظه بعمري على ما وصلت الرساله
راسا حذفتها من شفتها وصلت
صار عندي امل انقذ نفسي لكن بعديش بعد فوات الاوان بعدما راح اعز شي مني تمتلكه اي بنيه
وتتباهى بي گدام الناس واهلها يرفعون راسهم بيها
وخليت التلفون المكانه چنت خايفه خاف سراج يتصل وهذا يكتلني بقيت هادئه لكن عيوني ما بطلن دموع عرفت
نفسي انا انتهييت والموت هو السبيل الوحيد للخلاص لكن بالاول خلي يلگوني ويعرفون منو الحقير الي دز عليه
بس حتى يخطفوني ما اتمالكت اعصابي صرت ابچي واصرخ هو گعد شاف نفسه وشافني شلون اصرخ هو
باوعلي باستغراب وغمض عيونه حييل بعدين اتقرب يمي وحاچاني بنبرة تهديد
:اششش لا تصرخين ما صار شي اخذتچ حتى ما تخونيني گدام الشيخ والشهود انتي راح تصيرين مرتي
امنت نفسي وراح انتي هم تامنين نفسج
استهضمت على روحي حييل صرت اضرب على راسي واصرخ
... ... موتني احسن موتني انت وحش انت ما تخاف من الله
دخت وگعت فزيت على صوت واحد يصيح ويگول هاي مرتي طفرت من مكاني وانا اسمع صوت طلق
بعدين ما اعرف شنو صار حسيت براسي ثگل وصخنت فكيت عيوني وانا نايمه على جربايه وسراج ورضا يمي
لكن ما اگدر احچي صرت ادير عيوني اباوع بس ما اگدر احچي چان كل همي اسأل على حنيين وشلون لگوني
وانا هسه وين لكن اول مره اشوف سراج من شافني صحيت طلع ما حاچاني ولا باوع الوجهي
اتقرب مني رضا وگال
- - - عمو لا تخافيين احنه يمج اطمني بابا نامي وارتاحي كل شي راح يرجع المكانه
اتعجبت من كلامه ومن تصرف سراج حاولت انام لكن ما گدرت رغم عيوني ثگيلات وخرت الغطا ورحت اريد
افتح الباب واسمع رضا يحچي ويه سراج // اذكر الله شنو هي بايدها
:: لا آله الا الله
:خويه سراج على كيفك
::رضا اسكت لا اروح اكتلها واكتل نفسي ولك تعرف (وصار يبچي ) تعرف شنو مو باكر تعرف هذا النذل الي
بالمستشفى شنو يعني مغتصبها تعرف رضا لو اعلمك
رضا // وهي شبيدها بس حصلت فرصه خابرتك هسه تريد تكتلها
سراج :: منو يگول منو يگول رضا يمكن راحت وياا بارادتها يمكن صاحبها وخافت وتندمت خلي بس يصحى
من الغيبوبه واستفسر منه واكبر واحد ما يفكها مني اكتلها بايدي صدكني اموتها وما يرفلي جفن
من سمعت كلام سراج وشلون هو يشك بيه ما صدگت روحي وعرفت انو انا الي حكمت على نفسي بالموت لان
محد راح يصدگني انو النذل خاطفني واكو ناس دازينه عليه يعني لو شگول ما راح يصدگوني
وقررت انهي فصل حياتي الاخير بايدي باوعت للغرفه وشفت شباك رحت وخرت البرده وشفت ارض زراعيه
وشفت اشجار ونخل عرفت هاي الارض مالت عمي رضا اي اتذكر جايينها من چنت زغيره ولان شفت النخل
الي داير ما دايرها يعني سراج جابني هو ورضا لهنا بقيت متمدده ع الچربايه وغمضت عيوني وانا اعيد
شريط حياتي واگول
... ... ناديه لاتتوقعين ترتاحين لا من انتي زغيره ولا من طلعتي دم ابوج ولا من كبرتي وهسه انتي شنو
... ... انتي وحده منبوذه من اعز انسان على گلبج عباله رايحه ويه الخطفج ومتندمه
... ... سراج چان املي بعد ان فقدت الامل لكن هو يشوفني وحده رخيصه او وحده تشبه امها وهذا الشي مو
بصالح حنيين شنو ذنبها باچر اعم عليها وعلى مستقبلها كافي ناديه الي شفتي بحياتج كافي وزايد ولازم توضعين
نهايه وحد العمرج
... ... حتى لو حراام احسن ولا اختي تعيش بمرار وضيم عاد يوم شهر والناس تنسى
... تتصورين الناس تنسى ؟
... ااي تنسى
... ما نست مياده ؟
... ... مياده مجرمه وما نستها انا راح انهي حياتي بايدي
قررت اسدل الستار عن حياتي وتنتهي قصتي وماساتي بس حتى تعيش اختي
بقيت متمدده ع الچربايه وانا استغفر ربي بلي راح اسوي انفتح الباب انا غمضت عيوني ونمت على صفحتي
اتقرب عرفته سراج اي انا اعرفه حسيت بي بقى واگف ويباوعلي بعدين طلع وسد الباب ورا
بقيت افكر واسال نفسي
... ... معقوله سراج انت تشك بيه معقوله انا اسوي هيج شي معقوله رضا الرجال الغريب يدافع عني وانت حتى
ما تنطيني عذر ليش شنو الي غيرك عليه مو انا ندووش ابنيتك الي تكلي بابا معقوله تشك بيه ليش انت ما تعرفني
مو انا تربات ايدك لكن من اموت راح تعرف منو ناديه المهم لگيتني ومو مهم شيصير بعد
بقيت متمدده على صفحتي ودموعي يجرن انفتح الباب واجه رضا الي گلي
: عمو عمو ناديه اگعدي اشربي شويه شوربه
انا بقيت عبالك نايمه ما درت هو رجع حاچاني //بابا اگعدي اكليلج لگمه
هم ما جاوبت طلع وسد باب الغرفه وهو يكل السراج
: خطيه نايمه من التعب عبالك طايحه من جبل الله يساعدها
سراج گله ::رضا اريد انام تعبان
: اي رووح نام فرشولنه بالديوان البراني
بقيت متمدده على الجربايه عبالهم نايمه وانتظرت الى ان اطمانيت الكل نامو وگفت فتحت الباب على كيف
وطلعت حافيه ما مهتمه الاي شي اتذكر من اجينا ويه بيبي وسراج عمو رضا يكول
نخلي البيت ورانه ونمشى گدام من نريد نروح للشط
رحت امشي وانا ما مهتمه لا للگاع الي كلها تراب وحجر وطين ولا للظلمه رغم اكو كهرباء بالبيت
امشي واستغفر واكول ربي الي اسوي بس حتى حنين تعيش انت بكيفك تريد تسامحني تريد تعاقبني بس انا بعد
ما عندي لاقوه ولا قابليه سامحني ياربي
وصلت يم الشط وبدون ما افكر ولا اوكف لحظه بدون شعور شمرت روحي بالماي
/////////.
