رواية زواج حياة الفصل الرابع بقلم جمانه السعيدي
حياة....كعدتني امي الصبح
امي...يله اكعدي خل نطلع للسوك
حياة....فتحت عيوني اليوم ماكو روحه للسوك
امي...هااا ليش شكووو
حياة....غير عروسه ولازم احضر نفسي شوفي وجهي شلون صاير من الحر
امي.. ماكو زواج قبل لا تكمل سنة ابوج
حياة...اكيد مابقه غير شهرين احضر نفسي بيهن
هذا اليوم لان مانزلنا للسوك الحجي بقه بقلق
بس ماكدر يجي ويفهم موقفنا
بعد يومين دز علينا ام ايمان تعرف وافقنا على الزواج لو لا
ام ايمان....الحجي دزني عليكم شنو ردكم لان باقي بقلق
امي...اي موافقين الحجي خوش انسان واني اريد أأمن على بنتي قبل لا اموت
ام ايمان....اي شروط عدكم هو مستعد
امي.. ماعندي اي شروط بس يحافظ على حياة
ام ايمان خلاص راح نجيكم باجر اني ويااا ونتفق على كلشي
جمانه السعيدي
ثاني يوم اجانا العصر الحجي وام ايمان
مراح اكللكم بدلت وعدلت هي هاي الدشداشه السوده
بس سبحت اني حتى ماعندي مكياج واتمكيج
بس صار يومين اخلي فازلين الوجهي لان من البوشيه
صاير جاف
اول شي امي طلعت استقبلتهم دخلو واني حضرت الجاي
لبست حجاب وعباتي ودخلت عليهم بلجاي
سلمت وقدمتلهم الجاي وكعدت
الحجي....اني مستعد الكل طلباتكم
امي.. اني ماعندي اي طلبات اني ماطلعت من هاي الدنيا بس بحياة ومااريد اي شي بس اطمن عليه قبل لا اموت
ام ايمان...عمرج طويل وتفرحين بيه وبجهاله
الحجي.. انشاء الله المهر الي تطلبه حياة واكثر
وبعد مااريدكم تنزلون للسوك
كلشي تحتاجونه راح يجيك الحد البيت
وباجر اجيكم العصر ترحون تشوفون بيت حياة الي راح تسكن بي
بعد مااتفقنا على كلشي وطلعووو ماانكر اني فرحانه
بس احس فرحتي ماكامله
جنت اتمنى ازوج واحد بعمري او اكبر مني شويه بس مواحد بكد ابوي
بس الحمد لله هاي قسمتي واني راضيه بيه
ثاني بوم ماطلعنا واجانا المسواك للبيت كلشي وكلاشي
حتى اشياء مانعرفه ولا ماكلينه قبل
والعصر تحضرنا اجانا الحجي صعدنا وياا بلسياره واخذنا البيت الزوجيه
منطقه بلولايه تخبل والبيت يجنن اكثر من ٣٠٠ متر
وركن بي حديقه اجنن
والبيت من جوه تحفه الاثاث مثل الافلام
اني دخلت وفهيت صدك هذا البيت الي راح اسكن بي
معقوله من بعد الخرابه اني راح اسكن هنا
جمانه السعيدي
وغرفة النوم شي ملوكي الغرفه كريمي وبيه تاج ذهبي
تخبل
من شفت البيت نسيت فارق العمر نسيت كلشي جنت ضايجه منه
اتفقنا نعقد شيخ وعقد محمكه وبعد دورت السنه يكون الزواج
جابلي ذهب يخبل ونطاني فلوس اشتريت ملابس اجنن
لان كل عمري مامشتريه ملابس حلوه
عبالك ماشايفه شكد اشتريت ملابس واحذيه وجنط
اريد اسد النقص الي بداخلي
واعوض الحرمان الي عشته قبل
نسيت كلشي ونسيت فارق العمر اريد الوقت يفوت واروح اعيش بهذا البيت واستمتع بكلشي هناك
بهذني الشهرين ماجانا الحجي بس مرتين يكعد عشر دقايق ويروح تكعد يمنا امي
يسئلني شنو محتاجه وينطيني مصرف ويطلع
يعاملني كأنما بنته مو زوجته
خلصن الشهرين على خير
بس الحجي ماقبل يسوي زفه يريد عرس بسيط
رحت للصالون بس ماقبلت يكصون شعري لو يصبغونه
لان هو حلووو مامحتاج هيج اشياء
بس حفيت وعدلت حواجبي
طلعت اخبل تعرفون هاي اول مره احف واتمكيج هيج
حتى بمهري مارحت للصالون لان جانت سنة ابوي ماطالعه
كطعت مهر بلا سود
رجعت من الصالون ودخلت بيتنا الجوارين كلهن ملتمات وخالتي كاعده
الهلاهل ترست البيت
اجا الحجي بسياره حديثه غير ذيج السياره الي يوصلنا
بيه كل يوم
لابس دشداشه بيضه وعكال وجفيه ابيض وعبايه صيفيه
لونه ذهبي وحالق اتفاجئت بي طالع حلووو
اتشكر من امي واخذني وطلع
طبعا امي وخالتي راحن وياي بس بسياره ثانيه جايبه الحجي وياي
جمانه السعيدي
صعدنا بلسياره التفت عليه وكال مبروك الف مبروك
حياة...الله يبارك بيك
وصلنا للبيت ودخلنا لا كتنا مره تقريبا بلاربعين تهلل
وطشت جكليت علينا
الحجي.. هاي ام سعد تهتم بلبيت
صعدت كبل الغرفتي الحجي صعدني نزع عباته والعكال
وطلع كلبيه نص ردن وبدل وكال اخذي راحتج بدلي
هو طلع واني انتضرت امي شويه وصعدت
ساعدتني فتحت السحابه ونزعت البدله لبست سيت ابيض
طويل وروب تول فوكه وفتحت شعري من التسربحه
بين عليه ضايجه
خالتي...شبيج ماده البوز شبر
حياة...غير ينزعني البدله يكعد يمي شويه
خالتي... رجال جبير شمعرفه بهاي السوالف ايجوز يستحي من عدنا هسه يجي وين يلكه هيج كيكه
ولج حياة بيتج يخبل صدك صبرتي ونلتي
واذا تممتيته وجبتيله طفل تصيرين الكل بلكل
صعدت النا ام سعد الاكل فوك وتعشينا
امي...ليش مايجي الحجي يتعشى
ام سعد...كاعد ياكل جوه يكول خل ياخذون راحتهم
كملنا اكل وامي وخالتي نزلن واني بقيت منتضرته
تقريبا نص ساعه يله صعد
جمانه السعيدي
الحجي....امج تسلم عليج راحت هي وخالتج وتكول باجر اجي اشوفه
حياة.. انشاء الله
الحجي.. كعد بصفي ايجوز اني جبير عليج بس العمر
مو فرق انشاء الله راح نكون متفاهمين
حياة..سكتت لان مااعرف شحجي ويااا احنا لا متعارفين قبل وقت وماكو شي يربطنا ونسولف بي
طفا ضوه الغرفه وقرب عليه بس مااذاني خلص باسني براسي وكال مبروك
دخل سبح ونام
اني هم سبحت ونمت
رغم الموضوع كان خالي من الرومانسيه بس اني كنت فرحانه بلوضع الجديد
جمانه السعيدي
ثاني يوم كعدت مالكيته
نزلت جوا لكيت ام سعد تنضف
حياة...صباح الخير وين الحجي
ام سعد...طلع للشغل
حياة...للشغل
ام سعد...ترا الحجي حيل عملي ومايحب كعدت البيت
الساعه عشره اجت امي وخالتي
فرحت من سفتهن عبالك صار سنه ماشايفتهن
حياة...شلون وصلتن
امي...الحجي دزلنا سياره جابتنا وموصي السايق نبقى
يمج طول النهار خاف اتضوجين منا لمن يرجع
كلش فرحت بجيتهن لان البيت جبير ومااعرف شراح اسوي
باقي النهار وخصوصا الحجي مايرجع اله المغرب
بقينا نسولف ونستكشف بلبيت واكلنا عبالك طالعين سفره
منا المغرب بس دخل الحجي امي كالت نترخص منكم
الحجي خابر السايق يجي يوصلهن هي وخالتي
سلم عليه ودخل سبح وبعدين صلى
اني مبدله ومكيجه واروح وارجع مااعرف شنو الموضوع الي راح افتحه واحجي ويااا
كلش مستحيه منه
الحجي.. شلونج اليوم تعودتي على البيت
حياة...زينه
الحجي...الصبح ماكعدتج شفتج نايمه اني يوميه اطلع من الصبح بس يإذن الفجر اطلع
حياة...عادي كعدني احضرلك ريوك
الحجي ...اني مااتريك بلبيت اتريك بلعلوه ابقي نايمه واخذي راحتج
حياة... بقيت ساكته مااعرف شحجي ويااا
بعدين كتله شلون يومك جان
الحجي...عادي مثل كل الايام خل ام سعد اجيب الاكل
حياة...حاضر
تعشينا واحنا ساكتين المشكله مااعرف شحجي ويااا
احسه يختلف عني هواي
ويمكن لان اني ماطالعه ولا مختلطه ماعندي اي مواضيع احجيهن وياااا
يله مع الوكت اكيد راح اتعود علي
ثاني يوم كعدت ومالكيته بس ام ايمان اجت اتباركلي وجابتلي هديه نزله مال جربايه وكعدت تسولف عليه
تونست شويه
لليل من رجع جابلي تليفون حتى يتصل يطمن عليه
وجاب تليفون عادي الامي حتى اتصل عليه
لان يعرف اني وياها ابد مانفترك
حيل فرحت بلتليفون قربت علي بسته بخده وكتله شكرا
ابتسم وخله ايده على راسي
