رواية كريات الدم السوداء الجزء الثاني الفصل الرابع بقلم زحل شريف
_عضيت شفتي وانه احجي خرب حظج سونه
يعني شافني .غلست جني ما سمعته رجع صاح
الباشا::سونه .
_التفتت عليه
واكف ونضراته تريد تختصر المسافه البينا
ابتسم وكأنو جان يدور عله شيء ضايع ولكاه
ماعرفت سر هل نضرة ..اشر للسايق روح
و توجه لسيارته . التفتت محتارة شسوي
اكيد راح يستدار مشيت بسرعه عبرت السايد الثاني اول ماصارت كدامي تكسي صعد بدون ماكله وين اشرتله اطلع .
السايق::وين توصلين .
_سوك البصرة .حجيتها وطلعت نقالي لكيت
مكالمات من ابو بشاير واياد وحته ابو حيه.
خابرت عله اياد رد بقلق.
اياد::وينج يمعوده .
_سولفتله الصار.
اياد::نزلي نزلي وحاولي ادخلين
بين البيوت. بين مااجيج .
_حاسبت السايق ونزلت امشي واتلفت.
رديت بدون ماباوع للرقم. ها وينك ؟
الباشا::ولج انتي.
_ بلعت ريكي. نزلت النقال اباوع للرقم .
وهو صوته عابر السماعه . يصيح .
الباشا::مو احجي وياج رديي.
_رديت وانه احاول مابين رجفت صوتي
شتريد باشا . خلص شغلك وكملته براسي .
الباشا:: خوش اذا تدرين خلصت الشغله. منين شاردة باعي خلي افهمج ترى ماعليج شي، ليش خايفه
_يحجي بعصبيه احس اذاني
انزرفت من صوته . رديت وعيني لسيارة
اياد دخل بنفس الشارع الانه بي، سديت النقال
اشرلي اياد يله وبس صعدت حجه.
اياد::لو تغيرن رقمج افضل.
_تجاهلت كلامه. عدلت شالي وحجيت برود
عكس نار كلبي . وصلني للصعده . التفت عليه مستغرب. طلبي .
اياد::شنو . شعدج راجعه ؟
_ اريد اخذ جنسيتي .
اياد::اوك انطيني مجال بلكي اكدر ادز
احد يجيبها بس كون تحددين وين ممكن نلكاها.
_بغرفة سليمه . واكيد بكنتورها.
اياد::تمام هسه اخذج .
_ماخليته يكمل . رديت وعيني للشارع
نزلني هنا . ومن تجيب جنسيتي خابرني .
اياد::وين رايحه غير نعرف
ترى اختج ضال بالها عليج
وهم لازم نامن عليكم بفد مكان .
_ هو يحجي وابو بشاير اتصل
رديت وانه ادعي كون بعده مامسافر.
ابو بشاير::وين انتي طمنيني وش صار معج.
_شرحتله مختصر.
ابو بشيار::الحمد الله . والحين شناويه
تساوين اكصد وين بتروحين .
_صفنت حايرة .. وين اروح .
رد مجنبني الحرج .
ابو بشار:: تعالي حنه باكين
لبعد كم يوم . بس خل الضابط هو يوصلك
لان الطريج مزدحم ومنعو دخول السيارات .
_باوعت لاياد الي عينه للشارع واذنه
رديت مسمعته، تمام بس اجيب جنسيتي .
ابو بشاير::طيب الله معك.
_نهيت المكالمه وانه اباوع لشاشه النقال
وهيه تعلن عن وصول رسائل فتحتها بفضول
اقرء وعبالك هو كاعد كبالي ويحجي.
الباشا:ادري اذيتج هواي وحقج تزعلين
وتكرهين شوفتي . بس لازم اشوفج ونحجي
هواي امور ماتعرفينها . ثقي تعاملي وياج بقسوة
جان لمصلحتج ماردت ابين حبي حته لا يتخذوج نقطة ضعف وتتاذين صدكيني من خوفي عليج سونه اسف واعتذر وداعت ابوي وشرفي اعوضج عله كل الم .
_عفت باقي رسائله ودخلت عله صفحة قدر
اخ ياقدر. خليت ايدي عله حلكي مانعه صوت شهكتي اقرء ودموعي تنزل مثل الجمر . عتب فتت روحي .
قدر::ليش ليش مو اتفقنا نعيش سوى معقوله ماحاسبتني اختج . زين بس طمنيني عليج
ولا تخافين ماكلج تعاي اخذيني .
_شحجي وشلون افهمها الي ابالي
ترددت اكتبلها خاف النقال مو عدها
ويجوز يمها احد ويكتشفون مخططي .
رفعت راسي لكيت اياد مركز عيونه بنقالي بسرعه
ضميته بجنطتي وانه احجي وين احنه وين رايحين .
اياد::ماعرف انتي وين تردين اوصلج.
_حجاها وطبك سيارته كبال اسواق.
رد باوعلي . عرفت اباله شي . هزيت راسي شنو .
اياد::بالنسبه لاختج ماعرف يعني .
_ماخليته يكمل بسرعه رديت اختي تبقه يمكم لحد ماا رتب اموري . سيادة الضابط بسببكم احنه مانكدر نرجع لبيتنا . واكيد عندك علم بنضام الصعده ماكو داعي اشرحلك .
اياد::عله اساس جنتو عايشين
بأمان واحنه خربنا . اذا هيج رجعي لبيتكم.
_رغم كلشي جنت محميه لاتنسى
اياد::منو حاميج . ترى محابس قبل مايسلم
نفسه اول شرط شرطه انو مديحه تتبرء .
_احس كلبي اشتعل نار
معقوله هيج جنت مشوشه بي .
يعني تقبل ابو وعاش حياته ونساني لا ويفكر
بمديحه وانه كلت هسه يضغط عليهم حته يوصلني.
قطع تفكيري صوت نقال اياد
اياد::هلا بيك اي هاي يمي
يابه ترى مصخها . شو جذب الجذبه وصدكها.
_بتسمت بقهر وعرفت يقصد الباشا
يعني جان يمثل عليه خطه من ضمن واجبه
يله هيه بقت عله هاي كلها طلعت جذب.
اياد::وانته هم ماخذلك صفحه
شبيكم متكلي ديله جاي جاي ماشي .
_درت وجهي للجامه . بعد ماسالته وين رايحين
لحد ماوصلنه لنفس المكان واعتقد شركه نزلت
تلكانه ابو حيه الي اسمه ابد مو يم شكله
شخصيته ادل عله انسان محترم وصاحب كلمه .
ابو حيه::ها يابه اتاخرتو ضل بالي.
_دخلت وانه شايله حقد الدنيا والف فكرة
اجت ابالي اي كالت سليمه . ذول مامنهم
غير بس الاذيه لاحب عشك. اباوع لاياد واكف عله اعصابه وكل مايسمع صوت نقالي يلتفت وكل ضنه ارد
اياد::يابه غلقي . لحد مااجيبلج شريحه.
_ومنو كالك اريد اغير رقمي
ترى لهنا وانتهت مهمتكم بعد ماتفرضون عليه شسوي
حجيتها ودرت وجهي لابو حيه . الي خزر اياد مسكته.
ابو حيه::اكيد مانفرض عليج
يابه بس لاجل سلامتج.
_قصدك حته ينقطع التواصل بيني وبين الباشا.
باوعلي رافع حاجبه . وكأنو عرف بشنو افكر ابتسم بثكل وهز راسه تمام .ورد
ابوحيه::بشنو اكدر اساعدج.
_بس كمل موضوع قدر .حته نكدر نشوفلنه مكان
نسكن بي تعرف محد يقبل يأجرلنا بيته لان بنات وحدنا . عدل كعدته ورد بهدوء عكس شخصيته الي مبين عصبي وحدي بالكلام من هزة رجله والجكارة الازمها لاهو شاعلها ولا هو ذابها .
ابو حيه::يعني تتوقعين بهل سهوله
يعني لو يردون ينطوها جان ماتعرضو لكل هل مشاكل
بس فكري بعقل راح تعرفين . مو هين اهل فاروق ينطونها حصتها وهم يعتبرون هيه وامها سبب بالي صار الهم .
_ قابل هنه موتن فاروق
لو من طمعه.
ابو حيه::الله يرحمه . يجوز جان اله حق
لان زواج ام قدر باخو كان شكلي وهم اعتبر
مساعدته الها ثمن خدمتها لاخو .
_قصدك مانكدر نحصل منهم شي
حته لو اشتكينا عليهم.
ابو حيه::انتي عبالج مجرد ما تشتكون
تاخذون حصتكم . مو هيج يابه هاي دعوى
ورث تحتاج وقت. وهمه يعرفون مالها احد اكيد
راح يحاولون يأذوها والدليل السوا بيها محمود.
_هو يحجي وتلفوني يدك
طلعته جاي اغلقه . بس هو كال .
ابو حيه::ردي عليه .
_رفعت راسي باوعتله
غمض عيونه بمعنى اي.انتفض اياد
اياد::تحجي صدك وبله عرف هيه هنا.
ابو حيه::اول وتالي يتواجهون.
_رديت لا مانتواجه ولا اريد احجي ويا.
رفضت المكالمه وغلقت النقال . كمل ابو حيه.
ابو حيه::شوفي انه حاولت اتواصل
ويه خوال قدر ومنتضر بلكي يتقبلوها
فااذا دزو عليها اكيد راح يكون موقفها قوي
وتكدر تواجه اهل فاروق . وهمه يحسبون حساب
وراها ناس واهل وعشيرة فاهمه قصدي .
_واذا ماتقبلوها شنسوي . سالته وانه اعرف
الي اباله . رد وهو يحاول يفهمني انو ماطمعان بيها.
ابو حيه::انه عرضت عليها اعقدها
وهيج اكدر اوكف بوجهم بدون خوف.
_بعدني ماراده صاح اياد .
اياد::ترى انه متفق ويه الخال نامن للبنات
مكان عله مسؤليتنا . هو يعرف شخص
عنده شقه راح ناجرها الهن.
ابو حيه::اعتقد كلامنا خارج نطاق مهمتك
انتهت اذا ماعندك شي تكدر تروح .
_طلع مزعوج . احس ماي بارد نزل عله كلبي
من طرده . التفت لكيت ابو حيه يباوعلي
دنكت وانه احجي بكلبي انته شنو فلمك
مايعبر عليك شي عبالك سونار.
ابو حيه::اي يابه وين جنه نسولف.
_اذا مثل ماكال اياد يكدرون .
ابو حيه:سلاسل انتي ذكيه وعندج
نضرة بعيده للامور ،ابويه انتي الاجار
للناس العدها رواتب ودخل ممتاز وهم يشكون منه
والي ينطيكم شهر شهرين وبعدين منين تدفعين اشوف لو تاخذون حقكم وتبدون حياة جديده بعيده عن ماضيكم واعتبريني صديق واخذي كلامي لمصلحتج وماانكر اعجابي بااختج بس اذا هيه مارادتني اكيد مااجبرها وبس اكمل شغلتكم اعوفها.
_لحد ماتكمل هل سالفه وين نكعد؟
ابو حيه::هذا الي اريد افهمج بي
شوفي اختج وافقت عله طلبي من ايست منج
فااذا رجعتي الها راح تستغني حته عن حقها لان مستنده عليج ..
_فهمتك جا شنسوي .
ابو حيه::انه اكول اخليج هنا
لحد مااقنعها بالعقد ونوب اجمعكم بيتي .
_اذا هيج انه اروح لحسينيه ابو بشاير
هو كال تكدرين تبقين بيها.
ابو حيه::لا يابه ماعوفج رجال غريب
شلون اخليج يمهم .
_انه اريد ابعد هم ارتاح. خنكتني العبرة
ماكدرت احجي رد وهو يستغفر .
ابو حيه::شوفي للامانه ترى الباشا
ليل نهار يلوم بنفسه .
_ماردته يكمل . اشرتله يسكت
وانه اتحسر . باوعلي بااسف . رديت عليه
توسلت يطلعني مناك جان يدري بحالتي
ويعرف اشكد اذوني بس يغمض وماجنه
يشوف . فضل مصلحته . وحته لو فرضنا
كل هذا ماصاير هم زواجه بيه يبقه بالسر
وما الومه هذا واقع حالنه .
ابو حيه::سلاسل شكد عمرج.
_العمر مو رقم . ترى العشته يعادل الف سنه.
بشارعنا الطفل بس العمرة يوم بعدها يكبر عقله اضعاف عمرة . انشوف ونسمع كل الي يصير .
ابو حيه::الله يعينكم . لهذا السبب اريدكم
تبدون حياة مختلفه واهم جانب هو الراحه
لان يحتاج فترة تتخطون الصار تتشافون
من الم الخوف والضلم .
_ماضن النه حق نرتاح .
المهم اذا خوال قدر اتقبلوها لادليها مكاني.
ابو حيه::ليش خو ابقي عله تواصل بيها.
_اكلك نعم الله اذا غفرو لبتهم
مو انوب يتقبلون بنت الي اغتصب بتهم.
ابو حيه::صح كلامج . تمام انه احاول اقنعهم
تمام هسه انه اترخص وانتي ارتاحي بين مانشوف
شيصير .
_اذا تكدر تكول لاياد يجيب جنسيتي.
ابو حيه::اي هسه اشوفه.
_حجاها وطلع نقاله خابر
ابو حيه ::ها يابه وين انته
شسويت عله هويه سلاسل اها تمام سهله.
_احس عيوني بيهن رمل من كد البجي
نهه مكالمته والتفت عليه .
ابو حيه::يكول داز شخص ما لاكيها.
_لا موجوده . انه متاكده .
ابو حيه::لازم انتي دخلين ادوريها بس
شلون خل ارتب الامر . درتاحي وهذا المطبخ
بي اكل باجر الصبح اجيج .
_طلع وعافني بحيرتي .
اي ياسونه وين راح يصفى بيج الوكت اذا قدر راحت لخوالها. اضل وحدي يله اهم شي اامن عليه من التعب ماكمت ولا اكلت نمت عله القنفه فزيت بعده الفجر ماطر فتحت النقال والرسائل عبالك هجوم مافتحت غير رسائل ابو بشاير.
ابو بشاير::وينك بنت الاجواد طمنيني عنك.
_بعدني اقرء ودك رديت عليه .
ابو بشاير::وينك ليش جوالك مسكر.
_حجيتله الصار وكتله عله كلام ابو حيه.
ابو بشاير::وانه من رايه
افضل لو اختك تروح عند خوالها..
_اي ياريت.
ابو بشاير::وانت وين ودك تروحي.
_حايرة افكر ارجع لبيتنا لحد مايطلع ابوي.
ابو بشاير::طيب ليش ماجيتي هني
وانا كتلك كمن يوم ونسافر والحسينيه
تبقه فارغه اجلسي فيها لحين ماادبرين امرك .
_هو ماكو غير حل . لان اذا ابقه هنا اختي
مراح تروح لخوالها . تمام بس ايجيبون جنسيتي.
ابو بشاير::تعاي وهم غصب بيجيبوها .
_مافهمت هو كال ناخذج تجيبيها.
ابو بشاير::تجين ونتكلم .
_سديت النقال وكمت
خل استغل الفرصه سبحت
واكلت نقالي ماسكت الباشا يدك
ويدز رسائل صفنت وين جان حبك.
الباشا::سمرة . ردي بس احجي وياج
اريد اعتذر منج . اكفر عن ذنبي بحقج
ولج بس ردي . زين اختج شنو مصيرها غير تاخذيها .
_صفنت اتذكر وكفته باب المحكمه
والبس العسكري شكد لايك اله
تحسرت حقهم اهلك يستكثرونك عليه
اكيد زوجته حلوة وشخصيه مثله . ومدري ليش الانسان من يكعد لوحده تطلع كل الافكار نبهني من صفنتي، الباب انفتح دخل ابو حيه بيده علاليك سلم ونزلهن والله عجيب الفرق البينه وبين الباشا واياد
ابو حيه::يله اخيتي كومي سويلنه جاي
نتريك انه وياج حته يصير بينا زاد وملح.
_رديت وانه اكوم .
الماي بي حوبه اكثر ترى امن الزاد.
ابو حيه::اي باالله صح كلامج.
_بين جاي وسوالف دك نقاله
رد وهو يباوعلي .سده وكام
ابو حيه ::كومي يابه الباشا جاي لهنا.
_ خاف يحدد موقعي
دنكت الم الاكل . صاح عوفي طلعنه.
ابو حيه::لا اله اذا مكالمه مطوله
بينج وبينه .كومي اخذج لبيتي .
_لا خليني ارجع لكربلاء افضل
بس استعجل بشغلة قدر .
ابو حيه::باجر موعدي ويا خالها.
_تمام قبل لاتوديها كلي حته اخابرها.
حجيتها ونزلت دموعي .
ابو حيه::استغفر الله العظيم
عادي اول بدايه راح يمنعوها من تواصلها بأي شخص من طرف ابوج بس الزمن كفيل يحنن كلوبهم . يعني يشوفون اخلاقها وتحجيلهم عنج اكيد مايقطعون صلة رحم .
_جنسيتي ماجبتوها.
ابو حيه::لا والله بس اياد وعدني
يحاول يروح هو يدورها .
_تمام وصلني للكراج هم يله اوصل .
ابو حيه::لا يابه انه اخذج واتاكد من مكانج
خو مااعرفج انتي اخيتي وان شاء الله
شده وتخلص خل ابالج يوميه اتصل عليج .
_مايدخلون سيارتك
ابو بشاير كال كطعو الطريق
ابو حيه::عندي اذن دخول لان موكبنا
جوى ويعرفون نجيب غراض .
_مرة اصفن ومرة انتبه لكلامه
الطريق شطوله وازدحام دموعي تنزل
بسكته اباوع ناس تمشي وناس تلطم
وصلنه بعد الف سيطرة .وصلنه تلكانه ابو بشاير
ابو بشاير::حياكم الله اهلا.
_ضليت واكفه اتلفت بخجل.
حايرة يربي شنو هل حياة .
ابو بشاير::اخلي يخوج بشاير
تحاتي جيتج .
_دخلت وعجيب هل بشاير
عبالك انه من اهلها سلمت وكعدت.مر وقت طويل وصاحو عليه طلعت لكيتهم واكفين باب الحسينيه .
ابو بشاير::الاخ ثابت يبوي يرجع اهله.
_هزيت راسي .عرفت اسمه ابو حيه.
ثابت::الجماعه بعد الزيارة يرحون لبلدهم
الحسينيه محد بيها . شتكولين لو .
_ماخليته يكمل . افضل ابقه لوحدي
وانه اعرف ترى قدر من تشوفني ماتروح لخوالها.
ثابت::تمام. اكمل شغلتها امن عليها يم خوالها
واجيج ترجعين وياي .
_هزيت راسي اي. توجه لسيارته صفنت شو كالك مع السلامه عبالي راح ابوع فتح الجنطه نزل منها علاليك كبار ورجع علينا .
ثابت::هاي ملابس . وكل شي تحتاجي
نبقه عله اتصال .
_طلع مبلغ وشكد رفضت بس ماانطاني مجال
خلاهن فوك العلاكه ودار وجه سلم عله ابو بشاير
وصاه عليه التفتت ونضراته كلها اسف ودعنا وراح.
ابو بشاير::الله يحفظه ويكبر حظه.
_دخلت امسح بدموعي
حاولت اندمج وياهم كمت للخيمه
اساعد بشاير تعجبت هواي بنات عرفتني عليهن
وهيج لحد ما قربت الزيارة هيئو نفسهم للسفر .
ابو بشاير::المنطقه هني امان
وان شاء الله انتي بحماية الله وابطال الطف.
_ضل يوصي بيه عله الكهرباء وشغلات البيت
لليل كاعدين انه وبشاير وامها نسولف.
بشاير::ادعيلي يخيتي كون السنة الجايه
انه وطفلي نخدم الزوار..
_ وبعدني ماراده . فاجئتني امها بكلامها.
ام بشاير::مايصير هل كلام . يعني لو ماعطاج ربج ضنا
مابتجين لكربلاء هيج تصير خدمتك مشروطه
بشاير::لاه لاه مو كصدي .
_قاطعتها الام وعينها عليه.
ام بشاير::زوجك ماكصر ومن حكه يتزوج
كبر ويريد عيال يملون بيته .ادعي ربك يرزكه
بنت حلال ماتغيرة عليك .
_دنكت بشاير تمسح بدموعها.
ام بشاير::ارضي بكسمتك يبنتي
وحافظي عله الباكي من صحتك هاي انا جدامك
تعبت وكبرت اضاف عمري بسبب العلاج وبالنهايه
ماصار غير الي ربك كاتبه.
_ومن خلال حديثهن عرفت انو همه ماعدهم غير بشاير وبعد سنين من العلاج ابو بشاير متزوج عليها
صاير عنده ثنين ولد .صفنت ناس تتحسر عله طفل
وجهال الصعده تارسين الخرابه خو بنات نوشه
كل خميس يخلفون ويشمرن بالشارع من غير الي صارو من علاقات محرمه وضلو لااب وام اسم فززني من صفنت كلام الام.
ام بشاير::وشرايج ياسونه تتزوجين .
_باوعتلها بغباء . شتزوج ياخاله وانه مااعرف
مصيري واختي اله باقيه عند الناس .
ام بشاير::حسب ماعرفت اختك
الها اهل امها . وانتي افضل حل لك الزواج.
_ترى انه ازوجت قبل وطلكت ياخاله
مالي نصيب ضروفنا ماتسمح.
ام بشاير:اله انك زينة البنات وش نكصك.
_ناقصني اهل .
ام بشاير::الحرمه لو تزوجة تصي لنفسها اهل
زوجها وعيالها يملون عليها الدنيا الاهل نصير
يمهم خطار .
_هيه تحجي وانه اذكر كل يوم عشته
وانه عله ذمة الباشا. لو محابس الي جان
يقاتل حته اصير اله .
ام بشاير::وين صفنتي .
_التفت عليها ناهيه الحديث
اكيد خاله اذا اجاني شخص كد الثقه
وكون نفس نسبي .
ام بشاير::وان كتلك في رجل يستاهلك
وعله ضماتي يصونك ويخاف الله فيك.
_كامت بشاير . وهيه تحاول
تخفي دموعها . كل هذا وانه مافاهمه
كلامها لحد مافاجئتني بطلبها.
ام بشاير::وش رايك ازوجك فيصل
_منو فيصل .
ام بشاير::زوج بشاير رجال والنعم منه.
_فكيت حلكي بصدمه . اريد استوعب
كلامها . ماانطتني مجال ردت .
ام بشاير::الحرمه ماتاكل حرمه وانا اشوف
انك رويحة حلال وماتضلمين بنتي .
_لا خاله صدك جذب شلون هيج تحجين
هاي جزاتي لبشاير وابوها .
ام بشاير::يابنتي اسمعي مني.
_قاطع حديثها دخول ابو بشاير.
وكبل طرحت عليه الفكرة.
ابو بشاير::اهو فيصل مايتعيب
وسونه بعد والنعم منها .بس لاتفكرين هل طلب
استغلال ضرفك ان وافقتي حياك وان لا تبقين
بالحسينيه وكأن ماصار شي.
_همه يحجون وانه عيني للباب
عرفت بشاير واكفه من طرف الصايه الي
مامنتبهتله اكيد هسه كلبها نار رجلها تغار عليه
ام بشاير::وش كلتي .
_احس عركت من كد الخجل
ردت بس انهي الموضوع . خاله ويني وين الزواج
وانه حته جنسيه ماعندي وحته لو فكرت هم رجل بشاير . ضلو يحجون لحد ماتعبو ..
ابو بشاير::فكري عله راحتك.
_ضليت حايرة شلون اكدر اباوع بوجه بشاير
تاخر الوقت هيه بعد مادخلت يمنا كمت اريد
اروح للحمام طلعت واسمع صوتها تحجي .
بشاير::اول وتالي اتزوج خلص
انا اموافكه . والبنت مالها احد مانخاف منها.
فيصل::وش بلاج كتلج لاه
انسي هل سالفه.
بشاير::ليش يعني لان مو من الي اختارتهم امك.
فيصل::خلصنا يبا .
بشاير::تزوجها وخلها هني لبين ماتولد.
فيصل::وبعدين معاج كتلك لاه.
بشاير::اشرايك نعرض عليها ان ولدت
نعطيها مبلغ ونسجل الولد بأاسمي.
فيصل::لا زودتيها عاد كتلك لاه لاه يحرمه اتكي الله حنه باارض الحك لا تخربين تعبنا وتضيعين اجرك.
_التفتت فازه . دنكت فشلانه ابو بشاير واكف وراي.
ابو بشاير::الك حك الرفض .
_اصلا مافكرت بالموضوع . نعم الله عليكم
من تخلوني هنا .
ابو بشاير::بس ان كان تردين نصيحتي
الزواج هو فرصه الك حته تبدي حياة جديده.
ولا يهمك كلام بشاير ترى فيصل رجال محترم ومايساوي شي يغضب الله . والحرمه اهي الي
تحدد علاقتها بزوجها . وشوفت عينك هاي انا
مااكدر استغني عن ام بشاير رغم عندي زوجه ثانيه.
_سكت بسبب نقالي الي علن عن اتصال من ثابت
رديت بلهفه وحته مارديت السلام كبل سالته ها بشر.
ثابت::جنسيتج لكيناها.
_وقدر .
ثابت::قابلت خالها الجبير والرجل كلامه
مقنع . مو بسهوله يكدر يدخلها بينهم
يكول صارت عدنا اولاد وجناين ومحد يعرف
سر اختنا الي اندفن ويه طلعتنا من محافظتنا
_يعني شنو هسه.
ثابت::الامر مارجع بس اله كال اطيني مجال
اشور اخوتي وعمامي . الشغله مو هينه.
_اكو امل ياخذوها.
ثابت::ان شاء الله لمست منه شيء من القبول
بالاخص من كتله انه رايدها .
_وهيه شكالت .
ثابت::ماردت ااملها بشيء لحد مااتاكد
بس مامهتمه بكد سؤالها عنج .
_بجيت بعبرة . ابتعد ابو بشاير
طلعت للطارمه احجي ويا ثابت .
ثابت::كولي ياالله . وانه اخوج لاتتوقعين اعوفجن .
_بس ردت تحصلي مكان اكعد بي
اجار مناسب .
ثابت::ها ليش منو ضايقج.
_سولفتله عله طلبهم صفن ثواني ورد.
ثابت::زواج مشروط مانصحج .
يابه ترى بيتي محد بي تعاي يمنا افضل.
_وشكد تريد اتضمني وحسب كلامك بنفس الشارع بيت اهلك وبيت الباشا .
ثابت::اذا هيج خو خلي نرجعج لذمته.
_مانرهم انه اريد اشرد من
كل بشر يعرف ماضيي . خاف عبالك زعلانه عليكم
هذا واقع الوارثه مو بكيفنا نحددها قبل عماتي تعرضن لنفس الامر .
ثابت::مااكذب عليج اكيد راح تواجهين مشاكل
وبالاخص هو زوجته مو غريبه وحاليا . حامل.
_هو يحجي وانه اذكرت بيوم الي سليمه كالتله حامل
ومن نزلت الطفل شسوى جانت تصرفاته متناقضه ماعرفت وقتها ضاج لان نزلته لو خاف يبتلي .
ثابت::الوو . وياي .
_اي اسمعك .
ترى همه مافرضو عليه مجرد اقتراح.
ثابت::سلاسل انتي وين واصله بدراستج.
_متوسطه. بس ليش.
ثابت::لا بس كلامج مال ناس عدها وعي .
_كتلك احنه درسنا من الدنيا.
ثابت::الله يعينج . المهم يابه انه اخابر
باابو بشاير اشوف شوكت يسافرون .
_سديته وغصب تخوني ذاكرتي
وتاخذني لايامي ويا ومدري ليش اقارن
بينه وبين محابس . كمت وانه ادعي كون
افقد الذاكرة وانسى وينمحي وجودهم من حياتي
ايام وبيت ابو بشاير يحضرون انفسهم للسفر
يطلعون للسوك ماخلو شي حملو جنط .
بساير::هاذي لج يسونه اشتهيتها عليك
_اباوع الها تحاول تتصرف طبيعي
ضحكت نوب مشتريتلي ملابس .
بشاير::اي شغلاتكم حلوة .
_بالعكس احنه ندور صاياتكم
ضلينه نسولف . دك نقالي باوعت للرقم
انعصر كلبي . خلصت الدكه وبعدها اجت رسالة
فتحتها . رغم جنت ادعي تروح لخوالها بس من صارت صدك حسيت روحي ضايعه مثل الي فقد جزء منه.
قدر::تذكري انتي الي خلفتي الوعد وتخليتي عني
لو راجعه جان ماعفتج المهم اتمنى تكونين بخير
انه باجر اروح لخوالي .
_بجيت وانه ابوس بالنقال
احس هيه كبالي وتحجي .
بشاير::خير عسى ماشر وش الي بكاج.
_من حركت كلبي كمت افتر بالغرفه
ابجي والوم روحي مادري شلون بدون تفكير
دخلت عله رقم الباشا .دعيت عليه من كلبي
اكتب ودموعي تصب. ريتك تمر بحالتي.
وعبالك جان منتضر مني رساله بسرعه رد
الباشا::ابشرج الله اخذ حقج مني
ولج ردي ردي .
_مو رجال حته ارد عليك
حضرته وشمرت النقال .
بشاير::وكلي الله يخيتي .
_ليلي كله انه اباوع لرسائلها وابجي
صبحت مريضه كوى افتح عيوني
بشاير::اشربي هل حليب
يفك بلاعيمك . شلون نسافر ونتركك جذي
ابوي محتار .لو عندك جواز كان خذناك معانا.
_دخلت امها واكيد سمعت كلامنا.
ام بشاير::ومن يسمح بسفرها بدون محرم.
_وبعد سوالف طويله عرفت مايحقلي السفر
وياهم اله بموافقات امنيه واولها لازم محرم
الضروف وضياعي خلوني مااعرف شفكر
كل همي جان ابعد لو ليش اجذب عله روحي
جنت اريد اثبت للباشا ومحابس اتزوجت
الاحسن منكم. وبسبب الحاح بشاير وامها
وبغباء كتلهن موافقه .
_____قدر______
_شثكل الايام واساس الغربه متقيده بحركتي
رغم همه ابد مابينو انزعاجهم من وجودي
بالنهار بس انه وام اسعد بالبيت هادءه وملازمه
بحيث طول ماهيه تشتغل لسانها يلهج بالاستغفار
جناينها يجن شويه ويرحن زموجة ثابت عند اهلها
صاحت عليه .
وفيه::تعاي خاله ناوشيني هل ثرامه
ينطيج العافيه مااكدر اصعد اخاف اطيح.
_نزلت المكينه وانه اسال شتردين تسوين خاله.
وفيه::احضر عجين الكباب حته نخلص من هم العشه.
_تردين انه اسوي .
وفيه::اذا تعرفين سوي .
_احضر وهيه تباوعلي .
وفيه::يا المن الجزر والقرنابيط.
_ترى كلش طيب هسه تشوفين
انه هم جنت ماعرف واسوي مثل طريقتج
بس مرة اختي سوته ومن اكلته تعجبت .
وفيه::ديله خل مجرب وصفت اختج.
_يووو وصفاتها بالاكل عجيبه
خو التمن المدخن ماينشبع منه.
وفيه::هذا ابهارات مايرادله شي.
_لا هيه متخلي بهارات مدخن
تطبخ التمن وتشعل فحمات اثنين
تخليهن بشي فافون وتحطهن بنص التمن
وتصب فوكهن زيت وتكبس القبق .
وفيه::يااا شلون هيج.
_تخلي شويه ونوب تشيل الفحم
يصير ريحته عبالك مطبوخ عله حطب.
وفيه::عله يوم اجرب هل طريقه
_واخذتني السوالف وياها
وانه احجيلها كل شي عن سونه
ومانتبهت لروحي دموعي تصب .
وفيه::يا عيني الله يفك مشكلتكم
ولا يبعدكم عن بعض. غسلي وجهج .
_وبيومها اكلو ويحمدون بالطعم
وهيج احاول اشغل روحي خلصت الزيارة
واجه ثابت الي مايتواجد بالبيت بس
وقت الاكل اسمع صوته يحجي ويه اهله
يتصل بيه اذا محتاجه شي
وكل مااساله عن سونه يتهرب.
ثابت::الغايب عذرة ويا.
_زين خوالي .
ثابت::تواصلت ويا الجبير .
_سولفلي عن رده . وابد مالتهم .
ثابت::شويه شويه يحنون اكيد اهم شي
يعرفون بوجودج .
_بس انه ماعوف اختي.
ثابت::تحتاجن سند بالاخص انتي
عله الاقل اهل فاروق يحسبون حساب وراج ناس.
_وشكد تحاول بنين تشغلني عن تفكيري .
بنين::تعودت عليج تدرين
بس اكيد نبقه نتواصل .
_ان شاء الله. تمددت ومثل كل يوم
اكتب الها عله امل ترد . اباوع تشوفهن بس ماتجاوب.
كعدت عله صوت هوسه ضليت محتارة اطلع لو لا
ادنيت للباب اسمع الباشا خبص البيت بصياحه.
الباشا::مو من حقك تصرف بكيفك.
اياد::يابه خلص افهم البت مهمه وانتهت .
الباشا::وانته منو وتقرر شو جنك ناسي
اياد::ماناسي بس ياريت انته تذكر
انه الي ساعدت بترقيتك وهسه تريد تعاملني
بااوامر.
الباشا::وين وديتها احجييي.
اياد::مااعرف من المحكمه وانته تواصلي بيها.
_اشتد الكلام بينهم ضليت حايرة
شويه ودخلت بنين وجه مخطوف
سالتها بقلق عفيه شصار يمكن كلامهم عن اختي.
بنين::مااعرف والله مافهمت .
_اباوعلها اخذت نقالها واتصلت
من كلامها عرفت خابرت ابوها
بنين::ها يابه اسعد واياد تلاغو.
_عافتني اصفن وطلعت
شويه واسمع صوت ابو اسعد.
ابو اسعد::لا الضاهر تردون تكبرون عليه
ولكم واكفين تتصايحون كبالي .
ثابت::شكو خابص الدنيا
يعني نجبرها تجي لحضرتك .
الباشا::بس دليني وين واطلع منها.
ثابت::مااعرف اخر اتصال كالت اتقدملي
شخص خليجي . طلبت مني اوصل اختها لخوالها.
الباشا::وبصفتك شنو .
ثابت::اتنخن بيه فاعل خير.
الباشا::كثر الله خيرك
اختها انه اوديها لخوالها..
ثابت::مااضن من ضمن مهمتك .
الباشا:::كافييبيي . اتحملتكم هواي.
_كمزت من صوته . ركضت للنقال ادك ماترد
وشكد كرهتها بهل يوم وتندمت لان ثقيت بيها.
صياحهن وترني . دخلت بنين تمسح بدموعها
حسيت بثكل وجودي بينهم . دكيت عله ثابت
رفضه، وره شويه اتصل.
ثابت::ها يابه.
_ادري ثكلت عليك .
ثابت::كولي يابه بخدمتج انه.
_بس وصلني لخوالي.
ثابت::صار هيئي نفسج فد ساعه ونتوكل.
_سديت النقال وكعدت
جا شكد ثكيله بحيث بس كتله وافق
بسرعه لبست شالي ولميت ملابسي .
بنين::ها وين .
_سولفت الها .
بنين::جا انطيني رقمج عاد اطمن عليج.
_حفظنا ارقام بعض . دخلت عله صفحة سونه
كتبتلها رساله طويله عتب ولوم وحضرت رقمها
لليل ودك عليه ثابت.
ثابت::يله يابه .
_طلعت مدنكه استحي اباوع بعيونهم
وكفني صوت امهم.
وفيه::تعاي خاله .
_تقربت وكفت كبالها
وفيه::ماعوفج بس خل تبرد الامور .
_سلمت وطلعت متهربه
من نضرات بنين الي شهكتها مسموعه .
صعدت السيارة وكل ضني ابو اسعد ويانه
التفتت متساله جا الحجي وين.
ثابت::صار عنده شغل.
_حجاها وحرك .
كل مااشهك يلتفت عليه وهو يستغفر
مسافه مو بعيده وطبك اباوع وين احنه.
ثابت::هسه اريدج تسمعيني.
_هزيت راسي اي.
ثابت::خوالج رفضو حته من كتلهم
اجيبها يمكم ايام واتقدملها بصورة رسميه
واخذها، كالو اذا تريد تسترها كمل معروفك
واسترنا لان وجودها راح يفتح علينا كلام .
_يعني شنو جا ليش ماكتلي وانه بيتكم.
ثابت::لان ماريد ازغرج واعرف هل موقف ينذكر.
_اختي وين .
ثابت::مااجذب واكول عافتج
بس جانت مفكرة خوالج يتقبلونج.
_وديني الها .
ثابت::بس هيج راح تخربين عليها قسمتها
اذا رحتي اكيد ترجع عله مودج .
_اي نكعد انه وياها.
ثابت::وييين وين تكعدين بنات
لوحدجن مالجن والي . عبالج اختج غشيمه
لوتعرف الامر سهل جان ماترددت
_اذا اخذت ورث امي نكدر نسكن وين مانريد
ثابت::الكلام سهل . يابه افهمي ترى انه رحت وسالت
وعرفت مستحيل ينطوج اذا ماينوكف بوجهم .
_ليش ليش ترى حق امي.
ثابت::حق والها ديه لان هم سبب موتها
بس الحكوك تريد حلوك . يابه المصيبه
ابو فاروق مسجل الحصة الاكبر لايوب
خو تفكيرة واضح راد يضمن انو ماينشمر بالشارع
والضاهر يعرف فاروق طماع فخله الملك لايوب لاجل يبقه يداري .
_الحل شنو .
ثابت::حلها بيدج لو تعوفين الامر لحد مايطلع
طارق وبلكي هو ينصفج . لو تشدين احزامج وتواجهين.
_اي مو كتلك وكلي محامي.
ثابت::وكلنا وبعدين .
_اكيد تساعدني لحد مااخذ حقي.
ثابت ::بصفتي شنو . يعني من ادخل بيج للمحكمه
واهل فاروق يدزن كوامه لعمامي يابه ابنكم شله غرض.
_كول هيج .من الاول.
ثابت::ترى عيب كلامج .
شوفي لا انه مراهق ولاسرسري
واضن شفتي زوجتي .
_خلص وديني لاختي.
ثابت::ترى زوجها غريب . وكعدتج يمه زحمه.
_ويمك مو زحمه.
ثابت::جا صار ساعه الطم ليش
هو اريد بس احلل وجودج يمي. يابت الناس
ثقي بالله مااجبرج ولا استغلج .
_صحت ياناس بت منو مااعرف
ياريت صدك بت ناس .
ثابت::كولي ياالله . واسمعيني
تردين اخليج بيتي . تردين اخليج بالشركه
تردين اوديج لاختج .
_رجعني للصعده.
ثابت::اها يعني ماخايفه.
_شيصير اكثر من الصار.
ثابت::بس هيج راح تأذين اختج
اكيد ترجع من تسمع بيج.
_لا تكلها،
ثابت::تمام براحتج .الهم بلغت .
_اباوع ومااجه ابالي غير اشمر روحي
من السيارة واخلص . التفت عليه وقبل
مااخلي ايدي عله باب سمعت طكت القفل
فكيت حلكي . ابتسم ودار وجه وصلنه للشارع
احس كلبي انعصر وكف كبال الصعده .
ثابت::الانسان مخير وليس مسير.
_عيني لداخل الشارع اضلم .
ثابت::لا تخلي رجلك بالجحيم وتكول حظي
جابني الضروف جبرتني لا تدعي ربي خلصني.
_جا منو يخلصني غير الله.
ثابت القيت عليج الحجه
وعرضت عليج اكثر من حل.
_حل تتزوجني حالك حال الباشا تخليني
بيت محد يعرف بوحودي . ومن يحسون بيك
اطلكني .
ثابت::مامتخذج زوجه العقد لاجل اكدر
امشي باامورج . وهم دخلتي عليج محرمه.
_مثل بداية الباشا . وبعدين رادها زوجه
ومن حملت كالها نزلي.
ثابت::اختج مو ملاك وخاف عبالج
مااعرف زواجها بمحابس .
_وانته كلتها زواج .
رادت بس تشرد من هل مستنقع.
ثابت::وهو جان مجبر ومقيد .
_سكتنا نقاله رد .
ثابت::ها يابه. بس اوصل قدر لبيتهم
شسوي يابه مالكيت حل .
_باوعلي ونزل النقال فتح صوت
متعمد يسمعني .
ثابت::حجي سمعت كلام خالها بأذنك
ابو اسعد::اي مو معناها ترجعها للهلاك
تحجي صدك. بعدين ليش ماانتضرتني .
شو انته هم متجاهل،وجودي.
ثابت::العفو يابه . بس مالكيت
حل ثاني البنات مالهن احد كلت
ارجعها واحاول اتواصل ويه اختها.
ابو اسعد::لك لا لا تخرب عله البنيه
بلكي الله يوفقها بهذا الرجل.
_حجيت بكلبي هيج صرت عبى
عليها لا مستحيل اوكف بنصيبها..
ثابت::شنو الحل يابه خو متبقه هاي
وحدها بين الوحوش.
_سكت ابو اسعد. وعبالك يفكر
رد وهو يستغفر.
ابو اسعد::لازم نحل امرها ويه بيت فاروق
ونامن عليها بعدها ماعلينه ذنب.شتكول.
_رد ثابت وهو يحاول يخفي ضحكته.
ثابت::الي تشوفه يابه.
ابو اسعد::بس لا تخلي احد يعرف
لحد ما نحل امر جبار .
ثابت::ماله شي يمنا . بس المشكله اسعد.
ابو اسعد::كلبي ينزف عليه
شبيدي.
ثابت::اسم الله عله كلبك يابه.
ابو اسعد::هسه وين راح تخلي البنيه
ونوب تدري من دخلت استفقدتها.
_ماكدر يتمالك ضحكته.
ثابت::ههههه حجي اذا تسمعك بنين تزعل.
ابو اسعد::هيه تلتني من الباب تبجي.
ديله وين راح تودي البنيه .
ثابت::احجي وياها اذا قبلت بالاتفاق.
ارتب الها مكان بس انته طش الخبر
انو خوالها خذوها فاهمني ؟
_نهه مكالمته والتفت عليه.
ثابت::ها ست قدر.
_مابيدي غير حل . بس بشرط
اروح لاختي .
ثابت::تمام نكمل امورنا واخذج الها
ومن تسافر ترجعين .
_اعرف ارجع تخليني
بمكان محد يعرف وجودي بي.
ثابت:: كلت خوالج رادوج لغايه
حته من اعلن عقدي عليج اكول خطبتها من اهلها
شكرا لزيارتكم عالم روايات سكيرهوم
