رواية متلازمة الحب الفصل الرابع بقلم جمانه السعيدي
ياسمين...اجا عليه عمي وخالتي يشوفوني
وماجد مااجه وياهم جايبلي حلويات وكرزات
كالو ارجعي ويانا بس اني ماقبلت شنو رجعتي
اذا مو علمود زوجي على شنو راجعه
راح ارجع معلكه فوك وهو ماله شغل بيه وهيج يزيد قهري اكثر واكثر خليني هيج مااشوفه ولا يشوفني احسن
اعتذرت منهم وكتلهم اني مو زعلانه اني جايه ارتاح
كم يوم وارجع
ورا اسبوع تقريبا اجا ماجد هو وخالتي بس عبالك جاي من ورا خشمه كعد ساكت كلشي ماحجه
خالتي جانت محرجه من الموقف حيل
من شفته هيج كاعد وساكت
قررت ماارجع مااكدر ارجع وياا وهو هيج
ابد مامقدر وضعي كلش مصدومه منه
اكثر شي متعبني موهاي الطفله الداون لا متعبني موقف ماجد مني
يمكن لو طالعه مااخلف جان من الصبح شمرني وراح ازوج
صدك البشر ما تعرفه اله تعاشره
بقيت بيت اهلي امي شايلتني شيل على كفوف الراحه
رجعت للدوام
اكعد بلصيدليه وماافتر ابد بلمستشفى
جنت اشوف ماجد بس اجاهل وجوده
كل الموضفات عرفن اكو بينا خلاف لان احنا جنا ما نتفارك ابد اني ويااا
بس اني ماحجيت عن مشاكلنا
هاي مشاكل عائليه ماكو داعي نشهر بنفسنا كدام هذا وذاك
وليش اكعد ابرر للناس وضعي هم شنو علاقتهم بيه
شكد البنات حاولن يعرفن اسباب الخلاف
بس اني ابد ماحجيت
تعرفون شنو الاشاعه الي جانت طالعه علينا
ياسمين كشفت ماجد يخونها ويا وحده بلتليفون وزعلانه بيت اهلها
حتى ماتعبت نفسي وصححت هاي الاشاعه الي يربد يحجي خل يحجي بكيفه مالي شغل بلناس
كافي عليه الي اني بي والي يريد ياالف قصص عنا براحته مراح امنعه مادام حاشر خشمه بحياتنا خلي براحته
جمانه السعيدي
كل عشر ايام يجي ماجد هو وخالتي يشوفني ويروح
يعكد ساكت لا يسئلني ولا يحجي وياي عبالك تأدية واجب
لو ما خالتي زينه وياي جان طردته
من خلصت شهر الثامن خالتي وعمي جابولي فلوس الولاده
وكالو اذا تحتاجين شي اتصلي علينا
يوم التاسع بشهر التاسع صار عندي طلوك
امي لان عدها خبره بلولادات عرفت اني عندي ولاده
خدرتلي ماي وهيل وشربتني
خلتني اتحرك بس ما تقبل اجيبني
تكول هاي اول بطن لازم بلمستشفى وتحت إشراف الدكتوره خاف يصير نزف لو شي
ياسمين امي اتصلت بعمي اجا وراي للمستشفى هو وخالتي وماجد
دخلوني غرفة العمليات دخلن وياي ممرضات ثنيين وامي ودكتورة الولاده
ساعه كامله جوه وهنا يحاولون يجيبني بدون ماااتاذه
الحمد لله شفت الموت يله طلعت بنتي ماشاء الله حجمها جبير
اخيرا جبت
بنيه تخبل بس فعلا طلعت متلازمة داون
اول ما طلعت اخذتها خالتي حتى تسجل بياناتها
ماجد طالب الدكتوره المختصه تجري كل التحاليل
الازمه حتى يعرف شنو سبب
بلبدايه الدكتوره ماقبلت بس بعد الحاج منه قررت تسويلها تحليل واني هم نفس التحاليل
يسمونه تحليل مطابقه او تطابق يمكن او هيج شي
اجت الممرضه تاخذ مني دم كنت تعبانه وما منتبها
كلش
امي...ليش تاخذين دم
الممرضه...ابو الطفله طلب تحليل يريد يعرف البنيه سليمه لو لا
امي...شبي هذا تخبل
المهم ماجد كان مصمم على هذا التحليل لان اصدقائه
بلمختبر ناصحينه من تنولد الطفله يسوي تحليل
وراح تبين الاسباب
اذا طفره بلجينات يمكن راح يكون بس هذا الطفل
داون بس اذا وراثه احتمال يكون اكثر من طفل
ياسمين...عفته براحته خلي يسوي اي شي يريده
خلي يتاكد براحته جمانه السعيدي
للعصر رجعنا للبيت اني وامي واجت ويانا خالتي للبيت
مسكينه شايله الطفله وتبوس بيها
على الاقل احسن من ماجد
هيج تحليل يطول تقريبا ٣ ايام يله يطلع
ذني الايام هو ابد ماوصلني ولا شاف الطفله
اجت خالتي وعمي ودكتور اسعد وزوجته يتحمدولي بلسلامه
ويدلعون الطفله
بس اني لو يجيني العالم كله مو بعيني بس ماجد بعيني
لان هو زوجي هو شريك حياتي
لو ذوله كلهم زعلانيين عليه وبس هو وأكف وياي هذا الشي يكفيني
المهم ثالث يوم من طلع التحليل
اندكت الباب بليل
امي فتحته طلع ماجد
امي...هله خاله هله بيك تفضل دخل وهو منزل حواجبه
وعصبي
امي راحت تخدر جاي على اساس تعوفنه نحجي براحتنا
دخل عليه للغرفه اني متمدده على الجربايه
من شفته كعدت
ماجد...شلونج
ياسمين....بعد وكت توك اجيت تطمن علينا
ماجد...جنت منتضر التحليل يطلع
ياسمين.. وهذا التحليل شراح يفرق خاف انت شاك هاي مو بنتك
ماجد...لا بنتي بس عرفت انتم غشيونا
ياسمين...ههه ضحكتني واني ضايجه بيش خشيناكم
ماجد... طلع التحليل وهذا الداون وراثه
لان تطابق ١٠٠،/١٠٠ تطابق وراثي مو معقول
الدكتور يكول
اما الام او الخاله عدها هذا الداون قبل
ياسمين...هاي امي كدامك وماعندي خاله وهذا الدكتور زمال ما يفتهم
ماجد...عدت التحليل مرتين ويطلع تطابق وراثي ١٠٠/١٠٠
ياسمين...مو كتلك ماكو هيج
ماجد...اسئلي امج اذا مو امج ولا خالتج اذن انتي مو بتهم شوفي امج منيين جابتج
ايجوز ولدت وحده من المراجعات وعافتج ونهزمت
وامج ربتج
ياسمين...ليش ماتحترم نفسك ليش تخليني اهينك
ترا اني صابر عليك كوه
انت انسان لا تطاق
جمانه السعيدي
ماجد....اتأكدي وهاج هاي نسخه من التحليل اعتقد انتي دارسه وتعرفين تقرين
ولا تنسين تسئلين امج عن اصلج
ياسمين. اطلع برا اطلع برا الله ياخذك اطلع ناقص
لو ماانت ناقص ما تتهمني بااصلي
اني اشرف واحسن منك ومن عائلتك
الله لا يوفقك وإنشاء الله ماتشوف ريحة الطفل بعد
ياضالم الله لا يبارك بيك
طلع ماجد يمشي بسرعه وهو عصبي
وامي اجت لكتني ابجي
امي...هااا خير ليش تبجين شبي زوجج ليش هيج عصبي
ليش اتعيطين احجي
ياسمين...النذل الحقير يتهمني بااصلي يكول انتي مو بت امج انت لقيطه وحده شمرتج وامج اخذتج
امي...ياستار ليش هيج يكول
ياسمين...تطلع تطابق وراثي ١٠٠/١٠٠ بلتحليل
يعني بنتي متلازمة دوان وراثيه يكول من الدرجه الاولى
لو ام الام لو خالتها
كتله هاي امي كدامك
يكول هاي مو امج شوفي اصلج شنو
راسا امي كعدت على الكرسي ولزمت راسها
ياسمين...يمه معليج بي هذا حيوان
كامت امي تبجي اني من سمعت صوت بجيها كمت ابجي وياها
كلامي كان انفعالي بهاي اللحظه
انو عقلي بدون مايفكر رفض فكرت اني لقيطه
وهاي مو امي مستحيل تكون مو امي صح اني وياها ما نتشابه
بس هاي امي اني متأكده هاي امي
طلعت امي من يمي وهي تبجي
كلت حقها تبجي اذا نسيبها العزيز يطعن بيها
هاي مجازاتها شلون طحت بواحد بلاضمير
وين جانتلي شكد امي جانت حريصه عليه
وشكد حاولت تحميني
بلاخير طحت بواحد مثل ماجد
طالع من ملة الإسلام كلها ماعنده ذره ايمان بلله تعالى
امي بعد مارجعت بلغرفه
طلعت اطمن عليها لكيتها تبجي
ياسمين...معليج بكلامه خلي يولي اني راح اطلك منه
همزين عرفنا على حقيقته
لا اضوجين حقج عليه
همزين كشفنا على حقيقته
امي...ابجي عليج وعلى حظج وحظي الاغبر طحنا
بواحد مثل ماجد
ياسمين...مقدر ومكتوب وهذا الشي كاتبه الله علينه
الانسان مهما يكون حذر مراح يكدر يتغلب على قدر رب العالمين
هذا الشي مكتوب علينا
جمانه السعيدي
ياسمين...بليل اباوع الامي تمشي مهمومه تعبانه
اجتها وحده اجيبها كالتلها مااكدر اليوم تعبانه حيل
اول مره اشوف امي هيج
بكلبي كمت ادعي على ماجد
كعدت صار التحليل كبالي اخذته وكمت اقرا بي
كلشي بي الدم والخلايا وكلشي مطابق بنسبة ١٠٠/١٠٠
شلون طلع هذا التطابق
شلون واني امي كلشي مابيها وماعندي خاله
مامعقوله التحليل غلط
اذكرت امي كالت بيتنا احترك من جنتي زغيره وحتركت الصور
والاوراق
معقوله تكون هاي صدفه
ايجوز عندي خاله واني مااعرف
ايجوز ماتت بلحريق وامي ما تقبل تحجي عنها
بس ليش ما تحجي عنها
عادي واذا عندي خاله متلازمة داون ليش امي اضمها عليه
افففففف الله يلعنك ماجد من جبت هاي السالفه
زين امي ليش مادافعت عن نفسها
من كتلها يكول ماجد عليه لقيطه
ليش كامت تبجي
المفروض هي تحجي تكول لا هذا الكلام مو صحيح
ليش بس تبجي ليش ماعدها ردت فعل قويه
معقوله تطلع صدك مو امي
لا ياربي مستحيل ايجوز وحده جابتني وهي اخذتني
تربيني
يااا عود صدك بعد كل هذا العمر تطلع هاي مو امي
لا مستحيل ماكو هيج شي
ياربي مو جنت عايشه ومرتاحه منيين طلعتلي هاي السالفه
رحت يم امي
كاعده تلف كبه بلمطبخ
امبينه ضايجه كلش
ياسمين...يمه اريد اسئلج سؤال مهم بلنسبه اليه
امي....كولي بس لاتكثرين حجي عليه لان اني دايخه
هاكد ما بجيت اليوم
ياسمين...عندي سؤال مهمه بلنسبه اليه اعرف الجواب
امي...اي شنو
ياسمين....صح اني مو بنتج اني لقيطه
راسا وكعت الكبه من ايد امي ونزلت دموعها منا ومنا
امي...انتي بنتي شلون لقيطه
ياسمين...بداعتي احجي ولله راح اتقبل الموضوع
هاج شوفي التطابق شلون طالع بلتحليل
ترا ماجد ماجاب شي من جيبه
امي..هاي تاليتها تشكين بيه
دنكت امي ومسحت دموعها ودفعت صينية الكبه بعيد عنها
اتحسرت حسره عبالك كلبها انشك بلنص هلكد ما مقهوره
ياسمين....زين انتي عندج اخت داون ميته قبل لا انولد
اني لان الخاله هم تنقل الجينات الوراثيه
امي...ممكن تاخذين الكبه للمجمده وتعوفين انام لان تعبانه حيل
ياسمين....اني مراح اكدر انام اذا ماالكه اجابه للاسئله
الي بكلبي
يمه لازم اعرف الحقيقه حتى اكدر ارد على ماجد
تعرفين شنو يتهمني لقيطه
تعرفين شحسيت من كال امج لكتج وربتج
يمه كلامه موتني
بس انتي عندج الاجابه بس انتي تكدرين اتريحين بالي
فدوه ولو اني اعرف انتي اليوم انقهرتي
هواي بس اني مراح ارتاح اله اعرف الحقيقه
احجيلي يمه بداعتي عليج ريحي كلبي
اني بنتج
شكرا لزيارتكم عالم روايات سكيرهوم
