رواية متلازمة الحب الفصل الخامس بقلم جمانه السعيدي
ياسمين....يمه ممكن تريحني ترا كلمه وحده منج
تخليني اعرف راسي من رجليه
اذا انتي امي الحقيقيه وهذا الشي اني متأكده منه ليش التحليل يكول وراثه
بس فهميني الله يخليج
امي...اذا انتي متاكده اني امج الحقيقيه ليش تسئلين وتعذبيني
ياسمين...اريد افتهم اريد ارتاح اريد الحقيقه حتى اوكف بوجه ماجد واكله انت غلطان
هاي امي وماعندي ام غيرها
فدوه ماما لا تشلعين كلبي الله يخليج
كولي اي شي خلي ارتاح
تحسرت امي وباوعت بوجهي
امي ...انتي عندج شك اني امج
ياسمين...ابد بعمري ماشكيت ولا لحظه انتي امي
حتلو مو انتي الي جبتيني الهاي الدنيا انتي بعيني وكلبي امي
بس اريد افتهم حتى ارتاح الله يخليج
اني جبيره موزغيره واكدر افتهم واقدر اذا انتي ضحيتي علمودي
امي...كنت اتمنى مااحجي بهذا الموضوع كنت اتمنى اموت ويموت هذا السر وياي
كنت اتمنى ابقى بعينج اني امج للابد
بس الظاهر مو من حقي احتفظ بهذا السر
ياسمين...يعني فعلا اكو سر بلموضوع
امي...تعاي خل اتمدد بغرفتي لان ولله تعبانه مابيه حيل
اكو حركه بكلبي شكبرها من ماجد
مع الأسف طلع مايستاهلج
ياسمين... جبت بنتي ورحت ورا امي لكيته متمدده على الجربايه وتبجي بس شافتني مسحت دموعها
خليت بتي بلسله بلكاع
وصعدت تمددت بحضن امي
ياسمين...قبل لا تحجين اي شي حتلو اطلعين خاطفتني
هم تبقين انتي امي الي فتحت عيوني عليها
امي الي احبها واموت عليها اني اعرفج زين كلبج طيب ومستحيل تااذين نمله
مو تاذين بشر يله خليني بحضنج مثل لمن جنت زغيره
واحجيلي كلشي صار وياج
جمانه السعيدي
ياسمين..حضنتني حيل وباستني مسحت دموعها
امي...اني عندي اخت متلازمة داون
ياسمين...صدك
امي...اسكتي لا تحجين لان بلكوه جاي اجمع الكلام
ياسمين...سكتت
امي...عندي اخت ازغر مني بسبع سنوات متلازمة داون
ابوي مات واني عمري عشر سنوات
وحالتنا الماديه كانت تعبانه حيل يادوب مدبرين العيشه
لاعدنا ملابس حلوه ولانطلع سفرات
ولا ناكل اكل زين يله مشين يومنا
الراتب الي عافه ابوي قليل وامي ماتشتغل مره بسيطه
اما اختي بيداء
ياسمين...اسمها بيداء
امي...اي اسكتي ترا ابطل
بيداء نولدت متلازمة داون بس ابوي ابد ماسوه مثل ماجد
بلعكس جان يحبها يموت عليها
هي حلوه تخبل بيضه كلش بيضه مو مثلي سمره
وعيونها صفر شعرها عبالك حرير
كصيبتها توصل للخلفيه
نظيفه بشكل موطبيعي
هي الي جانت محليه بيتنا نعتبرها الطفله المددله بلبيت
من صار عمري ١٥ وبعد ماخلصت الثالث متوسط
كعدت سنتين مادخلت اعداديه لان المصرف يله على كد العيشه من صار عمري ١٨
قررت ادخل دورة تمريض
حتى اساعد بلمصرف
قبل التمريض دوره لمدت ٦ اشهر مودراسه مثل هسه
يعلمونا شلون نخلي الكانونه شلون نخيط جرح
شلون نضرب ابره اما ثقب الاذن قبل بلابره والخيط
ماكو جهاز ثقب مثل هسه
قبل اكو سمعه على الممرضات لان يبقن بليل بلمستشفى
لذلك محد تقبل تتعلم تمريض
رغم هي شغله حلوه والي تريد تحافظ على نفسها
محد يكدر يقرب عليها
كانت المستشفيات بيها شغل موطبيعي
عمليات وتضميد تعب وحركه بسبب قلة الممرضات بس اني كد المسؤليه
تخرجت من الدوره بامتياز
بديت اداوم بلمستشفى
كل أسبوع يتغير النظام الي تشتغل الصبح تصعد لليل
اني كنت محافظه على نفسي
وهم اني مابيه بركه يعني موحلوه محد يباوع عليه
كمت استلم راتب شويه وضعنا تحسن
كمنا ناكل اكل طيب
ونلبس ملابس مثل الناس جمانه السعيدي
واني هم اشتغل بلبيت الي عدها ابره اضربها تنطيني هلقاسمه الله
واذا اثقب اذن وحده بلابره والخيط
هم تنطيني شي حتلو قليل
شكد جنت فرحانه بنفسي وبعملي حسيت نفسي صرت وحده مهمه
من وصلت عمر ٢٣ امي ماتت ماتت على غفله
هي صح جانت مريضه وبيها كل العلل
بس موتها كان مفاجئ نامت بليل الصبح اجيت اكعدها ما تكعد
هذا كان اول انهيار اتعرضله بحياتي
شلون امي تموت وتعوفنا شلون راح اكدر بدونها
وهاي المسكينه شلون
المسؤليه كلها صارت براسي
بقيت فتره بعد وفاة امي احس نفسي ضايعه ومااعرف اتصرف احس الحمل عليه هواي مااكدرله
البنات بلمستشفى اجن عليه حتى يشجعني ارجع للدوام
كنت افكر بيداء شلون راح تبقى بلبيت وحدها
رحت على جوارينا ام عمار
وطلبت منها تخليها يمها الحد ماارجع من الدوام
المره ماعدها ولد عدها اربع بنات وزوجها عسكري
وافقت ام عمار
هم اختي مودبه ومرتبه بس مايفهمون كلامها
كلامها محد يفهمه غيري لان اني الي ربيتها افهم كلامها
جمانه السعيدي
بقت عدهم فتره بعدين كامت تبجي
تكول ابوهم يباوع عليه تضوج منه
تكول يكول عليه هاي حلوه يكرص خدودي ويبقى يباوع عليه
كالت اني ابقى بلبيت وحدي لا تخافين عليه
كمت من اطلع أفصخ القنينه من الطباخ اخاف عليها
اطفي الكهرباء الزايده
احضرلها اكل وحلويات اشغل التلفزيزن تبقى بلبيت
من ارجع الكاها تباوع تلفزيون وابد ماموصخه ولا مخربه شي بوقتها كان عمرها ١٥ سنه
اما اني اتفقت ويا صديقاتي اخذ شفت النهار وبس لان مااكدر اعوف اختي تبات وحدها بلبيت ولا أكدر أأمن عليها يم احد
البنات كانن مقدرات وضعي ويساعدني
لان شايفاتها ويعرفنها
قبل اعوفها يم امي بس هسه مااكدر اعوفها وحدها
مااكذب عليكم بليل اخاف لان احنا وحدنا بلبيت
صح احنا فقره وماعدنا شي يسوه ينباك بس ولد الحرام ينخاف منهم
كنت من المغرب اقفل البيبان كلها
واخلي وراهن ثكل وارجع اقفل الغرفه علينا
ومااخلي ايه قرانيه مااقراها
بوقتها كنا انام من وقت لان اني تعبانه طول النهار
بس اخلي راسي على المخده اغفى من التعب
استمرينا الوضع خمس سنوات بعد وفاة امي
اني الام والاب واني المسوله عن اختي وعن المعيشه
كنت اتمنى يتقدملي احد وازوج حالي حال البنات
صار عمري ٢٨ سنه تعبت اريد واحد انسند علي
مو علمود الماده ابد
لان عدنا راتب ابوي وراتبي ورب العالمين ساتره علينا
بس حتى انام بليل واني مطمنه
انام واني ماكو بكلبي خوف
حتى بلنهار من اعوف اختي وحدها اخاف عليها
لان اغلب الناس بمنطقتنا يعرفون هي تبقى وحدها بلبيت
وبالاخير اني كانسانه احتاج ازوج واستقر ويكون عندي اطفال حالي حال البنات
ميخالف يكون فقير جبير بلعمر بس اسمه رجال فوك راسنا
كان هذا الموضوع شاغل تفكيري
شلون ياربي اكعد ادلل بنفسي
منين اجيب واحد يزوجني ويرضا بهذا وضعي
اريد واحد يكعد وياي بيتي
ويتقبلني اني واختي
واني مستعده اقبل باي واحد
من ماتت امي واني افكر بهذا الموضوع
اريد ازوج واسقر
من اشوف صديقاتي ولي بعمري كلهن ازوجن وصارن ام فلان وام علان
انقهر واكول اني شبي حضي
لا اهل لا رجل لا اطفال مثل البنات
الحد ماوصلت العمر ٢٨ سنه
بيوم حاره كلش من رجعت من المستشفى رحت اسوكت
للبيت شايله العلاليك اريد اوصل للخط واصعد
واني امشي رجلي التوت وكعت بلشارع
اكو واحد عامل واكف شاب ملابسه مال عمال
راسا اجا عليه
خالد....الله الله تاذيتي
لم العلاليك انطاني ايده وكفني
بس شنو رجلي موتتني مااكدر اوكف
وكفت على رجل وحده وملابسي اتوصخن شصار بيه
خالد...سلامات رجلج توجعج
.هناء......اي ولله توجعني
خالد ...اخذج للمستشفى
هناء.. تسلم بس اريد تكسي لان بعد مو مال خط
خالد...هسه دقيقه
بقا واكف وياي اجرلي تكسي وصعد العلاليك
خالد.. اذا ماعندج أجره ادفعلج
هناء.. لا تسلم عندي خير من الله
الولد ماكان حلو شكله كلش عادي
بس اني الي ماكنت عاديه كلامه الحلوه واهتمامه بيه
خلاني ابقى افكر بي
واتخيل نرجع نلتقي مره ثانيه
وممكن يتقدملي ونزوج
راسا انكطع تفكير بصوت السايق
السايق كال بهذا لشارع بيتكم
هناء. كتله اااي ذاك الباب الازرك
بس ممكن تنزلي العلاليك لان رجلي توجعني
نزل السايق ونزلي العلاليك
دخلت اعرج على رجل وحده
لان اني ممرضه واعرف كلشي عن الطب
جبت مي ثلج بارد بشكل وخليت بي رجليه ثنيبنه
اذا اخلي بس رجل الي توجعني حرارة جسمي
تتخربط
لازم ثنيينهن شكد جان المي بارد
بس ماحسيت بي لان بقا عقلي يم خالد
شيصير لو يجمعنا القدر مره ثانيه
ونكون البعض يمكن هذا الحلم هواي عليه
يعني ياالاهي لا اني حلوه ولا غنيه ولا شهاده بيه حظ مثل البنات ولا رجل
عاد رجل ازوج واعيش احساس الامومه
حالي حال البنات
