رواية ناديه الفصل الخامس 5 بقلم انين الليل

من اجه عباس من اهل مرته بعد اربعينية ابوها وراح حتى يجيبها لكن شفته رجع ابحده ومبين علي التعب 

دخل الغرفته غسل وبدل واجه يمي سالته = وين مرتك وليش ما اجت وياك 

هو بتعب وبتردد كال // هي تعبانه وخليتها اهناك ترتاح يم اهلها

بيني وبين نفسي عرفت مووهذا السبب وتفاجات من تصرف مياده لان اتذكر قبل وفاة ابوها من نكللها امشي روحي 

الاهلج بالقدره توافق وتبقى يومين وتخابر عباس تكله ضايجه لو مشتاقتلك هسه اكثر من اربعين يوم وما تجي

ثاني يوم عباس راح للدوام ومناك يروح للمحل وصار ما يجي اله بالليل يسلم عليه وينطينه المصرف ويروح الغرفته

 ينام حتى اكل بس الريوك وانا اجبره ياكل شويه وبسرعه يكوم يتحاشى الكلام وياي 

ومن يجي بالليل يكول متعشي بره وياخذ التلفون الارضي الغرفته اعرف يخابر بيها ملابسه بالگوه ينطيهن السلوى

 تغسلهن اله انا كلش اتضايكت وانا اشوف ابني مقهور وضايج والسالفه موسالفة تعب اكيد اكو شي

وره عشر تيام الصبح من راح عباس واجه هادي يتريك من راد يطلع لحكته الباب الحوش وكتله 

==هادي يمه عندك تلفون منذر عديل اخوك 

اي يمه عندي لويش 

==انطيني ايا اريد اخابره واستفسر منه على مرت اخوك 

يمه ماكو شي مو كال تعبانه وهو عافها يم اهلها 

==لا يمه عباس ما اله خلك اريد افتهم

هادي // يمه انا اخابر منذر وافتهم منه اعرف اشلون احجي ويا 

==زين اعتمد عليك كل شي تعرف وما اريد احد يدري 

شقصدج احجي الافراح 

== ما طول هيج كلت تحجي وما تلزم السانك

ضحك // هههههه (باس راسي وطلع )ومن رجع وره الظهر اتغدا ودخل الغرفته وانا على نار بالليل اجه يمي انا 

رحت للديوان وهو اجه وراي كتله ==ما يصير اله تنطي الموجز الافراح وانا گاعده على نار ها خابرت منذر 

باوعلي//دومج ظالمتني 

==هسه فهمني 

اي خابرته 

==زين وشفتهمت منه 

يمه الي افتهمته مياده تريد بيت عزال 

انا بتعجب ==هاا هيج

هز راسه// اي وكايلتله اذا مو بيت ابحدي ما ارجع 

==هم عرفت ليش تريد تعزل 

اي منذر يگول تگل الاهلها اعيالي خوش ناس ومدلليني بس انا ما جاي اخذ راحتي بالبيت 

ومن سالت منذر شلون يعني 

گللي 

مياده تكول ما اكدر البس الشي اليعجبني وما اكدر اخلي مكياج وكل شي محسوب عليه وانا اريد اعيش 

واتونس انا ورجلي

انا جريت حسره وكتله ==يصير خير (بعدين باوعتله وكلت )

==خو منذر ما راح يكلهم على مخابرتك 

لا يمه حلفته وكلي ما راح اكول 

==زين لعد باجر ان شاء الله وره الظهر من ترجع نروح البيت اهل مرت اخوك 

حك خده // ها يمه اي صار بس شنكول وين رايحين 

==البيت خالك منير 

لملم حلگه // هاي هي افراح تلز 

==لا نكول خابرنه سراج ويكول ابوي تعبان وانا رايح اشوفه ليله ونرجع

يمه عباس يخابر سراج 

==ماعليك هسه اخابره السراج وافهمه وانا باجر الظهر ياالله اكول ومن تجي تتفاجا وتكلي امشي اخذج 

هادي بضحك //والله مفكره لو تشتغلين محقق بالجنايات چان ولا مجرم انلزم 

==انجب هادي واسكت 

هادي كلي بضحك //صار ياست الحبايب بس گرگشي جيبج تره ولا فلس 

==دومك تبچي بوجه الله 

هادي //ها يمه منيلي من الافلاس مال الراتب ما يكفي يومين

==والله صحيح ما يكفي بس انت درهم ما تصرف لا ع البيت ولا على جهالك ومرتك اتعس منك وادري بيك من 

تروح ايفاد للمحافظات شگد تحصل من الفلاح ياالله تنطي الموافقه ولو انا ما اقبل تسوي هيج بس حچيت او لا 

ما تسمع كلامي ولك الزم ايدك النفسك 

- يمه منيلي خو اذا عزل عباس بعد يصير حسره علينه الفلس 

=. شنو حسره علينه اسكت وباچر نروح ويصير خير

وطلع هادي وانا خابرت سراج رد عليه موفق سلمت علي كتله صيحلي سراج كلي //عمه بالدوام ما جاي 

==اهو نسيت صيحلي ابوك 

واجاني منير وفهمته منير كلي 

ها منيره تذكرين من كتلج لا تستعجلين خلي نسال ونتاكد 

==شمدريني ابو سراج الولد رادها

كح // هم صحيح انا راح اوصيهم اذا عباس يخابر يكلوله انتي يمنا ولو ادري ولا راح يخابر 

ثاني يوم الظهر قبل لا يجي هادي سالتني سلوى //ماما اشبيج 

انا جاوبتها ==خالج منير تعبان 

ياا ماما اسم الله منو كلج 

==خابرتني مرته وكالت البارحه اتخربط واخذوا للمستشفى ومن شافتني خفت علي وصرت ابجي كلتلي ما بي شي

افراح // خاله ان شاء الله مابي شي لا تفاولين علي مو زين 

==خاله ادري بي تعبان لان من كتلها اريد احجي ويا هي ارتبكت وكالت نايم وبعدين انكطع الخط 

اجه هادي وافراح كالتله اكيد هو طلع وسالني// صدك يمه خالي مريض 

==اي صدك وانا اريد اروح اشوفه 

يمته ترحين 

==هسه هادي ما ابقى هسه اروح

افراح //خاله ابقي للصبح وانا اروح وياج 

سلوى // ليش انتي ترحين خو انا اروح اشوف خالي 

هادي باوع الهن اثنينهن وكال //وين وين رايحات شنو ما تسمعن الرجال مريض انتي يمه مصره هسه ترحين

لو غبشه احسن 

==هاا بكيفك 

يمه باجر الفحر ان شاء الله نصلي ونروح نشوف خالي ونرجع

افراح //والكليه 

يوم ما راح اياثر

افراح //يومين هادي يومين 

هز راسه //اي مو مشكله

ثاني يوم الفجر صلينه وطلعنه حتى قبل لا يكعد عباس ورحنا وصلنه قريب الساعه بالعشره الصبح او اكثر دكينه الباب فتحته النه مرت اخوها الي رحبت بينه هادي دخل للديوانيه وانا ودتني البنيه للهول واجت امها لازمه عده اتسالمنه وهي صارت تبجي على زوجها وانا اصبر بيها البنيه جابت ماي وبعدين جابت ريوك انا شربت بس چاي وسالت على مياده

امها گالت //نايمه تعبانه من الحمل 

جاوبتها = الله يساعدها 

وباوعت الچنتهم وكتلها = خاله بلا زحمه عليج اندهيها 

اي صار تدللين

شويه واجت لابسه دشداشه سوده قصيره ونص ردن رغم الدنيا بارده سلمت عليه ابرود وتباوسنه 

باوعت الها كتلها== اشلونه البيبي 

اووي ماذيني ما يخليني انام 

==ما رحتي للسونار شفتي ولد بنيه

لا ما احب اخرب المفاجاه الي يجي من الله حيا الله 

=والنعم باالله

(بهاي الاثناء اندك الباب وشفت اختها مرت منذر جايه وسلمت عليه اما هادي فاجه اخوها حليم 

وكعد يمه والولد هم اجه وسلم باوعت الها وكلت )

==خاله مياده ياالله لمي غراضج وخلينه وره الغدا نروح 

هي باوعتلي باستغراب //وين نروح ؟

==البيتنا غير ؟

هي تهز برجلها //شنو خاله عباس ما كالج ؟

==اي كلي تعبانه وخليتها ترتاح يم اهلها وهناك عدنا هم ترتاحين رجلج بحاجتج كاتلته الوحاشه عليج

هي جاوبت //لا خاله مو بس تعبانه انا فهمته ما الي رجعه اله بيت ابحدي 

==هاا تردين تعزلين 

اي خاله حقي 

==بس احنه مو ذولاك العيال الهواي كلنه اربع نفرات 

الام //والله صحيح هي هم تكول بس هذا حقها ام عباس 

==ليش شنو سامعه منو ماذيها 

مياده// محد ماذيتي انا اريد البس براحتي وانام واكعد يمته ما يعجبني واريد اخلي مكياج وعطر وبسبب وجود 

هادي كل هاي ما اكدر اسويهن وانا من حقي اعيش حياتي

==بس خاله اذا على هادي يطلع وانتي بعدج نايمه ويجي الظهر ينام ويطلع لو يبقى هالايام بغرفته يدرس يعني 

محد مضايقج 

هي بقت ساكته ما جاوبت رديت عليها 

==ياالله خاله مياده امشي عباس ضايج بدونج 

هزت راسها // لا خاله ما اروح اعذريني 

==امشي وهناك نشوف الكم حل 

- - لا ما اروح انا اتفاهمت ويه عبوسي يكمل البيت وارجع ويا

استغزبت جوابها ==شنو يكمل البيت ؟

هزت راسها // اي خاله مو عباس اجر. بيت صار اسبوع وبي شغلات بسيطه يكملهن ويجي ياخذني شنو ما كالج 

==لا والله ما كالي يجوز نسى مي خالف ماما ارجعي وياي وهناك بس يكمل البيت شيلو بي 

هزت ايدها //لا خاله ما ارجع اله بيتي ابحدي هذا اخر كلام 

باوعت الامها كتلها== شنو ام حليم ما تحجين 

والله يا اختي هي وزوجها ما اتدخل بيهم

انا رديت ==اي بس اشوف جنتج عدها تلث جهال وهم وياهه اثنين حموين وهاي رغد بتج هم ويه عيالها 

شمعنى بس مياده وبهذا الوكت 

هي عكفت حاجبها //خاله شتقصدين بهذا الوكت 

==اقصد من ابوج اتوفى صرتي تجين وتبقين قبل نتوسل بيج ترحين الاهلج وانتي ما تقبلين 

ام عدي. //شتقصدين ام عباس 

==اقصد كبل ايجوز ابوها ما يرضى هيج تسوي وتتامر وهسه من اتوفى محد صار بعينها

باوعتلي وهي تتحداني /: خاله لا تعبين نفسج ما ارجع اله بيتي ابحدي لعد انسى من كونتي عليه على مود مرت 

هادي لو هادي لمن اجه يعيط 

جاوبتها =وانتي هم ما قصرتي ماكو يوم حسستينا انتي چنه 

مياده //اي مو انتم تردولكم خدامه مو كافي رجلي من هو عمره عشر سنين وهو يشتغل ويكد عليكم حتى 

ما كمل دراسه مثل باقي ولدج والهسه تاكلون من كده ولا حمدا ولا شكورا

==صحيح خاله كل الي تكولينه صحيح بس هم شفتي كلنه نحترم عباس اخو ما يفك حلكه ويا وكلنه شيگول

نگله صار وانتي دللناج عدنا هو بصفحه واحنا ما قصرنا وياج

- وانتو ما قصرتو تتامرون هذا زين وذاك لا وانا ما يعجبني هيج شي فلا اتعبين نفسج ما ارجع

==مو احنه من اجينه وخطبناج هاي امج وهاي اختج كالت كل شي تعرفين تاليتها چاي ما تعرفين تخدرين 

باالله من تاخذين ابني وتطلعين شتوكلينه 

خلت رجل على رجل وكالت //المطاعم موجوده 

جاوبتها =صحيح مثل ما تكولين( باوعت للبنيه الزغيره بت ابنهم كتلها) 

=روحي كلي الهادي خلي نمشي

الام/: لا ما مقبوله منج ام عباس تطلعين وكت الغدا 

=مشكوره حبيبتي على كولة بتج المطاعم هواي 

- هاي شنو ام عباس گولي زعلتي من كلامها 

=اذا ازعل ازعل عليچ انتي امها الي تحچي گدامچ وما تسكتينها من رخصتكم 

اخوها ما قبل وكلي: /خاله ما يصير تطلعون هسه قليله بحقنا

لكن انا اصريت الي شفته امها واختها ومرت اخوها لزمن بيه بس هي حتى ما كالت ابقي طلعنه وانا ميته 

من القهر ورحنا نزلنه بمطعم بنفس ولايتهم وهناك سولفت الهادي كل شي لان هادي ما كايل الاخوها انو جايين 

حتى نرجعها كايله جنا ابيت خالي ومرينه عليكم 

من سمع هادي الي صار كال // چا شكد ادب سزز وكله مني انا ورطت اخوي بيها

==لا انت شعليك هو قسمته من البدايه ما ادري شلونها 

هاي طلعت شكد جسره وحقيره 

==واخوك الي ماجر بيت بدون ما يكول 

يمه كله منها وهاي مبين راح اتأذي عباس 

==اعرف راح اتعبه الله كريم ربك يحلها

ورجعنا للبصره وصلنه وره المغرب بشويه وسط ذهول سلوى وافراح يمته وصلنه البغداد ويمته رجعنه 

انا توضيت وصليت وهادي راح الغرفته وسلوى صبت العشا كعدنا ناكل واجه عباس من وكت عرفنا هي 

مخابرته سلم ردينا سلوى كلتله 

اكعد اتعشى خويه ويانه 

عباس// لا اكلت بالمحل 

باوعتله وما حجيت وهو بقى گاعد ما راح الغرفته من شالن الصينيه كتلهن جيبن جاي وتعالن 

جابت افراح الجاي وانا باوعت العباس وكتله 

==ليش تاجر بيت بيتنا چبير واخذ منه غرفتين وطلعلك باب وابنيلك سياج

هو ما جاوب كتله= ليش ما تحجي مو عيب يا ابني ياعزوتي تاجر بيت وتخليني اسمع من ناس غربه ما اسمع منك 

عباس رد عليه //يمه اهل مياده مو غربه ذوله اهل مرتي 

جاوبته بنتر =بس بالنسبه الي غربه اسمع من عدهم الي بينا وبينهم خمس محافظات وانا يمك بنفس البيت ما ادري 

مو عيب زغرت امك ما تستحي

اتقرب مني راد يبوس راسي انا وخرته عني كتله= مع الاسف بعتني برخيص حرامات والله

انا رحت الغرفتي وانا العبره خانكتني واجت وراي سلوى

 هادي ومرته راحو الغرفتهم شويه واندك الباب اجه عباس هو وهادي وكعدوا يمي عباس كلي 

- يمه الله يخليج لاتزعلين عليه ادري من اكلج ع البيت ما تقبلين وانا ...

قاطعته = انت شنو 

بقى ساكت ما جاوبني كتله =انا اكلك انت شنو انت ما تكدر تزعل ست الحسن بس مي خالف تزعل امك والله مع 

الاسف عليك 

عباس //يمه البنيه ما طلبت غير حقها

جاوبته =شو من خطبناها اهلها بس اخذوها تداريج وتشيل البيت وكل شي تعرف 

عباس تحسر //يمه وانا اكدر ااجر بيت لا واكدر اشتري انا عندي خيرمن الله 

شفت ابني مصر =اي اشتري احسن اقلها نكول بيتك وردت تتوسع مو عايف بيت ابوك شكبره ورايح اتاجر 

عباس// يمه والله اذا ما تقبلين عليه ما اتوفق وما ارجع مياده

جاوبته باستهزاء=ولك انت صار عشر تيام اكل ما تاكل ويانه وما تسولف انوب ما ترجعها لو تطلكها تهيم على 

وجهك اذا ما تقترف بينه جريمه 

هادي //يمه مي خالف خلي يطلع 

انا بنتر =شنو يطلع ناسي هو شرطي وعلي خفارات شلون تبقى ابحدها مره حمره صفره 

عباس //لايمه شنو تبقى ابحدها تجي اهنا تبات وغصبن ما عليها وبالنهار ياسر وعمار يمها بس هي يمه خابرتني 

كالت خالتي طلعت زعلانه انا ابالي ارجع بس حبييت اتدلل عليها وانتي ما قابله تبقين ع الغدا تكليلهم المطاعم هواي

عرفت هاي شكد حياله وانا بايدي جبت الابني عكرب رمل

جريت نفس = يعني انت ماجر ومكمل وجاي تعدل بي وانا اخر من يعلم وما تريدني ازعل 

عباس //ادري بيج ما تقبلين اعزل 

==ها يعني خليتني امام الامر الواقع عليش جاي تشورني لو تاخذ موافقتي 

هو اتقرب عليه وباس راسي //يمه انتي بكيفج الي تردينه اسوي 

جاوبته بحركه =كل شي جنت اتصور بس تروح واتاجر بيت وانا ما ادري ما اتوقعتها منك ياابني ياجبيري يا 

عزوتي واعرف هذا تدبيرها انت ما تفارگني لو تفارك اخوك بس هي ...

اتحسرت وهو بقى مدنك وساكت كتله 

==هذا بيت ابوك شكبره اقسمه وطلعلك باب خارجي ومن اموت كل واحد وين ما يريد يروح خلي يروح 

جاوبني //يمه عمرج طويل بس مياده تكول خالتي ما يصفى كلبها مني خلي ااجر شهرين تلاثه وبعدين نرجع 

==صار الحچي بيد مياده ما شفنا الخير

سكتت وانا كاتلني القهر على ابني واشوفه شلون محتار بيني وبين مرته وافقت وانا اعرف فتحت على نفسي باب 

من المشاكل ويمكن الضياع 

سالتها ---ليش بيبي 

=لان مرت هادي من سمعت بدت تخبث من جوه ليجوه 

--هم رادت تعزل 

=اي جا شلون 

--بس بيبي هم حقها 

==ما كلت شي لو عايله جبيره مي خالف بس البيت بقى الهادي لان سلوى هم راح يجي نصيبها وهي بالاساس 

تدرس ومن ترجع تشتغل وتقرا وانا بالبيت افتر واساعد بالشغل

—شنو سوت افراح 

=النهار كله تدردم وتحجي وتسب وتكتل ابجهالها ومن اروح افكهم تكلي ولدي وبكيفي محد اله شغل بيهم 

اما شغلها بس العجن والخبز مره باليوم وايام تخبز مال يومين وتبقى كاعده التنظيف والمواعين على سلوى وانا اطبخ

صرت ابيتي مثل الغريبه جنت اكضي وكتي اطبخ والعصر اروح على الجده مريم لو على بسيمه او حتى على لولوه 

وحتى هادي ما صار يكعد يمي انا وسلوى 

وعباس يجي بس ينطي المصرف ويروح

ومن كمل تعديلات البيت جاب سياره واخذ اثاثه وراح وبعدين عرفت هو رايح وجايبها من اهلها انا ما سالته 

عن شي لان بصراحه جنت مصدومه من الي سووا 

واجه عباس وعزمنا ع الغدا انا ما وافقت اروح بس سلوى كلتله نجي ان شاء الله سلوى گالت 

- ماما لا تكسرين خاطر عباس ما تشوفينه شگد ضايج لان يعرف بيج ما قابله

ورحنا عرفت الغدا من المطعم وهي طايره من الفرح تلكتنا وباوستني كتلها 

= المفروض انتي تجيني وتوكعين عليه لان ما احترمتي جيتي الج وفشلتيني گدام اهلج انا اجيت 

لان ما احب ابني يشيل بخاطره عليه ويضوج

هي بس ضحكت وانا اشوف الذهب واللبس والمكياج واشوف عباس متفاجئ بكلامي الها وهي ما عقبت 

وراحت سلوى تحضر وياها الغدا اما افراح فكعدت وهي متنكه وبس تباوع بعيونها وتريد تنفجر من رجعت 

عرفت من سلوى هو مشتري طباخ وثلاجه جدد وكاونتر للمطبخ وفراشات

اتمنيتله السعاده والراحه وهي بس مره او مرتين اجت باتت عدنا تجي المغرب وتروح الصبح وبالنهار صار يروح 

يمها ياسر وعمار وبعدين بطلو وعباس ما حجى لان ما صارو يرحون 

وافراح حتى العجن والخبز بطلته صرنا نشتري خبز وصمون رغم قلة الافران بذاك الوكت بسبب الحصار

دخلت مياده بالشهر التاسع وصارت كل اسبوع تراجع هو ياخذها او انا ومرات تروح وياها سلوى وياخذون ياسر 

ابن هادي

لمن ما اجه موعد ولادتها خابرتني رحت كلت خلي انوديها للجده لكن هي ما قبلت واخذناها للمستشفى وانا وافراح 

وياها وعباس واكف ويدعي وبيومها اجه سراج جان جاي يشوفنا ولحگنا للمستشفى وبس وصل انتي صرتي وكانما 

ترحبين بي جابتج الممرضه وانطتج السراج الي شالج وصار يبوس بخدج ويكول اتخبل شنو ملك من الملائكه انوب 

حتى ما خلاني اشيلج كله بحضنه

ابوج چان خايف على امج اكثر من ما فرحان بيج سراج اول واحد شافج وباسج واذن باذنج وانتي تلقائيا باوعتيله 

وهو يكول ::عمه ابتسمتلي يعني عشكتني بعد هاي خطيبتي محد يفوت عليها 

انا كتله =شبيها تاخذلها شايب 

سراج ::شوفي عمه اخذها واخذها ومحد ياخذها غيري اكلكم شنسميها 

عباس رجع باوع السراج وكال/: انت سميها مو خطبتها اسمها عليك

رحنا للغرفه انا وافراح ولحكونه عباس وسراج الي گال 

::عمه انتي وافراح وهسه امها تره بت عباس الي محد يفوت عليها انا مسؤول عنها والعب جوله اذا صارت الغيري 

احنه ضحكنا وهو اتحمد السلامه الامج واجت السستر وكالت //الحمد لله على سلامة الحلوه الجابت كمر 

سراج شال فلوس وانطاها وگلها ::هاي السلامة امريتي وياشر عليج 

سراج كال ::عباس تتذكر البنيه المسيحيه كرايب القابله 

اي اتذكر هي تنسي بت اللذين

انا كتلهم =منو هاي 

عباس /:يمه كرايب جده مريم يمكن بت اختها 

سراج:: عمه من جانت تجي نرابط يم البيت ومن تطلع نبقى وراها وشكد تعاركنا لان الشباب يباعولها ويصجمون 

بيها ومن يومها قررنا انا وابنج هذا الخوينس التجي ابنيه من عدنا نسميها على اسمها وعباس اجته وبما انه هاي الحلوه 

اعتبارا من هاليوم خطيبتي راح اسميها (ناديه )

مياده بدلاعه وتعب //اوو سراج منو هالوكت يسمي ناديه 

هو بضحك :: انا وما عليكم هي مرتي وبكيفي 

واجت الدكتوره وقررت ساعتين وتطلع وسراج راح سأله عباس

- وين رايح 

:: اروح اجيب نيشان ناديه 

- اكيد راح تضحك علينه بغدوه انت سويها وشوف منو ينطيها الك 

سراج يضحك ::اخذها وعيونك تشوف عود لاتنطيها الي

وطلعنه البيتنا واشوف مياده متثاقله لكن عباس كلها امي تكول خليها للسابع وبعدين نروح البيتنا واجه سراج 

جايب غدا اشكال واجه هادي وهو فرحان وگال 

ناديه الياسر 

عباس گله //اخذ الثانيه انحجزت 

هادي //منو حجزها ياسر ابن عمها وياخذها 

سراج ::وانا ابن خالها واخذها غصبن على اليرضى والما يرضى

هادي //ما طوول الك سراج اخذها تمون ع الكل 

==اي والله سراج تمون بس من تكبر ناديه انت شايب 

هادي //لا يمه خلي ياخذها ويموت هي تستارثه وانا اخذها الابني 

سراج //هادي تفكيرك مال يهود شگد طماع

افراح وسلوى صبن الغدا واخذوا المياده ابحدها وسراج طلع من جيبه سوارات ذهب مال اطفال وتراجي كالي 

::عمه هذا نيشان ناديه 

--بييي يعني هذني التراجي عمو سراج اشتراهن 

منيره بحسره =اي بيبي والسوارات ويه الراح 

 وره السابعه اخذتج ورحت ويه اهلج بقيت هناك امج بس تكعد ترضعج وانا كل شي اسويلج بقيت لمن صار عمرج

 عشرين يووم رجعت البيتي لان شفت امج متثاقله من وجودي وهم اجت امها واختها فما صار الي لزوم 

وره شهرين اجه عباس وكلي //يمه مياده حامل

ومن يومها وانا وسلوى يوميه وحده تروح تبات وثاني يوم نتبادل هي بحجة تتنسى نروح نطبخ وانظف وحتى 

ملابس نغسل وانتي شمرتج ما الها شغل بيج وانا اسوي ممات وارضعج من هدات نساوتها احنه رجعنا لان 

مياده صار وجهه ثكيل ومن رجعت للبيت انا جبتج وياي خليتج عندي وهي ما حجت بالعكس كلتلي

- اخذيها ما اكدر الها الحمل متعبني 

ورجعت البيتي وانتي وياي ومن اجيتي جبتي الخير كله بجيتج 

--شلون يعني انا جبت الخير اشو (واتحسرت)كله تسميني الفكر 

=لا حبيبتي شهرين ابوج اشترى سياره والمحل انملى بضاعه يصرفها ابوج باسبوع ويجيب غيرها

وصرنا نسمع يوميه واحد من اهلها جاي وعباس من يجي من الدوام ياخذهم يونسهم واذا عنده واجب ينطي 

السياره الواحد من اخوانها

مره اجاني عباس وكال //يمه امشي تغدي عمتي جايه تشوف مياده 

جاوبته =لا يمه ذاك اليوم من اجت رحت وتغديت مو كل مره 

- ليش يمه قابل رايحه البيت غريب بيت ابنچ امشي كدام اهل مرتي يشوفون امي ما تاركتنا 

=وانا ما تاركتكم هاي ندوش عدي بس يا ابني بت وامها يمكن عدهن سالفه حجوه ما يحبن اسمعها عيب اروح اصير ثكيله 

عباس باستفهام //منو يكول سامعه شي !!

=عباس لا تسوي مشكله بس انا ما احب اروح والخاطرك اعزمهم ع العشا ا

- اهنا 

=اي اهنا ابيت ابوك شنو بيتنا مو كد المقام 

بلع ريگه //لا يمه بس انتي تعبانه وملتهيه بناديه وسلوى تقرا 

=وهم مرتك حامل وما بيها تطبخ 

شفته متردد كتله =انا راح اخابرهم واعزمهم 

- زين يمه وانا راح اجيب العشا من المطعم 

=لا عباس انا وافراح نطبخ 

- يمه انتي خابريهن وانا اجيب جاهز

وخابرتهن واجت مياده وامها واختها وابن اخوها جان عليها خامس ولابسه ملابس جديده وذهب بايديها وشعرها

 ولادي من تطلع تخلي الشال اسقاط واجب كعدت وصارت تحمد بعباس وتگول

- - تدرين عمه عباس هو يخابر امي ويكلها تعالي بتكسي من البيت للبيت 

عليه ومن ترجع نفس الشي وكله يجيبه من المطعم جاهز ما يقبل اتعب 

وهيجي جابلي وهيجي حطالي 

امها تكلي// تعبناج ام عباس والله انا ما اشتهي بس جايه اشوفج

اجه عباس وجاب علاليك العشا والفاكهه وما ناسي شي هي شافته

وهي انكلب لونها انا كلت 

=عباس ما قبل اطبخ كلي ما اريد اتعبج اتصوري خيه ام حليم هو دووم هيج ومن يجينه خطار كله يجيبه جاهز 

ام حليم //الله يطول عمره 

=اي والله الله يطول عمره ويخلي

شفت الانزعاج على وجه مياده وحتى ما اتعشت وبس كملوا عشا كالت خلي نروح واتحججت هي تعبانه من الحمل 

انا كلت الامها 

=علوا تبقين يمها ومن تجيب هالمره انتي وياها لان انا مثل ما تشوفين عندي ندو وافراح حامل وسلوى تدرس 

امها جاوتني بامتعاض//ان شالله

واهلها كله عدها الى ان دخلت بالشهر التاسع بعد ما سمعت احد اجاهم وصار موعد ولادتها وامها ولا اجت 

واجاني عباس واخذني ورحت وياها للمستشفى وصارت اختج فرحنا ولو جنت اتمنى ولد ويشيل اسمه بس الحمد لله 

ما صار الولد او صار وما جان من نصيبه وهالمره كالت العباس

انا اسميها لو ابقى عليك تسميها من هاي اسماء جديتيي انا راح اسميها حنين

وهم بقينا وياها وهي ما مهتمه بيج وحتى بحنين بس ترضعها والباقي انا او عمتج سلوى 

وفد يوم جان عمر حنين اربع تشهر وانتي صرتي تمشين اجه هادي وكلي 

يمه هم تدرين عباس اشترى بيت ابو وصفي الكردي 

انا اتفاجات كتله= منو عباس ؟

 هادي //اي يمه عباس ما شاء الله سياره ومحل وهسه اشترى بيت

رديت علي رغم مقهوره =اي هادي من شغله اشترى احسنله بدل الايجار الي كل راس شهر يدفعه 

هادي يلملم بحلگه // هااا يعني انتي قابله 

=اي ليش لا 

وانا يمه 

=انت شبيك 

انا هم حالي من حال عباس اريد بيت ابحدي 

=هذا بيتك ابو ياسر

هادي هز راسه //لا حجيه اريد بيت بيت الي ابحدي هم من حقي يصير عدي بيت باسمي واخذ راحتي بي وهم 

مرتي من حقها ترتاح 

جاوبته =الي يسمعك يكول اخوانك الي ما متزوجين خمسه واخواتك اربعه اشو بطركي انا وسلوى والبيت ما شاء الله جبير 

هادي //يمه اريد بيت باسمي الي ابحدي 

=شقصدك هادي 

قصدي هذا البيت ينباع ويتقسم علينه 

=تحجي صدك ابو ياسر

هز راسه //اي احجي صدك بيت ابونا ولازم كل واحد ياخذ حقه بشرع الله وحتى 

من حجيت ويه عباس هو رحب بالفكره لان كال اريد ابني البيت محتاج فلوس

ماخلاني احجي راح الغرفته وانا بقيت افكر وانا مذهوله يعني هلكد انا ثكيله على اولادي بحيث يتصرفون بكيفهم 

بدون ما يشوروني وبالاخير يردون يبيعون البيت البيت الي لامنه وساترنه بهالسهوله

وهذا عباس مياده جاي تلعب علي وهو دايخ وياها لو افراح الطلعت مو هينه الله العليم شماليه راسه نمت وثاني 

يوم كعدت صليت الفجر ورحت سويت ريوك هادي طلع ما مر عليه وقبلها مرته اخذتله ريوك للغرفه 

الظهر كملت الطبخ وبس اجت سلوى كتلها =صبي غدا الي والج والناديه

سلوى سالتني// ليش ما ننتظر هادي 

=لا هادي من يجي ياكل بغرفته

هي ما جاوبت وصبينا الغدا واتغدينا ونمنا وحسيت بهادي اجه وما 

مر عليه اتيقنت من شي لكن ردت اتاكد قبل المغرب اتصلت بعباس 

كتله =تعال جيب مرتك واتعشى يمنا رايدتك 

هو اتعذر لكن انا كتله =تعال شغله ضروريه تهمك 

هو كلي //ان شالله اجي

وخابرت نوال وكتلها تعالي 

نوال اجت وره نص ساعه لان بيتها قريب وجياتها علينه بس تشوفنا وترجع ما تتاخر 

وراحت نوال هي وسلوى يحضرن بالعشا وره الصلاة اجه عباس هو 

ومياده وحنين لان انتي بالاساس يمي وخليت سلوى تصيح الهادي

 الي اجه هو وافراح وجهالهم وكعدنا نتعشى كلنه وره العشا

سلوى جابت الچاي وصارت تصب نوال كالت //خير يمه دازه علينه 

باوعتلها وجريت نفس وكلت= اي والله عندي حجايه وياكم 

باوعت العباس وكتله= بالخير مشتري بيت 

هو باوع الهادي وگال// يمه ابو وصفي باعه وسعره مناسب وانا كلت احسن ولا اخليهن فلوس

نوال //يا عباس اشتريت بيت ابو وصفي الكردي هذا خرابه 

عباس //اي شويه شويه ابني 

مياده جاوبت //وليش شويه شويه ابني وخلي نكعد بي 

جاوبتها وانا ودي اموتها ==علوا طلعي من مصرج وانطي الرجلج اول وتالي البيت الج والجهالج محد يشاركج بي

مياده /:وانا منيلي تره هاي كدام ابنج كل شي ما ينطيني حسره عليه الفلس 

=مبين بهاي ما جذبتي والخشل واللبس والسفرات مالات اهلج 

وكفت على حيلها واتخوصرت //شنو انتي جاي تعدين عليه شنو ينطيني رجلي

نوال// على كيفج مياده اشو تنترين بوجه امي 

مياده //ما تشوفينها خالتني براسها عبالك كاتله ابوها 

نوال //امي ماكالت شي كالت ساعدي رجلج مو تريدين يبنيلج البيت 

مياده بتحدي تباوعلي وتاشر باصبعها //اي اريده يبني وراح يبني بيعوا هذا البيت وكلمن ياخذ حصته

انا ضليت ارجف واتنفس قوي = ما شاء الله صار الحجي بيد النسوان والزلم ساكته 

افراح //عمه انا ما عليه ماحجيت 

باوعت الافراح =انتي ما تحجين انتي تنطين التعليمات ويجي هادي يكولها وما شاء الله مياده تعرف كل شي 

عدنا وما عدنا 

عباس //يمه وديتي علينه على مود ترزلينه ما بيها شي بيعي البيت وكلمن ياخذ حقه 

انا بصدمه ==ياحق هذا ؟

هادي //ورث ابونا غير

انا انصدمت من عباس الي ما رد مرته وايدها ومن هادي الي دارس كل شي ومخططله ردت اصدمهم 

==بس البيت مو باسم ابوكم البيت باسمي 

همه مستغربين // شنو باسمج

ما جاوبتهم فتحت الكومدي وطلعت ورقة الطابو= هاكم شوفو البيت باسم منو 

هادي كال //يمه وين فلوس ابونا شنو البيت باسمج وشغل ابونا وين 

جاوبته =انا ما كلت البيت اشتريته من حلالي لا انا ساهمت بذهبي ويه ابوكم وهو كال اسجله باسمج للوكت 

هادي وكف على حيله وظل يرجف// يعني شنو ابونا حتى بيت ما كوباسمه لعد شغله وين

افراح// وين يعني اكيد عمتي ظامتهن وهم محل عباس 

جاوبتها =والله زين حاسبتهن ع الفلس 

هادي //يمه مو ترحين وتردين على افراح انا الي اعرفه ابوي عنده فلوس وين فلوسه 

=هاي لازم عمتك نصره من رحت ملت راسك وهالبتها تحسب ورانا 

هادي /يمه شجاب عمتي نصره بالنص

=انا متاكده هي گالتلك بس ما گالتلك على البيت الگاعده بي منواشترا الها 

هادي //هي گالت جدي اشترا الها 

=لا غلطان اواواجهه جدك اشترا بيت الخالتك جميله من طلكها عمك ابراهيم وترم على ابوك يشتري بيت النصره 

ام افراح لان ضاجت من العيال واشترا لان ابوك ما يكسر كلمه الجدك 

عباس //هاا والله ما ندري

  هزيت راسي = لا وبعد ابوكم انطى الابو افراح فلوس واشتروا بستان ومن مات 

ابوكم ابو افراح وعمتكم كالت خليل برانه الذمه عليهن وتالي ابو افراح 

جاب افلاس وكلي هذا حقكم وانا ما اخذتهن تتذكر عباس من رحنا انا وياك (باوعت الافراح )ها افراح احجي لو اسكت

نوال جابتلي ماي لان شافت شفايفي يبسن 

=بقى المحل مال عباس 

هادي// خو هم كولي مو فلوس ابوي 

=لا مو فلوس ابوك ناسي عباس شكده من اشتغل عد خالك لو من باع خالك المحل واشتغل صانع اول ما اجر 

المحل انا انطيته ذهب اربعه وتلاثين مثقال بعدهن عنده مو صحيح عباس وباقي ورثي من بيت ابوي الي دزا خالك منير

هو هز راسه 

باوعت بحنق المياده ==يعني ياست مياده عباس ما يكد علينه من فلوسه يكد من فليسات ذهباتي الي بعتهن 

اله وفلوس ورث بيت ابوي ها عباس صحيح لو لا 

=وهسه واحد يريدني ابيع البيت حتى يبني بيته الي اشترا وانا ما ادري بي 

=والثاني يريدني ابيع البيت لان هو مو وحد هم يريدله بيت ياخذ راحته بي 

=وما شاء الله همه ساكتين ونسوانهم هي التحجي وتحاسب لمن ما اكول عيني ايراد المحل كله يمج تكول ليش 

يمي مو يصرف عليكم وهو يصرف من فلوسي وكدام اهلها تكول هلكده من اشتغل وعيشكم يعني ما ظام عليها شي 

والثاني من صار واتوظف وبعد سنه يصير مهندس ومن چان يروح ايفاد واعرف ما ينطي موافقة حفر بير اله

 يستلم ذيج الحسبه من الفلاح لو ابو البستان واليوم الله هذا ما شفت دينار ما اشتراله قنينة غازوهسه متاكده 

ما ظامله الف دينار والكل حاط عينه ع البيت ينباع وما يدرون البيت باسمي وانا بكيفي اريد ابيعه لا شي راجعلي 

=تانوني اموت وتقاسموا بس قبلها عباس ترجع الذهب لان انت ما صارف علينه فلس احمر من كدك انا شريكه وياك 

يبقالك المحل وترجع الذهب وفلوسي ولا تگول ما عندي الي يشتري بيت وسياره ويخشل مرته اشكال ما تصعب 

علي شكم مثقال وشكم دينار 

شفت بوجهم الفشل والخذلان ونسوانهم وحده تباوع للثانيه بكراهيه كتلهم 

=من شفتكم ما تردوني والحچي صار بكيف النسوان ...

مياده قاطعتني وگالت //والله خاله مو بس انا الحچي بيدي انتي هم ضحكتي على عمي وسجلج البيت باسمج

جاوبتها وانا اباوع العباس =ما ضحكت عيب هذا الكلام وبقيت چنه ما يوم سمعت اعيالي لو كلمه انا لميته 

هاي انتي عباس محل وراتب شنو لميتي شوفي يبين عمره خمسين سنه وهسه انتي تحچين وهو ساكت 

مياده //انتي ليش خاله دوبج من دوبي تره عيب تشوفين ابنج يحبني وتغارين مني عبالك شريچتچ

انا باوعت العباس الي صار يرجف وهادي نظرات الشماته اله وسلوى رادت تحچي بس ما خليتها گتلها 

= انچبي سلوى ل تفكين حلگج 

اهنا عباس لزمها وگطعها واحنا ولا واحد فكها دفعها وطلعها بره وگلها 

بت الكلب باچر اطلكج واوديج الاهلج

من شفت الي صار وشفت افراح تضحك باستهزاء كتلهم 

انا اليوم رحت للحاكم الشرعي 

همه باوعولي مستفسرين 

==باجر خلو البيت عد دلال او اكتبوا علي للبيع بس قبلها انا ما اتنازل اله اخذ الثلث وهذا حقي الشرعي 

والباقي اقسمه عليكم حق ابوكم للذكر مثل حظ الانثيين

////