رواية ناديه الفصل الواحد والخمسون 51 بقلم انين الليل

سراج 

من رجعت انا وعمتي جميله وزهراء البغداد چان ويانه رضا الي ما فارگتي مره انا اسوق ومره رضا چان 

السكوت سيد الموقف واحس بجميله بينها وبين نفسها تبچي وتدندن بكلام ما مفهوم وزهراء تشهك من البچي

 وتحاول ما تسمعنا

اباوع العمتي بالجامه واشوفها شلون ذبلت على ناديه 

ناديه اليتيمه الي ما الها احد والي ما اعرف هسه هي وين

بقيت اسأل نفسي واگول معقوله عمتي جميله تزعل من كرم وانا اعرف شگد هي تحبه لو كرم الي انگلب الف 

درجه من يوم ما اختفت ناديه شفته مو هو كرم العصبي الي كل شي گدامه ايكسره بس بنفس الوكت ابو گلب الطيب

 ودمعته الرخيصه

شفته شلون يتهدد ويعض بايده واصابعه ويغلط ويتهجم على ناديه 

وسمعته شلون يتوعد بس يلگاها يذبحها

لكن الي فاجأني اكثر كرم ليش بهالوكت وبهذا الظرف بالذات ليش زوج ابنه الهديل بت هادي ليش عبالك جاي

 يتشفى بحنين

لو هذا الحقير مرتضى الي قبل على نفسه يتزوج بت هادي بحجة انو من يتزوج حنين الناس راح تعيره 

والي خلاني اتعجب اكثر انت ياهادي قبلت تنطي بتك وبهذا الظرف لو كرم الي حتى ما مانع لو بكلمه انو 

عمتي جميله تروح ويه زهراء الطريق كله وانا اسال بنفسي ليش وليش وليش وبصراحه ما لگيت جواب الاسالتي

يتردد نفس السؤال ابالي :: ناديه انتي وين ويامن رحتي منو هذا الي گلتي علي ابن عمج ورايحه ويا منو هو 

معقوله استغفلتينه وضحكتي علينه ومثلتي البراءه

وصلنه بالليل وقبل ما نوصل البيت زهراء وصيتهن انو ما يجيبن سيره گدام امي او بيت عمي جميل باختفاء ناديه 

رغم انو ولد عمي يدرون لكن انا وصيتهم السالفه تبقى ابيناتنا ومن رحت البيت اهلي وموفق سولفلي هم فهمته ما يجيب

سيره يم امي او زوجته چان بداخلي خوف قوي لان اعرف البنيه اذا انخطفت الف علامه استفهام تكون عليها 

والناس ما ترحم تبقى تتقول وتزيد وتنقص ومحد يرحمها حتى لو مظلومه

وصلت عمتي هي وزهراء البيتها ورحت البيتي والصبح رحت البيت اهلي الي من ادخله اشم بي ريحة ابوي 

وطيبته واتذكر شلون يوصيني وصوته يرن باذاني ويگلي 

— انت دائما راح تبقى مهموم لان ما راسيلك على بر دايخ

وصلت وحضنت امي ومن طلعت طلبت منها تدعيلي ورحت انا ورضا للزياره زرت امير المؤمنين وكان طلبي 

الوحيد اعرف طريق ناديه 

وبعدها رحت للمقبره وهناك گعدت يم صديقي والي يعرف كل اسراري يم ابوي وبچييت حييل وبعدها رحنا الكربلاء 

وزرت ودعيت واحنا بكل منطقه ننزل ونسأل

رجعنا البغداد ونزلت رضا يم بيته وانا رحت البيتي سبحت واتمددت وفتحت الموبايل طلعت صورتها وانا اسأل بيها 

::وين رحتي ما تعرفين شگد اتعب اذا ما اعرف انتي وين 

::ناديه ما معقوله تنهزمين لو شيصير 

::ناديه صيري قويه وارجعي ولا تخافين انا بظهرج 

::انتي هسه وين تعبانه جوعانه وين انتي ندووش لا تكسريني وتكسرين گلبي

يمكن التعب غلبني وبين الصاحي والغافي اجت رساله كل مره ما اهتم ولا اقرا اگول من الشركه لكن من يوم اختفاء 

ناديه صار كل همي الموبايل احس باي لحظه تجيني رساله او اتصال 

فتحت الرساله وشفتها من قريت كلمة عمو گلبي صار مكينه ما سيطرت على نفسي اتوقف بيه الزمن واتذكرتها

 هي لمن شايلها بالمحكمه وهي تناشغ وتگلي

... ... عمو سراج لاتخلي الشرطي يذبح حنين 

لو من اخذتها المياده وصخنت وصارت تصرخ وبعدها فقدت الكلام 

لو ضحكتها لمن شفتها محجبه وهي لازمه اذاناتها الي بيهن التراچي الي انا اشتريتهن باول يوم صارت 

لو من خابرتني وهي تگلي عمو تعال بيبي ماتت تعال عمو محتاجتك 

لومن سجى حچت وغلطت بحقها وانا خابرتها بس اعتذر وهي گالتلي اكرهك انت جبان

شفت بالرساله كل عمرها والمرت بي وحسيت بيها وهي تبچي حسيت بيها ناديه الزغيره ناديه الي محتاجتلي 

صرت ارجف وگوه اجر النفس گمت بسرعه لبست يمكن ما دگمت القميص اخذت الموبايل وطلعت ركبت بالسياره 

خابرت رضا الي راسا رد عليه //ها سراج 

::رضا جايك اطلعلي بره 

هو ما سالني گلي //متانيك

انا اسوق يمكن ردت اگلب السياره وگفت لگيت رضا منتظرني يم الباب بدشداشته دخل للسياره وگلي 

:ها سراج لگيتها 

اتعجبت من سواله شلت الموبايل وطلعت الرساله هو گال 

:اخرب بيتي عليج عمي وهسه سراج شتسوي 

انا ساكت وانفخ وانا مزيج من خوف وتفكير وشويه راحه لان لگيتها

خابرت ولد جاوبني حاچيته :: محتاج اشوفك 

هو گلي // اليوم خفر تعالي للدائره 

رحنا انا ورضا واحنا ساكتين وصلت يم الولد گتله :: اريد اعرف مكان هذا الرقم هو 

باوعلي وگلي // بس لومكالمه اسهل 

انا گتله :: حاول وع السريع ،ممكن باي لحظه تموت

   تدلل استاذ بس شوية وقت 

  رضا سالني // سراج شني راح تخابر عمامها 

باوعتله بتساؤل :: انت شتگول 

:بكيفك 

هزيت راسي وگلت :: ما اخابرهم هسه الكاها ويصير خيير 

رضا // بس ذوله اهلها 

   :: لا مو اهلها ذوله معمعه ع الفاضي هادي يجر طوول وكرم يتهدد وراح ننخبص بدون فايده 

رضا //وانا من رأيك خلي نسوي كل شي بسكته وهدوء لا تضيع البنيه ونضيع حقها

بقينا بالدائره گاعدين وننتظر تقريبا اربع ساعات ننتظر اتصال لكن ماكو بعدها اتصلو بالولد وهو رد استفسر منهم 

وسد النقال وگلي //استاذ الشريحه جديده قبل يومين مستخدمها وما بيها اي رقم 

::: هاا عرفتلي منين صدرت من يامكتب 

هز راسه //اي استاذ من محافظة كربلاء وهذا اسم المشتري 

:: زين المكان الي اجتي منه الرساله 

جاي الولد يحاولون يعرفون المكان او اقرب نقطه داله 

:: تمام انا رايح وافيني بالتفاصيل 

   - - صار استاذ 

وطلعنه رحنا الكربلا وانا بالسياره رضا يسوق وانا اخابر ناس حتى ايسهلولي امر الى ان وصلت 

الدائره ال ... وردت اعرف المناطق الي بيها معامل طابوك 

واتحركت بسرعه اجت وياي سيارتين مدنيات للتمويه وهذا كان طلبي لان خفت عليها يكتلوها

كان كل همي الگى المعمل الي بي كلمة الله باللون الاصفر صرت امشي بالسياره واباوع والخارطه بايدي وخليت 

ابالي انو هو معمل واحد الي بي كلمة الله بلون اصفر والا ما كتبت وگالت دائما معامل الطابوك قريبات ع الشارع فانا 

ادخل العمق الاراضي لان اكيد موجودات معامل بالداخل كل همي الگى المعمل الى ان واحد من الويانه اشرلي 

  وفعلا شفت الكلمه بلون اصفر واضحه وانطيت خبر للشباب فهمتهم ع الخطه

رضا گال // وهسه وين 

جاوبته وانا اباوع ::اكيد مو بي بواحد من هاي البيوت 

رضا //ادري سراج خو ما نفتشهن كلهن ؟

::لا بس لازم ناديه موجوده ابيت وهذا البيت ابحده وقريب ع المعمل 

رضا ياشر //هاي البيوت كلها باعتبار ابحدهن بس يابيت تبين منه الكلمه

نزلنه من السياره وظلينه نمشي متباعدين انا ورضا وشفت كل البيوت لكن اكو بيت گباله سياره بيك اب دبل قماره 

هذا الي تبين منه الكلمه لان صايره مقابيله وهو بعيد عن المعمل وتقريبا بعيد عن كل البيوت 

ما اعرف رجف گلبي حسيت ناديه موجوده اهنا

احنه المنطقه محاصريها تقريبا لكن بدون محد يعرف والمنطقه بصوره عامه هادئه لان عملهم يبدي بالليل والفجر 

اله من بعض الناس الي تجي تشتري بالنهار وهذوله دائما يستخدمون العرباين الي تجرها الحيوانات او الستوتات 

انطيت اشاره واتقربت يم البيت الي چان يمه چلاب (اجلكم الله ) صارن ينبحن لكن انا ما اهتميت بسرعه 

كسرت الباب ودخلت شفت واحد لابس سروال وفانيله طالع وبيده مسدس هو من شافنه اتفاجأ صار يرمي 

علينه وهو يگول

هاي زوجتي هو يرمي وانا صاوبته وكع التمو علي وانا ركضت بوجهي للغرفه اجه وراي رضا الي شافها 

واگعه بالباب

راسا رضا خله عليها چرچف وشالها ورحنه صعدها رضا وره رحت گعدت يمها خليت راسها بحضني وهو يسوق 

 بقيت ساكت اباوع الها اباوع البنتي الي ما اعرف شبيها وحتى رضا ما حچى وياي ما انتبهت للسياره من وگفت 

نزل رضا ورجع گلي // سراج خلي انزلها

باوعت احنه اباب مستشفى جابو سديه شلتها وصلنه يم غرفة الطبيبه اخذتها وسدت الباب 

شفت الشرطه الي ويانه واصلين قبلي 

واجه الضابط گلي // المجرم بعده عدل وضعه حرج ودخلوعمليات 

  اتنفست :: يبقى بعهدتك ما اريد اي واحد ياخذ خبر وتراقبونه واي احد يجي يحاول يعرف عنه شي تحجزونه 

  كائنا من يكون 

الضابط // صار استاذ

راح وانا بقيت انفتح الباب وشفتهم اخذوها لاحد الغرف الي بالمستشفى باوعت الرضا ورحت دخلت 

ع الطبيبه وياي رضا الطبيبه بادرت بالسؤال //اگدر اعرف شبيها هاي البنيه 

رضا //احنه نسالج دكتوره 

الطبيبه //انتو شتعودون الها ؟

انا ردت احچي لكن رضا سبقني //دكتوره احنه بحكم عملنه ما نعرفها لكن نريد تقريربحالتها

الطبيبه //مفهوم اطلعو بره شويه واشوفكم 

بقينه انا ورضا والسكوت سيد الموقف فتحت الباب الممرضه الي ويه الدكتوره وكالت اتفضلو 

دخلنه وانا بس اتنفس بقوه رضا // اتفضلي دكتوره اسمعج 

الطبيبه //. انا كتبت تقرير واتخذت الواجب 

رضا // شنو دكتوره غير نعرف 

الطبيبه // استاذ البنيه متعرضه الى عملية اغتصاب وتم الاعتداء عليها من ساعات قليله

رضا وگف على حيله // يعني شنو 

الطبيبه // يعني البنيه على تقديري البارحه معتدين عليها انا دزيتها للردهه لازم نسوي تحليل دم وننطيها ابره اجهاض

رضا //تحليل شنو دكتوره وشنو ابرة اجهاض اذا هي قبل ساعات معتدين عليها 

الطبيبه //استاذ تحليل دم اي ابنيه معتدين عليها لازم تحليل وخصوصا الي معتدي عليها موجود بالمستشفى 

 فهذا يسهل النه المهمه اما الابره حتى اذا كان ممكن ان يخدث حمل فالابره تمنعه

رضا هز راسه // نگدر نطلعها دكتوره 

الطبيبه //.انت مو تكول بحكم عملكم جبتوها لهنا لازم اهلها يطلعوها 

رضا //. اقصد دكتوره يصير تطلع 

الطبيبه // اي عادي ماكو اشكال بس تبقى يم مدير المستشفى وانا راح اكتب الها على علاج 

رضا // تمام شوفي شغلج 

الدكتوره هزت راسها باستغراب // هاك روح جيبه حتى اعلمك طريقة الاستعمال اما التحليل وياهن التقرير 

تگدرون باچر تاخذونه اقصد ادزه بالملف مال القضيه

طلع رضا واخذني ويا گعدت وانا مذهول يمكن بذيج اللحظه انجلطت احس ريگي يبس صار خشبه صرت بس اتنفس 

 بقوه لان الهوى انگطع عني شافني رضا گلي //سراج انت زين لو اصيح للطبيب يشوفك

ما جاوبته راح رضا جاب العلاج دخل للطبيبه الي اشرت بعدها راح رضا قابل مدير المستشفى 

  طلع بوجهه راح للردهه وجابها 

على السديه وشالها وخلاها بالسياره من وره وانا صعدت يمه وهو صار يسوق وهو ساكت اما انا فچنت عبالك 

مضروب طلقه ومشلول كل شي بيه حتى عيوني يمكن ما يرمشن 

اسمع الموبايل يتصل لكن انا ما اگدر ارفع ايدي واخلي على اذني ما انتبهت للطريق رغم فاتح عيوني لكن 

بوكتها چنت ميت او حواسي چانن ميتات رضا وگف السياره وگلي // ياالله سراج خلي ننزل

ما جاوبته هو دار عليه ولزمني من چتفي گلي // سراج اسمعني هاي ناديه لگيناها اهنا تريد تذبحها تريد تموتها 

محد يدري بيك بس اتذكر يا صاحبي هي استنجدت بيك يعني صارت دخيلتك والزلمه يفدي روحه ولا يطي دخيله 

وانت بكيفك وانا وياك ما اخالفك بشي

باوعت شفت رضا جايبنه للگاع مالته اتصورو شگد مشينا بالسياره وما انتبهت رضا گلي 

:ياالله سراج انزل ونزل دخيلتك ولا تخلي الغضب يسيطر عليك 

هو نزل فتح الباب وانا شلتها ودخلت وانا احس بحرارة جسدها يعني شگد مرتفعه حرارتها هو گلي

: دخلها الذيج الغرفه 

دخلتها نيمتها ع الچربايه وطلعت حتى ما باوعت الوجهها گعدت بالصاله وانا مدنك احس بروحي خاويه كاتلني 

الخجل من رضا الي اتقرب عليه وگلي // سراج ارفع راسك بعدنا كل شي ما نعرف

ما جاوبته لان صرخه چبيره بداخلي قهر وندم وحطام روحي من داخل تصرخ 

::ناديه ضاعت مني ناديه طفلتي الي اول ما صارت اجت بحضني وفتحت عيونها وهي بايدي وانا الي اول واحد

بستها حتى قبل ابوها وانا الي سميتها ناديه 

::بتي الي كبرت وهي عمرها اربع سنين الي اتحملت كل شي بس حتى اخليها احسن ابنيه

::انا حقير خليتها تتعب وتتاذى وتتحمل كل شي من افراح ومن هادي بس حتى تگدر تقرر مصيرها وتحافظ على 

نفسها من تضيع والگاها الگاها فاقده اعز شي 

::ياريت كتلها سلدار ياريت من اندعمت ماتت ياريت وياريت 

تلفوني ما بطل اتصالات وما رديت على اي احد طلعته حتى ما شفت منو متصل انا اتصلت 

::الو عصام شنو وضعه 

::زين بس ينتبه انطوني خبر ما اريد اي احد يعرف عنه شي دير بالك عصام اذا صار بي شي صدگني 

احملك المسؤوليه

سديته بعدها خابرت 

::الوصادق الجهاز يمك 

:: زين اريد اعرف منين اشترا اقصد من اي مكتب 

::اي انا وياك 

اتقرب عليه رضا وهو جايب صينيه بيها اكل وگلي //هاا بشر 

جريت نفس ::هذا الكلب بعده ما صاحي وجاي يديروله دم 

:والنقال 

:: يم صادق يگول الشريحه جديد توه مشتريها

: وهسه 

:: ننتظر شويه ويدزولي اسم المكتب (باوعت الرضا )وهيه

     سلهم عيونه // : يمها ام حسين ياالله سراج سمي باسم الله 

هزيت راسي :: ما اشتهي 

رضا لزم ايدي //بروح ابوك لو لگمه

رحت غسلت اديه وحتى اخجل اباوع النفسي بالمرايه گعدنا وگبالنه الصينيه وريحة خبز البيت الحار 

والدجاج الشوي بتنور الطين اكلت شويه گوه ابلع لگمتي اتوسل رضا اكمل ما گدرت وهو هم بطل ما اكل 

واخذ الصينيه وجاب كوبين چاي لمن ما اجت ام حسين تصير اخت رضا وگالت

:ابو علي البنيه گعدت

فزينا انا ورضا وصلنه شفناها تباوع للمكان اتقربت انا ورضا عليها انا بس شفتها طلعت ما ردت اباوع الوجهها 

ورضا بقى يمها يطمنها هي ما تحچي اعرف بيها من تصخن يروح صوتها لحگني رضا وانا واگف بالباب وصار 

يحچي ويگلي // على كيفك هي شنو ذنبها شبيدها 

وانا جاوبته بعصبيه :: شمدريني ويجوز هي منهزمه وياا ومن شافت شنو سووا بيها هي اتصلت 

رضا //. افه عليك چا انت شتختلف عن كرم وهادي 

  :: رضا اسكت رحمه الابوك وك هاي لو بيدي هسه اموتها

رضا. يحرك باديناته // على كيفك خلي نعرف 

 بنفس العصبيه :: شنعرف الي نريد انعرفه عرفنا وخلص بعد شتريدنا نعرف 

كانت كلماتي تطلع مو من گلبي لا من قهري 

بعدين گتله :: اريد انام وين اروح

اشرلي ع الديوان البراني اچذب انا بوكتها ويني او وين الراحه اتمددت على فراش وبس احرگ جكاير 

عقلي بطل ما يفكر بقيت كاعد وانا اعض با صبعي ومحتار ما اعرف شسوي وادري برضا راح هناك

براك الشط مكانه الي يستذكر بي عشگه وغرامه الي ضاع منه اتمددت وانا شايل هموم الدنيا فوك راسي وانا 

اعاتب بناديه :: ليش كل هذا صار ليش

درت على صفحتي وانا اغالب دموعي سمعت صوت رضا يصيح عليه كمت من مكاني عبالي احلم 

سمعته يحچي بعلو صوته //. الحگ سراج 

طلعت اركض رجليه اخذتني للغرفه ما شفت ناديه رحت اركض صوب الشط ولگيت رضا شايلها وهو يگلي 

  - - سراج لحگتها گبل لا تغرك

صار گلبي يدك احس ما شايل ناديه الكلها طين وماي احس شايل روحي اخذتها حطيتها ع الچربايه وصرت اضرب 

بوجهها ضربات خفيفه گعدت وصارت تتقئ يمكن شاربه ماي بعد صارت تتنفس وهي تحرك براسها 

باوعتلي وهي فاتحه عيونها الي مليانات دموع وعتب عرفت بيها سمعت كلامي الي حچيته ويه رضا 

رجعت غمضت عيونها وهي تشهك رضا لزمني من ايدي وطلعنا بره لان ام حسين اجت وجابت دشداشه

وابو حسين واگف ما سالنه رضا گلي //سراج قسيت عليها

جريت نفس ::لا تلومني انا مذبوح 

رضا بنتر // انعل ابو الي يلومك بس هي خطيه هسه عاد خلي نعرف ياهو هذا وليش خاطفها 

ابو حسين اشترك ويانه بالكلام وگال //لازم تهدون وعلى كيفكم 

رضا گال //اي والله صدك 

اجت ام حسين وگالت صارت ترجف غطيتها بونامت انا هزيت راسي هي گالت //اظل ابات يمها البنيه 

مصخنه ومو برايها 

رضا گال الاخته //روحي ومن نعتازج مو بعيده

راحت ام حسين هي ورجلها وانا گلت الرضا ::لازم ما تظل ابحدها راح انام اباب الغرفه 

رضا //نعله عليك اسريج ولك متفرفحه روحك عليها (بعدين هز راسه وگال )اي خويه نام اباب الغرفه وانا وياك 

 بس بالاول خلي اروح اسبح واغير هدومي

اخذت فراشي وخليته اباب الغرفه داخل الصاله واتمددت وانا يتراوالي اسمع انفاسها شويه واجه رضا وجاب افراشه وگال 

:اليوم الخاطرك راح اظل اهنا واعوف مچاني (يقصد ع الشط )

سالته ::رضا ما تعبت 

اتحسر وگلي //اعرف قصدك بس المصيبه بهذا (ويأشر على گلبه ) هذا سراج لا يچل ولا يمل

::وچم دووب ؟

اتحسر //الله كريم ياخوي وداعتك تگضي (وجراها ابوذيه )

تگضي تگضي تگضي وهم تنتهي وتظل سوالف 

باوعتله ::كافي رضا خليني اناام 

رضا //چذاب ياصاحبي ابدا ولا تنام موش ادري بيك عاشك و مجنون وابد ما تنام 

والعشك يصاحبي ايسودن ولا هو ينام 

شلك تره بالعشك لف راسك ونام

ابتسمت رغم الحزن بقيت الليل كله گاعد وبس ادخن وانا اريد اسمعها لكن ما اريد اباوع بوجهها صارت 

تجيني افكار وجه الصبح نمت 

وحسيت بام حسين اجت وجابت الريوك واسمع رضا ايگللها 

: بعد اخوج ودي الريوك للديوانيه ودشي شوفي البنيه گاعده لو نايمه 

گعدني رضا وهو يگلي //سراج اگعد نتريك سوولنه سياح وبيض

گعدت وانا بالاساس ما نايم رحت غسلت ورحنا للديوانيه شعلت جگاره ورضا گلي 

:صدگ چذب سراج فك ريگك بلگمه 

::ومنو يشتهي 

رضا جاوب //انا وانت وحتى ناديه لازم نجبر روحنا وناكل ورانا شغل هواي

باوعتله هو شالي سياحه وگلي بروح ابوك ذاك الطيب اتريك ادري بيك همك جبال ما تشيله بس هالمره الخاطري 

هزيت راسي وانا العبره متكسره بصدري اكلت وشربت چاي وگعدنا 

خابرت المستشفى گالي عصام الهسه ما صحى ومن سائلين الطبيب يگول لان هو يتعاطى حبوب ويشرب خمر 

فمن سووله العمليه صار كأنما ماخذ جرعة بنج زايده وماثره بي

اجتنا ام حسين وصبحتنا بالخير وگالت الرضا// ابو علي البنيه گعدت وگوه شربتها شويه حليب دافي 

سالتها ::صوتها طلع 

ام حسين //اي خويه بس بعده مبحوح 

رضا گالي //سراج امشينا خلي نستفسر منها وتالي نتصرف 

بقيت احك بچف رجلي من جوه رضا گلي //سراج شبيك 

::رضا ما اريد لا اشوفها ولا اسمعها

رضا //شوف سراج حگك بكل شي ويمكن لو انا ما اتحملت طگيتها طلقه بس انت شفتها من اجينه للبيت 

جاوبته ::اي بالغرفه وهو يگول مرتي وهم شفت بطل العرك والمزه (وصرت اضرب على گصتي بقوه )

رضا لزم ايدي //لا تتخبل اي شفت ما اچذبك وهم شفت شلون احوالها وشلون مصخنه امشي سراج لا تضيع 

زينتك بشينتك 

داريت دمعه بعيني ::لاتلومني رضا تره النار الي بگلبي تحرك مدينه بنيتي الي ربيتها وداريتها هيج يصير بيها 

تروح ويه واحد وتگول ابن عمي والگاها بالغرفه ويا وهو يگول مرتي

رضا //سراج البنيه راح يصيرلها 12 يوم عليك الله لو رايحه ويا لو مصاحبته بعدها بهدومها فكر سراج

شعلت جگاره وگتله ::لا تلومني رضا لو بيدي اكتل روحي 

رضا //ادري بيك بس مي خالف روح واگعد واسمعها اعتبرها غريبه وما تعرفها واستنجدت بيك اعتبر نفسك 

طالبينك اتحقق بقضيه ياالله ياخوي لا تعاملها ناديه الي تعرفها عاملها ابنيه اجت ودخلت عليك محتاجه مساعدتك

ردت احچي رضا لزمني من چتفي ورحنا انا ورضا الي اصريت يجي وياي دخلنه شفتها متمدده ع الجربايه 

وعليها لحاف ديباج جديد هي باوعت ودنگت 

رضا گللها //بابا ناديه احنه تره اهنا جايين نسمعج حتى نساعدج وانتي الي لازم تساعدين نفسج 

هي ساكته وانا داير وجهي ع الباب اجه رضا يمي وگلي //سراج ابقى يمها انا عدي شغل

   استغربت من تصرفه هو هزلي راسه وطلع 

بقيت بمكاني واگف وداير وجهي عنها گتلها:: سولفيلي وين چنتي 

هي ساكته ما جاوبت رديت عليها بنتر :: لا تسكتين احچي اريد اعرف هذا منو وليش من اجيت يگول مرتي

درت عليها اريد احچي وياها باوعتلها شفتها مدنگه وبس دموع على خدها اتذكرت دموعها لمن مصخنه من راحت 

المياده للسجن واتذكرت دموعها لمن وصلتها البيت هادي وره وفاة عمتي واتذكرت شهگتها لمن اجيت اعتذر عن 

الي سوته سجى 

وهسه جاي اشوف دموعها بكسره اتقربت ردت امسح دموعها بس كبرياء الرجل الشرقي الي انهان بكرامته هي 

الي منعتني گتلها بعصبيه وانا اشوفها شلون تغمض عيونها وتفز من صوتي

::احچي خليني اتصرف ولازم اتساعديني لان الموقف جدا صعب 

ما حچت جريت نفس وسالتها ::سولفيلي شلون وصلتي الذاك المكان 

بقت ساكته طلعت المسدس واتقربت منها ولزمت حنچها صارت عينها بعيني وگتلها 

:: شوفي ولج ما اكتلج اكتل نفسي ولا اسمع احد يعيرج (وخليته على گصتي )

هي اتفاجئت من ردة فعلي وانا صرت ارجف وهي صارت تشهك حييل زمخت عليها

::اسكتي لا تبچيين واحچيلي كل شي 

فتحت الباب صحت ::رضا رضا تعال 

اجه رضا وبعيونه تساؤل گتلها:: احچي على مود رضا يكون شاهد 

رضا باوعلي وشافني شايل المسدس اخذه مني انا هزيت راسي 

:: لا رضا خليني اكتل نفسي اريد ارتاح انا بس الخسرت 

رضا // تكتل نفسك وهاي المسكينه وين تبقى 

اتقرب رضا منها // بابا ناديه احچي انتي بحماية الله وحمايتي وصدگيني اخلي الدم للركب من كون 

احد ايمر بيج بس احچي خلي نعرف غريمنا ياهو خلي نقتص منه لاتخافيين 

م

صارت تبچي وتباوع اليه ومدنگه رضا گال 

: شوفي هذا الواگف (ويآشر عليه ) هذا الي هسه جاي يصيح ويريد يرمي روحه من يوم الرحتي لا اكل ولانام 

مثل الناس صار حاله حال المسودن يهوفج ويروح منا ويرد منا 

بويه ناديه شتحچيين انا اصدگج وماكو ابن مره يوصلج وها شو باوعيلي (لزم شواربه ) شاربي مو عليه اذا اخلي 

احد يوصلج

وگف رضا وگلي //وانت سراج اگعد وخلي نفتهم منها لا تسودن وتضيع حگ البنيه

صارت تشهك بالبچي حييل جريت نفس وظليت ساكت هي حچت بصوت متقطع 

... ... شت شتريد تعر ف عم و 

رضا // كل شي من طلعتي من الجامعه گلتي للبنيه رايحه ويه ابن عمي 

... ... لا عمم و ما گلت الها كتبت الها

رضا //اي كتبتيلها ويامن رحتي ياهو ابن عمج 

... ... عمو رحت ويه ياسر 

رضا وانا اتفاجئنا بكلامها رضا گللها //ياهو 

ما خليتها تجاوب اجيت يمها وهزيتها حييل وگتلها ::ادب سزز ما لگيتيلج عذر تردين تذبين مصيبتج على ياسر

اجاني رضا وگلي //عوف البت سراج خلي نفتهم كملي بابا ومالج غرض بي المسودن ما علي عتب 

هي ردت ... ... عمو والله هو كتبلي گلي اطلعي رايدج بشغله انا عرفت يريد يقنعني نعقد من غير ما يدرون 

اهله گلت اسايسه على ما اوصل للبيت وهناك اواجهه گدام اهله واگلهم هيج ابنكم طلب مني

رضا وهو يهز ايده ويقربها الحلگه // يواشج بابا شنو ياسر يريدج وگايلج يريد ياخذج من غير ادري اهله

هي هزت راسها وصارت تسولف وانا اسمع واتذكرت شلون ياسرمتخربطه اموره ويطلع شويه ويرجع  

ومن خابروني على البنيه الغرگانه وردت اسال حنين شنو چانت لابسه هو انطاني نفس لبسها الي شفتها بي 

يعني معقوله ياسر هو الي خطف ناديه سمعت كل الكلام

انا قاطعتها وگلت ::من اخذج ياسر ليش ما حاولتي تتصلين 

هي هزت راسها وگالت ... ... ردت اتصل بس هو اجه واخذ النقال مني 

::يعني نقالج عد ياسر 

... ... اي والله هو اجه واخذه وقفل عليه الكرفان 

  :: انوبه كرفان ياكرفان

صارت تحجي شلون قفل عليها الكرفان واجو اثنيين وخطفوها وشلون حرگو الكرفان هذا الي سمعته 

وبعدين سولفت كل قصة اختطافها وشلون قنعت الخاطف لكن هو طلع حقير ونذل واغتصبها 

هي صارت تبچي حييل وهي تعاتب برضا 

... ... عمو ليش ما خليتني اغرك واموت والله احسن من هاي حياتي 

رضا اتقرب يمها // لا يابعد عمج عمت عيني من كون اخليج تغرگين واخلي السوا بيج هالشكل عايش ومرتاح

باوعت الها وگلت ::شوفي ناديه انا راح اروح واتاكد من كلامج بس اسمعيني اذا طلع لو جمله لو كلمه كلمه چذب 

بايدي اخنگج وادفنج اهنا ومحد يدري بيج بس صدگيني لو يطلع كلامج صحيح هالمره انا الي احاسبهم واحد واحد 

هي باوعتلي وگالت ... ... تشك بيه مو اذا عندك ذره شك بكلامي من هسه اكتلني لا تروح ولا تسال

  رديت عليها بعصبيه واول مره هيچ اصير قاسي :: تبقيين اهنا وتنچبيين على ما اروح وارجع وديري 

بالچ تتصرفين بكيفچ والله اموتچ واحسب الله ما خلقچ واخلي ذولاك يگولون جاي تركص بالملاهي وبيوت الدعاره 

رضا // شبيك سراج هو هذا حچي 

صرت اتنفس هي حاولت توگف لزمت بالحايط واتقربت يمي وگالت وهي تبچي

...... اليوم اول مره بحياتي ما اسب مياده اسب نفسي الي وصلتها للاعدام لان لو چنت عدها.هسه انا 

واختي واخوي عايشين ومحد مان علينه عايشين وهيه محافظه علينه لكن انا السبب انا الي وصلت 

امي ونفسي واختي الهلمواصيل 

رضا گال //لا بابا لا تعتبين على سراج تره يمشي بس جسد وروحه عدج

حاچيتها بنتر ::ذوله الي اجو اخذوج من الكرفان ما سمعتي شي اسم 

هي هزت راسها بالنفي واتحسرت بعدين گالت وكانما اتذكرت ... ...ايي سمعت ايگله اخذ السياره الجراد 

وبعدين سمعت طلب من واحد اسمه توفيق يجيب عبايه مال نسوان 

::جراد اسمه جراد ؟

... ... اي يمكن هيج بوكتها چنت خايفه 

رضا // جراد لو جواد 

  ...... لا جراد

حاچييت رضا //. ابو علي صيحنه ام حسين رايدها 

  طلع وانا بقيت ما اباوع الها واسمع بس شهگتها

اجت ام حسين وگالت // آمر خويه 

::ما ايأمر عليج ظالم بس هاي البنيه امانة الله وامانتج 

ام حسين //ابطن عيني (وخلت اصبعها على عينها ) هاي مو خطاره راعية بيت انتم روحو راشده بوجهكم 

وما الكم غرض بيها يمي 

اتقرب رضا وگل الناديه// عمو ناديه نمشي انا وسريج الخبل وانتي تبقيين اهنا ابيت عمچ وهاي ام حسين عمتج 

واخت ابوج وما تسويين شي ويصير كله براسنه ها عمي ارووح

هي ابتسمت رغم مبرطمه وهزت راسها

رضا گللها //لاتخافين بابا انتي اذا صاحبة حق يوصلج وتاخذينه مربع (باوعلي ) ياالله امشينه سراج 

درنا نريد نطلع هي گالت بعبره ... ... عمو رضا 

وگفنا اثنينه درنا عليها هي دنگت وصارت تشاهگ وگالت ... ... عموورضا اريد اختي اريد حنين الله يخليك جيبها 

رضا جر نفس وگلها //لو ادري اكتل عشر زلم اله اجيبها يمج انا اعلمهم الچلاب ما افوتها الهم وهاي دموعج

 الها ثمن غالي

طلعت انا ورضا والنار جاي تطلع من عيوني رضا گلي //. فووت طيب خاطرها بكلمه 

   اتنفست بعمق :: ما اگدر 

  - - مي خالف اسحك على نفسك

مشيت خطوتين ورجعت شفتها بنفس گعدتها ويمها ام حسين من شافتني طلعت اتقربت منها وهيه مدنكه حاجيتها 

 :: تبقيين اهنا ما اريد اي احد يشوفج ( جريت نفس ) وتاكلين وتاخذين العلاج بدون عناد

ما سمعت ردها وصلت يم ام حسين :: تديرين بالج عليها واذا طلبت موبايل طلعيلج حجه ما اريدها تخابر 

ام حسين / ولا يهمك بعيوني 

    اتشكرتها ورحت ركبنا بالسياره مشينا شويه رضا وگف السياره ونزلنه يم الشط باوعتله

هو گال //لا تباوعلي بس اريد اسالك انت مصدك بكلامها 

بقيت ساكت ما رديت هو استردف //سراج فهمني شناوي تسوي لا تظل ساكت

فركت وجهي ::خلي اتاكد من كلامها واله ابچيهم على زمانهم 

رضا //وانا وياك بس الي اريده منك تتصرف بعقل مثل كل مره لاتتهور ويضيع حك البنيه

وركب رضا بالسياره وانا بقيت واگف واحچي ويه روحي ::صدك كلامج لو انتي عد مياده ما صار كل هذا الشي 

اووف ناديه اووف تعبت وانتي تعبتي وهسه انا تايه ما ادري شسوي وانتي الي تيهتيني

رحت ركبت بالسياره گلي رضا وين انا ما جاوبته خابرت صادق 

:: الو صادق عرفتلي اسم المكتب 

:: زين والعنوان 

::تمام مشكور ابقى مراقب الخط احنه جايين 

رضا باوعلي گلي //هاا وين هسه 

:: الكربلا عرفنا اسم المكتب

طلعنه الكربلا وبهاي الاثناء اتصل كرم رديت 

    :: الو هلا كرم 

كرم //هلا بيك اشلونك سراج 

::الله يسلمك 

كرم //انت وين 

::بالدائره ليش كرم صاير شي 

لا والله بس حبيت اسلم عليك

::الله يسلمك ابو مرتضى بشر ما لگيتوها 

لا وين نلگاها سراج هاي شوف وين راحت 

::اگلك كرم 

ها سراج 

::اگلك احنه دورنا بكل مكان بس ما دورنا 

كرم //وين ما دورنا

جريت نفس ::اقصد انا دورت كل مكان بس مارحنا للمناطق البيها داعش 

كرم بذهول //هاا شتگول ؟

::اي يجوز خطفوها وباعوها على داعش 

معقوله 

::اي ليش لا اگلك انت هذا الكلام سولفه على هادي او ولده حتى من ادز جماعه بلكي يلگوها واكيد اذا 

عايشه ندفع ديتها ونشتريها

كرم //شو مستسهل الامور عد داعش ونلگاها 

::اي ليش لا احيانا كل شي بالفلوس ينحل انت سولف هذا الكلام على هادي حتى يجي هو او واحد 

من ولده لان انا بصراحه ما اگدر اتصرف ابحدي وهم تعبت وتعرف انا موظف ولازم اتواجد بالدائره 

كرم //اي والله سراج انت ما قصرت دومك شايل مشاكل عباس وبناته على راسك 

::ليش هو فضل عباس ننسا اذا انا او انت وحتى من مات فضله غرك هادي واهله

كرم //اي والله بس مع الاسف عباس ما اله حظ لا ويه مرته ولا ويه بناته 

::صحيح وحتى ما عنده حظ ويه اخو او وياك مع الاسف 

كرم //لا سراج انا مقهور ومهضوم ليش ابنيه بعدهي بالبيضه تسوي هيج بينه وتنزل راسنا گدام الناس 

احنه لحد هسه ما جبنالها طاري ونحاول انطمطم الموضوع بس اليمته تدري هديل تگول بالكليه شاعت 

عليها شارده وراح يطلعون بيها قرار فصل 

:: بربك كرم منين يعرفون بالكليه ناديه منهزمه لو ما هديل هي الي فضحتها

كرم //لا انت شتحچي البنات الي بالخط كلهن يعرفن وليش تروح بعيد لو تلگا هو الي طلعها يجوز من الكليه 

وراحت ويا 

:: هاا ليش هديل تعرفه 

كرم // لا منين تعرفه بس خطيه اجت مقهوره وتسولف 

::مقهوره ما اصدك 

كرم //وليش ما تصدك هاي الچلبه هي وحنين سممن افكارنا على بو افراح هي وبناتها يكرهنه

:: ليش انت عندك شك 

كرم //. طبعا سراج كل كلامهن تلفيق وچذب افراح چانت خايفه منهن وهذا الشي صار لو تسمع هديل تكول 

يوميه كاعده ويه ولد شكل والسوالف التعبانه خطيه اتكول افكر ابطل ولا ابقى والناس اتاشر عليه 

:: مفهوم مفهوم هسه انت احجي ويه هادي شوف شيگول ورجعولي خبر فيمان الله 

  - - - الله وياك 

رضا باوعلي وگلي //على شنو ناوي 

 لملمت حلگي بقهر :: اريد اتاكد

وره تقريبا تلث ساعات وصلنه للمكتب الي اخذ منه الشريحه سالته وهو گال انو اخذ الشريحه وخلاها بجهاز جديد 

جهاز من هذا العادي وعرفنه بان الشريحه ماخذها بنفس اليوم الي دزتلي ناديه بي الرساله وحتى الولد عاد الكامرات

 وشفت شلون اشترى الشريحه وخلاها بالجهاز

طلعت انا ورضا ورحنا للمستشفى وعرفت انو هو لازال بالغيبوبه وانو كله بسبب التعاطي ولان عنده سكر فمو 

من السهوله يصحى فهمت الضابط المسؤول مجرد ما ينتبه ينطوني خبر

وطلعنه انا ورضا رحنا البغداد وهناك طلبت منه يروح للبيت لان هو تعب وهو كالعاده ما وافق رحت للدائره 

ومناك رجعنا للبصره چان اكو شي لازم اتاكد منه واذا طلع صحيح هالمره ما ارحم احد لو منو ما يكون 

باوعت الرضا وحچيت :: مرنا على ام حسين اريد احچي وياها 

رضا // ولك سراج شبي اسم ناديه ما صرت تگوله 

:: انت بطران انا بيا حال 

: والله حگك بس هي حالها مو احسن من حالك

   :: اي الايده بالنار مو مثل الايده بالماي 

رضا // هم صدك وانا ياصاحبي يوميه اكل جمر واشرب وراه الماي 

انتبهت الكلامي چان حاد ويه رضا جريت نفس وكتله 

::ابو علاوي اعذرني 

:لا ياخوي معذور مصيبتك چبيره 

وصلنه بالليل تلگتنا ام حسين وگالت //شني شو رديتو وين رحتو

رضا گللها //براگ الشط

هي ضحكت واجه ابو حسين سلم علينه رضا گاله //هالايام راح تنام چفي بنيتنا نريد ناخذها منك 

ابو حسين گال بضحك // اخذها علواا تفكني منها 

رضا صاح //اعليه خايبه اعليه اهلا( ويأشر بأيده ) تعاي شوفي زلمتج شيحچي 

ابو حسين // شبيك يامعود اتشاقى وياك 

رضا بضحك // انا خوك دگول مسويتك طلي وتخاف منها

اجت ام حسين وجابت عشا اكلنه شويه وابو حسين ومرته راحو رضا گاللهم احنه نغبش انتم ظلو باتو اهنا 

همه راحو وبقيت انا ورضا گتله :: خلي نروح نحچي وياها 

رضا گال //هسه يجوز نايمه 

هزيت راسي وگتله :: لا هي ما تنام بالليل 

رضا //حتى تدري بنومتها الله يساعدك

دگيت الباب ودخلت لگيتها متمدده والتعب مبين عليها سالتها بدون ما اسلم عليها 

:: من طلعتي ورحتي ويه ياسر اكيد شفتي مو نفس الطريق بس لازم لفت نظرج فد علامه تدل انتي بيا منطقه 

هزت راسها وهي مدنگه ... ... اي احنه عبرنا جسر ومشينه بطريق سريع حييل واكثر شي سيارات كبار بي الطريق 

غمضت عيوني وكاني اسمع ناديه الطفله حاچيتها ::اتذكري شنو اسم المنطقه 

... ... اي قريت لافته چبيره خور الزبير سفوان

جريت نفس ::هذا هو افتهمت

وطلعت رضا سالني //ها سراج 

:: نمشي للبصره وهناك اتصرف 

: اي خلي نرتاح شويه ونطلع الفجر 

لگيت ام حسين فارشه بالصاله اتمددت نمت ورضا هم والله لو ما يزعل چان عفته يرتاح واروح ابحدي 

الفجر اجه ابو حسين وگعدنا وگال // ياالله اگعدو صلو وتريكو حتى تتوكلون 

فزينه واحنا التعب بعيونه وابو حسين گال //والله لو مخليكم الباچر ما تگعدون 

رضا يتثاوب // اي والله تعبانيين

گمت غسلت واتوضيت وصليت وام حسين جابت الريوك اكلنه ع السريع دخلت للغرفه بعد ان دكيت الباب 

شفتها متمدده ودايره وجهها حاچيتها 

:: ادري بيچ ما نايمه راح تبقيين اهنا ولازم تاكلين وتاخذين علاجج ما نعرف شنو راح يصيرويانه خلي اروح 

وانا مطمئن ما تسوين اي شي اتفقنا 

سمعت حسرتها وهي تگلي ... ... اريد حنين 

  اطمنت من كلامها اتنفست بعمق وانا خانكتني العبره :: مثل ما وصيتج اذا تردين اطلع حقج وترجعلج 

اختج اكلي واخذي العلاج

طلعت وصيت ام حسين عليها الي سالتها :: هم طلبت الموبايل 

هيه هزت راسها بالتفي 

:: مثل ما كتلج ام حسين موبايل ممنوع بس يعرفون مكانها يجوون يكتلونها وانا ورضا نبتلي 

اطمن خويه ما يصير اله الخير 

وصلنه الصبح للبصره رضا سالني //وين هسه نروح 

:: ندور ع الكرفان المحترك واذا لگينا يكون هذا اول خيط بالحقيقه 

اجاني اتصال شفته كرم رديت 

::الو هلا ابو مرتضى 

  - - - هلا بيك سراج اشلونك 

::الحمد لله اگلك كرم اشو بس انت تخابرني هادي اولاده ما مهتميين للقضيه

كرم // انت تعرف بهادي هو من البدايه ما يريدهن ويگول مو بنات عباس هسه تريده يخابر من ناديه 

صخمت اوجوهنا 

:: بس هذا شرف وعرض وگدام الناس 

كرم //هادي هم الله يساعده الصار بي مو شويه فضحته بت مياده 

انا رديت باستهزاء :: اي مبين علي كلش مهتم والدليل زف بته الابنك بليله ويوم 

كرم // شنو قصدك سراج 

::ما اقصد شي بس لاتجمل بصورة هادي انا وانت نعرفه كلش زين 

 - - انا ما اجمل جاي احچي حقيقه

:: بهاي صحيح ما چذبت سبحان مغير الاحوال 

كرم //. سراج شبيك انا جنت واحد قشنر انت وامي وزهراء وحتى مرتي ضحكن عليه يتيمات وفقيرات ومحد الهن

:: اي صحيح ابو مرتضى وانت ما قصرت ولا حتى هادي 

  - - - شبيك سراج اشو هادي وهادي شبي هادي ما شاء الله اسم ومركز وبناته متربيات وما يخلفله كلمه مو مثل 

الي ضحكن علينه وعبالنه بزازين عميات 

::كرم خير شردت مني لان عندي شغل بالدائره 

كرم //اي سراج انا حچيت ويه هادي هو گال لا مستحييل اخاطر بواحد من ولدي واخلي يروح يدور بذيج المناطق 

جاوبته باستهزاء :: الله عليك كرم هادي الي حچى لو افراح

كرم // حقها سراج اولادها وتخاف عليهم 

:: اي والله صحيح الي عده ابو وام مو مثل اليتيم 

- - - شتقصد سراج 

::اقصد يمكن لو ناديه هسه عد مياده ما صار بيها هي واختها ربع الصار ياريت ما اعترفت على امها 

كرم بذهول / تحچي صدك ؟

:: اي والله اقلها هنه عايشات ويه امهن واخوهن وحلال ابوهن متمتعات بي 

كرم // ها وسلدار عايش هو وابنه بحلال عباس

:: ليش حلال عباس مو عاش بي هادي وافراح وهنه گاعدات ابيتونه لو نسيت 

  كرم بعصبيه // لا ما نسيت بس يبقى حلال اخو وهنه طلعن بنات حرام صحيح لو انا غلطان 

::ما اعرف ابو مرتضى انتو عمامهن وبكيفكم هذا هو واذا تحصل اي شي جديد بلغني بي 

كرم باستغراب // شبيك سراج شصاير 

جريت نفس :: ما صار شي بس اذا اهلهن ما مهتمين انا شكو حيا الله ابن خال ابوهن ياالله فيمان الله عندي شغل

سديت التلفون وانا احس نار تطلع من عيوني على جملة كرم الي گالها بنات حرام 

باقي كلامه ما اهتميتله لان حسيت اكو لعبه چبيره بالموضوع ورحنا انا ورضا ندور على الكرفان المحترك

شكرا لزيارتكم عالم روايات سكيرهوم