رواية ناديه الفصل الثاني والخمسون 52 بقلم انين الليل

اليوم الاحداث ابطالها سراج ورضا اتمنى تروق الكم 

سراج 

وصلنه انا ورضا للبصره وطول الطريق انا بس اسحك جگاير واضرب على الاستيرن ابدي اشك هدومي 

ابدي الطم مثل الام الي ضايع ابنها وگلولها عدل ومن اجت لگته مكتول 

اول مره رضا يركب وياي ويبقى ساكت ما يجر ابوذيه لو شعر دارمي

جبت الطريق وانا افكر اذا كلام ناديه صح هذا ابن هادي شسويله اكتله بايدي مووت 

بس بالاول خلي اعرف الاسباب واتاكد وبعدين راح انتقامي يكون عسير

وهنا لازم اتصرف بذكاء وعدم تسرع وهذا الشي اتعلمته بحكم عملي لازم نصير مثل الطبيب الي 

يدخل يسوي عمليه الواحد مسوي حادث ويتفاجأ بي ابنه الوحيد وهنا لازم يتماسك ويتوكل على الله 

ويسويها وينظر الابنه على انه مريض حاله حال الاف المرضى

او بيوم يصيحوله ويگلوله حاله طارئه ويتفاجأ بعدوه الي كان السبب بوفاة ابو او اخو اهنا الطبيب لازم 

ينسى كل الحقد والكره ويگوم بواجبه على انه طبيب مو قاضي حتى يقتص منه

اذن انا لازم اتصرف حسب مقتضيات الموقف ولازم اتصرف بذكاء وما اعتبر قضية ناديه بالوقت 

الحاضر قضيه شخصيه وتهمني لا خلي اعتبرها قضيه الناس ما تربطني بيهم اي علاقه لكن هذوله الناس 

استنجدوا بيه

وصلنا للبصره وهناك رحنا انا ورضا للدائره وعرفت عن نفسي وطلبت منهم نبقى على اتصال وهم 

طلبت منهم ان يخلون السياره مالتي بگراج الدائره وطلعنه انا ورضا الي بقى ساكت صرنا نمشي 

ورضا يگلي // اگلك ليش خليت السياره بالگراج 

::امشي وانت تعرف

اتمشينا وگفنا ع الشارع اجرت تكسي وگتله ::المفرق مال خور الزبير 

ركبت بالصدر ورضا ركب وره قدمت للسايق جگاره هو اخذها واتشكرني انا سالته 

::بس كون المفرق الگه بي سيارات يرحن للخور 

السايق جاوبني //ليش خو انا اوديكم للخور 

::مشكور ابو الشباب بس اريدلي واحد من الخور لان بصراحه ما اندل المكان الي جايين 

علي وهم اريد اسأله

السايق//هاا اذا هيج حقك اي تلگى هواي سيارات ومن اهل الخور 

::تسلم ياطيب 

وصلنه للمفرق وگفنا وصرنا نتمشى واهل التكسيات يسالون تكسي انا ما جاوبت رضا گلي 

:شنو سراج غير اتفهمني ليش ما اجينه بسيارتك 

جاوبته واحنا نتمشى ::احسن رضا احنه جايين نسال نريد نشتري مزرعه من واحد اسمه جراد وما نندله 

فاكيد السواق يعرفونه وراح ينطونه نبذه عن حياته

رضا ابتسم // والله ما ينخاف عليك جبتها 

اجرنه رجال يجي عمره بالاربعين ركبنا ويا وگله رضا //انت من اهل الخور 

هو گال //اي ليش تسالون 

جاوبته :: ابو الشباب جايين على ولد بس احنه ما نعرفه ولا نندله 

السايق استغرب //هاا اذا ما تعرفونه ليش جايين علي 

رضا جاوبه //ابن خالي مصادفه يم معرض سيارات وگاله عده مزرعه ويريد ايبيعها وانا جاي اشوفها 

السايق // زين خابرو

رضا //موابن خالي حشاك اثول اخذ الرقم من الولد وما مسيفه وتلفونه طاح وانمسحت كل الارقام بس انا اعرف اسمه

السايق //شسمه الرجال 

رضا //على ما اذكر جراد 

السايق //جراد لو جواد 

: لا جرااد لان هو گال اسمه غريب 

السايق //بس ما سامع بهذا الاسم من قبل 

جاوبت :: نسأل والله كريم

السايق //وهسه وين اوديكم 

رضا //حدر بعد اخوك نزلنه يم ذيج المزرعه 

السايق //ها هو هذا تندله 

رضا //اظنه هو لان گلي يمه مقطوره زركه ع الشارع اهنا ذبنا عمي ومشكور 

نزلنا والسايق دار وراح وصرنا نتمشى صوب المزرعه سالت رضا 

::اگلك ليش نزلتنا اهنا 

رضا // سراج نسينا شغله 

::شنو هي

رضا //المزارعين واحد يعرف الثاني اذا مو گرايب فهمه يتلاگون من يسوقون محصولهم لو من يشترون 

بذور او نايلون

::هاا 

رضا //اي اگلك واحد يعرف الثاني ما تشوف المزارع وحده بصف الثانيه 

::زين ما طوول هيج كون نسال على المزرعه الاخذها الها ياسر 

رضا //ايي ما عليك امشي والك الصافي

وصلنه اتلگانه رجال سلمنا 

السلام عليكم 

هو اجه وگال //عليكم السلام 

اتسالمنه وگلنه //اهلا وسهلا اتفضلو

رضا گله //مشكور الله يخليك والله جايين نسالك 

اي اتفضلو

رضا //والله ابو الشباب خويك عنده راتب وبيوت وگاع بالعماره والحمد لله والشكر

   الرجال // الله يزيد ويبارك 

:رحم الله والديك تعرف العوايل كثرت ومن تكثر العوايل تزيد الطلايب  

الولد // اي والله حجي 

:عاد انا گلت ابيع گاعي وعدي چم فلس واريد اشتريلي مزرعتين اگعد بيهن وارتاح 

:اي حجي زين تسوي بس المزارع تعب وسنه تصيب وسنه تخيب 

رضا //عمي على الله اقلها گاع وبعيده عن القال والقلت

الرجل //صحيح عمي 

رضا //ونعتولي مزرعه عد رجال خيير بس والله نسيت اسمه گالو عارضها للبيع گبل فتره طاگه عدهم الكهرباء 

ومحترك البيت 

الرجل حك راسه وگال //هاا حجي المزرعه محترگه 

رضا //لا عمي گالو البيت مال الفلاح والله ما ادري كرفان محترك وگالو يريد راعيها يبيعها 

الرجل //اي صدك هم سمعت 

رضا //ها يمكم

:لا حجي ابعيده علينه بس اعرف راعيها واندلها 

رضا //ما تسوي عليه فضل وتروح ويانه 

:عمي انا اهنا مو ملاچ انا فلاح بس ادليكم عليها 

واجه ويانه وگال //وين سيارتكم 

رضا //ما جبتها لان ما اندل بس اخذ تكسي 

هو الرجال وگف تكسي وصار ايوصفله وگاله //المزرعة حجي صالح ال... 

سلمنا علي واتشكرنه منه ورضا صار يسال بالسايق

:انت تعرف الحجي صاحب المزرعه 

السايق //اي اعرف حجي صالح والنعم منه 

رضا //اگلك عمي خو ما يضرب بالعالي 

السايق//والله عمي ما ادري بس انت تدري كل واحد حلاله عزيز عنده ويسومه غالي 

رضا //بس هي ايگولون محترگه 

السايق //لا حجي منو گلك

رضا ::ها چا انت تعرفها 

السايق //اي عمي الحجي عده هواي مزارع وهاي الي تگول عنها ما محترگه عده كرفان خاله اله هو 

وعياله من يجي يرتاح بي وبوكتها ما كو فلاليح عده بعدهم ما زارعين والكرفان احترك صار بي مس كهربائي 

رضا // انا خوك بس لا راحو بي ضحايا 

السايق //لا عمي الحمد لله بوكتها المزرعه خاليه 

:ها 

السايق //اي حجي هاي هي 

واشر السايق رضا ساله // وينها

     - - - ذيچ الگبالنه 

رضا //لا عمي مو هاي انا الگالي عليها صاحبي محتركه كلها 

السايق //لا حجي انا اعرف المزارع مزرعه مزرعه ماكو مزرعه محترگه خاف بغير مكان 

رضا //عمي وين 

السايق //يجوز بسفوان يجوز بالراحه بس اهنا ماكو 

رضا //زين عمي ما طوول تعرف المزارع هاي المزرعه للبيع 

السايق // لا حجي ما سامع يريدون ايبيعونها 

رضا //زين عمي الله يكثر خيرك رجعنا للسره 

ودار عليه رضا گلي //ابو نور هذا صاحبنا دلانه بالغلط ما سمعت الولد ايگلك ماكو مزرعه محتركه 

هزيت راسي وگتله :: هو اثول حتى العنوان ما اطا النه عدل 

السايق //جايين على مكان ما تندلونه

رضا //شنسوي عمي الخبزه يرادلها تعب احنه نشتري المزرعه المحترگه المفقس التعبان نعدلهن ونجهزهن 

ونبيعهن نحصل القاسمه الله وانت اذا تعرف لا تقصر انشد النه منا منا وهم تحصل القاسمه الله 

السايق//ان شاء الله حجي تدلل 

رضا //اطيني رقمك بعد عمك

وانطا السايق الرقم الرضا ونزلنه بالبصره اتشكرنه منه ورجعنا انا ورضا للفندق اتغدينا ع السريع 

ورحنا للدائره اخذنا السياره وطلعنه المزرعة حجي صالح وصلنه للمزرعه ونزلنا وره ما دگينا هورن 

اجه علينه ولد يجي عمره تلاثين شويه اقل ويا جهال اثنيين انا كل همي اباوع للكرفان واگول 

يعني ناديه ما چذبت گالت كرفان محترك اجه الولد سلم علينه رضا ساله

:عمي انت ابو المزرعه 

:اي اتفضل 

:اشكرك انت حجي صالح 

:لا عمي مو انا ابيش اخدمك اامرني 

:ما يأمر عليك ظالم بس اريد الحجي 

:والله هو ما موجود ليش عمي تره احنه نكفي ونوفي

رضا //وكفو منك ومن طيب اصلك بس عمك مو منا من المجر 

:اهلا وسهلا بيكم وبكل اهل المجر اتفضلو  

رضا //هله بيك لا والله غير مره ردنا الحجي بشغيله 

:اخابره الكم 

:خافه يبطي 

:اي تقريبا ساعه اكثر

رضا //لا عمي ورانه درب انريد نرد غير مره بس ابن الحلال الدلانه بي گال حجي وعده مخافة الله 

ويعرف بالمزارع 

:اي عمي الحجي زاروع ابا عن جد 

رضا //اي بويه گلت على عرفه اريدلي مزرعه بعد عمك عدي اولاد اخوي يتامه وعدهم شكم فلس وشباب هالوكت 

خاف يكضون الفلوس منا يصرفونها منا وهي الفلوس ما بيهن بركه گلت اشتريلهم مزرعه واخليلي بيها فلاح وهم

 اضمنلهم رزق حلال وهم فليساتهم ما يتطشرن

الصراحه لو كنت مخرج انطي الرضا درع التمثيل 

الفلاح //اي عمي الحجي رجال يخاف الله ويعرف هواي ناس يردون يبيعون مزارعهم 

رضا //زين بويه اطيني رقمه وانا اتصل بي 

:صار عمي 

:مشكور 

(الولد انطى الرقم ورضا سييفه ودار رضاعود اتفاجأ) اگلك بويه شني هذا الحرك

الفلاح //حجي هذا كرفان احترك قبل اسبوعين 

رضا //شني عمي ياهو الحرگه 

:عمي ما يندره اظن كهرباء 

انا جاوبت ::ايي مو الكرفان اذا احترك اي باب ما ينفتح اله يطيح من بحده خو ما بي ضحايا

الفلاح هز راسه //لا بوكتها چنت ماخذ عيالي ورايح الاهلي والكرفان هو الحجي مخلي اله والعايلته من يجون 

يگعدون بي بس من احترك ربك حميد ما بي احد 

رضا // الحمد لله والشكر ياالله بويه احنه نترخص 

الفلاح // عمي ما گعدتوما گمنالكم بالواجب 

رضا //تسلم عمي ماقصرت سلمنه ع الحجي وان شالله اخابره

طلعنه انا ورضا وهو يگلي // هاا ابو النور شلونه خويك 

  ابتسمت ورديت :: والله تسوه الف اغم على گولة عمتي جميله 

رضا ضحك وگلي //هاا سراج عرفت هسه ناديه ما تچذب 

اتحسرت وجاوبته :: بعد بعد ابو علي لا نستعجل 

رضا //تتصور ياسر هو ودا عليها يخطفونها 

هزيت راسي :: لا ابو علي ما اتصور

   رضا // ها وشلون 

::لان لو تشوف حال ياسر من يمك يصعب عليك صدگني مقهور من الصدمه عباله محترگه بالكرڤان 

رضا باستهزاء // خلي ايولي السگط وهسه شنسوي 

::هسه راح ابدي اول خطوه ولازم اطلع الحقيقه 

رضا// وجراد ما اعرف منوه 

::هسه خلي نعوف جراد لا تنسى بعده الكلب بغيبوبه

وصلنه للدائره وهناك التقيت بالمدير الي شرحتله الحاله وراويته الكتاب وهو اتفهم الموضوع وگلي 

- - - احنا وياك نعين ونعاون 

طلبت منه واحد كون ثقه گلي موجود وطلب ولد اسمه عبد العزيز عرفه بيه وگله تاخذ اوامرك من استاذ سراج 

گعدنا انا ورضا وعبد العزيز الي سولفتله انو انا لازم ما اظهر الي يد بهذا الشي الي راح اسوي

هو اتفهم وگلي //استاذ سراج بس اتاكدلي ياسر موجود لو لا 

::تدلل هسه 

خابرت هادي هو رد عليه // الو هلا سراج 

::اشلونك هادي 

:اهلا سراج 

::شخباركم 

:الحمد لله 

::شنو الاخبار

هادي حمحم //والله كلشي ماكو على حطة ايدك 

::اگلك هادي انا سولفت ويه كرم وگلت بلكي انت ياسر عمار مرتضى ترحون وياي 

هادي بكل برود // وين سراج نروح وياك 

::ليش كرم ما گلك 

هادي // گلي كرم بس بشرفك انا بايع ولدي اروح ادور على بت مياده بذيج المناطق عساها بالموت

::هادي هذا كلامك لو كلام ولدك 

جاوبني بعصبيه //لا كلامي او ولدي ما الهم كلام 

::انطيني عمار ياسر 

هادي // شتريد منهم سراج انا ما اخلي ولدي يرحون وياك 

::اي دانطيني اياهم مو اروح ابحدي ويگولون ليش ما گلت النه

:عمار بالجم وياسر طلع للكوفي 

::هاا دگول ما تريدهم يحچون وياي 

هادي //اي سراج انت تفر راسهم وانا ما بايع ولدي يرحون يدورون بلكي ينكتلون لو يتفجرون من وره الك...بت الگ...

::مو انا سمعت من كرم انت تريد تشيل 

هادي باستهزاء //لا عليمن اشييل وداعتك اعتبرها چلب ومات وهاي حنين اشوف الها صرفه 

:: واملاك ناديه 

هادي //املاكها تروح الحنين واخليها غصبن عليها توقعلي تنازل

انا باستهزاء ::والله لو ما ادري بيك تخاف چان گلت انت خطفت ناديه وكاتلها 

هادي //لا هي ميته ميته اذا بقت ما تجي احسبها ميته واذا لگيتها اكتلها غسل عار وكل شي ما عليه 

::زين خويه انا سويت العليه وما خليت مكان ممكن نلگاها بي ما دورته وتعرف انا من زمان 

عن الدائره وهم الوالده تعبانه بعد اعذرني راح اوقف البحث عنها وحتى الجماعه الي وديتهم للشمال 

هم اخابرهم يبطلون يدورون عليها بعد 

باعتبار انت ولي امرها وتگول ما عليه خلص هذا هو ابكيفك

هادي //والله سراج انت ما قصرت تعبت ويانه شنسوي بعد المفروض من يوم الي انعدمت مياده اخذهن اوديهن 

الخوالهن او اذبهن على اهل سلدار بس انت الله يسلمك سويت صحة نسب وامي تخبلت عليهن بنات عباس وشحده

اليوصل الهن 

::زين ابو ياسر فيمان الله 

:الله وياك سلم ع الوالده وموفق 

::الله يسلمك يوصل

سديته من هادي وانا حانق يعني هذا الرجال حتى غيره ما عنده راسا اتصلت بكرم جاوبني //هلا سراج 

جريت نفس ::هلا بيك كرم اشلونك 

:الحمد لله زين اشو خابرت زهراء تكلي من يوم الوصلتهم البيتها بعد لا اجيت ولا سآلت

:: اي والله بعد انت تعرف من زمان عن الدائره وشغل الفوك راسي 

كرم باستغراب //ها انت ابغداد ؟

::اي ابغداد ليش 

:لا والله عبالي بعدك اتدور

:: هسه توني سديت الخط ويه هادي على اساس شفت جماعه گالو يگدرون يوصلونه للمناطق ذيج 

كرم //ايي وشگال هادي 

::ما قبل يگول اخاف على ولدي واتصور حتى ما خلاني احچي وياهم بحجة عمار بالجم وياسر 

ما اعرف وين 

كرم //لا تزعل سراج همه ولده موجودين بس تعرف هادي يخاف عليهم 

::شنو كرم قصدك انا ما اخاف عليهم بس وداعتك هادي حاسبها صح

كرم // شلون يعني 

::يعني بكل الاحوال ناديه ميته اذا لگاها راح يكتلها وهذا حقه الشرف غالي واذا ما لگاها هم يعتبرها ميته وكل املاكها 

اول وتالي تصير الحنين وهو يعرف شلون يخلصهن من حنين 

كرم // ليش سراج دومك ظالم هادي 

::ايبااخ على اساس ما تعرفه الهادي يبيع امه على الفلس 

كرم // لا مو هيج بس حلال اخو من حقه

2

::والله ما اعرف كرم انا هم بعد ما ادور تعبت يا اخي تدري اليوم توسلت بمديري ينطيني اجازه ما قبل 

:ها يعني داومت بالدائره 

::اي كرم داومت بلكي باچر او عگبه اگدر انزل واروح اشوف عمتي واخذها يومين تلاثه يم امي 

كرم //اي والله سراج وبلكي تقنعها ترجع بعد انت تعرف الشباب اذا عشگو محد يردهم 

::هم صحيح ان شالله بس اشوفها احچي وياها ياالله فيمان الله 

:الله وياك سلم 

::الله يسلمك

سديته من هادي وكرم وانطيت الاوامر وراح عبد العزيز اتحرك على بيت هادي وصيته اهم شي يفتشون الغرفه 

والسياره مالته واهم شي موبايلاته وچانت الخطه ولد لابس مدني يدك الباب ويسال على ياسر وبعدها يدخلون ويفتشون

واهم شي الموبايلات مالاته يجيبوهن 

راحو وانا ورضا بقينا منتظرين خابرت زهراء وسالتها على عمتي وكالت هي يمها 

انا سلمت عليها وهي مو مثل كل مره عاتبتني ليش ما امر عليها لا هالمره كان كل همها الگى ناديه 

   وكان كلامها // عمه حملت الامانه من هنه زغار لاتعوفهن وهنه كبار

وره تقريبا ساعه او اقل اجو وجابو ياسر وانا ما خليته يشوفني همه بس جابو موبايل ياسر الي اخذته 

وطلبت من عبد العزيز ان يرسله للخبير يطلعلي بي الرسائل الي رسلهن بيوم الي اختفت ناديه وانطيته التاريخ 

والوقت التقريبي وگتله اريده

 يطلعهن اليه باسرع وقت ممكن حتى يكون عندي دليل ضد ياسر هذا كان كل همي اريد اتاكد من كلام ناديه

اما جهازها الي تگول عد ياسر فهذا ما لگو 

ياسر خلو بالحجز بدون ان يحچون ويا اي كلمه وهاي چانت تعليماتي 

اتصل عليه كرم انا راسا جاوبته 

::الو 

الو اشلونك سراج 

:: هلا كرم انا زين انت شلونك 

كرم //ها سراج

:: شبيك كرم انت متصل شنو لكيتوها 

بنفس الوقت اتصل هادي گتله ::خيير اشو هادي هم اتصل شنو لگيتوها 

كرم //لا جاوب هادي هو ايفهمك 

غلقته من كرم وجاوبت هادي ::الو ها ابو ياسر خيير اشو كرم هم جاي يتصل 

هادي بارتباك //سراج گبل ساعه اجت قوه واخذو ياسر 

رديت باستغراب :: لا بشرفك شنو قوه قوتيش ؟

هادي //ما اعرف اخذو ياسر وفتشو البيت 

::لا باالله تحچي صدك

هادي //اي ومن حاچيتهم ما جاوبوني بس راووني القاء القبض سراج شتگول اخابر ولد خالي جمييل 

نفخت :: لا شتخابرهم همه مشغولين انا اخابرهم واحاول اعمل جهدي بس لو تعرفلي منو الي اخذه 

هادي //والله ما ادري انا چان اتصلت ابمعارفي بس گلت خلي اخليك بالصوره 

::لا يا معارف لاتفتح على روحك باب ما نعرف ابنك شمسوي انا راح ااشوف شصاير وليش اخذو 

واذا يستوجب الامر انا اجي

هادي //اي والله سراج انت تعرف ياسر 

:: اي انا الاعرفه اطمن هادي سد التلفون وگول ان شالله 

هادي بخوف //ان شالله 

سديته من هادي ورضا گلي //ها سراج خابرك على مود ابنه 

هزيتله راسي وگتله :: يصير خيير بس كون لا گين النقال مالتها 

رضا //عده شوف وين ضامه ويجوز كسره ذبا

::مو اذا ما الگى الرساله يعني كل كلامها چذب وتلفيق

رضا //شبيك سراج شنو چذب وتلفيق والكرفان الي احترك هي حرگته شنو 

        لملمت حلكي وانا اتنفس بعمق :: والله ما ادري متشتت ذهني 

اتصل كرم وجاوبته ::الو ها ابو مرتضى 

كرم //ها سراج خابرك هادي على مود ياسر 

:: اي والله هسه ياسر حتى مو مال مشاكل 

كرم //وانا هم اگول بعد انت الي تعرفه 

:: كرم انا سالت ابو يگلي اجت قوه واخذته ومن سائلهم ما مجاوبينه

كرم //وهسه سراج شراح تسوي 

::هسه سده النقال من يمك وانا احاول جهدي حتى لو اضطر اجي للبصره 

كرم //تعبناك ويانه 

::شنو هالحچي هادي اخوي وياسر ابن اخوي

رجعنا للفندق انا ورضا بعد ان وصيت عبدالعزيز يدير باله ولو منو ما يجي ما يگله موجود اهنا ولا يرحوله 

ولا يشوفونه وبنفس الوقت يراقبونه 

وصلنه للفندق سبحنا وغيرنا ملابسنا وطلبنه عشا هالمره اتعشينا وشربنا چاي يمكن لان لگيت ناديه او عرفت بيها 

يجوز بريئه 

(ما عليكم بكلامي هذا احساسي مو رضا يگول المخبل ما علي عتب 😜😜)

صرت ادخن وانا متمدد ع الچربايه ورضا هم متمدد على چربايته او يمكن نام وره اكثر من ساعتين ونص 

خابرت هادي هو جاوبني //هاا سراج 

::الله يساعدك ابو ياسر 

:هلا بيك بشر 

::ابو ياسر سويت اتصالاتي باچراو عگبه يرجعولي الخبر واذا يستوجب حضوري احضر بس انت ما عرفت 

ابنك شمسوي

هادي //والله ما ادري سراج انت تعرف ياسر 

::اي اعرفه مو مال مشاكل بس 

هادي //بس شنو اكو شي 

::لا يااخي كل شي ماكو اريدك تسأل امه اخو يجوز صاير ويا شي يجوز مبتز شي من الشركه 

هادي // لا لا شتحچي انت سراج ياسر عايز ويبتز 

:: انا اگول يجوز والنفس اماره بالسوء زين يابه انا هم راح اكثف اتصالاتي وان شالله خير بس انت لا تسكت

 اسال اخته اخو امه ورجعلي خبر حتى من احچي احچي وانا مطمن

هادي //ان شالله سوينه زحمه 

::لا يابه كل زحمه ماكو انت هادي الله يساعدك منا بت اخوك ما خلينه مكان عليها ومنا هنوبه ابنك 

    والي معجبني ياخذون ياسر ليش وعلى شنو صدك هادي الله يكون بعونك 

هو اتحسر //الله يسلمك سراج 

::فيمان الله 

:الله وياك سراج مو تنسى حاول تعرفلي اي شي عن ياسر 

::ابطن عيني صدك چذب ياسر مثل ابني هسه الحچي ابيناتنا انت ما سالتلي امه اخته عمار اكيد واحد

 بيهم يعرف شي

هادي //اي سراج سالت كلهم ما عدهم علم باي شي

::وانت هادي ؟

:انا شنو ؟

::انت ابنك ما گايلك شي 

:مثليش سراج 

::مثل متعارك ويه واحد او طالعه علي سالفه بالشركه 

هادي //لا والله 

::بس عجيبه تگلي قوه وضاميين وجوههم وما سوو اي شي بس اخذو وفتشو غرفته وسيارته لازم اكو 

ان بالموضوع 

هادي //والله ما ادري 

::زين خويه انت لا يظل بالك تره انا ما گاعد دقيقه اگلك اجاني اتصال بعدين اخابرك

وسديته من هادي فعلا اجاني اتصال من عصام المسؤول عن حراسة المجرم گلي لحد الان ما انتبه لكن بدا يون 

اجه الطبيب حچى ويا هو ما رد الطبيب گال اموره تمام بس هو ما يرد لان خايف 

::هاا قصدك فبركه منه 

عصام //اي استاذ 

::خلص حتى من ينتبه ولا واحد يحچي ويا على ما انا اجيكم وخلو براحته 

:تمام

::اگلك محد اجه او سأل عنه 

عصام //لا ابد ولا اي واحد 

::زين عصام ما اوصيك تديرلي بالك واي شي يستجد راساا تخابرني 

:اعتمد استاذ 

::شكرا ما تقصر

اباوع الرضا نايم من كثر التعب بقيت الليل كله گاعد وانا احچي ويه نفسي 

::ايي ناديه صرت مثلج ما انام بالليل ادري بيچ هسه گاعده 

::وادري بيچ تبچيين على حنين وعلى نفسج بس لا انتي تبچيين على حنين اكثر طول عمرج حامله الهم ابحدج 

::تدرين بيه انا لازم اكتلج واغسل عارج وهذا الي راح اسوي بس بالبدايه اعرف الحقيقه وانتقم وبعدين افضالج

ما اعرف يمته نمت گعدت على صوت رضا الي يگلي //اگعد سراج مبين الليل كله ما نايم 

باوعتله وگعدت هز راسه //ما شاء الله ما ادري چم باكيت جكاير مخلص 

رحت للحمام واندك الباب جابولنه ريوك اجيت گعدت يمه وصرنا نتريك صبيت كوب چاي ثاني رضا 

لا بشرفكً مو توك شربت كوب حتى ما اكلت شي راح تموت چاي وجگاير 

جريت نفس وصرت ادخن واشرب الچاي بعدين گتله

::رضا خابر السايق الي وصلنه من الخور للبصره 

:ها وليش 

::لازم نساله على هذا الاسمه جراد بس بالبدايه نروح ويا بحجة نشتري او ندور 

:ايي صار خليها عليه 

::افتح الحاكيه 

اتصل رضا //الو 

السايق //الو منو 

:انا بعد عمك الامس جبتنا من الخور للبصره

هلا حجي هلا بيك 

رضا //هلا بيك تگدر تجينه تاخذنه 

::اي تدلل وين حجي 

رضا //شوف انا چنت بمعرض مال سيارات اشوفلي اسيييره وهسه انا واگفلك اباب فندق ال... بس كون تندله 

السايق //اي حجي نص ساعه وانا يمك 

:رمشلي من توصل 

صار

بدلنه وطلعنه من الفندق وگفنا بالباب وانا رحت اشتري جگاير ورجعت وگفت يم رضا ورمش علينه السايق رضا 

خابره واجه وره ما اشرناله صعدنا سلمنه علي وهو سأل رضا //عمي گلت رحتو للمجر 

رضا //اي والله هذا چان رايي تالي گلت جاي وجاي اشوف السيارات وبتنا 

السايق //وهسه وين اوديكم 

رضا //عمي انت گلت تعرف الزواريع بهاي المنطقه اريد انشدك على واحد 

السايق //اي حجي منو 

رضا //واحد عده مزارع وسيارات يسمونه جراد

السايق //حجي ما سامع بهذا الاسم 

رضا //ما يصير يگولون معروف بالمنطقه وخويو اسمه توفيق 

السايق //هااا خاف قصدك جريد 

رضا باوعلي //اي هو جريد 

السايق عكف وجهه وهز ايده وگال //عمي ياهو دلاك علي 

:ليش بويه 

:لا هيج ماكو شي 

انا جاوبته ::لا اكو وانت تعرفه 

السايق باوعلي باستغراب انا گتله:: ابو الشباب اتفضل

طلعتله هويتي وهو شافها صار يباوع الرضا ويباوعلي گتله ::اطبگ ولا تخاف 

هو طبك انا گتله:: اولا انت ما عليك واي شي تحچي النه شوف هاي الگاع اهنا اندفنه ما نگول انت الي گلته 

السايق //استاذ ما اعرف شي عنه

هزيت راسي ::اكيد وانا ما اتهمك واكيد انت سامع عنه اشياء لذلك انت اتخربطت امورك 

السايق //استاذ الي اعرفه هو صاحب طلايب ومو خوش انسان 

رضا //شلون يعني

السايق //سامع يشتغل بالتهريب وهم يبيع استغفر عرك ومخدرات 

::ها يعني مو مزارع 

السابق //لا استاذ بس اكو ناس تجي للبر وتشتري المزرعه حتى يصير الها وكر 

::تمام هسه اريدك تدلينه طريق المزرعه 

السايق //اي استاذ مي خالف بس انا سامع بيها كامرات وعنده زلم وسلاح 

رضا //يعني رئيس عصابه 

جاوبته ::تمام انت دلينه الطريق وما عليك

صعدنا ومشى بينا مسافه وگال شوف استاذ على ايدك اليسرى تنزل ع الترابي وتمشي ع اليمين مو اول مزرعه 

ولا الثانيه ولا الثالثه الرابعه داير ما دايرها تل ترابي 

::اكو ورا مزارع بعد 

اي استاد اكو 

:: زين يابه لووف ورجعنا مشكور ما قصرت

هو لاف بينا وتمينا ساكتين وصلنه للبصره وانطينا اجرته رضا گله 

:عمي لاتزعل علينه بس شغلنه يحتم هيج نتصرف 

:لا استاذ ما صار شي 

:كثر الله خيرك واعذرنا 

گتله ::واتمنى الي صار ما ياخذ بي خبر ايا كان 

السايق //لا استاد صدك چذب 

::فيمان الله 

:الله وياكم

نزلت ورضا سلم وباوسه وخله بجيبه بعد فلوس ورحنا للفندق دخلنه للغرفه وگتله //رضا اتصلي بام حسين 

باوعلي ولملم حلگه //ام حسين لو الگاعده يمها ام حسين 

اتقربت منه وگتله ::مو ساعات اگول عليك بطران تزعل 

:لا عمي انت التزعل 

واتصل //الو ها شلونج خويه 

الله يسلمج اطلعي بالطارمه حاچيني 

ها خوش اشلونها البنيه 

هاج وياچ سراج يريد يسلم عليج

::الو اشلونج ام حسين 

:هله خويه هلا بيك 

::شلون (اتحسرت وگلت )ناديه 

ام حسين //والله البارحه گوه اكلت الها لگمه واطيتها الدوه ونامت بس ياخويه الليل كله مصخنه وتتحلم وساعات

 تگعد تصرخ وتگول فدوه عمو هدني الله يخليك انا ما مسويه شي وهيج انت مثل اخوي (وسكتت)

::احچي ام حسين

ام حسين //خويه البنيه تگعد وتصيح وانوب جسمها شلون الخشبه عبالك واحد كاظها ولنوب صخنت وانا الله شاهد 

الليل كله اسويلها كمادات 

جريت نفس ::مشكوره تعبتج وياي 

:تعبكم راحه وهي من گعدت ما گامت من الفراش ومدنگه وتبچي وگوه شربت كوب حليب واكلت شويه خبزه 

::واخذت دواها 

ام حسين //اي اخذته وانا ضربتها الابر 

::ها زين تعرفين ام حسين ولو زحمه عليج وديلها النقال 

:اي تدلل

هي خلته على اذانها سمعت بس نفسها انا گتلها بنتر ::الرجال اسمه جراد لو جريد 

هي احس بيها فزت من مكانها رغم صوتها مبحوح وكالت 

... ... اي هو هووجريد 

اتنفست ونفخت ::زين اسمعيني اكلي زين واخذي علاجج سمعتي 

هي ما ردت بس سمعت صوت شهگتها  

غلقته واتقرب عليه رضا وگلي //وهسه شتسوي

باوعتله وخابرت الولد المكلف يرجعلي المحذوف من شريحة ياسر گلي كلهن رجعتهن 

طلعت بسرعه ورضا يگلي //اي غير تفهمني شكو 

::امشي وانت تفهم

ركبنا السياره ورحت للدائره وهناك المهندس انطاني النقال وخصوصا الرسائل والاتصالات باليوم الي اختفت بي ناديه 

لزمت النقال وانا متوتر وريگي يابس عيوني تطلع منها نار وايدي ترجف رحت ع الرساله شفتها واهنا صار گلبي 

يدك قريتها چانت الساعه 12الا ربع كانب الها 

ناديه اطلعي انا اباب الكليه واگف عندي موضوع جدا مهم وياچ

گعدت وانا منهار بين الحزن والفرح ولو الموقف مو مال فرح لكن عرفت بان ناديه ما تچذب وسواءكان 

ياسر متقصد او لا فهي صارت الضحيه اجه يمي رضا گلي //سراج شبيك شكو 

راويته الرساله هو قراها //. عرفت البنيه مظلومه الله يساعدها شتريد تحمل 

جاوبته وانا اهز براسي :: هسه بينت تص الحقيقه باقي النص الثاني 

رضا // يانص سراج 

باوعتله ::رضا لازم نطلع حنين من بيت هادي بدون ما يشكون

رضا //ليش انت شاك هادي اله يد بالي حصل 

::هسه ما احكم بس انت لازم تكون وياي 

:وانا حاضر صدك چذب بس آشر 

::تسلم ما اعرف شلون اجازيك 

 رضا حنچه وكال // تجازيني من تطلع الحقيقه وتنصف هاي المسكينه

اتصلت بهادي راسا جاوبني گتله ::ها ماكو شي 

هادي //لا والله سراج وانت 

::انا كل شي ما حصلت هسه انا بالطريق جايك فد ساعتين انا يمك واشوف شلون اتصرف 

هادي //هلا بيك سراج 

::اسمعني هادي تگعد ابيتك ولا تحاول تتصل باحد لان كل شي ما راح تحصل انا بطريقتي الخاصه اعرف اوصله 

هادي //اي والله سراج اعتمد على الله وعليك خطيه امه راح تتخبل 

::الاعتماد على الله ان شاء الله بالليل يمك فيمان الله وگل الامه لا تخاف ان شاء الله خيير

اخذت النقال واشرت الرضا نطلع ورحنا للدائره يم عبد العزيز سالته على ياسر گلي 

محد وصله وهو هم ما طلب اي شي ولا حاول يسال على شي 

هزيت راسي وجريت نفس بعدين اشرت الرضا والعبد العزيز يگعدون وفهمت كل واحد بيهم شنو راح يتصرف 

وشنو يحچي واهنا وصيت على غدا يودونه الياسر وبعدها طلعت انا ورضا وفهمت عبد العزيز على اشاره توصله 

من عندي حتى نسوي خطتنا

طلعنا انا ورضا واتصل كرم رديت

::الو هلا كرم 

:هلا بيك سراج هادي گلي جاي بالطريق 

::اي شاسوي كله الخاطر هادي والخاطرك 

كرم //ليش سراج شصاير ويه ياسر ؟

::ما اعرف شگد حاولت افهم شي محد يقبل ينطيني جواب لذلك قررت اجي واشوف شنو صاير

كرم // سراج اذا تعرف شي گلي 

:: اذا اعرف شي ليش اضمه. كرم كل شي ما اعرف محد ينطيني جواب انا بصراحه متخوف 

كرم //. متخوف من شنو سراج 

:: بس لا تحچي يم هادي الولد خاف متورط بصفقه مخدرات دولارات مزيفه تهريب اثار غسيل امواال 

كرم // انت شتحچي سراج ياسر لو اشوفه بعيني ما اصدك 

:: حتى انا وداعتك لكن مستغرب لان كل الي اساله ما ينطيني جواب

كرم // سراج ما اوصييك تره ياسر خطيه انت الي تعرفه 

:: راح اسوي كل الي اگدر علي وان شاالله خير 

:زين انا راح اروح البيت هادي وانتظرك اهناك 

::اي رووح خطيه هادي يگول امه كاتله نفسها 

:اي سراج امه كاتله روحها واخواته خطيه 

::اي خطيه ان شاءالله ساعتين تلاثه واجي كرم طمن هادي وانا راح اعمل جهدي حتى اعرف هو وين

كرم //الله يطمنك ويخليك سراج دومك انت شايل همومنا 

جاوبته ::ليش ننسى الربه والعشره افه عليك فيمان الله 

:الله وياك توصل بالسلامه 

::الله يسلمك 

رضا يباوعلي وگلي //هاي كلها على مود ايش 

جريت نفس وگتله ::هاي كلها حتى بس اامن على حنين واگدر اطلعها بدون محد يشك 

وتالي انتقم من كل الي اذوها واحد واحد

رضا باوعلي /= وناديه 

:: شبيها 

رضا // تنتقم الها لو منها 

سلهمت عيوني وما رديت حچييت ويه نفسي :: ناديه بت روحي كل الي اسوي الخاطرها

//////