رواية اغفري لي الفصل الواحد والخمسون بقلم أوتار حزينة
_______________&______________غٌوِآلَيِّ3مَرآتّ نِزِّلَتّهِ بِصٌوِرةّ وِمَآ نِزِّلَ آلَآهَِّسةّ نِزِّلَتّهِ بِدِوِنِ صٌوِرةّ
غاده
شفته راح للكنتور عرفت يريد ياخذ سلاحه
صحت
«،،،لااا حمزه عوف سلاحك
رحت علي بسرعه وصرت گدامه جرني
بقوه وشمرني على القنفه عمه مهدي طب ويا جعفر وموسى لزموه من فتح الباب جده صاح بي
«،،،شتريد تسوي تجتل الولد وتبلي روحك
«،،اااي اجتله واجتل ويا عااارنا الي گمنا
نتعير بيها
گلبي هبط من سمعت شحجه كلت
بخوف
««،حمزه لاااا عووفهم ولا تفجع اخويه بزهره
«،،وولج هووو السبب هو الي دمرنا وخلانا بحلك
اليسوه والمايسوه والجتله بي هووو
وذيج الساقطه
صاح بيه ،،،،،هم لازمي واشوفه تخبل ماظل
عقل براسه علي كام يبجي بصوت
قوي رانيه اخذته وطلعت
من يمنا الكل حاول
يهدأه بس هو
ماجان يسمع احد فقد وكام يدفع بعمه والولد
يريد ياخذ سلاحه ماخلوه اخذو بالقوه وطلعوه من الغرفه اسمعه يغلط ويفشر ويهدد طلعت وراه ابجي علي وخايفه من تهديده اخذو للمجلس
اسمع جدو يهدي بي وعمامه
«،،شلون يااربي ماراح نخلص من هااي السالفه
بيبي حجت كعدت تبجي وتضرب
على رجلها
«،،سوويتي الي براسج ومحد وكع بيها غير احنا
وهاااي شوفي الجنت خايفه منه
صار تعيرنا بيج والولد
كام يريد يذبح
من وراج
غطت وجهها بفوطتها تبجي رانيه اجت
شايله علي يبجي كالت
«،،ابنج ماجاي يسكت
اخذته مااعرف اهدي ابني ماادري ابوه الي
ظل يهدد ويغلط ويفشر ابني ماسكت
ظل يبجي بيبي كالت
«،،ولج اامشي مناا الولد راح يصير بي شي
من وره صياحه لابوه
«،،خايفه لايروح يگتل اخويه وزهره
جاوبتها ابجي ردت
«،،لاا ماراح يخلو يطلع كلها يمه
رانيه جاوبت علي شد بالبجي بيبي حجت
«،،،يمه ااخذي منا وسكتي لا يروح يصير بي
شي من هالصياح
اخذته ورحت للغرفه طبيت اهز
بي وجسمي كله يرجف خايفه يطلع ويروح يسوي الي كال علي
علي شد كلت
«،،،شبيك ياابني ووي قهر ابوك شديت
كعدت وبديت ارضعه بالاول ظل يبجي بعدين سكت وبده يرضع،،، دموعي نزلت وكمت ابجي
على حمزه لان جان يصيح ويحجي بحرگه
دم عرفته هو هسه احترك بنار لان تعير
بسالفه زهره
وره دقائق ماسمعت صوته گطعت الرضاعه
عن ابني كمت شايلته طلعت رانيه اجت صحت بخوف
«،،وين حمزه
«،،،لاتخافين اخذه جعفر لبيتنا
«،،عليج الله خما راح على اخويه وزهره
«،،لا ماراح جدي ماخلاه وحلف علي اذا طلع منا
يزعل علي وبعد مايحجي ويا
حجت هيج وكملت
«،،،امشي خلي علي بفراشه خطيه غفى
من حجت انتبهت ابني ساكت ونايم رحت
للغرفه خليته بفراشه غطيته
ورجعت عليهن سألت
«،،شصااير فهموني وهذوله شبيهم وي قاسم
«،،،شاحجي ولج والله هذوله ولد عمامي مايجي
من وراهم غير بس الطلايب ووجع
الراس
رانيه حجت بغضب وكملت
«،،،شوداك عليهم وليش طبيت بستانهم
««،اي واذا طب شصار يعني
«،،صار الشفتي لان احنا من زمان مو صلح وياهم
«،،،ليش
سالت بيبي ردت
«،،يمه ذوله من زمان رادو ياخذون الوصله الي
يم النهر بحجه تعود الهم بس ابو حمزه الله يرحمه ماخلاهم ووكف بوجههم هو والولد وجدج
«،،قصدج رادو ياخذون جزء من بستان حمزه
««،اي يعرفون تسوى هوايه ورادو ياخذوها
غصب بس عمي ماخلاهم
وصارت طلايب جبيره
بينا وبينهم
رانيه ردت وكملت
«،،وصارت كعده شيوخ من ورة هالشي وجدي
طلع الطابو القديم الي باسم جدنا الجبير وطلع
البستان من يم النهر ليم الشارع كله لعمي
علي بس عاد هم ظل حقدهم بگلبهم وظلو كل فتره
يسون مشكله وهاي شوفي قاسم جابها النا
وهو يعرف المشاكل الي بينا
««،،شادعي عليج يازهيره من الله لايرضى عليج
فضحتينا وخليتنا نصير علج بحلوك الشمات
بيبي سكتت وكامت تبجي كملت بخنكه
«،،ماغزر بيج الربى ولا غزر تعب هالمكرود
وياج كسرتي ظهره وخليتي
عايش ودمه محروك
وخايفه علي لايروح
يبتلي بدم واحد وذيج الساع
شااحصل انه لو سواها اخسره
اخسر رباي من وره وحده ماخافت
الله بينا
شاريد احجي والسبب اخويه والجنت خايفه منه صار وحمزه تعير بيها والله اليستر منه لان اعرفه هسه هو تخبل ماظل عقل براسه من وره السمعه
ردت اروح علي بس ماكدرت لان اعرف
راح اسمع منه نفس الكلام كله من
اخوج هو السبب بالكاعد
يصير بينا دموعي نزلت ورجعت لغرفتي كعدت
هناك ابجي بخنگه
رانيه اجت شافتني ماحجت شي وشتريد
تحجي والكاعد يصير بيهم
سببه اخويه
سمعت جدو صاحها راحت علي ظليت
وحدي دمعتي بعيوني وره ساعه هو طب الوجه مطعون وصاير دم بيبي اجت وراه تريد تحجي نتر
باعصاب
«،،مااريد ااي حجي وخلوني بقهري
ماحجت شي بس القهر جان تارس ملامحها
طلعت من يمنا وسدت الباب
من كعد على القنفه كمت
حجه
«،،،وانتي هم ولا جلمه اسمع منج عوفوني
بقهري بلكي يگتلني بهل الليله
واروحن باجر بالتراب
«،،،لا اسم الله عليك ليش هيج تحجي
حمزه
«،،،وولج اااخ
صاح واختنگ رحت علي بسرعه حظنت جتفه
وكمت ابجي ردد
«،انه ولج اتعير اانه ياااربي اخذني وخلصني
من هالعار
«،،،،كافي لاتحجي هيج والله بس يصير بيك
شي اني اموت وراك
وخرت منه باوعت اله ملامحه كلها
قهر والعيون صايره دم ومغوركه كلت
«،،شنو الي يريحك گلي شاسويلك حتى اشيل
منك هالقهر
««،ولج شسووين بعد وانتي انطوج اليه بعار ذيج
رد وكام يرجف من غضبه كمل
«،،ليش ولج لييش مافكرتي بيه اخوج مااافكر
بيج مافكرو بس بأرواحهم ماكالو
اكو ناس راح تتاذه من
وراهم
سكت باوع عليه وكمل بحركه دم
«،،شفتي تعيرت بيها والجنت خايف منه صار
وين الموت ولج وينه خلي يجي ياخذني
شكو باقي والمن لهل العار الي
راح اتعير بي بعد وبعد
كمت ابجي علي ورافضه يصير
بي شي ومااريده يدعي على
روحه بالموت لان اعرف
بروحي بس يصير
بي شي اني
اموت وراه
كام لزمته كلت
«««وين رايح
«،،اريد اطلع اهج ولج مخنوك واحس بروحي
راح اموت
«،،اسم الله عليك يومي قبل يومك
مشى يريد يطلع وكفت كدامه وحجيت
بتوسل
«،،،حمزة لاتطلع وانت بهل الحاله ابقى يمي
واالله ماراح احجي شي بس ظل
كدام عيوني والله اموت
اذا صارلك شي
دار روحه ولزم راسه كام يون
««اخ يااابويه ااخ ولكم ليش تعيلون على الاوادم
وحنا هالبله بينا هيج اااحسن
صاح بخنكه وكمل
«،،هيج احسن تعيرنا بعارنا وبعد وبعد
باوع عليه ردد بقهر وحركه دم
«،،وبعد غاده راح اتعير
شاحجي ياربي وشلون اكدر اشيل هالقهر منه
وشلون اكدر اواسي واخويه سبب قهره وعذابه
فتح الباب طلعت وراه
راح للغرفه الي گبال
غرفتنا وسد الباب
بقوه
بيبي جانت بالصاله رانيه يمها وجعفر وعمو
مهدي وولده جدو واكف يم باب
المجلس مقهور وحاله حال وذاك الي
سوه المشكله ماشفته لا هو ولا ابوه ولا عمه فاضل ولا ولده عمو مهدي كال
«،،،عوفو ولا حد يحجي ويا خلو يهدأ وحده
ماانطاني گلبي اعوفه بهيج وضع بس اعرف
هسه اني مااكدر اسويله شي رجعت
لغرفتي سديت الباب
رحت كعدت ابجي
من شفته شصار بي انمرد گلبي علي وعرفت
هو ماراح يكدر ينسى السمعه من
هذا الحقير
وره مشوار صار هدؤ كمت فتحت الباب اباوع لغرفته ساده وريحه الجگاير فايحه طلعت
ماكو احد بالصاله بس سمعت
صوتهم يحجون بالمجلس
رحت طبيت علي
جان كاعد وساند راسه ليوره مغمض والجگاره بايده فتح شافني
كال
«،،،،غاده اطلعي وعوفيني وحدي
«،،،مااكدر اتعب اذا اظل بعيده عنك
جاوبته وكعدت يمه اخذ نفس من الجگاره
وذبه بحسره ردد
«،،روحي يم علي ظل وحده
«،،خليني يمك والله ماراح احجي شي
نتر بغضب
«،،كومي خلي نولي لغرفتنا
كام بسرعه وطلع كمت وراه طبيت غرفتي
كال
«،،،طفي الضوه خلي انخمد بلگي مااكعد
سديت الباب
وطفيت الضوه تمدد رحت تمددت يمه جان منطيني ظهره اسمعه يتنفس بقوه ويذب
حسره وره اللخ
خفت علي لايصير بي شي من القهر مديت
ايدي وكمت افرك براسه واقره
ايات قرآن نزلت ايدي
على جتافه افرك
بيهن واقره
مرت ساعات هو بهل الوضع لا هو نام ولا اني
وجه الفجر جسمه المشنج فك ونفسه صار احسن
باوعت علي غفى بس القهر
جان تارس ملامحه
ووجهه صاير
دم
الصار بعدين هي كعده بينهم وبين بيت متعب
والشيوخ ماقبلت على عزيز يحجي
بسالفه العرض وصارت علي
ذيج السالفه الجبيره
لان زهره ازوجت
وانسترت
بس انسدت لان قاسم جان هو الي متعدي
عليهم ذولاك اعتذرو من عدهم وابو
قاسم اعتذر عن تصرف
ابنه حمزه ماراح
ولا كعد وياهم
بس بعد الصار هو تغير كمت اشوف الحزن
بعيونه والقهر تارس ملامحه كلامه
صار قليل واكله هم
حاولت اطلعه من هالجو بس مافاد حتى كام
يتاخر بره البيت يرجع مهموم وتعبان
بهل الايام انتبهت اني عندي اعراض حمل نفسي كامت تلعب وكام يصير عندي هبوط
جان عندي جهاز حمل لان مشتريه كم واحد
وخالته جوه ايدي لان دائما انسى
حب المانع الصبح كعدت
هو ماكو طالع
حتى ريوك كام مايتريك رحت للحمام
سويت التحليل انتظرته وره مشوار طلع خطين
واحد احمر طوخ الخ افتح منه
عرفت اكو حمل لان طلع
بخانه الاختبار سي
انقهرت وضجت لان علي بعد صغير ومو مال
حمل وهو بهل العمر بس كلت خلي اتاكد
واسوي تحليل دم بلكي يطلع
غلط
ماحجيت هالشي لاي احد كلت اذا طلع
حمل ذيج الساع احجي
يمامه
جنت عبالي اني مااعرف احب ولا عندي
گلب يعرف يحب من وره الضيم والقهر الي
جنت عايشه بي بس عرفت اني
مو هيج من حبيت مهيب
وعشگته عشك كلش
جبير
وهو الي خلاني احبه هذا الحب لان شفته
شسوه وشلون ذبح روحه حتى احبه وابادل
نفس الشعور
بس هذا الاحساس
الحلو جان ويا شعور خوف من الجاي
لان اعرف بروحي اني شضامه علي وهم خفت
لا نظراته تفضحه كدام اهله
ويعرفون شنو الي بينا
كلت لازم نرجع لبيت خاله حتى اخلص من
هالتوتر والخوف الي صيطر عليه
وخلاني اعيش بقلق
واجت من الله بنفس الشهر الي
بدت قصتي اني ويا ولد الحجيه اخذو نسوانهم
وولدهم وسافروا لتركيا يظلون
اسبوع ويرجعون
وراهم بيوم اخت خاله ام ياسين خابرتها تريد
تجي تظل يمها كم يوم كالت للحجيه
ردت
«،،،يعني تروحون وترجعون موو
«،،لا ام منير نرجع مثل قبل لان انتي بعد ماتحتاجينا مثل قبل لان الحمد لله وضعج صار زين
انقهرت وصفنت على يمامه ردت
«،،،شلون ام ياسين مو اني والله تعلمت على
يمامه وهم تعلمت عليج انتي
وحنين
«،،،،،احنا راح نجي عليج يوميه قابل نريد نگطع
بيج
سكتت تباوع عليه وعلى يمامه ذبت حسره
كالت
«،،والله ماأريدجن تروحن من يمي بس شاسوي
انتي تريدين ترجعين لبيتج واختج
جايه عليج ومايصير اجلب
بيج بعد وماقصرتي
لا انتي ولا حنين
وخلفه عليجن وكفتن وكفه حلوه اليه
وماراح انساها الجن طول العمر
«،،لاتحجين هيج احنا خوات وانتو هم
ماقصرتو ويانا بشي
«،،والله انتو صرتو اليه اعز من الاهل والله يشهد
عليه احسج من صدك اختي وحنين
عبالك وحده من بناتي لو بنات
ولدي
حجت هيج وكملت بقهر من باست يمامه
«،،وهالبنيه من اول ماشفتها حبيتها وعبالك
الله زرع حبها بگلبي
ضحكت الها من شافتها كامت تبجي
تردد
«،،شلون راح تعوفيني يبعد بيبي والله تعلمت
عليج والبيت راح يفرغ عليه بس
تروحين من عدنه
عيوني غوركت خاله ام ياسين ردت
«،،والله بس تروح اختي لا اجيبها
ونجي عليج قابل نريد نگطع بيج ياام منير
هزت راسها وردت
«،،لا حشاج والله انتي مو گاطعه ولا حنين
جاوبت وكملت
«،،ديربالج عليها من ترجعون دفوها زين واي
شي تحتاجين البيت كدامج
اخذي بالف عافيه
«،،تسلمين والله عدنا خير من الله انتو مامقصرين
ويانا باي شي
جاوبتها وكملت وياي
«،،،يله يمه روحي لمي غراضج وغراض بنتج
راح اخابر السايق حتى يجي علينا
لان ام حاتم تريد تجي بعد
شويه
«،اي خاله
رحت للغرفتي الم بغراضنا والدمعه بعيوني اريد
اظل على طول يمه وقريبه منه بس مااكدر
لازم اروح من كدام عيونه
لان صار صعبه وجودي
اني ويا بنفس
المكان
حتى ماخابرته ولا كتله اني راجعه لان اعرفه
راح يرفض هالشي واني جنت اريد
بس اطلع منا
طلعت الجنطه بالممر باوعت على غرفته
مشيت الها طبيت وصفنت على كلشي يخصه
هدومه بالزوايه جربايته
عطوره على الميز
رحت اخذت عطر دائما يخلي منه وقوي
ومميز شميته بنفس طويل
ودموعي نزلت
شفت على الجربايه لفاف خفيف دائما يخلي
على رگبته من يروح للدوام عرفته
ناسي اخذته وخليت من عطره
وطلعت ضميته بالجنطه
مالتي بين هدومي
رجعنا وي سايق تعرفه خاله ودائما جان يوصلنا
لبيتهم ويرجعنا لبيتنا
اول ماطبينا علگت صوبه يم ياسين لان جان بارد ثلج والعفونه تكتل
خليت يمامه بالغرفه وغطيتها زين لان جانت
نايمه وهم علگت يمها صوبه خاله
كالت
«،،،يمه اروح اجيب ريوك وارجع
«««تمام اني راح ابدي انظف
«،،،،اي واغسلي الحوش لان كله تراب
«،،،اي خاله
اخذت عبايتها وطلعت علكت التلفزيون لياسين
وبديت انظف غرفته وراها غرفه الكعده
الي انام بيها اني ويمامه
اني اغسل بالحوش الباب اندك لبست شالي
رحت فتحته جانت اخت خاله
وياها شاب يشبهها اول مره
اشوفه وياها كالت
«،،،شلونج يمه
«،،،،هلا خاله تفضلي
طبت سالت
«،،،وين ام ياسين
«،،راحت للسوك هسه تجي
«،،،يمه اني اروح
الولد حجه وحسيته ضايج
«،،وين تروح طب من تجي خالتك سلم عليها وروح
«،،مايحتاج يايمه
«،حاتم عيب توصل لهنا وما تسلم عليها
خلقته انگلبت بس ماحجه شي مااعرف ليش
حسيته شايف روحه ومغرور
وتأكدت من هالشي من طب وياها يباوع
على البيت بنظرات واحد مو عاجبه
الكاعد يشوفه
اخذتهم لغرفه ياسين
راحت ليمه باسته وكالت
««،شلونك يمه ياسين
رفع ايده للسما هو حجه
«،مادكلي انت شلون عايش بهل البيت الكله
رطوبه وعفونه
امه خزرته فر ايده وكعد على كرسي
«،،اروح اجيبلكم مي
طلعت من يمهم ورحت للمطبخ غسلت الصينيه
وخليت كلاصين مي جنت اعرف خاله
عدها اخت وحده وواخ واحد
هذا مات قبل لااجي يمها وجان لايسال عليها
ولا يعرفها وهاي اختها جانت تتصل دائما عليها
وتسال بس ماشفتها غير مرتين مره
اجت وحدها وهالمره اجت
وي ابنها وتعجبت من كالت اريد اظل يمها كم يوم لان هي بيتها بغداد كلت بس لاصاير
شي بينها وبين چنتها لان سمعتها
مره تشگي منها
طلعت بالصينيه قدمت مي ورجعت للمطبخ خليتها على السنك سمعت الباب انفتح
طلعت خاله اجت
سالت
«،،،ها يمه اجتي ام حاتم
«،،اي خاله وكاعده هي وابنها يم ياسين
ذبت العبايه وكالت
«،،هاج العلاكه وسوي ريوك النا والهم
«،،،تمام
مشت من يمي وراحت ليمهم اني بالمطبخ
سمعتها تحجي
«،،ظل يمه تريك ويانا وبعدين روح
«،،متريك بالبيت ولازم اروح لان ورايه شغل
ابن اختها جاوبها وطلع حضرت الريوك
ووديته للغرفه طبيت شفت
اختها تبجي وادكول
«،،تعبت خيه وشفت رباي راح لغيري
سكتت من شافتني خليت الصينيه كدامها
وكلت
«،،،خاله اني اروح اكمل غسل الحوش
«،،،عوفي وتعالي فگي ريكج ويانا
«،،لاا مااريد هسه مااشتهي اروح اكمل ومن تكعد
يمامه اتريك وياها
«،،براحتج يمه
طلعت من يمهن وعفتهن ياخذن راحتهن بالحجي
كملت الحوش لميت الصونده وخليتها
بمكانها
طبيت الغرفه الي بيها يمامه بعدها نايمه
سديت الباب ورايه رحت
طلعت جهازي من الجنطه شفت مهيب متصل
وداز هوايه رسايل على الواتس
قريت
«،،حنين انتي وين وصدگ رجعتي لبيتكم
«،،يولي مااجاوبين وين ذابه جهازج بير
برهوت
«،،شلون يعني لا اتصال اجاوبين ولا كاعد تردين
على الرسايل
«،،ولج وينج صاير شي بالقران راح اجي
عليج
«،،ااني جاي
فزيت من قريت اخر شي اتصلت علي رد
بعصبيه
«،،هاااي وينج وليش مااجاوبين
«،،،انت جااي
«،،اااي واذا انفصلت وتعاقبت فهو من وراج
«،،،ارجع واعقل
«،،،وين اانتي
«،،،بيت خاله
«،«ليش رجعتو اله
نتر بيه بعصبيه ذبيت حسره وجاوبته
«،،غير بيتنا ونرجع اله يعني خما نظل يمكم
على طول
«،،ولييش ماحجيتي ماگلتي انتي موليه بهل اليوم
«،،صارت فجأه وبعدين انت ليش صاير عصبي
وتغلط تره اول وتالي احنا لازم نرجع
لهنا
«،،لااان طلعتي بدون اذني وماكلتي اليه انتي راجعه للبيتكم
رد بعصبيه عرفت ضاج لان عفت البيت قربت
رجلي من الصوبه رديت بهدؤ
«،،مره الخ اگلك
سكت كملت
«،،ارجع وكافي خبالات سياده النقيب
«،،اني اعلمج ولج خلي تگضبج ايدي والله
فلا ارحمج والا اشوفج الخبالات
على اصولها
سكت بعدين كال
«،،شلون ارجع اليوم للبيت وانتي ماكو بي
ولا يمامه والله وحشه راح يصير
بدونج
«،،تحبها ليمامه
سالت رد
«،،شلون مااحبها وهي قطعه منج ولج
والله احسها عبالك بنتي مو بنت غيري
عيوني غوركت كمل
«،،واتمنى اليوم قبل باجر اشوفج انتي وياها
بغرفتي حتى من صدك ارتاح ويبرد
گلبي
جان هو اليحجي واني اسمعه لان كلما يصير
كلام بينا كلشي يتخربط بي اظل اذكر
اني منو وشلون انهزمت من
اهلي
ومرات حتى مااسمع كل كلامه لان الذكريات
السوده تسحبني بدوامه وتخليني
اذكر كلشي صار بيه
«،،،الو حنين
«،،هياني كاعده اسمعك
«،،شوكت ترجعون
«،،،من تروح اخت خاله نجي
«،،،وشكد تريد تظل
«،،كم يوم
«،،واني شنو اظل ايام مااشوفج
سكتت هو كمل
«،،،انتي تعالي وخليها هي يم اختها
«،،،لا مهيب مااجي
«،،ليش حنين مو جنتي تجين وحدج من هي
ماتكدر
«،،تغير الوضع
سكت وبعدين سال
«،،شنو الي تغير
«،،مهيب انت تعرف اني على شنو جاي احجي
««،،اريد اسمع منج
ذبيت حسره وورديت
«،،اني ردت ارجع لهنا من وراك لان شفتك ماجاي
تضم هالحب عن عيون اهلك وخفت
لايعرفون شنو بينا
وتصير سالفه
جبيره
«،،يابه انتي ليش خايفه تره اني اذا اريد
اسوي شي اسوي ومايهمني
اي احد
«،مهيب ذوله ابوك وامك واذا حجوا فهو من
حقهم لان انت ابنهم واعرفهم
يريدون الك الي احسن
مني
«،،واني مااريد غيرج
«،،اعرف والله اعرف بس
«،،بس شنو حنين فهميني يعني اني جاي
احس بروحي اني الي ذاب نفسي عليج
وانتي تجرين بظهرج
«،،،لاا والله مو هيج
«،«عجل شنو هالكلام الي كل فتره اسمعه منج
«،،هذا واقع مهيب
«،،لا مو واقع لان لا اني اول واحد اخذ ارمله
ولا اخر واحد راح ياخذ
غمضت عيوني ودمعتي نزلت كمل
«،،،،،حنين انتي ماعليج باهلي اني اعرف شلون
احجي وياهم وهم يحبوج ومن يشوفني شكد
احبج وشلون رايدج راح يوافقون
عليج
«،،مااعتقد وراح يكرهوني ويشوفني وحده
استغلت طبيتهم وضحكت على ابنهم
«،،،ااستغفر الله ياااربي
صاح بغضب وكمل
«،،ولج بابا افهمي ااني مايهمني احد لو كلها
وكفت بوجهي اخذج اخذج لو
اعرف اخليج بيت وحد
«،،واني مااقبل تعوف اهلك هم شعدهم غيرك
اجي اني واخذك منهم ليش
«،،اكلج انتي شبيج احجي كولي شنو تورطتي
من كلتي اليه اني احبك
««،لاا مو هيج الحجي
«،،لاا اني جاي احس بهذا الشي لان شلون
مااسهل علينا زواجنا انتي جاي
تصعبي
«،،مهيب والله اني احبك واموت عليك
بس
«،،،،هييي هاااي البس الي راااح تذبحني
صاح وكمل باعصاب
«،،كلمااا احجي وياج قااال وضعي وعمل
اهلك احجي واكول راضي يااااناس
والله راضي بيج وانتي
بهل الوضع ومااعليج
باهلي ماااعليج
باي احد عليج
بيه ااني وبس
مارديت كمل بنفس،اللهجه
«««هاااي شوفي سكتي احجي اتغزل انتي
ذابتها على الصامت ومااعرف ليش
جاوبته
««،ااريد اروح
«،،روووحي من خرب بيه وبگلبي الي حبج
سد الخط كمت ابجي بشهكه يمامه كعدت شافتني
بهل الوضع كامت تبرطم وبجت
شلتها واخذتها لحظني اريد اهديها
واني اريد الي يهديني
حجيت بقهر
،،،ياربي شاسوي احجيله كلشي راح يتورط
بنسب عارات لا يرفع الراس ولا
ينشد بيهم ظهر
واذا سكتت ماحجيت اله شي هم ماراح
اخلص راح يظل يريدني واني كدامه مزوجه
وعندي بنيه وبس يعرف بيه
بعدني بنيه راح يتخبل
وتبدي اسئلته
وينكشف كلشي وذيج الساعه جيب الي
يخلصني منه
اخر شي كلت خلي احجيله قصتي وهو اذا
يحبني صدك راح يسامحني
ويوكف وياي
واذا رفضني وسمعني كلام يقهر ذيج الساعه
اعرف هو جان يحب جسد مو روح
وحبه طلع كله جذب بجذب
النهار كله ظليت افكر بهل الشي وماكدرت
اكل شي
خاله التهت وي اختها ماانتبهت اليه
واني التهيت بقهري هو بعد لا اتصل ولا راسل
هي ماظلت يمنا ابنها اجاها وحلف الا
ترجع ويا ورجعت بليل
خاله نامت يم ياسين واني
ظليت وحدي بغرفتي اني ويمامه
لا غفت عيوني ولا كدرت اتمدد
صافنه على صوره الي دزهن اليه
بالواتس ودمعتي بعيوني كلها مبتسم والوجه
يضحك اريد اخابره احجي اله
الصار بيه بس كمت اتخيله من يعرف
كلشي راح يتغير بي وينگلب لواحد ثاني
اختنگت ودعيت على ابويه بالموت هو وقويدر ومنيره حتى من صدك اصير يتيمه
وماعندي اهل
منتضر اجه بالي وبدون شعور كتبت رقمه
وخابرته رد
«،،،الو منو وياي
ماجاوبت بس بجيت بسرعه حجه
«،،،يمامه
اسمي عبالك اول مره اسمعه رديت
«،،،اي
««،ولج وينج ووين رحتي
«،،بالگبور السود الي تاخذني حتى اخلص
من اهلك العارات
«،،يمامه بس كولي انتي وين والله اجي
عليج واخذج لاربيل
صفنت من سمعته شحجه سالت
«،،،وانت شسوي باربيل
«،،عوفج مني انتي وينج ووين اخذتي
يمامه وانهزمتي
«،،«ابوك مامات هو واخوك العار وذيج ام
اربع واربعين
سكت بعدين سال
«،،،،بس كولي انتي وين ولج والله تخبلت من
سمعت بيج انهزمتي
««،اني زينة بس انت شعندك باربيل
«،يمامه زينة
««،،اي احجي عاد وفهمني شسوي باربيل
رد بصوت مخنوك
«،،اني هم انهزمت من ابوج الگواد هو وقويدر
«،،،اذوك مو
«،،ياريت ظلت على اذيتهم
«،،ولك شصاير ماتحجي
«،،،شاحجي يمامه والله صار بيه شي استحي
احجي الج
گلبي هبط وجسمي كله كام يرجف
بس كلت
«،،ااحجي شصاير بيك
«،،ولج رحت لابوج كتله هذا وائل ابن نزار
تحارش بيه وماصدك يگلي انت
جذاب وكول اريد ابطل
من الشغل حلفت اله
يمين وماصدگني
سكت بعدين كمل
«،،،،وجبرني هو وقويدر ارجع علي
«،،ااي ورجعت
صحت بي رد
«،،لااا جنت ضام كم فلس يم صديق اخذتهن من عدنه وخابرت ولد جان يشتغل بمحل
يمنا طلع من زمان وكعد
باربيل خابرني
قبل فتره وكال اذا تريد شغل تعال
اني اشغلك ويانا بفرن صمون
ومن صار هالشي گبل
خابرته ورتب اليه
الاقامه وهسه اني كاعد ويا ونشتغل
سوه
«،،ولك خما سوالك شي هذاا الگواد
حجيت بغضب رد
«،،لا يمامه ماخليته ضربته وانهزمت على بيتنا
والصار انتي تعرفي من رجعني
ابويه گبل طلعت لاربيل
قهر السمعته منه خلاني ابجي بصوت
قوي
«،،يمامه لاتبجين والله اني زين ومابيه شي
«،«ولك الموت مااخذ ابوك واخوك العارات
اجه اخذ امي وحنين
«،،اي هو ياخذ الزين ويخلي وين ماكو واحد
عار
سكت بعدين كال
«،،حنين صار شي لازم تعرفي
«،،شصار اكثر من السمعته
جاوبته سكت بعدين رد
«،،من انهزمتي ابويه ماحجه هل الشي لسعيد
الا وره ماعقد عليج
فزيت وكمت لحيلي وحسيت راسي عبالك
انضرب بيده هاون بقوه كلت
بصوت طلع يرجف
«،،،،شنوو شجاي تحجي انت ولك شنو
عقد اليه وااني مو موجودة
«،،هو وكل روحه الج وعقدلج
«،،ولك منتضر لااتخبلين شنو وكل روحه وشلون
واني مو يمكم سعيد شلون قبل واني
مهزومه منه ومنهم
«،،ماگله انتي انهزمتي سوها سكته هو وقويدر
قبضو المهر وسوو روحهم متفاجأين
بيج انتي انهزمتي
«،،ياااربي شنو هالمصيبه
انهاريت بالگاع ابجي بشهكه واضرب
على وجهي اسال بخنگه
«،،،،يعني شنوو اني هسه مره سعيد
«،اي
«،،،ياربي لييش هيج ولكم لييش
«،،يمامه لاتبجين وكولي انتي وين اني اجي
اخذج يمي
«،،ولك رووح من ساعه السوده من خاابرتك
حجت بصوت رايح
سديت الخط وطفيت جهازي تخبلت كمت افتر بالغرفه واضرب بروحي فرفحت واختنگت اريد النفس ماكو وكعت على رگبتي
اريد اصيح صوتي
ماطلع
اريد اعيط اطلع الخنگه الي بصدري ماكو
كمت اسحب النفس مااعرف
اطلعه
شي كتم على گلبي وكلت راح اموت
من حلاه روحي عطت
«،،خاله
ماسمعتني لان باب الغرفه مسدود وخاله
علي بطانيه من البرد زحفت
ليمه ضربته بايد
ترجف
جان حديد وطلع صوت ضربته مره الخ
سمعت صوت بره الباب انفتح
هي طبت شافتني بهل
الحاله عاطت
«،،يمممه حنين شبيج
ماكو صوت بس ارجف واخذ اانفس
بشهكه
«،،ولج يمه شبيج شجاج
حظتني لصدرها وكامت تقره ايات
جسمي كله كام يرجف وينتفض اريد اهدأ
ماكدرت حسيت راسي ثگل
ومااشوف روحي غير
فاقده للوعي
مهيب
مثل كل مره من اطلع من يم اهلي فرحان
والضحكه تارسه وجهي
لان اول مااكعد اصبح بوجه حنين وهالشي
جان مخليني افرح هالفرحه
رحت للدوام اني هناك ولد صاحبي
يشتغل صايغ خابرني وگلي الي وصيتني علي
گملته الك كتله اني امر عليك بعد
شويه واخذها
شفت يمه حلقه ذهب عجبتني كلش
ووصيته يكتب اسمي عليها
اخذتها منه وفرحت بيها كلش كمت اتخيل اني
واكف وهي جدامي واخليها
باصبعها وتصير
اليه للابد
بس هالفرحه طفتها من شفت ترددها بسالفه
زواجنا كمت احس هي ماتحبني مثل مااني احبها
وعبالك جاملتني بذاك اليوم او انقهرت
عليه وكالت اليه اي اني احبك
جنت بس اني اتغزل اني الي فاتح گلبي واحجي
وهي ساكته الكلمه اجرها من حلگها
جر كلت خجل تستحي بس
هي مزوجه يعني لازم
تعرف هيج سوالف
شكد ماحاولت اسهل شغلتنا هي تصعبها
علينا قال وضعي وقال اهلك
احجي واعيد بنفس الحجي
واسمع نفس الكلام
اعرف اهلي ماراح يقبلون بيها لان جانو
يريدون بنيه اليه بس اني
ماجان يهمني اي احد بكثر ماتهمني
هي وجاي اشوفها مو وياي
ولا جاي تساعدني وهالشي
شنو غير هي ماتحبني
مثل مااني احبها
روحي اختنگت كمت ورحت فتحت الشباج
الهوه البارد ضرب وجهي وكفت
يم اسحب نفس الجگاره
واذبه نار من
صدري
جهازي دك كلت هاي هي مادرت بال
فصل ورجعت اتصلت لحت رحت علي
شفتها خاله ام ياسين گلبي
نغزني وبسرعه جاوبت
«،،هاا خاله بيكم شي
عاطت
«،،،ولك يمه الحك عليه حنين ماادري شبيها
تخربطت عليه اريد اكعدها ماتكعد
«،،شنوو شجااي تحجين انتي
وشبيهاا حنين
«،،مااعرف مهيب مااعرف البنيه مااعرف
شبيها صارت خركه بين ايدي
««،جاااي هسه جااي
طلعت من المركز بدون وعي صعدت سيارتي
حركت وطلعت للكاظميه وره مشوار وصلت دكيت الباب بقوه هي اجت فتحته
اليه تبجي طبيت بسرعه
كالت
«،،،بذيج الغرفه
رحت ركض عليها فتت شفتها ممده بالگاع
الوجه اصفر وفاقده الوعي شلتها
لصدري كمت اضرب على
وجهها اردد
«،،حنين ااكعدي ولج يابه ااكعدي
لا فتحت ولا انطت اي حرگه صحت
««،خاله عبايتج بسرعه خلي اخذها للمستشفى
«،،،اي يمه ااي
جابت عبايتها لفيتها وشلتها ورگضت
بيها لبره خاله ماكدرت تجي
ورايه من وره يمامه
وياسين
خليتها ليوره وبسرعه طلعت لاقرب مستشفى
حالي كله تخربط من وراها مااعرف شلون
كمت اسوق ولا شلون وصلت
نزلت شايلها اصيح
«،،اااالحكو عليه
ممرضه اجتي كالت
«،،جيبها لهاي الغرفه
اخذتها وخليتها على سديه دكتوره اجت عليها
هي ونفس الممرضه سالت من
كامت تفحص بيها
«،،،،شبيها البنيه
«،،مااعرف فقدت الوعي على غفله
«،،،جيبي جهاز الضغط بسرعه
وكفت مسافه عنها وگلبي يدك سريع وخايف
عليها فحصت ضغطها والنبض
توترت من طولت بالفحص
صحت
«،لخااطر الله هي شبيها وليش ماكعدت
لحد هسه
«،،شلون تريدها تكعد وضغطها نازل 6/4
ردت عليه وكملت وي الممرضه
«،بسرعه جيب مغذي وشدي الها كانوله
االبنيه طلعت من يمنا هي رفعت السديه لفوك
كالت
«««لازم نرفع رجلها لان ضغطها نازل كلش
«،،،راح تكعد مو
سالت بخوف ردت
«،،،،ان شاء الله
الممرضه رجعت شدت الها كانوله وخلت المغذي
جنت اروح واجي يمها عيوني عليها
متوتر والقلق ذبحني
هو والخوف
هن ظلن يمي والدكتوره ظلت كل ساع
تفحص نبضها سالت
«،،هي شسمها
«،،حنين
كامت تضرب على خدها بهداوه
وتحجي وياها
«،،،حنين اكعدي فتحي عيونج
وره لحظات ونت وفتحت بس رجعت غمضت
نزلت روحي عليها اوخر بشعرها
من وجهها واردد
«،،حنين اكعدي ولج دحگي عليه
فتحت ودحگت عليه كلت بخنكه
«««ليش هيج يابه والله وكعتي گلبي
وحيلي راح
دموعها نزلت ورجعت غمضت الدكتوره كالت
«،،الحمد لله على سلامه مرتك
صفنت عليها من حجت هيج وجاوبت
«،،الله يسلمج
«««خليها تكمل المغذيات يله تطلع لان مثل
ماعرفت ضغطها نازل كلش
«««تمام
«،،،مشوار امر واشوف وضعها
حجت هيج وطلعت من يمي هي والممرضه
دحكت عليها مغمضه ودموعها
تنزل جريت كرسي كعدت يمها گضبت ايدها سحبتها جلبت بيها ونزلت راسي بستها وكلت
«،،اسف والله ماجان قصدي ازعلج مني
ماردت بس شهكت كملت
«،،اش كافي لاتبجين وبعد ماالح عليج
ولا اضغط خليج براحتج شوكت ماگلتي
احجي اني راح افتح الموضوع وي
اهلي
ظلت تبجي كلت
««««ولج والله من قهري حجيت انتي ماتعرفين
اني شكثر احبج ماتعرفين انتي
شنو صرتي اليه
دارت وجهها ودحگت عليه بعيون كلها
دموع كملت
««انتي صرتي گلبي الي يدك جوة صدري وروحي
وشكو شي حلو بحياتي
غمضت دموعها تنزل على خدها كمت مسحتهن
بأيدي فتحت عيوني صارت بعيونها
ضعت بيهن ودخت كلت
هايم بيها بكل
تفاصيلها
«،،جنت ضايع ولگيت روحي بهل العيون
وماتعرفين اني من فرحتي بيج شسويت
وشجبت الج
صفنت عليه ابتسمت وكلت
«،،هسه اروح اجيبلج شي راح يفرح گلبج
طلعت من يمها خابرت ولد وياي بالدوام كتله
صار عندي ظرف اوكف بمكاني
رحت لسيارتي اخذت من الجكمجه العلبه ورجعت عليها طبيت للغرفه ساحبه روحها وكاعده
رحت يمها كلت
«،،،،شوفي شنو الي اشتريته وحضرته
لزواجنا
فتحت العلبه صفنت على الحلقه بعدين
عليه كلت مبتسم
«،،حلوه موو
هزت راسها بس القهر جان تارس ملامحها
دموعها تنزل وتمسحها طلعت الحلقه
كلت
«،،،بله خلي اشوفها باصبعج
ترددت بعدين انطتني ايدها خليتها
باصبعها اجت عليها فرحت وكلت
«،،،ذبيتها عميه طلعت مفتحه
سحبت ايدها خلتها بحظنها
«،،،،تعرفين شكتبت بيها
دحگت عليه كملت
«،،،كتبت اسمي بحلقتج
«،،،اااني
حجت قاطعتها وكلت
««،اعرف وكتلج راح اخليج براحتج ماراح اضغط
عليج كافي عليه اشوفج كل يوم
واحجي وياج كل ليله
خلت عيونها بعيوني ابتسمت وكلت
««،ويارب اشوف حلقتج بايدي واشوفج بثوب
العرس الابيض
غمضت وحسيت بيها تعبت كلت
«،تمددي وارتاحي
تمددت اشوف دموعها تنزل من عيونها
وره مشوار غفت الدكتوره اجت
فحصتها هي نايمه
كالت
«،،وضعها هس احسن وضغطها كام يصعد للطبيعي
بس خليها للصبح وبعدين اطلعوا
«،،،تمام
طلعت من يمي ظليت وحدي يمها قربت
الكرسي ليمها گضبت ايدها
ادحك للحلقه ومبتسم
الصبح ساعه سبعه طلعت اني وياها امشي بصفها
خايفه عليها كلش رادت تصعد ليوره
كلت مبتسم
«،،تعالي يمي حتى تكمل فرحتي بهل اليوم
ماحجت شي اجت كعدت يمي صعدت
هي ساكته ومنزله راسها كلت
«،،تعرفين تلوك الج العبايه كلش
رفعت راسها دحگت عليه جان ضوه الشمس
على جهتها گلبي كام يدك بجنون واخذت نظر
عيوني من شفت العيون صارت تخبل
هي والخلقه
جهازي دك وطلعني من لحظه الضياع الي عشته
بهل اللحظه الحلوه تنهدت طلعته من جيبي
جانت خاله ام ياسين رديت
من حرگت
«،،،هلا خاله اي جايين لا زينه والحمد لله
لا تونا طلعنا اي لايظل بالج
تمام الله وياج
سديت الخط شفتها غمضت كلت
«،،من ترجعين اكلي شي مالح وتمددي لاتعبين روحج
«،،،اي
جان كلشي مختلف بيها شكلها صوتها كلت
هالشي من وره الصار بينا لان اني
قسيت عليها بالكلام وصار
بيها هذا الهبوط واثر
عليها
وصلنا لبيت مشيت وياها دكيت الباب
خاله طلعت سالت بخوف
من طبينا
«،«ها يمه شلونج هسه
«،«زينة
ردت بخنكه وراحت لغرفتها كلت
«،خاله اني رايح للبيت انتي ظلي يمها راح
اكول لامي ماتكدرين تجين اليوم
«،اي يمه خلي تعذرني بهل اليوم لان انت شفت
شصار بيها وخلفه عليك من اجيت
بهل الليله واخذتها للمستشفى
«،،مو غريب عني عنكم حتى تحجين هيج
انتو اهلنا وهي
سكتت ودحگت للغرفتها كملت
«،،ديربالج عليها واي شي يصير خابرني
«،،ان شاء الله مايصير شي
«،«ان شاء الله اني رايح محتاجه شي
«،،ليش يمه ظل يمنا وتريك
«،«مااكدر والله لان تعبت واريد اروح
اتمدد شويه
«،،براحتك يمه
«،اني رايح
«،،الله وياك
يمامه
نايمه بالفراش مو مصدكه لحد هاي اللحظه الي
سمعته من اخويه
شنو ابويه عقد اليه على سعيد وشلون
صار هالشي واني مو موجوده
بس جنت اعرف من ورة الفلوس
يسوي اي شي ماخلانا اني واختي نفتر بالشوارع
نشحذ ونمد ايدينا للناس
ماراد يشغلنا يم ابو جون حتى نرگص
بالملاهي مالته والي اطب هناك حتى شرف مايظل
عدها وجان يقبل بهل الشي هو وقويدر
لان هم بلا شرف
ولا عندهم ذره غيره عليه اني واختي
دمعتي نزلت وكلت بشهكه
«،،ياارب ليش اخذت امي واختي وعفت ذوله
الظلام جان ااخذتهم الهم وعفتلي
الحنينات
شنو ذنبي اني حتى يصير بيه هيج
وشلون راح احجي وشراح اگله
لمهيب واني طلعت
مزوجه من
صدك
بجيت بخنگه عيوني على حلقته بايدي
اشوفه شلون فرحان بيها وبيه
روحي انمردت
وگلبي كام يوجعني
ردت اموت حتى اخلص من اهلي وقهرهم
بس ماكدرت من وره هالامانه الي
برگبتي
جانت يمي تلعب بالخرخاشه
باوعت عليه برطمت تريد تبجي كلت
«،،،،اش ماما اني مابيه شي
بس اني مو زينة وجاي امووت لا كدرت اكل
ولا شربت حتى مي خاله توسلت
بيه اخلي شي بحلگي
ماكدرت
عبالها مريضه ومااكدر اكل شي كالت مهيب
اتصل يسال عليج هو والحجيه وجايين
بعد ساعه علينا ذكرت اني طفيت جهازي من حجيت وي منتضر وسمعت منه هالخبر الاسود
من طلعت كمت دورت علي شفته يم الميز كمت اخذته فتحته شفته متصل عليه هوايه
وداز رسايل
قريت بعيون تبجي
«،،،هلو حنين شلون صرتي مو احسن
«،،والله ماكدرت انام ظل بالي عليج
«،،يولي وينج جاوبي تره كاعد بالغرفه
والوب اريد بس اسمع صوتج
اخر شي كاتب
«،،،،اني جاي وياي امي وابويه لان ظل بالهم
عليج واجوي يريدون يشوفج
شفته الساعه دازها بالعشره ونص وهسه صارت
ب 11وعشرين دقيقه كلت راح يوصلون بعد شويه
رجعت كعدت يم يمامه شفت اللفاف يم المخده
اخذته شميت عطره ابجي بخنگه سمعت الباب اندك كلت وصلو خليته بجيبي
ولبست الشال
كمت فزيت وگلبي هبط من سمعت صوت صااح
«،،،ووولج يمامه وينج
جان صوت ابويه رحت بسرعه شلت
يمامه وحظنتها لصدري سمعت
خاله كامت تصيح
«،،هاااي وين طاب اارجع
ردت انهزم بس منين اطلع الباب انضرب
بقوه يمامه عاطت طب هو وقويدر
وسعيد من شافوني خزروني بحقد
خاله طبت ووكفت بوجههم
صاحت بيهم
«،،انتوو شتريدون من عدنا وشلون اطبون
علينا هيج
«،،نررريد بنتنا
ابويه صاح بيها ودفعها من كدامه هد
علي جرني من شعري يصيح
«،،كلبه بنت الگلب ااني تنهزمين مني ااني
ولج تخليني مضحكه للرايح والجاي
كمت ادفع بي واعيط يمامه فرفحت
بأيدي سعيد جرها من عندي واخذها
خاله طلعت تعيط
قويدر كام يضرب بيه من شافني،كمت
ادفع بابويه جروني من
شعري للحوش
«،،،ووولك
سمعت صيحه مهيب طب يركض ضرب
ابويه بوكس شمره بالگاع ولزم قويدر لوى
ايده وره ضهره وضربه جلاق
شمره يمه
ابو صادق طب هو ورجال من المنطقه لزمو
قويدر وابويه من هدو علي
ابوه لزمه هو وامه صاح بيهم
«،،حركه وحده منكم وهسه اشيلكم كلكم
«،،وانت منو حتى تحجي هيج
«،،،اااني النقيب مهيب واشتغل بالشرطه
ابويه سكت قويدر وكف بمكانه
بعد ماجان يهد علي
بس ظل يخزر
بي
ابويه حجه
«،،هاااي بنتي وشارده من عدنا ومن عند رجلها
صارت صنطه مهيب باوع عليه سال
«،،هذا شكاعد يحجي
سكتت بس ابجي بشهكه قويدر صاح بي
«،،الي سمعته هاي اختي وشردت من عدنا
وهذا رجلها واساله
اشر على سعيد الكل صفن عليه مذهول
هو قرب مني مصدوم وفاك
عيونه سال بصوت
مخنوك
«،،حنين صدك هالحجي
«،ياحنين هااي اسمها يمامه
سعيد حجه عمو سال مصدوم
«،،،،،بنتي احجي كولي هالكلام صحيح
عيوني جانت على مهيب صافن عليه والوجه
انطعن والغضب ترس ملامحه
سال
«،،منوو يكول كلامكم صدك
«،،،ااسالها الها
ابويه رد علي صاح بيه
«،،ووولج ااحجي كولي هالكلام صحيح
نزلت راسي وكمت ابجي بقوه
«،،،،لااا ولج لااااا
ردد هالكلام ورجع ليوره اندار يباوع عليهم
صاح
«،،،،ولكم لاااتخبلوني شنو اسمها يمامه
ومنو يكول كلامكم صدك
«،،،،هااي هويتها وهذا عقد زواجها
ابويه طلع اله هويه
اخذها منه هي والعقد شفت ايده كامت ترجف
باوع لسعيد ساله
«،،،،انت رجلها
«،،،اي وهاي بنتي
«،،هوويتك
نتر بي باعصاب انطه الهويه الوجه
صار دم
«،،،لج يمه صدك هالحجي
امه سالتني خاله اجت عليه كالت
«،،حنين ذوله اهلج ولج احجي كولي شي
هو سال
«،،ولج طلعتي مو ارمله وهذاا رجلج بعده طيب
و اسمج يمامه مو حنين
سكتت صااح بخبال
«،،،ووولج ااحجي اانطقي
شاحجي كلشي انكشف واني انتهيت وانتهت قصتي اني ويا من باوع عليه وخزرني خزره موت لم العقد والهويات بايده بقوه وشفته كام يرجف من غضبه شمرهن واجه عليه بسرعه وضربني
راشدي من قوته انشمرت بالگاع
«،،لااا مهيب
عمو اجه لزمه نفضه وسحب مسدسه من وراه
ووجهه عليه
شكرا لزيارتكم عالم روايات سكيرهوم
